\id JON - Dawuro Full Bible Ethiopic Version
\ide UTF-8
\h ዮናሳ
\toc1 ዮናሳ ትምቢትያ
\toc2 ዮናሳ
\toc3 ዮናሳ
\mt1 ዮናሳ ትምቢትያ
\imt ገሉዋ
\ip ዮናሳ ማጻፋይ ጾሳ አዛዙዋ ፖልከ ጊደ እት ናብያ ቦላ ጋኬዳ ዱማ ዱማ መቱዋ ኦድያ ታርኪያ ማጻፋ ግድያ ግሻዉ፥ ሀራ ማጻፋቱዋፐ እ ዱማቴ። ጾሳይ ዮናሳ፥ “እስራኤልያዉ ዋና ሞርከ ግዴዳነ ዎልቃማ፥ አሶረ ካዉተዉ ዋና ካታማ ግዴዳ ነነዌ ባ” ያጊደ አዛዜዳ፤ ሽን ዮናስ፥ “ጾሳይ ካሰ ሄ ካታማ ይሳና ጊደ ኦዴዳ ምኖ ኦዱዋ ኪታን ፔሸናን አጋናዉ ሀኔዳ” ጊደ ቆፔዳ ድራዉ፥ ጾሳ ቃላ አኪደ ነነዌ ባናዉ ኮይቤና። ዳሮ ታርከባቱ ፖለቴዳዋፐ ጉየ ናሸተናን ደኢደ አዛዘቴዳ። ካሰ ኦደቴዳ ባሻ ሀናናዌ ፖለትቤና ግሻዉ ሀንቀቴዳ።
\ip ሀ ማጻፋይ ኡባባ ቦላን ጾሳዉ ማታይ ደእያዋ ኦዴዳ። ኡባ ቃይ ጎዳይ ሲቁነ ማሮተይ ኩሜዳ ጾሳ ግድያ ግሻዉ፥ ባረ አሳ ሞርከቱዋ ሙርያዋፐነ ይስያዋፐ፥ ኡንቱንቶ አቶ ግያዋን ኡንቱንታ አሽያዋ ዶስያዋ ቆንጭሴዳ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 1. ዮናሰ ጎዳፐ ባቃቱሳ \ior 1:1-17\ior*
\io1 2. ዮናሳ ዎሳ \ior 2:1-10\ior*
\io1 3. ዮናሰ ናናዌ ቡሳነ አሳ ናጋራ ፓጸ \ior 3:1-10\ior*
\io1 4. ጾሳይ እሜዳ ማሮታን ዮናሳ ሀንቁዋ \ior 4:1-11\ior*
\c 1
\s1 ዮናስ ጎዳፐ ባቃቱሳ
\r (1:1-17)
\p 1. 
