\id DAN - Dawuro Full Bible Ethiopic Version
\ide UTF-8
\h ዳኔላ
\toc1 ዳኔላ ትምቢትያ
\toc2 ዳኔላ
\toc3 ዳኔላ
\mt1 ዳኔላ ትምቢትያ
\imt ገሉዋ
\ip ዳኔል የሩሳላም ኦሞደቴዳ ዎደ እትፐ ኦሞደት ቢደ ባብሎነን ደእያ ናብያ። ዳኔላ ትምቢቲ ጻፈቴዳዌ አይሁዳ አሳቱ አይሁዳ ግደና ካዉተቱዋ ሞዱዋ ጋርሳን አቂደ፥ ዎልቃማ የደሳይነ ኡቁናይ ጋክና፥ ኡንቱንቱ መቱዋ በእያ ዎድያና። ማጻፋ ጻፌዳዌ ሳጻፐ ቤቴዳ ታርከቱዋንነ ኦሶቱዋን ጎኤቲደ፥ ሄ ዎደ ደእያ አሳ ምን። ጾሳይ ኡቁኒደ ሞድያ ካትያ ይሲደ፥ አሳ ኡቁና ቃሹዋፐ ከሳናዋ ህዶታ እሜ።
\ip ሀ ማጻፋይ ላኡ ሁጰ ሁጰ ክፍለቱዋን ሻከቴ።
\ili 1. ዳኔልነ አናና እትፐ ኦሞዱዋን ደእያ አማሬዳ አሳቱ ጾሳ አማንያ ምኖ አማኑዋንነ አዉ አዛዘትያ ሀኖታን ባረንቱ ሞርከቱዋ ጾኔዳዋ ኦድያ ታርከቱዋ ግድሽን፥ ኡንቱንቱካ ፖለቴዳዌ ባብሎነነ ፓርሰ ካዉተ ላይና።
\ili 2. ዳኔል ዱማ ዱማ ሳፃ በኤዳ። ሄ ሳጻቱዋ ሌምሱዋን በሲደ፥ ባብሎነፐ ዶሚደ፥ ዱማ ዱማ ካዉተቱ ደንድ ደንዲደ ኩንዳናዋነ ኡንቱንታ ሞድያ አይሁዳ ግደና ካቲ ይና፥ ጾሳ አሳይ ጾኑዋ ደማናዋ በሰ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 1. ዳኔላነ አ ሄዙ ላገቱዋ \ior 1:1-21\ior*
\io1 2. ካትያ ናቡካዳናጾራ አኩሙዋ \ior 2:1-49\ior*
\io1 3. ስድራቃ፥ ምሳቃነ አብድናጉዋ ጾሳይ ኤጽያ ታማፐ አሼዳ \ior 3:1-30\ior*
\io1 4. ናቡካዳናጾረ ላፑ ላይ ባረ ካዉተ ዬዳ \ior 4:1-37\ior*
\io1 5. ካትያ በልሻጻራነ ጎዳ ቦላ ጻፉዋ \ior 5:1-31\ior*
\io1 6. ጾሳይ ዳኔላ ጋሙዋ ዶናፐ አሼዳ \ior 6:1-28\ior*
\io1 7. ዳኔል በኤዳ ኦይዱ ዶአቱዋ ሳፃ \ior 7:1-27\ior*
\io1 8. ዳኔል በኤዳ ዶርሳ ኦርግያነ ዴሻ ኦርግያ ሳፃ \ior 8:1-27\ior*
\io1 9. ዳኔል ባረ አሳ ድራዉ ዎሴዳ \ior 9:1-27\ior*
\io1 10. ዳኔል ጼግሮሳ ሻፋ ማታን በኤዳ ሳፃ \ior 10:1—11:45\ior*
\io1 11. ዉርሰ ዎድያባ \ior 12:1-13\ior*
\c 1
\s1 ዳኔላነ አ ሄዙ ላገቱዋ
\r (1:1-21)
\p
\v 1 ይሁዳ ካቲ ዮአቄም ካተቴዳ ሄዘን ላይ፥ ባብሎነ ካቲ ናቡካዳናጾር የሩሳላመ ካታማ ቦላ ደንዲደ፥ ሄ ካታማ ዶዴዳ።\x - \xo 1:1 \xo*\xt 2 ካታ. 24:1፤ 2 ኦዱዋ 36:5-7\xt*\x* 
\v 2 ጎዳይ ይሁዳ ካትያ ዮአቄማነ ጾሳ ጌሻ ጎልያን ደእያ ሚሻቱዋፐ ኡንደነዳዋ አ ኩሽያን አደ እሜዳ። እካ ሄ ሚሻቱዋ ባብሎነ ጋድያን ደእያ ባረ ጾሳቱዋ ኤቃ ጎልያ አሄዳ፤ ባረ ጾሳ ሚሻ ምንጅያ ጎልያን ዎዳ።\x - \xo 1:2-4 \xo*\xt 2 ካታ. 20:17-18፤ 24:10-16፤ 2 ኦዱዋ 36:10፤ ኢሳ. 39:7-8\xt*\x*
\p
\v 3 ሄዋፐ ጉይያን፥ ካቲ አሽፋናዛ ግያ ባረ ኦሳንቻቱዋ ካፑዋ ሀዋዳን ያጊደ አዛዜዳ፤ “እስራኤልያ አሳ ግዶፐ ካትያ ዛረ ግድያዋንታነ ዎልቃማ አሳቱዋ ዛረ ግድያዋንታ ዶራ። 
\v 4 ያላጋቱ አሳተን ፓጫይ ባይናዋንታ፥ ማላንቻቱዋ፥ አያ ታማርሶፐካ ኤራናዉ ዳንዳይያዋንታ፥ አኬክያዋንታ፥ ኤራተይ ኩሜዳዋንታነ ካትያ ጎልያን ኦናዉ ዳንዳይያዋንታ። ኡንቱንታ ባብሎነቱዋ ቃላነ ጽፋትያ ታማርሳ” ያጌዳ። 
\v 5 ቃይ ኡንቱንቱ ሀች ሀች ማና ቁማይነ ኡሻና ዎይንያ ኤሳይ ካትያዉ ካኤዳ ቁማፐነ ኡሻፐ ግዳናዳን፥ ካቲ አዛዜዳ። ሄዋዳንካ፥ ሄዙ ላይ ሎሄዳዋፐ ጉይያን፥ ካትያ ስን ሺቂደ፥ ኦሱዋ ዶማናዳን ቃቼዳ።
\p
\v 6 ዶረቴዳዋንቱ ግዶፐ ይሁዳ ዛረ ግድያዋንቱ ዳኔላ፥ ሀናንያ፥ ምሻኤላነ አዛርያ ግያዋንቱ ደኢኖ። 
\v 7 ኦሳንቻቱዋ ካፑ ኡንቱንቱ ሱን ላሚደ፥ ዳኔላ ብልጻሶራ፥ ሀናንያ ስድራቃ፥ ምሻኤላ ምሳቃ፥ አዛርያ አብዳናጎ ጊደ ሱንዳ።
\p
\v 8 ዳኔል ካትያ ቁማ ምያዋንነ ዎይንያ ኤሳ ኡሽያዋን ባረና ቱንሰና ማላ፥ ባረ ዎዛናን ቆፋ ቃቼዳ፤ ሄ ቆፋን ማያናዳን፥ ኦሳንቻቱዋ ካፑዋ ዎሴዳ። 
\v 9 ሄ ካፑ ዳኔላ ሳባና ማላነ አዉ ቃረታና ማላ፥ ጾሳይ ኦዳ። 
\v 10 ግዶ ሽን፥ ኦሳንቻቱዋ ካፑ ዳኔላዉ ኦዲደ፥ “ታን ህንተንቶ ሀ ቁማነ ኡሻ አዛዜዳ ታ ጎዳ ካትያዉ ያያይ። ህንተናና ላገትያ ያላጋቱ ሶምኡዋፐ ህንተ ሶምኢ ግልቂ ቤቶፐ፥ ህንተ ጋሱዋን ካቲ ታና ዎና” ያጌዳ።
\p
\v 11 ሄዋፐ ጉይያን፥ ኦሳንቻቱዋ ካፑ ሱንና ዳኔላ፥ ሀናንያ፥ ምሻኤላነ አዛርያ ሀዳራ አኬዳ ብታንያ ዳኔል ሀዋዳን ያጌዳ፥ 
\v 12 “ኑዉ ማናዉ አታክልትያ፥ ኡሻናዉካ ሃ ጻላላ እማደ፥ ኑና ነ ቆማቱዋ ታሙ ጋላሳቱዋን ፓጫ። 
\v 13 ሄዋፐ ጉይያን፥ ኑ ሶምኡዋነ ካትያ ቁማ ምያ ያላጋ አሳቱዋ ሶምኡዋ ጌዳራ ጼላደ፥ ኑና ነ ቆማቱዋ ነዉ ማላት ቤቴዳዋዳን ኦ” ያጌዳ።
\p
\v 14 እ ሄዋ ማዪደ፥ ታሙ ጋላሳ ኡንቱንታ ፓጬዳ። 
\v 15 ታሙ ጋላሳፐ ጉይያን ኡንቱንቱ፥ ካትያ ቁማ ሜዳ ያላጋቱዋ ኡባፐ ፓጺደነ አንቃሪደ ቤቴድኖ። 
\v 16 ያትና፥ ኡንቱንቶ ጊጌዳ ቁማነ ዎይንያ ኤሳ ድጊደ፥ አታክልትያ እሜዳ።
\p
\v 17 ሀ ኦይዱ ያላጋቶ ጾሳይ ኤራነ ኡባ ቆሞ ጽፋቲነ ትምርቲ ገልያ አኬካ እሜዳ። ዳኔል ቃይ ሳጻነ አኩሙዋ ኡባ ብለ ኤሬ።
\p
\v 18 ካቲ ያላጋቱ ባረኮ ገላናዳን አዛዜዳ ዎዲ ፖለትና፥ ኦሳንቻቱዋ ካፑ ኡንቱንታ ናቡካዳናጾረ ስን አዳ። 
\v 19 ካቲ ኡንቱንታ ሃሳይሴዳ ዎደ፥ ዳኔላ፥ ሀናንያ፥ ምሻኤላነ አዛርያ ማላ አሳይ ኡንቱንቱ ግዶን ቤትቤና። ያትና፥ ኡንቱንቱ ካትያዉ ኦናዉ ገሌድኖ። 
\v 20 ካቲ ኡንቱንታ ኦቼዳ አይ አዳ ኤራተነ አኬካ ኦሻን፥ አ ካዉተን ደእያ ሻሬቾቱዋፐነ ሙሩንያዋንቱ ኡባፐ ኡንቱንቱ ታሙ ኩሽያ አደ ቤቴድኖ። 
\v 21 ዳኔል ካቲ ቂሮሰ ካተቴዳ ኮይሮ ላይይ ጋካናዉ ጋምኤዳ።
\c 2
\s1 ካትያ ናቡካዳናጾረ አኩሙዋ
\r (2:1-49)
\p
\v 1 ናቡካዳናጾር ባረ ካተቴዳ ላኤን ላይ አኩሙዋ አኩመቴዳ። ሄ አኩሙ አ ሎይ ሻቢርና፥ ገምእሹ አ አፌናን እጼዳ። 
\v 2 ያትና፥ እ አኩመቴዳ አኩሙዋ አዉ ኦዳና ማላ፥ ሻሬቾቱ፥ ሙሩንያዋንቱ፥ ብትያዋንቱነ ጾልንትያ ጼሊደ ካይያዋንቱ ጼገት ያናዳን ካቲ አዛዜዳ። ዪደ፥ አ ስንን ኤቄድኖ።\x - \xo 2:2 \xo*\xt ዶመ 41:8\xt*\x* 
\v 3 ካቲ ኡንቱንታ፥ “ታን ታና ሻቢርስያ አኩሙዋ አኩመታድ፤ ሄ አኩሙ አየንቶ ኤራናዉ ኮያይ” ያጌዳ።
\p
\v 4 ጾልንትያ ጼሊደ ካይያዋንቱ ካትያ ሶራቱዋ\f + \fr 2:4 \fr*\ft ዳን። 2:4 ፐ ቢደ ሸምፑዋ 7 ጋካናዉ ደእያዌ: ሶራቱዋ አሳ ቃላን ጻፈቴዳ።\ft*\f* ቃላን፥ “ካትያዉ፥ መናዉ ደአ! ነ አኩሙዋ ኑዉ ነ ቆማቶ ኦዳ፤ ኑን ነዉ አ ብለ ኦዳና” ያጌድኖ።
\p
\v 5 ካቲ ጾልንትያ ጼሊደ ካይያዋንታ ሀዋዳን ያጌዳ፤ “ታን ሎይደ ቃቼዳ ቆፋይ ሀዋ። ህንተ ሀ አኩሙዋነ አ ብለ ታና ኤርሳና ዮፐ፥ ታን ህንተና ቃንጻ የጋና፤ ህንተ ጎለቱካ ቡራ ኦልያ ሳኣ ከሳና። 
\v 6 ሽን ህንተ አኩሙዋነ አ ብለ ታዉ ኦዶፐ፥ እሙዋ፥ ዎይቱዋነ ዳሮ ቦንቹዋ ታፐ ህንተ አካና። ሄዋ ድራዉ፥ አነ አኩሙዋነ አ ብለ ታና ኤርስተ” ያጌዳ።
\p
\v 7 ላኤንዋካ ኡንቱንቱ ዛሪደ፥ “ካቲ አኩሙዋ ኑዉ ባረ ቆማቶ ኦዶ፤ ኑን አ ብለ ኤርሳና” ያጌድኖ።
\p
\v 8 ካቲ ኡንቱንቶ ዛሪደ፥ “ታን ህንተ ሀልቹዋ ኤራይ፤ ታን ሎይደ ቃቼዳ ቆፋ ህንተካ ኤሬዳ ድራዉ፥ ሀዋ ሱጋና ጊደ ሀኒታ ያጌዳ። 
\v 9 ህንተ አኩሙዋ ታዉ ኦዳና ዮፐ፥ እት ቀጩ ህንተና ናጌ። ሀኖታይ ላመታናዋ ጊደ ህንተ ህዶታ ኦያ ድራዉ፥ ታዉ ዎርዶነ ገንያ ቃላ ኦዳናዉ ማቀቴድታ። ሄዋ ድራዉ፥ አኩሙዋ ታዉ ኦድተ፤ ያቶፐ፥ ህንተ አ ብለ ኤርሳናዉ ዳንዳይያዋ ታን ኤራይ” ያጌዳ።
\p
\v 10 ጾልንትያ ጼሊደ ካይያዋንቱ ካትያዉ ዛሪደ፥ “ካቲ ኦችያ ኦሻ ዛራናዉ ዳንዳይያ እት አሳይነ ጋድያን ባዋ። አይ ግታቴዳነ ዎልቃሜዳ ካዉካ ሀዋ ማላባ ሻሬቾቱዋ፥ ሙሩንያዋንታ ዎይ ጾልንትያ ጼሊደ ካይያዋንታ ኦች ኤረና። 
\v 11 ካቲ ኦቼዳ ኦሻይ ዴጻ፤ አሳና እትፐ ደኤና ጾሳቱዋፐ አትና፥ ሀዋ ካትያዉ ቆንጭሳናዉ ዳንዳይያዌ ሙለካ ባዋ” ያጌድኖ።
\p
\v 12 ሄዋ ድራዉ፥ ካቲ ሎይ ሀንቀቲደ ባብሎነን ደእያ ካትያ ዞርያዋንታ ኡባ ዉርሳናዳን አዛዜዳ። 
\v 13 ካትያ ዞርያዋንታ ዎናዉ አዋዩ ከሴዳ። ዎያዋንቱ ዳኔላነ አ ላገቱዋ ዎናዉ ኮዬድኖ።
\s1 ጾሳይ ዳኔላ አኩሙዋ ብለ ኤርሴዳ
\p
\v 14 ካትያ ናግያ ኦላንቻቱዋ ካፑ አርዮክ፥ ባብሎነን ደእያ ካትያ ዞርያዋንታ ዎናዉ ከስያ ዎደ፥ ዳኔል አ አኬካንነ ሂላን ሃሳይሴዳ። 
\v 15 እ ካትያ ናግያ ኦላንቻቱዋ ካፑዋ አርዮካ፥ “ካትያ አዋዩ አያዉ ሀዋዳን ፓላቴዴ?” ጊደ ኦቼዳ። አርዮክ ሀኖታ ዳኔላዉ ኦዴዳ። 
