\id 1CO - Dawuro Full Bible Ethiopic Version
\ide UTF-8
\h 1 ቆሮንቶሳ
\toc1 ጳዉሎስ ቆሮንቶሳ አሳዉ ጻፌዳ ኮይሮ ኪታ
\toc2 1 ቆሮንቶሳ
\toc3 1 ቆሮ.
\mt2 ጳዉሎስ
\mt1 ቆሮንቶሳ አሳዉ
\mt2 ጻፌዳ ኮይሮ ኪታ
\imt ገሉዋ
\ip ጳዉሎስ ቆሮንቶሳ አሳዉ ጻፌዳ ኮይሮ ኪታይ፥ ጳዉሎስ ቆሮንቶሳ ካታማን ደእያ አማንያዋንቱ ግዶን ክርስትና ደኡዋነ አማኑዋ ጼልያባን ደንዴዳ መቱዋ ይሳናዉ ቆፒደ ጻፌዳዋ። ሄ ዎደ ቆሮንቶሳ ካታማይ ሄ ጋደን ደእያ አሳይ ጎኤትያ ኤረቴዳ ግሪከ ካታማ። ሄዋ ቦላካ ቃይ አካይያ ጌተትያ ሮማ ካዉተዉ ሁጰ ካታማ። ሀ ካታማይ ዎልቃማ ዛልእያን፥ ጋምኢደ ምኔዳ ዎጋን፥ ሎይ አክ አክ ብያ የዳ ደኡዋን ዎይ ጊገናባ ሀንያዋንነ ሀይማኖትያ ጮራተን ኤረቴዳዋ።
\ip የሱስ ኪቴዳዌ ምንሲደ ኦዳናዉ ኮዬዳዌ፥ ሄ አማንያዋንቱ ግዶን ደእያ ሻኮተባነ የዳ ደኡዋባ፥ ዎሹማባነ ገሉዋ አካባ፥ ዎሳ ጎለ ዎጋባ፥ ጌሻ አያና እሞታቱዋባነ ሀይቁዋ ደንዱዋባ። የሱስ ኪቴዳዌ ሀ ምሽራቹዋ ቃላ ሀ ኦሻቱዋ ቦላ ምንሲደ ኦድያዋ ናጊደ ሺሼ።
\ip ሲቁ ጾሳይ ባረ አሳዉ እሜዳ እሞታ ኡባፐ አያዋ ግድያዋ ኦድያ ሸምፑዋ ታማነ ሄዙ፥ ሀ ማጻፋን ዳሮ ኤረቴዳዋ ጌተቲደ ቆፈቴ።
\iot ሸምፓቱዋ ኡባቶ እመቴዳ ቃን ቆፋቱዋ
\io1 ገሉዋ \ior 1:1-9\ior*
\io1 አማንያዋንቱ ግዶን ደንዴዳ ሻኮተ \ior 1:10—4:21\ior*
\io1 የዳ ደኡዋባነ ሶይ አሳ ደኡዋባ \ior 5:1—7:40\ior*
\io1 አማንያዋንታነ ክርስትና አማኑዋ አክቤናዋንታ \ior 8:1—11:1\ior*
\io1 አማንያዋንቱ ደኡዋነ ጎሸታ ዎጋ \ior 11:2—14:40\ior*
\io1 ክርስቶስ ሀይቁዋ ጾን ደንዶዋነ አማንያዋንቱ ደንዱዋባ \ior 15:1-58\ior*
\io1 ይሁዳን ደእያ መቶታንቻቶ እመቴዳ ማዱዋባ \ior 16:1-4\ior*
\io1 ዉርሰ ቁትያ \ior 16:5-24\ior*
\c 1
\p
\v 1 ታን፥ ጾሳ ሸንያን የሱስ ክርስቶስ ኪቴዳዋ ግዳናዉ ጼሰቴዳ ጳዉሎስነ፥ ኑ እሻ ሶስተኒስ፥ 
\v 2 ቆሮንቶሳን ደእያ ጾሳ አማንያ አሳቶ፥ የሱስ ክርስቶሳን ጌዬዳዋንቱስነ፥ ኑዉ ጎዳ ግድያ ኑ ጎዳ የሱስ ክርስቶሳ ሱን ኡባ ሳኣን ጼስያ ኡባቱዋና ጌሻ ግዳናዉ ጼሰቴዳዋንቶ ሀ ዳብዳቢያ ጻፌቶ።
\p
\v 3 ጾሳይ፥ ኑ አዉነ ኑ ጎዳይ የሱስ ክርስቶስ ህንተንቶ አ ኬካተነ ሳሮተ እሞ።
\s1 ጾሳ ጋላቱሳ
\p
\v 4 ጾሳይ ክርስቶሳ የሱሳ ባጋና ህንተንቶ እሜዳ አ ኬካተ ድራዉ፥ ታን ኡባ ዎደ ህንተንቶ ጾሳ ጋላታይ። 
\v 5-6 ታን ክርስቶሳዉ ማርካትያዌ ህንተንቱን ምኔዳ ድራዉ፥ ህንተ ኡባባን፥ ሃሳያ ኡባን ኤራተ ኡባን፥ አን ዱረቴድታ። 
\v 7 ሀዋዳን ህንተ ኑ ጎዳ የሱስ ክርስቶሳ ዩሳ ናግሽን፥ አያና እሞታፐ ሀራይ አቶ እቱነ ህንተንቶ ፓጨና። 
\v 8 ቃይ ኑ ጎዳ የሱስ ክርስቶሳ ጋላሳን ህንተ ካ ባይናዋንታ ግዳናዳን፥ ዉርሰይ ጋካናዉ እ ህንተንታ ምንሳናዋ። 
\v 9 ባረ ናኣ ኑ ጎዳ የሱስ ክርስቶሳ እትፐተዉ ህንተንታ ጼሴዳ ጾሳይ አማነቴዳዋ።
\s1 አማንያ አሳ ግዶን ሻኮተይ መቶፖ
\p
\v 10 ሽን ታናዳን አማንያዋንቶ፥ እት ዎዛናንነ እት ቆፋን እትፐ ግዳናፐ አትን፥ ሻኮተይ ህንተ ግዶን ደኤና ማላ፥ ህንተ ኡባይ እት ሃሳያ ሃሳያናዳን፥ ኑ ጎዳ የሱስ ክርስቶሳ ሱንን ታን ህንተንታ ዎሳይ። 
\v 11 አያዉ ጎፐ፥ ታናዳን አማንያዋንቶ፥ ቃሎአ ሶይ አሳይ ህንተንቱባ፥ ህንተ ግዶን ዋላሳይ ደእያዋ፥ ታዉ ኦዴድኖ። 
\v 12 ታን ግያዌ ሀዋ፤ ህንተንቱ ሁጲያን ሁጲያን፥ “ታን ጳዉሎሳዋ። ታን አጲሎሳዋ። ታን ኬፋዋ።\f + \fr 1:12 \fr*\fq ኬፋ፦ \fq*\ft ሀዌ ግሪከ ሱን ግዲደ፥ ብለይ ዛላ ግያዋ። ሀራ ጌሻ ማጻፋቱዋን ኬፋ ሱንይ ጰጽሮሳ።\ft*\f* ታን ክርስቶሳዋ” ያጊታ። 
\v 13 ክርስቶስ ሻከቴዴ? ህንተንቱ ድራዉ፥ ማስቃልያ ቦላ ምስማርያን ሸቲደ ካቀቴዳዌ ጳዉሎስ? ዎይ ህንተ ጳዉሎሳዉ ግዳናዉ ጻማቀቴድቴ?
