\id 2TI – Ogea NT; Marib Fanua and Don Adep; 13-September-2013 
\h 2 Timoti 
\toc2 2 Timoti 
\toc1 2 Timoti 
\mt1 2 Timoti  
\c 1  
\p
\v 1 Ji Pol we, ji Yesus Kristus nomo aposel. No nogo nomo gauwou langa, Itou no ji nere fai-aita Yesus Kristus bode huwanyanege ngalengade waha, agenege auma nigei nomo beele baara tawai waha lenigei nomo bona aposel hangada hiyainga heigene.   
\p
\v 2 Timoti ne yame magana tigini, waha boni ji pas beha yerege hanini. Jijei Itou ere ebere Anyakaro Yesus Kristus ngare nere edo ne bodere aau narire bona augami nironga, ne ono hinoronga huwanyate foinga inyi gonga yafau.   
\s1 Ere hilou beele boya mayau adai higou.  
\p
\v 3 Ji yame babai gane nere fanyimu gai tigini, Itou ago langa jijiga uwau langa Itou nomo haruwe tane, ono wane waha, ji fanyimu onounga langa Itou nomo haruwe te‑teni. Onodu ji yame huwanyafe langa ji benou isini, ji no ago langa ji nyabuluwou ete uwau. Onodu saini ji hoonga bagu ooru bagu hauya boni, ji gai-gai ne boni ninafe isidu Itou hilobainga tu‑tuni.  
\v 4 Ji ne agiyote mai waha boni ninafe isidu, ege neriyedu boni ji edega dewei nomo gaude hina.  
\v 5 Ji benou isideni, ne Kristus boni huwanyate ngalengadena, amina ne name asane Lois, anyane Yunis ngare huwanyanere ngalengawai fanyimu onounga la. Ariya, saini ji ne name huwanyate ngalengawou danga bagu waha boni ninafe isidu,  
\v 6 ji ne name ninate jaimu hanehenga, Itou no toota hinai waha, ono tuwahe ne name agene auma yafou langa ege danga bagu heigonbona, fai eeya fu ganga eeya haena dorofe. Saini ji owofe ne morane langa tafa genenga, Itou no danga ne toota dorofe hinai waha boni leni.  
\v 7 Ne isini, Itou no ere Hauri higai waha, ere umugemu higei nomo hauri uwa. Hauri waha ere danga higi bona ono higigonga nere ila gaude nigei nomo, onodu ere hoyo higonga ere hage ebere yafou oofa dewei nomo.   
\p
\v 8 Onou waha bona, ne ere ebere Anyakaro nomo beele malalamudu lewei nomo adai mayau hinou. Onodu ne ji bonahe adai mayau hinou, ji no nomo dage hiyou fai. Ne Itou nomo danga tedu bonahe, ne ji ngare gaara hilou beele malalamudu lewei nomo haruwe langa ou aulau.  
\v 9 Itou no ere ege gidu haigedu bona, ere no nogo nomo fai-aita yafei nomo yaure higaiha. No ere fanyimu hilobainga ono weyenga ninau isidu bona yaure higei uwa. Gai aminanga, saini Itou no dada ete te ono wainga heigei uwa inyi gainga, no nogo nomo gauwou langa yaure higidu bona, Yesus Kristus owo langa, no ere bona augami tuwainga, no ere ono higainga no nogo nomo fai-aita heigeyeha.  
\v 10 Onodu elebe saini beha langa, Yesus Kristus no ere ege gidu haigou Fai, no malala heigaiha. Onodu no nomo haruwe langa, Itou nomo aau warou fere no malala heigaiha. Yesus Kristus no umei nomo danga usumuwai, onodu no nomo hilou beele langa, fai-aita oruwanga ono nigi ganga, nere agenege auma gai-gai inyina waha isi-iside.   
\p
\v 11 No ji hilou beele beha nomo haruwe tei nomo gau tuna, onou waha bona, no ji Itou nomo beele malalamudu lewei nomo fai dorofe hangada hibona, no nomo aposel dorofe hangada hiyai, onodu nere fai-aita fanyimu Itou gau tuna waha isisiwou nigei nomo fai dorofe hangada hiyai.  
