\id 2CO - Dawuro Full Bible Ethiopic Version
\ide UTF-8
\h 2 ቆሮንቶሳ
\toc1 ጳዉሎስ ቆሮንቶሳ አሳዉ ጻፌዳ ላኤን ኪታ
\toc2 2 ቆሮንቶሳ
\toc3 2 ቆሮ.
\mt2 ጳዉሎስ
\mt1 ቆሮንቶሳ አሳዉ
\mt2 ጻፌዳ ላኤን ኪታ
\imt ገሉዋ
\ip ጳዉሎስ ቆሮንቶሳ አሳዉ ጻፌዳ ላኤን ኪታይ ጻፈቴዳዌ፥ ጳዉሎሳዉ ቆሮንቶሳን ደእያ አማንያ አሳና ደእያ ጋከይ ዳሮ መቱዋ ግዶ ገል ኡቴዳ ዎድያና። እት እት አማንያ አሳቱ እት እት ቶሽያ ጳዉሎሳ ቦላ ዎድኖ፤ ግዶፐነ ጳዉሎስ ስጋተ መናዉ ላሞታይ ባረዉ ደእያዋ በሲደ፥ ሄዌ ሀንያ ዎደ ዎልቃማ ናሸቻ ናሸታናዉ ዳንዳይያዋ ቆንጭሴ።
\ip ሀ ኪታ ኮይሮ ዶመን ጳዉሎስ ቆሮንቶሳን ደእያ አማንያዋንቱና ባረዉ ደእያ ጋኮተ ቆንጭሲደ፥ አማንያዋንቱ ግዶን ደንዴዳ ቶሽያስነ ጳልቀዉ፥ እ ኡንቱንቶ አያዉ ምኖ ዛሩዋ እሜደንቶ ኦዴ። ሄዋናካ ጋደ ሀዌ አ ሴራይ ኡንቱንታ ናጋራፐ ስማዉነ ስጋተዉ ካለዳ ድራዉ፥ ስሰቴዳ ናሸቻ ኡንቱንቶ ቆንጭሴ። ካሊደ ቃይ ይሁዳን ደእያ አማንያዋንታ ማድያዋ ባረንቱዋፐ ጮ እማና ማላ፥ ኡንቱንታ ሀሳይሴ። ዉርሰ ሸምፓቱዋን ጳዉሎስ የሱሳፐ ኪተቴዳዋ ግድያዋ ቦላ ሺቄዳ ሞቶ ዛሩዋ ቃላ እሜ። አያዉ ጎፐ፥ ቆሮንቶሳ አማንያዋንቱ ግዶን እት እት አሳቱ ባረንታ ቱሙ የሱስ ኪቴዳዋንታ ከሲደ፥ “ጳዉሎስ የሱስ ኪቴዳዋ ግደና፤ እ ዎርዱዋ” ያጊደ፥ አ ሞቲኖ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ኡባፐ ስንትያ የዉዋ \ior 1:1-11\ior*
\io1 ጳዉሎሳነ ቆሮንቶሳን ደእያ አማንያዋንታ \ior 1:12—7:16\ior*
\io1 ይሁዳን ደእያ አማንያዋንቶ እመቴዳ ማዱዋ \ior 8:1—9:15\ior*
\io1 ጳዉሎስ ባረ ኪተቴዳ ማታዉ ኤቀታናዉ ሺሼዳ ቃላ ማርካ \ior 10:1—13:10\ior*
\io1 ዉርሰ ቁትያ \ior 13:11-14\ior*
\c 1
\p
\v 1 ታን ጳዉሎስ፥ ጾሳ ሸንያን፥ ክርስቶስ የሱስ ኪቴዳዌነ ኑ እሻይ ጽሞቶስ ጾሳዉ ጎይንያ ቆሮንቶሳ ካታማን ደእያ አማንያዋንቶነ አካይያን ደእያ ጾሳ ናናቶ ሀ ዳብዳቢያ ጻፌቶ።
\p
\v 2 ጾሳ ኑ አዉዋፐነ ጎዳ የሱስ ክርስቶሳፐ፥ አ ኬካተይነ ሳሮተይ ህንተንቶ ግዶ።
\s1 ጳዉሎስ ጾሳዉ ሺሼዳ ጋላታ
\p
\v 3 ጾሳ ኑ ጎዳ የሱስ ክርስቶሳ አዉዋ፥ ማሮተ አዉዋነ መንዋ ኡባ ጾሳ ጋላታይ ጋኮ፤ 
\v 4 ጾሳይ ኑና ኑ ሁጰዉ መንዳ መንዋዳን፥ ዳሮ ዋይያ ዋየትያዋንታ ኑንካ መንናዳን፥ ኑ ዋይያ ኡባን እ ኑና መን። 
\v 5 አያዉ ጎፐ፥ ኑን ክርስቶሳ ባጋና ዳሮ ዋይያ ዋየትያዋዳን፥ ሄዋዳንካ፥ ቃይ ኑና አ ባጋና ዳሮ መንዋን መን። 
\v 6 ኑን ዋየቶፐ፥ ሄዌ ህንተና መንናሳነ ህንተና አሻናሳ፤ ቃይ ኑን ምነቶፐ፥ ኑን ዳንዳዬዳ ዋይያ ማላ ህንተካ ገንጪደ ዳንዳያና ማላ፥ ጾሳይ ህንተዉካ ቃይ መንዋነ ዳንዳያ እማናሳ። 
\v 7 ህንተ ደማና ጊደ፥ ህዶታን ናግ ኡቴዳዌ ዳሮ ምና፤ አያዉ ጎፐ፥ ህንተ ኑናና ዋየቴዳዋዳን፥ ሄዋዳን መንዋካ ኑናና አካናዋ ኑን ኤሬቶ።
\p
\v 8 ኑ ኑናዳን ጾሳ ካልያዋንቶ፥ ኑን ኢስያ ጋድያን ዋየቴዳ ዋይያ ህንተና ሀሳይሳናዉ ኮዬቶ፤ ኑ ዋዪ ኑ ዎልቃፐ ዳርና፥ ኑና ዎ ጊደ፥ ህርጋና ጋካናዉ፥ ኑና ዎጋይ ባይናዋ ዴጼዳ። 
\v 9 ኑን ኑ ቦላ ሀይቁዋ ፕርዳይ ፕርደቴዳ ያጊደ ቆፔዶ፤ ሽን ሄዌ ሀኔዳዌ ሀይቄዳ አሳ ሀይቁዋፐ ደንያ ጾሳን ኑን አማነታናፐ አትን፥ ኑ ሁጲያን አማነተናዳና። 
\v 10 ጾሳይ ሀዋ ማላ ኢታ ሀይቁዋፐ ኑና አሼዳ፤ እ ኑና አሻና፤ ስንፐካ እ ኑና አሻናዋ ጊደ፥ ህዶታን ናግ ኡቴዶ። 
\v 11 ህንተ ዎሴዳ ዳሮ ዎሳን ኑዉ አንጁ ስሜዳ ድራዉ፥ ዳሮ አሳይ ኑ ድራዉ ጾሳ ጋላታና ማላ፥ ህንተካ ቃይ ኑና ዎሳን ማዳና ኮሼ።
\s1 ላመቴዳ ጳዉሎሳ ቆፋ
\p
\v 12 ኑን ጬቀትያዌ ሀዋ፤ ሀ ሳኣን ኑን ደእያ ደኡ፥ ኡባ ቃይ ህንተናና ኑዉ ደእያ እትፐተይ ጾሳ አ ኬካተናፐ አትን፥ አሳ አዳ ኤራተና ግደናዋ፥ ቃይ ጾሳይ እሜዳ ጌሻተንነ ሱረተን ኑን ደእያዋ ዎዛና ቆፋይ ኑዉ ማርካቴ። 
\v 13-14 አያዉ ጎፐ፥ ህንተ ናባባናዉነ አኬካናዉ ዳንዳይያዋ ጻላላ ህንተንቶ ጻፍያዋፐ አትን፥ ኑን ሀራባ ህንተንቶ ጻፎኮ። ኑ ጎዳ የሱሳ ጋላስ ኑን ህንተናን ጬቀታናዋዳን፥ ህንተካ ኑናን ጬቀታና ማላ፥ ህንተ ሀእ ዉርስ አኬከና የዉዋ ግድን ዉርስ አኬካና ጋደ ቆፓይ።
\p
\v 15 ሄዋ ታን ሎይ ኤሬዳ ድራዉ፥ ህንተ ላኡ ገደ ጎኤታና ማላ፥ ኡባፐ ካሰታደ ህንተኮ ባናዉ ቆፋ ቃቻድ። 
\v 16 ታን ማቅዶንያ ባደ ህንተናና ጋከታናዋነ ቃይ ያፐ ስማደ ህንተ ማታና ይሁዳ አሽን፥ ህንተ ታና ማዳናዋ ቆፓ ኡታድ። 
\v 17 ሄዋ ድራዉ፥ ታን ሄዋ ቆፓደ ታናን አማነትበይክታ? ታን ታ ቆፋ ቃችያ ዎደ፥ ሳኣ አሳዳን እት ኩን፥ “ኤ፥ ኤ” ዎይ፥ “ግደና፥ ግደና” ጋናዉ ጊጋ ኡታድታ?
\p
\v 18 ሽን ጾሳይ አማነቴዳዋ ግድያዌ ቱማ ግድያዋዳን፥ ኑን ህንተንቶ ኦድያ ቃላይ “ኤ” ግያዋነ “ግደና” ግያዋ ግደና። 
\v 19 አያዉ ጎፐ፥ ታን፥ ስላሰነ ጽሞቶስ ህንተ ግዶን ኦዴዳ ጾሳ ናአይ፥ የሱስ ክርስቶስ “ኤ” ግያዋፐ አትን፥ “ግደና” ግያዋ ግደና። ሽን ጾሳ ባጋና እ ኡባ ዎደካ “ኤ”። 
\v 20 አያዉ ጎፐ፥ ጾሳይ እማና ጌዳባዉ ኡባዉ ኤኖ ጌዳዌ ክርስቶሳ ባጋና ፖለታና፤ ሄዋ ድራዉ፥ ኑን ክርስቶሳ ባጋና ጾሳ ቦንቾ፥ አመንእ\f + \fr 1:20 \fr*\fq አመንእ፦ \fq*\ft “አመንእ” ግያ ቃላይ ሀዋን “ኤ” ያገትያ ብለ ኦይቄ።\ft*\f* ጌቶ። 
\v 21 ጾሳይ ክርስቶሳ ባጋና ኑናነ ህንተና መንነ ኦኬ። 
\v 22 ኑን አዋ ግድያዋ ኤርስያ ማታፋ እ ኑ ቦላ ዎደ፥ ባረ ጌሻ አያና ዋስያዳን፥ ኑ ዎዛና ግዶን ዎዳ።
\p
\v 23 ቃይ ታን ቆሮንቶሳ ቤናን አጌዳዌ ህንተና ቆሄናዳና። ሄዌ ዎርዶ ግዶፐ ታና ሙራናዉ ታ ሸምፑዋን ጾሳይ ማርካ። 
\v 24 ኑን ህንተና ናሸቻናዉ ህንተናና እትፐ ኦያዋንታፐ አትን፥ ህንተ አማንያዋን ህንተና ጎደታናዉ ኮይያዋንታ ግዶኮ፤ አያዉ ጎፐ፥ ህንተንቱ ህንተ አማኑሳን ምኒደ ደኢታ።
\c 2
\p
\v 1 ታን ላኤንዋ ህንተና ካዮየና ማላ፥ ህንተኮ ቤናዳን፥ ታ ቆፋ ቃቻድ። 
\v 2 አያዉ ጎፐ፥ ታን ህንተና ካዮይያዋ ግዶፐ፥ ሀ ታን ካዮዬዳ ህንተ ታና ናሸቻናፐ አትን፥ ኦኔ ታና ናሸቻናዌ? 