\v 16 ሄዋን ዳኔል ካትያኮ ገሊደ፥ አኩሙዋ ብለ ኤርሳናዉ፥ ባረዉ ዎዲ እመታና ማላ ዎሴዳ።
\p
\v 17 ሄዋፐ ጉይያን፥ ዳኔል ባረ ጎለ ስሚደ፥ ባረ ሄዙ ላገቶ፥ ሀናንያዉ፥ ምሻኤላዉነ አዛርያዉ ሀኖታ ኦዴዳ። 
\v 18 ኡንቱንቱ ባብሎነን ደእያ የንኮ ካትያ ዞርያዋንቱና እትፐ ሀይቀናዳን፥ ሳሉዋ ጾሳይ ማሮታ ኡንቱንቶ ኦደ፥ ሀ ጹራ ኡንቱንቶ ቆንጭሳናዉ ዎሳና ማላ፥ ኡንቱንቶ ኦዴዳ።
\p
\v 19 ሄ ቃማን ጹራይ ዳኔላዉ ሳጻን ቆንጬዳ። ያትና፥ ዳኔል ሳሉዋ ጾሳ ሀዋዳን ያጊደ ጋላቴዳ፤
\q1
\v 20 “አዳ ኤራተይነ ዎልቃይ፥
\q2 ጾሳሳ ግድያ ድራዉ፥
\q1 አ ሱንይ መናፐ መና ጋካናዉ
\q2 ጋላተቴዳዋ ግዶ።
\q1
\v 21 ዎደቱዋነ አግናቱዋ እ ላሜ።
\q2 ካተቱዋ ካዉተፐ ድጌ፤
\q2 ቃይ ካተቱዋ ካዉተን ኡትሴ።
\q2 አዳ ኤራንቻቶ አዳ ኤራ፥
\q2 አኬክያዋንቶካ ኤራ እ እሜ።
\q1
\v 22 ጪማ ጹራነ ጌሜዳ የዉዋ፥
\q2 እ ቆንጭሴ።
\q1 ማን ደእያዋካ እ ኤሬ፤
\q2 ፖኡካ አናና ደኤ።
\q1
\v 23 አቤት ታ ማይዛ አዎቱዋ ጾሳዉ፥
\q2 ታን ኔና ጋላታይነ ሳባይ።
\q1 አያዉ ጎፐ፥ ኔን ታዉ፥
\q2 አዳ ኤራነ ዎልቃ እማዳ።
\q1 ኑን ኔና ኦቼዳዋ፥
\q2 ታና ሀእ ኤርሳዳ።
\q1 ካትያ አኩሙዋ ኑና ኤርሳዳ”
\m ያጌዳ።
\s1 ዳኔል አኩሙዋነ አ ብለ ካትያ ኤርሴዳ
\p
\v 24 ሄዋፐ ጉይያን፥ ዳኔል ባብሎነን ደእያ ካትያ ዞርያዋንታ ዉርሳናዉ ካትያፐ አዛዙዋ አኬዳ አርዮካኮ ቢደ፥ “ካትያ ዞርያዋንታ ዎፓ። ታና ካትያኮ ገልሳ፤ ያቶፐ ታን አ አኩሙዋ ብለ አ ኤርሳና” ያጌዳ።
\p
\v 25 አርዮክ ኤለካ ዳኔላ ካትያኮ ገልሲደ፥ ካትያዉ፥ “ይሁዳፐ ኦሞደቲደ ዬዳ አሳፐ ካትያ አኩሙዋ ብለ ኤርሳናዉ ዳንዳይያ አሳ ደማድ” ያጌዳ።
\p
\v 26 ካቲ ብልጻሶራ ጌተትያ ዳኔላ፥ “ታን አኩመቴዳ አኩሙዋነ አ ብለ ታና ኤርሳናዉ ዳንዳያይ?” ጊደ ኦቼዳ።
\p
\v 27 ዳኔል ሀዋዳን ያጊደ ዛሬዳ፤ “ካትያዉ፥ ኔን ኦቼዳ ጹራ ቆንጭሳናዉ ዳንዳይያ አዳ ኤራንቻይ፥ ሻሬቹ፥ ሙሩንያዌ፥ ዎይ አያንትያዌ ባዋ። 
\v 28 ሽን ጹራቱዋ ቆንጭስያ እት ጾሳይ ሳሉዋን ደኤ። ዉርሰ ጋላሳቱዋን ሀናናባ እ ኔና በሴዳ። ነ አርሳን ዛቁላደ፥ ኔን አኩመቴዳ አኩሙነ ሳጻይ ሀዋ።
\p
\v 29 “ካትያዉ፥ ኔን አርሳን ዛቁላደ፥ ስንፐ ሀናናባ ቆፓዳ። ሄ ዎደ ጹራ ቆንጭስያ ጾሳይ ስንፐ ሀናናዋ ኔና በሴዳ። 
\v 30 ሀ ጹራይ ታዉ ቆንጬዳዌ ታን ሀራ አሳፐ አዳ ኤራንቻ ግድና ግደናን፥ ኔን ካቲ አኩሙዋ ብለ ኤራናዳናነ ነ ሁጲያ ግዶን ስመረቴዳ ቆፋ አኬካናዳና።
\p
\v 31 “ካትያዉ፥ ኔን ሎይ ዎልቃማ፥ ጶልያነ ጼላናዉ ያሽያ ምስሊ ነ ስንን ኤቄዳዋ በኣዳ። 
\v 32 ሀ ምስልያ ሁጲ ጌሻ ዎርቃፐ፥ አ ትራይነ ኩሸቱ ብራፐ፥ ኡሉነ ዎድረቱ ናሃስያ ግያ ብራታፐ፥ 
\v 33 ሱይሊ ብራታፐነ ገድያዉ ያቻይ ባጋይ ብራታፐ ባጋይ ኡርቃፐ መቴዳ። 
\v 34 ኔን ሀ ምስልያ ጼልሽን፥ እት ሹቻይ አሳ ኩሺ ቦቼናን ደርያፐ ቆለቲደ፥ ብራታፐነ ኡርቃፐ መቴዳ ምስልያ ገድያ ያቻቱዋ ቦላ ዎደ ጋጬዳ። 
\v 35 ሄ ዎደ ብራታይ፥ ኡርቃይ፥ ናሃሰ ግያ ብራታይ፥ ብራይነ ዎርቃይ ኡባይ ጋጨቲደ፥ ቦንያን ኡዱማን ደእያ ሱላ ማላ ግዴዳ፤ አያነ አሸናን ጫርኩ ፕቲደ አፌዳ። ሽን ምስልያ ቦላ ዎዳ ሹቻይ ዎጋ ደርያ ከሲደ፥ ቢታ ሳኣ ኩሜዳ።
\p
\v 36 “ሀዌ ነ አኩሙዋ፤ ቃይ ሀእ ብለ ኑን ነዉ ኦዳና። 
\v 37 ካትያዉ፥ ኔን ካተቶ ካትያ። ሳሉዋ ጾሳይ ነዉ ካዉተነ ዎልቃ፥ ምኖተነ ቦንቹዋ እሜዳ። 
\v 38 ቢታ ኡባ ቦላን ኔና ሞድያዋ ኦዳ፤ አሳ፥ ባዙዋ ዶኣነ ሳሉዋ ካፉዋ ነ ኩሽያን ዎዳ። ሄዋ ድራዉ፥ ዎርቃ ሁጲ ኔና።
\p
\v 39 “ኔፐ ጉይያን፥ ምኖተን ኔና ጋከና ሀራ ካዉተይ ደንዳና። ካሊደ፥ ቢታ ኡባ ሞድያ፥ ናሃሰ ብራታ ግድያ፥ ሄዘን ካዉተይ ደንዳና። 
\v 40 ዉርሰን ኡባባ ጋጨሬ ሊቅስያ ብራታዳን ምኔዳ ኦይደን ካዉተይ ደንዳና። ብራታይ ኡባባ ጋጨሬደ ሊቅስያዋዳን፥ እካ ባረፐ ካሰ ደንዴዳ ካዉተቱዋ ጋጨሬደ ሊቅሳና።
\p
\v 41 “ገደቱነ ገድያ ብራቱ ባጋይ ብራታፐ፥ ባጋይ ኡርቃፐ መቴዳዋንታ ኔን በኤዳዋዳንካ፥ ሄ ካዉተይ ሻከቲደ ካዉተ ግዳናዋ። ብራታይ ኡርቃና ዋላከቴዳዋ ነ በኤዳዋዳንካ፥ ባጋይ ብራታዳን ምኔዳዋ ግዳና። 
\v 42 ገድያ ብራቱ ባጋይ ብራታ፥ ባጋይ ኡርቃ ግዴዳዋዳን፥ ሄዋዳንካ ሀ ካዉተዉ ባጋይ ምኖ፥ ባጋይ ላፋ ግዳናዋ። 
\v 43 ብራታይ ኡርቃና ዋላከቴዳዋ ነ በኤዳዋዳን፥ ሄ ላኡ ባጋ አሳይ ገሉዋን አኩዋን ዋላከታና፤ ሽን ብራታይ ኡርቃና ዋላከታናዉ ዳንዳየናዋዳንካ፥ ኡንቱንቱ እቱዋ ግዲደ ጋምአናዉ ዳንዳይክኖ።
\p
\v 44 “ሄ ካተቱዋ ላይን፥ ሳሉዋ ጾሳይ ሙለካ ኩንደና፥ ሀራ አሳዉካ እመተና ካዉተ ኤሳና። ሄ ኤቄዳ ካዉተይ ሄ ካዉተቱዋ ኡባ ጋጨሬ ይሳና፤ ሽን እ መናዉ ኤቂደ ደአና። 
\v 45 አሳ ኩሺ ቦቼናን ደርያፐ ቆለት ዎደ፥ ብራታፐ፥ ናሃስያፐ፥ ኡርቃፐ፥ ብራፐነ ዎርቃፐ መቴዳ ምስልያ ጋጨሬዳ ሹቻ ብለይ ሄ ካዉተ።
\p “ዎልቃማ ጾሳይ ስንናዉ ሀናናባ ካትያ በሴዳ። አኩሙካ ቱማ፤ ብለይካ አማነቴዳዋ” ያጊደ ዛሬዳ።
\s1 ካቲ ዳኔላስ ዎይቴዳ
\p
\v 46 ሄዋፐ ጉይያን፥ ካቲ ናቡካዳናጾር ዳኔላ ቦንቺደ፥ ሶምኡዋ ቢታ ጋደ ጉፋኔዳ፤ ያቲደ አሳይ አ ስንን ያርሹዋ ያርሻናዳንነ እጻና ጩዋያናዳን አዛዜዳ። 
\v 47 ካቲ ዳኔላ፥ “ቱሙዋፐ ነ ጾሳይ ጾሳቱዋ ጾሳ፥ ካተቱ ጎዳነ ጹራ ቆንጭስያዋ። ኔን ሀ ጹራ ቆንጭሳናዉ ዳንዳይያዌ ሄዋሳ” ያጌዳ።
\p
\v 48 ሄዋፐ ጉይያን፥ ካቲ ዳኔላ ሎይ ቦንቼዳ፤ ዳሮነ አልኦ እሞታቱዋካ አዉ እሜዳ፤ ባብሎነ ቢታ ሞድያዋ ኦዳ። ቃይ ባብሎነን ደእያ አዳ ኤራንቻቱዋ ኡባ ቦላ ካፑዋ ኦደ፥ አ ሱንዳ። 
\v 49 ዳኔል ኦችና፥ ካቲ ስድራቃ፥ ምሳቃነ አብዳናጋ ባብሎነ ቢታ አይስያዋንታ ኦደ ሱንዳ፤ ሽን ዳኔል ካትያ ጎልያን ጋምኤዳ።
\c 3
\s1 ስድራቃ፥ ምሳቃ፥ አብድናጉዋ ጾሳይ ኤጽያ ታማፐ አሼዳ
\r (3:1-30)
\p
\v 1 ካቲ ናቡካዳናጾር ጌሳይ ኡሱፑን ታሙ ዋ፥ ጎምፓይ ኡሱፑን ዋ ግድያ ምስልያ ዎርቃፐ መደ፥ ባብሎነ ጋድያን ዱራ ደምባን ኤሴዳ። 
\v 2 ሄ ምስልያ አንጅሳናዉ ያናዳን፥ ካትያፐ ጋርሳና ጋድያ ሞድያዋንታ፥ ሱንቱዋ፥ አዉራጃ ሞድያዋንታ፥ ካትያ ዞርያዋንታ፥ ሚሻ ጎልያን ኦያዋንታ፥ ፕርዳ ዳናቱዋ፥ ህገ ኤራንቻቱዋነ አዉራጃን አዉራጃን ደእያ ሀራ ካፖቱዋ ጼጌዳ። 
\v 3 ያትና፥ ካትያፐ ጋርሳና ጋድያ ሞድያዋንቱ፥ ሱንቱ፥ አዉራጃ ሞድያዋንቱ፥ ካትያ ዞርያዋንቱ፥ ሚሻ ጎልያን ኦያዋንቱ፥ ፕርዳ ዳናቱ፥ ህገ ኤራንቻቱነ አዉራጃን አዉራጃን ደእያ ሀራ ካፓቱ እትፐ ሄ ምስልያ አንጅሳናዉ ሺቂደ፥ ካቲ ናቡካዳናጾር ኤሴዳ ምስልያ ስንን ኤቄድኖ።
\p
\v 4 ሄ ዎደ አዋዩዋ አዋይያዌ ባረ ቃላ ቁ ኦደ፥ ሀዋዳን ያጌዳ፤ “ህንተኖ፥ አሳዉ፥ ካዉተቶ፥ ዱማ ዱማ ቃላን ሃሳይያ ዛረቶ፥ 
\v 5 ኡባይካ ማላካታ፥ ሱሱልያ፥ ዛይያ፥ ማስንቁዋ፥ ዲነ ጮራ ባቀቴዳ ክርያን ዋጸቴዳ ዲነ ሀራ ሙዚቃ ሚሻቱዋ እትፐ ካእያ ዎደ ስሶ ሳናካ፥ ካቲ ናቡካዳናጾረ ኤሴዳ ዎርቃ ምስልያዉ ጉፋኒደ ጎይንተ። 
\v 6 ምስልያ ስንን ጉፋኒደ ጎይነና ኦንነ ሄ ሳትያን ኤጽያ እቶንያ ታማ ግዶ ኦለታና” ያጌዳ።
\p
\v 7 አሳይ ኡባይ፥ ካዉተቱ ኡባይነ ዱማ ዱማ ቃላን ሃሳይያ ዛራቱ ኡባይ ማላካታ፥ ሱሱልያ ዛይያ፥ ማስንቁዋ፥ ዲነ ጮራ ባቀቴዳ ክርያን ዋጸቴዳ ዲ እትፐ ካእያ ዎደ ስሶ ሳናካ፥ ሳኣን ጉፋኒደ፥ ካቲ ናቡካዳናጾር ኤሴዳ ዎርቃ ምስልያዉ ጎይኔድኖ።
\s1 ምስልያዉ ጎይነናን እጽና ሄዙ አይሁዳቱዋ ሞቴድኖ
\p
\v 8 ሄዋ ድራዉ፥ ሄ ዎደ እት እት ባብሎነ አሳቱ ስንዉ አደ፥ አይሁዳቱዋ ሞቴድኖ። 
\v 9 ኡንቱንቱ ካትያ ናቡካዳናጾራ ሀዋዳን ያጌድኖ፤ “ካትያዉ፥ መናዉ ደአ። 
\v 10 ካትያዉ፥ ኔን ማላካታ፥ ሱሱልያ፥ ዛይያ፥ ማስንቁዋ፥ ዲነ ጮራ ባቀቴዳ ክርያን ዋጸቴዳ ዲ እትፐ ካእያ ዎደ፥ ስስያ ኦንነ ሳኣን ጉፋኒደ፥ ዎርቃ ምስልያዉ ጎይናናዳን፥ 
\v 11 ቃይ ሳኣን ጉፋኒደ ጎይነና አሳይ ደኦፐ፥ ኤጽያ እቶነ ታማ ግዶ ኦለታናዳን አዋዩዋ ከሳዳ። 
\v 12 ሽን ካትያዉ፥ ኔን ባብሎነ ቢታ ቦላ ሱንዳ አይሁዳቱ፥ ስድራቅ፥ ምሳቅነ አብዳናጉ ነ አዛዙዋ እጼድኖ፤ ነ ጾሳቶ ኦክኖ፤ ቃይ ነ ኤሴዳ ዎርቃ ምስልያዉካ ጎይንክኖ” ያጌድኖ።
\p
\v 13 ናቡካዳናጾር ሄዋ ስሴዳ ዎደ፥ ሀንቁዋ ኤጽ ከሲደ፥ ስድራቃ፥ ምሳቃነ አብዳናጋ አሀናዳን አዛዜዳ። ኡንቱንታ ካትያ ስን አሄድኖ። 
\v 14 ናቡካዳናጾር ኡንቱንታ ሀዋዳን ያጌዳ፤ “ስድራቃ፥ ምሳቃ፥ አብዳናጎ፥ ሀ ህንተ ታ ጾሳቶ ኦናዌነ ታ ኤሴዳ ዎርቃ ምስልያዉ ጎይነናዌ ቱሜ? 