\p
\v 14 ታን ቃርስጶሳፐነ ጋዮሳፐ አትን፥ ህንተንቱፐ ኦናነ ጻማቃቤና ድራዉ፥ ጾሳ ጋላታይ። 
\v 15 ሄዋ ድራዉ፥ ኦንነ ህንተንታ ታዉ ግዳናዳን ጻማቀቴድታ ጋናዉ ዳንዳየና። 
\v 16 ቃይ፥ ኤ፥ እስጽፋኖሳ ሶይ አሳካ ታን ጻማቃድ። ሽን ሀራ ጉጃደ ጻማቃድታንቶነ ዎዛና አከ። 
\v 17 አያዉ ጎፐ፥ ክርስቶስ ታና ምሽራቹዋ ቃላ ኦዳና ማላ ኪቴዳፐ አትን፥ ጻማቃና ማላ ኪትቤና፤ ቃይ ክርስቶስ ማስቃልያ ቦላ ሀይቄዳዌ መላ ግደና ማላ፥ ታን አሳ አዳ ኤራተ ቃላን ታማርስከ።
\s1 ክርስቶስ ጾሳ አዳ ኤራነ ዎልቃ
\p
\v 18 አያዉ ጎፐ፥ ክርስቶስ ማስቃልያ ቦላ ሀይቄዳዋ ኦድያ ቃላይ ይያዋንቶ ኤያተ። ሽን ኑዉ አትያዋንቶ ጾሳ ዎልቃ። 
\v 19 ጾሳ ማጻፋይ፥
\q1 “ታን ኤራንቻቱዋ አዳ ኤራተ፥
\q2 ባይዛና፤
\q2 ቃይ አኬካንቻቱዋ አኬካካ ይሳና”
\m ያጌ።\x - \xo 1:19 \xo*\xt ኢሳ. 29:14\xt*\x* 
\v 20 አዳ ኤራንቻይ ሀቃን ደኢ? ህግያ ታማርስያዌ ሀቃን ደኢ? ዎይ ሀ አላምያ ጾናናዉ ፓሉመትያዋንቱ ዋናንድኖሻ? ጾሳይ ሀ ሳኣ አ ኤራተይ ኤያተ ግድያዋ በሴዳ!\x - \xo 1:20 \xo*\xt ኢዮባ 12:17፤ ኢሳ. 19:12፤ 33:18፤ 44:25\xt*\x*
\p
\v 21 አያዉ ጎፐ፥ አሳይ ባረ ሁጰ አ ኤራተን ባረና ጾሳ ኤረና ማላ፥ ጾሳይ ባረ አ ኤራተን ድጊደ፥ ኑን ኦድያ ኤያ ቃላን አማንያዋንታ አሻናዉ ቆፔዳ። 
\v 22 አይሁዳቱ ማላታ ኦቺኖ። ቃይ ግሪከ አሳቱ አ ኤራተ ዎልቃማ ኮሻ ኮዪኖ። 
\v 23 ሽን ኑን ማስቃልያ ቦላ ምስማርያን ሸቲደ ካቀቴዳ ክርስቶሳባ ኦዴቶ። ሄዌ አይሁዳቶ ቦ፤ ቃይ አይሁዳ ግደናዋንቶ ኤያተ። 
\v 24 ሽን ጾሳይ ጼሴዳዋንቶ አይሁዳቶካ ግሪካቶካ ኑን ኦድያ ጾሳ ዎልቃይነ አ አ ኤራተይ ክርስቶሳ። 
\v 25 አያዉ ጎፐ፥ ጾሳ ኤያተይ አሳ አዳ ኤራተፐ አ፤ ቃይ አ ላፋተ ጌተትያዌካ አሳ ምኖተፐ ምኔ።
\p
\v 26 ስም ታናዳን አማንያዋንቶ፥ ጾሳይ ህንተንታ ጼስያ ዎደ ህንተ ዎይሳ ማላ አሰንቶ ቆፕተ። አሳ ቆፋን ህንተ ግዶን አ ኤራንቻቱ፥ ዎልቃማቱነ ቃ ሼሻቱ ዳራ ግድክኖ። 
\v 27 ሽን ጾሳይ አዳ ኤራንቻቱዋ ዬላያናዉ፥ አላምያን ደእያ ኤያቱዋ ዶሬዳ፤ ቃይ ምናቱዋ ዬላያናዉ፥ አላምያን ደእያ ላፋቱዋ ዶሬዳ። 
\v 28 ጾሳይ ሀ አላምያን ዎልቃማባ ጊደ ቆፕያዋ ይሳናዉ፥ ሀ አላምያ ማደናባ ካቶባነ ሀንቤናባ ዶሬዳ። 
\v 29 ሄዋ ድራዉ፥ ኦንነ ጾሳ ስንን ጬቀታናዉ በሰና። 
\v 30 ሽን ጾሳይ ህንተንቶ ክርስቶስ የሱሳ ደኡዋ ኦ እሜዳ። ክርስቶስ ኑዉ አ ኤራተ፥ ጽሎተ፥ ጌሻተነ አቶተ ግዴዳ። 
\v 31 ሄዋ ድራዉ፥ ጾሳ ማጻፋይ፥
\q1 “ጬቀትያ ኡራይ ኦንነ፥
\q2 ጎዳይ ኦዳዋን ጬቀቶ”
\m ያጌ።\x - \xo 1:31 \xo*\xt ኤር. 9:24\xt*\x*
\c 2
\s1 ኑን ክርስቶሳ ካቃባ ማርካቴቶ
\p
\v 1 ታናዳን አማንያዋንቶ፥ ታን ጾሳ ቱማተ ጹራ\f + \fr 2:1 \fr*\fq ጾሳ ቱማተ ጹራ፦ \fq*\ft እት እት ጌሻ ማጻፋ ብለቱ፥ ጾሳባ ማርካተ፥ ያጊኖ።\ft*\f* ህንተንቶ ኦዳናዉ ህንተንቱኮ ዬዳ ዎደ፥ ቃ ቃላንነ አዳ ኤራተን ኦዳናዉ ያበይከ። 
\v 2 አያዉ ጎፐ፥ ታን ህንተንቱና ደኣደ፥ የሱስ ክርስቶሳፐነ ቃይ ማስቃልያ ቦላ ምስማርያን ሸቲደ እ ካቀቴዳዋፐ አትን፥ ሀራባ ኤረናዳን፥ ታ ቆፋ ቃቻድ። 
\v 3 ታን ዳቡራንነ ያሻን ዳሮ ኮኮርሳን ህንተንቱና ደኣድ። 
\v 4 ታን ታማርስያዋነ ኦድያዋ ጾሳ አያናንነ ዎልቃን ቆንጭሳይፐ አትን፥ ጪማ ግዲደ አዳ ኤራተ ቃላና ግደና። 
\v 5 ሄዋ ድራዉ፥ ህንተ አማኑ ጾሳ ዎልቃናፐ አትን፥ አሳ አ ኤራተን ዘምፕቤና።
\s1 ጾሳ አዳ ኤራ
\p
\v 6 ኑን አያናን ዎዛናማቱዋ ግዶን አ ኤራተ ሃሳዬቶ። ሽን ሄዌካ ሀ አላምያ አ ኤራተ ግደና፤ ዎይ ሀ አላምያ ሞድያ ይያዋንቱ አ ኤራተ ግደና። 
\v 7 ሽን ኑን ኦድያ አ ኤራተይ፥ ጾሳይ ካሰቲደ፥ ጮራ ዎድያፐ ካሰ ኑ ቦንቾ ዶሬዳ አሳፐ ጌሜዳ አ ጹራ አ ኤራተ። 
\v 8 ሀ አላምያ ሞድያዋንቱፐ ኦንነ ሀ አ ኤራተ ኤርቤና። ኡንቱንቱ ኤሬዳዋ ግድንቶ፥ ቦንቾ ጎዳ ማስቃልያ ቦላ ምስማርያን ሺደ ካቂክኖ። 
\v 9 ሽን ጾሳ ማጻፋይ፥
\q1 “ኦንነ አይፍያን በእቤናዌ፥
\q2 ሀይንካ ስስቤናዌ፥
\q2 ቃይ ኦንነ ባረ ዎዛናን ቆፕቤናዌ
\q2 ጾሳይ ባረና ሲቅያዋንቶ ጊግሴዳዋ”
\m ግያዋዳን ኑን ሃሳዬቶ።\x - \xo 2:9 \xo*\xt ኢሳ. 64:4\xt*\x* 
\v 10 ጾሳይ ባረ ጹራ የዉዋ ባረ አያናን ኑና ኤርሴዳ፤ አያዉ ጎፐ፥ ጌሻ አያናይ ጾሳባ ሀራይ አቶ ጌሜዳ የዉዋ ኡባ ብዴ። 
\v 11 አያዉ ጎፐ፥ አሳን ደእያ አሳ አያናፐ አትን፥ አሳባ ኤርያዌ ኦኔ? ሀዋዳንካ፥ ቃይ ጾሳባ ጾሳ አያናፐ አትን፥ ኦንነ ኤረና። 
\v 12 ኑን ጾሳይ ኑዉ እሜዳባ ኡባ ኤራናዉ እ ኑዉ የዴዳ አያና አኬዶፐ አትን፥ አላምያ አያና አክበይኮ።
\p
\v 13 ኑን አያና የዉዋ\f + \fr 2:13 \fr*\fk አያና የዉዋ፦ \fk*\ft ጌሻ አያናይ እሜዳ ቃላ።\ft*\f* አያና የዉዋና ጋደ፥ ጌሻ አያናይ ኑና ታማርሴዳ ቃላን ሀዋ ሃሳዬቶፐ አትን፥ አሳ አ ኤራተይ ኑና ታማርሴዳ ቃላን ሃሳዮኮ። 
\v 14 ሽን ጌሻ አያናይ ባይና አሳይ ጾሳ አያና የዉዋ አከና፤ አያዉ ጎፐ፥ ሄዌ አዉ ኤያተ። የዉ ጌሻ አያናን ፓጨትያ ድራዉ፥ እ ኤራናዉ ዳንዳየና። 
\v 15 ሽን ጌሻ አያናይ ደእያ አሳይ ኡባባ ሻኬ፤ ሽን እ ባረ ሁጰዉ ኦናንነ ሻከተና። 
\v 16 አያዉ ጎፐ፥ ጾሳ ማጻፋይ፥
\q1 “ጎዳ ዎዛና ኤርያዌ ኦኔ?
\q2 አ ዞራናዉ ዳንዳይያዌ ኦኔ?”
\m ያጌ። ሽን ኑዉ ክርስቶሳ ዎዛናይ ደኤ።\f + \fr 2:16 \fr*\fk ኑዉ ክርስቶሳ ዎዛናይ ደኤ፦ \fk*\ft ሀዋ ጉሳይ፥ ኑን ክርስቶስ ቆፕያዋዳን ቆፔቶ ጉሳ።\ft*\f*\x - \xo 2:16 \xo*\xt ኢሳ. 40:13\xt*\x*
\c 3
\s1 ጾሳ ካልያዋንቱ ኦሱዋ
\p
\v 1 ታናዳን አማንያዋንቶ፥ ታን ጌሻ አያናይ ደእያ አሳዉ ሃሳይያዋዳን፥ ህንተንቶ ሃሳያናዉ ዳንዳያበይከ። ሽን ሀ አላምያ አሳዉ ሃሳይያዋዳንነ አማኑዋን ምንቤና ክርስቶሳን ደእያ ጉ ናና ማላ አሳዉ ሃሳይያዋዳን ሃሳያድ። 
\v 2 ህንተንቱ ብሮ ምኖ ቁማ ማናዉ ዳንዳይቤና ድራዉ፥ ታን ህንተንታ ማ ፓካድ፤ ሀራይ አቶ፥ ሀእካ ዳንዳይበይክታ። 
\v 3 አያዉ ጎፐ፥ ህንተ ሀእካ ሀ አላምያ አሳዳን ደኢታ። ህንተንቱ ሀ አላምያ አሳ ግድያዋ ህንተ ግዶን ደእያ ቃናቲነ ፓሉማይ ኤርሰኔ? ቃይ ሀ አላምያ አሳዳን ስመረቲታ። 
\v 4 አያዉ ጎፐ፥ ህንተንቱፐ እቱ፥ “ታን ጳዉሎሳዋ” ጎፐ፥ ሀራይ ቃይ፥ “ታን አጲሎሳዋ” ጎፐ፥ ሀ አላምያ አሳ ማላ ግድክቴ?
