\id 1JN - Ese Ejja NT -Bolivia 2012 (DBL -2013) \h 1 HUANI \toc1 Huanija Etehueꞌyo Ebionei \toc2 1 Huani \toc3 1 Jn \mt2 HUANIJA ETEHUEꞌYO EBIONEI \mt1 1 JUAN \c 1 \s1 Huaniya tehue canaje ebaꞌe tiitiiꞌyojjijo \p \v 1 Epeejji cuana, eyaya, Huaniya miquiana que esohui tehueaña Jesosa Quitojo. Yahuajo nei nei meshi, aquiana cuana, dejja peaꞌai pana coo jjimahuajo oya yaña tii tiia poa. Jamajjeya Jesosa Quitohua eseya Eyacuiñajji ba mee cani, eseya baꞌe tiitii mee cani peaꞌai. Eꞌe jojo nei eyaya oya shajjaꞌajjanaje ecue eshajjaa. Eyaya oya banaje ecue ecojjaa. O ba neinei majje eya quea bihui nee poanaje. Oya ese jayojjaya poanaje, yamijji. Jamajjeya eya onijje jjapeequinaje. \v 2 Eꞌe, Jesosa ese jayojja poeyanaje yamijji, ese baꞌe tiitii meeꞌyohua. Eyaya oya banaje eꞌe jojo nei. Jamajjeya eyaya miquianaya jama huohuime aña baꞌa: Yahuajo nei nei Jesosa Quito yaña tiitiia poa Eyacuiñajji nijje, oja Chii nijje. Eseja Chii neiya Eyacuiñajjiya oya meshi yasijje huoojea canaje ese jayojja epojji, yamijji. Esejaya mimishi cuijeaꞌyo majje ohuaya eseya cuana baꞌe tiitii mee cajeꞌyo onijje eyajo. \v 3 Eꞌe, eyaya oya, Jesosa Quito banaje; ojaya esohui shajjaꞌajjanaje peaꞌai. Jamajjeya aje jja mi oe eyaya miquianaya huohuiaña enijje ejjapeequiꞌyojji. Jamajjeya eseya Eyacuiñajji nijje, eseja Chii nei nijje jjapeequiani, oja Bacua Ejja Jesosa Quito nijje peaꞌai jjapeequi poquiani. \v 4 Jamajjeya jiquio esohui cuana eyaya tehueaña miquiana quea bihui nee nee po meejji. Jamajjeya Jesosaja epeejji poanijo quea bihui nee nee poajeꞌyo. \s1 Eyacuiñajji quea jaꞌa nee nee enequi tii mimishiꞌama \p \v 5 Epeejji cuana, eyaya Jesosa Quitoja esohui shajjaꞌajjanaje. Maya eyaya miquianaya huohuiaña jama baꞌa: Eyacuiñajji quea jaꞌa nee nee poani tii. Jiquio ecua cuaquijijiya mecajje jijinequianiya ojjaña jeajaꞌa cani jayojja jama ohuaya eseya cuana, dejja mimishi cuana quea jaꞌa nee jjashahuabaqui mee cani. Eyacuiñajji mimishiꞌama tii tii, quea tai pojjeama; Eyacuiñajji quea apo pojjeama epojjajo jama tii tii oya baꞌe. \v 6 Jamajjeya joya mimishi po majje quea apo jayojja tii baꞌyani mimiani jama baꞌa: —Eya Eyacuiñajji nijje jjapeequiani —Eyacuiñajji nijje jjapeequiani poso oya jjabaquiani, siajje poani. \p Chojja. Jjapee neineiquiani pojjeama mi coma, jjadasiaquiani jja mi coma. Jiquio ecua se mecajje quea misijo poquiquehuani jayojja jama oya poani. \v 7 Eyacuiñajji ca ca quea jaꞌa nee nee poani tii, quea boejea nee nee. Jamajjeya Eyacuiñajji jayojja jama quea jaꞌa nee baꞌyanijo eseya jjapeequiani quea pame nee Jesosaja epeejji cuana nijje. Jesosa Quitoja enaꞌ cuayaquiꞌyo majje oya esejo manoꞌyonaje. Jamajjeya onijje jjapeequianijo, eseja Chii Eyacuiñajjiya esejaya mimishi cuana cuijea ca poquiꞌyani. \p \v 8 Ojjaña joya jama poani baꞌa: —Iña ca ca mimishiꞌama —jamaya quea quehua jjashahuabaquiani. Jamaya jjabaquianijo Jesosa ojaya ba jjima nei nei. \p \v 9 Eyacuiñajji nijje mimiajo ca ca ohuaya esejaya mimishi cuana cuijea cajeꞌyo. Eꞌe, jama poajo baꞌa: —Eyacuiñajji, eya quea mimishi poani. ¡Ecuea mimishi cuana cuijeaꞌyocue! —jamaya mimiajo ohuaya ojaya esohui jayojja jama acajeꞌyo eꞌe jojo nei. \p Eꞌe, Jesosa esejaya mimishi cuanajo manoꞌyonajejo ohuaya eseja mimishi cuana cuijeaꞌyo majje mimishi pajea meesahua cajeꞌyo. Eseya quea boejea po mee cajeꞌyo. \v 10 Eꞌe, Eyacuiñajjiya jama aca poa baꞌa: —Ojjaña cuana quea mimishi nee nee poani —ohuaya aca poa. \p Jamajjeya ojjaña joya jama poani baꞌa: —Chojja, iña ca ca mimishiꞌama —jama poaniya siajjepojji. Eyacuiñajji siajje poani posoya acani peaꞌai. Jamajjeya ojjaña joya jama poani Eyacuiñajjija esohui etehueꞌyo ba po jjima jayojja poani. \c 2 \s1 Jesosa Quito esejo mimiani Eyacuiñajji nijje \p \v 1 Eꞌe ecuea epeejji cuana, miquiana mimishiꞌama po meesahuajji eyaya jiquio esohui tehueaña. Jamatii eseya quea mimishi poajo, Jesosa Quito esejo mimiani Eyacuiñajji nijje, oja Chii nijje jama baꞌa: —Ecue Chii, eya manoꞌyonaje ecuea