\id REV - Ogea NT; Marib Fanua and Don Adeb with Auba; 13-September-2013 
\h Revelesen 
\toc2 Revelesen 
\toc1 Revelesen 
\mt2 Revelesen  
\c 1  
\p
\v 1 Amina beele beha no huwari inyi gainga, Yesus Kristus no malalamuwai. Itou no beele beha Yesus abitimu tuwai, wa no edo nomo haruwe fai abitimu nigonga, nere dada waha fasadu heigemu wodbode. Ono wainga Yesus no nomo ensel huuru tuwainga medu bona, ji Jon, nomo haruwe fai, ji Yesus nomo haruwe fai ila lenigei nomo bona lehiyai.  
\v 2 Ono wainga ji Jon, ji dada waha amina nerigene, ji Itou nomo beele bagu, Yesus Kristus nomo beele waha bagu, malala foomudu lenigene. Onodu ji benou lewene, beele beha no ngalenga tigini.   
\p
\v 3 Beele beha no profet beele Itou langa mai, fai no beele beha fai ila lelege nagona wa, no edo edega wona. Onodu nere fai-aita beele beha iside bagu, nere fai-aita Itou nomo beele ji yeregene beha oojode bagu, nere fere edo edega wode, taate bona, saini elebe heigona onona, Itou no dada ono wona lewai waha, ono wonbona.   
\s1 Jon no sios 7-langa beele yerege nagai.  
\p
\v 4 Ji Jon, ji beele beha tere Esia prowins nomo sios 7 langa fai-aita bagu yafaya waha yerege tagini. Itou elebe yafana, gai aminanga yafai waha, no iinga monbona, no edo tere bona aau wari gonga, tere tebere huwanyatege ono wonga foinga inyonbona. Onodu hauri 7, nere Itou nomo sia king hogo langa otode waha, nere fere edo tere bode aau narige gonga, tere ono tigogunga huwanyatege foinga inyonbona.  
\v 5 Yesus Kristus no Itou nomo beele oruwanga tigini malalamudu legou fai. No fai amugou matmat langa ege gidu jayai, onodu no king oruwanga oula langa yafade waha nebere Anyakaro. No fere edo tere bona aau wari gonga, tebere huwanyatege ono wonga foinga inyonbona.  
\p No ere gaude higi-higina, no nogo nomo ganemu langa ere ebere une oruwanga uulu hagaiha.  
\v 6 No ono higainga, ere king nomo gane nebere pris heigei, onodu, ere Itou nomo pris yafaya, no Yesus nomo Umamu. Yesus Kristus no gai-gai unyi gai anyakaro bagu, onodu no dada oruwanga oofa nigei nomo danga bagu. Ngalenga.   
\p
\v 7 Uragu. No agau gama langa yafaha mena, nere fai oruwanga nere nage agenege langa urodbode. Nere fai oruwa no ganya dada langa warane waha, nere fere urodbode. Onodu nere fai-aita oulaha oruwanga no bode ninanege isidu bode, nere aau narigou bagu inyangaro merodbode. Yo, dada waha heigonbona. Wa ngalenga.   
\p
\v 8 Itou Anyakaro, no Danga Oruwanga Bagu no benou lena, “Ji yagenga ji tigini amugou yafani, ji gai huunta yafani. Itou nogonga wahanga, elebe yafana, gai aminanga yafai, onodu iinga no monbona.”   
\s1 Jon no Kristus urai.  
\p
\v 9 Ji Jon, ji tebere baitege. Ji tere ngate ere Yesus nomo fai‑aita yafaya. Ji tere ngate gaara ou jimiri bagu tei nomo fadayaha, ji Itou nomo huuna langa yafou waha langa tere ngate yafaya. Ono boya ere oruwa danga bagu gaara otoboya, ou aule‑auleya. Ji Itou nomo hilou beele malalamudu benou lewene, ji Yesus boni huwanyafe ngalengana. Ono wenenga, nere ji so hidu bode nuuya Patmos ide walanga tafa hiyane yafani.  
\v 10 Anyakaro nomo fati langa, Hauri Guuni no danga bagu onou ji bagu heigai, ono gainga, ji mogofe langa fai ete nomo bolou bigul dorofe inyangaro yaurainga isene.  
\v 11 Fai waha no benou lewai, “Dada oruwa ne ureni waha, ne buk langa yeregedu bonahe, huuru wahenga sios 7 langa goyode. Ne huuru wahenga taon Efesus langa, Smerna langa, Pergamum langa, Taiataira langa, Sardis langa, Filadelfia langa, Laodisia langa goyode.”   
\p
\v 12 Ono wainga ji fai no beele lehiyai waha uroni ubulu wene. Ariya ji ubuludu boni gol lama 7, oto ganenga nerigene.  
\v 13 Onodu ji fai ete no lama waha, gamanege langa oto gainga urene. Wa no Fai Nomo Idau dorofe. No kolos ufaro tanainga mini afo kutauwai, onodu no gol leeti nomo bura kolilidu taguwai.  
\v 14 Ariya no nomo mora tawa bagu gai kaamba fowou, sipsip ululumu yo, agau kaambana dorofe. Ariya nomo ago magana wa, eeya inyangaro lalana dorofe lalawai.  
\v 15 Ariya no nomo afo gai lala dewou, bras nere eeya anyakaro langa bitane dorofe. Ariya ji nomo bolou wa, yaage anyakaro guriye bona bolouna dorofe bolou gainga isene.  
\v 16 No owo hilou langa baatu 7, yaasu nigai. Onodu oota kesebu ete nomo ma ulate-ulate bagu, gai ma bagu waha, no hurau langa mai heigai. No nomo hogo lala dewou, hoonga danga bagu lalana dorofe.   
\p
\v 17 Saini ji no uredu boni, no afo hugu langa me taumedu fai umou dorofe inyene. Ono genenga, no owo hilou geefe gala langa tafa bona benou lehiyai, “Ne adai umugau. Ji fai gai amugou tigini yafani, gai huunta yafani.  
\v 18 Onodu ji agefe auma yafagou, ji amina umeneha, onou wa urau, elebe ji gai-gai agefe auma yafani. Ji umou nomo bagu, nere fai umane waha bagu nebere haumu nomo kii yaasuni.  
\v 19 Onou waha bona, ne dada urenaha beha bonahe beele yeregau. Wa dada elebe inyide waha bagu, iinga huunta la heigodbode waha bagu bona yeregau.  
\v 20 Ne ji owofe hilou langa baatu 7 bagu, gol lama 7 waha bagu inyi ganenga nerigene. Waha no huwari beele dorofe, onodu nomo hugu wa benou, baatu 7 wa nere sios 7 waha nebere ensel. Onodu lama tofiyegou sten 7 wa sios 7 waha nere nage.”   
\c 2  
\s1 Beele Efesus nomo sios langa goyai.  
\p
\v 1 Fai waha no ege benou lewai, “Ne beele ila sios nomo ensel Efesus taon langa yafana waha yerege fuwau. Beele waha no benou, ‘Ji baatu 7 owofe hilou langa yaasu boni, lama tafagou gol sten 7 gamanege langa golo-goloni. Waha bona ji ne beele beha huuru hani gene maina.  
\v 2 Ariya, ne fanyimu oruwanga ono‑ononi bagu ne haruwe danga bagu ononi waha bagu ji amina iseneha. Onodu ji isini, ne danga bagu oto boni, nere fai inyaba waha ada gau nigi-nigini. Nere fai waha benou lehinane, “Ere fere aposel.” Ono wane wa, nere aposel uwa. Onodu ne nebere beele amina haawe nagidu, urene wa nere yaawagou fai.  
\v 3 Ne Ji unyife yaasu genenga, nere fai waha uredu ne inyabamu hini-hinide. Onou wa, ji benou isini, ne danga bagu oto boni ou waha aule‑auleni, onodu ne haruwe danga waha boni hogonyi hinei uwa.   
\p
\v 4 “ ‘Onou wa, ji ne boni beele benou bagu, saini ngasunga ne huwanyate ngalengawai langa, ne ji gaude hiyene, onou wa elebe uwa.  
\v 5 Amina ne onowou hilobainga ono wene, onou wa, ne onowou waha awadu boni, ne mebodu deweneha. Onou bona, ne onowou amina ono wene waha bonahe ege ninate isidu, ne huwanyate ubuludu bonahe, onowou ne ngasunga ono wene onounga ege onowau. Ne onou ada onowei mata bonahe wonga wa, ji ne bagu medu boni, name lama tofiyegou nomo sten tedu aririmu hanon boni.  
\v 6 Onou wa, ne name onowou hilobainga ete wa benou. Ne Nikolas nomo gane nebere fanyinege tigini ada gau hini-hinina. Ji fere nebere fanyinege tigini ada gau hi‑hina.   
\p
\v 7 “ ‘Ariya fai no agokuli bagu wonga, Hauri Guuni no sios beele malalamudu lenigina waha isi dewonbona. Fai no oota feiyawei mata wonga, ji no awa tuwehenga agenege auma nigigou nauge waha nomo hilou tedu nyonbona, nauge waha ha laluwa langa Itou nomo haga langa otona.’”   
\s1 Beele Smerna nomo sios langa goyai.  
\p
\v 8 Fai waha no ege benou lewai, “Ne beele ila sios nebere ensel Smerna taon langa yafana waha yerege fuwau. Beele waha no benou, ‘Ji fai gai amugou tigini yafani, onodu ji gai tigini huunta yafani. Amina ji umeneha, onou wa, elebe ji agefe auma yafani. Onodu ji beele beha ne langa huuru gene maina.  
\v 9 Ou jimiri bagu ne langa heigai waha ji isene, onodu ji isene, ne tigini dadate uwau yafani. Onou wa, ne dada gai baingaro inyina. Onodu fai ila nere memesi beele lehini-hinide waha, ji isini. Nere fai waha le‑lede, nere Juda nebere gane. Onou wa, nere Juda nebere gane uwa. Nere Satan nomo ganenga.  
\v 10 Iinga menanga onou ne jimiri aulau ganga, onou wa, waha ne adai umugemu hinou. Isau. Satan no ono wonga, tere wala-wala tigei nomo bona, nere fai ila tere gamatege langa dagou mata langa tafa nigodbode. Ono wogunga, tere ou jimiri bagu fati 10 onou aulagu ganga. Onou wa, ne huwanyate ngalengawou yaasu gahenga goi saini ne umau langa, ji ne agene auma yafou waha ewe toota dorofe hinon boni.   
\p
\v 11 “ ‘Ariya, fai no agokuli bagu wonga, Hauri Guuni no beele malalamudu sios lenigina waha isi dewona. Fai no oota feiyawei mata wona wa, umou nga waha no ada inyabamu tuwona. Gai uwanga uwa.’”   
\s1 Beele Pergamum nomo sios langa goyai.  
\p
\v 12 Fai waha, no ege benou lewai, “Ne beele ila sios nebere ensel Pergamum taon langa yafana waha yerege fuwau. Beele waha no benou, ‘Ji oota kesebu ufaro ma bagu, onodu nomo ma ulate-ulate bagu waha yaasuni. Ji beele beha ne huuru hanigene maina.  
\v 13 Ji haumu ne yafani waha ji isideni. Satan nomo sia king no haumu walanga inyina. Onou wa, ne yame unyife danga bagu yaasu boni, ne ji boni huwanyate ngalengana, ono boni ne name huwanyate ngalengawou waha ada huwarimuni. Amina Antipas, fai beha no yame beele malalamudu legai waha, no tere ngate yafei. No ji yame beele tigini oojo dewainga, tere tebere haumu langa dukote wanenga umai, haumu Satan yafana waha langa. Onodu saini waha langa fere, ne ji moge hiyei uwa.   
\p
\v 14 “‘Onou wa, ji ne bagu beele ila bagu. Fai ila ne bagu Pergamum langa yafade waha, nere Balam nomo onowou danga bagu yaasude. Balam nomo onowou waha benou, Amina no Balak, Israel fai-aita yaawa nigi gonga nere une langa orososowei nomo bona onowou ila abitimu tuwai. Onodu Balak no Israel fai-aita nere yaawa itou toota nigide waha nomo kaafa nyei nomo, longi tafei nomo bagu huwanyanege jaimu nagai.  
\v 15 Onou dorofenga, nere fai ila ne yaasu nigini yafade waha, nere Nikolas nomo gane nebere beele oojo-oojode.  
\v 16 Onou waha bona, ne huwanyate ubuluwau. Uwa wonga, ji menanga onou ne bagu medu boni, ji yame hurafe langa oota kesebu inyina waha langa, nere fai waha bagu wara wonboni.   
\p
\v 17 “ ‘Ariya fai no agokuli bagu wonga, Hauri Guuni no sios beele malalamudu lenigina waha isi dewonbona. Fai no oota feiyawei mata wonga, ji no mana elebe huwari waha inyina bagu, megebu kaamba ete bagu tuwon boni. Onodu megebu waha langa, ji unyi eege ete yeregon boni, fai ete te no unyi waha ada isina. Fai no megebu tona waha, no nogonga isonbona.’”   
\s1 Beele Taiataira nomo sios langa goyai.  
\p
\v 18 Fai waha no ege benou lewai, “Ne beele ila sios nebere ensel Taiataira taon langa yafana waha yerege fuwau. ‘Beele waha no benou, Ji Itou Nomo Idau, ji yame agefe magana eeya danga bagu lalana dorofe, onodu ji yame afefe nere bras polisi wari ganenga lala dena dorofe. Ji beele beha huuru genenga ne bagu maina.  
\v 19 Ne fanyimu oruwa ono-ononi waha, ji amina isene. Ji isini, ne fai-aita gaude nigi boni, ne ji boni huwanyate ngalenga ganga haruwe hogo fere-fere nere ila hoyo nigei nomo ono-ononi. Ji isini, ou oruwanga ne langa heigena waha, ne danga bagu oto-otoni. Ji isini, onowou ne amina ono wene wa hilobainga, onodu elebe ne name onowou waha gai hilobainga heigena.   
\p
\v 20 “ ‘Onou wa, ji ne boni beele benou bagu. Ne aita Jesebel, awa tugenenga ne bagu yafa-yafana. Aita waha no benou lelena, no profet, onou wa no yame haruwe fai yaawa nigi bona, longi fanyimu onowei nomo bagu, nere yaawa itou toota nigide waha nomo kaafa nyei nomo bagu agotete nigi-nigina.  
\v 21 Ji no huwanya ubuluwei nomo gau hina, onou waha bona, ji no awa tunaha saini ila yafana. Onou wa uwa. No huwanya ubuludu, no nomo longi fanyimu moge tuwei nomo awana.  
\v 22 Ariya isagu. Ji aita waha ono tuwehenga, no taura jimiri anyarokaro bagu tonbona. Onodu fai nere no ngate longi tafade waha, nere huwanyanege ubuludu no fanyimu onona waha ada moge tuwei mata bode wonga, ji nere fere jimiri anyarokaro ou bagu nigonboni.  
\v 23 Nomo magana gane fere dunege kote wehenga umeru wodbode. Ono wehenga sios oruwanga nere isodbode, ji fai oruwanga nebere ninanege huwanyanege bagu haawede nagi-nagini. Onodu boni, ji tere etenga-etenga tebere onowou waha nomo agou onounga tigonboni.   
\p
\v 24 “‘Onou wa, ji elebe tere sios nomo fai‑aita bagu ila Taiataira langa yafaya waha letigini. Tere aita waha nomo beele oojo wegu uwa, onodu tere onowou beha nomo isou tegu uwa, wa nere lede, “Satan nomo huwari beele.” Ji tere benou letigini, Ji ou ete tere langa ada tafoni.  
\v 25 Ariya tere dada oruwanga yaasu‑yaasuya waha, tere danga bagu yaasu gadenga goi, saini ji mayoni langa edo wonabona.   
\p
\v 26 “‘Fai no oota feiya bona, yame onowou oojo gonga goi dada oruwanga usuwei nomo saini langa heigona waha, ji no fai-aita bagu nebere mora bagu yafei nomo unyi anyakaro tuwonboni.  
\v 27 Onodu no nere danga bagu oofa nigi bona, fai no oula tauwe ete fourena dorofe fofoura mene-mene nigonbona. Haruwe waha ji no tuwon boni wa, haruwe yame Jijei no ji nere fai-aita bagu oofa nigei nomo hiyai dorofenga.  
\v 28 Onodu fere ji eringe amina nomo baatu heigena waha no tuwonboni.  
\v 29 Ariya fai no agokuli bagu wonga, Hauri Guuni no beele malalamudu sios lenigina waha isi dewona.’”   
\c 3  
\s1 Beele Sardis nomo sios langa goyai.  
\p
\v 1 Fai waha no ege benou lewai, “Ne beele ila sios nebere ensel Sardis taon langa yafana waha yerege fuwau. Beele waha benou. ‘Ji Itou nomo hauri 7 bagu, onodu ji baatu 7 waha yaasuni. Onodu ji beele beha ne huuru hanigene maina. Ne onowou oruwanga ono‑ononi wa, ji isini. Nere benou lehini‑hinide, “Sios waha no tigini ago auma bagu.” Onou wa uwa, ne amina umeneha.  
