\id LAM - Dawuro Full Bible Ethiopic Version
\ide UTF-8
\h ኤርማሳ ሴላ
\toc1 ኤርማሳ ሴላ ኦድያ ማጻፋ
\toc2 ኤርማሳ ሴላ
\toc3 ሴላ
\mt1 ኤርማሳ ሴላ
\mt2 ኦድያ ማጻፋ
\imt ገሉዋ
\ip ኤርማሳ ሴላ ኦድያ ማጻፋይ፥ ክርስቶስ የለታናፐ ካሰ እቼሹ ጼታነ ሆስፑን ታማነ ኡሱፑን ላይን የሩሳላመ ላለቴዳ ጋሱዋንነ አሳይካ ኦሞደቲደ ቤዳ ጋሱዋን፥ ጾሳይ ጾሳተ ሙሩዋ ፖላናዉ ባብሎናቱዋ ባረ ሾጭያ ጻምኣ ኦደ ጎኤቴዳ ጋሱዋን፥ ግንጹዋን ጊጌዳ እቼሹ ካዩዋ ዝላሳቱዋ ኦይቄዳዋ። ሀ ማጻፋዉ ዳርያ ባጋይ ዬኩዋባነ ካዩዋባ ኦድያዋ ግዶፐነ፥ ጾሳን አማነትያዋነ ህዶታን ደእያዋ ኦድያ ክፍለቱካ አን ደኢኖ። ሀ ግንጾቱዋ አይሁዳ አሳቱ ክርስቶስ የለታናፐ ካሰ እቼሹ ጼታነ ሆስፑን ታማነ ኡሱፑን ላይን፥ ሄ ቢታ ቦላ ጋኬዳ ባየ ሀሳያናዉ፥ ላይን ላይን ጾምያነ ካዮትያ ዎጋቱዋ ፖልያ ጋላሳቱዋን ጎኤቲኖ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 የሩሳላመ መቱዋነ ካዩዋ \ior 1:1-22\ior*
\io1 ጾሳይ የሩሳላመ ቦላ አሄዳ ሙሩዋ \ior 2:1-22\ior*
\io1 ብሮ ህዶታይ ደእያዋ ግዱሳ \ior 3:1-66\ior*
\io1 የሩሳላመ ባሻ \ior 4:1-22\ior*
\io1 ማሮታ ደማናዉ ዎሳ \ior 5:1-22\ior*
\c 1
\s1 የሩሳላመ መቱዋነ ካዩዋ
\r (1:1-22)
\p
\v 1 ካሰ አሳይ ኩሜዳ የሩሳላመ ካታማታ ሀእ ዋናደ መላ አታዴ! ካሰ ካዉተቱዋ ግዶን ዎልቃማ ግዴዳና ሀእ አስናይ ሀይቄዳ ምሽራቲዳን፥ ዋናደ ባረካ አታዴ! ካታማቱዋ ኡባ ግዶን ካታቶ ግዴዳና ሀእ ዋናደ አይለ ግዳዴ! 
\v 2 ቃማ ኡባን አፎይ እ ጋጩዋና ሆልሳካትሽን፥ ዬካደ አቃዱ። ካሰ እዞ ዶስያዋንቱፐ ሀእ እዞ ምንያዌ እቱነ ባዋ። እ ላገቱ እዞ አ እሚደ፥ እዉ ሞርከ ግዴድኖ። 
\v 3 ይሁዳታ ናቀታደነ አይለታደ ኦሞደታደ ባዱ። እዛ ሀእ ካዉተቱዋ ግዶን ደአዉ፤ ሽን ሸምፕያ ሳኣ ደማበይኩ። እዞ የደርሴዳዋንቱ እዛ መቶታ ደእሽን ጋኪደ ደሜድኖ። 
\v 4 ላይ ግዶን ቦንችያ ባላቱዋ ይያዌ ባይና ድራዉ፥ ጽዮነ ኦገቱ ካዮቲኖ። ካታማ ፐንገቱ መላ አቴድኖ፤ እ ቄሳቱ ካ ኦሊኖ። እ ዎዶሮ ናናቱካ ቱጋቴድኖ፤ ቃይ እዛ ባረ ሁጲያዉካ ኢታ ቱጋ ቱጋታዱ። 
\v 5 እ ሞርከቱ እዉ ጎዳ ግዴድኖ፤ ኡንቱንቶ እንጅና ደኤድኖ። አያዉ ጎፐ፥ እ ናጋራ ዳሩዋ ጋሱዋን መና ጎዳይ እዞ ቱጋዬዳ፤ እ ጉ ናናቱ ሞርክያን ኦሞደቲደ ቤድኖ። 
\v 6 ጽዮን ቦንቹ ኡባይ ኢፐ ቃረት ክቼዳ፤ እ ካፓቱካ ማታ ምያ ሳኣ ዬዳ ጋራ ማላ ግዴድኖ። ኡንቱንቱ ዎልቃ ዪደ፥ ባረንታ የደርስያዋንቱ ስንፐ ባቃቴድኖ።
\p
\v 7 የሩሳላማ ሀእ ባረ ቱጋነ ባረ ኡንኣ ጋላሳቱዋን በን ባረ ቦንቾ ዱረታ ሀሳያዉ። እ አሳይ ኡባይ ሞርከቱዋ ኩሽያን አደ እመቴዳ ዎደ፥ እዞ ማድያዌ እቱነ አትቤና። እ ሞርከቱ እዞ ጼሊደ፥ እ ባሻን ሚጬድኖ። 
