\id JOL - Dawuro Full Bible Ethiopic Version
\ide UTF-8
\h ኢዩኤላ
\toc1 ኢዩኤላ ትምቢትያ
\toc2 ኢዩኤላ
\toc3 ኢዩ.
\mt1 ኢዩኤላ ትምቢትያ
\imt ገሉዋ
\ip ትምቢትያ ኦድያ ኢዩኤል አዉደ ደኤደንቶ አ ደኡዋ ታርክያን ዳሮ ኤረትያዌ ባዋ። ግዶ ሽን፥ አ ሱን ብለይ፥ “መና ጎዳይ ታ ጾሳ” ግያዋ ግዶደ ጾሳይ አናና ደእያዋ በሴ። ሀ ማጻፋ ትምቢትያዉ ሀራ ጌሻ ማጻፋቱዋና ቃራ ማታይ ደኤ። ማጻፋይ ቤቴዳዌ ክርስቶሳ የለታፐ ካሰ፥ ኦይደን ዎይ እቼሸን ጼቱ ላይ ሄራና ጌተቲደ ቆፈቴ። ሄ ዎዲ ፓርሰ ካተተይ ደእያ ዎደ። ኢዩኤል ኦዲደ፥ እስራኤልያ ጋድያን ዳሮ ቦሊ ያናዋነ ጋድያ ባይዝያ አዋይ አዋጽና ጋዲ ኮሻታናዋ ኦዴ። ሀ ሀኖታቱ ቃይ ጎዳ ጋላሳይ ማታቴዳዋ ኦዲኖ። ጎዳ ጋላሳይ ጋክያ ዎደ፥ አ ጌሻ ሸኒ ፖለተናዳን ዋትያዋንታ ኡባ እ ሙራናዋካ ጉጂደ ኦዲኖ። ትምቢትያ ኦድያዌ አሳይ ናጋራፐ ስምያዋ ግዶፐ፥ ጾሳይ ኡንቱንታ ካሰ ኡንቱንቱ ደእያ ሀኖታኮ ዛሪደ፥ አንጃናዋ ሀሳይሴዳ። ሀናና ጊደ እ ኦዴዳዋፐ ግታቲደ ቤትያ ህዶታይ ጾሳይ አቱማ አሳቱዋነ ማጫ አሳቱዋ ቦላ፥ ያላጋቱዋነ ጭማቱዋ ቦላ፥ ባረ አሳ ኡባ ቦላ ባረ አያና ጉሳናዋ ኦድያ ሳኣ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 1. ቦልያነ ሞርክያ ዎታዳራ \ior 1:1—2:17\ior*
\io1 2. ጎዳ ጋላሳ \ior 2:18-32\ior*
\io1 3. ጎዳይ አማነናዋንታ ሙርያዋ \ior 3:1-21\ior*
\c 1
\s1 ቦልያነ ሞርክያ ዎታዳራ
\r (ሆሰ 1:1—2:17)
\p
\v 1 ፑቱኤላ ናኣ ኢዩኤላኮ መና ጎዳይ ኪቴዳ ቃላይ ሀዋ።
\p
\v 2 ህንተኖ ጭማቶ፥ ሀዋ ስስተ! ይሁዳ ጋድያን ደእያ አሳዉ ኡባዉ፥ ስስተ! ሀዋ ማላባይ ህንተ ዎደ ዎይ ህንተ አዎቱዋ ዎደ ሀን ኤሪ? 
