\id 1PE - Dawuro Full Bible Ethiopic Version
\ide UTF-8
\h 1 ጰጽሮሳ ኪታ
\toc1 ጰጽሮስ ጻፌዳ ኮይሮ ኪታ
\toc2 1 ጰጽሮሳ ኪታ
\toc3 1 ጰጽ.
\mt1 ጰጽሮስ
\mt2 ጻፌዳ ኮይሮ ኪታ
\imt ገሉዋ
\ip የሱስ ኪቴዳ ጰጽሮስ ጻፌዳ ኮይሮ ኪታይ ጻፈቴዳዌ፥ ሄ ኪታ ግዶን “ዶረቴዳ ጾሳ አሳቱዋ” ጌተቲደ ጼሰትያነ ቄር ኢስያን ሁጲሳ ባጋ ሻኩዋን ላለቴዳ አማንያዋንቱሳ። ሀ ኪታ ዋና ቆፋይ፥ አማኑዋ ጋሱዋን መቱነ ዋዪ ጋኬዳዋንታ ምንሳናሳነ መንናሳ። ጻፊ ሀዋ ኦያዌ አ ሀይቁዋ፥ አ ደንዱዋ፥ አ ላኤን ዩሳ ኦድያ የሱስ ክርስቶሳ ምሽራቹዋ ቃላ ናባብያዋንታ ሀሳይስያዋና። ኡንቱንቱ የሱስ ክርስቶሳ ደኡዋ ሌምሱዋዳን አኪደ፥ መቱዋ ገንጪደ አናዳን ሀሳይሴ። ሀዋና እትፐ ጋያ ዎደ፥ መቱ ኡንቱንቱ አማኑዋ ጻልታተ ፓጭያዋነ የሱስ ክርስቶስ ቆንጭያ ጋላስ ኡንቱንቱ በስያ ጋትያ አካናዉ ደእያዋ ኡንቱንታ ሀሳይሴ።
\ip ጻፊ፥ ኡንቱንቱ መቱዋን ገንጫና ማላ መንያዋ ቦላካ፥ ክርስቶሳ ካልያዋንቱ ደእያዋዳን ኡንቱንቱ ደአናዳን ቆፍሴ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ገሉዋ \ior 1:1-2\ior*
\io1 ጾሳ አሹዋባ \ior 1:3-12\ior*
\io1 ጌዬዳ ደኡዋ ደአናዳን እመቴዳ ማቁዋ \ior 1:13—2:10\ior*
\io1 መቱዋ ዎደ አማንያ አሳይ ኦና በስያ አዎተ \ior 2:11—4:19\ior*
\io1 አማንያ አሳ አሽከተነ ኦሱዋ \ior 5:1-11\ior*
\io1 ዉርሰ ቁትያ \ior 5:12-14\ior*
\c 1
\p
\v 1 ታን፥ የሱስ ክርስቶስ ኪቴዳ ጰጽሮስ፥ ጾሳይ ዶሬዳ አሳቶ ጳንጾሳ ጋድያን፥ ጋላትያ ጋድያን፥ ቃጳዶቅያ ጋድያን፥ ኢስያ ቢታንነ ቢታንያ ጋድያን በትያን ደእያዋንቶ ዳብዳቢያ ጻፋይ። 
\v 2 የሱስ ክርስቶሳዉ ህንተ አዛዘታና ማላነ አ ሱን ጌያና ማላ፥ ጾሳይ አዉ ዶሬዳ ህንተንቶ ባረ አያናን ጌሼዳዋንቶ፥ አ ኬካተይነ ሳሮተይ ግዶ።
\s1 ደኡዋ እማና ጌዳ ህዶታ
\p
\v 3 ኑን ጾሳ፥ ኑ ጎዳ የሱስ ክርስቶሳ አዉዋ፥ ባረ ማሮተ ዳሩዋዳንካ ኑና ላኤንዋ የሌዳዋ፥ የሱስ ክርስቶሳ ሀይቁዋፐ ደንዳዋን ኑዉ ደኡዋ ህዶታ እሜዳዋ ጋላቴቶ። 
\v 4 ቃይ ጾሳይ ህንተንቶ እማና ዳሮ ላታይ ዎቀናዌ፥ ባየናዌነ የናዌ ሳሉዋን ናጌ። 
\v 5 ሄዌካ ህንተንቶ፥ ጾሳ ዎልቃን አማኑዋን ናገት ኡቲደ፥ አቶተዉ ጊጌዳዋንቶ ዉርሰ ዎድያን ቆንጫናዋ።
