\id COL Mussau-Emira 
\h Kolosae 
\toc3 Kol 
\toc1 Uru ngai etikirighi Pol ghe pitiela ta aKolosae atoa 
\toc2 Kolosae 
\mt2 Uru ngai etikirighi Pol ghe pitiela ta  
\mt1 aKolosae atoa  
\imt1 Inangari emuemua  
\ip Ia oia uru ngai etikirighi Pol ghe pitiela nau ghe tokatoka tale ale mata voovoo, nongina Ipises, Pilipae me Pilimon. Pol karika ghe lao sio eKolosae, ta Epapras aKolosae ia ghe nongola masi kiukiu eIpises, ghe aiesoaala, me ghe oghi saela eKolosae tani ppooaa okae, me ale manga ateva eKolosae ghe lutula.  
\ip Tau ngalomasaanga ngatoa la nannaa va katoa laghe mae sio eKolosae me laghe apasungaala voto kamena okae, me Pol ghe aloannala tani auliaa kieira aKolosae atoa tale voto kamena laghe aapasunga. Ghe aulia ngakorokorongana va Iesu mata ngemua tale masi kiukiu, me marova teva voto elaulau Iesu, kamena ia. Ita rau mene aimuli usi tee voto taumattu ngatoa la ghaauliaa va masina, me ita rau mene kkauaa ensolo atoa, ta ita aimuli usi tee Iesu, me gheeleiaaita etani masina. Pol ghe auliaa teela vaalua tani toka amasina tale ale manga ateva me tanganueita.  
\iot Tani kila amuemua  
\io1 Aitiutiu tale inangari \ior 1:1-2 \ior*  
\io1 Iesu mata ngemua ia tale masi kiukiu \ior 1:3–2:5 \ior*  
\io1 Aimuli usi tee Iesu, me karika niaapasunga kamena \ior 2:6-23 \ior*  
\io1 Am tokatoka nongina kapuna atoa God \ior 3:1–4:6 \ior*  
\io1 Airuuruu tale inangari \ior 4:7-18 \ior*  
\c 1  
\s1 Pol ghe amasimasila tau ngaiesoa ngatoa eKolosae  
\p
\v 1 Aghi Pol, kapuna \w apostolo\w* ieghi \w Karisto\w* Iesu me tale aloaloannaane God, me Timoti kapuita ia.   
\p
\v 2 Angalu pitipiti atu etaimim akapa lo atoa taumattu manga am me am aaiesoaa ta Karisto eKolosae. Alooloo sae va maamasinaane me luei ekasukasu ta God aue etoka etaimim.   
\s1 Nikaili emasina me nilooloo sae  
\p
\v 3 \x - \xo 1:3 \xt Ips 1:15-16.\x*Angalu kaakaili emasina ta God Tamana ia Vau eteva Iesu Karisto tale kalumami nilooloo sae,  
\v 4 poli angalu ghe nongola uneimim niaikaaiaa ta Karisto Iesu me aielousiaaimim ta kapuna taumattu ngakapa atoa God manga ila.  
\v 5 \x - \xo 1:5 \xt Ips 1:13; 1 Pita 1:4.\x*Am aikaaiaa poli God eaaitaraa aipolipoli eteva \w epona liu\w* am kilakila va aue etau aatu. Ngam ghe nongo vella arau tale inangari koronna, tale \w masi kiukiu\w*,  
\v 6 ghe mae sio etaimim. Me tale kosa akapa ateva inangarina ateva God ekuukuneaa uene me epiipinosa nongina ghe gheleila etaimim nau am ghe kilala inangari koronna tale maamasinaane God.  
\v 7 \x - \xo 1:7 \xt Kol 4:12; Plm 23.\x*Am ghe nongoala ta masi kapumami eteva ta Epapras, kapuna tau ngai uungu eteva ia Karisto, me egheelei emasinaaili uunguaane, eghaaghaa liumami.  
\v 8 Me ange auliaa tau mae sio etaimami kaluimim niaielousi kanna Spirit Manga.   
\p
\v 9 \x - \xo 1:9 \xt Ips 1:16-17.\x*Liuna avalua o me nau eteva ami ghe nongola karika ami ghe ainoanala tani looloo sae tani kolomi God tani tau aatu alomasaanga tale Spirit Manga ateva me aue am kila aloannaane God.  