epeejji cuanaja mimishi cuana cuijeaꞌyojji sosejje. Jamajjeya ¡aꞌa quea quene pojji onijje! —jamaya Jesosa poani. \p Jesosa Quito ca ca oe mimishiꞌama, quea pame nee nee. Jamajjeya Eyacuiñajjiya Jesosa onijje mimiajo shajjaꞌajja cani, jamaya acani esejo. \v 2 Eꞌe, Jesosa acui ecueataꞌapeejo manoꞌya poa eseja mimishi cuana cuijeaꞌyojji sosejje. Ojjaña cuana ojjaña meshijo baꞌeca cuanaja mimishi cuijeaꞌyojji sosejje Jesosa manoꞌyonaje. \s1 ¡Eyacuiñajjija esohui jayojja jama baꞌecue! \p \v 3 Eꞌe ecuea epeejji cuana, Jesosaja esohui cuana jayojja jama añajo eseya ojaya epeejji poani eꞌe jojo nei; onijje baꞌe tiitiijeꞌyo eyajo. Jamaya esejaya eba. \v 4 Beca cuana aje oe jama poani baꞌa: —Eya ca iña Jesosaja epeejji poani —jama posoya jjabaquiani cuana. \p Jamatii oya cuana aje oe Jesosaja esohui jayojja jama baꞌe ajja. Jamajjeya oya cuana siajje poani. Jesosa ojaya ba jjima. \v 5 Ojjaña joya Eyacuiñajji quea jea nee nee ajji poani ca ca ojaya esohui jayojja jama baꞌyani. Jamajjeya ¡Eyacuiñajjija esohui jayojja jama baꞌe tiitiicue Jesosa Quitoja epeejji quea jaꞌa nee epojji! \v 6 Jamajjeya ojjaña joya eꞌe jojo nei jama poani baꞌa: —Eya Jesosa Quito nijje jjapeequiani —jamaya poanijo ¡quea pame nee nee cabaꞌyahua, Jesosa Quitohua aca poa jayojja jama caꞌa cahua! Jamaya baꞌyanijo eseya eꞌe jojo nei ojaya epeejji jjabaquije. \s1 ¡Pea cuana quea jea nee nee acue! \p \v 7 Epeejji cuana, yahuajo nei Eyacuiñajjija esohui huohuijjiya esohui tehue ca poa miquianaja ebajji. Ma esohui miquianaaya shajjaꞌajjanaje Jesosa nijje jjapeequi jeahuaa. Ma esohui etehueꞌyo eyaya tehue oꞌoyaña miquiana jjashahuabaqui meejji. \v 8 Jamatii eyaya ma esohui tehue etii jayojjaya tehue oꞌoyaña miquiana huasijje jama baꞌa: —¡Pea cuana quea jea nee nee acue! \p Jiquio esohui jayojja jama aca poa Jesosaa; pea cuana quea jea nee nee aca poa. Yahuajo ojjañaja ejjashahuabaquijji cuana quea tai, quea quehua poa Eyacuiñajjija esohui eꞌe nei shajjaꞌajja jjimahuajo. Jjeya ca ca miquianaaya Eyacuiñajjija esohui jama pea cuana quea jea nee nee aña peaꞌai. Ma esohui eꞌe nei cuaquijiji jayojja jamaa ojjaña quea jaꞌa jjashahuabaqui meesahua cani. \v 9 Jamajjeya ojjaña joya jama poani baꞌa: —Eya Jesosaja esohui jayojja jama baꞌyani quea jaꞌa nee —jamaya poani aje oe siajje poani. \p Jesosaja epeejji nijje quea quene nee poani tii tiijo quea mimishi nee baꞌyani, Jesosaja esohui shajjaꞌajja nisho cani, Jesosaja epeejji eꞌe jojo nei pojjeama. \v 10 Ojjañaa joya Jesosaja epeejji cuana quea jea nee nee acani ca ca quea jaꞌa nee nee baꞌyani. Jesosa jayojja jama baꞌyani. Jamajjeya ohuaya pea epeejji poquiquehua meeꞌyo jjima acani, quea mimishi po meeꞌyo jjima acani. \v 11 Ojjaña joya Jesosaja epeejji cuana nijje quea quene nee nee poani ca ca quea mimishi tii baꞌyani. Jiquio ecua se ecojja bebo poqui taiyani jama, ejiojji ba jjima jayojja jama oya cuana poani quea mimishi baꞌyani jjejojo. \s1 ¡Jesosaja epeejji cuana etii, eshoꞌi peaꞌai quea jaꞌa nee baꞌecue! \p \v 12 Ecuea epeejji cuana, miquianaya Jesosaja epeejji poanijo, Eyacuiñajjiya miquea mimishi cuana cuijea caꞌyonaje. Jamajjeya eyaya jiquio esohui tehueaña miquianajaya ebajji. \v 13 Yahuajo nei nei meshi pana jjimahuajo Jesosa ebaꞌe tiitiia poa. Jesosa nijje jjapeequianijo eyaya miquiana huasijje esohui tehueaña edejja tii cuana huasijje. Shacuimaꞌ nequi cuana, miquianaya Edosiquiana jeabichajeaꞌyojji epo. Jamajjeya eyaya miquiana huasijje esohui tehueaña peaꞌai. Eshoꞌi cuana, Eyacuiñajji eseja Chii nei miquianajaya eba. Jamajjeya eyaya miquiana huasijje tehueaña peaꞌai. \v 14 Eꞌe edejja tii cuana, Jesosa yahuajo nei nei ebaꞌe tiitiia poa miquianajaya eba. Jamajjeya eyaya esohui tehueaña miquianajaya ebajji. Eꞌe shacuimaꞌ nequi cuana, miquianaya quea caꞌa poani, dejja tiiꞌyo jjima. Eyacuiñajjija esohui jayojja jama aña. Jamajjeya miquianaya Edosiquiana jeabichajeaꞌyojji epo peaꞌai. Jamajjeya eyaya miquiana huasijje tehueaña peaꞌai. \s1 ¡Aꞌa