\id 1PE - Ese Ejja NT -Bolivia 2012 (DBL -2013) \h 1 PENO \toc1 Penoja Etehueꞌyo Ebionei \toc2 1 Peno \toc3 1 Pe \mt2 PENOJA ETEHUEꞌYO EBIONEI \mt1 1 PEDRO \c 1 \s1 Penohua tehue canaje Jesosaja epeejji yasijje ejjabaꞌechejjequi baꞌeca huasijje \p \v 1 Eya Peno bajjani. Jesosa Quitohua eya huoojea canaje ojaya esohui huohuiya. Eyaya jiquio esohui tehueaña miquiana huasijje, ma Jesosaja epeejji nei cuana huasijje. Miquianaya yahuajo baꞌenaje Jodio meshijo. Jesosaja epeejji poanijojo onaaya miquianaya napa canaje. Jamajjeya miquianaya poquinaje quea huiso cuiñajji cuana huasijje, pea meshi cuana huasijje. Ma meshi cuana bajjani yasijje baꞌa: Ponito meshi yasijje, Janata meshi yasijje, Capanosia meshi yasijje, Asia meshi yasijje, Bitinia meshi yasijje peaꞌai poquinaje miquianaya. \v 2 Yahuajo nei Eyacuiñajjiya, esejaya Chii eyajo aniya miquianaya babaca canaje ojaya epeejji nei epojji. Eꞌe, yahuajo nei oya miquianajo jjashahuabaquinaje jama baꞌa: —Miquianaya ecuea epeejji cuana poaje quijje. Edojjoshahua Pameya miquianaya quea pame nee baꞌe meesahua caje ecuea esohui jayojja. Jamajjeya miquianaya Jesosa Quitoja esohui shajjaꞌajjajji poaje. Jesosa Quito manojeꞌyo miquiana quea boejea epo meeꞌyojji —jamaya Eyacuiñajji jjashahuabaquia poa esejo. \p ¡Eyacuiñajjiya miquianaya cabaꞌe mee cahua quea pame nee nee! ¡Ohuaya miquianaya quea bei capo mee cahua peaꞌai! \s1 Jesosa Quito jjeya eshe anijo ecuana quea bihui nee nee poani \p \v 3 ¡Eseyaya Eyacuiñajji ejjabihuia tiitiiqui! Oya Jesosa Quitoja Chii. Oya esejaya mimishi cuanajo jjashahuabaqui tiitii ajja. Eseya quea jea nee poanijo, Jesosa Quito manoꞌyajo, Eyacuiñajjiya oya shequi mee ca oꞌoyanaje. Jesosa Quito eshe oꞌoya poanijo, eseya Jesosa jayojjaya baꞌe tiitii mee cajeꞌyo Eyacuiñajjiya. Jamajje jjashahuabaquiani quea bihui nee Jesosa nijje ebaꞌe tiitiiꞌyojji. \v 4 Aquiana jiquiojo quea pame pishana, ani tiitiiꞌyo ajja; ihuiꞌyo majje chamaꞌyo tii poajeꞌyo. Quijje ca ca Eyacuiñajjiya eseya baꞌe tiitii mee cajeꞌyo quea pame nee eyajo. Jamaya ohuaya huohui canaje. Ohuaya eseya pajeaꞌyo jjima acaje. \v 5 Miquianaya jjashahuabaquiani jama baꞌa: —Eyacuiñajjiya ojaya esohui etehueꞌyo jayojja jama acajeꞌyo. \p Jamaya jjashahuabaquianijo, Eyacuiñajjiya miquianaya jaahuana caje. Oya quea caꞌa nee nee. Jamajjeya Jesosa Quito poe oꞌoyajo, Eyacuiñajjiya miquianajo huohui caje jama baꞌa: —Miquianaya Jesosaja epeejji cuana poanijo baꞌe tiitii meejeꞌyo enijje eyajo. \p \v 6 Jamajjeya ¡quea bihui nee po tiitiicue Eyacuiñajjiya miquianaya baꞌe tiitii mee cajeꞌyo jjejojo! Eꞌe pojjaꞌa oe pojji cahui cuanajo quea nee poaje onaaya miquianaya napa cani Jesosa nijje jjapeequianijo. Jamatii. \v 7 Quea nee poani Jesosaja epeejji poanijo, Eyacuiñajjiya ba caje miquianaya ojaya epeejji nei nei. Jama poani baꞌa: Mei huoꞌo topo majje cuaquijo dahua cani cuaa mei shaa chamaꞌyo epojji. Jamatii mei huoꞌo quea pame pishana; seeꞌyo majje quea pame pojjeama poaje. Miquianaya ca ca Eyacuiñajjija quea boti nee nee. Jiquio ecua mei huoꞌo cuaquijo dahua cani cuaa mei shaa chamaꞌyo epojji jayojja jama onaa miquiana napa cajje Eyacuiñajjiya miquianajaya ejjashahuabaquijji tai chamaꞌyo po mee cajeꞌyo. Jesosaja epeejji eꞌe nei quea pame nee po mee cajeꞌyo. Jamajjeya ojjañaa Eyacuiñajji bihuia caje jama baꞌa: —Eꞌe, Jesosa Quitoja epeejji cuana quea pame nee. Jamajjeya ¡Eyacuiñajji ejjabihuiaqui, oya baꞌe tiitiiani quea caꞌa nee nee jjejojo! \p \v 8 Jesosa Quito miquianajaya eba pojjeama ecojjaja. Jamatii oya miquianajaya quea boti nee nee. Eꞌe, ojaya miquianajaya ba jjima eyami. Jamatii ojaya esohui jayojja jama poani. Jamajjeya miquianaya quea bihui nee nee poani. Pea cuanaja ba jjima Jesosaja epeejji quea bihui nee nee poani. \v 9 Eꞌe, Jesosa nijje jjapeequiꞌyanijo, ohuaya miquianaja mimishi cuana cuijea caꞌyonaje; baꞌe tiitii mee cajeꞌyo peaꞌai, ohuaya. \p \v 10 Eꞌe, jjeya nei ohuaya miquianaya baꞌe meesahua cani. Cuanaya baꞌe tiitii mee cajeꞌyo. Jamaya Eyacuiñajjija esohui huohuijji yahuajo nei ba sa poa; jjashahuaba neineiquia poa peaꞌai. Ohuaya yahuajo nei huohui ca poa jama baꞌa: —Eyacuiñajjiya quijje dejja cuana baꞌe tiitii