\v 8 የሩሳላማ ዎልቃማ ናጋራ ኦዱ፤ ሄዋ ድራዉ፥ እዛ ቱናባ ግዳዉ። ካሰ እዞ ቦንቼዳ ኡባይ ሀእ እ ካሉዋ በኤዳ ድራዉ፥ እዞ ካ። አካ ኦላዉነ ጉየ ስማዉ። 
\v 9 እ ቱናተይ እ አፍላ ጼራ ባቂ ኦይቄዳ። ስንፐ ባረ ቦላ ያናባ እዛ ቆፓበይኩ። ሄዋ ድራዉ፥ እዝ ኩንደይ ዳጋንያዋ። እዛ፥ “አቤት መና ጎዳዉ፥ ታ ቱጋ በአ! ታ ሞርከቱ ታና ጾኔድኖ” ጊናካ፥ እዞ ምንያዌ እቱነ ባዋ። 
\v 10 ሞርከቱ እዝ ቦንቾ ዱረታ ኡባ ቦላን ባረንቱ ኩሽያ የዴድኖ። ጋድያ ካዉተቱ፥ ካሰ ኔን ጾሳ ማባራ ግዶ ገልሰናን ድጌዳ አሳቱ፥ እ ጌሻ ጎልያ ገልሽን በኣዱ። 
\v 11 እዝ አሳቱ ኮሻቲደ፥ ቁማ ደማናዉ ኦሊኖ። ኡንቱንቱ ፓጻ ደአና ድራዉ ጊደ፥ ባረንቱ ቦንቾ ዱረታ ኡባ ቁማን ላሚኖ።
\p የሩሳላማ ሀዋዳን ያጋዉ፤ “አቤት መና ጎዳዉ፥ ጼላ፤ ታን ካቴዳዋ በአ! 
\v 12 ህንተኖ፥ ሀዋና አያዋንቶ፥ ሀዌ ህንተዉ ኡባዉ አያነ ግደኔ? መቱ ኡባይ መና ጎዳይ ባረ ኤጽያ ሀንቁዋ ጋላስ ታ ቦላ አሄዳ መቱዋ ማሌ? 
\v 13 ጾሳይ ቦላ ቃፐ ታማ ዱገ የዴዳ፤ ሄ ታማይ ታ መቀ ግዶ ገሌዳ። ታ ገድያ ኦይቃናዉ ጲርያ ዎዳ፤ ታና ጉየ ዛሬዳ። እ ታና ጋላሳ ኡባን ላባንደ፥ የግ ባሼዳ። 
\v 14 ታን ኦዳ ናጋራ ኡባ ሺሽ ቃቺደ፥ ሞርገ ምዳን ታ ሞርግያን ዎዳ። ያቲደ ታ ዎልቃ ዉርሴዳ። ታን ኤቀታናዉ ዳንዳየናዋንቶ ጎዳይ ታና አ እሜዳ። 
\v 15 ጎዳይ ታ ግዶን ዎልቃማ ኦላንቻቱዋ ኡባ እጼዳ። ታ ያላጋቱዋካ ይሳናዉ ዎድያ ኬሬዳ። ዎይንያ ቴራ ጉምእያ ሳኣን የያዋዳን፥ ጎዳይ ይሁዳ አሳ የዳ። 
\v 16 ታን ዬክያዌነ ታ አይፊ አፎ ሆልሳይያዌ ሄዋሳ። ታና ምንናዉነ ታ ዎልቃ ምንስያዌ እት አሳይነ ባዋ። ሞርኪ ጎቤዳ፤ ታ ናናቱነ መላ አቴድኖ” ያጋዉ።
\p
\v 17 ጽዮና ባረ ኩሽያ ምጫዱ፤ ሽን እዞ ምንያዌ ባዋ። እ ዩሹዋን ደእያዋንቱ እዞ ሞርካናዳን፥ መና ጎዳይ ኦዳ። የሩሳላማ ኡንቱንቱ ግዶን ቱናባ ግዳዱ።
\p
\v 18 እዛ ሀዋዳን ያጋዉ፤ “መና ጎዳይ ጽሉዋ፤ አ ቃላዉ አዛዘተናን ማካሌዳና ታና። ህንተኖ፥ አሳቶ ኡባይካ ስስተ! ታ መቱዋካ በእተ። ታ ዎዳላቱነ ታ ጌላዮቱ ኦሞደቲደ ቤድኖ። 
\v 19 ታን ታና ዶስያዋንታ ጼሳድ፤ ሽን ኡንቱንቱ ታና ጭሜድኖ። ታ ቄሳቱ ነ ታ ጭማቱ ባረንቱ አካታ ምንሳናዉ ቁማ ኮዪደ፥ ካታማ ግዶን ሀይቄድኖ። 
\v 20 አቤት መና ጎዳዉ፥ ታ ዋይያ በአ! ታ ጋርሳይ ሻቢረቴዳ። ታን ሎይ ማካሌዳ ድራዉ፥ ታ ዎዛናይ መኤዳ። ካረን ማሻይ ዉርሴ፤ ሶንካ ሀይቆ ጻላላይ ደኤ። 
\v 21 አሳይ ታን ዝላልያዋ ስሴዳ፤ ሽን ታና ምንያ እት አሳይነ ባዋ። ታ ሞርከቱ ኡባይ ታን መቶትያዋ ስሴድኖ፤ ኔን ኦዳባን ናሸቴድኖ። ኡንቱንቱካ ታናዳን ሀናና ማላ፥ ኡንቱንቱ ቦላ ኔን አዋዬዳ ጋላሳ አያ! 