\p
\v 6 ሀእ ጉ ዎደዉ ሀራይ አቶ ዱማ ዱማ ፓጭያን ህንተ ፓጨታናዉ ኮሾፐካ፥ ሀዋን ዳሮ ናሸትተ። 
\v 7 ሄዌ ሀራይ አቶ፥ ታማን የግና ይያ ዎርቃፐካ ህንተ አማኑ ዳሮ አልኦነ ባል ባይናዋ ግድያዋ በሳናሳ፤ ያቲደ የሱስ ክርስቶስ ቤትያ ዎደ፥ ጋላታ፥ ቦንቹዋነ ሳባ ህንተ አካና። 
\v 8-9 ህንተ አ ኤራና ዮፐካ፥ ሲቂታ፤ ህንተ ሀእ አ በአና ዮፐካ፥ አማኒታ። ቃይ ህንተ ህንተ አማኖ ፖሎ ግድያ ህንተ ሸምፑዋ አቶተ አክያ ድራዉ፥ ኦዳናዉ ዳንዳየተና ቦንቹ ኩሜዳ ናሸቻ ናሸቲታ።
\p
\v 10 ጾሳይ ህንተንቶ እማና አ ኬካተባዉ ትምቢትያ ኦዴዳ ናባቱ ሎይ ብዲደ፥ ሀ አቶተባ ኮዬድኖ። 
\v 11 ኡንቱንቱን ደእያ ክርስቶሳ አያናይ ክርስቶሳ ቱጋባነ ሄዋፐ ጉይያን ያና ቦንቹዋባ ካሰቲደ ማርካቲደ፥ አዉደ ዎይ ዋኔዳ ዎድያን ያነንቶነ አኬክሴዳዋዳን፥ ኡንቱንቱ ኮዬድኖ። 
\v 12 ሄ ትምቢትያ ኦድያዋንቱ ኦዳ ኦሱ ህንተሳፐ አትን፥ ኡንቱንቱ ሁጲያሳ ግደናዋ ጾሳይ ኡንቱንቶ ቆንጭሴዳ፤ ሀእ ህንተ ስሴዳ ምሽራቹዋ ቃላ ህንተንቶ ኦዴዳ አሳቱ፥ ባረዉ ሳሉዋፐ ኪተቴዳ ጌሻ አያና ዎልቃን ኦዴድኖ። ሄዋ ኪታንቻቱካ በአናዉ አሞቲኖ።
\s1 ጌሻተን ደእያዋ
\p
\v 13 ሄዋ ድራዉ፥ ኦሱዋ ኦናዉ ህንተ ዎዛናን ቆፋ ጊግሲደ ህንተ ሁጲያ ናግተ። የሱስ ክርስቶስ ቆንጭያ ዎደ አ ኬካተ ህንተ አክያ ድራዉ፥ ኩመን ህዶታን ናግተ። 
\v 14 ጾሳዉ አዛዘትያ ናናዳን፤ ህንተ ካሰ ኤረናን አሞቴዳ አሙዋ ካሎፕተ። 
\v 15-16 ሽን ህንተና ጼሴዳ ጾሳይ ጌሻ ግዴዳዋዳን፥ ህንተካ ህንተ ኦሱዋ ኡባን ጌሻ ግድተ። ጾሳ ማጻፋን፥ “ታን ጌሻ ግድያ ድራዉ፥ ህንተካ ጌሻ ግድተ” ጌተቲደ ጻፈቴዳ።\x - \xo 1:15-16 \xo*\xt ዎጋ 11:44-45፤ 19:2\xt*\x*
\p
\v 17 አሳ ሁጲያን ሁጲያን ዴሙዋ ጼለናን አ ኦሱዋዳን ፕርድያ ጾሳ ዎሲደ ህንተ፥ “ኑ አቦ” ጊደ አ ጼስያዋ ግዶፐ፥ ሀ አላምያን በተ ግዲደ ህንተ ደእያ ዎድያን ያሻተን ደእተ። 
\v 18-19 ህንተ ህንተ አዎቱዋፐ ላቴዳ ፓና ደኡዋፐ ዎዘቴዳዌ፥ ይያ ብራ ዎይ ዎርቃ ማላና ግደናዋ ኤሪታ፤ ቦርስያባይ ዎይ ቅታይ ባይና ዶርሳ ሱዳን፥ አልኦ ክርስቶሳ ሱን ህንተ ዎዘቴድታ። 
\v 20 ጾሳይ ሳአይ መታናፐ ካሰ ክርስቶሳ ዶር ዎዳ፤ ሽን ህንተ ድራዉ፥ ሀ ዎድያ ዉርሰን እ ቤቴዳ። 