\v 12 Onou waha boni, ji ou waha aule-auleni. Onou wa, ji waha boni mayau hiyei uwa. Ji fai no boni huwanyafe ngalengana waha, ji isi tuweneha. Onodu ji benou isideni, no haruwe ji owofe langa tafai waha, no edo oofa dewonbona, onodu waha no gai-gai inyide gonga goi Kristus nomo Fati anyakaro heigou waha langa edo wonbona.   
\p
\v 13 Ne ji beele hilobainga hinene waha bonahe ninate isidedu ne beele fanyimu hogo etenga langa, malalamudu lebonahe, nere fai-aita isisiwou nigau. Onou waha bona, ne Yesus Kristus bonahe huwanyate danga bagu ngalenga wonga, ne name huwanyate no tu bonahe, fanyimu waha langa ne nere beele malalamudu lenigau.  
\v 14 Hilou beele Itou no ne oofawei nomo owone langa tafai waha, no dada hilobainga tigini, ne oofadewau. Onodu Hauri Guuni ere huwanyage langa inyina waha, no edo haruwe waha langa hoyo hinona bona.   
\p
\v 15 Ne isene, nere Esia prowins langa fai oruwanga ji awa hiyaneha, onodu Figelus no Hermogenes ngare fere awa hiyareha.   
\p
\v 16 Ji Anyakaro no Onesiforus nomo aita magana bagu augami nigei nomo boni hauya tuni. Onesiforus no saini baingaro ji yame huwanyafe hilobainga ono hayai. Onodu no ji dagou mata langa yafene waha bona mayau tuwei uwa.  
\v 17 No Rom langa maidu bona, ji kuru hiyou haruwe danga bagu tedu bona, iinga no ji yeriyaiha.  
\v 18 Ji Anyakaro hauya tuni, no edo langa Itou nomo kot nomo Fati anyakaro langa no bona augami tuwonbona. Onodu ne tigini benou isi deni, Onesiforus no Efesus taon langa fere, ji hoyo hidu haruwe baingaro taiha.   
\c 2  
\s1 Timoti no Yesus Kristus nomo oota fai hilobainga yafona.  
\p
\v 1 Ariya, yame magana, ne gai-gai Yesus Kristus nomo aau warou awa tuwahenga ne dangamu hinona.  
\v 2 Onodu ji beele oruwanga nere fai baingaro agenege langa malalamudu legenenga ne isene waha, ne beele waha nere fai Itou nomo beele danga bagu yaasude waha nigahenga, nere fere edo nere fai ila isisiwou nigodbode.   
\p
\v 3 Ariya ne Yesus Kristus nomo oota fai hilobainga yafa bonahe, haruwe beha nomo ou, ere fai ila auleya waha bagu gaara aulau.  
\v 4 Ne oota fai nebere onowou boni isini. Saini nere oota fai nebere haruwe tede waha, nere haruwe hogo fere-fere ila bagu arotenga ada yaasu-yaasude. Nere oota fai nebere haruwe hilobainga wahanga te‑tede, ono wogunga nere nebere mora bagu no edo nebere haruwe gau tuwona bona.  
\v 5 Ariya fai no feiya guruwou langa guriyena waha, no feiya guruwei nomo nuuni beele oojo wona bona. Uwa wonga, fai no amugedu heigena waha nomo toota ada tonbona.  
\v 6 Ariya fai no haga langa da tatari bona, haruwe danga te bona oofana waha, no haga waha nomo da matau nere fai ila amuge nigidu elegonbona.  
\v 7 Ne ji beele leni beha bonahe ninate isau, ono wahenga Anyakaro no ne name ninate fokomu hanonga, ne beele beha nomo hugu oruwanga isau ganga.   
\p
\v 8 Ne gai-gai Yesus Kristus bonahe ninate isau, no umedu bona ege jayaiha, no King Devit nomo ganemuha fai, ji hilou beele langa malalamudu le‑leni dorofe.  
\v 9 Ariya ji hilou beele beha malalamudu legenenga, hugu waha langa fai nere, ji fai inyaba dorofe yeriyedu bode, nere ji ou hogo fere-fere hibode dagou mata langa tafa hihide. Onode waha, Itou nomo beele no dagou ada inyonbona.  
\v 10 Onou waha boni, ji nere fai-aita Itou no nogo nomo bona hangada nigai waha edo hoyo nigei nomo boni, ji yame huwanyafe dangamudu, ou waha oruwanga auleni. Ji nere fere agenege auma Yesus Kristus langa inyina waha tedu bode, nere no ngate gai-gai yafa dewodbode waha boni gau hina.   
