\id COL - Ogea N.T.; Marib Fanua and Don Adep; 13-September-2013 
\h Kolosi 
\toc2 Kolosi 
\toc1 Kolosi 
\mt1 Kolosi  
\c 1  
\p
\v 1 Ji Pol, ji Yesus Kristus nomo aposel. No nogo nomo gauwou langa, Itou no ji aposel dorofe hangada hiyai. Ji baabo Timoti ngare,  
\v 2 ere pas beha, tere Itou nomo fai-aita Kolosi taon langa yafaya waha bagu, tere baabo gane, ogoge gane Yesus Kristus boya huwanyatege ngalengana waha yerege tagiyare. Ere ebere Jijei Itou no edo tere bona aau waronga, tebere huwanyatege ono tagonga foinga inyonbona.   
\s1 Kolosi nere Yesus bode huwanyanege ngalenga dewai.  
\p
\v 3 Saini ere hauya boyare, ere gai-gai tere boya ninare isi boyare Itou hilobainga tutuyare, no ere ebere Anyakaro Yesus Kristus nomo Umamu.  
\v 4-6 Ere tere boya beele benou isere, saini beele ngalenga nomo hilou beele tere langa heigainga isidu boya, tere Itou no dada hilobainga ha laluwa langa hangada tagidu tafai waha boya huwanyatege ngalengawai boya, tere waha tei nomo itariya. Ono boya, tere Yesus Kristus boya huwanyatege ngalengade ganga, tebere huwanyatege nere Itou nomo fai-aita oruwa nigiya. Ha-ha oruwa langa nere hilou beele waha malalamudu legane, nere fai-aita baingaro huwanyanege ngalengadu oojo ganenga, nebere onowou hilobainga heige-heigena. Onodu onowou onouhanga tere gamatege langa heigai, fati amugou langa hugu waridu, tere Itou nomo aau warou nomo hilou beele waha agudu tere isi dewei.  
\v 7 Ariya, Epafras no hilou beele waha nomo beele isisiwou tigainga, tere waha iseye. Epafras no Kristus nomo haruwe fai hilobainga. No ere ebere haruwe etenga, onodu ere no gaude tu‑tuya. No tere hoyo tigidu bona, Kristus nomo haruwe te de‑dena.  
\v 8 No Itou nomo fai-aita gaude nigei nomo fanyimu, Hauri Guuni tere tigai waha lehirai.   
\s1 Pol no Kolosi dangamu nigei nomo bona Itou hauya tuwai.  
\p
\v 9 Onou bona fati amugou langa hugu waridu, ere tebere fanyitege hilobainga waha boyare isere, onodu ere gai-gai hauya boyare, Itou no tere hoyo tigei nomo isoki tu‑tuyare, ono wonga tere edo nomo gauwou waha isi dewagu ganga. Ono wonga Hauri Guuni no edo ninatege isou hilobainga hogo fere-fere baingaro tigonga, waha no edo tere langa bolo dewona.  
\v 10 Ono wonga, tere edo Anyakaro nomo fai-aita tigini waha nebere fanyinege langa golo wadenga, no tebere onowou oruwanga gau tuwonbona. Ono wonga tere haruwe hilobainga hogo fere-fere baingaro taagu ganga. Onodu, tere Itou bonade isi gadenga isou waha no gai‑gai anyakaro wonbona.  
\v 11 Ariya ere benou hauya-hauya yare, no nogo nomo danga anyakaro hilobainga waha langa, Itou no edo danga hogo fere-fere oruwa tigonga, tere edo danga bagu oto bonade, ou oruwanga auledu foinga yafa bonade, ou waha usuwei nomo saini itari wagu ganga. Onodu tere edega bonade,  
\v 12 Jijei hilobainga tuwagu ganga. No tere ono tigainga, tere onowou hilobainga oojo weye, tere edo langa no dada hilou-hilou elegei nomo hangada tagai waha elegagu ganga. Tere Itou nomo fai‑aita oruwanga gaara elegagu ganga, wa nere fai-aita no nomo lala langa yafade waha.  
