\id 1TH - Ese Ejja NT -Bolivia 2012 (DBL -2013) 
\h 1 TESANONISESE 
\toc1 Paboja Etehueꞌyo Tesanonica Cuiñajjijo Baꞌe Yasijje Ebionei 
\toc2 1 Tesanonisese 
\toc3 1 Te 
\mt2 PABOJA ETEHUEꞌYO TESANONICA CUIÑAJJIJO BAꞌE YASIJJE EBIONEI 
\mt1 1 TESALONICENSES 
\c 1  
\s1 Pabohua esohui tehue canaje Jesosaja epeejji cuana Tesanonica cuiñajjijo baꞌe yasijje 
\p  
\v 1 Eya Pabo. Sinasi, Timoteo peaꞌai enijje nequi. Jiquio esohui ecuaaya tehueaña miquiana huasijje, ma Jesosaja epeejji nei cuana Tesanonica cuiñajjijo baꞌe yasijje. Miquianaya Eyacuiñajji eseja Chii ai nijje jjapeequiani, Jesosa Quito esejaya Emeshi Mese nei nijje jjapeequiani peaꞌai. ¡Eyacuiñajjiya, Jesosa Quitohua peaꞌai miquianaya quea pame nee cajaahuana cahua! ¡Quea bei capo mee cahua peaꞌai! 
\s1 Jesosaja epeejji cuana quea pame nee baꞌyani 
\p  
\v 2 Eyacuiñajji nijje mimianijo ecuaaya oya bihuiaña miquianajo. Eꞌe, ecuana Eyacuiñajji nijje mimi huichaꞌa huichaꞌani miquianajo jama baꞌa:  
\v 3 —Eyacuiñajji, ecuanaja Chii ai, Jesosaja epeejji Tesanonicajo baꞌeca minijje jjapeequiani cuana quea pame nee nee. Miya ojaya quea boti nee nee; minijje quea pame nee chaco cani tii. Oya cuana Jesosa Quito nijje, ecuanaja Emeshi Mese nei nijje jjapee tiitiiquiani quea pame nee. Eꞌe, jjashahuabaquiani jama baꞌa: “Jesosaa ecuana baꞌe tiitii mee cajeꞌyo onijje eyajo” —jamaya ecuana mimiani Eyacuiñajji nijje miquianajo. 
\p  
\v 4 Epeejji cuana, miquianaya Eyacuiñajjija quea jea nee nee. Ohuaya miquianaya babaca majje iyaa canaje ojaya epeejji epo tiitiiꞌyojji. Jamaya ecuanajaya eba.  
\v 5 Eꞌe, ecuaaya Eyacuiñajjija esohui quea pame nee Jesosaja huohuinaje miquianajaya eshajjaꞌajjajji. Edojjoshahua Pameya ecuanaya sohuihuohui meesahua canaje quea jaꞌa nee nee; miquianaya ba mee canaje Eyacuiñajjija esohui eꞌe nei, dejjaja esohui pojjeama. Ecuana quea pame nee baꞌenaje miquiana nijje. Jamajjeya ecuanaya miquiaaya banaje quea pame nee baꞌe. Jamajjeya miquianaya baꞌenaje quea pame nee ecuana jayojjaya.  
\v 6 Eꞌe, miquianaya ecuana jayojjaya baꞌenaje quea pame nee nee; esejaya Emeshi Mese nei jayojja jama peaꞌai baꞌenaje. Jamajjeya pea cuaa miquianaya cuia canaje Jesosa nijje jjapee neineiquianijojo. Jamatii miquianaaya quea bihui neeya Jesosaja esohui shajjaꞌajjanaje; Edojjoshahua Pameya miquianaya quea bihui nee po mee canaje.  
\v 7 Eꞌe, miquianaya quea jaꞌa nee jjapeequinaje Jesosa nijje. Jamajjeya ojjaña Jesosaja epeejji cuana Masenonia meshijo baꞌeca cuana, Acaya meshijo baꞌeca peaꞌai miquiana ba majje quea jaꞌa nee jjapeequi sa poani Jesosa nijje miquiana jayojjaya.  
\v 8 Miquianajaya esohui Emeshi Mese neijo, Jesosajo ojjaña Jesosaja epeejji cuaa shajjaꞌajja canaje. Eꞌe, Masenonia meshijo baꞌeca cuaa, Acaya meshijo baꞌeca cuaa peaꞌai shajjaꞌajja canaje. Ojjañaa ba canaje miquianaya Jesosaja epeejji quea jaꞌa nee poani. Ojjaña cuaa quea huiso meshijo baꞌeya peaꞌai ba canaje miquianaya Eyacuiñajjija esohui jayojja jama po tiitiiani quea pame nee. Eꞌe, ojjaña cuaa ojjaña meshi cuanajo baꞌeya miquianajo shajjaꞌajja canaje. Jamajjeya ecuaaya oya cuana huohui oꞌoya jjima aña.  
