\id PHP - Dawuro Full Bible Ethiopic Version
\ide UTF-8
\h ፕልጵስዮሳ
\toc1 ጳዉሎስ ፕልጵስዮሳ አሳዉ ጻፌዳ ኪታ
\toc2 ፕልጵስዮሳ
\toc3 ፕልጵ.
\mt2 ጳዉሎስ
\mt1 ፕልጵስዮሳ አሳዉ
\mt2 ጻፌዳ ኪታ
\imt ገሉዋ
\ip ጳዉሎስ ፕልጵስዮሳ አሳዉ ጻፌዳ ኪታይ ጻፈቴዳዌ፥ ማቅዶንያ ግዱዋን ደእያ ሮመን ኦሞደቴዳ ፕልጵስዮሳ ጌተትያ ጋድያን ደእያ አማንያዋንቱሳ። ሀዋንቱ ጳዉሎስ ኮይሮ አማንደ ሺሼዳዋንታ። ኡንቱንቱ ሮመ ጋደ የለታ ግዶ ድራዉነ ቃይካ ካረ ጋደፐ ዬዳ ዎጋንነ አማኑዋን ዳሮፐ አዪኖ። ጳዉሎሳ ቦላን ኡንቱንቱ ዳሮፐ ሀንቅቴዳ ጋሱካ ሀዋ (ኪታ 16:20)። ሀ ኪታይ ጻፈቴዳዌ፥ ሀራ አማንያ ኦሳንቻቱ ጳዉሎሳ ቆፋ ጳልቂ ጳልቂደ ዋይስያ ዎድያናነ ፕልጵስዮሳ አማንያዋንቱ ግዶን ደንዴዳ ዎርዶ ትምርትያ ጋሱዋን አ ዎዛናይ ዳሮ ካዮቲደ መኤዳ ዎደነ ቃሾ ጎልያን እ ደእያ ዎድያና። ግዶ ሽን፥ ጳዉሎስ የሱስ ክርስቶሳ ምንሲደ አማንያ አሳ ግዴዳ ድራዉ፥ ሀ ኪታ ቦላን ቆንጪደ ቤትያዌ ናሸቻነ ኩመን አማነትያዋ።
\ip ጳዉሎስ ሀ ኪታ ጻፌዳ ኮይሮ ጋሱ አ መቱዋ ዎደ አ ማዳናዉ ፕልጵስዮሳ አማንያ አሳይ እሞታ አዉ ኪቴዳ ድራዉ፥ ኡንቱንታ ጋላታናሳ። አ ቦላንካ ኡንቱንቱ ቦላንካ ዱማ ዱማ መቱ ጋኬዳዋ ግዶፐካ፥ ኡንቱንቱ ጻላና ማላነ ኩመን አማነቲደ ደአና ማላ፥ ሀ ጋከቴዳ እንጅያን ኡንቱንታ መን። አዩዋነ ኦቶሩዋ ድጊደ፥ የሱስ ክርስቶሳ አሽከተን ኡንቱንቱ ኩማና ማላ፥ ምንሲደ ኡንቱንታ ሀሳይሴዳ። የሱስ ክርስቶሳና እትፐ ግዴዳዋን ኡንቱንቱ ደሜዳ ደኡ ጾሳ አ ኬካተፐ ፑልቴዳዋነ ኡንቱንቱ አማኑዋን አኬዳዋ ግድያዋፐ አትን፥ አይሁዳቱዋ ዎጋቱዋ ፖልያዋን ቤቴዳዋ ግደናዋ ኡንቱንታ ሀሳይሴ። የሱስ ክርስቶሳና እቱዋ ግዲደ ደእያ ኡባቶ ጾሳይ እምያ ሳሮተባነ ናሸቻባ ኡንቱንቶ ጻፌ።
\ip ሀ ኪታይ ኤረትያዌ ናሸቻ፥ አማነትያዋ፥ እትፐተነ ክርስትና አማኑዋንነ ደኡዋን ምኒደ ደእያዋ ጌሺደ በስያዋና። ሄዋ ቦላካ ጉጂደ፥ ጳዉሎስ ፕልጵስዮሳን ደእያ አማንያ አሳቱዋ ሲቅያ ዎልቃማ ሲቁዋ ቆንጭሴ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ገሉዋ \ior 1:1-11\ior*
\io1 ጳዉሎሳዉ ደኤዳ ደኡዋ ሀኖታ \ior 1:12-26\ior*
\io1 ክርስትና ደኡዋ ሌምሱዋ \ior 1:27—2:18\ior*
\io1 ጽሞቶሳዉነ ኤጳፍሮዲቱሳዉ ደእያ ቆፋ \ior 2:19-30\ior*