\v 1 መና ጎዳ ቃላይ አሚታያ ናኣ ዮናሳኮ ሀዋዳን ያጊደ ዬዳ፤\x - \xo 1:1 \xo*\xt 2 ካታ. 14:25\xt*\x* 
\v 2 “ደንዳ! ሄ ዎልቃማ ካታማ ነነዌ ባ፤ ባደ ሄ ካታማ አሳ ኢታተይ ታ ስን ጋኬዳ ግሻዉ፥ ኡንቱንቶ ማርካታ” ያጌዳ። 
\v 3 ሽን ዮናስ መና ጎዳ ስንፐ ባቃቲደ፥ ታርሴሰ ግያ ጋድያ ባናዉ ደንዴዳ፤ እ ዮጰ ካታማ ዎደ፥ ታርሴሰ ብያ ማርካብያ ደሜዳ። መና ጎዳ ስንፐ ባቃቲደ፥ ኡንቱንቱና ታርሴሰ ባናዉ ሚሻ ጭጊደ፥ ማርካብያን ገሌዳ።
\p
\v 4 ሽን ማርካቢ ቢሽን፥ መና ጎዳይ አባ ቦላ ዎልቃማ ጫርኩዋ ደንዳ፤ ደንና አባ ቤታይ ሎይ ዳሬዳ ግሻዉ፥ ማርካቢ መአና ሀኔዳ። 
\v 5 ያትና፥ ማርካብያ ላግያዋንቱ ያዪደ፥ ኡባይካ ባረንቱ ጾሳኮ ጾሳኮ ዋሴድኖ። ቃይ ማርካቢ ካዉሻና ማላ፥ አ ግዶን ደእያ ጫና ደንደ፥ አባን ኦሌድኖ። ሽን ዮናስ ማርካብያዉ ግዶ ክፍልያ ገሊደ፥ ያን ግሲደ፥ ገምእሹዋ ፓኑሬዳ።
\p
\v 6 ማርካብያ ካፑ ገምእሻድ ቢደ፥ “አያዉ ገምእሻዲ? ደንዳ፥ ነ ጾሳ ዎሳ! ኦን ኤሪ፥ እ ባረ ሎኦ አይፍያን ጼሊደ፥ ኑና አሻናዌንቶነ” ያጌዳ።
\p
\v 7 ማርካብያ ላግያዋንቱ እቱ እቶ ሀዋዳን ያጌድኖ፤ “ሃይተ፤ ሀ ኢታባይ ኑና ኦ ጋሱዋን ጋከደንቶነ ኤራናዉ ሳማ የጎይተ” ያጌድኖ። ሳማ የግና፥ ሳማይ ዮናሳ ቦላን ዎዳ። 
\v 8 ኡንቱንቱ ዮናሳ ሀዋዳን ያጊደ ኦቼድኖ፤ “ሀ ኢታባይ ኦ ጋሱዋን ኑ ቦላ ጋከደንቶነ፥ አነ ኑዉ ኦዳ። ነ ኪታይ አዬ? ሀቃፐ ያድ? ነ ጋዲ ሀቄ? ኔን ኦ ዛረ?” ያጌድኖ።
\p
\v 9 ዮናስ ዛሪደ፥ ሀዋዳን ያጌዳ፤ “ታን እብራዌ አሳ፤ አባነ ጋድያ መዳ መና ጎዳዉ፥ ሳሉዋ ጾሳዉ ጎይናይ” ያጌዳ።
\p
\v 10 መና ጎዳ ስንፐ እ ባቃትያዋ እ ኡንቱንቶ ኦዴዳባፐ አሳቱ ኤሬዳ ግሻዉ ያዬድኖ። አ፥ “ላ አይባ ፓላባ ኦዲ?” ያጌድኖ።
\p
\v 11 ቃይ አባ ቤታይ ካሰዋፐ ሃ ዳሬዳ ግሻዉ፥ አሳቱ ዮናሳ፥ “ኑዉ አባይ ዎፓና ማላ፥ ኔና ኑን ዋታነ?” ያጊደ ኦቼድኖ።
\p
