\id RUT - Dawuro Full Bible Ethiopic Version
\ide UTF-8
\h ኡሩቶ
\toc1 ኡሩት ማጻፋ
\toc2 ኡሩቶ
\toc3 ኡሩቶ
\mt1 ኡሩት ማጻፋ
\imt ገሉዋ
\ip ኡሩት ታርኪ ሳሮተይ ኩሜዳ ታርኪያ፤ ሀ ታርኪ ቤቴዳዌ ዳናቱዋ ማጻፋን ኦደቴዳ ማካላይ ደእያ ዎድያና። ሞኣበ ጋደ አሳ ግዴዳ ኡሩታ እስራኤልያ አሳ እቱዋ ገላዱ። ደእሽን እ አስናይ ሀይቂና፥ እስራኤልያ አሳ ግዴዳ ባረ ቦሎታትዉ ሎይ ማላልስያ ሀኖታን አማነታዱ። ሄዋዳንካ ቃይ እስራኤልያ ጾሳ ሎይ ሲቃዱ። ዉርሰን በን ባረ አስና ዳባቱዋፐ እቱዋ ገላዱ። ሄ ገሉዋ ባጋና እስራኤልያ ጋድያን ዎልቃማ ካትያ ግዴዳ ዳዊተዉ ማይዛ አቶ ግድያ ካጫ ደማዱ።
\ip ዳናቱዋ ማጻፋን ደእያ ታርኪ ጾሳ አሳይ ጾሳፐ ሃኬዳ ጋሱዋን ኡንቱንታ ጋኬዳ ባሻ በስኖ። ኡሩት ማጻፋን ደእያ ታርኪ ቃይ ባረ ዴሙዋ እስራኤልያ ጾሳኮ ዛሬዳ እት አላጋ ምሽራታ አንጀቴዳነ አማነቴዳ አሳፐ እትኖ ግዳደ ፓይደቴዳ እዝ ዳንዳያ በሰ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ኑሃማ ኡሩትና ቤተሌመ ስሙሳ \ior 1:1-22\ior*
\io1 ኡሩታነ ቦኤዘ ጋከቱሳ \ior 2:1—3:18\ior*
\io1 ቦኤዘ ኡሩቶ አኩሳ \ior 4:1-22\ior*
\c 1
\ms ኑሃማ ኡሩትና ቤተሌመ ስሙሳ
\mr (1:1-22)
\s1 ኤልመሌክነ አ ሶይ አሳይ ሞኣበ በቴድኖ
\p
\v 1 እስራኤልያ ጋደ ዳናቱ ሞድያ ዎደ፥ ሄ ጋድያን ኮሻይ ደንዴዳ። እት ብታንያ ባረ ማቻትናነ ባረ ላኡ ናናነ ይሁዳ ጋድያን ቤተሌመ ካታማፐ ደንዲደ፥ ሞኣበ ጋድያ በቴዳ። 
\v 2 ሄ ብታንያ ሱንይ ኤልመሌካ፤ አ ማቻት ሱንይ ኑሃሞ፤ አ ላኡ ናና ሱንይ ማህሎናነ ኬልዎናነ። ኡንቱንቱ ይሁዳ ቤተሌመን ደእያ ኤፍራታ ያራ። ሄዋንቱ ሞኣበ ቢደ ያን ደኤድኖ።
\p
\v 3 ኑሃም አስናይ ኤልመሌክ ሀይቄዳ። እዛ ባረ ላኡ ናናቱዋን አታዱ። 
