\id PHP Mussau-Emira 
\h Pilipae 
\toc3 Plp 
\toc1 Uru ngai etikirighi Pol ghe pitiela ta aPilipae atoa 
\toc2 Pilipae 
\mt2 Uru ngai etikirighi Pol ghe pitiela ta  
\mt1 aPilipae atoa  
\imt1 Inangari emuemua  
\ip Pilipae masaliki taatara namuu ia tale provinsi eteva eMesedonia, tale pai not tale namuu patunganua ateva ghaine ita aseasea va Gris. Pol ghe lao sio ePilipae tale aiaaghaluene ateva nikasu, me ghe atokala ale manga ateva etana (Apostolo 16). Masi niaikapukapuaa ghe tokatoka elome Pol me tau ngaiesoa ngatoa ePilipae. Laghe tau lao sio niaisausi etana oroiaata nau ghe kasu ekapa seela tani ppooaa masi kiukiu.  
\ip Nau Pol ghe pitila ia oia uru ngai etikirighi, arongona ta ghe tokatoka tale ale mata voovoo, ghe masimasi, poli ghe tarala va masi kiukiu kanna ia God ghe mene laolao ta mene katoa taumattu. Pol ghe aloannala va tau ngaiesoa ngatoa la aimuli tee isaa o voto laghe tarala ta Iesu, me la rati lo atoa laghe ue va tau ngeleka atoa la tani aJiu mua, me auena la rooroo tani saanga. Ghe auliaala va aPilipae atoa la rooroo tani masimasi, me la rau mene nnangaili tale voto.  
\iot Tani kila amuemua  
\io1 Aitiutiu tale inangari me nikaili emasina \ior 1:1-11 \ior*  
\io1 Masi kiukiu elaulau maamauluaane Pol \ior 1:12-26 \ior*  
\io1 Am toka me am kasu nonga tale masi kiukiu kanna Karisto \ior 1:27–2:18 \ior*  
\io1 Taita alua laghe uungu eitauaa tee Pol, Timoti me Epaproditus \ior 2:19-30 \ior*  
\io1 Lo atoa la apasunga voto kamena \ior 3:1-21 \ior*  
\io1 Inangari niloeloe \ior 4:1-9 \ior*  
\io1 Pol ghe kaili emasinala tale niaisausi kaluira aPilipae atoa \ior 4:10-20 \ior*  
\io1 Airuuruu tale inangari \ior 4:21-23 \ior*  
\c 1  
\p
\v 1 \x - \xo 1:1 \xt Apos 16:12-40.\x*Angalua Pol me Timoti, kapuna tau ngai uungu iengalua Iesu \w Karisto\w*,  
\p Angalu pitipiti atu etaimim akapa lo atoa taumattu manga am ta Iesu Karisto ePilipae tee elda me rikina atoa.   
\p
\v 2 Angalu looloo sae va maamasinaane me luei ekasukasu ta God Tamaita ia me Vau ngepona ateva Iesu Karisto aue etoka teeiem.   
\s1 Nikaili emasinaaili me nilooloo sae  
\p
\v 3 Akaakaili emasina ta kapughu Goto ateva nau ekapa atoa nau aghannainam.  
\v 4 Tale isaa akapa uneghi nilooloo sae mausiimim akapa, alooloo sae tee nimasimasi  
\v 5 poli niaighui me niuungu am gheelei tale \w masi kiukiu\w* ghe tiuaala tale aitiutiu eteva nau me ange mae ghaa sio nau oia.  
\v 6 \x - \xo 1:6 \xt 1 Ko 1:8.\x*Aghaatoka tuutulighi va, lo ateva ghe tiuaala masi niuungu etaimim aue eghelei isaa o niuungu lomosina ta elaa ruu ta nauna ateva Iesu Karisto.   