mee cajeꞌyo onijje eyajo —jamaya yahuajo nei aca poa. \p \v 11 Edojjoshahua Pameya yahuajo nei ma esohui huohuijji cuana jjashahuabaqui mee ca poa jama baꞌa: —Quijje Eyacuiñajjija huoojeaꞌyo ojjaña jaahuanajji poeje. Oya quea caꞌa nee nee poaje. Jamatii quea nee nee poajeꞌyo. Quea nee po majje ojjaña quea pame nee baꞌe tiitii mee cajeꞌyo eyajo onijje —jamaya Edojjoshahua Pameya oya cuana jjashahuaba meequi ca poa. \p Jamajjeya oya cuana jama poa peaꞌai baꞌa: —¿Ache shono shai oya Eyacuiñajjija huoojeaꞌyo ojjaña jaahuanajji poeje soꞌo? ¿Achajja shai ohuaya poe majje acajeꞌyo? —jamaya poa cuana. \p \v 12 Eyacuiñajjiya ma esohui huohuijji cuana jjashahuaba meequi ca poa jama peaꞌai baꞌa: —Miquianajaya esohui cuanajo ojjaña cuana quijje nei quea bihui nee poaje. Jamatii jjeya miquianajaya maya ba jjima —jamaya yahuajo nei nei poa. \p Jjeya Eyacuiñajjiya Edojjoshahua Pame huoojea canaje esohui huohuijji cuana huasijje Jesosa Quitojo huohui meesahuaa miquiana huasijje. Oya cuanaa esohui huohuijjija esohui, ma yahuajo baꞌya poaja jayojja jama huohui cani. Ma esohui quea pame nee Jesosa Quitojo Eyacuiñajjija esohuidojojji cuana eyajo nequi ba sa poani peaꞌai. \s1 ¡Eyacuiñajjija esohui jama baꞌecue! \p \v 13 Jamajjeya ¡jjeya ejjashahuabaquijji quea jaꞌa jama acue! ¡Aꞌa quea quehua jjashahuabaquijji! Poe oꞌoya majje Jesosa Quitohua miquianaya baꞌe tiitii mee cajeꞌyo eyajo onijje. ¡Jamaya jjashahuaba neineiquicue! \v 14 ¡Eyacuiñajjija esohui cuana jayojja jama atiitiicue! Jesosa Quito ba jjimahuajo miquianaya quea mimishi poanaje. ¡Jjeya miquianaya ejjashahuabaquijji quea mimishi yahuajo jama aꞌa pojji! \v 15 ¡Jjeya ca oe quea pame nee pocue! Eyacuiñajjiya miquianaya iyaa canaje onijje ejjapeequiꞌyojji. Oya quea pame nee nee. ¡Joya ecua ohuaya quea pame nee acani jamaya oe acue! \v 16 Eꞌe, Eyacuiñajjija esohui etehueꞌyo yahuajo nei jama poa baꞌa: \q1 “Eya quea pame nee nee poani; ¡e jayojjaya jama quea pame nee nee, quea boejea peaꞌai oe pocue!” \m Jamaya tehue ca poa yahuajo nei. \p \v 17 Eyacuiñajji nijje mimianijo miquianaya jama poani baꞌa: —Eyacuiñajji, miya ecuanaja Chii ai —poani. \p ¡Bacue oe! Eyacuiñajji oe dejjaja ebaꞌejjijo jjashahuabaquiani, oya jayojjaya jjashahuabaquiani pea cuanaja ebaꞌejjijo. Eꞌe, ojjaña shajjamaꞌ cuana ohuaya huohui caje jama baꞌa: —Miquianaya ca mi ca oe quea mimishi nee nee poanijo quea nee nee poajeꞌyo tii —acaje. \p Quea pame poanijo ca ca eseya jama huohui cajeꞌyo baꞌa: —Jamaya quea pame nee, enijje baꞌe tiitiijeꞌyo eyajo —Eyacuiñajji poaje. \p Jiquio meshijo eseya baꞌe tiitii ajja. Jamajjeya jiquio meshijo baꞌyanijo ¡ojjaña pojjajo Eyacuiñajjija esohui jayojja jama acue! ¡Oya shajjaꞌajjacue! \v 18 Yahuajo miquianaya baꞌeꞌyonaje etiiquiana cuanaja ehuohui jayojja jama quea mimishi. Oya cuana Moisesija esohui etehueꞌyo jayojja jama baꞌe nishonaje. ¿Aꞌa bejjo sosejje mimishi cuana cuijea mee caꞌyojji? Chojja. Ejjeshejji, esodojjo quea nahue, mei quea nahue peaꞌai quijje pishana sosemaꞌ poaje. \v 19 ¡Bacue oe! Jesosa Quitohua miquianajaya mimishi cuana cuijeaꞌyojji sosejje sosequia caꞌyonaje. Eꞌe, jiquio ecua ñajjajja eshoꞌi quea pame, taiꞌama quecua caꞌyaninaje cuaa jayojja jama Jesosa Quito quea pame nee, mimishiꞌama quecua caꞌyonaje cuaa esejaya mimishi cuijeaꞌyojji. Oja enaꞌ cuayaquinajejo, Eyacuiñajjiya esejaya mimishi cuana cuijea cajeꞌyo. \v 20 Yahuajo nei nei meshi pana jjimahuajo Eyacuiñajji jjashahuabaquinaje quijje nei Jesosa Quito huoojeaje mimishi cuanajo manoꞌyohua. Eꞌe, Eyacuiñajjiya Jesosa babaca canaje ese jaahuanajji. Jjeya epojja cuana beshahua nei oe poanajejo Jesosa Quito poeyanaje esejaya mimishi cuijeaꞌyohua, quea boejea baꞌe meeꞌyohua peaꞌai. \v 21 Miquianaya quea boejea acanajejo, jaahuana canajejo peaꞌai Eyacuiñajji miquianajaya eba poaje. Cuanaya Eyacuiñajjiya Jesosa Quito shequi mee ca oꞌoyanaje. Ojjaña huoojeaꞌyojji quea caꞌa nee nee po mee caꞌyonaje peaꞌai. Jamajjeya jjeya miquianaya Eyacuiñajjija esohui jayojja jama poani. Ohuaya miquianaya jjashahuabaqui mee cani jama baꞌa: —Eꞌe, Eyacuiñajjiya ecuana baꞌe tiitii mee cajeꞌyo onijje eyajo. \p \v 22 Jjeya miquianaaya Eyacuiñajjija