\p
\v 11 Ere beele beha boya edo huwanyage ngalenga dewonbona.  
\q1 “Ere no ngate ngalenga umeyeha wonga,  
\q2 ariya ere fere no ngate agege auma yafo boya.   
\q1
\v 12 Ariya ere danga bagu yafa boya,  
\q2 ou oruwanga aulei mata woya wa,  
\q2 ere fere no ngate king yafo boya.  
\q1 Ariya ere no moge tuwei mata woya wa,  
\q2 no fere ere moge higonbona.   
\q1
\v 13 Ariya ere no oojo tuwei nomo beele baara taudu,  
\q2 ebere beele waha ada oojo woya wa,  
\q1 Itou no beele lewai wahanga, oojo wonbona.  
\q1 No nogo nomo beele, ada ubulumu wonbona.  
\q2 Gai uwanga uwa.”   
\s1 Timoti no Itou nomo haruwe fai tigini heigei nomo, haruwe danga bagu tona.  
\p
\v 14 Ne gai-gai fai-aita beele beha bode ninanege isei nomo hoyo nigau. Onodu Itou ago langa nere dada mene‑mene ewe bode beele langa adai wara woguga bona, beele danga bagu lenigau, adadu, ebere fanyige langa unyinege adoha waha nigei nomo. Beele benouha waha no fai ete hoyo tuwei nomo edo uwa. Nere fai iside wahanga nebere yafou inyabamu nagi-nagina.   
\p
\v 15 Ne haruwe fai tigini heigei nomo haruwe danga bagu tahenga, Itou no ne name haruwe bona gau tuwonbona. Ono wonga, ne no ago langa mayau uwau, ne Itou nomo beele ngalenga waha malalamudu lewau ganga.  
\v 16 Ariya ne beele kejiwe hogo fere-fere nere Itou nomo ninau oojo wegu uwa waha moge nigau. Nere beele onouha waha nere fai hanigedu, Itou moge tuwei nomo jala langa gai goinga wonbona.  
\v 17 Beele onouha waha, no ju inyaba nere fai-aita inyabamu nigei nomo dorofe gai anyakaro heigonbona. Nere fai beele onouha le‑lede waha nebereha nga wa, Himenus, Filetus ngare.  
\v 18 Nere nga, ngalenga beele nomo jala awareha, taate bodere nere benou le‑ledere, “Ere matmat langa amina gidu jayeyeha, waha boya ere iinga gonga ege ada jayo boya.” Beele waha langa nere fai-aita ila nebere huwanyanege ngalengawou inyabamu nagi-nagide.   
\p
\v 19 Onou wa, Itou no nomo sios atei nomo auuma amina danga bagu tawaiha, onodu auuma waha no danga bagu otona. Onodu bona no auuma waha langa beele benou yeregai, “Anyakaro no nogo nomo fai-aita bona iside nigina”. Onodu no beele beha fere yeregai, “Nere fai-aita oruwanga Anyakaro nomo unyi tane waha, nere fanyimu tigini uwa waha moge tuwode.”   
\p
\v 20 Ariya mata anyakaro ete langa, haaya ila gol langa ila silwa langa ila oula langa ati bode, ila nauge langa salu nigane. Ariya ila haruwe hilobainga onowei nomo, ila haruwe hogo fere-fere kejiwe onowei nomo.  
\v 21 Onou waha bona, fai ete nomo ago auma yafou langa fanyimu inyaba uuludu bona, Itou ago langa jijiga uwau heigei mata wona wa, no haaya haruwe gai hilobainga tonbona dorofe yafonbona. No Itou nomo fai tigini yafa bona, no edo nomo Anyakaro hoyo tuwonbona. No haruwe hogo fere-fere tei nomo haiya wonbona.   
\p
\v 22 Onou waha bona, ne gauwou inyaba hogo fere-fere, nere fai giila nebere huwanyanege langa heige-heigena waha moge nigau. Onodu bonahe ne fanyimu tigini waha, Itou boya huwanyage ngalenga dewei nomo fanyimu bagu, nere ila gaude nigei nomo fanyimu bagu, huwanyage foinga inyei nomo fanyimu bagu, elegou haruwe tau. Ariya ne fai-aita Itou ago langa jijiga uwaunga uwau, nere Itou unyi isou bode, nere Anyakaro unyi langa hauya bode yafade waha bagu, tere oruwanga fanyimu waha ono wagu.  