\v 13 Ere agugu nomo danga huuna langa yafa geyenga, no ere ege gidu haigedu no nomo Idau nomo fai‑aita yafade langa logosi higai, wa Idau no gaude tuna waha.  
\v 14 Itou nomo Idau no ere ege gidu ejiya higidu bona, no ere ebere une uulu hagai.   
\s1 Pol no Kristus nomo haruwe, fanyimu bagu bona lena.  
\p
\v 15 Ere Itou urei nomo edo uwa, onou wa Itou Idau no Itou no nogo dorofenga. No Itou Idau motuwa, onodu no Itou dada oruwanga tafainga heigane waha nebere mora tigini yafana.  
\v 16 Itou no Magana waha nomo owo langa, dada oruwanga ha laluwa langa bagu oula langa bagu tafainga heigane. No dada oruwanga ere nerigeya waha bagu, ere nerigei nomo edo uwa waha bagu, nere ensel danga bagu hogo fere‑fere, nere hauri danga bagu-bagu, onodu dada danga bagu hogo fere-fere onou waha oruwanga. No dada oruwanga tafainga heigane waha, no nogo nomo.  
\v 17 Saini dada waha oruwanga heigegu uwa inyi gainga, no yafai. Onodu no dada oruwanga ono nigi ganga hilobainga inyide bode, gaara haruwe te de‑dede.  
\v 18 No sios nomo mora, onodu sios no nomo gogala. Ariya, no nogo no sios ago auma inyei nomo mora. No matmat langa ege gidu jayou fai amugou, onou waha bona no nogo edo dada oruwanga nebere mora yafonbona.  
\v 19 Itou no nogo nomo auma yafou nomo onowou bagu oruwanga Magana waha langa inyei nomo gau tuna. Onou waha bona, Itou no nogo no langa bolo dewou.  
\v 20 Onodu Itou no dada oruwanga ono nigonga, no bagu huwanyanege etengawei nomo gau tuna, wa nere oula nomo dada bagu, ha laluwa nomo dada bagu. Onou waha bona, no Kristus awa tuwainga nauge abalakawou langa umai, onodu ganemu feuwai, onowou waha langa Itou no honggoro guruwou fanyimu ilei hagai.   
\p
\v 21 Amina tere Kristus bae tudu yafeye, tere tebere ninatege langa no honggoro fai tafa tudu boya, tere fanyimu inyaba onowou haruwe tei.  
\v 22 Onou wa, Kristus no nauge abalakawou langa umainga, onowou waha langa, Itou no tere ono tigainga, tere no ngate huwanyatege etenga heigeye. No tere hatigedu no bagu maidu, tere edo guuni yafa bonade, no ago langa jijiga uwau, nyabuluwou uwau yafagu ganga bona no onou onowai.  
\v 23 Onou wa, tere huwanyatege ngalengawou yaasu bonade, danga bagu tigini oto wagu. Gamaji dada ete kuse tigoga, ono wonga tere hilou beele iseye waha nomo huwanyatege ngalengawou awagu ganga. Ji Pol, ji hilou beele beha nomo haruwe fai heigenenga, ere fai-aita oruwanga oula langa yafade waha, malalamudu lenigeye.   
\s1 Pol no Kolosi hoyo nigai.  
\p
\v 24 Ariya, ji elebe tere hoyo tigei nomo ou auleni waha boni ji edegani. Onodu ji Kristus nomo sios hoyo tuwoni ononi, wa nogo nomo gogala. Kristus no sios hoyo tuwei nomo jimiri aulai waha usuwei uwa. Onodu ou ji yage gefe gala langa auloni wa, ji Kristus nomo jimiri waha edomuwei nomo bona.  
\v 25 Itou nogo we ji sios nomo haruwe fai hangada hiyainga heigene, tere hoyo tigei nomo bona. Onodu ji Itou nomo beele oruwanga tigini malalamudu lewei nomo haruwe bagu.  