yahuajo jama baꞌe sa pojji Jesosaja epeejji pojjeama jama! \p \v 15 Epeejji cuana, ¡aꞌa yahuajo jama baꞌe sa pojji quea mimishi, Jesosaja epeejji pojjeama jama! Aquiana cuana jiquio meshijo ani ¡aꞌa quea jea nee ajji! ¡Aꞌa aquianajo jjashahuaba tiitiiquijji! Eꞌe, Jesosaja epeejji pojjeama jama baꞌe sa poanijo, aquiana cuanajo jjashahuaba tiitiiquianijo peaꞌai Eyacuiñajji, eseja Chii nei miquea quea boti pojjeama. \v 16 Eꞌe, Jesosaja epeejji pojjeama cuana Eyacuiñajjijo jjashahuabaqui ajja nei nei. Chojja, oya cuana jjashahuabaquiani jiquio meshijo ebaꞌejjijo jama baꞌa: Quea mimishi nee nee baꞌe sa poani; aquiana cuana ba majje jea ba neinei cani peaꞌai; quea dejja tai poani, quea nishehui peaꞌai poani. Dejja quea dejja tai jayojja jama baꞌe sa poani quea aquiana huiso nee nee. Ona huoojeajji po sa poani peaꞌai. Jamaya baꞌe sa poani eshahuaja epeejji cuana. \v 17 Jamatii joya aquiana ojjaña cuana sa neinei poani chamaꞌyo tii poajeꞌyo. Ojjaña quea mimishi nee jjashahuabaquiani, Jesosaja epeejji pojjeama quea nee nee poajeꞌyo tii tii. Ojjaña joya Eyacuiñajjija esohui jayojja jama baꞌyani ca ca baꞌe tiitiijeꞌyo onijje eyajo. Jamajjeya ¡yahuajo jama aꞌa baꞌejji, Jesosaja epeejji pojjeama jama! \p Jesosa Quito cuiajji epojji nisho poeje, Emeshi Mese nei nisho poaje. Eseya ca ca Jesosaja epeejji eꞌe jojo nei poani. \v 18 Ecuea epeejji cuana, ¡shajjaꞌajjacue mo! Yahuajo eyaya miquianaya huohuinaje jama baꞌa: —Quijje Jesosa poe jjimahuajo oe dejja poeje. Oya pea, Edosiquiana neija epeejji; dejja jayojja nei neiya oya poeje. Jesosa Quito cuiajji nisho poaje; ojjañaja Emeshi Mese nei nisho poaje —jamaya eyaya huohuinaje. \p Jamatii jjeya nei Jesosa Quito cuiapanajji poani yani, emeshi mese nei nisho quea huiso yani peaꞌai. Jamajjeya esejaya eba Jesosaja epoe oꞌoyajji beshahua nei apoa. \v 19 Jiquio Jesosa Quito cuiapanajji poani cuana yahuajo pishana ese nijje nequinaje. Jamatii oya cuana Jesosaja epeejji nei pojjeama poa. Jamajjeya ese nijje nequi tiitii ajja poa. Eꞌe, oya cuana Jesosaja epeejji nei epo jjemo ese nijje nequi tiitiiꞌyo quiaye. Oya cuana ca ca poquiꞌyonaje. Jamajjeya esejaya eba oya cuana Jesosaja epeejji nei pojjeama. \p \v 20 Miquiana que ca ca Jesosa Quitohua Edojjoshahua Pame huoojea canaje. Ohuaya miquianaya ojjaña Jesosa Quitoja esohui eꞌe nei ba mee canaje. \v 21 Jesosaja esohui eꞌe nei miquianajaya ebajojo eyaya jiquio esohui miquiana huasijje tehueaña. Eꞌe, miquianajaya eba siajjepojji cuana Jesosaja epeejji pojjeama. \v 22 Siajjepojji cuaa aje oe jama huohuime acani baꞌa: —Jesosa ca ca oma Eyacuiñajjija huoojeaꞌyo ojjaña jaahuanajji pojjeama, Quito pojjeama. \p Ojjaña joya jamaya Jesosajo poani aje oe Jesosa Quito Eyacuiñajjija Bacua Ejja pojjeama poso acani. Jamajjeya ohuaya Eyacuiñajji, eseja Chii nei cajaa acani peaꞌai. Eꞌe, oya cuana aje oe Jesosa Quito cuiapanajji poani. \v 23 Eꞌe, ojjaña joya Jesosa Quito Eyacuiñajjija Bacua Ejja pojjeama poso ajji poani Eyacuiñajji nijje jjapeequi ajja peaꞌai. Joya Eyacuiñajjija Bacua Ejja nijje jjapeequiani Jesosa nijje ca ca eseja Chii nei eyajo ani nijje peaꞌai jjapeequiani. \p \v 24 Jamajjeya esohui quea pame nee Jesosajo, ma miquiaa shajjaꞌajja cooa poa ¡aꞌa pajeaꞌyojji! ¡Jamaya atiitiicue! Eꞌe, ma esohui pajeaꞌyo ajjajo miquianaya Eyacuiñajjija Bacua Ejja nijje jjapee tiitiiquijeꞌyo Jesosa nijje. Eyacuiñajji eseja Chii nei nijje jjapee tiitiiquijeꞌyo peaꞌai. \v 25 Eꞌe, yahuajo nei ecuana nijje nequiahuaa Jesosa Quitohua huohui ca poa jama baꞌa: —Eyaya miquianaya, ecuea epeejji cuana baꞌe tiitii meejeꞌyo enijje eyajo —jamaya ecuana huohui ca poa Jesosaa. \p \v 26 Ecuea epeejji cuana, eyaya jiquio esohui eꞌe nei tehuenaje miquiana huasijje siajjepojji cuanajo, ma Jesosa cuiapanajji epo cuanajo. Poquiquehua mee ca chanaꞌ mi. \v 27 Miquiana que ca ca Jesosa Quitohua Edojjoshahua Pame huoojea caꞌyonaje. Oya, Edojjoshahua Pame miquiana nijje nequi tiitiiani. Ohuaya miquianaya Jesosaja esohui