\id 2TH  
\h 2 Tesalonika 
\toc3 2 Tes 
\toc1 Aiaaghaluene atikirighi uru ngai Pol ghe pitiela ta aTesalonika ngatoa 
\toc2 2 Tesalonika 
\mt2 Aiaaghaluene atikirighi uru ngai Pol ghe pitiela ta  
\mt1 aTesalonika ngatoa  
\imt1 Inangari emuemua  
\ip Pol ghe pitila aiaaghaluene atikirighi uru ngai ghe lao sio tale ale manga ateva eTesalonika tani ghelei emasalika kasina voto tale nau eteva Iesu aue emene mae. Katoa karika laghe kila amasina isaa o voto koronna ia, poli katoa tau ngai aapasunga laghe auliaala va Iesu ang ghe mene mae sio. Mene katoa laghe nnaala va karika la mene uungu, poli ghaisa ngarighi Iesu aue emene mae.  
\iot Tani kila amuemua  
\io1 Aitiutiu tale inangari \ior 1:1-2 \ior*  
\io1 Tani toka akorokorongana tale nau sesa \ior 1:3-12 \ior*  
\io1 Tau ngai ghelei saasakiaa inangari nipaopao ateva me maemaeaane Iesu \ior 2:1-17 \ior*  
\io1 Vaalua tani toka nau am toitoi maemaeaane Iesu \ior 3:1-15 \ior*  
\io1 Airuuruu tale inangari \ior 3:16-18 \ior*  
\c 1  
\p
\v 1 Aghi Pol, Saelas me Timoti,  
\p Ami pitipiti aatu ta taumattu ngatoa tale \w ale manga\w* ateva ona eTesalonika tale ararina ateae God Tamaita ia me Vau ngepona ateva Iesu \w Karisto\w*.   
\p
\v 2 \x - \xo 1:2 \xt Rom 1:7.\x*Ami looloo sae va maamasinaane me luei ekasukasu ta God Tamaita ia me Vau ngepona ateva Iesu Karisto aue etoka teeiem.   
\s1 Iesu aue esio me etaula aipolipoli ta kapuna atoa  
\p
\v 3 Uunguaaimami tani kaili emasina ta God nau ekapa atoa mausiimim, kapuimami etoa, me emaamasina tani ghelei isaa o llo voto, poli aikaaiaaimim epiipinosa anamuu nau ekapa atoa, me niaielousi eteva ta kateva kateva etaimim egheelei elao ta mene kateva ange ooroi.  
\v 4 \x - \xo 1:4 \xt 2 Ko 7:4; 1 Tes 2:19.\x*Liuna avalua o me elome tale alena ale manga akapa God, ami aasakeaa vaalua karika am maamangoo tani ghelei voto masina, me aikaaiaaimim tale isaa akapa nitootoonga me nimmarikana am ghaaghaa me am tiitingina akorokorongana.   
\p
\v 5 Isaa o voto eaapasunga va unna niaisakei God ghulughuluena tale isaa o voto, me God aue iraiem va masina am tale ararimangalina ateva, am mammarikana mausi ia o ararimagalina ateva.  
\v 6 \x - \xo 1:6 \xt Rom 12:19.\x*Nongina nighulughuluena ta matane God va eliu voto sesa ta lo atoa la gheelei voto sesa etaimim,  
\v 7 \x - \xo 1:7 \xt 1 Tes 3:13.\x*me aue etau aatu niainoana etaimim lo atoa am ghaaghaa voto sesa, me etaimami tee. Isaa o voto aue elutu nau Vau ngepona ateva Iesu ekauerekati \w epona liu\w*, tale kura ateae eramerame, tee kapuna \w ensolo\w* atoa sarasarakanaaili ila.  
\v 8 \x - \xo 1:8 \xt Ais 66:15.\x*Aue eliu voto sesa ta lo atoa karika la kilakila God me karika la nongonongo usilaa \w masi kiukiuna|lemma="masi kiukiu"\w* kapuita Vau ngepona ateva Iesu.  
\v 9 \x - \xo 1:9 \xt Ais 2:10.\x*Aue la ghaa aipolipoli tale voto sesa etaira, tale nitturu eteae tokatoka liu ia, me Vau ngepona ateva aue tiu vella tale taataraane me tale kinatama mallangina ateva  
\v 10 \x - \xo 1:10 \xt Kol 3:4.\x*tale ia o nau eteva aue emae, ita kapuna taumattu ngatoa manga ita, ita asaesae ararina ateae, me lo atoa la aiesoaa etana la gharueinia. Am tee aue am toka tee lo atoa la aiesoaa ta Iesu, poli am aiesoaa inangariimami etaimim.   