\v 26 Amina saini oruwa langa beele beha huwari inyigai, nere fai-aita oruwanga ada isi gane. Onou wa elebe nere Itou nomo fai-aita agenege langa amina malala heigaha.  
\v 27 Itou no nogo nomo gauwou langa, huwari beele beha, ere nomo fai-aita bagu abitimu higaha, ere edo iso boya, beele beha no hilobainga tigini, onodu no edo nomo fai‑aita oruwa hoyo nigonbona. Ariya huwari beele waha no benou. Kristus no tere bagu yafana, no tere hatigonga mani no ngate yafa bonade, tere no nomo dada hilou‑hilou ha laluwa langa otode waha elegagu ganga boya itari tuya.  
\v 28 Ere Kristus nomo hilou beele nere fai etenga-etenga oruwa malalamudu lenigi-nigiya. Ere ninage isou hilobainga oojo boya, nere isisiwou nigi boya, beele danga bagu lenigi-nigiya, taate bona, nere Kristen danga bagu heigogunga, ere hanigedu Itou bagu goyei nomo gau higina.  
\v 29 Onou waha bona, danga anyakaro Kristus hina waha langa, ji haruwe waha tei nomo ababi de‑deni.   
\c 2  
\s1 Ere huwanyage danga bagu ngalenga wonga, yaawa beele fetawei nomo.  
\p
\v 1 Ji tere benou isagu ganga boni gau hina, tere bagu sios Laodisia taon langa inyina waha nomo fai-aita yafade bagu, nere fai-aita ila ji hogofe uregu uwa waha oruwanga hoyo tigei nomo haruwe danga bagu teteni.  
\v 2 Ji tere oruwanga huwanyatege dangamu tagehenga, tere Itou nomo fai-aita ila gaude nigei nomo jaimu tigonga nere bagu huwanyatege etenga dedu yafagu ganga boni haruwe waha teteni. Ji gau hina waha, tere ninatege isou hilobainga tadenga waha no tebere huwanyatege ngalengawou dangamu tagonbona. Onodu tere Itou nomo huwari beele waha nomo hugu isi dewagu ganga gau hina. Kristus no nogo huwari beele waha nomo hugu.  
\v 3 Isou hogo fere-fere ninage isou huwari bagu oruwanga Kristus langa bolo tuwou, beng langa moni bolona dorofe.   
\p
\v 4 Ji fai ete tere gelele tigi bona yaawa tigei nomo gau hiyei uwa, waha boni ji beele beha leni.  
\v 5 Ji tere bagu yafei uwa. Onou wa ji yame ninafe langa ji tere bagu yafani dorofe, onodu ji tere haruwe tigini teboya Kristus boya huwanyatege danga bagu ngalengana waha terigei nomo edega deni.   
\s1 Ere Kristus fada tudu agege auma yafou tigini tei nomo.  
\p
\v 6 Tere Anyakaro Yesus Kristus amina tei, onou waha bona, tere no ngate golo wagu.  
\v 7 Tere no langa danga oto wagu, nauge oula langa danga otona dorofe, mata danga bagu auuma danga bagu ouwe langa otona dorofe. Tere hilou beele ere isisi tigeye waha bonade huwanyatege danga bagu ngalenga wonga, tere gai-gai Itou hilobainga tuwagu.   
\p
\v 8 Tere ure dewagu, gamaji fai ete no yaawa isou hogo fere‑fere malalamudu beele ewe lebona, tere ono tigonga nomo isou oojo wagu ganga. Nere fai onouha waha, nere asanege gane nebere ninanege isou bagu, nere hauri ha taene nomo dada bagu oula nomo dada bagu oofade waha, nebere isou elege‑elegede. Nere Kristus nomo ninau ada oojo-oojode.   
\p
\v 9 Tere isiya, Kristus no ere fai dorofe heigaiha, onodu Itou nomo ago auma yafou tigini bolo tuwai.  
\v 10 No dada danga bagu hogo fere-fere nebere mora bagu. Tere Kristus nomo, onou waha bona, Itou no tere agetege auma yafou waha tigi ganga, agetege auma yafou waha tere langa tigini bolodena.  