\io1 አማኑዋ ኤቀትያዋንቱፐ ናገታና ማላ ኦደቴዳዋ \ior 3:1—4:9\ior*
\io1 ጳዉሎስ ፕልጵስዮሳ አማንያዋንቶ ሺሼዳ ጋላታነ ማቁዋ \ior 4:10-20\ior*
\io1 ዉርሰ ቁትያ \ior 4:21-23\ior*
\c 1
\s1 ሳሮታ
\p
\v 1 ኑን የሱስ ክርስቶሳ ኦሳንቻቱ ጳዉሎስነ ጽሞቶስ፥ ክርስቶሳ የሱሳን ደእያዋንቶ፥ ፕልጵስዮሳ ግያ ካታማን ደእያ ጌሻቶ ኡባቶ፥ አማንያዋንታ ካለያዋንቶነ ማድያዋንቶ ሀ ዳብዳቢያ ጻፌቶ።
\p
\v 2 ኑ አዉዋ ጾሳፐነ ጎዳ የሱስ ክርስቶሳፐ አ ኬካተይነ ሳሮተይ ህንተንቶ ግዶ።
\s1 ጳዉሎስ ዎሴዳ ጋላታ ዎሳ
\p
\v 3 ታን ህንተና ሀሳይያ ዎደ ኡባን ታ ጾሳ ጋላታይ። 
\v 4-5 ህንተ ኮይሮ ጋላሳፐ ሀኖ ጋካናዉ፥ ምሽራቹዋ ቃላ ኦድያዋን ታና ማዴዳ ድራዉ፥ ታን ኡባ ዎደ ህንተንቶ ኡባዉ ናሸቻን ጾሳ ዎሳይ። 
\v 6 ቃይ ህንተንቱ ግዶን ሎኦ ኦሱዋ ዶሜዳ ጾሳይ፥ ክርስቶስ የሱስ ስምያ ጋላሳይ ጋካናዉ ፖላናዋ ኤራይ።
\p
\v 7 ታን ህንተንቶ ኡባዉ ሄዋዳን ቆፓናዉ በሴ፤ አያዉ ጎፐ፥ ታን ህንተና ኡባ ዎደ ሀሳያይ። ሀእ ታን ቃሹዋን ደእያዋንነ ዎንጋላዉ ሞተትያዋን፥ ቃይ ዎንጋላ ምንሳ ኤስያዋንነ፥ ጾሳይ ታዉ ካጬዳ ካጫ ህንተካ ታናና ግሽ አኬድታ። 
\v 8 አያዉ ጎፐ፥ ታን ህንተና ኡባቱዋ ክርስቶስ የሱሳፐ ይያ ሲቁዋን አይ ኬና ሲቅንቶ፥ ጾሳይ ታዉ ማርካ።
\p
\v 9-10 ቃይ ታን ህንተንቶ ጾሳ ዎስያዌ ሀዋ፤ ሎኦባ አያኔካ ዶራናዉ ህንተንቱ ዳንዳያናዳንነ፥ ቃይ ህንተንቱ ሲቁ ቱሙ ኤራተናነ አኬካ ኡባና እትፐ ጉጅ ጉጅ ድጫናዳን፥ ጾሳ ዎሳይ፤ ያቲደ ክርስቶስ ስምያ ጋላሳን ህንተንቱ ሱረነ ፖኩ ባይናዋንታ ግዳና። 
\v 11 ቃይ ህንተንቱ ሸምፑካ ጾሳ ቦንቾነ ጋላታዉ የሱስ ክርስቶሳ ባጋና ቤትያ ጽሎተ አይፍያ አይፋና።
\s1 ጳዉሎሳ ቃሹ ዎንጋላይ አካናዋ ድግቤና
\p
\v 12 ታናዳን ጾሳ ካልያዋንቶ፥ ሀ ታና ጋኬዳዌ ምሽራቹዋ ቃላይ አካናዳን ቱሙ ማዴዳዋ ህንተንቱ ኤራና ማላ ኮያይ። 
\v 13 ታን ክርስቶሳ ድራዉ ቃሸቴዳዋ፥ ካትያ ጎልያ ናግያ ኡባቱነ ሀዋን ደእያ ሀራቱ ኡባቱ ኤሪኖ። 
\v 14 ቃይ ታን ቃሸቴዳዌ ኑ እሻቱዋፐ ዳርያዋንቱ ጎዳን ሎይ አማነቲደ፥ ጾሳ ቃላ ያሽ ባይናን ካሰዋፐ ጻሊደ ኦዳናዳን ማዴዳ።
\p
\v 15 ቱሙፐ እቱ እቱ ቃናትያ ድራዉነ ፓሉምያ ድራዉ፥ ክርስቶሳዋ ኦዲኖ፤ ሽን ሀራንቱ ሎኦ አሙዋን ኦዲኖ። 
\v 16 ሀዋንቱ ጾሳይ ታዉ ዎንጋላ ናግያ ኦሱዋ እሜዳ ድራዉ፥ ሲቂደ ቃላ ኦዲኖ። 
