\id 1CO - Ese Ejja NT -Bolivia 2012 (DBL -2013) 
\h 1 CONITIO 
\toc1 Paboja Etehueꞌyo Conitojo Baꞌe Cuana Nuasijje Ebionei 
\toc2 1 Conitio 
\toc3 1 Co 
\mt2 PABOJA ETEHUEꞌYO CONITOJO BAꞌE CUANA HUASIJJE EBIONEI 
\mt1 1 CORINTIOS 
\c 1  
\s1 Pabohua tehue canaje Jesosaja epeejji cuana Conitojo baꞌe yasijje 
\p  
\v 1 Jesosaja epeejji cuana, eya Pabo, Jesosa Quitoja huoojeaꞌyo ojaya esohui huohuijji. Jamaya Eyacuiñajjiya a sa acani. Jesosaja epeejji Sotene enijje nequi.  
\v 2 Eyaya tehueaña miquiana huasijje, Jesosaja epeejji cuana Conito cuiñajjijo baꞌeca huasijje, ojjaña meshijo baꞌeca huasijje peaꞌai tehueaña. Eꞌe, yahuajo Eyacuiñajjiya miquianaya ojjaña babaca canaje Jesosaja epeejji eꞌe jojo nei epoꞌyojji, quea pame nee. Jamajjeya miquianaya ojjaña cuana jama poani baꞌa: —Jesosa, ¡e jaahuanajji pocue! —jamaya poani esejaya Emeshi Mese nei Jesosa Quito nijje, ojjaña esejaya Emeshi Mese nei nijje.  
\v 3 ¡Esejaya Emeshi Mese nei Jesosa Quitohua, Eyacuiñajjiya esejaya Chiiya peaꞌai miquianaya cajaahuana cahua, quea bei cabaꞌe mee cahua peaꞌai! 
\s1 Pabohua Eyacuiñajji bihuia canaje 
\p  
\v 4 Eya Eyacuiñajji nijje mimiani miquianajo quea huiso nee jama baꞌa: —Eyacuiñajji, miya quea pame nee nee. Jesosa Quitoja epeejji ojjaña cuana jaahuanaña quea pame nee nee —eya poani. 
\p  
\v 5 Eꞌe epeejji cuana, miquianaya Jesosa Quitoja epeejji poanijo, ohuaya miquianaya quea pame nee ameesahua cani tii, quea huiso nee. Jamajjeya miquianaya ojaya ejjashahuabaquijji ba meesahua canaje quea jaꞌa nee. Ojaya esohui ba meesahua canaje, huohui meesahua canaje peaꞌai.  
\v 6 Esohui quea pame nee Jesosa Quitoja eyaya miquianaya huohui huichaꞌa huichaꞌanaje yahuajo. Jamajjeya ojaya esohui jayojja jama miquianaaya atiitiiaña.  
\v 7 Jamajjeya esejaya Emeshi Mese nei Jesosa Quitoja epoe oꞌoyajjijo ishoañajo, o jayojjaya jama Edojjoshahua Pameya miquianaya ameesahua cani quea huiso.  
\v 8 Eꞌe, Edojjoshahua Pameya miquianaya Jesosa jayojja jama amee canijo, Jesosa nijje jjapeequi pajeaꞌyo ajja. Jamajjeya esejaya Emeshi Mese nei poe oꞌoyajo, Eyacuiñajjiya miquianaya ba caje mimishiꞌama.  
\v 9 Eꞌe, Eyacuiñajjiya miquianaya babaca canaje ojaya Ebacua Ejja nijje, Jesosa Quito nijje ejjapeequijji tii, esejaya Emeshi Mese nei nijje. Eyacuiñajjiya ojaya esohui jayojja jama acajeꞌyo nei nei, eꞌe jojo nei; miquianaya Jesosaja epeejji quea caꞌa nee po mee cajeꞌyo tii tii. 
\s1 Ojaya epeejji cuana ojee cajjapeequiꞌyahua Jesosa nijje 
\p  
\v 10-11 Ecuea epeejji cuana, Jesosa Quitoja epeejji Coeja huapa pojjeama poeyanaje e que. Enijje miminaje miquianajo jama baꞌa: —Pabo, Jesosa Quitoja epeejji cuana Conitojo baꞌe jjamimicuiajea nobiajeaquiani quea huiso nee —poanaje. 
\p Epeejji cuana, ¿apiojji acuae nequiana jjamimicuiajea nobiajeaquiani soꞌo? Jamaya miquianaya quea tai poani. 
\p Jamajjeya ¡shajjaꞌajjacue mo! Esejaya Emeshi Mese neiya Jesosa Quitohua eya huoojea canaje ojaya esohui huohuiya. Jamajjeya eyaya miquianaya huohuiaña jama baꞌa: Ojjaña miquianaya Jesosa Quitoja epeejji poanijo ¡ojjaña ojaya ejjashahuabaquijji jayojja jama jjashahuabaquicue! ¡Aꞌa jjamimicuiajea nobiajeaquijji! ¡Aꞌa peapea ejjashahuabaquijji ajji! Eꞌe, ¡ojee jjapeequicue quea bei nee Jesosa nijje!  
\v 12 Miquianaya aje oe beca cuana jama poani baꞌa: —Eya ca iña Pabo shajjaꞌajjajji poani. 
\p Pea ca jama poani baꞌa: —Eya ca iña Apono shajjaꞌajjajji. 
\p Pea ca jama poani baꞌa: —Eya ca iña Peno shajjaꞌajjajji. 
\p Pea ca jama poani baꞌa: —Eya ca iña Jesosa Quito shajjaꞌajjajji poani —nequiana poani, de. 
\p  
\v 13 ¿Apiojji acuae nequiana jamaya jjamimicuiajea nobiajeaquime poani soꞌo? ¿Aꞌa Jesosa ojjañaja mimishi cuijeaꞌyojji pojjeama? ¿Aꞌa ojjaña jaahuanajji pojjeama? Eꞌe, oya ojjaña ojaya epeejji cuanaja mimishi cuijeaꞌyojji, ese jaahuanajji oe nei poani tii tii. Eya pojjeama miquianaja mimishijo manojeꞌyo. Jesosa Quito ca ca oe miquianajo manoꞌyonaje acui ecueataꞌapeejo miquianajaya mimishi cuijeaꞌyojji. Onaaya miquianaya besa mee canaje Jesosa nijje jjapeequianijo, enijje jjapeequianijo pojjeama.  
\v 14 Jamajjeya eya, Pabo quea bihui poani ecuea miquianaya besa mee jjimajo. Jesosaja epeejji cuana oe pojji eyaya besa meenaje Quipo, Mayo peaꞌai.  
\v 15 Eꞌe, eyaya oe pojji besa meenajejo, ejjamimicuiajea nobiajeaquijji pojjeama pea cuana nijje jama baꞌa: —Pabohua ecuana besa mee canaje o shajjaꞌajjajji epojji —eꞌajji pojjeama. 
\p Eꞌe, eyaya miquianaya besa meenaje ecuea epeejji epojji pojjeama. 
\p  
\v 16 Eꞌe pojjaꞌa eyaya Etepana, ojaya huapa pojjeama cuana peaꞌai besa meenaje. Oe pojji pea cuana besa meenaje peaꞌai pojjaꞌa. Cuaꞌa de, pajeaꞌyonaje eyaya.  
\v 17 Jesosa Quitoja eya huoojea jjima ojaya epeejji cuana besa meeya. Chojja, ohuaya eya huoojea canaje ojaya esohui quea pame nee huohuiya jama baꞌa: —Ecuea esohui quea pame nee huohuiañajo, ¡eya acui ecueataꞌapeejo manoꞌyonajejo oe huohuicue! ¡Aꞌa dejjaja ejjashahuabaquijji jayojja jama huohuijji, ma ojaya ejjashahuabaquijji quea jaꞌa poso acanija! Jamaya ehuohuiꞌyo jojjemo, miya quea sohui jaꞌa jojjemo ojjaña mi bihuiajji pome. Jamajjeya jamaya ehuohui jojjemo Eyacuiñajji bihuia jjima acame. “Jesosa Quito acui ecueataꞌapeejo manoꞌyonaje ecuanaja mimishi cuijeaꞌyojji” ajjima acame onaaya —jamaya Jesosaa eya huohui cani. 
\s1 Eyacuiñajjija ejjashahuabaquijji esejaya ejjashahuabaquijji jayojja jama pojjeama 
\p  
\v 18 Eyacuiñajjija esohui quea pame nee Jesosajo, oya manoꞌyonaje esejaya mimishijo shajjaꞌajja majje shajjamaꞌ cuana jama poanaje baꞌa: —Cajaa Jesosaja esohui, ma oya ojjañaja mimishi cuijeaꞌyojji poani; acui ecueataꞌapeejo manoꞌyonaje cajaa peaꞌai —poanaje. Maya Eyacuiñajjiya quijje quea nee nee po mee cajeꞌyo. 
\p Eseya, Jesosaja epeejji cuana ca ca Eyacuiñajjiya baꞌe tiitii mee cajeꞌyo. Eꞌe, oja sohui shajjaꞌajja majje eseya jama poani baꞌa: —Eyacuiñajji quea caꞌa nee neeya eseya baꞌe tiitii mee cajeꞌyo onijje; oja Bacua Ejja Jesosa acui ecueataꞌapeejo manoꞌyonaje esejaya mimishi cuijeaꞌyojji —poani. 
\p  
\v 19 Eꞌe, yahuajo nei Eyacuiñajjiya Isaia tehue mee ca poa jama baꞌa: 
\q1 “Beca cuana jama poani baꞌa: —Ecuea eba ojjaña —poani. O shajjaꞌajjajji poaniya peaꞌai jama acani baꞌa: —Eꞌe de, ¡ojjaña ojaya eba! —poso acani. Ojjaña ojaya eba poso acani. Eyaya ca ca ojjaña cuana ba meeje ojaya eba oe pojji nei”. 
\m Jamaya Eyacuiñajjiya yahuajo nei Isaia tehue mee ca poa. 
\p  
\v 20 Eꞌe, Eyacuiñajji ese jayojja jama jjashahuabaqui ajja. Ojjaña ba epo poso ohuaya ba cani quea sapa caꞌa. Eꞌe, dejja quea huiso esohui bajji, esohui huohuijji cuana, joya dejja cuanaja ejjashahuabaquijjijo mimicuiajeanobiajea cani peaꞌai quea huiso ba epo poso Eyacuiñajjija esohuijo Jesosajo jjabahuejjaqui mee ajja jama baꞌa: Eyacuiñajjiya eseya ba cani emimishi cuijeaꞌyo Jesosa nijje jjapeequianijo ma dejja cuanajaya ba jjima. Yajja jjabahuejjaqui meeme yajji, quea huiso ba epo poso oya jjabaquiani. 
\p  
\v 21 Eyacuiñajjija ejjashahuabaquijji quea jaꞌa poanijo ohuaya eseya baꞌe tiitii mee caje onijje, Jesosa nijje jjapeequianijo, ojaya esohui shajjaꞌajja poquiañajo peaꞌai. Ohuaya eya esohui quea pame nee Jesosajo huohui mee canaje. Jamatii ojjaña quea jjashahuabaqui quehua jama poani baꞌa: —¿Yajja yajji joya miquianaaya huohuiaña Jesosa manoꞌyonaje esejo, esejaya mimishi cuijeaꞌyojji? Quea jjashahuabaqui quehua miya poani, de —jamaya Jesosaja epeejji pojjeama poani. 
\p  
\v 22 Eꞌe de, ecuana Jodio cuaa jama acani baꞌa: —¡Eyacuiñajjiya jayojja acue, ma dejjaa ajjima acani! Majoya ecuaaya miya baje eꞌe jojo nei Eyacuiñajjija huoojeaꞌyo ojaya esohui huohuijji —jamaya quea tai poani Jodio cuana. 
\p —¡Esohui huohuijji quea huiso ba epo jayojja jama mimicue! Jamajjeya ecuaaya miya baje Eyacuiñajjija huoojeaꞌyo esohui huohuijji —jamaya quea tai poani Jodio pojjeama cuana. 
\p  
\v 23 Ecuanaya ca ca jama poani baꞌa: —Jesosa Quito Eyacuiñajjija huoojeaꞌyo ojjaña jaahuanajji acui ecueataꞌapeejo manoꞌyonaje eseja mimishi cuijeaꞌyojji. 
\p Jesosa Quitoja esohui shajjaꞌajja sa po ajja jjejojo Jodio cuana quea quene poani, poquiquehuani tii onijje jjapeequi ajja jjejojo. Jodio pojjeama cuaa peaꞌai esohui cajaa acani: —Chojja Pabo, miyaya esohui quea jaꞌa pojjeama huohuiaña —jama siajje pomeya onaya poani. 
\p  
\v 24 Jamatii Eyacuiñajjiya Jodio cuana, Jodio pojjeama cuana peaꞌai babaca canaje Jesosa Quitoja epeejji nei epoꞌyojji. Esejaya, Jesosa Quitoja epeejji cuanaja eba Jesosa Quitoja esohui quea pame nee. Eꞌe, Eyacuiñajjiya Jesosa huoojea canaje mimishi cuijeaꞌyojji. Jamajjeya esejaya eba Eyacuiñajji quea caꞌa nee nee, ojjaña ojaya eba.  
\v 25 Eꞌe, Eyacuiñajji quea jjashahuabaqui jaꞌa nee nee. Ojjaña nei nei ojaya eba. Oya quea caꞌa nee nee; pea chamaꞌ o jayojja. Jamajjeya ohuaya eseya baꞌe tiitii mee cajeꞌyo Jesosa Quito acui ecueataꞌapeejo esejaya mimishijo manoꞌyonajejo. Jamatii Jesosaja epeejji pojjeama aje oe jama poani baꞌa: —¿Yajja poajo acuae Eyacuiñajjiya ecuanaja mimishi cuijea caꞌyome Jesosa manoꞌya poajo? Chojja —acani quea quehua jjashahuabaquiani jjejojo. 
\s1 Eyacuiñajjiya eseya babaca canaje ojaya epeejji epojji jamatii onajaya eseya botiꞌama 
\p  
\v 26 Epeejji cuana, ¡jjashahuabaquicue! Eyacuiñajjiya miquianaya Jesosa nijje jjapeequi meesahua jjimajo, ¿achajja miquianaya poanaje? Beshahua nei esohui ba po jjima. Beshahua nei ona huoojea po jjima, emeshi mese cuanaja bacua po jjima peaꞌai miquianaya poanaje.  
\v 27 Jamatii Jesosaja epeejji pojjeamaa jama acani baꞌa: —Jesosaja epeejji quea pame pojjeama. Oya cuana quea jjashahuabaqui jaꞌa pojjeama —jama posoya acani Jesosaja epeejji pojjeama cuaa. 
\p Eyacuiñajjiya ca ca eseya babaca canaje ojaya epeejji epojji, quea huiso esohui ba epo ona quea bicho po meejji. Eyacuiñajji jama poani baꞌa: —Jesosaja epeejji pojjeama quea pame pojjeama jjashahuabaquiani —jamaya Eyacuiñajji poani. 
\p  
\v 28 Eꞌe, Jesosaja epeejji pojjeamaa eseya niñe ba cani jama baꞌa: —Jesosaja epeejji cuana ona huoojeajji jayojja pojjeama, esohui ba po jjima jayojja peaꞌai, aemaꞌ peaꞌai. ¿Ajeo oya cuana eshajjaꞌajjajji? —poani. 
\p Jamatii Eyacuiñajjiya eseya iyaa ca poa ojaya ebabaca. Jamajjeya ohuaya onaya ba mee caje jama baꞌa: —Miya ojjaña ba epo poso poanijo, miquianajaya ejjashahuabaquijji quea tai. Miquianaya quea pame pojjeama. ¡Quea bicho pocue! —Eyacuiñajjiya acani. 
\p  
\v 29 Jamajjeya ae pishana Eyacuiñajji nijje mimije jama baꞌa: —Eyacuiñajji, ¡bacue! Eya ca ca iña jamatii quea pame nee —jamaya emimijji pojjeama miya Eyacuiñajji nijje. 
\p Quijje peaꞌai ojjaña Eyacuiñajji cojja nei nequi majje quea bicho, quea mete poaje.  
\v 30 Jamatii Eyacuiñajjiya eseya Jesosa Quito nijje jjapeequi meesahua caꞌyonaje. Ojaya epeejji poanijo, ojaya ejjashahuabaquijji ba meesahua cani. Ojaya esohui jayojja jama baꞌe meesahua cani. Mimishi cuijeaꞌyo majje quea boejea po mee cani. Eseya baꞌe tii tii mee cajeꞌyo onijje, Eyacuiñajjiya.  
\v 31 Yahuajo nei Eyacuiñajjija esohui etehueꞌyo jama poa baꞌa: 
\q1 “Jamajjeya ¡esejaya Emeshi Mese nei bihuiacue! Oya oe nei quea pame nee. Aꞌa jama pojji baꞌa: —Eya ca ca iña jamatii quea pame nee”. 
\m Jamaya Eyacuiñajjija esohui etehueꞌyo poa. 
\c 2  
\s1 Jesosa Quito acui ecueataꞌapeejo manoꞌyonaje 
\p  
\v 1 Ecuea epeejji cuana, yahuajo miquiana que poe jeahuaa eyaya esohui quea pame Jesosajo huohuinaje. Eya jama po jjima baꞌa: —Eya ohueya dejja ojjaña esohui ba epo nei nei. Ecuea emimi quea jaꞌa. ¡Jamajjeya shajjaꞌajjacue mo! —jamaya ajjima ecuea. 
\p Chojja, miquiana que poe majje eyaya Eyacuiñajjija esohui eꞌe nei Jesosa Quitojo huohuinaje, ma onajaya yahuajo ba jjima poa.  
\v 2 Miquiana que poe jjimahua eya jjashahuabaquinaje jama baꞌa: —Eyaya Conitojo baꞌe cuana huohuije esohui quea pame nee Jesosa Quitojo, ma acui ecueataꞌa peejo manoꞌyonaje esejaya mimishi cuijeaꞌyojji. Pea esohui huohui jjima aje. 
\p  
\v 3 Miquiana que poe majje eya jjashahuaba neineiquinaje jama baꞌa: —¿Aꞌa eyaya Eyacuiñajjija esohui huohuije quea jaꞌa nee pojjaꞌa? —eya quea mete poanaje. 
\p  
\v 4 Jamajjeya Edojjoshahua Pame quea caꞌa neeya eya huohui meesahua canaje esohui eꞌe nei miquianajaya eshajjaꞌajjajji. Esohui huohuijji ojjaña ba epohua jayojja jama ecuea huohui jjima.  
\v 5 Jamajjeya Eyacuiñajjiya miquianaya Jesosa Quito nijje jjapeequi meesahua canajejo, ojaya epeejji nei poanaje. Dejja ojjaña esohui ba epohua jama ecuea huohui jjima. 
\s1 Eyacuiñajjija ejjashahuabaquijji eꞌe jojo nei quea jaꞌa nee 
\p  
\v 6 Jamatii Jesosaja epeejji eyacua pojjeama eyaya huohuiaña; etii jayojja eyaya huohuiaña esohui quea jaꞌa nee, Eyacuiñajjija ejjashahuabaquijji. Jesosaja epeejji pojjeamaja esohui jayojja jama pojjeama, emeshi mese cuanaja esohui jayojja jama pojjeama eyaya esohui huohuiaña, eshahuaja esohui jayojja jama pojjeama peaꞌai. Maya quijje ojjaña caꞌaꞌama poaje. Eyacuiñajjiya oya cuana ona huoojeajji popajea mee cajeꞌyo. 
\p  
\v 7 Eꞌe, ojjaña nei nei Eyacuiñajjija eba. Eyaya Eyacuiñajjija ejjashahuabaquijji quea jaꞌa nee Jesosa Quitojo huohuiaña. Yahuajo maya ejjashahuabaquijji ba mee jjima ojjaña, Eyacuiñajjija. Jjeya ca ca ohuaya eseya, ojaya ehuoojeaꞌyo cuana ba mee canaje jama baꞌa: Meshi pana jjimahuajo tii Eyacuiñajjiya eseya babaca ca poa Jesosaja epeejji cuana epoꞌyojji, onijje ebaꞌe tiitiiꞌyojji. Jesosa Quitohua manoꞌyo majje oja epeejji cuana baꞌe tiitii mee cajeꞌyo quea pame nee onijje. Jamaya Eyacuiñajji jjashahuabaquia poa.  
\v 8 Maya Jodio pojjeamaja emeshi meseja ba jjima poa; Jodio etii cuanaja ba jjima peaꞌai poa. Maya onajaya eba jojjemo Emeshi Mese nei quea caꞌa Jesosa Quito bajjani acui ecueataꞌa peejo mano meeꞌyo jjima aca quiaye.  
\v 9 Jamatii Eyacuiñajjiya yahuajo nei esohui tehue mee ca poa jama baꞌa: 
\q1 “Oya esejaya quea jea neejo, Eyacuiñajjiya eseya quea pame nee acajeꞌyo, ojjaña ojaya epeejji cuana. Maya esejaya ba jjima ecojjaja, maya esejaya shajjaꞌajja jjima eshajjaja, huohui jjima peaꞌai. Maya eseya jjashahuabaqui jjima peaꞌai. Eseya ohuaya quea pame nee nee acajeꞌyo”. 
\m Yahuajo nei jamaya tehue mee ca poa.  
\v 10 Maya Edojjoshahua Pameya eseya ba mee cani: Eyacuiñajjiya quea pame nee acani esejo, ma Jesosa Quitohua ojaya epeejji cuana baꞌe tiitii mee cajeꞌyo onijje eyajo. 
\p Ojjaña Edojjoshahua Pameja eba. Jamajjeya ese que dobiqui majje ohuaya eseya ba mee cani Eyacuiñajjija ejjashahuabaquijji.  
\v 11 ¿Ajea eba oe dejjaja ejjashahuabaquijji? Ojaya eba ojaye nei ojaya ejjashahuabaquijji, onajaya ba jjima. Oya jayojjaya Edojjoshahua Pameja eba Eyacuiñajjija ejjashahuabaquijji, ojaye neija. Eyacuiñajjiya eseya baꞌe tiitii mee cajeꞌyo Jesosa nijje jjapeequianijo ojaya eba nei.  
\v 12 Eꞌe, eseya Jesosaja epeejji poanijo shajjamaꞌ jayojja jama jjashahuabaqui ajja. Jamajjeya Eyacuiñajjiya Edojjoshahua Pame ese que dobiqui mee canaje. Ohuaya eseya ba mee canaje jama baꞌa: Jesosaja epeejji poanijo ca ca oe Eyacuiñajjiya eseya baꞌe tiitii mee cajeꞌyo onijje, eseya ojaya quea jea neejo. Quea pame nee nee eseya acajeꞌyo peaꞌai ohuaya.  
\v 13 Jamajjeya Jesosaja epeejji pojjeamaja esohui jayojja jama esejaya ehuohuijji pojjeama. Chojja, Edojjoshahua Pameya eseya huohui meesahua cani ojaya ejjashahuabaquijji quea jaꞌa Jesosaja epeejji nei cuana huasijje. 
\p  
\v 14 Jamatii Jesosaja epeejji pojjeamaja ba jjima Edojjoshahua Pame. Ba meemee ajja Edojjoshahua Pameja ejjashahuabaquijji, quea quehua nee ojaya. Jamajjeya jama poani baꞌa: —¿Apiojji Jesosa nijje ejjapeequijji? Maya ecuanajaya esohui quea quehua —jamaya poani. 
\p Eꞌe, ojaya jamatii ebajji pojjeama Jesosa Quitoja esohui. Maya Edojjoshahua Pameya eseya ba mee cani.  
\v 15 Eseya ca ca Jesosaja epeejji poani. Edojjoshahua Pameya ese que dobiqui majje ba mee cani ojjaña ebaꞌejji quea pame; ebaꞌejji quea mimishi peaꞌai ba mee cani jama baꞌa: —Eꞌe, jamaya. ¡Quea pame nee acue! —amee cani—. Peaꞌai quea tai jjashahuabaquianijo, ohuaya jama amee cani baꞌa: —Chojja, jamaya quea tai, Eyacuiñajjija botiꞌama —ameesahua cani peaꞌai ojjaña quea jaꞌa ebaꞌejji. 
\p Maya onajaya quea quehua nee nee. Jamajjeya Jesosaja epeejji pojjeamaja ojaya epeejji eniñebajji pojjeama jama baꞌa: —¿Apiojji miquianaya jama baꞌyani? ¿Apiojji ma esohui shajjaꞌajjaña, huohuiaña peaꞌai? —jamaya eꞌajji pojjeama onajaya. 
\p  
\v 16 Eꞌe, yahuajo Eyacuiñajjija esohui etehueꞌyo jama poa baꞌa: 
\q1 “Ojjaña Eyacuiñajjija ejjashahuabaquijji ¿ajea eba? Chamaꞌ. ¿Aꞌa eseyaya Eyacuiñajji ba meesahuaje? Chojja”. 
\m Jamaya yahuajo nei poa. 
\p Jamatii Jesosa nijje jjapeequianijo, Edojjoshahua Pameya eseya Eyacuiñajjija ejjashahuabaquijji ba meesahua cani. 
\c 3  
\s1 Pabohua Jesosaja epeejji jjabahuejjaqui mee cani 
\p  
\v 1 Ecuea epeejji cuana, miquianaya ebacua eshoꞌi jayojja jama poani, quea jjashahuabaqui jaꞌa pojjeama poani tii tii. Eꞌe, yahuajo miquiana nijje nequiya eyaya Jesosa Quitoja huohuinaje. Jamatii beshahua nei miquianaya jjashajjaꞌajjaqui ajja. Jesosa nijje jjapee neineiqui jjima jayojja jama poani; ojaya epeejji pojjeama jama poani.  