\v 22 ኡንቱንቱ ኢታተይ ኡባይ ነ ስን ጋኮ፤ ታ ናጋራ ኡባ ድራዉ፥ ኔን ታና ሙሬዳዋዳን፥ ኡንቱንታካ ሙራ! አያዉ ጎፐ፥ ታ ዝላሳይ ዳሬዳ፤ ታ ዎዛናይካ መኤዳ” ያጋዉ።
\c 2
\s1 ጾሳይ የሩሳላመ ቦላ አሄዳ ሙሩዋ
\r (2:1-22)
\p
\v 1 ጎዳይ ባረ ሀንቁዋን ሻርያፐ ጋርሳና ጽዮኖ ዎት ዎዴ! እ እስራኤልያ ፑላ ሳሉዋፐ ዱገ ሳኣ ኦሌዳ። እ ባረ ሀንቁዋ ጋላሳን ባረ ጌሻ ጎልያካ ቆፕቤና። 
\v 2 ጎዳይ ይሁዳን ደእያ ኬቱዋ ኡባ ቃረተናን ይሴዳ። ቃይ ባረ ሀንቁዋን ሄ ቢታ ጌሱዋ ኡባ ኮሌዳ። ሄ ካዉተነ አ ካፖቱዋ ሳኣን ዱገ ዎደ ካዉሽሴዳ። 
\v 3 ባረ ሱልያ ሀንቁዋን እስራኤልያ ዎልቃ ኡባ መንሬዳ። ሞርኪ አ ኦላናዉ ይያ ዎደ፥ ጎዳይ ባረ ኡሸቻ ኩሽያ ኡንቱንቱ ቦላፐ ድጌዳ። ባረ ዩሹዋን ደእያዋ ኡባ ምያ ላጮትያ ታማዳን፥ ያቆባ ቦላ ኤጽ ከሴዳ። 
\v 4 ሞርክያዳን እ ባረ ዎንዳፍያ ኡንቱንቱ ቦላ ዳፌዳ። ኡቁንያዋንቱዋዳን እ ባረ ኡሸቻ ኩሽያ ምንሲደ፥ ጼልና ሎእያ አሳ ኡባ ዎዳ። ጽዮነ ጎለቱዋ ቦላ ባረ ሀንቁዋ ሱሉዋ ታማዳን ጉሴዳ። 
\v 5 ጎዳይ ሞርክያዳን ሀኒደ፥ እስራኤልያ ይሴዳ። እ ካትያ ጎለቱዋነ ጌሶቱዋ ኡባ ኮሌዳ። ይሁዳ አሳ ቦላን ካዩዋነ ዬኩዋ ጉጄዳ።
\p
\v 6 እ ባረ ጌሻ ጎልያ አታክልትያ ግዶን ደእያ ዳስያዳን፥ ሾድ ኦሌዳ። ላይ ግዶን ቦንችያ ባላቱነ ሳምባታቱ ሙለ ዶገታናዳን፥ መና ጎዳይ ኦዳ። ባረ ዎልቃማ ሀንቁዋን ካትያነ ቄስያ ካዳ። 
\v 7 ጎዳይ ባረዉ ያርሹዋ ያርሽያ ሳኣ እጼዳ፤ ባረ ጌሻ ጎልያካ ባሼዳ። ካትያ ጎለቱዋ ግምቢያ ሞርከቱዋ ኩሽያን አደ እሜዳ። አሳይ ላይ ባላ ቦንቺደ ዋስያዋዳን፥ ሞርከቱ መና ጎዳ ጎልያን ዋሴድኖ። 
\v 8 መና ጎዳይ ጽዮን ግምቢያ ኮላናዉ ቃቼዳ፤ እዞ ልክያ ዎዶሩዋ ምጬዳ፤ እዞ ይሰናን ደኢድ፥ ባረ ኩሽያ ዛረና። ሄዋ ድራዉ፥ ግምቢነ ጌሱ እትፐ ኩንዳናዳን ኦዳ። 
\v 9 የሩሳላመ ፐንግያ ሳንቃቱ ቢታን ዱገ ሞገቴድኖ፤ ኡንቱንቱ ኩልቦቱዋካ እ መንሬደ ይሴዳ። እ ካቲነ ካፓቱ ኦሞደቲደ፥ ካዉተቱዋ ግዶ ቤድኖ። ህግያ ታማርስያዌካ ባዋ፤ እዝ ትምቢትያ ኦድያዋንቶካ መና ጎዳፐ ሳጻይ ይያዋ አጌዳ። 
\v 10 ጽዮን ጭማቱ ጮኡ ጊደ፥ ቢታን ኡት አጌድኖ፤ ባረንቱ ሁጲያን ባና ቆሊደ፥ ማቃካ ማዬድኖ። የሩሳላመ ዎዶሮቱ ሳአዉ ዱገ ሆኬድኖ።
\p
\v 11 ታ አይፊ አፎጽ አፎጺደ ጆሌዳ፤ ታ ዎዛናይካ ካዩዋን ሻቢረቴዳ። አያዉ ጎፐ፥ ታ አሳይ ዬዳ፤ ጉ ናናቱነ ዪኦ ናናቱ ካታማ ኦግያን ላባኒደ ኩንዴድኖ። 
\v 12 ኡንቱንቱ ባረንቱ አየቱዋ፥ “ቁማ እማ! ዎይንያ ኤሳ እማ!” ያጊደ ዋሲኖ። ካታማ ኦግያን ደሸቲደ ላባንያ አሳቱዋዳን ኡንቱንቱ ላባንና፥ ኡንቱንቱ አየቱዋ ክዉዋን ኡንቱንቱ ሸምፑ ከሴ።
\p
\v 13 ኔኖ፥ የሩሳላመ፥ ታን ነባ አይ ጋናዉ ዳንዳያይታ? ዎይ ቃይ ነ ቆሁዋ ታን አያና ልካናዉ ዳንዳያይታ? ኔኖ፥ ዶሰቴዳ ጽዮኔ፥ ቃይ ታን ኔና ዎታ ምንናዉ ዳንዳያይታ? ነ ማዱይ አባ ኬሻ ጪማ። ያትና፥ ኔና ኦን ፓናዉ ዳንዳዪ? 