\v 15 ሀእ ማላካታ፥ ሱሱልያ፥ ዛይያ ማስንቁዋ፥ ዲነ ጮራ ባቀቴዳ ክርያን ዋጸቴዳ ዲነ ሀራ ሙዚቃ ሚሻቱዋ ካእያዋ ስሶ ዎደ፥ ታን ኤሴዳ ምስልያዉ ጉፋኒደ ጎይኖፐ፥ ዳሮ ሎአ። ሽን ህንተ ጎይነናን እጾፐ፥ ኤለካ ኤጽያ እቶንያ ታማ ግዶን ኦለታና። አይ ጾሳቱ ህንተና ታ ኩሽያፐ አሻናዌ?” ያጌዳ።
\p
\v 16 ሽድራቅ፥ ምሻቅነ አብዳናጉ ካትያዉ ዛሪደ፥ “ካትያዉ፥ ናቡካዳናጾራ፥ ሀ የዉዋ ኑን ነዉ ዛሩዋ እማናዉ በሰና። 
\v 17 ካትያዉ፥ ኑን ኤጽያ እቶነ ታማ ግዶ ኦለትንቶካ፥ ኑን አዉ ኦያ ጾሳይ ሄ ታማፐ አሻናዉ ዳንዳዬ። ቃይ ካትያዉ፥ እ ኑና ነ ኩሽያፐካ አሻና። 
\v 18 ሽን ካትያዉ፥ ኡባ እ ኑና አሸናን እጽንቶካ፥ ኑን ነ ጾሳቶ ኦናዋነ ኔን ኤሴዳ ዎርቃ ምስልያዉ ጎይነናዋ ኤራ” ያጌድኖ።
\s1 ሄዙ አይሁዳቱዋ ሀይቆ ፕርዴድኖ
\p
\v 19 ሄ ዎደ ናቡካዳናጾር ሽድራቃ፥ ምሻቃነ አብዳናጎ ቦላ ሀንቁዋ ሱሌዳ፤ አ ሶምኢ ኡንቱንቶ ካሰዋፐ ዱማቴዳ። ታማይ ካሰ ኤጽያዋፐ ላፑን ኩሽያ አደ ኤጻናዳን አዛዜዳ። 
\v 20 ሽድራቃ፥ ምሻቃነ አብዳናጋ ቃቺደ፥ ኤጽያ እቶንያ ታማ ግዶ ኦላናዳን፥ ባረ ኦላንቻቱዋ ግዶፐ ምኖ አሳቱዋ አዛዜዳ። 
\v 21 ያትና፥ ሀ አሳቱዋ፥ ኡንቱንቱ ማዩዋና፥ ሱርያና፥ ሁጲያን ጻጼዳ ጻናነ ሀራ ማዩዋ ኡባና ጋ ቃቺደ፥ ኤጽያ እቶንያ ታማ ግዶ ኦሌድኖ። 
\v 22 ካትያ አዛዙ ሎይ ኤሌልስያዋ ግዴዳ ድራዉነ እቶንያ ታማይካ ካሰዋፐ አ ኤጽያ ድራዉ፥ ስድራቃ፥ ምሳቃነ፥ አብዳናጋ ታማን ኦሌዳ ሄ ምኖ አሳቱዋ ታማ ላጩ ላቢደ ዎዳ። 
\v 23 ሀ ሄዙ ቃሸቴዳ አሳቱ፥ ሽድራቅ፥ ምሻቅነ አብዳናጉ፥ ኤጽያ እቶነ ታማ ግዶ ዎድኖ።
\p
\v 24 ሄዋፐ ጉይያን፥ ካቲ ናቡካዳናጾር ባረና ማላልስና ኤለካ ደንድ ኤቂደ፥ “ኑን ቃቺደ ኤጽያ እቶንያ ታማ ግዶ ኦሌዳ አሳቱ ሄዛ ግድክኖየ?” ያጊደ ባረና ዞርያዋንታ ኦቼዳ።
\p ኡንቱንቱ፥ “ካትያዉ፥ ኤ ሄዛ” ያጊደ ዛሬድኖ።
\p
\v 25 ካቲ ዛሪደ፥ “በእተ፥ ታን ቃሹዋፐካ ብለቴዳ፥ ታማ ግዶን ያ፥ ሃ ሀመትያ፥ ታማይካ አይነ ቦቼና ኦይዱ አሳቱዋ በአይ! ኦይደን ቃይ ጾሳቱዋ ናኣ ማላቴ” ያጌዳ።
\s1 ሄዙ አይሁዳቱ ታማፐ ከሴድኖ
\p
\v 26 ያትና፥ ናቡካዳናጾር ኤጽያ እቶነ ታማ ማታ ሺቂደ፥ ባረ ቃላ ቁ ኦደ፥ “ኡባፐ ቂያ ጾሳ ቆማቶ፥ ሽድራቃ፥ ምሻቃ፥ አብዳናጎ፥ ከስተ! ሃይተ!” ያጊደ ጼጌዳ። ያትና፥ ሽድራቅ፥ ምሻቅነ አብዳናጉ ታማ ግዶፐ ከሴድኖ። 
\v 27 ካትያፐ ጋርሳና ቢታ ሞድያዋንቱ፥ ሱንቱ፥ አዉራጃ ሞድያዋንቱ፥ ካትያዉ ኦያ ሀራ ካፓቱ ኡባይ ኡንቱንቱኮ ሺቄድኖ። ታማይ ኡንቱንቱ ቦላ ቦችቤናዋ፥ ኡንቱንቱ ሁጲያ ብናናፐ እቱካ ማላተትቤናዋ፥ ኡንቱንቱ ማዩካ ቦሸትቤናዋነ ታማ ፔኑካ ኡንቱንቱን ባይናዋ በኤድኖ።
\p
\v 28 ሄዋፐ ጉይያን፥ ናቡካዳናጾር ሀዋዳን ያጌዳ፤ “ስድራቃ፥ ምሳቃነ አብዳናጎ ጾሳይ ጋላተቶ! እ ባረ ኪታንቻ ኪቲደ፥ ባረናን አማነቴዳ ባረ ቆማቱዋ አሼዳ። ኡንቱንቱ ካትያ አዛዙዋ እጼድኖ፤ ባረንቱ ጾሳፐ አትና፥ ሀራ ጾሳዉ ኦናፐነ ጎይናናፐ ሀይቃናዋ ዶሴድኖ። 
\v 29 ሄዋ ድራዉ፥ ሽድራቃ፥ ምሻቃነ አብዳናጎ ጾሳ ቶቺደ ሃሳይያ አይ አስካ፥ ዎይ አይ ካዉተይካ፥ ዎይ ዱማ ዱማ ቃላን ሃሳይያ አይ ዛሪካ ቃንጸታናነ ሙጸታና ማላ፥ ኡንቱንቱ ጎሊካ ላለቲደ፥ ፕቱ ኦለትያ ሳኣ ግዳና ማላ፥ ታን አዋያድ። አያዉ ጎፐ፥ ሀራ አይ ጾስነ ሀዋዳን ኦደ፥ አሳ አሸና” ያጌዳ።
\p
\v 30 ሄዋፐ ጉይያን፥ ካቲ ሽድራቃ፥ ምሻቃነ አብዳናጋ ባብሎነ ጋድያን ቁ ቁ ኦደ ሱንዳ።
\c 4
\ms ናቡካዳናጾር ላፑ ላይ ባረ ካዉተ ዬዳ
\mr (4:1-37)
\s1 ናቡካዳናጾር ላኤን አኩሙዋ
\p
\v 1 ካቲ ናቡካዳናጾር አሳ ኡባዉ፥ ካዉተቱዋ ኡባዉነ ዱማ ዱማ ቃላን ሃሳይያ ዛራቱዋ ኡባዉ ሀዋዳን ያግ፥ ዳብዳቢያ ኪቴዳ።
\p “ሳሮ ደኢቴ!
\p
\v 2 “ኡባፐ ቂያ ጾሳይ ታዉ ኦዳ ማላልስያነ ኦራባ ታን ህንተንቶ ኦዳናዉ ኮያይ።
\q1
\v 3 “አ ማላታይ ዎት ግቴ!
\q2 እ ኦያ ኦራባይ ዎት ምኔ!
\q1 አ ካዉተይ መና ካዉተ፤
\q2 አ ማታይካ የለታፐ የለታ ጋካናሳ።
\p
\v 4 “ታን ናቡካዳናጾር፥ ታ ጎልያ እንጅያን፥ ታ ካዉተ ጎልያን ሚኩዋን ደአይ። 
\v 5 እት ጋላስ ታን ያሽያ አኩሙዋ አኩመታድ። ታን ታ አርሳን ዛቁላደ፥ በኤዳ አኩሙነ ሳጻይ ታና ዳጋንዳ። 
\v 6 ሄዋ ድራዉ፥ ሀ አኩሙዋ ብለ ታና ኤርሳና ማላ፥ ባብሎነን ደእያ ካትያ ዞርያዋንታ ኡባ ታኮ አሀናዳን አዛዛድ። 
\v 7 ሄ ዎደ ሻሬቾቱ፥ ሙሩንያዋንቱ፥ አያንትያዋንቱነ ጾልንትያ ጼሊደ ካይያዋንቱ ታኮ ዪና፥ ታ አኩሙዋ ኡንቱንቶ ኦዳድ፤ ሽን ኡንቱንቱ ብለ ታና ኤርሳናዉ ዳንዳይበይክኖ። 
\v 8 ዉርሰን ታ ጾሳ ሱንን ብልጻሶራ ጌተት ጼገትያ፥ ጌሻ ጾሳቱዋ አያናይ አን ደእያ ዳኔል ታኮ ገልና፥ አዉ ታ አኩሙዋ ሀዋዳን ጋደ ኦዳድ።
\p
\v 9 “አዳ ኤራንቻቱዋ ካፑዋ ብልጻሶራ፥ ጌሻ ጾሳቱዋ አያናይ ኔናን ደእያዋነ አያ ጹርነ ኔፐ ጌመናዋ ታን ኤራይ። ታን አኩመቴዳ አኩሙ ሀዋ፤ አነ ታዉ አ ብለ ኦዳ።
\p
\v 10 “ታን ታ አርሳን ዛቁላደ፥ ቢታዉ ግዶ ልክያን እት ምይ ኤቄዳዋ ሳጻን በኣድ፤ ሄ ምዉ ጌሳይ ዳሮ አዱሳ። 
\v 11 ሄ ምይ ድጪደ ግታቴዳነ ምኔዳ፤ አዉ ጼራይ ሳሉዋ ጋኬ፤ ሳኣፐ ሳኣ ጋጻ ጋካናዉ ቤቴ። 
\v 12 ሄ ም ሀይይ ጼላናዉ ሎእያዋ፤ አ አይፊካ ሎይ ዳራ፤ ኡባዉካ ምያባይ አን ደኤ። ዎራ ዶአቱ አ ኩዋን ሸምፔድኖ፤ ሳሉዋ ካፎቱካ አ ዳሻ ግዶን ኬጺደ ደኤድኖ። ፓጻ ደእያ ኡባይ አፐ ሜዳ።
\p
\v 13 “ታ አርሳን ዛቁላደ፥ ጌሻ ኪታንቻይ ሳሉዋፐ ዎሽን ሳጻን በኣድ። 
\v 14 እካ ባረ ቃላ ቁ ኦደ፥ ሀዋዳን ያጌዳ፤ ‘ሀ ም ቃንጽተ፤ አ ታሽያ ካርተ፤ አ ሀይካ ፕሪጽተ፤ አ አይፍያካ ላልተ። አ ጋርሳን ደእያ ዶአቱነ አ ዳሻን ደእያ ካፎቱ ኡባይ ባቃትኖ። 
\v 15 ሽን ዱሩማነ አ ጻጱዋ፥ ብራታፐነ ናሃስያፐ ቆጼዳ ሳንሳላታን ቃቺደ፥ ሳኣን፥ ማታ ግዶን አግ ባሽተ። ሳሉዋፐ ዎያ ከተርሳን ካሎ፤ ቃይ ባዙዋን ማታ ግዶን ዶኣና ደኦ። 
\v 16 አ ዎዛናይ ካሀይ አሳዋፐ ዶኣዉ ላመቶ። ሄዋዳን ሀን ደእሽን፥ አ ቦላ ላፑን ላይይ ዉሮ። 
\v 17 ኡባፐ ቂያ ጾሳይ አሳ ናናቱ ካዉተ ኡባ ሞድያዋ፥ ካዉተ እ ባረ ኮይያ ኡራዉ እምያዋነ ሀራይ አቶ፥ አሳ ኡባፐ ካቴዳዋንታካ እ ሱንያዋ ፓጻ ደእያ አሳይ ኡባይ ኤራና ማላ፥ ቃሸቴዳ ቆፋ ኪታንቻቱ አዋዬድኖ። ፕርዳካ ጌሻቱ ኦዴድኖ’ ያጌዳ።
\p
\v 18 “ታን ካቲ ናቡካዳናጾር አኩመቴዳ አኩሙ ሀዋ። ሀእ ስም ብልጻሶራ፥ ታዉ አ ብለ ኦዳ። አያዉ ጎፐ፥ ታ ካዉተ ግዶን ደእያ ካትያ ዞርያዋንቱፐ እቱነ ታና ብለ ኤርሳናዉ ዳንዳይቤና፤ ሽን ጌሻ ጾሳቱዋ አያናይ ኔናን ደእያ ድራዉ፥ ኔን ዳንዳያሳ” ያጋድ።
\s1 ዳኔል አኩሙዋ ብሌዳ
\p
\v 19 ሄ ዎድያን ብልጻሶራ ጌተትያ ዳኔል ዳጋሚደ፥ ሀንያዋ ዬዳ። እ ባረ ቆፋን ሻባረቴዳ ድራዉ፥ ጉ ዎድያ ጮኡ ጊደ ታኬዳ። ያትና፥ ካቲ፥ “ብልጻሶራ፥ ሀ አኩሙነ አ ብለይ ኔና ዳጋንፖ” ያጌዳ።
\p ብልጻሶር ዛሪደ፥ “ታ ጎዳዉ፥ ሀ አኩሙ ኔና እጽያዋንቶ፥ አ ብለይካ ቃይ ነ ሞርከቶ ግዴረኔሻ! 