ba meesahua cani quea jaꞌa nee. Jamajjeya pea esohui huohuijji chamajo jamatii Edojjoshahua Pameya miquianaya ojjaña Eyacuiñajjija esohui eꞌe nei ba meesahua cani quea jaꞌa nee. Oya siajjepojji pojjeama. Jamajjeya ¡ojaya esohui cuana jayojja jama baꞌecue Jesosa Quito nijje ejjapee tiitiiquiꞌyojji! \s1 Jesosaja epeejji cuana \p \v 28 Jamajjeya ecuea epeejji cuana, ¡Jesosa Quito nijje jjapee tiitiiquicue bichoꞌama epojji! Jamajjeya Jesosa Quito poe oꞌoyajo ojo eseya meteꞌama poaje. Ohua cojja ba neinei cajje eseya bichoꞌama poajeꞌyo. \v 29 Miquianajaya eba Jesosa Quito mimishiꞌama, quea pame nee nee. Jamajjeya ojjaña joya mimishiꞌama, quea pame nee nee baꞌyani Jesosaja epeejji cuana poani. \c 3 \p \v 1 ¡Jjashahuabaquicue! Eseja Chii nei Eyacuiñajjiya eseya quea jea nee nee acani. Jamajjeya ohuaya jama acanaje baꞌa: —Eyaya miquianaya ecue bacua cuana po meenaje —jamaya acanaje ohuaya. \p Eꞌe, ohuaya eseya oja bacua cuana po mee caꞌyonaje. Jamajjeya pea cuana Jesosa nijje jjapeequi sa po ajjajo ese nijje jjapeequi ajja peaꞌai. \p \v 2 Ecuea epeejji cuana, jjeya eseya Eyacuiñajjija bacua cuana. Jamatii quijje ¿ae jayojja eseya poajeꞌyo? Maya esejaya ba jjima jjeya. Jamatii esejaya eba Jesosa Quito poe oꞌoyajo eseyaya oya baje ecojjaa. Jamajjeya eseya jjashahuabaquiani jama baꞌa: —Eꞌe jojo nei Jesosa Quito poe oꞌoyajo eseya o jayojjaya nei nei poajeꞌyo. \p \v 3 Quea pame nee nee Jesosa. Ojjaña joya jama jjashahuabaquime poꞌani tii Jesosa Quitojo jjaꞌishoaꞌajjaquiani. Mimishi cuana pajea neinei caꞌyani peaꞌai. Quea boejea baꞌyani Jesosa Quito jayojja epoꞌyojjiya. \p \v 4 Shajjamaꞌ cuaa ca ca mimishi acanijo Eyacuiñajjija ejjashahuabaquijji quea pame nee jayojja jama po ajja. Eꞌe, jamajjeya Eyacuiñajjija esohuijo jjashajjaꞌajjaqui ajjajje quea mimishi poani. \v 5 Esejaya eba Jesosa Quito mimishiꞌama nei nei. Oya poeyanaje eseja mimishi cuana cuijeaꞌyohua. \v 6 Jamajjeya Jesosa Quito nijje jjapeequiꞌyo majje eseya mimishi amaja sa poꞌyo ajja; pajeaꞌyaña seya. Ojjaña joya mimishi atiitii sa poani ca ca Jesosa Quito nijje jjapeequi jjima, ojaya ba jjima, de. \p \v 7 Ecuea epeejji cuana, ¡quea jaꞌa nee jjashahuabaquicue pea cuanaja miquianaya edasiajji pojjeama! Jesosa Quito quea pame nee nee, mimishiꞌama. Jamajjeya ojjaña joya Jesosa Quito jayojja mimishiꞌama baꞌyani oya cuana quea pame nee peaꞌai poani. \v 8 Joya mimishi ahuichaꞌa huichaꞌajji poani ca ca eshahuaja epeejji poani. Eꞌe, Edosiquiana nei yahuajo nei nei yaña poa meshijo. Ohuaya mimishi acoo ca poa. Eyacuiñajjija Bacua Ejja Jesosa ca ca meshi yasijje poeyanaje ojjaña cuana mimishi pajea meeꞌyohua, eshahua cuana quea nee nee po meeya, eshahuaja epeejji cuana peaꞌai. \p \v 9 Eseya, Eyacuiñajjija bacua cuana ca ca oe mimishi atiitii sa poꞌyo ajja, Edojjoshahua Pameya ecuana huasijje edobiquinequiya eyacua po mee cani. Eꞌe, ohuaya eseya Eyacuiñajjija ejjashahuabaquijji jayojja jama jjashahuabaqui mee cani. Jamajjeya eseya Eyacuiñajjija bacua po majje mimishi epo majaꞌyojji pojjeama. \v 10 Jamajjeya eseyaya Eyacuiñajjija bacua cuana baña jama baꞌa: Ojjaña joya mimishi a sa poꞌyo ajja, Eyacuiñajjija esohui jayojja jama baꞌyani Eyacuiñajjija bacua cuana. Ojjaña joya mimishi atiitiijji poani, pea cuana quea jea aꞌajja peaꞌai, Jesosaja epeejji cuana nijje jjapeequi ajja peaꞌai ca eshahuaja epeejji cuana, Edosiquianaja bacua cuana. \s1 ¡Pea cuana oe quea jea nee ejjaꞌaqui! \p \v 11 Eꞌe ecuea epeejji cuana, ¡pea cuana oe quea jea nee nee ejjaꞌaqui! Jamaya yahuajo onijje jjapeequi jeahuajo Jesosaa eseya huohui coo ca poa. \v 12 Jamajjeya ¡aꞌa Adanaja bacua Caini jayojja jama pojji! Oya eshahuaja epeejji poa. Jamajjeya oja chahua sapa cuiahuejjajea caꞌya poa. Eꞌe, oja chahua quea pame poanajejojo Caini onijje quea quene nee poa; quea mimishiya jjejojoya oja chahua cuiahuejjajea caꞌya poa. \v 13 Jamajjeya oya jayojjaya Jesosaja epeejji pojjeamaja miquianaya botiꞌama peaꞌai acajje aꞌa jjashahuabaquijji jama