esohui jayojja jama añajo, mimishi cuana apajea mee caꞌyonaje, Eyacuiñajjiya. Edojjoshahua Pameya miquianaya Jesosaja epeejji cuana quea jea nee ameesahua canaje. Jamajjeya ¡ojjaña Jesosaja epeejji cuana quea jea nee atiitiicue! \v 23 Jesosa Quito miquianajaya mimishi cuanajo manoꞌyonajejo, Eyacuiñajjiya miquianaya pea ejjashahuabaquijjijo baꞌe mee caꞌyani. Eꞌe, miquianaya quea pame nee baꞌe tiitiiani pea ejjashahuabaquijjijo, dejjaja bacua jayojja jama pojjeama. Oya cuana caꞌaꞌama, oe pojji shequiajame baꞌyani. Ebaꞌejji eyajo ca ca ebaꞌe tiitiiꞌyojji, oe po ajja. \v 24 ¡Bacue oe! Eyacuiñajjija esohui etehueꞌyo yahuajo nei nei jama poa baꞌa: \q1 “Ojjaña dejja cuana sipone jama, caꞌaꞌama. Oe pojji cahuijo sipone shasha cuana quea pame. Jjeya nei jocaꞌyo majje chamaꞌyo tii poajeꞌyo. \q1 \v 25 Esejaya Emeshi Mese neija esohui cuana ca ca quea pame yani tiitiijeꞌyo”. \m Yahuajo nei jamaya poa. \p Eꞌe, ma esohui quea pame nee Jesosaja esohui huohuijji cuaa miquiana huasijje huohui canaje, Jesosaja esohui. \c 2 \s1 ¡Jesosa Quito nijje quea pame nee baꞌecue miquianaya! \p \v 1 ¡Jjeyahua nei ojjaña mimishi cuana pajea neineiꞌyocue! ¡Onaja aquiana aꞌa jea bajji! ¡Aꞌa jjadasiaquijji pojji, siipojji peaꞌai aꞌa pojji! ¡Siajjepojji aꞌa pojji! ¡Aꞌa pea cuana nijje mimijajijji! ¡Aꞌa epeejji nisho pojji! \v 2 ¡Eyacuiñajjija esohui ba neineicue! ¡Jiquio ecua ebacua eshoꞌiya tojjo quea boti nee, ojjaña pojjajo tojjo ishi neinei cani jayojja jama Eyacuiñajjija esohuijo pocue miquianaya! ¡Ojjaña pojjajo esohui ba neineicue! ¡Ba majje Jesosa Quitoja epeejji quea jaꞌa nee pocue! \v 3 Eyacuiñajjija esohui yahuajo nei jama poa baꞌa: “Quito nijje jjapeequi majje miquianaaya oya banaje quea pame nee nee poani”. \p \v 4 ¡Jjapeequicue Jesosa Quito nijje! Oya quea pame nee nee, quea caꞌa nee nee peaꞌai. Beca cuana onijje jjapeequi sa po ajja poa. Oya cuana jama poanaje baꞌa: —Jesosa Quito cajaa. Ecuana onijje jjapeequi sa po ajja. \p Eyacuiñajji ca ca Jesosa Quito quea jea nee neejo jama mimime poanaje baꞌa: —Oya quea pame nee acui caꞌa quea jaꞌa nee jama, equi yamajjana quea caꞌa jama. Ecuea oya quea jea nee nee. \p \v 5 Equijo acui caꞌa eyamajjana cuana nequia cani cuaa. Oya jayojjaya ojjaña Jesosaja epeejji cuana Eyacuiñajjija equi jayojja. ¡Equi yamajjana quea pame nee jayojja jama pocue! ¡Quea caꞌa nee nequicue Jesosa Quitojo! Jamajjeya ¡Eyacuiñajji nijje emimijji cuana peaꞌai pocue, miquianaya! ¡Jiquio ecua Jodioja Eyacuiñajji nijje emimijji cuaa chaco ca poa Eyacuiñajji bihuiajji jamaya oe acue! ¡Eyacuiñajjijo chacocue quea pame nee! ¡Jamaya oe acue Jesosa Quito miquianajaya mimishi cuanajo manoꞌyonajejo! \v 6 Jamaya Eyacuiñajjija esohui Jesosa Quitojo etehueꞌyo yahuajo poa baꞌa: \q1 “¡Bacue oe! Eyaya oya babacaje enequi tiitii meeꞌyojji ecuea cuiñajji Sioni bajjanijo. Oya acui caꞌa equi yamajjana quea pame nee, quea caꞌa nee peaꞌai jayojja jama. Ojjaña joya jjeya nei onijje jjapeequiani quijje yenoꞌama poaje”. \m Jamaya yahuajo nei poa. \p \v 7 Eꞌe, jjeya ojjaña Jesosaja epeejji poanija oya quea jea nee. Eꞌe, Jesosa quea pame nee nee ma equi yamajjana quea caꞌa jayojja. Pea cuanaja Jesosa botiꞌama, ma equi yamajjana quea caꞌa jayojja botiꞌama. Jamaya Eyacuiñajjija esohui etehueꞌyo yahuajo nei Jesosa Quitojo poa baꞌa: \q1 “Ma equi yamajjana jayojja equi iyajji cuaa cajaa aca poa. Jamatii Eyacuiñajjiya ma equi yamajjana oe nei quea pame nequi tiitii mee cani, equi jaabicha ajja epojji”. \m \v 8 Jamaya cuanaya pea esohui Jesosa Quitojo etehueꞌyo poa baꞌa: \q1 “Quea huiso cuaa oya ma equi yamajjana jayojja cajaa acajeꞌyo. Eꞌe, jiquio ecua acuihuojjajo ejiojjijje jjaquecuateꞌaqui majje jaabichajeaquiani jayojja jama poaje ojjaña joya o cajaa ajji poajeꞌyo”. \m Jamaya poa yahuajo. Onaaya Eyacuiñajjija esohui Jesosa Quitoja cajaa acani shajjaꞌajja sa po ajjaa jjejojo. Yahuajo nei Eyacuiñajjija eba poa jama baꞌa: “Oya cuana ecuea esohui shajjaꞌajja sa po ajja poaje. Jamaya capoꞌyahua” poa. \p \v 9 Miquianaya ca ca Eyacuiñajjija ebabaca ojaya epeejji cuana epojji, onijje emimijji ojjaña cuanajo. Eyacuiñajjija epeejji cuana quea pame nee poanaje