\v 2 Jiquio ecua ebacua eshoꞌi tojjo baꞌe noe quia jjima acani jayojja jama ecuea miquianaya huohui jjima esohui quea jaꞌa nee quea camaja ebajji. Jjeya peaꞌai miquianaya Jesosaja epeejji etii jayojja jama pojjeamajo ma esohuijo jjashajjaꞌajjaqui ajja.  
\v 3 Miquianaaya aje oe Jesosaja epeejji pojjeamaa jayojja tiiya aña. Eꞌe, Jesosaja pea epeejji cuanaja esohui shajjaꞌajja sa poꞌyo ajja. Jjamimicuiajea nobiajeaquiani. Jamaya poanijo miquianaya Jesosaja epeejji quea jaꞌa pojjeama. Ojaya epeejji pojjeama jama poani, de.  
\v 4 Eꞌe, miquianaya aje oe jama poani baꞌa: —Eya ca iña Pabo shajjaꞌajjajji poani. 
\p Beca ca jama poani baꞌa: —Eya ca ca Apono shajjaꞌajjajji. 
\p Jamaya poanijo Jesosaja epeejji quea jaꞌa nee jama jjashahuabaqui ajja miquianaya, de. 
\s1 Ecuana Apono nijje Jesosaa huoojea caꞌyonaje ojaya esohui huohuijji epojji 
\p  
\v 5 Eya, Pabo Apono jayojja Jesosaja esohui huohuijji. Ohuaya ecuana huoojea caꞌyonaje ojaya esohui huohuiya. Jamajjeya miquianaya Jesosa nijje jjapeequiꞌyonaje ecuanaja esohui shajjaꞌajja majje. Eꞌe, Eyacuiñajjiya ojjaña ecuana chaco mee cani. Ojaya esohui jama poani eya. Ojaya esohui jayojja jama acani Aponohua peaꞌai.  
\v 6 Eyaya Eyacuiñajjija esohui huohui coonaje miquiana huasijje. Aponohua ma esohui huohui ca oꞌoyanaje. Eyacuiñajjiya ca ca oe miquianaya ojaya esohui ba meesahua caꞌyonaje. Eꞌe, jiquio ecua acui sisi banajjiya bana cani jayojja jama eyaya, Pabohua Eyacuiñajjija esohui huohui coonaje miquiana huasijje. Echacojjiya acui sisi ebanaꞌyo enaa sha cani jayojja jama Aponohua esohui huohui ca oꞌoyanaje miquianajaya eshajjaꞌajjajji.  
\v 7 Esohui huohui coojjiya, esohui huohui oꞌoyajjiya peaꞌaiya ishoaꞌajja cani esohui huohui majje. Eyacuiñajjiya ohuaye nei ojaya esohui ba meesahua cani. Eꞌe, jiquio ecua acui sisi banajjiya, acui sisi shajjiya peaꞌai chaco majje ishoaꞌajja cani aꞌa acui tiijeꞌyo ebajji jayojja jama Eyacuiñajjiya ohuaye nei acui sisi jayojja tii mee cani.  
\v 8 Ebanajji epo acui sisi shajji jayojja jama jjashahuabaquiani jama baꞌa: —Eya quea pame nee chaco majje, eꞌacui yiye meseya eya sosequia caje —jjashahuabaquiani cuana. 
\p Eꞌe jojo nei eꞌacui yiye meseya jamaya acajeꞌyo.  
\v 9 Miquianaya Eyacuiñajjija acui yiye jayojja. Eꞌacui yiye mese jamaa Eyacuiñajjiya miquianaya quea pame nee jaahuana cani. Jiquio ecua acui yiye chacojji jamaya ecuanaya Apono nijje Eyacuiñajjija echacojji poani; miquiana que ojaya esohui huohuiaña. 
\s1 Jesosaja epeejji cuana Eyacuiñajjija equi jayojja 
\p Jiquio ecua eꞌequi meseya oja equi jaahuana cani jayojja jama Eyacuiñajjiya miquianaya jaahuana cani, ojjaña.  
\v 10 Eyacuiñajjiya Jesosa Quito equi yamajjana quea caꞌa nee jayojja jama nequi mee cani. Ecuana Apono nijje Eyacuiñajjija equi iyajji jayojja jama poani. Jiquio ecua echacojjiya equi iya cani eyamajjana nequia majje equi eꞌoquejji pojjeama jayojja jama ecuanaaya Jesosaja esohui huohuiaña, miquianaya nahueaña peaꞌai Jesosa nijje ejjapeequi meesahuajji, quea nee nee epojji pojjeama cuaquijo. Eyacuiñajjiya eya huoojea majje quea caꞌa po mee canaje ojaya esohui pea cuana huasijje ehuohui coojji. Jamajjeya eya equi yamajjana nequiajji jayojja poanaje. Jjeya pea cuaa miquianaya esohui huohui cani e chamajo. Oya equi iyajeyojji jayojja jama poani. ¡Miquiana quea jaꞌa nee nee casohuihuohui cahua! 
\p  
\v 11 Yahuajo Eyacuiñajjiya Jesosa Quito jiquio meshi cuana huasijje huoojea majje eseya huohui canaje jama baꞌa: —¡Aꞌa pea nijje jjapeequijji! ¡Ecuea Ebacua Ejja oe neija esohui shajjaꞌajjacue! —acanaje. 
\p Equi iyajjiya eyamajjana quea caꞌa nequia cani jayojja jama equi nequi tiitii meeꞌyojji jayojja jama Eyacuiñajjiya oja Bacua oe nei huoojea canaje ese baꞌe tiitii meeya. ¡Oya oe shajjaꞌajjacue!  
\v 12 Eꞌe, esohui huohuijji cuana equi iyajji jayojja. Beca equi iyajjiya equi quea caꞌa nee iya cani. Iya cani mei huoꞌo, mei oshe quea siyo, mei copo quea siyo nee nee pojjaꞌa. Pea cuaa equi iya cani caꞌaꞌama; acui equi, bequiobo iña, huenihueni equi pojjaꞌa. Jamaya esohui huohuijji quea hueaa acani.  
\v 13 Quijje cuaqui poeyajo, equi quiyoꞌyajo, ojjañaa ba caje ache equi iyajji quea pameya equi quea caꞌa nee iya canaje, ache equi iyajji quea hueaa equi caꞌaꞌama iya canaje peaꞌai. Oya jayojjaya Jesosa Quitohua poe oꞌoya majje huohui caje jama baꞌa: —Ma esohui huohuijji quea pameya esohui eꞌe nei huohui canaje. Jamajjeya o shajjaꞌajjajji cuana enijje jjapeequi pajea jjima acaje. Maya esohui huohuijji quea huea poanaje; quea tai esohui huohui canajejo, o shajjaꞌajjajji cuana enijje jjapeequi pajeaꞌyonaje. 
\p  
\v 14 Jiquio ecua cuaqui poeyajo, equi iyajji quea jaꞌaja equi nequije quea caꞌa jayojja jama Jesosa poe oꞌoyajo, esohui huohuijji quea jaꞌa nee Eyacuiñajjiya sosequia caje quea pame nee, oja chaco quea pame sosejje.  
\v 15 Equi iyajji quea hueaja ca ca oja equi quiyo jeyojeyojeꞌyo cuaqui poeꞌyajo jayojja jama poaje esohui huohuijji quea huea, Jesosa poe oꞌoyajo. Eyacuiñajjija oya cuana esosequiajji pojjeama. Jamatii equi jijiꞌyajo dejja cuayajeaquinanani equiyoꞌyo poajejje jayojja jama oya cuana cuaquijo quiyoꞌyo ajja poajeꞌyo, beshahua nei. 
\s1 Miquianaaya Eyacuiñajjija equi ¡aꞌa quea mimishi ajji! 
\p  
\v 16 Ecuea epeejji cuana Conitojo baꞌe, ¡aꞌa pajeaꞌyojji eseya Eyacuiñajjija equi jayojja! Edojjoshahua Pame nei ese que dobiquinaje Jesosaja epeejji poanijo. Oya miquiana nijje anijo, miquianaya Eyacuiñajjija equi jayojja poanaje.  
\v 17 Eyacuiñajjija ojaya equi quea nahue nee: —Ecuea equi quea pame nee, jehueꞌama. Miquianaya ecuea equi jayojja poanaje. Jamajjeya ecuea equi, miquea eyami, nahue ajjajo, quea mimishi poanijo eyaya miquianaya tecueaje —ohuaya acanaje. 
\s1 ¡Eyacuiñajjija ejjashahuabaquijji quea jaꞌa bacue, dejjaja pojjeama! 
\p  
\v 18 Ecuea epeejji cuana, ¡aꞌa quea jjashahuabaqui quehua pojji! Miquianaya beca cuana jama poani baꞌa: —Ecuana quea jjashahuabaqui jaꞌa poani, dejja ojjaña ba epo jayojja jama poani. 
\p Chojja. ¡Jjashahuabaquicue jama baꞌa: —Eyacuiñajji, ecuea eba oe pojji nei. ¡Eya ba meesahuacue miquea ejjashahuabaquijji quea jaꞌa nee! —jamaya oya acue! 
\p  
\v 19 Jesosaja epeejji pojjeama quea huiso jamaya jjashahuabaquiani baꞌa: —Ojjaña ecuanaja eba quea jaꞌa nee nee. 
\p Eyacuiñajjiya ca ca onajaya ejjashahuabaquijjijo jama poani baꞌa: —Oya cuana quea quehua jjashahuabaquiani, quea jaꞌa pojjeama, cajaa —oya poani. 
\p Eꞌe, Eyacuiñajjija esohui etehueꞌyo yahuajo nei jama poa baꞌa: 
\q1 “Quea huiso jiquio meshi cuanajo baꞌe jjashahuaba taiquiani jama baꞌa: —Ecuanaja ejjashahuabaquijji quea jaꞌa nee poani —poso oya poani. Chojja, oya cuana jjadasiaquijji poanijo, eyaya oya jjadasiaqui pajea meejeꞌyo”. 
\m Jamaya aca poa Eyacuiñajjiya oja sohui etehueꞌyojo. 
\p  
\v 20 Eyacuiñajjija pea esohui yahuajo nei etehueꞌyo jama poa baꞌa: 
\q1 “Eya oe nei quea jjashahuabaqui jaꞌa; jjadasia meequi ajja peaꞌai. Dejja cuana chojja, ojjañaja ejjashahuabaquijji quea jaꞌa pojjeama”. 
\m Jamaya yahuajo nei nei tehue mee ca poa. 
\p  
\v 21 Jamajjeya ¡aꞌa jama pojji baꞌa: —Ma esohui huohuijjija ejjashahuabaquijji quea jaꞌa nee. Oya cajjashahuabaquiahua —aꞌa pojji! 
\p ¡Bacue! Jesosa Quito miquea Emeshe Mese nei. Ohuaya ojjaña esohui huohuijji huoojea canaje miquiana onijje jjapeequi meesahuaa. ¡Jamajjeya shajjaꞌajjacue!  
\v 22 Eꞌe, Eyacuiñajjiya ojaya esohui huohuijji huoojea canaje miquiana huasijje. Ohuaya eya, Pabo ebionei huoojea canaje. Apono, Peno peaꞌai huoojea canaje. Ohuaya ojjaña aquiana pana ca poa miquianajaya quea pame nee ejaahuanajji. Miya eshe ani ohuaya jaahuana cani; manoꞌyajo peaꞌai jaahuana cajeꞌyo quea pame nee. Ohuaya jjeyahua nei miquianaya jaahuana cani. Quijje nei miquianaya jaahuana cajeꞌyo tii tii peaꞌai, Eyacuiñajjiya. Eꞌe, Jesosaja epeejji poanijo miquianaya eꞌaquiana mese jayojja jama poani.  
\v 23 Eyacuiñajji Jesosa Quitoja Chii. Miquianaya Jesosa Quitoja epeejji cuana. Jamajjeya ojjaña Eyacuiñajjija aquiana quea pame nee miquianajaya poani. 
\c 4  
\s1 ¡Aꞌa Jesosaja huoojeaꞌyo esohui huohuijji niñebajji! 
\p  
\v 1 ¡Epeejji cuana, ecuana shajjaꞌajjacue! Eyacuiñajjiya ecuana huoojea caꞌyonaje esohui eꞌe nei Jesosa Quitoja huohuiya, ma yahuajo nei onajaya ba mee jjima poa.  
\v 2 ¡Bacue! jiquio ecua echacojjiya o huoojeajji shajjaꞌajja cani jayojja jama ecuaaya aña. Jamajjeya ohua huoojea cajje ecuaaya Eyacuiñajjija esohui huohuiaña, onajaya esohui pojjeama. Esohui quea pame nee Jesosa Quitoja ehuohui pajeaꞌyojji pojjeama.  
\v 3 Jamajjeya ecuea miquianaya eshajjaꞌajjajji pojjeama ejo jama poani baꞌa: —Pabohua quea jaꞌa nee huohui cani —poani—. Pabohua quea jaꞌa pojjeama huohui cani —miquiaa ajje, eyaya eshajjaꞌajjajji pojjeama peaꞌai. Onaa jama ejo huohui cajje peaꞌai eyaya eshajjaꞌajjaꞌyojji pojjeama. 
\p Eya peaꞌai ecue huohuijo jjashahuabaqui ajja jama baꞌa: —Eꞌe pojjaꞌa ecuea ehuohui quea jaꞌa nee; eꞌe pojjaꞌa quea jaꞌa pishana —jamaya eya jjashahuabaqui ajja peaꞌai. 
\p  
\v 4 Eꞌe, eya jjashahuabaquiani jama baꞌa: —Eyaya Jesosa Quitoja chacoaña quea pame nee. 
\p Eꞌe pojjaꞌa. Eyacuiñajjiya ojaya ejjashahuabaquijji ejo, eya chacoañajo cahuohui cahua quijje.  
\v 5 Jamajjeya ecuanaja ejjashahuabaquijji, ojjaña ecuaaya anaje peaꞌai miquianajaya ba jjimajo, ¡aꞌa ecuanaya niñebajji! ¡Ishoa socue oe Jesosa Quitoja epoe oꞌoyajjijo! Majoya ohuaya, esejaya Emeshi Mese neiya ojjaña cuanaja ejjashahuabaquijji, ojjañaa quehuajje acanaje peaꞌai ba mee caje. Ojjañaa shajjaꞌajja caje. Majoya eseya quea pame nee anajejo, Eyacuiñajji quea bihui nee poaje: —Eꞌe, jamaya. Miya Jesosaja epeejji quea jaꞌa nee; quea pame nee ojo chaconaje —eseya acaje ohuaya. 
\s1 ¡Esohui huohuijji cuana pea jayojjaya quea jea ameya acue! 
\p  
\v 6 Eꞌe epeejji cuana, miquiana jjabahuejjaqui meejji eyaya tehueaña Aponojo, ejo peaꞌai. Eyacuiñajjija esohui jama poa baꞌa: “¡Oe epeejji quea boti, pea epeejji botiꞌama aꞌa ajji!” Jamaya esohui etehueꞌyo poa. 
\p Jamajjeya ¡aꞌa jama ajji baꞌa: —Aponohua quea pame nee acani; Pabohua ca ca quea pame pishana acani —aꞌa pojji! 
\p ¡Ojjaña Jesosaja esohui huohuijji pea jayojjaya oe acue! Jamajjeya miquianaaya ma esohui etehueꞌyo jayojja jama eꞌe jojo nei aje.  
\v 7 Eꞌe, Eyacuiñajjiya ojjaña Jesosaja epeejji pea jayojjaya ba cani. Ohuaya oe epeejji pea epeejji jayojjaya acani. Jamajjeya ¡aꞌa jjashahuabaquijji jama baꞌa: —Eya ca iña quea pame nee. Pea cuana quea pame pishana —aꞌa jamaya jjashahuabaquijji! 
\p Miquianaya ca mi ca oe Eyacuiñajjija esohui jamatii ba epo poso poani. Chojja, ojaya esohui miquianajaya ebajji pojjeama jamatii. Eyacuiñajjiya esohui huohuijji miquiana huasijje esohui huohui mee majamaja canaje.  
\v 8 Miquianaya ca mi ca oe jama poso jjabaquiani baꞌa: —Ecuana ca ca oe Jesosaja esohui jayojja jama baꞌyani quea pame nee —poso jjabaquiani quiana—. Quea huiso ecuanajaya eba —nequiana poani peaꞌai—. Ecuana ca ca ona huoojeaꞌyojji poani Eyacuiñajji nijje. Pabo chojja, ona huoojeajji pojjeama —jamaya poso poani miquianaya. 
\p Miquianaya Eyacuiñajji nijje ona huoojeaꞌyojji eꞌe jojo nei jojjemo miquianajo eya quea bihui nee pome. Jamaya eꞌe jojo nei jojjemo ecuana miquiana nijje ona huoojeaꞌyojji pome peaꞌai. 
\s1 ¡Jjashahuabaquicue ecuana quea nee poanaje miquiana sohui huohuijji! 
\p  
\v 9 Eyacuiñajjiya ecuana huoojea canaje ojaya esohui huohuiya. Jamatii ojaya eba ecuana shajjaꞌajja majje ojjañaa soadojo cani jama baꞌa: —¿Apiojji shai oya cuana shajjaꞌajjaje soꞌo, de? ¡Cuaꞌa, oya cuana quecuajeacue! Ojjaña oya cuana quea tai —jamaya onaya siajje poani. 
\p Ecuana ca ca jjashahuabaquiani jama baꞌa: —Eꞌe de, ojjaña meshijo baꞌeca cuaa ecuana soadojo cani, ojjaña eyajo aniya peaꞌai. 
\p  
\v 10 Eꞌe, Jesosa nijje jjapeequianijo, Jesosaja epeejji pojjeama cuaa ecuana niñepoqui poso acani. Miquianaya ca ca ojjaña ba epo poso acani cuaa. Jesosaja epeejji pojjeama cuaa ecuana ona huoojeaꞌyojji jayojja jama pojjeama poso acani. Miquianaya ca ca ona huoojeaꞌyojji jayojja jama acani. Onaaya ecuana shajjaꞌajja jjima acani. Jamatii miquianaya shajjaꞌajja cani.  
\v 11 Eꞌe, jjeyahua nei ecuana Jesosa Quitojo mimianijo quea nee poani; ojjaña pojjajo quea shoe poani. Quea naba taja poani. Daqui chiichiiani ecuanaja. Pea cuaa ecuana cuia cani Jesosa nijje jjapeequianijo. Ecuana poqui majamajani ojjaña cuiñajji yasijje quimaꞌ jayojja ecuana.  
\v 12 Eꞌe, ecuaaya bobijo janobajjima nei chacoaña. Pea cuana mimijajiyajo, ecuanaaya mimisajaꞌa jjima aña. Jama poani baꞌa: —Eyacuiñajjiya miquianaya cajaahuana cahua —ecuaaya dejja quea tecue aña. 
\p Jesosa nijje jjapeequianijo, pea cuaa ecuana napa cani. Jamatii quea quene po ajja. Jesosa nijje jjapeequi pajeaꞌyo ajja peaꞌai.  
\v 13 Pea cuaa niñeba cajje ecuaaya esohui quea beiya sajaꞌaña. Jjeya peaꞌai pea cuana ecuanajo quea tai mimiani jama baꞌa: —Oya cuana Jesosaja epeejji cuana, cajaa. Shabo jama, caquishijeahua —poani. 
\s1 ¡E jayojja jama pocue Jesosa nijje jjapeequianijo! —Pabohua aca poa 
\p  
\v 14 Ecuea epeejji cuana, eyaya jiquio esohui tehueaña miquiana quea yeno po meejji pojjeama. Miquianaya ecuea ebacua jayojja jama poanijo, jjabahuejjaqui mee sa aña.  
\v 15 Esohui quea pame nee Jesosa Quitoja eyaya huohuinaje miquiana huasijje. Ecuea esohuijo miquianaya ojaya epeejji poanaje. Jamajjeya eya oe nei mique chii jayojja jama poanaje. Eꞌe pojjaꞌa Jesosa Quitoja sohuihuohuijji quea huiso nee poeje miquiana sohuihuohuiya. Sico meemee ajja pojjaꞌa, quea huiso nee nee. Jamatii eyaya ebionei miquiana huasijje esohui huohuinajejo miquianajaya chii jayojja poanaje.  
\v 16 ¡Jamajjeya ecuea esohui shajjaꞌajja socue! ¡E jayojja jama pocue! 
\p  
\v 17 Jamajjeya eyaya Jesosaja epeejji Timoteo huoojeaje miquiana quea pame baꞌe meesahuaa. Timoteo ecuea quea jea nee, Jesosaja epeejji quea jaꞌa nee poani. Ecuea ebaꞌejjijo, ecuea esohui Jesosa Quitojo peaꞌai ohuaya huohui caje oꞌoya miquianajaya epajeaꞌyojji pojjeama, ma eyaya ojjaña Jesosaja epeejji cuana ojjaña cuiñajjijo baꞌe yasijje huohuiaña.  
\v 18 Miquianaya beca cuana shajjamaꞌ poani ojjaña miquea eba poso poanijo. Ecuea esohui shajjaꞌajja sa poꞌyo ajja. Jjashahuabaquiani jama baꞌa: —Pabo poe ajja ecuana baa —poani. 
\p  
\v 19 Eꞌe pojjaꞌa Eyacuiñajjiya eya huoojea cajeꞌyo Conito huasijje, miquiana huasijje quijje pishana. Shajjamaꞌ cuanaja esohui shajjaꞌajja maja sa po ajja eya. ¿Aꞌa oya cuana Jesosa nijje jjapeequiani eꞌe jojo nei? ¿Aꞌa Eyacuiñajjiya oya cuana ojaya esohui huohui meesahua cani quea jaꞌa nee? Maya eyaya ba sa aña.  
\v 20 Eꞌe, quea huiso esohui mimi majamaja majje eꞌe pojjaꞌa jamatii Jesosaja epeejji pojjeama pojjaꞌa nequiana. Jesosa nijje quea pame nee jjapeequianijo ca ca Eyacuiñajjiya eseya baꞌe tiitii mee cajeꞌyo onijje eyajo. 
\p  
\v 21 Eꞌe, eya poejeꞌyo miquiana baa. Shajjamaꞌ poani tii, tecueajeajeꞌyo. Ecuea etehueꞌyo jayojja jama poanijo, eya quea bihui nee, quea bei nee poaje. Jamajjeya ¡ecuea esohui shajjaꞌajjacue, eya miquiana nijje quea bei epojji! 
\c 5  
\s1 ¡Jesosaja epeejji quea mimishi poani beibeiya tecueacue! 
\p  
\v 1 Jesosaja epeejji Conitojo baꞌeya eya huohui cañanaje jama baꞌa: —Pabo, oe dejjaa Conitojo baꞌeya oja shanase cojjo cani, Jesosaja epeejjiya, de —acanaje. 
\p Jamaya quea tai nee nee. Eyacuiñajjija botiꞌama nei nei. Jesosaja epeejji pojjeama jama po ajja, quea mete oya cuana.  
\v 2 Jamatii miquianaya aje oe bichoꞌama jjejojo jama poani baꞌa: —Ecuanaya quea pame nee baꞌe —nisho poani. 
\p ¡Oe epeejji quea mimishi nee poanijo, quea yeno pocue! Ma dejja oja mimishijo yenoꞌama po jjimajo, ¡aꞌa onijje jjapeequijji! ¡Jesosaja epeejji cuana nijje aꞌa dobiqui meejji! 
\p —¡Aꞌa ecuana nijje Eyacuiñajjija equi yasijje dobiquijji! Eyacuiñajjiya miya eshajjaꞌajjajji pojjeama —oya acue. 
\p  
\v 3 Eya quea huesha nee yani; miquiana nijje nequi meemee ajja. Jamatii miquianajo jjashahuaba majamajaquiani tii. ¡Eya Jesosaja epeejji etii ojaya ehuoojeaꞌyo poanijo, shajjaꞌajjacue mo! Ecuea ejjashahuabaquijji ma dejja quea mimishijo jama baꞌa: —Oya quea mimishi poanijo, ¡quea bicho nee po meecue! —eyaya miquiana nijje nequiya jjemo jamaya huohuime. 
\p  
\v 4 Jamajjeya miquianaya Eyacuiñajjija equi yasijje ojee poe majje, Jesosa Quito esejaya Emeshi Mese nei miquiana nijje anije, miquiana quea jjashahuabaqui jaꞌa po meejji ojaya esohui jayojja jama ameesahua caje. Eya peaꞌai miquiana nijje jjashahuabaquianijo miquiana nijje nequi jayojja poaje.  
\v 5 Jamajjeya ojee poe majje ¡ma dejja mimishi tecueacue jama baꞌa: —¡Edosiquianaa mi huoojeajji poaniya miya canapa cahua! —jamaya acue oja mimishijo quea yeno epojji! 
\p Quea yeno po majje oja mimishi pajea cajeꞌyo. Manojeꞌyo pojjaꞌa. Jamatii esejaya Emeshi Mese neiya Jesosaa poe oꞌoya majje ma dejja huoojea ajja cuaqui yasijje, ca ohua mimishi pajea caꞌyajo. 
