\id EST - Dawuro Full Bible Ethiopic Version
\ide UTF-8
\h አስትሮ
\toc1 አስትር ማጻፋ
\toc2 አስትሮ
\toc3 አስ.
\mt1 አስትር ማጻፋ
\imt ገሉዋ
\ip አስትር ማጻፋን ኦደቴዳ ታርኪ ፓርሰ ካቲ ባልጉዋ አያ ሳኣን ፖለቴዳዋ። ሄ ታርኪ አስትራ ባረ ዎልቃማ ጻላንነ ባረ አሳ ሲቅያ ዎልቃማ ሲቁዋን፥ ሞርከቱ ጋድያፐ ይሳና ሀንያ ባረ አሳ አሼዳ፥ አይሁዳት ታርክያ ምንሲደ ኦዴ። ሀ ማጻፋይ አይሁዳቱ ቦንችያ፥ ፑሪማ ጌተትያ ኤረትያ ባላ ዶመነ አ ብርሸ ሎይደ ኦዴ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 አስትራ ካተታዱ \ior 1:1—2:23\ior*
\io1 ሃማን አይሁዳቱዋ ይሳናዉ ሀልቼዳ \ior 3:1—5:14\ior*
\io1 ሃማና ቦላ ሀይቁ ፕርደቴዳ \ior 6:1—7:10\ior*
\io1 አይሁዳቱ ባረንቱ ሞርከቱዋ ኩሽያ ጭገቴድኖ \ior 8:1—10:3\ior*
\c 1
\ms አስትራ ካተታዱ
\mr (1:1—2:23)
\s1 ካታታ አስጺና ካትያ አርጸክሲሳ አዛዙዋ እጻዱ
\p
\v 1-2 ሀዌ ካቲ አርጸክስስ ህንደ ጋድያፐ ቶጵያ ጋድያ ጋካናዉ ደእያ፥ ጼታነ ላታማነ ላፑን ቢታቱዋ ሞድያ ዎደ ሀኔዳባ። እ ኡቲደ ሞድያ ዋና ካታማይ ካቲ ደኢያሳ ሱሳ ጌተቴ።\x - \xo 1:1-2 \xo*\xt እዝራ 4:6\xt*\x*
\p
\v 3 እ ካተቴዳ ሄዘን ላይን፥ ባረፐ ጋርሳና ሞድያዋንቶነ አናና ኦያዋንቶ ባላ ጊግሴዳ። ሄ ባላ ሳኣን ሜዶናነ ፓርሰ ጋድያ ኦላ ጋዳዋቱ፥ ጋድያ ካፓቱነ አይስያዋንቱ ቤቴድኖ። 
\v 4 ካቲ እት ጼታነ ሆስፑን ታሙ ጋላሳ ኩመን ባረ ካዉተ ዱረተነ ባረ ቦንቾ አንጋ ኡባ ጮራ ጋላሳ ኡንቱንታ በሴዳ።
\p
\v 5 ሄ ጋላሳቱዋፐ ጉይያን፥ ካቲ ቃይካ ሀራ ላፑን ጋላሳዉ ጋምእያ ባላ፥ ሱሳ ካታማን ካቲ ደኢያሳ፥ ዱርያፐ ማንቁዋ ጋካናዉ ደእያ አሳ ኡባዉ ጊግሴዳ። ሄ ባላይ ካትያ ጎልያ አታክልትያ ሳኣን ጊጌዳ። 
\v 6 ሄ ሳኣን ደእያ ዳባባይ፥ ሊኑዋፐ ዳደቴዳ ቦነ ሳሉዋ ማላትያ ጋርዳቱዋን ፑላት ኡቴዳ። ጋርዶቱካ ቦነ ኦቻ ቴራ ማላትያ ሎኦ ሊኑዋ ባቀን አና፥ እብነባራድያ ጌተትያ ሹቻፐ ኦሰቴዳ ቱሳ ቦላን ደእያ ብራ ምግዳቱዋን ካቀት ኡቴድኖ። ቃይ ዎርቃፐነ ብራፐ ኦሰቴዳ አርሳቱ፥ ዱማ ዱማ ማላይ ደእያ አልኦ ሹቻቱዋፐነ እንቆቱዋፐ ኦሰቴዳ ባሱዋን ማራን የገት ኡቴድኖ። 
\v 7 እቱ እቱዋፐ ዱማ ግዴዳ ዎርቃ ቡርጩኩዋን ኡሻይ አሳዉ እመቴ፤ ካቲካ ባረ ሎኦተን ዳሮ ሎአ ዎይንያ ኤሳ ዳርስ እሜዳ። 
\v 8 እት እት አሳይ ባረ ኮዮዋ ኬሻ ኡሼ፤ ሄዋ ካቲ ካሰቲደ፥ ባረ ቆማቶ ኦድ ዎዳ።
\p
\v 9 ሄ ዎደ ካታታ አስጺናካ ማጫ አሳ ባላ ካትያ ጎለን ጊግሳዱ።
\p
\v 10 ሾቢ ዶመቴዳ ላፑን ጋላስ፥ ካቲ አርጸክስስ ዎይንያ ኤሳ አሊደ ናሸቴዳ ዎደ፥ ባረ ቆማቱዋ ማሁማና፥ ብዝታ፥ ሀርቦና፥ ቢግታ፥ አባግታ፥ ዘታራነ ካርካሳ ጌተትያ ላፑን ጎይረቴዳዋንታ ጼሲደ፥ 
\v 11 “ካታቶ አስጺኖ ካዉተ ካላቻ ዎስሲደ፥ ሃ አኪደ ዪተ” ያጊደ አዛዜዳ። አያዉ ጎፐ፥ አ ሎይ ማላ ሎአ ግድያ ድራዉ፥ ካፓቱነ አሳይ ኡባይ እዞ በአና ማላ፥ ካቲ ኮዬዳ። 
\v 12 ሽን ካትያ አዛዙዋ ሱንቱ ኦድና፥ ካታታ አስጺና ካትያ ስንዉ ዬናን እጻዱ። ሄዌ ካትያ ሀንቁዋን ኤዳ።
\p
\v 13-14 ሄዋ ድራዉ፥ ካቲ ባረ ስን ሺቃናዉነ ባረ ካዉተ ጋርሳን ዎልቃማ ማታይ ደእያ ላፑን ፓርሰነ ሜዶና ሱንቱዋ ጼሲደ ገልሴዳ። ኡንቱንቱ ካርሻና፥ ሸታራ፥ አድማታ፥ ታርሴሳ፥ መሬሳ፥ ማርሳናነ ማሙካና ጌተቲኖ። ሄ አሳቱ አዳ ኤራንቻነ ሄ ጋድያ ህግያ ኡባነ ደኡዋ ዎጋ ምንሲደ ኤሪኖ። ሀዋ ማላባዉ ካቲ ኡባ ዎደካ ኡንቱንታ ኦቼ። 
\v 15 ካቲ ኡንቱንታ፥ “ታን፥ ካቲ አርጸክስስ፥ ታ ጎይረቶዋንቱ ቦላ ኪትና፥ ካታታ አስጺና ታ አዛዙዋ ፖለናን እጻዱ። ሄዋ ድራዉ፥ ህጊ ኦድያ ማራን እዞ ዋታናዉ በሲ?” ያጊደ ኦቼዳ።
\p
\v 16 ሄዋፐ ጉየ ኡንቱንቱፐ እቱ፥ ማሙካን ካትያ ስንንነ ካፓቱ ስንን ዛሪደ፥ ሀዋዳን ያጌዳ፤ “ካታታ አስጺና ካትያ ጻላላ ግደናን ደእሽን፥ አ ካፓቱዋ ኡባነ አ ካዉተ ኡባ ግዱዋን ደእያ አሳ ኡባ ናቃዱ። 
\v 17 አያዉ ጎፐ፥ ሀ ካዉተ ግዶን ደእያ ማጫ አሳይ ኡባይ ካታታ አስጺና ኦዳዋ ስሲደ፥ ባረ አስና አስና ካናዉ ዶማና። ኡንቱንቱካ፥ ‘ካቲ አርጸክስስ ባረኮ ያናዳን ጼግስና፥ ካታታ አስጺና እጻበይኬየ!’ ያጋና። 
\v 18 ሄዋ ጻላላ ግደናን፥ ፓርሰነ ሜዶና ካፓቱ ማቻቱ ሀዋ ስሴዳ ዎደ፥ ሀቼ አዋይ ዉላናዉካ ባረንቱ አስናቱዋ ሄዋዳን ጊደ ካና። ሄዋን ማቼቱዋፐነ አስናቱዋፐ ግዱዋን ካነ ሀንቁ ዳራና።