\v 17 ሽን የኮንቱ ታን ቃሹዋን ደእሽን፥ ታ ቦላ ዋይያ አሀናዋ ኡንቱንቶ ማላትና፥ ባረና ሲቅያ ዎልቃማ አሙዋን ክርስቶሳዋ ኦድኖፐ አትን፥ ዎዛናፐ ኦድክኖ።
\p
\v 18 አይነ ባዋ፤ ማላትስያ ኦዶነ ግዶ ዎይ ቱሙ ኦዶነ ግዶ፥ አይ ኦግያንነ ክርስቶሳዋ ኦዶፐ፥ ታን ሄዋን ናሸታይ። ስንናዉካ ቃይ ታን ናሸታና። 
\v 19 አያዉ ጎፐ፥ ታን ህንተንቱ ዎሳንነ የሱስ ክርስቶሳ አያናፐ ይያ ማዱዋን አታናዋ ኤራይ። 
\v 20 ታ ዎልቃማ አሙነ ጾሳፐ አካና ጋደ ታን ናሸቻን ናግያ ናጉ አዬ ጎፐ፥ ታን ፓጻ ደእናካ ዎይ ሀይቂናካ ያየናን፥ ካሰዋዳን ሀእካ ታ ኩመን አሳተን ክርስቶስ ቦንቼታናዋፐ አትን፥ ታን ሀራይ አቶ እትባንካ ዬላተናን አታናሳ። 
\v 21 አያዉ ጎፐ፥ ታዉ ደኡ ክርስቶሳ፤ ቃይ ሀይቁካ ታዉ ጎአ። 
\v 22 ሽን ታን ፓጻ ደእያዋን ዳሮ ጎእያዋ ኦናዋ ግዶፐ፥ ሀቃዋ ዶራነንቶ ታዉ ኤረተና። 
\v 23 ታን ሀ ላኡ የዋቱዋን መቶታይ፤ ሀ ደኡዋፐ ሻከታናዉነ ቃይ ክርስቶሳና እትፐ ደአናዉ አሞታይ፤ ክርስቶሳና እትፐ ደእያዌ ኡባፐ አዳ ዳሮ ሎኦባ። 
\v 24 ሽን ታን ሀይቂያዋፐ ህንተንቱ ድራዉ ፓጻ ደእያዌ ህንተና ዳሮ ኮሽያዋ።
\p
\v 25 ሀዌ ቱማ ግድያዋ ታን ጌሻደ ኤራይ፤ ቃይ አማኑዋን ህንተንቱ ድጫናዳንነ ናሸታናዳን፥ ታን ህንተናና ኡባና ፓጻ ደአና። 
\v 26 ሄዋ ድራዉ፥ ታን ህንተናና ላኤንዋ ይያ ዎደ፥ ክርስቶሳ የሱሳና ህንተ ደእያ ደኡዋን፥ ታባን ጬቀትያባይ ህንተንቶ ዳራና።
\p
\v 27 ግዶፐካ፥ ህንተንቱ ህንተንቱ ሁጰዉ ክርስቶሳ ዎንጋላዉ በስያ ደኡዋ ደእተ፤ ታን ህንተና ባደ ዎይ በአና ይና፥ ህንተንቱ እት ቆፋን ምኒደ ኤቄዳዋነ፥ ቃይ ዎንጋላ አማኖ እት ዎዛና ግዲደ እትፐ ባጸትያዋ ስሳና። 
\v 28 ህንተ ሞርከቶ አያንካ ያዮፕተ፤ ሄዌ ኡንቱንቶ ኡንቱንቱ ባሻ ሽሴ፤ ሽን ጾሳይ ህንተና ጾንስያ ድራዉ፥ ህንተንቶ አቶተ ሽሴ። 
\v 29 አያዉ ጎፐ፥ ክርስቶሳዉ ኦያ ካጫይ ህንተና ጋኬዳዌ ህንተንቱ አን አማናና ጻላላሳ ግደናን አ ድራዉ ዋይያካ አካናሳ። 
\v 30 ታን ካሰ ባጸትሽን ህንተንቱ በኤዳዋ ማላ ባጺነ ቃይ ሀእካ ታን ባጸትያዋ ህንተንቱ ስስያዋ ማላይ ህንተና ጋኬዳ።
\c 2
\s1 ክርስቶስ ባረና ካዉሼዳዋ ሌምሱዋ
\p
\v 1 ክርስቶሳን ህንተንቱ ደእያ ደኡ ህንተና ዎዛን? አ ሲቁ ህንተና መን? ጌሻ አያናና ህንተንቶ እትፐተይ ደኢ? ህንተ እቱ እቶ ኬኪቴኔ ቃረቲቴ? 