\v 10 Me aue am kasu tale masi salana eoneoneaa Vau ngepona ateva, me aue am amasimasia nau am ghelei masi niuungu me aue am tani kila amasinaaili God.  
\v 11 \x - \xo 1:11 \xt Ips 1:19; 3:16.\x*God aue easarasarakanaiem tale kinatama sarasarakaniaane tani gheleiem va am rau mene sio asoasoaa tale nau sesa arova emae, ta aue am nim matua ngatoka, me am masimasi  
\v 12 \x - \xo 1:12 \xt Ips 1:11, 18.\x*tani kaili emasina sae ta Tamaita ateva, ia ghe gheleiemla va am tee am rooroo tani ghaa saa llo ghe suitoongaala va ekaluimim epona liu tee kapuna taumattu ngatoa God manga tale mallanga ateva.   
\p
\v 13 \x - \xo 1:13 \xt Luk 22:53; Ips 2:2.\x*God ghe ghaa oghitala tale sarasarakaniaa saurrom ateva, me ghe atokaita lao sio tale ararimangalina ateva Natuna ateva eaaielousieinia.  
\v 14 \x - \xo 1:14 \xt Ips 1:7.\x*Ie nonga aighaa oghiita ia, me ekakkaluaa kaluita ssavoto.   
\s1 Iesu Karisto ia nonga tale voto akapa  
\p
\v 15 \x - \xo 1:15 \xt 2 Ko 4:4; Jon 1:18.\x*Karisto tootoona ia God ateva, karika ita rooroo tani taraia, ghe tokala arau me ia mue ia tale voto akapa God ghe gheleila.  
\v 16 Poli ta ngetana voto akapa God ghe gheleila, voto epona liu me tale kosa ateva, voto ita taatara me voto karika ita rooroo tani tara, me ila akapaaili \w ensolo\w* atoa, kuturu etoa, raroai etoa me asease tau ngai toitoi etoa. God ghe gheleila isaa akapaaili voto ta Karisto, me kanna Karisto.  
\v 17 \x - \xo 1:17 \xt Jon 1:1; 8:58.\x*Ghe tokala emua arau, me ta ngetana isaa akapaaili voto etokatoka amasina.  
\v 18 \x - \xo 1:18 \xt Ips 1:22-23; Apos 26:23; Aotu 1:5.\x*Me ia emuemua \w ale manga\w* ateva nongina uruita ateva emuemueaa vaulaniita ateva. Ia ghe toka akasinala me aitiutiu ia tani totu tale nimate. Ia avalua o me ie nonga eaitara ngakapanaaili voto atoa.  
\v 19 \x - \xo 1:19 \xt Kol 2:9.\x*Poli God emasimasi va isaa akapaaili voto kanna God etoka ta Karisto.  
\v 20 \x - \xo 1:20 \xt Ips 1:10.\x*Ta ngetana God ghe mene atoka aitauaala isaa akapa voto teeia, voto tale kosa ateva me epona liu, me ghe gheleila luei tale raena ateva Natuna ateva tale \w aikotoo\w* ateva.   
\p
\v 21 \x - \xo 1:21 \xt Rom 5:10; Ips 2:12.\x*Me am, isaa too nau am ghe masaueiliila me tale nannaaimim am ghe sessa tee God, me gheegheleiaaimim sesa,  
\v 22 \x - \xo 1:22 \xt Ips 5:27; Rom 5:10.\x*me isaa oia ia ghe atoka aitaueiniemla teeia tale matemateaane tale aikotoo ateva, tani maeainiem nongina etokatoka, manga, me \w raarangisana\w*, me karika righi sesa gheegheleiaaimim,  
\v 23 arova am aloanna tani mene lao tee tale kaluimim niaikaaiaa, karika am mene tau velu uneimim niaikaaiaa tale masi kiukiu am ghe nongola, laghe ppooaala tale isaa akapaaili taumattu tale kosa ateva, me aghi tee, Pol, tau ngai uungu ieghi tani ppooaa ia o masi kiukiu.   