miquianaya. Eꞌe, Eyacuiñajji ojjaña emeshi mese cuana huoojeajji poani. Miquianaya babaca ca poa ma ohua huohui ca poa ehuohuijji. Jamajjeya miquianaaya huohuiaña jama baꞌa: —Eyacuiñajjiya eseya babaca canaje. Mimishi cuana cuijea caꞌyajje eseya baꞌe mee cani quea jaꞌa nee nee, de. \p Eꞌe, yahuajo miquianaya baꞌya poa quea mimishi. Jjeya ca chojja. \v 10 Yahuajo Eyacuiñajjija epeejji pojjeama poa. Jjeya ca ca miquianaya ojaya epeejji cuana poanaje. Yahuajo mi jaahuanajji chamaꞌ poa Eyacuiñajji miquianajaya botiꞌamajojo. Jjeya ca ca Eyacuiñajjiya miquianaya jaahuana cani quea pame nee. Onijje jjapeequianijo, miquianajaya Emeshi Mese nei oya poani. \s1 Eyacuiñajjija echacojji poanijo miquianaya jama baꞌecue baꞌa: \p \v 11 Ecuea epeejji cuana, ¡shajjaꞌajjacue mo! Miquianaya ca ca pea, ojjaña quea mimishi ojjaña meshi cuanajo baꞌe jayojja jama pojjeama. Miquianajaya meshi eyajo yani. Jiquio meshijo ani tiitii ajja. Jamajjeya ¡aꞌa quea mimishi baꞌejji! Mimishi cuana amajje miquianaya quea tai nequi tiitiiꞌyo chanaꞌ. \v 12 Jesosaja epeejji pojjeamaa miquianajaya ebaꞌe pame ba neinei cani. Jamajjeya ¡quea pame nee atiitiicue! Oya cuana miquianajo siajje poani jama baꞌa: —Jesosaja epeejji cuana quea mimishi. \p Jamatii miquianajaya ebaꞌejji quea pame nee ba majje ma dejja cuanaa huohui caje Jesosa Quito poe oꞌoyajo jama baꞌa: —Eyacuiñajjiya ojaya epeejji cuana quea pame ameesahua caꞌyonaje —poaje ojjaña. \s1 ¡Miquianaja emeshi meseja esohui shajjaꞌajjacue! \p \v 13 Epeejji cuana, ¡miquianaaya Jesosaja epeejji poanijo emeshi mese cuaa huohui cani jayojja jama acue! Jamajjeya miquiana ba majje Jesosa Quito niñeba ajja poaje. Eꞌe, pea cuanaja emeshi mese ehuoojeajji pojjeama. Jamajjeya ¡oya shajjaꞌajjacue! \v 14 Emeshi meseya ojaya echacojji cuana huoojea cani ojjaña jaahuanaa. Jamajjeya oya cuana poeyani mimishi cuana napaa. Ojjaña quea pame poani nijje ca ca quea bihui nee poani. \v 15 Miquianaaya quea pame nee añajoya, shajjamaꞌ cuana esohui eꞌe nei pojjeama huohui pajea cajeꞌyo. Jamaya Eyacuiñajji sa poani. \p \v 16 Yahuajo miquianaaya mimishi cuana aꞌyonaje, eme jeyoꞌyo jayojja jama poanaje. Jjeya ca ca Jesosa Quitohua ejeyoꞌyo jaa pichojea caꞌyani jayojja jama amee cani. Jamatii, ¡aꞌa jama pojji baꞌa: —Jesosaa eya epichojeaꞌyo jayojja jama po mee caꞌyani. Jamajjeya ¡eyaya jamatii mimishi caꞌa majamajaꞌyahua! —aꞌa jamaya pojji! ¡Eyacuiñajjija echacojji quea pame cuana pocue! \v 17 ¡Pea cuanajo aꞌa maimaijji! ¡Ojjaña Jesosaja epeejji cuana quea boti nee acue! ¡Eyacuiñajjija esohui jama acue quea bihui nee! ¡Miquea emeshi meseya huohui canijo shajjaꞌajjacue peaꞌai! \s1 Jesosa Quito quea nee nee poanaje jamatii oja Chiija esohui jayojja jama poanaje ¡Jesosa jayojja jama pocue! \p \v 18 ¡Bacue! ¡Mique emeshi meseja esohui shajjaꞌajjacue quea bihui nee! ¡Miquianajaya emeshi mese quea pameja esohui jayojja jama pocue! ¡Miquianajaya emeshi mese quea tecueja esohui jayojja jama acue peaꞌai! \v 19 Miquianaaya quea pame chacoajo, eꞌe pojjaꞌa echacomeejji quea tecue miquiana nijje poani. Jamatii ¡Eyacuiñajjija esohui ba majje quea bei pocue! Jamaya quea pame. \v 20 Quea pame nee chacochacoajo, miquianajaya emeshi meseya miquianaya quea yeno po mee cajeꞌyo pojjaꞌa. Jamatii Eyacuiñajjiya miquianajo huohui caje jama baꞌa: —Miquianaya ecuea epeejji cuana quea pame. \p Quea tai miquiaa chacome ajo ca ca miquianajaya emeshi meseya napa caje. Jamatii ¡catecuea cahua quea tai miquiaa chaconajejoya! \p \v 21 Jesosa Quito esejaya mimishijo quea nee nee poanaje. Jamajjeya Eyacuiñajjiya eseya huohui cani jama baꞌa: —¡Jesosa Quito jayojja jama pocue! Oya quenequene cuaji ajja poa. Quea bei nee. ¡Jamaya pocue miquianaya! \p \v 22 Yahuajo nei esohui huohuijjiya esohui tehue ca poa Jesosajo jama baꞌa: “Oya mimishiꞌama. Oya siajjepojji pojjeama peaꞌai”. \v 23 Pea cuana Jesosa Quito nijje mimijajiajo, onijje mimijaji ajja Jesosa poa. Onaaya Jesosa Quito napa canaje. Jamatii oya tecueajea jjima. Chojja: —Ecue Chii, oya cuana ca ca enijje quea mase poanijo, ¡cajaa aꞌyocue! —jamaya ajjima Jesosaja. \p Jama ca ca oe poanaje baꞌa: —Ecue Chii, miya quea pame nee. Dejja cuana quea