\p
\v 7 Karika sesa etaghi tani ateateaa ia o salana atikirighi mausiim akapa, poli aghaielousieinam tale urunguitanighi eteva. Arova la iriiri etokaieghi tale sene o agheelei kotokotoo me aghaauliaa va koronna masi kiukiu, am akapaaili me aghi, ita ghaaghaa niparruu tale maamasinaane God.  
\v 8 God erooroo tani aulia ngaotu vaalua aghannaaili ekapaiem tee ailousiaane ateva Iesu Karisto.   
\p
\v 9 Me uneghi nilooloo sae mausiimim isaa avalua toko, va aielousiaaimim aue epinosa me eoroi tale nialomasaanga, me tale ninannaa masalike tale niaielousi etaimim,  
\v 10 \x - \xo 1:10 \xt 1 Tes 5:23.\x*va am tara kila saa llo voto masina me \w raarangisana\w* me karika mene righi voto sesa etaimim lomosina ta nauna ateva Karisto,  
\v 11 me aue am pasu tale uene voto ghulughuluena ekasukasu ta Iesu Karisto, tale niasaesae me nikkauaa ta God.   
\s1 Unna sene Pol ghe akasukasula masi kiukiu  
\p
\v 12 Isaa oia aghanna, kapughu etoa, va am kila va saa llo ghe lutula etaghi ghe aisausiaala tani akasukasu masi kiukiu.  
\v 13 \x - \xo 1:13 \xt Apos 28:30.\x*Tale isaa o voto me soldia ngakapa atoa la aitoiaa tanganue \w Siisa\w* me mene katoa taumattu la kilakila va atokatoka tee sene mausi Karisto.  
\v 14 Me poli isaa o sene etaghi, me oroi ila lo atoa kapuita laghe asarasarakanailala ta Vau ngepona ateva laghe tam matautula tani ppooaa inangari.   
\p
\v 15 Koronna va katoa la poppooaa Karisto tale nisessaia tani tau sio ararighi eteae me uunguaa niaittaraaii. Mene katoa la gheelei tale masi ninannaa.  
\v 16 Kateva uta taumattu laghe gheelei tale niaielousi poli la kilakila va atokatoka oia mausi tani aippooaa kotokotoo tee masi kiukiu.  
\v 17 Mene kateva uta taumattu la poppooa Karisto ta la nnainila nonga, karika va tale masi ninannaa. La nim anna tani ghelei teeieghi voto sesa nau atokatoka tale sene.\f + \fr 1:17 \ft Katoa uru ngai laghe pitila, laghe piti emuemuela ves 17, me emulina ves 16.\f*  
\v 18 Me isaa o voto vaalua malloeane? Tani voto ateva masinaaili ia, ia avalua toko: va tale saa ase salana arova kamena o koronna me la poppooaa Karisto. Tale isaa o voto me amasimasi.  
\p Ue, anim toka masimasi  
\v 19 \x - \xo 1:19 \xt 2 Ko 1:11.\x*poli akilakila va tale kaluimim nilooloo sae, me tale nisausi kanna kapuna Spiriti eteva Iesu Karisto, saa llo voto ghe lutula etaghi, aue egheleieghi me asaanga.  
\v 20 Tale nannaaghi aghaloannaaili va tale saa ase salana, erau mene ghelei epalataieghi, me anim sarasarakana tani apasunga Karisto tale vilikighi, arova amaulue o amate.  
\v 21 \x - \xo 1:21 \xt Gal 2:20.\x*Ta ngetaghi, tani toka aue atoka ta Karisto, me tani mate aue aghaa masi voto.  
\v 22 Arova maamauluaaghi emene toka tee lao, malloeanina va aue uunguaaghi etue uene manee, me ta ngetaghi tani ue va ea alao karika akilakila.  
\v 23 \x - \xo 1:23 \xt 2 Ko 5:8.\x*Aghainanga teeilalua ilalua o salana aluekiri. Aghanna tani kasu, me alaa toka tee Karisto, poli emaamasinaaili evalua o.  
\v 24 Me mausiimim me emaamasina va atoka.  