\p
\v 5 ያትና፥ አጲሎስ ኦኔ? ጳዉሎስ ኦኔ? ኑን ህንተንታ አማንዳ ጾሳ ካልያዋንታ። ጾሳይ ኑዉ ሁጲያን ሁጲያን እሜዳ ኦሱዋ ኦቶ። 
\v 6 ታን ፑትያ ቶካድ፤ አጲሎስ ሃ ኡሼዳ፤ ሽን ጾሳይ ፑትያ ድቼዳ። 
\v 7 ሄዋ ድራዉ፥ ድችያ ጾሳፐ አትን፥ ቶክያዌካ ሃ ኡሽያዌካ አያነ ግደና። 
\v 8 ቶክያዌነ ሃ ኡሽያዌ እት ማላ፤ ሽን ጾሳይ ሁጲያን ሁጲያን አ ዳቡራ ኬና አዉ ዎይታና። 
\v 9 ኑን ጾሳዉ እትፐ ኦያ አ ኦሳንቻቱዋ ግድያ ድራዉ፥ ህንተ አ ኦሱዋ ሳኣ።
\p ቃይካ ህንተ ጾሳ ጎልያ። 
\v 10 ጾሳይ ታዉ እሜዳ አ ኬካተን ኤራንቻ አናጽያዳን፥ ጎልያ ባሱዋ ባሳድ። ሀራ ኡራይ አ ቦላ ኬጼ። ሽን አ ቦላ ኬጽያ ኦንነ ዎት ኬጽንቶ፥ ባረ ሁጰዉ ናገቶ። 
\v 11 አያዉ ጎፐ፥ ጾሳይ የሱስ ክርስቶሳ ጻላላ ባሶ ኦደ ዎዳ። አፐ ሀራ ባሱዋ ባሳናዉ ኦንነ ዳንዳየና። 
\v 12 ሽን ሀ ባሱዋ ቦላ ኦንነ ዎርቃን ግድና፥ ብራን ግድና፥ አልኦ ሹቻን ግድና፥ ምን ግድና፥ ጋታን ዎይ ማቃን ኬጾፐ፥ 
\v 13 አሳ ኡባ ኦሱ ቆንጭያ ከሳናዋ። አያዉ ጎፐ፥ ታማን ቆንጫና ድራዉ፥ ሄ ጋላሳይ አሳ ኡባ ኦሱዋ በሳና። አሳይ ኡባይ ባረ ኦሱዋ ዎት ኦደንቶነ ታማይ ፓጫና። 
\v 14 ኦንነ ባሱዋ ቦላ ኬጼዳ ኦሱ ምኒደ አቶፐ፥ እ ዎይታ አካናዋ። 
\v 15 ኦ ኦሱነ ጉደቶፐ፥ ሄ ኡራይ ቆሄታና። እ ባረ ሁጰዉ አታና፤ ሽን ታማ ግዶፐ ከስ አኮዋዳን አታና።
\p
\v 16 ህንተንቱ ጾሳይ አቅያ ጌሻ ጎልያ ግድያዋነ ጾሳ አያናይ ህንተንቱን ደእያዋ ኤርክቴ? 
\v 17 ኦንነ ጾሳ ጌሻ ጎልያ ኮሎፐ፥ ጾሳይ አ ኮላና። አያዉ ጎፐ፥ ጾሳይ አቅያ ጌሻ ጎሊ ጌሻ፤ ሄ ጌሻ ጎሊካ ህንተንታ።
\p
\v 18 ኦንነ ባረ ሁጲያ ጭሞፖ። ህንተንቱፐ ኦንነ ባረና ሀ አላምያን አ ኤራንቻ ያጊደ ቆፖፐ፥ አ ኤራንቻ ግዳናዉ፥ ኤያ ግዶ። 
\v 19 አያዉ ጎፐ፥ ሀ አላምያ አ ኤራተይ ጾሳ ስንን ኤያተ። ጾሳ ማጻፋይ፥
\q1 “ጾሳይ አ ኤራንቻቱዋ፥
\q2 ኡንቱንታ ኡንቱንቱ ገንያን ኦይቄ”
\m ያጌ።\x - \xo 3:19 \xo*\xt ኢዮባ 5:13\xt*\x* 
\v 20 ቃይ፥
\q1 “አዳ ኤራንቻቱዋ ቆፋይካ፥
\q2 ማዱ ባይናዋ ግድያዋ ጎዳይ ኤሬ”
\m ያጌ።\x - \xo 3:20 \xo*\xt ማዝ. 94:11\xt*\x* 
\v 21 ሄዋ ድራዉ፥ ኦንነ አሳን ጬቀቶፖ። አያዉ ጎፐ፥ ኡባባይካ ህንተዋ። 
\v 22 ጳዉሎስካ፥ አጲሎስካ፥ ኬፋይካ፥ ሀ አላሚካ፥ ደኡካ፥ ሀይቁካ፥ ሀእ ደእያዌካ፥ ስንፐ ያናዌካ፥ ኡባይካ ህንተዋ። 
\v 23 ህንተንቱ ክርስቶሳዋንታ፤ ክርስቶስካ ጾሳዋ።
\c 4
\s1 ክርስቶሳ ካልያዋንታ
\p
\v 1 አሳይ ኑና ክርስቶሳዉ ኦያዋንቱዳንነ ጾሳ ጎለን ደእያ ጹራ ናግያ አሳዳን ቆፖ። 
\v 2 ያቲደ ሄ አሳቱ ባረንቱ ጎዳዉ አማነቴዳዋንታ ግዲደ፥ ቤታናዉ ኮሼ። 
\v 3 ሽን ህንተ ዎይ ሀራይ ታ ቦላ ፕርዶፐ፥ አይነ ግደና። ሀራይ አቶ፥ ታንካ ታ ሁጲያን ፕርድከ። 
\v 4 አያዉ ጎፐ፥ ታን ታ ሁጲያን አያኔካ ኤርያባይ ባዋ፤ ሽን ታና ሄዌ ጽልሰና። ታና ፕርድያዌ ጎዳ። 
\v 5 ሄዋ ድራዉ፥ ጎዳይ ማን ጌሜዳባ ፖኡዋ ከስያዌ፥ ዎዛና ቆፋ ቆንጭስያዌ ያና ዎዲ ጋካናዉ ኦ ቦላንነ ኦናነ ፕርዶፕተ። ሄ ዎደ፥ አሳይ ኡባይ ሁጲያን ሁጲያን ጾሳፐ ሳባ ደማናዋ።
\p
\v 6 ታናዳን አማንያዋንቶ፥ ህንተንቱፐ ኦንነ እቱ ታማርስያዋ ሳቢደ፥ ሀራይ ታማርስያዋ ቦረና ማላ፥ “ጾሳ ማጻፋን ጻፈቴዳዋ ቦንቻ” ያግያዋ ህንተ ኑናና ታማራና ማላ፥ ህንተ ድራዉ፥ ታባነ አጲሎሳባ ሌምሱዋዳን ኦዳድ። 
\v 7 አያዉ ጎፐ፥ ሀራቱዋፐ ኔና ኦኔ ቂሴዳዌ? ኔን ጾሳፐ አካቤናባይ ነዉ አዬ ደእያዌ? ያትና፥ ኔን አኬዳዋ ግዶፐ፥ አያዉ አካቤናዋዳን ጬቀታይ?
\p
\v 8 ሀእ ህንተ ካሌድታ። ሀእ ዱረቴድታ። ኑን ባይናን ህንተረካ ካዉቴድታ። ኑንካ ህንተንቱና ካተታናዳን፥ ህንተ ካዉቴድተንቶ ሎአ ሽን። 
\v 9 አያዉ ጎፐ፥ ታዉ ማላትያዋዳን፥ ኑን ሀ ሳአዉ፥ ኪታንቻቶነ አሳዉ ካሳ ግዴዳ ድራዉ፥ ጾሳይ ኑና የሱስ ኪቴዳዋንታ ሀይቆ ፕርደቴዳ አሳዳን፥ ኡባፐ ዉርሰ ኦዳ።
\p
\v 10 ኑን ክርስቶሳ ድራዉ ኤያ፥ ሽን ህንተ ክርስቶሳን አዳ ኤራንቻ። ኑን ዳቡራንቻ፥ ሽን ህንተ ምና። ህንተንቱ ቦንቼቴዳዋንታ፥ ሽን ኑን ቶሸቴዳዋንታ። 
\v 11 ሀ ዎዲ ጋካናዉ፥ ኑን ኮሻቴቶ፤ ሳመቴቶ፤ ካሎቴቶ፤ ደሸቴቶ። ቃይ ደእያ ሳኣ ዪደ ዩዬቶ። 
\v 12 ኑን ኑ ኩሽያን ኦደ ዳቡሬቶ። ኑና አሳይ ሸቂያ ዎደ፥ አንጄቶ። ኑና የደርስ ዩይያ ዎደካ ዳንዳዬቶ። 
\v 13 ኑ ቦላ ኢታባ ሃሳይያ ዎደ፥ ኑን ሎኦ ቃላ ዛሬቶ። ኑን ሀዋ ጋካናስካ፥ ሀ ሳኣ ፕቱዋነ ኡባባ ቡራ ግዴዶ።
\p
\v 14 ታን ታ ሲቅያ ናናዳን፥ ህንተንታ ሴራናዉ ሀዋ ጻፋድፐ አትን፥ ዬላያናዉ ጻፋበይከ። 
\v 15 አያዉ ጎፐ፥ ክርስቶሳን ህንተንታ ድችያ ታሙ ሻአ አሳይ ህንተንቶ ደኦፐካ፥ ህንተንቶ እት አዉዋፐ ሀራይ ባዋ። አያዉ ጎፐ፥ ታን ምሽራቹዋ ቃላ ህንተንቶ አሄዳዋዳን፥ ክርስቶሳ የሱሳን ህንተንቶ አዉዋ ግዳድ። 
\v 16 ስም ታናዳን ሀንተ ያጋደ ህንተንታ ዎሳይ። 
\v 17 ሄዋ ድራዉ፥ ጎዳን አማነቴዳ ታ ሲቅያ ታ ናኣ ጽሞቶሳ ህንተንቱኮ ኪታድ። እ ኡባ ሳኣን ደእያ አማንያ አሳ ኡባዉ ታን ታማርስያ ክርስቶሳ የሱሳን ደእያ ታ ኦግያ ህንተንታ ሀሳይሳናዋ።
\p
\v 18 ታን ህንተንታ በአናዉ ህንተንቱኮ ዬናባ ማላትና፥ ኦቶረትያ እት እት አሳቱ ደኢኖ። 
\v 19 ሽን ጎዳይ ጎፐ፥ ታን ህንተንቱኮ ኤለካ ባደ ሄ ኦቶረትያ አሳቶ ሃሳያ ግደናን፥ ኡንቱንቱ ዎልቃ ኤራና። 
\v 20 አያዉ ጎፐ፥ ጾሳ ካዉተይ ጾሳ ዎልቃናፐ አትን፥ ሃሳያና ግደና። 
\v 21 ታን ህንተንቱኮ ሙርያ ጻምኣና ዮየ ዎይ ሲቁዋናነ አሽከ አያናና ዮ? ሀቃዋ ዶሪቴ?