baꞌa: —¿Apiojji shai eya onajaya botiꞌama? \p Oya cuana eshahuaja epeejji cuana, Caini jayojja. Eseya ca ca Jesosaja epeejji, echahua mese jayojja. Jamajjeya ese nijje quea quene nee poani. \p \v 14 Eseyaya Jesosaja epeejji cuana quea jea nee nee aña. Jamajjeya esejaya eba eꞌe jojo nei eseya pea jjashahuabaquime poani, yahuajo jama pojjeama. Jamajjeya eseya Eyacuiñajji nijje baꞌe tiitiijeꞌyo eyajo; cuaqui yasijje epoquiꞌyojji pojjeama. Joya pea cuana quea jea aꞌajja ca ca quea nee nee poajeꞌyo, cuaqui yasijje poquijeꞌyo tii tii pea jjashahuabaquime poꞌyo jjima jjejojo. \v 15 Joya pea cuana nijje quea quene nee nee poani aje oe pea quecuajji poani. Esejaya eba pea quecuajji cuana eshahua nijje jjapeequiani tii; oya cuana ebaꞌe tiitiiꞌyojji pojjeama eyajo. \p \v 16 Jesosa Quito esejo manoꞌya poa eseja mimishi cuijeaꞌyojji. Jamaya esejaya eba eꞌe jojo nei eseya ojaya quea jea nee nee. Jamajjeya ¡Jesosaja epeejji cuana quea jea nee nee ejjaꞌaqui peaꞌai; oya cuana ejjabaꞌe meesahuaqui! \v 17 Epeejji quea dejja taiya ca ca quea aquiana huisohua ojaya epeejji aemaꞌ nei nei ba majje aquiana quia jjima acani; quea mano jaa, quea shoe nee ba majje jjashahuabaqui ajja, baꞌe meesahua sa poꞌyo ajja ojaya quea jea pojjeama jojoya. Jamajjeya oya Eyacuiñajji jayojja jama po ajja Eyacuiñajji ojaya quea jea pojjeama jojoya. \v 18 Ecuea epeejji cuana, ¡shajjaꞌajjacue mo! Pea cuana esejaya quea jea nee poanijo ¡oya cuana quea pame nee nee ejjabaꞌe meesahuaqui! Jamaya quea pame nee. Eseya pea cuana quea pame ajjimajo ca ca jama siajje pome se poani baꞌa: —Pea cuana ca ca ecuea quea jea nee poani —jama siajje pomeya se poani. \s1 ¡Pea cuana quea jea ejjaꞌaqui Eyacuiñajjijo bichoꞌama epojji! \p \v 19 Eꞌe, Jesosaja epeejji cuana quea jea nee eseya añajo Jesosaja esohui eꞌe nei jayojja jama baꞌyani, Jesosa nijje jjapeequiani quea pame nee nee peaꞌai. Jamajjeya Eyacuiñajji cojja nei nequi majje bichoꞌama eseya poajeꞌyo. \v 20 Eꞌe pojjaꞌa eseya quea yeno jjashahuabaquiani jama baꞌa: —Eseya Eyacuiñajjija eba nei nei. Ojaya eya eba quea mimishi poanaje —jamaya pojjaꞌa poani. \p ¡Bacue! Eyacuiñajjiya eseya mimishi cuijea ca poqui yani. Jamajjeya ¡yenoꞌama pocue! \v 21 Eꞌe epeejji cuana, eseya ejjashahuabaqui jama baꞌa: —Eya Jesosa nijje jjapeequiani. Jamajjeya Eyacuiñajjiya ecuea mimishi cuijea caꞌyonaje. Enijje quea bei poani. \p Jamaya eꞌe jojo nei poanijo eseya bichoꞌama poani Eyacuiñajji nijje emimijji. \v 22 Eꞌe, Eyacuiñajjija esohui jayojja jama eseya añajo, Jesosa nijje jjapeequianijo peaꞌai Eyacuiñajji quea bihui nee ese nijje poaje. Jamajjeya onijje mimiajo ohuaya eseya shajjaꞌajja caje. Ma ecua eseya onijje miminaje jamaya ohuaya acaje. \p \v 23 Eꞌe, Eyacuiñajjiya eseya huohui ca poa jama baꞌa: —¡Ecue Bacua Ejja Jesosa Quito nijje jjapeequicue! ¡Jesosaja epeejji cuana quea jea nee nee acue peaꞌai! —jamaya ohuaya eseya huohui ca poa. \p \v 24 Ojjaña joya Eyacuiñajjija esohui jayojja jama ajji poani Eyacuiñajji nijje jjapeequiani. Eyacuiñajji ona nijje jjapeequiani peaꞌai. Eyacuiñajjiya Edojjoshahua Pame huoojea canaje ese que dobiquiya. Ohuaya eseya ba mee cani Eyacuiñajji ese nijje nequi. \c 4 \s1 Jesosaja epeejji nishohua mi dasia ca chanaꞌ \p \v 1 Ecuea epeejji cuana, ¡ojjaña esohui huohuijji cuanaja esohui aꞌa shajjaꞌajjajji! Chojja, beca cuana Edojjoshahua Pameja huoojeaꞌyo pojjeama, esohui huohuijji nisho. Jamajjeya ¡ojjaña cuana ba neineicue! Quea jaꞌa nee jjashahuabaquicue jama baꞌa: —¿Aꞌa oya cuana Eyacuiñajjija esohui eꞌe nei jayojja jama huohui cani? \p Eꞌe, quea huiso siajjepojji cuana ojjaña huasijje poquiani. Siajje poani jama baꞌa: —Eyacuiñajjiya eya huoojea canaje ojaya esohui huohuiya. \p \v 2 Jamajjeya Eyacuiñajjija esohui huohuijji eꞌe nei miquea eba poaje jama baꞌa: Edojjoshahua Pameya oya cuana huohui meesahua caje jama baꞌa: —Jesosa Quito ese jayojjaya yamijji poeyanaje. \p Jamajjeya jamaya ohua huohui cajo miquea eba oya cuana Edojjoshahua