\v 9 Onaaya ca ca ecuana huohui cani miquianajo jama baꞌa: —Jesosaja epeejji cuana Tesanonicajo baꞌe Paboja esohui Jesosajo ebionei shajjaꞌajja jeahua jjashajjaꞌajjaquinaje quea bihui nee. Jesosaja epeejji cuana poanaje. Eyacuiñajji nisho, meshi epanaꞌyo cuana bihuia pajea caꞌyonaje. Jjeya nei ca ca oya cuana Eyacuiñajji eꞌe nei nijje jjapeequiani. Eꞌe, Eyacuiñajji ca ca oe nei yani tii tii, eshe.  
\v 10 Ohuaya Eyacuiñajjija Bacua Ejja oe nei Jesosaja epoe oꞌoyajji ishoaꞌajja cani —jamaya ojjaña miquianajo poani. 
\p Eꞌe, Eyacuiñajjija Bacua Ejja Jesosa manoꞌyajo, Eyacuiñajjiya oya baꞌe mee ca oꞌoyanaje. Jjeya ohuaya, Jesosaa esejaya mimishi cuana cuijea ca poquipoquiꞌyani. Jamajjeya quijje Eyacuiñajjiya eseya sosequia cajeꞌyo jiquio meshijo baꞌya poa sosejjeya; ohuaya eseya quea nee nee epo meeꞌyojji pojjeama shajjamaꞌ cuana nijje. 
\c 2  
\s1 Pabo chacochacoa poa Tesanonica meshijo 
\p  
\v 1 Yahuajo ecuaaya Jesosaja esohui huohuinaje; miquianaya shajjamaꞌ pojjeama poa. Chojja, shajjaꞌajja neinei nequiaa poa. Miquianajaya jama eba peaꞌai baꞌa:  
\v 2 Miquiana baa Tesanonica huasijje poqui jjimahua ecuana cuia canaje Jodio cuaa Pinipo cuiñajjijo baꞌeca cuaa. Ecuana nijje mimijajinaje peaꞌai. Pea cuaa ecuana cuia canaje Jesosaja esohui huohui mee ajjaa jjejojo; jamatii Eyacuiñajjiya ecuana ojaya esohui quea pame nee Jesosa Quitojo huohui meesahua canaje miquiana huasijje meteꞌama, miquianajaya eshajjaꞌajjajji. 
\p  
\v 3 Eꞌe, miquiana huasijje sohuihuohuiañajo ecuanajaya ejjashahuabaquijji quea jaꞌa nee poanaje. Ecuanajaya esohui siajje pojjeama. Miquiana dasia sa poꞌyo ajja peaꞌai.  
\v 4 Chojja. Eyacuiñajjija eba ecuanaya siajjepojji pojjeama. Jamajjeya ohuaya ecuana huoojea canaje Jesosaja esohui quea pame nee huohuiya. Eyacuiñajjija ejjashahuabaquijji jayojja jama huohuiaña ecuaaya. Eyacuiñajjija eba nei nei ecuanajaya ejjashahuabaquijji ojaya ejjashahuabaquijji jayojja jama poani tii. Ecuaaya oya quea bihui nee po mee sa aña ecuana nijje. Eꞌe pojjaꞌa pea cuana quea bihui pojjeama ecuanaja huohuiꞌyojo. Jamatii ecuana jjashahuabaquiani jama baꞌa: —Ecuaaya esohui huohuiaña pea cuanaja ejjashahuabaquijji jayojja jama pojjeama, pea cuana enijje quea bihui epojji pojjeama —chojja, Eyacuiñajji quea bihui nee po mee sa aña ecuana nijje.  
\v 5 Miquianajaya ecuana eba. Esohui quea bihui nisho mimi jjima miquiana nijje miquiana dasiajji, aquiana sosemaꞌ edojojji peaꞌai. Chojja, Eyacuiñajjija eba ecuanajaya ejjashahuabaquijji quea pame nee.  
\v 6 Jjashahuabaqui ajja jama baꞌa: —Ecuanaja esohui quea pame nee shajjaꞌajja majje ecuana cabihuia cahua cuaa; aquiana caquia cahua peaꞌai —chojja, ecuana jjashahuabaqui ajja pea cuanaja ebihuiajji. 
\p  
\v 7 Ecuana Jesosa Quitoja huoojeaꞌyo ojaya esohui huohuijji. Jamajjeya miquianajaya aquiana sosemaꞌ jjesheme esohui huohuinaje sosejje. Jamatii aquiana cuana ecuanajaya jjeshe jjima poanaje. Chojja, miquiana nijje quea bei baꞌenaje. Jiquio ecua enaeseya oja bacua cuana jaahuana cani, quea jea nee acani jayojjaya jama ecuaaya miquianaya anaje.  
\v 8 Miquianaya ecuanajaya quea boti nee nee poanijo Eyacuiñajjija esohui quea pame nee nee Jesosaja huohuinaje miquiana huasijje. Pea cuaa ecuana cuia ca chanaꞌ Jesosaja esohui ehuohui poaje jjejojo. Jamatii miquianaya ecuanajaya quea jea nee nee poanijo esohui huohui tiitiinaje.  