mimishi poani ba majje oya cuana quea nee nee po meejeꞌyo quijje, miyaya —Jesosa poanaje. \p \v 24 ¡Jamaya capoꞌyahua! Jesosa Quito eseja mimishi cuanajo manoꞌyonaje acui ecueataꞌapeejo. Oya quea nee nee poanaje eseja mimishi cuijeaꞌyojji. Jamajjeya eseya mimishi pajea mee caꞌyani. Cuanaya ojo eseya Eyacuiñajjija esohui jayojja jama po tiitii mee cajeꞌyo quea pame nee. Jesosa Quito cuiasejjajea canaje cuaa ejee ejeapashajjajjaa. Quecua caꞌyonaje. Ma ecuiasejjajo, equecuaꞌyojo peaꞌai eseya quea boejea po mee canaje Jesosaa. \v 25 Yahuajo miquianaya ñajjajja oe nei ecuaquishoꞌyo jayojja jama poanaje. Jjeya Jesosa Quito ñajjajja cuiñajji jayojja jamaa miquianaya saꞌajjaꞌyo majje jjeshe caꞌyonaje ejaahuanajji. \c 3 \s1 ¡Yahue, ehuanase cuana peaꞌai, baꞌecue quea pame! \p \v 1 Eyaya epona cuana jama aña baꞌa: ¡Quea pame nee baꞌecue! Ehuanase cuana, ¡miquianajaya yahue cuana shajjaꞌajjacue! Eꞌe pojjaꞌa miquea yahue Jesosaja epeejji pojjeama. ¡Jamatii ohua huohui cani jayojja jama acue! Jamajjeya miya quea pame baꞌyani ba majje miquea yahue Jesosaja epeejji poajeꞌyo jamatii, Jesosajo huohui majamaja jjima. \v 2 Eꞌe, miya quea pame poanijo, miyaya oya shajjaꞌajjañajo peaꞌai, yahue Jesosaja epeejji poaje pojjaꞌa. \v 3 Aꞌa jjashahuabaquijji jama baꞌa: —Eya aquiana quea pame huoshoꞌyo majje quea pame poaje. Eyiijji quea pame yiije. Daqui quea nahue huoshoje. Ecuea sao ao ijjiacaꞌa meeje quea pame. Jamajjeya eya quea pame nee poaje. \p \v 4 Chojja. Quea jaꞌa nee jjashahuabaquianijo, mimishiꞌama poani peaꞌaijo miquianaya quea pame nee poaje. Jamaya Eyacuiñajjija quea boti nee nee. Jamajjeya ¡quea bei, tecueꞌama, quea pame nee peaꞌai pocue! \v 5 Eꞌe, yahuajo nei epona cuana Eyacuiñajjija epeejji poanijo ojaya esohui jayojja jama poa. Yahueja esohui shajjaꞌajja ca poa peaꞌai. Jamajjeya ma epona cuana yahueja quea boti nee nee poa. \v 6 Yahuajo nei epona Sana bajjani quea pame nee poa. Ojahueya Amajamaa huohui cani jayojjaya jama aca poa, Sanaa. Ojahue nijje jama poa baꞌa: —Miya ecueahue, e huoojeajji. \p Epona cuana, ¡miquianaya quea pame nee po sa poanijo Sana jayojja jama pocue quea pame nee! ¡Jesosa nijje jjapeequicue meteꞌama nei peaꞌai! \p \v 7 Yahue cuana, ¡shajjaꞌajjacue mo peaꞌai! Epona cuana caꞌaꞌama pishanajo, ¡ehuanase cuana jaahuanacue quea pame nee! Eyacuiñajjiya yahue cuana, ehuanase cuana peaꞌai baꞌe tiitii mee cajeꞌyo eyajo. Jamajjeya ¡ehuanase cuana quea boti nee acue! Jamaya poanijo, Eyacuiñajjiya shajjaꞌajja caje miquiana onijje mimianijo. \s1 Pea cuaa Jesosaja epeejji napa caje pojjaꞌa \p \v 8 ¡Jjeya pea esohui shajjaꞌajjacue! ¡Ojjaña miquianaya Eyacuiñajjija esohui jayojja jama pea nijje jjapeequicue! ¡Ojjaña Jesosaja epeejji cuana quea jea nee acue! ¡Huapa pojjeama jayojja acue! ¡Quea bei pocue ojjaña cuana nijje; tecueꞌama pocue! \v 9 ¡Pea cuana miquiana nijje quea mase poanijo, aꞌa onijje quea mase po peaꞌaijji! ¡Minijje mimijajianijo, aꞌa ona nijje mimijajijji peaꞌai! Chojja. ¡Quea pame nee pocue! Jamaya Eyacuiñajjiya miquianaya huoojea canaje. Miquianaya iyaa canaje quea bihui nee epojji. Jamajjeya ¡pea cuana nijje quea pame nee pocue! \v 10 Eyacuiñajjija esohui etehueꞌyo yahuajo nei jama poa baꞌa: \q1 “Quea pame baꞌe sa poanijo, quea bihui nee baꞌe sa poanijo peaꞌai ¡esohui quea mimishi epojji aꞌa huohuijji! ¡Aꞌa siajje pojji! \q1 \v 11 ¡Mimishi pajeaꞌyo majje quea pame nee oe atiitiicue! ¡Pea cuana nijje quea bei po tii tiicue peaꞌai! \v 12 Eyacuiñajjija esohui cuana jayojja jama quea pame añajo, ohuaya miquianaya jaahuana cani quea pame nee. Cuanaya ohuaya miquianaya shajjaꞌajja cajeꞌyo onijje mimianijo. Ojjaña quea mimishi poani ca ca Eyacuiñajjiya tecuea cajeꞌyo”. \m Jamaya yahuajo nei tehue mee ca poa Eyacuiñajjiya. \p \v 13 ¿Aꞌa miquianaya napa caje cuaa miquiaaya quea pame nee atiitiiañajo? \v 14 Eꞌe pojjaꞌa. Jamatii Eyacuiñajjiya miquianaya quea bihui nee po mee caje. Jamajjeya ¡aꞌa quea mete pojji! ¡Aꞌa quea yeno pojji peaꞌai! Quea bei jjashahuabaquicue jama baꞌa: \v 15 —Jesosa Quito quea pame nee poanaje; eya ojaya ehuohui jayojja jama poaje. Oya oe nei ecuea Emeshi Mese nei yani. \p Eꞌe pojjaꞌa miquianaya