\id 1JN - Ogea NT (BTA); Marib Fanua and Don Adep; 13-September-2013 
\h 1 Jon 
\toc2 1 Jon 
\toc1 1 Jon 
\mt1 1 Jon  
\c 1  
\s1 Beele ago auma no malala heigai.  
\p
\v 1 Ere beele ago auma waha nomo Beele malalamudu le‑leya. Beele waha no gai amina inyi gainga ere iseye, onodu ere agege langa ureye. Ere no fele-fele tu boya owoge no langa tafeye.  
\v 2 Agege auma waha no malala heigainga, ere ureye, onodu ere no boya beele malalamudu le‑leya. Ono boya ere agege auma gai-gai hilobainga yafei nomo waha tere malalamudu letigi-tigiya. Amina no Jijei langa inyai waha, malala heigainga ere ureye.  
\v 3 Ere uredu boya iseye, ono weye waha boya ere tere fere malalamudu letigedenga tere edo ere bagu huwanyatege etengadu yafagu ganga. Onodu ere Jijei Itou nomo Idau Yesus Kristus ngate gaara huwanyage etengadu yafo boya.  
\v 4 Ariya ere beele yeregeya beha, ere ebere edegawou edo bolo dewonbona.   
\s1 Ere lalawou langa golowei nomo.  
\p
\v 5 Ere Yesus Kristus no beele malalamudu lewainga iseye waha, tere malalamudu letigiya. Beele waha no benou, Itou no lala, onodu no langa agugu menenga ete inyei uwa.  
\v 6 Ere benou lewei mata woya, “Ji Itou bagu huwanyafe etengani,” ariya ere agugu langa goloya wonga, ere ebere beele waha no beele yaawawou, onodu ere ngalenga beele nomo fanyimu langa golowei uwa.  
\v 7 Ariya Itou no lala langa yafana waha fanyimu onounga la ere lala langa golowei mata boya wonga, ere Itou nomo fai-aita ila bagu huwanyage etengadu yafaya. Ono geyenga Itou Idau, Yesus nomo ganemu no ere ebere une oruwa huge hagi ganga, ere jijiga uwau heige‑heigeya.   
\p
\v 8 Ariya ere benou leboya wonga, “Ji une uwau,” ariya wa ere hage ebere huwanyage yaawa tuya, onodu ngalenga beele waha ere huwanyage langa inyei uwa.  
\v 9 Ariya ere ebere une uuluwei mata boya wonga, Itou no lewai onou ono wonbona. No fanyimu tigini onodu ebere une uulu hagonbona. Fanyimu inyaba ere langa inyina waha elege ayaru hagi bona, ono higonga jijiga uwau heigo boya.  
\v 10 Ere benou lewei mata woya, “Ji une tafei uwa,” ariya beele waha langa ere Itou no yaawa fai tuya. Onou waha bona Itou nomo beele ere huwanyage langa inyei uwa.   
\c 2  
\s1 Kristus no ere ebere Hoyo higou.  
\p
\v 1 O yame magana mene-mene, ji beele beha tere une adai tafagu ganga boni yerege tagini. Ariya fai ete no une tafei mata wonga, ere ebere Hoyo higou fai bagu, no Jijei ngare yafadere. No Yesus Kristus, fai waha no fanyimu tigini wahanga ono-onona.  
\v 2 No nogo ere ebere une uulu hagei nomo bona haruwe tai. Onodu no ere hagenga hoyo higei nomo bona haruwe tei uwa. No fai-aita oruwanga oula langa yafade waha hoyo nigei nomo onowai.   
\s1 Fai no Itou bona isidena waha no Itou nomo onowou oojo-oojona.  
\p
\v 3 Ariya ere Itou nomo nuuni beele oojowei mata boya wonga, ere tigini benou isi dewei nomo, ere no boya isideya.   
\p
\v 4 Ariya fai ete no beele benou lebona wonga, “Ji Itou boni isideni,” onodu no Itou nomo nuuni beele ada oojo wona wa, fai waha no yaawawou fai, onodu ngalenga beele waha no huwanya langa inyei uwa.  