\v 3 ታን ህንተንቶ ሄ ዳብዳቢያ ጻፌዳዌ፥ ታና ናሸቻናዉ በስያ አሳቱዋን ታን ካዮታናዉ ህንተኮ ባናዉ ኮያቤናዋሳ፤ ታን ናሸትያ ዎደ፥ ህንተ ኡባይካ ቃይ ናሸታናዋ ህንተ ኡባን አማነታይ። 
\v 4 አያዉ ጎፐ፥ ታን ህንተንቶ ዳሮ ዋይያንነ ቱጋን ቃይ ዳሮ አፎና ጻፌዳዌ፥ ህንተና ካዮያናሳ ግደና፤ ሽን ታን ህንተና ኡባቱዋ አይ ኬና ሲቃይታንቶ ህንተ ኤራናዳና።
\s1 ባይዛንቻዉ አቶ ግያዋ
\p
\v 5 ሽን እት ኡራይ ሀራ ካዮዬዳዋ ግዶፐ፥ ታን አ የዉዋ ዳርሳናዉ ኮይከ፤ እ ህንተና ኡባቱዋ ካዮዬዳፐ አትን፥ ታ ጻላላ ካዮይቤና። 
\v 6 ህንተፐ ዳርያ ባጋ አሳይ ሄ ብታንያ ማላ አሳ ሄዋዳን ሙሮፐ፥ ሄ ሙራይ አዉ ግዳናዋ። 
\v 7 ሄዋ ድራዉ፥ ሄ ብታኒ ሎይ ካዮተና ማላ፥ ህንተ አዉ አቶ ጋናዉነ አ መንናዉ በሴ። 
\v 8 ሄዋ ድራዉ፥ ህንተ አ ምንሲደ ሲቅያዋ እ ኤራና ማላ፥ ታን ህንተና ዎሳይ። 
\v 9 አያዉ ጎፐ፥ ህንተ ታዉ አዛዘታናዉ ኡባ ዎደ ጊግ ኡቴድተንቶነ ቃይ ፓጭያ ህንተ ዳንዳይንቶ ኤራናዉ፥ ሄ ዳብዳቢያ ህንተንቶ ጻፋድ። 
\v 10 እት ኡራይ ናቄዳዋ ህንተ አቶ ግያ ዎደ፥ ታንካ ቃይ አቶ ጋይ፤ ታን አቶ ጌዳዋ ግዶፐ፥ አቶ ጌዳዋ አያነ ክርስቶሳ ስንን ህንተ ድራዉ፥ አቶ ጋድ። 
\v 11 ሴጻናይ ኑኮ ዪደ፥ ኑና ጭመና ማላ፥ ታን አቶ ጋድ፤ አያዉ ጎፐ፥ ኑን አ ቆፋ ኤሬቶ።
\s1 ኦራ ጫቁዋ ኦሳንቻቱዋ ጾኑዋ
\p
\v 12 ታን ክርስቶሳ ምሽራቹዋ ቃላ ኦዳናዉ ጽሮኣዳ ቤዳ ዎደ፥ ጎዳይ ያን ታዉ ፐንግያ ዶይ ዎዳ። 
\v 13 ታን ታ እሻ ቲታ ያን ደማቤና ድራዉ፥ ታዉ አያናይ ሸምፕቤና። ሄዋ ድራዉ፥ ያን ደእያ አሳ፥ “ሳሮ ደእተ” ጋደ ማቅዶንያ ባድ።
\p
\v 14 ሽን ክርስቶሳ ባጋና ኡባ ዎደ ኑና ጾኖ ካለያ ጾሳ፥ ቃይ ክርስቶሳ ትምርትያ ኑ ባጋና ሽቱዋዳን፥ ኡባሳ ጋያዋ ጋላታይ ጋኮ። 
\v 15 አያዉ ጎፐ፥ ኑን አትያ አሳ ግዱዋንነ ይያ አሳ ግዶን ክርስቶስ ጾሳዉ ያርሽያ ሳዉዋ ቶሽኩ ግያ ሽቱዋ ማላ። 
\v 16 ኑን ይያዋንቶ ዜእያ ሀይቁዋ፤ ቃይ አትያዋንቶ ደኡዋ እምያ ሳዊያ ሽቱዋ፤ ያትና፥ ሄዋ ኦናዉ ዳንዳይያዌ ኦኔ? 
\v 17 ኑን ጾሳ ቃላ ገሎባዳን፥ ዋላኪደ ዛልእያ ሀራ ጮራ አሳቱዋ ማላ ግዶኮ፤ ሽን ጾሳይ ኑና ኪትና፥ አማነቲደ ጾሳ ስንን ክርስቶሳ ባጋና ቃላ ኦዴቶ።
\c 3
\s1 ጾሳ ኦራ ጫቁዋ
\p
\v 1 ኑን ሽረቲደ፥ ኑ ሁጲያ ሳባናዉ ዶሜዶዬ? ዎይ ሀራ አሳቱዋዋዳን፥ ሳባ ዳብዳቢያ ህንተንቶ የዳናዉ ዎይ ህንተፐ አካናዉ ኮዬቶ? 
\v 2 ህንተንቱ ህንተ ሁጲያን አሳይ ኡባይ ኤራናዳንነ ናባባናዳን፥ ኑ ዎዛናን ጻፈት ኡቴዳ ኑ ዳብዳቢያ። 
\v 3 ሀ ዳብዳቢያ ክርስቶስ ባረ ሁጲያን ጻፊደ፥ ኑ ቦላ ኪቴዳዌ ቱማ፤ ሀ ዳብዳቢ ደኡዋ ጾሳ ጌሻ አያናን አሳ ዎዛናን ጻፈቴዳዋፐ አትን፥ ሹቻ ቦላ ቃላምያን ጻፈትቤና።\x - \xo 3:3 \xo*\xt ከሳ 24:12፤ ኤር. 31:33፤ ህዝ. 11:19፤ 36:26\xt*\x*
\p
\v 4 ኑዉ ክርስቶሳ ባጋና ጾሳን ሀዋ ማላ አማኑ ደኤ። 
\v 5 ኑ ዳንዳያይ ጾሳፐ ይያዋፐ አትን፥ ሀ ኦሱዋ ኑን ኑ ሁጲያን ኦናዉ ዳንዳዬቶ ግያዌ ኑዉ አያይነ ባዋ። 
\v 6 ኑን ኦራ ጫቆ ኦና ማላ፥ ጾሳይ ኑና ዳንዳይሴዳ፤ ሄ ኦራ ጫቁ ጌሻ አያናዋፐ አትን፥ ጻፈቴዳ ህግያዋ ግደና። ጻፈቴዳ ህጊ ሀይቁዋ አሄ፤ ሽን ጌሻ አያናይ ደኡዋ አሄ።\x - \xo 3:6 \xo*\xt ኤር. 31:31\xt*\x*
\p
\v 7 ሹቻ ዎጪደ ጻፌዳ ህጊ እመትያ ዎደ፥ ጾሳ ቦንቹ ቤቴዳ፤ ሙሴ ሶምእያን ደእያ ጶለይ ይያዋ ግዶፐካ፥ ሄ ጶለይ ዳሮ ዎልቃማ ግድያ ድራዉ፥ እስራኤልያ አሳይ አ ሶምእያ ትሽ ኦ ጼላናዉ ዳንዳይቤና። ሀይቁዋ አህያ ህጊ ኦያ ኦሱ ሀዋ ማላ ቦንቹዋና ይያዋ ግዶፐ፥\x - \xo 3:7 \xo*\xt ከሳ 34:29\xt*\x* 
\v 8 ጌሻ አያናይ ኦያ ኦሱዋ ቦንቹ አይ ኬና ዳራኔ? 
\v 9 አያዉ ጎፐ፥ አሳይ ፕርዳ አክያ ኦሱ ቦንቾ ግዶፐ፥ አሳይ ጽልያ ኦሱዋ ቦንቹ ዋኒደ ዳራንዴሻ? 
\v 10 አያዉ ጎፐ፥ ካሰ ቦንቹ ሀእ ባረፐ ሎይ አያ ቦንቹዋ ጋሱዋን ቦንቹዋ ዬዳዌ ቱማ። 
\v 11 አያዉ ጎፐ፥ ሄ ዬዳዋን ቦንቹ ደእያዋ ግዶፐ፥ መናዉ ደእያዋን አይ ኬና ዎልቃማ ቦንቹ ደአንዴሻ?