huohuiꞌajja caje cuaa jama baꞌa: —¿Yajjajje acuae miya quea bihui nee jjashahuabaquiani soꞌo Eyacuiñajjiya miya baꞌe tiitii mee cajeꞌyo? \p Jamaya acajje ¡huohuicue miquianajaya ejjashahuabaquijji quea pame nee Jesosa Quitojo! \v 16 ¡Quea bei nee oe huohuicue, tecueꞌama! Eꞌe, ¡Jesosaja epeejji poanijo baꞌecue quea pame nee! Jamajjeya miquianaya bichoꞌama poaje pea cuaa niñeba cajje. Eꞌe, miquianaya quea pame nee baꞌyanijo, oya cuana quea bicho poaje mi niñeba majje. \v 17 Miquiaa quea pame añajo, pea cuaa pojjaꞌa nequiana napa caje. ¡Jamatii quea pame pocue! Eꞌe pojjaꞌa jamaya Eyacuiñajji miquianajo jjashahuabaquiani. Quea mimishi poanijo, pea cuaa miya cuia caje. ¡Jamaya caꞌa cahua cuaa ca mimishi cuana! Jamajjeya ¡aꞌa quea mimishi pojji! \s1 Shequiꞌyo majje Jesosaa ma yahuajo manoꞌyo cuana nequica huasijje sohuihuohuiqui canaje \p \v 18 ¡Bacue! Jesosa Quito mimishiꞌama nei nei. Jamatii oya manoꞌyonaje mimishi cuana cuijea meeꞌyojji. Apoa aje mimishi cuijea caꞌyonaje. Ohuaya miquianaya Eyacuiñajjija epeejji cuana po mee caꞌyonaje. Oya Jesosa manoꞌyajo Edojjoshahua Pameya oya shequi mee caꞌyonaje. \v 19 Eꞌe, Jesosa Quito jjani yasijje ejeanobia jaajo ojaya edojjoshahua poquinaje ma yahuajo manoꞌyo cuana nequica huasijje esohui huohuiya jama baꞌa: —Eꞌe, iña manoꞌyonaje mimishi cuijeaꞌyojji, apoa anaje —aca poa. \p Ma yahuajo nei manoꞌyo cuana poqui mee jjima poa eyahuasijje; ejeanobia jaa jayojja poa. \v 20 Yahuajo nei manoꞌyo cuana Eyacuiñajji shajjaꞌajja sa po ajja poa. Noeya bishe ai quecua canijo, Eyacuiñajjiya shajjamaꞌ cuana ishoaꞌajja caꞌya poa quea huiso shequiajame ache shono ohua mimishi pajea cajeꞌyo ebajji nisho. Jamatii oe pojji cuana, me oejje pea beca peejjima huisome, 8 huisome bishe ai yasijje dobiqui majje huiꞌiꞌyo jjima poa johuijo. Johuiya oya cuana bishejo baꞌe jeajjee caꞌya poa quea pame nee. \p \v 21 ¡Bacue! Johui yahuajo nei poa jjeya ca jiquio jama baꞌa: Jjeya oe dejjaa pea cuana Eyacuiñajjijo besa mee cani enajo. Eꞌe, jiquio ecua dejja bishe ai dojjojo ani cuana johuiya jeajjee ca poa jayojjaya jama jjeya oe dejjaa pea cuana Eyacuiñajjijo besa mee cani Edojjoshahua Pame ona que dobiquiꞌyajo. Jamajjeya baꞌe tiitii mee cani Jesosa Quito nijje. Ena huasijje iñajeanobia cajje jamatii meshi topo caje. Mimishi cuana ca ca etopojeajji pojjeama. Jamajjeya Eyacuiñajji nijje eꞌe jojo nei mimiajo, ohuaya esejaya mimishi cuana cuijea caꞌyajje pea jjashahuabaquime po mee caꞌyani. Jamaya Eyacuiñajjiya acajeꞌyo Jesosa Quito ma emanoꞌyojaa shequi mee ca oꞌoya poajojoya. \v 22 Jjeya nei Jesosa Quito eyajo Eyacuiñajjija ebianeimijijje eꞌanioque ani. Ohuaya ojjaña Eyacuiñajjija esohuidojojji cuana, esohuidojojji huoojeajji poani peaꞌai huoojea cani quea pame nee ameeya. Ojjaña eshahua cuana quea mete poani Jesosa Quitohua tecuea cajje. \c 4 \s1 ¡Pea jjashahuabaquiꞌyome pocue! \p \v 1 Jamajjeya Jesosa Quito jiquio meshijo nequi quea nee nee poanaje. Dejjaa oya napa canaje Eyacuiñajjija esohui huohuijjijojo. ¡Miquianaya Jesosa Quito jama pocue! Eyacuiñajjija esohui huohuiañajo quea nee poaje pojjaꞌa. Jamatii quea nee poanijo ¡Jesosaja epeejji quea caꞌa pocue, mimishiꞌama! \v 2 Jamajjeya ¡Jesosaja epeejji quea caꞌa nee poaniya ojjaña ejjashahuabaquiꞌyojji quea tai pajeaꞌyocue! ¡Eyacuiñajjija ejjashahuabaquijji jayojja jama baꞌe tiitiicue quea pame nee! \v 3 Yahuajo nei quea huiso shequiajajo miquianaya quea mimishi baꞌeꞌyonaje. Eshahuaja epeejji cuana jayojja ojjaña mimishi atiitiiꞌyonaje, miquianaaya. Ejjashahuabaquijji quea mimishi nee nee poanaje. Ehuoo jaa tiitiinaje peaꞌai. Ojee quea shajjaquijjo ijjiaꞌijjianaje quea mimishi jjejojo. Ojee ishiꞌishi tiitiinaje peaꞌai. Eyacuiñajji nisho peaꞌai miquianaaya bihuia majamajanaje. Eshahua nijje miminaje peaꞌai. Jamaya quea tai nee nee miquianaaya atiitiinaje yahuajo nei nei. \v 4 Jjeya ca ca miquea epeejji quea mimishi nijje jjapeequiꞌyo ajja onijje quea mimishi epojji. Jamajjeya oya cuana miquiana nijje quea tecue poani. Miquianaya niñeba cani peaꞌai onijje mi jjapeequiajo. \v 5 Jamatii. Quijje ma dejja mimishi cuana Eyacuiñajjiya o cojja neijo nequi mee caje ojaya mimishijo huohui