Pameja huoojeaꞌyo esohui huohuijji poani. \p \v 3 Pea cuaa ca ca esohui huohuijji nishohua jamaya huohui ajja. Chojja, oya cuana siajje poani jama baꞌa: —Jesosa Eyacuiñajjija huoojeaꞌyo ojjaña jaahuanajji pojjeama. Eyacuiñajjija Bacua Ejja meshi yasijje poe jjima dejja jayojja yamijji —jamaya huohui canijo aje oe miquianajaya eba oya cuana esohui huohuijji nisho, Jesosa Quito quecuajji nisho epo. Eyacuiñajjija oya cuana huoojea jjima. \p Yahuajo eyaya miquianaya huohuinaje oya cuana poeje. Jjeyahua nei oya yani quea huiso. Ojjaña huasijje poquinaje jjadasiaquiya. \p \v 4 Ecuea epeejji cuana, miquianaya ca ca Eyacuiñajjija bacua cuana poanaje. Jamajjeya ohuaya miquianaya dasia mee jjima acani Jesosaja epeejji pojjeama cuana. Miquianaya ona jeabichajeajji jayojja jama poani. Eꞌe, Eyacuiñajjija Edojjoshahua Pame miquianajo nequi ca ca oe quea caꞌa nee nee. Eshahua cuana, Edosiquiana quea caꞌa pishana. Eshahuaa miquianaya quea mimishi po meeꞌajja cani. \v 5 Esohui huohuijji nisho cuana eshahua nijje jjapeequianiya jjejojo Eyacuiñajjija esohui jayojja jama huohui ajja. Ebaꞌejji quea mimishi onaaya quea boti nee nee acani. Dejja mimishiya jayojjaya huohui cani. Jamajjeya mimishi cuaa oya cuana shajjaꞌajja cani. \v 6 Eseya ca ca Eyacuiñajjija bacua cuana poani. Jamajjeya Jesosaja epeejji cuana Eyacuiñajji nijje jjapeequiani peaꞌaiya jjejojo esejaya esohui shajjaꞌajja cani. Pea cuana Jesosaja epeejji pojjeama ca ca Eyacuiñajji nijje jjapeequi sa poꞌyo ajja; ecuanajaya esohui shajjaꞌajja sa poꞌyo ajja. Jamajoya Jesosaja epeejji nei esejaya eba; ohuaya esejaya esohui shajjaꞌajja cani. Pea cuana, eshahuaja epeejji cuana esejaya eba peaꞌai; oya cuana esejaya esohui shajjaꞌajja sa poꞌyo ajja. \s1 Ojjaña Eyacuiñajjija quea boti nee poani \p \v 7 Epeejji cuana, miquianaya ecuea quea jea nee poani. Ojjaña cuana Eyacuiñajjija quea jea nee nee poani. Jamajjeya pea cuana quea jea nee nee ejjaꞌaqui tii tii. Eꞌe, jamajjeya eseya Eyacuiñajjija bacua poanijo o jayojja jama poani. Pea cuana quea jea nee nee ejjaꞌaqui Jesosa nijje jjapeequianijo. \v 8 Ojjaña joya pea cuana botiꞌama poani ca ca Eyacuiñajji nijje jjapeequi ajja, Eyacuiñajji ba po jjima peaꞌai. Eꞌe, Eyacuiñajjiya ojjaña cuana quea jea nee acani tii tii. \v 9 Eseya cuana ojaya quea jea nee nee. Jamajjeya ohuaya oja Bacua Ejja oe nei Jesosa huoojea ca poa ese que, jiquio meshi yasijje. Jama ohua acanajejoya, ojjañaja eba eseya Eyacuiñajjiya quea jea nee nee acani. Eꞌe, Jesosa ese que poeyanaje eseja mimishi cuana cuijeaꞌyohua. Jamajjeya eseya onijje baꞌe tiitii mee cajeꞌyo eyajo quea pame nee nee. \v 10 ¡Bacue! Yahuajo nei esejaya Eyacuiñajji botiꞌama poa. Jamatii ohuaya ca ca oe ebionei eseya quea jea nee aca poa. Jamajjeya ohuaya ojaya Ebacua Ejja Jesosa Quito huoojea ca poa ese que, manoꞌyohua eseja mimishi cuijeaꞌyojji sosejje. \v 11 Ecuea epeejji cuana, Eyacuiñajjiya eseya quea jea nee nee acanaje; jamajjeya ¡pea cuana quea jea nee nee ejjaꞌaqui! \v 12 Yahuajo, jjeya nei peaꞌai esejaya Eyacuiñajji ba jjima ecojjaja. Jamatii esejaya ojaya epeejji cuana quea jea poanijo tii Eyacuiñajji ese nijje nequiani. Ohuaya eseya pea cuana quea jea nee nee po meesahua cani. Jamaya Eyacuiñajji sa poani. \p \v 13 Eꞌe, Eyacuiñajjiya Edojjoshahua Pame ese que dobiquiya huoojea canaje. Jamajojoya Edojjoshahua Pameya eseya ba meesahua cani Eyacuiñajji ese nijje nequiani, eseya onijje jjapeequiani peaꞌai. \p \v 14 Epeejji cuana, eyaya Jesosa banaje ecojjaa. Jamajjeya ojjaña huasijje jama huohuimeya aña. Eseja Chii nei eyajo aniya oja Bacua Ejja Jesosa huoojea canaje meshi yasijje manoꞌyohua, ojjaña cuana ojjaña meshijo baꞌeca cuanaja mimishi cuana cuijeaꞌyohua onijje eyajo ebaꞌe tiitii meeꞌyojji. \v 15 Jamajjeya eseyaya jama huohuime aña baꞌa: —Jesosa Eyacuiñajjija Bacua Ejja oe nei. \p Ojjaña joya jama poaniya eꞌe jojo nei Eyacuiñajjija bacua cuana poani. Eyacuiñajji onijje nequiani peaꞌai. \v 16 Esejaya eba eꞌe jojo nei