\p
\v 12 ኑን ህዶታን ናግያ ሀዋ ማላባይ ኑዉ ደእያ ድራዉ፥ ቆንጭያን ጻሊደ ሃሳዬቶ። 
\v 13 እስራኤልያ አሳይ ይያ ቦንቹዋ ዉርሰ በኤና ማላ፥ ባረ ሶምእያ ናጻላን ካሜዳ ሙሴ ማላ ግዶኮ።\x - \xo 3:13 \xo*\xt ከሳ 34:33\xt*\x* 
\v 14 ሽን ኡንቱንቱ ዎዛናይ ዶንጭሌዳ፤ አያዉ ጎፐ፥ ኡንቱንቱ ኤጫ ጫቁዋ ናባብያ ዎደ፥ ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ፤ ኦንነ ክርስቶሳና ጋከትያ ዎደ ጻላላን ሄ ናጻላይ ክቼ። 
\v 15 ሽን ኡንቱንቱ ሙሴ ማጻፋ ናባብያ ዎደ ኡባን ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ። 
\v 16 ሽን ጾሳ ማጻፋይ፥ “ኦንነ ጎዳኮ ስምያ ዎደ፥ አዉደነ ሄ ናጻላይ ቃረቴ” ያጌ።\x - \xo 3:16 \xo*\xt ከሳ 34:34\xt*\x* 
\v 17 ጎዳይ ጌሻ አያና። ጎዳ አያናይ ደእያ ሳን አይለተይ ባዋ። 
\v 18 ኑን ኡባይካ ናጻላን ካመትቤና ሶምእያን ጎዳ ቦንቹዋ በአና\f + \fr 3:18 \fr*\fk ናጻላን ካመትቤና ሶምእያን፦ \fk*\ft እት አሳ ደኡዋን ስን ሀናናባይ፥ ካሃ ጋርሳን ጶልቂ ቤትያዋዳን ጉሳ።\ft*\f* ቃይ ጌሻ አያና ግድያ ጎዳፐ ይያ ሄ ቦንቹ ኑና ባረና ማላትሲደ፥ ቦንቹዋፐ ቦንቾ ላማና።
\c 4
\s1 ጳዉሎስ ባረ ኦሱዋን አማነቴዳ አሳ
\p
\v 1 ስም ጾሳይ ኑዉ ሀ ኦሱዋ ባረ ማሮተን ኦናዳን እሜዳ ድራዉ፥ ኑን ሳለቶኮ። 
\v 2 ኑን ጌማን ኦያ ዬላይያ ኦሱዋ ኡባ አጎይተ፤ ቃይ ገንያ ኦሱዋካ ኦኮ፤ ዎይ ጾሳ ቃላ ዎርዱዋና ዋላኮኮ። ሄዋዳንካ፥ ቱሙዋ ቆንጭያን ሃሳዪደ፥ ጾሳ ስንን ሱረ ዎዛናዉ ኑና ሺሾይተ።
\p
\v 3 ኑን ኦድያ ዎንጋላ ምሽራቹ ጌሜዳዋ ግዶፐካ፥ ይያ አሳቱዋ ጻላላዉ ጌሜዳ። 
\v 4 ሀ ሳኣ ጾሳይ አማነና አሳቱዋ ቆፋ ጆልሴዳ፤ ክርስቶሳ ቦንቹዋ፥ ዎንጋላ ምሽራቹዋ ፖኡዋ ባረንቶ ፖእያዋ፥ ጾሳ ማላትያዋ ኡንቱንቱ በኤና ማላ፥ ኡንቱንታ ድጌዳ። 
\v 5 አያዉ ጎፐ፥ የሱስ ክርስቶስ ጎዳ ግድያዋነ አ ድራዉ ኑን ኑ ሁጲያን ህንተንቶ ቆማ ግድያዋ ኦደቶፐ አትን፥ ኑባ ኦዶኮ። 
\v 6 አያዉ ጎፐ፥ “ማፐ ፖኡ ፖአና” ጌዳ ጾሳይ ኑ ዎዛናን ባረ ፖኡዋ ፖእሴዳ፤ ቃይ እ ባረ ቦንቾ ኤራተ ፖኡዋ ክርስቶሳ ስንን ፖእያዋ ኑዉ እማናዉ ፖእሴዳ።\x - \xo 4:6 \xo*\xt ዶመ 1:3\xt*\x*
\p
\v 7 ሽን ኡባፐ አያ ዎልቃይ ጾሳዋፐ አትን፥ ኑሳ ግደናዋ በሳናዉ ኑዉ ሀ ምንጃይ ኡርቃፐ መቴዳ ሚሻ ግዴዳ ኑ ግዶን ደኤ።
\p
\v 8 ኑን ኡባ ባጋናካ ኡንኤቴዶ፤ ሽን መኤረትበይኮ፤ ቃይ እት እት ዎደ ስቶ፤ ሽን ኑ ኡባናካ አግበይኮ። 
\v 9 ኑን የደርሰቴዶ፤ ሽን ጾሳይ ኑና ኦልቤና፤ ቃይ ኑ ሞርከቱ ኑና ኦል አጌድኖ፤ ሽን ኑን ይበይኮ። 
\v 10 ቃይ የሱሳ ደኡ ኑ አሳተን ቤታና ማላ፥ ኑን ኡባ ዎደ አ ሀይቁዋ ኑ አሳተን ቶክ ዩዬቶ። 
\v 11 አያዉ ጎፐ፥ ሀይቂያ ኑ አሳተ ቦላ የሱሳ ደኡ ቤታና ማላ፥ ፓጻ ደእያ ኑን አ ድራዉ፥ ኡባ ዎደ ሀይቄቶ። 
\v 12 ሄዋ ድራዉ፥ ሀይቁ ኑ ግዶን ኦ፤ ሽን ደኡ ቃይ ህንተ ግዶን ኦ።
\p
\v 13 ጾሳ ማጻፋይ፥ “ታን አማኔዳ ድራዉ ሃሳያድ” ያጌ፤ ሄ አማኑዋ አያናይ ኑዉካ ደእያ ድራዉ፥ ኑንካ አማኔቶ፤ ሄዋ ድራዉ፥ ሃሳዬቶ።\x - \xo 4:13 \xo*\xt ማዝ. 116:10\xt*\x* 
\v 14 ጾሳይ፥ ጎዳ የሱሳ ሀይቁዋፐ ደንዳዌ፥ ኑናካ ቃይ የሱሳና ሀይቁዋፐ ደንደ፥ ህንተናና እትፐ ባረ ስን ሺሻናዋ ኤሬቶ። 
\v 15 ሀዌ ኡባይ ህንተ ድራሳ፤ ጾሳ አ ኬካተይ ዳሮ አሳ ጋክያ ዎደ፥ አሳይ ጾሳ ቦንቾ ዳሮ ጋላታ እማና።
\s1 አማኑዋን ደኡሳ
\p
\v 16 ሄዋ ድራዉ፥ ኑን ሳለቶኮ፤ ኑዉ ሀራይ አቶ፥ ቦላ ባጋ አሳተይ ዎቂንቶካ፥ ጋርሳ ባጋ አሳተይ ጋላሳን ጋላሳን ኦራጼ። 
\v 17 አያዉ ጎፐ፥ ሀእዉ ዋየትያ ሀ ጉ ዋዪ፥ ኡባፐ ሎይ ዳርያ መና ቦንቹዋ ኑዉ ቤትሳና። 
\v 18 ኑን ቤተናዋ ጼሌቶፐ አትን፥ ቤትያዋ ጼሎኮ፤ አያዉ ጎፐ፥ ቤትያባይ ሀእሳ፤ ሽን ቤተናዌ መናዉ ደእያዋ።
\c 5
\p
\v 1 አያዉ ጎፐ፥ ኑን ደእያ ሀ ሳኣ ዱንካኒ ኮለቶፐ፥ ኑዉ አሳይ ኬጽቤና ጎሊ፥ ጾሳይ ኬጼዳዌ፥ ሳሉዋን መናዉ ደእያዋ ኑን ኤሬቶ። 
\v 2 ኑን ሀ አላምያን ደኢደ ዳሮ ኦሌቶነ ሳሉዋን ደአና ኑ ጎልያ ማያናዉ ሎይ አሞቴቶ። 
\v 3 ኑን ሄዋ ማዪደ፥ ካሎቶኮ፤ 
\v 4 ኑን ሀ ሳኣ ዱንካንያን ደኢደ፥ ዴጸቲደ ኦሌቶ፤ አያዉ ጎፐ፥ ሀይቂያ አሳተይ ደኡዋን ምተታና ማላ፥ ኑን ማያናዉ ኮዬቶፐ አትን፥ ካሎታናዉ ኮዮኮ። 
\v 5 ኑና ሀዎ ጊግሴዳዌ ጾሳ፤ ቃይ እ ባረ ጌሻ አያና ዋሰ ኦደ፥ እሜዳዌ አ።
\p
\v 6 ሄዋ ድራዉ፥ ኑን ኡባ ዎደ አማነቴቶ፤ ቃይ ኑን ኑ ጎለን ሀ አሳተን ደኤዳ ኬናን፥ ጎዳፐ ሻከቲደ ደእያዋካ ኤሬቶ። 
\v 7 አያዉ ጎፐ፥ ኑን አማኑዋን ደኤቶፐ አትን፥ በእያዋን ደኦኮ። 
\v 8 ኑና አማን፤ ቃይ ሀ አሳተን ኑ ጎልያ አግ ጎለ ቢደ ጎዳና እትፐ ደእያዌ ኑና ናሸቼ። 
\v 9 ሄዋ ድራዉ፥ ኑን ቃይ አሹዋን ደእና ደአና ይና፥ ኑ ቆፋይ አ ናሸቻናሳ። 
\v 10 አያዉ ጎፐ፥ ኑን ሁጲያን ሁጲያን ኦዳ ኦሱ ሎአ ግድና፥ ዎይ ኢታ ግድና፥ ኑዉ በስያዋ አካናዉ፥ ክርስቶሳ ፕርዳ ኦይድያ ስንን ኡባይካ ሺቃናዉ በሴ።
\s1 አሳ ጾሳና ዳቦይያ ኦሱዋ
\p
\v 11 ሄዋ ድራዉ፥ ኑን ጾሳዉ ያዩሳይ አየንቶ ኤሪደ፥ ሄዋዳን ቃይ አሳካ አማንቶ፤ ጾሳይ ኑና ኡባና ኤሬ፤ ቃይ ህንተካ ህንተ ዎዛና ቆፋን ኑና ኤሪታ ያጋደ ቆፓይ። 
\v 12 ቤትያባን ጬቀትያዋንቱፐ አትን፥ ዎዛናን ደእያዋን ጬቀተና አሳቶ ህንተ ኦድ ዛርያባይ ደአና ማላ፥ ህንተ ኑናን ጬቀታናዳን፥ ኑን ህንተንቶ ጋሱዋ ግዳናዉ ኮይያዋፐ አትን፥ ኑና ጋላታናዉ ኮዮኮ። 
\v 13 ኑን ጎይያዋ ግዶፐ፥ ጾሳ ቦንቹዋሳ፤ ዎይ ቃይ ዎዛናና ደእያዋ ግዶፐካ፥ ህንተና ጎአናሳ። 
\v 14 ክርስቶሳ ሲቁ ኑና ግዴ፤ አያዉ ጎፐ፥ እት አሳይ አሳ ኡባዉ ሀይቄዳዋ ኑን አኬኬዶ፤ ሄዋ ግዶፐ አሳይ ኡባይ አናና ሀይቄዳ። 