epojji. Majoya quea nee nee po mee cajeꞌyo tii tii. Ojjaña etiiquiana mimishi yahuajo manoꞌyo cuana quea nee nee po mee cajeꞌyo, ojjaña jjeya quea mimishi poani quea nee nee po mee cajeꞌyo peaꞌai, Eyacuiñajjiya. \v 6 Jamajoya Eyacuiñajjiya esohui quea pame nee Jesosa Quitojo huohui mee caꞌyonaje ojjaña yahuajo nei baꞌya poa huasijje manoꞌyo jjimahua. Jamajjeya manoꞌyajo, oya cuana baꞌe tiitii mee caꞌyonaje quea pame nee eyajo onijje. Jamatii ojjaña ma etiiquiana cuana manoꞌyonaje dejja quea pame, dejja quea mimishi peaꞌai. \s1 Eyacuiñajjiya ojjana quea pame nee asahua cani \p \v 7 Eꞌe, Jesosa Quitoja epoe oꞌoyajji beshahua nei apoa. Jamajjeya ¡jjashahuabaquicue quea jaꞌa nee! ¡Ojaya esohui jama baꞌecue Eyacuiñajji nijje emimijji bichoꞌama! \v 8 ¡Jiquio esohui shajjaꞌajja neineicue! ¡Ojjaña Jesosaja epeejji cuana quea jea nee nee acue! ¡Pea cuana quea jea nee poanijo onaja mimishi cuana pajeaꞌyocue queneꞌama! \v 9 Jesosaja epeejji cuana poeꞌyajo, ¡jjequinobiacue quea bihui neeya miquea equi yasijje aniya! \v 10 Eyacuiñajjiya ojjaña ojaya epeejji quea pame chaco meesahua cani ojo. Ojjaña ojaya epeejji pea jayojja jama chaco ajja. Peapea chacome ameesahua cani ojo ojjaña quea bihui nee ebaꞌe meejji. ¡Ohuaya miquiana chaco meesahua canijo, ojjaña cuana quea bihui nee baꞌe meesahuacue! Jama acue baꞌa: \v 11 Esohui huohui sa po majje ¡Eyacuiñajjija esohui huohuicue! Pea cuana baꞌe meesahua sa po majje ¡baꞌe meesahuacue Eyacuiñajjiya miquiana baꞌe meesahua canijo! Jamajjeya ojaya epeejji cuana quea pame nee poanijo ojjaña cuaa Eyacuiñajji bihuia caje: —Eꞌe, Jesosa Quitohua esejaya mimishi cuana cuijea caꞌyajo, quea pame nee onijje chacochacoani —jamaya oya cabihuia tiitii cahua. ¡Oya ojjañaja Emeshi Mese quea caꞌa nee capo tiitiiꞌyahua peaꞌai! ¡Jamaya capoahua! \s1 Pea cuaa Jesosaja epeejji cuana napa caje \p \v 12 Ecuea epeejji cuana, ¡shajjaꞌajjacue mo! ¡Aꞌa quea yeno pojji pea cuaa miquianaya janobajjima napa canijo! Aꞌa jjashahuabaquijji jama baꞌa: —Eya ee nei quea nee nee poani Jesosa Quito nijje jjapeequianijo. \p Chojja, pea cuaa napa cani quea huiso Jesosaja epeejji cuana. \v 13 Jamajjeya onaa napa cajje ¡aꞌa quea yeno pojji! ¡Quea bihui nee pocue Jesosa Quito yahuajo nei onaa aca poa jayojjaya jamaya miquianaya acani jjeya! Onaa napa cajje Jesosa quea nee poanaje peaꞌai. Eꞌe, miquianaya jjeya quea nee o jayojjaya poanijo quijje quea bihui nee poaje Jesosa Quito quea pame nee nee, quea caꞌa nee nee poe oꞌoyajo. \v 14 Jesosaja epeejji poanijo, pea cuana minijje mimijajiajo ¡jamatii quea bihui pocue! Eꞌe de, Edojjoshahua Pame quea caꞌa nee miquiana nijje nequi quea bihui nee miquiana po meejji. \v 15 ¡Aꞌa quea mimishi pojji; aꞌa pea quecuajji; aꞌa siijji; aꞌa pea niñebajji peaꞌai! ¡Aꞌa jamaya pojji! Jamatii jamaya quea mimishi poanijo aje mi oe dejja etii cuaa napa caje. Quea nee nee po mee caje. \v 16 Jesosa Quitoja epeejji poanijo ca ca oe pea cuaa miquianaya napa cajje ¡jamatii aꞌa quea bicho pojji! ¡Eyacuiñajji bihuiacue jama baꞌa: —Eyacuiñajji, eya quea bihui nee Jesosa Quitoja epeejji poanijo, jamatii onaaya eya napa cani —acue! \v 17 ¡Aꞌa oe Jesosaja epeejji pojjeama jayojja jama baꞌejji quea mimishi! ¡Bacue oe! Jjeya apoa. Jesosa Quito poejeꞌyo ojjaña cuanaja ebaꞌejjijo huohuiya. Ojjaña joya quea jaꞌa nee baꞌyani quea pame nee acaje poeꞌyo majje. Ojjaña quea mimishi poani aje oe quea nee nee po mee cajeꞌyo. Ebionei Jesosa Quitohua ojaya epeejji cuanaja ebaꞌejji cuanajo huohui caje. Majoya ojaya epeejji pojjeama quea mimishi nee tecuea caje. Ojaya epeejji quea mimishi tecuea cajo, ¡ache sohui tecue nei neiya huohui caje ojaya epeejji pojjeama! Tecuea neinei cajeꞌyo. \v 18 Eꞌe, Eyacuiñajjija esohui etehueꞌyo jama poa baꞌa: \q1 “Quea camaja nee Quitoja epeejji neija mimishi cuijeaꞌyojji, eyahuasijje edobiqui meeꞌyojji peaꞌai. Jamajjeya Quitoja epeejji pojjeama, dejja quea mimishi peaꞌai ¿yajja shai poaje? ¡Eyahuasijje edobiqui meeꞌyojji pojjeama ca coma, de!” \m \v 19 Jamajjeya dejja mimishiya eseya Jesosaja epeejji cuana napa cajo onijje jjapeequianijo ¡jamatii Eyacuiñajjija esohui aꞌa pajeaꞌyojji! Jamaya Eyacuiñajjija