\v 11 Tere no fada tudu boya, getege gala karuwei nomo fanyimu tigini teiha. No genege gala nomo dada uwa. Kristus nomo onowou langa, ere huwanyage asari nomo onowou ayaru weyeha. Onodu waha no genege gala karuwei nomo fanyimu tigini.  
\v 12 Saini tere yaage bisou teboya, Kristus fada tugeyenga, Itou no tere Kristus ngate matmat langa u-u kuru tigaiha. Onodu tere Itou no Kristus matmat langa jaimu tuwei nomo haruwe tai waha boya huwanyatege ngalenga wainga, saini tere yaage bisou tei langa, no tere Kristus ngate ege jaimu tigaiha.  
\v 13 Amina tere nyabuluwou hogo fere-fere ono boya, tere huwanyatege asari nomo onowou oojo weyenga, waha no tere dutege kote wainga umeru weyeha. Onou wa, Itou no tere ono tigainga, tere Kristus ngate agetege auma yafou teinga, Itou no ere ebere nyabuliwou oruwanga uulu hagaiha.  
\v 14 Nuuni beele no ere kot langa tafa higidu bona, ebere nyabuluwou malalamu hagidu, ono higai ere nomo beele langa nomo danga huuna langa yafaya. Onou wa, Itou no ere kot langa tafa higei nomo beele waha oruwanga elege ayarudu bona, no nuuni beele nomo danga usumudu, Kristus nomo nauge abalakawou langa waraiha.  
\v 15 No hauri danga bagu, dada danga bagu hogo fere-fere oruwanga nebere danga usumu nagai. Nauge abalakawou langa, Itou no fai oruwanga benou abitimu nigina, no dada waha oruwanga feiya nigidu bona, ono nigainga, nere dada ewe dorofe heigane.   
\s1 Ere Kristus ngate amina umeyeha, onodu nuuni beele onouha waha ada hoyo higonbona.  
\p
\v 16 Onou waha bona, tere fai ete adai awa tuwadenga getege bona beele lewona, tere da nyei nomo yaage nyei nomo nuuni beele oojo wegu uwa, bori urei nomo fati anyakaro bagu, ole eege nomo bori urei nomo, Juda nebere bori Sabat nomo fati bagu, nebere nuuni beele oojo wegu uwa.  
\v 17 Nere dada waha, nere dada iinga heigonbona waha nomo ewe agotete. Ariya, Kristus no dada tigini.  
\v 18 Fai ete no dada wewe langa urai waha nomo beele malalamudu lebona, tere tage bonade ileidu ensel unyi jaimuwei nomo letigei mata wonga wa, tere no adai awa tuwadenga beele langa ilei tigona. Nere fai onouha waha, huwanyanege asari nomo ninanege oojo bode, nere iside nere nage isou hilobainga tigini bagu,  
\v 19 onodu nere Kristus ada fada tutude, no ebere mora tigini. Mora waha no nomo gogala oruwanga la da tu‑tuna, onodu nomo gogala turiwou nomo mumuni oruwanga ono nigi ganga gaara fadadede. Onou waha bona, Itou nomo danga langa gogala goi anyakarona.   
\p
\v 20 Tere Kristus ngate umedu boya, ege hauri nere taene nomo dada bagu oula nomo dada bagu oofade waha nebere danga langa yafegu uwa. Onou waha bona tere elebe taate boya, oula nomo fai dorofe goloya? Tere taate boya, nuuni beele benouha oojoya,  
\v 21 “Ne adai yaasuwau, ne adai nyau, ne adai awa tuwahe name gete gala fada tuwona?”  
\v 22 Nuuni beele onouha waha dada ere nere langa haruwe tegeyenga fasayadu inyabade waha bona lena. Nere fai wenga nuuni beele waha heigemudu bode, oojowei nomo isisiwou higane.  
