\id 2TH - Dawuro Full Bible Ethiopic Version
\ide UTF-8
\h 2 ተሰሎንቀ
\toc1 ጳዉሎስ ተሰሎንቀ አሳዉ ጻፌዳ ላኤን ኪታ
\toc2 2 ተሰሎንቀ
\toc3 2 ተስ.
\mt2 ጳዉሎስ
\mt1 ተሰሎንቀ አሳዉ
\mt2 ጻፌዳ ላኤን ኪታ
\imt ገሉዋ
\ip ክርስቶሳ ላኤን ዩሳ ጼልያዋን ደንዴዳ ኦሻይ ዋላሳ መደ ቤዳ ድራዉ፥ ተሰሎንቀን ደእያ አማንያ አሳ ግዶን መቱ ዳሪደ ቤዳ። ጳዉሎስ ተሰሎንቀ አሳዉ ጻፌዳ ላኤን ኪታይ፥ “ጎዳይ ያና ጋላሳይ ማቴዳ” ያግያ አማኑዋ ምንሲደ ኦዴ። ጳዉሎስ ኡንቱንቶ ኦዲደ፥ “ክርስቶስ ያናፐ ካሰቲደ ክርስቶሳ ትምርትያ ጳልቂያ እት፥ ‘ማካላ አሳ’ ጌተትያ ክርስቶሳ እጽያዌ ካለና አላምያ ቦላን ኢታተይነ ማካላይ ዳሪደ ባና” ያጊደ ኡንቱንቱ አማኑዋ ሱርሳናዉ ማሌ።
\ip የሱስ ኪቴዳዌ ናባብያዋንቶ፥ “መቱነ ዋዪ ዳሮፐካ ኡንቱንቱ ባረንቱ አማኑዋን ምናናዳን፥ እካ አናና እትፐ ኦያዋንቱካ ኦያዋዳን፥ ኡንቱንቱ ባረንቱ ደኦ ኮሽያዋ ደማናዉ፥ ምኒደ ኦናዳን፥ ሄዋዳንካ ቃይ ሎኦ ኦሱዋ ኦናዉ በናዳን” ያግ ኡንቱንታ ምንሲደ ዞሬ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ገሉዋ \ior 1:1-2\ior*
\io1 ጋላታነ ሀዳራ \ior 1:3-12\ior*
\io1 የሱሳ ላኤንዋ ዩሳዉ እመቴዳ ትምርትያ \ior 2:1-17\ior*
\io1 አማኑዋን ደኡዋባ ማቁዋ \ior 3:1-15\ior*
\io1 ዉርሰ ቁትያ \ior 3:16-18\ior*
\c 1
\p
\v 1 ኑን ጳዉሎስ፥ ስላሰነ ጽሞቶስ፥ ተሰሎንቀን ደእያ አማንያ አሳቶ ሀ ዳብዳቢያ ጻፌቶ። ሄዋንቱ ጾሳ ኑ አቡዋንታነ ጎዳ የሱስ ክርስቶሳዋንታ።
\p
\v 2 ጾሳ ኑ አዉዋፐነ ጎዳ የሱስ ክርስቶሳፐ፥ አ ኬካተይነ ሳሮተይ ህንተንቶ ግዶ።
\s1 ክርስቶሳ ዩሳ ጋላስ ሀናና ፕርዳ
\p
\v 3 ኑናዳን ጾሳ ካልያዋንቶ፥ ህንተንቱ አማኑ ሎይ ድጭያ ድራዉነ፥ ህንተንቱ እቱ እቱዋ ሲቅያ ሲቁ ዳርያ ድራዉ፥ ኑን ህንተንቶ በስያዋዳን፥ ጾሳ ኡባ ዎደ ጋላታናዉ በሴ። 