\p
\v 19 “ሄዋ ድራዉ ካትያዉ፥ ኔን ዶሶፐ፥ አስጺና ላኤን ነ ስን አናዳን ድግያ አዋዩዋ ከሳ፤ ሄ አዋዩካ ላኤን ላመተና ማላ፥ ፓርሰነ ሜዶና ህግያ ግዶን ጻፈቶ። ሄዋፐ ጉይያን፥ አ ካታቶ ግድያ ቦንቹዋ ኢፐ ኬክያ ሀራርዉ እማ። 
\v 20 አያዉ ጎፐ፥ ሀ ኔን አዳ አዋዩ ሀ ዎልቃማ ካዉተን ኡባን ኦደትያ ዎደ፥ እት እት ማቻታ ዱረ ግድና፥ ማንቆ ግድና፥ ሻከናን ባረ አስና ቦንቻና” ያጌዳ።
\p
\v 21 ሄዋፐ ጉየ ካቲነ አ ካፓቱ ሀ ዞርያን ናሸቴድኖ። ሄዋ ድራዉ፥ ማሙካን ጌዳዋዳን ካቲ ኦዳ። 
\v 22 እ ባረ ካዉተ ግዶን ደእያ ዱማ ዱማ ቢታቱዋ ኡባዉ ኡንቱንቱ ፕዶልያንነ ኡንቱንቱ ቃላን ጻፊደ፥ ዳብዳቢያ ኪቴዳ፤ ሄ አዋዩ፥ እት እት አስናይ ባረ ጎልያ ጎልያ አይሳናዉነ ባረ ቃላን ሃሳያናዉ ካፑዋ ግድያዋ ኦዴ።
\c 2
\s1 አስትራ ካታቶ ግዳዱ
\p
\v 1 ሄዋፐ ስሚደ፥ ካትያ አርጸክሲሳ ሀንቁ ዶቼዳ፤ አስጺና ኦዳባነ እካ እዝ ቦላን ከሴዳ አዋዩዋባ ቆፔዳ። 
\v 2 ሄ ዎደ ካትያ ጎለን ኦያ ቆማቱ አ ሀዋዳን ያጌድኖ፤ “ሎኦ ማላና ደእያ ዎዶሮ ማጫ ናና ኮዪደ፥ ካትያዉ አሀና ማላ፥ 
\v 3 ነ ካዉተ ግዱዋን ደእያ ቢታቱዋ ኡባን ካፓቱዋ ሱን። ኡንቱንቱካ ሎኦ ማላና ደእያ ዎዶሮ ማጫ ናና ዶሪደ፥ ሱሳ ካታማ አሂደ፥ ማጫ አሳ ጊጌዳ ጎለን ዎኖ። ሄዋን ሄ ማጫ አሳው ጎለዉ ሀላፈ ግድያ ካትያ ጎይሩዋ ሄጋያ ኩሽያን ኡንቱንቱ ደእሽን፥ ኡንቱንቱ ማላ ሎይያባይ ኡንቱንቶ እመቶ። 
\v 4 ሄዋፐ ጉይያን፥ ካትያ ኡባፐ አ ናሸችያ ወዶራታ አስጺን ኮታን ካታቶ ግዱ” ያጌድኖ። ሄዋፐ ጉየ ሀ ዞሪ ካትያ ናሸቼዳ ድራዉ፥ ካቲ ሄዋዳን ኦዳ።
\p
\v 5 ሄዋን ሱሳ ካታማን ካቲ ደእያ ሳን እት ማርድክዮሳ ጌተትያ አይሁዳ ጋድያ አሳይ ደኤ። እካ ያኢራ ናኣ፤ ያኢር ሽምአ ናኣ፤ ሽምእ ቢንያማ ዛርያ ግዴዳ ቂሳ ናኣ። 
\v 6 ባብሎነ ካቲ ናቡካዳናጾረ ይሁዳ ካትያ ዮኣኪናነ ሀራ አይሁዳ አሳ ኦላን ኦሞዲደ አፌዳ ዎደ፥ ማርዶክዮስ የሩሳላመፐ ኡንቱንቱና እትፐ ቤዳዋ።\x - \xo 2:6 \xo*\xt 2 ካታ. 24:10-16፤ 2 ኦዱዋ 36:10\xt*\x* 
\v 7 እ ሄ ጋድያን ደኢደ፥ ባረ አዉዋ እሻ ናቶ፥ እብራይጸ ቃላን ሀዳሶ ጌተትያ አታነ አዉ ሀይቅኬዳ አስቴሮ ባረናና ዎደ ድቼ። እዝ አዉነ አታ ሀይቆዋፐ ጉይያን፥ ማርዶክዮስ እዞ አፊደ፥ ባረ ማጫ ናቶ ኦደ ድቼዳ። አስትራ መንካ ጌሳንካ ሎይ ማላ ሎአ።
\p
\v 8 ካቲ ከሴዳ አዋዩዋነ አዛዙዋ ማራን፥ ካቲ ደኢያሳ ሱሳ ካታማ ካትያ ጎልያ ዬዳ ዶረቴዳ ሀጋየ አዎተን ኡቴዳ ጮራ ዎዶሮቱዋፐ እትና አስቴሮ። እዛካ ያደ፥ ማጫ አሳው ጊጌዳ ጎለ ሀላፈ ግዴዳ ሄጋያ ግያዋ አዎተን ኡታዱ። 
\v 9 ሄጋይ አስትርን፥ ሎይ ናሸቴዳ፤ እዛ አ ስንን ናሹዋ ደማዱ። ያቲደ ኤለካ ማናዉ ቁማነ ቦላ ኦከትያዋ እዝዉ እሜዳ። ቃይ እዝዉ ኦናዉ ካትያ ጎልያፐ ዶረቴዳ ላፑን ዳንጋጽረቱዋ ሱንደ፥ ማጫ አሳዉ ጊጌዳ ጎለን፥ ክፍልያ ኡባፐ አደ ሎእያ ክፍልያን ኦነ እ ዳንጋጽረቱዋ አፊደ ዎዳ።
\p
\v 10 ማርዶክዮስ እዝዉ ካሰቲደ ኦዴዳዋዳን፥ አስትራ ሀቃ አሳፐንቶነ ኦ ቆመንቶ ኦዉነ ኦዳበይኩ። 
\v 11 ቃይካ ማርዶክዮስ አስትር ፓጻተነ እዝዉ ሀንያዋ ኤራናዉ፥ ማጫ አሳ ጎልያ ዳባባፐ ስንና ጋላሳን ጋላሳን ያነ ሃነ ሀመቴ።
\p
\v 12 እት እት ወዶራታ ካትያኮ ገላናፐ ካሰታደ ማጫዋንቶ አዛዘቶ ማራዳን፥ እዛ እት ላይ ኩመን ባረ ማላ ሎይደ ጋምአዉ፤ ሄዌካ፥ ኮይሮ ኡሱፑን አግና ካርቢያ ዛይትያን ጎርፐታደ ጋምኣደ፥ ላኤን ኡሱፑን አግና ቃይ፥ ሎኦ ሳዊያ ሽቱዋንነ ማላ ሎይያባን ጎርፐታዉ። 
\v 13 ሄዋፐ ጉይያን፥ እት ወዶራታ ካትያኮ ገልያ ዎዲ ጋክያ ዎደ፥ እዛ ኮዮዌ ኡባይ እመትና፥ ማጫ አሳ ጎልያፐ ከሳደ፥ ካቲ ደእያ ሳኣ ገላዉ። 
\v 14 ቃማ ገላደ፥ ካትያና አቄዳዋፐ ህን ባጋን፥ ዎንትና ጉራ ከሳዉ። ካትያና አቅ ከሴዳ ማጫዋንቱ ደእያ ሀራ ጎልያ እዞ አፊኖ። ሄ ጎልያዉ ሀላፈ ግድያ ካትያ ጎይሩ ሻእሻጋዝ እዞ ናጌ። ካቲ ዶሲደነ እ ሱን ጼሴዳ፥ “ኤበሎ አህተ” ጋና ዮፐ፥ አ ላኤን ካትያኮ ገላናዉ ዳንዳዩኩ።
\p
\v 15 ሄዋ ግዶደ፥ ካትያኮ ገልያ ካላይ አስቴሮ ጋኬዳ። አስትራ ማርድክዮሳ አዉዋ እሻ አብሀይላ ናቶ፤ ማርዶክዮስ ባረ ናቶ ኦደ ድቼዳኖ። እዛ ማጫ አሳይ ጊግያ ጎለዉ ሀላፈ ግድያ ካትያ ጎይሩ ሄጋይ ዞሬዳዋፐ አትና እዛ አይነ ኦቻበይኩ። ኦ በኤዳ ኡባይ እ ማላ ናሼዳ። 
\v 16 አርጸክስስ ካተቴዳ ላፑን ላይን፥ ተቤታ ጌተትያ ታማን አግናን አስቴሮ ካቲ ደእያ ሳኣ አፌዳ።