\v 4 ሄ ናናይ ሞኣበ ጋደ ማጫ ናናቱዋፐ ኦርፖነ ኡሩቶነ ጌተትያ ማቻቱዋ አኬድኖ። ሄዋን ታሙ ላይ ግድያዋ ኡቲደ፥ 
\v 5 ማህሎንነ ኬልዎንነ ላአቱካ ሀይቄድኖ። ኑሃማ ባረ አስናይካ ባረ ላኡ ናናይካ ሀይቅና ባረካ አታዱ።
\s1 ኑሃማ ኡሩትና ቤተሌመ ስማዱ
\p
\v 6 አ ሞኣበን ደኣደ፥ መና ጎዳይ ባረ አሳ እስራኤልያ ማሪደ፥ ካ ኡንቱንቶ ጋዳዋ ስሳዱ። ሞኣበ ጋድያፐ ስማናዉ ባረ ናና ማቻቱዋ ላአቱዋና ደንዳዱ፤ 
\v 7 ባረ ናና ማቻቱዋ ላአቱዋና እትፐ ባረ ደኢያሳፐ ከሳዱ። ኡንቱንቱ ጉየ ይሁዳ ጋድያ አፍያ ኦግያን ገሌድኖ።
\p
\v 8 ኑሃማ ባረ ናና ማቻቱዋ፥ “ስምተ፤ ህንተንቱ ኡባይካ ህንተንቱ አት ሶ አት ሶ ቢተ። ህንተንቱ ሀይቄዳዋንቶነ ታዉነ ኬከዳዋዳን፥ መና ጎዳይ ህንተንቶ ኬኮ። 
\v 9 ህንተንቱ ሁጲያን ሁጲያን ገልያ ሀራ አስናቱ ሶን መና ጎዳይ ዎፓ እሞ” ያጋደ ኡንቱንታ የራዱ።
\p ሽን ኡንቱንቱ ባረንቱ ቃላ ቁ ኦደ ዬኪደ፥ 
\v 10 “ኑን ኔናና ነ አሳኮ ባና” ያጌድኖ።
\p
\v 11 ሽን ኑሃማ ኡንቱንታ፥ “ሀይ ታ ናቶ፥ ስምተ። ህንተንቱ ታናና አያዉ ቢቴ? ህንተንቶ አስና ግዳናዉ አቱማ ናና ታን ሀዋፐ ጉየ የላንታየ? 
\v 12 ታ ናቶ፥ ስምተ፤ ታን ሀራ አስና ገለናዳን ኤጫክቻድ። ዎን ታን የላና ጋይታንቶነ፥ ሀቼ ቃማ ኡባ አስና ገላደ፥ አቱማ ናና የላይታንቶነ፥ 
\v 13 ሄዋንቱ ድጭ ጋካናዉ ናጋኒቴየ? ኡንቱንቱ ድራዉ ጊደ፥ አስና ገለናን አት አጋንቴየ? ታ ናቶ፥ ሄዌ ሀነናዋ ግድያዋ ህንተንቱ ኤሪታ። መና ጎዳይ ታና መቶዳዋ ድራዉ፥ ህንተንታ ጋኬዳባይ ታና ሎይ ሴሌ” ያጋዱ።
\p
\v 14 ሄዋን ኡንቱንቱ ባረንቱ ቃላ ቁ ኦደ፥ ዬኬድኖ። ያትና ኦርፓ ባረ ቦሎታቶ የራ አካደ፥ ስማ አጋዱ። ሽን ኡሩታ ኦ ባቃ ኦይቃደ እጻዱ። 
\v 15 ኑሃማ ኦ፥ “በአ፥ ነ አስና እሻ ማቻታ ባረ አሳኮነ ባረ ጾሳኮነ ስማዱ። ኔንካ እዝና ስማደ ባ” ያጋዱ።
