\id HAB - Dawuro Full Bible Ethiopic Version
\ide UTF-8
\h እምባቆማ
\toc1 እምባቆማ ትምቢትያ
\toc2 እምባቆማ
\toc3 እምባ.
\mt1 እምባቆማ ትምቢትያ
\imt ገሉዋ
\ip ትምቢትያ ኦድያ እምባቆማዉ ትምቢትያ ቃላይ ዬዳዌ ባብሎናቱ ዳሪ ምኔዳ ዎድያን፥ ክርስቶሳ የለታፐ ካሰ፥ ላፑን ጼቱ ላይ ዉርሰና። ሀ መቀ ኢታ አሳቱ ኦደ ደእያ ሱገ ኦሱዋን እምባቆም ሎይ ዳሮ ኡንኤቴዳ ድራዉ፥ “ያትና ሀዋንታ ማካላንቻቱዋ ዎታ ጮኡ ጋደ ጼላይ? ናጋራንቻቱ ባረፐ ጽሉዋ ዳርያዋንታ ይሳናዉ ደንድያ ዎደ፥ አያዉ ጮኡ ጋድ?” ያጊደ ጾሳ ኦቼዳ (1:13)። ጾሳይ አዉ ዛሩዋ እሚደ፥ “ታን ኡባባካ ታ ዎድያን ኦይ” ያግ ዛሬዳዋፐ ጉይያን፥ ሄዌ ጋካናዉ፥ “ጽሉ አማኑዋን ደኡዋ ደሜ” ያጌዳ (2:4)።
\ip ማጻፋዉ አትያ ክፍሊ ማካላንቻቱዋ ቦላን ጋክያ ባሻባዉ ኦደቴዳ ትምቢትያ ግድሽና፥ ዉርሰ ሄራን ጾሳ ግታተባነ ሀ ግጽምያ ጻፌዳ ብታንያ አማኑዋ ምኖተባ ቆንጭስያ ማዛሙሪ ደኤ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 1. እምባቆማ ማጋናነ ጎዳ ዛሩዋ \ior 1:1—2:4\ior*
\io1 2. ናጋራንቻቱዋ ቦላ አዳ ፕርዳ \ior 2:5-20\ior*
\io1 3. እምባቆማ ዎሳ \ior 3:1-19\ior*
\c 1
\s1 እምባቆማ ማጋናነ ጎዳ ዛሩዋ
\r (1:1—2:4)
\p
\v 1 ትምቢትያ ኦድያ እምባቆማዉ መና ጎዳይ ሳጻን እሜዳ ኪታይ ሀዋ።
\s1 እምባቆም ሱረ ፕርዳይ ዬዳዋ መና ጎዳዉ ማጋኔዳ
\p
\v 2 እምባቆመ፥ “አቤት መና ጎዳዉ፥ ኔን ማዳናዳን ታን ጼስያ ዎደ፥ አዉደ ጋካናዉ ስሰናን እጻይ? ቃይ ታን ማካላዉ ነዉ ዋስያ ዎደ፥ አዉደ ጋካናዉ አሸናን እጻይ? 
\v 3 ሀ ናቁዋነ ባይዙዋ ታና አያዉ በሳይ? ማካላነ ባሻ ጼላደ ኔን አያዉ ጮኡ ጋደ ዳንዳያይ? ዋታይነ ኦሻይ ቢታ ኡባን ዳሬዳ። 
\v 4 ሄዋ ድራዉ፥ ህጊ ለፔዳ፤ ቱሙ ከስ ኤረና። ቃይ ናጋራንቻቱ ጽሎ አሳቱዋ ዶድ ኦይቄዳ ድራዉ፥ ፕርዳይ ጌላቴ” ያጌዳ።
\s1 መና ጎዳይ እምባቆማዉ እሜዳ ዛሩዋ
\p
\v 5 ጾሳይ ዛሪደ፥ “ህንተ ዩሹዋን ደእያ ካዉተ ጼሊደ ማላለትተ! አያዉ ጎፐ፥ ህንተዉ ኦድንቶካ ህንተ አማነና ኦሱዋ ታን ህንተ ዎድያን ኦና ሀናይ።\x - \xo 1:5 \xo*\xt ኪታ 13:41\xt*\x* 