\v 2 ያቶፐ፥ ህንተንቱ ቆፋን፥ ሲቁዋን፥ ዎዛናንነ ቆፋ ፖሉዋን እቱዋ ግዲደ፥ ታና ፖሎ ናሸችተ። 
\v 3 ህንተና ሲቅያዋን ዎይ ጬቀታናዉ ኮይያ መላ አሙዋን እትባነ ኦፕተ፤ ሽን እቱ እቱዋፐ ቃይ ያጊደ ቆፐናን፥ እቱ እቶ ህንተንቱ ሁጲያ ካዉሽተ። 
\v 4 ቃይ እቱ እቱዋ ጎእያዋ ኮያናፐ አትን፥ ህንተንቱ ሁጰ ጻላላ ጎእያዋ ኮዮፕተ።
\p
\v 5 ክርስቶሳ የሱሳን ደእያ ሀ አሽከተ ቆፋይ ቃይ ህንተናንካ ደአናዉ በሴ።
\q1
\v 6 እ ኡባ ዎደ ጾሳ ግዲደ ደኤዳ፤
\q2 ሽን እ ዎልቃን ጾሳ ኬና ግድያ ማታይ ደእያዋ በስያዋዳን ፓይድቤና።
\q1
\v 7 ሽን እ ባረ ሸንያን ኡባባ አጊደ፥\f + \fr 2:7 \fr*\fk ኡባባ አጊደ፦ \fk*\ft እ ባረና መላ ኦዳ ጉሳ።\ft*\f*
\q2 አይልያ መታ አኬዳ፤
\q2 ቃይ አሳ ማላቲደ ቆንጬዳ።
\q1
\v 8 እ ባረና ካዉሼዳ፤
\q2 ሀይቆ፥ ኡባ ሀራይ አቶ፥
\q2 ማስቃልያ ቦላ ሀይቃናዉካ አዛዘቴዳ።
\q1
\v 9 ሄዋ ድራዉ፥ ጾሳይ አ ሎይ ቁ ቁ ኦዳ፤
\q2 ቃይ ሱን ኡባፐካ አያ
\q2 ቃ ሱን አዉ እሜዳ።
\q1
\v 10 ሄዋ ድራዉ፥ ሳሉዋንነ ሳኣን፥
\q2 ሳኣፐ ጋርሳን ደእያ ኡባይ፥
\q1 የሱሳ ሱን ቦንቻናዉ ጉልባታና።\x - \xo 2:10-11 \xo*\xt ኢሳ. 45:23\xt*\x*
\q1
\v 11 ቃይ አሳይ ኡባይ የሱስ ክርስቶስ ጎዳ ያጊደ፥
\q2 ጾሳ አዉዋ ቦንቾ ማርካታና።
\s1 ሀ ሳኣን ደእያ አሳዉ ፖኦ ግድያዋ
\p
\v 12 ሄዋ ድራዉ፥ ታ ዳባቶ፥ ታን ህንተናና ደእያ ዎደ ኡባን ህንተንቱ ታዉ አዛዘቴዳዋዳን፥ ሀእ ታን ህንተንቱ ማታን ደኤና ዎደካ፥ ህንተንቱ ካሰዋፐ አደ ታዉ አዛዘታናዉ በሴ፤ ያሻተንነ ኮኮርሳን ህንተንቱ አቶተ ፖላናዉ ኦተ። 
\v 13 አያዉ ጎፐ፥ ጾሳይ ህንተና ባረዉ ኤኖ ጊሳናዳንነ ቃይ እ ቆፔዳዋ ህንተንቱ ኦናዳን ህንተንቱ ግዶን ኡባ ዎደ ኦ።
\p
\v 14-15 ጌላነ ናጋራንቻ አሳ ግዶን ፖኩ ባይናዋንታ፥ ጌሻቱዋ፥ ጾሳ ናናቱዋዳንካ ፖኩ ባይናዋንታ ግድተ፤ ቃይ ዙዙመናን ዎይ ኢታባ ቆፐናን ኡባባ ኦተ። ሄ አሳ ግዶንካ ሳሉዋን ፖእያ ጾልንትያዳን ፖኢደ፥\x - \xo 2:14-15 \xo*\xt ዛረ. 32:5\xt*\x* 
\v 16 ደኡዋ ምሽራቹዋ ቃላ ኡንቱንቶ ኦድተ፤ ሄ ዎደ ታ ዳቡራይነ ታ ኦሱ መላ ይቤናዌ ኤረትያ ድራዉ፥ ክርስቶስ ስምያ ጋላስ ታን ህንተናን ጬቀታና።