\p
\v 16 ኡሩታ ዛራደ፥ “ታን ኔፐ ሻከታናዳን ዎይ ኔና አጋደ ጉየ ስማናዳን ታና መቶፓ። ኔን ብያሳኣ ሀቃነ ታን ባና፤ ኔን ደእያ ሳኣን ሀቃንነ ታን ደአና። ነ አሳይ ታ አሳ ግዳና፤ ነ ጾሳይ ታ ጾሳ ግዳና። 
\v 17 ኔን ሀይቂያ ሳኣን ታን ሀይቃና፤ ሄዋን ሞገታ አጋና። ሀይቆፐ አትን፥ ሀራባይ ታና ኔፐ ሻኮፐ፥ መና ጎዳይ ታና ዎ” ያጋዱ።
\p
\v 18 ኡሩታ እዝና ባናዉ ባረ ቆፋ ቃቼዳዋ ኑሃማ ኤራደ፥ ጮኡ ጋደ አጋ ባሻዱ። 
\v 19 ሄዋ ድራዉ፥ ላኡ ማጫ አሳቱ ቤተሌመ ጋካናዉ ቤድኖ። ኡንቱንቱ ቤተሌመ ጋክያ ዎደ፥ ሄ ካታማ አሳይ ኡባይ ኡንቱንቱባን ማላሌቴዳ። ቃይ ማጫ አሳቱ፥ “ሀና ኑሃሚ?” ያጌድኖ።
\p
\v 20 አ ዛራደ ኡንቱንታ፥ “ታና፥ ኑሃሞ\f + \fr 1:20 \fr*\fq ኑሃሞ፦ \fq*\ft ሀ ሱን ብለይ፥ “ጫመቴዳኖ” ግያዋ።\ft*\f* ጎፕተ፤ ‘ጫመቴዳነ’ ጊተ። አያዉ ጎፐ፥ ኡባ ዳንዳይያ ጾሳይ ታ ደኡዋ ዳርስ ጫምሴዳ። 
\v 21 ታን ኩመንን ከሳደ ባድ፤ ሽን መና ጎዳይ ታና መላ ዛሬዳ። መና ጎዳይ ታና ቱጋዪደ ኡባ ዳንዳይያ ጾሳይ ታናን ፓላባ ጋዳ። ያትና፥ ታና አያዉ ኑሃመ ጊደ ጼሲቴ?” ያጋዱ።
\p
\v 22 ሄዋዳን ሀናደ፥ ኑሃማ ባረ ናኣ ማቻት ሞኣበ ኡሩትና ስማዱ። ኡንቱንቱ ቤተሌመ ጋኬዳዌ ባንጋ ጫካይ ዶመትያ ዎድያና።
\c 2
\ms ኡሩታነ ቦኤዛ ጋከቱሳ
\mr (2:1—3:18)
\s1 ኡሩታ ቦኤዛ ጋደ ቃርምያ ቆራናዉ ባዱ
\p
\v 1 ኑሃሚው እዝ አስና ኤልመሌካ ባጋና ዳቦትያ፥ ቦኤዛ ግያ እት ኤረቴዳ ዱረ ብታኒ ደኤ። 
\v 2 እት ጋላስ ሞኣባታ ኡሩታ ኑሃሞ፥ “ታዉ ቃረትያ አሳ ካላደ ቃርምያ ቆራናዉ ካ ጫክያ ሳኣ ቦሻ?” ያጋዱ።\x - \xo 2:2 \xo*\xt ዎጋ 19:9-10፤ ዛረ. 24:10\xt*\x*
\p እዛ፥ “ኤ ታ ናተ፥ ባ” ያጋዱ።
\p