\v 6 ታን ባብሎናዌቱዋ፥ ሄ መቀ ባይና ድርቢያ አሳቱዋ ደንይ። ኡንቱንቱ ባረንቱባ ግደና ቢታ ኦሊደ ኦይቃናዉ ቢታ ኡባን ዩዪኖ።\x - \xo 1:6 \xo*\xt 2 ካታ. 24:2\xt*\x* 
\v 7 ኡንቱንቱ ያሽስያዋንታነ ዳጋንያዋንታ። ኡንቱንቱ ፕርዳይነ ቦንቹ ኡንቱንቱፐ ከሴ። 
\v 8 ኡንቱንቱ ፓራቱ ማሄቱዋፐካ አዳ ድርቢያነ ኦማርሳ ኦኮራቱዋፐካ አዳ ኢታ። ኡንቱንቱ ፓራ አሳቱ ፕሪጺደ፥ ሃኮ ሳፐ ዪኖ፤ ኡንቱንቱ አርጋንይ አየንቶ ኦይቃናዉ ፓልያዋዳን ፓሊኖ። 
\v 9 ኡንቱንቱ ኦላንቻቱ ኡባይ ማካላባ ኦናዉ ባዞ ጫርኩዋዳን ጫርኪደ ዪኖ። አሳ ኦሞዲደ፥ ሻፍያዳን ሺሺኖ። 
\v 10 ኡንቱንቱ ካተቱዋ ቦላ ቅሊጪኖ፤ ሞድያዋንታካ ሚቻ ከሲኖ፤ ቃይ ሹቻን ድረቴዳ ጌሳቱዋ ኡባን ኡንቱንቱ ሚጪኖ። ሄ ጌሶቱዋ ኦሞዳናዉ ኡንቱንቱ ላንቂያን ቢታ ኬሊኖ። 
\v 11 ሄዋፐ ጉይያን፥ ኡንቱንቱ ጫርኩዋዳን አና። ሄ ናቂያዋንቶ ኡንቱንቱ ዎልቃይ ኡንቱንቱ ጾሳ” ያጌዳ።
\s1 እምባቆም ላኤንዋካ ጾሳዉ ማጋኔዳ
\p
\v 12 አቤት መና ጎዳዉ፥ ታ ጾሳዉ፥ ታ ጌሻዉ፥ ኔን መናፐ ዶማደ ደእያ መና ጎዳ ግድኪ? ኔን ኑ ዛላ ግድያ ድራዉ፥ ኑን ሀይቆኮ። አቤት ጾሳዉ፥ ባብሎናዌቱዋ ኑ ቦላ ፕርዳ ፖላናዳን፥ ኔን ደንደ ዎልቃካ ኡንቱንቶ እማዳ። 
\v 13 ነ አይፈቱ ዳሮ ጌሻ ግድያ ድራዉ፥ ኢታባ ጼላናዉ ዶስክኖ፤ ኢታባይ ኦሰትያ ዎደ በኣደ ጮኡ ጋናዉ ዳንዳያካ። ያትና፥ ሀ ጭምያዋንታ አያዉ ጮኡ ጋደ ጼላይ? ናጋራንቻቱ ባረፐ ጽልያ አሳቱዋ ምትያ ዎደ አያዉ ጮኡ ጋይ?
\p
\v 14 ኔን አሳ አባ ሞለቱዋዳን፥ ካለያዌ ኡንቱንቶ ባይና ትራን ጎሸትያ መታቱዋዳን ኦዳ። 
\v 15 ባብሎናዌቱ ጋድያ አሳ ኡባ ቃጲያን ቆሪደ ከሳና፤ ኡንቱንቱ ኡንቱንታ ባረንቱ ቀሪ ግትያን ኦይቃና፤ ቃይካ ኡንቱንቱ ኡንቱንታ ባረንቱ ዎጋ ግትያን ቡሪደ ሺሻና፤ ያቲደ ኡንቱንቱ ናሸታናነ ሀሹ ጋና። 
\v 16 ሄዋ ድራዉ፥ ኡንቱንቱ ባረንቱ ቄራ ግትያዉ ያርሺኖ፤ ባረንቱ ዎጋ ግትያዉ እጻና ጩዋዪኖ። አያዉ ጎፐ፥ ኡንቱንቱ እሻሉዋን ደእያዌነ ማልኡዋ ምያዌ ሄ ግተቱዋ ዎልቃና። 
\v 17 ያትና፥ ኡንቱንቱ ባረንቱ ግትያ ቆቆፊደ ካዉተቱዋ ኡባ ዎደ ቃረት ባይናን ዎደ ደአኔ?