\v 21 ህንተ አማኑነ ህንተ አካና ጊደ ናሸቻን ናግ ኡቴዳባይ ጾሳን ደአና ማላ፥ ጾሳይ ሀይቁዋፐ አ ደንደ፥ አዉ ቦንቹዋ እሜዳዋ አን አማኒታ።
\p
\v 22 ቱማተዉ ህንተ አዛዘትያዋን፥ ሎአ ማላትያ ኢታተይ ባይናን ህንተ እሻቱዋ ሲቃናዉ ህንተ ሁጲያ ጌሺደ፥ እቱ እቱዋና ምንሲደ ዎዛናፐ ሲቀትተ።
\p
\v 23 ህንተ ሀይቂያ ዘረፐ ላኤንዋ የለትበይክታ፤ ሽን መናዉ ደእያዋነ ስንዉካ ደአና ጾሳ ቃላን ሀይቀና ዘረፐ የለቴድታ። 
\v 24 አያዉ ጎፐ፥ ጾሳ ማጻፋይ፥ “አሳይ ኡባይ ማታ ማላ፤ አ ቦንቹ ኡባይካ ማታ ጪሻ ማላ። ማታይ መሌ፤ ጪሻይካ ቆቆፈቴ።\x - \xo 1:24-25 \xo*\xt ኢሳ. 40:6-8\xt*\x* 
\v 25 ሽን ጎዳ ቃላይ መናዉ ደኤ” ያጌ። ሀዌ ህንተንቶ ጎዳይ ኦዴዳ ምሽራቹዋ ቃላ።
\c 2
\s1 ደኡዋ ሹቻነ ጌሻ አሳ
\p
\v 1 ሄዋ ድራዉ፥ ህንተፐ ኢታተ ኡባ፥ ጭምያዋ ኡባ፥ ሎአ ማላትያ ኢታተ፥ ቃናትያነ ዝግርሳ ኡባ ድግተ። 
\v 2-3 ጎዳይ ኬካ ግዴዳዋ ህንተ ደኡዋን በኤዳዋ ግዶፐ፥ ሀእ የለቴዳ ጋጭኖ ናናቱዋዳን፥ ኡሺደ ድጫናዉነ አታናዉ ጽሎ ግዴዳ አያና ማ ላሞትተ።\x - \xo 2:2-3 \xo*\xt ማዝ. 34:8\xt*\x*
\p
\v 4 ጎዳኮ ደኦ ሹቻኮ ሺቅተ። አሳይ አ እጼዳ፤ ሽን ጾሳ ማታን እ ዶረቴዳ አልኦ። 
\v 5 ህንተካ ቃይ ደኦ ሹቻዳን፥ ጌሻ ቄሳ ግዲደ፥ የሱስ ክርስቶሳ ባጋና ጾሳ ናሸችያ አያና ያርሹዋ ጾሳዉ ያርሻናዉ፥ ህንተ ህንተ ሁጰዉ አያና ኬዳን ኬጸትተ። 
\v 6 አያዉ ጎፐ፥ ጾሳ ማጻፋይ፥ “በእተ፥ ታን ጽዮነ ግያ ካታማን ጎልያ ጎዳ ጻጱዋ ምንስያ፥ ዶረቴዳ፥ አልኦ ሹቻ ዎይ፤ አን አማንያ ኦንነ ዬላተና” ያጌ።\x - \xo 2:6 \xo*\xt ኢሳ. 28:16\xt*\x* 
\v 7 ሄዋ ድራዉ፥ ሀ ሹቻይ ህንተንቶ አማንያዋንቶ ዳሮ አልአ፤ ሽን አማነናዋንቶ፥ “ግምቢያዋንቱ ካዳ ሹቻይ ጎዳ ጻጱዋ ምንስያ፥ ኡባፐ አያ ሹቻ ግዴዳ” ያጌ። 
\v 8 ቃይካ፥ “ሀ ሹቻይ አሳ ቢያ ሹቻነ አሳ ኩንድስያ ዛላ” ያጌ፤ ኡንቱንቱ ጾሳ ቃላ አማነና ድራዉ፥ ኡንቱንቶ ካሰና ቆፈቴዳዋዳን በቴድኖ።\x - \xo 2:8 \xo*\xt ኢሳ. 8:14-15\xt*\x*
\p
\v 9 ሽን ጾሳይ ማፐ ማላልስያ ባረ ፖኦ ህንተና ጼሴዳ፤ ህንተ አ ኦራ ኦሱዋ ኦዳናዉ ዶረቴዳ ዛረ፤ ህንተ ካትያ ቄሳቱዋ፤ ጌሻ አሳነ ጾሳዉ ቡዞ አሳ።\x - \xo 2:9 \xo*\xt ከሳ 19:5-6፤ ኢሳ. 43:20፣ 21፤ ዛረ. 4:20፤ 7:6፤ 14:2፤ ቲቶ 2:14፤ ኢሳ. 9:2\xt*\x* 