\p
\v 17 ሀራይ አቶ ህንተንቱ አማኑ ጾሳዉ ያርሽያ ያርሹዋ ቦላ ታ ሱይ ኡሻ ያርሹዋዳን ጉኮፐካ፥ ታን ናሸታይ፤ ህንተናና ኡባና እትፐ ናሸታይ። 
\v 18 ሄዋዳን ህንተካ ቃይ ናሸታናዉ በሴ፤ ታናና እትፐ ናሸትተ።
\s1 ጽሞቶስነ ኤፓፍሮድቶስ ኦዳ ኦሱዋ
\p
\v 19 ሽን ታን ህንተንቱ ደኡዋባ ስሳደ ናሸታናዳን፥ ጽሞቶሳ ህንተኮ ኤለካ የዳናዋ ጎዳ የሱሳን አማነታይ። 
\v 20 አያዉ ጎፐ፥ ህንተንቱ ደኡዋባዉ ዎዛናፐ ህርግያ አ ማላ አሳይ ሀራይ ኦንነ ታዉ ባዋ። 
\v 21 አያዉ ጎፐ፥ ሀራቱ ኡባቱ ባረንቱ ሁጰ ጎኣ ኮዪኖ፤ የሱስ ክርስቶሳዋ ኮይክኖ። 
\v 22 ሽን ናአይ ባረ አቡ ኦያዋዳን፥ ጽሞቶስ ታናና እትፐ ግዲደ፥ ዎንጋላ ኦሱዋ ኦዳዋን፥ አማነትያ አሳ ግድያዋ ኤርሴዳዋ ህንተንቱ ኤሪታ። 
\v 23 ሄዋ ድራዉ፥ ታን የዉ ሀንያዋ በኣደ፥ ኤለካ አ ህንተኮ የዳና ጋደ ቆፓይ። 
\v 24 ታን ታ ሁጰዉ ማታ ዎድያን ህንተኮ ባናዋ ጎዳን አማነታይ።
\p
\v 25 ሽን ታን ታ እሻ ኤፓፍሮድቶሳ፥ ታናና እትፐ ታ ባጋ ግዲደ ኦዳዋ፥ ኦለቴዳዋነ፥ ቃይ ታና ማድያዋን ህንተንቶ ኪተቲደ ኦዳዋ ህንተኮ ኪታናዉ ኮሽያዋ ቆፓድ። 
\v 26 አያዉ ጎፐ፥ እ ህንተና ኡባ በአናዉ ላሞቴ፤ ቃይ እ ሳከቴዳዋ ህንተንቱ ስሴዳ ድራዉ፥ ባረ ዎዛናን ዳሮ መቶቴ። 
\v 27 እ ቱሙ ሳከቲደ፥ ሀይቂ አቴዳ፤ ሽን ጾሳይ አዉ ቃረቴዳ፤ አ ጻላላዉ ግደናን ካዩ ካዩዋ ቦላ ጉጀተናዳን፥ ታዉካ ቃረቴዳ።
\p
\v 28 ስም ህንተንቱ ላኤንዋ አ በኢደ ናሸታናዳን፥ ታዉካ ታ ዎዛና ካዩ እርጻናዳን፥ ታን ኤለካ አ ህንተኮ የዳና። 
\v 29 ሄዋ ድራዉ፥ ጎዳን ደእያ እሻዳን፥ ኩመን ናሸቻን አ ሞክተ፤ ቃይ አ ማላትያ አሳ ኡባካ ቦንችተ። 
\v 30 አያዉ ጎፐ፥ ህንተንቱ ህንተንቱ ሁጰዉ ታና ማዳና ዳንዳየና ማዱዋ ማዳናዉ፥ ክርስቶሳ ኦሱዋ ድራዉ፥ ባረ ሸምፑዋ ሸነኮ ጊደ፥ ሀይቂ አቴዳ።
\c 3
\s1 ቱሙ ጽሎተ
\p
\v 1 ዉርሰን፥ ታናዳን ጾሳ ካልያዋንቶ፥ ጎዳይ ህንተንቶ ናሸቻ እሞ። ታን ካሰ ጻፌዳዋ ዛረደ ጻፍያዌ ታና ዋይሰና፤ ቃይ ሄ ጻፍያዌ ህንተና ናጋና።
\p
\v 2 ኢታባ ኦያዋንቱፐ፥ ሄ ካናቱዋ ኤሻይ ደእያዋንቱፐ፥ ቃጻራይ ኮሼ ግያ አሳቱዋፐ ናገትተ። 
\v 3 አያዉ ጎፐ፥ ኑን ጾሳ ጌሻ አያናን ጾሳዉ ጎይንያ ድራዉነ ኑ ደኡዋን ጎዳ ክርስቶሳ የሱሳን ናሸትያ ድራዉ፥ ቱሙ ቃጻራ ቃጻረቴዳዋንታ፤ አሳተ ቦላ ኦሰትያዋን አማኖኮ።