\p  
\v 6 Dejja quea mimishi miquiana nijje jjapeequianijo, jamatii miquianaya bichoꞌama poanaje. Jamaya quea tai. Miquianajaya eba jiquio esohui jama baꞌa: “Oe pojji neiya pahui shejjeemeejjiya iñahuahuo cajje pahui shejjee mee cani” jamaya onaaya huohui cani.  
\v 7 Eꞌe, mimishi eshejjeemeejji jayojja jama poani. Oe dejja quea mimishi minijje ojee jjapeequianiya ojjaña quea mimishi po mee caje o jayojjaya. ¡Mimishi cajaa acue, ojjañaa! Jamajjeya miquianaya quea mimishi po ajja, pahui eshejjeemeejjimaꞌ jayojja poaje. Eꞌe, yahuajo nei Jodio cuaa Ejito meshijo nequiya ñajjajja cuia caꞌya poa ebacua cuana emanoꞌyojji pojjeamajo jama jayojjaya Eyacuiñajjiya Jesosa Quito esejo mano mee caꞌyonaje eseya onijje ebaꞌe tiitiiꞌyojji.  
\v 8 Eꞌe, Jodio cuana pahui eshejjeemeejjimaꞌ ojee ijjia cani Eyacuiñajjiya etiiquianaja ebacua cuana mano meeꞌyo jjima aca poa shahuabaꞌyojji. Jamaya jayojja Jesosa esejo manoꞌyonajejo, eseya cabaꞌyahua mimishiꞌama eꞌe jojo nei. Eꞌe, jamaya baꞌyanijo Jesosa eseja mimishijo manoꞌyonaje esejaya epajeaꞌyojji pojjeama. Jamajjeya jiquio ecua Jodio cuaa ñajjajja cuiaꞌyo majje ojee ijjia cani jayojja, etiiquianaja bacua cuana mano meeꞌyo jjima aca poa shahuabaꞌyojji jayojja jama eseyaya aña Jesosajo. 
\p  
\v 9 Yahuajo pishana eyaya miquiana huasijje pea esohui etehueꞌyo huoojeanaje. Ma etehueꞌyojo eyaya jama huohuinaje baꞌa: —¡Jesosaja epeejji quea mimishi nee poani nijje aꞌa jjapeequijji! ¡Joya pea cojjojji nijje aꞌa jjapeequijji! ¡Ona napajji nijje, quea mimishi jjashahuabaquiani nijje peaꞌai aꞌa jjapeequijji! —eyaya miquiana huasijje tehuenaje. 
\p  
\v 10 Eyaya jamaya tehuenaje Jesosaja epeejji quea mimishijo. Jesosaja epeejji pojjeamajo jamaya tehue jjima. Eꞌe, mimishi cuana quea huiso nee yani: Quea nahue poani, sii poani, eshahua nijje mimiani peaꞌai. Jamajjeya dejja mimishi pejjejo baꞌe sa poꞌyo ajjajo jiquio meshijo baꞌe meemee ajja. ¿Achejo dejja mimishi chamaꞌ huasijje ebaꞌejji?  
\v 11 Beca cuana ca ca jama po nishoani baꞌa: —Epeejji cuana, eya Jesosaja epeejji peaꞌai —poani. Jamatii oya cuana aje oe quea mimishi poani: Pea cojjojji poani, quea dejja tai, quea nishehui poani, quea mimijjequijea poani, meshi epana bihuia cani, ishiꞌishiani, sii poani, shajjamaꞌ poani peaꞌai. ¡Jesosaja epeejji jama poajo, onijje aꞌa jjapeequijji, aꞌa anioquejji eꞌijjiaꞌijjiajji! 
\p  
\v 12 Eyacuiñajjiya eya huoojea jjima Jesosaja epeejji pojjeama tecueaa jama baꞌa: —¡Miquianaya quea jaꞌa pojjeama baꞌyanijo quea nee nee poaje! 
\p ¡Eyacuiñajjiya ca ca oya cuana catecueajea cahua! Ohuaya ecuana huoojea canaje Jesosaja epeejji quea mimishi cuana jjabahuejjaqui meeya.  
\v 13 Jamajjeya Jesosaja epeejji miquiana nijje nequi quea mimishi poajo, ¡niñesheꞌacue: —Miya quea jaꞌa pojjeama poani —oya acue! 
\p Jamajjeya ¡Eyacuiñajjija esohui yahuajo tehueꞌyo jayojja jama acue! Yahuajo nei nei jama poa baꞌa: 
\q1 “Ecuea epeejji quea mimishi poanijo, ¡aꞌa miquiana nijje nequi meejji, ecuea epeejji cuana nijje! ¡Huoojeacuayajeaꞌyocue esecue yasijje!” 
\m Jamaya yahuajo nei Eyacuiñajjija esohui etehueꞌyo poa. 
\c 6  
\s1 ¡Aꞌa epeejji cuana dojojji dejja etii yasijje ca Jesosaja epeejji pojjeama huasijje! 
\p  
\v 1 Miquianaya Jesosaja epeejji poanijo ecuea huapa pojjeama cuana poani. Jamajjeya Jesosaja epeejji nijje quea quene po majje Jesosaja epeejji pojjeama huasijje dejja etii yasijje ¡aꞌa oya dojojji ojaya ejjashahuabaquijji baa! Chojja. ¡Jesosaja epeejji etii yasijje poquicue! Eyacuiñajjiya ojaya epeejji etii huohui meesahua caje quea jaꞌa nee ojjaña quea bei epo meejji.  
\v 2 Eꞌe, eseya Jesosaja epeejji cuana quijje onijje ona huoojeajji poaje. Jamajjeya ¡jjeyahua nei ojjaña ojaya epeejji cuana quea bei po meesahuacue pea epeejji cuana nijje! ¡O huoojeaꞌyojji nei jayojja jama oya cuana quea pame nee ameesahuacue!  
\v 3 Eꞌe, Jesosa poe oꞌoyajo, eseya esohuidojojji eyajo nequi huoojeaꞌyojji poajeꞌyo onijje peaꞌai. Jamajjeya jiquio meshijo nequiya ¡Jesosaja epeejji pea cuana nijje jjamimicuiajea nobiajeaquiani quea bei po meecue! ¡Oya cuana shajjaꞌajja majje quea jaꞌa nee huohuicue!  
\v 4 Jamajjeya Jesosaja epeejji nijje jjamimicuiajea nobiajeaqui majje ¡aꞌa poquijji dejja etii yasijje, Jesosaja epeejji pojjeama huasijje miquiana quea bei epo meejji!  
\v 5 Jamaya poanijo miquianajaya ejjashahuabaquijji quea tai poani. Jamajjeya miquianaya jjamimicuiajea nobiajeaqui majje ¡Jesosaja epeejji etii iyaacue! Ohuaya miquianaya quea bei po mee caje pea epeejji nijje.  
\v 6 Jamajjeya Jesosaja epeejji nijje mimijaji majje ¡aꞌa jja oe oya dojojji Jesosaja epeejji pojjeama huasijje ojaya ejjashahuabaquijji huohui meeya! Jamatii miquianaaya ca ca quea tai aña. 
\p  
\v 7 Eꞌe, miquianaya ca mi ca oe Jesosaja epeejji pojjeama jayojja jama poani. Jesosaja epeejji nijje jjamimicuiajea nobiajeaqui majje oya dojoaña Jesosaja epeejji pojjeama huasijje. ¡Aꞌa jja oe jamaya pojji! Chojja, miquianajaya epeejji minijje quea tai poajo, jamatii ¡aꞌa jjamimicuiajea nobiajeaquijji! ¿Yajjajo acuae jjaya jamatii mi sii meeꞌajjaña?  
\v 8 Miquianaaya ca ca oe Jesosaja epeejji cuana minijje nequi quea tai aña, oya cuana dasiaña, onajaya aquiana siiyaña peaꞌai, de. Jamaya quea tai.  
\v 9 ¡Jjashahuabaquicue oe! Miquianajaya eba mimishi cuana Eyacuiñajji nijje ebaꞌejji pojjeama eyajo ojaya cuiñajji eyacuajo. Eyacuiñajjija esohui aꞌa pajeaꞌyojji jama baꞌa: “Eꞌe jojo nei ojjaña quea mimishi poani pea nijje, ojjaña eshahua nijje mimiani, peaja ehuanase sii cani peaꞌai, onaja yahue sii cani peaꞌai, dejja cuana pea dejja nijje jjacojjoquiani, epona pea epona nijje yahue nisho poani peaꞌai,  
\v 10 siipojji cuana peaꞌai, quea dejja tai poani peaꞌai, ehuoo nei po huichaꞌa huichaꞌani peaꞌai, pea siajje ajji poani peaꞌai, shajjamaꞌ cuana peaꞌai Eyacuiñajji nijje ebaꞌejji pojjeama eyajo ojaya cuiñajji eyacuajo”.  
\v 11 Jamaya yahuajo miquianaya poanaje Jesosa nijje jjapeequi jjimahua. Jjeya ca ca esejaya Emeshi Mese neiya, Jesosa Quitohua miquianajaya mimishi cuijea caꞌyajje quea boejea po mee caꞌyonaje. Jamajjeya miquianaya jjeya baꞌyani Eyacuiñajjijo. Eꞌe, Jesosa Quito esejaya Emeshi Mese nei miquianajaya mimishi cuanajo manoꞌyonaje. Miquianaya quea boejea po mee caꞌyonaje. Jamajjeya Eyacuiñajjiya miquianaya ba cani mimishiꞌama. Edojjoshahua Pameya miquianaya Eyacuiñajjija esohui jayojja jama baꞌe meesahua cani peaꞌai. Jamajjeya ¡ojjaña Jesosaja epeejji cuana nijje quea bei, quea pame nee baꞌecue! ¡Mimishiꞌama pocue! 
\s1 ¡Eyacuiñajjijo chacocue quea pame nee! 
\p  
\v 12 Epeejji cuana, miquianaaya eya huohuiꞌajjanaje esohui etehueꞌyojo jama baꞌa: —Eya ca ca Jesosaja epeejji. Jamajjeya eyaya ojjaña aña meteꞌamaa jjejojo, ma Jesosaja epeejji pojjeama cuaa acani —jamaya miquianaya poani quea quehua jjashahuabaquianijo. 
\p Eya ca ca jama poani baꞌa: —Pea cuana jayojja jama baꞌe majje miquianaya quea pame pojjeama poaje —eya poani. Eꞌe pojjaꞌa eya mimije jama baꞌa: —Ojjaña pea cuana jayojja jama eyaya aje —poaje. 
\p Jamatii eya jamaya emimijji pojjeama. Chojja, jama po majje quijje eyaya jamaya apajeaꞌyo jjima aje. Eꞌe, jiquio ecua echacojjiya o chacomeejjija esohui apajea meemee ajja jayojja jama quijje eyaya maya apajeaꞌyo jjima aje. 
\p  
\v 13 Bobi ijjia majje see ai yasijje dobiquiani. Bobi chamajo see ai quea nee poaje. Jamatii quijje eyajo baꞌeꞌyo majje eseya bobi ijjia pajeajeꞌyo. Quea shoe pojjeama poajeꞌyo. Jamaya Eyacuiñajjiya acajeꞌyo. Jamajjeya ¡aꞌa jjashahuaba tiitiiquijji bobijo quea jejje nee epojjijo! Jama jjashahuabaquime pocue baꞌa: —Eya Eyacuiñajjija equi jayojja. Oya ecuea eyamijo baꞌyani. Eya quea jejje jayojja po mee cani. 
\p Eꞌe, Emeshi Mese neiya, Eyacuiñajjiya ecuea eyami quea pame nee pana ca poa. Jaahuana cani quea pame nee peaꞌai oja equi jayojja epojji. Ohuaya ecuana pana ca poa quea mimishi nee pea nijje epojji pojjeama; onajaya ehuanase, yahue pojjaꞌa esiijji pojjeama peaꞌai.  
\v 14 Jamajjeya esejaya Emeshi Mese nei Jesosa Quito manoꞌyajo, Eyacuiñajjiya oya shequi mee ca oꞌoyanaje. Jamaya ohuaya eseya baꞌe mee caje oꞌoya peaꞌai. Quea caꞌa nee nee poaniya jjejojo ojjaña acajeꞌyo ohuaya. 
\p  
\v 15 Jesosa Quitoja epeejji poanijo ojjaña eseya ojaya eyami jayojja jama poani. Jamaya miquianajaya eba. Jamajjeya ¡pea cojjojji nijje aꞌa jaajji! Chojja. Jamaya poajo Eyacuiñajji miquiana nijje quea tecue nee nee poaje.  
\v 16 Eꞌe, dejja epona quea mimishi nijje jaa majje oya cuana oe yamime jayojja poani. Jamaya Eyacuiñajjiya oya cuana ba cani. Miquea eba Eyacuiñajjija esohui etehueꞌyo jama baꞌa: “Dejja epona nijje jaa majje oya cuana oe yamime jayojja poani”.  
\v 17 Emeshi Mese nei Jesosa nijje jjapeequi majje ca ca eseya o jayojjaya jama jjashahuabaquime poani peaꞌai. 
\p  
\v 18 Jamajjeya eyaya miquianaya huohuiaña jama baꞌa: Dejja cuana, ¡epona miquea ehuanase pojjeama nijje aꞌa jaajji! Epona cuana, ¡aꞌa pea dejja nijje jaajji! ¡Jiñayii acue! Quea mimishi po majje miquea eyami nei quea tai poaje. ¡Ojjaña mimishi cuana aꞌa ajji peaꞌai!  
\v 19 ¡Bacue! Miquea eyami Edojjoshahua Pameja equi jayojja jama poani. Oya mique yami dojjo huasijje nequidobiquiꞌyonaje. Eꞌe, Eyacuiñajji mi huoojeajji poani. Ohuaya huoojea caꞌyonaje Edojjoshahua Pame miquiana que dobiquiya.  
\v 20 Oya mi mesenajji epo. Eꞌe, Jesosa Quito manoꞌyonaje miquianaja mimishi cuijeaꞌyojji sosejje. Jamajjeya ¡ojaya esohui jayojja jama baꞌecue! Miquianaya jama baꞌyajo, pea cuaa mi ba majje Eyacuiñajji bihuia caje jama baꞌa: —Eyacuiñajji quea caꞌa nee nee. Ojaya epeejji quea pame nee baꞌe meesahua cani —poaje. 
\c 7  
\s1 ¿Aꞌa shacuimaꞌ nequi cuana cajjahuanaquiahua? 
\p  
\v 1 Yahuajo pishana miquianaaya esohui tehuenaje ecuea ebajji. Ma esohui etehueꞌyojo eya miquiaaya huohuiꞌajjanaje jama baꞌa: —¿Aꞌa shacuimaꞌ nequi cajjahuanaquiahua? ¿Aꞌa jamatii canequiahua pojjaꞌa? —huohuiꞌajjame miquianaaya eya anaje. 
\p Jamajjeya jjeya eyaya miquianaya sajaꞌaña. Eꞌe, shacuimaꞌ nequi eshacui sa poꞌyo ajjajje ca jamatii canequiahua. Jamaya quea pame.  
\v 2 Jamatii quea huiso shacuimaꞌ nequiya epona cuana jea ba cani, onaja huanase sii cani. Epona ahuemaꞌani jamaya quea mimishi poani peaꞌai. Jamajjeya cajjahuanaquiahua, cajjahueaquiahua peaꞌai, ojjaña. Jamaya quea pame nee. 
\p  
\v 3 Yahue cuaa, ¡miquea ehuanase quea bihui nee po meecue! ¡Jaahuanacue quea pame nee peaꞌai! Ehuanase cuaa, ¡miquea yahue quea bihui nee po meecue! ¡Onijje tii jaacue!  
\v 4 ¡Mique yahueya huohui cani jayojja jama pocue onijje jaanijo! Yahue, ¡miquea ehuanase nijje jaanijo ohua sa cani jayojja jama acue!  
\v 5 Eꞌe pojjaꞌa yahue, ehuanase peaꞌai mimi sa poani Eyacuiñajji nijje beca cahuime. Eyacuiñajji nijje mimianijo yahue ojaya ehuanase nijje jaa sa po ajja pojjaꞌa. Jamaya quea pame, ca ehuanase yenoꞌama poanijo. Beca cahui cuana Eyacuiñajji nijje mimi majje ¡yahue oja ehuanase nijje cajjacojjoqui oꞌoyahua! Jamajjeya ehuanase yenoꞌama, yahue peaꞌai yenoꞌama poaje. Quea yeno poajo, eshahuaa oya cuana quea mimishi jjashahuabaqui mee ca chanaꞌ pea cojjojji epojji. Eꞌe, yahue, epona peaꞌai caꞌaꞌama. 
\p  
\v 6-7 Ecuea epeejji cuana, jiquio esohui etehueꞌyo ecuea ejjashahuabaquijji jama baꞌa: Eya ca ca shacuimaꞌ nequi. Ojjaña Jesosaja epeejji e jayojja jama shacuimaꞌ nequi, ahuemaꞌani peaꞌai quea pame nee chaco majamajaje Jesosa Quitojo. Jamatii eyaya miquianaya jamaya epojji pojjeama huohuiaña. Eyacuiñajjiya beca cuana quea pame nee baꞌe meesahua cani jamatii shacuimaꞌ nequi, ahuemaꞌani peaꞌai. Pea cuana ca ca jamatii ani quea mimishi po chanaꞌ. Jamajjeya oya cuana cajjahuanaquiahua, cajjahueaquiahua peaꞌai. ¡Eyacuiñajjija ejjashahuabaquijji mijo ohua acani jayojja jama acue! 
\p  
\v 8 Jamatii eya jjashahuabaquiani shacuimaꞌ nequijo, eshacuimanojo, ahuemaꞌanijo, eꞌahuemanojo peaꞌai jama baꞌa: Eya ee nei, shacuimaꞌ nequi. Miquianaya e jayojja jama mee nei nequi majje jama quea pame nee nee poaje.  
\v 9 Jamatii eꞌe pojjaꞌa miquianaya beca cuana ehuanase chamajo mimishiꞌama ebaꞌejji pojjeama. Jamajjeya ¡jjahuanaquicue! Eꞌahuemano cuana, miquiana ahuemaꞌani jayojja mimishiꞌama ebaꞌejji pojjeama. Jamajjeya ¡jjahueaquiꞌyocue! Jamaya quea pame. Miquianaya quea yeno mee nei baꞌyanijo quea mimishi po chanaꞌ. Jamaya quea tai. 
\s1 ¿Aꞌa Jesosaja epeejji cuana huei cajji? 
\p  
\v 10 Jjeyahua nei eyaya Eyacuiñajjija esohui tehueje yahue cuana huasijje, ehuanase cuana huasijje peaꞌai miquianajaya ebajji jama baꞌa: Ehuanase cuana, ¡miquea yahue oe nei nijje baꞌecue! ¡Aꞌa oya hueijji!  
\v 11 ¡Huei majje ca oe ahuemaꞌ baꞌe tiitiiꞌyocue! ¡Eꞌe pojjaꞌa miqueahue jjeshe oꞌoyacue! Jamaya quea pame nee. Yahue cuana, ¡oya jayojja aꞌa miquea ehuanase hueijji! ¡Jaahuana tiitiicue! ¡Eyacuiñajjija esohui jayojja jama acue! 
\p  
\v 12 Jjeya ca ca eyaya pea esohui tehueje, ma Jesosaa tehue mee jjima, ecuea ejjashahuabaquijji tehueje pea cuana huasijje, Jesosaja epeejji cuana huasijje. Yahue cuana, eꞌe pojjaꞌa miya Jesosaja epeejji poani, miquea ehuanase Jesosaja epeejji pojjeama. Jamatii miquea ehuanase minijje baꞌe sa poanijo, ¡aꞌa oya hueijji!  
\v 13 Ehuanase cuana, eꞌe pojjaꞌa miya Jesosaja epeejji poani, jamatii mique yahue Jesosa nijje jjepeequi jjima. Miqueahue minijje baꞌe sa poanijo, ¡aꞌa oya hueijji!  
\v 14 Miya Jesosaja epeejji poanijo, miqueahue minijje baꞌe sa poanijo, Eyacuiñajjiya oya quea pame acaje Jesosaja epeejji nijje baꞌe sa poanijo. Yahue cuana, oya jayojja miquea ehuanase miquea huei jjima minijje baꞌe sa poanijo, Eyacuiñajjiya oya quea pame acaje peaꞌai miya Jesosaja epeejji poanijo. Oe yamime jayojja ohuaya micuana ba cani. Jamajjeya ohuaya miquianajaya ebacua cuana jaahuana caje peaꞌai. Jesosaja epeejji pojjeamaja bacua cuana jama pojjeama oya cuana. 
\p  
\v 15 ¡Jiquio esohui bacue peaꞌai, epeejji cuana! Eyacuiñajjiya ojaya epeejji cuana quea bei baꞌe mee sa acani. Jamajjeya miquea ehuanase Jesosaja epeejji pojjeama jjejojoya minijje baꞌe sa poꞌyo ajja po majje capoquiahua. Eꞌe, Jesosaja epeejji pojjeama Jesosaja epeejji nijje baꞌe sa poꞌyo ajja capoquiahua, epona, yahue peaꞌai. Jamajjeya Jesosaja epeejji eꞌahuemano jayojja anije, eshacuimano jayojja jama nequije.  
\v 16 Jamajjeya ehuanase cuana, ¡miquea yahue nijje anicue, jamatii oya Jesosaja epeejji pojjeama! Oya Jesosa nijje jjapeequije pojjaꞌa mi quea pame baꞌyani ba majje. Yahue cuana, ¡miquea ehuanase Jesosaja epeejji pojjeama nijje baꞌecue! Jamajjeya oya Jesosa nijje jjapeequije pojjaꞌa. 
\s1 ¡Eyacuiñajjija ejjashahuabaquijji jayojja jama baꞌecue! 
\p  
\v 17 Eyacuiñajjiya ojjaña miquianaya ojaya echacojji po mee cani. Oe epeejji pea epeejji jayojja jama chaco ajja. Eꞌe, Eyacuiñajjiya miquianaya huoojea cani ojo chacohua. Peapea chaco meeme asahua cani. ¡Jamaya atiitiicue! Jamaya eyaya huohuiaña ojjaña Jesosaja epeejji cuana ojjaña cuiñajji cuanajo baꞌe yasijje.  
\v 18 Jamajjeya oe epeejji Jesosa nijje jjapeequianijo cuiishasha jehuisejjajea caꞌya poa, Jodio cuaa jjejojo. ¡Jamatii nequicue! Pea dejja cuiishasha ejehuisejjajeaꞌyo pojjeama Jodio dejja pojjeama jjejojo. ¡Jamatii nequicue, cuiishasha jehuisejjajea jjima tii!  
\v 19 Jjeya nei Jesosa nijje jjapeequianijo, Eyacuiñajjiya eseya jama ajjima baꞌa: —¡Cuiishasha jehuisejjajea meecue! —po ajja eseya jjeya. 
\p —¡Aꞌa cuiishasha jehuisejjajea meejji! —po ajja peaꞌai jjeya. 
\p Chojja. Jjeya Jesosa nijje jjapeequianijo, Eyacuiñajjiya eseya jama acani baꞌa: —¡Ecuea esohui jayojja jama baꞌecue! —ohuaya eseya acani. 
\p  
\v 20 Jamajjeya ¡miquianaya Jesosa nijje jjapeequi jeahuajo jayojja jama anicue quea pame nee! Jama baꞌa:  
\v 21 Eyacuiñajjiya miquianaya iyaa canajejo, beca cuana echacojji sosemaꞌ poanaje. ¡Jamaya anicue yenoꞌama! Jamatii miya miquea echaco meseja nahueꞌamajo, poqui sa po majje ¡poquicue, miquea yajjijo chacoquicue!  
\v 22 Jamajjeya beca cuanaja echaco mese yanijo, ¡ojaya esohui jayojja jama cachaco cahua! Esejaya Emeshi Mese nei Jesosaa oya cuana iyaa cajje ca ca oya echaco mesemaꞌ jayojja jama jjashahuabaquime poani. ¡Jesosaja ejjashahuabaquijji jayojja jama caꞌa cahua! Oya jayojjaya pea cuaa echaco mesemaꞌ nequiya chaco cani ojaya yajjijo. Jamatii Jesosa Quito oya cuana iyaa cajje ojaya ejjashahuabaquijji jayojja jama caꞌa cahua peaꞌai. Jama baꞌa: Jesosa nijje jjapeequi jjimahuajo eseya eshahuaja echacojji sosemaꞌ poa ojjaña. Jesosaa iyaa majje eseya poqui mee canaje eshahuajo echaco majajji pojjeama. Jamajjeya Jesosaja ejjashahuabaquijji jayojja jama ejjaꞌa qui, esejaya Emeshi Mese neija.  
\v 23 Eꞌe, Eyacuiñajjiya eseya jjeshe caꞌyonaje quea nahue nee nee, Jesosa Quito esejo manoꞌyonaje sosejje. Jamajjeya ¡ojaya esohui jayojja jama atiitiicue, onajaya pojjeama! ¡Ojo oe chacocue!  
\v 24 ¿Ae shai po aninaje miquianaya Eyacuiñajjiya iyaa jjimahuajo? ¡Jamaya atiitiicue quea bei! Eyacuiñajjiya miquianaya jaahuana cajeꞌyo quea pame nee. 
\s1 Pea etehueꞌyo shacuimaꞌ nequi yasijje, ahuemaꞌani yasijje peaꞌai 
\p  
\v 25 Miquianajaya etehueꞌyojo yahuajo eya huohuiꞌajjanaje nequiaa jama baꞌa: —¿Yajja acuae poaje shacuimaꞌ nequi, ahuemaꞌani peaꞌai? —tehuenaje nequiaa. 