\p
\v 17 ካቲ ሀራ ማጫዋንቱ ኡባፐ አደ፥ እዞ ዶሴዳነ ሀራ ዎዶሮቱዋ ኡባፐ እዝን ናሸቴዳ። ሄዋ ድራዉ፥ ካዉተ ካላቻ እ ሁጲያን ዎደ፥ እዞ አስጺን ሳኣን ካታቶ ኦዳ። 
\v 18 ሄዋፐ ጉይያን፥ ካቲ አስትር ቦንቾ ዎልቃማ ባላ ጊግሲደ፥ ሞድያዋንታነ አናና ኦያዋንታ ጼሴዳ። ቃይ ባረ ካዉተ ግዶን ናሸቻ ባላይ ቦንቼታና ማላ አዋዪደ፥ እሞታካ ባረ ኬካተ ኬሻ እሜዳ።
\s1 ማርዶክዮስ ካትያ ሸምፑዋ አሼዳ
\p
\v 19 ዎዶራቱ ላኤንዋ ሺቄዳ ዎደ ማርዶክዮስ ካትያ ጎለ ፐንግያን ማታይ እመትና ኡቴዳ። 
\v 20 አስትራ ሀቃ አሳፐንቶነ ኦ ቆመንቶ ኦነ ኦዳበይኩ። ኦ ማርዶክዮስ፥ “ኦዶፓ” ጌዳ ድራዉ፥ ካሰ ናአተን አዛዘትያዋዳን፥ ሀእካ አዉ አዛዘታዱ።
\p
\v 21 ማርዶክዮስ ካትያ ጎለ ፐንግያን ኡቴዳ ሄ ዎደ፥ ካቲ ደእያ ክፍለቱዋ ገልያ ፐንግያ ናግያ ካትያ ጎይረቶዋንቱፐ ላአቱ፥ ብግታንነ ተረሽ ካትያ አርጸክሲሳ ሞርኪደ፥ ዎናዉ ማቀቴድኖ። 
\v 22 ኡንቱንቱ ማቁዋ ማርዶክዮስ ስሲደ፥ ካታት አስትርዉ ኦድና፥ እዛካ ማርድክዮሳ ሱንን ካትያዉ ኦዳዱ። 
\v 23 ካቲ የዉዋ ሎይደ፥ ቆሪደ ጼልያ ዎደ፥ የዉ ቱማ ግዲደ ቤትና፥ ሄ ላኡ አሳቱዋ ኮጫን ካቂደ ዎዳ። ሀ ሀኖተይካ ካትያ አርጸክሲሳ ታርክያ ጻፍያ ማጻፋን እ ደእያ ሳኣን ጻፈቴዳ።
\c 3
\s1 ሃማን አይሁዳቱዋ ይሳናዉ ሀልቼዳ
\r (3:5-14)
\p
\v 1 ሄዋፐ ጉይያን፥ ካቲ አርጸክስስ ሀማና ሱንተ ቂሲደ፥ ባረ ካፓቶ ካፑዋ ኦደ ሱንዳ። ሀማዳታ ናኣ ሀማን አይሁዳቱዋ ሞርክያ፥ አጋጋ ዛርያ። 
\v 2 ካቲ አዛዝ ዎዳ ድራዉ፥ ካትያ ጎልያ ፐንግያን ደእያ ካፓቱ ኡባቱ ሃማን አያ ዎደ፥ ጉልባቲደ አ ቦንቺኖ። ግዶ ሽን፥ ማርዶክዮስ ሃማናዉ ጉልባተናንነ ቦንቼናን እጼዳ። 
\v 3 ሄ ዎድያን ካትያ ጎልያ ፐንግያን ደእያ ካፓቱ ማርድክዮሳ፥ “ካትያ አዛዙዋ ፖለናን አያዉ እጻይ?” ያጊደ፥ 
\v 4 ሀቼ ሀቼ ኦዲኖ፤ ሽን እ ኡንቱንቱ ኦድያዋ ስሳናዉ ኮይቤና። ኡባ ቃይ፥ “ታን አይሁዳ አሳ ግድያ ድራዉ፥ ሃማናዉ ጉልባታናዉነ አ ቦንቻናዉ ዳንዳይከ” ያጌዳ።
\p ሄዋፐ ጉይያን ኡንቱንቱ፥ “ሀ ማርዶክዮስ ኦድያ ጋሱዋ ስሲደ፥ ሃማን ዋናንዴሻ!” ጊደ፥ አዉ ኦዴድኖ። 
\v 5 ማርዶክዮስ ባረዉ ጉልባተናዋነ ባረና ቦንቼናዋ ሃማን ኤሬዳ ዎደ፥ ሀንቁዋ ታማዳን ኤጽ ከሴዳ። 
\v 6 ሄዋ ቦላካ ቃይ፥ ማርዶክዮስ አይሁዳ አሳ ግድያዋ ኤሬዳ፤ አ ጻላላ ዎያዌ ላፋባ ጊደ ቆፔዳ ድራዉ፥ አርጸክሲሳ ካዉተ ግዱዋን ደእያ አይሁዳ ዛርያ ኡባ ዎናዉ ሀልቼዳ።
\p
\v 7 አርጸክስስ ካተቴዳ ታማነ ላኤን ላይን፥ ንሳና ጌተትያ ኮይሮ አግናን፥ አይሁዳቱዋ ዎያ አግናነ ጋላሳ ኤራናዉ፥ ፑሪማ ጌተትያ ሳማ አ ስንን የጋናዳን፥ ሃማን አዛዜዳ። ሄ ሳማይ ዎዳ ማራን፥ አዳረ ጌተትያ ታማነ ላኤን አግናን፥ ታማነ ሄዘን ጋላሳይ አይሁዳቱ ዉርያ ጋላሳ ግድያዌ ቃሸቴዳ።
\p
\v 8 ሄዋፐ ጉይያን፥ ሃማን ካትያ አርጸክስሳዉ ሀዋዳን ያጊደ ኦዴዳ፤ “ነ ካዉተ ግዱዋን ሙለ ሳኣን ላለቲደ ደእያ እት ዛረ አሳቱ ደኢኖ፤ ኡንቱንቱ ደኡዋ ማራይ ሀራ አሳ ኡባዋፐ ዱማ፤ ሄዋ ጻላላ ግደናን፥ ኡንቱንቱ ካትያ ህግያዉካ ሞደትክኖ። ሄዋ ድራዉ፥ ኔን ኡንቱንቱ ደኢኖ ጋደ ጮኡ ጎፐ፥ ሄዌ ሎአ ግደና። 
\v 9 ሄዋ ድራዉ ካትያዉ፥ ሀ ቆፋይ ኔና ናሸቾፐ፥ ሀ አሳቱዋ ዎ ይሳና ማላ፥ አዋዩዋ ከሳ። ሄዋ ነ ኦፐ፥ ታን 340,000 ኪሎ ግራምያ ዴጽያ ብራ ካትያ ሚሻ ምንጅያ ጎለዉ ገልሳናዳን፥ ሀ ኦሱዋ ኦያዋንቶ እማና” ያጌዳ።
\p
\v 10 ሄዋፐ ጉየ ካቲ ባረ ማታ ኤርሳናዉ አዋዩዋ ቦላ ዎያ ምግዱዋ ማታፋ ባረ ብራያፐ ከሲደ፥ አይሁዳቱ ሞርክያ፥ አጋጋ ዛርያ፥ ሀማዳታ ናኣ ሃማናስ እሜዳ። 
\v 11 ካቲ ሃማና፥ “ኔን እማና ጌዳ ብራይ ነ ማታን ደኦ፤ ሽን ሀ አሳቱዋ ቦላ ነ ዶሴዳዋ ኪተታ” ያጌዳ።
\p
\v 12 ሄዋ ድራዉ፥ ኮይሮ አግናን፥ ታማነ ሄዘን ጋላሳን፥ ሃማን ካትያ ጻፈቱዋ ጼጌዳ። ሄ አዋዩ ቢታ ኡባን ደእያ አሳዉ ዱማ ዱማ ቃላንነ ዱማ ዱማ ፕዶልያን ጻፈቲደ፥ ካትያፐ ጋርሳና ጋድያ ሞድያዋንቱኮ፥ አዉራጃ ሞድያዋንቱኮነ ደርያ ካፓቱ ኡባኮ ኪተታናዳን አዛዜዳ። አዋዩካ ካትያ አርጸክሲሳ ሱንን ጻፈቲደ፥ ምግዱዋ ማታፋይ አ ቦላ ዎዋፐ ጉየ፥ 
\v 13 ኤሌል ዎንቻቱ አ ካዉተ ጋድያ ኡባ ጋናዳን ኪተቴድኖ። ሄ አዋዩ፥ “አዳረ ግያ ታማነ ላኤን አግናን ታማነ ሄዘን ጋላሳን፥ አይሁዳ ኡባ፥ ያላጋ፥ ጭማ፥ ማጫዋ፥ አቱማዋ፥ ናናካ አሸናን መጽ እት ጋላስ ዉርስ ዎተ፤ ኡንቱንቱ አቁዋካ ቦንቂተ” ያጌ። 