\v 10 ህንተ ካሰ ጾሳ አሳ ግድክታ፤ ሽን ሀእ ህንተ አ አሳ፤ ህንተ ካሰ ማሮተ አክበይክታ፤ ሽን ሀእ ማሮተ አኬድታ።\x - \xo 2:10 \xo*\xt ሆሰ 2:23\xt*\x*
\s1 ጾሳ አይላቱዋ
\p
\v 11 ታ ዳባቶ፥ ህንተ ሀ ሳኣን እማነ በተ ግዲደ ደእያዋንታ ግዴዳዋዳን፥ ኡባ ዎደ ህንተ ሸምፑዋና ኦለትያ አሳተ አሙዋፐ ህንተ ሃካና ማላ፥ ታን ህንተና ዎሳይ። 
\v 12 አማነና አሳይ ህንተና ኢታባ ኦያዋንቱዳን ዝግርያ ዎደ፥ ክርስቶስ ይያ ጋላስ ህንተ ሎኦ ኦሱዋ ኡንቱንቱ አኬኪደ፥ ጾሳ ጋላታና ማላ፥ ህንተ ደኡዋ ኡንቱንቱ ግዶን ሎይ ናግተ።
\p
\v 13 ጎዳ ድራዉ፥ አሳ ህግያ ኡባዉ ሞደትተ፤ ካቲካ ኡባፐ ቦላ ግድያ ድራዉ፥ አዉ ሞደትተ። 
\v 14 ቃይ ጋድያ ሞድያዋንቶካ ሞደትተ። አያዉ ጎፐ፥ ኡንቱንቱ ኢታባ ኦያዋንታ ሙራናዉነ ሎኦባ ኦያዋንታ ጋላታናዉ ካትያፐ ኪተቴድኖ። 
\v 15 አያዉ ጎፐ፥ ጾሳይ ህንተ ህንተ ሎኦ ኦሱዋን ካያ ኤያ አሳቱዋ ሃሳያ ጮኡ ኡዳናዋ ኮዬ። 
\v 16 አይለተፐ ከሲደ፥ ጾሳ አይልያዳን ደእተፐ አትን፥ ሄ አይለተፐ ከሴዳዋ ኢታተ ገንያዋ ኦፕተ። 
\v 17 አሳ ኡባ ቦንችተ። ህንተ እሻቱዋ ሲቅተ። ጾሳዉ ያይተ። ካትያ ቦንችተ።
\s1 ክርስቶሳ ጋኬዳ መቱዋ ሌምሱዋ
\p
\v 18 አይላቶ፥ ህንተ ሎኦ ጎዳቱዋ ጻላላዉነ አሽከ ጎዳቱዋ ጻላላዉ ግደናን፥ ኢታቶካ ዳሮ ያዪደ ሞደትተ። 
\v 19 አያዉ ጎፐ፥ አሳይ ናቂያ ዎደ ዋየትያ ኡራይ ጾሳ ቆፒደ፥ ኦገ ባይናን ናቀቶፐ ጾሳይ አ አንጃና። 
\v 20 አያዉ ጎፐ፥ ህንተ ናጋራ ኦና፥ ህንተና ደችያ ዎደ፥ ህንተ ዳንዳዮፐ፥ ህንተንቶ አይ ጋላታይ ደኢ? ሽን ሎኦባ ኦደ ዋይያ ህንተ ዳንዳዮፐ፥ ጾሳይ ህንተና ሄዎ አንጃና። 
\v 21 ጾሳይ ህንተና ጼሴዳዌ ሄዋ ድራሳ፤ አያዉ ጎፐ፥ ክርስቶስ ህንተንቶ ዋየቴ፤ ህንተ አ ቃታማ ካላና ማላ፥ ህንተንቶ ሌምሱዋ ግዴዳ። 
\v 22 ናጋራ እ ኦቤና፤ ባረ ዶናፐ ዎርዱዋ ሃሳይቤና።\x - \xo 2:22 \xo*\xt ኢሳ. 53:9\xt*\x* 
\v 23 አሳይ ባረና ቦርያ ዎደ፥ ዛሪደ ቦርቤና፤ ዋየትያ ዎደካ ማንድቤና። ሽን ጽሉዋ ፕርድያ ጾሳዉ ባረና አደ እሜዳ።\x - \xo 2:23 \xo*\xt ኢሳ. 53:7\xt*\x* 
\v 24 ኑን ናጋራዉ ሀይቂደ፥ ጽሎተዉ ደአና ማላ፥ ክርስቶስ ባረ ሁጰዉ ባረ አሹዋን ኑ ናጋራ ማስቃልያን ቶኬዳ፤ ህንተ አ ማይን ፓጼድታ።\x - \xo 2:24 \xo*\xt ኢሳ. 53:5\xt*\x* 