Eyacuiñajjiya eseya quea jea nee nee acani. \p Eyacuiñajjiya ca ca oe ojjaña quea jea nee nee acani. Jamajjeya ojjaña joya pea cuana quea jea nee nee ajji poani peaꞌai ca ca oe Eyacuiñajji nijje jjapee neineiquiani. Eyacuiñajji ma dejja cuana nijjeya nequiani peaꞌai. \v 17 Jamajjeya Eyacuiñajji esejaya quea jea nee nee poanijo pea cuana quea jea nee nee ejjaꞌaqui Jesosa Quito jayojja jama epojji. Jamajjeya eseya bichoꞌama poaje Eyacuiñajjijo. Jesosa Quito poe oꞌoya majje ohuaya ojjaña eseya sosequia cajeꞌyo ma eseya meshijo baꞌeya anaje sosejje. Shajjamaꞌ cuana ca ca ohuaya quea nee nee po mee cajeꞌyo. Ojaya epeejji quea pame nee cuana ca ca ohuaya baꞌe tiitii mee cajeꞌyo onijje eyajo. \v 18 Esejaya eba Eyacuiñajji, pea cuana peaꞌai esejaya quea jea nee nee poanijo eseya meteꞌama nei nei poaje. Eꞌe, Eyacuiñajji esejaya quea jea neejojo eseya jjashahuabaquiani jama baꞌa: —Eyacuiñajji enijje quea tecue epojji pojjeama. \p Jamajjeya meteꞌama poani. Ojjaña joya Eyacuiñajji quea jea aꞌajja ca ca quea mete poani. Jjashahuabaquiani jama baꞌa: —Eyacuiñajji enijje quea tecue nee nee poaje —jamaya jjashahuabaquianijo Jesosaja epeejji pojjeama poani. \v 19 Eꞌe, yahuajo nei nei Eyacuiñajjiya Jesosaja epeejji pojjeama cuana quea jea nee nee acanaje. Jamajjeya Eyacuiñajji quea jea nee nee ejjaꞌaqui, pea cuana eseyaya quea jea nee nee ejjaꞌaqui peaꞌai. \v 20 Beca cuana jama poani baꞌa: —Ecuea Eyacuiñajji quea jea nee nee. \p Jamatii oya cuana Jesosaja epeejji cuana quea jea nee aꞌajja. Jamajjeya oya cuana siajje poani. Pea cuana cojja ba majje botiꞌama acani. Jamajjeya ojaya Eyacuiñajji quea jea nee eꞌajji pojjeama ca ba jjima ecojjaja. \v 21 Eyacuiñajjiya eseya huohui ca poa jama baꞌa: —Eya, Eyacuiñajji miquianajaya quea jea nee nee poanijo ¡pea cuana quea jea nee acue peaꞌai! \c 5 \s1 Jesosaa eseya Edosiquiana jeabichajea mee cani \p \v 1 Ojjaña Jesosaja epeejji cuana jjashahuabaquiani jama baꞌa: —Jesosa Eyacuiñajjija huoojeaꞌyo ojjaña jaahuanajji. \p Eseya jamaya jjashahuabaquianijo, Eyacuiñajjiya eseya oja bacua cuana po mee cani. Ojjaña joya Eyacuiñajji, esejaya Chii nei eyajo ani quea jea nee nee ajji poani Eyacuiñajjija Bacua Ejja Jesosa quea jea nee ajji poani peaꞌai. \v 2 Oya jayojjaya Eyacuiñajji esejaya quea jea nee neejo, ojaya esohui jayojja jama poanijo peaꞌai esejaya eba jama baꞌa: Ojjaña Jesosaja epeejji cuana, Eyacuiñajjija bacua cuana esejaya quea jea nee poani. \v 3 Eyacuiñajji eꞌe jojo nei esejaya quea jea nee poanijo jiquio ecua ojaya esohui etehueꞌyo cuana jayojja jama poani. Ohuaya eseya jamaya ameesahua canijo, ojaya esohui cuana camajaꞌama. \v 4 Eꞌe, eseya Jesosa nijje jjapeequiani. Jamajjeya eshahuaja epeejji cuana mimicuiajeanobiajeaña. Eyacuiñajjija bacua cuana poanijo eseyaya mimishi cuana mimicuiajeanobiajeaña. Mimishiꞌama baꞌe mee aña peaꞌai. \v 5 Eꞌe jojo nei Jesosa Eyacuiñajjija Bacua Ejja oe nei. Jamaya jjashahuabaquianijo, onijje jjapeequianijo eseya mimishiꞌama baꞌeje. Eshahuaja epeejji cuana mimicuiajeanobiajeaña peaꞌai. \s1 Ehuohuiꞌyo Jesosa Quitojo \p \v 6 Jesosa Quito meshi yasijje poeyajo, Huaniya oya enajo besa mee ca poa Eyacuiñajjijo. Majoya ojaya enaꞌ cuayaquiajo Jesosa manoꞌya poa eseja mimishi cuijeaꞌyojji sosejje. Jamaya Edojjoshahua Pameya huohui ca poa Jesosa Quitojo. Ojaya esohui Jesosajo eꞌe nei poani. Eꞌe, Edojjoshahua Pame siajje po ajja nei nei. \v 7 Eꞌe, pea beca peejjimaa eyajo nequiya jamaya huohui cani Jesosa Quitojo. Eꞌe, Echii neiya, Ebacua Ejjaa, Edojjoshahua Pameya peaꞌai, mahuisohuaya oya jayojjaya huohui cani Jesosa Eyacuiñajjija Bacua Ejja. \v 8 Jiquio meshijo peaꞌai pea beca peejjimaa Jesosa Quitojo huohui cani peaꞌai. Eꞌe, Edojjoshahua Pameya jamaya huohui cani Jesosajo. Peaa Jesosa besa mee cajo Eyacuiñajjiya huohui ca poa jama baꞌa: “Jesosa ecuea Ebacua Ejja quea jea nee nee” aca poa. Jesosa manoꞌyajo ojaya enaꞌ cuayaquiꞌyonajejo peaꞌai ojjañaa jama aca poa baꞌa: “Oya Jesosa eꞌe jojo nei