\v 2 Ne agore inyou awadu bonahe jayau. Ne name onowou oruwa usuwei uwa, gai inyina ne dangamuwau. Taate bona, ji ne name fanyite langa onowou ete-te yame Itou ago langa tigini ete urei uwa.  
\v 3 Hilou beele ne amina isidu boni tene waha, ne ege ninate isau. Onodu ne oojode bonahe, huwanyate ubuluwau. Ne agore ada awadu jayei mata bonahe wonga, ji fasadu onou nere yebu fai maide dorofe, ne bagu mayonboni. Onodu ji mayonboni waha nomo saini ne ada isau ganga.   
\p
\v 4 “‘Onou wa, ne name fai-aita ila Sardis langa gai yafade, nere nebere kolos jijigamu wegu uwa. Nere waha nebere onowou hilobainga, nere kolos kamba tanidu bode, ji ngate golowei nomo edo langa.   
\p
\v 5 “‘Fai no oota feiyawei mata bona wonga, ji no kolos kaamba onouha waha tanimu tudu boni, ji no nomo unyi agenege auma nomo buk langa ada yosomu fuwoni. Ji no nomo unyi yame Jijei hogo langa nomo ensel hogonege langa malalamu wonboni.  
\v 6 Ariya fai no agokuli bagu wonga, Hauri Guuni no sios beele malalamudu lenigina waha isi dewona.’”   
\s1 Beele Filadelfia nomo sios langa goyai.  
\p
\v 7 Fai waha no ege benou lewai, “Ne beele ila sios nebere ensel Filadelfia taon langa yafana waha yerege fuwau. Beele waha benou, ‘Ji guuni tigini, onodu ji onowou tigini nomo hugu. Ji Devit nomo ki yaasuni, onodu dada ji helufani waha, fai ete sesemuwei nomo edo uwa. Onodu dada ji sesemuni waha, fai ete helufawei nomo edo uwa. Ji beele beha ne huuru hani genenga maina.  
\v 8 Ne fanyimu oruwa ono‑ononi waha, ji isini. Ariya Urau. Ji ne hogone langa jauli helufadu awanaha inyina, fai ete no sesemuwei nomo edo uwa. Ji isini ne name danga menekele mene gai inyina, onou bona, ne yame beele oojo boni, ne yame unyife moge tuwei uwa.  
\v 9 Ne Satan nomo gane fai waha ne isi nigini, nere le‑lede, nere Juda nebereha fai. Ariya nere Juda nebereha uwa. Nere beele yaawagou fai. Ariya Isau. Ji nere fai waha ono nigehenga, mai name afene hugu langa afenege tuburu kutudu bode, benou isodbode, Ji ne gaude hinini.  
\v 10 Ne yame beele oojo boni, ou oruwanga ne langa heigai waha ne danga bagu oto wene. Onou waha boni ji ne oofa hinon boni, onodu wala-walawou waha oula oruwa langa fai-aita wala-wala nigei nomo heigona onona waha, ne langa ada heigona.  
\v 11 Ji ne langa fasadu mayonboni. Ne dada yaasuni waha, ne danga bagu yaasuwau, gamaji fai ete ne name haruwe agou yebu hanoga.   
\p
\v 12 “‘Fai no oota feiya bona wonga, ji no auuma dorofe otomu tuwehenga ji yame Itou nomo mata hoyodu oto wonbona, onodu no ege Itou nomo mata awadu malala ada goyona. Gai uwanga uwa. Ji yame Itou nomo unyi bagu, ji yame Itou nomo taon unyi bagu no langa yeregon boni, wa Jerusalem eege yame Itou langa mena waha, no ha laluwa awadu mena. Onodu ji yage yame unyife eege fere, no langa yeregon boni.  
\v 13 Ariya fai no agokuli bagu wonga, Hauri Guuni no sios beele malalamudu lenigina beha isi dewonbona.’”   
\s1 Beele Laodisia nomo sios langa goyai.  
\p
\v 14 Fai waha no ege lewai, “Ne beele ila sios nebere ensel Laodisia taon langa yafana waha yerege fuwau. Beele waha no benou, ‘ji Itou nomo beele bagu, nomo beele baara tawou bagu oruwa bona “Wa Ngalenga” legou fai, onodu ji Itou nomo beele oruwanga tigini malalamudu le‑leni. Ji gai-gai beele ngalenga wahanga malalamudu le‑leni. Ji Itou dada oruwanga atai waha nomo hugu, ji beele beha ne huuru hani gene maina.  
\v 15 Ne onowou oruwa ono‑ononi waha, ji isene. Ji isini, ne uliya hinei uwa, ne ngisi-ngisi hinei uwa. Ji gau hina wa, ne oto yafau yo uwa, ne ngasu bagu yafau ganga.  
\v 16 Onou wa uwa. Ne menanga onou ngasu bagu. Ne gai ngasu uwa, ne gai oto uwa. Onou waha bona, ji ne hurafe langa ngirei hinoni boni.  
\v 17 Onodu ne benou le‑leni, “Ji moni baingaro bagu, ji dada baingaro otode. Ji dada ete boni tutu hiyei uwa.” Onou wa, uwa. Ne gai inyaba yafani, nere fai edo ne bode augamide nigona. Ne dadate uwaunga uwau, ne agene fosokowou, onodu ne bilani yafani. Ne nage, ne waha boni ada isini.  
\v 18 Onou waha bona ji ne isou beha hinoni boni, Ji yame gol no eeya uwainga dada inyaba oruwa no langa inyane waha, tigini fiidu kaitai. Onou waha bona, hilobainga ne gol waha ejiyadu bonahe moni baingaro bagu yafau ganga. Onodu ne geete gala kutauwei nomo kolos kaamba ete ejiyawau, ono wahenga saini nere fai neriyode la, ne bilani yafei uwa bona mayau ada hinona. Onodu ne marasini agene langa tafei nomo waha ejiyawau, onodu ne edo igeiwau ganga.  
\v 19 Ji fai ila gau nigei mata boni, ji nere honggoro nigi boni nebere onowou tiginimu nagi-nagini. Onou waha bona, ne name onowou tiginimuwei nomo danga tafa bonahe, ne huwanyate ubuluwau.   
\p
\v 20 “‘Urau, ji jauli arasai langa oto boni, arasai kato-katoni. Fai ete no yame bolofe isidu, jauli helufa bona wonga, ji huwanya goidu boni no bagu yafonboni. Onodu ji no bagu da nyi gehenga, no ji bagu da nyonbona.\fig |alt="Man knocking on door" src="cn02107B.tif" size="col" loc="Hbmw 3.20" copy="© 1996 David C. Cook" ref="Revelesen 3.20" \fig*  
\v 21 Fai no oota feiya bona wonga, ji no awa tuwehenga, no ji ngare yame sia king langa yafo boyare, amina ji fere, oota feiyadu boni ji yame Jijei ngare nomo sia king langa gaara yafere dorofe.  
\v 22 Ariya fai no agokuli bagu wonga, Hauri Guuni no sios beele malalamudu lenigina beha isi dewona.’”   
\c 4  
\s1 Nere ha laluwa la Itou unyi isou wane.  
\p
\v 1 Iinga gainga, ji ege feeledu boni, ha laluwa langa jauli arasai ete helufawai inyi gainga urene. Ono gainga fai waha no bolou amina bigul bolou dorofe danga bagu yaure hiyainga isene, waha no benou lewai, “Ne ouwe belanga mayau, ji ne dada oruwanga iinga heigonbona waha abitimu hinonboni.”  
\v 2 Onodu fasayadu onou, Hauri Guuni no ji la danga bagu heigai, ono gainga ha laluwa langa sia king ete oto gainga urene, Fai ete no sia waha langa yafai.  
\v 3 Fai waha no yaspa megebu dorofe lalawai, onodu konilian megebu giriwou dorofe. Onodu waale ete sia king kolili tuwai, waale waha no megebu giiwa emeral dorofe lala gainga urene.  
\v 4 Sia 24 oruwa sia king kolili tudu oto ganenga, nere mora bagu 24 sia waha langa yafane. Nere mora bagu waha, kolos kaamba ufaroro tanane, onodu nebere moranege langa gol teteri king nomo teteri dorofe inyai.  
\v 5 Sia king waha langa, ji amili fililai bona firigagadu fere-fere goi gane nerigene, onodu ji gududuwou anyakaro isi genenga, amili ayawaiha. Sia hogo langa, baa 7 oruwa lala bode otowane. Baa waha, nere Itou nomo hauri 7.  
\v 6 Sia king waha hogo langa dada ete inyina, wa hiiri anyakaro dodo langa ataneha dorofe, no fiyaidu kaitou.  
\p Onodu nere dada aise agenege auma waha, nere sia king nomo jagirou aise langa otode. Nere dada aise agenege auma waha, nere agenege magana baingaro, genege gala oruwa kutauwou wa aulanege langa fere.  
\v 7 Ariya nere dada aise agenege auma, nebere amugou waha nomo urou wa no laion dorofe, nga waha nomo urou wa bulumakao madowa dorofe, eei waha nomo hogo wa fai hogo dorofe, ariya aise waha nomo urou wa no mojenga anyakaro firiyana dorofe.  
\v 8 Ariya nere dada aise agenege auma waha nere etenga-etenga oruwa nebere hadinege 6-6, onodu agenege magana genege gala oruwa la edowou, hadinege huuna langa fere. Hoonga bagu ooru bagu nere benou lelede, “Anyakaro, no Itou Danga Oruwa Bagu, no guuni no guuni no guuni. Amina no yafai, elebe no yafana, iinga no mayonbona.” Nere beele beha lewei nomo houwe ada tafa-tafade.   
\p
\v 9 Nere dada agenege auma yafade waha, nere Fai no nomo sia king langa ago auma gai-gai yafana waha bode edega-edegade. Ono bode nere no unyi isou bode, hilobainga tutude. Nere dada aise agenege auma yafade waha, nere gai-gai onou ono onode,  
\v 10 ariya nere mora bagu 24 waha, nere Fai no sia king langa yafana waha, hogo langa afenege tuburu kutu-kutude. Ono bode nere no unyi jaimu-jaimude, no Fai gai-gai yafagou. Nere nebere gol teteri elege ayaru gane me sia king hogo hinomu langa metaumeru gane, nere moone benou tetede   
\q1
\v 11 “Anyakaro, ne ebere Itou.  
\q1 Ne nagenga tigini ouwe langa yafani,  
\q2 onodu nere fai oruwanga edo,  
\q1 ne bode edega bode,  
\q2 ne unyite isou bode,  
\q1 ne name danga huuna langa yafodbode.  
\q1 Wa taate bona,  
\q2 ne dada oruwa ateneha.  
\q1 Ne nage name gauwou langa,  
\q2 dada oruwanga ono wanenga  
\q1 heiganeha,  
\q2 onodu elebe dada waha oruwanga  
\q1 otode.”   
\c 5  
\s1 Jon no buk ete dagou urai.  
\p
\v 1 Fai waha no sia king langa yafa gainga, ji nomo owo hilou langa buk ete inyi gainga urene. Buk waha no fefa ufaro ete dorofe nere olilidu bode dagane, onodu fefa waha langa yeregou ulate-ulate inyina. Nere fefa olili wanenga matau 7 heigainga, kendel nomo laluwa langa danga bagu fidawane, onodu bode nere kendel laluwa 7 waha jaula langa naani isisiwou logosi waneha.  
\v 2 Onodu ji ensel danga bagu ete urene, no bolou oto bona benou yaurai, “Faiwei no fai hilobainga no edola buk olilidu bode kendel nomo laluwa langa fida wane waha oragedu bona, buk waha isebu wona?”  
\v 3 Onou wa, fai ete ha laluwa langa yo, oula langa yafana yo, oula gamu langa inyina yo, no edo langa buk waha isebudu, huwanya langa feelewei nomo edo uwa.  
\v 4 Ji ureni wa, fai ete no buk waha isebudu bona nomo huwanya langa feelewei nomo edo uwa, onodu boni ji merenga wene.  
\v 5 Ono gainga mora bagu nebere ete no benou lehiyai, “Ne adai merau. Isau. Laion Juda nebere gane langa heigai wa, no king Devit nomo asa gane langa Hui fuduwai, no oota feiyadu bona, no nomo honggoro fai ilei nigaiha. Onou waha bona, no edo langa kendel nomo laluwa 7 buk fidawou waha oragedu bona, isebu wonbona.”   
\s1 Jon no Sipsip Magana uraiha.  
\p
\v 6 Onodu ji Sipsip Magana ete oto gainga urene. Nomo urou wa nere no dukote wanenga umaiha dorofe. No sia king gama langa oto gainga, nere dada aise agenege auma yafade waha bagu, nere mora bagu nebere sia bagu, no kolili tudu oto wane. No nomo haraku 7, no nomo ago Magana 7, wa nere Itou nomo hauri 7. Itou no nere oula fere-fere oruwanga langa huuru nigainga goyane.  
\v 7 Ariya, Sipsip Magana no goidu bona, buk waha Fai sia king langa yafai waha nomo owo hilou langa inyi gainga tai.  
\v 8 No buk waha tainga, nere dada aise agenege auma yafade bagu, nere mora bagu 24 yafade waha bagu, nere Sipsip Magana hinomu langa afenege tuburu kutu waneha. Nere mora bagu etenga-etenga nere oruwanga musik ete gita dorofe bagu, gol haaya ete bagu yaasu wane, ono ganenga buutu agiya hilobainga haaya oruwa langa heigane. Wa no Itou nomo fai-aita bagu nebere hauyawou waha isisiwou dorofe.  
\v 9 Onodu bode nere moone eege ete benou taane,  
\q1 “Ne buk edola tigini tedu bonahe,  
\q2 kendel nomo laluwa buk fidawou waha oruwa  
\q2 oragau ganga.  
\q1 Taate bona, nere ne dute kote wanenga umeneha,  
\q2 onodu ne fai-aita bagu Itou tuwei nomo boni,  
\q2 ne name ganete langa  
\q3 ege gidu ejiya nigene.  
\q1 Yo, ne fai-aita oruwa nebere fai bagu,  
\q2 beele oruwa nebere bagu,  
\q2 genege gala hogo fere-fere nebere bagu,  
\q2 kantri oruwanga nebere bagu,  
\q2 ege gidu ejiya nigene.   
\q1
\v 10 Ne nere ono nigenenga, nere  
\q1 king nebere gane, nebere pris heigedu bode,  
\q2 ere ebere Itou nomo pris yafane.  
\q1 Onodu nere king yafabode,  
\q2 oulaha fai-aita oofa nigodbode.”   
\s1 Nere Sipsip Magana nomo unyi jaimu wane.  
\p
\v 11 Ariya, ji ege feeledu boni, nere ensel bolonege baingaro isene. Nebere lelege nigou wa, handret milion, onodu tausen-tausen gai baingaro dorofe. Nere sia king bagu, dada agenege auma yafade bagu nere mora bagu, kolili nigidu otowane.  
\v 12 Nere inyangaro benou yaurane,  
\q1 “Sipsip Magana beha,  
\q2 amina nere dukote wanenga umai waha,  
\q1 no edo langa tigini unyi anyakaro bagu,  
\q2 dada hilou‑hilou oruwa,  
\q1 isou hilobainga bagu,  
\q2 danga anyakaro bagu tonbona.  
\q1 Fai-aita bagu oruwanga  
\q2 nere edo no unyi jaimu bode,  
\q1 no bode edega bode,  
\q2 no hilobainga tuwodbode.”   
\p
\v 13 Onodu ji dada hogo fere-fere Itou ati nigai waha, nere ha laluwa langa yafade, oula langa yafade, oula gamu langa jiride, hiiri langa golode waha, oruwanga bona beele isene. Yo, ha‑ha oruwa langa dada oruwanga inyide waha, ji nere benou leganenga isene,  
\q1 “Fai no nomo sia king  
\q2 langa yafa-yafana waha,  
\q1 onodu Sipsip Magana fere,  
\q2 nere hilobaingawou oruwanga,  
\q3 unyinere anyakaro bagu,  
\q3 edegawou bagu, danga bagu,  
\q2 gai-gai edo todbodere.”   
\p
\v 14 Onodu nere dada aise agenege auma yafade waha nere lewane, “Wa ngalenga.” Ono wanenga, nere mora bagu afenege tuburu kutudu bode, nere nga unyinere jaimu wane.   
\c 6  
\s1 Sipsip magana no kendel laluwa buk langa fidawou waha orage nigai.  
\p
\v 1 Ji Sipsip magana no buk 7, kendel laluwa langa fidawou waha yaasu gainga urene, onodu no kendel lalauwa amugou waha oragai. Ono gainga ji dada aise agenege auma yafade waha nebereha ete no beele lewainga isene, no nomo bolou wa, amili ayana dorofe. No benou lewai, “Ne mayau.”  
