\id JON - Koti Bible portions [eko] -Mozambique 2008 (web 2017) 
\h Yuunusa 
\toc1 Yuunusa 
\toc2 Yuunusa 
\toc3 Yuu 
\mt1 Yuunusa  
\c 1  
\s1 Yuunusa onintthira Nnyizinku  
\p
\v 1 Siikhu moote Nnyizinku anrumiye Yuunusa mwaana wa Amitayi yoori:  
\v 2 “Olankhe olawe sitati khuulu ya Neniive, walaleye ottuukhu, yoori miiyo kinjuwa zooshi zootakhala zaya anrettaazo.”   
\p
\v 3 Ila Yuunusa asiiliyeevo toole, khuwaza otthirela tuniya yoolepelana Neniive, antthiraka Nnyizinku. Khulawa mpakha sitati ya Yoope khusikana pankaya vapatari, yaari weettaaye Taarisi. Khuripha pasaji yawe, khweetta mpankaya yoori atthirele Taarisi, antthiraka Nnyizinku.   
\p
\v 4 Aphano, alawaka, Nnyizinku khuperekha pheevo ya waatta na pahari khutakhala khusala esaleela opwecheya pankaya.  
\v 5 Mamalinyero ooshi khwiiya awoova, wakhula mmote wayo khusala akhuwa anvekelaka nluku awe, yoori apatthe wuusurukha, na khusala atupweeza mapwattha aya mpahari, yoori eveyaveye pankaya yaya.  
\p Wakathi aya opo Yuunusa, aarettiye eeshukheliye mpurawu eettaka olala ajisahawiye.  
\v 6 Nahota khwiishukhela mpurawu mphule aari olalaamo Yuunusa, khumuuzela yoori: “Weeyo! Onlala-ni? Olankhe onvekele nluku awo! Khinjuweya anoonelaka huruma yoori anuusuru nihifwe.”   
\p
\v 7 Paata ya toole, mamalinyero khusiilana yoori: “Nlaweni neekese nasipu, ninjuwe nlupa otu anitotheliye hasara eti.” Yo khweekesa nasipu etile, khusala emoona Yuunusa.   
\p
\v 8 Khuuzeliwa Yuunusa: “Weeyo o nlupa onitotheliyeeyo hasara eti. Nkanuuze! Weeyo onkhola khazi-ni? Wala onlankha vayi? Nti awo nti-ni? Ama lihimo lawo lihimo-ni?”   
\p
\v 9 Ye khujipu araka: “Miiyo ki Mwipereewu, kinimwaaputu Nnyizinku, Mwennyewe pinku, otu ompiye nti na pahari.”   
\p
\v 10 Elottelanaka Yuunusa khuwooza yoori aari ontthira Nnyizinku. Wakathi ajuwaziyeevo etthu yaari onrettikhanelaaye, yo khwiiya ootepa woova, na khumuuzela Yuunusa: “Apho niini orettiyeeyo!”   
\p
\v 11 Pheevo yeetta otepa yaattaka, khufiyelela mamalinyero omuuzela Yuunusa: “Yoori pheevo na pahari eshapweye, fweeyo nuurettele niini?”   
\p
\v 12 Yuunusa khujipu araka: “Miiyo kajuwa yoori pheevo eti yapuwelela mwaasa wa miiyo. Apho, mwikitthempe mwikeeselele mpahari. Mwirettaru toowo, mwintta woona pahari na pheevo zinyamaliye.”   
\p
\v 13 Ila mamalinyero apale khuhintupweezazi, khwaaza ofuttha reemu na kuvu zaya zooshi yoori afiye vathi. Khuhisala ewaheya, mwaasa yoori pahari yeetta ovira etepaka otakhala.  
\v 14 Yo khukhuwa ankhuwelaka Nnyizinku araka: “Oo, Nnyizinku, ohinilikhelele nifwaka mwaasa wa pinaatamu otu, na ohinikwisele paathuli ofwa wa mwinyi otu. Zooshi zarettikhana khwa nanna olakeliyeezo.”  