\v 12 እ ኡንቱንቶ፥ “ሀ ዎልቃማ ቤታይ ህንተንቱ ቦላን ደንዲደ ታ ጋሱዋና ግድያዋ ታን ኤራይ። ሄዋ ግሻዉ፥ ታና ደንደ፥ አባን ኦልተ። ያቶፐ፥ አባይ ህንተንቶ ዎፑ ጋናዋ” ያጌዳ።
\p
\v 13 ሽን ማርካብያ ላግያዋንቱ ማርካብያ ጉየ አባ ዶናዉ ከሳናዉ ዎልቃፐ ባጸቴድኖ፤ ግዶፐነ፥ አባ ቤታይ ሎይ ዳሬዳ ግሻዉ፥ ከሳናዉ ዳንዳይበይክኖ። 
\v 14 ሄዋ ግሻዉ፥ ኡንቱንቱ ሀዋዳን ያጊደ፥ መና ጎዳኮ ዋሴድኖ፤ “አቤት መና ጎዳዉ፥ ሀ ብታንያ ሸምፑዋ ግሻዉ፥ ኔን ኑና ይሰናዳንነ ሀ ጌሻ ሱ አጩዋ ኔን ኑፐ አቼናዳን፥ ኑን ኔና ምንሲደ ዎሴቶ። አያዉ ጎፐ፥ መና ጎዳዉ፥ ኔን ነ ኮዮዋዳን ኦዳ” ያጌድኖ።
\p
\v 15 ሄዋፐ ጉየ፥ ዮናሳ ደንደ፥ አባን ኦሌድኖ፤ ኦልና አባ ቤታይ ዎፑ ጌዳ። 
\v 16 ያትና፥ አሳቱ መና ጎዳዉ ሎይ ያዬድኖ፤ መና ጎዳዉ ያርሹዋ ያርሼድኖ፤ ሺቁዋካ ሺቄድኖ።
\p
\v 17 ዮናሳ ምታና ማላ፥ እት ዎልቃማ ሞልያ መና ጎዳይ ጊግሴዳ፤ ሄ ሞልያ ኡሉዋን ዮናስ ሄዙ ጋላሳነ ሄዙ ቃማ ደኤዳ።\x - \xo 1:17 \xo*\xt ማቶሳ 12:40\xt*\x*
\c 2
\s1 ዮናሳ ዎሳ
\r (2:1-10)
\p
\v 1 ዮናስ ሞልያ ኡሉዋን ደኢደ፥ ሀዋዳን ያጊደ፥ መና ጎዳኮ፥ ባረ ጾሳኮ፥ ዎሴዳ፤ 
\v 2 “ታን ታ ቱጋ ግዶን ደኣደ መና ጎዳ ጼሳድ፤ ጼስና እ ታዉ ኮዬዳ። ታን ስኦልያ ኡሎ ግዶን ደኣደ ዋሳድ፤ ኔንካ ታ ዋሱዋ ስሳዳ። 
\v 3 ኔን ታና ጪማ አባ ጋርሳን ዱገ ኦላዳ፤ ሃይ ታ ዩሹዋ ዶዴዳ፤ ነ ኡምቡለትያ ነ ቤታይ ታ ቦላና አድኖ። 
\v 4 ሄዋ ግሻዉ፥ ታን ሀዋዳን ያጋድ፤ ‘ታን ነ ስንፐ ዎራ ኦለታድ፤ ግዶፐነ፥ ታን ነ ጌሻ ጎልያ ዛራደ በአና’ ያጋድ።
\p
\v 5 “ሃይ ታዉ ቆያ ጋካናዉ ምቴዳ፤ ጪማ አባይ ታና ሙኬዳ፤ አባን ደእያ ማታይካ ታ ሁጲያን ጻጸቴዳ። 
\v 6 ታን ደር ባሰቴዳ ሳኣ ዱገ ዎአድ፤ ቢታንነ አ ኩቡዋን መናዉ ጎርደታድ። ሽን አቤት መና ጎዳዉ፥ ታ ጾሳዉ፥ ኔን ታ ሸምፑዋ ጪማ ኦላፐ ከሳዳ።
\p
\v 7 “ታን ዎደ፥ ኔና መና ጎዳ ሀሳያድ። ታ ዎሳይካ ኔኮ፥ ነ ጌሻ ጎልያ ማቅዳስያ ጋኬዳ። 