\v 15 ፓጻ ደእያዋንቱ ባረንቱ ድራዉ ሀይቄዳዎነ ቃይ ሀይቁዋፐ ደንዴዳዎ ደአናፐ አትን፥ ስንፐ ባረንቱ ሁጰዉ ደኤና ማላ፥ እ አሳ ኡባ ድራዉ ሀይቄዳ።
\p
\v 16 ሄዋ ድራዉ፥ ኑን ሀዋፐ ስንዉ ኦናነ አሳ ቆፋን ፕርዶኮ፤ ሀራይ አቶ፥ ኑን ክርስቶሳ ካሰ አሳ ቆፋን ፕርዴዳዋ ግዶፐካ፥ ስም ስንፐ ሄዋዳን ፕርዶኮ። 
\v 17 ሄዋ ድራዉ፥ ኦንነ ክርስቶሳና ደኦፐ፥ ኦራ መታ፤ ጭማይ አዳ፤ በእተ፥ ኡባባይካ ኦራጼዳ። 
\v 18 ክርስቶሳ ባጋና ኑና ባረናና ስገዳ ጾሳይ ኡባባካ ኦዳ፤ ቃይ እ ኑዉ ሀራቱዋ ባረናና ስገያ ኦሱዋ እሜዳ። 
\v 19 ጾሳይ ክርስቶሳ ባጋና አሳ ኡባ ባረናና ስገ፤ አሳ ናጋራካ አሳ ቦላ ፓይደና፤ ቃይ አሳ ባረናና ስገያ ኪታካ ኑዉ እሜዳ።
\p
\v 20 ስም ጾሳይ ኑ ባጋና ህንተንቶ ሃሳይያዋዳን፥ ኑንካ ክርስቶሳ ድራዉ ሃሳይያ እ ኪቴዳዋንታ፤ ቃይ ኑን ህንተና፥ “ጾሳና ስገትተ” ጊደ፥ ክርስቶሳ ድራዉ ዎሴቶ። 
\v 21 ኑን ጾሳ ጽሎተ ክርስቶሳ ባጋና አካና ማላ፥ ናጋራ ኤረና ክርስቶሳ ኑ ድራዉ፥ ጾሳይ ናጋራንቻ ኦዳ።
\c 6
\p
\v 1 ህንተ ኑናና ጾሳ ኦሱዋ ኦደ፥ አ አ ኬካተ አኪደ ሀነና ኦግያን ጎኤተና ማላ፥ ኑን ህንተና ዎሴቶ። 
\v 2 አያዉ ጎፐ ጾሳይ፥
\q1 “ታን እንጀ ዎድያን፥
\q2 ኔን ግያዋ ስሳድ፤
\q2 ቃይ አቶተ ጋላስ፥
\q2 ኔና ማዳድ”
\m ያጌ። በእተ፥ እንጀ ዎዲ ሀአ። በእተ፥ አቶተ ጋላሳይ ሀቻ።\x - \xo 6:2 \xo*\xt ኢሳ. 49:8\xt*\x*
\p
\v 3 ኑን ኑ ኦሱዋ ኦንነ ቦራናዋ ኮዮኮ፤ ቃይ ኦናነ ባናዋ ኮዮኮ። 
\v 4 ሽን ኡባባን ኑን ጾሳ ኦሳንቻቱዋ ግድያዋ ኑ ሁጲያን በሴዶ፤ ዳሮ ገንጫን፥ ዋይያን፥ መቱዋን፥ ዎልቃማ ቱጋን፥ 
\v 5 ልሱዋን ሾጨትያዋን፥ ቃሹዋን፥ ሻቢረቱሳን፥ ዳቡራን፥ ገምእሹዋ ይያዋን፥ ጾማን፥ 
\v 6 ጌሻተን፥ ኤራተን፥ ዳንዳያን፥ ኬካተን፥ ጌሻ አያናን፥ ቱሙ ሲቁዋን፥ 
\v 7 ቱሙዋ ሃሳይያዋን፥ ጾሳ ዎልቃን ኑን ጾሳ ኦሳንቻቱዋ ግድያዋ ኑ ሁጲያን በሴዶ፤ ቃይ ጽሎተ ቶራ ኡሸቻ ኩሽያን፥ ጎንዳልያ ሀድርሳ ኩሽያን ኦይቃና። 
\v 8 ኑን ቦንቼቴዶነ ቶሸቴዶ፤ ቦረቴዶነ ጋላተቴዶ። ቃይ ቱሙዋ ሃሳዬቶ፤ ሽን አሳይ ኑና ዎርዱዋ ጊደ ቆፔ። 
\v 9 ኑን አሳይ ኤረና አሳ ማላ፤ ሽን አሳይ ኡባይ ኑና ኤሬ፤ ኑን ሀይቄዳ አሳ ማላ፤ ሽን ህንተ በእያዋዳንካ ደኤቶ፤ ሙረቴዳ አሳ ማላ፤ ሽን ሀይቂበይኮ። 
\v 10 ኑን ካዮትያዋንታ ግዶፐካ፥ ኡባ ዎደ ናሸቴቶ። ህዬሳ ማላቴቶ፤ ሽን ዳሮ አሳ ዱረዬቶ፤ ቃይ አያይነ ባይና አሳ ማላቴቶ፤ ሽን ኡባባይካ ኑዋ።
\p
\v 11 ቆሮንቶሳን ደእያ አሳዉ፥ ኑን ህንተንቶ ቆንጭያን ኦዴዶ፤ ኑ ኡሉዋካ ህንተና በሴዶ፤ 
\v 12 ኑን ህንተንቶ ብበይኮ፤ ቤዳዋንቱ ህንተና። ኑን ኑ ኡሉዋ ህንተንቶ ገንበይኮ፤ ሽን ህንተ ኡሉዋ ኑዉ ገንዳዋንቱ ህንተና። 
\v 13 ሀእ ታን ታ ናናዉ ሃሳይያዋዳን፥ ህንተንቶ ሃሳያይ፤ ኑን ህንተና ኑ ኡሉዋ በሴዳዋዳን፥ ህንተካ ኑና ህንተ ኡሉዋ አስ ዶዪደ በስተ።
\s1 አማነና አሳና ዙፐተና ማላ ሴራ
\p
\v 14 አማነና አሳቱዋና ዙፐቲደ፥ ጊገና ኦሱዋ ኦፕተ። አያዉ ጎፐ፥ ጽሎተዉነ ናጋራዉ አያን ጋከይ ደኢ? ፖኦነ ማዉ አያን እትፐተይ ደኢ? 
\v 15 ክርስቶሳነ ዳብሎሳ\f + \fr 6:15 \fr*\fq ዳብሎሳ፦ \fq*\ft ግሪክያ ማጻፋይ “በልያር” ጌ። ሄዋ ጉሳይ እብራይስጽያን “በልያል” ግያዋ። ላኡዋ ብለይካ “ማካላንቻ” ዎይ “ማደናዋ” ጉሳ።\ft*\f* እትፐ ጋያባይ አዬ? ቃይ አማንያዌነ አማነናዌ ኮጽያዌ አዬ ደኢ? 
\v 16 ጾሳ ጌሻ ጎለዉነ ኤቃዉ አይበ ዙፐተይ ደኢ? አያዉ ጎፐ ጾሳይ፥
\q1 “ታን ኡንቱንቱ ግዶን ደአናነ
\q2 ኡንቱንቱ ግዶን ሀመታና።
\q1 ታን ኡንቱንቱ ጾሳ ግዳና፤
\q2 ቃይ ኡንቱንቱካ ታ አሳቱዋ ግዳና”
\m ጌዳዋዳን፥ ኑን ደኡዋ ጾሳ ጌሻ ጎልያ።\x - \xo 6:16 \xo*\xt ዎጋ 26:12፤ ህዝ. 37:27፤ 1 ቆሮ. 3:16፤ 6:19\xt*\x*
\q1
\v 17 ሄዋዳንካ፥ ቃይ ጎዳይ፥
\q2 “ኡንቱንቱ ግዶፐ ከስተ፤
\q2 ኡንቱንቱፐ ሻከትተ።
\q2 ቱናባካ ቦቾፕተ።
\q2 ታን ህንተና ሞካ አካና።\x - \xo 6:17 \xo*\xt ኢሳ. 52:11\xt*\x*
\q1
\v 18 ቃይ ታን ህንተንቶ አዉዋ ግዳና፤
\q2 ህንተካ ታዉ አቱማ ናናቱዋነ፥
\q2 ማጫ ናናቱዋ ግዳንታ።
\q2 ታን ኡባፐ ዎልቃማ ጎዳይ፥
\q2 ሀዋ ኦዳይ”
\m ያጌዳ።\x - \xo 6:18 \xo*\xt 2 ሳሜላ 7:14፤ 1 ኦዱዋ 17:13፤ ኢሳ. 43:6፤ ኤር. 31:9\xt*\x*
\c 7
\p
\v 1 ሄዋ ድራዉ፥ ታ ሲቃቶ፥ ጾሳይ ሀ ኡባባ ኑዉ እማና ጌዳዋፐ ህን ባጋን፥ ኑ አሹዋነ ኑ ሸምፑዋ ቱንስያ ኡባባፐ ኑ ሁጲያ አነ ጌሾይተ፤ ቃይ ጾሳዉ ያይያዋን ኡባና ጌዪደ ደኤቶ።
\s1 ጳዉሎሳ ናሸቻ
\p
\v 2 ህንተ ኡሉዋ ኑና በስተ፤ ኑን ኦናነ ናቂበይኮ፤ ኦናነ ቆህበይኮ፤ ቃይ ኦናነ ጭምበይኮ። 
\v 3 ታን ሄዋ ህንተ ቦላ ፕርዳናዉ ጊከ፤ አያዉ ጎፐ፥ ታን ካሰ ህንተንቶ ጌዳዋዳንካ፥ ህንተንቱ ኑ ዎዛናን ደኢታ፤ ኑን ደእናካ ሀይቂናካ፥ እትፐ ደኤቶ። 
\v 4 ታን ሃሳይያዋ ህንተፐ ቆስከ፤ ታን ህንተናን ጬቀታይ፤ ኑ ዋይያ ኡባን ታን ሎይ ምናይነ ናሸታይ።
\p
\v 5 አያዉ ጎፐ፥ ሀራይ አቶ ኑን ማቅዶንያ ቤዳ ዎደ፥ ኡባ ባጋንካ ዋየቴዶፐ አትን፥ ሸምፕበይኮ፤ ሀራ አሳና ዋላሳይ ደኤ፤ ኑ ዎዛናንካ ያሻይ ደኤ። 
\v 6 ሽን ካዉሼዳዋንታ መንያ ጾሳይ፥ ቲቶ ዩሳን ኑና መንዳ። 
\v 7 ኑና ካሰዋፐ አ ናሸችያዌ፥ ቲቶ ዩሳ ጻላላ ግደና፤ ሽን ህንተ አ መንዳዌ፥ ህንተ ታና በአናዉ አሞቴዳዋነ ታዉ ቃረቴዳዋ ቃይ ህንተ ታና ማዳናዉ ጊገቴዳዋ እ ኑዉ ኦዴዳ።
\p
\v 8 አያዉ ጎፐ፥ ታ ዳብዳቢ ህንተና ካዮዬዳዋ ግዶፐካ፥ አያዉ ጻፋድታሻ ጊከ፤ አያዉ ጻፋድታሻ ጎፐካ፥ ታ ዳብዳቢ ህንተና ጉ ዎድያ ካዮዬዳዋ በአይ። 
