\id GAL - Dawuro Full Bible Ethiopic Version
\ide UTF-8
\h ጋላትያ
\toc1 ጳዉሎስ ጋላትያ አሳዉ ጻፌዳ ኪታ
\toc2 ጋላትያ
\toc3 ጋላ.
\mt2 ጳዉሎስ
\mt1 ጋላትያ አሳዉ
\mt2 ጻፌዳ ኪታ
\imt ገሉዋ
\ip የሱስ አሽያዋ ግድያዋ ኦድያ ምሽራቹዋ ቃላይ፥ ዱማ ዱማ ሳኣን ኦደትሺናነ አይሁዳ ግደና አሳይካ አማኒደ አክ አክ ቢሽን፥ “አማንያ አሳ ግዳናዉ ሙሴ ህግያ ፖላናዉ ኮሺዬ ኮሸኔ?” ግያ ዋላሳይ እትፐ ደንዴዳ። ሄ ዎደ ጳዉሎስ፥ “አማንያ አሳ ግዳናዉ ሙሴ ህግያ ፖላናዉ ኮሸና፤ የሱሳን ኦራ ደኡዋ ደማናዉ አን አማኖ አሳይ፥ ጾሳ ስንን ጽላናዉ ዳንዳይያዌ አማኖ ጻላላና” ያጊደ ታማርሱዋ ዶሜዳ። ሽን ቄር ኢስያ ግዶን፥ “አሳይ ጾሳ ስንን ጽላናዉ የሱሳን አማንያዋ ጻላላ ግደናን፥ ሙሴ ህግያካ ፖላናዉነ ቃጻረታናዉ ኮሼ” ያጊደ ጳዉሎሳ ትምርትያ ጳልቂያ አሳቱ ደኢኖ።
\ip ጳዉሎስ ሀዋ ጋላትያ ኪታ ጻፌዳዌ ሀ ባላ ትምርትያን ጭመቴዳ አሳ ሱረ አማኖነ አማኑዋ ደኦ ዛሪደ ካለናሳ። ጳዉሎስ ኮይሮ ዶሚደ፥ እ ባረና፥ “ታን የሱስ ኪቴዳዋ” ያግ ኤርሲደ ዶሜ። የሱስ ኪቴዳዋ ኦደ አ ጼሴዳዌ ጾሳፐ አትን፥ አሳ ግደናዋነ ቃይ እ ኪተቴዳዌ አይሁዳ ግደና አሳቱዋሳ ግድያዋ ቆንጭሲደ ኦዴ። ሄዋናካ ኦይቀቲደ፥ አሳይ ጽላናዉ ዳንዳይያዌ አማኑዋ ጻላላና ግድያዋ ኦዴ። ዉርሰ ሸምፓቱዋን አማኑዋ ኤሻይ የሱሳ አማንያ አማኑዋፐ ከስያ ሲቁዋፐ ፑልትያዋ ግድያዋ ኦዴ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ገሉዋ \ior 1:1-10\ior*
\io1 ጳዉሎስ ጾሳፐ ኪተቴዳ ማታ \ior 1:11—2:21\ior*
\io1 ጾሳ አ ኬካተ ምሽራቹዋ ቃላ \ior 3:1—4:31\ior*
\io1 ክርስትና ላአተነ አማኑዋ \ior 5:1—6:10\ior*
\io1 ዉርሰ ቁትያ \ior 6:11-18\ior*
\c 1
\p
\v 1 ታን ጳዉሎስ፥ የሱስ ክርስቶስነ ቃይ ሀይቁዋፐ አ ደንዳ ጾሳይ አዉ ኪቴዳዋፐ አትን፥ አሳፐ ዎይ አሳ ባጋና ኪተቴዳዋ ግድከ። 
\v 2 ሀ ታንነ ታናና ደእያ አማንያ እሻቱ ኡባይ፥ ጋላትያ ጋድያን ደእያ አማንያ አሳ ኡባዉ ሳሮታ ኪቴቶ።
\p
\v 3 ጾሳይ ኑ አዉነ ኑ ጎዳይ የሱስ ክርስቶስ ህንተንቶ አ ኬካተነ ሳሮተ እሞ።
\p
\v 4 ኑ ጾሳ፥ ኑ አዉዋ ሸንያን ክርስቶስ ሀ ኢታ ኦሱ ኦሰትያ ዎድያፐ ኑና አሻና ማላ፥ ኑ ናጋራ ድራዉ፥ ባረ ሁጲያ እሜዳ። 
\v 5 ጾሳዉ መፐ መና ጋካናዉ ቦንቹ ግዶ። አመንእ።
\s1 ምሽራቹዋ ቃላ ቱሙ እቱዋ ጻላላ
\p
\v 6 ክርስቶሳ አ ኬካተን ህንተንታ ጼሴዳ ጾሳ አጊደ፥ ሀራ ዎንጋላኮ፥ ህንተ ኤሌሊደ፥ ዎት ስሜድተንቶ ታዉ ኦራባ ግዴዳ። 
\v 7 ህንተንታ ቡልአክያዋንቱነ ክርስቶሳ ምሽራቹዋ ቃላ ጌላያናዉ ኮይያ አማሬዳ አሳቱ ደኢኖፐ አትን፥ ቱሙፐ ሀራ ምሽራቹዋ ቃላይ ባዋ። 
\v 8 ሽን ሀራይ አቶ ኑና ግድና፥ ዎይ ሳሉዋፐ ኪታንቻ ግድና፥ ኑን ህንተንቶ ካሰ ኦዴዳ ምሽራቹዋ ቃላፐ ዱማትያዋ ህንተንቶ ኦድያዋ ግዶፐ፥ እ መናዉ ሸቀቴዳዋ ግዶ። 
\v 9 ካሰ ኑን ጌዳዋዳን፥ ሀእካ ላኤንዋ ታን ኦዳይ፤ ህንተ አኬዳ ምሽራቹዋ ቃላፐ ዱማትያዋ ኦንነ ህንተንቶ ኦዶፐ፥ ሄ ኡራይ መናዉ ሸቀቴዳዋ ግዶ።
\p