\v 25 Liuna avalua o me aghaiesoa ngasarasarakanaaili va aue amene toka aitaua ngakapa teeiem me aikaaiaaimim me masimasiaaimim aue enamuu.  
\v 26 Liuna avalua o me nau amene toka teeiem, masimasiaaimim ta Iesu Karisto aue epasu esassanga mausighi.   
\p
\v 27 \x - \xo 1:27 \xt Ips 4:1; 1 Tes 2:12.\x*Marova sa ateva elutu, am toka me am kasu nonga tale masi kiukiu kanna Karisto. Arova amae taraiem o anim nongoam, aue akila va am tiitingina akorokorongana tale kateva nonga spiriti, me ekaakateva iem tale ninannaa me niuungu va mene katoa la aikaaiaa tale masi kiukiu.  
\v 28 Me karika aue am matauta lo atoa la sessa teeiem tale voto la gheelei. Eaimatootoongana etaira va aue la turungila me am, aue am saanga. Isaa o voto God aue eghelei.  
\v 29 \x - \xo 1:29 \xt Apos 16:19-40.\x*Poli God ghe nim tau aatu sio etaimim mausi Karisto, karika va tani aiesoaa nonga etana, ta tani sau maate aitauaa teeia.  
\v 30 Am tee ngam laolao tale isaa o ase maamatana me am ghe taraieghila ta aghe ghaala, me isaa oia am nongonongo va aghaaghaa.   
\c 2  
\s1 Tani usilaa vaalua Karisto esio siuaa nannaane  
\p
\v 1 Arova righi niasarasarakana poli am tokatoka tee \w Karisto\w*, me arova righi inangari nisausi tale ailousiaane ateva, me arova righi niaighui tale Spiriti eteva, me arova righi niamaramara me nialousiusi,  
\v 2 am ghelei eroorooaa masimasiaaghi nau ekateva nonga nannaaimim, me eisaa aitauaa niaielousi, me ekateva nonga iem tale spiriti me tani uungu eitauaa.  
\v 3 \x - \xo 2:3 \xt Gal 5:26.\x*Am rau mene ghelei righi voto tale nikuruetu me tani saeaa nannaaimim. Me karika, ta tale nisiuaa ninannaa am tara katoa va masinaaili ila etaimim.  
\v 4 \x - \xo 2:4 \xt 1 Ko 10:24.\x*Kateva kateva etaimim erau mene atoka nonga nannaam tale llo nonga voto ia eaalona ta etara tee saa llo mene katoa la ghaloanna.   
\p
\v 5 Nannaaimim enonginaaili tee nannaane Iesu Karisto.   
\q1
\v 6 \x - \xo 2:6 \xt Jon 1:1-2; 17:5.\x*Koronnaaili Karisto ia Goto ia  
\q2 me karika ghe nnaala va easarasarakanaia tani toka nongina God me tani poso parasi va Goto ia.   
\q1
\v 7 \x - \xo 2:7 \xt 2 Ko 8:9; Jon 1:14.\x*Ghe ghaa vella mallangina ateva  
\q2 me ghe ghaala uunguaaira tau ngai uungu etoa,  
\q2 me ghe gheleiela va arova nim  //  taumattu ia nongina ita.   
\q1
\v 8 \x - \xo 2:8 \xt Hib 5:8; 12:2.\x*Me laghe tarala taataraane va taumattu ia  
\q2 ghe sio siuaa nannaane  
\q2 me ghe nongo usilaala tani lao tale nimate  
\q2 me tani mate tee tale \w aikotoo\w*.   
\q1
\v 9 \x - \xo 2:9 \xt Apos 2:33; Ips 1:20-21; Hib 1:3-4.\x*Liuna avalua o me God ghe taue liue saela epona  
\q2 me ghe taula arari eteae elaulau isaa akapa arari,   
\q1
\v 10 \x - \xo 2:10 \xt Rom 14:11.\x*va tale ararina ateae Iesu ila akapa la suuiaa sio patu kkeira etana,  
\q2 \w epona liu\w* me kosa ateva me lo atoa euu tale kosa ateva,   
\q1
\v 11 \x - \xo 2:11 \xt Rom 10:9.\x*me ila akapa aue la ghaulia ngaotu va Iesu Karisto Vau ngepona ia  
\q2 tale nitau sae ta God Tamaita ia.   