\v 9 ሀእ ታና ናሸችያዌ ታን ህንተና ካዮዬዳ ድራሳ ግደና፤ ሽን ህንተ ካዩ ህንተና ናጋራፐ ዛሬዳዋ ድራሳ፤ አያዉ ጎፐ፥ ኑን ህንተና አያንነ ቆሄናዳን፥ ጾሳይ ባረ ኮዬዳዋዳን፥ ህንተና ካዮዬዳ። 
\v 10 አያዉ ጎፐ፥ ጾሳይ ኮይያ ካዩ ናጋራፐ ዛሪደ አቶተኮ አሄ፤ ሄዌካ ታን ባይዛድ ጌና ዎዛና፤ ሽን አላምያ ካዩ ሀይቁዋ አሄ። 
\v 11 ጾሳይ ሄ ህንተ ካዩዋን አይ አይፍያ እሜደንቶ በእተ። ህንተና አይ ኬና ደንደንቶነ ህንተ ጌሻተ ቱማያናዉ ህንተና አይ ኬና ዛሩዋ እምሴደንቶ፥ አይ ኬና ሀንቀደንቶነ አይ ኬና ታዉ ያሽሴደንቶ፥ አይ ኬና ሴልሴደንቶ፥ አያ ኬና ታና ላሞትሴደንቶነ ናቆ ኦሱዋ ኦዋንታ ሙራናዉ አይ ኬና ጊግሴደንቶ ፓጭ በእተ፤ ህንተ ህንተ ሁጲያን ጌሻ ግዴዳዋ ኡባባንካ ኤርሴድታ።
\p
\v 12 ሄዋ ድራዉ፥ ታን ሄ ዳብዳቢያ ህንተንቶ ጻፌዳዋ ግዶፐካ፥ ናቄዳ ኡራ ዎይ ናቀቴዳ ኡራ ድራሳ ግደና፤ ሽን ህንተ ኑዉ ዎይሳ ቆፕንቶነ ጾሳ ስንን ህንተንቶ ቆንጭሳናዉ ታን ጻፋድ። 
\v 13 ኑን ምኔዳዌ ሄዋ ድራሳ፤ ሄ ኑ ምኖታ ቦላ፥ ቲቶ ናሸቴዳዎ ኑን ኡባፐ ዳርያ ናሸቻ ናሸቴዶ። አያዉ ጎፐ፥ ህንተ ኡባይ አ ህርጋፐ ሸምፕሴድታ። 
\v 14 ታን ህንተዋ ሳባደ አዉ ኦድና፥ ህንተ ታና ዬላይበይክታ፤ ሽን ኑን ህንተንቶ ኡባ ዎደ ቱሙዋ ሃሳዬዶ፤ ሄዋዳንካ፥ ኑን ቲቶ ስንን ህንተዋ ሳቤዳዌ ቱማ ግዴዳ። 
\v 15 ሄዋ ድራዉ፥ ህንተ ኡባይ አዉ ያዪደ ኮኮሪደ፥ አ ዎት ሞኬድተንቶነ ቃይ አዉ አይ ኬና አዛዘቴድተንቶ እ ሀሳይያ ዎደ፥ ህንተና ሎይ ሲቄ። 
\v 16 ታን ኡባባን ህንተና አማንያ ድራዉ ናሸታይ።
\c 8
\s1 ጾሳ አሳቱዋ ኬካተ እሞታ
\p
\v 1 ኑዋዳን ጾሳ አሳቶ፥ ጾሳ አ ኬካተይ ማቅዶንያ አማንያዋንቱ ግዶን ኦዳዋ ህንተና ኤርሳናዉ ኮዬቶ። 
\v 2 ኡንቱንቱ አዳ ዋይያን ዎልቃማ ፓጭያ ፓጨቴድኖ፤ ሽን ኡንቱንቱ ህዬሳ ግዶፐካ፥ ባረንቱ እምያዋን ዳሮ ኬክኖነ ቃይ ዎልቃማ ናሸቻ ናሸቲኖ። 
\v 3 አያዉ ጎፐ፥ ኡንቱንቱ ባረንቱ ዎልቃ ኬና ቃይ ሀራይ አቶ ባረንቱ ዎልቃፐካ ዳርያዋ ዶሲደ እሜዳዎ ታን ማርካ። 
\v 4 ኡንቱንቱ ጾሳ አሳቱዋ ማድያ ሎኦ ኦሱዋ ኑናና ኦናዉ ኑና ዳሮ ዎሴድኖ። 
\v 5 ኡንቱንቱ ኑን ቆፔዳዋፐ አደ ኦድኖ፤ ካሰቲደ ኡንቱንቱ ባረንቱ ሁጲያ ጎዳዉ እሜዳዋፐ ጉይያን፥ ጾሳ ሸንያዳን፥ ኑዉካ ባረንቱ ሁጲያ እሜድኖ።
\p
\v 6 ሄዋ ድራዉ፥ ኑን ሀ ሎኦ ኦሱዋ ዶሜዳ ቲቶ ጉጅ ኦናዳንነ ህንተና ማዲደ፥ ሄ ኦሱዋ ፖልሳናዳን አ ዎሴዶ። 
\v 7 ሽን ህንተ ኡባባን፥ አማኑዋን፥ ሃሳያን፥ ኤራተን፥ ዎልቃማ ሎኦ አሙዋን፥ ኑና ሲቅያዋንካ ዱረቴዳዋዳን፥ ሀ ሎኦ ኦሱዋንካ ህንተንቱ ኬካ ግዳናዋ ኑን ኮዬቶ።
\p
\v 8 ታን ሄዋ አዛዛናዉ ጊከ፤ ሽን ሀራቱዋ ዎልቃማ ሎኦ አሙዋ ባጋና ህንተ ሲቁ አይ ኬና ቱመንቶ ኤራናዉ ጋይ። 
\v 9 አያዉ ጎፐ፥ ህንተ ኑ ጎዳ የሱስ ክርስቶሳ አ ኬካተ ኤሪታ፤ ክርስቶስ ዱረ ግድ ደኢደ፥ ህንተ አ ህዬሳተን ዱረታናዳን፥ ህንተ ድራዉ ህዬሴዳ።
\p
\v 10 ታን ሀ የዉዋ ህንተና ዞርያዌ ሀዋ፤ ዝላይ ህንተ ዶሜዳዋ ሀእ ዉርስያዌ ህንተንቶ ሎአ፤ ህንተ ኦሶ ጻላላዉ ግደናን፥ ኦና ቆፋዉካ ካሰቴዳዋንታ። 
\v 11 ህንተ ኦናዉ ሎይ አሞቴዳዌ ኦደ ፖሌዳዋና ጊጋ ግዳና ማላ፥ ህንተንቶ ዳንዳየቴዳዋዳንካ ኦሱዋ ፖልተ። 
\v 12 አያዉ ጎፐ፥ እት ኡራይ እማናዉ ሎይ ኮዮፐ፥ እ ባረዉ ደኤዳ ኬና እማናፐ አትን፥ አዉ ባይናዋ አፐ አከና።
\p
\v 13 አያዉ ጎፐ፥ ታን ሀራንቱ ዋይያፐ ሸምፕና፥ ህንተ ዋየትተ ጊከ፤ ህንተ ኡባይካ ቃራ ደአናዳናፐ አትን። 
\v 14 ኡንቱንቱ ፓላሀይ ህንተ ፓጫ ኩንና ማላ፥ ህንተንቶ ሀ ዎድያን ደእያ ፓላሀይ ኡንቱንቱ ፓጫ ኩንና ኮሼ፤ ላኡካ ሄዋን ቃራን ጎኤቲኖ። 
\v 15 ጾሳ ማጻፋን፥ “ዳርሲደ ሺሼዳዎ ፓላህቤና፤ ቃይ ጉ ሺሼዳዎካ ፓጭቤና” ጌተቲደ ጻፈቴዳ።\x - \xo 8:15 \xo*\xt ከሳ 16:18\xt*\x*
\s1 ቲታነ አ ላገ
\p
\v 16 ሽን ኑን ህንተንቶ ቆፕያዋ ማላ፥ ዎልቃማ ቆፋ ቲታ ቆፍሴዳ ጾሳ ጋላታይ ጋኮ። 
\v 17 ቲቶ ህንተኮ ባናዉ ባረ ቆፋ ቃቼዳዌ፥ ባረ ሁጲያን ህንተና ማዳናዉ ዳሮ አሞቴዳ ግሻፐ አትን፥ ኑ ዞርያ ጻላላ አኬዳዋና ግደና። 
\v 18 ምሽራቹዋ ቃላ ኦድያ ባረ ኦሱዋን አማነትያ አማንያዋንቱ ስን ኡባን ዳሮ ቦንቼቴዳ እሻ ኑን አናና እትፐ ኪቴቶ። 
\v 19 ሄዋ ቦላን ቃይ፥ ሀ ኑን ኦያ ሎኦ ኦሱዋ እ ኑናና እትፐ ኦናዉነ ጎዳ ቦንቾ ኑን ሀራቱዋ ማዳናዉ ሎይ አሞትያዋ በሳናዉ አማንያ አሳቱ አ ዶሪደ ሱንድኖ።
\p
\v 20 ኑን ኦያ ሀ ኬካ እሞታ ድራዉ፥ ኦንነ ኑና ዝግረና ማላ ናገቴቶ። 
\v 21 አያዉ ጎፐ፥ ኑን ጎዳ ስንን ሎኦባ ኦናዋ ጻላላ ግደና፤ ሽን አሳ ስንንካ ሎኦባ ኦናዉ ቆፔቶ።\x - \xo 8:21 \xo*\xt ሌም. 3:4\xt*\x*
\p
\v 22 ኑን ዳሮ ገደ ፓጭ በኤዳ ኑ እሻ፥ ኡባ ዎደ ህንተና ማዳናዉ ዳሮ አሞትያዋ፥ ሀ አሳቱዋና ህንተኮ ኪቴቶ፤ ቃይ ሀእ እ ህንተና ዳሮ አማንያ ድራዉ፥ ህንተና ማዳናዉ ካሰዋፐ አደ ሎይ አሞቴ። 
\v 23 ቲቶዋ ግዶፐ፥ እ ህንተና ማዳናዉ ታናና እትፐ ኦያ ታ ላግያ፤ የኮ እሻቱዋባ ግዶፐ፥ ኡንቱንቱ አማንያ አሳቱ ኪቴዳዋንታነ ኡንቱንቱ ደኡ ክርስቶሳ ቦንችስያዋ። 
\v 24 ስም አማንያዋንቱ ኡባቱ ህንተ ሲቁ ቱማ ግድያዋ ኤራና ማላ፥ ቃይ ኑን ህንተዋ ሳቢያዌ ልከ ግድያዋ ኤራና ማላ፥ ህንተ ሲቁዋ ኡንቱንታ በስተ።
\c 9
\s1 ፓጫይ ደእያዋንታ ማዱሳ
\p
\v 1 ይሁዳን ደእያ ጌሻ አሳቱዋ ማዳናዉ የድያባዉ ታን ህንተንቶ ጻፋናዉ ኮሸና። 
\v 2 ህንተ ማዳናዉ ሎይ አሞትያዋ ታን ኤርያ ድራዉ፥ ማቅዶንያን ደእያ አሳዉ ህንተዋ ሳባድ። ታን ኡንቱንቶ፥ “አካይያን ደእያ እሻቱ ዝላይፐ ዶሚደ፥ ማዳናዉ ጊገቴድኖ” ያጋደ ኦዳድ፤ ቃይ ህንተ ዎልቃማ አሙካ ኡንቱንቱፐ ዳርያ ባጋ ደንዳ። 
\v 3 ሽን ታን ኡንቱንቶ ጌዳዋዳንካ ኑን ሀ የዉዋ ህንተናን ጬቀትያዌ መላ ግደና ማላ፥ ህንተ ጊገቴዳዋንታ ግዳናዳን፥ ሀ እሻቱዋ ህንተኮ ኪታይ። 