\v 9 Eꞌe, miquianajaya eba miquiana nijje nequianijo ecuaaya janobajjima nei chaco tiitiinaje ebaꞌejji sosejje. Eyacuiñajjija esohui quea pame nee Jesosaja huohuiañajo chaco tiitiinaje epojjajo, mecajje peaꞌai. Jamaya anaje ecuaaya. Jamajjeya miquianajaya ecuana ebaꞌejji quia jjima poanaje. Eyacuiñajjija esohui huohuinaje sosemaꞌ miquianajaya eshajjaꞌajjajji. 
\p  
\v 10 Ecuana miquiana nijje baꞌenaje quea bei nee, mimishiꞌama, quea pame nee, dejja taiꞌama. Jamaya miquianajaya eba. Jamaya Eyacuiñajjija eba peaꞌai. Jamajjeya ¿yajjajo pea cuaa ecuana niñeba cani soꞌo quea dejja tai poanaje miame?  
\v 11 Eꞌe, echii meseya oja bacua cuana cuiña cani quea pame nee jayojjaya jama ecuaaya miquianaya anaje. Jamaya miquianajaya eba peaꞌai. 
\p  
\v 12 Ecuaaya miquianaya huohui majamajanaje jama baꞌa: —¡Quea bihui nee Jesosa Quito nijje jjapeequicue! ¡Aꞌa quea yeno pojji onaa miya quea mimishi acajje! Eyacuiñajji oe nei quea jaꞌa nee nee, quea caꞌa nee nee poani tii tii. Oya oe nei ojjaña huoojeaꞌyojji poani. Ohuaya miquianaya babaca canaje onijje ebaꞌe tiitiiꞌyojji eyajo. Jamajjeya ¡ojaya esohui jayojja jama baꞌe tiitiicue Eyacuiñajji miquiana nijje quea bihui nee epojji! 
\p  
\v 13 Ecuaaya Eyacuiñajji bihuiaña miquianajo jama baꞌa: —Eyacuiñajji, eyaya miya bihuiaña Jesosaja epeejji cuana Tesanonicajo baꞌe quea pame nee poani yasijje. Eꞌe, miyaya miquea esohui huohui meesahuañajo, onaaya shajjaꞌajja canaje. Quea bihui nee poanaje. Quea jaꞌa jjashahuabaquinaje jama baꞌa: “Eꞌe jojo nei Pabohua ojaya esohui pojjeama huohui cani; Eyacuiñajjija esohui quea pame ca ca huohui cani” poanaje cuana —jamaya ecuaaya Eyacuiñajji bihuia huichaꞌa huichaꞌaña miquianajo. 
\p Eꞌe epeejji cuana, Jesosa nijje jjapeequianijo, Eyacuiñajjiya miquianaya baꞌe meesahua cani quea pame nee ojaya esohui eꞌe nei jayojjaya. 
\p  
\v 14 Yahuajo Jesosaja peejji cuana Jodio meshijo baꞌe onijje, Jesosa Quito nijje jjapeequianijo, pea Jodio cuaa, oja huapa pojjeama cuaa oya cuana cuia ca poa quea huiso nee. Oya jayojjaya jjeya miquianaya Jesosa nijje jjapeequianijo, miquianajaya huapa pojjeama cuaa miquianaya cuia cani peaꞌai.  
\v 15 Eꞌe, yahuajo nei nei Jodio cuaa Eyacuiñajjija esohui huohuijji cuana cuiajea caꞌya poa. Majoya esejaya Emeshi Mese nei Jesosa quecua mee caꞌya poa peaꞌai. Jjeya eseya cuia cani peaꞌai, Jodio cuaa. Shajjamaa po tiitiiya jjejojo Jodio cuaa Eyacuiñajji quea quene po tiitii mee capoquiani. Jodio cuaa aje oe ojjaña dejja cuana quea tai acani.  
\v 16 Eꞌe, ecuaaya Jodio pojjeama cuana huasijje Eyacuiñajjija esohui quea pame nee Jesosajo huohuiaña. Jodio pojjeama cuana Jesosa nijje jjapeequi mee sa aña onijje eyajo ebaꞌe tiitii meeꞌyojji quea pame nee. Jamatii Jodio cuaa aje oe ecuana Jesosaja esohui huohui pajea meeꞌyo sa acani tii. Jamaya oya cuana, Jodio cuana quea mimishi nee nee po tiitiiani. Jamajojoya aje jja oe Eyacuiñajji quea quene nee poani Jodio cuana nijje. Quea yeno nee nee po tiitii mee cani Jodio cuana. 
\s1 Pabo poqui oꞌoya sa poanaje Tesanonica huasijje 
\p  
\v 17 Epeejji cuana, yahuajo ecuana miquiana nijje nequijo, Jodio cuana ecuana nijje quea quene nee nee poanaje. Jamajjeya miquiana nijje nequi tiitii jjima poanaje. Jamatii miquianaya ecuanajaya pajeaꞌyo jjima. Chojja, miquianajo jjashahuabaquiani tii. Poqui oꞌoya sa neinei poanaje miquiana baa. Mi poqui mee ca oꞌoyajje ecuana quea yeno nee poanaje.  