\p Maya esejaya Emeshi Mese neiya Jesosaa eya huohui jjima shacuimaꞌ nequijo, ahuemaꞌanijo peaꞌai. Eyaya ecuea ejjashahuabaquijji tehueaña miquianajaya ebajji. Jamatii Eyacuiñajjiya eya babaca canaje esohui quea pame nee Jesosaja ehuohuijji. Ohuaya eya esohui eꞌe nei huohui meesahua cani tii peaꞌai. Jamajjeya ¡ecuea esohui shajjaꞌajjacue! 
\p  
\v 26 Jjeya Jesosaja epeejji pojjeamaa eseya napa cani quea huiso nee. Jamajjeya quea camaja ebaꞌejji. Jamajjeya epona cuana, jjeya nei miya ahuemaꞌani, ¡jamaya baꞌecue! Shacuimaꞌ nequi cuana peaꞌai, ¡jamatii baꞌecue! Jamaya eya jjashahuabaquiani.  
\v 27 Jamatii miquea ehuanase yanijo ¡aꞌa oya hueijji! Miya shacuimaꞌ nequiya, ¡aꞌa ehuanase sajji!  
\v 28 Eponajo jjahuanaqui sa poanijo miya quea mimishi pojjeama; jamaya quea pame. Epona, miya jjahueaqui sa poanijo quea pame, quea mimishi pojjeama peaꞌai. Jamatii jjahuanaqui majje quea camaja poaje miquianajaya ebaꞌejji, bobijo, aquiana ebaꞌejjijo. Ehuanasejo quea huiso jjashahuabaqui majamajaje. Ebacua quea huiso po majje quea camaja poaje. Eya ca ca shacuimaꞌ nequi. Ebaꞌejjijo jjashahuabaqui tiitii ajja. Jamajjeya miquianaya e jayojja nequianijo miquea ebaꞌejji camajaꞌama pishana poaje. 
\p  
\v 29 Ecuea epeejji cuana, eya jjashahuabaquiani jama baꞌa: Epojja Jesosa Quitoja epoe oꞌoyajji beshahua nei apoa. Jamajjeya ¡aꞌa jjashahuaba tiitiiquijji miquea ehuanase neijo! ¡Jesosa Quitojo oe jjashahuaba neineiquicue!  
\v 30 Eꞌe, Jesosa Quito poe oꞌoyani. ¡Ojaya epoejjijo jjashahuaba tiitiiquicue! Jamajjeya ¡aꞌa quea yeno po tiitiijji ebaꞌejji quea camajajo, emanoꞌyojo peaꞌai! ¡Quea bihui nee nee poani, aꞌa jjashahuaba tiitiiquijji peaꞌai! ¡Aꞌa jjashahuaba tiitiiquijji aquiana jjeshejjijo, meshi cuana jjeshejjijo peaꞌai!  
\v 31 Echaco quea huisojo jjashahuabaquianijo ¡aꞌa Jesosa Quitojo jjashahuabaqui pajeaꞌyojji! Oya Jesosa poe oꞌoyajo jiquio meshi cuana, ojjaña aquiana cuana peaꞌai chamaꞌyo tii poajeꞌyo.  
\v 32 Jamajjeya ¡aꞌa miquianajaya aquiana quea huisojo jjashahuabaqui majamajajji! Jesosaja epeejji shacuimaꞌ nequi jjashahuabaquiani Jesosa Quitojo, ojaya ejjashahuabaquijji jayojja jama a sa neinei poani tii.  
\v 33 Yahue ca ca jjashahuabaquiani ojaya ehuanase quea bihui nee epo meejji. Jamajjeya oya quea huiso aquianajo jjashahuabaquiani.  
\v 34 Eꞌe, shacuijji Jesosa Quito oe neijo jjashahuabaqui tiitii ajja. Oya ojaya ehuanasejo quea huiso jjashahuabaquiani peaꞌai. Epona Jesosa Quitoja epeejji ahuemaꞌani Jesosajo jjashahuabaquiani. Jesosaja ejjashahuabaquijji jayojja jama a sa poani. Ojo chaco sa neinei poani peaꞌai. Oja yahue enequijo, ehuanase jjashahuabaquiani quea huiso ojahue quea bihui po meejji. Jesosa Quito oe neijo jjashahuabaqui tiitii ajja. Jamajjeya oya quea huiso aquianajo jjashahuabaquiani.  
\v 35 Jamajjeya epeejji cuana, eyaya jiquio esohui tehueaña miquiana quea pame baꞌe meesahuajji, mijo quea camaja epo meejji pojjeama. Eꞌe, eyaya miquianaya jama ajjima baꞌa: —¡Aꞌa jjahueaquijji! ¡Miquianaya quea pona jea nee po majje jamatii aꞌa jjahuanaquijji! —jamaya ecuea miquianaya huohui jjima. Chojja, eyaya miquianaya huohuiaña jama baꞌa: —¡Jesosa nijje quea jaꞌa nee jjapeequicue! ¡Ojaya esohui jayojja jama baꞌecue! ¡Quea huiso nee jjashahuabaquicue Jesosajo, aquiana cuanajo pojjeama! ¡Onijje chacocue! —jamaya eyaya aña miquianaya. 
\p  
\v 36 Shacuimaꞌ nequija ebajji eyaya jama tehueaña baꞌa: Eꞌe pojjaꞌa miquianaya yahuajo jama poa baꞌa: —Ecuana ejjahuanaquijji pojjeama Jesosaja epeejji pojjeamaa ecuana quea huiso napa canijo. Quea camaja nee poaje —poa yahuajo. 
\p Jamajjeya shacuimaꞌ nequi cuana, miquea eshiye mese ahuemaꞌani jaajaa epo, miya huana sa neinei poanijo ¡ojo jjahuanaquicue! Jamaya quea pame nee, mimishiꞌama.  
\v 37 Jamatii shacuimaꞌ nequi oja shiye nijje ojaya ejjashahuabaquiꞌyojjijo jama poaje pojjaꞌa baꞌa: —Eya ca ca iña jjahuanaqui sa poꞌyo ajja peaꞌai. Eya quea pona jea nee pojjeama, quehuajje jjacojjoqui ajja nei nei —jamaya eꞌe jojo nei jjashahuabaqui majje jamatii canequiahua oya cuana, jjahuanaqui jjima tii. Jamaya quea pame nee nee. Eꞌe, onaaya Jesosaja epeejji napa canijo, quea camaja poaje jjahuanaqui majje.  
\v 38 Jamajjeya shacuimaꞌ nequi cuana, miquea eshiye mesejo jjahuanaqui majje miyaya quea pame aña. Eshiye mese mi huana majje ca ca miyaya quea pame nee nee aña. Eꞌe, miya Jesosajo nei jjashahuabaqui sa poani. 
\s1 Paboja esohui eꞌahuemanojo 
\p  
\v 39 Epeejji cuana, jiquio esohui eyaya tehueaña Jesosaja epeejji eꞌahuemanoja ebajji jama baꞌa: Epona, ¡miqueahue eshe nequijo, onijje tii anicue! ¡Aꞌa oya hueijji! ¡Miqueahue manoꞌyajo oe pea dejjajo jjahueaquiꞌyocue ca jjahueaquiꞌyo sa po majje! ¡Jesosaja epeejjijo oe jjahueaquiꞌyocue, epona cuana!  
\v 40 Jamatii ecuea ejjashahuabaquijji eꞌahuemanojo jama baꞌa: Miqueahue manoꞌyajo, ¡mee nei anicue, ahuemaꞌani jama! Jamaya miya quea bihui nee nee poajeꞌyo. Edojjoshahua Pameya eya jjashahuabaqui meesahua canijo, ecuea esohui eꞌe nei. 
\c 8  
\s1 ¿Aꞌa bobi eshahuaja eꞌijjiajji nisho baꞌehuanasohua majje ijjia cajji? 
\p  
\v 1 Yahuajo miquianaaya ecue bajji tehuenaje. Jama huohuiꞌajjame nequiaa iña anaje baꞌa: —¿Aꞌa noe eyacuiñajji nishoja eꞌijjiajji nisho, eshahuaja eꞌijjiajji nisho peaꞌai baꞌe huanasohua majje ijjia cajji? ¿Aꞌa eꞌijjiajji pojjeama pojjaꞌa? —eya huohuiꞌajjanaje nequiaa. 
\p Jamajjeya jjeya eyaya miquianaya sajaꞌaje jama baꞌa: Pea cuaa bobi edahuaꞌyo quia cani eyacuiñajji nisho huasijje, eshahua cuana huasijje pojjaꞌa onijje ejjapeequijji, maseꞌama epo meejji. Beca cuana jama poani baꞌa: —Ecuanaja eba epanaꞌyo acui ejehuiꞌyo, meshi epanaꞌyo peaꞌai, Eyacuiñajji pojjeama. Jamajjeya maya bobi ijjia caꞌyojji. 
\p Eꞌe jojo nei. Jamatii jamaya poanijo miquea ejjashahuabaquijji quea pame pishana. Ojjaña miya ojjaña ba epo poso poanijo quea pame pojjeama poaje. Pea ejjashahuabaquijji quea pame nee nee jama baꞌa: —¡Pea epeejji cuana ejjaꞌasahuaqui quea pame nee! ¡Quea jaji nee ejjapo meequi! 
\p  
\v 2 Eꞌe jamaya quea pame. Pea cuana jama jjashahuabaquiani baꞌa: —Jamatii ecuea eba nei nei quea huiso. 
\p Jamaya jjashahuabaquianijo oya quea jaꞌa jjashahuabaqui jjima.  
\v 3 Quea Eyacuiñajji jea nee poanijo ca ca, ojaya eba eseya ojaya epeejji nei poani. 
\p  
\v 4 Jamajjeya jjeya eyaya miquianaya huohuije bobijo, ma eshahua huasijje, eyacuiñajji nisho huasijje quia canijo. Quia majje pea cuaa bobi ijjia cani. Esejaya eba eyacuiñajji nisho acui ejehuiꞌyo, meshi epanaꞌyo pojjaꞌa, Eyacuiñajji eꞌe nei pojjeama. Eyacuiñajji eꞌe jojo nei oe nei yani. Jamajjeya bobi eyacuiñajji nisho huasijje quia majje eshahuaja eꞌijjiajji nisho baꞌehuanasohua ijjia caꞌyojji eseyaya. Jamaya quea mimishi poani pojjeama.  
\v 5 Pea cuana ca ca jjashahuaba quehuaquiani jama baꞌa: —Eyajo, meshijo cuana peaꞌai quea huiso eyacuiñajji yani. 
\p Jamaya jjashahuaba quehuaquianijo quea huiso cuaa eyacuiñajji nishojo chaco cani, eshahuajo peaꞌai. Eꞌe, acui ejehuiꞌyo, meshi epanaꞌyo pojjaꞌa, eshahua pojjaꞌa, emeshi mese peaꞌai Eyacuiñajji poso acani pea cuaa.  
\v 6 Esejaya ca ca eba Eyacuiñajji oe nei yani. Oya esejaya Chii ai. Ohuaya ohuaye nei ojjaña aquiana cuana pana caꞌya poa. Eseya onijje jjapeequiani, ojaya esohui shajjaꞌajjaña peaꞌai. Jesosa Quito esejaya Emeshi Mese oe nei poani peaꞌai. Yahuajo nei Eyacuiñajjiya Jesosa Quito nijjeya ojjaña pana caꞌya poa. Nequi mee cani peaꞌai. Jesosa Quitohua eseya baꞌe mee cani peaꞌai, ojaya epeejji nei cuana. 
\p  
\v 7 Eꞌe jojo nei Eyacuiñajji oe nei yani esejaya Chii ai. Jamatii jamaya Jesosaja epeejjija ba jjima beca cuanaja. Yahuajo Jesosa Quito ba jjimahuajo onaaya bobi edahuaꞌyo eshahua quea bihui po meeꞌyojji ijjia canaje quea huiso. Jjeya ma bobi ijjia majje oya cuana quea mete nee jjashahuabaquiani jama baꞌa: —¡Dee! Eya eshahuaja epeejji jayojja jama poani oꞌoya. Quea mimishi poani —jamaya eshahuajo jjashahuabaquianijo, eꞌe, oya cuana quea mimishi poani. 
\p  
\v 8 Miquianaya quea quehua jjashahuabaquiani jama baꞌa: —Eyacuiñajji ecuanajo quea bihui nee pojjeama poaje, ca ojjaña bobi ijjiañajo. Eyacuiñajji ecuanajo quea bihui nee pojjeama poaje, ca ecuaa pea bobi ijjia ajjajo —poani beca cuana. 
\p Chojja. Eyacuiñajji ese nijje quea bei poani Jesosa nijje jjapeequianijo, bobi ijjiañajo pojjeama. 
\p  
\v 9 Epeejji cuana, ¡shajjaꞌajjacue mo! Miquianaya quea jjashahuabaqui jaꞌa. Jamajjeya bobi eshahuaja eꞌijjiajji nisho ebaꞌehuanasohua ijjia majje miquianajaya eba jamaya poani quea mimishi pojjeama. Jesosaja epeejji caꞌaꞌama cuana ca ca quea jjashahuabaqui jaꞌa pojjeama quea mimishi po oꞌoya mee chanaꞌ.  
\v 10 Jama po chanaꞌ baꞌa: Miya eyacuiñajji nishoja equijo bobi ijjia ani ba majje ohuaya ijjia caje peaꞌai pojjaꞌa. Ijjiaꞌijjia ani, oya jjashahuabaquije eyacuiñajji nishojo, eyacuiñajji nisho bihuia cani poso oya quea jaꞌa pojjeama poaje.  
\v 11 Eꞌe, mi ba majje mi jayojja jama ma bobi ijjia majje oya quea mete poaje: —Eꞌe, eya eshahuaja bobi ijjia majje quea mimishi po oꞌoyanaje —poso jjabaquije. 
\p Jamajjeya Eyacuiñajji onijje quea quene poaje poso oya quea yeno poaje. Oja mimishijo Jesosa Quito manoꞌyonaje peaꞌai. Oya mique chahua jama. Jamajjeya ¡oya quea yeno po chanajo aꞌa maya noe ijjiajji!  
\v 12 Miquianaya Jesosaja epeejji cuana quea jaꞌa poani. Jamatii pea epeejji jaꞌaꞌama quea bicho, quea mete poani mi jayojja jama po majje. Jamajjeya miyaya oya quea mimishi po meenaje. Jamajjeya Jesosa Quitohua miya ba cani ona mimishi po meejji jayojja, quea mimishi peaꞌai.  
\v 13 ¡Bacue, oe! Pea epeejji quea mete, quea mimishi peaꞌai poani eya maya noe ijjiaña ba majje, eyaya maya noe eꞌijjia oꞌoyajji pojjeama nei nei. Jamajjeya Jesosaja epeejji jaꞌaꞌama quea mimishi epo meejji pojjeama nei nei. ¡E jayojja jama pocue; Jesosaja epeejji jaꞌaꞌama aꞌa quea mimishi po meejji! 
\c 9  
\s1 ¿Achajja baꞌe cajji Jesosaja huoojeaꞌyo esohui huohuijji? 
\p  
\v 1 Ecuea epeejji cuana Conitojo baꞌe, eya ca iña eꞌe jojo nei Jesosaja huoojeaꞌyo oja esohui huohuijji. Dejjaja huoojeaꞌyo pojjeama iña iquio. Jesosaja epeejji quea jaꞌa nee baꞌe meesahua sa aña nei nei. Yahuajo eyaya Jesosa banaje, esejaya Emeshi Mese nei. Esohui quea pame nee ojo eyaya huohuinaje miquiana huasijje. Shajjaꞌajja majje miquianaya ojaya epeejji poanaje. Maya miquianajaya eba.  
\v 2 Jamajjeya eꞌe pojjaꞌa pea cuana jama poani baꞌa: —Pabo Jesosaja huoojeaꞌyo pojjeama —poani. 
\p Jamatii miquianajaya eya eba Jesosaa huoojea cani. Eꞌe, miquianaya ojaya epeejji poanaje eya huohuiajje. Jamajjeya quea huiso jama poani baꞌa: —Conitojo baꞌe cuana Jesosaja epeejji poanaje Paboja esohui shajjaꞌajja majje. Jamajjeya esejaya eba Eyacuiñajjiya Pabo huoojea canaje; ohuaya Pabo esohui huohui meesahua cani tii —poani cuana. 
\p  
\v 3 Eꞌe, beca cuaa eya niñeba cani jama baꞌa: —Pabo ca jja ca oma Eyacuiñajjija huoojeaꞌyo pojjeama. 
\p Jamaya poajo, eyaya sajaꞌaña jama baꞌa: —Jesosaa ecuana huoojea caꞌyonaje ojaya esohui huohuiya —sajaꞌame aña. 
\p  
\v 4 Eꞌe, eya Jesosaja huoojeaꞌyo ojaya esohui huohuijji. Jamajjeya eyaya miquea bobi ijjiaje sosemaꞌ, eya sohuihuohuiaña sosejje. Jamatii eya jamaya po ajja nei nei.  
\v 5 Jesosaja esohui huohuijji cuana, oja chahua mese peaꞌai ca ca ehuanase cuana nijje poquiani esohui huohuiya. Jamaya poani Peno peaꞌai. Jamaya quea pame nee. Eya jamaya po sa po majje quea pame poaje, ca ehuanase Jesosaja epeejji poanijo.  
\v 6 Ojjaña Jesosaja huoojeaꞌyo esohui huohuijji cuana esohuijo nei chacochacoani tii, bobi yajjijo chacochaco ajja. 
\p ¿Aꞌa ecuaaya oeyaya Benabe nijjeya cachacoahua bobi sosejje? ¿Aꞌa ecuaaya oeyaya casohuihuohuiahua sosemaꞌ? ¿Aꞌa jamaya quea pame? Eya ca ca jamaya poani baꞌa: —Chojja; ecuanaya peaꞌai casosequia cahua esohui huohuiaña sosejje —poani eya. 
\p  
\v 7 ¡Bacue! Emeshi meseja huoojeaꞌyo, ona oja esohui shajjaꞌajja meejji poani ohuaya sosequia cani ojo chaco canaje sosejje. Oya jayojjaya eꞌacui yiye meseya acuijjajja ijjia cani acui yiye chaco canaje sosejje. Anaꞌai jaahuanajjiya tojjo na ishi cani jaahuana sosejje.  
\v 8 Jiquio ecuea esohui etehueꞌyo jayojja jama ojjaña poani. Jamaya ojjañaja eba. Jamajjeya ecuana peaꞌai cabobia cahua cuaa Eyacuiñajjija esohui huohui sosejje.  
\v 9 Eyacuiñajjiya Moisesi yahuajo nei nei jama tehue meeme aca poa baꞌa: 
\q1 “¡Anaꞌai chacochacoanijo bobiacue! Esoꞌ quishihuojo poequiya tii caꞌijjia cahua; ¡aꞌa naba huoshojji!” 
\m Jamaya yahuajo nei Eyacuiñajjiya tehue mee ca poa. Ohuaya Moisesi jamaya tehue meeme aca poa anaꞌaijo nei pojjeama jjashahuabaquianijo.  
\v 10 Ohuaya esejo jjashahuabaquianijo peaꞌai jamaya tehue mee ca poa. Oya jayojjaya que chacojji cuana, anoso sejjajji peaꞌai chaco majje jama jjashahuabaquiani baꞌa: —Eyaya anoso sejja sosejje quijje yejeꞌyo ecuea equijo eꞌijjiajji. 
\p  
\v 11 Jiquio ecua chacochacojjiya jayojjaa ecuaaya miquianaya sohuihuohuinaje. Shajjaꞌajja majje Jesosaja epeejji poanaje. Jamajjeya jjeya ecuana bobi quiaje esohui huohuinaje sosejje miquianaya quea pame nee poaje.  
\v 12 Eꞌe, pea esohui huohuijji sohuihuohui majje jama poani baꞌa: —¡Ecuaa miquiana sohuihuohuinaje sosejje bobi, aquiana peaꞌai che ecuana quiacue! —poani pea esohui huohuijji. 
\p Jamaya quea pame. Ecuaaya ca ca quea huiso nee esohui quea pame nee Jesosaja huohuinaje miquianajaya eshajjaꞌajjajji. Sosemaꞌ. Jamatii ecuanajaya miquianaya jama ajjima baꞌa: —¡Aquiana mo che quiacue eya esohui huohuinaje sosejje! —ajjima ecuanajaya. 
\p Chojja. Jamaya eꞌa jojjemo Jesosaja epeejji pojjeama siajje pome jama baꞌa: —Pabohua ca jja ca esohui huohui cani quea huiso aquiana sosejje. Jamajjeya ecuana shajjaꞌajja sa po ajja —siajje pome. 
\p Jamajjeya eya aemaꞌ jayojja jama baꞌyani; esohui huohuiaña sosemaꞌ ojjañaja eshajjaꞌajjajji. 
\p  
\v 13 Yahuajo nei nei Eyacuiñajjiya jama aca poa baꞌa: —Jodio dejja cuaa Eyacuiñajjija equijo chaco majje bobi Eyacuiñajji yasijje onaja quia ijjia ca poa sosemaꞌ. Jodio etii cuaa Eyacuiñajjija equijo huo dahua ca poa Eyacuiñajji quea bei epo meejji. Ma huo dahua tehuejea jjimahua ijjia ca poa Eyacuiñajjija equijo chaco cani sosejje. 
\p Maya miquea eba.  
\v 14 Oya jayojjaya esejaya Emeshi Mese neiya Jesosaa huohui canaje ojaya esohui huohuijji cuanajo jama baꞌa: —Sohuihuohui canijo, ¡sose quiacue ecuea esohui huohuijji! —poa. 
\p  
\v 15 Jamatii eya jamaya epojji pojjeama nei nei. Esohui huohuinaje sosejje bobi edojojji pojjeama. Jjeya esohui tehueaña miquiana huasijje miquea bobi equia meejji pojjeama. Bobijo pojjeama eyaya esohui huohuiaña. Eyaya Jesosa Quitoja esohui huohui tiitiije sosemaꞌ miquianaya.  
\v 16 Eyaya ehuohuijji pojjeama jama baꞌa: —Eyaya ca eya Jesosaja esohui quea pame huohuiaña; jamajjeya eya quea pame nee. 
\p Chojja. Eyacuiñajjiya eya huoojea caꞌyonaje Jesosa Quitoja esohui huohuiya. Esohui huohui ajja jjemo eya quea yeno nee nee pome, Eyacuiñajjiya eya quea nee nee po mee came peaꞌai.  
\v 17 Eyaya jamatii ecuea ejjashahuabaquijji jayojja jama esohui huohuiaña jojjemo jama huohuime baꞌa: —¡Sosequiacue mo esohui huohuiaña sosejje! —ame. 
\p Yahuajo eya jjashahuabaqui jjima Jesosaja esohui huohuijji. Chojja. Eyacuiñajjiya eya huoojea caꞌyonaje ojaya esohui huohuiya. Eyaya ojo sosemaꞌ jayojja quea bihui nee chacoaña.  
\v 18 ¿Ae sa poani eya esohui huohuiaña sosejje? Eya bejjo, bobi peaꞌai sa po ajja esohui huohuiaña sosejje. E shajjaꞌajjajji huohui jjima jama peaꞌai baꞌa: —¡Che mo bejjo quiacue eya esohui huohuiaña sosejje! —jamaya ecuea ajjima. 
\p Chojja, eya quea bihui nee Jesosaja esohui quea pame nee huohuiaña sosemaꞌ.  
\v 19 Chamaꞌ dejja e huoojeaꞌyojji esohui huohuijji. Chojja. Jesosa nijje chaco sa poanijo eya chacochacoani. Ojjañaja yajjijo chacoaña. Eꞌe, eyaya esohui huohuiaña ojjaña Jesosa nijje ejjapeequi meesahuajji.  
\v 20 Jamajjeya Jodio cuana nijje baꞌyanijo, o jayojja jama baꞌyanijo eya Moisesija etehueꞌyo jayojja jama aña peaꞌai. Jamajjeya ohuaya ecuea esohui Jesosa Quitojo shajjaꞌajja cajeꞌyo pojjaꞌa. Moisesija etehueꞌyojo jjamimicuiajea nobiajeaqui ajja onijje.  
\v 21 Oya jayojjaya Jodio pojjeama cuanaja Moisesija etehueꞌyo ba jjimajo, eyaya onijje nequiya ohuaya jayojjaya jama aña. Moisesija etehueꞌyo huohui ajja. Chojja. Eyaya esohui quea pame nee Jesosaja huohuiaña ona Jesosa nijje jjapeequi meesahuajji. Jamajjeya Jesosaja esohui jama po majje Eyacuiñajjija ejjashahuabaquijji jama aje peaꞌai. Eya ca ca Eyacuiñajjija esohui jayojja jama baꞌyani tii, shajjaꞌajjaña tii tii, Jesosa Quitoja. Jamajjeya Eyacuiñajji quea bihui nee poani enijje.  
\v 22 Jesosaja epeejji quea jjashahuabaqui jaꞌa pishana nijje baꞌyanijo eya o jayojja jama poani, Jesosa nijje ejjapee neineiqui meesahuajji. Eꞌe, Jesosa nijje ejjapeequi meesahuajji eyaya ojjaña joya e pejjejo baꞌe nijje jjapeequiani. Eyaya aje oe ojjaña pea cuana Jesosaja epeejji quea jaꞌa po meesahuaña. 