\v 23 Onodu ne fai isou hilou uwau waha nebere beele nyabuluwou kejiwe lede waha bonahe agene kuli adai tafau. Ne isini, beele onouha waha no ewe beele langa warawei nomo, beele langa honggoro guruwei nomo wahanga heigemu-heigemuna.  
\v 24 Onodu, Anyakaro nomo haruwe fai no beele langa adai wara bona, adai honggoro wona. No fai oruwanga fanyimu hilobainga wahanga ono nigona. Ariya fai nere feeto tuwei mata wogunga, no nomo houmu mayou ilei bona, no fanyimu Itou gau tuna waha, nere fai-aita isisiwou nigei nomo jala hilobainga kuru wona.  
\v 25 No haruwe foinga te bona, fai beele feiyade waha nebere ninanege tiginimu nagona. No onou onowei mata wonga, Itou no nere hoyo nigonga, nere huwanyanege ubuludu bode, beele ngalenga bode isou hilou tode rute.  
\v 26 Ariya, Satan no ono nigonga nomo beele oojowei nomo bona, nomo hagoma langa elege nigai. Onou wa, nere ngalenga beele waha bode isi bode wonga, nere nebere ninanege ege foo wonga, Satan nomo hagoma awadu bode nere edegawou langa yafodbode.   
\c 3  
\s1 Fati usuwou nomo saini langa, fai nere fanyimu inyaba ono wodbode.  
\p
\v 1 Onou wa, ne benou isau, fati usuwou nomo saini langa, ou inyaba gai baingaro heigodbode.  
\v 2 Fai nere nage bodenga gau nigi gonga, nere moni tei nomo gaude nigonbona. Nere nage nebere unyinege jaimu bode, kejiwe edega bode, nere honggoro bode, nere ila beele inyaba lenigodbode. Nere amenege, anyanege gane nebere beele feiya bode, nere fai-aita fanyimu hilobainga ono nigide waha bode, hilobainga ada nigodbode. Nere Itou nomo onowou moge tuwobode.   
\p
\v 3 Nere ila nebere ilibanege gane yafei nomo ada isodbode, onodu saini nere honggoro wode wa, nere nebere honggorowou karu nagei nomo jala uwau. Nere fai ila beele inyaba lenigodbode. Nere nebere genege gala nomo gauwou ada oofa wode, onodu nere wara bode fai kejiwe inyabamu nigodbode. Nere fanyimu hilou oruwanga bode honggoro wodbode.  
\v 4 Nere nage nebere ilibanege gane inyabamu nigodbode, ono bode nere fasayadu nere nage nebere ninanege inyaba oruwanga oojo wodbode. Nere nage, ere fai anyakarowou isodbode. Nere oula beha nomo edegawou fanyimu hogo fere-fere gaude bode, nere Itou ada gau tuwode.  
\v 5 Nere ewe genege gala langanga Itou nomo onowou oojo bode, nere danga anyakaro, Itou nomo onowou tigini langa inyina waha, menanga ada isodbode. Ne fai onouha waha bae nigidu yafau.   
\p
\v 6 Nere fai onouha waha, nere aita ninanege hilou uwau waha nebere mata jauli huwanya goyei nomo jala kuru-kurude, onodu bode nere gelele nigi bode nere nebere ninanege oofa nagi-nagide. Nere aita waha une baingaro tafane, onodu nebere nyabuluwou nomo ou nere iside. Onodu nere nebere huwanyanege no jaidu bona, fanyimu inyaba hogo fere-fere hugu uwau waha onowei nomo kuse nigi-nigina.  
\v 7 Nere aita waha, nere isisiwou tei nomo gaude nigi-nigina, onou wa, nere Itou nomo ngalenga beele waha langa isou tei nomo edo uwa.  
\v 8 Amina Janes, Jambres ngare, Moses honggoro fai tafa tuware, onou dorofenga nere fai fanyimu onouha ono-onode waha, nere ngalenga beele waha nebere honggoro fai tafa tuwodbode. Nere nebere ninanege hilala dewou, nere Itou bode huwanyanege tigini ngalengawei uwa.  
\v 9 Onou wa, nere nebere fanyinege waha no gai ada anyakaro wona. Nere fai oruwanga nere nebere fanyinege waha gai dabutayou dorofe urodbode, amina nere fai Janes, Jambres ngare neire dabutayou fanyimu urane dorofe.   