\v 2 Ono wainga, ji ege feeledu boni hoosi kaamba ete urene, fai no hoosi jaula langa yafai waha no ganya yaasuwai. Nere teteri ete fai no oota feiyawei nomo waha tuwanenga, no oota feiyawou fai dorofe goi bona, no oota gai baingaro feiya nigingawai.   
\p
\v 3 Ariya Sipsip magana no kendel laluwa buk fidawou nga waha oragai, ono gainga dada agenege auma yafade nga waha no lewai, “Ne mayau.”  
\v 4 Ono gainga hoosi ete heigai, no giriwou. Nere fai hoosi waha jaula langa yafai waha danga tuwane, danga waha no oulaha fai-aita nebere saini hilobainga usumu nagei nomo bona, ono wonga, fai nere fai ila dunege kote wogunga umeru wodbode. Onodu nere oota kesebu anyakaro ete no haruwe waha onowei nomo bode tuwane.   
\p
\v 5 Ariya, Sipsip magana no kendel laluwa buk eei fidawou waha oragai, ono gainga, dada ago auma eei yafana waha benou lewainga isene, “Ne mayau.” Ono wainga, ji ege igeidu boni, hoosi usuma ete urene. Onodu fai no hoosi jaula langa yafai waha, no skel ete ou haawegou waha nomo owo la yaasuwai.  
\v 6 Onodu ji dada ete fai bolou dorofe, dada aise agenege auma yafade waha gamanege langa beele malalamudu legainga isene, bolou waha no benou lewai, “Ne goidu bonahe name haruwe ono wahenga fai nere da bode tutu nigonbona. Ono wahenga nere fai agou fati etenga la tode waha, nere edo langa wit tauwe menakele etenga yo, bali tauwe mene-mene eeinga yo ejiya wodbode. Onou wa, ne oliv nauge bagu, wain nauge bagu, adai inyabamu nigau, ono bonahe oliv wain bagu neire faronga gai inyonbona.”   
\p
\v 7 Ariya, Sipsip Magana no kendel laluwa buk fidawou aise waha oragai, ono wainga ji dada aise ago auma yafana waha no bolou benou lewainga isene, “Ne mayau.”  
\v 8 Ono wainga, ji ege igeidu boni, hoosi bailu bagu ete urene. Fai no hoosi jaula langa yafai waha nomo unyi, Umou. Ono gainga fai umou nebere Haumu fere, no Umou oojo tudu mayai. Nere nga danga nirane wa, nere fai-aita oruwa wesedu aise langa haawe nigidu bodere, nere aise waha nebereha ete oruwa dunege kote wogunga umeru wodbode. Nere oota kesebu langa fai-aita dunege kote bodere, maau saini anyakaro ono worunga heigedu, nere dunege kote gonga, taura anyakaro ono worunga heigedu dunege kote gonga, nere oulaha kaafa kui huuru nigorunga goi nere dunege kote wodbode.   
\p
\v 9 Ariya Sipsip magana no kendel laluwa buk fidawou, anyimu kouwou waha orage gainga, ji fai-aita umeru wane waha nebere anunege, alta huuna langa yafa ganenga nerigene. Amina nere fai-aita waha Itou nomo beele danga bagu yaasu bode, nere beele waha malalamudu leganenga, honggoro fai dunege kote wane.  
\v 10 Nere anunege waha danga bagu yauredu benou lewane, “Dada oruwa nomo King Anyakaro, ne gai-gai onowou hilobainga tigini ono-ononi. Ne guuni yafani, onodu ne name onowou oruwa no tigini. Ere saini agonyi itari gedenga, ne fai-aita oula langa yafade waha kot langa tafa nigidu ere ebere ganege agou kabaka nere nigauga?”  
\v 11 Ariya nere kolos kaamba ufaaroro fai-aita bagu waha etenga-etenga nigi bode benou lenigane, “Tere menanga onou houwe tafagu. Nere honggoro fai tebere haruwe etenga tegou bagu, tebere baitege gane bagu, dunege kote wodbode, wa nere tere dutege kote wane dorofe. Itou no nere fai-aita agonyi dunege kote wodbode waha no amina hangadawai, onodu saini honggoro fai nere fai-aita waha oruwanga dunege kote boro wogunga, ariya, Itou no tere tebere ganetege agou kabaka nigonbona.”   
\p
\v 12 Ariya Sipsip Magana no kendel laluwa buk fidawou 6 waha orage gainga, ji ege igeidu boni, oula langa mimi anyakaro heigainga urene. Ono gainga hoonga no beeke asari dorofe usuma heigai. Ono gainga ole no ganenege dorofe oruwanga giriwai.  
\v 13 Nere taene nomo baatu jagui fik nauge yoku tuganga nomo bidukula orosode dorofe, nere oula langa oroso wane.  
\v 14 Taene fere, nere tagaga olilidu dagede dorofe goi usuwaiha. Ono gainga muju nuuya bagu, nere oruwanga nebere haumu awadu bode, gurutudu goyane.  
\v 15 Nere oula nomo king bagu, nere fai unyinege anyakaro bagu, nere oota fai nebere kepten bagu, nere moni fai bagu, nere fai danga bagu, nere haruwe fai ewe yafade waha oruwanga, nere fai ewe nebere gauwou langa yafade waha, nere oruwanga gurarudu goi megebu u-u gamu langa megebu anyaroro muju langa otode waha mogonege langa huwari wane.  
\v 16 Onodu nere muju bagu megebu bagu oruwanga benou yauredu lenigane, “Tere Fai no nomo sia king langa yafana waha hogo langa kutau higidu, huwarimu higadenga, Sipsip Magana waha no nomo houmu mayou anyakaro bagu ada maidu ere inyabamu higona.  
\v 17 Wa taate bona, nere nga waha neire hounere mayou, nere fai-aita bagu nebere agou inyaba waha kabaka nigei nomo Fati anyakaro waha elebe amina heigaha. Ariya faiwei no neire danga waha edo langa feiyadu yafa dewonbona?”   
\c 7  
\s1 144,000 Israel fai-aita bagu Itou nomo naani taane.  
\p
\v 1 Dada waha oruwanga usu wainga, ji ensel aise nere oula mutu aise langa oto gane nerigene, nere oulaha jagui aise yaasu nigidu bode oto wane, wa nere adai goidu bode oula bagu, hiiri bagu, nauge bagu, fu nigoguga bode.  
\v 2 Onodu ji ensel ete hoonga mayou haumu awadu mai gainga urene. No Itou ago auma gai-gai yafana nomo naani yaasudu bona, no ensel aise Itou no nere oula hiiri bagu inyabamuwei nomo danga nigai waha, danga bagu yaure nigai.  
\v 3 No benou lewai, “Tere oula bagu, hiiri bagu, nauge bagu fasadu adai inyabamu nigagu. Ere ebere Itou nomo naani, nomo haruwe fai hogonege bala langa fida nagedenga, iinga tere edo dada inyabamu nigagu.”  
\v 4 Onodu ji nere fai-aita Itou nomo naani taane waha nebere lelege nigou lewanenga isene. Nere Israel oruwanga gamanege langa fai‑aita 144,000 naani tafa nagane.  
\v 5 Onou waha bona nere fai-aita bagu 12,000 Juda nomo langa, 12,000, Ruben nomo langa, 12,000, Gat nomo langa,  
\v 6 onodu 12,000 Aser nomo langa, 12,000, Naptali nomo langa, 12,000, Manase nomo langa,  
\v 7 onodu 12,000 Simeon nomo langa, 12,000, Livai nomo langa, 12,000, Isakar nomo langa,  
\v 8 onodu 12,000 Sebulun nomo langa, 12,000, Josep nomo langa, 12,000, Benjamin nomo langa. Nere waha oruwanga, Itou nomo naani taneha.   
\s1 Nere fai-aita bagu toomaro Itou unyi isou wane.  
\p
\v 9 Iinga ji ege igeidu boni, fai toomaro lelege nigei nomo edo uwa waha nerigene. Nere fai-aita waha nere fai hugu fere-fere oruwa nebereha, kantri fere-fereha bagu, genege gala fere-fereha bagu, beele fere-fereha bagu. Nere oruwanga sia king hogo langa Sipsip Magana ago langa oto wane. Nere kolos kaamba ufaroro waha elege jiridu bode, nebere owonege langa matora gala yaasudu otowane.  
\v 10 Nere inyangaro yauredu benou lewane, “Ere ebere Itou no nomo sia king langa yafa-yafana, no Sipsip Magana ngare, nere narenga ere ege gidu haigedu bodere, ono higi ganenga hilobainga yafaya.”   
\p
\v 11 Onodu nere ensel oruwanga, nere mora bagu, dada aise agenege auma yafade bagu sia king kolili nigidu oto wane. Nere sia king igei tubode, afenege tuburu kutudu, dunege turigedu bode Itou unyi isou wane.  
\v 12 Nere benou lewane, “Ngalenga. Ere ebere Itou boya inyangaro edega boya, no unyi anyakaro malalamudu leya. No isou hilobainga oruwa bagu, waha boya ere no hilobainga tuboya, no unyi isouya. No gai danga bagu. Yo, danga aroro oruwa no langa inyina. Gaigai dada waha oruwanga, Itou nomonga. Ngalenga.”   
\s1 Nere beha nebere jimiri elebe usuna.  
\p
\v 13 Ariya nere mora bagu nebereha ete no ji benou isoki hiyai, “Nere fai-aita kolos kaamba ufaroro tanane waha, nere ani? Nere alaha mayane?”  
\v 14 Ono wainga, ji no nomo beele ege gidu benou letuwene, “Fai anyakaro, ne nage isini.” Ono wenenga no benou lehiyai, “Nere fai-aita waha, nere honggoro fai owonege langa ou anyakaro jimiri bagu taane. Onodu nere nebere kolos Sipsip Magana nomo ganemu langa hugeru wanenga, kolos kaamba heiganeha.  
\v 15 Onou waha bode, nere Itou nomo sia king hogo langa oto-otode. Onodu nere hoonga bagu, ooru bagu, nomo mata langa yafa bode nomo haruwe te fufude. Itou no sia king langa yafa-yafana waha, no nogo nere bagu yafa bona oofa nigonbona.  
\v 16 Nere ege huweli ada nigonbona, ege yaage nyomoli ada nigonbona. Nere nebere genege gala hoonga ada uwonbona, onodu dada ete-te nere nebere genege gala ada ono wonga ngasu kuru wona.  
\v 17 Wa taate bona, Sipsip Magana no sia king gama langa tigini yafana, no nebere oofa nigou fai yafonbona. No nere hanigedu bona, yaage u-u langa heigena waha langa goyonbona, wa agenege auma nigei nomo yaage. Onodu Itou no nere agiyonege karamu nagonga, nere ege ada merode bode.”   
\c 8  
\s1 Sipsip Magana no kendel nomo laluwa 7 oragai.  
\p
\v 1 Ariya Sipsip Magana no kendel laluwa buk fidawou 7 waha oragai, ono wainga dada ete te aleluwei uwa, beele ete ha laluwa langa heigei uwa inyi gainga goi hoonga ago awa matau onou goyai.  
\v 2 Ono wainga, iinga ji ensel 7 Itou hogo langa oto wane waha, bigul 7 eleganenga nerigene.   
\p
\v 3 Ono gane ensel ete no maidu bona, alta hinomu langa otowai. No gol haaya faura yassu gonga, buutu agiya hilobainga heigemuwei nomo waha yaasuwai. Onodu bode nere faura onouha waha baingaro tuwane, wa no edo langa Itou nomo fai-aita bagu oruwa nebere hauyawou bagu fadamudu bona, no gol alta Itou nomo sia king hogo langa otona waha langa Itou eeya muru wari fowonbona.  
\v 4 Onodu buutu agiya hilobainga waha bagu Itou nomo fai-aita nebere hauyawou bagu, nere ensel Itou hogo langa otowai waha nomo owo awadu bode, ouwe la manane.  
\v 5 Ariya ensel no eeya alta langa tedu bona, haaya buutu agiya hilobainga nomo waha langa tanidu bona, no eeya aya wainga oula langa minai. No aya boro wainga, amili gududu bona bolou anyakaro heige gainga, amili nomo lala firigagadu fere-fere goi gainga, oula terere waiha.   
\s1 Ensel aise bigul buu wane.  
\p
\v 6 Ariya ensel 7 nere bigul 7 yaasu wane waha, nere bigul buuwei nomo haiya wane.  
\v 7 Ensel amugou no nomo bigul buuwai, ono wainga ais yaage, eeya ganenege bagu heigedu bona minidu oula langa feuwai. Wa no oula matau oruwanga nauge oruwanga haawe eei langa wese nigoufewai ono wainga eeya oula matau ete nomo oruwanga biti bona, matau ete nomo nauge biteruwai. Ono bona jiigu gala auma fere oruwanga biteru nigaiha.   
\p
\v 8 Ariya ensel nga waha nomo bigul buu wainga, dada ete muju anyakaro eeyana dorofe aya wanenga mini hiiri langa meboduwai. Onodu nere hiiri matau haawe eei nigoufe wanenga, hiiri waha nomo matau ete ganenege heigai.  
\v 9 Nere dada agenege auma hiiri langa fere nere haawe eei nigane, ono wanenga matau ete oruwa umeru wane. Onodu sip fere onounga, nere haawe eei nigane, ono wane wa sip ago ete oruwa inyaba wane.   
\p
\v 10 Ariya ensel eei waha nomo bigul buu wainga, baatu anyakaro ete no ba dorofe lala bona ha laluwa awadu meboduwai. Nere yaage oruwa haawe eei nigofe wane waha, no yaage waha nebereha ete bagu, nere yaage u-u bagu, waha yaulanege langa meboduwai.  
\v 11 Baatu waha nomo unyi benou, Marasini Gai Iisa Bagu. Onodu no yaage waha nebereha ete yaula langa mebodu wainga, yaage waha no marasini gai iisa bagu dorofe heigai. Nere fai baingaro yaage waha nyanenga, yaage waha huwanyanege biti nagainga umeru wane.   
\p
\v 12 Ariya ensel aise no nomo bigul buu wainga, hoonga bagu, ole bagu, baatu bagu oruwanga nere haawe eei nigofe wane. Onodu nere hoonga nomo matau ulate bagu, ole nomo matau ulate bagu, nere baatu oruwanga nebere matau ulate bagu, inyabamu wane. Onou bona, nere nebere lala matau ulate agugu heigai, waha bona, hoonga nomo matau ulate bagu ooru nomo bagu nere lala uwau.   
\p
\v 13 Ono gainga ji mojenga anyakaro ete taene gama langa firiyadu goi gainga urene. Onodu no inyangaro yauredu benou legainga isene, “Agenege gami, agenege gami, nere fai-aita oula la yafade waha agenege gami bagu. Ensel eei nere ege nebere bigul buu wode onode waha, ou gai anyakaro fai-aita bagu langa heigonbona.”   
\c 9  
\s1 Ensel anyimu kouwou no nomo bigul buuwai.  
\p
\v 1 Ariya ensel anyimu kouwou no nomo bigul buu wainga, ji baatu ete ha laluwa awadu oula langa mebodu wainga urene. Ono wainga nere u-u gai gamu minou, hugu uwau waha nomo ki tuwane.  
\v 2 Ono wanenga, baatu no u-u waha helufa wainga, buutu u-u gamuha heigai waha, no eeya anyakaro nomo buutu dorofe. Onodu buutu u-u langa heigai waha no hoonga taene bagu kutau wainga, hoonga taene bagu aguguwai.  
\v 3 Ono wainga dada mene‑mene koisi dorofe waha baingaro nere buutu waha awa tudu bode oula langa kejiwe fere‑fere goyane. Nere waha aure malagu nomo danga dorofe taane, nere oulaha aure malagu waha fai inyabamu nigi-nigide.  
\v 4 Onodu nere koisi waha benou lenigane, “Tere jiigu bagu dada hogo fere-fere oula langa heigede waha, nauge bagu adai inyabamu nigagu. Tere fai-aita nere, Itou nomo naani hogonege bala langa inyei uwa wahanga, inyabamu nigagu.  
\v 5 Tere fai-aita nere waha jimiri edo nigi gadenga ole anyimu kouwou goyona, ariya tere dunege adai kote wadenga umeru wode.” Ono wanenga nere koisi waha fere-fere goidu bode, nere fai-aita jimiri gai danga bagu nigane. Nere jimiri nigane wa, aure malagu jimiri nigide dorofenga.  
\v 6 Saini waha langa fai-aita bagu nere umei nomo jala kuru wodbode, ono wode wa, nere ada umodbode. Nere umei nomo gaude nigonbona, ono wode wa, umou no nere awa nigidu faga wonbona.   
\p
\v 7 Ji nere koisi nerigene wa, nere hoosi oota goyode haiyade dorofe. Nere moranege langa gol teteri dada dorofe inyai. Onodu nebere hogonege bala wa, fai hogonege bala dorofe.  