\v 4 ሄዋ ድራዉ፥ ህንተንታ የደሳይነ ዋይያ ኡባይ ጋክናካ ህንተንቱ ገንጭያዋነ አማንያዋ ኑን ኑ ሁጰዉ ጾሳ አማንያዋንቶ ኦዲደ፥ ህንተዋን ጬቀቴቶ።
\p
\v 5 ህንተንቱ ዋየትያ ጾሳ ካዉተዉ በስያዋንታ ግዲደ ፓይደታና ማላ፥ ጾሳይ ፕርድያ ጽሎ ፕርዳ በስያ ማላ። 
\v 6-7 ጾሳይ ቱሙ ፕርዳ ፕርዳና። ጎዳይ የሱስ ባረ ዎልቃማ ኪታንቻቱዋና ታማ ላጩዋ ግዶን ሳሉዋፐ ይያ ዎደ፥ ጾሳይ ህንተንታ ዋይስያዋንቱ ቦላ ዋይያ አሀና። ቃይ ዋየትያ ህንተናነ ኑና ሸምፕሳና። 
\v 8 ቃይ ጾሳይ ባረና ኤረናዋንታነ ኑ ጎዳ የሱስ ክርስቶሳ ዎንጋላ ምሽራቾ አዛዘተናዋንታ ሙራና። 
\v 9-10 ሄ ጋላስ እ ባረ ጌሻቱዋን ቦንቼታናዉነ ቃይ ባረና አማንያ ኡባቱዋን ሳበታናዉ ይያ ዎደ፥ ኡንቱንቱ ጎዳ ስንፐነ አ ዎልቃ ቦንቹዋፐ ሻከቲደ፥ መና ባሻን ሙረታና። ጋሱነካ፥ ኑን ህንተንቶ ኦዴዳ ኪታይ አማነቴዳ።\x - \xo 1:9-10 \xo*\xt ኢሳ. 2:10\xt*\x*
\p
\v 11 ኑን ህንተንቶ ኡባ ዎደ ጾሳ ዎስያዌ ሄዋሳ። ኑ ጾሳይ ጼሴዳ ደኦ ህንተንታ በስያዋንታ ጊደ ፓይዳናዳን፥ ኑን አ ዎሴቶ፤ ህንተንቱ ሎኦባ ኡባ አሞትያዋነ ህንተንቱ አማኑዋ ኦሱዋ እ ባረ ዎልቃን ፖሎ። 
\v 12 ሄዋን ኑ ጾሳ አ ኬካተንነ ቃይ ኑ ጎዳ የሱስ ክርስቶሳ አ ኬካተን፥ ጎዳ የሱሳ ሱን ህንተንቱ ቦንቻና፤ ህንተናካ እ ቦንቻና።
\c 2
\s1 የሱሳ ላኤን ዩሳባ
\p
\v 1 ሀእ ኑናዳን ጾሳ ካልያዋንቶ፥ ኑ ጎዳ የሱስ ክርስቶሳ ዩሳባዉነ ኑን አናና ደአናዉ አኮ ሺቃናባዉ፥ 
\v 2 ትምቢትያ አሳይ ህንተንቶ ኦድያዋን ዎይ ሀራ አሳፐ ስሴዳ ቃላን፥ ዎይ ኦንነ ኑፐ ዬዳ ኪታዳን ሃሳይያዋን፥ “ጎዳ ጋላሳይ ጋኬዳ” ጊደ ህንተንቱ ኤለካ ዳጋመናዳንነ ዎዛና ባየናዳን፥ ኑን ህንተንታ ዎሴቶ። 
\v 3 ህንተንታ ኦንነ አይ ኦግያንነ ባለፖ። አያዉ ጎፐ፥ ካሰቲደ ማካልያዌነ ቃይ ናጋራንቻይ፥ ባሻ ናአይ ቆንጨናን ደእሽን፥ ሄ ጋላሳይ ጋከና። 
\v 4 አሳይ ጎይንያ ኡባባነ አሳይ ጾሳ ግያ ኡባባ እ እጻና። እ ባረና ኡንቱንቱ ኡባፐ ቁ ኦና። ቃይ ሀራይ አቶ ጾሳ ጌሻ ጎልያ ገል ኡቲደካ፥ “ታን ጾሳ” ጋና።
\p
\v 5 ህንተንቱ ሀሳይክቴ? ታን ሄዋ ህንተንቶ ህንተናና ደኣደ ኦዳድ። 