\c 2
\p
\v 1 ዎችያ አዱሳ ግምቢያ ቦላ ከሳ ኤቃደ ታን ናጋና። ሄ ሳኣን ጾሳይ ታና ግያባነ ታ ማጋናዉ እ እምያ ዛሩዋ ስሳናዉ ጼላሻና።
\s1 መና ጎዳይ እምባቆማዉ እሜዳ ላኤን ዛሩዋ
\p
\v 2 መና ጎዳይ ታዉ ዛሪደ፥ “ዎጽያ ኡራይካ ናባባና ማላ፥ ማሰቴዳ ሹቻ ቦላ ታን ነዉ ቆንጭስያ ሳፃ ኦርዱዋን ጻፋ። 
\v 3 አያዉ ጎፐ፥ ሳጻን ቤቴዳዌ ባረ ኬረቴዳ ዎድያ ናጌ። ሄ ሳጻይ ፖለትያ ዎዲ ኤለካ ጋካናዋ፤ ዎርዱዋ ግዲደ ደኤና። ታክያባ ማላትንቶካ ናጋ፤ አያዉ ጎፐ፥ እ ቱሙዋፐ ያና፤ ጋምኤና።\x - \xo 2:3 \xo*\xt እብራ. 10:37\xt*\x*
\p
\v 4 “በአ፥ እ ኦቶረቴዳ፤ አ ቆፋ ኡባይካ ሱረ ግደና፤ ሽን ጽሉ ባረ አማኑዋን ደአና።”\x - \xo 2:4 \xo*\xt ሮመ 1:17፤ ጋላ. 3:11፤ እብራ. 10:38\xt*\x*
\s1 ናጋራንቻቱዋ ቦላ አዳ ፕርዳ
\r (2:5-20)
\p
\v 5 ዱረተይ አሳ ጭሜ፤ ኦቶራንቻ አሳዉ ሸምፖ ባዋ። እ ዱፉዋዳን ዮራ ግድያ ድራዉነ ሀይቁዋዳን ካል ኤረና አሳ ግድያ ድራዉ፥ ካዉተቱዋ ኡባ ባረዉ ሺሼ፤ አሳ ኡባካ ባረዉ ኦሞዴ።
\p
\v 6 “አሳይ ባረንታ ኦሞዴዳዋንታ፥ ‘ባረዋ ግደና ሚሻ ሺሺደ ዳጋይያዎነ አጩዋ አሳፐ ዎልቃን አኬዳ ማጹዋን ዱረትያዎ አየሮ! ሀዌ ሀዋዳን ሀኒደ፥ አዉደ ጋካናዉ ደአኔ?’ ያግ ቅሊጫናነ ቶቻና። 
\v 7 ኔን ኡንቱንቶ ታልኤዳ አሳቱ ነ አኬከናን ነ ቦላ ደንዲደ፥ ኔና ኮኮርሳና። ሄዋፐ ጉይያን፥ ኡንቱንቱ ነ ማጹዋ ኡባ ቦንቃናዋንታ። 
\v 8 ኔን ጮራ ያራ ማጹዋ ቦንቄዳ ድራዉ፥ ኡንቱንቱፐ አቴዳዋንቱ ነ ማጹዋ ቦንቃናዋንታ። አያዉ ጎፐ፥ ነ ዳሮ አሳ ሱ ጉሳዳ፤ ቃይ ሳኣ ኡባን፥ ካታማቱዋ ቦላነ ኡንቱንቱን አሳ ቦላካ ሱገ ኦሱዋ ኦዳ።
\p
\v 9 “መቱ ኔና ጋከናዳን፥ ነ ጎልያ ቃሳን ኬጻናዉ ናቁዋን ሚሻ ሺሽያዎ፥ ነዉ አየሮ! 
\v 10 ዳሮ አሳ ነ ገናደ ይሴዳዋ ጋሱዋን ነ ሶ አሳ ካዉሻዳ፤ ኔን ነ ቦላ ባየ አሃዳ። 
\v 11 ሀራይ አቶ ነ ጎልያ ግምቢያ ሹቻይካ ነ ቦላ ዋሳና፤ ቱሳቱካ ዋሱዋ አላናዋንታ።
\p
\v 12 “ካታማ ማካላን ባሲደ፥ አሳ ሱን ኬጽያዋንቶ፥ ህንተዉ አየ አና! 