\v 3 ሄዋ ህንተ ናናቶ ኦድተ፤ ህንተ ናናይ ባረንቱ ናናቶ ኦድኖ፤ ቃይ ኡንቱንቱ ናናይካ ካልያ የለታዉ ኦድኖ።
\p
\v 4 ጎንዱዋፐ አቴዳ ካ ዉደ ቦሊ ሜዳ፤ ዉደ ቦልያፐ አቴዳ ካ ቡምቡረይ ሜዳ፤ ቃይ ቡምቡረፐካ አቴዳ ካ ኩኩባይ ሜዳ።
\p
\v 5 ህንተኖ ማትያዋንቶ፥ ቤጎቲደ ዬክተ! ህንተኖ፥ ዎይንያ ኤሳ ኡሽያዋንቶ ኡባ ገደ፥ ዝላልተ! አያዉ ጎፐ፥ ማልእያ ዎይንያ ኤሳይ ህንተ ዶናፐ አቴዳ። 
\v 6 ፓይዱ ባይና ኦላንቻይ ታ ጋድያ ማዬዳ። ኡንቱንቱ አቻይ ጋሙዋ አቻ ማላ፤ ቃይ ኡንቱንቱ ካስሊካ ጋማት ካስልያ ማላ።\x - \xo 1:6 \xo*\xt ሳፃ 9:8\xt*\x* 
\v 7 ኡንቱንቱ ታ ዎይንያ ቱራ ባይዜድኖ፤ ታ ባላስያ ምካ ጮሜድኖ። ኡንቱንቱ ፖቁዋ ኡባ ም ድጌዳ ድራዉ፥ ዎይንያነ ባላስያ ታሸቱ ኡባይ ቦጼድኖ።
\p
\v 8 አቱማዎ፥ ባረ ያላጋተን አ ጊጌዳ አስናይ ሀይቂና፥ ዋሩዋ ማያደ ዬክያ ጌላያቲዳን፥ ኡባይካ ዬክተ! 
\v 9 ካ ያርሹነ ኡሻ ያርሹ መና ጎዳ ጌሻ ጎልያ ብያዋ አጌዳ፤ ሄዋ ድራዉ፥ መና ጎዳዉ ኦያ ቄሳቱ ዬኪኖ። 
\v 10 ሾይቃይ መላ አቴዳ፤ ቢታይካ ዬኬ። አያዉ ጎፐ፥ ካይ ዬዳ፤ ዎይንያ ቱራይ መሌዳ፤ ዛይቲካ ላፌዳ።
\p
\v 11 ህንተኖ ጎሻንቻቶ፥ ካዮትተ! ህንተኖ፥ ዎይንያ ቱራ ቶክያዋንቶ፥ ዝላልተ! አያዉ ጎፐ፥ ጫኩ ጋኬዳ ዛርጋይነ ባንጋይ ጋደን ይክቼዳ። 
\v 12 ዎይንያ ቱራይ መሌዳ፤ ባላስያ ምይካ ሹሌዳ፤ ሮማንያ ግያ ምይ፥ ተምርያ ግያ ምይ፥ አፕልያ ግያ ምይነ ቃይ ሾይቃን ደእያ ሀራ ም ኡባይካ መሌዳ። ሄዋ ድራዉ፥ አሳፐ ናሸቻይ ሃኬዳ።
\s1 ስማናዳንነ ዎሳናዳን ሺቆ ጼሳ
\r (ሆሰ 1:11—2:17)
\p
\v 13 ህንተኖ ቄሳቶ፥ ዋሩዋ ማዪደ ዬክተ! ህንተኖ፥ ያርሽያሳን ኦያ ቄሳቶ፥ አዬ! አዬ! ጊተ፤ ህንተኖ፥ ታ ጾሳ ስንን ኦያዋንቶ፥ ጌሻ ጎልያ ገልተ፤ ዋሩዋ ማዪደ አቅተ። አያዉ ጎፐ፥ ካ ያርሹዋነ ኡሻ ያርሹዋ ጾሳ ጌሻ ጎልያን ያርሽያዌ ባዋ።
\p
\v 14 ጾማ አዋይተ፤ ጌሻ ያአዉ አሳ ጼሲደ ሺሽተ፤ ጭማቱዋነ ጋድያን ደእያ አሳ ኡባ መና ጎዳ ህንተ ጾሳ ጌሻ ጎልያ ሺሽተ፤ ያቲደ ያን መና ጎዳኮ ዋስተ!
\p
\v 15 መና ጎዳ ጋላሳይ ማቴዳ፤\x - \xo 1:15 \xo*\xt ኢሳ. 13:6\xt*\x* ሄ ጋላሳዉ አየ አና! ሄ ጋላሳይ ኡባ ዳንዳይያ ጾሳፐ ባሻ ጋላሳ ግዲደ ዬ። 
\v 16 ኑ አይፍያ ስንፐ ካይ፥ ኑ ጾሳ ጌሻ ጎልያፐ ናሸቻይነ እልልሳይ ዬዳ ግደኔ? 