\p  
\v 23 Jamaya eyaya aña ojjaña cuana esohui quea pame nee Jesosa Quitojo eshajjaꞌajja meejji. Jamajjeya eya quea bihui nee jjapeequiani Jesosaja epeejji eyacua cuana nijje. 
\p  
\v 24 ¡Jjashahuabaquicue eshoꞌiquiana quebanei poanijo! Ojjaña cuajicuajiani aquiana iñajji sosemaꞌ. Oe eshoꞌi quea cuejipashi nee nee ebionei poeje. Oya oe nei iña mee caje aquiana sosemaꞌ. Jiquio ecua eshoꞌiquiana quea cuejipashi nee cuajicuajiani aquiana iñajji jayojja jama ¡miquianaya Jesosa Quito nijje jjapeequicue quea pame nee nee! ¡Ojaya esohui jama acue! Jamajjeya quijje ohuaya miquianaya quea pame nee baꞌe tiitii mee cajeꞌyo.  
\v 25 Ojjaña eshoꞌi cuana janobajjima nei cuajicuaji huichaꞌa huichaꞌani, jjashahuabaquiani quea cuejipashi nee epojji, aquiana eꞌiñajji. Jamatii ma aquiana quijje pishana chamaꞌyo tii poajeꞌyo. Jesosa nijje jjapee neineiquiajo ca ca quijje ohuaya eseya quea pame nee nee sosequia cajeꞌyo, ebaꞌejji quea pame nee nee epo tii tiijji.  
\v 26 Jamajjeya eya Jesosa nijje jjapee neineiquiani. Jjashahuaba tiitiiquiani. Eya poqui ajja cojjamaꞌ jama; dejja ehuoo jama poqui ajja, eya. Ecuea eba Jesosaja esohui quea pame nee nee.  
\v 27 Jesosaja epeejji quea pame nee, quea jaꞌa nee epojji eya jjashahuabaquiani quea huiso. Eꞌe, ojaya esohui huohui huichaꞌa huichaꞌa majje eya quea bicho nee nee pome Jesosaja epeejji pameꞌama po majje. Jama poajo Jesosa Quitohua quijje eya esosequiaꞌyojji pojjeama. Eya ba caje ohuaya epeejji quea mimishi. 
\c 10  
\s1 ¡Etiiquiaa jayojja aꞌa eyacuiñajji nisho ajji! 
\p  
\v 1 Ecuea epeejji cuana, ¡jiquio esohui shajjaꞌajjacue! Yahuajo nei nei ecuanaja etiiquiana Moisesi nijje meshi jabojo poquianijo, Eyacuiñajjiya jaahuana caꞌya poa. Eyajo ona biajje bo ai nequi mee caꞌya poa eshequiya edahua ca poani jjejojo. Poquianijo bae huoꞌo huasijje poeꞌyanaje; bae yiyesamajje ejiojji quea jabo nee po mee majje, ojjaña tii ojee ojje miji yasijje poqui meesahua caꞌya poa quea pame nee ejiojjijje.  
\v 2 Yahuajo nei bo quimejjejje poquianijo, bae huoꞌo ojje miji yasijje poquianijo peaꞌai ecuanaja etiiquianaa Moisesija esohui shajjaꞌajja ca poa. Jamajjeya onajaya emeshi mese poꞌya poa Moisesi. Oya jayojjaya jjeya eseya enajo besa mee cajje Jesosaja esohui jayojja jama ebaꞌejji.  
\v 3 Yahuajo nei meshi jabojo Eyacuiñajjiya bobi pahui jayojja oque mee caꞌya poa meshi yasijje ojjaña etiiquianaja eꞌijjiajji.  
\v 4 Ena chamaꞌ poajo, Quitohua ena jamatii cuaya meequi caꞌya poa bajjoojje etiiquianaja eꞌishijji. 
\p Jamajjeya Quitohua ojaya epeejji cuana jaahuana cani. Etiiquiana Quitojo jama poa baꞌa: —Oya ecuana nijje poquiani, de; ohuaya ecuana jaahuana cani. Jamajjeya ohuaya bajjoojje ena cuaya meequi canaje —poa. 
\p  
\v 5 Jamatii aje oe beshahua nei ojjaña ecuanaja etiiquiana quea mimishi po tiitiia poa. Eyacuiñajji bihuia jjima aca poa. Eyacuiñajji quea quene ona nijje poa. Jamajjeya beshahua nei ojjaña mano caꞌya poa meshi jabojo tii. 
\p  
\v 6 Eyacuiñajjiya etiiquiana quea mimishi nee nee mano mee caꞌya poa ese jjabahuejjaquijji, mimishijo quea mete epojji. Jamajjeya mimishi cuana a sa po ajja poajeꞌyo eseya.  
\v 7 Eꞌe, ecuanaja etiiquiana eyacuiñajji nisho nijje, acui ejehuiꞌyo nijje, eshahua nijje peaꞌai mimi caꞌya poa. Eyacuiñajjija esohui yahuajo nei etehueꞌyo jama poa baꞌa: 
\q1 “Yahuajo oya cuana ijjiaꞌijjia majje, ishiꞌishi majje peaꞌai majamaja ca poa eshahua nijje jjapeequianijo”. 
\m Jamaya yahuajo poa. 
\p ¡Aꞌa ona jayojja jama quea mimishi pojji eshahua nijje! Jamaya quea tai.  
\v 8 Etiiquiana cuana aje oe onaja ehuanasejo jaanaje, onaja yahuejo jaanaje. Quea mimishi nee nee poanijo, Eyacuiñajjiya oya cuana quea huiso nee nee, 23.000 mano mee caꞌya poa oya pojjajo tii. Jamajjeya ¡aꞌa jja oe ona jayojja jama pojji! ¡Aꞌa onajaya ehuanasejo, yahuejo peaꞌai baꞌejji!  
\v 9 Ecuanaja etiiquiana cuana jjashahuabaquia poa jama baꞌa: —Ecuana quea mimishi poajo, eꞌe pojjaꞌa Eyacuiñajji queneꞌama poaje ecuanaja mimishi cuanajo —jamaya poa, de. 
\p Chojja. Quea mimishi poajo, Eyacuiñajjiya peyo cuana huoojea ca poa ona ijjiaa. Jamajjeya ¡etiiquiana jayojja jama aꞌa pojji!  
\v 10 Ecuanaja etiiquiana cuaa Eyacuiñajji niñeba ca poa. Jama poa baꞌa: —Eyacuiñajjiya ecuana quea pame nee ejaahuanajji pojjeama —aca poa. 
\p Eyacuiñajji niñeba canijo, ohuaya ojaya esohuidojojji quea caꞌa cuana huoojea caꞌya poa o niñebajji cuana mano meeꞌyohua. Jamajjeya ¡etiiquiaa aca poa jayojja jama niñebame aꞌa ajji Eyacuiñajji! 
\p  
\v 11 ¡Aꞌa pajeaꞌyojji! Ecuanaja etiiquiana quea mimishi poaninajejo mano caꞌya poa yahuajo nei. Jamaya Eyacuiñajjiya amajje esohui tehue mee ca poa esejaya ebajji. Jamajjeya jjeya ba mee cani eꞌe jojo nei oya quea quene poaje esejaya mimishijo. Jesosa Quito pojjaꞌa jjeya poeje oꞌoya. ¡Jamajjeya etiiquiana quea mimishi nee nee poa jayojja aꞌa pojji! 
\p  
\v 12 Eꞌe pojjaꞌa beca cuana quea quehua jjashahuabaquiani jama baꞌa: —Eya quea pame nee poanijo eshahuaa eya quea mimishi epo meejji pojjeama. 
\p Chojja. ¡Jamaya jjashahuabaquicue baꞌa: —Eyacuiñajji, ¡eya quea pame po meesahuacue! ¡Nahue neineicue mo; quea mimishi aꞌa po mee oꞌoyajji! —jamaya Eyacuiñajji nijje mimicue! 
\p  
\v 13 Eshahuaa ojjaña quea mimishi po mee sa acani. Ohuaya miquianaya quea mimishi po mee sa acani. Jamatii Eyacuiñajjiya miquianaya epajeaꞌyojji pojjeama. Ohuaya miquianaya ojaya epeejji quea pame nee po mee canijo, eshahuaa miya quea mimishi epo meeꞌyojji pojjeama. Beshahua nei quea mimishi po mee canijo, ¡Eyacuiñajji nijje mimicue: —Jesosa, ¡eshahua quea huesha nee huoojeacue! ¡Eya quea pame po meecue mimishiꞌama epojji! —jamaya pocue! 
\s1 Jesosaja bobi ijjiañajo ¡aꞌa eshahuaja epeejji jama pojji! 
\p  
\v 14 Jamajjeya ecuea epeejji cuana, ¡eshahuaja epeejji cuana nijje aꞌa jjapeequijji! ¡Onaya eshahua nijje mimiani yasijje aꞌa poquijji! ¡Epanaꞌyo cuanajo aꞌa jjashahuabaquijji peaꞌai!  
\v 15 Ecuea eba miquianaya quea jjashahuabaqui jaꞌa nee poani. Jamajjeya ¡ecuea esohuijo jjashahuaba neineiquicue, quea jaꞌa nee!  
\v 16 Eseyaya Jesosaja bobi ijjiaña oya esejaya mimishijo manoꞌyonaje pajeaꞌyo jjima yajji. Jesosaja bobi ijjia jjimahuajo, oja ena ishi jjimahuajo peaꞌai eseya Eyacuiñajji nijje emimi jama baꞌa: —Eyacuiñajji, miya quea pame nee nee. 
\p Ma ena ishi jjimahuajo Jesosa Quitoja enaꞌ ecuayaꞌyojo eseya ejjashahuabaqui jama baꞌa: —Jesosa manoꞌyonaje ecuea mimishi cuijeaꞌyojji sosejje —jamaya jjashahuabaquime epo. 
\p Pahui ijjia jjimahuajo eseya ejjashahuabaqui Jesosa Quitoja yamijo jama baꞌa: —Jesosa Quito eseya ojaya epeejji quea pame nee epo meejji sosejje manoꞌyonaje. 
\p  
\v 17 Pahui mijisisi jjimahuajo oe pahui yani. Eseya Jesosaja epeejji cuana quea huiso. Jamatii pahui oe jayojja jama eseya poani. Eꞌe, eseya ojee nequianijo eseye nei jayojja nequiani Jesosa Quito nijje nei jjapeequianijo. 
\p  
\v 18 ¡Jjashahuabaquicue ecuanajaya etiiquianajo, Jodio cuanajo! Oya cuana yahuajo nei jama poa baꞌa: Eyacuiñajji nijje emimijji cuaa noe Eyacuiñajji yasijje equiaꞌyo dahua ca poa. Noe dahua tehuejea jjimahua ijjia caninaje Eyacuiñajji nijje jjapeequianiya jjejojo.  
\v 19 ¿Ajeo acuae eyaya miquiana jama huohuiaña, ae ba meesahuajji? Jama baꞌa: Bobi eyacuiñajji nisho huasijje quia majje dejja cuaa jamatii ijjia cani. Eyacuiñajji nisho eshe pojjeama, Eyacuiñajji eꞌe jojo nei pojjeama, de.  
\v 20 Jamatii eshahuaja epeejji cuaa bobi quia cani eyacuiñajji nisho epanaꞌyo huasijje pojjeama. Maya eshahua cuana huasijje quia cani. Jamajjeya oya cuana Eyacuiñajji eꞌe jojo nei nijje jjapeequi ajja. Miquianaya Jesosaja epeejji cuana, ¡aꞌa eshahuaja epeejji jayojjaa jama ajji! ¡Aꞌa eshahua cuana nijje pojji!  
\v 21 Jesosa Quito nijje jjapeequianiya ¡eshahua cuana nijje aꞌa jjapeequijji! Pea oya, de. Jamajjeya Jesosaja ena ishiañajo, oja bobi ijjiañajo peaꞌai ¡bobi eshahua huasijje equiaꞌyo aꞌa ijjia peaꞌaijji!  
\v 22 Eshahua cuana Eyacuiñajjija botiꞌama nei nei. ¡Aꞌa esejaya Emeshi Mese nei Eyacuiñajji quea quene po meejji eshahua nijje jjapeequianijo! ¿Aꞌa miya quea caꞌa nee poso jjabaquiani? ¿Aꞌa ya Eyacuiñajji caꞌaꞌama poso aña? Jamajjeya Jesosa nijje jjapeequiani ¡aꞌa eshahuaja epeejji po peaꞌaijji! 
\p  
\v 23 Jesosa Quitoja epeejji beca cuana jama mimiani baꞌa: —Eya Jesosaja epeejji poanijo ojjaña bobi, epanaꞌyo huasijje quiaꞌyo peaꞌai ijjia majje quea mimishi pojjeama poani —jamaya poani. 
\p Eꞌe jojo nei. Jamatii eyaya miquianaya sajaꞌaña jama baꞌa: —Chojja. Ma bobi ijjia majje quea pame pojjeama poani. Maaya ojjaña Jesosa nijje jjapeequi meesahua ajja. Miquianaya jama jjashahuaba quehuaquiani peaꞌai baꞌa: —Ecuaaya ojjaña aje mimishiꞌama poanijo. 
\p Eyaya ca ca miquianaya huohuiaña jama baꞌa: —Ojjaña quea pame pojjeama eꞌajji. ¡Jesosaja epeejji quea jaꞌa pojjeama cuana quea mimishi po mee oꞌoya chanaꞌ!  
\v 24 Jamajjeya aꞌa quea quehua jjashahuabaquijji jama baꞌa: —Eyaya ojjaña bobi jjesheje ecuea eꞌijjiajji —jamaya poanijo miquianaya Jesosaja pea epeejji cuanajo jjashahuabaqui ajja. 
\p Chojja. ¡Jjashahuabaquicue pea cuana Jesosa nijje ejjapeequi meesahuajji quea jaꞌa nee!  
\v 25 Jamajjeya noe edahuaꞌyo jjesheañajo ¡aꞌa huohuiꞌajjajji jama baꞌa: —¿Aꞌa jiquio noe edahuaꞌyo eshahua huasijje quia? —aꞌa jamaya huohuiꞌajjajji! 
\p Jamajjeya ¡miyaya maya ijjiacue quea bihui nee, meteꞌama!  
\v 26 Eꞌe, Eyacuiñajjija esohui etehueꞌyo jama poa baꞌa: 
\q1 “Eyacuiñajjiya ojjaña meshi cuana pana caꞌya poa. Ojjaña aquiana peaꞌai pana caꞌya poa. Jamajjeya ojaye nei meshi, aquiana peaꞌai, ojjaña”. 
\m Jamaya poa yahuajo nei. 
\p  
\v 27 Eꞌe pojjaꞌa Jesosaja epeejji pojjeamaa miya iyaa caje ojaya equi yasijje bobi ijjiaa. Jamajjeya ojaya equi yasijje poqui majje ¡bobi ijjiacue meteꞌama! Ijjiaꞌijjianijo ¡aꞌa huohuiꞌajjajji jama baꞌa: —¿Aꞌa jiquio noe edahuaꞌyo eshahua huasijje quia? —aꞌa huohuiꞌajjajji! ¡Jamatii ijjiacue meteꞌama! 
\p  
\v 28 Jamatii ojee ijjiaꞌijjianiya, pea eseja epeejjiya miya jama huohui caje pojjaꞌa baꞌa: —Jiquio bobi eshahua huasijje quia —jamaya acajje ¡aꞌa maya bobi ijjiajji! Ma bobi quea pame nee eꞌijjiajji. Jamatii miya Jesosaja epeejji neiya ma bobi ijjiaña ba majje esejaya epeejji quea yeno poaje pojjaꞌa. ¡Aꞌa oya quea yeno, quea bicho po meejji!  
\v 29 Eꞌe, miya Jesosaja epeejji quea pame poaniya ijjiaje meteꞌama. Jamatii mi ba majje Jesosaja epeejji quea jaꞌa pishana quea mete po chanaꞌ miyaya ma bobi ijjiajo. Jamajjeya ¡aꞌa ijjiajji! ¡Oya quea bei po meecue; miya peaꞌai quea bei pocue! 
\p Eꞌe pojjaꞌa beca cuaa huohui caje jama baꞌa: —Eyaya Jesosaja epeejji poaniya ojjaña bobi ijjiaña meteꞌama —acaje. 
\p Eya ca ca jama po ajja. Pea cuana quea jjashahuabaqui jaꞌa pojjeamajo quea mete poanijo, eyaya ojjaña bobi ijjia ajja. 
\p Eꞌe pojjaꞌa onaaya jama acaje peaꞌai baꞌa:  
\v 30 —Eꞌe, eyaya Eyacuiñajji bihuiaña ojjaña bobi ijjia jjimahuajo. Jamajjeya eyaya ojjaña bobi ijjiaña meteꞌama. Bobijo eyaya Eyacuiñajji bihuiaña; jamajjeya ¡aꞌa enijje mimijajijji eya ojjaña bobi ijjiañajo! —jamaya acaje pojjaꞌa onaaya. 
\p  
\v 31 Jamajjeya ¡jiquio esohui bacue! Miyaya bobi ijjiañajo, eꞌishijji ishiañajo peaꞌai ojjaña miquea ebaꞌejjijo peaꞌai jjashahuabaquicue jama baꞌa: —Eyaya ojjaña cuana Eyacuiñajji bihuia mee sa aña. 
\p  
\v 32 Jamajjeya ¡quea jaꞌa nee baꞌe tiitiicue! ¡Aꞌa esejaya epeejji cuana quea mimishi po mee oꞌoyajji! ¡Jodio cuana, Jodio pojjeama, Jesosaja epeejji cuana peaꞌai aꞌa quea mimishi po mee oꞌoyajji! ¡Eꞌe, quea jaꞌa nee baꞌecue ojjaña cuana Jesosa nijje quea jaꞌa nee ejjapeequi meesahuajji!  
\v 33 ¡E jayojja jama pocue! Eya jjashahuabaquiani ona quea bei po meesahuajji. Eya jjashahuabaqui ajja jama baꞌa: —¿Ae shai ejo quea pame? 
\p Eyaya ca ca ojjaña quea bei po mee sa aña. Jamaya eyaya aña ojjaña Jesosaja epeejji epojji. 
\c 11  
\p  
\v 1 Eyaya Jesosa Quitoja esohui jayojja jama aña. ¡Jamajjeya e jayojja jama pocue miquianaya! 
\s1 Esohui Eyacuiñajjija equi yasijje dobiquianijo 
\p  
\v 2 Ojjaña pojjajo miquianaya ejo jjashahuabaquiani. Ecuea esohui jayojja jama po tiitiiani, miquianaya. Jamaya quea pame.  
\v 3 Jamatii ¡ecuea esohui etehueꞌyo ba neineicue yahue cuana, ehuanase cuana peaꞌai! Yahue cuana ojaya ehuanase huoojeajji poani. Jesosa Quito ojjaña huoojeajji poani tii, dejja cuana huoojeajji poani, ojaya epeejji cuana huoojeajji poani. Ojaya Chii Eyacuiñajji eyajo ani Jesosa Quito huoojeajji poani peaꞌai.  
\v 4 Jamajjeya dejja cuana, Eyacuiñajjija equijo nequi onijje mimianijo, oja sohui huohui canijo peaꞌai ¡ejaahuojja cajjajeaꞌyocue! Jaahuojjajjiya Eyacuiñajjija esohui huohui canijo Jesosa Quito cajaa ajji jayojja jama poani.  
\v 5 Epona cuana ca ca Eyacuiñajjija equijo ani onijje mimianijo, ojaya esohui huohui caqui peaꞌai ¡jjasapataquicue! Eꞌe, epona jjasapataqui ajjajo oja yahue cajaa ajji jayojja jama poani. Jamajjeya jjasapataqui ajjajo esao cobojea majje jayojja jama poani, quea bicho poani.  
\v 6 Eꞌe, eponaa jjasapataqui ajjaa jjejojo cacobojea cahua. Jamatii epona esao cobojea majje quea bicho nee nee poaje. Jamajjeya bichoꞌama epojji epona cajjahuojja taquiahua Eyacuiñajjija equijo mimianijo. 
\p  
\v 7 Dejja cuaa, Eyacuiñajjija epeejjiya ejaahuojja iya ajja Eyacuiñajjija equijo esohui huohui canijo. Eꞌe, Eyacuiñajji dejja cuanajo jama poa baꞌa: —Dejja cuana ojjaña eꞌaquiana mese poaje ojjaña aquiana meshijo ani. Jamaya Eyacuiñajjiya ojjaña ba mee caje ohuaya dejja pana caꞌya poa quea pame nee oya jayojja jama epojji. Jamajjeya ¡aꞌa epona jama pojji! ¡Aꞌa jjahuojjataquijji nequiana dejja! Oya jayojjaya epona oja yahueja esohui jayojja jama acani oja yahueja yajjijo.  
\v 8 Eyacuiñajjiya dejja ebionei pana coo caꞌya poa. Dejja pana majje quijje epona pana caꞌya poa dejjaja edojjojjanijji saꞌ.  
\v 9 Eyacuiñajjija dejja pana jjima eponaja yajji. Chojja. Epona pana caꞌya poa dejjaja yajji. Dejja epona huoojeajji poa. Jamaya Eyacuiñajjiya a sa acaꞌya poa.  
\v 10 Jamajjeya Eyacuiñajjija esohuidojojji cuaa eseya ba canijo, epona cuana cajjahuojjataquiahua Eyacuiñajji nijje ojee mimianijo. Jamajjeya ojjañaa ba cani yahue epona huoojeajji poani. 
\p  
\v 11 Jamatii jjeya Emeshi Mese nei Jesosa nijje jjapeequi majje ehuanase cuaa yahue cuana baꞌe meesahua cani Jesosa Quitojo. Yahue cuaa ehuanase jaahuana cani peaꞌai.  
\v 12 Eꞌe, yahuajo nei nei dejja pana majje quijje Eyacuiñajjiya epona pana caꞌya poa dejjaja edojjojjanijji saꞌ, ebionei epona. Jjeya ca ca dejja shoꞌi cuana eponaja mejo cuayani. Jamatii Eyacuiñajjiya ojjaña pana caꞌya poa, ojjaña nei nei. 
\p  
\v 13 Jamajjeya ¡jjashahuabaquicue epona cuanajo! ¿Aꞌa ojjaña ojee Eyacuiñajji nijje mimianijo epona camimiahua jjahuojjataqui jjima? ¿Aꞌa jamaya quea pame nee? Chojja, quea pame pojjeama.  
\v 14 Ecuanaja eba dejja cuana saojji quea pame pojjeama. Epona jayojja poani, saojji.  
\v 15 Epona saojji ca ca quea pame nee nee. Eponaja esao ao ojaya ejjahuojja taquijji jayojja. Jamaya Eyacuiñajjija quea boti nee nee.  
\v 16 Eꞌe pojjaꞌa eponaja esao aojo, ejjahuojjataquijjijo peaꞌai pea cuana jjamimicuiajea nobiajeaqui sa poani enijje. Jamatii ecuea esohui jiquio jama baꞌa: Epona cuana Eyacuiñajjija equijo cajjahuojjataquiahua. Jesosaja epeejji cuaa ojjaña cuiñajjijo baꞌeya jamaya huohui cani peaꞌai. 
\s1 ¡Pea Jesosaja epeejji cuana nijje aꞌa quea mimishi pojji! 
\p  
\v 17 Ecuea epeejji cuana, jjeya pea esohui eyaya tehueje miquianaja ebajji. Miquianaya Eyacuiñajjija equijo ojee anijo quea pame pojjeama poani. Ojjaña cuana Jesosa nijje quea jaꞌa nee jjapeequi meesahua jjima. Pea epeejji cuana ca ca quea yeno po mee aña. Jamajjeya eyaya miquianaya huohuije Eyacuiñajjija equijo quea jaꞌa nee epojji.  
\v 18 Pea cuaa eya huohui canaje jama baꞌa: —Jesosa Quitoja epeejji cuana Conitojo baꞌe Eyacuiñajjija equijo ojee jjachichaqui majje jjamimicuiajea nobiajeaquiani. Oe pojji epeejji cuaa pea epeejji cuana nijje jjapeequi sa po ajja acani cuaa —jamaya acani cuaa. 
\p Eꞌe pojjaꞌa miquianaya jamaya quea tai poani.  
\v 19 Jesosaja epeejji quea bei pojjeama mimicuiajeanobiajea sa poani, pea nijje jjapeequi ajja. Jamaya quea tai. Jamatii jamaya poanijo, ojjañaa ba caje ache dejja cuana Jesosaja epeejji eꞌe jojo nei pojjeama, ache oja epeejji eꞌe jojo nei ba caje peaꞌai.  
\v 20 Eꞌe, miquianaya ca mi ca oe Eyacuiñajjija equi yasijje dobiquiani esejaya Emeshi Mese nei Jesosaja bobi ojee ijjiaa poso. Chojja, Jesosajo miquianaya jjashahuabaqui ajja, oya esejo manoꞌyonajejo jjashahuabaqui ajja.  
\v 21 Ojee ijjiaꞌijjia ajja peaꞌai miquianaya. Chojja, pea cuana ishoa ajja. Jamajjeya beca cuaa quea huiso ijjia cani. Quea huiso ishi cani peaꞌai, quea jejje nee nee poani. Pea cuana ca ca quea shoe nee poani.  