\v 4 ማቅዶንያ አሳቱ ታናና ዪደ፥ ህንተ ጊገተናን ደእሽን፥ ህንተና ደሞፐ፥ ኑ ጻላላ ግደናዳን፥ ህንተ ኑፐ አዋ ዬላታንታ፤ ሽን ኑን ህንተና ሎይ አማኒደ ጬቀቴዳዋሳ። 
\v 5 ሄዋ ድራዉ፥ ታን ሀ እሻቱ ታፐ ስንት ህንተኮ ቢደ፥ ህንተ እማና ጌዳ እሞታ ካሰቲደ ጊግሳና ማላ፥ ኡንቱንታ ዎሳናዉ ኮሽያዋ አኬካድ። ሄዋፐ ጉይያን፥ ሄ እሞታይ ታን ጋክያ ዎደ ጊግ ኡታናዋ፤ ሄዌ ቃይ ዎልቃን ህንተ እምያዋ ግደናን፥ ዶሲደ እምያዋ ኤርሴ።
\p
\v 6 ሀዋ አኬክተ፤ ጉ ዘረ ዘርያ ኡራይ ጉ ካ ጫካና፤ ዳሮ ዘረ ዘርያ ኡራይ ቃይ ዳሮ ካ ጫካና። 
\v 7 ጾሳይ ናሸቻን እምያ ኡራ ሲቅያ ድራዉ፥ ቃረቲደ ዎይ ዶሰናን እምያዋ ግደናን፥ እምያ ኡራይ ሁጲያን ሁጲያን ባረ ዎዛናን ቆፔዳዋ እሞ። 
\v 8 ጾሳይ ህንተንቶ ግድያዌ ኡባ ዎደ ደአናዳንነ ቃይ ሀራቶካ ህንተ እማናዉ ግድያዌ ደአናዳን ህንተና ኮሽያ ኡባባ ህንተንቶ እማናዉ ዳንዳዬ። 
\v 9 ጾሳ ማጻፋይ፥
\q1 “እ ህዬሳ አሳዉ ዳርሲደ እሜ፤
\q2 ቃይ አ ጽሎተይ መናዉ ደአናዋ”
\m ያጌ።\x - \xo 9:9 \xo*\xt ማዝ. 112:9\xt*\x* 
\v 10 ጾሳይ፥ ዘርያዎ ዘረነ ማናዉ ቁማ እምያዌ፥ ህንተና ኮሽያ ዘረ ኡባ ህንተንቶ እማና፤ ቃይ ህንተ ጽሎተፐ ዳሮ አይፍያ አይፍሳናዉ ሄ ዘረ ድቻናዋ።\x - \xo 9:10 \xo*\xt ኢሳ. 55:10\xt*\x*
\p
\v 11 ዳሮ አሳይ ህንተ እምያ እሞታ ኑፐ አኪደ፥ ጾሳ ጋላታናዳን፥ ህንተ ኡባ ዎደ ዳርሲደ እምያዋንታ ግዳና ማላ፥ ጾሳይ ህንተና ኡባ ባጋና ዱረያና። 
\v 12 አያዉ ጎፐ፥ ሀ ህንተ ኦያ ኦሱ ጾሳ ናናዉ ኮሽያዋ ኩን እምያዋ ጻላላ ግደና፤ ሽን ጾሳዉ ዳሮ ጋላታ እምያዋን ኩሚደ ጎጌ። 
\v 13 ሀ ህንተ ኦሱ ህንተ አማኑዋ ኤርስያ ድራዉ፥ ዳሮ አሳይ ክርስቶሳ ዎንጋላ ህንተ አማኒደ ማርካትያዎነ ህንተ ማዱዋ ኡንቱንቱናነ ሀራ ኡባቱዋና ሻኪደ፥ ዳርስ እምያዎ ጾሳ ቦንቻና። 
\v 14 ኡንቱንቱ ህንተንቶ ጾሳ ዎሲደ፥ ህንተናን ደእያ ጾሳ አ ኬካተይ ዛዋይ ባይናዋ ድራዉ፥ ህንተና ላሞቴቶ። 
\v 15 ዛዋይ ባይና ጾሳ አ ኬካተ ድራዉ፥ ጾሳ ጋላታይ ጋኮ።
\c 10
\s1 ጳዉሎስ ሞትያዋንቶ ዛሬዳ ዛሩዋ
\p
\v 1 ታን ጳዉሎስ፥ ህንተ፥ “እ ኑናና ደእያ ዎደ አሽከ” ግያዌ፥ ቃይ፥ “ኑፐ ሃክ ደእያ ዎደ ኑ ቦላ ጻሌ” ግያዌ፥ ሎአነ አሽከ ግዴዳ ክርስቶሳ ባጋና ህንተና ዎሳይ። 
\v 2 ኑና ሀ ሳኣ ዶያዳን ደኢኖ ጊደ ቆፕያ እት እት አሳቱዋ ቦላ ታን ጻላናዋ ኤራይ፤ ሽን ታን ህንተኮ ብያ ዎደ ህንተ ታና ጻልሰና ማላ፥ ህንተና ዎሳይ። 
\v 3 አያዉ ጎፐ፥ ኑን ሀ ሳኣን ደኦፐካ፥ ሀ ሳኣ አሳዳን ኦለቶኮ። 
\v 4-5 አያዉ ጎፐ፥ ኑን ኦለትያ ቶራይ ሀ ሳኣዋ ግደና። ሽን ጌሱዋ ላላናዉ ዎልቃና ደእያ ጾሳ ቶራ። ኑን አሳ ቆፋ ይሴቶ፤ ቃይ ጾሳ ኤራተ ቦላ ደንዲደ ቢያ ኦቶሮ ቆፋ ኡባ ላሌቶ። ሄ ቆፋ ኡባይ ክርስቶሳዉ አዛዘታና ማላ ኦሞዴቶ። 
\v 6 ህንተ አዛዘትያዋ ፖሌዳዋፐ ጉይያን፥ አዛዘተናን እጽያዋ ኡባ ኑን ሙራናዉ ጊገታና።
\p
\v 7 ህንተ ስንን ደእያዋ ጼልተ፤ ኦንነ ባረና ክርስቶሳዋ ጊደ ቆፖፐ፥ ሄዋ ጉጅ ቆፖ፤ ክርስቶሳዋ እ ግዴዳዋዳን፥ ኑንካ ቃይ አዋ። 
\v 8 አያዉ ጎፐ፥ ጎዳይ ኑዉ እሜዳ ኑ አዎተን ታን ሎይ ኦቶረትያዋ ግዶፐካ፥ ሄዋን ዬላትከ፤ ሄ ኑዉ እሜዳ አዎተይ ህንተና ኬጻናሳፐ አትን፥ ኮላናሳ ግደና። 
\v 9 ታን ታ ዳብዳቢያን ህንተና ያሽሳናዉ ጻፎ አሳ ማላታደ ቤታናዉ ኮይከ። 
\v 10 አያዉ ጎፐ፥ እት እት አሳይ፥ “ጳዉሎሳ ዳብዳቢ ዴጾነ ዎልቃማ፤ ሽን ጼልያ ዎደ እ ዳቡራንቻ፤ አ ሃሳያይካ ፓና” ያጌ። 
\v 11 ሄዋ ማላ አሳይ ኑን ሃኩዋን ደኢደ ጻፍያ ዳብዳቢያንነ ያን ህንተናና ደኢደ ኦያ ኦሱዋን ዱማተ ባይናዋ አኬካና ኮሼ።
\p
\v 12 ኑን ባረና ናሽያ እት እት አሳቱዋና ኑና ፓይዳናዉ ዎይ ልክሳናዉ ኮዮኮ፤ ሽን ኡንቱንቱ ባረና እቱ እቱዋና ልክሲድነ ቃይ ባረና እቱ እቱዋና ቃራዪደ፥ ኡባና ኤዬድኖ።
\p
\v 13 ሽን ኑን ጾሳይ ኑዉ ኤሴዳ ዛዋ ግዶን ጬቀትያዋፐ አትን፥ ሄ ዛዋፐ ፕኒደ ጬቀቶኮ፤ ሄ ዛዋይ ህንተኮካ ጋኬ። 
\v 14 ኑን ህንተኮ ጋክቤናዋ ማላቲደ፥ ዛዋ ፕኖኮ፤ አያዉ ጎፐ፥ ኑን ክርስቶሳ ምሽራቹዋ ቃላ ኦዲደ፥ ህንተኮ ካሰ ጋኬዶ። 
\v 15 ኑን ጾሳይ ኤሴዳ ዛዋ ፕኒደ፥ ሀራ አሳይ ኦዳ ኦሱዋን ጬቀቶኮ፤ ሽን ህንተ አማኑ ድጭ ድጭ ብያ ዎደ፥ ኑን ህንተ ግዶን ኦያ ኦሱዋ ዛዋይ ካሰዋፐ ሎይ አክ አክ ባናዋ ጊደ ቆፔቶ። 
\v 16 ኑን ምሽራቹዋ ቃላ ህንተ ደኢያሳፐ ህን ባጋን ኦዳና፤ ቃይ ሀራ ዛዋን ኦሰት ድጌዳ ኦሱዋንካ ጬቀቶኮ። 
\v 17 ሽን ጾሳ ማጻፋይ፥
\q1 “ጬቀትያ ኡራይ ኦንነ
\q2 ጎዳ ሎኦተባን ጬቀቶ”
\m ያጌ።\x - \xo 10:17 \xo*\xt ኤር. 9:24\xt*\x* 
\v 18 አያዉ ጎፐ፥ ጎዳይ ናሽያ ኡራፐ አትን፥ ባረና ናሽያ ኡራይ ጋላተተና።
\c 11
\s1 ጳዉሎሳነ ባረና የሱስ ኪቴዳ ግያ ዎርዳንቻቱዋ
\p
\v 1 ህንተ ታ ኤያተ ጉ ዳንዳይንቶ ሎአ። ሀያና ዳንዳይተ። 
\v 2 ጾሳይ ቃናትያዋዳን፥ ታንካ ህንተዉ ቃናታይ፤ አያዉ ጎፐ፥ ታን ህንተና እት አቱማዎ፥ ክርስቶሳዉ እማና ጋደ፥ አቱማዋ ኤረና ጌሻ ዎዶራቲዳን ጊግሳ ዎድ።
\p
\v 3 ሽን ሾሻይ ባረ ማካላን ሄዋኖ ባለዳዋዳን፥ ክርስቶሳዉ ህንተ እሜዳ ህንተ ሱረ ቆፋይ ባይቤናዌ ዎራ ባንዴሻ ጋደ ህርጋይ።\x - \xo 11:3 \xo*\xt ዶመ 3:1-5\xt*\x* 
\v 4 አያዉ ጎፐ፥ እት ኡራይ ዪደ፥ ኑን ህንተንቶ ኦዴዳ የሱሳፐ ሀራ የሱሳ ህንተንቶ ኦዶፐ፥ ዎይ ህንተ አኬዳ አያናፐነ ዎንጋላፐ ዱማ አያናነ ዎንጋላ ህንተ አኮፐ፥ ህንተ ኤኖ ጊደ አኬድታ ጉሳ።
\p
\v 5 የሱስ ኪቴዳ ሀ ዋናቱዋፐ ታን አያንካ ላፍያዋ ታዉ ማላተና። 
\v 6 ታን ሃሳይያ ሃሳያን ታማራቤና አሳ ግዶፐካ፥ ኤራተን ግድከ፤ ሽን ኑን ህንተንቶ ሀ የዉዋ አሳ ኡባ ግዶን ኡባ ባጋና ቆንጭሴዶ።
\p
\v 7 ዎይ ታን ህንተና ሚሻ ኦቼናን፥ ጾሳ ምሽራቹዋ ቃላ ህንተንቶ ጮ ኦዴዳዌነ ህንተና ቁ ኦናዉ ታ ሁጲያ ቶቼዳዌ ታዉ ናጋራ ግዳንዴሻ? 