\v 15 Nawiisha khuntthempaza Yuunusa khumweeselela mpahari. Aphano pahari na pheevo, zooshi khunyamala.  
\v 16 Ooniyeevo toole, mamalinyero ooshi khwiiya awoova channu na khumwaaputu Nnyizinku. Khunrettelaza twaha na theenya ahiti.   
\p
\v 17 Amweeselelaziyeevo mpahari, Nnyizinku khuperekha swi khuluyeene yoori emmize Yuunusa, ye khwiiya mmatthupo wa swi siikhu ttatthu nthana na osikhu.   
\c 2  
\s1 Olompa wa Yuunusa  
\p
\v 1 Ari mmatthupo wa swi, ye khwaaza olompa anshukhurwelaka Nnyizinku awe:   
\b  
\q1
\v 2 “Nhuzuni mwaka kankhuweliye Nnyizinku,  
\q2 na aakijipwiye.  
\q1 Mithili za ahera kaakhuwiye  
\q2 na waasiiliye huula yaka.   
\q1
\v 3 Waakitupweeziye mpahari wa wiichamo,  
\q2 nkatthi wa khilintti,  
\q1 nziko wa maati khukizukulela,  
\q2 na mawipi awo khukikhutela.   
\q1
\v 4 Miiyo khulupa yoori keekareliwa peeti-wene  
\q2 na omaasho wawo weeyo Nnyizinku.  
\q1 Kinta kirutele woona theenya  
\q2 nyuupa yawo yoottakatthiifu?   
\q1
\v 5 Maati khukifiya vakhulo,  
\q2 khilintti khukizukulela  
\q2 na mirawa khukizokonzela eeshwa yaka.   
\q1
\v 6 Khuzama mpakha vanchina la nyaako,  
\q2 tuniya ya vathi, puuro enimfukelaaye ntthu khwa siikhu zooshi.  
\q1 Ila weeyo Mbwanaaka Nnyizinku khuusuru nafusi yaka  
\q2 nkhapuri mphule.   
\q1
\v 7 Wakathi kaari osaleelaavo ofwa,  
\q2 koofikhiriye weeyo Nnyizinku,  
\q1 khuuperekheza lompa yaka,  
\q2 yoori efiye nnyupa mwawo woottakatthiifu.   
\b  
\q1
\v 8 Apale anaputwaaye sanamu zoohiina fwayita,  
\q2 antarawu tthakaraka ya Nnyizinku.   
\q1
\v 9 Ila miiyo kinteela wuushukhurwela Nnyizinku  
\q2 na maliipo a siifwa na owinkha twaha,  
\q1 na kinteela oretta eti kaahitiyeeyo,  
\q2 maana nusura ti yaawo weeyo Nnyizinku.”   
\b  
\p
\v 10 Aphano, Nnyizinku khuruma swi etile, yoori yanchuwe Yuunusa nshini wa nttima.   
\c 3  
\s1 Otafusiri wa Yuunusa sitati ya Neniive  
\p
\v 1 Aphano Nnyizinku khunruma Yuunusa swaafu ya phiiri yoori:  
\v 2 “Olankhe olawe sitati khuulu ya Neniive, walaleye ottuukhu mattakhuzi apa kinuurumaaye.”   
\p
\v 3 Ye khulankha khulawa Neniive, nkhama etthiipo Nnyizinku anrumiyeezo. Neniive yaari sitati khuluyeene ntthu aari wiishishaaye siikhu ttatthu eettaka weettetta mwentto.  
\v 4 Ila ye n'oofiya sitati etile eettettiye siikhu moote, alaleyaka yoori: “Nkatthi wa siikhu arupayiini Nnyizinku onteela opwecha Neniive.”  
\v 5 Aneniive khwiiya wonkhupali Nluku khulaleyana yoori afuke, waaza attunkhulu mpakha asimaana, ooshi khuwalaza saakhu.   