\v 10 ሀዌ ታና አሳፐ ሳባ ኮይያዋ ማላትሲ? ማላትሰና! ታን ጾሳይ ሎአ ግያዋ ኮያይ። ዎይ ታን አሳ ናሸቻናዉ ኮያይታ? ታን ሀእካ አሳ ናሸቻናዉ ኮይያዋ ግዶፐ፥ ክርስቶሳ አይለ ግድከ።
\s1 ጳዉሎስ የሱስ ኪቴዳዋ ግዴዳ ሀኑዋ
\p
\v 11 ታ እሻቶ፥ ታን ህንተንቶ ኦዴዳ ምሽራቹዋ ቃላይ አሳፐ ግደናዋ ህንተንቶ ኦዳይ። 
\v 12 አያዉ ጎፐ፥ ታዉ የሱስ ክርስቶስ ቆንጭሴዳፐ አትን፥ ታን ምሽራቹዋ ቃላ አሳፐ አካበይከ፤ አሳይ ታና ታማርስቤና።
\p
\v 13 ካሰ ታን አይሁዳ አማኑዋን ደእያ ዎደ፥ ዋናደ ደኣድታንቶ፥ ህንተ ስሴድታ፤ ታን ክርስቶሳ አማንያዋንታ ቃረታይ ባይናን የደርሳድነ ይሳናዉ ባጸታድ። 
\v 14 ታ ዎደ ደኤዳ አሳቱዋፐ ጮራቱዋ አይሁዳ አማኑዋ ህግያ ናጉዋን አይ፤ ኑ አዎቱዋ ዎጋ ኦፐነ አአደ ሲቃድ።
\p
\v 15-16 ሽን ጾሳይ ባረ አ ኬካተን፥ ታን ብሮ ታ ዳይ ኡሉዋን ደእሽን፥ ባረዉ ኦናዉ ታና ጼሴዳ፤ አባ ኦድያ ምሽራቹዋ ቃላ አይሁዳ ግደና አሳዉ ታን ኦዳና ማላ፥ ጾሳይ ባረ ናኣ ታዉ ቆንጭሳናዉ ኮዬዳ ዎደ፥ ዞረታናዉ ኦኮነ ባበይከ። 
\v 17 ዎይ ታፐ ካሰ የሱስ ኪቴዳዋንቱና ጋከታናዉ የሩሳላመ ባበይከ፤ ሽን ታን ኤለካ አራብያ ጌተትያ ጋድያ ባድ። ሄዋፐ ዳማስቆ ግያ ካታማ ስማድ። 
\v 18 ሄዙ ላይፐ ጉይያን፥ ጰጽሮሳና\f + \fr 1:18 \fr*\fq ጰጽሮሳ፦ \fq*\ft ግሪከ ማጻፋይ ኬፋ ያጌ። ብለይካ አራማይከ ቃላን “ዛላ” ግያዋ።\ft*\f* ጋከታናዉ የሩሳላመ ባደ፥ አናና ታማነ እቼሹ ጋላሳ ኡታድ። 
\v 19 ሽን የሱስ ኪቴዳዋንቱፐ ጎዳ እሻ ያቆባፐ አትን፥ ሀራቱዋና ጋከታበይክ።
\p
\v 20 ታን ህንተንቶ ጻፍያዋን ዎሪ ባዋ፤ ታን ህንተንቶ ዎርዱዋ ኦደናዋ ጾሳይ ማርካ!
\p
\v 21 ሄዋፐ ጉይያን፥ ሶርያ ጌተትያ ጋድያነ ክልቂያ ጌተትያ ጋድያ ባድ። 
\v 22 ይሁዳን ደእያ ክርስቶሳን አማንያዋንቱ ታናና ኤረታ ግድክኖ። 
\v 23 ሽን ሀራ አሳይ፥ “ኑና የደርስ ዩይያ ብታኒ ሀዋፐ ካሰ እ ይሳናዉ ኮይያ አማኑዋባ ሀእ ኦዴ” ግያዋ ኡንቱንቱ 
\v 24 ስሲደ ታባን ጾሳ ጋላቴድኖ።
\c 2
\s1 ጳዉሎስ ኪቴቶዋ ግድያዌ ሀራቱዋ ማታን ኤረቴዳ
\p
\v 1 ሄዋፐ ስማደ ታን ታማነ ኦይዱ ላይፐ ጉይያን፥ ባርናባሳና ላኤንዋ የሩሳላመ ባደ፥ ቲታካ ታናና አካደ ባድ። 
\v 2 ጾሳይ ታዉ ሳጻን ቆንጭሴዳ ድራዉ ባደ ታን ሀእ ኦያ ኦሱ ዎይ ካሰ ኦዳዌ መላ አተና ማላ፥ ክርስቶሳን አማንያዋንታ ካለያዋንታ ዱማ ሺሻደ፥ አይሁዳ ግደና አሳዉ ታን ኦድያ ምሽራቹዋ ቃላይ አይ ማለንቶ ኡንቱንቶ ኦዳድ። 
\v 3 ሽን ሀራይ አቶ ታናና ደእያ ቲታ እ ግሪከ ጋድያ አሳ ግድሽን፥ ቃጻረቶ ጊደ ጎደትበይክኖ። 
\v 4 ግዶፐነካ፥ ዎርዱዋን ኑዉ እሻቱዋ ማላት ዪደ፥ ኑናና ዋላከቴዳ ጮራ አሳቱ አ ቃጻራናዉ ኮዬድኖ። ሄ አሳቱ ክርስቶሳ የሱሳን ኑዉ ደእያ ኑን ኮዬዳዋዳን ሀናና ዳንዳይያ ላአተ ዎቺደ ሻናዉ፥ ዉኤቲደ ኑ ግዶ ገሊደ ኑና አይለ ኦናዉ ኮዬድኖ። 
\v 5 ሽን ምሽራቹዋ ቃላ ቱማተይ ህንተንቱና ምን ደአና ማላ፥ ኑን ሀራይ አቶ ጉ ዎድያካ ኡንቱንቶ ሞደትበይኮ።
\p
\v 6 ሽን ካፓቱዋ ማላትያዋንቱ ታዉ አይነ ኦራ ቆፋ እምበይክኖ፤ ሀዋ አያዉ ጋይታ ጎፐ፥ ሀዋፐ ካሰ ኡንቱንቱ ኦና ግድናካ ታና መትያባ ግደና፤ ጾሳይ አሳ ሶምእያ ጼሊደ ፕርደና።\x - \xo 2:6 \xo*\xt ዛረ. 10:17\xt*\x* 