\c 5
\s1 አማንያ አሳ ግዶን ኦሰቴዳ ፖኮባ
\p
\v 1 ህንተንቱ ግዶን ፖኮ ዎሹማ ኦሱ ደእያዌ ዝግረቴ፤ ሄዋ ማላ ፖኮ ዎሹማ ኦሱ ሀራይ አቶ፥ ጾሳ አማነና አሳ ግዶንነ ባዋ። አያዉ ጎፐ፥ ባረ አዉዋ ማቻቶ አኬዳ አሳይ ደኤ።\x - \xo 5:1 \xo*\xt ዛረ. 22:30\xt*\x* 
\v 2 ህንተንቱካ ኦቶረቴድታ። ሄዋፐ ህንተ ካዮታናዉ በሰኔ? ሄዋ ማላ ፖኮ ኦሱዋ ኦዳ ብታኒ ህንተ ግዶፐ ክቻናዉ በሴ።
\p
\v 3-4 አያ ግድናካ ታን ታ አሳተን ህንተንቱና ደኤናን ዮፐካ፥ አያናን ህንተንቱና ደአይ። ሀእ ህንተንቱና ደእያዋዳን ሀናደ፥ ሄዋ ማላ ኦሱዋ ኦዳ ብታንያ ቦላ ኑ ጎዳ የሱስ ክርስቶሳ ሱንን ፕርዳድጋድ። ህንተንቱነ ታ አያናይ ኑ ጎዳ የሱስ ክርስቶሳ ዎልቃና እትፐ ሺቂደ፥ 
\v 5 ሄ ብታንያ አያናይ ጎዳ የሱስ ፕርዳዉ ይያ ጋላሳን አታና ማላ፥ ናጋራን ኩሜዳ አ ቦላ ኮላናዳን ሴጻናዉ ህንተ እማናዳን፥ ታን ፕርዳድ።
\p
\v 6 ህንተንቱ ጬቁ ሎአ ግደና። ጉ እርሹ ሙናቃ ኡባ ደንያዋ ኤርክቴ? 
\v 7 ህንተንቱ ኦራ ግዳና ማላ፥ ናጋራ እርሹ ጫሌዳዋ ከስተ። ህንተንቱ እርሹ ባይና ሙናቃ ማላ። አያዉ ጎፐ፥ ኑ ፓስጋ ዶርሳይ፥ ክርስቶስ ያርሸቴዳ።\x - \xo 5:7 \xo*\xt ከሳ 12:5\xt*\x* 
\v 8 ሄዋ ድራዉ፥ ኑን ኡክ ባላ ሱረተንነ ቱማተን ቦንቻናፐ አትን፥ ጫላ እርሹዋን፥ ኢታተ እርሹዋንነ ጌላተ እርሹዋን ቦንቾኮ።\x - \xo 5:8 \xo*\xt ከሳ 13:7፤ ዛረ. 16:3\xt*\x*
\p
\v 9 ዎሹማናዉ ቆፕያዋንቱና ህንተ እትፐ ጋይተና ማላ፥ ህንተንቶ ዳብዳቢያ ጻፋድ።\f + \fr 5:9 \fr*\fk ዳብዳቢያ ጻፋድ፦ \fk*\ft ሀዋ ጻፋናፐ ካሰና ጳዉሎስ ቆሮንቶሳ አሳዉ ጻፌዳ ሀራ ቆንጭያን ኤረትቤና ዳብዳቢ ደኤ ጉሳ።\ft*\f* 
\v 10 ታን ግያዌ ሀ አላምያን ደእያ ዎሹማናዉ ቆፕያዋንቱፐ ዎይ ዮራትያዋንቱፐ፥ ካይሶትያዋንቱፐነ ዎይ ኤቃዉ ጎይንያዋንቱፐ ኡባካ ሻከታና ማላ ግደና። ሄዋ ግዶፐ፥ ሀ አላምያፐ ህንተ ሻከት ባናዉ በሴ ጉሳ። 
\v 11 ሽን እሻቱዋ ሀእ ጌተትያዋንቱፐ እቱነ ዎሹማናዉ ቆፕያዋንቱ ዎይ ሚሻዉ ዮራትያዋንቱ ዎይ ኤቃዉ ጎይንያዋንቱ ዎይ አሳ ሱን ባይዝያዋንቱ ዎይ ማትያዋንቱ ዎይ ዉእያዋንቱና ህንተንቱ እትፐተ ኦና ማላ፥ ታን ህንተንቶ ጻፋድ። ሄዋንቱ ማላና ሀራይ አቶ፥ ቁማካ እትፐ ሞፕተ።
\p
\v 12 አያዉ ጎፐ፥ ዎሳ ጎለፐ ካረና ደእያዋንቱ ቦላ ፕርዳናዉ ታና አዬ ጋ? ህንተንቱ ግዶን ዎሳ ጎለን ደእያዋንቱ ቦላን ህንተ ፕርድክቴየ? 
\v 13 ሽን ካረና ደእያዋንቱ ቦላን ጾሳይ ፕርዳና። ሄ ኢታባ ኦያ ኡራ ህንተ ግዶፐ ከስ ድግተ።\x - \xo 5:13 \xo*\xt ዛረ. 13:5፤ 17:7\xt*\x*
\c 6
\s1 አማንያ አሳ ግዶን ደእያ ዋላሳ ዎቲደ ይሳናዉ በሲ?
\p
\v 1 ህንተንቱፐ እት ኡራዉ ባረ እሻና ሞቱ ደእያባ ግዶፐ፥ አማንያዋንቱ ቦላ ፕርደታናዋ ባሺደ፥ አማነናዋንቱ ቦላ ፕርደታናዉ ዋን ጻሊደ ቤዳ? 
\v 2 አማንያዋንቱ አላምያ ቦላ ፕርዳናዋ ኤርክቴ? ያትና፥ አላምያ ቦላ ህንተ ፕርዳናዋንታ ግዶፐ፥ ኡባባፐ ጉጽያዋ ፕርዳናዉ ዳንዳይክቴ? 
\v 3 ሀ ደኡዋባይ አቶ ሽን፥ አማንያዋንቱ ኪታንቻቱዋ ቦላ ፕርዳናዋ ኤርክቴ? 
\v 4 ያትና፥ ህንተንታ ሀ አላምያ ደኡዋባዉ ፕርዳ ጎለ ቡሳይ ኮሾፐ፥ አማንያ አሳይ ካዳ አሳን ፕርድሳናዉ አፊቴ? 
\v 5 ታን ህንተንታ ዬላያናዉ ሀዋ ጋይ፤ ሀዋ ግዳናዉ በሲ? ህንተንቱ ግዶን እሻቱዋ ስገናዉ ዳንዳይያ ሎኦ ኤራንቻ አሳይ እቱነ ባዌ? 
\v 6 ሽን እት እሻይ የኮ እሻ ፕርዳ ጎለን ሞቲደ፥ ሄ የዉዋ አማነና አሳን ፕርድሲ?
\p
\v 7 ስም እቱ እቱዋ ሞትያዌ ህንተ ግዶን ደኦፐ፥ ሄዌ ህንተ ኩንዴዳዋ በሴ። ሄዋፐ ህንተ ናቀትያዌነ ጭመትያዌ ሎኤኔ? 