\v 13 ኡባፐ ዎልቃማ መና ጎዳይ አሳይ ኦያዌ ኡባይ ታማ ካተ ግዳናዳን፥ ቃይ ካዉተቱ ኡባይ ዳቡርያዌ ጮ መላ ግዳናዳን፥ ቆፋ ቃች ዎዳ። 
\v 14 አያዉ ጎፐ፥ ሃይ አባ ካምያዋዳን፥ መና ጎዳ ቦንቹዋ ኤራተይ ሳኣ ኩማና።\x - \xo 2:14 \xo*\xt ኢሳ. 11:9\xt*\x*
\p
\v 15 “ባረ ሾሮ አሳይ ካሎትና በአና ጊደ፥ ኢታባ ጉጃንነ ኡንቱንታ ኡሺደ ማይያ ኡራዉ አየ አና! 
\v 16 ኔን ቦንቹዋ ድራዉ ካዉሻ ማያና። ሀእ ስም ላ ኔኖ፥ ኡሻ! ኡሻደ ጋንድጋራ! መና ጎዳዉ ኡሸቻ ኩሽያን ደእያ ጹአይ ኔኮ ያና፤ ነ ቦንቹ ካዉሻዉ ላመታና። 
\v 17 ኔን ሊባኖሳ ይሴዳዋዳን፥ ኔንካ ያና። ኔን ዶአቱዋ ዎራ ዉርሳዳ፤ ሀእ ቃይ ኡንቱንቱ ኔና ያሽሳና። አያዉ ጎፐ፥ ነ ዳሮ አሳ ሱ ጉሳዳ፤ ቃይ ሳኣ ኡባን፥ ካታማቱዋ ቦላነ ኡንቱንቱን ደእያ አሳ ቦላካ ሱገ ኦሱዋ ኦዳ።
\p
\v 18 “እ ባረዉ ኤቃይ አያ ማዲ? አ አሳይ ጊግሴዳ ግደኔ? ዎርዱዋፐ አትና፥ አን ሀራባይ አያይነ ቤተና። ያትና፥ አ መዳ ብታኒ ሀ አይነ ሃሳየና ኤቃ አማንያዌ አ አያ ማዳናሴ? 
\v 19 ምፐ ማሰቴዳዋ ‘ቤጎታ!’ ግያዎ፥ ቃይ ሹቻፐ ማሰቴዳ ዱድያ፥ ‘ደንዳ ኤቃ!’ ግያዎ፥ ነዉ አየ አና! እ ዎን ነዉ አየንቶ ቆንጭሳናዉ ዳንዳዪ? በአ፥ እ ዎርቃንነ ብራን ሼሼዳዋ፤ አዉ ሸምፑ ባዋ።
\p
\v 20 “ሽን መና ጎዳይ ባረ ጌሻ ጌሻ ጎልያና። ሄዋ ድራዉ፥ ቢታን ሳኣን ደእያ አሳይ ኡባይ አ ስንን ጮኡ ጎ” ያጌዳ።
\c 3
\s1 እምባቆማ ዎሳ
\r (3:1-19)
\p
\v 1 ትምቢትያ ኦድያ እምባቆም ማዝሙርያዳን የጺደ፥ ዎሴዳ ዎሳይ ሀዋ፦
\p
\v 2 አቤት መና ጎዳዉ፥ ኔን ካሰ ኦዳዋ ታን ስሳደ ያያድ። አቤት መና ጎዳዉ፥ ኑ ዎድያንካ ሄ ኦሶቱዋ ዛረደ ኦ፤ ኡንቱንቱ ኑ ዎድያንካ ኤረትኖ። ኔን ሀንቀያ ዎደ ነ ማሮታ ቆፓ።
\p
\v 3 ጾሳይ ተማና ግያ ሳኣፐ ዬ፤ ሄ ጌሻይ ፓራና ደርያፐ ዬ። አ ቦንቹ ሳሉዋ ካሜዳ፤ አ ጋላታይካ ሳኣ ኩሜዳ። 
\v 4 አ ጶለይካ አዋ ፖኡዋ ማላ፤ አ ዎልቃይ ቆሰት ኡቴዳ አ ኩሽያፐ ፖዡ ግያ ፖኡ ከሴ። 
\v 5 ጾሳይ ኢታ ሀርግያ ባረፐ ስንዉ ኪቴ፤ ሀይቁዋካ ባረ ጌዱዋ ካለ። 