Eyacuiñajjija Bacua Ejja nei” poa. Mahuisohuaya oya jayojjaya Jesosa Quitojo huohui cani. Jamajjeya esejaya eba eꞌe jojo nei Jesosa Eyacuiñajjija Bacua Ejja. \v 9 Eꞌe, dejja cuanaja Jesosa ba neinei jjima. Jamatii onajaya esohui eseyaya shajjaꞌajjaña. Eyacuiñajjija esohui Jesosajo ca ca eꞌe nei nei. ¡Maya oe ejjashajjaꞌajja neineiqui! Ohuaya yahuajo huohui ca poa jama baꞌa: —Jesosa ecue Bacua Ejja. \p \v 10 Jamajjeya ojjaña joya jama poani baꞌa: —Jesosa Eyacuiñajjija Bacua Ejja eꞌe jojo nei —jamaya poanijo Edojjoshahua Pame ese nijje nequi. Jamaya jjashahuabaqui sa poꞌyo ajjajo ca ca siajje poani jama baꞌa: —Chojja, Jesosa Eyacuiñajjija Bacua Ejja pojjeama. Eyacuiñajjiya ecuana siajje aca poa —jama siajje pomeya poani cuana. \p \v 11 Eꞌe, Eyacuiñajjiya eseya huohui canaje jama baꞌa: —Eyaya ecue Ebacua Ejja Jesosa huoojeanaje miquiana baꞌe tiitii meeꞌyohua. Onijje jjapeequiajo miquianaya baꞌe tiitii meejeꞌyo eyajo onijje —Eyacuiñajji jamaya poanaje. \p \v 12 Jamajjeya oja Bacua Ejja Jesosa nijje jjapeequiajo, Eyacuiñajjiya eseya cuana baꞌe tiitii mee cajeꞌyo onijje eyajo. Onijje jjapeequi sa poꞌyo ajjajo ca se ca Eyacuiñajjija Bacua Jesosa nijje ebaꞌe meeꞌyojji pojjeama eyajo; quea nee nee poajeꞌyo tii tii. \s1 Ebaꞌejji quea pame nee eyajo \p \v 13 Ecuea epeejji cuana, miquianaya Eyacuiñajjija Bacua Ejja Jesosa nijje eꞌe jojo nei jjapeequiani. Jamajjeya eyaya jiquio esohui tehueaña miquiana ba meejji eꞌe jojo nei onijje ebaꞌe tiitiiꞌyojji eyajo. \v 14 Esejaya eba eꞌe jojo nei jama baꞌa: Eseyaya ojaya ejjashahuabaquijji jayojja jama añajo, Eyacuiñajji eseja Chii nei nijje mimianijo ohuaya eseya shajjaꞌajja cani. \v 15 Eꞌe, o jayojjaya jjashahuabaquime poanijo eꞌe jojo nei Eyacuiñajjiya shajjaꞌajja caje esejaya emimi onijje. Jamajjeya esejaya emimi onijje jayojja jama ohuaya acajeꞌyo. Jamajjeya eseya bichoꞌama onijje emimijji. \s1 ¡Esejaya epeejji quea mimishi poanijo mimicue Eyacuiñajji nijje! \p \v 16 Epeejji cuana, Jesosaja epeejji quea mimishi poani ba majje ¡ma epeejjijoya oe mimicue Eyacuiñajji nijje oja mimishi ecuijeaꞌyojji, o baꞌe tiitii meeꞌyojji! Jamajjeya Eyacuiñajjiya oja mimishi cuijea cajeꞌyo. Pea epeejji cuanajo, coya quea mimishi nee nee po tiitiianijo ecuea miquianaya ehuohuijji pojjeama ojo emimijji Eyacuiñajji nijje jama baꞌa: —Eyacuiñajji, ¡aꞌa ma epeejji quea nee po meejji jamatii quea mimishi atiitii canijo! —chojja, ¡aꞌa jamaya mimijji Eyacuiñajji nijje ma dejjajo! Eyacuiñajjiya joya quea mimishi nee nee ajji poani cuana quea nee nee po mee cajeꞌyo. \v 17 Eyacuiñajjija esohui jayojja jama aꞌajjajo eseya quea mimishi poani. Jamatii mimishi amajje eseya Eyacuiñajji nijje mimiꞌyajo ohuaya esejaya mimishi cuijea cajeꞌyo. Joya mimishi quea tai nee nee ajji tii tii poani ca ca Eyacuiñajjiya quea nee nee po mee cajeꞌyo. \s1 Esohui quijjeyejje nei tehue \p \v 18 Ecuea epeejji cuana, esejaya eba Eyacuiñajjija bacua cuana, ma ohua quea pame nee po mee caꞌyonaje quea mimishi tii tii poꞌyo ajja, pajea caꞌyonaje. Eyacuiñajjija Bacua Ejja, Jesosa Quitohua ojaya epeejji cuana jaahuana cani, nahue cani Edosiquianaja quea mimishi epo meeꞌyojji pojjeama. \v 19 Esejaya eba peaꞌai eseya Jesosaja epeejji poani, Eyacuiñajjija bacua cuana poani. Pea cuana ca ca eshahuaja epeejji poani. Edosiquiana aje oe ona huoojeajji poani. \v 20 Esejaya eba peaꞌai Eyacuiñajjija Bacua Ejja, Jesosa meshi yasijje poeyanaje. Ohuaya eseya quea jaꞌa nee nee jjashahuabaqui meesahua cani. Jamajjeya ohuaya eseya Eyacuiñajji eꞌe nei ba meesahua cani. Jamajjeya eseya Eyacuiñajjija Bacua Ejja oe nei nijje, Jesosa Quito nijje jjapeequi majje eseya Eyacuiñajjija bacua cuana poani. Jesosaja Chii ca ca oe Eyacuiñajji eꞌe nei ese baꞌe tiitii meeꞌyojji poani. \v 21 Jamajjeya ecuea epeejji cuana, ¡aꞌa eshahua cuana nijje mimijji, eyacuiñajji nisho nijje peaꞌai aꞌa mimijji! Jamaya capoahua. \p Mahuiso ecuea esohui. Eyaya, Huani bajjaniya jiquio esohui tehuenaje miquianajaya ebajji. Apoa.