\v 7 ሽን ጉየፐ ጾሳይ ጰጽሮሳዉ፥ አይሁዳቶ ምሽራቹዋ ቃላ ኦድያ ሀዳራ እሜዳዋዳን፥ ታዉካ አይሁዳ ግደና አሳዉ ምሽራቹዋ ቃላ ኦድያ ሀዳራ እሜዳዋ ኡንቱንቱ በኤድኖ። 
\v 8 አያዉ ጎፐ፥ ጰጽሮስ አይሁዳቶ የሱስ ኪቴዳዋ ግዴዳዋዳን፥ ታንካ ጾሳ ዎልቃን አይሁዳ ግደና አሳዉ የሱስ ኪቴዳዋ ግዳድ። 
\v 9 ቃይ ካለያዋንታ ማላቲደ ቤትያዋንቱ፥ ያቆብ፥ ጰጽሮስነ ዮሃንስ፥ ታዉ እመቴዳ አ ኬካተ ኤሪደ፥ ታናነ ባርናባሳ ኑ ኩሽያ ኦይቂደ ሳሮቴድኖ። ታንነ ባርናባስ አይሁዳ ግደና አሳ ግዶን ኦናዳን፥ ቃይ ኡንቱንቱ አይሁዳቱዋ ግዶን ኦናዳን ቃቺደ ደንዴዶ። 
\v 10 ኡንቱንቱ ኑና ካሰፐካ ታን ኦናዉ ቆፓደ ደእያ ህዬሳቱዋ ማዳናዋ ጻላላ ቆፍሴድኖ።
\s1 ጳዉሎስ አንጾክያን ጰጽሮሳ ትምርትያ ጳልቄዳ
\p
\v 11 ሽን ጰጽሮስ አንጾክያ ግያ ካታማ ዬዳ ዎደ፥ እ ባይዜዳ ድራዉ፥ ቆንጭያን ታን አ፥ “ኔን ባይዛንቻ” ያጋድ። 
\v 12 አያዉ ጎፐ፥ ያቆባ ማታፐ ኪተቴዳ አማሬዳ አሳይ ያናፐ ካሰ አይሁዳ ግደና አሳቱዋና ቁማ ሜ፤ ሽን ኡንቱንቱ ዬዳዋፐ ጉይያን፥ አይሁዳ ግደናዋንቱ አማንያዋንታ ግዳናዉ ቃጻረታናዉ ኮሼ ግያዋንቶ ያዬዳ ድራዉ፥ ምያዋ ኤሲደ፥ አይሁዳ ግደናዋንቱፐ ሻከቴዳ። 
\v 13 ቃይ የኮ አማኔዳ አይሁዳቱ ጰጽሮሳና ያሻ ዶሜድኖ፤ ሀራይ አቶ ባርናባስካ ኡንቱንቱና ያሻንቻ ግዴዳ።
\p
\v 14 ሽን ኡንቱንቱ ምሽራቹዋ ቃላ ቱማተዳን፥ ሱረ ሀመተናዋ በኣደ፥ ጰጽሮሳ ሄ ኡባ አሳ ስንን፥ “ኔን ጾሳ አሳ አይሁዳ ግዳደ፥ ኡንቱንቱዳን ግደናን ጾሳ አሳ ግደና አይሁዳ ግደናዋንቱዳን ደኣ፤ ሽን ያትና፥ ዎታደ አይሁዳ ግደናዋንታ፥ ‘አይሁዳቱዋዳን ደእተ’ ጋደ ግዳይ?” ያጋድ።
\s1 አይሁዳቱካ አይሁዳ ግደናዋንቱካ አትያዌ አማኑዋና
\p
\v 15 ኑን የለታን አይሁዳ፤ “ናጋራንቻ ግዴዳ አይሁዳ ግደና አሳቱዋ” ግዶኮ። 
\v 16 ሄዋ ግዶፐካ፥ አሳይ የሱስ ክርስቶሳ አማኒደ ጾሳ ስንን ጽላናፐ አትን፥ ሙሴ ህግያ ናጉዋን ጽለናዋ ኤሬዶ፤ አሹዋ ማዬዳ አሳይ ኡባይ ሙሴ ህግያ ናጉዋን ጽለና ድራዉ፥ ኑን ኑ ሁጰዉካ ሙሴ ህግያ ናጉዋን ግደናን፥ ክርስቶሳን አማኒደ ጽላና ማላ፥ ክርስቶስ የሱሳን አማኔዶ።\x - \xo 2:16 \xo*\xt ማዝ. 143:2፤ ሮመ 3:20፣ 22\xt*\x*
\p
\v 17 ሽን ኑዉ ክርስቶሳን ደእያ እትፐተን ጽላናዉ ኮይያዋንታ ግዲደ፥ ኑ ሁጰዉ ናጋራንቻ ግዲደ ቤቶፐ፥ ያትና ክርስቶስ ናጋራ ታማርስያዌ? ሄዌ ሙለካ ዎርዶ! 
\v 18 አያዉ ጎፐ፥ እት ካላካ አጋ ድጌዳዋ ታን ላኤንዋ ኦያዋ ግዶፐ፥ ታን ታ ሁጰዉ ህግያ መንያዋ ግድያዋ ኤርሳይ። 
\v 19 ታን ጾሳዉ ፓጻ ደአና ማላ፥ ህግያ ባጋና ህገዉ ሀይቃድ። 
\v 20 ታን ክርስቶሳና አ ማስቃልያ ቦላ ምስማርያን ሸታደ ካቀታድ፤ ስም፥ ሀእ ፓጻ ደእያዌ ታና ግድከ። ሽን ክርስቶስ ታ ግዶን ደኤ፤ ታን ሀእ ደእያ ደኡ፥ ታና ሲቂደ፥ ታ ድራዉ፥ ባረ ሁጲያ እሜዳ ጾሳ ናኣን ደእያ አማኑዋና። 
\v 21 ታን ጾሳ አ ኬካተ እጽከ፤ አሳይ ህግያ ባጋና ጽሎተ ደምያዋ ግዶፐ፥ ክርስቶስ ጮ መላ ሀይቄዳ ጉሳ።
\c 3
\s1 ጽሎተይ አማኖ ጻላላን ቤቴ
\p
\v 1 አኬካይ ባይና ጋላትያ አሳቶ፥ ታን ህንተና ክርስቶስ ማስቃልያ ቦላን ምስማርያን ሸቲደ ካቀቴዳዋ ቆንጭሳደ ታማርሳድ። ያትና፥ ቱሞ ህንተ ኤኖ ጌና ማላ፥ ህንተንታ ብቴዳዌ ኦኔ? 
