\id 2PE - Ogea NT; Don Adep and Marib Fanua; 13-September-2013 
\h 2 Pita 
\toc2 2 Pita 
\toc1 2 Pita 
\mt1 2 Pita  
\c 1  
\p
\v 1 Ji Saimon Pita, ji Yesus Kristus nomo haruwe magana onodu nomo aposel, no ere ebere Itou, onodu no ere ege gidu haigou Fai. Ji beele beha tere fai-aita huwanyatege ngalengawou hilobainga tigini tei waha yerege tagini. Yesus Kristus nomo onowou tigini langa, tere tebere huwanyatege ngalengawou no ere ebere huwanyage ngalengawou dorofenga heigai.  
\v 2 Elebe tere Itou ere ebere Anyakaro Yesus ngare boya, isou hilobainga teya. Fanyimu waha langa, aau tarigou huwanyatege foinga inyou bagu tere tebere agetege auma yafou langa edo gai anyakaro heigonbona.   
\s1 Itou no ere no nogo nomo hangada higai.  
\p
\v 3 Yesus Kristus no Itou, onodu no nomo danga langa, no ere ebere agege auma yafou dangamu hagei nomo dada oruwanga higi bona, no ere Itou nomo fanyimu langa golowei nomo hoyo higai. Kristus no onou onowei nomo bona, ere awa higainga ere no nogo tigini isi tuweye. Unyi anyakaro bagu no nomo danga langa, no nomo onowou hilobainga tigini langa, no ere yaure higidu bona,  
\v 4 dada amugou anyaroro tigini waha oruwanga ere amina higei nomo beele baara tawai waha higaiha. Huwanyage jayei nomo fanyimu ere fai-aita oulaha langa inyina, onodu no ere inyabamude higi-higina. Onou wa, Kristus no dada hilobainga waha oruwanga higaiha, onodu fanyimu waha langa no tere hoyo tigonga, tere inyabawei nomo onowou waha feiyadu agetege auma yafou bagu, Itou nogo nomo onowou bagu taagu ganga.   
\p
\v 5 Tere waha bonade ninatege isidu, fanyimu hilobainga onowei nomo haruwe gai danga bagu taagu, onodu fanyimu onouha waha ono wadenga tere tebere huwanyatege ngalengawou dorofe danga bagu inyona. Onodu tere Itou bonade isou tei nomo haruwe taagu, onodu isou waha ono wadenga no tebere fanyitege hilobainga dorofe danga bagu heigona.  
\v 6 Onodu tere tebere getege gala nomo gauwou oofa dewagu, onodu tebere fanyitege waha ono wadenga no tere tebere isou hilobainga dorofe danga bagu heigona. Onodu tere danga bagu otodu ou aulei nomo fanyimu taagu, onodu tere fanyimu waha ono wadenga no getege gala oofawei nomo fanyimu dorofe danga bagu heigona. Onodu tere Itou nomo onowou langa golo wagu, onodu fanyimu waha ono wadenga no danga bagu oto bona ou aulei nomo fanyimu dorofe danga bagu heigona.  
\v 7 Onodu tere Itou nomo fai-aita ila bagu ilibumu-ilibumu tigini yafei nomo fanyimu taagu, onodu fanyimu waha ono wadenga Itou nomo onowou langa golowei nomo fanyimu dorofe danga bagu heigona. Onodu tere nere ila huwanyatege nigei nomo fanyimu tedu bonade, fanyimu waha ono wadenga, ilibumu-ilibumu tigini yafei nomo fanyimu dorofe danga bagu heigona.   
\p
\v 8 Tere ere ebere Anyakaro, Yesus Kristus boya iseyeha. Onodu tere fanyimu onouha waha elegadenga, tere langa tigini danga bagu heigonga wa, tere tebere isou waha ewe ada inyonbona. No hilou baingaro heigonbona.  
\v 9 Onou wa, fai no fanyimu waha uwau wonga, no dada baae langa inyide waha ada uronbona, onodu no ago fosokowou dorofe. Ngalenga, no amina une tafai waha Itou no uulu fudu bona, Itou no ono tuwainga jijiga uwau heigaiha. Onou wa, fai waha no Itou no langa dada onowai waha ninau hilalawaiha.  
\v 10 Baabo gane, Itou no tere yaure tigidu, tere no nogo nomo fai-aita yafei nomo hangada tigaiha. Onou waha bona, tere no nomo fai-aita tigini yafei nomo haruwe danga bagu taagu. Tere onou ono bonade wonga, tere ada me bodudu awa tuwagu ganga.  