\v 6 እ ባረ ዎድያን ያናፐ አትን፥ ሀእ ያናዋ አያይ አ ተቂንቶ፥ ህንተንቱ ኤሪታ።
\p
\v 7 አያዉ ጎፐ፥ ጹራ ግዴዳ ማካላይ ሀእ ኦ፤ ሽን ሄ ተእያዌ ኦግያፐ ክቻና ጋካናዉ፥ እ ቆንጨና። 
\v 8 ሄዋፐ ጉይያን፥ ሄ ማካላንቻይ ቆንጭና፥ ጎዳይ የሱስ ባረ ዶና ፔኑዋን አ ዎና። ቃይ የሱስ ባረ ላኤን ቦንቾ ዩሳን አ ሙለካ ይሳና።\x - \xo 2:8 \xo*\xt ኢሳ. 11:4\xt*\x* 
\v 9 ሄ ማካላንቻይ ሴጻና ኦሱዋን ዪደ፥ ዳሮ ዎልቃን ዎርዶ ማላታነ ማላልስያዋ ኦና።\x - \xo 2:9 \xo*\xt ማቶሳ 24:24\xt*\x* 
\v 10 ሄዋዳንካ፥ ቃይ ይያ አሳቱዋ ዱማ ዱማ ኢታ ጭሙዋን ባለና። ይያዋንቱ አታናዉ ቱማተ ሲቂደ አክቤና ድራዉ ያና። 
\v 11-12 ሄዋ ድራዉ፥ ቱማተ አማንቤና ኡባ አሳቱ፥ ናጋራ ኦያዋን ናሸትያዋንቱ ኡባይ ፕርደታናዳንነ ዎርዶ ግድያባ አማናናዳን፥ ጾሳይ ዎልቃማ ባላ ኡንቱንቱ ግዶ የዳና።
\s1 አቶተዉ ዶረቴዳ አሳቱዋ
\p
\v 13 ሽን ጎዳይ ሲቅያ ኑናዳን ጾሳ ካልያዋንቶ፥ ኑን ጾሳ ህንተንቱ ድራዉ፥ ኡባ ዎደ ጋላታናዉ በሴ። አያዉ ጎፐ፥ ጌሻ አያና ዎልቃንነ ቱማተ ህንተንቱ አማንያዋን ህንተንታ አሻናዉ፥ ጾሳይ ህንተና ባይራዳን ዶሬዳ። 
\v 14 ጾሳይ ህንተንታ ኑን ህንተንቶ ኦዴዳ ኑ ምሽራቹዋ ቃላ ባጋና ጼሴዳዌ፥ ህንተንቱ ኑ ጎዳ የሱስ ክርስቶሳና እትፐ ቦንቼታናሳ። 
\v 15 ስም ኑናዳን ጾሳ ካልያዋንቶ፥ ምኒደ ኤቂተ፤ ኑን ህንተና ኑ ዶናን ግድና፥ ዎይ ኑ ዳብዳቢያን ግድና፥ ታማርሴዳ ዎጋ ኦይቂተ።
\p
\v 16-17 ኑ ጎዳ የሱስ ክርስቶስ ባረ ሁጲያን ቃይ ጾሳይ፥ ኑ አዉ ኑና ሲቂደ፥ ባረ አ ኬካተን ኑዉ መና ዳንዳያነ ሎኦ ህዶታ እሜዳዌ፥ ቃይ ህንተንቱ ሎኦባ ኡባ ኦናዳንነ ሃሳያናዳን፥ ህንተንቱ ዎዛና ምንሶነ መን።
\c 3
\s1 ጳዉሎስ፥ “ኑዉ ዎስተ” ያጌዳ
\p
\v 1 ዉርሰን ኑናዳን ጾሳ ካልያዋንቶ፥ ጎዳ ቃላይ ህንተንቱ ግዶን፥ ኤለካ አካናዳንነ ቦንቼታናዳን፥ ኑዉ ጾሳ ዎስተ። 
\v 2 ቃይ አሳይ ኡባይ አማነና ድራዉ፥ ጾሳይ ኑና ናጋራንቻ አሳቱዋፐነ ኢታ አሳቱዋፐ አሻና ማላ፥ ኑዉ ዎስተ።