\v 8 Onodu nebere tawanege gala wa aita nebere tawanege gala ufaaroro dorofe. Nebere manege wa laion ma dorofe.  
\v 9 Onodu dada siot kafa dorofe buranege kutauwai, nebere hadinege hoosi karis kuse nigidu oota langa guriyedu goi ganga gududuna dorofe bolouwai.\fig |alt="Men in armor on horses" src="HK00191B.TIF" size="span" loc="Hbmw 9.9" copy="Horace Knowles © The British & Foreign Bible Society, 1954, 1967, 1972." ref="Revelesen 9.9" \fig*  
\v 10 Nere koisi waha malanege aure malagu malanege dorofe, onodu tutui marasin inyaba wari nagogunga jimiri nigei nomo wa, nebere malanege langa inyina. Onou waha bona, nere fai-aita bagu jimiri inyaba nigogunga ole anyimu kouwou goyonbona waha, nebere danga malanege langa inyina.  
\v 11 Nere nebere king ete no nebere mora bagu yafana. King waha no u-u gai gamu minou hugu uwau waha nomo ensel. Hibru beele langa nere ensel waha unyi, Abadon tutude. Ariya ere ebere beele langa nere le‑lede, Dada Oruwanga Inyabamugou Fai.   
\p
\v 12 Ariya ou anyakaro amugou no usuwai. Onou wa isagu. Ou anyaroro nga nononga gai inyina, iinga heigonbona.   
\s1 Ensel 6 no nomo bigul buuwai.  
\p
\v 13 Ariya, ensel 6 no nomo bigul buu wainga, ji fai ete nomo bolou haraku aise Itou toota tugou gol alta Itou hogo langa otona waha nomo mutu aise oto ganenga, gamanege langa beele legainga isene.  
\v 14 No ensel 6 bigul yaasuwai waha benou letuwai, “Nere ensel aise Yufretis yaage, dagou mata langa yafade waha, awa nigahe goyode.”  
\v 15 Ariya no ensel aise waha awa nigonga nere edo fai-aita oruwanga ago eei langa haawe nigidu bode, ago ete oruwanga dunege kote wogunga umeru wodbode. Nere ensel waha, haiya borodu hoonga ago waha langa, fati waha langa, ole waha langa, haga orei waha langa, haruwe waha onowei nomonga itaride.  
\v 16 Nere oota fai hoosi langa yafade waha, 200 milion onou. Ji nebere lelege nigou lewanenga isene.  
\v 17 Onodu boni ji dada wewewou dorofe langa hoosi nerigene, fai nere hoosi langa yafane, onodu nere nebere onowou wa benou. Fai nere kapa siot tanane, onodu siot waha nebere yere, giriwou bagu, giiwa bagu, bailu bagu. Nere hoosi waha nebere moranege, laion moranege dorofe. Onodu eeya bagu buutu bagu, megebu salfa eeyana bagu, hoosi hawenege langa heigedu bode, firigagadu fere-fere goyane.  
\v 18 Wa nere fai-aita oruwanga ago eei langa haawe nigoufedu, nere dada inyaba eei waha, ago ete oruwanga dunege kote wanenga umeru wane. Nere dada eei waha, eeya bagu, buutu bagu, megebu salfa eeyana bagu, nere hoosi huawenege langa heigane.  
\v 19 Nere hoosi waha nebere danga hawenege bagu malanege bagu langa inyina. Nere nebere malanege no maangi dorofe, onodu mora bagu. Onodu hoosi nebere malanege langa nere fai-aita inyabamu nigi-nigide.   
\p
\v 20 Nere fai-aita ila waha, nere dada inyaba eei waha dunege kote wanenga umeru wegu uwa, nere fai-aita waha huwanyanege ubuludu bode, nere yaawa Itou nere nage nebere owonege langa atane waha moge nigegu uwa. Nere hauri inyaba bagu, nere fai yaawa Itou nomo ago anu gol langa, silwa langa, bras langa, megebu langa, nauge langa, atane waha, nere ada igei-igeide, beele ada isi-iside, ada golo-golode, dada waha unyinege jaimuwou fanyimu aweguwa.  
\v 21 Nere fai-aita waha, fai-aita ila dunege kote wanenga umeru wane, nere henowa tafa bode, danga hogo fere-fere ila ono bode, longi tafa bode, fai ila nebere dada yebu wane. Onou wa, nere huwanyanege ubuludu bode, onowou waha fere moge tuweguwa.   
\c 10  
\s1 Ensel no Jon buk tuwainga nyai.  
\p
\v 1 Ariya, ji ensel danga bagu ete ha laluwa langa me gainga urene. No nomo gogala agau langa kutauwai, onodu waale ete nomo mora langa inyai. No nomo Hogo Bala hoonga dorofe lalawai, onodu afo nga waha nomo urou wa eeya dorofe.  
\v 2 Ensel waha no buk menakele ete owo langa isebudu inyigainga, yaasuwai. No nomo afo hilou wa, hiiri jaula langa tafadu, afo kenao oula langa tafai.  
\v 3 Onodu no laion bolou oto bona uina dorofe, danga bagu yaurai. No yaure boro wainga, amili aya 7-du nebere beele hayane.  
\v 4 Amili 7 waha aya boro wanenga, ji nere beele lewane waha yeregoni ono wene. Ono wa ji ha laluwa langa fai ete benou yaurainga isene, “Ne amili aya 7 wane waha, nebere beele adai yeregau. Ne name ninate langa tafahenga inyona.”   
\p
\v 5 Ariya ensel afo ulate hiiri langa, afo ulate oula langa tafadu oto gainga urene waha, owo hilou isoudu ha laluwa langa jo bona lewai,  
\v 6 ngalenga auwe langa, Itou gai-gai ago auma yafana waha unyi langa. Wa Itou no ha laluwa bagu, dada oruwanga no langa tafai inyina waha bagu, onodu oula bagu dada oruwanga oula langa tafai inyina waha bagu, onodu hiiri fere dada oruwanga no langa tafai inyina waha bagu. Onodu ensel no benou lewai, “Saini usuwona onona. Itou no ege ada itari wonbona.  
\v 7 Saini ensel 7 no bigul buu wonga, nomo bolou heige gonga, Itou no dada ono wonbona waha nomo beele huwariwai inyina waha, Itou no tigini ono wonga heigonbona. Wa hilou beele no amina profet lenigai waha, nere nomo haruwe fai.”   
\p
\v 8 Onodu fai waha nomo bolou ha laluwa langa ege heigedu bona benou lehiyai, “Ne goidu bonahe, ensel afo ete oula langa ete hiiri langa tafaha otona waha, owo langa buk isebuwou inyina waha tau.”  
\v 9 Ono wainga, ji ensel bagu goidu boni letuwene, “Ne buk menakele waha ji hiyau.” Ono wenenga, no benou lehiyai, “Ne tedu bonahe nyau. No huwanyate hau wara wonbona. Onou wa, name hurate langa no ameme hu dorofe unyuru hinonbona.”  
\v 10 No leboro wainga, ji buk menakele waha nomo owo langa ngau tedu boni nyene. Onodu ji yame hurafe langa, no ameme hu dorofe unyuru hiyai. Onou wa, saini ji nyi boro wenenga, no yame huwanyafe hau warawai.  
\v 11 Onodu nere benou lehiyane, “Ne profet beele ege malalamudu, kantri baingaro nebere fai-aita baingaro langa beele fere-fere baingaro bagu, nere king baingaro fere, dada nere langa heigonbona waha lenigau.”   
\c 11  
\s1 Fai nga beele malalamudu leware.  
\p
\v 1 Ariya nere ji dada isisiwei nomo dumuga hiyane, dumuga waha yaasudu golowei nomo dumuga dorofe, onodu nere benou lehiyane, “Ne jaidu bonahe, Itou nomo mata bagu, alta bagu isisiwau. Onodu bonahe, ne fai-aita bagu mata waha langa bori ure‑urede waha lelege nigau.  
\v 2 Onou wa, ne komowou haumu, Itou nomo mata orei kolili tuwou dui langa inyina waha, adai isisiwau. Wa ne awau, taate bona, wa fai ila nebere komowou haumu, nere fai waha maidu Itou nomo taon ilei gogunga goi ole 42 edo wonbona.  
\v 3 Onodu Ji fai nga waha huuru nirehenga yame beele malalamudu lewodbodere. Nere augami nomo kolos tanodbodere, onodu nere yame beele malalamudu legoronga goi fati 1,260 langa edo wonbona.”   
\p
\v 4 Nere fai nga waha, nere Oliv nauge nga waha dorofe, onodu lama nga waha ha-ha oruwanga nebere Anyakaro hogo la otodere.  
\v 5 Onou wa fai nere inyabamu nirei nomo onowei mata wode wa, eeya huranere langa heigedu, neire honggoro fai tigini biteru nigonbona. Onou bona faiwei no nere inyabamu nirei nomo ono bona wonga, no onowou wahanga la umonbona.  
\v 6 Nere nga saini oruwa Itou nomo profet beele malalamudu legorunga, yaage adai moga bodere agau sesemuwei nomo nere danga bagu. Onodu nere yaage oruwanga ono worunga ganenege heigei nomo bagu, dada hogo fere-fere ono worunga heigedu oulaha fai-aita inyabamu nigei nomo nere danga waha bagu. Nere edo neire gauwou langa dada onouha waha ono worunga heigodbode.   
\p
\v 7 Saini nere Itou nomo hilou beele malalamudu lewei nomo haruwe usumu gorunga, u-u hugu uwau waha nomo kaafa kui, u-u awadu ouwe mayonbona. Onodu no nere nga waha bagu wara wonbona. Onodu no nere nga waha ilei niridu dunere kote wonga umeru wodbodere.  
\v 8 Ono wonga, neire genere gala taon anyakaro waha nomo jala anyakaro langa inyodbodere, ere muuji beele langa benou le-leya, Sodom, Isip bagu. Taon wahanga la, amina neire Anyakaro nauge abalakawou langa waridu dukote wanenga umai.  
\v 9 Nere fai oruwanga genege gala hogo fere-fere bagu, kantri oruwanga, beele hogo fere-fere bagu, nere fai-aita hugu fere-fereha oruwanga, nere nga neire genere gala ure gogunga fati eei nomo matau bagu goyonbona. Onodu nere fai awa nigogunga, neire genere gala u-u ada tanode.  
\v 10 Onodu oulaha fai-aita nere nga waha umorunga neriredu, edega bode, moone uyi bode, da nyi bode, nebere ilibanege gane toota nigodbode. Taate bona, profet nga waha nere fai-aita bagu oula langa yafade waha, jimiri danga bagu nigigare.   
\p
\v 11 Fati eei nomo matau bagu waha usu wainga, Itou no agenere aumawei nomo hauri nere nga huwanyanere langa huuru wainga goyainga, nere jaidu oto ware. Ono warenga, fai-aita bagu nere nga waha neriredu bode, danga bagu umugane.  
\v 12 Onodu fai ete nomo bolou ha laluwa langa danga bagu yauredu benou leniri gainga isare, “Tere ouwe belanga mayaru.” Ono wainga honggoro fai nere nerire bode oto ganenga, nere agau huwanya langa goidu bodere ha laluwa ouwe langa manare.  
\v 13 Onodu saini waha langa tigini, mimi anyakaro mai, onodu taon waha nomo ulate inyabamuwai, ariya 9 waha nomo ulate gai inyai. Onodu nere fai-aita 7,000 mimi waha langa umeru waneha. Nere fai-aita gai yafane waha nere danga bagu umugedu, ha laluwa nomo Itou unyi isou wane.   
\p
\v 14 Ariya ou anyaroro nga waha usuwai. Onou wa isagu. Saini menekele langa, ou anyakaro eei waha heigonbona.   
\s1 Ensel 7 no bigul buuwai.  
\p
\v 15 Ariya ensel 7 no nomo bigul buu wainga, ji nere ha laluwa langa yafade waha danga bagu benou yauranenga isene, “Ebere Anyakaro, fai no nomo fai-aita bagu ege gidu haigei nomo hangada tuwai waha ngare, nere ha-ha oruwanga nebere king heigareha. Onodu Anyakaro no king gai-gai yafonbona.”  
\v 16 Onodu nere mora bagu 24, nere Itou ago langa nebere sia langa yafade waha, nere afenege tuburu kutudu hogonege oula tudu bode, Itou unyi jaimu wane.  
\v 17 Nere benou lewane,  
\q1 “Anyakaro, ne Itou  
\q3 Danga Oruwanga Bagu.  
\q1 Ne elebe yafani, gai aminanga yafene.  
\q1 Ne name danga  
\q3 anyakaro amina teneha,  
\q2 onodu ne king tigini heigene.  
\q1 Onou waha boya ere hilobainga hiniya.   
\q1
\v 18 Haiden nere  
\q2 ne bode hounege danga bagu maina, ariya  
\q2 ne name houte mayei nomo saini heigaha.  
\q1 Elebe nere fai umane waha, ne  
\q2 name kot langa  
\q2 heigei nomo saini.  
\q1 Elebe ne name haruwe fai  
\q3 nebere agou kabaka  
\q2 hilobainga nigei nomo saini,  
\q3 wa ne name profet bagu,  
\q2 name fai-aita bagu,  
\q2 nere fai oruwanga  
\q3 ne umuge hini bode name  
\q3 huuna langa yafade bagu,  
\q3 nere fai unyinege bagu,  
\q3 nere fai unyinege uwau fere.  
\q1 Elebe nere fai oula inyabamu wane waha, inyabamu nigei nomo saini.”   
\p
\v 19 Nere mora bagu beele leboro wanenga, ensel nere Itou nomo mata ha laluwa langa inyina waha helufa wane, onodu nere Itou nomo Beele Baara Tawou Bogisi bagu Itou nomo mata huwanya langa malala inyi gainga urane. Ono wanenga biyai fililaidu fere-fere firigagadu goi gainga, ha gududuwou anyakaro heige bona amili aya wainga, oula mimi me bona, aisi yaage baingaro maiha.   
\c 12  
\s1 Jon no Aita maangi anyakaro ngare nerirai.  
\p
\v 1 Ariya, naani anyakaro hogo fere ete taene langa heigai. Naani waha benou. Aita ete no yafai, no hoonga nomo kolos dorofe taguwai. Ono gainga ole no afo huuna langa inyi gainga, baatu 12 nere no mora langa teteri dorofe oto wane.  
\v 2 Ariya aita waha no go bagu, onou bona no magana bisei nomo gogala jimiriwou amina heigai. No magana bisona ono bona jimiri gai danga bagu isidu, no inyangaro holewai.  
\v 3 Ono gainga, naani ete taene langa heigai. Naani waha benou, Maangi giriwou anyakaro ete inyai. Nomo mora 7, onodu nomo haraku 10, no mora langa heigane. Onodu teteri 7 king nomo teteri dorofe no mora 7 walanga otowane.  
\v 4 Nomo mala langa taene nomo baatu toomaro kunude nigidu bona elegedu oula langa ayaru nigainga orososo wane. Nere baatu haawe eei nigoufe wane, onodu baatu haawe ete waha oruwanga oula langa orososo waneha.  
\p Ariya maangi waha no aita magana bisona onona waha hogo la otowai, no aita waha magana bisonga, no magana waha tedu nyonbona itari tuwai.  
\v 5 Ariya aita waha no fai magana bisai, Itou no magana waha aini dumuga yaasudu bona nere fai-aita oruwanga danga bagu oofa nigei nomo bona hangada tuwai. Aita waha no magana bisainga, nere fasadu onou magana waha haudu bode ouwe langa manane, onodu bode nere Itou bagu nomo sia king langa togoyane.  
\v 6 Onodu aita waha heige fagadu ha lawou langa goyai. Itou no haumu waha no yafei nomo amina haiya fuwai, no walanga yafa gonga, nere oofa tubode da langa uyi tu gogunga goi fati 1,260 langa edo wonbona.  
\v 7 Ariya ha laluwa langa oota anyakaro heigai, Maikel no nomo ensel bagu nere maangi anyakaro waha ngate wara wane. Ono wanenga maangi anyakaro waha nomo ensel bagu, nere oota agou ege giimu nagane,  
\v 8 onou wa, nere oota waha feiyawei nomo danga uwau. Onou waha bode nere ha laluwa langa ege ada yafode,  
\v 9 nere Itou nomo ensel maangi waha tedu ha esene la kaite tuwane. Maangi no waha aminaha, nere lede Satan, “No Fai Oruwa Kot Langa Tafa Nigi-nigina.” No waha oulaha fai-aita oruwa yaawa nigigou fai. Nere no te kaite tuwanenga oula la me gainga, nomo ensel fere elege ayaru niganenga no ngate mane.  