\p
\v 4 ቃይ ታዉ ታ ሁጲያንካ ታ አሳተን አማነትያዌ ደኤ። አይ አሳይነ ባረ አሳተን አማነትያዌ ባረዉ ደኤ ጊደ ቆፖፐ፥ ታን አፐ ሎይ አይ። 
\v 5 ታን የለቶደፐ ሆስፑን ጋላሳን\f + \fr 3:5 \fr*\fq ታን የለቶደፐ ሆስፑን ጋላሳን፦ \fq*\ft ሀዌ አይሁድያ አቱማ ናናይ የለቶደፐ ሆስፑን ጋላሳን ቃጻረትያዋ በሴ።\ft*\f* ቃጻረታድ። ታን የለታን እስራኤልያ፤ ቢንያማ ዛረ፤ ዋላካይ ባይና አይሁዳ አሳ። አይሁዳ ህግያ ናግያዋን ግዶፐ፥ ታን ፓርሳዌ፤ 
\v 6 አይሁዳ አማኖ ሴላ ግዶፐ፥ ታን አማንያዋንታ ዋይሳድ፤ እት ኡራይ ሙሴ ህገዉ አዛዘቲደ ጽልያዋ ባጋ ግዶፐ፥ ታናን ፖኮባይ ቤትቤና።
\p
\v 7 ሽን ታና ጎእያ ሄ ኡባባ ክርስቶሳ ድራዉ ባዬዳዋዳን ፓይዳይ። 
\v 8-9 ቱማካ፥ ሄዋንቱ ጻላላ ግደና፤ ታን ታ ጎዳ ክርስቶስ የሱሳ ኤርያዌ ኡባባፐ ሎይ አያ ድራዉ፥ ኡባባ ታና ሙለካ ጎኤናዋዳን ፓይዳይ፤ ታን አ ድራዉ ኡባባ የጋ ባሻድ። ክርስቶሳ ደማናዉነ አናና ደአናዉ ኡባባ ዎራ ኦሌዳዋዳን ፓይዳይ፤ ታን ሙሴ ህገዉ አዛዘታደ ደምያ ታ ሁጰ ጽሎተይ ታዉ ባዋ። ክርስቶሳ አማንና፥ ጾሳይ እምያ ጽሎተይ፥ አማኑዋን ጾሳ ማታፐ ይያ ጽሎተይ ታዉ ሀእ ደኤ። 
\v 10-11 ታን ክርስቶሳነ አ ደንዱዋ ዎልቃ ኤራናዉ ኮያይ፤ ያታደ ታን ታ ሁጰዉ ሀይቁዋፐ ደንዳና ያግያዋን፥ አ ዋይያ አናና ዋየታናዉነ አ ሀይቁዋን አ ማላታናዉ አሞታይ።
\s1 ጋክያሳ ጋካናዉ ዎጽያዋ
\p
\v 12 ታን ሀእ ደማ ድጋድ ዎይ ታናን ባል ባዋ ጊከ። ሽን ክርስቶስ የሱስ ታና ባረዉ ኦዳ ዎይታ ደማና ጋደ ኤሌላይ። 
\v 13 ታናዳን ጾሳ ካልያዋንቶ፥ ታን ሄዋ ደማ ድጋድ ጋደ ቆፕከ፤ ሽን ታን እትባ ኦይ፤ ታፐ ጉየና ደእያዋ ዶጋደ ስንን ደእያዋ ኦይቃናዉ ዋታይ። 
\v 14 ጾሳይ ክርስቶስ የሱሳ ባጋና ቦላ ደኦ ጼስያ ዎይታ አካናዉ፥ ታ ጋካናዉ ዎጻይ።
\p
\v 15 ስም ኑን አያናን ምኔዳዋንቱ ኡባቱ ሀዋ ቆፓናዉ በሴ፤ ቃይ ህንተፐ አማሬዳዋንቶ አያንነ ዱማ ቆፋይ ደኦፐ፥ ሄዋካ ጾሳይ ህንተንቶ ቆንጭሳና። 
\v 16 ግዶፐካ፥ ኑን ሀኖ ጋካናዉ ደኤዳ ማራዳን፥ አነ ስንዉ ሄ ማራ ካሎይተ።
\p
\v 17 ታናዳን ጾሳ ካልያዋንቶ፥ ታን ሀንያዋዳን ሀንተ። ኑን ህንተንቶ ሌምሱዋ ግዴዶ፤ ሄዋዳን ህንተካ ኑን ህንተንቶ ሌምሱዋ ግዴዳ ማራ ካልያዋንታ አኬክተ። 