\s1 Uunguaane Pol tale ale manga  
\p
\v 24 Ghaine amasimasi tani ghaa maamatana tani aisausieinam, me aghelei erooaa maate Karisto ghe suitoongainaghila va aghaa tale vilikighi, tani sausi ale manga ateva.  
\v 25 \x - \xo 1:25 \xt Ips 3:2, 7-8.\x*God ghe tau mae sio niuungu etaghi tani uungu mausi ale manga ateva, ghe sungieghila tani ppooa ngakapa masi kiukiu etaimim.  
\v 26 \x - \xo 1:26 \xt Rom 16:25-26; Ips 3:5, 9.\x*Ia o inangari eteva ang ghe aisuliaa vella arau, me tale isaa oia nau ang ghele kaurekatila tale taumattu manga.  
\v 27 God ghe suitoongainilala tani apasunga voto aisulianna etaira, va tau ngeleka atoa aue la ghaa kinatama \w niarangise\w* ateva, me Karisto aue etoka teeiem tau ngeleka atoa, me am atoka tuutuliimim tale voto emae epona liu.  
\v 28 Ami aaulia ngaotu Karisto, ami aauliaa kieira taumattu ngakapa atoa me ami aapasunga ta taumattu ngakapa atoa tale alomasaanganiaane Karisto, tani ghelei taumattu ngakapa atoa va la matuenna ta Karisto nau la tingina emua ta God.  
\v 29 \x - \xo 1:29 \xt Ips 3:7, 20; Plp 4:13.\x*Liuna avalua o me auungu ekorokorongana tale isaa akapaaili sarasarakaniaane etautau mae etaghi.   
\c 2  
\p
\v 1 Aghaloanna tani auliaa kieimim vaalua aghe saula maamatana mausiimim me tau ngai kkaua ngatoa eLaodesia, me tee lo atoa la aikaaiaa karika poi laghe taraieghi.  
\v 2 Aghanna tani aisausieinila me tani gheleila va la toka aitauaa tani korokorongana tale niaielousi. Aue la kaarasi tani ghaa \w niarangise\w* me alomasaanga, me aue la kila voto aisulianna kanna God, isaa ta \w Karisto\w*.  
\v 3 \x - \xo 2:3 \xt 1 Ko 1:24, 30.\x*Karisto nonga erooroo tani ghelei taumattu ngatoa la alomasaanga me tani apasunga llo voto God eaipanipaniaa ta taumattu ngatoa.  
\v 4 \x - \xo 2:4 \xt Rom 16:18.\x*Aghaauliaa etaimim llo oia voto, ta toa taumattu la rau kameam nonga tale kamena niapasunga am nongonongo arova masinaaili.  
\v 5 \x - \xo 2:5 \xt 1 Ko 5:3.\x*Arongona ta masaueili ieghi etaimim, me urunguitanighi eteva etokatoka teeiem, me amasimasi tani tara va tokatokaaimim masina me uneimim niaikaaiaa ta Karisto korokoronganaaili.   
\s1 Ouna ateva maulue ta Karisto me karika tale inangari niloeloe  
\p
\v 6 Me isaa oia, nongina ngam ghe ghaala Karisto Iesu va ang ghe Vauimmi iela, am kasu teeia nau etoa.  
\v 7 \x - \xo 2:7 \xt Ips 3:17.\x*Am atoka maamauluaaimim epona etana nongina ai eteae oane eposoposo asarasarakana ia, me am tingina akorokorongana tale niaikaaiaa am ghe ghaala, me aue am kaili emasina etana nau etoa.   
\p
\v 8 Am aipanipaniaa! Toa taumattu la rau kameam nonga tale nim nannaaira pei tale kosa ateva oia korokoronganaaili me kamena, emaemae ta raroai etoa me karika emaemae ta Karisto.  
\v 9 \x - \xo 2:9 \xt Jon 1:14, 16.\x*Poli isaa akapaaili voto kanna God etoka ta Karisto,  
\v 10 \x - \xo 2:10 \xt Ips 1:21-22.\x*me ngam ghe pasula nau am tokatoka ta Karisto, ia emuemue ngakapa tau ngai toitoi etoa me namu ngatoa tee.  