\v 10 Onodu ji ha laluwa langa fai ete bolou inyangaro yauredu benou lewainga isene, “Elebe ebere Itou no ere ege gidu amina haigaha, no nomo danga amina malala heigaha, onodu no king yafana. Fai waha no nomo fai-aita bagu ege gidu hanigei nomo hangada tuwai, no unyi anyakaro danga bagu amina tai. Taate bona, fai waha no ebere baabo gane Itou ago langa hoonga bagu ooru bagu kot la tafa nigigai waha, elebe ensel nere amina tedu aya tuwanenga minaha.  
\v 11 Ebere baabo gane nere nebere agenege auma yafou inyangaro gau nigei uwa, onodu nere oula langa hilou yafei nomo danga bagu ninanege iseguwa. Nere Sipsip Magana nomo ganemu langa danga taane, onodu nere nomo hilou beele malalamudu lewei nomo danga tafane, edo nere honggoro fai dunege kote wanenga umeru wane. Onowou waha langa nere oota feiyadu bode, oota waha usumu wane.  
\v 12 Onou waha bona ne ha laluwa, onodu tere oruwanga ha laluwa langa yafaya waha, tere edo edega wagu. Onou wa ne oula, ne hiiri, tere ure dewagu. Ou anyakaro tere la heigonbona onona. Satan no tere bagu amina heigaha, no houmu danga bagu maina. No isina, no nomo yafei nomo saini tutu menekele mene.”   
\p
\v 13 Saini maangi no urai wa nere oula la aya tuwanenga mai, onodu no goidu aita fai magana bisai waha so tuwai.  
\v 14 Ono wainga nere aita waha mojenga anyakaro nomo hadimu nga nononga tuwane, no edo firiyadu bona goi nomo matane, oula fai uwau langa maangi waha baae tudu yafonbona. Ono gonga nere no oofade tubode huweli bona aare tu gogunga goi haga orei eei matau bagu langa edo wonbona.  
\v 15 Ono wainga maangi waha no hao langa yaage ngireiwai. Yaage waha no anyakaro dorofe heigedu bona, guriyedu aita waha oojo tuwai. Maangi nomo gauwou wa, yaage no aita waha tedu inyabamude tuwona bona.  
\v 16 Ariya oula no aita hoyo tuwai. Oula no hao isebudu bona, yaage maangi ngireiwai waha nyai.  
\v 17 Ono wainga maangi no aita waha bona houmu mayainga, no idau gane ila bagu oota wara wona onowai, wa nere fai-aita bagu Itou nomo nuuni beele oojo bode, Yesus nomo hilou beele malalamudu lebode oojo tutude waha.  
\v 18 Ariya, maangi no laanga ulisi langa oto bona itarina.   
\c 13  
\s1 Kaafa kui nga nononga heigare.  
\p
\v 1 Ariya ji kaafa kui ete hiiri la mai heigainga urene. Nomo mora 7, onodu nomo haraku 10, nomo mora langa heigane. Ariya no nomo teteri 10 waha king nomo teteri dorofe nomo haraku langa oto wane. Onodu nomo mora la unyinege otona. Ariya unyinege waha nomo hugu, Itou memesi tuwou fanyimu hogo fere-fere.  
\v 2 Ariya ji kaafa kui elebe ureni beha no buusi kui anyakaro, nere lepat ide dorofe, onodu no nomo afo bea nomo afo dorofe, onodu nomo hao laion nomo hao dorofe. Ariya maangi waha no nogo nomo danga kaafa kui waha tuwai. Onodu no wenga kaafa kui waha nogo dorofe king tafa tudu bona, no nomo danga anyakaro tuwai.  
\v 3 Ariya urei nomo wa, kaafa kui waha nere mora ete waridu bode dukote wanenga umai dorofe. Onou wa ju inyaba waha no kakarege boredu ege hilouwai. Ono wainga nere fai-aita bagu oruwanga kaafa kui waha uredu bode horoto wane, onodu no oojo tuwane.  
\v 4 Nere fai-aita bagu benou isane, maangi anyakaro no wenga nomo danga waha kaafa kui waha tuwai, onou bona nere maangi waha unyi isou wane. Onodu nere kaafa kui waha fere unyi isou wane, onodu bode benou lewane, “Faiwei no kaafa kui waha dorofe? Faiwei no ngare warawei nomo edo?”   
\p
\v 5 Ariya Itou no kaafa kui waha awa tuwainga, kejiwe bolou oto bona Itou memesi beele letungawai. No fanyimu waha ono gonga goi ole 42 langa haawewei nomo, no danga bagu.  
\v 6 Onou bona, no bolou oto bona Itou memesi beele letungawai. No Itou unyi bagu, Itou nomo matane bagu, Itou nomo gane ha laluwa la yafade waha bagu bona beele inyaba lewai.  
\v 7 Itou no awa tuwainga no Itou nomo fai-aita bagu oota warawai, onodu no feiya nigidu bona ilei nigai. No fai‑aita bagu oruwanga, nere kantri oruwa, matane beele oruwa nebere, fai genege gala hogo fere-fere oruwa bagu, nebere king yafei nomo bona danga tai.  
\v 8 Saini Itou no oula tafainga heigei uwa langa, nere oula nomo fai-aita oruwanga nebere unyinege agenege auma nomo buk langa inyei uwa waha, nere kaafa kui waha unyi jaimu wodbode. Agenege auma nomo buk waha, Sipsip Magana nomo buk, amina nere dukote wanenga umai.   
\p
\v 9 Fai no agokuli bagu wonga, no beele beha isi dewona.  
\v 10 Itou no fai ete dagou mata langa goyei nomo hangada tuwei mata wonga, no edo dagou mata langa goyonbona. Onodu no fai ete oota kesebu langa dukotewei nomo hangada tuwei mata wonga, nere no oota kesebu langa dukote wogunga umonbona. Onodu saini fanyimu onouha heigonga, Itou nomo fai-aita nere danga bagu yafa bode, nere nebere huwanyanege ngalengawou yaasu dewode.   
\p
\v 11 Onodu ji ege kaafa kui ete oula gamu la jaidu bona mai gainga urene. Ariya nomo mora langa haraku nga nononga heigare wa, sipsip magana nomo haraku dorofe, ariya no nomo beele lewou wa maangi anyakaro beele lena dorofe.  
\v 12 Ariya saini kaafa kui iinga huunta heigai waha no kaafa kui amugedu heigai waha ngare yafare la, no kaafa kui amugedu heigai waha nomo danga oruwa elegai. Onodu no oula bagu fai-aita oula langa yafade waha bagu ono nigonga, kaafa kui amugou waha unyi isouwei nomo bona haruwe danga tai, no ju inyaba umei nomo edo la waha tai, onou wa ju waha no amina kakaregai.  
\v 13 Ariya kaafa kui huunta heigai waha no dodokawou aroro hogo fere‑fere baingaro tafai. No dodokawou hogo fere ete tafai wa benou. No fai-aita bagu agenege langa eeya ete ono wainga ha laluwa awadu bona oula langa mai.  
\v 14 Ariya Itou no awa tuwainga kaafa kui amugou waha ago langa dodokawou fere-fere tafangawai, onodu fanyimu waha langa no oulaha fai-aita bagu yaawa nigai. No fai-aita bagu benou lenigai, “Tere kaafa kui waha unyi isouwei nomo anu isisiwou kadana salu wagu. Kaafa kui waha no amina bainat du kotewai, onou wa no ago auma gai yafana.”  
\v 15 Itou no awa tuwainga, no kaafa kui waha anu isisiwou kadana waha, ago auma nomo hauri tuwai. Ono wainga kadana waha no beele lewai. Ariya fai ila nere kaafa kui waha nomo kadana unyi ada isou bode wonga, no dunege kote wonga umeruwei nomo danga bagu.   
\p
\v 16 Ariya kaafa kui nga waha no lewainga, nere fai-aita bagu oruwanga naani ete owonege hilou langa bagu, hogonege langa bagu tafa nagane, edo nere fai-aita bagu ewe yo nere unyinege bagu, nere moni baingaro bagu yo nere dadanege uwau yafade, nere ewe nebere gauwou langa yafade yo nere haruwe magana haruwe aita ewe.  
\v 17 Onou wa, fai no kaafa kui waha nomo unyi nomo naani uwau yo nomo unyi nomo namba uwau wonga, no fai-aita ila langa dada ada ejiya wona, nere fere no langa dada ada ejiya wode.  
\v 18 Fai no ninau hilobainga bagu waha, no edo dada waha bona isi dewonbona. Fai no isou bagu waha, no kaafa kui nomo namba waha edo lelege dewonbona. Namba waha, fai ete nomo namba, onodu fai waha nomo namba wa 666.   
\c 14  
\s1 Sipsip Magana nomo fai-aita bagu moone eege taane.  
\p
\v 1 Ji ege igeidu boni Sipsip Magana no Saion muju langa oto gainga urene, nere fai-aita 144,000 no ngate gaara otowane. Itou no Sipsip Magana unyi bagu Umamu unyi bagu nebere hogonege bala langa yerege nagai.  
\v 2 Onodu ji bolou hilobainga ete ha laluwa langa mainga isene, no yaage anyakaro guriye bona bolouna dorofe, onodu amili inyangaro aya ganga bolouna onou. Ariya bolou, no fai gita wari ganga musik heigena dorofe.  
\v 3 Ono gainga nere fai-aita bagu waha, nere Itou nomo sia king hogo langa, dada agenege auma aise waha agenege langa, mora bagu agenege langa oto bode moone eege ete taane. Ariya moone eege waha nere fai-aita 144,000, Itou no nere oula nomo fai-aita oruwanga gamanege la ejiya nigidu ege gidu hanigai waha, nere nagenga edo moone eege waha bode isou tode bode. Ariya ege fai ete moone waha isou tei nomo edo uwa.  
\v 4 Nere fai waha, nere aita bagu jiridu jijiga bagu heigegu uwa. Nere jijiga uwaunga uwau. Onou waha bona Sipsip Magana no matane oruwa la goyona ono ganga, nere waha no oojo tudu goi-goide. Itou no nere waha, oula nomo fai-aita oruwanga gamanege langa ejiya nigai, onodu nere amugou fai Itou ege gidu hanigai dorofe yafade. Nere waha Itou Sipsip Magana ngare neire tigini yafodbode.  
\v 5 Nere yaawa beele lewegu uwa. Nere dada ete bode nyabuluwou uwau.   
\s1 Ensel eei nononga beele malalamudu lewane.  
\p
\v 6 Ji ensel ete taene gama la firiya gainga urene. No gai-gai nomo yafou langa hilou beele bagu, onodu no hilou beele waha nere fai-aita bagu oula langa yafade waha, malalamudu lenigei nomo haruwe bagu. No hilou beele waha nere fai-aita bagu oruwanga kantri oruwa la, beele fere-fereha bagu, nere fai genege gala fere-fereha bagu malalamudu lenigai.  
\v 7 Onodu no inyangaro yauredu lenigai, “Itou no fai-aita bagu nebere onowou kot langa haawe nagei nomo saini amina heigaha. Onou waha bona, tere no umuge tu bonade unyi isou wagu. Tere Itou no ha laluwa bagu oula bagu, hiiri bagu, yaage u-u bagu, no dada oruwanga tafai waha unyi isou wagu.”   
\p
\v 8 Ono gainga ensel ete fere ensel amugedu mai waha oojo tudu mai. Ensel iinga huunta mai waha no lewai, “Babilon taon anyakaro waha no amina inyaba waha! Yo, no amina inyaba waha! Babilon taon no wahanga nere fai-aita oruwa kuse nigi gainga nomo longi fanyimu gai danga bagu ono gane. No wain danga bagu nigainga nyane dorofe.”   
\p
\v 9 Ono gainga ensel ete fere nere nga waha taga niridu mai. Ensel eei no waha inyangaro yauredu bona lewai, “Fai ete no kaafa kui waha nomo ago anu isisiwou ngare unyinere isou bona nomo naani nomo hogo bala owo bagu langa elege bona wonga,  
\v 10 no wain hogo fere ete nyonbona. Wain waha no Itou nomo houmu mayou. Itou no amugedu, wain waha yaage bagu ada ubulumu wona. No nomo houmu mayou waha agou inyaba tuwei nomo bona kap langa feu wonga minonga, fai waha nyonbona. No Itou nomo ensel agenege langa, Sipsip Magana ago langa, no eeya bagu, megebu salfa eeyana waha bagu langa jimiri anyakaro tonbona.  
\v 11 Onodu eeya nere jimiri nigonbona waha nomo buutu no gai-gai ouwe maninga wonbona. Nere fai kaafa kui waha nomo anu isisiwou ngare neire unyinere isou bode, nere nomo unyi nomo naani taane waha, nere hoonga bagu ooru bagu houwe ada tafode.”   
\p
\v 12 Ariya saini onowou benouha heigonga, nere Itou nomo fai-aita bagu danga bagu oto wode, wa nere fai-aita Itou nomo nuuni beele oojo bode, Yesus bode huwanyanege ngalengawou yaasu dede waha.   
\p
\v 13 Ji ha laluwa la fai ete bolou benou yaurainga isene, “Ne beele benedu yeregau, ‘Elebe bagu huunta saini oruwa langa nere fai-aita Anyakaro bode huwanyanege ngalenga ganga umede waha nere edo edega wode.’ ” Ariya Hauri Guuni no fere lewai, “Nere edo edega dewode, taate bona, nere haruwe danga taane waha awane, onou bona nere edo houwe tafode. Onodu nere ewe goyegu uwa. Nere fanyimu hilobainga ono wane waha bagu arotenga goyane.”   
\s1 Oula langa da muumu wane waha faasiwei nomo saini heigaha.  
\p
\v 14 Ji ege feeledu boni, agau kaamba ete urene, ariya fai ete oulaha fai ere dorofe agau waha jaula langa yafa gainga urene. No mora langa gol teteri bagu, onodu no kesebu tigini ma bagu ete owo la yaasuwai.  
\v 15 Ono gainga ensel ete no Itou nomo mataha malala mai heigai. No fai agau la yafai waha inyangaro benou yaure tuwai, “Ne name kesebu tedu da faasiwau. Oula langa da oruwanga amina muumu boro waha, onou waha bona elebe da waha faasiwei nomo saini.”  
\v 16 Ono wainga, fai no agau langa yafai waha nomo kesebu yaasudu oula langa ogudu bona, da oula la muumu wane waha faasiwai.   
\p
\v 17 Ono gainga ensel ete Itou nomo mata ha laluwa la inyina waha awadu malala heigai. No fere kesebu tigini ma bagu yaasuwai.  
\v 18 Ono gainga ensel ete fere no alta awadu mai heigai. Ensel no waha eeya oofawei nomo danga bagu. No inyangaro yauredu, ensel kesebu tigini ma bagu yaasuwai waha letuwai, “Oula nomo wain fatu muumu boro wane, onou waha bona ne name kesebu tigini ma bagu waha tedu, wain nauge fatu oula langa waha kakarudu haumu etenga la komomuwau.”  
\v 19 Ono wainga ensel waha no nomo kesebu tedu bona oula langa ooguwai, onodu bona no oula langa wain hilou waha kakarudu, komomuwai. Onodu bona no wain hilou waha elegedu bona, megebu tang anyakaro wain bujajimugou waha huwanya la jiriwai. Wa Itou nomo houmu mayou waha abitimuwai.  
\v 20 Onodu bode nere megebu tang taon anyakaro malala la inyina waha langa wain fatu bujajimu wane, ono wanenga, ganenege wain bujajimugou megebu tang waha langa suudu mai heigedu bona, mini oula oruwa kutauwai waha 300 kilo mita. Ariya ganenege no suudu bona ogou digedu ouwe mayai, onodu no aini matau nere hoosi huranege langa inyina waha bagu edowai.   
\c 15  
\s1 Ensel 7 nere dada gai inyabanga inyaba 7 yaasu wane.  
\p
\v 1 Ji naani ete hogo fere ete taene ouwe langa heigainga uredu boni horoto wene. Ensel 7 wala yafa gane nerigene, nere dada gai inyabanga inyaba 7 waha, nere fai-aita bagu inyabamu nigei nomo yaasu wane. Ariya saini dada inyaba waha usu boro wonga, ege dada ete te ada heigonbona. Dada inyaba 7 waha langa, Itou nomo houmu mayou usu dewonbona.   
\p
\v 2 Onodu ji dada ete hiiri anyakaro dorofe dodo eeya bagu langa atane waha urene. Nere fai-aita bagu oota feiyadu, kaafa kui nogo nomo kadana ago anu bagu waha, nomo namba unyi isisiwou bagu ilei nigane, nere Itou gita dada nigai waha yaasudu, hiiri dodo dorofe waha mou langa oto wane.  
\v 3 Nere Moses nomo moone taane, no Itou nomo haruwe fai, onodu Sipsip Magana nomo moone taane. Moone waha no benou,  
\q1 “Anyakaro, ne Itou Danga Oruwa Bagu,  
\q2 ne haruwe danga  
\q1 bagu hogo fere-fere ono-ononi,  
\q2 saini ere waha uredu boya ere horoto horotoya.  