\v 8 ሽን ህንተ ህንተ ሁጰዉ እቱ እቱዋ ሀራይ አቶ፥ ህንተ እሻቱዋካ ናቂታነ ጭሚታ።
\p
\v 9 ዎይ ማካላንቻቱ ጾሳ ካዉተ ላተናዋ ኤርክቴ? ባሎፕተ። ዎሹማናዉ ቆፕያዋንቱ ዎይ ኤቃዉ ጎይንያዋንቱ ዎይ ዎሹምያዋንቱ ዎይ አቱማዋ ግዲደ፥ አቱማዋና ግስያዋንቱ፥ 
\v 10 ዎይ ካይሳቱ ዎይ ሚሻዉ ዮራትያዋንቱ ዎይ ማትያዋንቱ ዎይ አሳ ሱን ባይዝያዋንቱ ዎይ ቦንቂያዋንቱ ጾሳ ካዉተ ላትክኖ። 
\v 11 ህንተንቱፐካ እት እት አሳይ ሄዋንቱ ማላ። ሽን ጎዳ የሱስ ክርስቶሳ ሱንንነ ኑ ጾሳ አያናን ህንተ ሜጨቲደ ጌዬድታ፤ ቃይ ጽሌድታ።
\s1 ህንተንቱ አሳተ ጾሳ ቦንቾ ፔሽተ
\p
\v 12 እት ኡራይ፥ “ታን ኮዬዳባ ኡባ ኦናዉ ዳንዳያይ” ጋና ዳንዳዬ። ሽን ኡባይካ ታና ማደና። ታን ኮዬዳባ ኡባ ኦናዉ ዳንዳያይ። ሽን አዬኔካ ታና ሞደና። 
\v 13 ቃይ ሀራይካ፥ “ቁማይ ኡሉዋሳ፤ ኡሉካ ቁማሳ” ጌ። ሽን ጾሳይ ኡሉዋካ ቁማካ ይሳና። አሳ አሳተይ ጎዳ የሱሳሳፐ አትን፥ ዎሹማሳ ግደና። ጎዳ የሱስካ አሳ አሳተሳ። 
\v 14 ጾሳይ ጎዳ የሱሳ ሀይቁዋፐ ደንዳ፤ ቃይ ኑናካ ሀይቁዋፐ ባረ ዎልቃን ደንና።
\p
\v 15 ህንተንቱ አሳተይ ክርስቶሳ አሳተና እቱዋ ግድያዋ ህንተ ኤርክቴ? ያትና፥ ታን ክርስቶሳ አሳተና እቱዋ ግዴዳዋ አፋደ፥ ጫራት አሳተና እቱዋ ኦናዉ በሲ? በሰና! 
\v 16 ዎይ ጫራትና እትፐተ መያ ኡራይ እዝና እት አሳተ ግድያዋ ኤርክቴ? አያዉ ጎፐ፥ ጾሳ ማጻፋይ፥ “ኡንቱንቱ ላአቱ እት አሾ ግዳና” ያጌ።\x - \xo 6:16 \xo*\xt ዶመ 2:24\xt*\x* 
\v 17 ሽን ጎዳና እትፐተ መያ ኡራይ አያናን አናና እቱዋ ግዴ።
\p
\v 18 ዎሹማፐ ሃክተ። እት ኡራይ ኦያ ሀራ ናጋራ ኡባይ አ አሳተፐ ካረና ደኤ፤ ሽን ዎሹምያዌ ባረ ቦላን ናጋራ ኦ። 
\v 19 ዎይ ህንተ ቦላይ ጾሳይ ህንተንቶ እሜዳ ህንተንቱን ደእያ ጌሻ አያናይ አቅያ ጌሻ ጎልያ ግድያዋ ኤርክቴ? ቃይ ህንተ ህንተ ሁጲያሳ ግድክታ። 
\v 20 አያዉ ጎፐ፥ ጾሳይ ህንተንታ ጋትያን ሻሜዳ። ሄዋ ድራዉ፥ ህንተ አሳተን አ ቦንችተ።
\c 7
\s1 ገሉዋ አካባስ ኦሸቴዳ ኦሻነ እመቴዳ ዛሩዋ
\p
\v 1 ህንተንቱ ታዉ ጻፌዳ የዎ አቱማ አሳይ ማጫዉኖ ቦቼነንቶ ሎአ። 
\v 2 ሽን ዎሹማ ጋሱዋ ድራዉ፥ አቱማ አሳዉ ሁጲያን ሁጲያን ማቻታ ደኡ። ቃይ ማጫ አሳዉካ ሁጲያን ሁጲያን አስናይ ደኦ።
\p
\v 3 አስናይ ባረ ማቻትዉ አስናተን በስያባ ኦ፤ ቃይ ሄዋዳን፥ ማቻታካ ባረ አስናዉ ማቼተን በስያባ ኦ። 
\v 4 ማቻታ ባረ አሳተዉ ጎዳ ግዱኩ፤ ሽን እዝ አስናይ ጎዳ። ሀዋዳንካ፥ ቃይ አስናይ ባረ አሳተዉ ጎዳ ግደና፤ ሽን አ ማቻታ ጎዳ። 
\v 5 ህንተንቱ ህንተ ግዶን ጾሳ ዎሳን ገንጫናዉ ሄ ዎድያዉ ዞረታን ድገታናፐ አትን፥ እቱ እቱዋ ድጎፕተ። ህንተንቱ ህንተንታ ናገና ድራዉ፥ ሴጻናይ ህንተንታ ፓጨናዳን፥ እትፐ ደእተ። 
\v 6 ሽን ታን ህንተንታ ሄዋ ህንተ ዶሶዋዳን ሀንተ ጋይፐ አትን፥ አዛዝከ። 
\v 7 ታን አሳይ ኡባይ ታናዳን ሀንንቶ ዶሳይ። ሽን ጾሳይ አሳዉ ሁጲያን ሁጲያን ዱማ ዱማ እሞታ እም ዎዳ፤ እቶ ሀዋዳን፥ ቃይ የኮ ሄዋዳን እም ዎዳ።
\p
\v 8 ሄዋ ድራዉ፥ ታን ማቻቶ አክቤናዋንቱነ አስናይ ሀይቆ ማጫዋንቱ ታናዳን ጮ ደኢኖንቶ፥ ኡንቱንቶ ሎአ ጋይ። 
\v 9 ሽን አሙዋን ጉደትያዋፐ አክያዌነ ገልያዌ ሎአ ግድያ ድራዉ፥ ኡንቱንቱ ባረንታ ናጋናዉ ዳንዳያና ዮፐ፥ አክኖነ ገልኖ።
\p
\v 10-11 ማቻታ ባረ አስናፐ ሻከቱፑ። ሽን ሻከቶፐነ ገለናን ደኡ፤ ዎይ ባረ አስናና ስገቱ። አስናይካ ባረ ማቻቶ የዶፖ ያጋደ፥ አኬዳዋንታነ ገሌዳዋንታ አዛዛይ። ሽን ሀዋ አዛዝያዌ ጎዳፐ አትን፥ ታና ግድከ።
\p
\v 12 ታን ሀራቱዋ ሀዋዳን ጋይ፤ ጎዳ ግደና። አማነና ማቻታ ደእያ አማንያ አሳይ ኦንነ ደኦፐ፥ አ ማቻታ አናና እትፐ ደእያዋ እ ዶሶፐ፥ እዞ የዶፖ። 
\v 13 ቃይ አማነና አስናይ ደእያ አማንያ ማቻታ ደኦፐ፥ እዝ አስናይ እዝና እትፐ ደእያዋ እዛ ዶሶፐ፥ አፐ ሻከቱፑ። 
\v 14 አያዉ ጎፐ፥ አማነና አስናይ ባረ አማንያ ማቻትና ደኢደ ጌዬዳ። ቃይ አማነና ማቻታ ባረ አማንያ አስናና ደኣደ ጌያዱ። ሄዌ ባዌንቶ፥ ህንተንቱ ናናይ ቱና፤ ሽን ሀእ ኡንቱንቱ ጌሻ። 
\v 15 ሽን አማነናዌ ሻከታና ኮዮፐ ሻከቶ። አማንያ ማቻቶ ግድና፥ ዎይ አስና ግድና፥ ሀዋ ማላ የዉዋን ቃሸትክኖ። አያዉ ጎፐ፥ ጾሳይ ኑና ሳሮተን ደአናዉ ጼሴዳ። 
\v 16 አማንያ ማቻቴ፥ ኔን ነ አስና አሻንንቶነ ኦ ኤር? ዎይ አማንያ አስናዉ ኔን ነ ማቻቶ አሻንንቶነ ኦ ኤር?