\v 11 Onodu no jala helufa boro wonga tere huuna langa gai-gai yafou huwanya langa goyagu ganga, huuna langa yafou waha Yesus Kristus nomo, no ere ebere Anyakaro, onodu no ere ege gidu haigou Fai.   
\p
\v 12 Wa ngalenga, tere dada waha amina iseye, onodu ngalenga beele waha tedu boya, tere waha langa danga bagu otoya. Onou wa, ji tere ninatege hilalawei nomo awani, onou waha boni, ji saini oruwa ege letigei nomo ono-ononi.  
\v 13 Saini ji geefe gala beha langa yafa boni, hilobainga, ji tere ninatege jaimu tagehenga tere dada waha bonade ege ninatege isagu ganga boni ege letigei nomo ninafe isini.  
\v 14 Ji isini, ji geefe gala awa tuwei nomo saini menekele mene inyina. Ere ebere Anyakaro Yesus Kristus no onou lehiyaha.  
\v 15 Onou waha bona, ji tere letigi dewei nomo haruwe danga bagu tonboni. Onodu saini ji umehenga, saini oruwa tere edo langa ji dada oruwanga letigene waha bonade ege ninatege isagu ganga.   
\s1 Aposel nere Itou nomo lala Kristus langa inyi gainga urane.  
\p
\v 16 Ere ebere Anyakaro Yesus Kristus nomo danga boya, no ege gidu mayonbona waha boya bagu, ere amina letigeyeha. Onou wa, saini ere Kristus nomo beele waha letigi boya, ere aasa ewe fai nebere ninanege langa heigena waha oojowei uwa. Ere hage agege langa, Itou nomo danga bagu nomo lala bagu no langa heigainga ureye, onou waha boya ere leya.  
\v 17 Jijei Itou no unyi anyakaro tubona, lala hilobainga waha no langa ono wainga heigai. Onodu Itou no nogo ha laluwa nomo lala amugou waha langa yafa bona, no Yesus bona beele benou lewai, “No beha yame magana, ji no gaude tuboni, no boni edegani.”  
\v 18 Ere no ngate muju Itou yafai waha langa yafa boya, ere beele waha ha laluwa langa me gainga iseye.  
\v 19 Onou waha boya, ere profet nebere beele boya huwanyage danga bagu ngalengana, onodu tere fere nere nebere beele danga bagu yaasu bonade wonga, hilobainga. Profet nebere beele no lama agugu langa lala bona inyi ganga goi hamba ganga, eringe nomo baatu tere tebere huwanyatege langa jaidu maina dorofe.   
\p
\v 20 Onou wa, dada anyakaro tere isagu ganga, wa benou. Ere hage ebere ninage oojo boya, profet nebere beele Itou nomo buk langa inyina waha nomo hugu adai malalamudu lewoya.  
\v 21 Taate bona, profet nebere beele ete te, no fai nomo gauwou langa malalamudu lewei nomo heigei uwa. Hauri Guuni nogo we fai jaimu nigainga, nere Itou no beele le nigai waha malalamudu lewane.   
\c 2  
\s1 Fai inyaba nere Kristen nebere ninanege hilalamu nagide.  
\p
\v 1 Ngalenga, nere yaawa profet ila Israel gama langa heigane. Onou dorofenga, nere fai ila fere tere gama langa jaidu bode, yaawadu fai-aita Itou nomo dada langa isisiwou nigodbode. Nere huwaridu, beele yaawawou hogo fere-fere tere gama langa heigemu wodbode, wa tere tebere huwanyatege ngalengawou inyabamuwei nomo beele. Anyakaro no nere ege gidu ejiya nigaiha, ariya nere Anyakaro fere moge tuwodbode. Nere onou onodu, nere nage fasayadu inyaba wodbode.  
\v 2 Ono wogunga fai baingaro nere nebere onowou inyaba hogo fere-fere waha oojo wodbode. Onodu waha no nere fai kejiwe ono nigogunga nere onowou ngalenga nomo Jala waha beele inyaba letuwodbode.  
\v 3 Nere fai waha, nere agenege warigou fai tigini, onou waha bode, nere tere tebere moni dada kusewei nomo beele yaawawou baingaro lewodbode. Onou wa, gai amina Itou no nere kot langa tafa nigei nomo fati hangada nagidu bona, nere yaaewei nomo lewaiha. Onodu inyaba nere langa heigonbona waha, no agore inyei uwa. No itari waha yafana.   