\s1 Timoti no Itou nomo beele danga bagu yaasuwou.  
\p
\v 10 Onou wa ne ji ngare yafare, onodu boni ji nere fai-aita fanyimu Itou no gau tuna waha isisiwou nigene waha ji yame fanyife ne isene. Onodu fanyimu ji gologene waha nomo hugu oruwanga tigini ne isi gene. Ne benou isau, ji Itou boni huwanyafe danga bagu ngalenga ganga, ji gai-gai yame huwanyafe dangamudu haruwe te boni, ji nere ila gaude nigi boni, ji danga bagu oto boni ou aule-auleni.  
\v 11 Ne fai nere fanyimu inyaba oruwanga ono hiyane waha, ji jimiri oruwanga Antiok langa, Aikoniam langa, Listra langa aulene waha ne isini. Nere ji dada gai inyabanga inyaba, taon waha langa ono hiyane waha ne alai. Onou wa, Anyakaro no ji ou waha oruwanga langa hoyo hiyainga ji yafa dewene.  
\v 12 Ngalenga tigini, nere fai oruwanga Yesus Kristus fada tudu bode, Itou nomo onowou oojo wode onode waha, fai nere inyabamu nigodbode.  
\v 13 Onodu nere fai inyaba bagu, nere yaawa profet bagu, nere fai-aita yaawa nigodbode. Onodu Satan no nere nage fere yaawa nigonga, nere nebere fanyinege gai inyaba heigonbona.   
\p
\v 14 Onou wa, ne beele tedu boni huwanyate danga bagu ngalengawai waha, danga bagu yaasuwau. Ne ere fai-aita bagu beele isisiwou hineye waha, ne iside higini.  
\v 15 Onodu ne isini, saini ne magana menakele yafa boni, ne buk Itou nomo beele bagu waha langa isou tei nomo hugu warene. Nere buk waha edo ninate hilobainga hini gogunga, ne Yesus Kristus bonahe huwanyate ngalenga wonga, Itou no ege gidu hainonbona.  
\v 16 Itou no nogo nomo Hauri wenga, beele oruwanga Itou nomo buk langa inyina waha heigemuwai. Onodu beele waha no, ngalenga beele isisiwou higei nomo bona, no nere fai-aita ninanege tigini uwa waha tiginimu nigei nomo bona, ere ebere golowou tiginimu hagei nomo bona, Itou ago langa onowou tigini waha isisiwou higei nomo dada hilobainga tigini.  
\v 17 Onou waha bona, beele beha no ere Itou nomo fai-aita ono higiganga, ere fanyimu hilobainga oruwanga elegede geyenga, no ere ono higiganga ere haruwe hilobainga hogo fere-fere tei nomo haiyaya.   
\c 4  
\s1 Timoti no Itou nomo beele malalamudu lewei nomo danga tafonbona.  
\p
\v 1 Itou ago langa, Yesus Kristus ago langa, no fai-aita oruwanga agenege auma yafade bagu, umeru wane fere nebere onowou haawe nagonbona, ji beele danga bagu benou lehinini, Yesus Kristus no fai-aita oruwanga agenege langa heigedu bona, no king gai-gai yafonbona,  
\v 2 onou waha bona, ne nomo beele malalamudu lewei nomo danga tafau. Edo fai nere beele isei nomo haiya wane yo, nere haiya wegu uwa yo, ne gai-gai Kristus nomo beele malalamudu lewei nomo danga tafau. Ne nere beele huwanyanege warei nomo bagu, nere jaimu nigonga huwanyanege ngalenga wonga, Itou nomo fanyimu oojo wodbode waha danga bagu lenigau. Onodu ne gai-gai, nere foinga ono nigi bonahe, fanyimu Itou gau tuna waha isisiwou nigidewau.  
\v 3 Isau. Iinga gonga nere fai ege beele tigini waha isei nomo ada gau nigona. Nere nebere agenege kuli beele hogo fere-fere isei nomo gau nigonbona, ono bode nere beele hogo fere ete isei nomo gau nigina waha, isisiwou nigei nomo bode fai baingaro hanigobode.  
\v 4 Onou bode, nere beele ngalenga moge tubode, aasa hogo fere-fere ewe waha, agenege kuli tafadu aagu wodbode.  