ejjashahuabaquiꞌyojji. Jamajjeya ¡quea pame nee nee atiitiicue! Eꞌe, Eyacuiñajjiya eseya pana caꞌya poa. Ojaya esohui jayojja jama acajeꞌyo eꞌe jojo nei, epajeaꞌyojji pojjeama Eyacuiñajjija. \c 5 \s1 Penoja esohui etehueꞌyo Jesosaja epeejji jaahuanajji cuana huasijje \p \v 1 Jjeya eyaya Jesosaja epeejji jaahuanajji cuana huohuiaña. Eya ca iña Jesosaja epeejji cuana jaahuanajji peaꞌai. Yahuajo pea cuaa Jesosa Quito cuia caqui eyaya oya ba poa. Jesosa Quito poe oꞌoyajo, eya o jayojja quea pame nee, quea caꞌa nee nee poajeꞌyo. Jamajjeya eyaya tehueaña jama baꞌa: \v 2 ¡Miquianaaya Jesosa Quitoja epeejji cuana jaahuanajji poaniya oya cuana jaahuanacue quea pame nee! Eyacuiñajjiya miquianaya huoojea canaje ojaya epeejji cuana jaahuanajji. Jamajjeya ¡quea bihui nee oya cuana jaahuanacue, tecueꞌama! Jesosa Quito miquianajaya quea jea nee neejo ¡ojo chacocue quea bihui nee, ejjeshejji quea huiso sa poanijo pojjeama! Eyacuiñajjiya miquianaya huoojea caꞌyonaje ojaya epeejji jaahuanajji. \v 3 Jamajjeya ¡o huoojeaꞌyojji quea tecue jama jayojja aꞌa pojji! Jamajjeya Jesosaja epeejji cuaa miquiana ba majje quea pame atiitii caje peaꞌai; miquiana jayojjaya poaje. \v 4 Eꞌe, Jesosa Quito ojaya epeejji cuana jaahuanajji huoojeajji poani. Jamajjeya poe oꞌoya majje ohuaya eseya o jayojja quea pame nee, quea caꞌa nee po mee cajeꞌyo. \p \v 5 Cuanaya Jesosaja epeejji jjeya nei onijje jjapeequiani cuana eyaya huohuiaña jama baꞌa: ¡Jesosaja epeejji jaahuanajji cuana shajjaꞌajjacue! ¡Quea bei pocue! Yahuajo nei Eyacuiñajjija esohui etehueꞌyo jama poa baꞌa: \q1 “Beca cuana quea caꞌa poso jjabaquianijo Eyacuiñajjiya oya cuana ba cani quea mimishi. Jamajjeya ohuaya oya cuana jeabichajea cajeꞌyo. Pea quea bei poani ca ca jaahuana cajeꞌyo, Eyacuiñajjiya”. \m Jamaya yahuajo nei poa. \v 6 Jamajjeya ¡Eyacuiñajjija ejjashahuabaquijji jayojja jama acue quea bei nee! Oya quea caꞌa nee enequi tii tii. Jamajjeya quijje ohua apoa acajje miquianaya ona jaahuanajji quea jaꞌa nee po mee cajeꞌyo. \v 7 Jjeya oya jjashahuabaquiani miquiana jaahuanajji. Jamajjeya meteꞌama jjashahuabaquicue ojo jama baꞌa: —Eꞌe jojo nei Eyacuiñajjiya eya jaahuana cajeꞌyo. \p \v 8 ¡Quea jjashahuabaqui jaꞌa nee pocue! ¡Ojjaña ba neineicue! Edosiquiana quea mase poqui tiitiiani ojjaña dasiaa. Jiquio ecua ibia quea mase po ayequiani aquiana saꞌajjaa jayojja jama Edosiquiaa eseya saꞌajja cani edasiajji. \v 9 Eꞌe, miquianajaya eba Jesosaja epeejji cuana ojjaña meshijo baꞌe Edosiquiaa napa mee cajje quea nee poani miquiana jama. Jamajjeya ¡Jesosaja epeejji quea caꞌa nee pocue! ¡Ojaya esohui aꞌa pajeaꞌyojji! \v 10 Eꞌe, oe pojji cahuime miquianaya quea nee poaje Jesosa Quito nijje jjapeequianijo. Jamatii miquianaya ojaya epeejji cuana quea jaꞌa nee po mee cajeꞌyo. Ohuaya miquianaya quea caꞌa nee nee po mee cajeꞌyo. Ojaya esohui cuana jayojja jama baꞌe tiitii meesahua caje peaꞌai. Eꞌe de, Eyacuiñajjiya, ese jaahuanajjiya miquianaya babaca caꞌya poa. Miquianaya Jesosa Quito nijje jjapeequianijo, o jayojjaya quea caꞌa nee, quea pame nee nee po tiitii mee cajeꞌyo. \p \v 11 ¡Eyacuiñajji ojjaña huoojeaꞌyojji oe nei quea caꞌa nee nee po tiitiiani! ¡Jamaya capoahua! \s1 Penohua quea bei tehue cani Jesosaja epeejji cuana huasijje \p \v 12 Ecuea epeejji Simano bajjani enijje nequi. Ecuea eba oya Jesosa nijje jjapeequiani quea pame nee. Ohuaya jiquio esohui etehueꞌyo biso nei tehue meesahua cani. Ecuaaya miquiana que tehueaña quea jaꞌa nee, quea bihui nee nee peaꞌai ejjapeequi meesahuajji. Ecuea eba eꞌe jojo nei Eyacuiñajjiya miquianaya quea pame jaahuana cani. Jamajjeya ¡onijje jjapee tiitiiquicue! \p \v 13 Jesosaja epeejji cuana jiquiojo, Babenonia cuiñajji jayojjajo baꞌe Eyacuiñajjiya babaca caꞌyonaje ojaya epeejji nei epojji, miquiana jayojjaya. Oya cuana, Macoso ma ecuea ebacua ejja jayojja peaꞌai miquianajo jjashahuabaquiani. —¿Achajja ami ani soꞌo? —ohuaya huohuiꞌajja mee cani. \p \v 14 ¡Ojjaña Jesosaja epeejji cuana jomajo baꞌe nijje quea bei nee mimi tiitiicue! Onijje jjapeequianijo, ¡Jesosa Quitohua miquianaya quea jaꞌa nee cabaꞌe meesahua cahua! \p Eyaya, Peno bajjaniya jiquio esohui tehueꞌyonaje. Mahuiso. Apoa.