\v 3 ኡሩታ ባደ፥ ካ ጫክያ አሳ ጌዱዋፐ ቃርምያ ዶማዱ። ካጫዳን አ ቃርምያ ማጽያዋ ጋዲ ኤልመሌካ ዳቡዋ ቦኤዛ ጋደ። 
\v 4 ሄ ዎደንካ ቦኤዝ ቤተሌመ ካታማፐ ጋክ ዎዳ፤ ካ ጫክያ አሳ፥ “መና ጎዳይ ህንተንቶ ዎልቃ እሞ” ያጌዳ።
\p ኡንቱንቱካ ዛሪደ፥ “ኔናካ መና ጎዳይ አንጆ” ያጌድኖ።
\p
\v 5 ያትና ቦኤዝ ካ ጫክያዋንቱ ካፑዋ፥ “ሀና ያላጋ ማጫውና ኦኒ?” ያጊደ ኦቼዳ።
\p
\v 6 ጫክያዋንቱ ካፑ ዛሪደ፥ “ሀና ያላጋታ ኑሃምና ሞኣበ ጋድያፐ ዬዳ ሞኣበ ማጫ አሳ። 
\v 7 አ ታና፥ ‘ካ ጫክያዋንቱ ጌዱዋ ካላደ ፖቻቱዋ ግዱዋፐ ቃርምያ ማጾ?’ ጋደ ኦቻዱ። ያቴዳና ዎንታ ዮደፐ ዶማደ ሀእ ጋካናዉ፥ ጉነ ሸምፐናን ሀዋን ማጻደ ጋምኣዱ” ያጌዳ።
\p
\v 8 ቦኤዝ ኡሩቶ፥ “ታ ናተ፥ ስሳ፤ ቃርምያ ማጻናዉ ሀራ ጋደ ቦፓ። ቃይ ሀዋፐ ሀቃነ ቃጾፓ። ታ ማጫ ቆማቱዋና ሀዋን ፔሻ። 
\v 9 አሳይ ካ ጫክያ ሳኣ ጼላ ጼላደ፥ ኡንቱንቱ ጌዱዋ ካላደ ማጻ። አቱማ ቆማቱ ኔና ቦቼናዳን ታን ኡንቱንቶ ኦዳድ። ቃይ ኔና ሳምያ ዎደ፥ አቱማ ቆማቱ ትክ ዎዳ ሃ ኦቱዋኮ ባደ ኡሻ” ያጌዳ።
\p
\v 10 ኡሩታ ሶምእ ሳኣ ጋካናዉ ሆካደ ዉትሻዱ፤ “ታን እማ አሳ ግድክታ? ኔን ሀዋ ኬሻ ታዉ ቃረቴዳዌ አያ ድራሴ?” ያጋዱ።
\p
\v 11 ቦኤዝ ዛሪደ፥ “ነ አስናይ ሀይቆደፐ ዶምና፥ ኔን ነ ቦሎታትዉ ኦዳ ኩመን ኡባ ታን ስሳድ። ኔን ነ አቶ፥ ነ አዉዋነ ነ የለቴዳ ጋዲያ አጋደ፥ ሀዋፐ ካሰ ነ ኤረና አሳና ደአናዉ ዬዳዋ ታን ጌሻደ ኤራድ። 
\v 12 ኔን ሀኔዳዋ ኩሽያ መና ጎዳይ ነዉ ዛሮ። ኔን አ ቀፍያ ጋርሳን አታናዉ ዬዳ መና ጎዳይ፥ እስራኤልያ ጾሳይ ነዉ ኩመንባ እሞ” ያጌዳ።
\p
\v 13 ኡሩታ፥ “ታ ጎዳዉ፥ ኔን ታዉ ዳርሳ ቃረታዳ፤ ታን ነ ቆማቱፐ እቱዋ ጋክከ፥ ሽን ታዉ ሎኦባ ሃሳያደ፥ ታና ምንዳ” ያጋዱ።
\p
\v 14 ላጻ ምያ ዎደ ቦኤዝ ኦ፥ “ሃ ሺቃ፤ ኡክ አካደ ዎይንያ ኤሳ ጫላን ቱሻ ቱሻደ ማ” ያጌዳ። ካ ጫክያዋንቱ ማታን ኡታዱ። እዝዉ ትሻ ጺጼዳዋካ እሜዳ፤ አ ማደ ካልና፥ ቁማይ ፓላሄዳ።