\v 18 Eꞌe jojo nei ecuana poqui oꞌoya sa poanaje miquiana huasijje. Eꞌe eya, Pabo poqui huichaꞌa huichaꞌaꞌajjanaje. Jamatii Edosiquiana neiya eya poqui mee jjima acanaje.  
\v 19 Eꞌe jojo nei miquianaya Jesosaja epeejji poanijo, ecuana quea bihui nee nee poani. Jamajjeya esejaya Emeshi Mese nei Jesosa Quito poe oꞌoyajo, miquiana onijje nequiꞌyajo, ecuana quea bihui nee poajeꞌyo. Eꞌe, jiquio ecua se chacochacoajo sosequia cajje eseya quea bihui nee poani jayojja jama ecuana quea bihui nee nee poaje miquiana Jesosa nijje nequi ba majje.  
\v 20 Eꞌe, miquianaya quea pame nee Jesosa nijje jjapeequianijo, ecuaaya Eyacuiñajji bihuiaña. Quea jaji nee poani peaꞌai miquianajo. 
\c 3  
\s1 Pabohua Timoteo huoojea canaje Tesanonicajo baꞌeca cuana baꞌajjaꞌyohua 
\p  
\v 1 Jamajjeya miquianajo quea yeno jjashahuaba tiitiiqui majje eya jama poanaje baꞌa: —Eꞌe, eya ee nei Atena cuiñajjijo nequije. Timoteo, ¡miya poquicue Jesosaja epeejji cuana Tesanonicajo baꞌe baa! —eya poanaje. 
\p  
\v 2 Majoya eyaya esejaya epeejji nei Timoteo huoojeanaje miquiana baa. Timoteohua ecuana nijjeya Eyacuiñajjija esohui quea pame nee Jesosaja huohui tiitii cani. Eyaya oya huohuinaje jama baꞌa: —Timoteo, ¡Jesosaja epeejji cuana quea jaꞌa nee, quea pame nee jjapeequi meesahuacue Jesosa nijje! ¡Oya cuana Jesosaja esohui jayojja jama atiitii meesahuacue quea bihui nee!  
\v 3 Jamajjeya onaaya oya cuana cuia canijo, Jesosa nijje jjapeepajeaquiꞌyo ajja —jamaya eyaya Timoteo huohuinaje miquiana que huoojea jjimahuaa. 
\p Jamatii miquianajaya eba pea cuaa Jesosaja epeejji cuana cuia cajeꞌyo. Eyacuiñajjija eba eseya ojaya epeejji cuana quea jaꞌa poaje onaa cuia cajje. Jamajjeya cuia pajea mee jjima acani.  
\v 4 Eꞌe, yahuajo miquiana nijje nequiya ecuaaya huohuinaje jama baꞌa: —Jesosaja epeejji poanijo pea cuaa eseya cuia caje. 
\p Eꞌe jojo nei. Jjeya pea cuaa miquianaya cuia cani. Jamaya miquianajaya eba.  
\v 5 Jamajjeya eya quea mete miquianajo poanaje. Timoteo huoojeanaje miquiana baa: —¡Aꞌa Jesosa nijje jjapeequiani tii baꞌajjaquiꞌyo socue, Timoteo! —eya poanaje. 
\p Eꞌe, eya quea mete miquianajo poanaje. Eꞌe pojjaꞌa Edosiquiana neiya miquianaya Jesosa nijje jjapeequi pajea mee caꞌyonaje. Jamaya epoꞌyo jojjemo, miquianajaya Eyacuiñajjija esohui epajeaꞌyo jojjemo ecuana quea yeno pome; esohui huohuijeajji pojjaꞌa eyaya sohuihuohuijea nequinaje. 
\p  
\v 6 Eꞌe de, miquiana ba majje jjeya nei Timoteo poe oꞌoyanaje e que. Ohuaya huohui cañaꞌyonaje jama baꞌa: —Jesosaja epeejji cuana Tesanonicajo baꞌe Jesosa nijje jjapeequiani tii; pajeaꞌyo jjima. Eyacuiñajjija esohui jayojja jama po tiitiiani; pea cuana quea jea nee acani. Eya peaꞌai ohuaya quea jea nee acajjequinaje. Oya cuana ecuanajo jjashahuaba tiitiiquiani quea pame nee. Jiquio ecua ecuanaya jjashahuabaquinaje o baquijji jamaya oya cuana jjashahuabaquiani ecuana bahuajji —jamaya eya Timoteohua huohui cañaꞌyonaje miquianajo. 
\p  
\v 7 Jamajjeya ma shajjaꞌajja majje ecuana quea bihui nee poanaje. Eꞌe de, ecuana aemaꞌ poani Jesosa nijje jjapeequianijo. Pea cuaa ecuana cuia cani peaꞌai. Jamatii miquianaya ecuana quea bihui nee po meeaña. Eꞌe, miquianaya Jesosa Quitoja esohui jayojja jama poanijo tii miquianaaya ecuana quea bihui nee nee po meeaña.  
\v 8 Eꞌe de, miquianaaya esejaya Emeshi Mese neija esohui jayojja jama atiitiiañajo, ecuana quea bihui nee, quea bei nee peaꞌai poani.  