\v 8 ታን ህንተንቶ ኦናዉ ሀራ አማንያ አሳፐ ሚሻ አኬዳዎ፥ ሄዋንታ ቦንቃድ። 
\v 9 ቃይ ታን ህንተናና ደእሽን፥ ታና መትና፥ ህንተፐ እት ኡራካ ዋይሳበይከ። አያዉ ጎፐ፥ ማቅዶንያፐ ዬዳ እሻቱ ታና ኮሼዳ ኡባባ ታዉ እሜድኖ፤ ታን ህንተና ዋይሰና ማላ፥ ካሰ ቶኮ ግዳቤናዋዳንካ ስንዉካ ቶኮ ግድከ። 
\v 10 ክርስቶሳ ቱማተይ ታናን ደእሽን፥ ሀ ታ ጬቁ አካይያ ጋድያን ሀቃንነ አተና። 
\v 11 ታን ሀዋ አያዉ ጋይታ? ህንተና ሲቀና ድራሴ? ታን ህንተና ሲቅያዋ ጾሳይ ኤሬ።
\p
\v 12 ሽን ሄ ባረንቱ ጬቀትያዋን ኑን ኦያዋዳን ኦናዉ ጋሶትያዋንቱ ጋሱዋ ድጋናዉ፥ ሀእ ታን ኦያ ኦሱዋ ጉጃደ ኦና። 
\v 13 አያዉ ጎፐ፥ ኡንቱንቱ የሱስ ኪትቤና ዎርዶ አሳቱዋ፤ ሄዋንቱ ማላ አሳቱ ክርስቶስ ኪቴዳዋንታ ማላታናዉ ባረንቱ ማላ ላመረያ ኪተትቤና ዎርዳንቻቱዋነ ላባንቻ ኦሳንቻቱዋ። 
\v 14 ሄዌ ማላልስያዋ ግደና፤ አያዉ ጎፐ፥ ሴጻናይ ባረ ሁጰዉ ፖኡዋ ኪታንቻ ማላታናዉ ባረ ማላ ላሜ። 
\v 15 ሄዋ ድራዉ፥ ሴጻና ኦሳንቻቱ ጽሎተ ኦሳንቻቱዋ ማላታናዉ ባረንቱ ማላ ላሞፐ፥ ሄዌ ዎልቃማባ ግደና፤ ኡንቱንቱ ዉርሰን ባረንቱ ኦሱዋ ማላ አካና።
\s1 ጳዉሎሳ ጋኬዳ መቱዋ
\p
\v 16 ታን ላኤንዋካ ጋይ፤ ታና ኦንነ ኤያ ጊደ ቆፖፖ፤ ሽን ህንተ ታና፥ እ ኤያ ጎፐካ፥ ታን ጉ ጬቀታናዳን፥ ታና ኤያ ጊተ። 
\v 17 ታን ሀዋዳን ጻላደ ጬቀታደ ሃሳይያዌ፥ ኤያተ ሃሳያፐ አትን፥ ታና ጎዳይ አዛዝና ግደና። 
\v 18 ዳሮ አሳይ ሀ ሳኣባን ጬቀትያ ድራዉ፥ ታንካ ጬቀታና። 
\v 19 ህንተ አዳ ኤራንቻ ግድያ ድራዉ፥ ኤያ አሳዋ ናሸቻን ዳንዳዪታ። 
\v 20 አያዉ ጎፐ፥ ኦንነ ህንተና አይለዮፐ፥ ዎይ ህንተዋ ሞፐ፥ ዎይ ህንተዋ ቦንቆፐ፥ ህንተ ቦላ ኦቶረቶፐ፥ ዎይ ህንተ ሻይያ ባቆፐ፥ ዳንዳዪታ። 
\v 21 ኑን ሄዋ ኦናዉ ዳሮ ዳቡራንቻ ግዴዳዋ ታን ዬላታደ ኦዳይ።
\p ሽን ኦንነ እትባን ጻሊደ ጬቀቶፐ፥ ታንካ ጬቀታናዉ ጻላይ፤ ታን ኤያ አሳዳን ሃሳያይ። 
\v 22 ኡንቱንቱ እብራዌ? ታንካ እብራዌ። ኡንቱንቱ እስራኤልያ አሴ? ታንካ እስራኤልያ አሳ። ኡንቱንቱ አብራሃመ ዛረ? ታንካ ቃይ አብራሃማ ዛረ። 
\v 23 ኡንቱንቱ ክርስቶሳ ቆማቴ? ታንካ ኡንቱንቱፐ አያ ቆማ፤ ታን ጎይያ አሳዳን ሃሳያይ፤ ታን ዳሮ ኦ ዳቡራድ፤ ዳሮ ዎድያ ቃሸታድነ ልሱዋን ሾጨታድ፤ ቃይ ዳሮ ዎድያ ሀይቃደ አታድ። 
\v 24 አይሁዳቱ ታና እቼሹ ገደ፥ ሀታማነ ኡዱፑኑዋ ልሱዋን ሾጬድኖ።\x - \xo 11:24 \xo*\xt ዛረ. 25:3\xt*\x* 
\v 25 ሮመ አሳይ ታና ሄዙ ገደ ጻምኣን ሾጬዳ፤ እት ጋላስ ሹቻን ጫድ ጫዲደ አጌዳ፤ ማርካቢ ሄዙ ገደ መእና፥ አባ ግዶን እት ቃማነ እት ጋላሳ አቃደ ፔሻድ። 
\v 26 ታን ዳሮ ኦግያ ሀመታድ፤ ታና ኩን ሃይነ ቦንቃንቻቱ ቦንቂ ድጊደ አሼዳ፤ ቃይ ታ ቢታ አሳይነ አይሁዳ ግደና አሳይ ቦንቂ ድጊደ አሼድኖ። ቃይካ ካታማይ፥ ባዙ፥ አባይ፥ ታና ያሽሴዳ፤ ዎርዱዋ ዳባቱካ ታና ቦንቂ ድጊደ አሼድኖ። 
\v 27 ታን ዳቡራድነ መቶታድ። ዳሮ ገደ ገምእሹዋ ያድ፤ ኮሻታድ፤ ሳመታድ። ዳሮ ገደ ጾማድ፤ ቃይ ሜገታድነ ካሎታድ።
\p
\v 28 ሀራባ ኡባፐካ ኡባ ጋላስ ታዉ ቶኩዋ ግዴዳባይ፥ ዎሳ ጎልያ ኡባዉ ህርግያዋ። 
\v 29 ዳቡርያዌ ኦኔ? ታን ዳቡርክታዬ? ናጋራን ገልያዌ ኦኔ? ታን ኡንኤታደ አዉ ቃረትክታዬ?