\v 11 \x - \xo 2:11 \xt Rom 2:29.\x*Nau eteva am ghe mae sio ta Karisto am ghe ghaala ni-isoiso, karika tale ni-isoiso tuunga ateva, ta am ghe ghaala ni-isoiso ateva kanna ia Karisto, ghe iso vella vilikina tale matemateaane,  
\v 12 \x - \xo 2:12 \xt Rom 6:4.\x*poli am ghe mate teela Karisto nau eteva laghe asuuemla tale manu me am ghe totu teeiela tale ouna ateva maulue, poli am aatoka tuutuliimim tale kaluimim niaikaaiaa elome tale sarasarakaniaana God, ghe totula Karisto tale nimate.  
\v 13 \x - \xo 2:13 \xt Ips 2:1, 4-5.\x*Am nongina va matena am poli kaluimim ssavoto me poli sesa gheeleiaaimim karika ghe kapa, vara me God ghe ghelei esakesakeamla ta Karisto, ta ghe kkaluaala isaa akapaaili kaluimim ssavoto.  
\v 14 \x - \xo 2:14 \xt Ips 2:14-16; 1 Pita 2:24.\x*Ghe sei vella kaluita ssavoto tale uru ngai laghe pitila me kaluita dinao nau ghe matela tale \w aikotoo\w*.  
\v 15 Tale isaa o salana, ghe apalala sarasarakaniaa sesa spiriti etoa me tau ngai toitoi etoa me ghe apalatailala ta mataira taumattu ngatoa nau eteva ghe apalailala tale aikotoo.   
\p
\v 16 \x - \xo 2:16 \xt Rom 14:1-13.\x*Ia avalua o me am rau mene tau veluem va la auliaa teeiem tale inana am namanama me manu am ropiropi me karika am laolao tale kasina tana uneira nivelu eitauaa tale \w nau manga\w* tale kateva kateva ninamanama me kateva kateva ulana me tale nau sambati.  
\v 17 \x - \xo 2:17 \xt Hib 8:5.\x*Isaa o inangari niloeloe me kastam nim tootoo voto auena emae, me ia o Karisto, ia koronna ia, ang ghe mae sio.  
\v 18 Am rau mene tau velu taumattu ngatoa va la ghelei kaluimim nikkauaa tani ue va am siuaa nannaaimim me am kkauaa \w ensolo\w* atoa me la annaa va muennaaili ila poli laghe tarala nitaatara, sesa nannaaira egheeleila me la tautau sae nannaaira.  
\v 19 \x - \xo 2:19 \xt Ips 2:21; 4:16.\x*Karika la tokatoka tee Karisto, ia nongina uruita eposoposo aitauaa vaulaniita me riuita me ita piipinosa nau eteva God eapinosaita.   
\p
\v 20 \x - \xo 2:20 \xt Gal 4:3, 9; 1 Tim 4:3.\x*Am ghe mate teela Karisto, me ghe akekkeliemla tale raroai etoa, me vaalua am mene usiusi inangari niloeloe tale kosa ateva oia:  
\v 21 Am rau mene poso, am rau mene namunamuaa, am rau mene tuli!  
\v 22 \x - \xo 2:22 \xt Mat 15:9.\x*Isaa o ase inangari niloeloe pei tale kosa ateva oia aue ekapa, nim kaluira taumattu ngatoa la apasunga.  
\v 23 Isaa o inangari niloeloe enim gheeleila va la kkauaa me la ghelei voto tale vilikiira va enim usilaa nannaaira. Isaa o inangari niloeloe arova tani alomasaanga, karika, me karika etautau mae righi niaisausi tani apala sesa gheeleiaa kateva kateva taumattu.   
\c 3  
\s1 Am toka tale ouna ateva maulue  
\p
\v 1 \x - \xo 3:1 \xt Mak 12:36; 16:19; Ips 1:20.\x*Nau am ghe totula tale ouna ateva maulue, am ghe totu eitauaa teela \w Karisto\w*, me am tani pae voto \w ngepona liu|lemma="epona liu"\w*, nongina Karisto etokatoka tale pai muenna atelange ta God  
\v 2 \x - \xo 3:2 \xt Mat 6:33.\x*me am atoka nannaaimim tale voto ngepona liu me karika va voto tale kosa ateva.  