\v 14 ሄዋ ድራዉ፥ ሄ ኬሬዳ ጋላሳይ ጋክያ ዎደ፥ አሳይ ኡባይ ጊገታናዳን፥ ሄ አዛዙ ቢታዉ ኡባዉ ጻፈቲደ ኪተቴዳ።
\p
\v 15 ካትያ አዛዙዋን ኤሌል ዎንቻቱ ቢታ ኡባካ ኪታ ጋድኖ። ቃይ ሱሳ ካታማን ካትያ ጎልያ ሄራን ጻፈቴዳ ህጊ እመቴዳ። ያትና፥ ሱሳ ካታማ አሳይ ኡባይ ሻቢረቴዳ። ሽን ካቲነ ሃማን እትፐ ኡቲደ፥ ሚኖ።
\c 4
\s1 ማርዶክዮስ አስቴሮ ማዱዋ ዎሴዳ
\p
\v 1 ማርዶክዮስ ሀ ሀኔዳባ ኡባ ስሴዳ ዎደ፥ ካዮቲደ ባረ ማዩዋ ፔዳ፤ ማቅያ ማዬዳ፤ ባረ ሁጲያንካ ብድን ክክፌዳ። ባረ ኮሻካ ቁ ኦደ፥ ሴላ ዬኩዋ ዬኪደ፥ ካታማ ግዶን ዩዬዳ። 
\v 2 ካትያ ጎልያ ገልያ ፐንግያ ጋካናዉ ቤዳ፤ ሽን ገላናዉ ዳንዳይቤና። አያዉ ጎፐ፥ ማቅያ ማዪደ፥ ካትያ ጎልያ ገላናዉ ኦነ ዳንዳየተና። 
\v 3 ካትያ አዋዩ ስሰቴዳ ቢታ ኡባን አይሁዳቱ ግዶን ዎልቃማ ካዩ፥ ጾማይ፥ ዬኩነ ዝላሳይ ዶመቴዳ። ኡንቱንቱፐ ዳሮቱካ ቃይ ማቅያ ምጪደ፥ ካዮታናዉ ብድንን ካካፊደ ኡቴድኖ።
\p
\v 4 ካታት አስትር ዳንጋጽረቱነ እዞ ናግያ ሱንቱ ዪደ፥ ማርዶክዮሳባ እዝዉ ኦዴዳ ዎደ፥ አ ሎይ ካዮታዱ። ማርዶክዮስ ዋሩዋ ከስ ድጊደ ማያና ማላ፥ አዉ ሀራ ማዩዋ ኪታዱ፤ ሽን እ አከናን እጼዳ። 
\v 5 ሄዋፐ ጉይያን አስትራ፥ ካቲ እዝዉ ኦናዳን ዎዳ ሀታካ ግያ ጎይረቶዋ ጼጋደ፥ ማርድክዮሳ መቱ አዬንቶነ ቃይ እ አያዉ ካዮትንቶነ ኤራና ማላ፥ አኮ ኪታዱ። 
\v 6 ሀታክ ካትያ ጎልያ ገልያ ፐንግያ ማታ ዳባባን ደእያ ማርዶክዮሳኮ ቤዳ። 
\v 7 ማርዶክዮስ፥ ባረ ቦላ ጋኬዳዋ ኡባ ቆንጭሲደ፥ አዉ ኦዴዳ። ቃይካ አይሁዳቱዋ ዎዳ ዉርሳናዉ ሃማን ካትያ ሚሻ ምንጅያ ጎለዉ እማናዉ ገፔዳ ሻሉዋ ልክያና ኡባይ አተናን ጌሺደ ኦዴዳ። 
\v 8 ሄዋ ጻላላ ግደናን፥ አይሁዳቱዋ ዉርሳናዉ ሱሳን ከሴዳ አዋዩ ጻፈቴዳ ዋራቃታካ ሀታካዉ እሚደ፥ ሄዋ አስትርዉ እማናዳንነ ሀንያዋ ኡባ እዝዉ ኦዳናዳን ኦዴዳ። ቃይ አስትራ ካትያኮ ገላደ፥ ባረ አሳይ ዉረናዳን ጋናታና ማላ፥ ሀታካዉ ኦዴዳ።
\p
\v 9 ሀታክ ዪደ፥ ማርዶክዮስ ኪቴዳዋ ኡባ አስትርዉ ኦዴዳ። 
\v 10 አስትራ ሀታካ ዛራደ፥ ማርዶክዮሳኮ ሀዋዳን ያጋደ ኪታዱ፤ 
\v 11 “ህጊ፥ ‘ማጫዋ ግድና፥ አቱማዋ ግድና፥ ኦንነ ጼገተናን ደኢደ፥ ካትያና ጋከታናዉ ካትያ ጎልያ ግዶ ዳባባ ገሎፐ፥ ሀይቆ። ሽን እ ጼገተናን ካትያኮ ገልያ ዎደ፥ ካቲ ዎርቃፐ ኦሰቴዳ ባረ ካዉተ ጻምኣ ጼራ አኮ ዛሪደ በሶፐ፥ ሄ ኡራ ጻላላይ አቶ’ ያጌ። ሀ ህግያ ካትያና ዞረትያዋንቱፐ ቢደ፥ ጮ አሳ ጋካናዉ ደእያ አሳይ ኡባይ ኤሬዳ። ሽን ታን ሀታሙ ጋላሳ ግዶደፐ ካትያኮ ገላናዉ ጼሰታ ኤርከ” ያጋዱ።
\p
\v 12 ማርዶክዮስ አስትራ ኪቴዳ ኪታ ስሴዳዋፐ ጉይያን፥ 
\v 13 እዝዉ ዛሩዋ ኪቲደ፥ ሀዋዳን ያጌዳ፤ “ኔን፥ ‘ታን ካትያ ጎለን ደእያ ድራዉ፥ ሀራ አይሁዳቱዋፐ አትና፥ ታና ቦችያዌ ባዋ’ ጋደ ቆፖፓ! 
\v 14 ኔን ሀዋ ማላ ዎድያን ጮኡ ጎፐ፥ አይሁዳቶ ማዱ ሀራ ሳፐ ያናዋ። ኡንቱንቱካ ቱሙፐ አታና፤ ሽን ኔንነ ነ አዉዋ ጎልያ አሳይ ያና። ኔን ካታቶ ግዳደ ዬዳዌ ሀዋ ማላ ዎድያሰንቶነ ኦን ኤሪ?” ያጌዳ።
\p
\v 15 አስትራ ማርዶክዮሳዉ ሀዋዳን ያጋደ ዛራደ ኪታዱ፤ 
\v 16 “ባደ ሱሳ ደእያ አይሁዳቱዋ ኡባ እትፐ ሺሻ። ጾሚደ፥ ታዉ ዎስተ። ሄዙ ጋላሳይነ ሄዙ ቃማይ ዉራናዉ፥ ቁማ ሞፕተ፤ ሃ ኡሾፕተ። ታንካ ታ ዳንጋጽረቱዋና ሄዋዳን ጾማና። ሄዋፐ ጉይያን፥ እ ኡባ ህግያን ተኤቴዳዋ ግዶፐነ፥ ካቲ ደእያ ሳኣ ታን ገላና። ታን ሀይቂንቶነ ሀይቃና” ያጋዱ።
\p
\v 17 ማርዶክዮስ ቢደ፥ አስትራ አ አዛዜዳዋዳን ኡባባ ኦዳ።
\c 5
\s1 አስትራ ሾብያ ጊግሳዱ
\p
\v 1 ጾማ ዶሞደፐ ሄዘን ጋላስ አስትራ ካዉተ ማዩዋ ማያደ፥ ካትያ ጎለፐ ስን ባጋና ግዶ ዳባባ ገላደ ኤቃዱ። ሄ ዳባባን ካቲ ኡትያ ዉይግያ አራታይ ደኤ። ካቲካ ባረ ጎልያ ገልያ ፐንግያ ጼልያ ሳን ደእያ፥ ባረ ካዉተ አራታን ኡቴዳ። 
\v 2 ካታታ አስትራ ገላደ፥ ግዶ ዳባባን ኤቄዳኖ ካቲ በኢደ እዝን ናሸቴዳ ድራዉ፥ ባረ ኩሽያን ደእያ ዎርቃ ጻምኣ ኢኮ ምጬዳ። አካ ሺቃደ ጻምኣ ጼራ ቦቻዱ። 
\v 3 ካቲ እዞ ሀዋዳን ያጌዳ፤ “ካታት አስቴረ፥ ኔን ታኮ አያዉ ያድ? ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነዉ እማና” ያጌዳ።
\p
\v 4 አስትራ ዛራደ ሀዋዳን ያጋዱ፤ “ካትያዉ፥ ኔና ናሸችያዋ ግዶፐ፥ ታን ነዉ ጊግሴዳ ባላ ማናዉ ኔንነ ሃማን ላኡ ሀቼ ይንቶ ዶሳይ” ያጋዱ።
\p