\v 25 አያዉ ጎፐ፥ ህንተ ኦጊ ባሌዳ ዶርሳ ማላ፤ ሽን ሀእ ህንተ ሸምፑዋ ሄምያዋኮነ ናግያዋኮ ስሜድታ።\x - \xo 2:25 \xo*\xt ኢሳ. 53:6\xt*\x*
\c 3
\s1 አስናባነ ማችያባ
\p
\v 1-2 ሄዋዳንካ ማቼቶ፥ ህንተ አስናቱዋፐ ጾሳ ቃላዉ አዛዘተና እቱ እቱ ደኦፐካ፥ ህንተ ፓሉመተናን፥ ኡንቱንቱ ህንተ ያሻተነ ህንተ ጌሻ ደኡዋ በኢደ ጾነታና ማላ፥ ኡንቱንቶ ሞደትተ። 
\v 3 ህንተ ህንተ ሁጲያ አልኦባን ጊግስያዋንነ ዎርቃ ዎያዋን ዎይ አልኦ ማዩዋ ማይያዋን ህንተንቱ ቦላ ባጋ ሎይፕተ። 
\v 4 ሽን ህንተ ጋርሳን ቆሰቴዳ አሳተ ሎኦተይ ጾሳ ስንን ህንተንቶ ዳሮ አልኦ ግዲደ፥ የና አሽከነ ዎፑ ጌዳ አያና ግዶ። 
\v 5 አያዉ ጎፐ፥ ሄዋዳን ጾሳን ህዶቴዳ ጌሻ ማጫ አሳቱ በን ዎደ ባረንቱ አስናዉ ሞደቲደ፥ ባረንታ ዳሮ ሎይድኖ። 
\v 6 ሄዋዳን ሳራ አብራሃማ፥ “ታ ጎዳዉ” ያጋ ጼሳደ፥ አዉ አዛዘታዱ፤ ህንተካ እትባዉነ ያየናን ሎኦባ ኦፐ፥ እ ናናቱዋ።\x - \xo 3:6 \xo*\xt ዶመ 18:12\xt*\x*
\p
\v 7 ሄዋዳን አስናቶ፥ ህንተ ማጫ አሳቱዋና አኬካን እትፐ ደእተ። ኡንቱንቶ ዳቡራንቻ አሳተይ ደእያ ድራዉ፥ ኡንቱንታ ቦንችተ፤ ህንተ ዎሳይ በተና ማላ፥ ጾሳይ እሜዳ ደኡዋ አ ኬካተ ኡንቱንቱ ህንተናና እትፐ ላትኖ።
\s1 ሎኦባ ኦደ መቱዋ አክያዋ
\p
\v 8 ዉርሰን፥ ኡባይ እት ቆፋን ደእተ። እቱ እቶ ቃረትተ፤ እሻቱዋዳን ሲቀትተ፤ ቃይ እቱ እቶ ኬክያዋንታነ ህንተ ሁጲያ ካዉሽያዋንታ ግድተ። 
\v 9 ኢታ ድራዉ ኢታ ዎይ ሸቃ ድራዉ ሸቃ ዛሮፕተ፤ ሄዋ አጊደ፥ ጾሳይ ህንተንቱ አንጁዋ ላታናዳን ህንተና ጼሴዳ ድራዉ፥ አንጅተ። 
\v 10 አያዉ ጎፐ፥ ጾሳ ማጻፋይ ሀዋዳን ያጌ፤ “ደኡዋ ዶስያዌነ ሎኦ ጋላሳ በአናዉ ኮይያዌ ኦና ግዶፐነ ባረ እንጻርሳን ኢታባ ሃሳይያዋነ ዎርዱዋ ኦድያዋ አጎ።\x - \xo 3:10 \xo*\xt ማዝ. 34:12-16\xt*\x*
\p
\v 11 “ኢታባ ኦያዋ አጊደ፥ ሎኦባ ኦ፤ ሳሮተካ ሎይ ኮዮነ ካላናዉ ባጸቶ።
\p
\v 12 “አያዉ ጎፐ፥ ጎዳ አይፊ ጽሎቱዋኮ ጼሌ፤ ቃይ አ ሀይይ ኡባ ዎደ ኡንቱንቱ ዎሳዉ ዶያ ደኤ። ሽን ጎዳይ ኢታባ ኦያዋንታ ባረ ሀንቁዋ ሶምእያን ጼሌ” ያጌ።
\p
\v 13 ህንተ ሎኦባ ኦናዉ አሞቶፐ፥ ህንተና ቆሀናዌ ኦኔ? 