\v 22 Jamajjeya bobi quea huiso ijjia sa poanijo ¡miquianajaya equijo ijjiaꞌijjia socue! ¡Aꞌa Eyacuiñajjija equijo quea dejja tai pojji! ¡Jesosaja epeejji aemaꞌ aꞌa quea bicho po meejji ojaya bobi quea huiso chamajo! Eyacuiñajjija equijo quea tai añajo, eyaya ojjaña miquianaya tecueaña jama baꞌa: —¡Eyacuiñajjija equijo ani aꞌa Jesosaja epeejji quea mimishi ajji bobijo! 
\s1 ¡Jesosaja bobi eꞌe jojo nei ijjiacue o pajeaꞌyo jjima yajji! 
\r (Mateo 26.26-29; Macoso 14.22-25; Noca 22.14-20) 
\p  
\v 23 Esejaya Emeshi Mese neiya Jesosaa eya ba mee canaje jiquio esohui oja bobi ojee eꞌijjiajjijo, oya esejaya mimishijo manoꞌyonaje pajeaꞌyo jjima yajji. Maya yahuajo eyaya huohuinaje jama baꞌa: —Oe mecajje esejaya Emeshi Mese nei Jesosaja epeejji nishohua oya quia canaje dejja maseja equecuaꞌyojji. Iña majje dojo canaje cuaa. Iña jjimahuajo Jesosaa oe pahui jjeshe canaje.  
\v 24 Eyacuiñajji bihuia majje pahui mijisisi canaje. Ojaya epeejji cuana jama huohuime acanaje baꞌa: —Jiquio pahui emijisisi ecuea eyami. Eya miquianajaya mimishi cuanajo manojeꞌyo. Jamajjeya jiquio pahui ijjiañajo miquianaaya eya miquianaja mimishijo manoꞌyonaje pajeaꞌyo jjima yajji —Jesosa poanaje. 
\p  
\v 25 Pahui ijjia majje Jesosa Quitohua caneco jjeshe canaje. Eyacuiñajji bihuia ca oꞌoyanaje. Huohui canaje jama baꞌa: —Jiquio ena canecojo nequi ecuea enaꞌ. Eꞌe, ecuea enaꞌ cuayaquijeꞌyo. Eya ojjañaja mimishijo manojeꞌyo. Jamajjeya Eyacuiñajjiya miquianaya huohui caje, ma ohua miquianajaya mimishi cuana cuijea cajeꞌyo e manoꞌyajo, ma oja yahuajo huohui jjima. Jamajjeya jiquio ena canecojo nequi ishiañajo jjashahuaba tiitiiquicue jama baꞌa: “Jesosa manoꞌyajo oja enaꞌ cuayaquinaje ecuea mimishi cuijeaꞌyojji” jamaya acue —Jesosaa acanaje. 
\p  
\v 26 Jiquio pahui, ena canecojo nequi peaꞌai Jesosa Quitoja bobi poani. Jamajjeya ojee ojaya bobi ijjiaña o shahuaba poquiajji, ma oya eseja mimishijo manoꞌyonaje. ¡Jamaya acue esejaya Emeshi Mese nei Jesosa Quito poe oꞌoya jjimahuajo!  
\v 27 Jamajjeya esejaya Emeshi Mese nei Jesosaja bobi, pahui ijjiañajo ojaya ena canecojo nequi peaꞌai ojee ishiañajo ¡aꞌa quea dejja tai pojji! ¡Quea nishehui aꞌa pojji! ¡Aꞌa quea mimishi jjashahuabaquijji peaꞌai! Jamaya poanijo Jesosa quecuaꞌyojji jama poani miya. Eyacuiñajjiya quea nee nee po mee cajeꞌyo. Jamajjeya quea jaꞌa jjashahuabaqui ajjaa ¡aꞌa Jesosaja bobi ijjiajji, ojaya ena canecojo nequi peaꞌai aꞌa ishijji! Quea jaꞌa baꞌyaniya ¡quea bihui nee Jesosaja bobi ijjiacue, ojaya ena ishicue peaꞌai! 
\p  
\v 28 Jamajjeya Jesosaja bobi ijjia jjimahuajo, ¡ojaya ena ishi jjimahuajo peaꞌai jjashahuaba neineiquicue jama baꞌa: —¿Aꞌa eya eꞌe jojo nei Jesosa Quito nijje jjapeequiani quea jaꞌa nee? —jjashahuabaquicue! 
\p ¡Majoya pahui ijjiacue, eꞌishijji ishicue quea bihui nee peaꞌai!  
\v 29 Jesosa Quitoja esohui ojaya bobijo miquea quea quehuajo ¡aꞌa ijjiajji! Jesosa mijo manoꞌyonajejo jjashahuabaqui jjimaa ¡aꞌa oja bobi ijjiajji! Miya ijjiajo Eyacuiñajji quea quene nee nee po chanaꞌ. Miya quea nee po mee caje.  
\v 30 Quea huiso miquiana nijje nequiya Jesosajo jjashahuabaqui jjima oja bobi ijjia cani. Jamajjeya quea mano poani, beca cuana caꞌaꞌama poani. Jamajjeya beca cuana manoꞌyonaje peaꞌai.  
\v 31 Miquea ebaꞌejjijo jjashahuabaqui majje ¡mimicue Eyacuiñajji nijje jama baꞌa: —¡Ecuea mimishi cuana cuijeaꞌyocue! —jamaya acue! 
\p Jamajjeya Eyacuiñajjiya miquea mimishi cuijeaꞌyo majje miya etecueajji pojjeama Jesosaja bobi ijjiañajo.  
\v 32 Jamatii Eyacuiñajjiya jjeya Jesosaja epeejji quea jaꞌa pishana quea mano, quea nee po mee cani ejjabahuejjaqui meejji, mimishi cuana epajea meeꞌyojji. Jamajjeya quijje Jesosaja epeejji pojjeama cuana nijje equiyoꞌyojji pojjeama cuaquijo eshahuaja epeejji cuana nijje. 
\p  
\v 33 Jamajjeya epeejji cuana, ¡shajjaꞌajjacue mo! ¡Miquianaaya Jesosaja bobi ijjiañajo ojee oe ijjiacue o shahuabaꞌyojji! ¡Aꞌa mee nei ijjiaꞌijjiajji; ishoa socue cuana!  
\v 34 Ojjaña joya quea naba taja, quea shoe peaꞌai poani equijo ca ijjiaꞌijjiahua Jesosaja bobi ijjia jjimahuajo. Jamajjeya Eyacuiñajji quea tecue po ajja miquiana nijje, quea pame nee ojee Jesosaja bobi ijjiañajo. 
\p Miquea esohui etehueꞌyojo, quea huiso eya miquiaaya huohuiꞌajjanaje. Maya eyaya huohuije miquiana huasijje poe oꞌoya majje. 
\c 12  
\s1 Edojjoshahua Pameya eseya Eyacuiñajjijo chaco meesahua cani 
\p  
\v 1 Ecuea epeejji, miquianajaya esohui etehueꞌyojo eya huohuiꞌajjanaje miquiaaya Edojjoshahua Pamejo. Jjeya nei eyaya maya huohuije miquianajaya ebajji. Edojjoshahua Pameya eseya Eyacuiñajjijo chaco meesahua cani. Ojjaña Eyacuiñajjija ejjashahuabaquijji jayojja jama ameesahua cani.  
\v 2 Yahuajo Jesosa Quito nijje jjapeequi jjimahua miquianaya jjapeequinaje eshahua cuana nijje. Eyacuiñajji nisho nijje miminaje, acui ejehuiꞌyo nijje peaꞌai. Maya shajjamaꞌ, nabamaꞌ peaꞌai. Jamaya miquianajaya eba.  
\v 3 Beca cuana jama siajje pome poani baꞌa: —Jesosa siajjepojji. Oya Eyacuiñajjija Bacua Ejja pojjeama —jama siajje pomeya poani. 
\p Jamajjeya miquianajaya eba oya cuana Edojjoshahua Pame nijje jjapeequi ajja. Onijje jjapeequianijo ca ca Edojjoshahua Pameya oeyaya eseya huohui meesahua cani jama baꞌa: —Esejaya Emeshi Mese nei oe nei nequi, Jesosa Quito —eꞌe, jamaya Edojjoshahua Pameya oeyaya eseya huohui meesahua cani. 
\p  
\v 4 Edojjoshahua Pame oe neiya eseya amee cani Eyacuiñajjijo quea pame nee. Oe epeejji oe aquiana quea pame nee Eyacuiñajjijo ameesahua cani. Beca cuana pea aquiana quea pame nee ameesahua cani. Quea huiso aquiana cuana Eyacuiñajjija ameesahua cani Edojjoshahua Pameya.  
\v 5 Esejaya Emeshi Mese oe nei yani. Ojaya nei yajjijo eseyaya chacoaña. Ohuaya ojaya epeejji cuana huoojea cani quea huiso ojaya yajjijo quea pame aꞌyohua. Ojaya yajjijo ohuaya chaco meesahua cani ojjaña echaco.  
\v 6 Eyacuiñajji oe nei yani. Ohuaya Jesosaja epeejji cuana huoojea cani ojaya echacojji cuana aꞌyohua. Oe epeejji oe echacojji ameesahua cani, Eyacuiñajjiya. Pea epeejji pea echacojji ameesahua cani.  
\v 7 Edojjoshahua Pameya Jesosaja epeejji cuana quea pame ameesahua cani peaꞌai. Jamajjeya ojjaña ba mee caje oya ese nijje nequi. Eꞌe, ohuaya Jesosaja epeejji cuana quea jaꞌa ameesahua cani ojjaña Jesosa nijje ejjapeequi meesahuajji.  
\v 8 Eꞌe, Edojjoshahua Pameya Jesosaja epeejji beca cuana quea jjashahuabaqui jaꞌa po mee cani Eyacuiñajjija ejjashahuabaquijji eꞌe jojo nei ehuohuijji. Pea epeejjiya Eyacuiñajjija esohui jayojja jama onaya ba meesahua cani quea jaꞌa nee.  
\v 9 Pea epeejji cuaa Jesosaja epeejji cuana quea jaꞌa, meteꞌama peaꞌai po mee cani. Beca epeejji cuana emanojaa cuana huaquia meesahua cani Edojjoshahua Pameya.  
\v 10 Ohuaya pea epeejji cuana ma dejjaa ajjima acani ameesahua cani. Pea epeejji Eyacuiñajjija esohui huohui meesahua cani quea jaꞌa nee, pea baꞌe meejji. Beca cuana ba meesahua cani ache cuana eꞌe jojo nei ojaya, Edojjoshahua Pameja huoojeaꞌyo poani ebajji. Ache dejja eshahua nijje quehuajje jjapeequiani ba meesahua cani peaꞌai. Edojjoshahua Pameya beca cuana Eyacuiñajjija emimi mimi meesahua cani. Pea cuana ma emimi huohui meesahua cani ojjaña cuanaja ebajji.  
\v 11 Eꞌe, Edojjoshahua Pameya ojjaña Jesosaja epeejji jamaya ameesahua cani quea huiso. Ojaya ejjashahuabaquijjijo ojaya epeejji cuana huoojea cani, Edojjoshahua Pameya. 
\s1 Esejaya Emeshi Mese oe nei yani; ojaya epeejji cuana oja yami jayojja jama poani 
\p  
\v 12 Ecuea eyami oe nei yani. Yaa cuana yani, equise cuana peaꞌai yani. Quea huiso pea aquiana cuana yani ecue eyamijo. Jamatii ecuea eyami oe nei. Oya jayojjaya Jesosaja epeejji cuana poani, quea huiso ojee onijje jjapeequianijo. Jamatii ojjaña oe eyami jayojja jama poani; Jesosa Quitoja eyami jayojja jama eseya poani.  
\v 13 Jamaya poanaje ojjaña eseya ojaya epeejji cuana poanijo. Eꞌe, Jodio cuana, Jodio pojjeama cuana ojaya epeejji poani. Sosemaꞌ chacochacoani cuana, echaco mesemaꞌ peaꞌai ojaya epeejji poani. Jamajjeya Edojjoshahua Pameya eseya Jesosa Quitoja eyami jayojja jama po mee canaje ojjaña, onijje jjapeequianijo. Edojjoshahua Pameya esejo nequiya Jesosaja epeejji quea jaꞌa po mee cani. 
\p  
\v 14 Eꞌe, esejaya eyami oe nei yani. Jamatii yaa yani, equise yani, ecojja yani, quea huiso pea aquiana yani esejaya yamijo peaꞌai.  
\v 15 Ejiojji emeꞌ jayojja jama pojjeama. Jamatii ejiojji quea pame nee. Aꞌa ejiojji jama poaje pojjaꞌa baꞌa: —Eya emeꞌ jayojja pojjeamajo eyamijo enequijji pojjeama —¿aꞌa jamaya mimi majje enequijji pojjeama? Chojja, jamaya po majje oya jamatii eyamijo nequi, de. 
\p  
\v 16 Eꞌe, eshajja ecojja jayojja jama pojjeama. Jamatii eshajja peaꞌai quea pame nee, esapajo nequi peaꞌai. Eshajja jama mimijajime epojji pojjeama baꞌa: —Eya ecojja jjemo eyamijo nequime —jamaya mimijaji ajja, jamatii jamaya po majje eyamijo nequime, de. 
\p  
\v 17 Eꞌe, ecuea eyami ecojja oopana pojjeama. Chojja. Eshajja yani peaꞌai ejjashajjaꞌajjaquijji. Ecuea eyami eshajja oopana pojjeama. Yani ehui peaꞌai ejjashiyeꞌajjaquijji.  
\v 18 Eꞌe, Eyacuiñajjiya ecuea eyami pana ca poa. Ohuaya sa cani jayojja jama aca poa. Jamajjeya ecojja cuana, eshajja cuana, ehui cuana, quea huiso pea aquiana peaꞌai pana ca poa, ohuaya.  
\v 19 Jamaya epana jojjemo eya ese ejja pojjeama pome. Eꞌe, Eyacuiñajjija ecuea eyami ecojja oopana ajjima poa. Eya ecojja oopana eꞌa jojjemo eya ese ejja jayojja jama pojjeama pome. Jamajjeya ohuaya ecue eyamijo quea huiso aquiana pana canaje, jjashajjaꞌajjaquijji po mee canaje, jjashiyeꞌajjaquijji po mee canaje peaꞌai.  
\v 20 Eꞌe jojo nei ecuea eyamijo yani quea huiso aquiana. Jamatii ecuea eyami oe nei jayojja jama poani. Oya jayojjaya Jesosaja epeejji quea huiso nee yani. Jamatii ojee onijje jjapeequianijo eseya oe jayojja jama poani, Jesosaja eyami jayojja jama poani. 
\p  
\v 21 Ecuea ecojjaa emeꞌ cajaa aꞌajja poani. Esapaa ejiojji cajaa ajjima acani peaꞌai. Chojja ojjaña ojee quea pame nee nee poani.  
\v 22 Eyami dojjojo caꞌaꞌama. Jamatii eyami dojjojo cuana chamaꞌ jojjemo eyami eshe pojjeama pome.  
\v 23 Beca eyami dojjojo eꞌe pojjaꞌa huaꞌama. Jamatii eseyaya eyami dojjojo ani nahue neineiaña. Pea aquiana eyamijo anijo eseyaya daqui huoshoaña bichoꞌama epojji.  
\v 24 Jamatii pea eyamijo esapajo, emejo bichoꞌamajo daqui mi huoshoaña. Eyacuiñajji ca ca bichoꞌama eseja eyamijo. Ojjaña aquiana eyamijo oja pana. Ojjaña eyami ojee nequia canaje oe eyamijo. Jiquio ecua eseyaya esejaya eyami nahueaña ojjaña eyami, jamatii beca cuanajo se quea bicho poani jama jayojja ¡Jesosaja epeejjiya pea epeejji jjapeequi meesahuacue onijje quea pame nee!  
\v 25 Ojjaña aquiana eyamijo ani oe eyami poani, ojee acani quea pame nee. Oe eyami pea eyamiya nahue cani. Jamajjeya eyami quea pame nee poani. ¡Ma jayojja jama eseyaya Jesosaja epeejji ojee ejjachacoqui onijje!  
\v 26 Eꞌe, oe mijijje eyami quea nee poanijo, pea mijijje quea mano poaje peaꞌai. Ojjaña mijijje eyami cuana quea aja poanijo, quea pame nee poaje ojjaña. Oya jayojjaya eseya Jesosaja epeejji oe eyami jayojjaya poani. Jamajjeya oe epeejji quea nee poanijo, ojjaña quea yeno poani ojo. Oe epeejjiya quea pame nee nee acanijo, ojjaña onijje quea bihui nee poani. 
\p  
\v 27 Jamajjeya ojaya ejjashahuabaquijji jama Eyacuiñajjiya esejaya eyami cuana pana ca poa quea huiso peapea cuana eyami. Oya jayojjaya Jesosaja epeejji cuana ojaya eyami quea huiso cuana jayojja jama poani.  
\v 28 Jamajjeya Eyacuiñajjiya eseya Jesosaja epeejji cuana quea huiso peapea jjashahuabaquiꞌyome asahua cani ojaya epeejji cuana quea jaꞌa epojji. Eꞌe, ohuaya beca epeejji huohui canaje jama baꞌa: —Miya ecuea ehuoojeacoo Jesosa Quitojo huohuiya. 
\p Ohuaya pea cuana huohui canaje jama baꞌa: —¡Ojjaña cuiñajji yasijje esohui quea pame nee Jesosa Quitojo huohuiquicue quea jaꞌa nee ojjañaja eshajjaꞌajjajji! 
\p Pea cuana huohui canaje jama baꞌa: —¡Jesosa Quitoja epeejji cuana esohui huohuijji pocue! 
\p Pea cuana ma dejjaa ajjima acani ameesahua canaje. Pea cuana emanojaa cuana huaquia meesahua canaje peaꞌai. Pea epeejji cuana ona quea pame baꞌe meesahuajji po mee canaje. Pea epeejji emeshi mese jayojja jama ojjaña jaahuanajji po mee cani. Pea cuana Eyacuiñajjiya pea emimi mimi meesahua cani.  
\v 29 ¿Aꞌa ojjaña Jesosaja epeejji cuana Eyacuiñajjiya huoojea cani esohui quea pame Jesosajo huohui coohua? ¿Aꞌa ojjaña epeejji cuaa Eyacuiñajjija esohui quea huesha huohui cani? ¿Aꞌa ojjaña ojaya epeejji cuana esohui huohuijji poani? ¿Aꞌa ojjaña epeejji ma dejjaa ajjima acani ameesahua cani? Chojja.  
\v 30 ¿Aꞌa ojjaña epeejji cuaa emanojaa cuana huaquia mee cani? Chojja. ¿Aꞌa ojjaña ojaya epeejji cuana Eyacuiñajjija emimi mimi meesahua cani? Chojja. ¿Aꞌa ojjaña epeejjiya ma emimi eseja esohuijo huohui cani ojjañaja ebajji? Chojja.  
\v 31 Eꞌe, Edojjoshahua Pameya eseya, Jesosaja epeejji cuana Eyacuiñajjijo chaco meesahua cani. ¡Miquianaaya Eyacuiñajjijo quea pame nee chaco neinei sa añajo quea pame nee oe acue, pea epeejji cuana quea jaꞌa nee ebaꞌe meesahuajji! Jamatii eyaya miya huohuije eꞌe jojo nei joya ojjaña quea jea nee nee acani Eyacuiñajjiya ba cani quea pame nee nee. Jamajjeya ¡ojjaña quea jea acue! 
\c 13  
\s1 Eyacuiñajjiya eseya ojjaña quea jea nee ameesahua cani 
\p  
\v 1 Eꞌe, ojjaña eꞌe jojo nei quea jea acue jama baꞌa: Eꞌe pojjaꞌa ojjaña dejjaja emimi, esohuidojojjija emimi quea pame nee peaꞌai mimi majje jamatii pea epeejji ecuea quea jea nee pojjeama. Jamajjeya ecuea pea cuana Jesosa nijje ejjapeequi meesahuajji pojjeama. Eya mimiani emimijeajji, eshoꞌiquiaa cuiaqueyajea cani jama quea shajjaquijjo epojji.  
\v 2 Eyacuiñajjiya eya ojaya esohui quea huesha nee huohui meesahua cajje ojaya ejjashahuabaquijji ba meesahua cajje peaꞌai, ojjaña ojaya esohui etehueꞌyo ba meesahua cajje peaꞌai, ma dejjaa ajjima acani ameesahua cajje peaꞌai jamatii pea epeejji ecuea quea jea nee pojjeama. Jamajjeya eyaya pea cuana Jesosa nijje ejjapeequi meesahuajji pojjeama. Eyacuiñajjiya eya ba cani mimishi cuijeaꞌyo jjima peaꞌai.  
\v 3 Ojjaña ecuea aquiana cuana aemaꞌ cuana huasijje quiajeꞌyo pojjaꞌa; Jesosa nijje jjapee nishoquianijo, eꞌe pojjaꞌa pea cuaa eya iña caje ejeanobiajeajji. Jamatii pea cuana quea jea nee aꞌajjajo eyaya oya cuana ebaꞌe meesahuaꞌyojji pojjeama Jesosa nijje. Eyacuiñajjiya eya ba cani mimishi cuijeaꞌyo jjima peaꞌai. 
\p  
\v 4 Pea cuana eꞌe jojo nei ecuea quea jea nee nee amajje oya cuana ecuea tecuea cuajijji pojjeama. Quea bei poaje. Pea cuanaja aquiana quea jea yajji pojjeama. Ecuea ehuohuijji pojjeama jama baꞌa: —Eya ca iña quea pame nee nee poani. 
\p Pea jayojja po sa po ajja nei nei peaꞌai ca iña.  
\v 5 Pea cuana eꞌe jojo nei ecuea quea jea nee neejo ecuea eniñebajji pojjeama. Pea nijje emimijajijji pojjeama. Quea nahue pojjeama poani, equenequene cuajijji pojjeama peaꞌai. Pea cuana eꞌe jojo nei ecuea quea jea neejo, eya onaa quea tai acajje, aquiana napa cajje peaꞌai eya quea yeno po tiitii ajja: —Onaaya eya quea mimishi acajje eyaya oya quea mimishi a peaꞌaijeꞌyo —jamaya aꞌa jjashahuabaquijji. 
\p  
\v 6 Eyacuiñajji ecuea quea jea nee poanijo ecuea onajaya mimishi cuana botiꞌama poaje. Ona quea pame nee poanijo ca ca eya quea bihui nee poaje peaꞌai.  
\v 7 Pea cuana eꞌe jojo nei ecuea quea jea nee poanijo e napajji cuana nijje quea quene po ajja. Oe epeejji pea epeejjijo siajje poanijo, ecuea eshajjaꞌajjajji pojjeama. Jesosa nijje jjapee tiitiiquijeꞌyo jamatii quea camaja poanijo. Jjashahuaba tiitiiquijeꞌyo jama baꞌa: —Eꞌe jojo nei Jesosaja epeejji poanijo, ohuaya eya baꞌe tiitii mee cajeꞌyo onijje eyajo. 
\p  
\v 8 Eyaya pea cuana quea jea nee atiitiijeꞌyo. Jamaya sa poani Eyacuiñajji. Jjeya ca ca Eyacuiñajjiya ojaya epeejji cuana esohui quea pame huohui meesahua cani. Jamatii eyajo huohui pajeajeꞌyo. Jjeya beca cuana Eyacuiñajjija emimi mimi cani. Jamatii eyajo ma emimi mimi pajea cajeꞌyo. Jjeya Eyacuiñajjija ejjashahuabaquijji ba meesahua cani oe pojji. Quijje eyajo ojjaña ba mee cajeꞌyo quea huiso.  
\v 9 Jjeya eseya Eyacuiñajjija ejjashahuabaquijji oe pojji nei ba mee cani. Jjeya Edojjoshahua Pameya eseya Eyacuiñajjija ejjashahuabaquijji oe pojji nei huohui meesahua cani.  
\v 10 Jesosa Quito poe oꞌoyajo ca ca eseya ojjaña Eyacuiñajjija ejjashahuabaquijji cuana quea pame nee nee ba mee cajeꞌyo. 
\p  
\v 11 Jama poaje baꞌa: Eya eshoꞌyahuajo oe pojji jjashahuabaquinaje quea pame pishana. Ecuea esohui cuana quea pame pishana poanaje peaꞌai. Tii majje ca ca etii jama jjashahuabaquime poanaje, quea jaꞌa nee. Quea jaꞌa nee huohuinaje peaꞌai.  
\v 12 Oya jayojjaya jjeya eseyaya Quito ba jjima aña ecojjaa. Jamajjeya ojjaña ojaya ejjashahuabaquijji ba mee jjima acani. Quijje poe oꞌoya majje ese cojja neijo nequi oya mimijeꞌyo. Jjeya ohuaya ojjaña esejaya ejjashahuabaquijji ba neinei cani. O poe oꞌoyajo eseyaya ojaya ejjashahuabaquijji ba neineijeꞌyo peaꞌai quea jaꞌa nee. Oya eseyaya ba neineijeꞌyo peaꞌai. 
\p  
\v 13 Eꞌe, Jesosa Quito poe oꞌoyajo, eseya onijje jjapee tiitiiquijeꞌyo. Ojaya epoeꞌyojjijo eseya jjaꞌishoaꞌajjaquiani. Jjeya esejaya ojaya epeejji cuana quea jea nee poani. Eꞌe, Jesosa Quitoja epoeꞌyojjijo jjaꞌishoaꞌajjaquiani, onijje jjapeequiani peaꞌai. Ojaya epeejji cuana quea jea nee atiitiiaña peaꞌai. Jamaya Eyacuiñajji sa poani. 