\s1 Ita mallanga nongina katto atoa  
\p
\v 12-13 Mausina avalua o, masi kapughu etoa, me nongina am ghe nongonongo usilaa, karika va nau atokatoka teeiem nonga, ta nau karika aghi, am ghelei isaa o voto nau ekapa atoa, poli God euungu etaimim tani asarasarakanaiem tale aloannaaimim me uunguaaimim. Am uungu tee nioneoneaa tani apasunga va God ghe asaangiemla, tale masi aloaloannaane.   
\p
\v 14 Me nau am ghelei voto am rau mene ghelei tale niauliulia me niaitamammarasii,  
\v 15 \x - \xo 2:15 \xt Den 12:3; Plp 1:10; 1 Tes 2:19.\x*va karika aue righi kaluimim ssavoto me aue am \w raarangisana\w*, me enatuna am God, karika gheeleiaaimim sesa tale uunguaa karika ghulughuluena me sesa voto tale lo ateva oia vituu. Me am mallanga nongina katto atoa tale kosa ateva,  
\v 16 nau am posoposo atingina sae inangari maulue ateva. Me tale nauna ateva Karisto, aue aghaasake va karika aghe iloula tale niaikarati eteae o aghe uungula tale nim lao.  
\v 17 Me arongona ta la ghele kaoaghi sae tale \w liu nighelei aiaavusuvusuena\w* nongina manu opring, me am ghele ghelei llo tale uneimim niaikaaiaa, amasimasi me amasimasi eitauangaili teeiem.  
\v 18 \x - \xo 2:18 \xt Plp 3:1; 4:4.\x*Liuna avalua o me am tee am masimasi, me am masimasi eitauaa teeieghi.   
\s1 Timoti me Epaproditus  
\p
\v 19 Aghaiesoaa ta Vau ngepona ateva Iesu va ghaisa ngarighi asungi aatu Timoti etaimim me aghi tee aue amasimasi nau emae auliaa kiukiuimim etaghi.  
\v 20 Karika amene annaa teva nongina ia, eannangailiiem tani aitarainam.  
\v 21 \x - \xo 2:21 \xt 2 Tim 4:10.\x*Mene katoa la annainila nonga me karika va llo voto isaa ta Iesu Karisto.  
\v 22 Me am kilakila va Timoti ang ghe gheleila voto eaapasunga va erooroo, poli nongina kateva me tamane, ang ghe uungu eitauaa teeieghila tale \w masi kiukiu\w*.  
\v 23 Liuna avalua o me aghaiesoaa va aue asungia tani mae taraiem ghaisa ngarighieili me atara mua va sa ateva aue la gheleia mua etaghi.  
\v 24 Me aghaatoka tuutulighi ta Vau ngepona ateva va gharighi tau amae taraiem.   
\p
\v 25 \x - \xo 2:25 \xt Plp 4:18.\x*Me aghanna va emaamasina tani sungi aatu kapughu ta Epaproditus euungu eitauaa teeieghi me tee tau ngaiuvii ia, me kapuimim tau ngai kasuaa inangari teeia me am ghe sungiela tani mae sausieghi.  
\v 26 Ta poli eannangailiiem me ghe alousiusieiliila poli ghe kilala va am ghe nongola va ghe isikila.  
\v 27 Koronna va ghe isikila me ghaisa ngarighi ghe mate, me God ghe alousiusi teeiela, me karika va ie nonga ta aghi tee, tani akekkelieghi tale mene kasina nialousiusi.  
\v 28 Liuna avalua o me asungi parasia atu etaimim me nau am taraia aue am masimasi me karika aue atani alousiusi.  