\v 9 Eꞌe jojo nei jjeya miquianajo ecuaaya Eyacuiñajji bihuia neineiaña. Eyacuiñajjiya ecuana quea bihui nee po mee cani miquianaya quea pame nee onijje jjapeequianijo. 
\p  
\v 10 Jamajjeya ecuana onijje mimi tiitiiani jama baꞌa: —Eyacuiñajji, ¡ecuana poqui meesahua oꞌoyacue ecuanaja epeejji cuana baa! ¡Ojjaña miquea esohui huohui meesahua oꞌoyacue onajaya eshajjaꞌajjajji, quea pame nee minijje ejjapeequiꞌyojji! —jamaya ecuana Eyacuiñajji nijje mimiani ojjaña pojjajo, ojjaña mecajje peaꞌai. 
\p  
\v 11 Ecuana onijje mimi neineiani jama peaꞌai baꞌa: —Eyacuiñajji, ecuanaja Chii ai, Emeshi Mese nei Jesosa peaꞌai, ¡che ecuana poqui meesahuacue Tesanonica huasijje miquea epeejji cuana baa!  
\v 12 Eꞌe Emeshi Mese nei, ¡miquea epeejji cuaa Tesanonicajo baꞌe cuaa pea miquea epeejji cuana quea jea nee nee ameesahuacue! ¡Ojjaña cuana peaꞌai quea jea nee ameesahuacue! ¡Ecuaa oya cuana quea jea nee nee aña jayojjaya jama oya cuana pea cuana quea jea nee ameeshahuacue peaꞌai!  
\v 13 Eꞌe Eyacuiñajji, ecuanaja Chii ai, ¡oya cuana Jesosaja epeejji cuana quea jaꞌa nee po meesahuacue quea boejea, mimishiꞌama ebaꞌeꞌyojji! Jamajjeya ecuanaja Emeshi Mese nei Jesosaa ojjaña ojaya esohuidojojji cuana nijje poe oꞌoya majje oya cuana mi cojja nei nequi mee cajeꞌyo quea boejea, bichoꞌama. Eꞌe, ¡jamaya acue Eyacuiñajji! —jamajjeya eya Eyacuiñajji nijje mimi tiitiiani miquiana huasijje. 
\c 4  
\s1 ¡Quea pame nee baꞌecue Eyacuiñajji minijje quea bihui epojji! 
\p  
\v 1 Jamajjeya epeejji cuana, eyaya pea esohui tehueje miquianajaya ebajji. Yahuajo ecuaaya miquianaya huohuinaje quea pame nee ebaꞌejji. Ma ecuanajaya esohui jayojja jama baꞌyanijo, Eyacuiñajji quea bihui nee poani miquiana nijje. Jamaya miquianaya baꞌenaje. Jjeya esejaya Emeshi Mese neiya, Jesosa Quitohua ecuana ma esohui tehue mee ca oꞌoyani miquiana huasijje quea pame tii ebaꞌe poquijji.  
\v 2 Yahuajo esejaya Emeshi Mese neiya, Jesosaa ecuana huoojea canaje miquiana sohuihuohuiya. Ma esohui miquianajaya eba.  
\v 3 Eyacuiñajjija ejjashahuabaquijji miquianajaya ebaꞌeꞌyojji jama baꞌa: —¡Quea pame nee baꞌecue, mimishiꞌama nei nei! ¡Aꞌa onajaya ehuanase siijji! ¡Aꞌa peaja yahue siijji! ¡Aꞌa pea cojjojji pojji!  
\v 4 Dejja cuana, ¡miquianaya eponajo jjahuanaqui sa poanijo quea jaꞌa nee jjashahuabaquicue! ¡Eyacuiñajjija esohui jayojja jama epona huanacue quea pame nee!  
\v 5 ¡Aꞌa quea mimishi jjashahuabaquijji Eyacuiñajjija epeejji pojjeama cuana jayojja! Oya cuana aje oe pea epona cuana nijje jaani; ojaya ehuanase jaahuana jjima acani.  
\v 6 Onajaya ehuanase sii canijo, eꞌe jojo nei Eyacuiñajjiya dejja cuana quea nee nee po mee cajeꞌyo. Jamajjeya miquianaaya ca ca ¡aꞌa onajaya ehuanase siijji! ¡Aꞌa jea bajji peaꞌai! —jamaya Eyacuiñajji jjashahuabaquiani ojaya epeejji cuanajo. Jamaya yahuajo ecuaaya miquianaya huohuinaje. 
\p  
\v 7 Eꞌe, Eyacuiñajjiya eseya iyaa majje huohui canaje jama baꞌa: —¡Ecuea epeejji cuana po majje ecuea esohui jayojja jama baꞌecue quea pame nee nee! ¡Aꞌa oe quea mimishi pojji! ¡Aꞌa oe quea mimishi baꞌejji! 
\p  
\v 8 Jiquio esohui cuana Eyacuiñajjija esohui, de; dejjaja esohui pojjeama. Jamajjeya ojjaña joya jiquio esohui cuana jayojja jama baꞌe sa poꞌyo ajja Eyacuiñajji nijje jjapeequi sa poꞌyo ajja; Eyacuiñajji cajaa aꞌyojji poani. Eyacuiñajjiya ca ca oe ese yasijje ojaya Edojjoshahua Pame huoojea caꞌyonaje quea pame nee ebaꞌe meesahuaꞌyojji. 