\v 8 ሀዳ ኤቃቶ ጎይንያዋንቱ ግኦድአን አማነትያዋ አጌድኖ። 
\v 9 ሽን ታን ጋላታና ነዉ ያርሻና፤ ታን ሺቄዳዋ ኡባካ ጋና። አያዉ ጎፐ፥ አቶተይ መና ጎዳፐ ዬ” ያጌዳ።
\p
\v 10 ሄዋፐ ጉየ፥ መና ጎዳይ ሞልያ አዛዝና፥ ሞሊ ዮናሳ ቢታ ቦላን ጮሼዳ።
\c 3
\s1 ዮናሰ ናናዌ ቡሳነ አሳ ናጋራ ፓጸ
\r (3:1-10)
\p
\v 1 መና ጎዳ ቃላይ ላኤንዋ ዮናሳኮ ሀዋዳን ያጊደ ዬዳ፤ 
\v 2 “ደንዳ! ሄ ዎልቃማ ካታማ ነነዌ ባ፤ ታን ነዉ ኦድያ ቃላ ኡንቱንቶ ማርካታ” ያጌዳ።
\p
\v 3 ዮናስ ደንዲደ፥ መና ጎዳ ቃላዳን ነነዌ ቤዳ። ናናዌ ሎይ ዎልቃማ ካታማ፤ ሀ ጋጻፐ ያ ጋጻ ጋካናዉ ሄዙ ጋላሳ ሀመትሴ። 
\v 4 ዮናስ ካታማ ብ ጋኪደ፥ እት ጋላሳ ኦግያ ካታማ ግዱዋኮ ሀመቴዳ፤ ሀመቲደ፥ “ኦይታሙ ጋላሳፐ ጉየ፥ ናናዌ ያና” ያጊደ አዋዬዳ።\x - \xo 3:4-5 \xo*\xt ማቶሳ 12:41፤ ሉቃሳ 11:32\xt*\x*
\p
\v 5 ያትና፥ ነነዌ አሳይ ጾሳ አማኔዳ፤ ጾማ አዋዬዳ። ዎጋፐ ቄራ ጋካናዉ፥ ኡባይካ ማቅያ ማዬድኖ።
\p
\v 6 ኦዱ ነነዌ ካትያኮ ጋኬዳ፤ እ ባረ ካዉተ አራታፐ ዎደ፥ ካዉተ ማዩዋ ማዬዳዋካ ቃሪደ፥ ማቅያ ማዪደ፥ ብድንን ኡቴዳ። 
\v 7 ያትደ ነነዌ አሳዉ ሀዋዳን ያጊደ አዋይሴዳ፤ “ካትያፐነ ካትያ ኦሳንቻቱዋፐ እመቴዳ አዛዙዋ ማራን፥ ሀቼፐ ዶሚደ፥ አሳይነ መሂ፥ ሚዛይነ ዶርሳይካ ኡባይ አያነ እንጻርሳን ላጮፕኖ፤ ሃካ ጋንጾፕኖ። 
\v 8 አሳይካ መሂካ ማቅያ ማዮ፤ አሳይ ኡባይ ምንሲደ ጾሳኮ ዋሶ፤ ባረንቱ ኢታ ኦግያፐነ ናቆ ኦሱዋፐካ ስምኖ። 
\v 9 ያትንቶ ኦን ኤሪ፥ ጾሳይ ኑዉ ቃረቲደ፥ ኑን የናዳን፥ ባረ ዎልቃማ ሀንቁዋፐ ስማነንቶነ” ያጌዳ።
\p
\v 10 ኡንቱንቱ ባረንቱ ኢታ ኦግያፐ ስሜዳዋ ጾሳይ በኤዳ ዎደ፥ ኡንቱንቶ ቃረቲደ፥ ኡንቱንቱ ቦላ አሀና ጌዳ ኢታባ አግ ባሼዳ።
\c 4
\s1 ጾሳይ እሜዳ ማሮታን ዮናሳ ሀንቁዋ
\r (4:1-11)
\p