\p
\v 15 ቃይካ ቃርምያ ማጻናዉ አ ደንድያ ዎደ፥ ቦኤዝ ባረ ቆማቱዋ፥ “ፖቺያ ጋርሳፐካ አ ቆሮፐካ፥ ኦ ዬላዮፕተ። 
\v 16 ኡባ ፖቺያፐካ ሾዲደ፥ እዝዉ የግ አግተ፤ እዛ ማጹ፤ ኦ አማሳሎፕተ” ያጌዳ።
\p
\v 17 ሄዋን ኡሩታ ኦማርስ ጋካናዉ ቆራዱ። ባረ ማጻ ፔሾዋ አ ቡክና፥ ታሙ ኪሎ ግራመ ባንጋ ግድያዋ ከሴዳ። 
\v 18 አ ሄ ካ ባአ አካደ፥ ካታማ ስማዱ፤ አይ ኬሻ ካ ማጻደንቶ አ ባረ ቦሎታቶ በሳዱ። ቃይ ባረ ሚሽን ፓላሂደ አቴዳ ቁማ አሄዳዋ ከሳደ እዝዉ እማዱ።
\p
\v 19 ያትና፥ እዝ ቦሎታታ ኦ፥ “ሀቼ ሀዋ ሀቃፐ ማጻዲ? ሀቃን ኦዲ? ነዉ ሀዋዳን ኬኬዳ ብታኒ አንጀቶ” ያጋዱ።
\p እዛ ባረ ኦ ፔሼዳ ጋድያ ጎዳባ ባረ ቦሎታትዉ ኦዳዱ። “ታን ሀቼ ኦደ ፔሼዳ ጋድያ ጎዳ ሱንይ ቦኤዛ” ያጋዱ።
\p
\v 20 ኑሃማ ዛራደ፥ “ሀይቄዳዋንቶካ ፓጻ ደእያዋንቶካ ባረ ኬካተ አግቤና መና ጎዳይ አንጆ” ያጋዱ። ጉጃደካ ኑሃማ ኦ፥ “ሄ ብታኒ ኑ ማታ ዳቡዋቴ፤ ኡባ ኑባ ዎዛናዉ ጋያዋንቱፐካ እቱ አ” ያጋዱ።\x - \xo 2:20 \xo*\xt ዎጋ 25:25\xt*\x*
\p
\v 21 ሞኣባታ ኡሩታ፥ “እ ኡባ ታና፥ ታ ካይ ጫከቲደ ዉራና ጋካናዉ፥ ታ ኦሳንቻቱዋፐ ሻከተናን ቃርምያ ማጻ ያጌዳ” ያጋዱ።
\p
\v 22 ኑሃማ ባረ ናኣ ማቻቶ ኡሩቶ፥ “ታ ናተ፥ ቱሙካ ቦኤዛ ጋድያን ኦያ ማጫ አሳቱዋና ቦፐ፥ ነዉ ሎአ። አያዉ ጎፐ፥ ሀራ አሳ ጋደ ቦፐ፥ ኔና አቱማ አሳይ ቦቻናዋ” ያጋዱ።
\p
\v 23 ሄዋ ድራዉ፥ ኡሩታ ቦኤዛ ማጫ ቆማቱዋኮ ሺቃደ፥ ባንጋነ ዛርጋ ጫካይ ዉራና ጋካናዉ፥ ቃርምያ ማጻደ ጋምኣዱ። ቃይ ባረ ቦሎታትና እትፐ ደኣዱ።
\c 3
\s1 ኡሩታ አስና ደማዱ
\p
\v 1 እት ጋላስ ኑሃማ ባረ ናኣ ማቻቶ፥ “ታ ናተ፥ ኔን ጊግና ደአናዉ፥ ታን ነዉ አስና ኮይንቶ ኢታኔ? 