\p
\v 4 Tere isiya, amina ensel ila une tafanenga, Itou no awa nigei uwa. No eeya haumu, u-u gai agugu dewou langa dage nigai yafade. Onodu nere dagou langa gai yafa bode, Itou nomo kot nomo Fati anyakaro itaride.  
\v 5 Nere fai-aita aminaha fere Itou moge tuwanenga, no awa nigei uwa. No yaage kuwei anyakaro wali wainga nere langa heigainga, yaae waneha. Ariya Noa no onowou tigini malalamudu legou fai. Onodu no fai-aita 7 bagu gaara Itou no oofa nigainga, hilou yafane.  
\v 6 Itou no Sodom Gomora ngare fere inyabawei nomo lewai. Onodu Itou no taon aroro nga waha eeya langa biteru wainga neire amuji wahanga inyai. No taon nga waha inyabamude nirainga, inyaba deware. Onou waha bona iinga gonga, nere fai-aita Itou moge tude waha nere Sodom Gomora bagu langa dada heigai waha bode ninanege isidu, dada nere langa fere edo langa heigonbona waha isodbode.  
\v 7 Ariya Lot, fai tigini waha no Sodom langa yafa bona, fai inyaba nebere longi fanyimu dada hogo fere-fere uredu bona, huwanya ou dewai. Onodu Itou no Lot ege gidu hawainga, no inyabawei uwa.  
\v 8 Yo, fai tigini waha no Sodom gamanege langa yafa bona, nere nebere onowou inyaba ure bona, fati oruwa nere nebere beele inyaba isigai. No nomo huwanya tigini inyi gainga, nere nuuni beele feiyawou fanyimu ono wanenga waha bona horotodu huwanya danga bagu jimiri wai.  
\v 9 Ariya, ere Anyakaro no dada onowai waha boya ninage isidu, ere isoboya, nere fai Itou oojo tude waha nere langa wala-wala nigou heigei mata wonga, Anyakaro no nere wala-walawou waha langa ege gidu hanigei nomo jala isina. Onodu Anyakaro no fai inyaba nebere onowou no isina, onodu no kabaka agou inyaba nigi gonga goi Itou nomo kot anyakaro nomo Fati langa heigei nomo jala no isina.  
\v 10 Nere fai ila agou inyaba waha gai inyangaro todbode. Wa nere fai huwanyanege jai ganga longi fanyimu tigini jijiga bagu ono bode, Anyakaro nomo beele no dada ewe iwou ninanege iside waha.  
\p Nere fai inyaba tere gamatege langa jayane waha, nere feeto fai, nere nage nebere gau wounga oojo‑oodode. Onou waha bode, nere ha laluwa nomo ensel amugou beele inyaba lenigei nomo menanga umugegu uwa.  
\v 11 Ensel nere fai waha tigini feiyade nigou, nere gai danga bagu. Ariya, nere beele inyaba lenigi bode, Anyakaro ago langa kot langa ada tafa nigi-nigide.   
\p
\v 12 Nere fai waha kaafa dorofe nere ninanege uwau, onodu nere genege gala nomo gauwou wahanga oojo-oojode. Nere kaafa kui oula langa heiganeha dorofe, nere fai edo la tatari nigidu bode dunege kote wogunga umeruwei nomo wahanga. Nere dada ada iside waha, nere beele inyaba letunga wodbode. Nere kaafa kui inyabade fanyimu onounga langa inyaba wodbode.  
\v 13 Nere fanyimu inyaba hogo fere-fere ono wane waha bona, nere fai ila agou inyaba kabaka nigodbode. Nere hoonga la da yaage bagu baingaro nyei nomo fanyimu waha, edegawei nomo fanyimu tigini ide. Nere tere ngate gaara da nyi boya, tere tage ono tigi ganenga jijiga bagu heige geyenga, nere tere unyitege inyabamu tagide. Onou wa, nere yaawawou fanyimu onode waha bode edega-edegade.  
\v 14 Nere gai-gai aita agenege wari ganga, longi fanyimu onowei nomo ninanege isi-iside. Nere une tafou langa nebere gauwou usumuwei nomo edo uwa. Nere fai nebere huwanyanege ngalengawou danga uwau waha, gelele nigi bode, une tafei nomo kuse nigi-nigide. Nere ila nebere dada agenege warei nomo fanyimu bode isisiwou taneha. Onou waha bona Itou no nere tigini inyabamude nigonbona.  
\v 15 Nere jala tigini waha moge tudu bode, nere goi dabu tayane. Nere Beor Idau, Balam nomo jala oojo waneha. No une tafadu bona, no nomo onowou inyaba waha langa ejiya tuwou heigonga tei nomo bona gaude tuwai.  