\v 14 ነ ትምቢትያ ኦድያዋንቱ ነዉ ዎርዶነ ፓና ሳፃ በኤድኖ፤ ኡንቱንቱ ኔን ኦሞዶ ቤና ማላ፥ ነ ናጋራ ቆንጭሲደ ኦድበይክኖ። ኡንቱንቱ ባለያ ዎርዶ ሳፃ ነዉ በኤድኖ።
\p
\v 15 ነ ማታና አያ ኡባይ ባረ ብራያ ነ ቦላን ዱኬ። ቃይ፥ “ቢታን ሳኣን ኡባፐ አአደ ሎእያ ካታማታ ሀኒ? ኩመን ቢታዉ ናሸቻ ጌተቴዳ ካታማታ ሀኒ?” ያጊደ ኔና ቅሊጬድኖ፤ ባረንቱ ሁጲያካ ቃኖ። 
\v 16 ነ ሞርከቱ ኡባይ ባረንቱ ዶና ነ ቦላ ዶዬድኖ፤ ቅሊጪድነ ይሉዋን ባረንቱ አቻ ጋርጪደ፥ “ኑን እዞ ይሴዶ! ኑን ናጌዳ ጋላሳይካ ሀዋ፤ ሀእ ጋኪደ በኤዳ!” ያጊኖ። 
\v 17 መና ጎዳይ ባረ ሀልቼዳዋ ኦዳ፤ በን ዎደ እ አዋዬዳ ባረ ቃላካ ፖሌዳ። የሩሳላምዉ ቃረተናን እዞ ኮሌዳ። እ ሞርከቱዋካ ናሸቼዳ፤ እዞ ኡቁኔዳዋንቱ ዎልቃካ ቁ ቁ ኦዳ።
\p
\v 18 ኔኖ፥ ጽዮኔ፥ ጎዳኮ ነ ድርሳ ግምቢ ዋሶ! ነ አፎይካ ቃማነ ጋላስ ሻፋዳን ጎጎ! ኔን ኔና ሸምፕሶፓ፤ ነ አይፍያዉካ ሸምፑዋ እሞፓ! 
\v 19 ደንዳ፤ ቃማ ደንዳደ ዋሳ። ጎዳ ስንን ነ ዎዛና ሃዳን ጉሳ። ኦግያ ዶናን ኡባን ኮሻቲደ፥ ላባኔዳ ነ ናናቱዋ ሸምፖ ነ ኩሽያ አኮ ፑደ ደንደ ዎሳ!
\p
\v 20 አቤት መና ጎዳዉ፥ በአ! ኔን ኦ ቦላ ካሰ ሀዋዳን ኦድንቶ፥ አነ ቆፓ። አየቱ ባረንቱ ክዉዋን እሻልሲደ ድቼዳ ባረንቱ ናናቱዋ ሚኖ ጋይ? ቃይ ቄሳቱ ነ ናበቱ ጎዳ ጌሻ ጎልያ ግዶን ሀይቂኖ ጋይ?
\p
\v 21 ጭማይነ ናናይ ካታማ ግዶ ኦግያ ባናን ግሴዳ፤ ታ ዎዶሮቱነ ታ ዎዳላቱ ማሻን ዉሬድኖ። ኔን ነ ሀንቁዋ ጋላስ ኡንቱንታ ዎዳ፤ ኡንቱንቶ ቃረተናን ኡንቱንታ ሲፋዳ።
\p
\v 22 ግብራ ጋላሳዉ አሳ ጼስያዋዳን፥ ኔን ታና ዳጋንያዋንታ ኡባ ሳፐ ጼሳዳ። መና ጎዳ ሀንቁዋ ጋላሳን ከስ አክ ፓጻ አቴዳዌ እቱነ ባዋ። ታን ታ ክዉዋን እሻልሳደ ድቼዳ ናናቱዋ ኡባ ሞርኪ ዎ ይሴዳ።
\c 3
\s1 ብሮ ህዶታይ ደእያዋ ግዱሳ
\r (3:1-66)
\p
\v 1 ጾሳ ሀንቁዋ ጋትማን መቱዋ በኤዳ አሳይ ታና። 
\v 2 እ ታና ላግ ከሲደ፥ ፖኡ ባይና ማዉ አፌዳ። 
\v 3 እ ዛር ዛሪደካ ጋላሳ ሙልያ ታና ሾጫናዉ ባረ ኩሽያ ታ ቦላን ደንዳ። 
\v 4 እ ታ ጋልባነ ታ አሹዋ ኤጭሴዳ፤ ታ መቀካ መንዳ። 
\v 5 እ ታና ድሬዳ፤ መቱዋንነ ዳቡራን እ ታና ዶዴዳ። 
\v 6 በን አይደንቶ ሀይቄዳ አሳዳን፥ ታና ማ ግዶን ዎዳ። 
\v 7 ታን ከሰናዳን፥ ታ ዩሹዋ ድሬዳ፤ ዴጾ ሳንሳላታንካ ታና ቃቼዳ። 
\v 8 ታን አ ጼሳድ፤ አኮ ዋስናካ፥ እ ታ ዎሳ ስሰናን እጼዳ። 