\v 29 Am ghaaia va nongina kapuna ia Vau ngepona ateva tee kinatama nimasimasi, me am oneoneaa ase taumattu nongina ia.  
\v 30 Poli ghaisa ngarighi ghe mate tee uunguaane Karisto, me karika ghe annaa maamauluaane tani ghelei eroorooaa nisausi am karika am ghe rooroo tani ghelei etaghi poli masaueili iem.   
\c 3  
\s1 Am rau mene atoka tuutuliimim tale uunguaa vilikiimim  
\p
\v 1 Liuna avalua o, kapughu etoa, me am masimasi ta Vau ngepona ateva. Karika egheelei righi sesa etaghi tani mene piti aatu etaimim llo ngaghe auliaa muela etaimim, ta isaa o voto erooroo tani sausiem.   
\p
\v 2 Am paniem tale ila o paua atoa isaa o taumattu la gheelei voto karika masina, tau ngai ghelei saasakiaa viliki etoa.  
\v 3 \x - \xo 3:3 \xt Rom 2:29.\x*Poli ita isoiso ita. Ita lo atoa ita kakkauaa tale Spiriti eteva kanna ia God, ita asaesae Iesu \w Karisto\w* me karika ita atoka tuutuliita tale uunguaa vilikiita.  
\v 4 \x - \xo 3:4 \xt Apos 22:3; 2 Ko 11:18.\x*Arongona ta aghi arooroo va aghatoka tuutulighi tale isaa o voto.  
\p Arova teva eannaa va eatoka tuutulina tale uunguaa vilikina, aghi alaulaula.  
\v 5 \x - \xo 3:5 \xt Luk 1:59; 2 Ko 11:22; Apos 23:6.\x*Tale aiaaghaoaluna ateva nau, laghe isoieghila. Aghi atala nge Israeli ieghi, tale ararimangali eteva ta Benjamin, aHibru ieghi me asamasama nge Hibru.\f + \fr 3:5 \ft o \fqa aHibru ieghi me tuvughu ekapa atoa aHibru ila.\f* Me tale uunguaa inangari nipaopao, aghi \w Paresi\w* ieghi.  
\v 6 \x - \xo 3:6 \xt Apos 8:3.\x*Aghe annaaili isaa o voto, liuna avalua o me aghe uviuvi kapuna taumattu God, me karika teva erooroo tani auliaa teeieghi, poli aghe nongonongo usila ngakapa inangari nipaopao.   
\p
\v 7 \x - \xo 3:7 \xt Mat 13:44-46.\x*Me tale isaa akapa o salana tani ghelei va aghe ghaa oroi voto, nau ghaine ataataraila va peisaane ila mausi Karisto.  
\v 8 Liuna avalua o me ataatara isaa akapa voto peisaane nau aghe toongi teela kinatama voto atoa tani kila Iesu Karisto Vaughu ia. Mausina me aghe velu ekapala voto o, ataatara va nim lao me aue aghaa nonga Iesu.  
\v 9 \x - \xo 3:9 \xt Rom 3:21-22.\x*Me aue atoka ta ngetana, me karika aue aghulughuluena tale uunguaa inangari nipaopao, ta aghulughuluena tale niaikaaiaa kanna Karisto, me isaa o nighulughuluena ghe kasula ta God tale niaikaaiaa.  
\v 10 \x - \xo 3:10 \xt Rom 6:3-5; 8:17.\x*Aghanna tani kila Karisto, me sarasarakaniaane tale unna nitotu tale nimate, me tani lao nongina vaalua ghe mmarikanala me tani nongina ia tale matemateaane.  
\v 11 Me tale isaa o ase salana, aue arooroo tani totu tale nimate.   
\s1 Ni-iilou esarasarakana tani laa rekata  
\p
\v 12 \x - \xo 3:12 \xt 1 Tim 6:12, 19.\x*Karika va ngaghe ghaala isaa o voto va ngaghe ghulughuluenala. Iesu Karisto eposoposoaghi, me akasukasu kkai tani laa ghaa isaa o voto.  