\p
\v 11 \x - \xo 1:11 \xt Kol 1:9; 1 Tes 1:2-3.\x*Poli isaa o voto etokatoka tale nannaaimami, me nau ekapa atoa ami looloo sae mausiimim, va aue God esausiem tani ghelei voto ghe koloamla tani ghelei, me tale sarasarakaniaane aue am ghelei ekapa isaa o masi voto am aloanna tani ghelei, me isaa akapa gheeleiaaimim am gheelei mausi tale aikaaiaaimim.  
\v 12 Ami looloo sae va isaa o voto elutu me aue ararina ateae kapuita Vau ngepona ateva Iesu am aamuemueia etaimim, me am etana, tale maamasinaane kapuita God ateva me Vau ngepona ateva Iesu Karisto.   
\c 2  
\s1 Tau ngai ghelei saasakiaa inangari nipaopao ateva  
\p
\v 1 Me tale maemaeaane kapuita Vau ngepona ateva Iesu \w Karisto\w*, me nivelu eitauaa ita gheelei etana, ami kookolomiem, kapuimami etoa,  
\v 2 tani rau mene nnangaili me emoiem tale taumattu la ue va nauna ateva Vau ngepona ateva ang ghe mae sio. La ghele ue va laghe nongoala tale inangari niaulia ngamuemua, o inangari laghe nongola, o inangari tale uru ngai taataraane va ghe kasula etaimami.  
\v 3 \x - \xo 2:3 \xt 1 Tim 4:1; 1 Jon 2:18; 4:3.\x*Am rau mene tau velu teva taumattu va ekameam tale teva ase salana, poli ia o nau eteva karika aue emae lomose ta nioghi vulu masi voto emae mua, me tau ngai ghelei saasakiaa inangari nipaopao ateva\f + \fr 2:3 \fq tau ngai ghelei saasakiaa inangari nipaopao ateva \ft Katoa uru ngai laghe pitila, la ghe pitila va \fqa tau ssavoto ateva.\f* aue eotua, lo ateva elaolao tale salana nitturuu.  
\v 4 \x - \xo 2:4 \xt Den 11:36; Esik 28:2.\x*Aue eghelei runga salane God, me aue easaesaea tale voto akapaaili manga, me aue etoka tale alena \w ale manga\w* ateva God, me aue eue va ia Goto ia.   
\p
\v 5 Koti am ghe kkaluaala va nau aghe tokatoka teeiem aghe aauliaa isaa o voto etaimim.  
\v 6 Me ia oia am rooroo tani kila va sa ateva egheelei rungainia, me aue vira otua tale nau eteva ang ghe suiela.  
\v 7 Ta ia o tau ngai ghelei saasakiaa inangari nipaopao ateva ange tiuaala tani apasunga uunguaa sarasarakaniaane ghe aaisuliaa, me lo ateva egheelei rungainia aue etoka gheelei rungainia, lomose ta God aue eghaa velua.  
\v 8 \x - \xo 2:8 \xt Ais 11:4; Aotu 19:15.\x*Vara me aue eotu tau ngai ghelei saasakiaa inangari nipaopao ateva, Vau ngepona ateva Iesu aue uvi ematea tale aulao paane ateva, me eturungia tale mallangi maemaeaane ateva.  
\v 9 \x - \xo 2:9 \xt Aotu 13:11-13.\x*Maemaeaa ia o tau ngai ghelei saasakiaa inangari nipaopao ateva aue elao aitauaa tee sarasarakaniaane Satana, me aue eapasunga tale asease sarasarakana, niaimatoonga me mirikolo kamena,  
\v 10 me isaa akapa ase voto sesa tani kame lo atoa aue eraula. Aue eraula, poli laghe ratila tani aielousiaa koronna kiukiu kanna God me aue la ghele saanga.  
\v 11 Liuna avalua o me God aue eghelei savisavilaa nannaaira, me aue la aikaaiaa tale llo kamena.  
\v 12 Liuna avalua o me God aue eghelei niaisakei etaira, poli karika laghe aaiesoaa tale llo koronna, ta laghe masimasiaa llo sesa.   
\s1 Inangari niaisausiaa tani tingina akorokorongana  
\p
\v 13 \x - \xo 2:13 \xt 2 Tes 1:3; Ips 1:4.\x*Uunguaaimami tani kaili emasina ta God nau ekapa atoa poli mausiimim, kapuimami etoa, Vau ngepona ateva eaailousieinam. Ami kaakaili emasina ta God ta poli aitiutiu God ghe suitoongainamla va am saanga tale uunguaane Spiriti eteva, tani manga poli am ghe aiesoaala tale koronna kiukiu kanna God.  
\v 14 Ghe koloamla tani saanga tale \w masi kiukiu\w* ami ghe poppooaa, liuna avalua o me am tee aue am ghaa mallangina ateva kapuita Vau ngepona ateva Iesu Karisto.  
\v 15 Liuna avalua o, kapuimami etoa, me am tingina akorokorongana, me am poso parasi voto ami ghe apasungaala etaimim, tale inangari am ghe nongola ta paaimami me tale uru ngai ami ghe pitila.   