\v 5 ሄዋፐ ጉይያን ካቲ፥ “ኑን አስትራ ጊግሴዳ ሾብያዉ ባናዉ፥ ሃማና ኤለካ አህተ!” ያጌዳ።
\p ሄዋፐ ጉየ ላአቱካ ሄ ሳኣ ቤድኖ። 
\v 6 ኡንቱንቱ እትፐ ዎይንያ ኤሳ ኡሺደ ደእሽን፥ ካቲ ላኤንዋ አስቴሮ፥ “ኔን ታና ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነ ኦሻ ፖላና” ያጌዳ።
\p
\v 7 አስትራ ዛራደ ሀዋዳን ያጋዱ፤ 
\v 8 “ካትያዉ፥ ኔን ታናን ናሸቴዳዋ ግዶፐ፥ ቃይ ታን ዎስያዋ እማናዉነ ታ ኦሻ ፖላናዉ ኔን ዶስያባ ግዶፐ፥ ዎንት ታ ጊግስያ ሀራ ግብራዉ ኔንነ ሀማን ያናዳን ኦቻይ። ታን አያ ኮይንቶ፥ ሄ ዎደ ነዉ ቆንጭሳና” ያጋዱ።
\s1 ሀማና ማቁዋ
\p
\v 9 ሄ ጋላስ ሃማን ባላ ሳፐ ከሲደ ብያ ዎደ፥ ሎይ ናሸቴዳ ድራዉ፥ ባረ ዎዛናን ኖጩ ጊደ ቤዳ። ሽን እ ካትያ ጎልያ ገልያ ፐንግያ ማታና አደ ብያ ዎደ፥ ሄዋን ኡቴዳ ማርድክዮሳ በኤዳ፤ አዉ ደንድቤናዋነ ያዪደ ኮኮርቤናዋ አኬኪደ፥ ሃማን ሀንቁዋ ኤጽ ከሴዳ። 
\v 10 ግዶፐነ፥ ባረ ሀንቁዋ ዳንዳዪደ ቢደ፥ ባረ ሶ ጋኬዳ።
\p ሄዋፐ ጉይያን፥ ባረ ላገቱዋነ ባረ ማቻቶ ዘሬሾ እትፐ ጼግሲደ፥ 
\v 11 ሃማን ባረ ዱረተ ልክያ፥ ባረ አቱማ ናና ፓይዱዋ፥ ካቲ ባረና ኡባባን ቦንቼዳ ቦንቹዋነ ሀራ ሞድያዋንቱፐነ ካትያ ኦሳንቻቱዋፐ አያ ሱንተ አዉ እሚደ፥ ዋቲደ አ ቦንቼደንቶ፥ ኡንቱንቶ ጬቄዳ። 
\v 12 ጉጂድካ ሃማን ሀዋዳን ያጌዳ፤ “ሀራይ አቶ ካታታ አስትራካ ባረ ጊግሴዳ ሾብያዉ ካትያና ባናዉ ታፐ አትና፥ ሀራ ኦናነ ጼሳበይኩ። ቃይ ዎንትካ ካትያና ባናዳን ታና ጼሳ ዎዱ። 
\v 13 ሽን ሄ አይሁዳይ ማርዶክዮስ ካትያ ጎልያ ገልያ ፐንግያን ኡቴዳዋ በእያ ዎደ፥ ሀ ኡባባይካ ታና ካልሰና” ያጌዳ።
\p
\v 14 ሄ ዎደ አ ማቻታ ዘሬሻነ አ ላገቱ ኡባይ ሀዋዳን ያጌድኖ፤ “ኔን እሻታሙ ዋ አዱሳ ኮጫ ኤስሳ፤ ያታደ ዎንት ጉራና ማርዶክዮስ ሄ ኮጫን ካቀታና ማላ፥ ካትያ ኦቻ። ሄዋፐ ጉይያን፥ ናሸታደ ባላ ማናዉ ባ” ያጌድኖ። ሃማና ሀ ቆፋይ ናሸቼዳ ድራዉ፥ ኡንቱንቱ ጌዳዋዳን ኮጫ ጊግስሴዳ።
\c 6
\ms ሃማነ ቦላ ሀይቁ ፕርደቴዳ
\mr (6:1—7:10)
\s1 ካቲ ማርድክዮሳ ቦንቼዳ
\p
\v 1 ሄ ጋላስ ቃማ ካትያ ገምእሹ አፈናን እጼዳ። ሄዋ ድራዉ፥ ካቲ ካትያ ታርክያ ጻፍያ ማጻፋ አሂደ፥ ሄዋን ጻፈቴዳ፥ ካሰ ሀኔዳ ታርከቱዋ ዎዛናን አናዉ አዉ ናባባና ማላ አዛዜዳ። 
\v 2 ናባበቴዳ ታርከቱዋፐ እቱ ማርዶክዮስ ኦዳዋ፤ ሄዌነ፥ ካቲ ደእያ ክፍልያ ናግያ፥ ብግታናነ ተረሻ ግያ ላኡ ጎይረቴዳዋንቱ ካትያ ዎናዉ ማቀቴዳ ማቁዋ ማርዶክዮስ ቆንጭሴዳዋ።\x - \xo 6:2 \xo*\xt አስ. 2:21-22\xt*\x* 
\v 3 ካቲ፥ “ያትና፥ እ ሀዋ ቆንጭሴዳዎ አዉ እመቴዳ ሱንተይ ዎይ ጋቲ አዬ?” ያጌዳ።
\p ካትያ ቆማቱ ዛሪደ፥ “አዉ አያይነ ኦሰትቤና” ያጌድኖ።
\p
\v 4 ካቲካ ዛሪደ፥ “ካትያ ጎልያ ካረ ዳባባን ኦኔ ደእያዌ?” ያጌዳ። ሄ ዎደ ባረ ጊግሴዳ ኮጫን ማርድክዮሳ ካቃናዉ፥ ካትያ ኦቻና ጊደ፥ ሃማን ካትያ ጎልያ ካረ ዳባባ ገሊደ ደኤ።
\p
\v 5 ካትያ ቆማቱ፥ “ሃማን ሀዋን ደኤ” ያጌድኖ።
\p ካቲ ዛሪደ፥ “ሃ ገላ ጊተ” ያጌዳ።
\p
\v 6 ሃማን ገሎዋፐ ጉይያን ካቲ፥ “ካቲ ቦንቻናዉ ዶስያ አሳዉ አይ ኦናዉ ኮሺ?” ያጊደ ኦቼዳ።
\p ሀማን፥ “ካቲ ታፐ ሀራ ኦና ቦንቻናዉ ዶሲ?” ያጊደ ባረ ዎዛናን ቆፔዳ። 
\v 7-8 ሄዋ ድራዉ፥ ሃማን ካትያዉ ያጊደ ዛሬዳ፤ “ካቲ ቦንቻናዉ ዶስያ ኡራዉ ካቲ ማይ ከሴዳ ባረ ካዉተ ማዩዋ፤ ባረ ቶጌዳ ፓራነ አ ሁጲያን ዎዳ ካላቻ አሀናዳን ኡዳ። 
\v 9 ሄዋፐ ጉይያን፥ ባረናና ኦያ ሞድያዋንቱፐ እት ሎይ ቦንቼቴዳዋ ጼግሲደ፥ ካዉተ ማዩዋ አ ማይዛናዳንነ ካትያ ፓራን አ ኡትሲደ፥ ካታማ ዳባባ ከሳናዳን አዛዛ። ያቶፐ ሄ ሎይ ቦንቼቴዳ ካፑ አ ስንን ሀመቲደ፥ ‘ካቲ ቦንቻናዉ ዶስያ ኡራዉ ሀዋዳን ኦ’ ያጊደ አዋዮ” ያጌዳ።
\p
\v 10 ሄዋፐ ጉየ ካቲ ዛሪደ፥ ሃማና ሀዋዳን ያጊደ አዛዜዳ፤ “ዎደ ኤለካ ደንዳ ካዉተ ማዩዋነ ታ ፓራ አካደ፥ ነ ጌዳዋዳን አይሁዳ ማርዶክዮሳዉ ኦ። እ ካትያ ጎልያ ገልያ ፐንግያን ደኤ። ነ ጌዳዋፐ እትባነ አሾፓ” ያጌዳ።
\p
\v 11 ሄዋ ድራዉ፥ ሀማን ማዩዋነ ፓራ አኪደ ማርድክዮሳ ካዉተ ማዩዋ ማይዚደ፥ ካትያ ፓራ ቦላን ኡትሴዳ። ቃይ ካታማ ዳባባን አፐ ስንና ሀመቲደ፥ “ካቲ ቦንቻናዉ ዶስያ ኡራዉ ሀዋዳን ኦ” ያጊደ አዋዬዳ።
\p
\v 12 ሄዋፐ ጉይያን፥ ማርዶክዮስ ካትያ ጎልያ ፐንገ ጉየ ስሚደ ቤዳ። ሽን ሃማን ዳሮ ካዮቴዳ ድራዉ፥ ባረ ዴሙዋ ጉሎቴዳ፥ ኤሌሊደ ባረ ሶ ቤዳ። 