\v 18 አያዉ ጎፐ፥ ታን ሄዋ ህንተንቶ ካሰ ጮራቶ ኦዳድ፤ ቃይ ሀእ ላኤንዋካ አፎጻደ ህንተንቶ ኦዳይ፤ ክርስቶስ ማስቃልያ ቦላ ምስማርያን ሸቲደ ሀይቄዳዎ ባረንቱ ሸምፑ ባረና ሞርከ ኦዳ ዳሮ አሳቱ ደኢኖ። 
\v 19 ኡንቱንቱ ዉርሰይ ባሻ፤ ኡንቱንቱ ኡሉ ኡንቱንቶ ጾሳ፤ ዬላታናዉ በስያዋን ኡንቱንቱ ኦቶረቲኖ፤ ቃይ ሀ ሳኣባ ጻላላ ቆፒኖ። 
\v 20 አያዉ ጎፐ፥ ኑ ቢታይ ሳሉዋና፤ ኑን ቃይ ሳሉዋፐ ያና ኑና አሽያ ጎዳ የሱስ ክርስቶሳ ናጌቶ። 
\v 21 ክርስቶስ ኡባባ ባረፐ ጋርሳን ዎናዉ ዳንዳይያ ባረ ዎልቃን፥ ኑ ዳቡራንቻ አሳተ ላሚደ፥ ባረ ቦንቾ አሳተ ማላትሲደ ኦና።
\c 4
\s1 ዉርሰ ዞርያ
\p
\v 1 ታናዳን ጾሳ ካልያዋንቶ፥ ታን ሲቅያዋንቶ፥ ላሞትያዋንቶ፥ ታና ናሸችያዋንቶ፥ ታና ቁ ኦያዋንቶ፥ ታ ዳባቶ፥ ስም ጎዳን ህንተንቱ ምን ኤቃናዉ በሴ።
\p
\v 2 ኤዎደነ ስንጺኬ፥ ህንተንቱ ላኡካ ቆፋን እቱዋ ግዲደ፥ ጎዳን ደአናዳን፥ ታን ህንተና ዞራይ። 
\v 3 ቃይ ታናና ኦያ አማነቴዳዎ፥ ኔን ሀ ማጫ አሳቱዋ ማዳናዳን፥ ታን ኔና ዎሳይ፤ አያዉ ጎፐ፥ ኡንቱንቱ ታናናነ ኡንቱንቱ ሱንይ ጾሳ ደኡዋ ማጻፋን\f + \fr 4:3 \fr*\fq ጾሳ ደኡዋ ማጻፋን፦ \fq*\ft ጾሳ አሳ ሱንይ ጻፈትያ ማጻፋ።\ft*\f* ጻፈቴዳ ቃለምንጾሳና ቃይ ታናና እትፐ ኦያ ሀራቱዋ ኡባና ዎንጋላ ኡባሳ ጋናዉ ዳቡሬድኖ።
\p
\v 4 ጎዳና ህንተንቱ ደእያ ደኡዋን ኡባ ዎደ ናሸትተ፤ ታን ሀዋ ጉጃደካ ጋይ፤ ናሸትተ።
\p
\v 5 አሳይ ኡባይ ህንተንቱ አሽከተ ኤሮ፤ ጎዳይ ማታን ያና። 
\v 6 ጾሳ ህንተንቱ ዎስያ ዎሳ ኡባን አ ሎይ ጋላቲደ፥ ህንተና ኮሽያዋ ኡባዉ ዎስተፐ አትን፥ እትባዉካ ህርጎፕተ። 
\v 7 ቃይ አሳ ኤራተ ኡባፐ አያ ጾሳ ሳሮተይ ህንተንቱ ዎዛናነ ህንተንቱ ቆፋ ጎዳ የሱስ ክርስቶሳ ባጋና ናጋና።
\p
\v 8 ዉርሰን፥ ታናዳን ጾሳ ካልያዋንቶ፥ ህንተንቱ ዎዛናን ሎኦባነ ጋላትስያዋ ቆፕተ፤ ቱማ ግድያባ ኡባ፥ ቦንችስያዋ ኡባ፥ ባይዙዋ ግደናባ ኡባ፥ ጌሻባ ኡባ፥ ሲቁዋ ኡባ፥ ሱረ ግድያባ ኡባ ቆፕተ። 
\v 9 ህንተንቱ ታፐ ታማሬዳዋ፥ አኬዳዋ፥ ስሴዳዋነ በኤዳዋ ኡባ ኦተ፤ ቃይ ኑዉ ሳሮተ እምያ ጾሳይ ህንተናና እትፐ ግዳናዋ።
\s1 ባረዉ ኪተቴዳ እሞታዉ ጳዉሎስ ጋላቴዳዋ
\p