\v 2 አነ ታዉ ሀ እት የዉዋ ጻላላ ኦድተ: ጾሳ አያና፥ ህጊ ግያዋ ናጊደ አኬድቴ ዎይ አማኑዋን ስሲደ አኬድቴ? 
\v 3 ህንተንቱ ሄዋ ኬና ኤዬ? ጾሳ አያናን ደኡዋ ዶሚደ፥ ሀእ ህንተ ዎልቃን ፖሊቴ? 
\v 4 ህንተንቱ ዳቡራ ኡባዉ አይነ ማዱ ባዌ? ቱማ ማዱ ደኤ። 
\v 5 ያትና፥ ጾሳይ ህንተንቶ ጌሻ አያና እምያዌነ ህንተ ግዶን ማላታ ኦያዌ፥ ሙሴ ህግያ ህንተ ኦዳ ድራሴ? ዎይ ምሽራቹዋ ቃላ ስሲደ፥ ህንተ አማኔዳ ድራሴ?
\p
\v 6 ሀዋዳንካ፥ አብራሃሞ ጾሳ አማኔዳ ድራዉ፥ ጾሳይ አ ጽሉዋዳን ጼሌዳ። 
\v 7 ሄዋ ድራዉ፥ አማንያዋንቱ አብራሃመ ዛረ\f + \fr 3:7 \fr*\fk አማንያዋንቱ አብራሃመ ዛረ፦ \fk*\ft ጾሳይ አብራሃማ ዶሬዳ፤ ሄ ድራዉ ኦንነካ አብራሃመ ናኣ ጌተቴዳዌ፥ ጾሳ ናኣ ግድያዌ አማነቴዳ። 3:29 ጼልተ።\ft*\f* ግድያዋ ኤርተ።\x - \xo 3:7 \xo*\xt ሮመ 4:16\xt*\x* 
\v 8 ጾሳይ አይሁዳ ግደና አሳ አማኑዋን ጽልሳናዋ ጾሳ ማጻፋይ ካሰት በኢደ፥ “ሀ አላምያን ደእያ አሳይ ኡባይ ኔናን አንጀታና” ያጊደ፥ ምሽራቹዋ ቃላ አብራሃሞ ካሰቲደ ኦዴዳ።\x - \xo 3:8 \xo*\xt ዶመ 12:3\xt*\x* 
\v 9 ሄዋ ድራዉ፥ አብራሃሞ አማኒደ አንጀቴዳዋዳን፥ አማንያዋንቱ አዋዳካ አንጀታና።
\p
\v 10 ህግያ ኦሱዋን አማነቲደ ደእያዋንቱ ኡባይ ሸቃ ግዶን ደኢኖ፤ አያዉ ጎፐ፥ ጾሳ ማጻፋይ፥ “ህግያ ማጻፋን ጻፈቴዳ ኡባባን ደኤናዌነ ፖለናዌ ኦንነ ሸቀቴዳዋ” ያጌ። 
\v 11 ጾሳ ማጻፋይ፥ “ጾሳ ስንን ጽላቱ አን አማነቲደ ደኡዋን ደአና”\f + \fr 3:11 \fr*\fqa ጾሳ ስንን ጽላቱ አን አማነቲደ ደኡዋን ደአና፦ \fqa*\ft ጾሳይ አኬዳ አሳይ አማኑዋፐ ደንዴዳዋን ደኡዋን ደኤ።\ft*\f* ግያ ድራዉ፥ ኦንነ ጾሳ ስንን ህግያ ናግያዋን ጽለናዌ ኤረቴዳዋ። 
\v 12 ህጊ አማኑዋን ባሰት ኤቂቤና፤ ሽን ጾሳ ማጻፋይ፥ “ህጊ ግያዋ ፖልያዌ አን ደኡዋን ደአና” ያጌ።\x - \xo 3:12 \xo*\xt ዎጋ 18:5\xt*\x*
\p
\v 13 ጾሳ ማጻፋን፥ “ም ቦላ ካቀት ሀይቂያ ኦንነ ሸቀቴዳዋ” ጌተት ጻፈቴዳ ድራዉ፥ ክርስቶስ ኑ ድራዉ ሸቀቴዳዋ ግዲደ፥ ኑና ህግያ ሸቃፐ ዎዝ አኬዳ።\x - \xo 3:13 \xo*\xt ዛረ. 21:23\xt*\x* 
\v 14 ክርስቶስ ሄዋ አያዉ ኦዴ ጎፐ፥ ጾሳይ እማና ጎፐ፥ ጌሻ አያና ኑን አማኑዋን አካናዳንነ አብራሃመ አንጁ ባረ ባጋና አይሁዳ ግደና አሳ ጋካና ማላ ጊደ ኦዳ።
\s1 ህጊ ህዶታ ቃላ ኮለና
\p
\v 15 ታናዳን አማንያዋንቶ፥ ታን አሳይ ግያዋዳን ህንተንቶ ጋይ፤ ሀራይ አቶ ላኡ አሳቱ እት የዉዋ ሃሳዪደ፥ ጫቁዋ ዎዳዋፐ ህን ባጋን፥ ኦንነ ሄ ጫቁዋ ብላናዉ ዎይ ሀራባ ሄ ጫቁዋ ቦላ ጉጃናዉ ዳንዳየና። 
\v 16 አብራሃሞነ አ ዛሪ ጾሳይ ስንፐ እማና ጊደ ሃሳዬዳዋ ስሴድኖ። ጾሳ ማጻፋይ ጮራ አሳዉ ሃሳይያዋዳን፥ “ነ ዘረቶ” ጌና፤ ዋጊ ጎፐ፥ “ነ ዛረዉ” ያጌ። ሄዌነ፥ እት አሳ ጻላላ ጌ፤ እካ ክርስቶሳ።\x - \xo 3:16 \xo*\xt ዶመ 12:7\xt*\x*
\p
\v 17 ታን ግያዌ ሀዋ፤ ጾሳይ አብራሃሞ ጫቂደ፥ ሀ ጫቁዋ ታን ናጋና ያጌዳ። ኦይዱ ጼታነ ሀታሙ ላይፐ ጉይያን ዬዳ ሙሴ ህጊ ጾሳይ ዎዳ ሀ ጫቁዋ ይሳናዉነ ስንፐ እማና ጊደ ሃሳዬዳዋ ድጋናዉ ዳንዳየና።\x - \xo 3:17 \xo*\xt ከሳ 12:40\xt*\x* 