\v 13 ባረና ጋኬዳዋ ኡባ ባረ ማቻት ዘሬሽዉነ ባረ ላገቱዋ ኡባቶ ኦዴዳ። ኡንቱንቱ አ፥ “አ ስንን ኔን ኩንዳናዉ ዶሜዳ ሀ ብታኒ፥ ማርዶክዮስ፥ አይሁዳ አሳ ግዶፐ፥ ነ አናና ኤቀታደ፥ አ ጾናናዉ ኡባካ ዳንዳያካ፤ ቱሙፐ እ ኔና ጾናና” ያጌድኖ።
\s1 ሃም ካቀቴዳ
\p
\v 14 ኡንቱንቱ ብሮ ሄዋ ሃሳዪደ ደእሽን፥ ካትያ ጎይራቱ ጋኪደ፥ ሃማና አስትራ ጊግሴዳ ሾብያዉ ኤሌልሲደ አፌድኖ።
\c 7
\p
\v 1 ካቲነ ሀማን ካታት አስትር ባላ ማናዉ ቤድኖ። 
\v 2 ሄ ላኤን ጋላሳ ሾብያዉ ቢደ፥ ኡንቱንቱ ዎይንያ ኤሳ ኡሽ ደእሽን፥ ካቲ ቃይካ፥ “ካታት አስቴረ፥ ኔን ዎስያባይ አዬ? ታን ነዉ እማና። ቃይ ኔን ታና ኦችያባይ አዬ? ሀራይ አቶ ታ ካዉተፐ ባጋ ግዶፐነ፥ ታን ነ ኦሻ ፖላና” ያጊደ ኦቼዳ።
\p
\v 3 ካታታ አስትራ ዛራደ ያጋዱ፤ “ካትያዉ፥ ኔን ታናን ናሸቴዳዋ ግዶፐ፥ ቃይ ታ ኦሻካ ፖላናዉ ኔን ዶሴዳዋ ግዶፐ፥ ታ ዎሳይነ ታ ኦሻይ ታንነ ታ አሳይ ሀይቀናን አታናሳ። 
\v 4 አያዉ ጎፐ፥ ታንነ ታ አሳይ እቱነ አተናን ዉራናዉ ሀይቃናዉነ ያናዉ ዛልኤቴዶ። ኑን ዛልኤቴዳዌ ማጫ አይለነ አቱማ አይልያ ግዲደ ደአናዉ ግድንቶ፥ ታን ጮኡ ጋና፤ አያዉ ጎፐ፥ ሄዋ ማላ መቱ ካትያ ዋይሳናዉ በስያዋ ግደና” ያጋዱ።
\p
\v 5 ካቲ አርጸክስስ ዛሪደ፥ “ሄዋ ኦናዉ ጻሌዳዌ ኦኔ? እ ሄ ብታኒ ሀቃን ደኢ?” ያጊደ ካታቶ አስቴሮ ኦቼዳ።
\p
\v 6 አስትራ፥ “ኑ ሞርኪ፥ ኑና የደርስያዌ ሀዋ ሀ ኢታ ሃማና” ያጋዱ።
\p ሄ ዎደ ሃማን ካትያ ስንንነ ካታት ስንን ዳሮ ዳጋሜዳ። 
\v 7 ካቲ ሎይ ሀንቀቲደ፥ ባረ ኡቴዳ ሳፐ ደንድ ኤቂደ፥ ካትያ ጎልያ አታክልትያ ሳኣ ቤዳ። ሽን ሃማን ካቲ አ ቦላ ኢታባ አሀናዉ ቃቼዳዋ ኤሬዳ ድራዉ፥ ካታታ አስትራ አ ሀይቁዋፐ አሻና ማላ ዎሳናዉ ጉየ አቴዳ።
\p
\v 8 ካቲ ካትያ ጎልያ አታክልትያ ሳፐ ስሚደ፥ ዎንታ ኡንቱንቱ ዎይንያ ኤሳ ኡሽያ ሳኣ ገልያ ዎደ፥ ሃማን ካታት አስትርፐ ማሮታ ዎሳና ጊደ፥ አ ኡቴዳ ግሱዋ ቦላን ጉፋኔዳዋ በኢደ፥ ሀንቁዋን ኤጽ ከሲደ “ላ ሀ ብታኒ ሀዋን ካትያ ጎለን፥ ኡባ ቃይ ታ ስንን፥ ካታትና ግሳናዉ ኮዪየ?” ያጌዳ።
\p ካቲ ብሮ ሄዋ ሃሳይሽን፥ ካትያ ሱንቱ ዪደ፥ ሃማና ዴሙዋ ጉሎዬድኖ። 
\v 9 ቃይ ኡንቱንቱፐ እቱ፥ ሀርቦና ጌተትያ ካትያዉ ኦያ ጎይረቶዌ፥ “ካትያዉ፥ ሃማን ኔና ሀይቁዋፐ አሼዳ ማርድክዮሳ ካቃና ጊደ ኤሴዳ እሻታሙ ዋ ኮጫይ አ ሶን ደኤ” ያጌዳ።
\p ካቲ ዛሪደ፥ “ሃማና አፊደ፥ ሄ ኮጫን ሱልተ!” ያጊደ አዛዜዳ።
\p
\v 10 ሄዋ ድራዉ፥ ማርድክዮሳ ካቃና ጊደ ጊግሴዳ ኮጫን ሀማን ካቀቴዳ። ሄዋፐ ጉይያን፥ ካትያ ሀንቁ ዶቼዳ።
\c 8
\s1 አይሁዳቱ ባረንቱ ሞርከቱዋ ኩሽያ ጭገቴድኖ
\r (8:1—10:3)
\p
\v 1 አይሁዳቱ ሞርኪ ሀማን ሱለቴዳ ጋላስ ካቲ አርጸክስስ ሀማና አቁዋ ኡባ ካታት አስትርዉ አደ እሜዳ። ቃይ ማርዶክዮስ እዝዉ ማታ ዳቦ ግድያዋ አስትራ ካትያዉ ኦዳዱ። ሄዋ ድራዉ፥ ሄ ጋላሳፐ ዶሚደ፥ ማርዶክዮስ ካትያኮ ገላናዉ ዳንዳዬዳ። 
\v 2 ካቲካ ሃማናፐ ጉየ አኬዳ ባረ ምግዱዋ ማታፋ ከሲደ፥ ማርዶክዮሳዉ እሜዳ። አስትራ ማርድክዮሳ ሃማና አቁዋ ቦላን አዎያደ ሱንዱ።
\p
\v 3 ሄዋፐ ጉይያን፥ አስትራ ዬካደ፥ ካትያ ገድያ ቦላን ዛራ ኩንዳደ፥ አጋጋ ዛርያ ግዴዳ ሃማን አይሁዳቱ ቦላን ቱኬዳ ኢታ ማቁ ኪታን ፔሸናዳን ካትያ ዎሳዱ። 
\v 4 ያትና፥ ካቲ ባረ ዎርቃ ጻምኣ እዝዉ ምጭና፥ አ ደንዳ ኤቃደ፥ ሀዋዳን ያጋዱ፤ 
\v 5 “ካትያዉ፥ ኔን ታናን ናሸቴዳዋ ግዶፐ፥ ቃይ ታ ኦሻካ ፖላናዉ ኔን ዶሴዳዋ ግዶፐነ ታ ኦሻይ በሴ ጋደ ቆፖፐ፥ ነ ካዉተ ግዶን ደእያ አይሁዳ ኡባ ዉርሲደ ዎና ማላ፥ አጋጋ ዛርያ ግዴዳ ሀማዳታ ናአይ ሃማን ከሴዳ አዋዩዋ ሻርያ ሀራ አዋዩዋ ኔን ከሳናዳን ዎሳይ። 
\v 6 ሀ ኡባ ባሻይ ታ አሳ ቦላን ጋክያ ዎደ፥ ታን ዋና ጼላናዉ ዳንዳያይታ? ቃይ ታ ዳቦቱዋካ ኡባ ይስያ ዎደ፥ ታን ዋና ጼላናዉ ዳንዳያይታ?” ያጋዱ።
\p
\v 7 ሄዋፐ ጉይያን፥ ካቲ አርጸክስስ፥ ካታቶ አስቴሮነ አይሁዳ ማርድክዮሳ ሀዋዳን ያጌዳ፤ “ሃማን አይሁዳቱዋ ዎናዉ አዋዩዋ ከሴዳ ድራዉ፥ ታን ም ኮጫን አ ካቅሴዳዋነ አ አቁዋካ ኡባ ካታት አስትርዉ እሜዳዋ ህንተንቱ ኤሪታ። 
\v 8 ግዶፐነ፥ ካትያ ጎልያ ማታፋይ ዎና፥ ካትያ ሱንን ከሴዳ አዋዩ ላመታናዉ ዳንዳየና። ሄዋ ድራዉ፥ ህንተንቱ ህንተንቱ ባጋና አይሁዳቱዋ ጎአናዉ ኮዬዳዋ ጻፍተ። ሄዋ ታ ሱንን ጻፊደ፥ ካትያ ማታፋ አ ቦላን ዎተ” ያጌዳ።