\v 5 Ariya fai ete no Itou nomo beele oojowei mata bona wonga, no nomo huwanya Itou tuwei nomo isi dena, onodu fanyimu waha langa ere benou isiya, ere Itou bagu fadaya.   
\p
\v 6 Ariya fai ete no beele benou lebona wonga, “Ji Itou bagu fadani,” ariya fai waha no Kristus golowai dorofe golowou.  
\v 7 O ilibafe gane, Ji nuuni beele yerege tagini beha no nuuni beele eege uwa. Nuuni beele beha no aminaha, tere gai amina langa tei waha. Nuuni beele aminaha waha, tere beele waha amina iseye.  
\v 8 Ariya ji nuuni beele yerege tagini beha, no fere nuuni beele eege, onodu no Kristus nomo yafou langa no ngalenga, onodu tebere yafou langa fere onounga, taate bona, agugu no usu wona ono ganga, lala tigini waha heigaha inyina.   
\p
\v 9 Ariya fai ete no beele benou lebona wonga, “Ji lala langa yafani,” onodu no Kristen baabo ete huwanya inyaba tuwona wa, fai waha no gai agugu langa yafana.  
\v 10 Ariya fai no nomo huwanya baabo gane nigina waha, no lala langa yafana. Onodu lala langa dada ete no ono tuwonga meboduwei nomo ete inyei uwa.  
\v 11 Ariya fai no Kristen baabo ete bona huwanya inyaba-inyabana, fai waha no agugu langa yafana. No agugu langa golona, ariya no jala adoha oojona waha no alai uwa. Agugu no ago amina kutau fuwai.   
\p
\v 12 Tere yame magana mene-mene, Itou no tere tebere une Kristus unyi langa uulu tagai. Waha boni ji beele beha yerege tagini.   
\p
\v 13 Ariya tere amenege gane, fai no gai aminanga yafai waha no gai yafana, tere fai waha iside tuya.  
\p Onou waha boni ji beele beha yerege tagini.  
\p Tere fai giila, tere Satan feiya tuweiha. Onou waha boni ji beele beha yerege tagini.   
\p
\v 14 Tere magana, tere Jijei boya isi deya. Waha boni ji beele beha yerege tagini.  
\p Ariya tere amenege gane, tere fai gai aminanga yafai waha elebe gai yafana waha iside tuya. Waha boni ji beele beha yerege tagini.  
\p Ariya tere fai giila, tere dangatege bagu waha bona Itou nomo beele tere huwanyatege langa danga bagu inyi gainga tere Satan feiya tuweiha. Waha boni ji beele beha yerege tagini.   
\s1 Ere oula nomo onowou adai gau higou.  
\p
\v 15 Tere oula nomo onowou bagu oula nomo dada oruwanga bonade adai gau tigou. Fai ete no oula nomo onowou gau tuwei mata wonga, no Jijei ada gaude tu-tuna.  
\v 16 Ere alai, nere oulaha fai oruwanga nebere onowou wa, huwanyanege jayei nomo, agenege warou honyonyowei nomo fanyimu, fanyimu waha Jijei langa mei uwa. Fanyimu waha oula nomonga.  
\v 17 Ariya oula beha no usu wonbona, ono wonga oula beha nomo onowou oruwanga, wa huwanyanege jayou bagu agenege warou waha oruwanga usu wonbona. Ariya fai no Itou nomo beele oojona waha no gai-gai yafonbona.   
\s1 Kristus nomo honggoro fai no amina heigaha.  
\p
\v 18 O yame magana gane, ere fati usuwou nomo saini langa heigeyaha. Ariya tere amina Kristus nomo honggoro fai heigodbode beele iseye. Elebe nere Kristus nomo honggoro fai baingaro heigane. Onou waha bona ere isiya, ere fati usuwou nomo saini langa heigeyaha.  
\v 19 Amugedu nere fai waha ere bagu yafadu bode, awa higidu goyane. Ono wane waha nere ebere gane tigini yafegu uwa. Nere ere ebere gane tigini wage, nere ere bagu gai yafedege. Ariya nere ere awa higane, ono wane waha boya ere isideya, nere fai waha oruwanga ebere gane tigini uwa.   
\p
\v 20 Tere Hauri Guuni tei, ono weye waha bona tere oruwanga isou bagu.  