\v 17 ዘረቴዳ ዘረይ ቢታ ግዶን ቡቄዳ፤ ካይ መል ክቼዳ ድራዉ፥ ዬሲካ ኡባይ መላ ግዴዳ፤ ድየቱካ ኮለቴድኖ። 
\v 18 መሄቱ ሎይ ዋሲኖ፤ ሚዛ ዉድያዉካ ማታይ ባይና ድራዉ፥ ያነ ሃነ ብቻሪኖ። ሀራይ አቶ፥ ዶርሳ ዉደቱካ ቱጋቲኖ።
\p
\v 19 አቤት መና ጎዳዉ፥ ታማይ ባዙዋን ደእያ ሄን ጋደቱዋ ም ድጌዳ ድራዉነ ደምባን ደእያ ም ኡባ ላጩ ጹግ ድጌዳ ድራዉ፥ ታን ኔኮ ዋሳይ። 
\v 20 ጎግያ ሃይ መሌዳ ድራዉነ ታማይ ባዙዋን ደእያ ማታ ም ድጌዳ ድራዉ፥ ሀራይ አቶ፥ ባዙዋ ዶአቱካ ኔኮ ዋሲኖ።
\c 2
\p
\v 1 ጽዮነን ማላካታ ፑንተ፤ ታ ጌሻ ደርያንካ ማላካታ ስስተ! ይሁዳ ጋድያን ደእያ አሳይ ኡባይ ያሻዉ ኮኮሮ፤ አያዉ ጎፐ፥ መና ጎዳ ጋላሳይ ዬ፤ ማታቴዳ። 
\v 2 ሄ ጋላሳይ ማነ ሻኖቻ ጋላሳ፤ ሻርያነ ባራ ማ ጋላሳ! ጮራነ ምኖ ኦላንቻቱ ደረቱዋ ቦላን ጻልቂ ከስያዋዳን ከስ ዎድኖ። ኡንቱንቱ ማላይ በንፐ ዶምና ደእቤና፤ ሀዋፐ ስንናዉ ዳሮ የለታ ጋካናዉካ ኡንቱንቱ ማላይ ደኤና።
\p
\v 3 ኡንቱንቱ ባረፐ ስንና ደእያ ጫርሻ ኡባ ታማዳን ሚኖ፤ ቃይ ኡንቱንቱፐ ጉየና ደእያባ ላጩዋዳን ጹጊኖ፤ ኡንቱንቱፐ ስንና ደእያ ሳአይ ኤደነ ገነትያ ማላ፤ ሽን ኡንቱንቱፐ ጉዪ መላ ባዙዋ ማላ፤ ኡንቱንቱፐ አያይነ አተና። 
\v 4 ኡንቱንቱ ማላይ ፓራ ማላ ማላ፤\x - \xo 2:4-5 \xo*\xt ሳፃ 9:7-9\xt*\x* ኡንቱንቱ ኦላ ፓራቱዋዳን፥ ኤለካ ዎጺኖ። 
\v 5 ፓራይ ጎችያ ጋረቱዋ ኮሻ ጊሪኖ፤ ኡንቱንቱ ደረቱዋ ጼራና ጉፒኖ፤ ዳላ ምያ ታማ ላጩዋዳን ጻራጊኖ፤ ኦላ ባናዉ ሳልፔዳ ዎልቃማ ኦላንቻቱዋዳን ማራን ሀመቲኖ። 
\v 6 ኡንቱንቱፐ ስንና አሳይ ኮኮሬ፤ ኡንቱንቱ ያሻዉ ኡባ ሶምኢ ላመቴዳ። 
\v 7 ኡንቱንቱ ኦላንቻቱዋዳን ዎጺኖ፤ ድርሳ ግምቢያካ ግኢኖ። ኡንቱንቱ ኡባይካ ባረ ማራን ሳልፒኖ፤ ባረንቱ ሳልፕያፐ ጋጻ ከስክኖ። 
\v 8 ኡንቱንቱ እቱ እቱዋና ሱገትክኖ፤ ኡባይካ ባረ ሳልፕያን ሳልፕያን ስት ጊደ፥ ስንዉ ሀመቲኖ። ኡንቱንቱ ባረናና ኦለትያዋንቱ ግዱዋና ሲደ አኖ፤ ሄ ዎደ ኡንቱንታ ተእያባይ ባዋ። 
\v 9 ኡንቱንቱ ካታማ ኤለካ ዎራጂኖ፤ ድርሳ ግምቢያ ቦላንካ ዎጺኖ። ኡንቱንቱ ጎልያ ቦላካ ከሲኖ፤ ቃይ ካይሱዋዳን፥ ማስኮትያና ገሊኖ። 
\v 10 ኡንቱንቱፐ ስንና ጋዲ ቃጼ፤\x - \xo 2:10 \xo*\xt ሳፃ 8:12\xt*\x* ሳሎቱካ ኮኮሪኖ። አዋይነ አግናይ ሚኖ፤ ቃይ ጾልንተቱካ ባረንቱ ፖኡዋ ገንኖ። 
\v 11 መና ጎዳይ ባረ ኦላንቻቱዋ ስንን ጉሜ፤\x - \xo 2:11 \xo*\xt ሳፃ 6:17\xt*\x* አዉ አዛዘትያ ኦላንቻቱ ጮራነ ዎልቃማ። መና ጎዳ ጋላሳይ ግታነ ዳሮፐ ያሽያዋ። ሄ ጋላሳ ዳንዳያናዌ ኦኔ?