\v 20 ኔን አኩሙዋን በኤዳ ምይ፥ ድጪደ ምኔዳዌ፥ ጼራይ ሳሉዋ ጋኬዳዌ፥ ሳኣፐ ሳኣ ጋጻ ጋካናዉ ቤቴዳዌ፥ 
\v 21 ሀይይ ጼላናዉ ሎኤዳዌ፥ አይፊካ ሎይ ዳሬዳዌ፥ ኡባዉ ምያባይ አን ደእያዌ፥ ባዙዋ ዶአቱ አ ኩዋን ሸምፔዳዌነ ሳሉዋ ካፎቱካ አ ዳሻ ግዶን ኬጺደ ደኤዳዌ፥ 
\v 22 ካትያዉ፥ ሄ ምይ ኔና! ኔን ግታታዳነ ምናዳ፤ ነ ግታተይ ድጪደ፥ ሳሉዋ ጋኬዳ፤ ነ ካተተ ማታይካ ሳኣ ጋጻ ጋኬዳ።
\p
\v 23 “ካትያዉ፥ ኔን ጌሻ ኪታንቻይ ሳሉዋፐ ዎደ፥ ‘ሀ ም ቃንጺደ ይስተ፤ ሽን አ ዱሩማነ አ ጻጱዋ ብራታፐነ ናሃስያፐ ቆጼዳ ሳንሳላታን ቃቺደ፥ ሳኣን፥ ማታ ግዶን አግ ባሽተ። ሳሉዋፐ ዎያ ከተርሳን እ ካሎ፤ ላፑን ላይይ ዉራና ጋካናዉ፥ ባዙዋ ዶኣዳን ደኦ!’ ግያ ዎደ በኣዳ።
\p
\v 24 “ካትያዉ፥ አ ብለይ ሀዋ። ሀዌ ኡባፐ ቂያ ጾሳይ ታ ጎዳ ካትያ ቦላ ፖላናዉ ኪቴዳ ፕርዳ። 
\v 25 ኔን አሳ ግዶፐ የደርሴታደ፥ ባዙዋ ዶአቱዋና እትፐ ደአና። ኔን ቦራዳን ማታ ማናነ ሳሉዋፐ ዎያ ከተርሳን ካላና። ቃይ ኡባፐ ቂያ ጾሳይ አሳ ናናቱ ካዉተ ኡባ ሞድያዋነ ካዉተ ባረ ኮዬዳ ኡራዉ እምያዋ ኔን ኤራና ጋካናዉ፥ ላፑን ላይይ ነ ቦላን አና።
\p
\v 26 “ዱሩማይ ባረ ጻጱዋና ጋድያን አታናዳ አዛዘቴዳዌ፥ ኔን ሳሉዋ ጾሳይ ቢታ ኡባ ሞድያዋ ኤርያ ዎደ፥ ነ ካዉተይ ነዉ ስማናዋ በሰ። 
\v 27 ሄዋ ድራዉ፥ ካዎ፥ ታ ዞርያ አካ። ናጋራ ኦያዋ አጋደ፥ ጽሎባ ኦ፤ መቱዋን ኡቁነቴዳዋንታ ናቂያዋ አጋደ፥ ኡንቱንቶ ቃረታ። ያቶፐ፥ ኔን ሳሮ ደአና ዎዲ አዱቀናን አገና” ያጌዳ።
\p
\v 28 ሀዌ ኡባይ ካትያ ናቡካዳናጾረ ቦላ ጋኬዳ። 
\v 29 ታማነ ላኡ አግናፐ ጉይያን፥ ካቲ ባብሎነን ደእያ ካትያ ጎልያ ቦላ ደምባይ ኬጼዳሳን ሀመቲደ 
\v 30 ሀዋዳን ያጌዳ፤ ሀዌ ታ ካዉተ ጎሊ አን ደአና ማላ፥ ታን ታ ዎልቃማ ዎልቃን፥ ታ ግታተ ቦንቾ ግምቢሴዳ ባብሎነ ካታማ ግታ ግደኔ? ያጌዳ።
\p
\v 31 እ ሃሳዪደ ዉርሰናን ደእሽን፥ ሳሉዋፐ ሀዋዳን ግያ ቃላይ ፑቱ ጌዳ፤ ካትያ ናቡካዳናጾራ፥ ነ ቦላን ፕርደቴዳ ፕርዳይ ሀዋ: ነ ካዉተይ ኔፐ አከቴዳ። 
\v 32 ኔን አሳ ግዶፐ የደርሰታደ፥ ባዙዋ ዶኣና ደአና፤ ኔን ቦራዳን ማታ ማና። ኡባፐ ቂያ ጾሳይ አሳ ናናቱ ካዉተ ኡባ ሞድያዋነ ካዉተ እ ባረ ኮዬዳ ኡራዉ እምያዋ ኔን ኤራና ጋካናዉ፥ ላፑን ላይይ ነ ቦላ አና ያጌዳ።
\p
\v 33 ናቡካዳናጾረ ቦላ ጌዳዌ ባሱዋናካ ፖለቴዳ። አሳ ግዶፐ ጎደቲደ፥ ቦራዳን ማታ ሜዳ። አ ቦላይካ ሳሉዋፐ ዎያ ከተርሳን ካሌዳ። አ ብናናይ አንኩዋ ባልያዳን፥ አ ጹጉንይካ ካፉዋ ጹጉንዳን ድጬዳ።
\s1 ናቡካዳናጾር ጾሳ ጋላቴዳ
\p
\v 34 ሄ ላፑን ላይይ ዉሬዳ ዎደ፥ ታን ናቡካዳናጾረ ቁ ጋደ ሳሉዋ ጼላድ፤ ታ ዎዛናይ ካሀይካ ስሜዳ። ኡባፐ ቂያ ጾሳ ጋላታድ፤ መናዉ ደእያዋካ ቦንቻድነ ሳባድ።
\q1 አ ማታይ መና ማታ፤
\q2 አ ካዉተይካ የለታፐ የለታ ጋካናሳ።
\q1
\v 35 ሳኣን ደእያ አሳይ ኡባይ
\q2 አዉ አያነ ግደና።
\q1 ሳሉዋን ደእያ መታቱዋ ቦላነ
\q2 ሳኣን ደእያ አሳ ቦላ
\q1 እ ባረ ዶሶዋ ኦ።
\q2 አ ኩሽያ ተአናዉ ዳንዳይያዌ ባዋ፥
\q2 ዎይ አ አያ ኦይ? ያጊደ
\q2 ኦችያዌ ባዋ።
\p
\v 36 ታ ዎዛናይ ስሚና፥ ታ ካዉተ ቦንቹዋ ድራዉ፥ ታ አንጋይነ ታ ፑላይ ታዉ ስም አጌዳ። ካሰ ታና ዞርያዋንቱነ ታ ካፓቱ ታና ኮዬድኖ። ታን ታ ካዉተን ምናድ፤ ካሰዋፐካ አያ ግታተይ ታዉ ጉጀቴዳ።
\p
\v 37 ሀእ ስም ታን ናቡካዳናጾር ሳሉዋ ካትያ ጋላታይ፤ አ ቁ ቁ ኦይነ ቦንቻይ። አያዉ ጎፐ፥ እ ኦያባይ ኡባይ ልከ፤ አ ኦገቱ ኡባይካ ጽሉዋ፤ ቃይ ኦቶሩዋን ብያዋንታ እ ካዉሻናዉ ዳንዳዬ ያጌዳ።
\c 5
\s1 ካትያ በልሻጻራነ ጎዳ ቦላ ጻፉዋ
\r (5:1-31)
\p
\v 1 እት ጋላስ ካቲ በልሻጻር ባረ ኦሳንቻቱዋፐ እት ሻአቶ ግብራ ጊግሲደ ኡንቱንቱና እትፐ ዎይንያ ኤሳ ኡሼዳ። 
\v 2 በልሻጻር ዎይንያ ኤሳ ኡሺደ ማቴዳ ዎደ፥ ባረ አዉ ናቡካዳናጾር የሩሳላመን ደእያ ጌሻ ጎልያፐ አሄዳ ዎርቃፐነ ብራፐ ኦሰቴዳ ኡሻ ሚሻቱዋ አሀና ማላ አዛዜዳ። አያዉ ጎፐ፥ እነ አ ኦሳንቻቱ፥ አ ማቼቱነ አ ባኮቱ ኡባይ ሄ ኡሻ ሚሻቱዋን ኤሳ ኡሻና ማላ፥ እ ኮዬዳ። 
\v 3 ያትና፥ ኡንቱንቱ ሄ የሩሳላመን ደእያ ጾሳ ጌሻ ጎልያፐ አሄዳ ዎርቃፐ ኦሰቴዳ ኡሻ ሚሻቱዋ ካትያዉ አሄድኖ። ካቲ፥ አ ኦሳንቻቱ፥ አ ማቼቱነ አ ባኮቱ ሄ ሚሻቱዋን ትገቴዳ ዎይንያ ኤሳ ኡሼድኖ። 
\v 4 ኡንቱንቱ ሄ ዎይንያ ኤሳ ኡሺደ፥ ዎርቃፐ ብራፐ፥ ናሃስያፐ፥ ብራታፐ፥ ምፐነ ሹቻፐ ኦሰቴዳ ጾሳቱዋ ጋላቴድኖ።
\p
\v 5 ሄ ዎደ ቆፐናን ደእሽን፥ አሳ ኩሽያ ብራቱ ሀቃፐንቶ ከሲደ ዪደ፥ ካትያ ጎልያን ላሳነቴዳ ጎዳ ቦላን፥ ጾምፕያ ዎያ ባላ ስንን ጻፌዳ። ሄ ኩሺ ጻፍያ ዎደ፥ ካቲ ባረ ሁጲያን በኤዳ። 
\v 6 አ ሶምኢ ላመቲደ፥ ብድን ማላቴዳ፤ ቃይ ያሻን አ ጋዲ ኮኮሬዳ፤ አ ጉልባታይካ እጼዳ።
\p
\v 7 ካቲ ባረ ቃላ ቁ ኦደ፥ ሙሩንያዋንታ፥ ጾልንትያ ጼሊደ ካይያዋንታነ ሻሬቾቱዋ አሀናዳን አዛዜዳ። ኡንቱንቱ ዪና ባብሎነ አዳ ኤራንቻቱዋ ሀዋዳን ያጌዳ፤ “ሀ ጽፋትያ ናባቢደ፥ አ ብለ ታዉ ኦድያ ኡራይ ኦንነ፥ ኦቻ ቴራ ማላትያ ማዩዋ ማያና፤ አ ቆያን ዎርቃ ሀብልያ አና፤ ቃይ እ ታ ካዉተ ሞድያ ሄዘን አሳ ግዳናዋ” ያጌዳ።
\p
\v 8 ሄዋፐ ጉይያን፥ ካትያ ዞርያዋንቱ ኡባይ አ ስን አድኖ፤ ሽን ኡንቱንቱፐ ኦንነ ሄ ጽፋትያ ናባባናዉ፥ ዎይ አ ብለ ኦዳናዉ ዳንዳይቤና። 
\v 9 ሄዋን ካቲ በልሻጻር ካሰዋፐ አ ዳጋምና፥ አ ሶምኢካ ካሰዋፐ አ ብድን ማላቴዳ። አ ካፓቱካ ሀንያዋ ዬድኖ።
\p
\v 10 ካቲነ አ ካፓቱ ጫቡዋ አ ዳያ ካታታ ስሳደ፥ ኡንቱንቱ ግብራ ምያ አኮ ጎልያ ገላደ፥ ሀዋዳን ያጋዱ፤ “ካትያዉ፥ መናዉ ደአ! ሀ ቆፋን ሎይ ሻባረቶፓ፤ ነ ሶምኢካ ላመቶፖ። 
\v 11 ጌሻ ጾሳቱዋ አያናይ አን ደእያ እት አሳይ ነ ካዉተ ግዶን ደኤ። ኤራይ፥ አኬካይነ ጾሳቱዋ ማላ አዳ ኤራተይ አን ደኤ። ካሰ ነ አዉ ካቲ ናቡካዳናጾር አ ሻሬቾቶ፥ ሙሩንያዋንቶ፥ ጾልንትያ ጼሊደ ካይያዋንቶነ አያንትያዋንቶ ካፑዋ ኦደ ሱንዳ። 
\v 12 አያዉ ጎፐ፥ አዉ ሎኦ አያናይ፥ ኤራይነ አኬካይ ደኤ፤ አኩሙዋ ብላናዉ፥ ቃንእሽያ ኦዳናዉነ ጹራ ቆንጭሳናዉ እ ዳንዳዬ። ሄዋ ድራዉ፥ ካቲ ብልጻሶራ ጊደ ሱንዳ ዳኔላ ጼሳ። እ ነዉ ጽፋትያ ብለ ኦዳና” ያጋዱ።
\s1 ዳኔል ጽፋትያ ብሌዳ
\p
\v 13 ሄ ዎደ ዳኔላ ካትያኮ አህና፥ ካቲ አ ሀዋዳን ያጌዳ፤ “ኔን ዳኔሌ? ታ አዉ ካቲ ይሁዳፐ ኦሞዲደ አሄዳዋንቱፐ እቱዋ ግያዌ ኔኔ? 
\v 14 ጾሳቱዋ አያናይ ኔናን ደእያዋነ ኤራይ፥ አኬካይነ ሎይ አዳ ኤራተይ ነዉ ደእያዋ ታን ስሳድ። 
\v 15 ሀ ጽፋትያ ናባባናዉነ አ ብለ ታዉ ኦዳናዉ ሙሩንያዋንቱነ ካትያ ዞርያዋንቱ ዬድኖ፤ ሽን ኡንቱንቱ ብለ ታዉ ኦዳናዉ ዳንዳይበይክኖ። 
\v 16 ኔን ብለ ኦዳናዉነ ዴጾ ኦሻቱዋ ዛሩዋ እማናዉ ዳንዳይያዋ ታን ስሳድ። ሀእ ስም ኔን ሀ ጽፋትያ ናባባናዉነ አ ብለ ታዉ ኦዳናዉ ዳንዳዮፐ፥ ኦቻ ቴራ ማላትያ ማዩዋ ማያና፤ ነ ቆያን ዎርቃ ሀብሊ አና፤ ቃይ ኔን ካዉተ ሞድያ ሄዘን አሳ ግዳናሳ” ያጌዳ።
\p
\v 17 ዳኔል ካትያዉ ዛሪደ፥ “ኔን እምያ እሙ ኔሳ ግዶ፤ ነ ዎይቱዋካ ሀራ ኡራዉ እማ። ሀኖፐነ ታን ጽፋትያ ካትያዉ ናባባና፤ ብለካ ኦዳና።
\p
\v 18 “ካትያዉ፥ ኡባፐ ቂያ ጾሳይ ነ አዉዋ ናቡካዳናጾራዉ ካተቱዋ፥ ግታተ፥ ቦንቹዋነ አንጋ እሜዳ። 
\v 19 እ አዉ እሜዳ ግታተ ጋሱዋን ሄ አሳቱነ ዱማ ዱማ ቃላ ሃሳይያ ዛራቱ አዉ ያዬድኖነ ኮኮሬድኖ። ባረ ዎናዉ ኮይያዋ ዎዳ፤ አሻናዉ ኮይያዋካ አሼዳ፤ ባረ ቂሳናዉ ኮዬዳዋካ ቂሴዳ፤ ካዉሻናዉ ኮዬዳዋካ ካዉሼዳ። 
\v 20 ሽን እ ኦቶረቴዳ ዎደነ አ ዎዛናይ ሙሜዳ ዎደ፥ ባረ ካዉተ አራታፐ ዎዳ፤ አ ቦንቹካ ቃረቴዳ። 
\v 21 አሳ ግዶፐ የደርሰቴዳ፤ አ ዎዛናይ ካሀይካ ላመትና፥ ዶኣ ማላ ግዴዳ። ቦራዳን ማታ ሚደ፥ ደምባ ሀረቱዋና እትፐ ደኤዳ። አ ቦላይካ ሳሉዋፐ ዎያ ከተርሳን ጽርክኬዳ። ሄዌካ ኡባፐ ቂያ ጾሳይ አሳ ናናቱ ካዉተ ኡባ ሞድያዋነ እ ባረ ኮዬዳ ኡራዉ እምያዋ እ ኤራና ጋካናሳ።
\p
\v 22 “ሽን ነኖ፥ በልሻጻራ፥ ኔን አ ናአይ ሄ ኡባ ኤራደካ፥ ነ ሁጲያ ዝቂ ኦባካ። 
\v 23 ቃይ ሳሉዋ ጎዳ ቦላን ኦቶረታደ፥ ነ ሁጲያ ቁ ቁ ኦዳ። አ ጌሻ ጎልያፐ ቦንቂያን ዬዳ ዎርቃ ሚሻቱዋ ኔን አህስና፥ ነ ኦሳንቻቱ፥ ነ ማቼቱነ ነ ባኮቱ ዎይንያ ኤሳ ኡንቱንቱን ኡሼድኖ። ቃይ ጼላናዉ፥ ስሳናዉነ ኤራናዉ ዳንዳየና ጾሳቱዋ፥ ብራፐ፥ ዎርቃፐ፥ ናሃስያፐ፥ ብራታፐ፥ ምፐነ ሹቻፐ ኦሰቴዳዋንታ ጋላታዳ። ነ ሸምፑዋነ ነ ገላ ከሳ ባረ ኩሽያን ኦይቄዳ ጾሳ ቦንቻበይካ። 
\v 24 ሄዋ ድራዉ፥ ሀ ኩሽያ ብራቱ አፐ ኪተትና፥ ሀ ጽፋቲ ጻፈቴዳ።
\p
\v 25 “ጻፉካ፥ ‘ማነ፥ ማነ፥ ተቀል፥ ፓሬስ’ ያግያዋ። 
\v 26 አ ብለይካ ሀዋ፦
\b
\q1 “ማነ ግያዌ፥ ጾሳይ ነ ካተተ ላይ ፓይዲደ፥
\q2 ዉራናዳን ኦዳ ግያዋ።
\q1
\v 27 ተቀል ግያዌ ሚዛናን ልከታደ፥
\q2 ካዉሻደ ቤታዳ ግያዋ።
\q1
\v 28 ፓሬስ ግያዌ ነ ካዉተይ ሻከቲደ፥
\q2 ሜዶናቶነ ፓርሰቶ እመቴዳ ግያዋ” ያጌዳ።
\p
\v 29 ሄዋፐ ጉይያን፥ በልሻጻር አዛዝና፥ ኦቻ ቴራ ማላትያ ማዩዋ ዳኔላ ማይዜድኖ፤ አ ቆያንካ ዎርቃ ሀብልያ አድኖ፤ ቃይ ካዉተ ሞድያ ሄዘን አሳ ግዳናዳን አዋዬድኖ።\x - \xo 5:29 \xo*\xt ዶመ 41:42\xt*\x*
\p
\v 30 ሄ ጋላስ ቃማ ሞርከቱ ገሊደ፥ ባብሎነ ካትያ በልሻጻራ ዎድኖ። 
\v 31 አ ካዉተ ሜዶንያ ዳርዮሰ አኬዳ። ሄ ዎደ ዳርዮሳዉ ላይይ ኡሱፑን ታማነ ላአ።
\c 6
\s1 ጾሳይ ዳኔላ ጋሞቱዋ ዶናፐ አሼዳ
\r (6:1-28)
\p
\v 1 ካቲ ዳርዮሰ ባረ ካዉተ ኡባ ግዶን ባረፐ ጋርሳና ቢታ ሞድያ ጼታነ ላታሙ አሳቱዋ ሱንያዌ ሎአ ጊደ ቆፔዳ። 
\v 2 ቃይ ካትያዉ አያነ ፓጭሰናዳን፥ ሄ ቢታ ሞድያዋንታ ጼላና ማላ፥ ሄዙ አሳቱዋ ካፑዋ ኦደ ዶሬዳ፤ ዶረቴዳዋንቱፐ እቱ ዳኔላ። 
\v 3 ዳኔል ኦሱዋ ኦናዉ ባረዉ ደእያ ዱማ ኤራን ሀራ ካፓቱዋፐነ ቢታ ሞድያዋንቱፐ አደ ቤቴዳ። ሄዋ ድራዉ፥ ካቲ አ ባረ ኩመን ካዉተ ቦላ ቃ ኦደ ሱንናዉ ሀልቼዳ።
\p
\v 4 ያትና፥ ቢታ ሞድያዋንቱነ ካፓቱ ዳኔላ ሞታናዉ፥ እ አይስያ አይሱዋ ቦላ ባላ ደማና ጊደ ኮዬድኖ። ሽን እ ሎይ ሱረነ አማነትያ አሳ፤ ቃይ ጌላባ ኦና አሳ ግዴዳ ድራዉ፥ አ ሞታናዉ አ ቦላ አይ ባላነ ደምበይክኖ። 
\v 5 ዉርሰን ኡንቱንቱ ጊደ፥ “አ ጾሳ ህግያ ባጋና ግዶፐፐ አትና፥ ሀራ ባጋና ዳኔላ ሞትያባ ደሞኮ” ያጌድኖ።
\p
\v 6 ሄዋፐ ጉይያን፥ ቢታ ሞድያዋንቱነ ካፓቱ እትፐ ካትያኮ ቢደ፥ ሀዋዳን ያጌድኖ፤ “ካትያዉ ዳርዮሳ፥ መናዉ ደአ! 