\v 18 አያዉ ጎፐ፥ ጾሳይ እምያ ላታይ ህግያን ቤትያዋ ግዶፐ፥ ያትና ጾሳይ ስንፐ እማና ጊደ፥ ቃላ ገሌዳዋና ግደና ግያዋ፤ ሽን ጾሳይ እማና ጊደ ቃላ ገሌዳዋን ላታ አብራሃሞ እሜዳ።
\p
\v 19 ያትና፥ ህጊ አያዉ ደኢ? ህጊ ባይዞ ኦሱዋ ግድያባይ አየንቶ በሳናዉ ጾሳይ እማና ጊደ ሃሳዬዳ አብራሃመ ዛሪ ያና ጋካናዉ ጉጀቴዳ፤ ኪታንቻ ባጋና ሙሴ ጋናትያዋን እመቴዳ። 
\v 20 ጋናይ እት ኡራ ጻላላሳ ግደና፤ ሽን ጾሳይ እቱዋ።
\s1 ህግያ ቆፋ
\p
\v 21 ያትና፥ ጾሳይ ስንፐ እማና ጊደ ሃሳዬዳዋ፥ እት ህጊ፥ “ሀነና” ያጊ? አአ! ሄዋ ጌና። አያዉ ጎፐ፥ ህጊ አሳዉ ደኡዋ እማናዉ ዳንዳይያባ ግዶፐ፥ ጽሎተይካ ቱሙ ህግያ አዛዘትያዋፐ ቤቴ ግያዋ። 
\v 22 ሽን የሱስ ክርስቶሳ አማንና፥ ጾሳይ ስንፐ እማና ጊደ ቃላ ገሌዳ ላአተይ፥ አማንያዋንቶ እመታና ማላ፥ አሳይ ኡባይ ናጋራዉ ሞደቲደ ደእያዋ፥ ጾሳ ማጻፋይ ኦዴ።
\p
\v 23 ሽን ካሰ ሀ አማኑ ያናዉ፥ ስንፐ ቆንጫና አማኖ ህጊ ኑና ቃሸቴዳ አሳዳን ጎርድ ዎዳ። 
\v 24 ሄዋ ድራዉ፥ ኑን አማኑዋን ጽላና ማላ፥ ክርስቶስ ያና ጋካናዉ ህጊ ኑና ናግያዋ ግዴዳ። 
\v 25 ሽን ሀእ ስም አማኑ ዬዳ ድራዉ፥ ህጊ ሀዋፐ ስንዉ ኑና ናግያዋ ግደና።
\p
\v 26 ህንተንቱ ኡባይ አማኑዋ ባጋና ክርስቶሳ የሱሳን እቱዋ ግዴዳ ጾሳ ናና። 
\v 27 አያዉ ጎፐ፥ ህንተ ክርስቶሳና እቱዋ ግዳና ማላ ጻማቀቴዳ ኡባቱ ክርስቶሳ ማዬድታ። 
\v 28 ሄዋ ድራዉ፥ አይሁዳ አሳ ግዶንነ ግሪከ አሳ ግዶን ዱማተይ ባዋ፤ አይልያ ዎይ ዎማኑዋ ግዶን ዱማተይ ባዋ፤ አቱማዋ ዎይ ማጫ አሳ ግዶን ዱማተይ ባዋ። አያዉ ጎፐ፥ ህንተንቱ ኡባይካ ክርስቶሳ የሱሳን እት አሳ። 
\v 29 ህንተንቱ ክርስቶሳዋ ግዶፐ፥ ስም ህንተንቱ አብራሃመ ዛረ፤\f + \fr 3:29 \fr*\fq አብራሃመ ዛረ፦ \fq*\ft ሀእ ኑን አብራሃመ ጎለ አሳ። ሄዋሳ ጳዉሎስ ጋላትያ አሳዉ ኦዲደ፥ እት አሳይ የሱሳ አማኔዳ አማኑዋን አብራሃመዉ ቱሙ ናኣ ያገቲደ ጼገቴ። ሄዋ ጉሳይ ጾሳ ናኣ ጉሳ። 3:7 ጼልተ።\ft*\f* ቃይ ጾሳይ ስንፐ እማና ጊደ ቃላ ገሌዳዋ ላትያዋንታ።
\c 4
\s1 ኑን ጾሳ ናና ግድያዋ
\p
\v 1 ሽን አኬክተ፤ ባረ አቡዋ ላትያ ናአይ ናአተን ደኢደ፥ ደእያዋ ኡባዉ ጎዳ ግዶፐካ፥ አይላቱዋፐ አዉ ዱማትያሳይ ባዋ። 
\v 2 ሽን ባረ አቡ ጌዳ ዎዲ ዉራና ጋካናዉ፥ አ ሀዳራ አኬዳዋንቱ ኩሽያንነ አ ሚሻ ናግያዋንቱ ኩሽያን ደኤ። 
\v 3 ሀዋዳን ኑንካ ቃይ ናአተን ደእያ ዎደ፥ ሀ አላምያ ሞድያ አያናቶ አይለቴዶ። 
\v 4 ሽን ያናዉ በስያ ዎዲ ጋኬዳ ዎደ፥ ጾሳይ ማጫዉንፐ የለቶዋ፥ ሙሴ ህገዉ ሞደትያ አሳ ጋርሳን የለቴዳዋ፥ ባረ ናኣ ኪቴዳ። 
\v 5 አያዉ ኪቴዴ ጎፐ፥ ህግያን ሞደቲደ ደእያዋንታ ዎዛናዉነ ኑና ባረ ናና ኦናዉ ኪቴዳ።
\p
\v 6 ጾሳይ ህንተ አ ናና ግድያ ድራዉ፥ “አባቦ፥ ታ አቦ” ጊደ ዋስያ ባረ ናኣ አያና፥ ኑ ዎዛና ግዶ ኪቴዳ። 
\v 7 ሄዋ ድራዉ፥ ሀዋፐ ስንዉ ኔን ጾሳ ናኣ ግድያዋፐ አትን፥ አይለ ግዳካ፤ ቃይ ኔን አ ናኣ ግዶፐ፥ ክርስቶሳ ባጋና ጾሳይ ቃላ ገሌዳባ ላትያዋ።
\s1 ጳዉሎስ ጋላትያ አሳባ ህርጌዳ
\p
\v 8 ሽን ህንተ ሀዋፐ ካሰ ጾሳ ኤረናን ደኢደ፥ ቱማ ግደና ጾሳቶ አይለ ግዲደ ኤኖ ጌድታ። 
\v 9 ሽን ሀእ ጾሳ ኤሪደ፥ ኡባካ ጾሳን ኤረቲደ፥ ላፋነ ቃይ ካቴዳ ሀ አያናቱዋኮ ዋኒደ ስሚቴ? ሽረት ስም፥ አይለ ግዲደ፥ ላኤንዋ ኡንቱንቶ ኤኖ ጋናዉ ኮዪቴ? 