\v 13 Kapughu etoa, karika ataataraieghi va ngaghe ghaala isaa o voto. Me kateva nonga voto agheeleia, akakkaluaa llo emuli etaghi me aghameemeti tani laa ghattau aipolipoli emua etaghi.  
\v 14 \x - \xo 3:14 \xt 1 Ko 9:24.\x*Aiilou parasi nonga tani laa rekata tale airuuruu me tani ghaa aipolipoli nongina God ghe koloaghila tani sae \w epona liu\w* ta Iesu Karisto.   
\p
\v 15 \x - \xo 3:15 \xt 1 Ko 2:6.\x*Ita akapa lo atoa ngita ghe matuennala ita nna ngamasina isaa o voto. Me arova karika am maemae aitauaa tale kasina ninannaa, isaa tee o llo God aue eghelei emasalika etaimim.  
\v 16 Me arova vaalua, ita toka nonga tale llo voto ngita ghe kilala.   
\p
\v 17 \x - \xo 3:17 \xt 1 Ko 4:16.\x*Kapughu etoa, am mae aitauaa me am usilaa gheeleiaaghi, me am tani tara amasina lo atoa la kasukasu nongina vaalua ami, ami ghe kasukasu.  
\v 18 Poli nongina aghe auliaa nonga etaimim oroiaata, me ngamene auliaa tee nialousiusi, va oroi lo atoa la tokatoka tani ssatee \w aikotoo\w* ateva ta Karisto.  
\v 19 \x - \xo 3:19 \xt Rom 16:18.\x*Airuuruu tale kasukasuaaira nitturuu eteae. Kovaira ateva kapuira goto ia me llo tani palata, la aasakeaa. Me nannaaira etokatoka nonga tale voto tale kosa ateva.  
\v 20 \x - \xo 3:20 \xt Ips 2:6, 19.\x*Me ita tanganueita epona liu, me earieri ita tani toi teva tau ngai asaangi ekasu okae, Vau ngepona ateva Iesu Karisto etana.  
\v 21 \x - \xo 3:21 \xt 1 Ko 15:28, 42-53.\x*Aue eaikolikoliaa ia oia vilikiita ateva sesa ia ghele nongina vilikina masinaaili, tale sarasarakaniaane erooroo tani ghaa aitaua ngakapa voto me eghelei tale aloaloannaane.   
\c 4  
\p
\v 1 \x - \xo 4:1 \xt 1 Tes 2:19-20.\x*Liuna avalua o, kapughu etoa, me aghailousieinam me aghannangailiiem, am arova aipolipolighi iem tale uunguaaghi me tale masimasiaaghi, liuna avalua o me am tingina akorokorongana ta Vau ngepona ateva, masi kapughu etoa.   
\s1 Inangari niloeloe me niakorokorongana  
\p
\v 2 Alooloo luei ta Iuodia me Sintike tani mae aitauaa tale ninannaa ta Vau ngepona ateva.  
\v 3 \x - \xo 4:3 \xt Luk 10:20.\x*Me tee akookolomio, lo ateva ughe uungu teeieghi, tani sausi ilalua o vause alua laghe uungu aanasa teeieghi mausi \w masi kiukiu\w*, tee me Klemen me ila akapa lo atoa la uungu teeieghi, me arariira isaa tale vuku maulue ateva.   
\p
\v 4 Nau ekapa atoa am masimasi ta Vau ngepona ateva, me amene ue va am masimasi.  
\v 5 \x - \xo 4:5 \xt Hib 10:25; Jms 5:8-9.\x*Am tau velu va taumattu ngakapa atoa la tara va karika am saasavalaa inangari, poli Vau ngepona ateva ange aakalakalaa.  
\v 6 \x - \xo 4:6 \xt Mat 6:25-34; Kol 4:2.\x*Am rau mene annangaili asease voto atoa. Tale voto akapa, am kokkolomi sae ta God tani auliaa sae aloaloannaaimim tee nikaili emasina.  
