\id ECC - Dawuro Full Bible Ethiopic Version
\ide UTF-8
\h ኤራንቻ
\toc1 ኤራንቻ ማጻፋ
\toc2 ኤራንቻ
\toc3 ኤራ.
\mt1 ኤራንቻ ማጻፋ
\imt ገሉዋ
\ip “ኤራንቻ ማጻፋ” ግዶን ጻፈቲደ ቤትያዋንቱ፥ አሳ ደኡ ቃን ግድያዋ ጻላላ ግደናን፥ ዳቡራይ፥ ሻቢርሳይ፥ ፕርዳ ጌላተይነ አርጋጫይ ኩሜዳዋ ግድያዋ ኤሪደ፥ “አሳ ደኡ መላ” ያጊደ ቃቼዳ እት ኤራንቻ ቆፋቱዋ። ሀ ኤራንቻይ አሳ ደኡዋ ዉርሰ ጋካናዉ ናግያ፥ ጾሳ ኦሱ አየንቶ ኤራናዉ አዉ እጸቴዳ። ግዶፐነ አሳይ ባረ ደኤዳ ላይ ኡባንነ ባረዉ ዳንዳየቴዳ ኬሻ ኡባን፥ ምኒደ ኦናዌነ ጾሳይ እሜዳባቱዋን ናሸታናዋ ኮሽያዋ ዞሬ።
\ip ኤራንቻ ቆፋቱዋፐ ዳርያ ባጋቱ እቱ እቱዋና ጋከተና ጼላቱ ደእያዋንታነ ህዶታ ቃንጽያ ሀኖታቱ ደእያዋንታ። ግዶፐነ ሀ ማጻፋይ ጌሻ ማጻፋ ግዶ ገሌዳዌ፥ ጌሻ ማጻፋ ቦላ ኤቄዳ አማኑ ሀራይ አትና፥ ሀ እቱ እቱዋና ጋከተና ቆፋነ ስ ኩሜዳ ማጻፋ ባረ ጎምፓን ኦይቂያ ኬሻ አኮ ግድያዋ በሴ። ሀዌ ሀ ኤራንቻ ማጻፋይ አሳ ደኡዋ ማስቶትያዳን በስያ ድራዉ፥ ዳሮ አሳቱ ሀ ማጻፋፐ ምንዋ ደሜድኖ። ሄዋዳንካ ሀ ቆፋቱዋ ኦይቄዳ ጌሻ ማጻፋይ፥ እን እካ፥ ደኦ ዎልቃማ ብለ እምያ ጾሳን ህዶታ ኦናዳን ዞርያዋ አኬኬድኖ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ደኡዋ ብለ \ior 1:1—2:26\ior*
\io1 ደኡዋባዉ ጌተቴዳ ሃሳያቱዋ \ior 3:1—11:8\ior*
\io1 ዞርያ ኡባ ዪቻ \ior 11:9—12:8\ior*
\io1 ጾሳ ቦንቹሳነ አዛዘቱሳ \ior 12:9-14\ior*
\c 1
\ms ደኡዋ ብለ
\mr (1:1—2:26)
\s1 ኡባባይካ ሀዳ
\p
\v 1 ሀዌ፥ ዳዊታ ናኣ፥ የሩሳላመን ካተቴዳ ኤራንቻ ቃላ። 
\v 2 ሄ ኤራንቻይ፥ “ኡባባይካ መላ፤ ቃይ ኡባባይካ ሀዳፐ አዳ መላ፤ ኡባባይካ ኡባና መላ” ያጌዳ። 
\v 3 ባረ ደእያ ሳን ኡባን፥ አሳይ ዳቡሪደ ኦያዋን ኡባን አዉ ዎ አዬ? 
\v 4 እት የለታይ አያ ዎደ፥ ሀራ የለታይ ሳኣ ኦይቄ። ሽን ሀ ቢታይ መናዉካ ላመተናን ደኤ። 
\v 5 አዋይ ዶሌነ ዉሌ፤ ቃይ ላኤንዋካ ዶላናዉ ያ ዶሊያ ሳኣኮ ኤሌሌ። 
\v 6 ጫርኩ እት ገደ ገድሳ እት ገደ ሁጲሳ ጫርኬ፤ ቃይ ዩይ ዩይ አደ፥ ስመረቲደ ዬ። 
\v 7 ጎግያ ሃይ ኡባይ አባን ገሌ፤ ሽን አባይ ኩም ኤረና። ሄ ሃይ ቃይካ ስሚደ ጎጋናዉ፥ ጉየ ባረ ፑልትያ ሳኣ ቤ። 
\v 8 ኡባባይካ ሳለያባ። እ ዎይሳ ኬናዉ ሳለንቶካ ኦድ ዉርሳናዉ ዳንዳየተና። አይፊ ጼሊደ፥ ካል ኤረና፤ ሀይይካ ስሲደ፥ ታዉ ግዴዳ ግ ኤረና። 
\v 9 ካሰ ሀኔዳዌ ስንናዉካ ስሚደ እ ሀናና፤ ቃይ ሀእ ሀኒደ ደእያባይካ ካሰ ሀኔዳዋ። ሄዋ ድራዉ፥ ሳሉዋ ጉፋንን ኦራባ ግያዌ አያይነ ባዋ። 
\v 10 ኦንነ፥ “በእተ! ሀዌ ኦራባ” ጎፐ፥ ሄዌ ኦራ ግደና፤ ሄዌ ኑን የለታናፐ ካሰ ባጋን ሀኔዳዋ። 
\v 11 ካሰ አዳ ዎደቱዋን ሀኔዳባቱዋ ዛሪደ ሀሳይያዌ ባዋ፤ ጉየፐ ሀናናባቱዋካ ኡንቱንቱፐ ጉይያን ኦንነ ሀሳየና።
\s1 አዳ ኤራተይ አለና
\p
\v 12 ታን ኤራንቻይ፥ የሩሳላመን እስራኤልያዉ ካተ ግዳደ ደኣድ። 
\v 13 ታን ቢታን ሳኣን ደእያዋ ኡባ ቆራ ቆራደ ኤራናዉነ አዳ ኤራተን ፕልጋ ጼላናዉ ታ ቆፋ ቃቻድ። ያታደ አሳ ኡባዉ ጾሳይ እሜዳ ደኡ ሎይ ዳቡርስያባነ ናሸችያባ ግድያዋ አኬካድ። 
\v 14 ሳሉዋፐ ጋርሳ ባጋን ሀኔዳዋ ኡባ ታን በኣድ፤ ሽን ኡባባይካ መላ፤ ጫርኩዋ ኦይቃናዉ የደርስያዋ ማላ።
\p
\v 15 ጌላይ ስታናዉ ዳንዳየና፤ ቃይ ባይናባካ ፓይዳናዉ ዳንዳየተና።
\p
\v 16 ታን ዎን ታ ዎዛናን ሀዋዳን ያጋደ ቆፓድ፤ “ታፐ ካሰ የሩሳላመ ሞዴዳ ኡባቱዋፐ ታን ዎልቃማነ አዳ ኤራንቻ ግዳድ። ጭንጫተነ ኤራ ግያዌ እ አየንቶ ፓጫደ ኤራድ” ያጋድ።\x - \xo 1:16 \xo*\xt 1 ካታ. 4:29-31\xt*\x* 
\v 17 ቃይ ታን አዳ ኤራተፐ፥ ጎሻፐነ ኤያተፐ ግዱዋን ደእያ ዱማተይ አየንቶ ኤራናዉ ሎይ ዳቡራድ። ሽን ዉርሰን ሄዌካ ጫርኩዋ ኦይቃናዉ የደርስያባ ማላ መላ ግድያዋ ኤራድ። 
\v 18 አዳ ኤራተይ ዳርያ ዎደ ካዮዪያባይ ዳሬ፤ ኤራይ ዳርያ ዎደካ ቃይ መቱ ዳሬ።
\c 2
\s1 ባረና ናሸችያዌካ ሀዳ
\p
\v 1 ታን ታ ዎዛናን፥ “አነ ታዉ ዎልቃማ ናሸቻ እምያዌ አየንቶ፥ ቃይ ደእያ ደኡዋ ግዶንካ ሎኦባይ አየንቶ በአና” ያጋደ ቆፓድ፤ ሽን ሄዌካ መላ። 
\v 2 ኡባ ገደ ሚጭያዌ ኤያተ ግድያዋ፥ ቃይ ዳሮ ናሸቻይካ አይነ ጎኤናባ ግድያዋ አኬካድ። 