\s1 ጾሳይ ህንተንታ ኮይሮ ጼስያ ዎደ ህንተንቱ ደእያ ሀኖታን ደእተ
\p
\v 17 ግዶፐነ፥ አሳይ ሁጲያን ሁጲያን ጎዳይ አዉ እሜዳዋዳንነ ቃይ ጾሳይ ባረና ጼሴዳዋዳን ደኦ። ሄዌ አማንያ አሳ ኡባ ታን ታማርሴዳ ህግያ። 
\v 18 ኦንነ ቃጻረት ኡቲደ፥ ጾሳ አማኔዳዋ ግዶፐ፥ ባረ ቃጻራ ማላ ድጎፖ። ቃይ ኦንነ ቃጻረተናን ደኢደ፥ ጾሳ አማኔዳዋ ግዶፐ ቃጻረቶፖ። 
\v 19 አያዉ ጎፐ፥ ጾሳ አዛዙዋ ናጋናፐ አትን፥ ቃጻረትና ቃጻረታና ይና አላሊ ባዋ።
\p
\v 20 አሳይ ሁጲያን ሁጲያን ጾሳይ ባረና ጼስያ ዎደ ደእያዋዳን ደኦ። 
\v 21 ጾሳይ ኔና ጼስያ ዎደ ኔን አይለ? አይነ ባዋ፤ ሽን ኔን አይለተፐ ከሳናዉ ዳንዳዮፐ ከሳ። 
\v 22 አያዉ ጎፐ፥ አይለ ግድ ኡቴዳ አሳ ጎዳይ ጼሶፐ፥ እ ጎዳይ አይለተፐ ከሴዳ አሳ። ሀዋዳንካ፥ አይለ ግደና አሳ ክርስቶስ ጼሶፐ፥ እ ክርስቶሳ አይለ። 
\v 23 ጾሳይ ህንተንታ ጋትያን ሻሜዳ። አሳ አይለ ግዶፕተ። 
\v 24 ታናዳን አማንያዋንቶ፥ አሳይ ሁጲያን ሁጲያን ጾሳይ አ ጼስያ ዎደ ደእያ ደኡዋዳን፥ ጾሳና ደኦ።
\s1 ገለት አከትቤናዋንቱባነ አምኤቱዋባዉ ኦሸቴዳ ኦሻ
\p
\v 25 ዎዶራቶ ጎዳይ ታና አዛዜዳባይ ባዋ። ሽን ታን ጎዳዉ አማነቴዳዋ ግዴዳ ድራዉ፥ አፐ ማሮተ አኬዳዋዳን፥ ህንተንታ ዞራይ። 
\v 26 ስም ሀእ መቶ ታዉ ሀዌ ሎአ ማላቴ፤ አሳይ ሀዋዳን ሀኒደ ደኦፐ ሎአ። 
\v 27 ኔን ማቻቶ አካ ድጌዳዋ ግዶፐ፥ እዞ የዳናዉ ኮዮፓ። ማቻቶ አካቤናዋ ግዶፐ፥ አካናዉ ኮዮፓ። 
\v 28 ሽን ኔን ማቻቶ አኮፐ፥ ናጋራ ኦበይካ። ወዶራታካ አስና ገሎፐ፥ ናጋራ ኦበይኩ። ሽን አከትያዋንቶነ ገለትያዋንቶ ኡንቱንቱ ደኡዋን ዎልቃማ መቱ ደኤ። ታን ህንተንታ ሄ መቱዋፐ አሻናዉ ኮያይ።
\p
\v 29 ሽን ታናዳን አማንያዋንቶ፥ ታን ግያዌ ሀዋ፤ ዎዲ ዉሬዳ። ሀዋፐ ስንዉ አኬዳ አሳቱ፥ አክቤና አሳዳን ሀንኖ። 
\v 30 ዬክያዋንቱ ዬከናዋዳን፥ ናሸትያዋንቱ ናሸተናዋዳን፥ ሻምያዋንቱካ ሻሚደ አይነ ባይናዋዳን፥ 
\v 31 ሀ አላምያ ደኡዋን ማደትያዋንቱ ኡባካ ማደተናዋዳን ሀንኖ። አያዉ ጎፐ፥ ሀ አላምያ ደኡ አትያዋ።
\p
\v 32 ህንተንቱ ህርገናን ደአናዋ ታን ዶሳይ። አክቤናዌ ጎዳ ናሸቻናዉ ኮይያ ድራዉ፥ አ ኦሱዋባ ቆፔ። 
\v 33 ሽን አኬዳዌ ባረ ማቻቶ ናሸቻናዉ ኮይያ ድራዉ፥ ሳኣባ ቆፔ። 
\v 34 አ ቆፋይ ሻከቴዳ። አስና ገላቤና ወዶራታ ባረ አሹዋንነ ባረ ሸምፑዋን ጌያናዉ ኮይያ ድራዉ፥ ጎዳ ኦሱዋባ ቆፓዉ። ሽን አስና ገሌዳዉና ባረ አስና ናሸቻናዉ ኮይያ ድራዉ፥ ሳኣባ ቆፓዉ።
\p
\v 35 ታን ሀዋ ህንተንታ ማዳና ማላ ጋይፐ አትን፥ ህንተንታ ባናዉ ጊከ። ሽን ህንተ በስያዋዳን ደኢደ፥ ጎዳ ኦሱዋ ህንተና እሚደ ኦና ማላ ኮያይ።
\p
\v 36 ኦንነ ባረ ጊግሴዳ ዎዶራቶ አክያ ዎዲ ጋክና፥ ባረና ናጋናዉ አዉ ዳንዳየተናን እጾፐ፥ እዞ አኮ። እ እዞ አኮፐ፥ ሄዋን ናጋራይ ባዋ። 
\v 37 ሽን እ ባረ ዎዛናን ምኖፐ፥ አከናን ጋምአና ዳንዳዬ። ቃይ ባረና ናጊደ፥ ባረ ጊግሴዳ ዎዶራቶ አከናን ጋምአና ጎፐ፥ ኦንነ ዎልቃንናን ባረ ዎዛናን ቆፋ ቃቼዳዋ ግዶፐ ሎይዳ። 
\v 38 ሄዋ ድራዉ፥ ዎዶራቶ አክያ ኡራይ ሎይዳ፤ ቃይ አከናዌ ኡባ አ ሎይዳ።
\p
\v 39 አስና ገሌዳ ምሽራታ ባረ አስናይ ደኤዳ ኬናን አናና እትፐ ደአናዳን ቃሸታ ኡታዱ። ሽን እ ሀይቆፐ፥ ጎዳ አማንያ አሳ ኦናነ ግዶፐ፥ ባረ ዶሴዳ አስና ገላናዉ ዳንዳያዉ። 
\v 40 ታ ቆፋ ግዶፐ፥ ገለናን ደአንቶ፥ እዛ ናሸቻን ደአና። ቃይ ታናን ጾሳ አያናይ ደእያዋ ታን ኤራይ።
\c 8
\s1 ኤቃዉ ያርሸቴዳ ቁማባ
\p
\v 1 ኤቃዉ ያርሼዳ ቁማባ ግዶፐ፥ ኑን ኡባይካ ኤሬቶ። ኤራይ ኦቶርሴ፤ ሽን ሲቁ አማኑዋን ድቼ። 
\v 2 ኦንነ ባረዉ እትባ ኤርያዋ ማላቶፐ፥ እ ብሮ ኤራናዉ በስያዋ ኤርቤና። 
\v 3 ሽን ኦንነ ጾሳ ሲቆፐ፥ ጾሳይ አ ኤሬ።
\p
\v 4 ሄዋ ድራዉ፥ ኤቃዉ ያርሼዳ ቁማ ሙሳባ ግዶፐ፥ ኤቃ ኡባይ አላምያን አያነ ግደናዋነ፥ እት ጾሳፐ አትን፥ ሀራይ ባይናዋ ኑን ኤሬቶ። 
\v 5 አያዉ ጎፐ፥ ጮራ ጾሳቱነ ጮራ ጎዳቱ ደኢኖ። ሽን ሀራይ አቶ፥ ሳሉዋን ግድና ሳኣን ግድና፥ ጾሳቱዋ ጌተትያዋንቱ ደኦፐካ፥ 
\v 6 ኡባባ መዳዌ ኑን አዉ ደእያዌ፥ እት ጾሳይ፥ አዉ፥ ኑዉ ደኤ። ቃይ ኡባባይ አን መቴዳዌነ ኑን አን ደእያዌ እት ጎዳይ፥ የሱስ ክርስቶስካ ኑዉ ደኤ።
\p
\v 7 ሽን ሀ ኤራይ አሳ ኡባዉ ደኤና። እት እት አሳቱ ኤቃ ዶዬዳ ድራዉ፥ ሀእ ጋካናዉካ፥ “ኤቃዉ ያርሼዳ ቁማ” ያጊደ ሚኖ። ቃይ ኡንቱንቱ ዎዛናይ ሹጋ ግዴዳዋን፥ ኡንቱንቶ ሀ ቁማን ቱኔዳዋ ማላቴ። 
\v 8 ሽን ቁማይ ኑና ጾሳኮ ሺቃናዳን ማደና። ኑን ማና ይንቶካ ኑዉ አይነ ፓጨና፤ ሞፐነ ኑዉ አይነ ጉጀተና።
\p
\v 9 ሽን ሀዌ ህንተ ህንተ ዶሶዋዳን ሀንያዌ ሹጎ አማኑዋና ደእያዋንታ ናጋራን የገና ማላ ናገትተ። 
\v 10 አያዉ ጎፐ፥ ኔን ኤራንቻይ ኤቃዉ ያርሼዳ ቁማ ማናዉ ኤቃ ጎልያን ኡቴዳ ዎደ፥ ሹጎ አማኑዋና ደእያ እት አሳይ ኔና በኦፐ፥ ኤቃዉ ያርሼዳ ቁማ እ ማናዉ አ ዎዛናይ ቆፐኔዬ? 
\v 11 ሄዋ ግዶፐ ሀ ሹጎ አማኑዋና ደእያ ነ እሻይ፥ ክርስቶስ አ ድራዉ ሀይቄዳዌ፥ ነ ኤራን ባዬ። 
\v 12 ሀዋዳንካ፥ ህንተ ህንተ እሻቱዋ ናቂያዋንነ ኡንቱንቱ ሹጎ ዎዛና ማይያዋን ክርስቶሳ ናቂታ። 
\v 13 ሄዋ ድራዉ፥ ቁማይ አማንያ ታ እሻ ቢያዋ ግዶፐ፥ አ በና ማላ፥ ታ ደእያ ላይን ሙለካ አሹዋ ሚከ።
\c 9
\s1 የሱስ ኪቴዳዋንቶ ደእያ ማታነ ኡንቱንቱ ኦናዉ በስያባ
\p
\v 1 ታን አይለተይ ባይና አሳ ግድክታ? የሱስ ኪቴዳዋ ግድክታ? ኑ ጎዳ የሱስ ክርስቶሳ በአበይክታ? ህንተንቱ ታን ጎዳዉ ኦዳ ታ ኦሱዋፐ ቤቴዳዋንታ ግድክቴዬ? 
\v 2 ታን ሀራንቶ የሱስ ኪቴዳዋ ግዳና ዮፐካ፥ ህንተንቶ የሱስ ኪቴዳዋ ግድያዌ ኤረቴዳዋ፤ አያዉ ጎፐ፥ ታን ጎዳን የሱስ ኪቴዳዋ ግድያዎ ህንተ ማርካ።
\p
\v 3 ታና ቦርያዋንቶ ታን እምያ ዛሩ ሀዋ። 
\v 4 ማናዉነ ኡሻናዉ ኑዉ ማት ባዌ? 