\p
\v 9 ሲዋና ግያ ሄዘን አግናን፥ ላታማነ ሄዘን ጋላሳን፥ ማርዶክዮስ ካትያ ጻፈቱዋ ጼጌዳ፤ ህንደፐ ቶጵያ ጋካናዉ ደእያ፥ ጼታነ ላታማነ ላፑን ቢታቱዋ ካትያፐ ጋርሳና ሞድያዋንቶ አይሁዳቶ፥ አዉራጃ ሞድያዋንቶነ ጋድያ ካፓቶ የድያ አዋዩዋ ኡባባ ጻፍሴዳ። አዋዩ ዱማ ዱማ ቃላንነ ዱማ ዱማ ፕዶልያን ጻፈቴዳ፤ ቃይ አይሁዳቶካ ኡንቱንቱ ቃላንነ ኡንቱንቱ ፕዶልያን ጻፈቴዳ። 
\v 10 ማርዶክዮስ ሄ አዋዩዋ ኡባ ካትያ አርጸክሲሳ ሱንን ጻፍሲደ፥ ካትያ ማታፋ ዎዳ። ያትደ ኤሌልያ ካትያ ፓራቱዋ ቶግያ አሳቱዋ ቦላ ቢታዉ ኡባዉ ኪቴዳ።
\p
\v 11 ካቲ ከሴዳ አዋዩ ካታማቱዋ ኡባን ደእያ አይሁዳቱ እትፐ ሺቃናዉነ ባረንቱ ቦላ ይያዋ ኦለቲደ ተአናዉ ዳንዳያና ማላ፥ ማታ ኡንቱንቶ እሜ። ቃይ ኦላ ሚሻ ኦይቅኪደ፥ አይ ቢታፐ ግዶፐነ፥ ኡንቱንታ ኦላናዉ ይያዋንታ፥ ኡንቱንቱ ናናነ ኡንቱንቱ ማቼቱዋና ኡባ እቱዋነ አሸናን ዉርስ ዎናዉነ ኡንቱንቱ አቁዋካ ቦንቂደ አካናዉ ማታ እሜ። 
\v 12 አይሁዳቱ ካትያ አርጸክሲሳ ካዉተን ሄዋ ኦናዉ ኬረቴዳ ጋላሳይ፥ አዳረ ግያ ታማነ ላኤን አግና፥ ታማነ ሄዘን ጋላሳ። 
\v 13 ካትያ አዋዩዋ ቢታቱዋ ኡባን ደእያ አሳይ ኤራናዳን፥ ህግያ ግዲደ አዋየቴዳ፤ ሄዌካ አይሁዳቱ ባረንቱ ሞርከቱዋ ቦላን ሀሉዋ ከሳናዉ ባረንታ ጊግሳናዉ ዳንዳይሴ። 
\v 14 ኪተትያዋንቱ ካትያ ጎልያ ፓራቱዋ ቶጊደ፥ ካትያ አዛዙዋ ጋናዉ ኤሌሊደ ቤድኖ። ቃይ ሱሳ ካታማንካ ካቲ ደእያ ሳን ሀ አዋዩ አሳ ኡባዉ እመቴዳ።
\p
\v 15 ማርዶክዮስ ሳሉዋ ማላትያነ ቦ ካዉተ ማዩዋ ማዪደ፥ ኦቻ ቴራ ማላትያ ካባ፥ ሊኑዋፐ ዳደቴዳዋ ቦላና ጉጄዳ፤ ቃይ ዎልቃማ ዎርቃ ካላቻካ ዎደ፥ ካትያ ስንፐ ከሴዳ። ሱሳ ካታማይ እልሌዳነ ናሸቻዉ ኖጩ ጌዳ። 
\v 16 ሄዌ አይሁዳቶ ቃይ ዎልቃማ ናሸቻነ እልልሳ፥ ዎፓነ ሾብያ ዎደ ግዴዳ። 
\v 17 ሄዋ ድራዉ፥ ካትያ አዋዩ ጋክና ናባበቴዳ ቢታንነ ካታማ ኡባን ደእያ አይሁዳቱ ኡባይ፥ ናሸቲደነ ባላ ሚደ ፔሼድኖ። ሄዋ ጋሱዋን አይሁዳቶ ያዪደ፥ ሄዋን ደእያ ሀራ ዛርያ አሳፐ ዳራቱ አይሁዳ ግዴድኖ።
\c 9
\s1 አይሁዳቱ ባረንቱ ሞርከቱዋ ዎድኖ
\p
\v 1 አዳረ ጌተትያ ታማነ ላኤን አግናን ታማነ ሄዘን ጋላሳይ ጋኬዳ። ሄ ጋላሳይ፥ ካቲ ኮይሮ ከሴዳ አዋዩዋ ማራን አይሁዳቱ ሞርከቱ ኡንቱንታ ጾናና ጌዳ ጋላሳ። ሽን የዉ አ ዎና፥ አይሁዳቱ ባረንቱ ሞርከቱዋ ጾኔድኖ። 
\v 2 ካትያ አርጸክሲሳ ካዉተ ግዶን ደእያ አይሁዳቱ ኡባይ ባረንታ ቆሀናዉ ኮይያ ኡባ ይሳናዉ ባረንቱ ካታማን ካታማን እትፐ ሺቄድኖ። ኡንቱንቱና አይ አሳይነ ኤቀታናዉ ዳንዳይቤና፤ አያዉ ጎፐ፥ ሀራ ዛርያ ግዴዳ አሳይ ኡባይ ኡንቱንቶ ያዬዳ። 
\v 3 ኡባ ቃይ ማርዶክዮሳዉ ያዬዳ ድራዉ፥ ካትያፐ ጋርሳና ጋድያ ሞድያዋንቱ፥ አዉራጃ ሞድያዋንቱ ጋድያ ካፓቱነ ዱማ ዱማባ ኦያዋንቱ ኡባይ አይሁዳቱዋ ሃ ማዴድኖ። 
\v 4 አያዉ ጎፐ፥ ማርዶክዮስ ካትያ ጎለን ዎልቃማ ማታይ እመቴዳነ ዎልቃ ጉጅ ጉጅ ብያ አሳ ግዴዳዌ፥ ሄ ካዉተ ግዶን ደእያ ቢታ ኡባን ኤረቴዳ።
\p
\v 5 ሄ ኬሬዳ ጋላስ አይሁዳቱ ባረንቱ ሞርከቱዋ ኡባ ማሻን ዎ ይሴድኖ፤ ባረንታ እጽያ ኡባ ቦላንካ ባረንቱ ኮዮዋ ኦድኖ። 
\v 6 ዋና ካታማ ግዴዳ ሱሳ ካቲ ደኢያሳ ጻላላን እቼሹ ጼቱ አሳ ዎ ይሴድኖ። 
\v 7-10 ኡንቱንቱ ቃይ ፓርሻንዳታ፥ ዳልፎና፥ አስፓታ፥ ፖራታ፥ አዳልያ፥ አሪዳታ፥ ፓርማሽታ፥ አሪሳያ፥ አሪዳያነ ዋይዛታ ጌተትያ፥ ሀማዳታ ናኣ አይሁዳቱ ሞርክያ ሀማና ናና ታሙዋካ ዎድኖ። ሽን ኡንቱንቱ ኡንቱንቱ አቁዋ ቦንቂበይክኖ።
\p
\v 11 አይሁዳቱ ሱሳ ካታማን ካቲ ደእያ ሳኣን ዎዳ አሳ ፓይዱ አፑነንቶ ሄ ጋላስካ ካትያዉ ኦደቴዳ። 
\v 12 ያትና፥ ካቲ ካታቶ አስቴሮ ሀዋዳን ያጌዳ፤ “አይሁዳቱ ዋና ካታማ ግዴዳ ሱሳ ካቲ ደኢያሳ ጻላላን እቼሹ ጼቱ አሳነ ሃማና ናና ታሙዋ ዎ ይሴድኖ። ሄዌ ሄዋ ግዶፐ፥ ካትያ ቢታቱነ ሀራቱዋን ኡንቱንቱ ዎዳዋንቱ አፑና ግዳንድኖሻ! ቃይ ሀእ ኔን ዎስያባይ አዬ? ታን ነዉ እማና። ኔን ታና ኦችያባይ ሀራባይ አዬ? ታን ነዉ ፖላና” ያጌዳ።
\p
\v 13 አስትራ ዛራደ፥ “ካትያ ሀ ቆፋይ ናሸቾፐ፥ ሱሳን ደእያ አይሁዳቱ ሀቼ ኦዳዋዳን ዎንትካ ኦኖ። ቃይ ሃማና ናና ታማቱዋ አሃካ ኮጫ ቦላን ካቃናዳን አዛዛ” ያጋዱ።
\p
\v 14 ሄዋፐ ጉየ ካቲ ሄዋ ኦናዳን አዛዜዳ፤ አዋዩካ ሱሳን ላኤንዋ እመትና፥ ሃማና ናና ታማቱዋ አሃይ ኮጫ ቦላን ካቀቴዳ። 