\v 7 ኑን ነ ካዉተ ኦሱዋ ኦያ ካፓቱ፥ ቢታ ሞድያዋንቱ፥ ኦላ ጋዳዋቱ፥ ዞርያዋንቱነ አዉራጃ ሞድያዋንቱ ኡባይ ማዬዳ እት ዞረታይ ደኤ። ሄዌካ ሀችፐ ቢደ ሀታሙ ጋላሳይ ጋካናዉ፥ አይ አሳይነ ኔና ካትያ ዎሳናፐ አትና፥ ሀራ አይ አሳካ ዎይ አይ ጾሳካ ዎሰናዳን፥ ኔን አዋዩዋ ከሳናዳን ኢጼዳ ዎስያዌ ደኦፐ፥ ጋሞቱዋ ኦላን ኦለታናዳን ኔን አዛዛናሳ። 
\v 8 ስም ካትያዉ፥ ሀ አዋዩ ሻረተና ሜዶናቱዋነ ፓርሰቱዋ ህግያዳን፥ ምኖነ ላመተናዋ ግዳና ማላ ፓራማ” ያጌድኖ። 
\v 9 ሄዋ ድራዉ፥ ካቲ ዳርዮሰ አዋዩዋ ጻፊደ ፓራሜዳ።
\p
\v 10 ዳኔል አዋዩ ፓራመት ከሴዳዋ ኤሬዳ ዎደ፥ ባረ ጎለ ቤዳ፤ ፖቅያን ደእያ ክፍልያ ገሌዳ። ሄ ክፍልያ ማስኮቲ የሩሳላመ ባጋ ስሚደ ዶየት ደእሽን፥ ባረ ካሰ ዎስያዋዳንካ ጉልባቲደ፥ ባረ ጾሳ ጋላቲደ፥ ሀች ሀች ሄዙ ገደ ዎሴዳ።
\p
\v 11 ሄዋፐ ጉይያን፥ ሀ አሳቱ እትፐ ቢደ፥ ዳኔል ባረ ጾሳ ዎስሺናነ ማዱዋ ኦችሽን ደሜድኖ። 
\v 12 ካትያኮ ቤድኖ፤ ካትያ፥ “ካትያዉ፥ ሀ ሀታሙ ጋላሳቱዋ ግዶን ኔና ዎሳናፐ አትና፥ ሀራ አይ አሳካ ዎይ አይ ጾሳካ ዎስያዌ ጋሞቱዋ ኦላን ኦለታናዳን አዋያበይኪየ?” ያጊደ አዋዩዋባ ሃሳዬድኖ።
\p ካቲ ዛሪደ፥ “አዋያድ፤ አዋዩ ሻረተና ሜዶናቱዋነ ፓርሰቱዋ ህግያዳን ምኔዳዋ” ያጌዳ።
\p
\v 13 ኡንቱንቱ፥ “ካትያዉ፥ ያትና ሄኮ ይሁዳፐ ኦሞደቲደ፥ ዬዳዋንቱፐ እቱዋ ግድያ ዳኔል፥ ነዉካ ኔን ፓራማደ ከሴዳ ነ አዋዮካ አዛዘተና። እ ሀእካ ሀች ሀች ሄዙ ገደ ባረ ጾሳ ዎሴ” ያጌድኖ።
\p
\v 14 ካቲ ሄዋ ስሴዳ ዎደ ሎይ ካዮቴዳ፤ ዳኔላ አሻናዉ ቆፋ ቃቺደ፥ አዋይ ዉላና ጋካናዉ፥ አሽያ ኦግያ ኡባ ኮዬዳ።
\p
\v 15 ሄ ዎደ አሳቱ እትፐ ካትያኮ ቢደ፥ “ካትያዉ፥ ሜዶናቱዋነ ፓርሰቱዋ ህግያዳን ግዶፐ፥ ካቲ አዋዬዳ አዋዩ ዎይ አዛዜዳ አዛዙ ላመተናዋ ነዉ ኤራ” ያጌድኖ።
\p
\v 16 ሄዋ ድራዉ፥ ካቲ አዛዝና፥ ዳኔላ አሂደ፥ ጋሞቱዋ ኦላን ኦሌድኖ። ካቲ ዳኔላ፥ “ኔን ኡባ ገደ ጎይንያ ጾሳይ ኔና አሾ” ያጌዳ። 
\v 17 ኡንቱንቱ ሹቻ አሂደ፥ ኦላ ዶና ባሬድኖ፤ ዳኔላ ቦላ ኦሰቴዳባይ ላመተና ማላ፥ ካቲ ባረ ማታፋነ ባረ ካዉተ ካፓቱዋ ማታፋ ጎርዴዳ ሹቻ ቦላ ዎዳ። 
\v 18 ሄዋፐ ጉይያን፥ ካቲ ባረ ጎልያ ስሚደ፥ ቁማ ሜናንነ ፓሽክስያዋ አያካ ባረኮ ሺሸናን፥ ገምእሹዋና ዪደ አቄዳ።
\p
\v 19 ዎንታ ጉራን ካቲ ደንዲደ፥ ኤሌሊደ ጋሞቱዋ ኦላኮ ቤዳ። 
\v 20 ኦላኮ ጋኪደ ካዩዋን፥ “ደኡዋ ጾሳ ቆማዉ ዳኔላ፥ ኔን ኡባ ገደ ጎይንያ ነ ጾሳይ ኔና ጋሞቱዋፐ አሻናዉ ዳንዳዬዴ?” ያጊደ ጼሴዳ።
\p
\v 21 ዳኔል ዛሪደ፥ “ካትያዉ፥ መናዉ ደአ! 
\v 22 ታ ጾሳይ ባረ ኪታንቻ ኪቲደ፥ ጋሞቱዋ ዶና ጎርዴዳ፤ ኡንቱንቱ ታና ቦችበይክኖ። አያዉ ጎፐ፥ ታን አ ስንን ጽሉዋ። ቃይ ካዎ፥ ታን ነ ስንንካ ኢታባ ኦበይከ” ያጌዳ።
\p
\v 23 ካቲ ሎይ ናሸቴዳ፤ ዳኔላ ኦላፐ ከሳናዳን አዛዜዳ። ዳኔል ኦላፐ ከሴዳ፤ ባረ ጾሳን እ አማነቴዳ ድራዉ፥ አ ቦላን አያ ደሸቴዳ ሳአይካ ቤትቤና።
\p
\v 24 ሄዋፐ ጉይያን፥ ዳኔላ ሞቴዳ አሳቱዋ አሀናዳን ካቲ አዛዜዳ። ኡንቱንቱ ኦይቀቲደ፥ ባረንቱ ማጫ አሳናነ ባረንቱ ናናቱዋና እትፐ ዪደ፥ ኡባይካ ጋሙዋ ኦላን ኦለቴድኖ። ኡንቱንቱ ኦላ ዉርሰ ጋከናን ደእሽን፥ ጋሞቱ ሶጲ አኪደ፥ ኡንቱንቱ መቀ መንሬድኖ።
\p
\v 25 ሄዋፐ ጉይያን፥ ካቲ ዳርዮሰ አሳ ኡባዉ፥ ካዉተቶ ኡባዉነ ዱማ ዱማ ቃላን ሃሳይያ ዛረቶ ኡባዉ ሀዋዳን ያጊደ ጻፌዳ፦
\p “ሳሮ ደኢቴ!
\p
\v 26 “ታ ካዉተን ደእያ አሳይ ኡባይ ዳኔላ ጾሳዉ ያያና ማላነ ኮኮራና ማላ፥ ታን አዋዩዋ ከሳድ።
\b
\q1 “አያዉ ጎፐ፥ እ ደኡዋ ጾሳ፤
\q2 ቃይ እ መናዉ ደእያዋ።
\q1 አ ካዉተይ ሙለካ የና፤
\q2 አ ካተቱዋ ማታይካ ሙለ አተና።
\q1
\v 27 እ አሼነ፥
\q2 መቱዋፐ ከስ አኬ።
\q1 ሳሉዋንካ ሳንካ፥ ማላታነ ኦራባ ኦ።
\q2 ዳኔላ ጋሞቱዋ ዶናፐ፥
\q2 አሼዳዌ አ!” ያጌዳ።
\p
\v 28 ሄዋ ድራዉ፥ ሀ ዳኔል ዳርዮሳ ካዉተ ዎደነ ፓርስያ ቂሮሳ ካዉተ ዎደ ኡባን እሻሊደ ደኤዳ።
\c 7
\s1 ዳኔል በኤዳ ኦይዱ ዶአቱዋ ሳፃ
\r (7:1-27)
\p
\v 1 ባብሎነ ካቲ በልሻጻር ካተቴዳ ኮይሮ ላይ፥ ዳኔል ባረ አርሳን ዛቁሊደ፥ አኩሙዋነ ሳፃ በኤዳ። እ ባረ አኩሙዋን በኤዳ አይፈ የዎቱዋ ጻፌዳ።
\p
\v 2 ዳኔል ሀዋዳን ያጊደ ጻፌዳ፤ “ቃማ ታን ታ ሳጻን ሳሉዋፐ ዬዳ ኦይዱ ጫርኮቱ ዎጋ አባ ቡልአክሽን በኣድ። 
\v 3 ቃይ እቱ እቱዋፐ ዱማትያ ኦይዱ ዎልቃማ ዶአቱ አባፐ ከሴድኖ።\x - \xo 7:3 \xo*\xt ሳፃ 13:1፤ 17:8\xt*\x*
\p
\v 4 “ኮይሮ ዶአይ ጋሙዋ ማላቴ፤ ቃይ አዉ አንኩዋዳን ቀፊ ደኤ። ታ ጼልሽን፥ አ ቀፊ ሾደትና፥ ሳኣፐ ደንዲደ፥ አሳዳን ላኡ ገድያን ኤቃናዳን ኦሰቴዳ፤ ቃይ አሳ ዎዛናይካ አዉ እመቴዳ።\x - \xo 7:4-6 \xo*\xt ሳፃ 13:2\xt*\x*
\p
\v 5 “ቃይ ላኤን ዶአይ እት ባጋ ቁ ጊደ ኤቄዳ ባባን ግያ ኢታ ዶኣ ማላቴ። ሄ ዶአይ ሄዙ ጋይልያ መቀ ባረ ዶናን ባሪደ፥ ባረ ማታን ሳእ ኦይቄዳ። ያቴዳዌ፥ ‘ደንዳደ ዳሮ አሹዋ ማ’ ጌተቴዳ።
\p
\v 6 “ሄዋፐ ስምና ቃይ፥ ማህያ ማላትያ ሀራ ዶኣ በኣድ። አ ዞክያን ካፉዋ ቀፍያ ማላትያ ኦይዱ ቀፈቱ ደኢኖ። ቃይ አዉ ኦይዱ ሁጰቱ ደኢኖ። ሀ ዶአዉ ሞድያ ማታይ እመቴዳ።
\p
\v 7 “ሄዋፐ ስምና፥ ቃማ ሳጻን ያሽያ፥ ዳጋንያነ ሎይ ምንያ ኦይደን ዶኣ በኣድ። አዉ ዎልቃማ ብራታ አቻቱ ደኢኖ። እ ባረናን ጋከቴዳዋ ኡባ ኡንቱንቱን መንሬደ ሜነ አቴዳዋ ባረ ገድያን የሬ። ካሰ ታ በኤዳ ዶአቱዋ ኡባፐ እ ዱማቴ፤ አዉ ታሙ ካጪ ደኤ።\x - \xo 7:7 \xo*\xt ሳፃ 12:3፤ 13:1\xt*\x* 
\v 8 ታን ሀ ካጨቱዋባ ቆፕሽና፥ ሄ ካጨቱዋ ግዶፐ ሀራ እት ጉ ካጪ ከስሽን በኣድ፤ ሄ ካጪ የንኮ ካጨቱዋፐ ሄዛቱዋ ቆሊደ ኦሌዳ። ሀ ካጭያዉ አሳ አይፍያ ማላትያ አይፊነ ኦቶሩዋን ሃሳይያ እንጻርሳይ ደኤ።\x - \xo 7:8 \xo*\xt ሳፃ 13:5-6\xt*\x*
\s1 መናዉ ደእያዋፐ ቆንጬዳ ሳፃ
\p
\v 9 “ታን ሄዋ ጼልሽን፥ ካተቱዋ አራታቱ ኡተዉ ጊጌድኖ። መናፐ ደእያዌ ባረ አራታን ኡቴዳ። አ ማዩ ሻቻዳን፥ አ ሁጲያ ብናናይካ ፑቱዋዳን ቦ። አ አራታይነ አራታ ይንግረቱ ታማዳን ላጮቲኖ።\x - \xo 7:9 \xo*\xt ሳፃ 20:4፤ 1:14\xt*\x* 
\v 10 ታማ ሻፋይ አ ስንፐ ፑልቲደ ከሴ። ሻአ ገደ ሻአቱ አዉ ኦኖ፤ ቃይ ዳሮ ሚሎነቱ አ ስንን ኤቄድኖ። ያት ደእሽን ፕርዳ ፕርድያዌ ዶመቴዳ፤ ማጻፋቱካ ዶየቴድኖ።\x - \xo 7:10 \xo*\xt ሳፃ 5:11፤ 20:12\xt*\x*
\p
\v 11 “ሀ ጉ ካጪ ሃሳይያ ኦቶሮ ቃላይ ታዉ ስሰትያ ድራዉ፥ ታን ሀእካ ሽሳደ ጼላድ። ታን ጼልሽን ሀ ዶአይ ሀይቂደ፥ ኤጽያ ታማን ኦለቲደ ዬዳ። 
\v 12 የንኮ ሄዙ ዶአቱዋፐ፥ ኡንቱንቱ ማታይካ አከቴዳ፤ ሽን ኡንቱንቱ ኬረቴዳ ዎድያ ፓጻ ደእኖ ጌተቴድኖ።
\p
\v 13 “ቃይካ ታን ሄ ቃማ ሳጻን፥ አሳ ናኣ ማላትያዌ ሳሉዋ ሻርያና ይያዋ በኣድ። መናፐ ደእያዋኮ ሺቅና፥ ኡንቱንቱ አ አ ስን አድኖ።\x - \xo 7:13 \xo*\xt ማቶሳ 24:30፤ 26:64፤ ማር. 13:26፤ 14:62፤ ሉቃሳ 21:27፤ ሳፃ 1:7፣ 13፤ 14:14\xt*\x* 
\v 14 አዉ ማታይ፥ ቦንቹነ ካዉተይ እመቴዳ። አሳይ ኡባይ፥ ካዉተቱ ኡባይነ ዱማ ዱማ ቃላን ሃሳይያ ዛራቱ ኡባይ አዉ ሞደቴድኖ። አ ማታይ መናዉ ሻረተና ማታ፤ አ ካዉተይ ሙለካ የናዋ።\x - \xo 7:14 \xo*\xt ሳፃ 11:15\xt*\x*
\s1 ሳፃ ብለ
\p
\v 15 “ታና ዳኔላ ግዶፐ፥ ታ በኤዳዋን ኡባን ዳጋማድ፤ ታ ሳጻይካ ታና ሻባርሴዳ። 
\v 16 ታን ሄዋ ኤቄዳዋንቱፐ እቱዋኮ ሺቃደ፥ ሀ ኡባዉ ቱሙ ብለይ አየንቶ ኦቻድ። እ ታዉ አ ብለ ኡባ ሀዋዳን ያጊደ ኦዴዳ፤ 
\v 17 ‘ሀ ኦይዱ ዎልቃማ ዶአቱ ሀ ሳኣን ስንፐ ደንዳና ኦይዱ ካዉተቱዋ። 
\v 18 ሽን ኡባፐ ቂያ ጾሳ ጌሻቱ አ ካዉተ አኪደ፥ መናዉ ባረሳ ኦና፤ መና ካዉተ ኡንቱንቱ ላታና’ ያጌዳ።\x - \xo 7:18 \xo*\xt ሳፃ 22:5\xt*\x*
\p
\v 19 “ሄዋፐ ጉይያን፥ ታን ሀራ ዶአቱዋ ኡባፐ ዱማቲደ ያሽያ ኦይደን ዶአዉ ደእያ ቱሙ ብለ ኤራናዉ ኮያድ። ሄ ዶአዉ ብራታ አቻይነ ናሃሰ ብራታ ጹጉንይ ደኤ፤ እ ባረናን ጋከቴዳዋ ኡባ መንሬደ ሜነ ሚሽን አቴዳዋ ባረ ገድያን የሬ። 
\v 20 ቃይ ሀ ዶኣ ሁጲያን ደእያ ታሙ ካጨቱዋባነ ቃይ ጉየፐ ከሲደ፥ ኡንቱንቱፐ ሄዛቱዋ ቆል ኦሌዳ ቄር ካጭያባካ ኤራናዉ ኮያድ። ሄ ቄር ካጭያዉ አይፈቱነ ኦቶሮ ቃላ ሃሳይያ እንጻርሳይ ደኤ። ሄ ካጪ የንኮቱዋ ኡባፐ አ ያሽያዋ። 
\v 21 ታን ጼልሽን፥ ሀ ካጪ ጌሻቱዋና ኦላ ጋከቲደ፥ ኡንቱንታ ጾኔዳ።\x - \xo 7:21 \xo*\xt ሳፃ 13:7\xt*\x* 
\v 22 ሄዌ ሀኔዳዌ፥ መናፐ ደእያዌ ያና ጋካናዉነ፥ ኡባፐ ቂያ ጾሳ ጌሻቶ ፕርዳይ ፕርደታና ጋካናሳ፤ ኡንቱንቱ ካዉተ ላትያ ዎዲካ ጋኬዳ።\x - \xo 7:22 \xo*\xt ሳፃ 20:4\xt*\x*