\v 10 ሽን ዳሮ ዎድያፐ ጉይያን፥ ሀእ ህንተንቱ ታዋ ላኤንዋ ቆፓናዉ ዶሜዳ ድራዉ፥ ታን ጎዳን ሎይ ናሸታይ፤ ታዉ ቆፓናዉ ህንተንቶ እንጀተናን እጼዳዋፐ አትን፥ ታዉ ቆፋ ቆፒታ። 
\v 11 ታን ሀዋ ታና መቴዳ ድራዉ ጊከ፤ አያዉ ጎፐ፥ ታዉ ደእያባይ ታዉ ግዳና\f + \fr 4:11 \fr*\fk ታዉ ደእያባይ ታዉ ግዳና፦ \fk*\ft ታዉ ደእያባን ታን ሸምፓይ፥ ካላይ፥ ዎፑ ጋይ።\ft*\f* ግያዋ ታን ታማራድ። 
\v 12 ታን መቶቲደ ዎት ደአነንቶ ኤራይ፤ ቃይ ዱረቲደ ደእያዌካ አየንቶ ኤራይ፤ ሀቃን ግድናካ አዉደ ግድናካ፥ ታን ካሉዋነ ኮሻ ቃይ ፓጫነ ፓላሃ ታማራድ። 
\v 13 ክርስቶስ ታዉ እሜዳ ዎልቃን፥ ኡባባ ኦናዉ ታን ዳንዳያይ።
\p
\v 14 ግዶፐካ፥ ህንተንቱ ታ መቱዋ ታናና መቶቲደ ዳሮ ሎይድታ፤ 
\v 15 ፕልጵስዮሳ አሳዉ፥ ዎንጋላ ምሽራቹ ኮይሮ ህንተ ግዶን ኦደቴዳ፤ ሽን ታን ማቅዶንያፐ ከሴዳ ዎደ፥ ታና አማንያ ህንተንቱፐ አትን፥ ሀራይ ማድቤናዋ ህንተንቱ ህንተንቱ ሁጰዉ ኤሪታ፤ ቃይ እምያባንካ አክያባንካ ህንተፐ አትን፥ ሀራይ ታና ማድቤና።\x - \xo 4:15-16 \xo*\xt 2 ቆሮ. 11:9\xt*\x* 
\v 16 አያዉ ጎፐ፥ ታና መቱ ኦይቄዳ ዎደ፥ ሀራይ አቶ ታን ተሰሎንቀን ደእሽንካ ታና ዛር ዛሪደ ማዴድታ።\x - \xo 4:16 \xo*\xt ኪታ 17:1\xt*\x* 
\v 17 ታን ህንተዋ ቦላ ሀራባይ ጉጀታናዋ ኮይያዋፐ አትን፥ ዎይታ ጻላላ አካናዉ ኮይከ።
\p
\v 18 ሽን ታን ህንተንቱ እሜዳዋ ኡባ አካድ፤ ቃይ ታዉ ፓላሂደ ግድያዌ ደኤ። ህንተ ኪቴዳ ኡባባ ኤፓፍሮድቶሳፐ አካድ፤ ኮሽያ ኡባይ ታዉ ደኤ። ህንተ ታዉ ኪቴዳ እሙ ጾሳዉ ሳዉዋ ቶሽኩ ግያነ እ ዶስያ፥ አ ናሸችያ ያርሹዋ ማላ።\x - \xo 4:18 \xo*\xt ከሳ 29:18\xt*\x* 
\v 19 ቃይ ታ ጾሳይ ባረ ቦንቾ ዱረተ ዳሩዋን ክርስቶስ የሱሳ ባጋና ህንተና ኮሽያዋ ኡባ ህንተንቶ እማና። 
\v 20 ኑ ጾሳዉ፥ ኑ አዎ መናፐ መና ጋካናዉ ቦንቹ ግዶ። አመንእ።
\s1 ዉርሰ ሳሮታ
\p
\v 21 ክርስቶስ የሱሳዋ ግድያ ጾሳ አሳቱዋ ኡባቱዋ ሳሮ ጊተ። ታናና ሀዋን ደእያ እሻቱ ህንተና ሳሮ ጊኖ። 
\v 22 ሀዋን ደእያ ጾሳ አሳቱዋ ኡባቱ፥ ኡባፐካ አደ ካትያ ቄሳረ ጎልያን ደእያዋንቱ ህንተና ሳሮ ጊኖ።
\p
\v 23 ኑ ጎዳ የሱስ ክርስቶሳ አ ኬካተይ ህንተናና ግዶ።