\v 23 Ngalenga, nere nuuni beele onouha waha, ere bori urei nomo jaimu higi bode, huwanyage ilei hagi gogunga, ere ebere geege gala huwarimu dewoboya. Onou waha bona fai ila ninanege iside, nuuni beele beha, nere ninage hilobainga bagu isou hilou bagu oojode ide. Onou wa, nuuni beele beha ere hoyo higidu huwanyage asari nomo onowou tigini ileiwei nomo edo uwa.   
\c 3  
\s1 Ere Kristus ngate ege gidu amina jayei.  
\p
\v 1 Itou no tere Kristus ngate jaimu tigaiha, onou waha bona tere dada ouwe nomo waha elegei nomo haruwe taagu. Haumu ouwe waha langa, Kristus no Itou owo hilou langa, nomo sia king langa yafana.  
\v 2 Tere gai-gai nere dada ouweha bonade ninatege isagu. Tere oula nomo dada bonade ninatege adai isagu.  
\v 3 Tere umeyenga, tebere agetege auma yafou no Kristus bagu huwari waha yafa ganga, tere Itou fada tuya.  
\v 4 Kristus no tebere agetege auma yafou nomo hugu. Onodu saini no malala heige gonga, tere fere no ngate lala anyakaro bagu, Itou nomo mujari bagu heigagu ganga.   
\s1 Ere fai-aita eege heigeye.  
\p
\v 5 Onou waha bona, tere tebere huwanyatege langa oula beha nomo onowou oruwanga inyide waha, dunege kote wadenga umode. Ji onowou benou boni leni, longi fanyimu bagu, onowou jijiga bagu, fanyimu inyaba onowei nomo huwanyage jayou bagu, fai ete nomo dada boya agege warou bagu. Ariya agege warou fanyimu waha no yaawa itou unyi isouwou fanyimu dorofe.  
\v 6 Itou no fai oruwanga fanyimu onouha onode waha, agou inyaba nigei nomo amina haiyawai, wa fai nere nomo beele feiyade waha.  
\v 7 Amina tere fere fai nere waha bagu goloboya, fanyimu waha oruwanga ono geye.   
\p
\v 8 Onou wa, elebe tere onowou inyaba hogo fere-fere oruwanga elege ayaru wagu, wa honggoro guruwou, houge mayou, huwanyage inyaba guruwou, nere ila beele inyaba lenigei nomo fanyimu, beele jijiga bagu lewou.  
\v 9 Tere etenga-etenga nere Kristen ila adai yaawa nigagu, taate bona, tere huwanyatege asari nomo fanyimu oruwanga elege ayarudu boya,  
\v 10 tere fai eege heigeyeha. Itou no tere ono tigainga fai eege heigeye, no gai-gai isou hilobainga baingaro tigi bona, tere ono tigainga eege heigedu boya, no nogo dorofenga heigeye.  
\v 11 Onodu ere fai eege heigeye waha, ere oruwanga hogo etenga yafaya. Ere ege benou adai isei nomo, ere Grik nebere yo, Juda nebere yo, ere geege gala karu weye yo, ere geege gala karuwei uwa yo, onodu ere matane beele hogo fere-fereha nomo yo, kantri hogo fere-fereha nomo yo, ere haruwe magana ewe yafaya yo, ere ebere gauwou langa yafaya yo, taate bona, Kristus nogonga yafana, onodu Kristus nogo ere oruwanga huwanyage langa yafana.   
\s1 Ere nere ila gaude nigou nomo fanyimu waha tei nomo.  
\p
\v 12 Itou no tere hangada tigai, onodu tere no nomo fai-aita yafa geyenga, no tere bona gaude tu‑tuna. Onou waha bona, tere fanyimu benou waha elegagu. Tere ila bonade augamide tigi gonga, hilou tafa nigagu. Tere tage tebere onowou ilei bonade, nere fai foinga langa ono nigi bonade, fai tere nyabulumu tigide waha bonade houtege fasayadu adai mayou.  
\v 13 Fai ete tere gamatege langa no baabo ete nyabulumu tuwai waha no bagu beele bagu wonga, no ou waha auledu baabo waha nomo une uulu fuwona. Anyakaro no tere tebere une amina uulu tagaiha, onou dorofenga, tere fere nere ila nebere une uulu nagagu.  