\p
\v 16 Aue ia kapuita Vau ngepona ateva Iesu Karisto, me God Tamaita ia, ghe aielousieinitala, me tale maamasinaane ghe tau mae sio inangari niasarasarakana tokatoka liu me masi voto emua etaita,  
\v 17 easarasarakana urunguitaniimim, me eaisausieinam tani ghelei isaa akapa masi niuungu me inangari.   
\c 3  
\s1 Pol ghe kolomila tau ngaiesoa ngatoa tani looloo sae mausiira  
\p
\v 1 Liuna avalua o, kapuimami etoa, me am looloo sae mausiimami, me aue inangarina Vau ngepona ateva ekasu parasi ekapa see, me la oneoneainia nongina am, am ghe oneoneainia.  
\v 2 Me am looloo sae va God eghaa oghiemami tale sesa taumattu ngatoa la gheelei voto karika masina, ta poli karika va taumattu ngakapa atoa la ghaaikaaiaa ta God.  
\v 3 Me Vau ngepona ateva egheelei voto ghe uela va eghelei, me aue easarasarakanaiem, me eghelei rungainam ta sesa taumattu ngateva.  
\v 4 \x - \xo 3:4 \xt 2 Ko 7:16; Gal 5:10.\x*Ami aatoka tuutuliimami ta Vau ngepona ateva va am toka gheelei voto ami ghe aulia ngasarasarakanala etaimim, me aue am toka gheelei isaa o voto.  
\v 5 Aue Vau ngepona ateva ekatula ngaghulughuluena urunguitaniimim tani lao tale ailousiaane ateva God me nitingina asarasarakana ta \w Karisto\w*.   
\s1 Niaulia ngaotu tale uunguaa tani nim toka  
\p
\v 6 \x - \xo 3:6 \xt Rom 16:17.\x*Tale ararina ateae Vau ngepona Iesu Karisto, ami aaulia ngasarasarakana etaimim, kapuimami etoa, va am kasu emasalika ta lo atoa kapuita la nim tokatoka me karika la uusilaa inangari am ghe ghaala etaimami.  
\v 7 \x - \xo 3:7 \xt Plp 3:17.\x*Poli am kilakila vaalua tani usilaa gheeleiaaimami, karika ami ghe nim tokatoka nau ami ghe tokatoka teeiem.  
\v 8 \x - \xo 3:8 \xt 1 Tes 2:9.\x*Karika ami ghe nim namanama inana ta teva taumattu, ta ami ghe polipoli, me ami ghe uungu aanasa eleivoo me ellaa tani ghelei va ami rau mene taula maate ta teva etaimim.  
\v 9 \x - \xo 3:9 \xt 1 Ko 9:4; 1 Tes 1:6.\x*Ami ghe gheelei llo, karika va poli karika masina etaimami tani ghelei, ta ami ghe anna va ami ghe apasunga voto am aimuli tee.  
\v 10 Nau ami ghe tokatoka teeiem, ami ghe aulia ngasarasarakanala etaimim va, “Lo ateva taumattu etam aloanna tani uungu, erau mene namanama.”   
\p
\v 11 \x - \xo 3:11 \xt 1 Tim 5:13.\x*Ami nongonongo va katoa elome etaimim la nim tokatoka, karika la uungu me la nim toka aauliaa uunguaaira katoa.  
\v 12 \x - \xo 3:12 \xt 1 Tes 4:11.\x*Isaa o ase taumattu ami aulia ngasarasarakana, me aaloannaaimami tani auliaa etaira tale ararina ateae Vau ngepona ateva Iesu Karisto, va la toka rarieinila me la nama inana la uunguaa.  
\v 13 \x - \xo 3:13 \xt Gal 6:9.\x*Me ta ngetaimim, kapuimami etoa, am rau mene mangoo vulu tani ghelei voto masina.   
\p
\v 14 Arova teva etam nongo usilaa inangari niloeloe ami aauliaa tale uru ngai etikirighi oia, am tani tara tootoongainia me am rau mene ghuia, tani attara mataneia me epalata.  
\v 15 \x - \xo 3:15 \xt 1 Tes 5:14.\x*Me am rau mene taraia va tau ngai ssateeimi ia, ta poli kapuita ia, am auliaa kiena.   
\s1 Pol ghe arangiseilala  
\p
\v 16 Isaa oia, aue Vau ngepona ateva luei ia, ia aue tau aatu luei nau ekapa atoa me tale isaa akapa salana. Vau ngepona ateva aue etoka aitaua ngakapa teeiem.   
\p
\v 17 Aghi Pol apitipiti isaa oia inangari \w niarangise\w* tale nimaghi etelange, me ia oia niaimatootoongana ateva etokatoka tale isaa akapa uneghi uru ngai apitipiti, tani apasunga va aghi aghe pitila.   
\p
\v 18 Alooloo sae va aue maamasinaane kapuita Vau ngepona ateva Iesu Karisto etoka teeiem akapaaili.