\v 2 ኔን ኡንቱንቱና ጋምኤዳ ማጫ ቆማቱ አዉ ኪተትያ ቦኤዝ ኑዉ ማታ ዳቦ ግደኔ? ስሳ፥ እ ሀቼ ቃማ ኡዱማን ባንጋ ቡካናዋ። 
\v 3 ኔን ሜጨታ፤ ሽቱዋ ኦከታ። ያታደ ነ ሎኦ ማዩዋ ማያደ፥ ዱገ ኡዱማ ባ፤ ሽን ባደ ቦኤዝ ሚድነ ኡሽደ ስማና ጋካናዉ፥ አ አይፍያን ቤቶፓ። 
\v 4 እ ግስያ ዎደ፥ ሀቃን እ ግስንቶነ በኣደ፥ እ ገምእሾንን አ አፍላ ቃራደ፥ አ ገድሳና ግሳ ባሻ። ኔን ሀናናባ እ ነዉ ኦዳናዋ” ያጋዱ።
\p
\v 5 ኡሩታ፥ “ኔን ጌዳዋ ኡባ ታ ሀናና” ያጋዱ። 
\v 6 ሄዎ ኡሩታ ዱገ ኡዱማ ባደ፥ እዝ ቦሎታታ እዝዉ ኦዴዳባ ኡባ ሀናዱ።
\p
\v 7 ቦኤዝ ሚደ ኡሽደ ባረ ቦላ ፓሽክሴዳዋፐ ጉየ፥ ካ ኡልያ ማታን አደ ግሴዳ። ኡሩታ ሎዳን ሺቃደ፥ አ ገድያ ቃራደ፥ ገድሳና ግሳ አጋዱ። 
\v 8 ሄካ ብላሄ ግድያ ዎደ፥ ብታንያ እትባይ ዳጋንና ቤጎቲደ፥ አ ዎደ፥ እት ማጫውና አ ገድሳና ግሴዳኖ ደሜዳ።
\p
\v 9 “ሀኔ፥ ኔን ኦኔ?” ያጊደ ኦቼዳ።
\p እዛ፥ “ታን ነ ቆማቶ ኡሩቶ፤ ኔን ታ አስናዉ ማታ ዳቦ ግድያ ድራዉ፥ ታና አካ” ያጋዱ።
\p
\v 10 ቦኤዝ ዛሪደ፥ “ታ ናተ፥ መና ጎዳይ ኔና አንጆ! ሀዌ ነ ኦሻይ ኔን ካሰ ነ ቦሎታትዉ ኦዳ ኬካተፐካ አ፤ ኔን ማንቆ ዎይ ዱረ ግዴዳ ያላጋ አቱማ አሳ ኮያባካ። 
\v 11 ሀእ ስም ታ ናተ፥ ያዮፓ። ኔን ኦቼዳ ኡባ ነዉ ታን ኦና። አያዉ ጎፐ፥ ታ ካታማን ደእያ አሳይ ኡባይ ኔን ሎኦባ ሀንያ ማጫ አሳ ግድያዋ ኤሬዳ። 
\v 12 ታን ማታ ዳቦ ግድያዌ ቱማ፤ ሽን ታፐ ማታ ዳርያዌ ደኤ።\x - \xo 3:12 \xo*\xt ኡሩቶ 2:20\xt*\x* 
\v 13 ሀቼ ቃማ ሀዋን አቃ። ዎንትና እ ኔና አይሳናዉ ኮዮፐ፥ ሎአ፤ አኮ። ሽን እ አይሳናዉ ኮየናን እጾፐ፥ መና ጎዳይ ኤሮ፥ ታን ኔና አካና። ሳአይ ዎንታናዉ ሀዋን ግሳሻ” ያጌዳ።
\p
\v 14 እዛ ቦኤዛ ገድሳና ሳአይ ዎንታናዉ ግሳዱ፤ ቦኤዝ፥ “ማጫውና ካ ኡዱማ ዬዳዋ ኦንነ ኤሮፖ” ጌዳ ድራዉ፥ ኡሩታ አሳይ አሳ በኤና ዎድያን ደንዳዱ። 