\v 15 አዳረ ጌተትያ አግናን ታማነ ኦይደን ጋላሳን፥ ሱሳ ደእያ አይሁዳቱ ቃይካ እትፐ ሺቂደ፥ ሀራ ሄዙ ጼቱ አሳ ዎድኖ፤ ሽን ሀእካ ኡንቱንቱ ኡንቱንቱ አቁዋ ቦንቂበይክኖ።
\p
\v 16 ሄ ዎደ ካትያ ካዉተ ጋርሳን ደእያ ቢታቱነ ሀራቱዋን ደእያ አይሁዳቱካ እትፐ ሺቂደ፥ ባረንቱ ሞርከቱዋ ኡባ ኦለቲደ ተኤድኖ። ኡንቱንቱ ኡባና 75,000 አሳ ዎዳዋፐ ጉይያን፥ ባረንቱ ሞርከቱዋፐ ሸምፔድኖ። ሽን ኡንቱንቱ አቁዋ ቦንቂበይክኖ። 
\v 17 ሀዌ ኡባይ ሀኔዳዌ አዳረ ግያ አግናን ታማነ ሄዘን ጋላሳና፤ ታማነ ኦይደን ጋላሳን ኡንቱንቱ ሸምፒደ፥ ባላ ሚደ፥ ኡሺደነ ናሸቲደ ፔሽያ ጋላሳ ኦድኖ።
\p
\v 18 ሽን ሱሳን ደእያ አይሁዳቱ ታማነ ሄዘንነ ታማነ ኦይደን ጋላሳቱዋን ዎ ፔሺደ፥ ታማነ እቼሻን ጋላሳን ሸምፔድኖ። ሄ ጋላሳ ኡንቱንቱካ ባላ ሚደ፥ ኡሺደነ ናሸቲደ ፔሽያ ጋላሳ ኦድኖ።
\p
\v 19 ሄዋ ድራዉ፥ ቄር ቄር ካታማቱዋን ደእያ አይሁዳቱ ሀቼ ጋካናዉካ አዳረ ጌተትያ አግናን ታማነ ኦይደን ጋላሳ ባላ ጋላሳ ኦደ ቦንቺኖ። ሄ ጋላሳን ሚኖነ ኡሺኖ፤ ቃይ እቱ እቶ ቁማ እሞታ እሚኖ።
\s1 ፑሪማ ባላ
\p
\v 20 ማርዶክዮስ ሀ ሀኔዳ ኡባ ታርክያ ጻፊደ ዳብዳቢያ ካትያ አርጸክሲሳ ቢታቱዋን ኡባን፥ ሃኩዋን ማታን፥ ደእያ አይሁዳ ኡባዉ ኪቴዳ። 
\v 21 ሄ ዳብዳቢያን ማርዶክዮስ አዳረ አግናን ታማነ ኦይደንነ ታማነ እቼሻን ጋላሳቱዋ፥ አይሁዳቱ ላይን ላይን ባላ ኦደ ቦንቻና ማላ፥ ኡንቱንቶ ኦዴዳ። 
\v 22 አያዉ ጎፐ፥ ሄ ጋላሳቱ አይሁዳቱ ባረንቱ ሞርከቱዋፐ ሸምፑዋ ደሜዳ ጋላሳቱዋ፤ ቃይ ሄ አግናይካ ኡንቱንቱ ካዩነ ዬኩ ናሸቻዉነ ባላ ሙሳዉ ላመቴዳ አግና። ሄዋ ድራዉ፥ ኡንቱንቱ ሙሳንነ ኡሻን ናሸቲደ፥ እቱ እቶ ቁማ ህዬሳቶ እሞታ እሚደ ቦንቻና ማላ፥ ኡንቱንቶ ኦደቴዳ።
\p
\v 23 አይሁዳቱ ማርዶክዮስ እሜዳ አዛዙዋ አኪደ፥ ኡንቱንቱ ቦንቻናዉ ዶሜዳ ባላ ላይን ላይን አገናን ቦንቻናዉ ማዬድኖ። 
\v 24 ጋሱነካ አጋጋ ዛሪ ሀማዳታ ናአይ ሃማን፥ አይሁዳቱ ኡባቱዋ ሞርኪ፥ ኡንቱንታ ይሳናዉ ካሰ ማቀቴዳ፤ ኡንቱንታ ዉርስ ዎያ አግናነ ጋላሳ ኤራናዉ ፑሪማ ግያ ሳማ የግሴዳ።\x - \xo 9:24 \xo*\xt አስ. 3:7\xt*\x* 
\v 25 ሽን አስትራ ካትያኮ ገሌዳዋፐ ጉይያን፥ ሃማን አይሁዳቱ ቦላ ማቀቴዳ ኢታ ማቁ ኡባይ ጉየ ስሚደ፥ አ ቦላ ፖለታናዳን ካቲ ጻፉዋን አዛዜዳ። ያትና፥ ሃማንነ አ ናናይ ታሙ ኮጫን ካቀቴድኖ። 
\v 26 ሄዋ ድራዉ፥ ሀ ላኡ ጋላሳቱ ፑሪማ ጌተትያ ሳማ ባላ ጌተቲኖ። ሀ ዳብዳቢያን ኡንቱንቶ ጻፈቴዳዋ ኡባ ጋሱዋን፥ ኡንቱንቱ ባረንቱ አይፍያን በኤዳዋ ጋሱዋንነ ኡንቱንቱ ቦላን ጋኬዳዋ ጋሱዋን 
\v 27 አይሁዳቱ ባረንቶ፥ ባረንቱ ዛረቶነ አይሁዳ ግዳናዉ ኮይያ ኡባዉ፥ ሀ ባላ ቦንችያዋ ዎጋ ኦድኖ። ሄዌካ ላይን ላይን አገናን ሀ ላኡ ጋላሳቱዋ ቦንቻናሳ። 
\v 28 ቃይ፥ ሀ ካዉተ ጋድያን ኡባንነ ካታማቱዋን ኡባን ደእያ አይሁዳቱ ጎልያ አሳይ ኡባይነ ያና የለታ ኡባይ ሀ ፑሪማ ባላ ሀሳያናዉ በስያዌ ቃሸቴዳ። ሄዋ ቦላንካ፥ አይሁዳቱ አዉደ ግዶፐነ፥ ሀ ፑሪማ ጋላሳቱዋ ቦንቻናዉነ ሄ ጋላሳቱዋን ሀኔዳባይ ኡንቱንቱ ዛርያንካ ዶገተናን አጋናዉ በሰ።
\p
\v 29 ሄዋፐ ጉይያን፥ አብሀይላ ናታ፥ ካታታ አስትራነ አይሁዳይ ማርዶክዮስ ፑሪማ ባላ ጼልያዋን ካሰ ጻፌዳ ዳብዳቢያ ምንናዉ ሀዋ ላኤን ዳብዳቢያ ኩመን ማታን ጻፌድኖ። 
\v 30 ሄ ዳብዳበቱ አርጸክሲሳ ካዉተን፥ ጼታነ ላታማነ ላፑን ጋድያን ደእያ አይሁዳቶ ኡባዉ ሳሩነ ዎፓይ ግዶ ግያ ሳሮታና ጻፈቲደ ኪተቴድኖ። 
\v 31 ቃይ ኡንቱንቱ ካሰ ጾማናዉነ ካዮታናዉ ዎጋ ከሴዳዋዳን፥ ሀእ ኡንቱንታ ግድና፥ ስንፐ ይያ ኡንቱንቱ ዘረ ግድና፥ ሀ ፑሪማ ጋላሳቱዋ ላይን ላይን ዎጋ ኦደ ቦንቻና ማላ፥ ሄ ዳብዳበቱ ቆንጭሲኖ። ሄዌ አይሁዳይ ማርዶክዮስነ ካታታ አስትራነ ላኡ ከሴዳ አዛዙዋ። 
\v 32 ካታት አስትር አዛዙ ፑሪማ ባላ ዎጋ ምንሴዳ፤ እካ ማጻፋን ጻፈቴዳ።
\c 10
\s1 ካትያ አርጸክስሳነ ማርድክዮሳ ግታተ
\p
\v 1 ካቲ አርጸክስስ ባረ ካዉተ ግዶን ሀ ጋጻፐ ህን ጋጻይ ጋካናዉ ደእያ አሳይ ኡባይ ጊራ ጭጋና ማላ፥ ዎልቃን አዛዜዳ። 
\v 2 እ ኦዳ ዎልቃማነ ማላልስያ ኦሶቱ ኡባይ፥ ቃይ ማርዶክዮሳካ ቁ ኦደ፥ ዎት ቦንቼደንቶ ቆንጭስያ ታርኪ ሜዶናነ ፓርሰ ካዉተ ታርክያ ማጻፋን ጻፈቴዳ። 
\v 3 ማታ ባጋን ግዶፐ፥ ካትያ አርጸክሲሳ እታ ጊና፥ ማርዶክዮስ ላኤንዋ። ቃይ እ አይሁዳቱዋንካ ሎይ ቦንቼቴዳነ ዶሰቴዳ አሳ፤ አያዉ ጎፐ፥ እ ባረ አሳ ግዴዳ አይሁዳቱ፥ ሳሮተንነ ህርግ ባይናን ደአና ማላ፥ ሎይ ዳቡሬዳ አሳ።