\v 9 ታ ኦግያን ማሰቴዳ ሹቻ ዎደ ጎርዴዳ፤ ታ ኦግያካ ጌላዬዳ።
\p
\v 10 እ ታዉ ሙግያ ባባን ማላ፥ ዎይ ቆሰቲደ ናግያ ጋሙዋ ማላ ግዴዳ። 
\v 11 እ ታና ታ ኦግያፐ ከስ ኦሊደ፥ ዱሰረዳ። ያቲደ ታና አሳይ ባይና ሳን የግ ባሼዳ።
\p
\v 12 ባረ ዎንዳፍያ ዳፊደ፥ ታና ዱካናዉ ማሌዳ። 
\v 13 እ ባረ ዎንዳፍያ ዳፊደ፥ ታ ዎዛና አይፍያ ጫዴዳ። 
\v 14 ታን አሳ ኡባዉ ሚቻነ ጋላሳ ኩመን ቦሪደ የጽያዋ ግዳድ። 
\v 15 እ ታና ጫሙዋን ኩንዳ፤ ቃይ ጎዳረ ኡዳን ጫምያ ጹኣ ኡሺደ፥ ታና ካልሴዳ።
\p
\v 16 እ ታ አቻ አንጩዋን መንዳ፤ ባና ግዶን እ ታና የዳ። 
\v 17 ሳሩ ታፐ ሃኬዳ፤ ታን እንጀ ደኡዋ ዶጋድ። 
\v 18 ሄዋ ድራዉ፥ ታን፥ “ታ ዎልቃይ ታፐ ክቼዳ፤ ታን መና ጎዳን ህዶታ ዎዳዌ ኡባይካ ዬዳ” ያጋድ። 
\v 19 ታ መቱዋነ ታን ቶይላካትያዋ ሀሳይና፥ ደኡ ታና ጫሜዳ። 
\v 20 ሄዌ ታን ኡባካ ዶገናባነ ታ ሸምፑካ ካዮትያዋ።
\p
\v 21 ግዶፐነ፥ ታን ሀ እትባ ታ ዎዛናን ቆፕያ ዎደ፥ ታዉ ስንናዉ ህዶታይ ደኤ። 
\v 22 ሄዌነ፥ መና ጎዳ አገና ሲቁዋፐ ደንዴዳዋን ኑን ይቦኮ። አ ቃረታይካ ሙለ ዉር ኤረና፤ 
\v 23 ኡንቱንቱ ዎንታ ዎንታ ኦራ። ኔን ሎይ አማነትያዋ። 
\v 24 ታን ታዉ፥ “መና ጎዳይ ታና ጋኬዳ ሳማ፤ ሄዋ ድራዉ፥ ታን አን ህዶታ ዎይ” ያጋድ።
\p
\v 25 ባረንቱ ህዶታ አን ዎያዋንቶነ አ ኮይያዋንቶ መና ጎዳይ ሎኦ። 
\v 26 ሄዋ ድራዉ፥ አሳይ መና ጎዳይ አሽያ አሹዋ ዳንዳያን ናጎፐ ሎአ። 
\v 27 ቃይ አሳይ ባረ ያላጋተን ደኢድ፥ ዳንዳያ ታማሮፐ ሎአ።
\p
\v 28 መና ጎዳይ መቱዋ አህያ ዎደ፥ እ ጮኡ ጊደ፥ ባረካ ኡት አጎ። 
\v 29 እ ባረ ሶምኡዋ ቢታ ጋደ ሀይዞ። ኦን ኤሪ፥ አዉ ስንናዉ ህዶታይ ደአነንቶነ። 
\v 30 እ ባረ ሻይያ ባቂያዎ በሶ፤ ባረ ሞርከቱ ሸቂያ ሸቃካ ካሎ።
\p
\v 31 አያዉ ጎፐ፥ ጎዳይ አሳ መናዉ ኦለና፤ 
\v 32 እት ዎደ ካዩዋ አሆፐነ፥ እ ባረ አገና ሲቁዋ ዳሩዋዳን ቃረቴ። 
\v 33 አያዉ ጎፐ፥ እ አሳ ቱጋይያዋንነ መቶይያዋን ናሸተና።
\p
\v 34 አ አሳ ካለያዋንቱ ቃሸቴዳዋንታ ባረንቱ ገድያፐ ጋርሳ ባጋና የድኖ፤ 
\v 35 ቃይ ኡባፐ ቂያ ጾሳ ስንን አሳዉ ደእያ ማታ ድጊኖ፤ 
\v 36 ቃይካ ችሎታን ፕርዳ ጌላዪኖ። ኡንቱንቱ ጎዳይ ሄዋ ኡባ በኤና ጊደ ቆፒኖየ?
\p
\v 37 ጎዳይ አዛዝቤናዋ አዛዚደ፥ ፖልሳናዉ ዳንዳይያዌ ኦኔ? 
\v 38 ኢታባ ግድና ሎኦባ ግድናካ፥ ሃሳዪደ ፖልያዌ ኡባፐ ቂያ ጾሳ ግደኔየ? 