\p  
\v 9 Miquianaaya Jesosaja pea epeejji cuana quea jea nee añajo, eyaya miquiana que esohui etehue oꞌoyajji pojjeama ca comajo. Eꞌe, Eyacuiñajjiya miquianaya jjabahuejja meequi canaje ojjaña ojaya epeejji cuana quea jea nee eꞌajji.  
\v 10 Eꞌe jojo nei miquianaaya jamaya aña; Jesosaja epeejji cuana ojjaña Masenonia meshijo baꞌe cuana quea jea nee aña. Eꞌe, Eyacuiñajjija esohui jayojja jama aña miquiaaya. Epeejji cuana, ¡Jesosaja epeejji oe quea jea nee nee atiitiicue! Jamaya ecuaaya miquianaya huohui neineiaña. 
\p  
\v 11 Yahuajo ecuaaya miquianaya sohuihuohuinaje jama baꞌa: —¡Quea bei baꞌe tiitiicue! ¡Aꞌa jjachichaquijji pea cuana miminaanaa ani yasijje! ¡Miquea bobijo, daquijo, ebaꞌejjijo peaꞌai chacocue! ¡Quea jaꞌa nee jjashahuaba tiitiiquicue!  
\v 12 Jamajjeya miquianaya aquianajji poaje; miquianaya bobi yasijje epoꞌyojji pojjeama bobijji poꞌyo majje. Pea huasijje bobijo cua ajja poaje. Jamajjeya miquianaya quea pame baꞌyani ba majje Jesosaja epeejji pojjeama cuaa miquianaya shajjaꞌajja caje Jesosaja esohui miquianaaya huohuiañajo. Jamajjeya miquianaya quea pame baꞌeje. 
\s1 Emeshi Mese nei Jesosa poe oꞌoyajo ojaya epeejji emanoꞌyo cuana shequije oꞌoya 
\p  
\v 13 Epeejji cuana, eyaya jiquio pea esohui tehueaña miquiana ba meejji eꞌe jojo nei Jesosaja epeejji cuanajo, ma yahuajo mano caꞌya poajo. Jamajjeya miquianaya yenoꞌama poaje emanoꞌyo cuanajo. Pea cuana ca ca, Jesosaja epeejji pojjeama cuana quea yeno nee nee poani emanoꞌyo cuana shequiꞌyo jjima poanijo poso.  
\v 14 Esejaya eba eꞌe jojo nei Jesosa manoꞌyajo Eyacuiñajjiya oya shequi mee ca oꞌoya poa. Oya jayojjaya Jesosaja epeejji cuana manoꞌyajo, Eyacuiñajjiya oya cuana shequi mee caje oꞌoya. Jamajjeya Jesosa poe oꞌoyajo Eyacuiñajjiya onijje huoojea caje ojaya epeejji ma yahuajo manoꞌya poa cuana. Jamaya eꞌe jojo nei; jamaya jjashahuabaquime eseya poani. 
\p  
\v 15 Eꞌe, Emeshi Mese neiya Jesosaa ecuana huohui ca poa jamaya eyaya miquianaya huohuiaña jama baꞌa: Poe oꞌoya majje Emeshi Mese neiya, Jesosaa ojaya epeejji eshe nequi cuana, ojaya epeejji yahuajo emanoꞌyo cuana nijje ojee jjequisohua cajeꞌyo onijje eyahuasijje.  
\v 16 Eꞌe, Emeshi Mese nei Jesosa eyajo ani meshi yasijje poe jeahuajo janobajjima nei taaaje; esohuidojojji jaahuanajjiya quea caꞌa nee neeya emiajji mia cani jayojja taaame poaje, janobajjima nei nei. Eyacuiñajjija emiajji mia caje cuaa peaꞌai. Majoya Emeshi Mese nei eyajo ani jjapashineijje nequioqueje bo biajje nequi. Jamajjeya ojaya epeejji cuanaja, ma yahuajo manoꞌya poaja eyami eshe po mee caje oꞌoya, eyacua.  
\v 17 Majoya poe oꞌoya majje, emanoꞌyo cuanaja eyami eshe oꞌoya po mee majje Jesosa Quitohua ojaya epeejji eshe nequi cuana bo biajje jjequisohua cajeꞌyo emanoꞌyo cuana nijje, ojee. Bo biajje nequije Jesosa nijje. Majoya ojjaña ojaya epeejji cuana onijje baꞌe tiitiijeꞌyo Emeshi Mese nei nijje, Jesosa nijje.  
\v 18 Jamajjeya ¡jiquio esohuijo quea bihui nee nee pocue! ¡Jesosaja pea epeejji cuana quea bihui nee po meesahuacue! ¡Jiquio esohui cuana huohui huichaꞌa huichaꞌacue! Jama baꞌa: —Jesosaa ojjaña ojaya epeejji cuanaja eyami eyacua po mee majje jjequisohua cajeꞌyo eyahuasijje onijje ebaꞌe tiitiiꞌyojji, ojaya epeejji yahuajo manoꞌya poa cuana nijje peaꞌai. 