\v 6 እ ኤቂደ ቢታ ቃዳ። ቃይ እ ጼሊደ ካዉተቱዋ ኮኮርሴዳ። መናደፐ ደኤዳ ደረቱ መኤረቴድኖ፤ ቃይ እ ኡንቱንቱ ቦላን ሀመትያ በኒደፐ ደኤዳ ደረቱካ ላለቴድኖ። 
\v 7 ታን ቶጵያ አሳይ ቱጋትሽን በኣድ፤ ምድያማ ቢታ አሳይካ ኮኮርሺና በኣድ።
\p
\v 8 አቤት መና ጎዳዉ፥ ኔን አያዉ ሀንቀታዲ? ሻፋቱ ኔና ሀንቀሴድኖ? ዎይ አባ ቦላ ሀንቁዋ ኤጻ ከሳዲ? ቱይት፥ ኔን ነ ፓራቱዋነ ነ ፓራ ጋረቱዋ ቶጌዳዌ ነ አሳዉ ጾኑዋ እማናሳ። 
\v 9 ኔን ነ ዎንዳፍያ ጊግሳዳ፤ ፖቱዋ ዱካናዉ ዳፋዳ። ቢታ ጳልቃደ ሃ ከሳዳ። 
\v 10 ደረቱ ኔና በኢደ፥ ያሻዉ ኮኮሬድኖ፤ ሃ ክጻይካ አዳ። ቃይ ሃ ጪማቱካ ዋሲኖ፤ ዋሲደ ባረንቱ ዳምባላ ሃ ሃ ዳርሴድኖ። 
\v 11 እ ጾንጊደ የዴዳ ፖቱ ፖኡዋንነ ነ ቶራቱዋ ጶለን አዋይነ አግናይ ባረንቱ ደእያ ሳን ደእያ ሳን ኤቄድኖ።
\p
\v 12 ኔን ሀንቀታደ ቢታ ኡባን ዩያዳ፤ ካዉተቱዋካ ሀንቁዋን የዳ። 
\v 13 ኔን ነ አሳ አሻናዉነ ነ ኦከቴዳዋ አሻናዉ ከሳዳ፤ ኢታቱዋ ካፑዋ ሾጫዳ፤ አ ማዩዋ ቃራደ አ ካሎ ጺራ አሻዳ። 
\v 14 አ ኦላንቻቱዋ ጋዳዋ ኔን አ ቶራን አ ጫዳዳ። ኡንቱንቱ ኑና ላላናዉ ጎትያዳን ዪኖ፤ መቶታንቻካ ጌማን ምታናዉ ዶሲኖ። 
\v 15 ኔን ነ ፓራቱዋን አባ የደ አያ ዎደ፥ ዳሮ ሃይ ሆሙዋ ጎፑ ጌ።
\p
\v 16 ታን ሀዋ ኡባ ስስና፥ ታ ቦላይ ጋጅ ጋጄዳ፤ ታ መተርሻይ ኮኮሬዳ፤ ታ መቀይካ ዎቄዳ፤ ታ ገደቱካ ቃይ ጉንዴድኖ። ኑና ቱጋይያዋንታ ጾሳይ ሙራና ጋካናዉ፥ መቱዋ ጋላሳ ታን ዳንዳያን ናጋና።
\p
\v 17 ባላስያ ግያ ምይ አይፋና ዮፐካ፥ ዎይንያ ቱራን አይፊ ዮፐካ፥ ዎጋራይ አይፈናን እጾፐካ፥ ጋዲ ካ ሞከናን እጾፐካ፥ ስኩዋን ዶርስ ዮፐካ፥ ቃይ አቁዋን መሂ ዮፐካ፥ 
\v 18 ሄዌ ኡባይ ዮፐካ፥ ታን መና ጎዳን ናሸታና፤ ታና አሽያ መና ጎዳን ታን ናሸቻ ፖጩ ጋና። 
\v 19 ኡባ ሞድያ መና ጎዳይ ታዉ ዎልቃ፤\x - \xo 3:19 \xo*\xt 2 ሳሜላ 22:34፤ ማዝ. 18:33\xt*\x* ታ ገድያ ጋራ ገድያዳን ምንሴ፤ ታን ቃ ሳአቱዋን ሄመታናዉ ታና ዳንዳይሴ።
\p (የጽያዋንታ ካለያዋ ሀሳይስያዋ: ሀ ማዛሙሪ ዲጽያዋ ዲጺደ የጽያ ማዝሙርያ።)