\p
\v 30 ታን ጬቀታናዉ ኮሽያዋ ግዶፐ፥ ታን ዳቡራንቻ ግድያዋ ኤርስያዋን ጬቀታና። 
\v 31 መናዉ አንጀቴዳ ጾሳይ፥ ኑ ጎዳ የሱስ ክርስቶሳ አዉ፥ ታን ዎርዶተናዋ ኤሬ። 
\v 32 ዳማስቆ ካታማን አረታሳ ግያ ካትያፐ ጋርሳና ጋድያ ሞድያዌ፥ ታና ኦይናዉ ዳማስቆ ካታማ ናግሴ። 
\v 33 ሽን ካታማ ግምቢያ ድርሳ ማስኮትያና ታና ቁንኣን ዱገ ዎና፥ አፐ ከሳ አካድ።
\c 12
\s1 ጳዉሎሳ ሳፃ
\p
\v 1 ጬቀትያዌ ታዉ አይነ ጎኤናዋ ግዶፐካ፥ ታን ጬቀታናዉ በሴ። ሽን ታን ሳጻባነ ጎዳፐ ቆንጬዳዋ ሃሳያና። 
\v 2 ታማነ ኦይዱ ላይፐ ካሰ፥ ሄዘን ሳሉዋ ፑደ ቤዳ እት ብታንያ፥ ክርስቶሳ አማንያዋ፥ ታን ኤራይ፤ ሄ ብታኒ ባረ አሳተን ቤዴ ዎይ ሳጻን ቤደንቶ፥ ታን ኤርከ፤ ጾሳይ ኤሬ። 
\v 3 ሄ ብታንያ፥ ሄዘን ሳሉዋ ፑደ ቤዳዋ፥ ኤራይ፤ እ ባረ አሳተን ቤደንቶነ ዎይ ሳጻን ቤደንቶ፥ ታን ኤርከ፤ ጾሳይ ኤሬ። 
\v 4 ሄዋን ሄ ብታኒ አሳይ ሃሳያናዉ ዳንዳየናዋ፥ አሳ እንጻርሳይካ ሃሳያናዉ ዳንዳየናዋ ስሴዳ። 
\v 5 ታን ሄ ብታንያባን ጬቀታና፤ ሽን ታን ዳቡራንቻ ግድያዋ ኤርስያ ድራዉ፥ ታ ሁጲያን ጬቀትከ። 
\v 6 ታን ጬቀታናዉ ኮይያዋ ግዶፐካ ኤያ ግድከ፤ አያዉ ጎፐ፥ ታን ቱሙዋ ሃሳያይ። ሽን አሳይ ታዋ ታናን በእያዋፐነ ታፐ ስስያዋፐ አደ ቆፐና ማላ ናገታይ።
\p
\v 7 ቃይ ጾሳይ ታዉ ዳሮ ቆንጬዳ ዎልቃማ የዉዋፐ ደንዴዳዋን ኦቶረተናዳን ድጋናዉ ታና ጫድ ኦይቂያ፥ ሴጻና ኪታንቻይ፥ ታና መቶናዉነ ታን ኦቶረተና ማላ፥ ታና ናጋናዉ ታዉ እመቴዳ። 
\v 8 ሄዋ ታፐ ሻካና ማላ፥ ታን ጎዳ ሄዙ ገደ ዎሳድ። 
\v 9 ጎዳይ ታና፥ “ታ አ ኬካተይ ነዉ ግዳናዋ፤ አያዉ ጎፐ፥ ታ ዎልቃይ ነ ዳቡራን ፖለቴ” ያጌዳ፤ ሄዋ ድራዉ፥ ክርስቶሳ ዎልቃይ ታናን ደአና ማላ፥ ታ ዳቡራን ጬቀታናዉ ታን ዳሮ ናሸታይ። 
\v 10 ታን ክርስቶሳ ድራዉ ዳቡርያዋን፥ አሳን ቦረትያዋን፥ ዋየትያዋን፥ የደርሰትያዋን፥ መቶትያዋን ናሸታይ፤ አያዉ ጎፐ፥ ታን ዳቡርያ ዎደ፥ ሄ ዎደ ምናይ።
\s1 ጳዉሎስ ቆሮንቶሳ አሳዉ ኡንኤቲደ ቆፔዳ
\p
\v 11 ታን ጬቀቴዳዋን ኤያድ፤ ሽን ሄዋ ህንተ ታና ዎልቃን ኦስሴድታ፤ አያዉ ጎፐ፥ ህንተ ታና ጋላታናዉ በሴ፤ ታን አያንነ ኤረተናን ዮፐካ፥ የሱስ ኪቴዳ ቃ ጌተቴዳ ኡባቱዋፐ ላፍከ። 
\v 12 ታና የሱስ ኪቴዳዌ ቱማ ግድያዋ ኤርስያ ማላይ፥ ኦራባይነ ዎልቃማ ኦሱ ህንተ ግዶን ዳሮ ገንጫን ኦሰቴዳ። 
\v 13 ታን ታ ሁጲያን ህንተና ዋይሳቤናዋፐ አትን፥ ሀራ አማንያ አሳቱዋፐ ህንተ አያን ላፊቴ? ሀያና ታን ህንተና ናቄዳዋ ታዉ አቶ ጊተ።
\p
\v 14 ታን ህንተኮ ባናዉ ጊጎደፐ፥ ሀዌ ታዉ ሄዘን ዎደ፤ ታን ህንተና ዋይስከ። ታን ህንተና ኮይያዋፐ አትን፥ ህንተ ሚሻ ኮይከ፤ አያዉ ጎፐ፥ አዉነ አታ ባረንቱ ናናዉ ሚሻ ምንጅያዋፐ አትን፥ ናናይ ባረንቱ አዎነ አትዉ ምንጅክኖ። 
\v 15 ታን ህንተ ሸምፖ ታዉ ደእያዋ ታናና ጋደ ናሸቻን እማና፤ ያትና፥ ታን ህንተና ሎይ ሲቅያ ድራዉ፥ ህንተ ታና ላፋ ሲቂቴ?
\p
\v 16 ግዶፐካ፥ ታን ህንተና ዋይሳበይከ፤ ሽን ህንተ ታና፥ “ኔን ኑና ጭማደ ማካላን ኦይቃዳ” ያጋንታ። 
\v 17 ታን ሀራይ አቶ፥ ህንተኮ ኪቴዳ እት አሳ ባጋናካ ህንተፐ ጎኤታድታ? 
\v 18 ቲቶ ህንተኮ ባና ማላ፥ ታን ዎሳድ፤ ቃይ አማንያ እሻካ አናና የዳድ። ቲቶ ህንተፐ ጎኤቴዴ? ኑን ኑ ኦሱዋ እት ቆፋን ኦበይኮ? ቃይ ኑ ሀኑካ እቱዋ ግደኔዬ?
\p
\v 19 ኑን ኡባ ዎደካ ህንተ ስንን ኑ ሁጰዉ ሞተትያዋ ህንተንቶ ማላቲ? ኑን ክርስቶሳን ደእያዋንቱዳን፥ ጾሳ ስንን ሀእ ጋካናስካ ሃሳዬቶ። ኑ ሲቃቶ፥ ኑን ኦያ ኡባባይካ ህንተና ማዳናሳ። 
\v 20 አያዉ ጎፐ፥ ታን ህንተኮ ብያ ዎደ፥ ኦን ኤር ታን ኮይያዋ ማላ ህንተ ግደናን አጋነንቶነ፤ ቃይ ታንካ ህንተ ኮይያዋ ማላ ግደናን አጋነንቶነ። ቃይ ኦን ኤር ሄዋን ፓሉሚ፥ ቃናቲ፥ ሀንቁ፥ ዮራይ፥ ዝግርሳይ፥ ሳሮተ ድጉሳይ፥ ኦቶሩ፥ መቱ ደኤናን ዋዪ አጋና፤ ታና ያሼ። 
\v 21 ታን ህንተኮ ላኤንዋ ብያ ዎደ፥ ታ ጾሳይ ህንተ ስንን ታና ካዉሻነንቶነ ያያይ፤ ታን ናጋራ ካሰ ኦደ፥ ባረንቱ ኦዳ ቱናተፐ፥ ዎሹምያዋፐነ አሙዋፐ ስምቤና ዳሮ አሳቶ ዬከናን አግከ ጋደ ያያይ።
\c 13
\s1 ዉርሰ ዞርያነ ሳሮታ
\p
\v 1 ሀዌ ታዉ ህንተኮ ዩሳይ ሄዘን ዎደ። አይ ሞቱካ ላኡ ዎይ ሄዙ ማርካይ ማርካትና ፕርደታናዉ ኮሼ።\x - \xo 13:1 \xo*\xt ዛረ. 17:6፤ 19:15\xt*\x* 
\v 2 ታን ላኤንዋ ህንተናና ጋከቴዳ ዎደ፥ ህንተና ናገትተ ጋድ፤ ሀእካ ሃኩዋን ደኦፐካ፥ ህንተና ናገትተ ጋይ። ታን ቃይካ ህንተኮ ብያ ዎደ፥ ናጋራ ካሰ ኦዳዋንታካ ቃይ ሀራቱዋ ኡባቱዋካ ሙረናን አግከ።
\p
\v 3 አያዉ ጎፐ፥ ክርስቶስ ታ ባጋና ሃሳይያዋ ኤርስያዋ ህንተ ኮዪታ። እ ህንተናና ሃሳይያ ዎደ አ ዎልቃፐ አትን ቤትያዌ አ ዳቡራ ግደና። 
\v 4 አያዉ ጎፐ፥ ክርስቶስ ማስቃልያ ቦላ ምስማርያን ሸቲደ፥ ዳቡራን ካቀቴዳ፤ ሽን ጾሳ ዎልቃን ፓጻ ደኤ። አያዉ ጎፐ፥ እ ዳቡራንቻ ግዴዳዋዳን፥ ኑንካ ዳቡራንቻ፤ ሽን ህንተናና ሃሳይያዋን ኑን ጾሳ ዎልቃን አናና ደአና።
\p
\v 5 አማኑዋን ህንተ ምን ደእንቶ አነ ህንተና ፓጭተ፤ ህንተና ብድተ። ክርስቶስ ህንተናን ደእያዋ ህንተ ኤርክቴ? ሄዌ ዮፐ ፓጭያን ኩንዴድታ ጉሳ። 
\v 6 ኑን ፓጭያን ኩንድቤናዋ ህንተ ኤርያዋ አማናይ።
\p
\v 7 ህንተ ኢታባ ሙለካ ኦና ማላ፥ ኑን ጾሳ ዎሴቶ። ኑን ፓጭያ ዳንዳይያዋንታ ግዲደ ቤታናሳ ግደና፤ ሽን ኑን ፓጭያ ዳንዳየናዋንታ ማላቲደ ቤቶፐካ፥ ሎኦባ ህንተ ኦናሳ። 
\v 8 አያዉ ጎፐ፥ ኑን ቱሙዋ ጻላላዉ ኦናፐ አትን፥ ቱሙዋፐ ሀራ አይነ ኦናዉ ዳንዳዮኮ፤ 
\v 9 ኑን ዳቡራንቻ ሽን ህንተ ዎልቃማ ግዶደ ናሸቴቶ። ህንተ ፖሎ ግዳና ማላ ኑን ጾሳ ዎሴቶ።
\p
\v 10 ታን ህንተፐ ሃኩዋን ደኣደ ጻፌዳዌ ሄዋ ድራሳ፤ ታን ህንተኮ ብያ ዎደ፥ ጎዳይ ታዉ እሜዳ ማታን ዘምፓደ፥ ህንተና መቶናዉ ታና ዋዪ ኮሻና። ሄ ማታይ ታን ህንተና ኬጻናዉ ታዉ እመቴዳዋፐ አትን፥ ህንተና ኮላናዉ እመትቤና።
\p
\v 11 ዉርሰን ታናዳን ጾሳ ካልያዋንቶ፥ ሳሮ ደእተ፤ ባል ባይናን ደእተ፤ ታ ዞርያ ስስተ፤ እት ዎዛና ግዲደ ደእተ፤ ሳሮተን ደእተ። ሲቁዋነ ሳሮተ ጾሳይ፥ ህንተናና እትፐ ደአና።
\p
\v 12 እቱ እቱዋና ጌሻ የረታ የረቲደ ሳሮተትተ። 
\v 13 ጾሳ አሳ ኡባቱ ህንተና ሳሮ ሳሮ ጊኖ።
\p
\v 14 ጎዳ የሱስ ክርስቶሳ አ ኬካተይ፥ ጾሳ ሲቁ፥ ጌሻ አያና እትፐተይ ህንተናና ኡባና ግዶ። አመንእ።