\c 5  
\s1 ¡Jesosaja epoe oꞌoyajjijo jjashahuaba tiitiiquicue! 
\p  
\v 1 Epeejji cuana, ¡shajjaꞌajjacue mo oe! Jesosaja epoe oꞌoyajji miquianajaya eba. Jamajjeya eyaya miquiana huasijje etehuejji pojjeama ache pojjajo oya poeje oꞌoya ebajo ese.  
\v 2 Chojja, ¿ache pojjajo shai poeje oꞌoya Jesosa? Emeshi Mese neija epoe oꞌoyajji esejaya ba jjima epojja. Jiquio ecua siipojji quehuajje poecuajiani jayojja jama Jesosa quehua poecuajije oꞌoya.  
\v 3 O poe jjimahuajo pishana mimishi cuana jama poaje baꞌa: “Ojjaña quea bei poani. Ecuana quea pame nee baꞌe tiitiijeꞌyo” onaa jama poꞌajjaquijo tiiya Jesosa Quito poeje oꞌoya. Mimishi cuana quea nee nee po mee cajeꞌyo. Eꞌe, Jesosa poe oꞌoyajo chamaꞌ ejjaꞌaniquehuaquijji poaje. Jiquio ecua epona cuana bacua nee cuajiani jama poecuajime poaje Jesosa. 
\p  
\v 4 Ecuea epeejji cuana, miquianaya Jesosa nijje jjapeequiani. Jamajjeya ¡quea jaꞌa nee jjashahuabaquicue! ¡Jesosaja epoe oꞌoyajji ishoaꞌajja anicue! Jamajjeya ¡jiquio ecua siipojji chamajo poso equi jaahuana ajja jayojja jama aꞌa pojji! ¡Jesosaja epoe oꞌoyajji ishoa anicue!  
\v 5 Ojjaña miquianaya onijje jjapeequiani; quea jaꞌa nee nee baꞌyani, epojjajo quea jaꞌa poquiani jayojja jama poani. Eꞌe, eseya eshahua nijje poquiquehua ajja. ¡Joya ecua eshahua quea mimishi poani jama aꞌa pojji!  
\v 6 Pea cuanaa ca ca Jesosaja epoe oꞌoyajji ishoa ajja. Jamaya pojjeama eseya. Chojja. ¡Jesosaja epoe oꞌoyajji ejjaꞌishoaꞌajjaqui! ¡Quea jaꞌa nee ejjashahuabaqui peaꞌai! 
\p  
\v 7 Shajjamaꞌ cuana quea jjashahuabaqui quehua poani Jesosaja epoe oꞌoyajji ishoa ajja. Quea jjashahuabaqui quehua poanijo shajjamaꞌ cuana quea mimishi baꞌyani. Eꞌe, jiquio ecua mecajje huoo majje shajjamaꞌ cuana jjashahuabaqui ajja jayojja jama onaya Jesosaja epoe oꞌoyajjijo jjashahuabaqui ajja.  
\v 8 Eseya ca ca, Jesosaja epeejji cuana quea jaꞌa nee baꞌyani Eyacuiñajjija esohui jama. Quea jaꞌa nee jjashahuabaquiani. Jamajjeya Jesosaja epoeꞌyojji ishoaꞌajjaña. Eꞌe, jiquio ecua sohuinanohua baa daqui quea moo eseꞌojje huosho cani onaja quecua jjima yajji jayojja jama eseya Jesosa nijje jjapeequiani. ¡Pea cuana quea jea nee nee ejjaꞌaqui peaꞌai! Jamajjeya Eyacuiñajjiya eseya Edosiquiana nei jeabichajea meesahua caje. Jiquio ecua sohuinanohua ejaahuojja caꞌa, baajee sapajo iya cani onaja sapa jaja jjima yajji jayojja eseya Jesosa nijje jjapeequiani; esejaya eba Eyacuiñajjiya eseya mimishi cuana cuijeaꞌyo majje baꞌe tiitii mee cajeꞌyo onijje eyajo.  
\v 9 ¿Aꞌa Eyacuiñajjiya eseya babaca canaje cuaqui yasijje quea nee nee epoꞌyojji? Chojja. Esejaya Emeshi Mese nei nijje, Jesosa Quito nijje jjapeequianijo, mimishi cuana cuijea majje Eyacuiñajjiya eseya baꞌe tiitii mee cajeꞌyo onijje.  
\v 10 Eꞌe, Jesosa Quito eseja mimishijo manoꞌya poa. Jamajjeya eseya onijje baꞌe tiitii mee cajeꞌyo eyajo. Eꞌe pojjaꞌa o poe oꞌoya jjimahuajo eseya manojeꞌyo. Eꞌe pojjaꞌa oya poeje oꞌoya ese eshe nequijo. Jamatii ojjaña eseya onijje ojee baꞌe tiitiijeꞌyo eyajo. 