\v 14 ሽን ሀራይ አቶ፥ ጽሎተ ድራዉ ህንተ ዋየቶፐካ፥ አንጀቴዳዋንታ። አሳዉ ያዮፕተነ ህርጎፕተ።\x - \xo 3:14-15 \xo*\xt ማቶሳ 5:10፤ ኢሳ. 8:12-13\xt*\x* 
\v 15 ሽን ክርስቶሳ ህንተ ዎዛናን ቦንችተነ አ ህንተ ጎዳ ኦተ። ጾሳይ ህንተንቶ ህዶቴዳ ደኦ ጋሱዋ ኦችያ ኦስነ ዛሩዋ እማናዉ ኡባ ዎደ ጊግ ኡትተ፤ 
\v 16 ሽን ሄዋ አሽከተንነ ያሻተን ኦተ። ቃይ ክርስቶሳን ህንተ ደእያ ሎኦ ደኡዋ ኢታባ ኦዳዋዳን፥ ህንተ ቦላን ኢታባ ሃሳይያ አሳይ ባረ ዝግርያዋን ዬላታና ማላ፥ ህንተ ዎዛናይ ጌሻ ግዶ። 
\v 17 አያዉ ጎፐ፥ ጾሳይ ጌዳዋ ግዶፐ፥ ኢታባ ኦዳ ድራዉ ዋየትያዋፐ፥ ሎኦባ ኦዳ ድራዉ ዋየትያዌ ኬካ። 
\v 18 አያዉ ጎፐ፥ ክርስቶስ ኑና ጾሳኮ አፋናዉ፥ ባረዉ ጽሎ ግዲደ፥ ማካላንቻቱዋ ድራዉ፥ እት ገደ ኡባ ናጋራዉ ሀይቄዳ፤ እ ባረ አሳተን ሀይቄዳ፤ ሽን አያናን ፓጼዳ። 
\v 19 ቃይ ሄ አያናን፥ ቃሹዋን ደእያ አያናቱዋኮ ቢደ፥ ኡንቱንቶ ቃላ ኦዴዳ። 
\v 20 ሄ አያናቱ አማሬዳ፥ ሆስፑን አሳቱ ሃን አቴዳ ማርካብያ ኖሄ ኬጽሽን፥ ጾሳይ ዳንዳዪደ ጋምኤዳ ዎደ፥ ጾሳዉ አዛዘትቤና አሳ አያናቱዋ።\x - \xo 3:20 \xo*\xt ዶመ 6:1—7:24\xt*\x* 
\v 21 ሄዌ ጽንቃታዉ ሌምሱዋ ግዲደ፥ ህንተና ሀእ አሼ፤ ሱረ ዎዛናፐ ጾሳ ዎስያዋፐ አትን፥ ቦላ ቅታ ሜጭያዋ ግደና፤ ሄዌ ህንተና የሱስ ክርስቶስ ሀይቁዋፐ ደንዴዳዋን አሼ። 
\v 22 ሳሉዋ ቢደ ጾሳፐ ኡሸቻ ባጋን እ ኡቲደ፥ ኪታንቻ ኡባ፥ ማታና ደእያዋንታነ ዎልቃማቱዋ ሞዴ።
\c 4
\s1 ጌሻተን ደአና ደኡዋባ
\p
\v 1 ሄዋ ድራዉ፥ ክርስቶስ ባረ አሹዋን ኑዉ ዋየቴዳ ድራዉ፥ ህንተካ ሄ ቆፋን ዳንጨትተ። አያዉ ጎፐ፥ ባረ አሹዋን ዋየቴዳ ኡራይ ናጋራ ኦያዋ አጌዳ። 
\v 2 ሀዋፐ ስንን፥ ሀ ሳኣን ሸምፑዋና ደአናዉ አቴዳ ዎድያን፥ ጾሳይ ኮይያዋዳን ደአናዉ በስያዋፐ አትን፥ አሳ አሙዋዳን ደአናዉ በሰና። 
\v 3 አያዉ ጎፐ፥ አማነና አሳይ ኦናዉ ዶስያዋ ህንተ ኦደ፥ ዎሹማናዉ ካጄልያዋን፥ አሙዋን፥ ማዋን፥ የን፥ ኡሻን፥ ፖክያ ኤቃዉ ጎይንያዋን፥ ደኤዳ ካሰ አዳ ዎዲ ህንተንቶ ግዳናዋ። 