\v 3 ሄዌ ሄዋ ግድ ኡት ደእሽን፥ አዳ ኤራተ ደማናዉ አሞታደ፥ ታ ዎዛና ዎይንያ ኤሳን ናሸቻደ፥ ሄዋ ሱጋናዉ ኤያተን ቆፋ ቃቻድ። ቃይ አሳይ ሀ ሳኣ ቦላ ባረዉ ደእያ ቃን ዎድያ አያ፥ ኡባፐ አያ ሎኦ ኦጊካ ሀዋ ጋደ ቆፓድ።
\p
\v 4 ቃይ ሀራ እት ዎልቃማባ ኦድ፤ ታዉ ደእያ ኬቱዋ ኬጻድ፤ ዎይንያ ቱራካ ቶካድ።\x - \xo 2:4-8 \xo*\xt 1 ካታ. 10:23-27፤ 2 ኦዱዋ 9:22-27\xt*\x* 
\v 5 ዱማ ዱማ አታክልትያነ አይፍያ አይፍያ ምቱዋ ቶክያ ሳኣነ አሳይ ሸምፕያ ሳኣ ጋናትያዳን ሎይደ ጊግሳድ። ሄ ሳኣን ዱማ ዱማ አይፍያ አይፍያ ምቱዋካ ቶካደ፥ ድቻድ። 
\v 6 ሄ ድጭያ ምቱዋ ኡሻናዉ፥ ሃ ዳጋይያ ሳኣ ዜራደ ጊግሳድ። 
\v 7 አቱማነ ማጫ አይለቱዋ ሻማድ፤ ቃይ ታ ሶን የለቴዳ ሀራ አይለቱካ ታዉ ደኢኖ። ታፐ ካሰ የሩሳላመን ደኤዳ ኦዋፐነ ዳርያ መህያ፥ ዴሻነ ዶርሳ ዉድያ ሃራድ።\x - \xo 2:7 \xo*\xt 1 ካታ. 4:23\xt*\x* 
\v 8 ታን ሞድያ ዱማ ዱማ ቢታቱዋፐ ቦንቼቴዳ ካተ ጎልያ ዱረታ አይሳደ፥ ዳሮ ዎርቃነ ብራ ታዉ ዳጋያድ። ቃይ፥ ታና ሳቢደ የጽያ አቱማነ ማጫ የንቻቱዋ ቃጻራድ፤ ሄዋ ቦላካ፥ አሳዉ ናሸቻ እምያ ሎይ ዳሮ ማጫ አሳካ ሺሻድ።\x - \xo 2:8 \xo*\xt 1 ካታ. 10:10፣ 14-22\xt*\x*
\p
\v 9 ሄዋ ድራዉ፥ ታን ታፐ ካሰ የሩሳላመን ደኤዳ ኦፐነ አዳ ዎልቃማ አሳ ግዳድ። ታ አዳ ኤራተይካ ታናና ዉርሰይ ጋካናዉ ደኤዳ።\x - \xo 2:9 \xo*\xt 1 ኦዱዋ 29:25\xt*\x* 
\v 10 ታ አይፊ ጼሌዳባነ ታ ዎዛናይ አሞቴዳባ ኡባ ደማድ፤ ታ አሳተይ ኮይያ ናሸቻ ኡባካ ድጋበይከ። ታን ኦዳ ኦሱዋ ኡባን ናሸታይ፤ ታ ዳቡራዉ ዎካ ሄዋ። 
\v 11 ግዶ ሽን፥ ሄዋ ኡባ ኦ ስማደ ታን አኬክያ ዎደ፥ ሎይ ታን አዉ ዳቡሬዳዌ ኡባይካ መላ ግድያዋ በኣድ። ሳሉዋ ጉፋንን ጎእያዌ አያይነ ባዋ፤ ኡባይካ ጫርኩዋ ኦይቃናዉ የደርስያባ ማላ።
\s1 ኤራንቻይ ባረ ደኡዋፐ ደሜዳ ኤራ
\p
\v 12 ሄዋፐ ጉይያን፥ ታን አዳ ኤራተይ፥ ኤያተይነ ጎሻይ አየንቶ ፓጫደ ኤራናዉ ቆፋ ዶማድ። ካትያ ኮታን ካተትያ ሀራ ካቲ ካሰ ኦሰቴዳዋፐ አያ ሀራባ አይ ኦኔ? 
\v 13 ታን ሀዋዳን ያጋድ፤ “ቱሙካ ፖኡ ማፐ ኬክያዋዳን፥ አዳ ኤራተይ ኤያተፐ ኬኬ። 
\v 14 ጭንጫ አሳቱ ባረንቱ ደንድያ ሳኣነ ቢደ ጋክያ ሳኣ ኤሪኖ፤ ሽን ኤያቱ ሄዋ ኡባ ኤርክኖ” ያጋድ። ግዶፐ አትና፥ ኡንቱንቱ ላኡዋ ዉርሰይካ እቱዋ።
\p
\v 15 ታን ታ ዎዛናን፥ “ኤያ ጋክያ ካጫይ ታናካ ጋኬ፤ ያትና፥ ታን አዳ ኤራንቻ ግድያዌ ታና አያ ማዲ?” ያጋደ ቆፓድ። ቃይ ታን ታ ዎዛናን፥ “ሀዌ ኡባባይካ መላ!” ያጋድ። 
\v 16 አያዉ ጎፐ፥ ኤይና አዳ ኤራንቻ ግድና፥ ሀይቁዋፐ ሄፍንን ስሚደ፥ አ ሀሳይያዌ ባዋ፤ ስንፐ ይያ ላይቱዋን ኑን ኡባይካ ዶገት አታና። ኤያይ ሀይቂያዋዳን፥ አዳ ኤራንቻይካ ሀይቄ።
\s1 ኦ ዳቡርያዌካ ሀዳ
\p
\v 17 መቱዋፐ አትና፥ ጎእያዌ ባይና ድራዉ፥ ሀ ሳኣ ደኡ ታና ኢቴዳ። ሄዌካ መላ፤ ጫርኩዋ ኦይቃናዉ የደርስያባ ማላ። 
\v 18 ሳሉዋ ጉፋንን ታን ሎይ ዳቡራደ ደሜዳ ታ ማጹዋ ኡባ ታፐ ጉይያን ይያ ኡራዉ የጋደ ብያ ድራዉ፥ ታን ዳቡሬዳዌ ኡባይ ታና ኢቴዳ። 
\v 19 ታፐ ጉይያን ይያ ብታኒ አዳ ኤራንቼንቶ ኤየንቶ ኦን ኤሪ? ሽን እ ኦና ግድናካ፥ ታን ሎይ ዳቡሬዳዋነ ታ ጭንጫተን ታን ደሜዳዋ ኡባ ባረዉ አኪደ፥ ጎዳ ግዳናዋ፤ ያቶፐ፥ ሄዌካ መላ።
\p
\v 20 ሄዋ ድራዉ፥ ሳሉዋ ጉፋንን ሀዋ ኬሻ አያዉ ዳቡራድታሻ ጋደ ታ ዎዛናን ካዮታድ። 
\v 21 አስ ባረ ደኤዳ ላይን ባረዉ ደኤዳ አዳ ኤራተን፥ ኤራንነ ሂላን ዳቡሪደ ደሜዳዋ ኡባ አይነ ዳቡርቤናዎ የጊደ ቤ። ሄዌካ ቃይ፥ ሀዳነ ልከ ግደናዋ። 
\v 22 ያትና፥ ሳሉዋ ጉፋንን አሳይ ሎይ ዳቡሪደ ኦዳዋፐ ኡባፐ አያ ጎኣ ደሜዴ? 
\v 23 እ ባረ ደኡዋ ላይን ዳቡርያ ዳቡራይ ኡባይ ካዮቶፐነ ካዮፐ ሀራባ አይነ አዉ ጉጀና፤ ሀራይ አቶ ቃማካ አ ሁጲ ቆፋፐ ሸምፐና፤ ግዶ ሽን፥ ሄ ኡባይካ መላ።\x - \xo 2:23 \xo*\xt ኢዮባ 5:7፤ 14:1\xt*\x*
\p
\v 24 ሄዋ ድራዉ፥ አሳዉ ጎኣ ግድያዌ አዬ ጎፐ፥ አሳይ ባረ ዳቡሬዳባፐ ሚድነ ኡሺደ ናሸትያዋ። ሄ ናሸቻይካ ቃይ ጾሳ ኩሽያፐ እመቴዳዋ ግድያዋ ታን አኬካድ።\x - \xo 2:24 \xo*\xt ኤራ. 3:13፤ 5:18፤ 9:7፤ ሉቃሳ 12:19፤ 1 ቆሮ. 15:32\xt*\x* 
\v 25 አያዉ ጎፐ፥ አ ሸነ ግዳናዋ ዮፐ፥ ምን ኡሽናካ አሳዉ ናሸቻይ ሀቃን ቤቲ? 