\v 16 Donki nere beele ada le‑lede, ariya donki ete no fai dorofe beele lebona, no Balam nomo onowou inyaba bona honggoro tuwai. Onodu fanyimu waha langa, donki no profet waha ono tuwainga, no dabu tayou fanyimu ono wona ninau isai waha awaiha.   
\p
\v 17 Nere fai waha yaage u-u kanyiwai dorofe. Onodu nere agau dorofe, jagui anyakaro fu nigi ganga fere-fere goi-goide. Itou no haumu tigini agugudu gai usuma kuruwou, nere walanga goi yafei nomo haiya nagaiha.  
\v 18 Nere fai waha belenege oto bode, ewe onou nebere beele inyaba bode edega-edegade. Nere fai gelele nigidu bode, ono nigi ganenga, nere longi fanyimu bagu geege gala nomo onowou inyaba hogo fere-fere onowei nomo huwanyanege jai-jaina. Onodu fanyimu waha langa, nere fai iinga haiden nebere onowou inyaba awane waha kuse nigi ganenga, nere goi fai inyaba waha oojo nigi-nigide.  
\v 19 Nere fai inyaba waha benou le‑lede, “Tere ere oojo higei mata bonade wonga, tere tebere gauwou langa yafa bonade, dada oruwanga edo tebere gauwou langa ono wagu ganga.” Onou wa, nere nage inyabawei nomo haruwe magana ewe dorofe yafade, taate bona, fai ete no dada ete awa tuwonga oofa tuwei mata wonga, fai waha no dada waha nomo haruwe magana ewe dorofe yafana.  
\v 20 Ngalenga, Yesus Kristus no ere ebere Anyakaro onodu ege gidu haigou Fai, no langa nere isou taane. Onodu isou waha no onowou jijiga bagu oruwanga oula langa inyide waha feiyawei nomo hoyo nigai. Onou wa, nere fanyimu onouha waha ege fada tuwei mata wogunga no dage nigonga wa, nere gai inyaba dedu yafodbode. Amugedu nere inyaba yafane, onou wa, onowou jijiga bagu waha ege dage nigei mata wonga, nere gai inyaba dedu yafodbode.  
\v 21 Hilobainga, nere fanyimu tigini nomo Jala tegu uwa. Taate bona, elebe Jala waha nere iside, onodu nere Itou nogo nomo nuuni beele taane, ariya nere amina moge tuwane.  
\v 22 Dada nere langa heigena waha, no beele ngalenga ete benou lena dorofe, “Gauna no ngireidu bona ege gidu goi nomo ngireiwou nyaha.” Onodu beele ete fere benou, “Buwa no yaage bisaha, ariya no goidu bona buru langa ubelu ubulu waha.”   
\c 3  
\s1 Ngalenga tigini, Anyakaro no mayonbona.  
\p
\v 1 Yame ilibafe gane tigini, ji pas beha elebe tere yerege tagi ngani. Pas nga beha langa ji tere beele le tigehenga, tere jaimu tigonga tere ege dada beha bonade ninatege isi bonade, tere tebere ninatege oruwanga tigini inyonbona.  
\v 2 Ji tere dada iinga ege heigonbona waha nomo beele bonade ninatege isagu ganga boni gau hina, wa nere Itou nomo profet malalamudu lewane. Onodu tere Anyakaro nomo nuuni beele bonade fere ninatege isagu, no ere ege gidu haigou fai. Tere nuuni beele waha, nere aposel tere bagu mayane waha nebere huranege langa iseyeha.   
\p
\v 3 Onou wa, dada anyakaro tere isagu ganga wa benou, Fati usuwou saini langa, nere memesi beele lewei nomo fai heigodbode, onodu nere nebere huwanyanege nomo gauwou inyaba oojo wodbode. Nere memesi beele  
\v 4 benou lewodbode, “No benou lewai, no ege gidu mayonbona yo? Ariya no alanga yafana? No ada mayona. Saini nere asage gane umeru wane langa mai elebe, dada oruwanga hogo etenga inyina, gai amina saini oula heigai langa inyai dorofenga.”  
\v 5 Nere ninanege isi dedu dada waha bode isei nomo awane. Gai amina langa Itou no lewainga taene heigaiha. Onodu Itou no yaage tedu oula yaage gama langa tafainga heigai.  
\v 6 Onodu iinga Itou no lewainga yaage ege heigedu kuwei anyakaro oula beha kutau wainga, oula inyaba borowaiha.  