\v 39 ያትና፥ ኑን አሳ ግድያዋንቱ ኑ ናጋራ ድራዉ፥ እ ኑና ሙርያ ዎደ፥ አያዉ ዙዙሜቶ?
\p
\v 40 ሄዋ አጊደ፥ አነ ኑ ኦግያ ፓጮይተነ ቆሮይተ፤ መና ጎዳኮካ አነ ስሞይተ። 
\v 41 አነ ኑ ዎዛናነ ኑ ኩሽያ ሳሉዋን ደእያ ጾሳኮ ደንደ፥ ሀዋዳን ያጎይተ፤ 
\v 42 “ኑን ኔና ናቄዶ፤ ነዉ ማካሌዶ፤ ኔንካ ኑዉ አቶ ጋባካ። 
\v 43 ነ ሀንቁዋን ኑና የደርሳዳ፤ ቃይ ኔን ኑዉ ቃረተናን ኑና ሲፋዳ። 
\v 44 ኑ ዎሳይ ኔኮ አናዳን፥ ነ ሁጲያ ሻርያን ካማዳ። 
\v 45 አሳ ግዶን ኑና ፕቶነ ቡራ ኦዳ። 
\v 46 ኑ ሞርከቱ ኡባይ ኑ ቦላን ሃሳዬድኖ። 
\v 47 ኑን ዳጋሜዶነ ግትያን ገሌዶ፤ ባዬዶነ ዬዶ” ያጌቶ።
\p
\v 48 ታ አሳይ መቱዋን ዬዳ ድራዉ፥ ታ አይፊ ሻፋዳን አፎ ጎጌ። 
\v 49 ታ አይፊ ሙለ ዎደ አገናን አፎ ትጌ። 
\v 50 መና ጎዳይ ሳሉዋፐ ዱገ ጼሊደ በአና ጋካናዉ ሄዌ ሀኔ። 
\v 51 ታ ካታማን ደእያ ማጫ አሳቱዋ ኡባ ቦላን ጋኬዳዋ ታ አይፊ በኤዳ ዎደ፥ ታ ዎዛናይ ካዮቴዳ።
\p
\v 52 ጮ ታና ሞርክያዋንቱ ታና ካፉዋ ሻንካትያዋዳን ሻንካቴድኖ። 
\v 53 ኡንቱንቱ ታና ፓጻ ደእሺና ኦላን የጊደ፥ ኦላ ዶና ሹቻን ጎርዴድኖ። 
\v 54 ሃይ ኩሚደ፥ ታ ሁጲያና ጎግያ ዎደ፥ ታን ያድ ጋደ ቆፓድ።
\p
\v 55 አቤት መና ጎዳዉ፥ ታን ጪማ ኦላ ግዶን ደኣደ ነ ሱን ጼሳድ። 
\v 56 ታ ዋሱዋ ስሳናዳን ታን ኔና ዎስያ ዎደ፥ ኔን ታዉ ስሳዳ። 
\v 57 ታን ኔና ጼሴዳ ዎደ፥ ታኮ ሺቃደ፥ “ያዮፓ” ያጋዳ። 
\v 58 አቤት ጎዳዉ፥ ኔን ታ ሞቱዋ ሞተታደ፥ ታና ዎዛዳ። 
\v 59 አቤት መና ጎዳዉ፥ ኔን ታ ቱጋ በኣዳ። ሄዋ ድራዉ፥ ታ ሞቱዋ ኔን ፕርዳ። 
\v 60 ኡንቱንቱ ሀሉዋ ከሳናዉ ታ ቦላን ማቀትያ ማቁዋ ኡባ በኣዳ። 
\v 61 አቤት መና ጎዳዉ፥ ኡንቱንቱ ታና ሸቂያ ሸቃነ ታ ቦላን ማቀትያ ማቁዋ ኡባ ስሳዳ። 
\v 62 ቃይ ታ ሞርከቱ ጋላሳ ኩመን ታ ቦላን ዙዙምያዋነ ሳሱክያዋ ስሳዳ። 
\v 63 በአ፥ ኡንቱንቱ ኡቲድነ ኤቂደ፥ ታና ቦር ቦሪደ የጺኖ።
\p
\v 64 አቤት መና ጎዳዉ፥ ኡንቱንቱ ኦዳ ኦሶ በስያ ጋትያ ኡንቱንቶ ጭጋ! 
\v 65 ኡንቱንቱ ዎዛና ዳምሳ! ነ ሸቃይ ኡንቱንታ ጋኮ! 
\v 66 አቤት መና ጎዳዉ፥ ኔን ኡንቱንታ ነ ሀንቁዋን የደርሳ፥ ሳሎቱዋፐ ጋርሳና ኡንቱንቱ ደኢያሳፐ ኡንቱንታ ይሳ!