\v 3 Tale lo ateva oia maulue angam ghe matela etana, me maamauluaaimim tuunga ateva eaaisuliaa ta Karisto elome ta God.  
\v 4 Karisto etautau aatu maulue ateva. Me nau eteva ekaurekati tale kosa akapa ateva, aue eapasunga sarasarakaniaane me mallangina, am tee aue am lao aitauaa teeia me aue la tara akapaiem me maamauluaaimim aue etoka tee Iesu, karika aue am aisuliaa me aue am toka tale mallangina ateva.   
\p
\v 5 \x - \xo 3:5 \xt Rom 6:6, 11; Ips 4:19; 5:3-6.\x*Liuna avalua o me am ghelei emate sesa ninannaa me sesa voto tale kosa ateva oia: uunguaa niailai salosaloaa see, karika am mene kune taita me vause, me am rau mene ghelei llo voto sesa taumattu ngatoa la paapalata, me aloaloannaaimim korokoronganaaili tani kune vause me taita tani ghelei ssavoto, me nikuruetu, nim nongina va am kakkauaa tootoo.  
\v 6 Poli isaa o ase voto, sessaiaane God aue emae sio.\f + \fr 3:6 \fq aue emae sio \ft Kasina uru ngai laghe pitila, laghe pitila \fqa aue emae sio ta lo atoa la sassakieinia.\f*  
\v 7 Me am, am ghe kasukasu tale llo akasina maulue sesa am ghe tokatoka etana.  
\v 8 \x - \xo 3:8 \xt Ips 4:25-29; 5:4.\x*Me isaa oia, am ghaa velu etaimim isaa o asease voto nongina nisessai, me niauliaa saasakiaa ta kateva, me nitam aloanna kateva, me niaasake, me inangari nilakolako ta paaimim.  
\v 9 \x - \xo 3:9 \xt Ips 4:22, 25.\x*Karika am mene aikameaa, nau eteva am ghe ghaa vella uunguaaimim pei ngarau am ghe gheeghelei  
\v 10 \x - \xo 3:10 \xt Ips 4:24.\x*me am ghe mene tiuaa ngaounala nau God ghe mene ghelei eounaiemla tale tootoona ateva lo ateva ghe gheleitala, tani ghelei va am tani kila aalomasaanganiaane.  
\v 11 \x - \xo 3:11 \xt Gal 3:28.\x*Tale ouna ateva maulue karika toa \w aJiu|lemma="Jiu"\w* me karika toa aGrik, me karika toa isoiso me lo atoa karika isoiso ila, me lo atoa karika va aJiu ila me aGrik ila, me lo atoa karika alomasaanga ila, me lo atoa karika la rooroo tani ghelei voto tale nim nannaaira, me lo atoa la rooroo tani ghelei nongina la aloanna tani ghelei, ta Karisto ie nonga akapa etaira.   
\p
\v 12 \x - \xo 3:12 \xt 1 Pita 2:9.\x*Nongina God ange suitoongainamla va am manga am, me eaailousiangailiem, am amolumoluem tale isaa o niuungu: am alousiusi tee lo atoa la tokatoka tale maamatana, me niaisausi etani mae tale urunguitaniimim, me am sioaa nannaaimim ta katoa, me am nnaa mene kateva, me karika emene sessai parasiem ta mene kateva.  
\v 13 \x - \xo 3:13 \xt Ips 4:2, 32.\x*Arova ange gheleila voto ateva karika masina ia me karika ange mae sio ta nannaam, unim sioaa nannaam me lao aitauaa teeia, me arova kateva eghelei saasakiaa, am kkalueinia, nongina Vau eteva ghe kkaluaala kaluimim maamatana.  
\v 14 \x - \xo 3:14 \xt Rom 13:8-10.\x*Me tale llo voto matuutuliena, am ailousia ngakoronna me aue am toka amasina tee mene kateva.  
\v 15 \x - \xo 3:15 \xt Plp 4:7; 1 Ko 12:27; Ips 4:4.\x*Am tau velu kanna luei eteva Karisto emuemue tale urunguitaniimim, nongina ghe koloamla tani kateva nonga, me am kaili emasina.  