\c 14  
\s1 Edojjoshahua Pameya eseya chaco meesahua cani Jesosa nijje 
\p  
\v 1 Jamajjeya ¡jjashahuaba tiitiiquicue pea cuana quea jea nee eꞌajji! Jamaya mimicue baꞌa: —Eyacuiñajji, ¡Edojjoshahua Pame huoojeacue e que mi jayojja ameesahuaa, Jesosaja epeejji cuana quea jaꞌa nee onijje ejjapeequi meesahuajji! Eꞌe, ¡miquea ejjashahuabaquijji huohui meesahuacue ojjaña meshi yasijje! 
\p  
\v 2 Ojjaña joya Eyacuiñajjija emimijo mimiani onajaya ba jjima esohuijo Eyacuiñajji nijje mimiani, pea cuana nijje pojjeama. Edojjoshahua Pameya maya mimi meesahua cani. Jamatii pea cuanaja maya emimi quea quehua. Eyacuiñajjiya ohuaye nei shajjaꞌajja cani.  
\v 3 Eyacuiñajjija esohui cuana quea jaꞌa nee huohui canijo ca ca Jesosaja epeejji cuaa quea jaꞌa shajjaꞌajja cani. Onijje jjapee neineiqui meesahua cani. Quea bihui nee po meesahua cani peaꞌai.  
\v 4 Ojjaña joya Eyacuiñajjija emimijo mimiani onijje nei mimiani. Oya oe nei quea bihui nee poaje. Joya Eyacuiñajjija esohui quea jaꞌa nee huohuijji poaniya ca ca quea huiso Jesosaja epeejji cuana quea bihui nee po mee caje. 
\p  
\v 5 Eya miquianajo jjashahuabaquiani jama baꞌa: Ojjaña miquianaya Eyacuiñajjija emimijo mimianijo jamaya quea pame pishana poaje. Eya quea bihui pishana poaje. Miquianaaya Eyacuiñajjija esohui joya ojjañaja eba esohuijo huohuiañajo ca ca jamaya quea pame nee nee, eya quea bihui nee nee poaje. Eꞌe, Eyacuiñajjija esohui quea jaꞌa nee huohui majje pea cuana Jesosa nijje jjapeequi meesahuaña. Eyacuiñajjija pea emimijo mimi majje aje oe pea cuana Jesosa nijje ejjapeequi meesahuajji pojjeama. Pea epeejjiya Eyacuiñajjija pea emimi, ma ojjañaja quea quehua shajjaꞌajja majje cahuohui cahua esejaya esohuijo. Jamaya ohuaya huohui majje ojjaña Jesosaja epeejji cuana quea pame nee jjapeequi meesahua caje Jesosa nijje. 
\p  
\v 6 Jamajjeya epeejji cuana, eya miquiana que poe majje mimi ajja pea emimijo joya miquianajaya bajjima esohuijo. Chojja, maya emimi shajjaꞌajja majje miquianaya Jesosa nijje ejjapeequijji pojjeama. Quea jaꞌa nee ca ca eyaya Eyacuiñajjija ejjashahuabaquijji miquianaya ba meesahuaje. Ojaya esohui eyacua Jesosaja ba meesahuaje peaꞌai. 
\p  
\v 7 ¡Jiquio esohuijo jjashahuabaquicue peaꞌai! Dejja cuanaja ba jjima pishanajo dehue quea jaꞌa nee miamia ajja. Eꞌiñaqueyajji bajea jjimajo quea jaꞌa iñaqueyaqueya ajja peaꞌai. Jamatii quea shajjaquijjo poaje, quea quehua. Jamajjeya ojjañaja eshajjaꞌajjajji pojjeama.  
\v 8 Echacomeejjiya esheꞌana mia jjimajo, echacojji cuana poqui ajja chacohua.  
\v 9 Oya jayojjaya miquianaya pea emimijo joya onajaya quea quehuajo mimianijo, miquea esohui onajaya eshajjaꞌajjajji pojjeama. Jamajjeya ¡esohui joya onaja quea jaꞌa neejo huohuicue ojjañaja ebajji!  
\v 10 Eꞌe, dejja cuana quea huiso meshi cuanajo baꞌyani. Quea huiso emimijo mimiani peaꞌai. Jamatii ojjaña emimi ojjaña meshijo quea jaꞌa nee poani, ma meshijo baꞌeja quea jaꞌa. Jamajjeya ojjañaja emimi onijje baꞌe cuanaja quea jaꞌa nee.  
\v 11 Jamatii oe dejja pea emimijo joya ecuea quea quehuajo mimianijo oya pea dejja, eya ojaya pea poani peaꞌai.  
\v 12 Jamajjeya miquianaya Edojjoshahua Pame nijje quea pame nee a sa poanijo Edojjoshahua Pame nijje mimicue jama baꞌa: —¡Eya ameesahuacue quea pame nee, quea jaꞌa nee! Jamajjeya eya quea huiso Jesosaja epeejji cuana onijje jjapeequi meesahuaje. Eꞌe, ¡quea jaꞌa nee nee Eyacuiñajjija esohui huohui meesahuacue mo! 
\p  
\v 13 Jamajoya Jesosaja epeejji Eyacuiñajjija emimijo joya pea cuanaja quea quehuajo mimi majje oya Eyacuiñajji nijje camimiahua jama baꞌa: —Ecue Chii, ¡joya o miminaje mo huohui meesahuaꞌyocue pea epeejji cuanaja quea jaꞌa nee epojji! ¡Maya esohui mo huohui meesahuacue quea jaꞌa nee onajaya ebajji! —jamaya mimicue Eyacuiñajji nijje. 
\p  
\v 14 Eꞌe, Eyacuiñajjija pea emimijo ma ecuea ba jjimajo onijje mimi mee cajje jamatii ma e miminaje ecuea quea quehua poani peaꞌai. Edojjoshahua Pameya eya mimi meesahua cani ecuea ejjashahuabaquijji pojjeama.  
\v 15 Jamajjeya eya jama poaje baꞌa: Ecuea ejjashahuabaquijji quea jaꞌa nee jayojja eya mimije Eyacuiñajji nijje ecuea esohuijo; pea emimijo joya ecuea ba jjima esohuijo peaꞌai eya onijje mimije peaꞌai. Edojjoshahua Pameya eya sohuicuaya meesahua cani pea emimijo joya ecuea ba jjima esohuijo, ecuea edojjoshahua Jesosajo sohuicuayani; ecuea ejjashahuabaquijji quea jaꞌa nee jayojja jama eya sohuicuayani ecuea esohuijo peaꞌai.  
\v 16 Miquiaaya pea emimijo Eyacuiñajji bihuiañajo, pea epeejjija minijje Eyacuiñajji ebihuiajji pojjeama. Ojaya ba jjima miquea esohui.  
\v 17 Eꞌe, miyaya Eyacuiñajji bihuiaña quea pame nee. Jamatii miquea emimi onajaya quea quehua. Jamajjeya miyaya Jesosaja epeejji cuana onijje jjapeequi sahua jjima aje. 
\p  
\v 18 Miquianaya oe pojji mimiani Eyacuiñajjija pea emimijo. Eyacuiñajjiya eya ojaya pea emimijo mimi meesahua canaje quea huiso. Jamajjeya eya onijje mimiani jama baꞌa: —Jamaya Eyacuiñajji, miyaya eya quea pame nee anaje. 
\p  
\v 19 Jamatii Jesosaja epeejji cuana ojee nequiani Eyacuiñajjija esohui shajjaꞌajjajji, eyaya quea jaꞌa nee huohui sa aña joya onaja ojjañaja eba esohuijo. Esohui quea jaꞌa nee, quehuaꞌama mimianijo, ojjañaa shajjaꞌajja caje quea jaꞌa nee. Jamaya quea pame nee nee. Huohui sa po ajja quea huiso esohui pea emimijo, joya onajaya ba jjima esohuijo. Jamaya quea pame pishana. 
\p  
\v 20 Ecuea epeejji cuana, ¡quea shoꞌi tai jayojja jama aꞌa jjashahuabaquijji! ¡Quea jaꞌa nee jjashahuabaquicue! ¡Jesosa Quitoja esohui ba neineicue! ¡Aꞌa quea mimishi baꞌejji peaꞌai!  
\v 21 Eyacuiñajjiya esohui yahuajo nei tehue mee ca poa jama baꞌa: 
\q1 “Pea cuana pea meshijo baꞌe, ma pea esohuijo mimiani peaꞌai eyaya huoojeaje Jodio cuana jjabahuejjaqui meeya. Jamatii oya cuana aje oe o shajjaꞌajja sa po ajja poaje”. 
\m Jamaya Eyacuiñajjija esohui poa. 
\p  
\v 22 Jamajjeya Jesosa Quitoja epeejji etiiya Eyacuiñajjija pea emimi shajjaꞌajja majje ba caje Eyacuiñajji eꞌe jojo nei ona nijje nequi. ¡Jesosaja epeejji pojjeama cuana ca oe Eyacuiñajjija esohui huohuicue; joya o mimiani esohuijoya oe huohuicue! Esohui shajjaꞌajja majje oya cuana jjapeequijeꞌyo Jesosa nijje.  
\v 23 Jamajjeya Jesosaja epeejji cuana ojee nequianijo, eꞌe pojjaꞌa ojjaña miquianaya Eyacuiñajjija pea emimijo mimije. Jesosaja epeejji pojjeama cuaa, ojaya epeejji eyacua peaꞌaiya ma emimi shajjaꞌajja majje ¿ae shai oya cuana jjashahuabaquije? Miquianaya onajaya ba jjima esohuijo mimiani shajjaꞌajja majje jama acaje baꞌa: —¡Dee! Jesosaja epeejji cuana niñe poquiꞌyonaje. Jamajjeya quea quehua mimiani —acaje. 
\p  
\v 24 Jesosaja epeejji cuaa ojee nequi majje Eyacuiñajjija esohui quea jaꞌa nee huohui canijo ca ca, pea cuana shajjaꞌajja majje ojaya mimishi cuanajo quea yeno poaje. Eꞌe, Jesosaja epeejji pojjeama cuana, ojaya epeejji eyacua cuana pojjaꞌa Eyacuiñajjija esohui shajjaꞌajja majje quea mete poaje jama baꞌa: —Eyacuiñajjiya eya quea nee nee po mee cajeꞌyo, de, ecuea mimishijo. 
\p  
\v 25 Eyacuiñajjija esohui huohuijjiya ma dejja cuanaja ejjashahuabaquijji tai huohui cajo, shajjaꞌajja majje oya cuaa Eyacuiñajji bihuia caje ecuiꞌoshajjajo nequiya. Jama poaje baꞌa: —Eꞌe jojo nei Eyacuiñajji miquiana nijje nequi —acaje cuaa. Jesosa nijje jjapeequijeꞌyo peaꞌai. 
\s1 ¡Jesosaja epeejji ojee nequianijo Eyacuiñajjija esohui huohuicue quea jaꞌa nee! 
\p  
\v 26 Jamajjeya ecuea epeejji cuana, ¡bacue jiquio esohui! Miquianaya ojee nequi majje Eyacuiñajjija esohui huohuiya, jama acue baꞌa: Oe epeejjiya Jesosa cabihuia cahua esohuicuayajjijo. Pea epeejjiya Eyacuiñajjija esohui cahuohui cahua. Peaa Eyacuiñajjija ejjashahuabaquijji pea cuana que cahuohui cahua. Majoya pea epeejji Eyacuiñajjija pea emimijo mimi sa poanijo, peaa cahuohui cahua esejaya esohuijo. Jamajjeya ¡Jesosaja epeejji ojee nequianijo quea jaꞌa nee acue! ¡Ojjaña Eyacuiñajji nijje jjapeequi meesahuacue!  
\v 27 Eꞌe pojjaꞌa beca cuana Eyacuiñajjija pea emimijo mimi sa poani. ¡Beca cuana, pea beca peejjima pojjaꞌa mimi meecue, quea huiso pojjeama! Ma pea emimi mimianijo, ¡aꞌa ojee mimi meejji! ¡Oe epeejji mimi pajeaꞌyajo, pea mimi meecue! ¡Oya mimi pajeaꞌyajo, pea mimi meecue! Ma epeejji cuana Eyacuiñajjija pea emimijo mimi majje, peaa cahuohui cahua esejaya esohuijo ojjañaja ebajji.  
\v 28 Pea epeejjija ma emimi ba jjimajo, ¡aꞌa mimi meejji Jesosaja epeejji cuana ojee nequi yasijje! Oya oe nei nequi majje Eyacuiñajjija emimijo camimiahua Eyacuiñajji nijje. 
\p  
\v 29 Miquiana ojee nequijo beca esohui huohuijjiya, pea beca peejjima pojjaꞌaa Eyacuiñajjija esohui quea jaꞌa nee cahuohui cahua, quea huiso pojjeama. Pea cuaa cashajjaꞌajja cahua. Shajjaꞌajja majje cajjashahuabaquiahua jama baꞌa: —¿Aꞌa eꞌe jojo nei Eyacuiñajjija esohui huohui canaje? —cajjashahuabaquiahua. 
\p  
\v 30 Jamatii Edojjoshahua Pameya pea epeejji jjashahuabaqui meesahua caje, oya peaꞌai camimiahua ojjañaja eshajjaꞌajjajji. Eꞌe, esohui huohuijjiya huohui pajea cajo, ma epeejjiya Eyacuiñajjija ejjashahuabaquijji cahuohui cahua.  
\v 31 Jamaya miquianaaya Eyacuiñajjija ejjashahuabaquijji ba majje huohuije ojjañaa. ¡Pea acaje jja aꞌa huohuijji! ¡Oe epeejjiya huohui pajea cajo, pea epeejjiya cahuohui cahua! Jamajjeya Jesosaja epeejji cuana ba mee caje quea huiso Eyacuiñajjija esohui. Quea bihui nee poaje peaꞌai.  
\v 32 Jesosaja esohui huohui sa poanijo ¡caꞌishoa cahua! ¡Pea mimi pajeaꞌyajo cahuohui cahua!  
\v 33 Eꞌe, Eyacuiñajjija equijo ojaya epeejji cuaa ¡aꞌa becajje huohuijji! Quea shajjaquijjo poaje. Eyacuiñajjiya ojaya epeejji cuana ojee shajjaꞌajja mee cani quea bei. ¡Bacue! Ojjaña Eyacuiñajjija equi cuanajo Jesosaja epeejji ojee nequi majje quea jaꞌa nee esohui huohui cani; becajje pojjeama huohui cani. 
\p  
\v 34 Epona cuana, ojjaña Eyacuiñajjija equijo ojee nequianijo, ¡aꞌa mimijji Eyacuiñajjija esohui huohuijji mimianijo! ¡Jjashajjaꞌajjaquicue oe! Jodio cuanaja esohui etehueꞌyo yahuajo jama poa peaꞌai baꞌa: 
\q1 “¡Eyacuiñajjija equijo epona cuana cajjashajjaꞌajjaquiahua! Eyacuiñajjija epeejji cuana huoojeajji pojjeama oya cuana”. 
\m Jamaya poa yahuajo.  
\v 35 Esohui shajjaꞌajja majje eꞌe pojjaꞌa epona cuana huohuiꞌajja sa poani ma esohuijo. Jamatii ¡Eyacuiñajjija equijo aꞌa huohuiꞌajjajji! Jamaya quea pame pojjeama. Ojaya equi yasijje poqui majje ojaya yahue cahuohuiꞌajja cahua, eponaa. 
\p  
\v 36 Ecuea epeejji cuana Conitojo baꞌe, miquianajaya eba Eyacuiñajjija esohui miquiana que poe coo jjima. Chojja. Pea cuaa ojaya esohui shajjaꞌajja canaje miquianaja shajjaꞌajja jjimahuajo. Jamajjeya ¡shajjaꞌajjacue mo!  
\v 37 Miquianaya beca cuana jama poani baꞌa: —Eya Eyacuiñajjija esohui huohuijji eꞌe jojo nei poani. Eya Edojjoshahua Pameya quea pame nee ameesahua cajeꞌyo Eyacuiñajjijo. Jamajjeya ¡miquianaya jjabahuejjaquicue ecuea esohui Eyacuiñajjija esohui eꞌe nei poani!  
\v 38 Ojjaña joya miquiana nijje nequi ecuea esohui shajjaꞌajja sa po ajja, ¡aꞌa oya cuana shajjaꞌajjajji! 
\p  
\v 39 Ecuea epeejji cuana, jamajjeya ¡Eyacuiñajjija esohui huohui neineicue! Pea epeejji Eyacuiñajjija pea emimijo mimi sa poanijo ¡oya camimiahua!  
\v 40 Jamajjeya ¡Eyacuiñajjija equijo ojee nequi majje ojjañaa quea jaꞌa nee acue! ¡Ojjaña Jesosaja epeejji cuana shajjaꞌajjacue quea jaꞌa nee peaꞌai! 
\c 15  
\s1 Jesosa Quito manoꞌyo majje shequi oꞌoyanaje 
\p  
\v 1 Jjeyahua nei eya miquiana huasijje huohui sa oꞌoya poani esohui quea pame nee Jesosa Quitojo. Yahuajo pishana ma esohui shajjaꞌajja majje miquianaya onijje jjapeequiꞌyonaje quea jaꞌa nee.  
\v 2 Ma esohui Jesosa Quitoja eyaya huohuinaje. Shajjaꞌajja majje miquianaya onijje jjapeequiꞌyonaje quea jaꞌa nee, cuaqui yasijje epoquiꞌyojji pojjeama. Jamatii Jesosa Quito nijje eꞌe jojo nei jjapeequi jjima ca mi ca oe cuaqui yasijje poquijeꞌyo. 
\p  
\v 3 Eꞌe, ma esohui quea pame nee Jesosa Quitojo shajjaꞌajja majje eyaya huohuinaje miquianajaya eshajjaꞌajjajji jama baꞌa: Eyacuiñajjija esohui yahuajo etehueꞌyo jayojja jama eꞌe jojo nei Jesosa Quito eseja mimishi cuanajo manoꞌyonaje.  
\v 4 Jesosa Quito manoꞌyajo, ojaya epeejji cuaa oya jjani ai yasijje huananobia caꞌya poa. Pea beca peejjima cahui po majje, Eyacuiñajjiya oya, Jesosa Quito shequi mee ca oꞌoya poa. Eꞌe, Eyacuiñajjija esohui yahuajo nei etehueꞌyo jayojja jama aca poa Jesosaa.  
\v 5 Eshe oꞌoya poajo, Penohua oya ba canaje. Majoya ome miji peaꞌai pea becaa, 12 huisomeya ojaya pea epeejji cuaa Jesosa Quito ba caꞌyonaje, oja huoojeaꞌyo cuaa.  
\v 6 Majoya quijje pishana quea huiso ojaya epeejji cuaa, 500 huisomeya ojee jjachichaqui majje Jesosa Quito ba canaje eshe oꞌoya. Quea huiso ma epeejji jjeya eshe enequiꞌyo. Beca cuana manoꞌyonaje.  
\v 7 Majoya pea pojjajo Satiacohua Jesosa Quito ba canaje eshe oꞌoya. Majoya ojjaña oja huoojeaꞌyo cuaa oya ba canaje eshe oꞌoya.  
\v 8 Majoya eyaya quijjeyejje neiya Jesosa Quito banaje peaꞌai. Eꞌe, yahuajo eya ojaya epeejji pojjeama poa. Jjeya ca ca eya ojaya epeejji po mee caꞌyonaje peaꞌai.  
\v 9 Jamajjeya eya quea pame pishana. Pea oja huoojeaꞌyo cuana quea pame nee poani. Eꞌe, o ba jjimahuajo eyaya ojaya epeejji cuana janobajjima nei napanaje. Jamatii Eyacuiñajjiya eya babaca canaje Jesosaja huoojeaꞌyo epojji peaꞌai.  
\v 10 Eya Eyacuiñajjija quea jea nee nee poani. Jamajjeya ojaya esohui huohuijji po mee canaje, Jesosaja huoojeaꞌyo po mee canaje peaꞌai. Ohua huoojea cajje eyaya ojaya esohui huohui neineiꞌyonaje. Jesosaja pea ehuoojeaꞌyo cuaa quea huiso pishana chaco canaje ojo. Eyaya ca ca ojo janobajjima nei chaco tiitiiaña ohuaya eya chaco meesahua canajejo. Eꞌe, ohuaya eya chaco meesahua ajja jojjemo eyaya ojo chaco jjima ame.  
\v 11 Eꞌe pojjaꞌa pea ehuoojeaꞌyoja esohui Jesosa Quitojo miquianaaya shajjaꞌajjanaje. Eꞌe pojjaꞌa ecuea esohui ojo shajjaꞌajjanaje. Jamatii, ojjaña ecuaaya ma esohui quea pame Jesosa Quitojo huohuiaña. ¡Shajjaꞌajja majje miquianaaya ojaya esohui jayojja jama eꞌe jojo nei baꞌecue! 
\s1 Jesosa Quitoja epeejji cuana quijje eshe oꞌoya poaje 
\p  
\v 12 Eꞌe, miquiana huasijje ecuaaya huohuinaje jama baꞌa: —Jesosa Quito manoꞌyajo, Eyacuiñajjiya oya shequi mee ca oꞌoyanaje. 
\p Jamajjeya ¿apiojji acuae jja oe miquianaya beca cuana jjeya siajje poani? Jama baꞌa: —Eseya manoꞌyajo quijje eshequi meeꞌyojji pojjeama —¿apiojji jamaya siajje poani? 
\p Chojja. Shequi mee caje oꞌoya eseya.  
\v 13 ¡Bacue, oe! Manoꞌyo majje eshe oꞌoya po meemee ajja jojjemo Jesosa Quito manoꞌyo majje shequi mee oꞌoya jjima acaquiaye peaꞌai. Chojja. Oya shequi mee caꞌya poa, Eyacuiñajjiya.  
\v 14 Oya eshe oꞌoya pojjeama poa jojjemo ecuanaja esohui quea pame nee ojo eꞌe nei pojjeama pome. Oya mi shequi oꞌoya poa jojjemo miquianaya onijje jjapeequi jjima pome peaꞌai.  
\v 15 Ecuaaya huohuiaña jama baꞌa: —Eyacuiñajjiya Jesosa Quito shequi mee caꞌyonaje —jamaya eꞌe nei pojjeama jojjemo ecuana siajje ponequime. Chojja, de. ¡Shajjaꞌajjacue mo! Ma siajjepojji cuanaja esohui eꞌe nei poani jojjemo ca emanoꞌyo cuana shequiꞌyo jjima pome, Jesosa Quito shequiꞌyo jjima poquiaye peaꞌai. Chojja, ecuea eba oya shequiꞌyonaje.  
\v 16 Eꞌe, emanoꞌyo cuana shequiꞌyo ajja jojjemo Jesosa Quito peaꞌai shequiꞌyo jjima poquiaye.  
\v 17 Oya shequi oꞌoya jjima jojjemo miquianaaya siajjepojjija esohui shajjaꞌajjaꞌyome, Jesosa nijje jjapeequi jjima pome. Eꞌe, Jesosa Quito shequi oꞌoya jjima poa jojjemo Eyacuiñajji quea quene nee tii pome, miquianajaya mimishi cuijeaꞌyo jjima peaꞌai pome. Chojja, ecuea eba Jesosa Quito shequi oꞌoyanaje.  
\v 18 Oya shequi oꞌoya jjima jojjemo ojaya epeejji yahuajo manoꞌyo cuana cuaqui yasijje poquiꞌyoquiaye. Chojja, ecuea eba Jesosa Quito shequi oꞌoya poa.  
\v 19 Eꞌe, eseya quea bihui nee onijje jjapeequi mee canaje jiquio meshijo baꞌyanijo. Jamatii eseya eshe oꞌoya po mee ajja jojjemo eyajo onijje baꞌe tiitii meeꞌyo jjima acame. Jamaya poani jojjemo ojjaña cuana esejo mimiꞌyome jama baꞌa: —Pabohua ecuana siajje acanaje, de. “¡Jesosa Quito nijje jjapeequiꞌyocue!” siajje aꞌyome acanaje. 
\p Chojja, ecuea eba eseya eshe oꞌoya po mee cajeꞌyo.  
\v 20 Eꞌe jojo nei jamaya poanaje baꞌa: Eyacuiñajjiya Jesosa Quito shequi mee ca oꞌoyanaje, eyami eyacua acoo caꞌyonaje emano oꞌoyajji pojjeama. Jamajjeya esejaya eba ohuaya eꞌe jojo nei Jesosaja epeejji cuana ojjaña tii shequi mee caje oꞌoya emano oꞌoyajji pojjeama.  
\v 21 Eꞌe, Adana quea mimishi poa sosejje mano mee caꞌya poa. Jamajjeya ojjaña manojeꞌyo, baꞌe tiitii ajja meshi cuanajo baꞌeca. Jesosa Quitohua ca ca quea pame nee nee acanajejo, ojjaña eshe oꞌoya po mee cajeꞌyo.  
\v 22 Ojjaña cuana Adanaja osecua cuana poanijo o jayojja quea mimishi poani. Jamajjeya Eyacuiñajji nijje baꞌe meemee ajja eyajo. Jesosa Quito nijje jjapeequi majje ca ca ohuaya eseya baꞌe tiitii mee cajeꞌyo onijje eyajo eshe oꞌoya po meeꞌyo majje.  
\v 23 ¿Ache ebionei shequi mee ca oꞌoyanaje? Eyacuiñajjiya Jesosa Quito ebionei shequi mee ca oꞌoyanaje. Quijje poe oꞌoya majje ohuaya ojaya epeejji cuana shequi mee caje oꞌoya. 