\v 21 Onou waha bona, ji tere beele ngalenga waha alai uwa idu boni beele beha yerege tagei uwa. Ji yeregene, wa taate boni, tere ngalenga beele waha alai, onodu tere isiya, ngalenga beele no beele yaawa heigemuwei nomo edo uwa.  
\v 22 Ariya beele yaawagou fai waha no faiwei? Fai no beele benou le-lena waha, “Yesus no fai waha Itou nomo fai-aita ege gidu hanigei nomo hangada tuwei uwa.” Fai no beele onou lena waha, no Umamu Idau ngare moge niri‑nirina, waha bona no Kristus nomo honggoro fai.  
\v 23 Fai no Idau moge tuna waha, no Umamu fere moge tu‑tuna. Fai no Idau bona huwanya ngalengana waha no Umamu bona fere huwanya ngalenga‑ngalengana.   
\s1 Hauri Guuni no ngalenga beele waha bona isisiwou higi-higina.  
\p
\v 24 Ariya tere beele amina iseye waha, tere danga bagu yaasu wagu. Tere beele amina iseye waha danga bagu yaasuwei mata bonade wonga, Umamu Idau ngare tere bagu gai-gai yafodbodere.  
\v 25 Ariya Kristus no beele baara tawou higai wa benou, no ere agege auma gai-gai hilou yafei nomo higonbona.   
\p
\v 26 Ji beele yerege tagini beha nere fai tere yaawa tigode onode waha nebere fanyinege boni letigonboni.  
\v 27 Ariya tere Kristus langa Hauri Guuni tei waha, tere bagu gai inyina. Onou waha bona ji tere isisiwou ada tigoni, taate bona, tere isou boya tutu tigei uwa. Hauri Guuni no nogo we dada oruwanga bona isisiwou tigi-tigina, onodu Hauri nomo beele waha no ngalenga. No yaawawei uwa. Onou waha bona tere Hauri isisiwou tigai dorofe Kristus fada tuwagu.   
\s1 Elebe ere Itou nomo magana gane yafaya.  
\p
\v 28 Yo, yame magana gane, tere Kristus bagu fada wagu. Ono wadenga saini no malala heige gonga, ere no ago langa otowei nomo mayau ada higona, ere edo langa danga bagu otowei nomo.  
\v 29 Ariya tere benou isei mata bonade wonga, Kristus nomo onowou gai tigini, ariya tere benou fere edo isagu, nere fai oruwanga fanyimu tigini ono wane waha, nere Itou nomo magana heigane.   
\c 3  
\p
\v 1 Magana, Jijei no ere gau higidu bona no nomo huwanya ere inyangaro higai! No ere Itou nomo magana gane higai. Onowai waha ngalenga tigini, ere nomo magana gane yafaya. Nere oulaha fai Itou bode alai uwa, waha bode nere ere bode fere alai uwa.  
\v 2 O ilibafe gane, elebe ere Itou nomo magana gane yafaya. Onoya waha iinga gonga ere adadu yafei nomo waha foowei uwa inyina. Ariya ere isiya, saini Kristus no malala heige gonga, ere no tigini urei nomo, onodu boya ere no nogo dorofe heigo boya.  
\v 3 Onodu nere fai oruwanga no itari tude waha, nere nage Itou ago langa jijiga uwamudu bode, nere Kristus no jijiga uwau yafana dorofenga jijiga uwau yafa-yafade.   
\p
\v 4 Fai no une tafa-tafana waha, no Itou nomo nuuni beele feiyana. Une no nuuni beele feiyawei nomo fanyimu.  
\v 5 Tere alai, Kristus no une uuluwei nomo heigai, onodu une ete no langa inyei uwa.  
\v 6 Ariya fai no Kristus fada tu-tuna waha, no une nomo fanyimu ada oojoo‑ojona. Ariya fai ete no une nomo fanyimu oojowei mata wonga, ere edo iso boya, fai waha no Kristus urei uwa, onodu no Kristus bona alai uwa.   
\p
\v 7 O yame magana mene-mene, tere ure dewagu, gamaji fai ete yaawa tigoga. Fai no fanyimu tigini onona waha, no fai tigini, Kristus dorofenga.  