\v 26 ጾሳ ናሸችያ ኡራዉ ጾሳይ ጭንጫተ፥ ኤራተነ ናሸቻ እሜ፤ ናጋራንቻዉ ማታ እ ዳቡሪደ ሺሻናዳን፥ ዳቡራ እሜ፤ ሽን እ ሺሼዳዋ ጾሳይ አኪደ፥ ባረዉ ያይያዎ ሀራዉ እሜ። ሄዋ ድራዉ፥ ሀ ኡባይካ ሀዳነ ጫርኩዋ ኦይቃናዉ የደርስያባ ማላ።\x - \xo 2:26 \xo*\xt ኢዮባ 32:8፤ ሌም. 2:6\xt*\x*
\c 3
\ms ደኡዋባዉ ጌተቴዳ ሃሳያቱዋ
\mr (3:1—11:8)
\s1 ኡባባዉካ ዎዲ ደኤ
\q1
\v 1 ኡባባዉ ዎዲ ደኤ፤
\q2 ሳሉዋፐ ጋርሳ ባጋና ኦሰትያባዉ ኡባዉ፥
\q3 አ ላይይ ላይይ ደኤ።
\q1
\v 2 ሄዋ ድራዉ፥ የለታናዉ ዎዲ ደኤ፤
\q2 ሀይቃናዉካ ዎዲ ደኤ።
\q1 ቶካናዉ ዎዲ ደኤ፤
\q2 ቶኬዳዋ ሾዳናዉካ ዎዲ ደኤ።
\q1
\v 3 ዎናዉ ዎዲ ደኤ፤
\q2 ፓናዉካ ዎዲ ደኤ።
\q1 ኮላናዉ ዎዲ ደኤ፤
\q2 ቃይ ኬጻናዉካ ዎዲ ደኤ።
\q1
\v 4 ዬካናዉ ዎዲ ደኤ፤
\q2 ሚጫናዉካ ዎዲ ደኤ።
\q1 ካዮታናዉ ዎዲ ደኤ፤
\q2 ቃይ ናሸቲደ የጻናዉካ ዎዲ ደኤ።
\q1
\v 5 ሹቻ ላላናዉ ዎዲ ደኤ፤
\q2 ሹቻ ሺሻናዉካ ዎዲ ደኤ።
\q1 ቆመታናዉ ዎዲ ደኤ፤
\q2 ቃይ ሻከታናዉካ ዎዲ ደኤ።
\q1
\v 6 ኮዪደ ደማናዉ ዎዲ ደኤ፤
\q2 ባይዛናዉካ ዎዲ ደኤ።
\q1 ሺሽ ኦይቃናዉ ዎዲ ደኤ፤
\q2 ላላናዉካ ዎዲ ደኤ።
\q1
\v 7 ፔናዉ ዎዲ ደኤ፤
\q2 ስካናዉካ ዎዲ ደኤ።
\q1 ጮኡ ጋናዉ ዎዲ ደኤ፤
\q2 ቃይ ሃሳያናዉካ ዎዲ ደኤ።
\q1
\v 8 ዶሳናዉ ዎዲ ደኤ፤
\q2 እጻናዉካ ዎዲ ደኤ።
\q1 ኦላዉ ዎዲ ደኤ፤
\q2 ሳሮ ዎዲ ደኤ።
\p
\v 9 ያትና፥ ኦሳንቻይ ባረ ዳቡሬዳ ዳቡራፐ አያ ዎያ ደሜዴ? 
\v 10 ታን ቃይ፥ አሳ ናናቱ ዳቡሪደ ኦና ማላ፥ ጾሳይ እሜዳ ገዲ ሎይ ዴጾ ግድያዋ በኣድ። 
\v 11 ጾሳይ ኡባባ አ ዎድያን ዎድያን ሎይደ ኦዳ። ጾሳይ አሳ ዎዛናን መናተ ኦዳ፤ ሄዋ ግዶፐነ፥ ጾሳይ ኦዳዋ ኡባ ኮይሩዋፐ ዉርሰይ ጋካናዉ፥ አሳይ ዉርሲደ ኤራናዉ ዳንዳየና። 
\v 12 ሄዋ ድራዉ፥ አሳይ ባረ ደኤዳ ላይን ሎእያዋ ኦያዋፐነ፥ ናሸትያዋፐ አያዌ አያይነ ባይናዋ ታን አኬካድ። 
\v 13 ቃይ፥ አሳዉ አዉ አ ዳቡራዉ ዋጋ ግድያዌ ሙሳንነ ኡሻን ባረና ናሸችያዋ፤ ሄዌካ አዉ ጾሳፐ እመቴዳ እሞታ።
\p
\v 14 ጾሳይ ኦዳዌ ኡባይ መናዉ ደእያዋ ግድያዋ ታን ኤራድ፤ እ ኦዳዋ ቦላን ጉጃናዉ ዎይ አፐ ሃ ጉናዉ ዳንዳየተና። ጾሳይ ሄዋ ኦዳዌ፥ አሳይ ባረዉ ያዪደ ቦንቻናሳ። 
\v 15 ሀእ ሀኒደ ደእያባይ ዎይ ስንፐ ሀናናዉ ደእያባይ ኡባይ ካሰ አዳ ዎድያን ሀኔዳዋ፤ አያዉ ጎፐ፥ ጾሳይ ካሰ ሀኔዳዌ ዛር ዛሪደካ ሀናናዳን ኦ።
\s1 ሀ ሳኣን ፕርዳይ ጌላቴዳባ
\p
\v 16 ቃይ ታን፥ ሳሉዋ ጉፋንን ጌሻ ፕርዳ ሳኣን ኢታተይ፥ ጽሎተ ሳንካ ናጋራይ ደእያዋ በኣድ። 
\v 17 ታ ዎዛናን፥ “ጾሳይ ጽሉዋነ ኢታ ላኡዋካ ፕርዳዉ ሺሻና፤ አያዉ ጎፐ፥ ጾሳይ አላለ ኡባዉነ ኦሱዋ ኡባዉ ዎድያ ኬር ዎዳ” ያጋደ ቆፓድ።
\p
\v 18 ቃይ ታን ታ ዎዛናን፥ “አሳይ ዶአቱዋፐ ኬከናዌ ኡንቱንታ በሳናዉ፥ ጾሳይ ኡንቱንታ ፓጬ” ያጋድ። 
\v 19 አያዉ ጎፐ፥ አሳ ግድና፥ ዶአቱዋ ግድናካ፥ ኡንቱንቱ ካጫይ እቱዋ፤ እቱ ሀይቂያዋዳን፥ የንኩካ ሀይቄ። ቃይ ላኡካ እት ጫርኩዋ ሸምፒኖ፤ ሄዋ ድራዉ፥ አሳቱካ ዶአቱዋፐ ኬክክኖ፤ ሄዌካ መላ። 
\v 20 ኡንቱንቱ ላኡካ እት ሳኣ ቢኖ፤ ላኡካ ቢታፐ መቴዳ ድራዉ፥ ቢታዉ ስሚኖ። 
\v 21 ያትና፥ አሳ ሸምፑ ሳሉዋ ፑደ ከስያዋነ ዶአቱዋ ሸምፑ ቢታ ጪማዉ ዱገ ዎያዋ ሻኪደ ኤራናዉ ዳንዳይያዌ ኦኔ? 
\v 22 ሄዋ ድራዉ፥ አሳይ ባረ ኦዳ ኦሱዋን ናሸትያዋፐ ኬክያዌ ሀራባይ አዉ ባይናዋ በኣድ። አያዉ ጎፐ፥ አዉ ደእያ ሎኦ ካጫይ ሄዋ ጻላላ። አስ ሀይቂ ክቾፐ አፐ ጉይያን ሀንያዋ በሳናዉ፥ አ ሀይቁዋፐ ጉየ አሀናዉ ዳንዳይያዌ ኦኔ?
\c 4
\s1 ናቁዋ፥ ዳቡራነ ላግያ ዩሳ
\p
\v 1 ታን ቃይካ፥ ሳሉዋ ጉፋንን አሳይ አሳ አያ ኬሻ ናቂንቶነ ጼላድ። ናቀቴዳዋንቱ ባረንታ ምንያዋ ዪደ ዬኪኖ። ናቂያዋንቶ ዎልቃማ ማታይ ደእያዋፐ አትና፥ ናቀትያዋንታ ማድያዌ ኦንነ ባዋ። 
\v 2 ሄዋ ድራዉ፥ ታን፥ “ሀእ ፓጻ ደእያዋንቱፐ ካሰ ሀይቂ ክቼዳዋንቱ ኬካ” ያጋድ። 
\v 3 ግዶ ሽን፥ ሀ ላኡዋፐካ አደ ቃይ፥ ሙለ የለትቤናዋንቱ ካጫይ ሎአ፤ አያዉ ጎፐ፥ ኡንቱንቱ ሳሉዋ ጉፋንን ኦሰትያ ናቁዋ ሙልያ በእበይክኖ።
\p
\v 4 አሳይ ባረ አሞቴዳባ ደማናዉ ሎይ ዳቡሪደ ኦ፤ ሽን ሄ ዳቡራይ ባረ ላግያ ቦላን ቃናትያ ቆፋፐ ደንዴዳዋና ግድያዋ ታን አኬካድ። ሄዌካ ቃይ መላ፤ ጫርኩዋ ኦይቃናዉ የደርስያባ ማላ። 
\v 5 ባረ ኩሽያ ጻጺደ፥ ኡት አግያ አዛላይ፥ ኮሻን ሀይቄ። 
\v 6 ዳቡራንነ ጫርኩዋ ኦይቃናዉ የደርስያባ ማላ ጃማን ዳቡሪደ ደምያ ላኡ ኩሽያፐ፥ ዎፓን ደምያ እት ኩሽያ ዳሬ።
\p
\v 7 ቃይ ታን፥ ሳሉዋ ጉፋንን መላ ግደዳዋ እት ሀራባካ በኣድ። 
\v 8 ሄዌካ እት ባረካ ዴእያ ብታንያባ፤ አዉ አቱማ ናአይ ዎይ እሽ ባዋ። ሽን እ ዳቡርያ ዳቡራዉ ዛዋይ ባዋ፤ ቃይ ባረዉ ደእያዋን አለና። እ ባረካ ባረና ኦቺደ፥ “እ ታ ሀዋ ኦሲ ዳቡራይታ? ታና ታ ሁጲያ አያዉ ናሸቻ ድጋይታ?” ያጊደ ኦቼዳ። ሄዌካ ቃይ ሀዳባነ ቱጋ ደኡዋ።
\p
\v 9 እቱዋ ግድያዋፐ ላአ ግድያዌ ሎአ፤ አያዉ ጎፐ፥ ኡንቱንቱ ኦሱ እቱዋዋፐ አደ፥ ሎኦ አይፍያ እማናዉ ዳንዳዬ። 
\v 10 ቃይ፥ ላኡዋፐ እቱ ኩንዶፐ እቱ ደን፤ ሽን ባረካ ደእያ ኡራይ ኩንዶፐነ አ ደንያዌ ባይና ድራዉ፥ አዉ አየ አና! 