\c 4
\s1 የሩሳላመ ባሻ
\r (4:1-22)
\p
\v 1 ጶልያ ዎርቃይ ባረ ማላ ዋኒደ ታሴዴ። ጌሻ ዎርቃይ ዋኒደ ማላ ዬደ። ጌሻ ጎሊ ኬጸቴዳ ሹቻይ ካታማቱዋ ኦግያ ኡባ ዶናን ላለት ኡቴዳ። 
\v 2 ካሰ ቦንቼቴዳ ዎርቃ ላገ ግዴዳ ጽዮነ ናናቱ ሀእ ኩሽያ ሂላይ ኡርቃፐ መዳ ሚሻ ማላ ግዴድኖ።
\p
\v 3 ሀራይ አቶ ዎራካናቱዋነ ባረ ማራ ንዉ፤ ሽን ታ አሳይ ባዙዋን ደእያ ሶጎንያዳን፥ ባረ ናናቶ መቀ ኢቴዳ። 
\v 4 ሳሙዋ ጋሱዋን ምያ ናናቱዋ እንጻርሳይ ኮክያና ኦይቀቴዳ፤ ናናቱ ቁማ ዎሴድኖ፤ ሽን ኡንቱንቶ እምያዌ እቱነ ባዋ። 
\v 5 ካሰ ማልእያ ቁማ ጻላላ ሜዳዋንቱ ሀእ ኦግያ ዶናን ኮሻን ዉሪኖ፤ ቃይ ካሰ እሻሉዋን ድጬዳዋንቱ ሀእ ብድን ቦላ ዛቁሌድኖ።
\p
\v 6 ታ አሳ ናጋራይ ኦ ኩሺነ ቦቼናንነ ቆፐናን አ ዎዳ ሶዶማ ካታማ አሳ ናጋራፐካ ዳሬዳ\x - \xo 4:6 \xo*\xt ዶመ 19:24\xt*\x* 
\v 7 ይሁዳ ካፓቱ ካሰ ሻቻፐ አዳ ጌሻነ ማፐ አዳ ቦ። ኡንቱንቱ ቦላይ ዞኦ እንቁዋፐ አዳ አርሳ፤ ኡንቱንቱ ማላይካ ሳምፔርያ ግያ አልኦ እንቁዋ ማላ። 
\v 8 ሽን ሀእ ኡንቱንቱ ሶምኢ ሻላፐ አደ ካረጼዳ፤ አሳይ ኦግያን በኢደ ኡንቱንታ ኤረና። ኡንቱንቱ ጋልባይካ ኡንቱንቱ መቀና ኦይቀቲደ፥ ምዳን መሌዳ።
\p
\v 9 ምያባ ዪደ፥ ሎዱ ጊደ፥ ኮሻን ሀይቄዳዋንቱፐ ኦላን ሀይቄዳዋንቱ ኬካ። 
\v 10 ታ አሳ ቦላን ዬዳ ባየ ጋሱዋን፥ ቃረትያ አየቱ ባረንቱ የሌዳ ናናቱዋ ዶይሲደ፥ ባረንቶ ቁማ ከሲደ ሜድኖ።\x - \xo 4:10 \xo*\xt ዛረ. 28:57፤ ህዝ. 5:10\xt*\x* 
\v 11 መና ጎዳ ሀንቁዋ ጹአይ ኩሜዳ፤ እ ባረ ሱልያ ሀንቁዋ ትጌዳ። የሩሳላመ ካታማ ባሱዋና ሜዳ ታማ ኤ ከሴዳ።
\p
\v 12 ሀ ሳኣን ደእያ ካተቱዋፐ ዎይ ካዉተቱዋ ግዶን ደእያ አሳፐ ኦንነ ሞርኪ የሩሳላመ ፐንግያና ገላና ጊደ አማንቤና። 
\v 13 ሽን ሀዌ ሀኔዳዌ አ ናበቱነ አ ቄሳቱ ኦዳ ናጋራ ድራሳ፤ ቃይ ኡንቱንቱ ጽሎቱዋ ሱ አ ግዶን ጉሴዳ ድራሳ። 
\v 14 ኡንቱንቱ ቆቀ አሳዳን፥ ኦግያን ታታፊኖ፤ ቃይ ኡንቱንቱ ሱን ቱኔዳ ድራዉ፥ ኡንቱንቱ ማዩዋ ኦንነ ቦቻናዉ ኮየና። 
\v 15 ሄዋ ድራዉ፥ አሳይ ኡንቱንታ፥ “ክችተ! ህንተ ቱና! ክችተ! ኑና ቦቾፕተ!” ያጊደ ኡንቱንቱ ቦላ ዋሴዳ።
\p ያትና፥ ኡንቱንቱ ባቃቲደ ቶይላካቴዳ ዎደ፥ ካዉተቱዋ ግዶን ደእያ አሳይ ኡንቱንታ፥ “ህንተ ኑናና ሀዋን ደአናዉ ዳንዳይክታ” ያጌድኖ። 
\v 16 መና ጎዳይ ባረ ሁጲያን ኡንቱንታ ላሌዳ፤ እ ኡንቱንቶ ላኤን ቆፐና። ኡንቱንቱ ቄሳቱ ካ ቦንቼትበይክኖ፤ ኡንቱንቱ ጭማቱካ ናሸትበይክኖ።
\p
\v 17 ኑ አይፊ ማዱዋ ደማናዉ ጼሊደ፥ ጮ መላ ዳቡሬዳ። ኑና አሻናዉ ዳንዳየና ካዉተቱዋ፥ ኡንቱንቱ ያና ጊደ ዎቼዶ።
\p
\v 18 አሳቱ ኑ ቃታማ ካልያ ድራዉ፥ ኑ ካታማ ኦግያን ሄመታናዉ ዳንዳይበይኮ። ኑ ዉርሰይ ማታቴዳ፤ ኑ ላይይ ዉሬዳ፤ ኑ ይያ ዎዲካ ጋኬዳ። 
\v 19 ኑና የደርስያዋንቱ ሳሉዋና ፓልያ አርጋንፐካ አደ ኤሌሊኖ። ኡንቱንቱ ኑና ደርያ ሁጲያና የደርሴድኖ፤ ቃይ ባዙዋን ዙጊደ፥ ኑና ናጌድኖ።
\p
\v 20 መና ጎዳይ ኦኬዳ ካትያ፥ ኑን ሲያና ሸምፕያ ኑ ሸምፑዋ፥ ኡንቱንቱ ባረንቱ ጲርያን ኦይቄድኖ። ኑን አ ኩዋ ጋርሳን ኡቲደ፥ ካዉተቱዋ ግዶን ደአና ጊደ ቆፔዶ።
\p
\v 21 ህንተኖ፥ ኡጻ ቢታን ደእያ ኤዶማ አሳቶ፥ ናሸትተነ ፖጩ ጊተ። ሽን ሀንቁዋ ጹአይ ህንተኮካ ጋካናዋ፤ ህንተካ ማቲደ፥ ካሎ አታና።
\p
\v 22 ህንተኖ፥ ጽዮነ አሳቶ፥ ህንተ ባይዙዋ ሙሩ ፖለቴዳ። ሀዋፐ ስንን እ ህንተና ኦሞዱዋን ዎና።
\p ሽን ኤዶማ አሳቶ፥ ህንተ ባይዙዋ እ ሙራና፤ ህንተ ናጋራካ ቆንጭሳና።
\c 5
\s1 ማሮታ ደማናዉ ዎሳ
\r (5:1-22)
\p
\v 1 አቤት መና ጎዳዉ፥ ኑ ቦላ ጋኬዳዋ ኡባ ሀሳያ፤ ኑና ጼላ፤ ኑ ካዉሻካ በአ! 