\q1 Ne fai-aita bagu oruwa nebere king,  
\q2 onodu ne name  
\q1 fanyite oruwa galenga tigini.   
\q1
\v 4  Anyakaro, ne nagenga ne guuni yafani.  
\q1 Onou waha bona fai-aita oruwa  
\q2 ne umuge hini bode  
\q2 unyite isou wodbode.  
\q1 Nere fai-aita oruwa maidu bode  
\q2 ne unyite isou wodbode.  
\q1 Taate bona ne name onowou tigini waha amina  
\q2 malala heigaiha.”   
\p
\v 5 Iinga waha usu gainga, ji ege igeidu boni Itou nomo mata sel bori mata ha laluwa langa helufawai inyi gainga urene. Itou nomo sel bori mata waha, nomo ngalenga beele waha heigemuwai.  
\v 6 Ono gainga ensel 7 waha nere fai-aita bagu inyabamu nigei nomo dada gai inyaba 7 waha yaasudu, Itou nomo mata awadu bode heigedu malala langa mayane. Nere oogola hilobainga jijiga uwau gai laladewou waha tagu wane. Onodu bode nere buranege langa gol leeti kolilidu taagu wane.  
\v 7 Onodu dada agenege auma aise waha nebereha ete no gol haaya 7 waha elegedu bona, ensel 7 waha nigai. Wa Itou nomo houmu mayou haaya 7 waha langa gai-gai bolodu inyi-inyina.  
\v 8 Onodu lala nomo buutu bagu, Itou nomo danga bagu, nomo mata langa bolowou inyina. Onou waha bona, fai ete te nomo mata huwanya la goyei nomo edo uwa. Nere ensel 7 waha itari nigi gogunga, nere dada inyaba 7 waha langa haruwe usumu wogunga.   
\c 16  
\s1 Nere haaya 7 Itou nomo houmu mayou bagu feumu wane.  
\p
\v 1 Ji fai ete bolou Itou nomo mata huwanya langa heigainga isene. No ensel 7 waha, danga bagu benou yaure nigidu bona lenigai, “Tere Itou nomo houmu mayou haaya 7 waha elegedu, oula la feu wadenga minona.”   
\p
\v 2 Ono wainga, ensel amugou no nomo haaya waha togoidu bona oula ouwe langa feuwai. Ono wainga nere fai kaafa kui nomo naani bagu, nomo ago anu bagu unyi isou-isoude waha, genege gala langa ju inyaba danga bagu hogo fere-fere heige nigai.   
\p
\v 3 Ono wainga, ensel nga waha no nomo haaya tedu hiiri ouwe langa feuwai. Ono wainga hiiri no fai umou ganenege dorofe heigai. Ono wainga nere dada agenege auma hiiri langa golode waha oruwanga umeru wane.   
\p
\v 4 Ono wainga ensel eei no nomo haaya tedu bona yaage anyakaro langa bagu, yaage u-u langa bagu feuwai, ono wainga yaage waha oruwanga ganenege ubuluwai.  
\v 5 Ono wainga, ji yaage waha oofa nigigou ensel benou lewainga isene, “Itou, ne elebe yafani, gai amina ne yafene. Ne name fanyite oruwa hilobainga tigini, onodu ne gai tigini guuni. Ne fai waha nebere onowou amina haawe nageneha, onodu saini ne dada inyaba nere langa heigona leni waha, name beele wa oruwa ngalenga tigini.  
\v 6 Nere fai waha ne name fai-aita bagu, profet bagu dunege kote wanenga, nebere ganenege feuwai. Waha bona ne fai inyaba ganenege waha nigahenga nyode. Ariya nere ganenege waha nyode wa, nere onowou inyaba ono wane waha nomo agou tigini.”  
\v 7 Ono wainga, ji alta no benou yaurainga isene, “Anyakaro, ne Itou Danga Oruwa Bagu. Ne fai-aita bagu nebere onowou kot langa haawe nagi-nagini, ngalenga tigini, ne name kot wa oruwa ngalenga, onodu gai tigini.”   
\p
\v 8 Ono wainga ensel aise waha no nomo haaya hoonga la feuwai, ono wainga Itou no hoonga danga tuwainga eeya dorofe fai-aita bagu uweru nigai.  
\v 9 Hoonga waha nomo ngasu anyakaro fai nere waha danga bagu uweru nigai. Ono wainga nere Itou unyi beele inyaba le tuwane, Itou no dada inyaba nere langa heigai waha oofawei nomo danga bagu. Onou wa, nere huwanyanege ubuludu bode no unyi isou wegu uwa.  
\v 10 Ono wainga ensel anyimu kouwou waha no nomo haaya kaafa kui nomo sia king langa feuwai. Ono wainga agugu anyakaro fai-aita kaafa kui nomo danga huuna la yafane waha kutau nigai. Ono wainga nere jimiri anyakaro tebode, hoole bode munyanege karu wane.  
\v 11 Nere jimiri bagu genege gala langa ju heigane waha bode ninage isi bode, ha laluwa nomo Itou beele inyaba letuwane. Nere huwanyanege ubuludu bode fanyimu inyaba ono-onode waha moge tuwegu uwa.   
\p
\v 12 Ono wainga ensel 6 waha no nomo haaya Yufretis yaage anyakaro langa feuwai. Ono wainga yaage waha, king hoonga mayouha mayei nomo bona jala haiya nagi bona kanyiwai.  
\v 13 Ariya ji nere hauri inyaba eei nononga borou dorofe, nere maangi anyakaro waha bagu kaafa kui waha bagu, nere yaawa profet bagu hawenege langa heiganenga nerigene.  
\v 14 Nere hauri gai inyaba waha, dodokawou hogo fere-fere tafa-tafade, nere oula nomo kantri oruwa nebere king bagu goi-goide. Nere king ono nigogunga nebere oota fai hanigedu tamai komomu nigogunga, Itou Danga Anyakaro Bagu nomo fati anyakaro waha langa, fai‑aita bagu kot langa haawe nigi gonga, nere oota edo jaimu wodbode.   
\p
\v 15 “Isagu. Ji fasayadu, yebu fai maina dorofe tere bagu mayonboni. Onou waha bona, fai no agore inyei uwa, onodu no nomo kolos dada hinomu langa tafa ganga otode waha, no edo edega wona, taate bona, no bilani golo gonga, nere fai-aita bagu nomo gogala mayau ada ure fuwode.”   
\p
\v 16 Ono wainga nere hauri inyaba waha king oruwa hanigedu tamai, haumu nere Hibru beele langa lede, Armagedon walanga komomu nigane.   
\p
\v 17 Ono wainga ensel 7 no nomo haaya tedu bona taene langa feuwai. Ono wainga, Itou nomo mata huwanya langa, Itou nomo sia king langa fai ete bolou heigai, no inyangaro benou yaurai, “Elebe usu waha.”  
\v 18 Ono gainga biyai fililai bona lala fere‑fere hara ganenga bolou anyakaro heige gainga, amili aya bona mimi anyakaro mai. Mimi waha no gai anyakaro, saini oruwa nere fai-aita bagu oula langa yafa gane mayai la, mimi anyakaro onouha ete amina heigei uwa.  
\v 19 Ariya Babilon taon anyakaro no foure eei wainga, nere fai-aita bagu oruwa nebere taon inyaba dewane. Itou no Babilon Taon anyakaro nomo onowou bona ninau isidu, Babilon ono tuwainga nomo wain kap langa nyai, wain waha no Itou nomo houmu mayou anyakaro tigini.  
\v 20 Ono wainga nere nuuya oruwanga heige hara boro wanenga, ege muju ete te walanga otowei uwa.  
\v 21 Ono gainga aisi yaage anyakaro mai. Ha oruwa la aisi etenga-etenga mai waha nomo ou 50 kilogram onou. Ais yaage waha taene langa medu, fai jaulanege langa orososodu inyabamude nigai. Nere Itou ais waha huuru wainga medu inyabamu nigai waha bode beele inyaba letuwane.   
\c 17  
\s1 Longi aita anyakaro no agou inyaba tai.  
\p
\v 1 Nere ensel 7 waha nebereha ete, no haaya 7 yaasudu maidu bona benou lehiyai, “Ne mayau. Longi aita yaage aroro ouwe langa yafana woha no nomo agou inyaba tonbona. Ji no taate agou tonbona waha abitimu hinonboni.  
\v 2 Nere oulaha king aita waha ngate longi fanyimu baingaro tafane. Onodu nere oulaha fai fere nere oruwanga aita waha ngate longi tafane, onodu nere fai yaage nyidu sipakde dorofe dabu tayane.”   
\p
\v 3 Ono ganenga Hauri Guuni no danga bagu ji langa heigedu bona, aule hidu togoi ha fai uwau langa tafa hiyai. Haumu waha langa ji aita ete no kaafa kui giriwou yaula owe langa yafa gainga urene. Kaafa kui waha gogala langa, unyi baingaro bolowou inyina, unyi waha oruwa Itou memesi tuwou beele hogo fere-fere bagu beele inyaba bagu inyina. Kaafa kui waha no nomo mora 7, onodu nomo mora langa haraku 10 heigane.  
\v 4 Aita waha no kolos giriwou nomo yere nga, onodu no gol mujari hogo fere-fere bagu, megebu hilobainga bagu, onodu kililoi moni anyakaro nomo bagu, waha langa mujarimuwou waha tanai. No gol kap owo langa yaasuwai. Onodu dada Itou ago langa onowou hogo fere-fere isi dewou, aita waha nomo longi fanyimu nomo jijiga hogo fere-fere waha bagu, kap waha langa bolowou.  
\v 5 Onodu aita waha hogo bala langa nere nomo unyi yeregane. Waha no muuji beele ete dorofe, onodu unyi tigini benou, “Babilon toan anyakaro no longi aita oruwanga onowou inyaba oruwa oula langa inyina waha nebere anyanege tigini.”  
\v 6 Aita waha no Itou nomo fai-aita bagu, nere Yesus bode huwanyanege ngalenga wainga nomo unyi malalamudu lewane waha, dunege kote wainga umeru wane. Onodu ji aita waha no nebere ganenege nyidu bona, fai yaage nyidu sipak na dorofe dabu tayainga urene. Ji waha uredu boni, horotodu ninafe baingaro isene.   
\p
\v 7 Ono wainga ensel no benou isoki hiyai, “Ne taate boni horotoni? Kaafa kui waha no aita aule tudu goi-goina waha nomo mora 7, onodu nomo haraku 10 waha ngare nere dada ewe agotete dorofe. Agotete waha nomo hugu huwari inyina waha ji ne abitimu hinonboni.  
\v 8 Ne kaafa kui waha ureneha, amina no yafai, ariya elebe no ege yafei uwa. Onou wa, no oula u-u hugu uwau waha awadu heigedu maidu bona, no gai bona yae wonbona. Saini Itou no oula tafainga heigei uwa langa, nere fai‑aita oulaha nebere unyinege agenege auma nomo buk la inyei uwa waha, nere kaafa kui waha uredu bode horoto wodbode. Taate bona, amina no yafai, ariya elebe no yafei uwa, iinga no heigonbona.   
\p
\v 9 “Fai no isou hilou bagu waha, no dada waha bona edola isi dewonbona. Ariya mora 7 wa, muju 7 waha isisiwou, muju 7 waha jaula langa aita waha yafai.  
\v 10 Onodu fere, mora 7 waha no king 7 isisiwai, ayimu kouwou nere inyaba wane, etenga waha elebe yafana, ariya ete no king heigei uwa inyina. Saini no heigona la, no saini tutu menenga onounga yafonbona.  
\v 11 Ariya kaafa kui amina yafai waha, elebe no yafei uwa, no waha king 8 dorofe. Ariya no king 7 waha nebereha ete, no gai bona yae wonbona.   
\p
\v 12 “Ariya ne haraku 10 kaafa kui waha moranege langa heiganenga urene wa, nere king 10 waha isisi nigou. Nere king heigegu uwa inyina. Ariya nere kaafa kui waha bagu gaara danga tedu bode, nere awa etenga onou king yafodbode.  
\v 13 Nere king waha, nere nebere isou etenga, onodu nere nage nebere unyinege anyakaro bagu, nebere danga oruwanga bagu kaafa kui waha tuwodbode.  
\v 14 Onodu nere Sipsip Magana bagu wara wode wa, Sipsip Magana no feiyade nigonbona. No fai aroro oruwa nebere fai anyakaro, onodu king oruwa nebere king. Nere fai oruwa no ngate yafade waha, no nogo we nere yaure nigai, onodu no nogo nomo bonadu hangada nigai. Nere nomo ngalenga beele oojo‑oojode, nere fai waha, Sipsip Magana ngate oota waha feiya wodbode.”   
\p
\v 15 Onodu ensel no ege onou lehiyai, “Ne longi aita yaage aroro waha jaulanege langa yafa gainga urene wa, no fai oruwa nebere fai-aita bagu, nere fai genege gala hogo fere-fereha bagu, nere fai matane beele fere-fereha bagu, nere fai komowou aroro langa komodu yafade bagu, waha nebere isisi nigou yafai.  
\v 16 Ariya ne haaraku 10 nerigene wa, nere haraku waha kaafa kui ngate nere longi aita waha nomo honggoro tuwou yafodbode. Nere no gai inyabamu tubode, nomo kolos dada oruwa uludu ayaru fuwodbode. Onodu nomo gogala mujamu nyi bode, eeya langa bitogunga usigonbona.  
\v 17 Itou no nogo we king isou waha nigonga, nere dada waha edo ono wogunga heigonbona, wa nere dada Itou no amina lewai waha heigonbona. Nere isou etenga wahanga inyonbona, onodu nere danga king yafei nomo taane waha oruwa kaafa kui waha tuwodbode. Nere onou ono gogunga goi saini Itou no dada lewai waha oruwanga edomu wonbona.  
\v 18 Ariya aita ne urene waha no taon anyakaro waha isisi tuwou, no oula nomo king oruwanga oofa nigi-nigina.”   
\c 18  
\s1 Babilon inyaba waiha.  
\p
\v 1 Iinga gainga, ji ensel ete ha laluwa awadu mainga urene. No danga anyakaro bagu, no nomo mujari waha lala wainga oula oruwa jamari dewai.  
\v 2 No inyangaro yauredu benou lewai, “Babilon toan anyakaro inyaba boro waha! No inyaba boro waha! Elebe hauri inyaba nebere yafou haumu heigaha. Nere hauri inyaba bagu, neei jijiga bagu, nere neei gai inyaba waha fere walanga yafade.  
\v 3 Taate bona, nere fai-aita oruwanga no ngate longi tafane waha, nere nomo wain yaage danga bagu nyane dorofe. Nere oula nomo king fere no ngate longi tafane. Onodu fai oulaha nere moni kusewei nomo haruwe te‑tede waha, nere onowou hogo fere-fere no onowei nomo mayau ada tu‑tuna waha ono bode, moni baingaro kuse wane.”   
\p
\v 4 Onodu ji fai ete bolou ha laluwa langa benou heigainga isene, “Tere yame fai-aita bagu, tere haumu beha awadu malala heigagu. Gamaji tere no une tafa-tafana waha fada tuwaguga. Onodu gamaji saini no une waha nomo agou inyaba tona langa, tere fere fada tuwagu ganga.  
\v 5 No nomo une komo wainga mani ha laluwa togowai. Onou bona, Itou no nomo onowou inyaba onowai waha bona oruwa isi dena.  
\v 6 Tere longi aita fanyimu onowai waha bonade ninatege isagu, onodu tere nomo onowou agou onounga tuwagu. No nomo onowou inyaba waha no jaula faama tafainga baingarowai. Onou dorofenga tere fere no onowou inyaba oruwa onowai onounga nomo agou inyaba jaula faama tafa fuwagu. No yaage danga bagu kap langa ubulumuwai. Ariya tere yaage danga bagu nomo danga jaula faama ubulumudu tuwadenga nyona.  
\v 7 No nogo unyi isou bona longi fanyimu hogo fere-fere ono bona, onowou inyaba ila onowai. Onou bona tere no jimiri baingaro nomo agou inyaba waha nomo haawe langa tuwagu. Onodu tere no ono tuwadenga inyangaro merona. No nogo bona no benou le‑lena, ‘Ji kuin, onodu ji sia kuin langa yafani. Ji aita oyo dorofe ewe yafei uwa. Ou ji langa ada heigonga meroni. Gai uwanga uwa.’  
\v 8 Onou bona, dada gai inyaba hogo fere-fere no langa fati etenga la heigonbona. Taura baingaro heige gonga, fai baingaro merodbode, ono gonga maau saini anyakaro heigonbona. Ono gonga eeya Babilon uwe boro wonbona. Itou Anyakaro no danga anyakaro bagu, no Babilon nomo onowou amina haawedu, no inyaba wona bona lewai.   
\p
\v 9 “Nere oulaha king nere, no ngate longi tafa bode, nere fanyimu inyaba hogo fere-fere baingaro no ngate ono wane. Onou bona, saini king nere eeya waha no uwe tubona buutu jai gonga, ure bode nere agenege gami bagu mere bode huwanyanege ou gonga yafodbode.  