\v 4 አማነና አሳና ህንተ ሾራይ ባይና ኦሱዋ እትፐ ኦና ድራዉ ማላለቲደ፥ ህንተና ቦሪኖ። 
\v 5 ሽን ኡንቱንቱ ፓጻ ደእያ አሳ ቦላነ ሀይቄዳ አሳ ቦላ ፕርዳናዉ ጊግ ኡቴዳ ጾሳዉ ዛሩዋ እማና። 
\v 6 ሀይቄዳ አሳይ\f + \fr 4:6 \fr*\fq ሀይቄዳ አሳይ፦ \fq*\ft የሱሳ አማናናፐ ካሰና ሀይቄዳዋንታ ዎይ ኖሄ ዎደ አሳቱዋ። 3:19 ጼልተ።\ft*\f* ባረ አሳተን አሳይ ፕርደትያዋዳን ፕርደታናዉነ ቃይ አያናን ጾሳይ ደእያዋዳን ደአናዉ፥ ዎንጋላ ምሽራቹ ኡንቱንቶ ሄዎ ኦደቴዳ።
\s1 ጾሳይ እሜዳ እሞታቱዋ ሎይ አይስያዋ
\p
\v 7 ኡባባዉካ ዉርሰይ ማታቴዳ። ሄዋ ድራዉ፥ ጾሳ ዎሳናዉ ቆፋን ጌዪደ፥ ህንተና ናግተነ ምንተ። 
\v 8 ሲቁ ዳሮ ናጋራ ካምያ ድራዉ፥ ኡባባፐ አደ እቱ እቱዋና ዎዛናፐ ሲቀትተ።\x - \xo 4:8 \xo*\xt ሌም. 10:12\xt*\x* 
\v 9 ዙዙመናን እቱ እቱዋ እማተን ሞክተ። 
\v 10 ህንተ ሁጲያን ሁጲያን ጾሳፐ ዱማ ዱማ አ ኬካተ አኬዳዋዳንካ፥ ጾሳ ዱማ እሙዋ ሀዳራ ሎይ ከስያዋንቱዳን፥ እቱ እቶ ኦተ። 
\v 11 የሱስ ክርስቶሳ ባጋና ኡባባን ጾሳይ ጋላተታና ማላ፥ ኦንነ ኦድያዋ ግዶፐ፥ ቃላ ጾሳፐ አኪደ ኦድያዋዳን ኦዶ። ቃይ ኦንነ ማድያዋ ግዶፐ፥ ጾሳይ አዉ እምያ ዎልቃን ማዶ። ቦንቹነ ጎዳተይ ጾሳዉ መናፐ መናዉ ግዶ። አመንእ።
\s1 መቱዋ ዎደ ምንያዋ
\p
\v 12 ታ ሲቃቶ፥ ህንተ ግዶን ታማዳን ጉዲደ ፓጭያ ዋዪ ይያዋ ኦራባይ ሀንያዋዳን ማላለቶፕተ። 
\v 13 ሽን ክርስቶሳ ቦንቹ ቤትያ ዎደ ህንተ ናሸታና ማላ፥ አናና ዋየትያዋን ናሸትተ። 
\v 14 አሳይ ህንተና ክርስቶሳ ሱን ድራዉ ቦርያዋ ግዶፐ፥ ህንተ አንጀቴዳዋንታ፤ አያዉ ጎፐ፥ ቦንቾ አያናይ፥ ጾሳ አያናይ፥ ህንተ ቦላ ሸምፓና። 
\v 15 ህንተፐ ኦንነ ሸምፑዋ ዎዳዋዳን፥ ዎይ ካይሱዋዳን፥ ዎይ ኢታባ ኦዳ አሳዳን፥ ዎይ ሀራ አሳ የዉዋ ገሌዳዋዳን ዋየቶፖ። 
\v 16 ሽን ኦንነ ክርስታንያ ግድያ ድራዉ ዋየቶፐ፥ ክርስቶሳ ሱን ድራዉ፥ ጾሳ ጋላታናፐ አትን፥ ዬላቶፖ።
\p
\v 17 አያዉ ጎፐ፥ ፕርዳይ ጾሳ ጎልያን ዶመትያ ዎዲ ጋኬዳ። ቃይ ሄ ፕርዳይ ኮይሮ ኑ ቦላ ዶመትያዋ ግዶፐ፥ አ ዎንጋላዉ አዛዘተናዋንቱ ዉርሰይ አያ ግዳኔ? 