\v 16 \x - \xo 3:16 \xt Ips 5:19.\x*Am tau velu inangarina ateva Karisto etoka elome etaimim me eapasunga ta kateva kateva alomasaanga tani kkinari tau sae emaemae ta Spiriti eteva, me kkinari tee nimasimasi tani tau sae God tale urunguitaniimim.  
\v 17 \x - \xo 3:17 \xt 1 Ko 10:31; Ips 5:20.\x*Me saa llo am gheelei tale inangari me niuungu, am gheelei llo voto tale ararina ateae Vau eteva Iesu, tani kaili emasina ta God Tamaita ia.   
\s1 Inangari niloeloe tale  //  kateva kateva tau ngaiesoaa  
\p
\v 18 \x - \xo 3:18 \xt Ips 5:22.\x*Vause atoa lailai iem, am atoka nannaaimim ta taitaniim atoa ta isaa o voto ghulughuluena ta Vau eteva.  
\v 19 \x - \xo 3:19 \xt Ips 5:25.\x*Taita atoa lailai iem, am aielousiaa vauseniim atoa karika am mene sorriena teeila.  
\v 20 \x - \xo 3:20 \xt Ips 6:1.\x*Aliki etoa am nongo usilaa tamaimim me kinaimim atoa tale isaa akapa voto, poli isaa o voto eaamasimasi Vau eteva.  
\v 21 \x - \xo 3:21 \xt Ips 6:4.\x*Tamatama atoa am rau mene savalaa natuimim atoa va esessaila, ta erau ghelei nannaaira va esioaili euu.  
\v 22 \x - \xo 3:22 \xt Ips 6:5-8.\x*Lo atoa am uungu me karika am tokatoka tale aloaloannaaimim, am nongo usilaa vauim atoa tale kosa ateva oia tale voto akapa. Karika am mene uungu nonga ta nau eteva la taataraiem va am ghelei emasimasila, ta am uungu tale masi ninannaa emaemae tale urunguitaniimim, me tani oneoneaa God.  
\v 23 Saa niuungu am gheelei, am ghelei tale masi ninannaa emaemae tale urunguitaniimim ateva, nongina va am uungu ta Vau ngepona ateva, me karika va ta taumattu ngatoa.  
\v 24 Am uungu emasina poli am kilakila va ta Vau eteva aue am ghaa voto masina ghe aulia ngalokoila, nongina aipolipoli. Am uungu ta Vau eteva Karisto.  
\v 25 \x - \xo 3:25 \xt Rom 2:11.\x*Tau ngai ghelei ssavoto atoa aue la ghaa aipolipoli tale llo voto sesa laghe gheleila. Karika aue righi niaimassiaa.   
\c 4  
\p
\v 1 \x - \xo 4:1 \xt Ips 6:9.\x*Vau etoa am aitoiaa tau ngai uungu etoa karika la tokatoka tale aloannaaira, me am ghelei emasina me ghulughuluena lao ta kapuimim tau ngai uungu etoa, ta am kilakila va am tee kapuimim Vau eteva ia \w epona liu\w*.   
\s1 Niailoe tale nikokkolomi sae  
\p
\v 2 \x - \xo 4:2 \xt Ips 6:18; Plp 4:6.\x*Am rau mene amaomao tani kokkolomi sae, me nau am kokkolomi sae, nannaaimim eoti, me am kaili emasina sae ta God.  
\v 3 \x - \xo 4:3 \xt Rom 15:30; Ips 6:19.\x*Me am kokkolomi sae mausiimami tee va God aue etau mae salana tani laa ppooaa \w masi kiukiu\w*, me aue ami aulia ngaotu voto aisulianna isaa ta \w Karisto\w*, poli aghe poppooaa masi kiukiu eteva, laghe atokaieghi ssola tale ale mata voovoo.  
\v 4 Atani mene ppooa ngaotu masi kiukiu ta taumattu ngatoa. Ia avalua o me am kokkolomi sae ta God me aue esausieghi tani kila tani ppooa ngamasinaaili.   