\p
\v 3 ሽን ጎዳይ አማንያዋ፤ እ ህንተና መንናነ ቃይ ኢታፐካ ናጋና። 
\v 4 ኑን ህንተና አዛዝያዋ ህንተንቱ ሀእ ኦያዋነ ቃይ ስንፐካ ኦናዋ ጎዳይ ኑና ህንተዋን አማን።
\p
\v 5 ጎዳይ ህንተንቱ ዎዛና ጾሳ ሲቁዋኮነ ክርስቶስ እምያ ዳንዳያኮ ካለ።
\s1 ኪታ ኪተት ደአናዌ ግደ
\p
\v 6 ኑናዳን ጾሳ ካልያዋንቶ፥ ህንተንቱ ኑፐ አኬዳ ዎጋ ካለናን አዛላ ደኡዋ ደእያ እሻ ኡባፐ ህንተንቱ ሻከታናዳን፥ ኑ ጎዳ የሱስ ክርስቶሳ ሱንን ህንተና አዛዜቶ። 
\v 7 አያዉ ጎፐ፥ ኑን ህንተናና ደእያ ዎደ አዛልቤና ድራዉ፥ ህንተንቱ ኑዋዳን ሀኒደ ደአናዉ በስያዋ ህንተንቱ ህንተንቱ ሁጲያን ኤሪታ። 
\v 8 ኑን ህንተፐ ኦስነ ቶኩዋ ግደና ማላ፥ ቃማነ ጋላስ ዳቡሪደነ ጃሚደ ኦደ ደኤዳዋፐ አትን፥ ኦፐነ ቁማ ጮ ምቦኮ። 
\v 9 ኑን ሄዋ ኦዳዌ ህንተንቱ ኑዋዳን ሀኒደ ደአናዳን፥ ኑን ህንተንቶ ሌምሱዋ ግዳናዳፐ አትን፥ ሄዋ ህንተና ኦቻናዉ ኑዉ ማታይ ይና ግደና። 
\v 10 አያዉ ጎፐ፥ ኑን ሀራይ አቶ ህንተናና ደኢደካ፥ “ኦናዉ ኮየና ኡራይ ኦንነ ሞፖ” ያጊደ ህንተና አዛዜዶ።
\p
\v 11 አያዉ ጎፐ፥ አሳ የዉዋን ገልያዋፐ አትን፥ አይነ ኦናዋንቱ፥ አዛላ ደኡዋ ደእያ አማሬዳ አሳቱ ህንተንቱ ግዶን ደእያዋ ኑን ስሴዶ። 
\v 12 ኑን ሄዋንቱ ማላ አሳቱ ማራ ደኡዋ ደአናዳንነ ኦደ ቁማ ማናዳን፥ ጎዳ የሱስ ክርስቶሳ ሱንን አዛዜቶነ ዞሬቶ።
\p
\v 13 ሽን ህንተንቱ ኑናዳን ጾሳ ካልያዋንቶ፥ ሎኦ ኦሱዋ ኦናዉ አዛሎፕተ። 
\v 14 ቃይ ኑን ሀ ዳብዳቢያን ኪቴዳ ኪታዉ አዛዘተና ኡራይ ኦንነ ደኦፐ፥ ሄ ኡራ አኬክተ። እ ዬላታና ማላ፥ አፐ ሻከትተ። 
\v 15 ሽን እሻዳን አ ሴርተፐ አትን፥ ሞርክያዳን ጼሎፕተ።
\s1 ዉርሰ ሳሮታ
\p
\v 16 ሳሮተ ጎዳይ ባረ ሁጲያን ህንተንቶ ኡባ ዎደነ ኡባ ባጋና ሳሮተ እሞ። ጎዳይ ህንተናና ኡባና ግዶ።
\p
\v 17 ታን ጳዉሎስ፥ ሀ ሳሮታ ታ ኩሽያን ጻፋድ፤ ታ ዳብዳቢያ ኡባዉ ሀዌ ታ ፍርማ። ሀዌ ታን ጻፍያ ኦግያ።
\p
\v 18 ኑ ጎዳ የሱስ ክርስቶሳ አ ኬካተይ ህንተናና ኡባና ግዶ።