\v 15 ቦኤዝ ኦ፥ “ነ ማዬዳ ቃምሽያ ሃ አሀዴ፥ ፕድ ኦ ኦይቃ” ያጌዳ። አ ኦይቂና ላታሙ ኪሎ ግራመ ባንጋ ማክ ቆሊደ፥ ኦ ባእሴዳ። አ ባአደ ጉየ ካታማ ባዱ።
\p
\v 16 ኡሩታ ባረ ቦሎታትኮ ዪና፥ ኑሃማ ኦ፥ “ታ ናተ፥ ነባይ ዋኔዴ?” ያጋደ ኦቻዱ። ብታኒ እዚው ኦዳባ ኡባ ኦዳዱ፤ 
\v 17 “ ‘ነ ቦሎታትኮ መላ ኩሸ ቦፓ’ ጊደ ሀዋ ላታሙ ኪሎ ግራመ ባንጋ እሜዳ” ያጋዱ።
\p
\v 18 ያትና፥ ኑሃማ፥ “ታ ናተ፥ አይዴ ሀናናዌንቶ በአና ጋካናዉ ናጋ። ብታኒ ሀቼ ሀ የዉዋ ዉርሰናን ሸምፐና” ያጋዱ።
\c 4
\s1 ቦኤዝ ኡሩቶ አኩሳ
\r (4:1-22)
\p
\v 1 ቦኤዝ ካታማ ፐንግያ ማታን ደእያ ጉታራ ፑደ ከሲደ፥ ያን ኡቴዳ። እ ኦዴዳ ማታ ዳቡ ያና አ። ቦኤዝ “ታ እሻዉ፥ ሃ ስማደ ሀዋን ኡታ” ያጌዳ። እ ስሚደ ኡቴዳ። 
\v 2 ቦኤዝ ሄ ካታማ ጭማቱዋፐ ታሙ አሳ ዶሪደ፥ “ሀዋን ኡትተ” ያጌዳ፤ ኡንቱንቱ ኡቴድኖ። 
\v 3 ቦኤዝ ባረ ማታ ዳቡዋ ሀዋዳን ያጌዳ፤ “ሞኣበ ጋድያፐ ስማደ ዬዳ ኑሃማ፥ ኑ እሻ ኤልመሌካ ጋድያ ባይዛዉ። 
\v 4 ሄዋ ድራዉ፥ ታን ነዉ፥ ሀዋን ኡቴዳ አሳ ስንንነ ታ ካታማ ጭማቱዋ ስንን፥ ‘ሻማ’ ጋደ ኦዳናዉ ቆፓድ። ኔን ዎዛናዉ ኮዮፐ ዎዛ፤ ኮያና ዮፐ፥ ታን ኤራናዉ ታዉ ኦዳ። አያዉ ጎፐ፥ ዎዛናዉ ማታይ ደእያዌ ኔፐ ሀራ አሳይ ባዋ፤ ኔፐ ካላደ ታን ደአይ” ያጌዳ።
\p እ፥ “ታን ዎዛና” ያጌዳ።
\p
\v 5 ቦኤዝ፥ “ጋድያ ናኦምፐ ሻምያ ጋላስ፥ አምአቶ ኡሩቶ አካሳ፤ ያቶፐ፥ ሀይቄዳዋ ሱንይ አ ላታ ጋድያን ጼሰታናዋ” ያጌዳ።
\p
\v 6 ሀ ማታ ዳቡ፥ “ሄዋ ግዶፐ፥ ታን ዎዛናዉ ዳንዳይከ፤ አያዉ ጎፐ፥ ሄዌ ታና ታ ቡዞ ላታ ጋድያ ባይዝሳና። ሄዋ ኔን ነዉ ዎዛ፤ ታን ዳንዳይከ” ያጌዳ።
\p
\v 7 በን ዎደ እስራኤልያ ጋድያን ኦንነ አቁዋ ዎዞፐ ዎይ ላሞፐ፥ ዛልእያ ዱናዉ እት ባጋይ ባረ ጫማ ገድያፐ ሾዲደ፥ ህንኮ ባጋዋ እሜዳ። እስራኤልያ ጋድያን እትባ እቱዋፐ እቶ ሼያ ማራይ ሄዋ።\x - \xo 4:7-8 \xo*\xt ዛረ. 25:9\xt*\x* 
\v 8 ሄዋ ድራዉ፥ ሄ ማታ ዳቡ ቦኤዛ፥ “ኔን ሻማ” ያጊደ፥ ባረ ጫማ ገድያፐ ሾዴዳ።