\v 1 ሽን ሄዌ ዮናሳ ኡባካ ናሸችቤና። ሄዋ ግሻዉ፥ እ ሎይ ሀንቀቴዳ፤ 
\v 2 መና ጎዳ ሀዋዳን ያጊደ ዎሴዳ፤ “አቤት መና ጎዳዉ፥ ታን ብሮ ታ ጋደን ደኣደ ጌዳዌ ሀዋ ግደኔ? ታን ነ ስንፐ ባቃታደ ታርሴሰ ባናዉ ኤሌሌዳዌ ሀዋሳ። ኔን ቃረታይነ ማሮተይ ኩሜዳ ጾሳ ግድያዋ፥ ሀንቆ ኤሌለናዋነ አገና ሲቁዋን ኩሜዳዋ፥ ቃይ አሀና ጌዳ ኢታባካ አግያ ጾሳ ግድያዋ ታን ካሰካ ኤራድ።\x - \xo 4:2 \xo*\xt ከሳ 34:6\xt*\x* 
\v 3 አቤት መና ጎዳዉ፥ ሀእ ስም ሀይ ሀያና ታና ዎ፤ ፓጻ ደእያዋፐ ሀይቂያዌ ታዉ ሎአ” ያጌዳ።\x - \xo 4:3 \xo*\xt 1 ካታ. 19:4\xt*\x*
\p
\v 4 መና ጎዳይ አ ሀዋዳን ያጌዳ፤ “ቱሙ ኔን ሀዎ ሀንቀታናዉ በሲ?” ያጌዳ።
\p
\v 5 ዮናስ ካታማፐ ከሲደ ቤዳ፤ ቢደ ካታማፐ አዋይ ዶልያ ባጋን ኡቴዳ። ሄዋን ባረዉ ዳስያ ዳሴዳ፥ አ ኩዋን ኡቲደ፥ ካታማ ቦላ ጋክያዋ በአናዉ ናጌዳ። 
\v 6 አዋ ሱሉዋፐ ዮናሳ አሻና ማላ፥ መና ጎዳይ ጾሳይ እት ጎስያ ዶልሲደ ጊግሴዳ፤ ሄ ጎስያ ሀይይካ ዮናሳ ሁጲያፐ ቦላ ባጋና ኩዋ ግዳናዳን ኦዳ። ዮናስ ሄ ጎስያ ጋሱዋን ሎይ ናሸቴዳ። 
\v 7 ሽን ዎንተ ጋላስ ዎንታ ጾሳይ ጉጹንያ ጊግሴዳ፤ ሄ ጉጹኒ ጎስያ ሞዋን፥ ጎሲ መል አጌዳ። 
\v 8 አዋይ ከሶ ዎደ፥ ጾሳይ ምችያ ጫርኩዋ አዋይ ዶልያ ባጋፐ የዴዳ፤ ሄዋፐ ደንደዳዋን ዮናስ ላባናና ጋካናዉ፥ አዋይ ዮናሳ ሁጲያ ጹጌዳ። ያትና እ፥ “ፓጻ ደእያዋፐ ሀይቂያዌ ታዉ ሎአ” ያጊደ ሀይቃናዉ ዎሴዳ።
\p
\v 9 ጾሳይ ዮናሳ ሀዋዳን ያጌዳ፤ “ቱሙ ኔን ሀ ጎስያ ግሻዉ ሀንቀታናዉ በሲ?” ያጌዳ።
\p ዮናስ፥ “ኤ በሰ፤ ኡባ ሀይቃና ጋካናዉ ሀንቀታናዉ በሰ” ያጌዳ።
\p
\v 10 መና ጎዳይ ዮናሳ ሀዋዳን ያጌዳ፤ “እት ቃማን ዶላደ፥ ላኤን ቃማ መሌዳ ጎስያዉ፥ ኔን አን ዳቡራቤናባዉነ ድቻቤናባዉ ሀዋ ኬሻ ቃረታዳ። 
\v 11 ኡሸቻነ ሀድርሳ ሻክ ኤርቤና ጼታነ ላታሙ ሻአ አሳይነ ዳሮ መሂ ናናዌን ደኤ። ያትና ታን ሀ ዎልቃማ ካታማዉ ቃረታናዉ በሰኔ?” ያጌዳ።