\v 10 ዱማቴዳ ጋላሳቱዋ፥ አገናቱዋ፥ ዎደቱዋነ ላይቱዋ ህንተ ሎይ ናጉዋን አይለቴድታ። 
\v 11 ታና ህንተባይ ያሼ፤ ታን ህንተንቶ ጮ ጋደ መላ ዳቡራድታሻ?
\p
\v 12 ታናዳን አማንያዋንቶ፥ ታን ህንተንቱዳን ሀኔዳ ድራዉ፥ “ህንተንቱካ ታናዳን ሀንተ” ጋደ፥ ህንተንታ ዎሳይ፤ ህንተ ታና አይነ ናቂበይክታ። 
\v 13 ታን ኮይሮ ህንተንቶ ምሽራቹዋ ቃላ ኦዴዳዌ ታና ሀርግስሺና ግድያዋ ህንተ ኤሪታ። 
\v 14 ታዉ ፓጻተይ ዪደ፥ ህንተንቶ ፓጨ ግድናካ፥ ታና ካበይክታ፤ ሸነትካበይክታ። ሄዋ ድራ ኡባ ታና ጾሳ ኪታንቻ ሞክያዋዳን፥ ዎይ ክርስቶሳ የሱሳ ሞክያዋዳን ሞኬድታ።
\p
\v 15 ያትና፥ ሄኮ ህንተ ናሸትያዌ ቤተና! ታና ግዶፐ፥ ህንተንቶ ዳንዳየትያባ ግድና፥ ታዉ ህንተ ህንተንቱ አይፍያ ዎጭ እምንቶነ እጸናዋ ማርካታይ። 
\v 16 ያትና ታን ህንተንቶ ቱሙዋ ኦድያ ድራዉ፥ ህንተ ሞርከ ግዳይታ?
\p
\v 17 ሀራ አሳቱ ህንተንቶ ቃረትያዋ ማላቲኖ፤ ሽን ኡንቱንቱ ቆፋይ ሎኤና፤ አያዉ ጎፐ፥ ህንተ ኡንቱንቶ ቃረታና ማላ፥ ታፐ ህንተንታ ሻካናዉ ኮዪኖ። 
\v 18 ሽን ታን ህንተ ማታን ደእያ ዎደ ጻላላን ግደናን፥ ኡባ ዎደካ ሎኦባን ህንተ ኮየትያዋንታ ግዶፐ ሎአ።
\p
\v 19 ታ ሲቆ ናቶ፥ ክርስቶሳ መታይ ህንተንቱን ቤታና ጋካናዉ፥ ማጫዉኖ ኦይይ ሳክያ ኬና፥ ታን ህንተ ድራዉ ሳከታይ። 
\v 20 ሽን ታን ህንተንቶ ህርግያ ድራዉ፥ ሀእ ህንተ ማታ ባደ ህንተንቱና ዶናን ሃሳያንቶ፥ ዳሪ ዶሳይ።
\s1 አጋርነ ሳር ሌምሱዋ
\p
\v 21 ሙሴ ህግያን ሞደቲደ ደአናዉ ኮይያዋንቶ፥ ህጊ ግያዋ ስስክቴ? አነ ታዉ ኦድተ። 
\v 22 አያዉ ጎፐ፥ ጾሳ ማጻፋይ፥ “አብራሃሞ ዳንጋጽራትፐነ ጎዳትፐ የለቴዳ ላኡ ናናይ ደኢኖ” ያጌ።\x - \xo 4:22 \xo*\xt ዶመ 16:15፤ 21:2\xt*\x* 
\v 23 ሽን ዳንጋጽራት ናአይ አሳይ ናኣ የልያ ማራዳንካ የለቴዳ፤ ቃይ ጎዳት ናአይ፥ ጾሳይ ስንፐ እማና ጊደ ቃላ ገሌዳዋን የለቴዳ።
\p
\v 24 ሀ ላኡ ማጫዋንቱ ላኡ ጫቆ ግድያ ሌምሶ። ኡንቱንቱፐ እትና፥ ሙሴዉ ህጊ እመቴዳ ሲና ደርያፐ ጫቁ ዬዳዉና፥ ባረ ናና አይለተዉ የላዱ፤ እዛካ አጋሮ። 
\v 25 ሀ አጋራ አራብያ ጌተትያ ጋድያን ደእያ ሲና ደርያን ሌምሰታዉ፤ ቃይካ ሀእ ደእያ የሩሳላመን ሌምሰታዉ፤ አያዉ ጎፐ፥ የሩሳላመ ካታማይ ባረ ግዶን ደእያ አሳ ኡባና ሙሴ ህግያ አይለተን ደኤ። 
\v 26 ሽን ሳሉዋን ደእያ የሩሳላመ አይለተን ደኡኩ፤ እዛ ኑዉ አቶ ግዴዳ ሳሮ። 
\v 27 አያዉ ጎፐ፥ ጾሳ ማጻፋይ፥
\q1 “ሀኔ፥ የላቤና ማንቴ፥ ናሸታ፤
\q2 የሉዋ ኦይይ ኦይቂ ኤረናዉኔ፥
\q2 ነ ኮሻ ቁ ኦደ እልላ!