\p
\v 9 ያትና፥ ቦኤዝ ጭማቱዋነ አሳ ኡባ፥ “ታን ኤልመሌካዉነ ከልዎናዉነ ማእሎናዉ ደእያዋ ኡባ ናኦምፐ ሻሜዳዎ ሀቼ ህንተንቱ ማርካ። 
\v 10 ቃይ ሀይቄዳዋ ሱንይ ኡንቱንቱ ሶ አሳ ሱን ግዶፐ ዎይ ካታማ አሳ ማዝጎባፐ የናዳን፥ አ ሱን አ ላታ ጋድያን ጼስሳናዉ ማእሎና አምአቶ ኡሩቶካ ታን አክያዎ ሀቼ ህንተንቱ ማርካ” ያጌዳ።\x - \xo 4:10 \xo*\xt ዛረ. 25:5-6\xt*\x*
\p
\v 11 ፐንገ ጉታራን ደእያ ጭማቱነ አሳይ ኡባይ፥ “ኤ፥ ሀዎ ኑን ማርካ! መና ጎዳይ ሀኖ ነ ሶ ይያ ማቻቶ፥ እስራኤልያ አሳዉ ማይዛ አቶ ግዴዳ ራሄልዳንነ ልያዳን ኦ። ኔንካ ኤፍራታን ዱረ ግዴዳ ነ ሱንይ ቤተሌመን ኤረቶ።\x - \xo 4:11 \xo*\xt ዶመ 29:31\xt*\x* 
\v 12 መና ጎዳይ ሀ ሎአ ያላጋ ማቻትፐ ነዉ እምያ ዛርያን፥ ትእማራ ይሁዳዉ የሌዳ ፓሬሳ ጎለን ሀኖ” ያጌዳ።\x - \xo 4:12 \xo*\xt ዶመ 38:27-30\xt*\x*
\s1 ቦኤዛ የለታ
\p
\v 13 ሄዋዳን ኦደ፥ ቦኤዝ ኡሩቶ አኬዳ፤ አዉ ማቻቶ ግዳዱ። መና ጎዳይ እዝዉ ኡሉዋን የሉዋ እምና፥ አቱማ ናኣ የላዱ። 
\v 14 ማጫ አሳቱ ኑሃሞ፥ “ሀቼ ኔና ሄማናዉ ነዉ ናኣ ናኣ ይስቤና መና ጎዳይ ጋላተቶ! አ ሱንይ እስራኤልያን ኤረቶ! 
\v 15 እ ነዉ ሳኣ ኬክሳና፤ ኔን ኤጭያ ዎድያን ኔና እ ሄማና። አያዉ ጎፐ፥ ኔና ዶስያና፥ ላፑን አቱማ ናናፐካ አ ነዉ ኬክያኖ፥ ነ ናኣ ማቻታ አ የላዱ” ያጌድኖ።
\p
\v 16 ኑሃማ ዬራ አካደ እድማዱ፤ ያታደ አ ድቻዱ። 
\v 17 እ ሾሩዋን ደእያ ማጫ አሳቱ፥ “ኑሃሚው አቱማ ናአይ የለቴዳ” ያጊደ አ ዮቤዳ ሱንድኖ። ዮቤድ ዳዊተ አዉዋ እሰያ የሌዳዋ።
\p
\v 18 ፓሬሳ የለታይ ሀዋፐ ካሊደ ጻፈቴዳዋዳን: ፓሬስ ሄጽሮና የሌዳ፤ 
\v 19 ሄጽሮን ራማ የሌዳ፤ ራም አምናዳባ የሌዳ፤ 
\v 20 አምናዳበ ናአሶና የሌዳ፤ ናአሶነ ሳልሞና የሌዳ፤ 
\v 21 ሳልሞነ ቦኤዛ የሌዳ፤ ቦኤዝ ዮቤዳ የሌዳ፤ 
\v 22 ዮቤድ እሰያ የሌዳ፤ እሰይ ዳዊታ የሌዳ።