\v 8 Gai aminanga hugu warou langa, Satan no gai-gai une tafagai, onou bona fai no une tafagou waha, no Satan nomo fai. Ariya Itou Idau no Satan nomo haruwe inyabamu fudu te kaite fuwei nomo bona malala heigai.  
\v 9 Fai ete no Itou nomo magana heigei mata bona wonga, no une nomo fanyimu ada oojo-oojona. Itou no nogo nomo ago auma yafou fai waha langa inyina, onou waha bona no une nomo fanyimu oojowei nomo edo uwa. No Itou nomo magana yafana.  
\v 10 Ariya ere faiwei no Itou nomo magana yafana, onodu faiwei no Satan nomo magana yafana, ere waha haawedu isei nomo wonga, ere edo benou iso boya, fai no fanyimu tigini ada onona waha, no Itou nomo uwa. Onodu fai no Itou nomo magana ila tigini ada gau nigina waha, no fere Itou nomo uwa.   
\s1 Yesus no ere fai ila gaude nigei nomo fanyimu waha abitimu higina.  
\p
\v 11 Gai aminanga, tere beele benou iseye, ere etenga-etenga fai ila gaude nigo boya.  
\v 12 Ere Kein dorofe adai yafoya. Kein no Satan nomo fai, no bemu dukote wainga umai. No bemu taate bona dukote wainga umai? No bemu dukote wainga umai taate bona, no nomo fanyimu inyaba, onodu no nomo bemu nomo fanyimu no tigini.   
\p
\v 13 O baabo gane, nere oulaha fai tere honggoro fai tafa tigei mata wogunga, tere waha bonade adai horoto wagu.  
\v 14 Ere ebere huwanyage Itou nomo fai-aita ila nigi-nigiya waha bona ere isiya, ere umei nomo fanyimu awadu agege auma yafei nomo fanyimu langa yafaya. Ariya fai no nomo huwanya nere baabo gane ada nigina waha, no umei nomo fanyimu langa gai yafana.  
\v 15 Ariya fai no nomo bemu tigini ada gau tu bona huwanya inyaba tuna waha, no fai dukote ganga umena dorofe. Onodu tere isiya, fai no fai ete dukote ganga umena waha, no ago auma gai-gai yafou waha tei uwa.  
\v 16 Yesus no ere hoyo higei nomo bona no nogo ago auma yafou waha awai, onodu fanyimu waha no fai ila gaude nigei nomo fanyimu waha abitimu higai. Onou waha bona ere fere Kristen baabo gane hoyo nigei nomo boya ebere agege auma yafou awei nomo.  
\v 17 Ariya fai ete no oula beha nomo dada bagu wonga, no baabo ete dada bona tutu tuna waha uredu bona baabo waha bona ada augami tuwei mata wona wa, ere isiya, fai waha no Itou nomo fanyimu langa nere fai ila gaude nigei nomo waha, fai waha langa inyei uwa.  
\v 18 O yame magana mene-mene, ere beele langanga yo hurage langanga baabo gane ada gau nigo boya. Ere ebere huwanyage nere nigi deboya, hilou tafa nigei nomo.   
\s1 Kristen nere Itou ago langa edo danga bagu oto wodbode.  
\p
\v 19-20 Ere fai ila gaude nigei mata boya wonga, ere edo iso boya, ere ngalenga beele oojoya. Edo ebere huwanyage no dada ete bona kot langa tafa higona, ariya ere Itou ago langa edo huwanyage foinga inyi gonga yafo boya. Taate bona, Itou no dada oruwanga bona isina, onodu no nomo isou ere ebere huwanyage langa isou inyina waha feiya dewou.  
\v 21 O ilibafe gane, ere ebere huwanyage no ere kot langa tafa higei uwa wonga, ere Itou ago langa danga bagu oto-otoya.  
\v 22 Onodu ere dada ete boya hauyadu no isoki tuwei mataya waha, no ere higi-higina, taate bona, ere nomo nuuni beele oojo-oojoya, ono boya ere fanyimu no gau tuna waha ono-onoya.  
\v 23 Ariya no nomo nuuni beele benou. Ere no nomo Idau Yesus Kristus nomo unyi boya huwanyage ngalenga wonga, ere etenga-etenga nere ila gaude nigo boya, no ere lehigai dorofe.  