\v 5 የሱስ ኪቴዳ ሀራቱዋዳንነ ጎዳ እሻቱዋዳን፥ ጰጽሮሳዋዳን፥ ኤኖ ግያ ማቻቶ እትፐ አኪደ ባናዉ ኑዉ ማታይ ባዌ? 
\v 6 ዎይ ኑ ደኦ ኦደ ባጸታናዉ በስያዌ ታናነ ባርናባሳ ጻላሌ? 
\v 7 አይ ዎደነ ባረ ሚሻ ሚደ፥ ዎታዳራተ ኦያዌ ኦኔ? ዎይ ዎይንያ ቱራ ቶኪደ፥ አ አይፍያ ሜናዌ ኦኔ? ዎይ ሚዛ ዉድያ ሄሚደ፥ ሄ ሚዛ ዉድያፐ ማ ኡሸናዌ ኦኔ?
\p
\v 8 ታን ሀዋ አሳ ቆፋ ጻላላን ጋይታ? ዎይ ህጊ ቃይ ሀዋ ጌኔ? 
\v 9 አያዉ ጎፐ፥ ሙሴ ህግያን፥ “ካ የያ መህያ ዶና ቃቾፓ” ጌተቲደ ጻፈቴዳ። ጾሳይ መህያባ ቆፒደ ሀዋ ጊ?\x - \xo 9:9 \xo*\xt ዛረ. 25:4፤ 1 ጽሞ. 5:18\xt*\x* 
\v 10 ዎይ እ ሄዋ ግያዌ ሙለካ ኑ ድራሳ ግደኔ? ቱማካ ኑ ድራዉ ጻፈቴዳ፤ ጎሽያ ብታኒካ ካ ቡክያ ብታኒካ፥ “ታና ጋክያዋ አካና” ያጊደ ኦናዉ በሴ። 
\v 11 ኑን ህንተ ግዶን አያና የዉዋ ዘሬዳዋንታ ግዲደ፥ ኑ አሾ ማዶ ግድያዋ ህንተንቱፐ ጫኮፐ ዳሮቤ? 
\v 12 ሀራቱ ሄዋ ህንተንቱፐ አካናዉ ኡንቱንቶ ማታይ ደኦፐ፥ ኑዉ ኡንቱንቱዋፐ አያ ማታይ ባዌ?
\p ሽን ኑን ክርስቶሳ ምሽራቹዋ ቃላዉ ቦ ግደናዳን፥ ኡባባ ገንጭያዋፐ አትን፥ ሄ ማታን ጎኤትበይኮ። 
\v 13 ጌሻ ጎልያን ኦያ አሳቱ ባረንቱ ቁማ ጌሻ ጎልያፐ አክያዋ ኤርክቴ? ቃይ ያርሽያሳን ኦያዋንቱ ያርሹዋፐ አክያዋ ኤርክቴ?\x - \xo 9:13 \xo*\xt ዛረ. 18:1\xt*\x* 
\v 14 ሀዋዳንካ፥ ቃይ ምሽራቹዋ ቃላ ኦድያዋንቱ ባረንቱ ደኦ ኮሽያባ አፐ ደማናዳን፥ ጎዳይ አዛዜዳ።
\p
\v 15 ሽን ታን ሀ ማታ ኡባን አይነ ጎኤታበይከ። ታን ሀዋ ጻፌዳዌ ሄዋ ማላ ማታይ ታዉ ደአናዉ በሴ ያግያዋና ግደና። አያዉ ጎፐ፥ ታ ጬቁዋ ኦንነ መላ ከስያዋፐ ሀይቂያዌ ታዉ ሎአ። 
\v 16 ምሽራቹዋ ቃላ ኦዳናዉ ታን አዛዘታ ኡቴዳ ድራዉ፥ አ ኦዶፐካ ታዉ ጬቀትያባይ ባዋ። ምሽራቹዋ ቃላ ኦደናን አጎፐ፥ ታዉ አየሮ። 
\v 17 አያዉ ጎፐ፥ ታን ሀዋ ዶሳደ ኦፐ፥ ታዉ ዎይታይ ደኤ። ሽን ታን ዶሰናን እጾፐካ፥ ምሽራቹዋ ቃላ ድራዉ ሀዳራ ጾሳይ ታዉ እሜዳ። 
\v 18 ያትና፥ ታ ዎይታይ አዬ? ምሽራቹዋ ቃላ ኦዳደ፥ ታዉ ዎንጋላን ደእያ ኩመን ማታን ጎኤተናን፥ ምሽራቹዋ ቃላ ጮ ኦድያዋ።
\p
\v 19 ታን ኦስነ አይለ ግድከ ሽን፥ ጮራቱዋ ዛራናዉ ታና ኡባዉ አይለ ከሳድ። 
\v 20 ታን አይሁዳቱዋ ዛራናዉ ኡንቱንቱና ኡንቱንታ ግዳደ ደኣድ። ታ ሁጰዉ ህግያፐ ጋርሳና ደእከ። ሽን ህግያፐ ጋርሳና ደእያዋንታ ዛራናዉ ህግያፐ ጋርሳና ደእያ አሳ ማላ ግዳድ። 
\v 21 ታን ህጊ ባይና አሳቱዋና ደኣደ፥ ህጊ ባይና አሳዳን ሀናድ። ጾሳ ህጊ ይና ግደና። ሽን ህጊ ባይናዋንታ ዛራናዉ፥ ክርስቶሳ ህግያፐ ጋርሳና ደኣድ። 
\v 22 ታን አማኑዋን ዳቡርያዋንታ ዛራናዉ፥ ኡንቱንቱ ማላ ግዳድ። ታን አይ ኦግያንነ አማሬዳ አሳቱዋ አሻናዉ፥ ኡባ አሳቱዋና ኡባባን ኡንቱንቱ ማላ ግዳድ። 
\v 23 ታን ምሽራቹዋ ቃላ አንጁዋ ሻካናዉ፥ ምሽራቹዋ ቃላ ድራዉ፥ ኡባባ ኦይ።
\p
\v 24 ዎን ጾናና ጊደ ዎጽያ ኡባይ እትፐ ዎጼ። ሽን እቱዋ ጻላላይ ዎይታ አክያዋ ኤርክቴ? ሀዋዳን ህንተንቱካ ዎይታ አካናዉ ዎጽተ። 
\v 25 ካሳዉ ባረና ጊግስያ ኦንነ ኡባባን ባረና ናጌ። አሳይ ሄዋ ዳቡርያዌ ጾኔዳዎ እመትያ ባይያ ካላቻ ደማናሳ። ሽን ኑን ዳቡርያዌ መናዉ ደእያዋነ ባየና ካላቻ ደማናሳ። 
\v 26 ሄዋ ድራዉ፥ ታን ቆፍ ባይናን ዎጽያዋዳን ዎጽከ። ጫርኩዋ ይምፕያ አሳዳንካ ጮ ኦለትከ። 
\v 27 ሽን ታን ሀራንቶ ኦዴዳዋፐ ጉይያን፥ ታ ሁጰዉ ዎይታፐ አተና ማላ፥ ታ አሳተ ናገታናዳን ኦይ።
\c 10
\s1 ኤቃዉ ጎይናናዉ በሰና
\p
\v 1 ሄዋ ቦላን ታናዳን አማንያዋንቶ፥ ታን ህንተ ሀዋ ኤራና ማላ ኮያይ። ኑ አዎቱ ኡባይ ሻርያፐ ጋርሳና ደኤድኖ፤ ኡባይካ አባ ግዶና ፕኔድኖ።\x - \xo 10:1 \xo*\xt ከሳ 13:21-22፤ 14:22-29\xt*\x* 
\v 2 ኡንቱንቱ ኡባይ ሙሴና እትፐ ግዳናዉ፥ ሻርያንነ አባን ጻማቀቴድኖ። 
\v 3 ኡንቱንቱ ኡባይ ሄ እት አያና ቁማ ሜድኖ።\x - \xo 10:3 \xo*\xt ከሳ 16:35\xt*\x* 
\v 4 ቃይ ኡባይካ ሄ እት አያና ኡሻ ኡሼድኖ። አያዉ ጎፐ፥ ኡንቱንቱ ባረንታ ካለያ አያና ዛላፐ ፑልቶዋ ኡሼድኖ፤ ሄ ዛላይካ ክርስቶሳ።\x - \xo 10:4 \xo*\xt ከሳ 17:6፤ ፓይ. 20:11\xt*\x* 
\v 5 ሽን ጾሳይ ኡንቱንቱፐ ዳርያ ባጋቱዋን ናሸትቤና ድራዉ፥ ኡንቱንቱ አሃይ አሳይ ባይና ሳን ላለቴዳ።\x - \xo 10:5 \xo*\xt ፓይ. 14:29-30\xt*\x*
\p
\v 6 ኡንቱንቱ ኢታባ አሞቴዳዋዳን፥ ኑ ዎዛናይ ቃይ ኢታባ አሙዋፐ ናገታናዳን፥ ሄዌ ኡባይ ኑዉ ትምርተ ግዴዳ።\x - \xo 10:6 \xo*\xt ፓይ. 11:4\xt*\x* 
\v 7 ጾሳ ማጻፋይ፥ “አሳይ ማናዉነ ኡሻናዉ ኡቴድኖ፤ ቃይ ዱሮ ደንድ ኤቄድኖ” ያግያዋዳን፥ ኡንቱንቱፐ እቱ እቱ ኤቃዉ ጎይኔዳዋዳን፥ ህንተ ጎይኖፕተ።\x - \xo 10:7 \xo*\xt ከሳ 32:6\xt*\x* 
\v 8 ኡንቱንቱፐ እቱ እቱ ዎሹሜዳዋዳን፥ ኑን ዎሹማናዉ በሰና። ሄዋ ጋሱዋን ኡንቱንቱፐ እት ጋላስ ላታማነ ሄዙ ሻአይ ሀይቄዳ።\x - \xo 10:8 \xo*\xt ፓይ. 25:1-18\xt*\x* 
\v 9 ኡንቱንቱፐ እቱ እቱ ጎዳ ፓጪደ፥ ሾሻን ዱከት ሀይቄዳዋዳን፥ ኑን ጎዳ ፓጫናዉ በሰና። 
\v 10 ኡንቱንቱፐ እቱ እቱ ዙዙምና፥ ዎያ ኪታንቻን ኡንቱንታ ይሴዳዋዳን ዙዙሞፕተ።\x - \xo 10:10 \xo*\xt ፓይ. 16:41-49\xt*\x*
\p
\v 11 ሀዌ ኡባይ ሀራቶ ትምርተ ግዳናዳን ኡንቱንቱ ቦላ ጋኬዳ። ቃይ ኑና ዎድያ ዉርሰይ ጋካና ማቴዳዋንታ ሴራናዉ ጻፈቴዳ።
\p
\v 12 ሄዋ ድራዉ፥ ምና ኤቃድ ጊደ ቆፕያ ኡራይ ኦንነ ኩንደናዳን፥ ባረና ናጎ። 
\v 13 ህንተንታ ጋክያ ፓጪ፥ አሳ ኡባ ጋክያ ፓጭያ ማላፐ አትን፥ አይነ ዱማተና። ህንተንቱ ዎልቃይ ዳንዳይያዋፐ አያ ፓጭያን ህንተ ፓጨታናዉ ኮየና ጾሳይ አማነቴዳዋ። ሽን ህንተንታ ፓጪ ጋክያ ዎደ፥ ሄ ፓጭያ እ ህንተንታ ዳንዳይሳና። ቃይ ሄ ፓጭያፐ ህንተንቱ ከስያ ኦግያካ እ እማና።
\p
\v 14 ሄዋ ድራዉ፥ ታ ዶስያዋንቶ፥ ኤቃዉ ጎይኖፕተ። 
\v 15 ህንተንቱ ዎዛናማ አሳ ግዴዳ ድራዉ፥ ታን ህንተንቶ ኦዳይ። ታን ግያዋ ህንተ ፕርድተ። 
\v 16 ኑን ጾሳ ጋላቲደ ሻክያ አንጁዋ ጹአይ ክርስቶሳ ሱና እትፐተይ ደእያዋ ግደኔ? ቃይ ኑን መንያ ኡክይ ክርስቶሳ አሹዋና እትፐተይ ደእያዋ ግደኔ? 