\v 11 ሜጎ ዎድያን ላኡ እትፐ ግሶፐ ሆኤ፤ ሽን ባረካ ግስያ ኡራ ሀቃፐ ሆአናዉ ዳንዳዪ? 
\v 12 እት አሳይ ባረካ ተአናዉ ዳንዳየና መቱዋ ላኡ አሳቱ እትፐ ኤቀቲደ፥ ተአናዉ ዳንዳዪኖ። ሄዙ ኩን ዶቀቴዳ ዎዶሩካ ኤለ ዱጸና።
\p
\v 13 ሎኦ ዞርያ አከና ጭማ ካትያፐ ህዬሳ ግዶፐነ፥ አዳ ኤራንቻ ያላጋይ ኬካ። 
\v 14 አያዉ ጎፐ፥ እ ሄ ህዬሳ ግድያ ሳኣፐ ደንዲደ፥ ዎይ ቃሾ ጎልያፐ ከሲደ፥ ባረ ቢታን ካተ ግድያ ሳኣ ጋካናዉ ዳንዳዬ። 
\v 15 ሳሉዋ ጉፋንን ደእያነ ሀመትያ አሳ ኡባይ ካትያ ካዉተ አራታ ላትያ ያላጋ ካልያዋ በኣድ። 
\v 16 እት ካቲ ሞድያ አሳይ ፓይዱ ባይና ጮራ ግዳናዉ ዳንዳዬ። ሽን ካዉታፐ እ ክችያ ዎደ፥ እ ኦዳባዉ ኦንነ አ ጋላተና። ሄዋ ድራዉ፥ ሀ ኡባይካ መላ፤ ጫርኩዋ ኦይቃናዉ የደርስያባ ማላ።
\c 5
\s1 ገፋ ገፓናዉ ኤሌሎፓ
\p
\v 1 ጾሳ ጎልያ ገልያ ዎደ፥ ነ ገድያ አኬካደ ታንጋ። ስሳናዉ ማታ ሺቅያዌ፥ ኤያቱ ያርሹዋ ሺሽያዋፐ አ፤ አያዉ ጎፐ፥ ኡንቱንቱ ኢታ ኦሱዋ ኦደ ደእያዋ ኤርክኖ። 
\v 2 ነ ዶናን ሃሳያናዉ፥ ጾሳ ስንንካ ብዳናዉ ኤሌሎፓ። ቃይ እትባ ጾሳዉ እማና ጋደ ነ ዎዛናን ኤሌላደ ገፓ ክቾፓ፤ አያዉ ጎፐ፥ ጾሳይ ሳሉዋን፥ ኔን ቃይ ሀዋን ሳኣን ደኣሳ፤ ሄዋ ድራዉ፥ ነ ሃሳይያ ቃላይ ጉ ግዶ። 
\v 3 ህርጋይ ዳርያ ዎደ፥ ቃማን አኩሙካ ዳሬ፤ ሄዋዳንካ፥ ብደ ዳሩ ኤያተ ቃላ ከሴ። 
\v 4 ጾሳዉ ኔን ገፔዳዋ ፖላናዉ ጋምኦፓ፤ አያዉ ጎፐ፥ ጋምእያ ኤያቱዋን ጾሳይ ናሸተና። ሄዋ ድራዉ፥ ኔን ገፔዳዋ ኡባ ፖላ።\x - \xo 5:4 \xo*\xt ማዝ. 66:13-14\xt*\x* 
\v 5 እትባ ጾሳዉ ገፒደ፥ ፖለናን አግያዋፐ ኮይሮ ገፐናን አግያዌ ሎአ። 
\v 6 ኔና ነ ዶናይ ናጋራን የገናዳን፥ ነ ዶና ዛዋፐ አዳ የዳ ኦፓ፤ ቃይ ጾሳዉ ኦያዎ፥ “ካሰካ ሀዋ ታን አኬከናን ገፓድ” ጎፓ። አያዉ ጎፐ፥ ሄዋ ጾሳይ ሎይ ሀንቀያ ድራዉ፥ ኔን ዳቡራደ ደሜዳዋ፥ ነ ኩሽያ ኦሱዋ ኡባ እ ባረ ሀንቁዋን ቁጪደ ይሳናዉ ዳንዳዬ። 
\v 7 ዳሮ አኩሙዋ አኩመቶፐነ ዎይ ቃይ ዳሮባ ሃሳዮፐነ ሄ ኡባይካ መላ፤ ሄዋ ድራዉ፥ ኔን ሄዋ አጋ አጋደ ጾሳዉ ያያ።
\s1 ደኡዋ ሀዳተ
\p
\v 8 እት ካዉተይ ባረ ቢታን ደእያ ህዬሳቱዋ ናቂሺንነ ፕርዳ ጌላይሽን ኔን በኦፐ፥ ዳርና ማላለቶፓ። እት እት ካፖ አፐ ቦላና ሱንቲደ፥ አ ጼልያ ሀራ ካፑ ደኤ። ቃይ ኡንቱንቱ ላኡዋፐካ ቦላና ሱንቲደ፥ ኡንቱንታ ጼልያ ሀራ ካፓቱካ ደኢኖ። 
\v 9 ሀራይ አትና፥ ካትያ ግዶፐነ፥ ጎሻፐ ቤትያ አይፈቱ ዮፐ፥ ዎፓን ደአናዉ ዳንዳየና።
\p
\v 10 ብራ ዶስያ ኡራዉ ብር ግድ ኤረና፤ ዱረታናዉ ሲቅያ ኡራይካ ሚሻ ካል ኤረና። ሽን ሀ ኡባይካ መላ። 
\v 11 ዱረተይ ዳርያ ዎደ፥ ምያባይካ ሄዋ ኬሻ ዳሬ። ያትና፥ ባረ ማጹዋ ጮ አይፍያን ጼሊደ፥ “ታን ዱረ” ጋናፐ አትና፥ ሀራባ አዉ አያ ማዲ!
\p
\v 12 ኦሱዋ ኦያ አሳይ ጉ ምን፥ ዳሮ ምን፥ ሳሮ ገምእሹዋ ገምእሺደ አቄ፤ ሽን ዱሪ ባረ ዱረተዉ ኡባ ዎደ ኡንኤቲደ ቆፕያ ድራዉ፥ ገምእሹዋ ዪደ ደኤ።
\p
\v 13 ሳሉዋ ጉፋንን ሎይ ካዮይያዋ ሀራባካ ታን በኣድ፤ ኢታ ዎድያን ባረና ማዶ ጊደ፥ አሳይ ባረዉ ደኤዳዋፐ ጉየ ዎደ ዳጋዬ። 
\v 14 ቃይ ሄ ዱረተይ እት ኢታባይ ጋከትና ይ ክቼ። እ ናኣ የሌዳዋ ግዶፐካ፥ ናኣ ላትስያዋና ዪደ፥ መላ አቴ። 
\v 15 አስ ኡባይ ኮይሮ ካሎ የለቴዳዋዳን፥ መላ ኩሽያና ስሚደ ባና። አይ ኬሻ እ ዳቡሪደ ኦፐነ፥ ባረ ዳቡሬዳባፐ አኪደ ብያባይ አያይነ ባዋ።\x - \xo 5:15 \xo*\xt ኢዮባ 1:21፤ ማዝ. 49:17፤ 1 ጽሞ. 6:7\xt*\x*
\p
\v 16 አስ ካሎ የለቲደ፥ ካሎ ጉየ ስምያዌካ ቃይ ሎይ ካዮትያ ኢታባ። አ ዳቡራይ ኡባይ ጫርኩዋ ኡጭያዋዳን መላ ግዶዋፐ ስንን፥ እ ሄዋን አያ ማደቲ? 