\v 24 Fai ete no Itou nomo nuuni beele oojowei mata bona wonga, fai waha no Itou fada tu ganga, Itou no fai waha fada tuna. Itou no ere Hauri Guuni higi ganga, Hauri waha no ere benou abitimu higina, Itou no ere bagu yafana.   
\c 4  
\s1 Tere hauri haawe nigagu, nere Itou langa mede yo uwa.  
\p
\v 1 O ilibafe gane, nere yaawa profet baingaro oula langa kejiwe golo-golode. Onou waha bona nere fai oruwanga tere bagu maidu benou letigogunga adai ngalenga wagu, “Itou nomo Hauri beele lehiyaha.” Tere hauri oruwanga haawe nigagu, onodu tere isagu ganga, nere Itou langa mayane yo uwa.  
\v 2 Ono wadenga tebere fanyitege no edo Itou nomo Hauri bona isonbona, wa benou. Fai no beele benou le-lena wonga, “Yesus Kristus no fai tigini heigai.” Ono wonga, Itou nomo Hauri no fai waha langa inyina.  
\v 3 Ariya fai no Yesus bona beele onou ada lewei mata wonga, fai waha no hauri fere bagu, hauri waha Itou langa mei uwa. Hauri waha Yesus nomo honggoro fai nomo, amina tere no mayonbona beele iseye waha. Ariya elebe no mayaha oula langa yafana.   
\p
\v 4 Tere yame magana mene-mene, tere Itou nomo, onodu tere yaawa profet ilei nigiyaha, taate bona, Hauri tere huwanyatege langa inyina waha, no hauri nere fai oulaha huwanyanege langa inyina waha, feiya tuwou.  
\v 5 Nere fai waha oulaha. Onou waha bona, nere nebere beele wa oula beha nomonga, onodu oulaha fai nere nebere beele isi-iside.  
\v 6 Onou wa, ere Itou nomo, onodu nere fai Itou bode iside waha, nere ere ebere beele isi-iside. Ariya, fai no Itou nomo uwa waha, no ere ebere beele ada isi-isina. Fanyimu waha langa, ere edo langa ngalenga beele nomo Hauri bagu, yaawa nomo hauri bagu iso boya.   
\s1 Fai no Itou gaude tuna waha, no fai-aita ila fere gau nigonbona.  
\p
\v 7 O ilibafe gane, ere etenga-etenga fai-aita ila gaude nigei nomo, taate bona, nere fai-aita ila gau nigei nomo fanyimu waha, Itou nomo fanyimu. Onou waha bona fai no fai-aita ila gaude nigina waha, no Itou nomo magana, onodu no Itou bona isidena.  
\v 8 Itou no nogo nere fai-aita ila gau nigei nomo fanyimu waha nomo hugu. Onou waha bona fai ete no fai-aita ila ada gau nigina waha, no Itou bona ada isina.  
\v 9 Itou no Idau etenga wahanga, ere no langa agege auma tei nomo bona Idau waha huuru tuwainga oula langa mai. Fanyimu waha langa Itou no ere bona gaude tuna waha abitimu higina.  
\v 10 Nere fai-aita ila gau nigei nomo fanyimu waha, Itou nomo fanyimu. Onou waha bona ere benou ada iso boya, ere amugedu Itou gau tuweye. Uwa. Itou no we amgedu ere gau higai. Onou waha bona no nomo Idau ere ebere une uulu hagei nomo bonadu huuru tuwainga oula langa mai.   
\p
\v 11 O ilibafe gane, no nomo fanyimu waha langa, Itou no ere gaude higina waha abitimu higina. Onou waha bona ere etenga-etenga nere fai-aita ila gaude nigo boya.  
\v 12 Fai ete no Itou urei uwa. Onou waha bona ere fai-aita ila gaude nigei mata boya wonga, Itou no ere bagu yafana, onodu no nomo fanyimu nere fai-aita ila gau nigei nomo waha ere ebere agege auma yafou langa no danga bagu heigai.   
\p
\v 13 Itou no ere fada higi ganga, ere no fada tuya waha, ere adadu langa isei nomo? Ere benou langa isiya, taate boya? No nogo nomo Hauri ere higaiha.  