\v 18 ጽሎ አሳይ ቱጋን አትያዋ ግዶፐ፥ ማካላንቻይነ ናጋራንቻይ ያትና ዋናኔ?\x - \xo 4:18 \xo*\xt ሌም. 11:31\xt*\x* 
\v 19 ሄዋ ድራዉ ቃይ፥ ጾሳይ ጌዳዋዳን ዋየትያዋንቱ ሎኦባ ኦደ፥ ባረንቱ ሸምፑዋ ሀዳራ ባረና መዳ አማነትያ ጾሳዉ እምኖ።
\c 5
\s1 ጾሳ አሳ አይሳናዉ እመቴዳ ዞርያ
\p
\v 1 ስም ታን ዎሳ ጎልያ ጭማቱዋና ጭማ ግድያዌነ፥ ክርስቶሳ ዋይያ ማርካትያዌ፥ ቃይ ቆንጫና ቦንቹዋ ሻካናዌ ህንተ ግዶን ደእያ ጭማቱዋ ዞራይ። 
\v 2 ህንተ ግዶን ደእያ ጾሳ ዉድያ ጾሳይ ኮይያዋዳን ሄምተ። ዶሱዋናፐ አትን፥ ዎልቃን ግደና። ቃይ ህንተ ጎአ ጻላላ ጼለናን፥ ሎኦ ቆፋን ሄምተ። 
\v 3 ዉደዉ ህንተ ሌምሱዋ ግድተፐ አትን፥ ህንተ ሄምያዋንታ ዎልቃን ሄሞፕተ። 
\v 4 ቃይ ሄምያዋንቱ ካፑ ቆንጭያ ዎደ፥ ባየና ቦንቾ ካላቻ ህንተ አካና።
\p
\v 5 ሄዋዳንካ ያላጋ አሳቶ፥ ጭማቶ ሞደትተ። ኡባይካ እቱ እቶ ኦናዉ ህንተ ሁጲያ ካዉሽያዋ አፍላዳን ማይተ። አያዉ ጎፐ፥ ጾሳይ ኦቶረትያዋንታ እጼ፤ ሽን ባረና ካዉሽያዋንቶ አ ኬካተ እሜ።\x - \xo 5:5 \xo*\xt ሌም. 3:34\xt*\x* 
\v 6 ጾሳይ ባረ ሎኦ ዎድያን ህንተና ቁ ኦና ማላ፥ ዎልቃማ ጾሳ ኩሽያፐ ጋርሳና ህንተና ቶችተ። 
\v 7 እ ህንተንቶ ቆፕያ ድራዉ፥ ህንተና ህርግስያ ኡባባ አ ቦላ ኦልተ።
\p
\v 8 ጻላህያ ካፑ፥ ህንተ ሞርኪ፥ ምትያ ኡራ ኮዪደ፥ ጉድያ ጋሙዋዳን ህንተ ዩሹዋን ዩይያ ድራዉ ናገትተነ ቤጎትተ። 
\v 9 ሳኣን ደእያ ህንተ እሻቱ ሄዋዳን ዋየትያዋ ኤሪደ፥ አማኑዋን ምኒደ፥ አናና ኤቀትተ። 
\v 10 አ ኬካተ ኡባ ጾሳይ፥ ባረ መና ቦንቾ ክርስቶስ የሱሳ ባጋና ህንተና ጼሴዳዌ፥ አማሬዳ ዎድያ ህንተ ዋየቴዳዋፐ ጉይያን፥ እ ባረ ሁጰዉ ህንተና ሽር ኦራናነ ምንሳና። ቃይ እ ህንተና ማዳናነ ባስ ኤሳና። 
\v 11 ዎልቃይ መናፐ መና ጋካናዉ አዉ ግዶ። አመንእ።
\s1 ዉርሰ ሳሮታ
\p
\v 12 ሀዌ ጾሳ ቱሙ አ ኬካተ ግድያዋ ታን ህንተንቶ ማርካታደነ ህንተና ዞራደ፥ ህንተንቶ ቃንን ጻፌዳ ዳብዳቢያ አማነትያ እሻ ጋደ ታን ቆፕያ ስላሰ ቦላ ኪታድ፤ ሄ አ ኬካተን ምኔድታ።
\p
\v 13 ህንተናና እትፐ ዶረቴዳ ባብሎነን\f + \fr 5:13 \fr*\fq ባብሎነ፦ \fq*\ft ሳፃ ማጻፋ ቆፋዳን፥ ሀ ሱንይ ሮመ ጉሳ ግደናን አገና።\ft*\f* ደእያ ዎሳ ጎልያ አሳይነ ታ ናአይ ማርቆስ ህንተና “ሳሮ ሳሮ” ጊኖ። 
\v 14 ሲቁዋ የረታ የረቲደ፥ እቱ እቱዋ ሳሮትተ።
\p ህንተዉ፥ ክርስቶሳና እቱዋ ግዴዳዋንቶ ኡባቶ ሳሮተይ ግዶ። አመንእ።