\v 17 እ ባረ ላይ ኡባ ማ ደኡዋን፥ ካዩዋን፥ ይሎትያዋን፥ ሀርግያንነ ሀንቁዋን ዉርሴ።
\p
\v 18 ሄዌ ሄዋ ግዶፐነ፥ ታን አኬኬዳ እት ሎኦባይ ደኤ፤ ሄዌካ ሳሉዋ ጉፋንን ጾሳይ አሳይ ደአናዳን እሜዳ ቃን ላይ ግዶን፥ አሳይ ዳቡራፐ ምያዌ፥ ኡሽያዌነ ናሸትያዌ ሎአነ በስያዋ። አያዉ ጎፐ፥ አ ካጫይ ሄዋ። 
\v 19 ጾሳይ አሳዉ ዱረተነ ማጹዋ እምያዌ፥ ባረ ዳቡራ ጋትያ ደሚደ፥ ሚድነ ኡሺደ ናሸታናሳ። ሄዌካ ቃይ ጾሳፐ አዉ እመቴዳ እሞታ። 
\v 20 ጾሳይ አ ዎዛናን ኡባ ዎደ ናሸቻ ኩን ዎያ ድራዉ፥ እ ባረ ደኡዋ ላይባ ዳሮ ቆፐና።
\c 6
\p
\v 1 ሳሉዋ ጉፋንን አሳ ቦላ ጋክያ ሎይ ኢታባ ታን በኣድ። 
\v 2 ጾሳይ አሳዉ ማጹዋ፥ ዱረተነ ቦንቹዋ ኡባ እሜ፤ አዉ ኮሽያባፐ አያነ ፓጭሰና። ሽን፥ አዉ እመቴዳ ማጹነ ዱረተ ኡባን ኬዉ ናሸታና ማላ፥ ኩመን ሸንያ አዉ እመና። ሄዋ ጻላላካ ግደና፤ እ ዳቡሪደ ደሜዳዋን ሀራ ዳቡርቤናዌ ናሸታናዳን ኦ። ሄዌካ ሀዳነ ሎይ ካዮትያ ኢታባ።
\p
\v 3 እት አሳይ ጼቱ ናናቱዋ ጋካናዉ የሊደ፥ አዱሳ ላይ ደኢደ ኤጫናዉ ዳንዳዬ፤ ሽን እ ባረዉ እመቴዳዋን ናሸትያ ካጫይ አዉ ዮፐ፥ ቃይ ዉርሰን ቦንቾ ሞጉዋካ ሞገተናን አቶፐ፥ አፐ ባረ ዳይ ኡሉዋን ሀይቂደ የለቴዳ ቦሻይ ኬካ ጋይ። 
\v 4 አያዉ ጎፐ፥ ሄ ቦሻይ ጮ የለቴዳ፤ ስሚደ ቃይ፥ አ ኦንነ ሀሳየና ማዉ ቤ፤ አ ሱንይካ ሄ ማን ካመቲደ አቴ። 
\v 5 እ አዋ ፖኡዋ በእቤና፤ ደኡዋባይካ አየንቶ ኤርቤና። ህንኮ ብታንያዋፐ አደ ሸምፕያዌ አ። 
\v 6 ሄዋ ድራዉ፥ ናሸቻይ ባይናን ደእሺና፥ ላኡ ሻኡ ላይ ደእያ አሳፐ ሄ ቦሻ ካጫይ ሎአ። አያዉ ጎፐ፥ ዉርሰን ላኡካ እት ሳኣ ቢኖ።
\p
\v 7 አስ ዳቡሪደ ኦያ ኡባይ ባረዉ ምያዋ ደማናሳ፤ ሽን አ ኡሉ አዉደነ ግዳናዋ ግ ኤረና። 
\v 8 ያትና፥ ጭንጫ አሳይ ኤያፐ አያን ኬኪ? ህዬሳይካ ሎይ ጭንጪደ፥ ሀራቱ ስንን ዋን ስመረታነንቶ ኤርያዌ አዉ አያ ማዲ? 
\v 9 አይፍያን በእያዌ አሞትያዋፐ ኬካ። ቃይ ሄዌካ ጫርኩዋ ኦይቃናዉ የደርስያዋ ማላ መላ።
\p
\v 10 ሀንያባይ ኡባይካ ካሰቲደ ኩሸት ኡቴዳ። እት እት አሳይ ዋናናዉ ደእንቶ፥ አዱሳ ዎድያፐ ካሰ ባጋን ኤረት ኡቴዳ፤ ቃይ አይ አሳይነ ባረፐ ምንያዋና ጋዳታናዉ ዳንዳየና። 
\v 11 ሃሳያይ ጮራትያ ዎደ፥ ሀዳባይ ጮራቴ፤ ሄዌ ያትና፥ አሳ አያ ማዲ?
\p
\v 12 ሀዳ ግዲደ፥ ኩዋዳን ጮ አያ ጉ ላይ ባረ አሳይ ዎቲደ አናዉ ኮሽንቶ ኤርያዌ ኦኔ? ቃይካ አሳይ ሀይቂደ ብ ክችና፥ ሳሉዋ ጉፋንን ሀናናዉ ደእያዋ አሳዉ ኦዳናዉ ዳንዳይያዌ ኦኔ?
\c 7
\s1 ደኡዋባ ቆፕያዋ
\p
\v 1 ጋቲ አልኦ ግዴዳ ሎኦ ሽቱዋፐ ሎኦ ሱንይ አ፤ የለትያ ጋላሳፐካ ሀይቂያ ጋላሳይ ሎአ።\x - \xo 7:1 \xo*\xt ሌም. 22:1\xt*\x*
\p
\v 2 ግብራ ጎልያ ብያዋፐ፥ ዬኮ ጎልያ ብያዌ ሎአ፤ አያዉ ጎፐ፥ አሳ ኡባ ዉርሰይ ሀይቆ፤ ፓጻ ደእያ አሳይካ ሄዋ ባረ ዎዛናን ዎናዉ ኮሼ።
\p
\v 3 ሚቻፐ ካዩ ኬካ፤ አያዉ ጎፐ፥ ካዩ ሶምኡዋ ካረጽሶፐካ ዎዛና ፖእሴ።
\p
\v 4 ኡባ ገደ ናሸችያዋ ጻላላ ቆፕያ ኡራይ ደኦፐ፥ ሄ ኡራይ ቦዛ፤ ሽን ጭንጫ አሳይ ሀይቁዋባካ ቆፔ።
\p
\v 5 ኤያቱ ሳቢደ የጽያ የ ስስያዋፐ፥ አዳ ኤራንቻ አሳይ ሴርያ ሴራ ስስያዌ ሎአ።
\p
\v 6 ኤያ ሚቻይ፥ ሱፓ አጉን ታማን የግና ኤጺደ እያዋ ማላ። ሄዌካ ቃይ መላ።
\p
\v 7 ሱገ ኦሱ አዳ ኤራንቻ ቦዛ ከሴ፤ ማጋንጻ አሳፐ አክያዌካ ዎዛና ባይዜ።
\p
\v 8 አይ የዎ ግዶፐነ፥ ዶመፐ ዉርሰይ ኬካ፤ ቃይ ኦቶራንቻ ኡራፐካ ዳንዳያንቻ ኡራይ ኬካ።
\p
\v 9 ሀንቁ አዛላቱ ሀሉዋ ከሳናዉ ጎኤትያ ሚሻ ግድያ ድራዉ፥ ኤለ ሀንቀቶፓ።\x - \xo 7:9 \xo*\xt ያቆባ 1:19\xt*\x*
\p
\v 10 “ሀእ ዎድያፐ ካሰ አዳ ዎዲ አያዉ ኬካ ግዴዴ?” ጋደ ኦቾፓ፤ አያዉ ጎፐ፥ ሄዋ ማላ ኦሻይ አዳ ኤራንቻ ግያ አሳይ ኦችያ ኦሻ ግደና።
\p
\v 11 ሀ ሳኣን አሳይ ኡባይ አዳ ኤራንቻ ግዳናዉ ኮሼ፤ አያዉ ጎፐ፥ አዳ ኤራተ ደምያዌ ማጹዋ ላትያዋፐ ጉጸና። 
\v 12 ሚሻይ አሳ ኢታፐ ካሚደ አሽያዋዳን፥ አዳ ኤራተይካ አሼ። ሽን፥ አዳ ኤራተይ ሚሻፐ ዳርያዌ፥ እ አሳዉ ደኡዋ እማናዉ ዳንዳይያዋና።
\p
\v 13 አነ ጾሳይ ኦዳዋ አኬካ! ጾሳይ ጌላዬዳባ ኦን ሱርሳናዉ ዳንዳዪ? 
\v 14 ነዉ ኡባባይ ጊጌዳ ዎድያን ናሸታ፤ ቃይ መቱ ጋክያ ዎድያንካ አኬካ፤ አያዉ ጎፐ፥ ናሸቻ ግድና፥ መቶ ግድና፥ ጾሳይ የድያ ዎድያን ዬ። ሽን ሀቃዌ ካሰቲደ ያነንቶ፥ ኔን ኤራካ።
\p
\v 15 ሀ መላ ግዴዳ ላይን ታዋን ዳሮባ ታን በኣድ። ሄዌካ፥ ጌላይ ባረ ጌላተ ኦደ፥ አዱሳ ላይ ደእያ ዎደ፥ ጽሎተ ኦያ ጽሉ ቃን ላይን ሀይቄ። 
\v 16 ሄዋ ድራዉ፥ ኔን ኤለ የናዳን፥ ሎይ ዳሮ ጽሉዋ ዎይ ሎይ ዳሮ አዳ ኤራንቻ ግዶፓ። 
\v 17 ቃይ ዎዲ ባይናን ኔን ሀይቀናዳን፥ ኡባ ባላ ኢታነ ግዶፓ፤ ኡባ ሞጆጃ ኤያነ ግዶፓ። 
\v 18 ሀ ኡባንካ ጾሳዉ ያይያ ኡራይ፥ መቶ ኡባፐ ጾኑዋን ከሳናዉ ዳንዳይያ ድራዉ፥ ኔን ዳሮ ኢታ ዎይ ዳሮ ጽሉዋነ ግደናን ግዶ አሳ ግዳ።
\p
\v 19 አዳ ኤራተይ አዳ ኤራንቻቶ እምያ ዎልቃይ ታሙ ካታማቱዋ ሞድያ አሳቶ ዎልቃፐ ዳሬ።
\p
\v 20 ጽሎባ ጻላላ ኦደ፥ ናጋራ ኦና አሳይ ሀ ሳኣ ቦላን ባዋ።
\p
\v 21 አሳይ ሃሳይያ ቃላ ሙልያ ሀይዛደ ፖላና ጎፓ፤ ኔን ሙልያ ሀይዛና ጎፐ፥ ነ ቆማይ ኔና ሸቂሽን፥ ኔን ስሳና። 
\v 22 ቃይ ኔንካ ነ ሁጲያን ሀራቱዋ ሸቄዳዋ ነ ዎዛናይ ኤሬ።
\p
\v 23 ሀዋ ኡባ ታን አዳ ኤራተን ፕልጋደ ጼላድ፤ ያታደ፥ “ታንካ አዳ ኤራንቻ ግዳና” ያጋድ። ሽን ታን ጌዳዋዳን ሀንቤና። 
\v 24 አዳ ኤራተይ ኡባ ገደካ ሃኩዋን ደእያዋነ ጪማባ፤ ያትና፥ አ ቆሪደ ደማናዉ ዳንዳይያዌ ኦኔ? 