\p
\v 23 “እ ታዉ ብለ ሀዋዳን ያግ ኦዴዳ፤ ‘ኦይደን ዶአይ ሀ ሳኣን ስንፐ ደንዳና ኦይደን ካዉተ። ሄ ካዉተይ ሀራ ካዉተ ኡባፐ ዱማ፤ ቢታ ሳኣ እ ማና፥ የናነ መንሬና። 
\v 24 ቃይ ታሙ ካጨቱ ሀ ካዉተቱዋፐ ደንዳና ታሙ ካተቱዋ። ሄዋፐ ጉይያን፥ ካሰ ታሙ ካተቱዋፐ ዱማትያ ሀራ ካቲ ደንዳና። እ ኡንቱንቱፐ ሄዙ ካተቱዋ ጾኒደ ሞዳና።\x - \xo 7:24 \xo*\xt ሳፃ 17:12\xt*\x* 
\v 25 እ ኡባፐ ቂያ ጾሳ ቦላ ጻሊደ ሃሳያና፤ አ ጌሻቱዋካ ኡቁናና። ቃይ ዎደቱዋነ ዎጋ ላማናዉ ቃቃታናዋ። ዎዲ፥ ዎደቱነ ዎድያ ባጋይ ጋካናዉ ጌሻቱ አ ማታፐ ጋርሳና ሞደታና።\x - \xo 7:25 \xo*\xt ሳፃ 12:14፤ 13:5-6\xt*\x*
\p
\v 26 “ ‘ሽን ሄዋፐ ጉይያን፥ ፕርዳ ፕርድያዌ ዶመታና፤ አ ማታይ ሙሊ አከታና፤ እ መናዉ ያና። 
\v 27 ሳሉዋፐ ጋርሳና ደእያ ካዉተቱዋ ኡባ ማታይ፥ ዎልቃይነ ግታተይ ኡባፐ ቂያ ጾሳ ጌሻ አሳቶ እመታና። አ ካዉተይካ መና ካዉተ ግዳናዋ፤ ሳኣ ሞድያዋንቱ ኡባቱ አዉ አዛዘታናነ አዉ ኦና’ ያጌዳ።\x - \xo 7:27 \xo*\xt ሳፃ 20:4፤ 22:5\xt*\x*
\p
\v 28 “ታ ሳጻባይ ሀዋን ዉሬዳ። ታን ዳኔል፥ ታ ቆፋን ዳሮ ሻባረታድ፤ ታ ሶምኢካ ሄዋ ኤርሴ። ሽን ኡባባካ ታን ታ ዎዛናን ዎድ” ያጊደ ጻፌዳ።
\c 8
\s1 ዳኔል በኤዳ ዶርሳ ኦርግያነ ዴሻ ኦርግያ ሳፃ
\r (8:1-27)
\p
\v 1 በልሻጻር ካተቴዳ ሄዘን ላይ፥ ታን ዳኔል ሀዋፐ ካሰ በኤዳ ሳጻፐ ሀራ ሳፃ በኣድ። 
\v 2 ሄ ሳጻን አያ በኣድታ ጎፐ፥ ኤላማ ጋድያን ሱሳ ግያ ካታማን፥ ኡላያ ግያ ሻፋ ማታን ኤቄዳ ታና በኣድ።
\p
\v 3 ሄ ሻፋ ማታን ላኡ አዱሳ ካጨቱ ደእያ ዶርሳ ኦርጊ ኤቄዳ። ላኡ ካጨቱዋፐ እቱ ጉየፐ ዶሌዳ፤ ሽን ኮይሮ ዶሌዳዋፐ አዱቄ። 
\v 4 ሄ ዶርሳ ኦርጊ ባረ ካጭያን ቃይጫናዉ፥ አዋይ ዉልያ ባጋ፥ ሁጲሳ ባጋናነ ገድሳ ባጋ ንግሽን በኣድ። አናና ኤቀታናዉነ አ ዎልቃፐ ከስ አካናዉ አይ መሂካ ዳንዳይቤና። እ ባረ ኮዬዳዋ ኦዳ፤ ያቲደ ባረና ግታዬዳ።
\p
\v 5 ታን ሀ ሳጻባ ቆፕሽን፥ እት ዴሻ ኦርጊ አዋይ ዉልያ ባጋፐ ከሲደ፥ ቢታ ሳኣ አደ፥ ገዲ ሳኣ የናን ዬዳ፤ አዉ ላኡ አይፈቱዋፐ ግዱዋን እት ዎጋ ካጪ ደኤ። 
\v 6 እካ ዳሮ ሀንቁዋና ዲሲደ፥ ሻፋ ማታን ታን በኤዳ ላኡ ካጭያና ደእያ ዶርሳኮ፥ ዋታዉ ንጊደ ዬዳ። 
\v 7 ጋኪደ፥ ዳሮ ይሎቲደ፥ ታን ጼልሽን፥ ዶርሳ ኦርግያ ካጨቱ ላኡካ መአና ጋካናዉ፥ ኢታ ዶምኤ ዶምኤዳ። ዶርሳ ኦርግያዉ አናና ኤቀታናዉ ዎልቃይ ባዋ፤ ሄዋ ድራዉ፥ ዴሻ ኦርጊ አ ኩንድሲደ፥ የ ኤቄዳ። ዴሻ ኦርግያ ዎልቃፐ ሄ ዶርሳ ኦርግያ አሽያዌ ባዋ።
\p
\v 8 ሄ ዴሻ ኦርጊ ሎይ ግታቴዳ፤ ሽን አ ዎልቃይ ዳር ዳር ብያ ዎደ፥ አ ዎጋ ካጪ መኤዳ፤ ኤለካ፥ ኦይዱ ዎጋ ካጨቱ ቢታዉ ኦይዱ ባጋ ስሚደ ድጬድኖ። 
\v 9 ሀ ኦይዱ ካጨቱዋፐ እቱዋ ቦላ ሀራ ጉ ካጪ ዶሊደ፥ ዎልቃን ገድሳኮ፥ አዋይ ዶልያ ባጋ እስራኤልያ ጋድያኮ ስሚደ ድጬዳ። 
\v 10 እ ቢደ ሳሉዋን ደእያ ኦላንቻቱዋ ጋካናዉ ድጬዳ፤ ሳሉዋ ጾልንተቱዋፐ ኡንደናዋንታ ሳኣን ዱገ ኦሊደ፥ ኡንቱንታ የዳ።\x - \xo 8:10 \xo*\xt ሳፃ 12:4\xt*\x* 
\v 11 ቃይ እ ባረና ቁ ኦደ፥ ኦላንቻቱዋ ጋዳዉዋ ጾሳና ልክሴዳ። ሀቼ ሀች አሳይ ያርሽያ ጹገትያ ያርሹዋካ ተኤዳ። ቃይ አ ጌሻ ጎልያካ ቱንሴዳ። 
\v 12 ማካላ ጋሱዋን ጌሻቱዋ ኦላንቻቱነ ሀች ሀች ያርሽያ ያርሹ ሄ ካጭያዉ እመቴዳ። ቱሙካ ሳኣን ኦለቴዳ፤ ሄ ካጪ ኦያባይ ኡባይ አዉ እንጀቴዳ።
\p
\v 13 ሄዋፐ ጉይያን፥ እት ጌሻ ኪታንቻይ ሃሳይሽን ታን ስሳድ። የንኮ ጌሻ ኪታንቻይ ሀ ኪታንቻ፥ “ሀ ሀች ሀች ያርሽያ ያርሹዋባ፥ ሀ ማካላይ አህያ ባሻባነ ሳሉዋ ኦላንቻቱነ ጌሻ ሳአይ የቲደ ደአናባ ኦድያ ሳጻይ አዉደ ፖለታኔ?” ያጊደ ኦቼዳ።
\p
\v 14 እ ዛሪደ፥ “ላኡ ሻኣነ ሄዙ ጼቱ ዎንታይነ ኦማርሳይ ጋካናዉ ጋምአና፤ ሄዋፐ ጉይያን፥ ጌሻ ጎሊ ጌያና” ያጊደ ኦድሽን ስሳድ።
\s1 ኪታንቻይ ጋብሬል ሳፃ ብሌዳ
\p
\v 15 ታን፥ ዳኔል፥ ሀ ሳፃ በኣደነ አ ብለ ኤራናዉ ቆፓደ ደእሽን፥ እት አሳ ማላትያዌ ታ ስንን ኤቄዳዋ በኣድ። 
\v 16 ቃይ ታን ኡላያ ሻፋፐ፥ “ጋብሬላ፥ ሀ ብታንያዉ ሀ ሳፃ ብለ ኦዳ” ያግያ ኮሻ ስሳድ።\x - \xo 8:16 \xo*\xt ሉቃሳ 1:19፣ 26\xt*\x*
\p
\v 17 እ ዪደ ታን ኤቄዳ ሳኣ ማቴዳ ዎደ፥ ታን ዳጋማደ፥ ታ ሶምኡዋ ቢታዉ ዱገ ዛራደ ኩንዳድ። እ ታና፥ “አሳ ናአዉ፥ ሀ ሳጻይ ዉርሰ ዎድያባ በስያዋ ግድያዋ አኬካ” ያጌዳ።
\p
\v 18 እ ታናና ሃሳይያ ዎደ፥ ታን ሳኣን ጉፋናደ፥ ገምእሹዋ ካይሮታድ። ያትና፥ እ ታና ሳኣፐ ፑደ ደንደ፥ ታ ገድያን ኤሴዳ። 
\v 19 ታና፥ “ስሳ፥ ታን ጾሳ ሀንቁዋ ዉርሰን ሀናናዉ ደእያዋ ኦዳይ፤ አያዉ ጎፐ፥ ሀ ሳጻይ ጾሳይ ኬር ዎዳ ዉርሰ ዎድያን ሀናናባ ኦዴ።
\p
\v 20 “ኔን በኤዳ ላኡ ካጭያና ደእያ ዶርሳ ኦርጊ ሜዶናነ ፓርሰ ካተቱ ሌምሱዋ። 
\v 21 ዴሻ ኦርጊ ቃይ ግሪከ ካትያ ሌምሱዋ፤ አ ላኡ አይፈቱዋፐ ግዱዋን ደእያ ዎጋ ካጪ ኮይሮ ካትያ። 
\v 22 ካጪ መእ ዎና፥ አ ሳኣን ዶሌዳ ኦይዱ ካጨቱ አ ካዉተፐ ሻከቲደ ከሳና ኦይዱ ካዉተቱዋ ሌምሱዋ፤ ሽን ኡንቱንቱ ዎልቃይ ኮይሮዋ ዎልቃ ጋከና።
\p
\v 23 “ኡንቱንቱ ካዉተ ዉርሰይ ጋክያ ዎደነ ኡንቱንቱ ማካላይ ዛዋ ጋክያ ዎደ፥ እት መቀ ኢታነ ጭምያ ጭንጫ ካቲ ደንዳና። 
\v 24 እ ሎይ ምኖ ግዳና፤ ሽን ባረ ዎልቃና ግደና። ዳጋንያ ባሻ እ ባይዛና፤ እ ኦያባይ ኡባባይ አዉ እንጀታና። እ ምኖ አሳቱዋነ ጌሻ አሳቱዋ ይሳና። 
\v 25 እ ጭምያ ድራዉ፥ አዉ እንጀታና፤ ቃይ እ ባረና ኡባፐ ቁ ቁ ኦና። ኡንቱንቱ ሳአይ ሳራ ግ ደእሽን፥ ኡንቱንቱፐ ዳሮቱዋ ዎና፤ ቃይ ካፓቱዋ ካፑዋና ኤቀታና። ሽን አሳይ ቦቼናን እ ባረዉ ያና።
\p
\v 26 “ነዉ ኦደቴዳ ላኡ ሻአነ ሄዙ ጼቱ ዎንታነ ኦማርሳ ጼልያ ሳጻይ ቱማ፤ ሽን ዳሮ ዎድያፐ ጉይያን ፖለታናዉ ደእያ ድራዉ፥ ጎርዳደ ማታፋ አ ቦላ ዎደ ናጋ” ያጌዳ።
\p
\v 27 ታን ዳኔል፥ ሎይ ዳቡሬዳ ድራዉ፥ ሳከታደ ዳሮ ጋላሳ ግሳድ። ሄዋፐ ጉይያን ደንዳደ፥ ካትያ ኦሱዋ ባድ። ሀ ሳጻን ታን ሎይ ሻቢረታድ፤ አኬካናዉካ ዳንዳያበይከ።
\c 9
\s1 ዳኔል ባረ አሳ ድራዉ ዎሴዳ
\r (9:1-27)
\p
\v 1 ሜዶና ቢታ አሳ ግድያ አርጸክስሳ ናአይ ዳርዮሰ ባብሎነን ካተቴዳ። 
\v 2 እ ካተቴዳ ኮይሮ ላይ፥ ታን ዳኔል፥ ጌሻ ማጻፋቱዋ ናባባድ፤ ትምቢትያ ኦድያ ኤርማሳዉ መና ጎዳይ ኦዴዳዋዳን የሩሳላመ ላፑን ታሙ ላይ ኮለቲደ ጋምአናዉ ደእያዋ አኬካድ።\x - \xo 9:2 \xo*\xt ኤር. 25:11፤ 29:10\xt*\x*
\p
\v 3 ሄዋ ድራዉ፥ ታን ጎዳ ጾሳኮ ስማደ፤ ማቃ ማያደ፥ ብድን ታ ሁጲያ ቦላ ቆላደ፥ ጾማደ፥ አ ዎሳይነ አዉ ዋትዋታይ።
\p
\v 4 ታን ናጋራ ፓጻደ፥ መና ጎዳ ታ ጾሳ ሀዋዳን ያጋደ ዎሳድ፤ “አቤት ጎዳዉ፥ ዎልቃማነ ያሽያ ጾሳዉ፥ ኔና ሲቅያዋንቶነ ነ አዛዞ ኤኖ ግያዋንቶዉ ነ አገና ሲቁዋነ ጫቁዋ ናግያዎ፥ 
\v 5 ኑን ናጋራ ኦዶነ ባሌዶ፤ ኑን ኢታባ ኦዶነ ማካሌዶ፤ ነ አዛዙዋፐነ ነ ዎጋፐ ዎራ ስሜዶ። 
\v 6 ኑ ካተቶ፥ ኑ ካፓቶ፥ ኑ አዋቶነ ሳኣን ደእያ አሳ ኡባዉ ነ ሱንን ትምቢትያ ኦዴዳ ነ ቆማቱ ኦዴዳዋ ስሰናን እጼዶ።
\p
\v 7 “አቤት ጎዳዉ፥ ኔን ጽሉዋ፤ ሽን ኑን ሀች ዬላ ማዬዶ። ይሁዳንነ የሩሳላመን ደእያ አሳይ ኡባይ፥ ኑን ነዉ አማነተናን እጽና፥ ኔን ሃኮ ቢታንነ ማታ ጋድያን ላሌዳ እስራኤልያ አሳይ ኡባይ ዬላቴዶ። 
\v 8 አቤት መና ጎዳዉ፥ ኑን፥ ኑ ካተቱ፥ ኑ ካፓቱነ ኑ አዎቱ ኔና ናቄዳ ጋሱዋን ዬላ ማዬዶ። 
\v 9 ሽን ኑን አዉ ማካሌዳባ ግዶፐካ፥ ጎዳይ ኑ ጾሳይ ማርያዋነ አቶ ያግያዋ። 
\v 10 ኑን መና ጎዳዉ፥ ኑ ጾሳዉ፥ አዛዘትቦኮ፤ ቃይ ትምቢትያ ኦድያ ባረ ቆማቱ ባጋና እ እሜዳ አ ህግያ ናግበይኮ። 
\v 11 እስራኤልያ አሳይ ኡባይ ነ ህግያ መንደ፥ ዎራ ስሜድኖ፤ ነ አዛዞካ ኤኖ ግበይክኖ።
\p “ኑን ነ ቦላ ናጋራ ኦዳ ድራዉ፥ ጾሳ ቆማ ሙሴ ህግያ ማጻፋን ጻፈቴዳ ሸቃይነ ፕርዳይ ኑ ቦላ ትገቴዳ። 
\v 12 ቃይ ኑ ቦላነ ኑና ካለያዋንቱ ቦላ ዎልቃማ ባሻ አሀናዉ ኔን ሃሳዬዳ ቃላ ኑ ቦላ ፖላዳ። አያዉ ጎፐ፥ የሩሳላመ ቦላ ጋኬዳዋ ማላይ ሳሉዋፐ ጋርሳን ሀራ ጋድያ ቦላ ሙለካ ጋክቤና። 
\v 13 ሙሴ ህግያን ጻፈቴዳዋዳን፥ ሀ ባሻይ ኡባይ ኑ ቦላ ጋኬዳ። ኑ ናጋራፐ ስምበይኮ፤ ነ ቱሙዋ ስስበይኮ፤ ኔና፥ መና ጎዳ ኑ ጾሳካ ማሮታ ኦችበይኮ። 
\v 14 መና ጎዳይ ሀ ባሻ ኑ ቦላን አሀናዉ ጉየ ግቤና፤ አያዉ ጎፐ፥ መና ጎዳይ ኑ ጾሳይ ባረ ኦያባን ኡባን ጽሉዋ፤ ሽን ኑን አዉ አዛዘተናን እጼዶ።
\p
\v 15 “አቤት ጎዳዉ፥ ኑ ጾሳዉ፥ ካሰ ነ አሳ ነ ምኖ ኩሽያን ግብጼፐ ከሳደ፥ ሀቼዋዳንካ ነ ሱን ጼስሴዳዎ፥ ኑን ናጋራ ኦዶ፤ ኑን ባሌዶ። 