\s1 ናጋራፐ ስማናዳን ጼሳ
\p
\v 12 መና ጎዳይ ሀዋዳን ያጌ፤ “ሀእካ ጾሚደ፥ ዬኪድነ ካዮቲደ ፖሎ ዎዛናፐ ታኮ ስምተ። 
\v 13 ህንተ ዎዛናፐ አትና፥ ህንተ ማዩዋ ፔፕተ” ያጌ።
\p መና ጎዳኮ፥ ህንተ ጾሳኮ፥ ስምተ፤ አያዉ ጎፐ፥ እ ቃረታይነ ማሮታይ ኩሜዳዋ፤ ሀንቆ ኤሌለናዋነ ሲቁ ዳሬዳዋ፤ እ ህንተና ሙራናዉ ኮየናዋ። 
\v 14 ኦን ኤሪ፥ ጾሳይ ህንተ ጾሳይ፥ ባረ ሀንቁዋፐ ስሚደ፥ ህንተንቶ ዳሮ ካ አንጁዋ እማነንቶነ። ሄ ዎደ መና ጎዳዉ፥ ህንተ ጾሳዉ፥ ካ ያርሹዋነ ኡሻ ያርሹዋ ህንተ ያርሻና።
\p
\v 15 ጽዮነን ማላካታ ፑንተ፤ ያአዉ አሳ ሺሽተ! ጾማ አዋይተ፤ 
\v 16 ሺቁዋ ጌሽተ፤ ጭማቱዋ እትፐ አህተ፤ ጉ ናናቱዋነ ምያዋንታካ አሾፕተ። አክያዌ ቡላቻ ጎልያፐ ከሶ፤ ቡላቼትያናካ ባረ ሲርጻፐ ከሱ። 
\v 17 መና ጎዳዉ ኦያ ቄሳቱ ጌሻ ጎልያ ባራንዳፐነ ያርሽያ ሳኣፐ ግዱዋን ኤቂደ ዬክኖ። ኡንቱንቱ ሀዋዳን ያጊደ ዎስኖ፤ “አቤት መና ጎዳዉ፥ ነ አሳዉ ቃረታ፤ ነ አሳ ካዉተቱዋ ግዶን ቦርያባነ ቅሊጭስያዋ ከሶፓ። አሳይ ባረ ግዶን አያዉ፥ ‘ኡንቱንቱ ጾሳይ ሀቃን ደኢ?’ ያጋኔ?” ያግኖ።
\s1 ጎዳ ጋላሳ
\r (2:18-32)
\p
\v 18 ያትና፥ መና ጎዳይ ባረ ቢታዉ ሴለታና፤ ቃይ ባረ አሳዉካ ቃረታና። 
\v 19 መና ጎዳይ ዛሪደ ባረ አሳ ሀዋዳን ያጌ፤ “በእተ፥ ታን ህንተንቶ ካ፥ ዎይንያ ኤሳነ ዛይትያ ህንተና አዳ ካልስያዋ የዳና፤ ታን ህንተና ሙለካ ካዉተቱዋ ግዶን ቦርያ ከስከ።
\p
\v 20 “ሁጲሳ ባጋና ዬዳ ቦልያዳን ግዴዳ ሞርከቱዋ ታን የደርሳደ፥ ህንተፐ ሃሳና፤ ባዙዋነ መላ ቢታ ታን ኡንቱንታ የደርሳና። አዋይ ዶልያ ባጋና ደእያዋንታ ማጽነ አባዉ፥ አዋይ ዉልያ ባጋና ደእያዋንታ ቃይ ሜድተራነ አባዉ ዛራደ የዳና፤ ኡንቱንቱ አሃይ ጽንቁዋ ጾኡ ጋና። ሄዌ ኡባይ ኡንቱንቱ ህንተ ቦላ ዎልቃማ ኢታባ ኦዳ ግሻሳ” ያጌ።
\p
\v 21 ቢታዉ፥ ስም ያዮፓ፤ መና ጎዳይ ግታባ ኦዳ ድራዉ፥ ናሸታነ ሀሹ ጋ! 