\v 10 Nere no jimiri inyaba waha tegonga ure bode umuge dewodbode. Nere no bae tudu oto bode lewodbode, ne agene gami, Babilon ne tigini agene gami bagu, ne anyakaro onodu taon danga bagu! Awa etenga la ne name une nomo agou inyaba ne langa amina heigaha!   
\p
\v 11 “Nere ha-ha oruwa nebere moni kusegou fai nere Babilon bode ninanege isi bode, nere no bode augami bagu mere bode, huwanyanege ou gonga yafodbode. Taate bona, fai ete te ege nebere udu ejiyawei nomo uwau.  
\v 12 Ariya nere nebere udu wa, gol bagu, silwa bagu, megebu hilobainga bagu, kililoi moni anyakaro nomo bagu, ogola kaamba hilobainga bagu, ogola yere giriwou hogo fere-fere bagu, ogola lalasa bagu. Onodu fere nere nauge hogo fere-fere oruwanga agiya hilobainga bagu, dada hogo fere-fere nere elefan ma langa atane bagu, dada hogo fere-fere nauge moni anyakaro nomo langa atane bagu, bras langa bagu, aen langa bagu, megebu yere hilobainga langa atane bagu.  
\v 13 Onodu nere nebere udu ila fere otode, wa sinamon bagu, edema nyei nomo bagu, paura nomo buutu asirau hilobainga heigei nomo bagu, gris hogo fere-fere nomo asirau hilobainga bagu, sanda hilobainga bagu, wain bagu, oliv nauge nomo faronga bagu, flaua bagu, wit bagu. Onodu nere bulumakau bagu, sipsip bagu, hosi nebere karis bagu, nere haruwe magana ewe bagu, wa nere fai agenege auma waha. Dada waha oruwanga fai ete ege ejiyawei nomo uwau.  
\v 14 Nere fai moni kusewou haruwe te‑tede waha nere benou lewodbode, ‘Da ne elegei nomo boni huwanyate jayai waha, oruwanga ne bae hinou otode. Nere dada hilou-hilou oruwa moni anyakaro nomo bagu, ne name mujari hilou-hilou waha oruwa yae wane, onou bona, ne ege adanga ada urau.’   
\p
\v 15 “Onodu fai nere dada waha langa moni kusewou haruwe te bode, moni baingaro taon waha langa elegane waha, nere taon waha jimiri inyaba tai waha uredu umuge dewodbode. Onodu nere no bae tudu oto bode, huwanyanege ou gonga augami bagu merodbode.  
\v 16 Onodu nere benou lewodbode, ‘Augami, taon anyakaro wa augami bagu! Amina no kolos kaamba hilobainga bagu, kolos yere giriwou hogo fere-fere bagu mujarigai, ono bona no gol bagu megebu hilobainga kililoi moni anyakaro nomo waha bagu gogala mujarimugai.  
\v 17 Awa etenga langa, moni bagu mujari bagu dada waha oruwa inyaba boro wane.’  
\p “Onodu sip nebere kepten oruwanga, fai sip langa golodu kantri fere-fere langa goi-goide waha oruwanga, boskru oruwanga, fai hiiri langa moni kusewei nomo haruwe te‑tede waha oruwanga nere Babilon bae tudu oto wodbode.  
\v 18 Onodu saini nere eeya no biti tugonga, nomo buutu jai gonga uredu bode benou yauredu lewodbode, ‘Taate taon no taon anyakaro waha dorofe inyina?’  
\v 19 Onodu nere amuji elegedu bode, nere nage moranege langa ayaru bode, augami bagu mere bode huwanyanege ou gonga yafodbode. Onodu nere benou yaurodbode, ‘Augami, taon anyakaro wa augami bagu! Nere sip oruwanga nebere amenege gane hiiri langa golode waha, nere taon waha nomo moni anyakaro waha langa moni fai heigane. Augami bagu! Awa etenga la no gai inyaba dewaha!’   
\p
\v 20 “Ha laluwa ne Itou nomo fai-aita bagu, tere aposel bagu profet bagu oruwanga dada elebe taon waha langa heigaha waha bonade edo edega wagu. Itou no amina nomo onowou haawe fudu bona, no nomo onowou agou inyaba ege gidu tuwaha. Onowou waha langa, no taon waha nomo agou inyaba tere ono tigai waha ege gidu tuwaha.”   
\p
\v 21 Ariya beele waha usu wainga, ensel danga bagu ete no, megebu anyakaro wit bujajimu gou megebu dorofe ete tai. No megebu waha isoudu kaitainga hiiri langa minai. Onodu no benou lewai, “Fanyimu behanga langa nere Babilon taon anyakaro waha tedu danga bagu aya tuwogunga minonga, fai nere no ege ada urode.”  
\v 22 Onou bona, Babilon, gita bolonege bagu, korofina bolonege bagu bigul bagu, musik bolonege fere‑fere bagu waha ege name orei huwanya langa ada heigonbona. Onodu fai nere haruwe hogo fere-fere oruwa onowei nomo bode isisiwou taane waha, nere ege ne langa ada yafodbode. Megebu wit bujajimu gou bolou waha, ne langa ege ada heigonbona.  
\v 23 Lama nomo lalawou, ege ne langa ada lala wonbona. Fai-aita bagu te guruwei nomo beele waha fere, ne langa ege ada heigon bona. Amina ne name moni kusewou fai nere fai-aita ila agenege langa unyinege bagu yafane. Onodu ne henowa dada hogo fere-fere kantri oruwa langa, fai-aita bagu yaawa nigei nomo ono wene.   
\p
\v 24 Itou no taon beha no profet bagu nomo fai-aita bagu dunege kotewai waha nomo nyabulwou urai. Onodu oula nomo fai oruwanga, nere honggoro fai dunege kote wanenga umeru wane waha, nomo nyabuluwou waha fere Babilon nonga langa inyina.   
\c 19  
\s1 Nere fai-aita Babilon inyabawai waha bode edega wane.  
\p
\v 1 Iinga gainga ji dada ete fai-aita baingaro ha laluwa la yafabode inyangaro yaurede dorofe bolonege isene. Nere benou lewane, “Ere Itou unyi isou ya! Ebere Itou no nogonga ere ege gidu haigai. No unyi anyakaro onodu danga bagu.  
\v 2 Itou no fai-aita bagu nebere onowou kot langa haawe nagi-nagina, onodu nomo kot wa oruwa ngalenga tigini. Longi aita anyakaro waha no fai-aita oulaha oruwa nomo longi fanyimu la inyabamu nigai. Onou bona Itou no nomo agou inyaba ege gidu tuwai. Aita waha no Itou nomo haruwe fai dunege kotewai waha nomo une bagu. Onou bona Itou no nomo agou inyaba ege gidu amina tuwai.”   
\p
\v 3 Onodu bode nere ege benou yaurane, “Ere Itou unyi isou ya! Eeya taon anyakaro bitaha waha nomo buutu no gai‑gai ouwe mani-manina!”  
\v 4 Nere mora bagu 24 waha dada aise agenege auma yafade waha bagu, afenege tuburu kutudu bode Itou nomo sia king langa yafana waha unyi isou wane. Nere benou lewane, “Nalenga tigini. Ere Itou unyi isouya!”  
\v 5 Ono ganenga, Itou nomo sia king langa fai ete bolou benou heigai, “Tere Itou nomo haruwe fai, tere Itou boya umuge boya nomo huuna langa yafa-yafaya, tere fai ewe bagu tere fai unyitege bagu tere oruwanga Itou unyi isou wagu!”   
\s1 Sipsip Magana aita teganga, ajou anyakaro heigena.  
\p
\v 6 Ariya ji dada ete fai-aita bagu baingaro komodu yafa bode beele lede dorofe isene. Wa no yaage anyakaro guriye bona bolouna dorofe. No bolou amili danga bagu aya bona gudu-duna dorofe. Nere benou yaurane, “Ere Itou unyi isou ya! Anyakaro, No Itou Danga Oruwa Bagu, elebe no king tigini yafana!  
\v 7 Onou bona, elebe ere huwanyage hilobainga inyi gonga inyangaro edega boya, nomo unyi isou woboya, taate bona, Sipsip Magana no nomo aita tei nomo saini amina heigaha, onou waha bona nomo aita haiya waha yafana.  
\v 8 Itou no kolos kaamba hilobainga aita waha tuwaha, klos waha no foodu lala dewou.” Ariya kolos kaamba hilobainga waha no Itou nomo fai-aita bagu onowou hilobainga onode waha isisiwou.   
\p
\v 9 Ono wainga ensel no ji benou lehiyai, “Ne beele benou yeregau, ‘Nere fai waha Itou yaure niganga Sipsip Magana nomo aita ngare te guruwei nomo ajou anyakaro langa mayane waha, nere edo edega wode.’ ” Onodu no ege onou lehiyai, “Beele beha no Itou nomo ngalenga beele.”  
\v 10 Ono wainga ji ensel nomo afo hugu langa afefe tuburu kutudu boni, no unyi isou woni ono wene. Ono wenenga no lehiyai, “Ne onou adai onowau! Ji fere ne name baine gane bagu ere haruwe etenga, wa tere Yesus no beele malalamudu leganga huwanyatege ngalengana waha. Ne Itou nogonga unyi isouwau. Ere isiya, beele Yesus no malalamudu lena wahanga, fai jaimu nigi ganga nere profet beele malalamudu le‑lede.”   
\s1 Jon no Fai hoosi kaamba jaula la yafa gainga urai.  
\p
\v 11 Ji ha laluwa helufa wainga hoosi kaamba ete oto gainga urene. Ariya fai hoosi jaula la yafai waha nomo unyi benou, “Fai no nomo haruwe oofa dena,” onodu “Fai no onowou tigini wahanga ono-onona.” Saini no fai-aita bagu nebere onowou kot langa haawe nigidu bona, no oota jaimuna wa, no onowou tigini wahanga oojo bona ono-onona.  
\v 12 No nomo ago magana wa eeya la‑lana dorofe, onodu no nomo mora langa king nomo teteri baingaro inyide. Ariya no nomo gogala langa unyi ete yeregane, no nogonga unyi waha isina. Ariya nere fai ila waha ada iside.  
\v 13 Fai waha no kolos ufaro ganenege kutauwou tanai. Onodu bode nere nomo unyi benou warane, “Itou nomo Hilou Beele.”  
\v 14 Nere ha laluwa nomo oota fai nere, kolos kaamba hilobainga jijiga uwaunga uwau waha elege jiridu bode nebere hoosi kaamba langa digedu no oojo tudu goyane.  
\v 15 Oota kesebu ete gai ma bagu, no nebere amugou fai waha nomo hao langa mai heigai. Oota kesebu waha langa, no ha-ha oruwa nebere fai‑aita bagu inyabamu nigonbona. No aini dumuga yaasudu bona, fai-aita oruwa danga bagu oofa nigonbona. Onodu no tang megebu anyakaro langa wain fatu bujajimu wonbona, wa Itou Danga Oruwa Bagu nomo houmu mayou anyakaro waha isisiwou.  
\v 16 No nomo kolos ufaro waha afo langa nere unyi beha yeregane, “King oruwa nebere king, fai aroro oruwa nebere Anyakaro.”   
\p
\v 17 Ariya ji ensel ete hoonga ago la oto gainga urene. No neei oruwanga taene gama langa firiya wane gologane inyangaro benou yaure nigai, “Tere mai komodu Itou nomo da anyakaro beha itari wagu.  
\v 18 Tere king nebere genege gala bagu, oota fai nebere kepten genege gala bagu, nere fai danga bagu waha nebere genege gala bagu, nere hoosi nebere genege gala bagu nere fai hoosi langa yafade waha nebere genege gala nyagu ganga. Nere fai nebere gauwou langa yafade waha bagu, nere haruwe magana ewe bagu, nere fai unyinege uwau waha bagu, nere fai unyinege bagu, waha oruwanga nebere genege gala nomo mujanege nyagu ganga.”   
\p
\v 19 Onodu ji kaafa kui bagu, nere oula nomo king nebere oota fai bagu, fai no hoosi langa yafai waha, no nomo oota fai bagu warawei nomo mai komo wanenga nerigene.  
\v 20 Onou wa, no kaafa kui waha yaawa profet ngare dagou mata la jiri nirai. Yaawa profet no waha dodokawou baingaro kaafa kui waha ago langa tafai, onodu onowou waha langa, no fai yaawa nigainga nere kaafa kui nomo naani waha tedu, nomo anu isisiwou waha unyi isou wane. Nere Kaafa kui waha yaawa profet ngare agenere auma elege niridu bode, ayaru niranenga u-u koririwou anyakaro megebu salfa bolowou eeya bona inyina langa minare.  
\v 21 Onodu fai no hoosi langa yafai waha hao la oota kesebu inyina waha langa, nebere oota fai dunege kote wainga umeru wane. Ono wainga, neei oruwa oota fai umeru wane waha nebere genege gala nyanenga ogonege digai.   
\c 20  
\s1 Satan no dagou mata langa yafa gonga goi haga orei 1,000 edo wonbona.  
\p
\v 1 Ariya ji ensel ete ha laluwa awadu bona mainga urene. No ki u-u hugu uwau nomo waha owo langa yaasuwai. Onodu no sen anyakaro ete fere yaasuwai.  
\v 2 No maangi anyakaro waha taidu bona yaasuwai, maangi waha no aminaha tigini, no Satan. “Fai No waha Fai Oruwanga Kot langa Tafa Nigi-nigina.” Onou bona ensel no sen langa dage tuwai, no onou oto gonga goi haga orei 1,000 edo wonbona.  
\v 3 Onodu ensel no maangi waha aya tuwainga u-u hugu uwau waha langa minainga, no u-u waha nomo haola sesemudu bona jauli arasai danga bagu katamuwai. Onou bona, Satan no ha‑ha oruwa nebere fai-aita bagu ege yaawa nigei nomo edo uwa. No onou itari gonga goi haga orei 1,000 usu wonga, iinga nere awa tuwodbode, ono wogunga saini tu‑tu menakele la no edo kejiwe golo wonbona.   
\p
\v 4 Onodu ji sia ila, sia king dorofe oto gane nerigene, ono gainga fai nere sia waha langa yafane. Itou no nere waha fai-aita bagu nebere onowou kot langa haawe nagei nomo bona haruwe nigai. Onodu ji fai‑aita bagu nere Yesus bode huwanyanege ngalenga wainga, nere no unyi malalamu bode, Itou nomo beele danga bagu yaasu wane waha, nere honggoro fai benege karudu bode dunege kote wanenga umeru wane waha, nebere anunege baingaro nerigene. Ji fai-aita nere kaafa kui bagu, nomo anu isisiwou bagu, unyi isou wegu uwa waha nere nomo naani hogonege langa owonege langa bagu elegegu uwa waha fere nebere anunege nerigene. Nere fai‑aita waha agenege auma yafou taane, nere Kristus ngate king yafa gogunga goi haga orei 1,000 edo wonbona.  
\v 5 Nere fai-aita bagu ila amina umeru wane waha, nere saini waha langa agenege auma yafou teeguwa. Nere haga orei 1,000 waha itari gogunga goi usu wonga. Beha no saini amugou nere fai-aita matmat langa ege gidu jayodbode.  
\v 6 Ariya nere fai-aita bagu saini amugou waha langa ege gidu jayode waha, Itou no nogo nomo bona hangada nigai bona nere edo edega wode. Umou nga waha no nere waha ilei nigei nomo danga uwau. Nere Itou Kristus ngare neire pris yafodbode. Ono bode nere haga orei 1,000 waha langa nere Kristus ngate king yafodbode.   
\s1 Satan no gai inyaba dewai.  
\p
\v 7 Saini haga orei 1,000 waha usu wonga, nere u-u hugu uwau waha nomo jauli arasai helufa wogunga, Satan no dagou mataha usu wonbona.  
\v 8 Onodu bona no fai-aita bagu ha-ha oruwa langa yafade waha yaawa nigei nomo bona heigedu mayonbona, wa nere Gok bagu Magok bagu nebere gane. Satan no oota jaimuwei nomo bona nere komomu nigonbona. No nomo oota fai lelege nigou wa laanga la ulisi inyina dorofe.  
\v 9 Nere ha-ha oruwa laha maidu bode, Itou nomo fai-aita bagu nebere yafou haumu bagu, taon Itou no gaudena waha bagu kolili tuwodbode. Ono wode wa, eeya ha laluwa la medu bona oota fai waha uwerude nigonbona.  
\v 10 Satan no nere yaawa nigai, waha bona Itou no tedu aya tuwonga, u-u anyakaro salfa megebu nomo eeya ngasu bona inyina langa minon bona. Kaafa kui no yaawa profet ngare nere amina u-u waha langa yafadere, onou bona nere eei hoonga bagu ooru bagu gai-gai onou jimiri anyakaro todbode.   