\v 7 \x - \xo 4:7 \xt Ais 26:3; Jon 14:27; Kol 3:15.\x*Me luei eteva kanna ia God elaulau ekapaaili ninannaa, aue eaitaraa urunguitaniimim me nannaaimim ta Iesu \w Karisto\w*.   
\p
\v 8 Liuna avalua o, kapughu etoa, me saa voto koronna, me llo voto pei nioneoneaa, me llo ghulughuluena, me saa llo \w raarangisana\w*, me saa llo eaalutu nimasimasi, me saa llo voto taataraane masikkanaaili, me arova righi voto masinaaili o am aruaa etana, am annaa isaa o voto.  
\v 9 \x - \xo 4:9 \xt Rom 16:20.\x*Saa llo voto ngam ghe kilala o ngam ghe ghaala, o am ghe nongola o tarala etaghi, am tootoonga tani ghelei me God, etautau luei, aue etoka aitauaa teeiem.   
\s1 Nikaili emasina tale uneira nitaula  
\p
\v 10 Namungaili masimasiaaghi ta Vau ngepona ateva poli ngam ghe mene nnainaghila. Akilakila va am ghe nannainaghi erau me poli karika righi salana va am ghe apasunga.  
\v 11 Karika aghauliaa llo poli aghanna righi niaisausi, poli ngaghe kilala tani toka tale nimasimasi tale asease nitoka.  
\v 12 Ngaghe kilala vaalua tani toka arova karika righi voto etaghi o arova oroi voto etaghi. Ngaghe kilala vaalua tani toka tale isaa o ase nau, arova pasu kovaghi o maloona aghi o oroi peighi o karika oroi.  
\v 13 \x - \xo 4:13 \xt 2 Ko 12:10.\x*Arooroo tani ghelei voto akapa ta lo ateva eaasarasarakanaieghi.   
\p
\v 14 Me masinaaili etaimim ta am ghe sausieghila tani sau maate tale maamauluaaghi.  
\v 15 \x - \xo 4:15 \xt 2 Ko 11:9.\x*Am aPilipae atoa am kilakila va nau masi kiukiu ghe tiuaala etaimim, me ngaghe anna tani kasu eMesedonia, am nonga am ghe tau mae sio, me ita ghe ailiuaala voto. Karika mene teva \w ale manga\w* ghe gheleila isaa o voto.  
\v 16 Me nau aghe tokatoka eTesalonika am ghe aasaoki mae voto tani sausieghi, karika va katengaata nonga.  
\v 17 Karika va poli aghe annaa va am ghe tau mae voto, ta aghe annaa va am ghe ghaa aipolipoli ta poli masi gheeleiaaimim.  
\v 18 Ngaghe ghaala voto aghannaa me oroieili. Aghe pasueilila poli am ghe tau lao sio ta Epaproditus va emaeaa voto am ghe asaoki mae sio, nonginaaili nitau lao tale aiaavusuvusuena masi ngusungusuaane, me God eghaaghaa me emasimasia.  
\v 19 Me aue kapughu Goto ateva aue etau aatu isaa akapaaili aloaloannaaimim tale oroiaa \w ngepona liu|lemma="epona liu"\w* ta Iesu Karisto.   
\p
\v 20 Ta God Tamaita ia aue ita taue sae tale nau oia, me nau ekapa atoa. Koronna.   
\s1 Airuuruu tale inangarina Pol  
\p
\v 21 Am auliaa masimasiaaghi ta isaa akapa taumattu manga ta Iesu Karisto. Kapughu tee atoa la tokatoka teeieghi laghe suula masimasiaaira etaimim.  
\v 22 Ila akapa taumattu ngatoa manga ila, la suu teela masimasiaaira ta lo atoa la uungu ta \w Siisa\w*.   
\p
\v 23 Alooloo sae va maamasinaane Vau ngepona ateva Iesu Karisto aue etoka tee lo ateva spiriti etaimim. Koronna.