\v 25 ታን ኤራናዉ፥ ፕልጋ ጼላናዉነ አዳ ኤራተነ የዉዋ ኡባ ዉርሰ ኤራናዉ፥ ቃይ ናጋራይ ኤያተ ግድያዋነ ኤያተይካ ጎሻ ግድያዋ ኤራናዉ፥ ታ ዎዛናን ዩሻ ዩሻደ ቆፓድ።
\p
\v 26 ታን ሀይቁዋፐ አደ ጫምያ ሀራ እትባ ፕልጋ ጼላደ ደማድ፤ ሄዌካ፥ እዝ ዎዛናይ ጲረ ዎይ እግር ብራታ ግድና፥ እዝ ኩሺ ሳንሳላታ ማላ ግዴዳ እት ማጫ ምሽራትባ። ጾሳ ናሸችያ ኡራይ ኢፐ ከስ አካና፤ ሽን ናጋራንቻ አ ባረ ጲርያ ዋጻደ ኦይቃና።
\p
\v 27 ኤራንቻይ ሀዋዳን ያጌዳ፤ “ታን ካላ ካላደ፥ ፕልጋ ጼላደ፥ ሀራ ደሜዳዌ ሀዋ። 
\v 28 ሄዌካ፥ ታን ሀች ጋካናዉ ኮያደ ደማቤናዋ። ሻኡ አቱማ አሳ ግዶፐ ቦንቹ በስያ እት አሳ ጻላላ ደማድ፤ ሽን ማጫ አሳ ግዶፐ እትኖነ ደማናዉ ዳንዳያበይከ። 
\v 29 ታን ቆራደ ደሜዳ ሀራባይ፥ ጾሳይ አሳ ሱረ ቆፋይ ደእያዋንታ ኦደ መዳ፤ ሽን አሳይ ዳሮ ሂላ ኦግያ ኮዪደ ቤዳ” ያጌዳ።
\c 8
\p
\v 1 አዳ ኤራንቻ አሳ ማላ አሳይ ኦኔ? የዎቱዋ ኡባ ብለ ኤርያዌ ኦኔ? አዳ ኤራተይ ፓሽክሲደ፥ ሜዳ ሶምኡዋ ፖእሴ።
\s1 ካትያዉ አዛዘትያዋ
\p
\v 2 ካትያዉ አዛዘታ፤ አያዉ ጎፐ፥ አዛዘታናዉ ኔን ካሰ ጾሳ ስንን ጫቃ ኡታዳ። 
\v 3 ኡባ ዎደ ኢታ ኦሱዋ ኦፓ፤ አያዉ ጎፐ፥ ካቲ ባረ ኮዬዳዋ ኦናዉ ዳንዳይያ ድራዉ፥ ኔን አ ስንፐ ኤለ ያና። 
\v 4 ኡባባ ኦናዉ ካትያዉ ማታይ ደኤ፤ ያትና፥ “አያዉ ሀዋ ኦዲ?” ያጊደ አ ኦቻናዉ ዳንዳይያዌ ኦኔ? 
\v 5 አ አዛዙዋ ፖልያ ኡራይ ሙረተና፤ አዳ ኤራንቻ አሳይ ልከ ግድያ ዎድያነ ኦያ ኦግያ ኤሬ። 
\v 6 እት አሳ ቦላን ዴጾ መቱ ጋክንቶነ፥ የዉዋ ኡባዉ አዉ አ ዎዲነ አ ኦጊ ኦጊ ደኤ። 
\v 7 ስንፐ ሀናና ትምቢትያ ኤርያዌ ባዋ፤ ሄዋ ድራዉ፥ “ሀዌ ሀናና” ጊደ ኦዳናዉ ዳንዳይያዌ ኦኔ? 
\v 8 ሸምፑ ሻከቲደ ብያ ጋላስ ኦይቂደ፥ ተአናዉ ዳንዳይያ አሳይ ባዋ፤ ዎይ ሀይቁ ባረ ጋላሳን ዬናዳን ድጋናዉ ዳንዳይያ አሳይካ ባዋ። ሄዌ ኦንነ ከስ አካናዉ ዳንዳየና ኦላ። ሄዋ ድራዉ፥ ሀይቁዋ ስንን ኢታተ ኢታ ኦያ ኡራ አሽ አከና።
\s1 ኢታ አሳቱዋነ ኬካ አሳቱዋ ሀኖታ
\p
\v 9 ሳሉዋ ጉፋንን ሀንያዋ ኡባ ታን አኬካደ ቆፕያ ዎደ፥ እት አሳይ ባረዉ ሞድያ ማታ ሀራ አሳ ቆሀናዉ ጎኤትያዋ በኣድ። 
\v 10 ቃይ ኢታ አሳቱ ቦንቹዋን ሞገትሽና በኣድ። ሄዋፐ አያዌካ ቃይ፥ ሞጉዋፐ ስምያ ዎደ፥ ኡንቱንቱ ሄ ኢታተ ኦዳ ካታማ አሳይ ሺቂደ፥ ኡንቱንታ ሳቢሽና ስሳድ። ሄዌ ኡባይካ መላ።
\p
\v 11 አስ ሀልቺደ ኢታባ ኦያ ጋሱ፥ ኢታባ ኦዳ አሳቱዋ ኤለካ ሙርያባይ ባይና ድራሳ። 
\v 12 ናጋራንቻይ ጼቱ ገደ ኢታባ ኦሽና፥ አ ላይይ አዱቆፐካ፥ ጾሳዉ ያይያዋንቶ ሳአይ ሎአናዋ ታን ኤራይ። 
\v 13 ኢታቱ ጾሳ ያየና ድራዉ፥ ሳሮተይ ኡንቱንቶ ባዋ፤ ጾሳዉ ኡንቱንቱ ያየና ድራዉ፥ ኡንቱንቱ ባረካ ኩዋዳን ቃማና። 
\v 14 ሀ ሳኣን ኦሰትያ እት ሀዳባይ ደኤ፤ ሄዌካ፥ ጌሻ አሳቱ ናጋራንቻቶ ይያ ሙሩዋ አክና፥ ናጋራንቻቱ ቃይ፥ ጌሻቶ ይያ ሎኦባ አኪኖ። ሀ ኡባይካ መላ።
\p
\v 15 ሄዋ ድራዉ፥ አሳይ ባረ ደኡዋን ናሸቶፐ ሎአ ጋደ ቆፋ እማይ፤ አያዉ ጎፐ፥ አሳይ ምያዋፐ፥ ኡሽያዋፐነ ባረና ናሸችያዋፐ አዳ ሎኦባይ አዉ ሳሉዋፐ ጋርሳ ባጋና ሀራይ ባዋ። ጾሳይ አዉ እሜዳ ላይን እ ዳቡሪደ ደሜዳዋን ሄዋዳን ኦፐ፥ ናሸታናዉ ዳንዳዬ።
\p
\v 16 ታን አዳ ኤራተይ አየንቶ ኤራናዉነ አሳይ ሀ ሳኣ ቦላን ዳቡርያ ዳቡራ አኬካናዉ ሀልቻድ፤ ዉርሰን አሳይ ገምእሹዋ ዪደ ኦያ ዱጸና ኦሱ ደእያዋ በኣድ። 
\v 17 ሄዋፐ ጉይያን፥ ጾሳይ ኦዳዋ ኡባ በኣድ። ቃይ ሳሉዋፐ ጋርሳ ባጋን ኦሰቴዳ ኦሱዋ አሳይ ፕልጊደ ኤራናዉ ዳንዳየናዋ ኤራድ። አስ አይ ኬሻ ዳቡሪደ ፕልግ ጼሎፐነ፥ አ ብለ ኤራናዉ ዳንዳየና። ቃይ አዳ ኤራንቻ አሳይ፥ “ታን ሀዋ ኤራይ” ጎፐነ፥ እ ኤራናዉ ዳንዳየና።
\c 9
\p
\v 1 ሀ ኡባ የዎቱዋባ አዱሳ ዎድያ ታን ቆፔዳዋፐ ጉይያን፥ አዳ ኤራንቻነ ጽሉዋ ግዴዳ አሳቱነ ኡንቱንቱ ኦሶቱ ጾሳ ኩሽያን ደኢኖ ጋደ ቃቻድ፤ ሽን ሲቁ ናግያ፥ እጹ ናግያ ኦንነ ባረና ናግያዋ ካሰቲደ ኤረና። 
\v 2 ዱማተይ ባይናን ደእሺና፥ ኡባ ጋክያ ካጫይ እቱዋ፤ ጽሉዋ ግድና ማካላንቻ ግድና፥ ሎአ ግድና ኢታ ግድና፥ ጌሻ ግድና ቱና ግድና፥ ያርሹዋ ያርሽያዋ ግድና ያርሸናዋ ግድና፥ ኡንቱንቱ ኡባ ካጫይ እቱዋ። ሎኦ አሳዉ ናጋራንቻዋፐ ኬክያ ካጭ ባዋ፤ ጫቁዋ ጫቃናዉ ያይያዌካ ጫቃናዉ ጻልያዋፐ ዱማተና።
\p
\v 3 አሳ ኡባ ካጫይ እቱዋ ግድያዌ፥ ሀ ሳኣን ደእያ ሀራ ኢታተካ ማላ ዳሮ ኢታ። አስ ደኡዋን ደኤዳ ላይን ኡባን አ ዎዛናይ ኢታተንነ ጎሻን ኩሚደ ደኤ፤ ዉርሰን ሀይቂ አጌ። 