\v 14 Tere huwanyatege nere fai-aita ila nigagu. Onowou waha no onowou ila oruwa feiyade nigou, onodu no onowou hilobainga ila ono nigi ganga danga bagu heigedu, komodu haruwe te‑tede.  
\v 15 Kristus no huwanyage foinga inyou higi bona, ere ono higi ganga huwanyage etenga yafaya, onodu huwanyage foinga inyou waha no edo tebere huwanyatege tigini oofa tagona bona. Itou no tere edo langa getege gala etenga heigedu bonade, huwanyatege tigini etengadu yafei nomo bona yaure tigaiha. Tere gai-gai Itou hilobainga tuwagu.  
\v 16 Tere Kristus nomo beele awa tuwadenga tebere huwanyatege langa danga bagu inyona. Tere etenga-etenga Kristen ila isisiwou nigi bonade, ninanege isou hilou nigadenga, nere onowou hilobainga wahanga onowode. Tere huwanyatege langa, Itou hilobainga tuwagu, onodu tere Buk Song nomo moone te bonade, bori moone ila bagu, Hauri Guuni tere huwanyatege langa moone heigemuna waha taagu.  
\v 17 Tere tebere beele lewou langa, tebere haruwe langa, onodu tere dada oruwanga onoya langa, tere Anyakaro Yesus unyi langa ono wagu. Onodu no unyi langa, tere Jijei Itou hilobainga tuwagu.   
\s1 Pol no Kristen baabo gane bona lena.  
\p
\v 18 Tere aita, tere tebere fai gane nebere huuna langa yafagu. Fanyimu waha Anyakaro ago langa no tigini.  
\v 19 Tere fai, tere tebere oyatege gane gaude nigagu, onodu tere nere huwanyanege adai inyabamu nagagu.   
\p
\v 20 Tere magana, tere tebere ametege, anyatege gane dada oruwanga bonade nebere beele oojo wagu. Anyakaro no fanyimu onouha waha gaude tu‑tuna.  
\v 21 Tere amenege gane, tere tebere magana gane adai ono nigadenga honggoro wode, gamaji nere benou isoguga, nere haruwe hilobainga ete ada ono wodbode.   
\s1 Pol no haruwe magana bagu hoobu fai bagu bona lena.  
\p
\v 22 Tere haruwe magana, tere tebere hoobu fai nebere beele oruwanga oojo wagu. Gamaji saini nere hinetege langa yafa gogunga tere gelele nigei nomo ninatege isi bonade, haruwe hilobainga taagu ganga. Tere Anyakaro umuge tuwagu, onodu tere gai-gai haruwe hilobainga tei nomo jala bonade ninatege isagu.  
\v 23 Tere dada oruwanga ono bonade, tere haruwe danga bagu taagu. Tere fai nebere haruwe teya dorofe uwa. Tere Anyakaro nomo haruwe tefuya.  
\v 24 Tere isiya, iinga Anyakaro no agou tigonbona, wa dada hilobainga no nomo fai-aita hangada nagai waha. Isagu, Tere Kristus nomo haruwe magana yafaya, onodu no nogonga tebere Hoobu Fai tigini yafana.  
\v 25 Onodu fai no nyabulu bona wa, no nomo nyabuluwou agou tonbona. Itou no fai-aita oruwanga onowou hogo etenga langanga haawe nigi-nigina.   
\c 4  
\p
\v 1 Tere haruwe magana nebere hoobu fai tere onowou hilou onodu tigini langa nere ono nigagu. Tere isiya, tere fere tebere hoobu fai ha laluwa langa yafana.   
\s1 Ere danga bagu hauya boya tigini golowei nomo fanyimu oojowei nomo.  
\p
\v 2 Tere hauyawei nomo fanyimu danga bagu yaasu wagu. Onodu saini tere hauya bonade, tere ninatege isi dedu bonade Itou hilobainga tuwagu.  