\v 2 ኑ ላታ ቢታይ አላጋቶ፥ ኑ ጎሊካ በተቶ እመቴዳ። 
\v 3 ኑን አዉ ሀይቄዳ ናናቱዋ ግዴዶ፤ ኑ አየቱካ አምኤ ማጫ አሳ ግዴድኖ። 
\v 4 ኑ ኡሽያ ሃዉ ሚሻ ጭጌቶ፤ ኤያ ምካ ሻም አኬቶ። 
\v 5 ኑና የደርስያዋንቱ ኑ ግንድያ ጻጱዋ ጋኬድኖ። ኑን ዳቡሬዶ፥ ሽን ሸምፓናዉ ዳንዳይበይኮ። 
\v 6 ኑን ቁማ ካላና ጊደ፥ ግብጼ አሳቶነ አሶረ አሳቶ ኩሽያ እሜዶ። 
\v 7 ናጋራ ኦዳዋንቱ ኑ ማይዛ አዎቱዋ፤ ሽን ኡንቱንቱ ሀእ ደእክኖ። ኡንቱንቱ አካናዉ በስያ ሙሩዋ አክያዋንቱ ኑና።
\p
\v 8 አይለቱ ኑና ሞድያዋንታ ግዴድኖ፤ ኡንቱንቱ ኩሽያፐካ ኑና ዎ አክያዌ እቱነ ባዋ። 
\v 9 ማሻን ዎያዋንቱ ባዙዋን ደእያ ድራዉ፥ ኑን ኑ ሸምፑዋ ሸነኮ ጊደ፥ ኑ ቁማ ደሜዶ። 
\v 10 ኮሻይ ሱሌዳ ጋሱዋን ሀርግና፥ ኑ ጋልባይ ታማ ጮጭያዳን ምቼ። 
\v 11 ጽዮነን ማጫ አሳቱዋ፥ ይሁዳ ካታማቱዋንካ ዎዶሮቱዋ ዎልቃን ኦይቂደ ባይዜድኖ። 
\v 12 ካፓቱዋ አፊደ ካቄድኖ፤ ጭማቱካ ቦንቼትበይክኖ። 
\v 13 ያላጋ አቱማ አሳቱ ዎጻን ጋጬድኖ፤ አቱማ ናናቱካ ዴጾ ም ቶኪደ ጋንድጋሬድኖ። 
\v 14 ጭማ አሳቱ ካታማ ፐንገን ፕርዳናዉ ኡትያዋ አጌድኖ፤ ያላጋ አቱማ አሳቱ የ የጽያዋ አጌድኖ። 
\v 15 ኑ ዎዛናፐ ናሸቻይ ብ ክቼዳ፤ ኑ ዱሩሳይካ ዬኮ ላመቴዳ፤ 
\v 16 ካላቻይ ኑ ሁጲያፐ ኩንድ ክቼዳ። ኑን ናጋራ ኦዳ ድራዉ፥ ኑዉ አየ አና! 
\v 17 ሄዋ ድራዉ፥ ኑ ዎዛናይ ዳቡሬዳ፤ ኑ አይፊካ ጋልጄዳ። 
\v 18 አያዉ ጎፐ፥ ጽዮነ ደሪ መላ ግዴዳ፤ ዎራካናቱካ አን ስመረቲኖ።
\p
\v 19 ሽን አቤት መና ጎዳዉ፥ ኔን መናዉ ካዉታሳ፤ ነ ካዉተ አራታይካ የለታ ኡባ ጋካናዉ ደኤ። 
\v 20 ኔን ኑና አያዉ ኡባ ዎደ ዶጋይ? ቃይ ሀዋ ኬሻ አዱሳ ዎድያ ኑና አያዉ አጋይ? 
\v 21 አቤት መና ጎዳዉ፥ ኑና ኔኮ ዛራ፤ ኑንካ ስማና! ኑ ዎድያካ በንዋዳን ዛራደ ኦራ! 
\v 22 ኔን ኑና ኡባ ሙለ አጋዲየ? ነ ሀንቆካ ዛዋይ ባዌየ?