\v 4 ሀይቂዳ ጋሙዋፐ ፓጻ ደእያ ካናይ ኬካ፤ አያዉ ጎፐ፥ ፓጻ ደእያዋንቱና ደእያ አሳዉ ህዶታይ ደኤ።
\p
\v 5 ፓጻ ደእያ አሳቱ እት ገደ ሀይቃናዉ ደእያዋ ኤሪኖ፤ ሽን ሀይቄዳዋንቱ አያነ ኤርክኖ። ኡንቱንቱ ሙለካ ዶገት ክቼዳዋንቱ ግድያ ድራዉ፥ አይነ ማድክኖ። 
\v 6 ኡንቱንቱ ሲቁ፥ እጹነ ቃናቲ ኡባይ ኡንቱንቱና እትፐ ይክቼዳ። ሄዋ ድራዉ፥ ሀዋፐ ህን ባጋን ሳሉዋ ጉፋንን ኦሰትያ የዉዋ ኡባን ኡንቱንቶ መናዉካ ካጭ ባዋ።
\p
\v 7 ባደ፥ ነ ቁማ ናሸቻን ማ፤ ነ ዎይንያ ኤሳካ ነ ዎዛናይ ፓሽክሽና ኡሻ። አያዉ ጎፐ፥ ጾሳይ ሄዋ ነዉ ካሰፐካ እም ዎዳ። 
\v 8 ኡባ ዎደ ነ ማዩ ቦ ግዶ፤ ነ ሁጲያንካ ዛይትያ ኦከታ። 
\v 9 ሳሉዋፐ ጋርሳ ባጋና ጾሳይ ነዉ እሜዳ ሀ መላ ደኡዋን፥ ነ መላ ደኦቱዋ ኡባን ኔን ሲቅያ ነ ማቻትና ናሸታደ ደአ፤ አያዉ ጎፐ፥ ኔን ሳሉዋፐ ጋርሳ ባጋና ዳቡራደ ኦዳዋ ኡባፐ ኔና ጋክያ ሳማይ ሄዋ። 
\v 10 ነ ኩሺ ኦናዉ ደሜዳዋ ኡባ ነ ኩመን ዎልቃን ኦ፤ አያዉ ጎፐ፥ ኔን ባናሳን ዱፉዋን ኦሱ፥ ዎይ ሀልቹ፥ ዎይ ኤራይ፥ ዎይ አዳ ኤራተ ባዋ።
\p
\v 11 ታን ሳሉዋፐ ጋርሳና ሀራባካ በኣድ፤ ሄዌካ፥ ኤሌልያ ዎንቻቱ ኡባ ዎደ ጾንክኖ፤ ዎይ ምኖ ኦላንቻቱካ ኡባ ዎደ ኦላን ጾንክኖ፤ ዎይ አዳ ኤራንቻቱ ኡባ ዎደ ቁማ ደምክኖ፤ ዎይ ጭንጫቱ ኡባ ዎደ ዱረትክኖ፤ ዎይ ታማሬዳ አሳቱ ኡባ ዎደ ሳበትክኖ። ሽን ኡባይካ ካጫይነ ዎዲ ኦዋዳን ሀኔ።
\p
\v 12 ሄዋ ቦላካ ቃይ፥ ስንፐ ያናዉ ደእያ መቶ ዎዲ አዉደ ጋካነንቶ፥ ኤራናዉ ዳንዳይያ አሳይ ባዋ፤ ካፉ ፓሊደ ጲርያን ገልያዋዳን፥ ዎይ ሞሊ ማጋን ኦይቀትያዋዳን፥ አሳይ ኡባይ ቆፐናን ጋክያ ኢታ ዎድያን ኦይቀቴ።
\s1 አዳ ኤራተነ ኤያተ
\p
\v 13 ሳሉዋ ጉፋንዋን ታን በኤዳባይ ሀራባይካ ደኤ፤ ሄዌካ አዳ ኤራተይ ዎልቃማ ሌምሶ ግድያዋ። 
\v 14 እት ቢታን እት ጉ አሳይ ደእያ ቄር ካታማታ ደአዉ፤ ሄ ካታማቶ እት ዎልቃማ ካቲ ኦላናዉ ደንዴ። እዞ ዶዴዳ። 
\v 15 ቃይ፥ እት ህዬሳ ሽን ጭንጫ ግዴዳ ብታኒ፥ ሄ ካታማትን ደኤ፤ እ ባረ አዳ ኤራተን ሄ ካታማ አሼዳ። ሽን፥ ሄ ህዬሳ ብታንያ ዛረደ ሀሳዬዳባይ ባዋ። 
\v 16 ታን፥ “አዳ ኤራተይ ዎልቃፐ ዳሬ” ያጋድ። ግዶ ሽን፥ አዳ ኤራንቻ ግዶፐነ፥ ህዬሳ አሳይ ካቴ፤ እ ሃሳይያዋካ ሀይዝያዌ ባዋ። 
\v 17 ሄዋ ግዶፐካ፥ ደርያ ሞድያዌ አዛላቱዋ ሺቁዋን ዋስያ ዋሱዋ ስስያዋፐ፥ ሌላን ኦደትያ አዳ ኤራንቻ ቃላ ስስያዌ ሎአ። 
\v 18 አዳ ኤራተይ ኦላ ሚሻፐ ሎአ፤ ሽን እት ናጋራንቻ አሳይ ዳሮ ሎኦባ ባይዜ።
\c 10
\p
\v 1 ሀይቄዳ ኡዱንጸቱ ሳዊያ ዛይትያ ሽቱዋ ጽንቀናዉ ዳንዳዪኖ፤ ሄዋዳንካ፥ ጉ ኤያተይ አዳ ኤራተነ ዎልቃማ ቦንቹዋ ባይዜ።
\p
\v 2 አዳ ኤራንቻ አሳ ዎዛናይ አ ኡሸቻዉ ካለ፤ ሽን ቦዛ አሳ ዎዛናይ ሀድርሳዉ ካለ። 
\v 3 ኤያ አሳይ ኦግያን ሀመትያ ዎደካ፥ አዉ አኬክ ባዋ፤ ሄዋፐ ደንዴዳዋን እ ቦዛ ግድያዋ አሳይ ኡባይ ኤሬ።
\p
\v 4 ነ ካፑ ነ ቦላን ሀንቀቶፐነ፥ ነ ሱንቴዳ ሳኣፐ ክቻ ክቾፓ፤ አያዉ ጎፐ፥ ጮኡ ጊደ ዳንዳይያዌ ዎልቃማ ባይዙዋካ አቶ ጊሴ።
\p
\v 5 ሳሉዋ ጉፋንን ታን በኤዳ ሀራ ኢታባይ ደኤ፤ ሄዌካ ደርያ ሞድያዋንቱ ኦያ ናቁዋ። 
\v 6 ኤያቱ ዳሮ ቃ ሱንተ ኦይቂደ ደእያ ዎደ፥ ዱረቱ ህርክ ዝቃ ሳኣን ኡቴድኖ። 
\v 7 ታን፥ አይለቱ ሞድያዋንቱዳን ፓራ ቶጊደ ቢሺናነ ቃይ ሞድያዋንቱ አይለቱዋዳን ገድያን ሀመትሽን በኣድ።
\p
\v 8 ኦላ ቦክያ ኡራይ ሄ ኦላን እ ኩንዳና፤ ቃይ ግምቢያ ድርሳ ኮልያ ኡራ ሾሻይ ዱካና።\x - \xo 10:8 \xo*\xt ማዝ. 7:15፤ ሌም. 26:27\xt*\x* 
\v 9 ሹቻ አ ሳኣፐ አ የግያ ኡራይ ሄ ሹቻን ደሸቴ፤ ቃይ ም ቆእያ ኡራይካ ሄ ምን ደሸቴ።
\p
\v 10 ዱልዱሜዳ ካልታ ፖሸናን ጮ ቆኦፐ፥ ዳሮ ዎልቃ ዉርሴ፤ ሽን አዳ ኤራን ኦያዌ ኦሱዋ ዳርሴ።
\p
\v 11 ሾሻይ ዱክ ድግና፥ ሾሻ ጆልሳናዉ አያንቲያ አያንቱ ሄ ኡራዉ አይነ ማደና።
\p
\v 12 አዳ ኤራንቻ ሃሳያይ አዉ ቦንቹዋ እምሴ፤ ሽን ኤያይ ባረ ዶናፐ ከሴዳ ቃላን እ ባረዉ መቱዋን ገሌ።
\p
\v 13 ኤያይ ባረ ሃሳያ ቦዛ ቃላን ዶሚደ፥ ኢታተንነ ጎሻን ፖሌ።
\p
\v 14 ኤያይ ዳሮባ ሃሳዬ። ግዶፐነ፥ ስንፐ ሀናናዉ ደእያዋ ኦንነ ኤረና። አስ ሀይቂ ክችና፥ ሀናናዉ ደእያዋ አዉ ኦዳናዉ ዳንዳይያዌ ባዋ።
\p
\v 15 ኤያ አሳይ ባረ ኦሱዋን ዳቡሬ፤ እ ባረ ጎለ ብያ ኦግያ ኤረና።
\p
\v 16 ቄር ናኣ ግዴዳ ካዉነ ዎንታ ጉራና ግብራ ጊግሲደ፥ ባረንቶ ምያ ካፓቱ ደእያ ቢታይ ነዉ አየ አና! 