\p
\v 5 \x - \xo 4:5 \xt Ips 5:15-16.\x*Nau am tokatoka tee taumattu karika la aikaaiaa ta Iesu, am tani aitoka tee llo voto am gheelei me am rau mene tau velu kasina voto va enim peisaane.  
\v 6 \x - \xo 4:6 \xt Ips 4:29; 1 Pita 3:15.\x*Nau etoa am sama amasina etaira, nongina uela ateva eaamasikkana anem inana, ia avalua o me aue am kila tani asokoi kaluira nikokkolomi.   
\s1 Airuuruu tale inangari niloeloe me nimasimasi  
\p
\v 7 \x - \xo 4:7 \xt Ips 6:21.\x*Tikikus aue eaulia ngakapa voto ghe ailutuaala etaghi. Ia nengaghi tuungia aghailousieinia. Ia kapuna tau ngai uungu ia Vau ngepona ateva nongina aghi, me egheelei emasinaaili uunguaane.  
\v 8 \x - \xo 4:8 \xt Ips 6:22.\x*Aghe sungiela tani mae taraiem tale masi voto am kila etana va sa ateva elutulutu etaimami, me ia aue eakorokorongana urunguitaniimim.  
\v 9 \x - \xo 4:9 \xt Plm 10-12.\x*Aue emae aitauaa tee Onesimas, am kilakilaia ghe kasula ona tale masalikiimim ateae, egheelei emasinaaili uunguaane me ami aaielousiangailiia. Ilalua aue lalu auliaa etaimim isaa akapaaili voto elutulutu oia.   
\p
\v 10 \x - \xo 4:10 \xt Apos 12:12; 15:37-39; 13:13; 2 Tim 4:11.\x*Aristakus esuula masimasiaane etaimim. Etokatoka teeieghi tale ale mata voovoo. Me Mak, aloana ta Banabas ia tee esuula masimasiaane etaimim. Am nnaa inangari aghe auliaala tale uunguaane Mak; arova emae etaimim, am aikoloainia.  
\v 11 Me Iesu, la kolokoloa va Jastas, ie tee esuula masimasiaane tee etaimim. Ilotolu o taita kotolu ilotolu nonga \w aJiu|lemma="Jiu"\w* ilotolu. Ilotolu lotolu kakkauaa, me lotolu uungu teeieghi tale \w ararimangalina ateva God\w*. Lotolu kaakaarasi tani aisausieinaghi.  
\v 12 \x - \xo 4:12 \xt Kol 1:7; Plm 23-24.\x*Epapras tee ghe kasula ona tanganueimim ie tee etautau aatu masimasiaane etaimim. Ia kapuna tau ngai uungu ia Karisto Iesu. Karika enim aaitoka ta ekokkolomi sae nau ekapa atoa poli am, va am tingina akorokorongana me am matuenna me aue am kilaaili saa voto God ealona va am ghelei.  
\v 13 Aghaloanna tani aulia ngakorokorongana etaimim va ia euungu ekorokoronganaaili tani sausiem, me lo atoa tee eLaodesia me Ierapolis.  
\v 14 Luk dokta ia ami ailousiangailiia etautau aatu masimasiaane etaimim me tee Diimas.   
\p
\v 15 Me am auliaa tee masimasiaaghi ta tuemami me nengamami etoa eLaodesia, me ta vause ateva la kolokoloa va Nimpa me tee ta lo atoa la kakkauaa tale alena ateva.  
\v 16 Nau eteva lo atoa am tokatoka eKolosae am ruu tani nongo uru ngai etikirighi oia am mene laoainia me la ritia tale \w ale manga\w* ateva eLaodesia. Me am tani riti ia oia uru ngai etikirighi aghe pitiela ta aLaodesia ngatoa.  
\v 17 \x - \xo 4:17 \xt Plm 2.\x*Me am auliaa ta Akippus va, “Utani ghelei ekapa llo voto Vau eteva ghe tau aatu sio va ughelei.”   
\p
\v 18 \x - \xo 4:18 \xt 1 Ko 16:21.\x*Aghi Pol, aghe pitila isaa oia masimasiaaghi. Am annaa tokatokaaghi tale ale mata voovoo. Alooloo sae va maamasinaane God aue etoka teeiem.