\p
\v 6 Hapari epile za Yuunusa zamfiyeliye mfwalume wa Neniive, ye khwiishukha vakhukulu yoohaakhimu, khuvula kuwo zoofwalume khuwala saakhu na khwiikhala vafuutha.  
\v 7 Aphano khuruma olaleyiwa Neniive yooshi yoori:  
\p “Khwa nzina la mfwalume na mawaziri awe:  
\p Ahiiyevo atha ntthu mmote antakhaaye oja na onywa, wala ojisa na onywisa nyama zawe, mompe zawe ama pwittipwitthi zawe.  
\v 8 Atthu ooshi awale saakhu, na awalise nyama zaya, na akhuwe khwa nzina la Nluku na kuvu zaya zooshi. Attharuwe oretta vitthu zootakhala na ohusuti.  
\v 9 Khinjuweya Nluku omwiishelaka wiiphiiriwa wawe, anoonele huruma yoori nihifwe.”   
\p
\v 10 Wakathi Nluku ooniyeevo yoori alikhaza oretta vitthu zootakhala, ye khulikha etile aari wuupuwelaaye owaarettela na khuhiwaahukhumu.   
\c 4  
\s1 Katapu ya Yuunusa na huruma ya Nnyizinku  
\p
\v 1 Erettiyeevo toole, Yuunusa khuhintuveli etile yaya, na khwiiya wookatipukha.  
\v 2 Ye khusala amuuza Nnyizinku araka: “Oo Nnyizinku aka, khahiyo eti kaalupiiye nalelo kiri onti? Ti ethiito yaakipatthisiyeeyo otthira keettaka Taarisi. Miiyo kaajuwiye yoori weeyo o Nnyizinku wa tthakaraka na wa huruma, woovilela na woopheta channu, onaahitaaye ohukhumu ila khulevelela mmana wiiyavo othupwiya.  
\v 3 Aphano Mbwanaaka okilaze nafusi yaka, kinhithari ofwa kihiiyeeni wiiya haayi.”   
\p
\v 4 Ye Nnyizinku khulupa: “Weeyo onaaye shariya yookatipukha?”   
\p
\v 5 Yuunusa aalawiye khwiikhala mashaarikhi ya sitati ethiitile. Khujeka lipantta lawe, khwiikhala vamwiivuuli, khusala aweja etthu-ni yaari weettelaaye orettikhana sitati etile.  
\v 6 Aphano, Nnyizinku khootthisa nrayi khurapela vatulu valipantta aphale aariivo Yuunusa, yoori eeye vamwiivuuli na aawuneye haari. Nrayi opule waamwinkhiye furaha ya waatta Yuunusa.  
\v 7 Ila mmeesho mwaya supuyeene, Nluku khumperekha mwanyanyama khurafuna nrayi opule, khuuma.  
\v 8 Etthamu-tthamu ya njuwa, Nluku khuperekha pheevo ya mashaarikhi yoolukuza channu, naye njuwa khusala lipiyela veeshwa vawe Yuunusa, khusala asaleela ozileya. Eviriyeevo toole, ye khusala ajitakhela ofwa, na khuri: “Toono afwataali ofwa ehiiyeeni wiiya haayi.”   
\p
\v 9 Ila Nluku khumuuzela Yuunusa: “Weeyo onaaye shariya yookatipukha mwaasa wa nrayi?” Ye khujipu: “Ayo, kinaaye! Na ki wookatipukha kintakha hatha ofwa.”   
\p
\v 10 Aphano Nnyizinku khumuuza: “Weeyo onoonela huruma nrayi opo, ohikholeleeni khaazi wala ohiwuliseeni, woottha osikhu mmote na osikhu nkina khufwa.  
\v 11 Ila Neniive awaakho atthu anzitaaye eshiriini wa miiya alufu, ahinjuwaaye othawula etthu yooshapweya wala etthu yootakhala, na nyama za waatta. Miiyo akaari oteela wiiyana huruma na sitati khuluyeene etile?”