\p  
\v 24 Eꞌe, quijje poe oꞌoya majje Jesosa Quito ojjañaja Emeshi Mese nei poajeꞌyo, ojjaña huoojeaꞌyojji. Jamajjeya ohuaya ojjaña quea mimishi poani jeabichajeaꞌyo majje iña cajeꞌyo. Iña majje shajjaꞌajja mee cajeꞌyo. Eꞌe, ohuaya Edosiquiana nei shajjaꞌajja mee cajeꞌyo peaꞌai. Ojjaña eshahua cuana peaꞌai, ojjaña emeshi mese quea tai cuana peaꞌai shajjaꞌajja mee cajeꞌyo, Jesosa Quitohua. Jamaya amajje ohuaya ojjaña cuana ojjaña meshi cuanajo baꞌe oja Chii bihuia mee cajeꞌyo jama baꞌa: —Eyacuiñajji, miya quea caꞌa nee nee ojjaña huoojeaꞌyojji. ¡Ojjañaa miya cashajjaꞌajja cahua! —jamaya ojjaña amee caje Jesosaa. 
\p  
\v 25 Eꞌe, Eyacuiñajjiya Jesosa Quito ojjaña mimishi cuana, eshahua cuana peaꞌai jeabichajea meesahua cani. Jeabichajea jeyojeyo majje oya, Quito Emeshi Mese oe nei nei poajeꞌyo; ojjaña huoojeaꞌyojji nei poajeꞌyo.  
\v 26 Yahuajo mimishi aca poa sosejje mano poquipoquiꞌyani. Quijjeyejje nei ese mano meeꞌyojji chamaꞌyo tii aꞌyo majje ojjaña cuana eshe oꞌoya po mee cajeꞌyo, Jesosa Quitohua. Manoꞌyo ajja tii tii po mee cajeꞌyo.  
\v 27 Yahuajo nei Eyacuiñajjija esohui etehueꞌyojo jama poa baꞌa: “Eyacuiñajjiya ojjaña jeabichajeaꞌyo majje ojjaña huoojeaꞌyojji po mee cajeꞌyo oya”. Jamaya yahuajo Eyacuiñajjiya Jesosa Quitojo aca poa. 
\p Jamatii Jesosa Quito Eyacuiñajji huoojeaꞌyojji pojjeama. Ojjaña pea cuana huoojeaꞌyojji ca ca Quito po mee cajeꞌyo, Eyacuiñajjiya.  
\v 28 Eꞌe, Jesosa Quito ojjaña quea mimishi cuana jeabichajea sahuamee caje Eyacuiñajjiya, oya ojjaña huoojeaꞌyojji po mee cajeꞌyo. Majoya oja Chii nijje Jesosa Quito mimije jama baꞌa: —Ecue Chii, miya e huoojeaꞌyojji poani tii tii —jamaya poaje oja Bacua Ejja Jesosa Quito. 
\p Eꞌe, Eyacuiñajji eꞌe nei ojjaña huoojeaꞌyojji poajeꞌyo tii tii; eyajo nequi cuana, meshijo ani cuana peaꞌai huoojeaꞌyojji poajeꞌyo tii tii. 
\p  
\v 29 Eꞌe jojo nei Eyacuiñajjiya eseya shequi mee caje oꞌoya. Jamatii beca cuana jama poani baꞌa: —Emanoꞌyo cuana eshequi mee oꞌoyajji pojjeama. 
\p Beca epeejji cuana quea quehua jjashahuabaquiani jama baꞌa: —Yahuajo Jesosaja epeejji manoꞌya poa Eyacuiñajjijo besa mee jjima. Jamajjeya emanoꞌyoja yajjijo ojaya epeejji eshe nequi Eyacuiñajjijo besa mee cani cuaa emanoꞌyoja bajjanijo, emanoꞌyo cuana cuaquijo equiyoꞌyojji pojjeamajo —jamaya beca cuaa acani. Oya cuana jjashahuabaquiani ojjaña cuana shequi mee caje oꞌoya. Jamajjeya jamaya acani. 
\p  
\v 30 Eyacuiñajjiya eseya eshe oꞌoya epo meeꞌyojji pojjeama jojjemo ¿ajeo acuae ecuaaya ojjaña pojjajo Jesosa Quitoja sohui huohuime? Ojaya esohui huohuiañajo pea cuaa ecuana quecua nei nei sa acani.  
\v 31 Epeejji cuana, eꞌe jojo nei Eyacuiñajjiya eseya shequi mee caje oꞌoya. Miquiana esejaya Emeshi Mese nei Jesosa Quitoja esohui shajjaꞌajjanajejo, eya quea bihui nee. Jamatii pea cuaa quecuapana caniya tii eya Jesosa Quitojo chacochacoani quea bihui nee.  
\v 32 Eꞌe, eshahuaja epeejji cuaa ibia jama quea mase neeya Epesojo baꞌeya eya beshahua nei mano mee caꞌyonaje eya esohui ehuohui poajejje. Jesosa Quito eshe oꞌoya po ajja poa jojjemo ¿apiojji shai eyaya esohui huohui tiitiime soꞌo? Quea camaja nee poanaje. Dejja mimishi cuaa huohui cani jama baꞌa: —Mecahuajje ecuana manojeꞌyo eshequiꞌyojji pojjeama. ¡Jamajjeya jjeyahua nei eꞌijjiaꞌijjia, eꞌishiꞌishi peaꞌai! —poani. 
\p Jamatii eshe epo oꞌoyajji pojjeama jojjemo eseya jamaya po peaꞌaime.  
\v 33 ¡Aꞌa quea quehua jjashahuabaquijji! ¡Aꞌa onaaya miya jjadasia meequijji! Pea cuana siajje poani jama baꞌa: —Ecuana eshequi mee oꞌoyajji pojjeama. 
\p ¡Onijje aꞌa jjapeequijji! O jayojjaya mi po chanaꞌ, quea mimishi.  
\v 34 Jamajjeya ¡pajeaꞌyocue ejjashahuabaquijji quea quehua! ¡Jesosaja esohui jayojja jama po oꞌoyacue! ¡Esohui quea quehuajo aꞌa jjashajjaꞌajjaquijji! Beca cuanaja Eyacuiñajjija esohui eꞌe nei ba jjima. Eyaya miquianaya huohuiaña quea bicho epojji. 
\s1 ¿Achajja shequi oꞌoyame acuae se poaje? 
\p  
\v 35 Eꞌe pojjaꞌa miquianaaya eya huohuiꞌajjanaje jama baꞌa: —¿Achajja shai Eyacuiñajjiya emanoꞌyo cuana shequi mee caje oꞌoya? ¿Ache eyami shai esejaya poajeꞌyo? ¿Aꞌa eyami eyacua? 
\p  
\v 36 Miquianaya quea quehua jjashahuabaquianijo ¡bacue! Anoso quecua jjima tii ajja. Quejo quecua cajje meshijo pohuaꞌyani. Siobijje pohua majje ejjii chamaꞌyo poani, meshi pojji poꞌyani.  
\v 37 Quejo quecua cani cuaa anoso, pea esoꞌ pojjaꞌa. Anoso saꞌ bana ca ajja. Chojja, esoꞌ pohua majje esaꞌ tiijeꞌyo.  
\v 38 Eyacuiñajjiya esoꞌ pohua meeꞌyo majje esaꞌ tii mee cani. Jamajjeya anoso pohua majje anoso saꞌ tiiani. Pea same anoso, huenehuene saꞌ jayojja pojjeama. Jamaya Eyacuiñajjiya pana caꞌya poa. 
\p  
\v 39 Oya jayojja eyami cuana: Oe eyami pea eyami jayojja pojjeama. Quea huiso peapea yamime yani. Ijjiacajji pea yamime, dejja jayojja jama pojjeama. Cuichojjija eyami pea. Jai cuana pea yamime, cuichojjija jama pojjeama.  
\v 40 Oya jayojjaya eyajo Eyacuiñajjija esohuidojojji cuana yani quea huiso nee. Oya cuana yamimaꞌ, dejja cuana jama pojjeama. Esohuidojojji cuaa quea pame acani Eyacuiñajjija yajjijo. Jamatii dejjaa acani jayojja jama pojjeama acani. Dejja cuanaja eyami quea bame peaꞌai. Eseyaya quea pame aña Eyacuiñajjija yajjijo peaꞌai.  
\v 41 Oya jayojjaya eshequi epojjajo quea pame nee. Baꞌi eshequi jayojja jama pojjeama. Jamatii baꞌi quea pame nee peaꞌai. Majameta baꞌi jayojja jama pojjeama. Jamatii majameta quea pame nee peaꞌai. Oe majameta pea majameta jayojja jama pojjeama. Oe quea jiji nee, pea quea jiji pishana. Jamatii ojjaña quea pame nee. 
\p  
\v 42 Jiquio ecua anoso quecua cajje Eyacuiñajjiya esaꞌ pohua mee cani jayojja jama eseya manoꞌyajo, Eyacuiñajjiya eshe oꞌoya po mee cajeꞌyo. Eꞌe, mojea caꞌyajje esejaya eyami ihuijeꞌyo. Chamaꞌyo tii poajeꞌyo. Eshe oꞌoya po mee caꞌyajje ca ca emanoꞌyojji pojjeama. Eyami eyacua poajeꞌyo, quea pame nee nee esejaya.  
\v 43 Eꞌe, esejaya eyami mojea caꞌyajje ihuijeꞌyo. Caꞌaꞌama. Eshe oꞌoya po mee majje ca ca quea pame nee po mee cajeꞌyo, Eyacuiñajjiya. Pea eyami eyacua quea caꞌa nee poajeꞌyo emano becaꞌyojji pojjeama tii.  
\v 44 Jjeya meshijo baꞌyanijo esejaya eyami caꞌaꞌama. Manojeꞌyo. Ojjaña cuana eseya jamatii ihuijeꞌyo. Eshe oꞌoya po majje ca ca pea eyami poaje esejaya. Eyajo anicaja jayojja jama poajeꞌyo. Eꞌe, jjeya esejaya eyami meshijo ebaꞌejji caꞌaꞌama. Jamajjeya eꞌe jojo nei quijje Eyacuiñajjiya esejaya pea eyami pana cajeꞌyo eyacua, quea caꞌa nee eyajo ebaꞌe tiitiiꞌyojji. 
\p  
\v 45 Eyacuiñajjija esohui etehueꞌyo jama poa baꞌa: “Eyacuiñajjiya ebionei dejja Adana bajjani pana caꞌya poa. Eshe po mee caꞌya poa”. Jamaya yahuajo nei nei poa. 
\p Adanaja eyami caꞌaꞌama poa. Quijje Jesosa Quitohua eseya eshe oꞌoya po mee cajje esejaya eyami eyacua poajeꞌyo, pea eyami. Eyajo anicaja jayojja jama poajeꞌyo quea caꞌa nee, ihuiꞌyo ajja.  
\v 46 Eyacuiñajjiya esejaya eyami caꞌaꞌama ebionei pana caꞌya poa meshijo ebaꞌejji. Quijje Jesosa Quitohua esejaya eyami eyacua pana cajeꞌyo quea caꞌa, quea pame nee peaꞌai eyajo ebaꞌe tiitiiꞌyojji.  
\v 47 Eyacuiñajjiya ebionei dejja Adana bajjanija eyami pana caꞌya poa meshi, meshijo ebaꞌejji. Shequi oꞌoya majje Jesosa Quitoja eyami eyacua poa, meshi pojjeama. Pea eyami ojaya, de, quea caꞌa nee eyajo eꞌani tiitiiꞌyojji.  
\v 48 Ojjaña cuana meshijo baꞌe Adana jayojja. Eyami caꞌaꞌama. Meshi oopana. Jesosaja epeejji cuana ca ca o jayojja jama poajeꞌyo quea pame nee, quea caꞌa nee onijje eyajo ebaꞌe tiitiiꞌyojji. Eyami meshi pojjeama poaje.  
\v 49 Jjeya meshijo baꞌyanijo esejaya eyami ebionei dejjaja eyami jayojja poani, meshi oopana. Quijje eyajo baꞌe majje eseya Jesosa Quitoja eyami eyacua jayojjaya poajeꞌyo, meshi pojjeama. 
\p  
\v 50 Epeejji cuana, ¡shajjaꞌajjacue ecuea esohui! Ojjaña meshijo baꞌeja eyami caꞌaꞌama, eꞌihuiꞌyojji, meshi pojji epoꞌyojji, Jesosa Quitoja eyami eyacua jayojja pojjeama. Baꞌe meemee ajja eyajo Eyacuiñajjija cuiñajjijo. Eꞌe, jjeya esejaya eyami meshi, de, eshe epojji tiitii pojjeama eyajo. Quijje ca ca eseya eyami eyacuajji baꞌe tiitii mee cajeꞌyo eyajo, Eyacuiñajji ojjaña huoojeaꞌyojji poanijo. 
\p  
\v 51 ¡Jjeya shajjaꞌajjacue pea esohui! Yahuajo eseya jiquio esohui ba mee jjima, eyacua, jama baꞌa: Beca cuana manoꞌyo ajja nei nei Jesosa poe oꞌoya jjimahuajo. Ojjaña joya eshe nequi Jesosa Quito poe oꞌoyajo, emanoꞌyojji pojjeama; onajaya eyami eꞌihuiꞌyojji pojjeama. Jesosa Quitohua ojaya epeejji cuanaja pea eyami panacuaji cajeꞌyo eyacua.  
\v 52 Eꞌe, quijjeyejje nei esheꞌana ai mia cajo, Jesosa Quitohua ojaya epeejji eshe nequi cuanaja pea eyami eyacua pana cajeꞌyo. Jiquio ecua cojja capicapiani jayojja jama panacuajiꞌyomeya acaje. Esheꞌana mia cajo, ojjaña emanoꞌyo cuana shequi mee cajeꞌyo. Eyami eyacua panacuaji cajeꞌyo ebaꞌe tiitiiꞌyojji. Mano oꞌoya ajja poajeꞌyo. Eꞌe, ojjaña esejaya eyami eyacua poajeꞌyo.  
\v 53 Jjeya esejaya eyami ebaꞌe tiitiijji pojjeama. Caꞌaꞌama. Manojeꞌyo. Chamaꞌyo tii poajeꞌyo. Jamajjeya poeꞌyo majje Jesosa Quitohua esejaya eyami eyacua pana cajeꞌyo ese nequi tiitii meeꞌyojji, emanoꞌyojji pojjeama tii tii.  
\v 54 Jjeya jiquio meshijo eseya Jesosa Quitoja epeejji cuana enequi tiitiijji pojjeama. Quijje ca ca ohuaya eseya nequi tiitii mee cajeꞌyo eyajo. Jjeya meshijo baꞌe eseya manojeꞌyo. Quijje ca ca esejaya eyami eyacua manoꞌyo ajja poajeꞌyo. Baꞌe tiitiijeꞌyo. Eꞌe, Eyacuiñajjija esohui yahuajo nei nei etehueꞌyo jayojja jama poaje. Yahuajo jama poa baꞌa: “Dejja cuana manoꞌyo ajja tii tii. Eshe oꞌoya po tiitii mee cajeꞌyo Eyacuiñajjiya”.  
\v 55 Jamaya tehue mee ca poa yahuajo nei nei peaꞌai baꞌa: 
\q1 “Emanoꞌyo cuana emojeaꞌyo jaa tiitii ajja; eshe oꞌoya po mee cajeꞌyo tii tii. Quijje manoꞌyo ajja nei nei poajeꞌyo”. 
\m Jamaya yahuajo nei nei tehue mee ca poa Eyacuiñajjiya. 
\p  
\v 56 Mimishi cuana po nequi jjejojo ojjaña cuana mano caꞌyani. Jamajjeya ojjaña quea mete nee poani emanoꞌyojji. Moisesija esohui etehueꞌyojo eseyaya baña ojjaña shajjamaꞌ poani. Jamajjeya manojeꞌyo.  
\v 57 Jjeya Eyacuiñajji ejjabihuiaqui jama baꞌa: —Eyacuiñajji, miya quea pame nee nee. Miyaya ecuanaja Emeshi Mese nei Jesosa Quito huoojeanaje ecuanaja mimishi cuijeaꞌyohua. Jamajjeya ecuana shequi meeje oꞌoya. Baꞌe tiitii meejeꞌyo eyajo. 
\p  
\v 58 Jamajjeya ecuea epeejji cuana, ¡Jesosa Quitoja esohui etehueꞌyo jayojja jama atiitiicue! ¡Ojaya epeejji quea pame nee po tiitiicue! ¡Aꞌa Jesosa nijje jjapeequi pajeaꞌyojji! ¡Emeshi Mese neijo Jesosajo chaco tiitiicue! Jjeya ojo chacochacoanijo, quijje ohuaya eseya quea huiso sosequia cajeꞌyo eyajo. 
\c 16  
\s1 ¡Ejjeshejji chichacue Jesosaja epeejji aemaꞌ baꞌe meesahuajji! 
\p  
\v 1 Yahuajo pishana miquianajaya etehuejo eya huohuiꞌajjanaje bejjo Jesosaja epeejji huasijje, ma Jodea meshijo baꞌe yasijje ehuoojeajji. Jjeya eyaya miquianaya sajaꞌaje jama baꞌa: Eyaya esohui tehuenaje Jesosaja epeejji cuana huasijje, Janata meshijo baꞌe yasijje. ¡Ma esohui etehueꞌyo jayojja jama acue peaꞌai miquianaaya!  
\v 2 Eꞌe, ¡bejjo chichacue! Eꞌe, chacochacoajo miquianaya sosequia cani cuaa ejjeshejjijo. Jamajjeya ojjaña epojja Eyacuiñajji ojee bihuiajjijo, nomico pojjajo, ¡ejjeshejji chichacue Jesosaja epeejji aemaꞌ huasijje ehuoojeajji, Jodea meshijo baꞌe yasijje! Eꞌe pojjaꞌa oe epeejjiya oe pojji chaco majje oe pojji quia caje. Pea epeejjiya quea huiso quia caje pojjaꞌa. ¡Jamaya quea pame quiacue! Jamajjeya eya miquiana que poe jjimahuajo miquea ejjeshejji echichaꞌyo poaje.  
\v 3 ¿Ache dejja cuana pojjaꞌa ejjeshejji echichaꞌyo dojo meejeꞌyo aema huasijje, Jenosanenajo baꞌe yasijje? ¡Jjashahuabaquicue ache dejja cuana quea pame nee ehuoojeajji! Jamajjeya miquiana huasijje poe majje eyaya ma dejja cuana huoojeaje ejjeshejji dojohua. Eyaya ecuea esohui etehueꞌyo huoojeaje onijje ojjaña esejaya epeejji cuana Jenosanenajo baꞌeca ba meejji ma dejja cuana ecue huoojeaꞌyo ejjeshejji quiaa.  
\v 4 Eꞌe pojjaꞌa quijje jjashahuabaqui majje eya jama poaje baꞌa: —Eꞌe, eya peaꞌai Jenosanena huasijje capoquiahua. Jamaya quea pame nee —eya poaje. Jamajjeya ojee poquije. 
\p  
\v 5 Quijje eya Masenonia meshi yejjenana sa poani. Yejjenana majje miquiana que poqui sa poani.  
\v 6 Eꞌe pojjaꞌa eya miquiana nijje nequije quea huiso cahui cuanajo; quea huoe poani baꞌi pojja cuanajo eya miquiana nijje anije. Majoya eya ojjaña huapa cuana huasijje poquije oꞌoya. Miquianaaya eya poqui meesahuaje. Aquiana epoqui meejji quiaje pojjaꞌa.  
\v 7 Jjeya ca ca eya miquiana que poe sa po ajja. Eꞌe, jjeya miquiana nijje nequi meemee ajja quea huiso cahuijo. Jamajjeya quijje eya poeje miquiana baa. Poe majje miquiana nijje nequije quea cahui huiso. Jamaya eya poaje esejaya Emeshi Mese neiya Jesosaa eya miquiana nijje nequi mee sa acanijo.  
\v 8 Jjeya ca ca eya jjashahuabaquiani jiquiojo Epesojo enequijji. Eꞌe, eya jiquiojo tii nequije. Jodio cuana ojjaña bobi que cuanajo nequi chicha majje, bobi apoa po majje peaꞌai ojjaña quea bihui nee ojee ijjiaꞌijjiaje. Maya eyaya ishoaña.  
\v 9 Eꞌe, jiquiojo eyaya quea huiso cuana Eyacuiñajjija esohui huohuiaña. Quea huiso nee neeya shajjaꞌajja cani. Jamatii quea huiso eshahuaja epeejjiya eya Jesosa Quitojo mimi pajea meeꞌyo sa acani cuaa. 
\p  
\v 10 Eꞌe pojjaꞌa Timoteo miquiana que poejeꞌyo. ¡Poeꞌyajo oya jaahuanacue, quea bihui nee po meecue! Oya e jayojja jama poani; esejaya Emeshi Mese nei Jesosajo chaco cani.  
\v 11 Oya etii pishana. ¡Jamatii ojjañaa miquianaaya oya shajjaꞌajjacue! ¡Aꞌa ojo miamiajji! ¡Pea huasijje poqui meesahuacue quea bihui nee! Jamajjeya oya poeje oꞌoya e que. Eyaya oya ishoaꞌajja anije Jesosaja pea epeejji cuana nijje. 
\p  
\v 12 Yahuajo eya Jesosaja epeejji Apono bajjani nijje miminaje jama baꞌa: —Apono, ¿ache shono acuae miya poquije Conito huasijje esejaya epeejji cuana baa? ¡Jesosaja pea epeejji cuana nijje oe poquicue jocuama! —eya poanaje. 
\p Jjeya oya, Apono poqui sa po ajja quea huiso chacochacoanijo. Quijje apoa po majje oya poquije miquiana baa. 
\s1 Pea esohui quepe nei Etepanajo 
\p  
\v 13 Ecuea epeejji cuana, ¡quea jaꞌa nee jjashahuabaqui tiitiicue! Peaa miya dasia ca chanaꞌ. ¡Jesosa nijje jjapeequianijo Eyacuiñajjija esohui jayojja jama po tiitiicue quea pame nee! ¡Aꞌa Jesosaja epeejji quea mete pojji! ¡Ojaya epeejji quea caꞌa nee, quea pame nee pocue!  
\v 14 ¡Ojjaña quea jea nee acue! ¡Quea bei nee nee baꞌecue ona nijje! 
\p  
\v 15 ¡Epeejji cuana, shajjaꞌajjacue mo! Miquianajaya eba Jesosaja epeejji quea pame nee Etepana bajjani. Ojaya huapa pojjeama cuana miquianajaya eba peaꞌai, Jesosaja ebionei epeejji cuana Acaya meshijo poanaje. Jesosaja pea epeejji cuana jaahuana tiitii cani quea pame nee, Etepanaa.  
\v 16 Jamajjeya ¡onijje jjapeequicue! ¡Quea pame poanijo, oya shajjaꞌajjacue! ¡Pea cuaa Etepana jayojja jama quea pame nee Jesosajo chaco cani shajjaꞌajjacue peaꞌai! 
\p  
\v 17 Ojjaña miquianaya poe ajja e baa, enijje jjapeequiꞌyohua. Jamatii miquianajaya epeejji cuana Etepana bajjani, Potonato peaꞌai, Acaico peaꞌai poeyanaje e chaco sahuaa. Jamaya quea pame nee.  
\v 18 Miquiana quea bihui nee po mee canaje jayojjaya jama ohuaya eya quea bihui nee po mee cani. Quea pame nee poanijo, ¡oya cuana cashajjaꞌajja cahua ojjañaa! 
\s1 Esohui quijjeyejje nei tehueꞌyo 
\p  
\v 19 Jesosaja epeejji cuana Asia mishijo baꞌe miquianajo jjashahuabaquiani. Jamajjeya eya huohuiꞌajja mee cani jama baꞌa: —¿Achajja acuae nequiana ani soꞌo? —onajaya ebajji. 
\p Jesosaja epeejji Aquinaa ojaya ehuanase Pisina nijjeya, ojjaña Jesosaja epeejji cuana Aquinaja equijo ojee dobiquiani Jesosaja esohui baa peaꞌaiya miquiana huohuiꞌajja cani jama baꞌa: —¿Achajja acuae nequiana ani soꞌo? 
\p  
\v 20 Ojjaña Jesosaja epeejji cuana jiquiojo baꞌeya miquianaya huohuiꞌajja cani jamaya peaꞌai. 
\p Ojjaña Jesosaja epeejji cuana esejaya quea jea neejo, ¡quea bihui nee mimicue ojjaña cuana nijje! 
\p  
\v 21 Eya bajjani Pabo. Miquiana quea bihui nee epojji eyaya eyaye neiya jiquio esohui tehueaña miquiana huasijje jama baꞌa:  
\v 22 —¡Ojjaña joya Emeshi Mese nei Jesosa Quito nijje eꞌe jojo nei jjapeequi ajja Eyacuiñajjiya quea nee nee capo mee cahua! ¡Esejaya Emeshi Mese nei Jesosa Quito capoe oꞌoyahua jjeya nei! 
\p  
\v 23 ¡Esejaya Emeshi Mese nei Jesosa Quitohua miquianaya cajaahuana cahua quea pame nee! 
\p  
\v 24 Eseya Jesosaja epeejji cuana poanijo miquianaya ecuea quea jea nee nee poani, ojjaña. Mahuiso. Eyaya, Pabohua jiquio esohui tehuejeyonaje. Apoa.