\v 7 Onodu elebe, Itou nomo beele onounga langa, taene oula bagu eeya heigedu inyabamu nirei nomo itaridere. Taene oula bagu nere kot nomo fati anyakaro heigei nomo itaridere, onodu nere fai Itou moge tuwane waha, nere inyaba boro wodbode.  
\v 8 Tere ilibafe gane tigini, tere dada etenga beha bonade ninatege adai hilalawou. Anyakaro nomo ninau langa fati etenga waha 1,000 haga orei dorofe, onodu 1,000 haga orei no fati etenga dorofe.  
\v 9 Anyakaro no dada heigemuwei nomo beele baara tawai waha no haruwe foifoi ada tetena, nere fai ila lede dorofe. Uwa. Ariya, no fai ete te yaaewei nomo gau tuwei uwa. No fai oruwa huwanyanege ubuluwei nomo gau tuna, onou waha bona, no tere foinga ono tigi bona, gai itari tigi bona yafana.   
\s1 Oula taene bagu beha usu wodbodere.  
\p
\v 10 Onou wa, Anyakaro nomo Fati no yebu fai maide dorofe fasayadu heigonbona. Fati waha langa taene no inyangaro boloudu gai usu dewonbona. Onodu dada mene-mene oruwanga Itou no oula langa tafai waha, eeya biteru wonga usu wodbode. Onou waha bona oula bagu dada oruwanga oula langa tafai inyina waha ege ada inyonbona.  
\v 11 Ariya, tere ninatege isagu. Nere dada waha oruwanga fanyimu onou langa usu wogunga, tere isagu tere fanyimu adoha waha oojo wagu ganga? Tere tebere agetege auma yafou Itou tudu bonade, tere fanyimu guuni langa golo bonade, Itou nomo onowou oruwanga oojo wagu.  
\v 12 Tere fanyimu waha langa Itou nomo Fati heigei nomo itari wagu, onodu Fati waha siisa tuwei nomo haruwe danga bagu tadenga, no fasayadu heigonbona. Fati waha langanga taene no eeyadu bona usu wonbona, onodu eeya gai ngasu bagu no Itou dada mene-mene oruwanga oula langa tafai waha biteru wonga ewe yaage wodbode.  
\v 13 Onou wa, Itou no oula eege bagu taene eege bagu atei nomo beele baara tawaiha, onodu fanyimu tigini wahanga walanga inyonbona. Ere dada wahanga heigei nomo itariya.   
\s1 Ere Anyakaro itari tuboya ure dewoboya.  
\p
\v 14 Tere ilibafe gane tigini, tere dada waha heigei nomo itari-itariya. Onou waha bona, tere tage Itou ago langa jijiga uwau, dada ete bonade nyabuluwou ete uwau yafagu ganga bona haruwe danga bagu taagu. Onodu tere Itou bagu huwanyatege etenga yafagu. Onodu Anyakaro nomo Fati langa, Itou no tere tebere fanyitege hilobainga waha uronbona.  
\v 15 Anyakaro no gai itari bona, foinga ono higina. Tere isagu, no fanyimu onou langa onona waha taate bona, no ere ege gidu haigei nomo bona onona. Itou no ere ebere baige tigini Pol isou hilobainga tuwai, onodu no fere beele benounga tere yerege tagai.  
\v 16 No nomo pas oruwa langa, no dada waha bona le‑lena. Ngalenga, pas beha langa beele ila foo dewei uwa, onodu ere beele hugu isi dewoboya ababi-ababiya. Onou waha bona, nere fai isou uwau nebere huwanyanege ngalengawou danga uwa waha, nere beele beha hilalamu bode, Itou nomo buk langa beele oruwanga inyina fere onounga ono-onode. Onou bona nere inyaba dewodbode.   
\p
\v 17 Tere ilibafe gane tigini, Tere dada iinga gonga heigonbona waha amina iseye. Onou waha bona, tere tage ure dewagu. Gamaji nere fai nuuni beele feiyagou nebere yaawawou kuse tigonga, tere huwanyatege ngalengawou langa ege danga bagu ada otowagu ganga.  
\v 18 Yesus Kristus no ere ebere Anyakaro, no ere ege gidu haigou Fai, no tere bona augami tuganga tere no iside tuya. Onodu tere Kristus nomo aau warou awa tuwadenga dangamu tigi gonga, tere isou baingaro no langa taagu ganga. No unyi tigini anyakaro, onodu ere no unyi elebe bagu saini oruwanga isou woboya. Wa ngalenga.