\v 22 ህንተኖ ሳኣ መሄቶ፥ ያዮፕተ፤ አያዉ ጎፐ፥ ባዙዋን ደእያ ሄን ጋዲ አጬዳ፤ ምይካ ባረ አይፍያ አይፌ፤ ኤ ምይነ ዎይንያ ቱራይካ አይፍያ ዶርጾጼ።
\p
\v 23 ህንተኖ ጽዮነ አሳቶ፥ ናሸትተ፤ መና ጎዳን፥ ህንተ ጾሳን፥ ሀሹ ጊተ! አያዉ ጎፐ፥ እ ባልጉዋ እራ ህንተንቶ ዳርሲደ እሜዳ፤ ቃይ እ ካሰዋዳን፥ ህንተንቶ ባልጉዋ እራነ አድልያ እራ ግድሲደ እሜዳ። 
\v 24 ካ ቡክያ ኡዱማቱዋን ካይ ኩማና፤ ዎይንያ ኤሳይነ ዎጋራ ዛይቲ ጉምእያ ኦላቱዋ ኩሚደ ፓላሀና።
\p
\v 25 መና ጎዳይ ህንተ ጾሳይ ሀዋዳን ያጌ፤ “ካሰ ታን ህንተ ግዶ የዴዳ፥ ታ ዎልቃማ ኦላንቻቱዋ፥ ጎንዶቱ፥ ቦለቱ፥ ቡምቡሮቱነ ኩኩቦቱ ሜዳ ላይቱዋ አጩዋ ታን ህንተንቶ ጭጋና። 
\v 26 ማናዉ ህንተንቶ ዳሮ ቁማይ ደአና። ሄዋ ድራዉ፥ ህንተ ካላናነ ማላልስያባ ህንተንቶ ኦዳ ታና መና ጎዳ ህንተ ጾሳ ሱን ጋላታና። ቃይ ታ አሳይ ላኤን ሙለካ ዬላተና። 
\v 27 ሄ ዎደ ታን እስራኤልያ ግዶን ደእያዋ፥ ታን መና ጎዳይ ህንተ ጾሳ ግድያዋነ ታፐ አትና፥ ሀራ ጾስ ባይናዋ ህንተ ኤራና። ቃይ ታ አሳይ ላኤን ሙለካ ዬላተና።
\p
\v 28 “ሄዋፐ ጉይያን ሀዋዳን ሀናና፤ ታን አሳ ኡባ ቦላ ታ አያና ጉሳና።\x - \xo 2:28-32 \xo*\xt ኪታ 2:17-21\xt*\x* ህንተ አቱማ ናናቱነ ህንተ ማጫ ናናይ ትምቢትያ ኦዳና፤ ህንተ ጭማቱካ አኩሙዋ አኩመታና፤ ህንተ ዎዳላ ናናይካ ሳፃ በአና። 
\v 29 ሄ ጋላሳቱዋን ታ አቱማ ቆማቱ ቦላነ ታ ማጫ ቆማቱ ቦላ ታን ታ አያና ጉሳና።
\p
\v 30 “ቃይ ታን ቦላ ሳሉዋን ማላልስያባ፥ ጋርሳ ሳንካ ሱ፥ ታማነ ስት ጊደ ፑደ ደንድያ ጩዋ በሳና። 
\v 31 ግታነ ዳሮፐ ያሽያ መና ጎዳ ጋላሳይ ጋካናፐ ካሰ አዋይ ማና፤\x - \xo 2:31 \xo*\xt ማቶሳ 24:29፤ ማር. 13:24-25፤ ሉቃሳ 21:25፤ ሳፃ 6:12-13\xt*\x* አግናይካ ሱ ማላታና። 
\v 32 ሄ ዎደ ሀዋዳን ሀናና፤ መና ጎዳ ሱን ጼስያ ኡባይ አታና።\x - \xo 2:32 \xo*\xt ሮመ 10:13\xt*\x* መና ጎዳይ ጌዳዋዳን፥ ጽዮነ ደርያንነ የሩሳላመን አትያዋንቱ ደአና። ሄዋንቱፐካ መና ጎዳይ ጼሴዳዋንቱ ፓጻ ደአና።”
\c 3
\s1 ጎዳይ አማነናዋንታ ሙርያዋ