\v 14 Ere Jijei no dada onowai waha ureyeha. No nomo Idau nere oulaha fai-aita oruwanga ege gidu hanigei nomo bona huuru tuwainga mai, onowai waha ere dada waha boya beele malalamudu leleya.  
\v 15 Ariya fai ete no beele benou lewona, “Yesus no Itou Idau.” Ono wona wa Itou no fai waha fada tuna, ono ganga fai waha no Itou fada tuna.  
\v 16 Onou waha boya ere isidu huwanyage danga bagu benou ngalengana, Itou no ere gaude higi ganga, no nomo fanyimu ere ebere agege auma yafou langa inyina.  
\p Itou no nogo nere fai-aita ila gaude nigei nomo fanyimu waha hugu. Onou waha bona fai no fai-aita ila gaude nigina waha, Itou no fai waha fada tuganga, fai waha no Itou fada tuna.  
\v 17 Ariya ere onou yafei mata boya wonga, nere fai-aita ila gau nigei nomo fanyimu waha, ere ebere agege auma yafou huwanya langa danga bagu heigage. Ono wagenga ere Itou nomo kot nomo Fati anyakaro boya ada umugedege. Ngalenga, ere oula langa yafaya, ariya ere Kristus no nogo dorofe yafaya, onou waha boya ere adai umugoya.  
\v 18 Fai no fai-aita ila gau nigina waha no ada umuge-umugena. Ariya fai-aita ila gau nigei nomo fanyimu waha, fai ete no nomo ago auma yafou huwanya langa danga bagu heigona wa, no umugei nomo fanyimu feta tuna. Ariya umugou nomo hugu benou. Fai no isina, no agou inyaba tonbona, waha bona no umugemu tu-tuna. Onou waha bona fai ete no umugei mata wonga, ere edo isoboya, nere fai-aita ila gau nigei nomo fanyimu waha, no nomo ago auma yafou huwanya langa danga bagu heigei uwa inyina.   
\p
\v 19 Ere fai-aita ila gau nigi-nigiya, taate bona, Itou no amugedu ere gau higai.  
\v 20 Ariya fai ete no benou lewei mata wona, “Ji Itou gaude tuni.” Onodu no Itou nomo fai-aita nebereha ete ada gau tuwei mata wona wa, fai waha no yaawa fai. Fai ete te no Itou urei uwa. Onou waha bona fai no fai-aita ila ada gau nigina waha, nere fai-aita uraneha, no Itou urei uwa, waha bona ada gau tuwonbona.  
\v 21 Ariya Kristus langa nuuni beele tei waha benou. Fai no Itou gaude tuna waha, no Itou nomo fai‑aita ila fere gaude nigonbona.   
\c 5  
\s1 Kristen nere oula beha nomo danga feiya waneha.  
\p
\v 1 Fai oruwanga Yesus bode huwanyanege ngalengana, fai waha Itou no nomo fai-aita bagu ege gidu hanigei nomo bona hangada tuwai, nere Itou nomo magana gane yafade. Onodu fai oruwanga nere amenege etenga gau tude waha, nere nomo magana gane fere gau nigi-nigide.  
\v 2 Ere Itou gaude tudu boya, no nomo nuuni beele oojowei mata boya wonga, ere fanyimu waha langa edo isi boya, ere Itou nomo magana gane gaude nigiya.  
\v 3 Ere Itou gaude tuwei mataya wonga, ere nomo nuuni beele oojo-oojoya. Onodu no nomo nuuni beele ere ou higei uwa.  
\v 4 Fai oruwanga Itou nomo magana gane yafade waha, nere oula beha nomo danga feiya waneha. Ere Itou boya huwanyage ngalengana, onodu fanyimu waha langa ere oota feiya boya oula beha nomo danga ileiya.   
\s1 Itou no nomo Magana bona beele tigini malala foomudu lena.  
\p
\v 5 Faiwei no oula beha nomo danga feiya-feiyana? Fai no Yesus bona huwanya ngalengana, no Itou Nomo Magana, no waha oula nomo danga feiya-feiyana.  