\v 16 አቤት ጎዳዉ፥ ኔን ካሰ ነ ጽሎ ኦሱዋ ኡባ ኦዳዋዳን፥ ሀእ ነ ሀንቁዋነ ነ ቦሻነ ነ ካታማፐ፥ የሩሳላመፐ፥ ነ ጌሻ ደርያፐ፥ ዎራ ዛራ። ኑን ኦዳ ናጋራይነ ኑ አዎቱ ኦዳ ባይዙ የሩሳላመነ ነ አሳነ ኑ ዩሹዋን ደእያ ኡባዉ ቅሊጩዋ ከሴዳ።
\p
\v 17 “ስም ሀእ ኑ ጾሳዉ፥ ታን ነ ቆማይ ዎስያ ዎሳነ ዋትዋቱዋ ስሳ። ጾሳዉ፥ ነ ሱን ድራዉ ጋደ፥ ሀ ኮለቴዳ ነ ጌሻ ጎልያ ነ ኬካ አይፍያን ጼላ። 
\v 18 አቤት ታ ጾሳዉ፥ ነ ሀይ ኑኮ የጋደ ስሳ፤ ነ አይፍያካ ዶያደ፥ ነ ሱንን ጼሰቴዳ ካታማ ባየ ጼላ። ኑን ነዉ ዋትዋትያዌ፥ ኑ ጽሎተ ድራዉ ግደናን፥ ነ ዎልቃማ ማሮተ ድራሳ።
\p
\v 19 “አቤት ጾሳዉ፥ ስሳ! አቤት ጾሳዉ፥ አቶ ጋ! አቤት ጾሳዉ፥ ሀይዛነ ኦ! ነ ካታማይነ ነ አሳይ ነ ሱንን ጼሰቴዳ ድራዉ፥ አቤት ታ ጾሳዉ፥ ነ ሱን ድራዉ ጋምኦፓ” ያጋድ።
\s1 ጋብሬል ዳኔላዉ ስንፐ ሀናናባ ኦዴዳ
\p
\v 20 ታን ዎሳደ፥ ታ ናጋራነ ታ አሳ እስራኤልያ ናጋራ ፓጻደነ ታ ጾሳ ጌሻ አሳባ፥ የሩሳላመባ መና ጎዳዉ ታ ጾሳዉ ዋትዋታደ ታካድ። 
\v 21 ሄዋዳን ሀናደ ታን ደእሺና፥ ካሰ ሳጻን ታን በኤዳ ጋብሬል፥ ታኮ ኤለካ ፓሊደ፥ ኦማርሳ ያርሹዋ ያርሽያ ሳትያን ፑቱ ጌዳ።\x - \xo 9:21 \xo*\xt ሉቃሳ 1:19፣ 26\xt*\x* 
\v 22 እ ሀዋዳን ያጊደ፥ ታዉ ኦዴዳ፤ “ዳኔላ፥ ታን ኤራነ አኬካ ነዉ እማናዉ ሀእ ያድ። 
\v 23 ኔን ብሮ ዎሳ ዶሞደ ነ ዎሳ ዛሩ እመቴዳ፤ ታንካ ሄዋ ነዉ ኦዳናዉ ያድ። አያዉ ጎፐ፥ ጾሳይ ኔና ሎይ ዶሴ። ሄዋ ድራዉ፥ ታን ኦድያዋ ቆፓ፤ ሳጻካ አኬካ።
\p
\v 24 “ላፑ ገደ ላፑን ታሙ ላይይ ጾሳይ ነ አሳዉነ ነ ጌሻ ካታማዉ ኬሬዳ ዎድያ። ሄ ዎደቱዋን ናቁ ዉራና፤ ናጋራ ኦሱ አታና፤ ባይዙ ማረታና፤ መና ጽሎተይ ገላና፤ ሳጻይነ ትምቢቲ ፖለታናነ ኡባፐ አዳ ጌሻ ሳአይ ኦከታና።
\p
\v 25 “ሄዋ ድራዉ፥ ሀዋ ኤራነ አኬካ። የሩሳላመ ካታማይ ኦራጻናዳንነ ኬጸታናዳን አዛዙ ከሴዳ ጋላሳፐ ቢደ ካፑ ኦከቶዌ ያና ጋካናዉ፥ ላፑን ገደ ላፑኑነ ኡሱፑን ታማነ ላኡ ገደ ላፑን ላይይ አና። ሄዋን የሩሳላመ ካታማይ ኦራጻና፤ ኦገቱካ ዩሹዋ ግምበቱካ ኦሰታና። ሽን ግምበትያ ዎዲ መቶ ዎደ ግዳናዋ።
\p
\v 26 “ኡሱፑን ታማነ ላኡ ገደ ላፑን ላይፐ ጉይያን፥ ኦኬቴዳዋ አሳይ ዎና። አ ማታን አያይነ ባዋ። ይያ ካፑዋ አሳይ፥ ካታማነ ጌሻ ጎልያ ላላና። ሄ ካታማ ዉርሰይ ድኡዋዳን አኬከናን ያና። ሄ ዎድያፐ ቢደ ዉርሰይ ጋካናዉ፥ ኦላነ ባሻ አዋዬዳ። 
\v 27 ሄ ካፑ ላፑን ላይይ ግዶን አሳና ምኖ ጫቁዋ ጫቀታናዋ። ሄ ላፑን ላይቱዋ ግዶ ግሸቻን እ ያርሹዋ ያርሽያዋነ እሞታ እምያዋ ድጋና። ጌሻ ጎልያዉ ግዶ ግሸቻን ባየ ቱናተ እ ኤሳና። ዉርሰን አዋየቴዳ ቦሻይ አ ቦላ ትገታናዋ” ያጌዳ።\x - \xo 9:27 \xo*\xt ዳኔላ 11:31፤ 12:11፤ ማቶሳ 24:15፤ ማር. 13:14\xt*\x*
\c 10
\s1 ዳኔል ጸግሮሳ ሻፋ ማታን በኤዳ ሳፃ
\r (10:1—11:45)
\p
\v 1 ፓርሰ ካቲ ቂሮስ ካተቴዳ ሄዘን ላይ፥ ብልጻሶረ ግያ ዳኔላዉ ሀራ ሳጻይ ቆንጬዳ። ሄ ሳጻን ቆንጬዳዌ ቱማ፤ ቆንጬዳዌካ ዎልቃማ ኦላባ። ሄ አኬካይ አዉ እመቴዳዌ ሳጻና።
\p
\v 2 ሄ ዎደ ታን፥ ዳኔል፥ ሄዙ ሳምንታ ዬካድ። 
\v 3 ሄዙ ሳምንታይ ዉራና ጋካናዉ ሎኦ ቁማ ማበይከ፤ አሹ ዎይ ዎይንያ ኤሳይ ታ ዶናኮ ሺቅቤና። ታ ሁጲያካ አያነ ኦከታበይከ። 
\v 4 ኮይሮ አግናን ላታማነ ኦይደን ጋላሳን፥ ጸግሮሳ ግያ ዎልቃማ ሻፋ ማታን ታን ኤቃደ ጼላድ፤ 
\v 5 ላይኑዋ ግያ ማዩዋ ማዬዳ እት ብታንያ በኣድ። እ ባረ ጼሳን በርተ ዎርቃፐ ኦሰቴዳ ሳቂያ ዳንጨዳ።\x - \xo 10:5-6 \xo*\xt ሳፃ 1:13-15፤ 2:18፤ 19:21\xt*\x* 
\v 6 አ ቦላይ ጶልያ እንቁዋ ማላቴ፤ አ ሶምኢ ዋልቃንዳን ጶልቁ ጌ፤ አ አይፈቱካ ታማ ላጩዋ ማላቲኖ፤ አ ኩሺነ አ ገዲ ቁጨቴዳ ናስያ ብራታዳን ፖእሴ፤ አ ቃላይካ ዳሮ አሳይ ሃሳይያ ቃላዳን ሀኔ።
\p
\v 7 ሀ ሳፃ ታን ዳኔል ታረካ በኣድ። ታናና ደእያ አሳቱ በእበይክኖ፤ ኡንቱንቱ ሎይ ዳጋሜዳ ድራዉ፥ ባቃት ቆሰቴድኖ። 
\v 8 ታን ሀ ዎልቃማ ሳፃ ጼላደ፥ ታረካ አታድ፤ ታዉ ዎልቃይ እጽና ዳቡራድ፤ ታ ሶምኢ ሎይ ቡላቴዳ። 
\v 9 ሄ ዎደ ታን እ ሃሳይያዋ ስሳድ፤ ቢታን ዱገ ታ ሶምኡዋን ጉፋናድ፤ ገምእሹዋ ታይሮታድ።
\p
\v 10 ሄዋፐ ጉይያን፥ እት ኩሺ ታና ቦቼዳ፤ ታን ኮኮራደ ደእሺና፥ ታና ታ ኩሽያንነ ታ ጉልባታን ደንደ ኤሴዳ። 
\v 11 እ ታና፥ “ላ፥ ጾሳይ ሎይ ሲቄዳ ዳኔላ፥ ታን ነዉ ኦድያ ቃላ ሎይደ አኬካ፤ ደንዳ ኤቃ። አያዉ ጎፐ፥ ታን ኔኮ ኪተታደ ያድ” ያጌዳ። እ ታና ሀዋዳን ያግና፥ ታን ኮኮራደ ደንዳ ኤቃድ።
\p
\v 12 ቃይካ እ ሀዋዳን ያጌዳ፤ “ዳኔላ፥ አይነ ያዮፓ! አያዉ ጎፐ፥ ኔን አኬካ ደማናዉ ቆፋ ቃቼዳነ ነ ጾሳ ስንን ነ ሁጲያ ካዉሼዳ ኮይሮ ጋላሳፐ ዶሚደ፥ ነ ዎሳይ ስሰቴዳ፤ ታንካ ሄዎ ዛሩዋ አካደ ያድ። 
\v 13 ሽን ፓርሰ ካዉተ ካፑዋ ግድያ አያናይ ላታማነ እት ጋላሳ ታና ተኤዳ። ታን ታረካ ፓርሰ ካዉተ ካፑዋና ያን አታድ። ሄዋ ድራዉ ኪታንቻቱዋ ካፓቱዋፐ እቱ፥ ምካኤል ታና ማዳናዉ ዬዳ።\x - \xo 10:13፣ 21 \xo*\xt ሳፃ 12:7\xt*\x* 
\v 14 ታን ሀእ ኔኮ ዬዳዌ፥ ዉርሰ ጋላሳቱዋን ነ አሳ ቦላ ሀናናዉ ደእያዋ ነዉ ቆንጭሳናሳ፤ አያዉ ጎፐ፥ ሀ ሳጻይ ስንፐ ሀናናዉ ደእያዋ” ያጌዳ።
\p
\v 15 እ ሄዋ ታዉ ኦድያ ዎደ፥ ታን ታ ሶምኡዋን ጹጉናደ፥ ግያዋ ያድ። 
\v 16 ሄዋፐ ጉይያን፥ አሳ ማላትያ እቱ ታ መተርሻ ቦቼዳ፤ ታ ዶናይ ዶየትና፥ ሃሳያ ዶማድ። ታ ስንን ኤቄዳዋ ሀዋዳን ያጋድ፤ “ታ ጎዳዉ፥ ሀ ሳጻን ታን ሎይ ዳጋሜዳ ድራዉ፥ ዳሮ ዳቡራድ። 
\v 17 ታን ነ ቆማይ ኔናና ታ ጎዳና ሃሳያናዉ ዎታ ዳንዳያይታ? ታ ዎልቃይ ዉሬዳ፤ ሸምፓናዉካ ታዉ እጸቴዳ” ያጋድ።
\p
\v 18 ሄ አሳ ማላትያ እቱ ላኤንዋካ ታና ቦቺደ፥ ታዉ ዎልቃ እሜዳ። 
\v 19 ያቲደ ታና፥ “ላ፥ ጾሳይ ሎይ ሲቄዳ ብታንያዉ፥ አይነ ያዮፓ! ሳሩ ነዉ ግዶ። ሀእ ስም ምና፤ ኤ ምና” ያጌዳ።
\p እ ሄዋዳን ጊና፥ ታን ምናድ፤ “ታ ጎዳዉ፥ ኔን ታና ምንሶ ድራዉ፥ ሀእ ኦዳ” ያጋድ።
\p
\v 20 እ ዛሪደ፥ “ታን ኔኮ አያዉ ያድታንቶ ኤራይ? ሀእ ታን ስማደ ባደ፥ ፓርሰ ካፑዋ ግድያ አያናና ኦለታና፤ ቃይ ታን ቢና፥ ግሪከ ካፑዋ ግድያ አያናይ ያና። 
\v 21 ሽን ታን ነዉ ቱሙዋ ማጻፋን ጻፈቴዳዋ ኦዳና። ታን ኡንቱንቱና ኦለትያ ዎደ፥ ህንተ ካፑዋ ምካኤለፐ አትና፥ ታና ማድያ ሀራይ እቱነ ባዋ።
\c 11
\s1 ሁጲሳ ቢታ ካትያነ ገድሳ ቢታ ካትያ
\p
\v 1 “ሜዶና ቢታ አሳ ግድያ ዳርዮስ ካተቴዳ ኮይሮ ላይን፥ ታን አ ማዳናዉነ ምንሳናዉ አ ምይያን ኤቃድ።
\p
\v 2 “ሀእ ስም ታን ነዉ ቱሙዋ ኦዳይ። ሀራ ሄዙ ካተቱ ፓርሰ ቢታን ካተታና፤ ቃይ ኡንቱንቱፐ ጉይያን ካተትያ ኦይደን ካቲ፥ ካሰዋንቱ ኡባቱዋፐ አዳ ዱረ ግዳናዋ። እ ባረ ዱረተ ጋሱዋን ዎልቃ ደምያ ዎደ፥ አሳይ ኡባይ ግሪከ ካዉተና ኦለታና ማላ ደንና።
\p
\v 3 “ሄዋፐ ጉይያን፥ ዎልቃን ሞድያ ምኖ ካቲ ደንዳናዋ፤ ባረ ኮዬዳዋ ኡባ ኦና። 
\v 4 እ ደንዴዳዋፐ ጉይያን፥ አ ካዉተይ ዱጸረቲደ፥ ኦይዱ ሳኣን ሻከታና። አ ዛረ አ ካዉተ ላትክኖ፤ እ አይስያ ዎደዋዳን ካዉተዉ ዎልቃይ ደኤና። አያዉ ጎፐ፥ አ ካዉተይ አፐ አከቲደ፥ ሀራቶ እመታና።
\p
\v 5 “ገድሳ ቢታ ካቲ ምኖ ግዳናዋ፤ ሽን አ ካፓቱዋፐ እቱ አፐ አ ምኒደ፥ ሄ ዎልቃማ ካዉተ ሞዳና።
\p
\v 6 “ጉ ላይፐ ጉይያን፥ ገድሳ ቢታ ካቲነ ሁጲሳ ቢታ ካቲ ባረንቱ ግዶን ዳቦተ ጫቁዋ ጫቀታናዋንታ። ገድሳ ቢታ ካትያ ናታ ሁጲሳ ቢታ ካትያ ገላናኑ፤ ሽን እዝ ዎልቃይካ ምነና፤ ቃይ እካ አ ዎልቃይካ ዳሮ ዎድያ ጋምኤና። ሄ ዎደ እዞ፥ እዞ አጃብያዋንቱ፥ እዝ ናአይነ እዝ አስናይ ኡባይ አደ እመታና።
\p
\v 7 “ሄዋፐ ስምና፥ እዝ ዳቦቱዋፐ እቱ ገድሳ ቢታን ካተታና። ሁጲሳ ቢታ ካትያ ቦላን ገሊደ፤ አ ጌሱዋ መን ገሊደ፥ አ ጾናና። 
\v 8 ቃይ ኡንቱንቱ ጾሳቱዋ፥ ምስለቱዋነ ብራፐነ ዎርቃፐ ኦሰቴዳ ሚሻቱዋ አኪደ፥ ግብጼ አፋና። ያቲደ አማሬዳ ዎድያዉ ሁጲሳ ቢታ ካትያ ቦቼናን አጋና። 
\v 9 ሄዋፐ ጉይያን፥ ሁጲሳ ቢታ ካቲ ገድሳ ቢታ ካዉተ ቦላ ገላና፤ ሽን ድግና፥ ጉየ ባረ ቢታ ስማና።
\p
\v 10 “ሁጲሳ ቢታ ካትያ አቱማ ናናቱ ኦላዉ ጊጊደ፥ ዳሮ ኦላንቻቱዋ ሺሻና፤ ስንን ጋከትያዋ ኡባ ሜጭያ ዎልቃማ ድኡዋዳን፥ አደ ኦሊደ፥ ገድሳ ካትያ ጌሱዋ ኦላናዋንታ። 
\v 11 ሄ ዎድያን ገድሳ ቢታ ካቲ ሎይ ሀንቀቲደ፥ ሁጲሳ ቢታ ካትያ ኦላናዉ ደንዳናዋ። ሁጲሳ ቢታ ካቲ ሺሼዳ ዳሮ ኦላንቻቱዋና ኦለቲደ፥ ኡንቱንታ ጾናና። 
\v 12 ዳሮ ኦላንቻቱዋ ኦሞዴዳዋፐ ጉይያን፥ ገድሳ ቢታ ካቲ ኦቶሩዋን ፑገታና። ያቲደ ዳሮ ሻኣ ዎና፤ ሽን አ ጾኑ አናና ጋምኤና።
\p
\v 13 “ዋኒደ ጎፐ፥ ሁጲሳ ቢታ ካቲ ካሰዋፐ አያ ሀራ ኦላንቻቱዋ ጊግሳና፤ አማሬዳ ላይቱዋ ጋምኢደ፥ ኩመን ኦላ ሚሻ ኦይቄዳ ሀ ኦላንቻቱዋ አኪደ፥ ኦላዉ ከሳና። 