\r (3:1-21)
\p
\v 1 መና ጎዳይ ሀዋዳን ያጌ፥ “ሄ ጋላሳቱዋንነ ሄ ዎድያን ታን ይሁዳነ የሩሳላመ አሳ ኦሞዱዋ ዛራናነ እሻልሳደ ዎና። 
\v 2 ታን ካዉተቱዋ ኡባን ደእያ አሳ ሺሻደ፥ ዱገ እዮሳፈጻ ዎምባ ዎና፤ ኡንቱንቱ ታ አሳ እስራኤልያ ቦላ ኦዳ ባይዙዋ ኡባ ድራዉ፥ ታን ኡንቱንታ ያን ፕርዳና። አያዉ ጎፐ፥ ኡንቱንቱ ታ አሳ ካዉተቱዋ ግዶን ላሌድኖ፤ ቃይ ታ ቢታካ ባረዉ ግሽ አኬድኖ፤ 
\v 3 ኦሞደቴዳ ታ አሳ ቦላን ሳማ የጌድኖ፤ ሻርሙጻ ማጫ አሳ ደማናዉ፥ አቱማ ናኣ እሜድኖ፤ ቃይ ዎይንያ ኤሳ ኡሻናዉ፥ ማጫ ናቶ ባይዜድኖ።
\p
\v 4 “ሄዋዳንካ፥ ህንተኖ፥ ጺሮሳ፥ ሲዶናነ ፕልስጼማ ጋድያ አሳቶ፥ ህንተ ታ ቦላ አይ ኦናዉ ቆፔድቴ? ታን ኦዳዋ ሀሉዋ ከሳናዉ ኮዪቴ? ሄዋ ህንተ ኮዮፐ፥ ታን ኤሌላደ ህንተ ኦዳ ኦሱዋ ህንተ ቦላ ዛራና።\x - \xo 3:4-8 \xo*\xt ኢሳ. 14:29-31፤ 23:1-18፤ ኤር. 47:1-7፤ ህዝ. 25:15—28:26፤ አሞጻ 1:6-10፤ ሶፎ. 2:4-7፤ ዛካ. 9:1-7፤ ማቶሳ 11:21-22፤ ሉቃሳ 10:13-14\xt*\x* 
\v 5 አያዉ ጎፐ፥ ህንተ ታ ብራነ ታ ዎርቃ አኬድታ፤ ታ አልኦ ሚሻካ ህንተ ኤቃ ጎለቱዋ ገልሴድታ። 
\v 6 ይሁዳ ጋድያ አሳነ የሩሳላመ ካታማ አሳ ኡንቱንቱ ጋድያፐ ሃስ አፊደ፥ ግሪከ ጋድያ አሳዉ ዛልኤድታ። 
\v 7 በእተ፥ ህንተ ዛልኤዳ ሳኣፐ ታን ኡንቱንታ ሀእ ደንና፤ ህንተ ኦዳዋ ኡባ ህንተ ሁጲያን ዛራና። 
\v 8 ታን ህንተ አቱማ ናናቱዋነ ህንተ ማጫ ናናቱዋ ይሁዳ ጋድያ አሳዉ ዛልኤታናዳን ኦና፤ ቃይ ኡንቱንቱካ ሃኮ ጋድያን ደእያ ሳባ ጋድያ አሳዉ ኡንቱንታ ዛልአና። ታን መና ጎዳይ ሀዋ ኦዳድ።
\s1 ጾሳይ አማነና አሳ ቦላ አሄዳ ፕርዳ
\p
\v 9 “ሀዋዳን ያጊደ አይሁዳ ግደና አሳቱዋ ግዶን አዋይተ፤ ‘ኦላዉ ጊግተ፤ ምኖ አሳቱዋ ደንተ! ኦላንቻቱ ኡባይ ሺቅኖነ ከስኖ። 
\v 10 ህንተ ማራሻ ማሻ፥\x - \xo 3:10 \xo*\xt ኢሳ. 2:4፤ ሚክ. 4:3\xt*\x* ህንተ ባጫካ ቶራ ከሳናዉ ቆጽተ! ዳቡራንቻይ፥ ታን ምና! ያጎ። 
\v 11 ህንተኖ፥ ዩሹዋን ደእያ ካዉተ ኡባቶ፥ ኤለካ ሃ ዪተ፤ ሄዋን ሺቅተ’ ያግተ” ያጌ።
\p አቤት መና ጎዳዉ፥ ነ ኦላንቻቱዋ ያ ዱገ ዎ!