\q2 አያዉ ጎፐ፥ ባረ አስናና
\q2 ደእያ ማጫዉንፐ፥
\q2 ባረካ ደእያ ማጫዉንዉ
\q2 ጮራ ናናይ ደአና”
\m ያጌ።\x - \xo 4:27 \xo*\xt ኢሳ. 54:1\xt*\x*
\p
\v 28 ታናዳን አማንያዋንቶ፥ ኑንካ ሳር ናኣ ይሳቃዳን፥ ጾሳይ ስንፐ እማና ጊደ ቃላ ገሌዳ ናና። 
\v 29 ሽን ሄ ዎደ አሳ ማራዳን የለቴዳዌ፥ ጾሳ አያናይ ጌዳዋዳን የለቴዳዋ የደርስ ድጎዋዳን፥ ሀእካ ሄዋ ማላ።\x - \xo 4:29 \xo*\xt ዶመ 21:9\xt*\x* 
\v 30 ሽን ጾሳ ማጻፋይ ዋጊ? “ዳንጋጽራት ናአይ ጎዳት ናኣና እትፐ ላተና ድራዉ፥ ዳንጋጽራቶ እዝ ናኣና እትፐ ከሳ የዳ” ያጌ።\x - \xo 4:30 \xo*\xt ዶመ 21:10\xt*\x* 
\v 31 ሄዋ ድራዉ፥ ታናዳን አማንያዋንቶ፥ ኑን ጎዳት ናና ግድያዋፐ አትን፥ ዳንጋጽራት ናና ግዶኮ።
\c 5
\s1 ክርስቶሳን አይለተፐ ከሱሳ
\p
\v 1 ኑን አይለተይ ባይናን፥ ደአና ማላ፥ ክርስቶስ ኑና አይለተፐ ከሴዳ፤ ስም ምኒደ ኤቂተ፤ ላኤንዋ አይለተ ሞርገ ምን ዋጸቶፕተ።
\p
\v 2 ስስተ፥ ታን ጳዉሎስ፥ ህንተንታ ያጋይ፤ ህንተ ቃጻረትያዋ ግዶፐ፥ ክርስቶስ ህንተንታ አይነ ማደና። 
\v 3 ቃጻረትያ ኡባቱ ህጊ ግያዋ ኡባ ፖሊደ ናጋናዉ በስያዋ ጉጃደ ቆፈይ። 
\v 4 ህግያ ናጊደ ጽላናዉ ኮይያዋንቶ፥ ክርስቶሳፐ ሻከቴድታ፤ ጾሳ አ ኬካተፐካ ኩንዴድታ። 
\v 5 ኑና ግዶፐ፥ ኑን ጾሳ አያና ባጋና አማኑዋን ጽላናዉ ናሸቻን ናጌቶ። 
\v 6 አያዉ ጎፐ፥ ኑን ክርስቶስ የሱሳና እትፐ ደኦፐ፥ ሲቁዋን ኦያ አማኑዋፐ አትን፥ ቃጻረትናካ፥ ቃጻረተናን አግናካ ኑና አይነ ማደና።
\p
\v 7 ካሰ ሎኦ ዎጺታ፤ ሽን ቱማተዉ ህንተ ኤኖ ጌና ማላ፥ ኦኔ ህንተንታ ድጌዳዌ? 
\v 8 ሀ ጭሙ ህንተንታ ጼሴዳ ጾሳፐ ይቤና። 
\v 9 አሳይ ግያዋዳን፥ ጉ እርሹ ሙናቃ ኡባ ደን። 
\v 10 ህንተንቱ ሀራባ ቆፐናዋ ታን ጾሳን አማነታይ፤ ሽን ህንተንታ መትያ ኡራይ ኦና ግዶፐነ፥ ጾሳፐ ባረ ፕርዳ አካናዋ።
\p
\v 11 ሽን ታናዳን አማንያዋንቶ፥ ታን ሀዋ ጋካናዉ ቃጻራይ ኮሽያዋ ኦድያዋ ግዶፐ፥ ታና አያዉ የደርሲኖ? ሄዌ ቱማ ግዶፐ፥ ታን ክርስቶሳ ማስቃልያባ ታማርስና አይነ መትያባይ ባዋ። 
\v 12 ህንተንታ መቶያዋንቱ ባረንታ ባረንቶካ ጎይሬርክኖሻ!
\p
\v 13 ህንተንታ ግዶፐ፥ ታናዳን አማንያዋንቶ፥ አይለተፐ ከሳናዉ ጼሰቴድታ። ግዶፐነካ አይለተፐ ህንተ ከሴዳዋን፥ ህንተ አሳተ አሙ ህንተንታ ሞዶፖ። ሄዋ ድራ ሲቁዋን እቱ እቶ ሞደትተ። 
\v 14 አያዉ ጎፐ፥ ህጊ ኡባይ እት ሃሳያን ቃሸቴዳ፤ እካ፥ “ነ ሾሩዋ ነ ሁጲያዳን ሲቃ” ያግያዋ።\x - \xo 5:14 \xo*\xt ዎጋ 19:18\xt*\x* 
\v 15 ሽን ህንተ እቱ እቱዋና ሳኤትያዋነ ሜተትያዋ ግዶፐ፥ ህንተ ህንተ ግዶን ዉረና ማላ ናገትተ።
\s1 አያናነ አሹዋ
\p
\v 16 ሽን ስስተ፤ ጾሳ አያናይ ህንተንታ ካለያዋ ግዶፐ፥ ህንተ አሹዋ አሙዋ ሙለካ ፖልክታ። 
\v 17 አያዉ ጎፐ፥ ኑ አሹ አሞትያዋ ጌሻ አያናይ እጼ፤ ቃይ ጌሻ አያናይ አሞትያዋ ኑ አሹ እጼ፤ ሀዋንቱ እቱ እቱዋና እጸቲኖ። ሄዋ ድራዉ፥ ህንተ ዶስያዋ ኦናዉ ዳንዳይክታ። 
\v 18 ሽን ጾሳ አያናይ ህንተንታ ካለያዋ ግዶፐ፥ ሙሴ ህጊ ህንተንታ ሞደና።
\p
\v 19 አሹዋ ኦሱ ኤረቴዳዋ፤ እካ አዬ ጎፐ፥ ዎሹምያዋ፥ ቱናተ፥ አዳ ቱናተ ኦሱዋ፥ 