\v 17 ቦንቼቴዳ ካዉነ ማዋሳ ግደናን ዎልቃነ ምኖተ ደማናዉ ማራን ምያነ ኡሽያ ካፓቱ ደእያ ቢታታ ጋላተቴዳኖ።
\p
\v 18 ብታኒ አዛላ ግዶፐ፥ አ ካራይ ዎዴ፤ አ ኩሺ ኦሱዋ ብሎዋል ግዶፐ፥ አ ጎሊ አ።
\p
\v 19 ቁማ ምያዋንነ ዎይንያ ኤሳ ኡሽያዋን ናሸቻይ ቤቴ፤ ሽን ሚሻይ ኡባባ ሻሜ።
\p
\v 20 ስስያዌ ባዋ ጋደ ነ ዎዛና ቆፋን ግዶፐነ፥ ካትያ ቦሮፓ፤ ዎይ ነ ግስያ ክፍልያን ዱርያ ቦሮፓ፤ አያዉ ጎፐ፥ ነ ጌዳዋ ሳሉዋ ካፉ ዎይ፥ ቀፍያና መታቱ ቢደ፥ ኡንቱንቶ ኦዳና።
\c 11
\s1 አዳ ኤራንቻ ኡራይ ኦናዉ በስያዋ
\p
\v 1 ነ ኡክ ሃ ቦላን ኦላ፤ ዳሮ ጋላሳቱዋፐ ጉይያን፥ ኔን ዛረደ አ ደማና። 
\v 2 ነዉ ደእያ ማጹዋ ላፑን ዎይ፥ ኡባ ሆስፑን ሳኣን ሻካደ ዎ፤ አያዉ ጎፐ፥ ስንፐ ሀ ሳኣ ቦላ አይ ኢታባይ ያነንቶ፥ ኔን ኤራካ።
\p
\v 3 ሻሪ ሃን ኩሜዳባ ግዶፐ፥ ቢታ ቦላን እራ ትጌ።
\p ምይ ሁጲሳ ኩንድና ገድሳ ኩንድና፥ ሄ ባረ ኩንዴዳ ሳኣን ደኤ።
\p
\v 4 ጫርኩዋ ሀኖታ ናግያ ኦንነ ካ ዘረና፤ ቃይ ሻሪ ደንዳናዉ ናግያ ኦንነ ባረ ካ ጫከና።
\p
\v 5 ጫርኩ ሀቃና ብንቶ፥ አ ኦግያ ኤራካ፤ ቃይ ናአይ አት ኡሉዋን ዋን መትንቶካ ኤራካ። ሄዋዳንካ፥ ኡባባ መያ ጾሳይ ባረ ኦሱዋ ዎት ኦንቶ፥ ኤራናዉ ዳንዳያካ።
\p
\v 6 ዎንታ ጉራን ግድናካ ኦማርሳን፥ ነ ዘረ ዘርያዋ አጎፓ፤ አያዉ ጎፐ፥ ዎንታዌ ሎአኔ ኦማርሳዌ ሎአኔ ኔን ኤራካ።
\p
\v 7 ፖኡ ናሸችያዋ። አዋ አይፍያ በእያዌካ ሎኦባ። 
\v 8 አስ ሎይ አዱሳ ላይ ሀ ሳኣን ደኦፐ፥ ሄ ኡባ ላይንካ ናሸቶ። ሽን ማ ዎደቱዋ ቆፓ። አያዉ ጎፐ፥ ሄ ዎደቱ አዱቃና። ያናዉ ኡባባይካ መላ።
\s1 ዞርያ ኡባ ዪቻ
\r (ኤራ. 11:9—12:8)
\p
\v 9 ኔኖ ያላጋዉ፥ ያላጋተይ ሎይ ሎኦባ ግድያ ድራዉ፥ ነ ያላጋተ ላይን ናሸታ፤ ነ ዎዛናይካ ናሸቶ። ነ አይፊ ጼሌዳባነ ነ ዎዛናይ አሞቴዳባ ኡባ ፖላ። ሽን፥ ሄ ኔን ኦዳዋ ኡባ ድራዉ፥ ኔና ጾሳይ ፕርዳናዉ ደእያዋ ዶጎፓ።
\p
\v 10 ሄዋ ድራዉ፥ ስም ነ ዎዛናፐ ህርጋ፥ ነ ቦላፐካ ሴላ ድጋ። አያዉ ጎፐ፥ ናአተይነ ያላጋተይ መላ።
\c 12
\p
\v 1 ነ ያላጋተ ላይን ኔና መዳዋ ቆፓ። መትያ ጋላሳቱ ዬናን ደእሺና፥ ኔን፥ “ታና ሀዌ ናሸቼና” ግያ ዎደቱ ጋከናን ደእሽና፥ 
\v 2 አዋይነ ፖኡ፥ አግናይነ ጾልንቲ መናን ደእሺና፥ እራይ ቡክ አናካ ሻሪ ሃ ስመናን ደእሺና፥ ኔና መዳዋ ቆፓ። 
\v 3 አያዉ ጎፐ፥ ሄዌ ጎልያ ናግያዋንቱ ኮኮርያ ዎደ፥ ምኖ አሳይ ቁንያ ዎደ፥ ጋጭያዋንቱ ፓይዱዋን ጉጼዳ ጋሱዋን ጋቻ አግያ ዎደ፥ ቃይ ማስኮትያና ጼልያዋንቱ ጋልጅያ ዎደ ግዳናዋ። 
\v 4 ሄ ዎደ ዎጋ ኦግያኮ ስሜዳ ፐንገቱ ጎርደትያ ዎደ፥ ጋጭያ ዎጻቱዋ ኮሻይ ዝቂ ግያ ዎደ፥ ካፉዋ ዋሱ አሳ ገምእሹዋፐ ቤጎያ ዎደ፥ ሽን፥ የንቻ ማጫ ናናቱዋ የ ኮሻይ ለፕያ ዎደ ግዳናዋ። 
\v 5 ሄ ዎዲ አሳይ ቃ ሳአቱዋ ከሳናዉነ አኮ ኦገቱዋና ሄመታናዉ ያይያ ዎደ፥ ነ ሁጲ ፑሉምያ ዎደ፥ ኔን ኔና ዳንዳያደ ሄመትያዌ ነዉ እጽያ ዎደ፥ አሞይያባይ አግያ ዎደ ግዳናዋ። ሄ ዎዲ አሳይ ባረ መና ጎልያ ብያ ዎደ፥ ዬክያዋንቱካ አኮ ኦግያና ዬኪደ ዩይያ ዎደ ግዳናዋ።
\p
\v 6 ብራ ቃጭናይ ዱጸናን፥ ዎርቃ ከሪካ መኤናን፥ ሃ ኦቱካ ፑልቱዋ ላንቂያን መኤናን፥ ሃ ፑደ ጎችያ ዎዶሩካ ዱጸናን ደእሺና፥ 
\v 7 ቢታይ ካሰ ባረ አከቴዳ ቢታኮ ስመናን፥ ሸምፑካ ባረና እሜዳ ጾሳኮ ስሚደ ቤና ደእሺና፥ ኔና መዳዋ ቆፓ።
\p
\v 8 ኤራንቻይ ኦዲደ፥ “ሀዳ! ሀዳ! ኡባባይካ መላ!” ያጌዳ።
\s1 ጾሳ ቦንቹሳነ አዛዘቱሳ
\r (12:9-14)
\p
\v 9 ኤራንቻዉ አዳ ኤራተይ ደእያ ድራዉ፥ ኤራተ ደርያ አሳ ታማርሴዳ። እ ዳሮ ሌምሳቱዋ ፕልግ ቆሪደ፥ እቱዋ እቱዋ አ ማራን ማራን ዱማዪደ ኦዳ። 
\v 10 ኤራንቻይ ልከ ግዴዳ ቃላ ደማናዉ ኮዬዳ፤ ሄዋ ድራዉ፥ እ ጻፌዳዌ ሱረነ ቱማ።
\p
\v 11 ኤራንቻቱዋ ቃላይ ሄንንቻይ ዉድያ ላግያ ጼራ ሌኦ ጻምኣ ማላ። ቃይ እትፐ ሺሼዳ ሌምሶቱካ ጎምፓ ጋኪደ ገልያ ምስማረቱዋ ማላ።
\p
\v 12 ታ ናአዉ፥ ሀ ኡባፐ ቦላና ኔን ናገታናዉ ኮሽያባይ ደኤ። ማጻፋ ጻፊደ ዉርሳናዉ ዳንዳየተና። ቃይ ዳሮባ ፕልግ ጼሊደ አገናን እጽያዌካ አሳተ ዳቡርሴ።
\p
\v 13 ሄኮ ኡባባይ ኦደቴዳ፤ ሄዋ ድራዉ፥ ኡባባዉ ኩሻይ ሀዋ: ጾሳዉ ያያ፤ አ አዛዙዋ ናጋ። አያዉ ጎፐ፥ ሄዌ አሳዉ ዋና ኦሱዋ። 
\v 14 ጾሳይ ኦሱዋ ኡባ ቦላን፥ ቃይ ጌሜዳ የዉዋ ኡባ ቦላን፥ ሎአ ግድና፥ ኢታ ግድናካ ፕርዳናዉ ደኤ።