\p
\v 12 ቃይካ ጾሳይ ሀዋዳን ያጌ፤ “ካዉተቱ ደንዲደ፥ እዮሳፈጻ ዎምባ ቢኖ፤ አያዉ ጎፐ፥ ዩሹዋን ደእያ ካዉተቱዋ ኡባ ቦላን ፕርዳናዉ ታን ያን ኡታና። 
\v 13 ኡንቱንቱ ኢታተይ ሎይ ዳሬዳ።\x - \xo 3:13 \xo*\xt ሳፃ 14:14-16፣ 19-20፤ 19:15\xt*\x* ሄዋ ድራዉ፥ ጫካ ዎዲ ጋክና ባጫን ጫክያዋዳን፥ ኡንቱንታ ጫክተ፤ ዎይንያ አይፊ ጉምእያ ኦላን ኩምና የያዋዳንካ፥ ኡንቱንታ የተ።”
\p
\v 14 ፕርዳ ዛንጋራን መና ጎዳ ጋላሳይ ጋኬዳ፤ ሄዋ ድራዉ፥ ዳሮ ዳሮ አሳይ ፕርዳ ዛንጋራን ደኤ። 
\v 15 ሄ ጋላስ አዋይነ አግናይ ማና፤ ጾልንተቱካ ባረንቱ ፖኡዋ ገንና። 
\v 16 መና ጎዳይ ጽዮነን ግዲደ ጉማና፤\x - \xo 3:16 \xo*\xt አሞጻ 1:2\xt*\x* የሩሳላመንካ ባረ ኮሻ ስሳና፤ ሳሉነ ሳአይ ኮኮራና። ሽን መና ጎዳይ ባረ አሳዉ እስራኤላዉ ባቃት አትያ ሳኣነ ደኡዋ ግዳናዋ።
\s1 ጾሳይ ባረ አሳ አንጃና
\p
\v 17 መና ጎዳይ፥ “ታን ታ ጌሻ ደርያን ጽዮነን ደእያ መና ጎዳ ህንተ ጾሳ ግድያዋ ህንተ ሄ ዎደ ኤራና። የሩሳላመ ካታማይ ጌሻ ግዳናዋ፤ ቃይ አላጋቱዋ ኦላንቻቱ ላኤን የሩሳላመ ዎራጅክኖ።
\p
\v 18 “ሄ ጋላስ ደረቱ አይፍያ ዎይንያ ቱራን ካመታና፤ ደረቱዋ ቦላንካ ዳሮ ማ እምያ ሚዛይ ሄመታና። ይሁዳ ጋድያን ደእያ ሻፋ ኡባና ሃይ ፑልታና። መና ጎዳ ጌሻ ጎልያፐ ፑልቱ ጎጋና፤ ሺጽማ ዛንጋራ ኡሻና።
\p
\v 19 “ግብጼ ጋዲ መላ ግዳናዋ፤ ኤዶማ ቢታይካ አይነ ዶለና ቢታ ግዳናዋ። አያዉ ጎፐ፥ ኡንቱንቱ ይሁዳ አሳ ቦላ ኢታባ ኦድኖ፤ ቃይ ይሁዳ ጋድያን ጽሎ አሳ ሱካ ጉሴድኖ። 
\v 20 ሽን ይሁዳ ጋዲ መናዉ፥ የሩሳላመካ የለታ ኡባ ጋካናዉ፥ አሳይ ደኢያሳ ግዳናዋ። 
\v 21 ታን ጭገተናን አጌዳ ኡንቱንቱ ሱ ሀሉዋ ብሮ ከሳና፤ አያዉ ጎፐ፥ ጾሳይ ጽዮነን ደኤ” ያጌ።