\v 3 Tere Itou no ere fere edo hoyo higei nomo hauya tuwagu. No ere jala buru hagonga ere Kristus nomo beele malalamudu lewei nomo isoki tuwagu. Beele waha no amina huwari inyai, elebe no malala heigaha. Onou wa nere fai beele waha isei nomo awa bode, nere ji dagou mata langa tafa hiyane.  
\v 4 Tere ji beele waha malala foomudu boni lewei nomo hauya wagu, Itou no gau tuna onou ji onowon boni.   
\p
\v 5 Saini tere fai sios huwanya langa yafegu uwa waha bagu yafa bonade, tere ninatege isou hilobainga oojo bonade, fanyimu hilobainga onowagu. Tere gai-gai Kristus nomo onowou abitimu nigei nomo haiya wagu.  
\v 6 Tere gai-gai beele hilobainga wahanga lewagu, wa beele nere fai isei nomo gau nigina waha. Tere ninatege isi dedu bonade, fai oruwanga nebere beele ege gidu lenigagu.   
\s1 Pol no Tikikus, Onesimus ngare huuru nirainga Kolosi goyare.  
\p
\v 7 Tikikus no ji haruwe oruwanga ono wene waha letigon bona. Tikikus no ere haruwe etenga, no ebere baige tigini, onodu no Anyakaro nomo haruwe fai hilobainga tigini.  
\v 8 Ji no huuru tugenenga tere bagu maina wa hugu beha boninga, tere ere adadu yafaya waha isagu ganga, onodu no tere huwanyatege dangamu tagonbona.  
\v 9 Ji Onesimus huuru tugenenga Tikikus ngare maidere. Onesimus no ebere baige hilobainga tigini, onodu no tebere ilibatege. Nere dada oruwanga belanga heigai waha, letigod bodere.   
\s1 Pol no Kolosi kaiyewou beele huuru nagai.  
\p
\v 10 Aristarkus no ji ngare dagou mata langa yafayare, no tere kaiye tigina. Ariya Mak no Barnabas gaimu, no fere tere kaiye tigina. No tere bagu mayei mata wonga, tere no hawei nomo edega wagu, ji tere beele huuru tagidu boni letigene dorofe.  
\v 11 Onodu Yesus, nere Jastus tude, no fere tere kaiye tigina. Juda nebere gane langa fai behanga nere ji ngate gaara Itou nomo huuna langa yafou jaimuwei nomo haruwe te‑teya, onodu nere ji hoyode hide.   
\p
\v 12 Epafras no tere kaiye tigina. No tebere ilibatege, onodu no Yesus Kristus nomo haruwe fai. No gai-gai Kristen nere, Itou nomo onowou amina tedu bode, nomo gauwou oruwa tigini isi dewane dorofe danga bagu oto wodbode waha bona Itou danga bagu hauya tubona isoki tu‑tuna.  
\v 13 Ji tere benou letigon boni, no tere bagu, nere sios nomo fai-aita Laodisia taon langa yafade bagu, Hierapolis taon langa yafade bagu, hoyo tigei nomo bona haruwe danga te‑tena.  
\v 14 Onodu Luk, dokta ere gaude tu‑tuya waha, no Demas ngare tere kaiye tigidere.   
\p
\v 15 Tere yame kaiyewou beha, nere baabo gane Laodisia taon langa yafade waha nigagu ganga boni gau hina. Ono bonade kaiyewou Nimfa fere tubonade, nere sios nomo fai-aita no nomo mata langa komo-komode waha fere nigagu.  
\v 16 Saini tere pas beha lelegedu bonade, huuru wadenga Laodisia sios langa goyonga, nere fere edo lelegodbode. Onodu pas ji Laodisia langa huuruni waha, tere fere lelegagu.  
\v 17 Onodu Arkipus letuwagu, “Ne haruwe Anyakaro langa tene waha oofade bonahe, haruwe waha te dewau.”  
\v 18 Ji Pol, ji yage kaiyewou beele beha tere yerege tagini. Tere ji bonade ninantege isagu, ji dagou mata langa gai yafani. Itou nomo aau warou edo tere bagu inyonbona.