\v 6 Yesus Kristus no yaage langa yaage bisou tei nomo fanyimu bagu, no nomo ganemu nauge adalakawou langa feuwei nomo bagu maiha. No yaage nomo onowou bonanga mei uwa. No yaage bagu ganemu bagu neire onowou bona maiha. Hauri Guuni no ngalenga beele nomo hugu, onodu Hauri Guuni no Yesus Kristus nomo fanyimu malalamudu le‑lena.  
\v 7 Nere dada eei no nomo fanyimu bode beele malalamudu lede,  
\v 8 wa Hauri Guuni, yaage, ganemu. Onodu nere eei beele etenga wahanga lede.   
\p
\v 9 Ere fai beele malalamudu lede waha boya huwanyage ngalengana. Ariya, beele Itou no malalamudu lena waha, fai nebere beele feiyade tuwou. Onodu Itou no beele malalamudu lewai waha, no nomo Magana bona lena.  
\v 10 Fai no Itou Nomo Magana bona huwanya ngalengana waha, no beele Itou malalamudu lewainga amina tai waha, no nomo huwanya langa inyina. Onou wa, fai no Itou nomo beele bona huwanya ngalengawei uwa waha, no Itou yaawagou fai tuna dorofe, taate bona, no Itou no nomo Magana nomo fanyimu bona beele malalamudu lewai waha bona huwanya ngalengawei uwa.  
\v 11 Onodu fanyimu waha langa Itou no benou abitimuna, no nomo beele ngalenga. Itou no agege auma hilobainga gai-gai yafei nomo higaiha, onodu agege auma nomo hugu wa, no nomo Magana langa inyina.  
\v 12 Fai no Itou nomo Magana fada tuna waha, no ago auma yafou waha bagu. Onodu fai no Itou Nomo Magana fada tuwei uwa waha, no ago auma yafou waha uwau.   
\s1 Ere edo isoboya, ere agege auma gai-gai yafou bagu.  
\p
\v 13 Ji beele beha tere fai-aita Itou Nomo Magana nomo unyi boya huwanyatege ngalengana waha yerege tagini, tere edo isagu ganga, tere agenege auma gai-gai hilobainga yafei nomo amina teiha.  
\v 14 Ere Itou nogo nomo gauwou oojo boya, hauya tudu dada ete boya isoki tuwei mata boya wonga, no ere ebere hauyawou isi-isina. Onou waha boya ere Itou ada umuge tutuya. Ere no hinomu langa goi-goiya.  
\v 15 Ere isiya, no ere ebere hauyawou oruwanga isi-isina. Onou waha bona, saini ere no dada ete higei nomo isoki tu boya, ere benou isiya, ere dada waha tigini toboya.   
\p
\v 16 Fai ete no Kristen baabo ete une tafa gonga uredu, une waha no baabo waha ono tuwonga umei nomo edo uwa wonga, fai waha no edo Itou hauya tuwonga, Itou no baabo waha ege ago auma tuwona. Ji fai nere une onouha tafade waha ono nigonga umeruwei nomo edo uwa waha boni leni. Une adoha waha no fai ono tuwonga umei nomo edo, ji tere waha bonade hauyawei nomo letigei uwa.  
\v 17 Fanyimu oruwanga tigini uwa waha, no une. Onou wa une adoha waha no fai ono tuganga ada ume-umena bagu.   
\p
\v 18 Ere isiya, fai oruwanga Itou nomo magana gane yafade waha, nere une nomo fanyimu ada oojo-oojode. Itou no fai no nomo magana yafana waha oofade tugonga, Satan no owo no langa tafei nomo edo uwa.  
\v 19 Ere isiya, ere Itou nomo magana gane yafaya, ariya oula beha oruwanga Satan nomo danga huuna langa inyina.   
\p
\v 20 Ere isiya, Itou Nomo Magana no maiha, onodu no ere edo Itou tigini boya isi dewei nomo bona isou higaiha. Ere Itou no nomo Magana Yesus Kristus ngare tigini fada nigeye. Yesus Kristus no Itou tigini, onodu no agege auma hilobainga gai-gai yafa dewei nomo hugu.   
\p
\v 21 Yame magana mene-mene, tere yaawa itou oruwanga baae nigidu yafagu.