\v 20 ኤቃዉ ጎይንያዋ፥ ብትያዋ፥ ሞርከተ፥ ፓሉማ፥ ቃናትያዋ፥ ሀንቁዋ፥ ባረና ዶስያዋ፥ ዋላቀትያዋ፥ እቱ እቱዋፐ ሻከትያዋ፥ 
\v 21 አሳዋ አሞትያዋ፥ ማትያዋ፥ የንቻ ግድያዋነ ሀዋንታ ማላትያዋንታ። ካሰካ ታን ህንተንቶ ኦዴዳዋዳን፥ ሀዋንታ ማላትያዋንታ ኦያዋንቶ ጾሳ ካዉተን ገልያሳይ ባዋ።
\p
\v 22 ሽን ጌሻ አያና አይፊ፥ ሲቁዋ፥ ናሸቻ፥ ሳሮተ፥ ዳንዳያ፥ ኬካተ፥ ሎኦተ፥ አማነትያዋ፥ 
\v 23 አሽከተ፥ ባረ ሁጲያ ናግያዋ። ሄዋንታ ማላትያዋንታ ድግያ ህጊ ባዋ።
\p
\v 24 ክርስቶሳ የሱሳባ ግድያዋንቱ ባረንቱ አሳተ አ ኢታ ቆፋናነ አ አሙዋና እትፐ ማስቃልያ ቦላን ምስማርያን ሺደ ካቄድኖ። 
\v 25 ኑዉ ጌሻ አያናይ ደኡዋ እሞዋፐ ጉይያን፥ ኑና ቃይ እ ካለ። 
\v 26 አነ ኦቶረትያዋ፥ ዎይ እቱ እቱዋ ሀንቀያዋ፥ ዎይ እቱ እቱዋ ቃናትያዋ አጎይተ።
\c 6
\s1 እቱ እቱዋና ማደትያዋ
\p
\v 1 ታናዳን አማንያዋንቶ፥ ህንተናን ጌሻ አያናን ደእያዋንቱ እት ኡራይ አይ ባይዙዋ ኦደ፥ ቤቶፐካ፥ አሽከተ አያናን አ ሱርስተ፤ ቃይ ህንተ ፓጨተና ማላ፥ ህንተ ሁጲያ ናግተ። 
\v 2 እቱ እቱዋ ቶኩዋ ቶክተ፤ ሄዋ ኦያዋን ክርስቶሳ ህገዉ አዛዘቲታ። 
\v 3 አያዉ ጎፐ፥ እት ኡራይ አይነ ሀነናን ደኢደ፥ እትባ እ ሀኔዳዋ አዉ ማላቶፐ፥ ባረ ሁጲያ ጭሜ። 
\v 4 ሽን አሳይ ኡባይ ሁጲያን ሁጲያን ባረ ኦሱዋ ፓጮ፤ ሄዋፐ ጉይያን፥ ሀራ አሳዋና ልከናን፥ ባረ ሁጰ ኦሱዋ ጻላላን አማነትያዋ ደማና። 
\v 5 አያዉ ጎፐ፥ አሳይ ኡባይ ሁጲያን ሁጲያን ባረፐ ናገትያዋ ኦና በሴ።
\p
\v 6 ሽን ጾሳ ቃላ ታማርያዌ ባረዉ ደእያ ሎኦባ ኡባ ባረና ታማርስያዋና ሻኮ።
\p
\v 7 ህንተንታ ህንተረካ ጭሞፕተ። ኦንነ ጾሳ ቦላ ቅሊጫናዉ ዳንዳየና፤ አያዉ ጎፐ፥ አሳይ ባረ ዘርያዋ ዛረደ ቆይጫና። 
\v 8 ባረ አሹዋ አሙዋን ዘርያዋ ግዶፐ፥ አሹዋ አሙዋፐ ሀይቁዋ ቆይጫና። ሽን ጾሳ አያናን ዘርያዋ ግዶፐ፥ ጾሳ አያናፐ መና ደኡዋ ቆይጫና። 
\v 9 አነ ሎኦ ኦሱዋ ኦናዉ ምኖይተ። አያዉ ጎፐ፥ ኑን ምን ኦፐ፥ ቆይጭያ ዎዲ ስንፐ ያናዋ። 
\v 10 ሄዋ ግዶፐ ሀ ኦናዉ ኑን ዳንዳይያዋን፥ አሳ ኡባዉ ሎኦባ ኦይተ፤ ሽን ኡባፐ አደ፥ ኑናና አማኑዋን ደእያዋንቶ ሎኦባ ኦይተ።
\s1 ዉርሰ ዞርያነ ሳሮታ
\p
\v 11 ታን ታ ኩሽያን፥ አይ ማላ ዎልቃማ ፕዶላቱዋን፥ ሀዋ ህንተንቶ ጻፋድታንቶ በእተ። 
\v 12 አሳ ስንን ሎኢደ ቤታናዉ ኮይያ ኡባቱ፥ ህንተ ቃጻረታና ማላ ኮዪኖ፤ ሽን ሄዋ ኡንቱንቱ ኦያዌ ባረንቶ ክርስቶሳ ማስቃልያ ድራዉ የደርሰተናን አታና ጻላላሳ። 
\v 13 አያዉ ጎፐ፥ ኡንቱንቱ ህንተ ቃጻረቴዳዋን ጬቀታናዉ ህንተንታ ቃጻረትኖ ጊኖፐ አትን፥ ሀራይ አቶ ቃጻረቴዳዋንቱካ ባረንቱ ሁጰዉ ሙሴ ህግያ ናግክኖ።
\p
\v 14 ሽን አላሚ ታዉ ካቀትና፥ ታንካ አላመዉ ካቀቴዳ የሱስ ክርስቶሳ ማስቃልያፐ አትን፥ ታን ጬቀትያባይ ሀራባይ ታፐ ሃኮ። 
\v 15 አያዉ ጎፐ፥ ክርስቶስ የሱሳን ኦራ መታ ግድያዌ ማዴፐ አትን፥ ቃጻረትናካ ቃጻረተናን አግናካ አይነ ማደና። 
\v 16 ሀ ዎጋን ሀመትያ ኡባቱዋ ቦላንነ ጾሳ አሳ ኡባ ቦላ፥ ሳሮተይነ ማሮተይ ግዶ።
\p
\v 17 ታን የሱሳዉ ማይቴዳ ማላ ታ ቦላን ቶኬዳ ድራዉ፥ ሀዋፐ ስንዉ እት አሳይካ ታና መቶፖ።
\p
\v 18 ታናዳን አማንያዋንቶ፥ ኑ ጎዳ የሱስ ክርስቶሳ አ ኬካተይ ህንተንቱና ግዶ። አመንእ።