\v 5 Onou wa, ne nage gai-gai ninate foowou. Ne ou jimiri bagu aulau. Ne fai-aita hilou beele malalamudu lenigei nomo haruwe tau. Ne fai-aita hoyo nigei nomo haruwe bagu, onodu ne haruwe waha tigini tau.   
\s1 Pol no umonbona jugu waiha.  
\p
\v 6 Ne isini, ji elebe umoni juguni, ono wehenga yame ganefe wain Itou toota tu‑tude dorofe feu wonbona. Ji yame goyei nomo saini jugu waha.  
\v 7 Ji danga bagu agege auma yafou nomo, feiya guruwou hilobainga langa guriyeneha. Onodu ji Itou boni huwanyafe ngalengawou yaasudu, elebe ji haawe langa heigene.  
\v 8 Elebe fai no feiya guruwou langa guriyedu, amugou heigena waha nomo agou itari hiyaha inyina. Agou waha no benou. Anyakaro no ji fai tigini hiyonbona. No fanyimu tigini wahanga oojo bona, fai-aita nebere onowou haawe nagi-nagina, onodu no nomo kot nomo Fati anyakaro langa, no ji agou waha hiyona bona. Wa no ji yagenga ada hiyonbona. No fai oruwanga no urodbode gaude nigi ganga, nere no malala heigei nomo itari tude waha fere nigonbona.   
\s1 Timoti no Pol bagu fasayadu mayonbona.  
\p
\v 9 Ne ji bagu fasayadu mayei nomo danga tafau.  
\v 10 Isau. Demas no ji awa hiyaiha. No oula beha nomo onowou gaude tuwainga, no Tesalonaika taon goyai. Kresens no Galesia prowins langa goi gainga, Taitus no Dalmesia distrik langa goyai.  
\v 11 Luk no nogonga ji bagu yafana. Onou waha bona, ne Mak hawahenga ne ngare mayaru. No ji haruwe hoyo hiyei nomo fai hilobainga.  
\v 12 Ji Tikikus amina huuru tunanga Efesus goyaha.   
\p
\v 13 Saini ne mayau ganga wonga, ji yame saket ufaro Troas taon langa, Karpus nomo mata langa awene waha tetamai hayau. Onodu buk fere elegou. Onodu ne ure dewau, nere buk kaafa osoko langa atane waha bonahe agene kuli adai digou.   
\p
\v 14 Aleksander no bras langa dada atigou fai, no ji inyabamude hiyai. Iinga gonga Anyakaro no fanyimu onowai waha agou, no inyabamude tuwonbona.  
\v 15 Ne fere fai waha bona ure dewau. No ere ebere beele sei tuwai.   
\p
\v 16 Saini amugou langa, ji kot nomo beele agou gidu letuwene waha, fai ete te no ji ngare otodu bona no yame beele hoyowei uwa. Fai oruwanga awa hiyaneha. Ji Itou nere nebere nyabuluwou bona ninau adai isei nomo boni hauya tuwene.  
\v 17 Onou wa, Itou no ji riya hibona, no ji danga hiyai. Onou bona, ji hilou beele edo langa tigini malalamudu lewenenga, haiden nere oruwanga isaneha. Onodu Itou no ji laion nomo hao langa gidu haifaiha.  
\v 18 Onou dorofenga, Anyakaro no ji nere fanyimu inyaba oruwanga ono hiyode onode waha langa ege gidu haifedu bona, no ji ono hiyonga yafade gehenga, haifedu no nomo huuna langa yafou ha laluwa langa inyina walanga goyonbona. Ngalenga. Ere no nomo unyi gai-gai isou woboya.  
\p Ngalenga.   
\p
\v 19 Ne yame kaiyewou Prisila Akwila ngare niri bonahe, Onesiforus nomo gane bagu nigau.  
\v 20 Erastus no Korin taon langa gai yafana. Onodu Trofimus no taura bagu bona, ji no Miletus taon langa awa tunaha yafana.  
\v 21 Ne fasayadu mayei nomo danga tafau. Gamaji ne itari gahenga, oto saini bagu karaga saini bagu heigoga.  
\p Yubulus wanga, Pudens wanga, Linus wanga, Klodia wanga, nere Kristen baige gane oruwanga tere kaiye tigou huuru tagane.   
\p
\v 22 Anyakaro no edo name anute bagu yafonbona. Onodu no nomo aau warou edo tere oruwanga langa inyonbona.