\p  
\v 11 Jamajjeya ¡jiquio esohuijo quea bihui nee nee pocue! ¡Jiquio esohui huohui huichaꞌa huichaꞌacue Jesosaja epeejji cuana quea bihui nee epojji! ¡Oya cuana Jesosa Quito nijje quea jaji nee jjapeequi meesahuacue peaꞌai! Jamaya miquiaaya aña; ¡jamaya oe atiitiicue! 
\s1 Pabohua ebaꞌejji quea pamejo tehue canaje 
\p  
\v 12 Epeejji cuana, jjeya eyaya pea esohui tehueaña miquianaja ebajji jama baꞌa: ¡Jesosaja epeejji etii cuana miquiana nijje nequi shajjaꞌajjacue oe! Ohuaya miquianaya jaahuana cani, Eyacuiñajjija esohui huohui cani peaꞌai.  
\v 13 Oya cuana Eyacuiñajjijo quea pame nee chacochacoanijo ¡quea boti nee acue! ¡Quea pame nee jjashahuabaquicue onajo peaꞌai! ¡Ojjaña Jesosaja epeejji cuana nijje quea bei pocue! 
\p  
\v 14 Eꞌe epeejji cuana, jama acue peaꞌai baꞌa: Jesosaja epeejji quea huea poanijo, ¡janobajjima nei onijje mimicue! ¡Epeejji quea mete cuana quea bei po meesahuacue! Epeejji eshahua nijje poquiquehua sa poanijo, ¡quea jaꞌa baꞌe meesahuacue! ¡Tecueꞌama po tiitiicue ojjaña cuana nijje!  
\v 15 Onaa miya napa cajje ¡aꞌa jjasoseaquijji! ¡Aꞌa onaya napa peaꞌaijji! ¡Ojjaña pojjajo jjashahuaba neineiquicue ojjaña Jesosaja epeejji cuana nijje, pea cuana nijje peaꞌai quea pame nee epojji!  
\v 16 Jesosaja epeejji poanijo ¡quea bihui nee po tiitiicue!  
\v 17 ¡Eyacuiñajji nijje mimi huichaꞌa huichaꞌacue ojjaña pojjajo!  
\v 18 Miquianaya quea pame baꞌyanijo, quea camaja miquianajo poanijo peaꞌai ¡jamatii Eyacuiñajji bihuiacue oe! Jamaya Eyacuiñajjija ejjashahuabaquiꞌyojji miquianajo, Jesosa Quito nijje jjapeequianijo. 
\p  
\v 19 Edojjoshahua Pame minijje mimianijo, ¡aꞌa shajjamaꞌ pojji!  
\v 20 Eyacuiñajjija esohui huohuijjiya esohui huohui canijo, ¡shajjaꞌajja neineicue oe!  
\v 21 ¡Jamatii ojjaña esohui shajjaꞌajja neinei majje quea jaꞌa jjashahuabaquicue! ¡Esohui eꞌe nei jama acue!  
\v 22 ¡Ojjaña mimishi cuana pajea neineiꞌyocue! Eꞌe, ¡quea pame nee nee baꞌe tiitiicue! 
\p  
\v 23 Jamajjeya eya Eyacuiñajji nijje miquiana huasijje mimiani jama baꞌa: —Eyacuiñajji, miyaya ojjaña quea bei po tiitii meeaña. ¡Miquea epeejji cuana minijje jjapee neineiqui meesahuacue quea boejea nee epoꞌyojji! ¡Oya cuana baꞌe meesahuacue quea pame nee nee, mimishiꞌama: ojaya ejjashahuabaquijji, ojaya eyami peaꞌai, ojaya edojjoshahua peaꞌai! Jamajjeya ecuanaja Emeshi Mese nei Jesosa Quito poe oꞌoyajo oya cuana bichoꞌama, mimishiꞌama poajeꞌyo —jamaya eya mimiani Eyacuiñajji nijje miquiana huasijje. 
\p  
\v 24 Eyacuiñajjiya ojaya esohui miquiana nijje epajeaꞌyojji pojjeama tii tii. Ohuaya miquianaya iyaa canaje onijje ejjapee tiitiiqui poquijji. Jamajjeya ohuaya miquianaya jjapeequi tiitii mee cajeꞌyo quea pame nee nee. 
\p  
\v 25 Ecuea epeejji cuana, ¡Eyacuiñajji nijje mimicue ecuanajo, ejo peaꞌai! 
\p  
\v 26 Ojjaña Jesosaja epeejji cuana nijje quea bihui nee mimicue jama baꞌa: —Pabo miquianajo jjashahuaba tiitiiquiani; quea jea nee nee pa mi Paboja. 
\p  
\v 27 Eyaya Emeshi Mese nei Jesosaja esohui huohuijji poaniya miquianaya huohuiaña jama baꞌa: ¡Jiquio ecuea esohui etehueꞌyo ojjaña Jesosaja epeejji cuana huasijje huohuicue, ojjaña tii! Jamaya. 
\p  
\v 28 ¡Esejaya Emeshi Mese neiya Jesosa Quitohua miquianaya quea pame nee cajaahuana cahua! 
\p Mahuiso. Eyaya Pabohua jiquio esohui tehueꞌyonaje. Apoa.