\v 14 ሄ ዎድያን ዳሩ ገድሳ ቢታ ካትያ ቦላ ደንዳናዋ። ሳጻይ ፖለታና ማላ፥ ነ አሳፐካ እት እት ማካላንቻ አሳቱ ደንዳናዋንታ፤ ሽን ጾንክኖ።
\p
\v 15 “ሄዋፐ ጉይያን፥ ሁጲሳ ቢታ ካቲ ገድሳ ቢታ ዪደ፥ ዩሹ ግምበት ኡቴዳ እት ካታማ ኦሊደ ኦይቃና። ገድሳ ቢታ ካትያ ኦላንቻቱ ዎልቃ ያና፤ ሀራይ አቶ ኡንቱንቱፐ ምኖ ኦላንቻቱካ ኡንቱንቱና ኤቀታናዉ ዳንዳይክኖ። 
\v 16 አናና ኤቀትያዌ ሙለካ ባይና ድራዉ፥ ሁጲሳ ቢታ ካቲ ባረ ኮይያዋ ኡባ ኦና። እ እስራኤልያ ግያ ሎኦ ቢታን ባረዉ ምን ኤቂደ፥ አ ይስያ ዎልቃ ደማና። 
\v 17 እ ባረ ካዉተዉ ደእያ ዎልቃ ኡባ አኪደ ያናዉ ቆፋ ቃቻና፤ ዪደ፥ ገድሳ ቢታ ካትያና ዳቦተ ጫቁዋ ጫቀታናዋ። ሄ ካዉተ ኡንጋናዉ ሀልቺደ፥ ባረ ናቶ አዉ እማና፤ ሽን አ ሀልቹ ፖለተና።
\p
\v 18 “ሄዋፐ ጉይያን፥ እ ባረ ቆፋ አባ ጋጻን ደእያ ቢታቱዋኮ ዛሪደ፥ ኡንቱንቱፐ ዳሮቱዋ ኦሊደ፥ ባረዉ አካና። ሽን እት ኦላ ጋዳዉ አ ኦቶሩዋ ጊሻና፤ ያቲደ አ ኦቶሩዋ አ ቦላ ዛራና። 
\v 19 ሄዋፐ ጉይያን፥ ሁጲሳ ቢታ ካቲ ባረ ቢታ ባረ ጌሱዋ ስማና። ሽን እ ሄዋን በቲደ ኩንዳና፤ አ ላኤን ኦንነ በኤና።
\p
\v 20 “አ ሳኣን ካተቴዳዌ ባረ ካዉተ ቦንቹዋ ናጋናዉ ጊራ ጊርስያ አሳ ካዉተ ግዶ ኪታና። ግዶፐነ፥ ቃን ዎድያፐ ጉይያን፥ ቆንጭያን ዎይ ኦላን ግደናን እ ጮ ሀይቂ ያና።
\s1 ሁጲሳ ቢታ ካትያ ካቴዳዋ
\p
\v 21 “አ ሳኣን ቃይ እት ካቴዳ አሳይ ደንዳናዋ፤ ሽን ኡንቱንቱ ካዉተ ቦንቹዋ አዉ እምክኖ። አሳይ ሳአይ ሳራ ጊደ ደእሽን፥ ጭም ገሊደ፥ ካዉተ እ ኦይቃና። 
\v 22 ሄዋፐ ጉይያን፥ ዳሮ ኦላንቻቱ አ ስንፐ ፕተቲደ ያና፤ ጫቁዋ ካፑካ ሀይቃና። 
\v 23 አናና ጫቁዋ ጫቀት ስሚደ፥ ባረ ኦያዋ ጭሙዋን ኦና፤ አማሬዳ አሳቱዋ ጻላላና እ ምናና። 
\v 24 አሳይ ሳአይ ሳሮ ጊደ ደእሽን፥ ሄ ቢታን ዳሮ ዱረትያ እት ባጋ እ ገላና። ካሰ ባረ አዉ ዎይ ባረ ማይዛ አዎቱ ኦቤናዋ ኦና፤ ባረ ኦሞድ ሺሼዳ ዱረተነ አቁዋ ባረና ካልያዋንቶ ግሻና። ጌሶቱዋካ ላላናዉ እ ሀልቻናዋ፤ ሽን ሄዋ እ ኦያዌ ጉ ዎድያሳ።
\p
\v 25 “ሄዋፐ ጉይያን ጻሊደ፥ ባረ ዎልቃካ ምንሲደ፥ ዳሮ ኦላንቻቱዋና ገድሳ ቢታ ካትያ ቦላ ደንዳናዋ። ቃይ ገድሳ ቢታ ካቲ ሎይ ዳሮነ ዎልቃማ ኦላንቻቱዋና ኦላዉ ደንዲደ፥ አናና ኦለታና። ሽን አ ቦላ ኡንቱንቱ ካሰቲደ ማቄዳ ማቁዋ ጋሱዋን፥ እ ኡንቱንቱና ኤቀታናዉ ዳንዳየና። 
\v 26 ካትያና እት ማዳን ምያዋንቱ አ ይሳና፤ አ ኦላንቻቱ ፕተታና፤ አ ኦላንቻቱዋፐ ዳሮቱ ኦላን ሀይቃና። 
\v 27 ሀ ላኡ ካተቱካ ባረንቱ ዎዛናን ኢታ ቆፕያ ድራዉ፥ ኡንቱንቱ እትፐ እት ኦይድያን ኡቲደ ሃሳዪደ፥ እቱ እቶ ዎርዶታና። ሽን ኡንቱንቱ ኦና ግያዌ ኡንቱንቶ እንጀተና፤ አያዉ ጎፐ፥ ጾሳይ ኬሬዳ ዎዲ ብሮ ጋክቤና።
\p
\v 28 “ሁጲሳ ቢታ ካቲ ዳሮ ዱረተና ባረ ቢታ ስማና። ሽን እ ባረ ዎዛናን ጌሻ ጫቁዋ እጻና። አ ቆሀናዉ እትባ አ ቦላ ኦደ፥ ባረ ቢታ ስማና።
\p
\v 29 “ጾሳይ ኬሬዳ ዎዲ ጋክና፥ እ ዛሪደ ገድሳ ቢታ ቦላ ገላና፤ ሽን አዉ ካሰዋዳን እንጀተና። 
\v 30 አያዉ ጎፐ፥ አዋይ ዉልያ ባጋ ቢታፐ ይያ ኦላ ማርካባቱ አ ዳጋንና። ያቶፐ እ ጉየ ስሚደ፥ ጌሻ ጫቁዋ ቦላ ሀንቀታና። ቃይ ሄዋፐ ስሚደ፥ ጌሻ ጫቁዋ አግያዋንቱና ዳቦታና።
\p
\v 31 “አ ኦላንቻቱ ጌሻ ጎልያካ አ ዩሹዋ ግምቢያካ ቱንሳናነ ሀች ሀች ያርሽያ ያርሹዋካ ድጋና። ያቲደ ኡንቱንቱ ባየ ቱናተ ያን ኤሳና።\x - \xo 11:31 \xo*\xt ዳኔላ 9:27፤ 12:11፤ ማቶሳ 24:15፤ ማር. 13:14\xt*\x* 
\v 32 ጫቁዋ ኮልያዋንታ እ ባረ ጭሙዋ ቃላን ባረ ባጋ ኦና፤ ሽን ባረንቱ ጾሳ ኤርያ አሳይ ምናናነ አናና ኤቀታና።
\p
\v 33 “አሳ ግዶን ደእያ አዳ ኤራንቻቱ ዳሮ አሳ ታማርሳና፤ ሽን ጉ ዎድያ ጋርሳን ሀ ታማርስያዋንቱ ማሻን ቡሳከታና፥ ታማን ጹገታና፥ ኦሞደታና ዎይ ቦንቀታና። 
\v 34 ሄ መቶቱዋ ግዶን ደኢድ፥ ኡንቱንቱ ጉ ማዱዋ ደማና፤ ዳሮ አሳይካ ኡንቱንቱ ባጋ ማላቲደ፥ ኡንቱንቱኮ ሺቃና፤ ሽን ዎዛናፐ ግደና። 
\v 35 አዳ ኤራንቻቱዋፐ ኡንደናዋንቱ በታና። ሄዋዳን ሀኒደ፥ ዉርሰ ዎዲ ጋካናዉ፥ ኡንቱንቱ ፓጨቲደ ከሳና፥ ጌያናነ ቶሺ ባይናዋንታ ግዳና። አያዉ ጎፐ፥ ጾሳይ ኬሬዳ ዎዲ ብሮ ጋክቤና።
\s1 ባረና ቂስያ ካትያ
\p
\v 36 “ካቲ ባረና ኮሾዋ ኦና፤ ጾሳቱዋ ኡባፐ ቦላ ባረና ቁ ኦደ ዳርሳና፤ ቃይ ጾሳቱዋ ጾሳ ቦላ ካሰ ስሰት ኤረና ኢታ ቃላ ሃሳያና። ሀናናዉ ቆፋን ቃሸት ኡቴዳዌ ሀናናዉ ደእያ ድራዉ፥ ጾሳ ሀንቁ ፖለታና ጋካናዉ፥ እ ኦያዌ ኡባይ አዉ እንጀታና።\x - \xo 11:36 \xo*\xt 2 ተስ. 2:3-4፤ ሳፃ 13:5-6\xt*\x* 
\v 37 እ ካሰ ባረ ማይዛ አዎቱዋ ጾሳቱዋ፥ ዎይ ማጫ አሳይ ሲቅያ ጾሳ ካና፤ እ ባረ ጻላላ ሀራ ኡባፐ አደ ቁ ኦናፐ አትና፥ ሀራ አይ ጾሳነ ኮየና። 
\v 38 እ ኡንቱንታ ቦንቻናዋ አጊደ ጌሱዋ ጾሳ ቦንቻና፤ አ ማይዛ አዎቱ ኤረና ጾሳዉ ዎርቃ፥ ብራ፥ አልኦ ሹቻነ ሎኦ እሙዋ እሚደ ቦንቻና። 
\v 39 እማ ጾሳ ማዱዋን ምኖ ጌሱዋ ቦላ እ ደንዳና። ቃይ ባረ ማታ ኤርያዋንታ እ ዳሮ ቦንቻና። እ ኡንቱንታ ዳሮ አሳ ሞድያዋንታ ኦደ ሱንና፤ ቃይ ቢታካ ዎይቱዋ ኦደ፥ ኡንቱንቶ ሻክ ሻኪደ እማና።
\p
\v 40 “ዉርሰ ዎዲ ጋክና፥ ገድሳ ቢታ ካቲ ደንዲደ፥ ሁጲሳ ቢታ ካትያ ኦላና። ሽን ሁጲሳ ቢታ ካቲ ፓራ ጋረቱዋ፥ ፓራ አሳቱዋነ ዳሮ ማርካባቱዋ አኪደ፥ አ ቦላ ጎትያዳን ያና። ዳሮ ቢታ ቦላ ገሊደ፤ ድኡዋዳን ኡንቱንታ ሜጪደ አና። 
\v 41 ቃይ እ እስራኤልያ ግያ ሎኦ ቢታ ቦላንካ ገላና። ዳሮ ቢታቱ አ ኩሽያን ኩንዳና፤ ሽን ኤዶማ፥ ሞኣባነ አሞና ቢታቱ አ ኩሽያፐ አታና። 
\v 42 እ ዳሮ ቢታቱዋ ቦላ ገልያ ዎደ፥ ግብጼካ አፐ ከስ አከና። 
\v 43 ግብጼ ቢታ ዎርቃ፥ ብራነ ዱረተ ኡባ እ ባረ ኩሽያ አና። ሊቢነ ቶጲ አዉ ሞደታና።
\p
\v 44 “ሽን አዋይ ዶልያ ባጋፐነ ሁጲሳ ባጋፐ ይያ ኦዱ አ ዳጋንና፤ ሀንቁዋ ኤጽ ከሲደ፥ ዳሮቱዋ ዎናዉነ ሙለ ይሳናዉ ደንዳናዋ። 
\v 45 እ ባረ ካተቱዋ ዱንካንያ አባፐነ ፑላንቻ ጌሻ አሳፐ ግዱዋን ቶካና። ሽን አ ዉርሰይ ጋካናዋ፤ አ ማድያዌካ ያና።
\c 12
\s1 ዉርሰ ዎድያባ
\r (12:1-13)
\p
\v 1 “ሄ ዎድያን፥ ነ አሳ ሄምያ ዎልቃማ ካፑ ምካኤል ደንዳናዋ። ካዉተይ ዶሞደፐ ዶምና፥ ሄ ዎደ ጋካናዉ፥ በእ ኤረና መቶ ዎዲ ሀናና። ግዶፐነ፥ አ ሱንይ ጾሳ ማጻፋን ጻፈቴዳ ነ አሳይ ኡባይ ሄ ዎደ አታናዋ።\x - \xo 12:1 \xo*\xt ማቶሳ 24:21፤ ማር. 13:19፤ ሳፃ 7:14፤ 12:7\xt*\x* 
\v 2 ካሰ ሀይቂደ ሞገቴዳ አሳፐ ዳሮቱ ደንዳና። ኡንቱንቱፐ ባጋቱ መና ደኦ፥ ባጋቱ ቃይ ዬላዉነ መና ካዉሻዉ ደንዳና።\x - \xo 12:2 \xo*\xt ኢሳ. 26:19፤ ማቶሳ 25:46፤ ዮሃ. 5:29\xt*\x* 
\v 3 አዳ ኤራንቻቱ፥ ሳሉዋ ፖኡዋዳን፥ ቃይ ዳሮቱዋ ጽሎተ ኦግያ ካለዳዋንቱ መ መናዉ ጾልንትያዳን ፖአና።
\p
\v 4 “ሽን ነኖ ዳኔላ፥ ኔን ዉርሰ ዎዲ ጋካናዉ፥ ሀ ማጻፋ ቃላ ጎርዳደ፥ ማታፋ ዎ። ዳሮቱ ያነ ሃነ ብንኮታና፤ ኤራይካ ዳራና” ያጌዳ።\x - \xo 12:4 \xo*\xt ሳፃ 22:10\xt*\x*
\p
\v 5 ሄዋፐ ጉይያን፥ ታን ዳኔል፥ ሀራ ላአቱዋ፥ እቱ ሻፋፐ ሀፍን ላንቂያን፥ እቱ ሻፋፐ ሄፍን ላንቂያን ኤቄዳዋንታ በኣድ። 
\v 6 ኡንቱንቱፐ እቱ ላይኑዋ ማዪደ፥ ሻፋ ሃፐ ቦላ ባጋና ኤቄዳዋ ኦቺደ፥ “ሀ ማላልስያዋንቱ ፖለታናዉ ዎይሳ ዎድያ ጋምአንዴሻ?” ያጌዳ።
\p
\v 7 ሄ ላይኑዋ ማዪደ፥ ሻፋ ሃፐ ቦላ ባጋና ደእያዌ ባረ ኡሸቻ ኩሽያነ ባረ ሀድርሳ ኩሽያ ሳሉዋ ዛር ደንደ፥ መናዉ ደእያዋ ሱንን ሀዋዳን ያጊደ ጫቄዳ፤ “ሀዌ ዎዲ፥ ዎደቱነ ዎድያ ባጋይ ጋካናዉ ጋምአና፤ ቃይ ጌሻ አሳቱ ዎልቃይ ክንቼቲደ ዉርያ ዎደ፥ ሀ ኡባባይካ ፖለታና” ያጌዳ።\x - \xo 12:7 \xo*\xt ሳፃ 10:5፤ 12:14\xt*\x*
\p
\v 8 ሀዋ ኡባ ታን ስሳድ፤ ሽን ታዉ ገልቤና። ያትና፥ ታን፥ “ታ ጎዳዉ፥ ሀ የዎ ኡባዉ ዉርሰይ አያ ግዳኔ?” ጋደ ኦቻድ።
\p
\v 9 እ ዛሪደ፥ ሀዋዳን ያጌዳ፤ “ዳኔላ፥ ባ። አያዉ ጎፐ፥ ሀዌ ማጻፋይ ዉርሰ ዎዲ ጋካናዉ ጎርደቴዳዋነ ማታፋይ አ ቦላ ዎዳዋ። 
\v 10 ዳሮቱ ፓጨቲደ ከሳና፥ ጌያናነ ቶሺ ባይናዋንታ ግዳና፤ ሽን ኢታቱ ኢታባ ኦና። ኢታቱዋፐ እት ኡራይነ አኬከና፤ ሽን አዳ ኤራንቻቱ አኬካና።\x - \xo 12:10 \xo*\xt ሳፃ 22:11\xt*\x*
\p
\v 11 “ሀች ሀች ያርሽያ ያርሹ ድገቶደፐነ ባየ ቱናተይ ሄ ሳኣን ኤቆደፐ 1,290 ጋላሳ።\x - \xo 12:11 \xo*\xt ዳኔላ 9:27፤ 11:31፤ ማቶሳ 24:15፤ ማር. 13:14\xt*\x* 
\v 12 ገንጪደ 1,335 ጋላሳቱ ዉራናዉ ጋያ ኡራይ አንጀቴዳዋ።
\p
\v 13 “ኔና ግዶፐ፥ ኔን ዉርሰይ ጋካናዉ ባ። ኔን ሸምፓና፤ ጋላሳቱዋ ዉርሰን ኔና ጋክያ ላታ አካናዉ ደንዳናሳ” ያጌዳ።