\s1 Kot anyakaro heigaiha.  
\p
\v 11 Ariya ji sia king kaamba anyakaro ete inyi gainga urene, onodu ji fai sia waha langa yafa-yafana waha ureni. Ono gainga oula taene bagu awatudu harawane, nere ege walanga oto wegu uwa.  
\v 12 Ono wainga ji fai-aita bagu umeru wane waha nerigene, wa nere fai-aita unyinege bagu, nere fai-aita ewe bagu, nere sia king hogo langa oto wane. Ono gane ensel nere fai-aita bagu nere fanyimu ono wane waha nebere buk langa beele bagu waha isebu wane. Nere buk ete fere isebu wane, wa agenege auma nomo buk. Ariya fai sia king la yafai waha no beele buk waha langa inyide waha ure bona, fai-aita bagu umeru wane waha nebere onowou haawe nagai.  
\v 13 Hiiri no fai oruwanga umedu no langa inyane waha awa nigainga goyane. Onodu Umou no fai umou nebere Matane ngare, nere fere fai oruwanga umedu nere owonere langa yafane waha awa niganenga goyane. Onodu fai sia king langa yafai waha no fai etenga-etenga oruwa fanyimu nere ono wane waha oruwa nomo kot langa haawe nigai.  
\v 14 Onodu iinga no Umou bagu, fai umou nebere Matane bagu, aya nirainga u-u anyakaro eeya bagu langa minare. U-u anyakaro eeya bagu no umou nga waha.  
\v 15 Nere fai-aita bagu oruwanga, nebere unyinege agenege auma nomo buk langa inyei uwa waha, nere fere ayaru niganenga u-u anyakaro eeya bagu langa minane.   
\c 21  
\s1 Oula taene ngare eege heigare.  
\p
\v 1 Ji elebe taene eege bagu, oula eege bagu inyi gare nerireni. Taena amugou bagu, oula amugou bagu, goi usu dewai. Hiiri ege inyei uwa.  
\v 2 Onodu ji Itou nomo taon waha urene, no Jerusalem eege. Ji no Itou bagu inyi gainga urene, onodu no ha laluwa awadu bona mai. No mujari hilobainga bagu, aita ete no nomo fai tei nomo bona mujari hilobainga langa mujaridu, haiyadu yafana dorofe.  
\v 3 Ono gainga sia king langa ji fai ete bolou no danga bagu benou yaurainga isene, “Isagu. Elebe Itou nomo mata nere fai-aita bagu langa inyina. No nere gamanege langa inyi gonga, nere no nomo fai-aita gane yafodbode. Yo Itou no nogo nere bagu yafonbona, no nebere Itou yafonbona.  
\v 4 No nere oruwanga nebere agiyonege karamu nagonbona. Nere fai-aita bagu ege ada umode, nere ege huwanyanege ou gonga ada merode, nere jimiri ege ada tode. Dada aminaha waha, oruwa usu boro wane.”   
\p
\v 5 Ono wainga, Fai sia king langa yafai waha, no benou lewai, “Isagu. Ji dada oruwanga ononanga eege heigaha.” Onodu bona no ege benou lewai, “Ne beele beha yeregau. Beele beha no ngalenga tigini, nere fai oruwanga no bode edo huwanyanege ngalenga wona.”  
\v 6 Onodu no benou lehiyai, “Dada oruwanga heige borowane. Ji yagenga ji amugou tigini yafani, gai huunta yafani. Ji dada oruwanga nomo hugu, onodu ji haruwe oruwa ononi waha usumu-usumuni. Fai ete no yaage nyomoli tuwei mata wonga, ji no awa tuwehenga, yaage u-u langa agege auma nomo yaage nyonbona. Onodu ji no awa tuwehenga toota dorofe tonbona. No ada ejiya wona.  
\v 7 Onou wa, fai no oota feiya bona wonga, ji dada waha no tuwonboni, onodu ji no nomo Itou yafa gehenga, no ji yame magana yafonbona.   
\p
\v 8 “Ariya fai nere umugedu bode ege gide bagu, nere huwanyanege ngalengawei uwa bagu, nere fai fanyimu inyaba tagini hogo fere‑fere onode bagu, nere fai dunege kote ganenga umerude bagu, nere fai longi tafade bagu, nere fai henowa tafa bode danga fere-fere onode bagu, nere fai yaawa itou unyi isoude bagu, nere fai oruwa beele yaawade bagu nere oruwanga nebere haumu wa, u-u anyakaro eeya ngasu bagu megebu salfa langa lala bona inyina waha langa goyodbode. Wa no umou nga.”   
\s1 Jon no Jerusalem eege urai.  
\p
\v 9 Ariya ensel ete no ji bagu mai. No ensel 7 waha nebereha ete, no haaya 7 dada gai inyaba nere fai-aita inyabamu nigei nomo bagu, Itou nomo houmu mayou usumuwei nomo bagu yaasuwai. Ensel waha no lehiyai, “Ne mayau. Ji Sipsip Magana nomo aita elebe tonbona waha, abitimu hinon boni.”  
\v 10 Ono gainga, Hauri Guuni no ji langa danga bagu heigai, ono wainga ensel no ji aule hidu bona, muju anyakaro ete gai ouwe langa manai. Onodu no Jerusalem abitimu hiyai, wa Itou nomo taon, no Itou bagu inyai waha, ha laluwa awadu bona mai.  
\v 11 Itou nomo lala anyakaro taon waha langa lalana. Nomo lala wa gai hogo ferete, megebu hilobainga ete no moni anyakaro la ejiyawei nomo dorofe. No megebu jaspa dorofe lalawai, onodu no dodo dorofe gai fowou.  
\v 12 Taon waha nomo orei no anyakaro onodu gai ouwe la. Onodu orei waha nomo arasai 12, ensel 12 nere arasai waha hinenege la otode. Nere Israel nebere olobeta mutu 12 unyinege, arasai 12 waha langa yereganeha otode.  
\v 13 Ariya orei ulate hoonga mayou langa nomo arasai eei nononga, matau ulate not langa fere arasai eei nononga. Onodu orei ulate saot langa waha fere nomo arasai eei nononga, onodu ulate hoonga minou langa waha fere nomo arasai eei nononga.  
\v 14 Taon waha nomo orei hugu dangamuwei nomo megebu 12 otode, megebu 12 waha langa Sipsip Magana nomo aposel 12 nebere unyinege inyina.   
\p
\v 15 Ensel ji ngare beele hayere waha no taon waha nomo mita bagu, nomo orei anyakaro kolili tuwou nomo mita bagu, nere orei waha nomo arasai nomo mita bagu isisiwei nomo bona gol dumuga yaasuwai.  
\v 16 Taon anyakaro waha nomo owo tuburu warou aise, nebere isisiwou hogo etenga. Nomo ufaro bagu, nomo anyakaro bagu, neire isisiwou hogo etenga. Ensel no nomo dumuga langa taon nomo isisiwai, nomo anyakaro tigini no 2,200 kilo mita. Taon nomo owo tuburu warou aise bagu, nomo ouwe manou bagu, neire isisiwou gai gara-gara.  
\v 17 No taon waha nomo orei fere isisiwai, orei waha nomo huwanya goyou wa, 144 mita. Mita waha fai nere dada isisi‑isiside, mita waha dorofenga. Ensel no mita onouhanga la orei isisimuwai.   
\p
\v 18 Taon waha nomo orei Itou no megebu jaspa langa atai. Onodu bona no taon waha gol langanga atai, onodu taon waha no dodo dorofe lalawai.  
\v 19 Onodu bona, taon waha nomo orei hugu la, Itou no megebu hogo fere-fere moni anyakaro nomo langa mujarimuwai. Megebu hilobainga orei hugu langa amugou inyina waha jaspa. Ono ganga megebu nga waha no hiiri balina nomo yere dorofe, nomo unyi sapaia. Ono ganga megebu eei waha nomo unyi aget. Ono ganga megebu aise waha giiwa, nomo unyi emeral.  
\v 20 Ariya megebu anyimu kouwou waha no kaamba bagu giriwou bagu, nomo unyi sadonikis. Ariya megebu 6 waha giriwou nomo unyi konilian. Ariya megebu 7 waha no bailu bagu nomo unyi krisolait. Ariya megebu 8 waha no giiwa onodu no hogo fere ete, waha nomo unyi beril. Ariya megebu 9 waha no bailu bagu no hogo fere ete, waha nomo unyi topas. Ariya megebu 10 waha no krisopres. Ariya megebu 11 waha no unyi haiasin. Ariya megebu 12 waha no hogo fere ete, nomo unyi ametis.  
\v 21 Jauli arasai 12 waha no pel 12, wa nere kililoi kaamba onouha moni anyakaro nomo waha. Jauli arasai etenga-etenga la nere pel aroro etenga-etenga langa atane. Nere taon waha nomo jala oruwa nere gol langanga atane, gol waha no dodo dorofe gai foodu kaitou.   
\p
\v 22 Ji taon waha langa tempel ete oto gainga urei uwa. Anyakaro, no Itou Danga Oruwa Bagu, nomo Sipsip Magana ngare, nere nare nomo tempel dorofe yafadere.  
\v 23 Onodu hoonga ole bagu, taon waha lala tuwei nomo uwau. Itou nogo nomo lala anyakaro no, taon lala tutuna. Ono ganga, Sipsip Magana no taon nomo lama dorofe yafa-yafana.  
\v 24 Nere fai oruwa nebereha fai-aita bagu nere taon waha nomo lala langa golo wodbode. Nere oula nomo king kantri oruwa langa nebere dada hilou-hilou elegedu no langa tamayode bode.  
\v 25 Hoonga langa nere taon waha nomo orei nomo jauli arasai ada sesemu wode. Jauli arasai nere gai-gai helufadu inyodbode, taate bona, agugu no taon waha langa ada heigonbona.  
\v 26 Fai-aita bagu nebere mujari moni dada bagu oruwanga elegedu no huwanya langa togoyode bode.  
\v 27 Onou wa nere dada jijiga bagu nere fai onowou inyaba hogo fere-fere ono bode yaawa beele lelede waha, nere taon huwanya la ada goyode. Gai uwanga uwa. Nere fai-aita bagu unyinege agenege auma nomo buk langa inyina waha, wa Sipsip Magana nomo buk, nere nagenga taon waha huwanya la goyei nomo edo.   
\c 22  
\s1 Jon no agenege auma nomo yaage bagu agenege auma nomo nauge bagu urai.  
\p
\v 1 Ariya ensel waha no yaage anyakaro ete abiti hiyai, wa agenege auma nigei nomo yaage, yaage waha no dodo dorofe inyangaro fililaiwai. Yaage waha Itou no nomo Sipsip Magana ngare neire sia king langa heigedu bona,  
\v 2 taon waha nomo jala anyakaro waha tigini gama langa guriyedu minai. Yaage waha mou langa agenege auma nomo nauge nga nononga, nere yaage mou ulate-ulate otodere. Nauge waha no haga orei oruwa langa hilou heige 12-12na. No ole oruwa langa hilou heige-heigena. Onodu nauge gala waha no, nere fai-aita nebere gane bagu oruwa figini nigei nomo bona.  
\v 3 Ariya dada oruwanga Itou no tigini ada gauna waha, no elege ayaru wona onona, dada waha ege ada oto wode.  
\p Itou nomo Sipsip Magana ngare neire sia king taon waha langa inyonbona. Ono gonga Itou nomo haruwe fai nere no unyi isou wodbode,  
\v 4 ono bode no hogo urodbode. Ono gogunga no nomo unyi nere hogonege bala langa yerege nagonbona.  
\v 5 Ariya agugu ege ada heigon bona, lama nomo lala bagu hoonga nomo lala bagu nere ege haruwe uwau. Itou, Anyakaro no fai-aita bagu lala nigonbona. Ono wonga nere gai‑gai king yafodbode.   
\s1 Yesus fasadu mayonbona.  
\p
\v 6 Ensel waha no ji benou lehiyai, “Beele beha no ngalenga tigini, nere fai oruwa edo no bode huwanyanege ngalenga wode. Itou, Anyakaro no profet nomo beele malalamudu lewei nomo bona, nebere hauri jaimu nagi-nagina, no nomo haruwe fai nere dada oruwa fasadu heigei nomo waha abitimu nigei nomo bona, nomo ensel huuru tuwainga mai.  
\v 7 Onodu isagu. Yesus no lewai, ‘Ji tere bagu fasadu mayonboni.’”  
\p Nere fai-aita bagu profet beele buk beha la inyina waha, oojo wode wa, nere edo edega wode.   
\p
\v 8 Ji Jon, ji beele beha isidu, dada waha nerigene. Ji amina isi borodu amina nerigene, ji ensel no dada waha abitimu hiyainga urene waha afo hugu langa afefe tuburu kutudu boni, unyi isou woni ono wene.  
\v 9 Ono wenenga no lehiyai, “Ne onou adai onowau! Ji fere ne name baine gane bagu ere haruwe etenga, wa nere profet. Onodu ji fai oruwanga buk beha nomo beele oojo-oojode waha nebere haruwe etenga. Ne Itou nogonga unyi isouwau.”  
\v 10 Onodu ensel no ege benou lehiyai, “Profet beele buk beha langa inyina waha ne adai yaasudu yafau. Itou no dada waha ono wonbona saini amina mai jugu waha.  
\v 11 Onou bona, nere fai-aita bagu onowou inyaba ono‑onode waha, nere edo onounga onowode. Nere fai-aita bagu onowou jijiga bagu onode waha, nere edo onowou jijiga bagu waha onounga ono wode. Ariya fai-aita bagu nere onowou tigini onode waha, nere edo onowou tigini waha onounga ono wode. Ariya fai‑aita bagu nere Itou nogo nomo bona hangada nigai waha nere guuni yafade wonga, nere edo onowou guuni wahanga ono wode.”  
\v 12 Yesus no benou lewai, “Isagu. Ji fasadu mayonboni. Ji fai oruwa nebere agou waha nigei nomo tamayon boni. Onodu ji nere fai etenga-etenga oruwa nere fanyimu ono wane waha agou onounga ege gidu nigonboni.  
\v 13 Ji yagenga ji gai amugou yafani, onodu ji gai huunta yafani. Ji gai amugou onodu ji gai huunta. Ji dada oruwa nomo hugu, onodu haruwe oruwa ji ononi waha ji usumu-usumuni.   
\p
\v 14 “Nere fai-aita bagu nebere kolos hugeru wane waha nere edo edega wode. Nere agenege auma higigou nauge langa edo da tedu nyodbode. Onodu nere taon waha nomo jauli huwanya goyei nomo edo.  
\v 15 Nere fai onowou inyaba tigini ono-onode waha bagu, nere fai henowa tafa bode danga hogo fere-fere ono-onode waha bagu, nere fai longi tafade waha bagu, nere fai ilibanege gane dunege kote ganenga umerude waha bagu, nere fai yaawa itou unyi isou-isoude waha bagu, fai oruwanga yaawa fanyimu gau nigi ganga oojodu ono-onode waha bagu, nere fai waha oruwanga Itou nomo taon dui langa yafodbode.  
\v 16 Ji Yesus, ji yame ensel tere bagu huuru tuwenenga mai, onodu beele beha tere sios nomo fai-aita bagu malalamudu letigai. Ji yagenga ji Uwei beha King Devit nomo asa gane langa heigene, ji Devit Idau. Onodu ji baatu eringe amina langa lala dena waha.”   
\p
\v 17 Ono wainga Hauri Guuni no Sipsip Magana nomo oya ngare leware, “Ne mayau.” Nere fai oruwa beele beha isane fere lewodbode, “Ne mayau.” Faiwei no yaage nyomoli tuwonga, no mayona. Fai no yaage nyona wonga, no maidu agenege auma nigei nomo yaage waha tona, wa Itou nomo toota dorofe.   
\s1 Jon no nere fai-aita bagu, buk beha nomo beele isane waha beele danga bagu lenigai.  
\p
\v 18 Nere fai oruwanga profet beele buk beha langa inyina waha nere isane, waha ji beele danga bagu lenigini. Onou wa fai ete no beele fere ete, beele beha turi bona wonga, dada gai inyaba Itou no buk beha langa lena waha, dada waha turi wonga fai waha langa heigonbona.  
\v 19 Onou wa, fai ete no profet beele ila buk beha langa inyina waha elege ayaru bona wonga, Itou no fai waha langa dada hilobainga inyina waha elege ayaru wonbona. Ono wonga no agenege auma nigei nomo nauge waha langa da ada tona, onodu no Itou nomo taon waha langa ada yafonbona, buk beha lena onounga.   
\p
\v 20 Ariya fai waha no dada beha oruwa bona beele malalamudu lewai waha, elebe no lena, “Ngalenga tigini, ji fasadu mayonboni.”  
\p Wa Ngalenga. Anyakaro Yesus, ne mayau.   
\p
\v 21 Anyakaro Yesus nomo aau warou no edo fai-aita bagu oruwanga langa inyonbona.