\v 17 እት ኡክይ ደእያ ድራዉ፥ ኑን ጮራ ግዶፐካ፥ እት አሳተ። አያዉ ጎፐ፥ ኑን ኡባይካ ሄ እት ኡክ ሻከቴቶ።
\p
\v 18 እስራኤልያ አሳ ጼልተ። ያርሹዋ ምያዋንቱ ያርሽያሳና እትፐተይ ደእያዋንታ ግድክኖ?\x - \xo 10:18 \xo*\xt ዎጋ 7:6\xt*\x* 
\v 19 ስም ታን ዋጋይታ? ኤቃዉ ያርሸቴዳ ቁማይ ማዲ ዎይ ኤቃይ ማዲ? 
\v 20 ማደና፤ ሽን ታን ግያዌ ጾሳ አማነና አሳቱ ኢታ አያናቶ ያርሽያዋፐ አትን፥ ጾሳዉ ያርሽክኖ። ኢታ አያናቱዋና ህንተ እትፐ ዙፐታና ማላ፥ ታን ኮይከ።\x - \xo 10:20 \xo*\xt ዛረ. 32:17\xt*\x* 
\v 21 ጎዳ ጹኣፐ ኡሺደ ቃይ ኢታ አያናቱዋ ጹኣፐ ኡሻናዉ ህንተ ዳንዳይክታ። ጎዳ ጋይታፐ ህንተ ግሸቲደ ቃይ ኢታ አያናቱዋ ጋይታፐ ማናዉ ዳንዳይክታ። 
\v 22 ሄዋ ኦደ ኑን ጎዳና ጺኖታናዉ ኮሺ? ኑን አፐ ምኔቶ?\x - \xo 10:22 \xo*\xt ዛረ. 32:21\xt*\x*
\p
\v 23 ህንተፐ እቱ እቱ፥ “ኡባባ ኦናዉ ታና ድግያባይ ባዋ”፤ ሽን ኡባባይ ማደና። “ኡባባ ኦናዉ ድግያባይ ባዋ፤ ሽን ኡባባይ ጌሸና” ያጊኖ። 
\v 24 ኦንነ ሀራ አሳ ማድያባ ቆፖፐ አትን፥ ሀራይ አቶ እቱነ ባረና ማድያባ ቆፖፖ።
\p
\v 25 ገያን አጻረ ታራን ዛልኤትያ አሹዋ ህንተ ዎዛና ቆፋን፥ አይነ ስናን ሚተ። 
\v 26 አያዉ ጎፐ፥ አላሚነ አን ደእያባይ ኡባይ ጎዳባ።\x - \xo 10:26 \xo*\xt ማዝ. 24:1\xt*\x*
\p
\v 27 እት አማነና አሳይ ህንተንታ እማ ኦ ሾባናዉ ጼስና ባናዉ ኮዮፐ፥ ህንተ ዎዛና ቆፋን፥ አይነ ስናን ህንተ ስን እ አያባ ኡባ ሚተ። 
\v 28 ሽን እት ኡራይ ህንተንቶ፥ “ሀዌ ኤቃዉ ያርሼዳዋ” ጎፐ፥ ሄ ህንተንቶ ኦዴዳ ብታንያ ድራዉነ ቃይ ህንተ ዎዛና ቆፋ ድራዉ፥ ሄ ቁማ ሞፕተ። 
\v 29 ታን ግያዌ ነ ዎዛና ቆፋ ድራሳ ግደና፤ ሽን የኮ ብታንያ ዎዛና ቆፋ ድራሳ።
\p ታን ታ ሀናናዉ ዳንዳይያ ታ ሀኖታ ሀራ አሳ ዎዛናይ አያዉ ፕርዲ? 
\v 30 ታን ጾሳ ጋላታደ ቁማ ሞፐ፥ ጾሳ ጋላታደ ሜዳ ቁማዉ አያዉ ቦረታይታ?
\p
\v 31 ስም ህንተ አያነ ሞፐ፥ ዎይ አያነ ኡሾፐ፥ ዎይ ህንተ አያነ ኦፐ፥ ኡባባ ጾሳ ቦንቾ ኦተ። 
\v 32 ህንተንቱ አይሁዳ አሳቶ ዎይ ግሪከ አሳቶ ዎይ ጾሳ አማንያዋንቶ ቦ ግዶፕተ። 
\v 33 ታን ቃይ ጮራቱ አታና ማላ፥ ኡንቱንቱ ኡባ ማዳናዳንፐ አትን፥ ታ ሁጰዉ ማዱዋ ኮየናን፥ አሳ ኡባ ኡባባን ናሸችያዋዳን፥ ህንተንቱካ ሄዋዳ ኦተ።
\c 11
\p
\v 1 ታን ክርስቶሳ ሌምሱዋ ካልያዋዳን፥ ህንተንቱካ ታዋ ካልተ።
\s1 አሳይ እትፐ ዎስያ ዎደ ደአናዉ በስያ ዎጋ
\p
\v 2 ታናዳን አማንያዋንቶ፥ ህንተ ኡባባን ታና ሀሳይያ ድራዉነ፥ ዎጋ ታን ህንተንቶ እሜዳዋዳን፥ ህንተ ምንሲደ ናግያ ድራዉ፥ ህንተንታ ጋላታይ። 
\v 3 ሽን ክርስቶስ አቱማዋ ኡባዉ ሁጰ ግድያዋ፥ አቱማ አሳይ ማጫ አሳዉ ሁጰ ግድያዋነ ቃይ ጾሳይ ክርስቶሳዉ ሁጰ ግድያዋ ህንተ ኤራና ማላ ኮያይ። 
\v 4 ጾሳ ዎሲደ፥ ዎይ ትምቢትያ ኦዲደ፥ ባረ ሁጲያ ጎዝያ አቱማ አሳይ ኡባይ ክርስቶሳ ቶቼ። 
\v 5 ቃይ ጾሳ ዎሳደ ዎይ ትምቢትያ ኦዳደ፥ ባረ ሁጲያ ጎዘና ማጫዉና ባረ አስና ቶቻዉ፤ አያዉ ጎፐ፥ እዛ ባረ ሁጲያ ሜደታ ድጎንና እት ማላ።
\p
\v 6 ማጫዉና ባረ ሁጲያ ጎዛና ዮፐ፥ ቃንጽሱ። ሽን እዛ ባረ ሁጲያ ቃንጽሳናዌ ዎይ ሜድሳናዌ ፖኮፐ፥ ባረ ሁጲያ ጎዙ። 
\v 7 አቱማዌ ጾሳ ሌምሱዋነ ቦንቹዋ ግድያ ድራዉ፥ ባረ ሁጲያ ጎዛናዉ በሰና፤ ሽን ማጫዉና አቱማዎ ቦንቾ።\x - \xo 11:7 \xo*\xt ዶመ 1:26-27\xt*\x* 
\v 8 አያዉ ጎፐ፥ ማጫዉና አቱማዋፐ ቤታዱፐ አትን፥ አቱማዌ ማጫዉንፐ ቤትቤና።\x - \xo 11:8 \xo*\xt ዶመ 2:18-23\xt*\x* 
\v 9 አያዉ ጎፐ፥ ማጫዉና አቱማዋ ድራዉ መታዱፐ አትን፥ አቱማዌ ማጫዉን ድራዉ መትቤና። 
\v 10 ሄዋ ድራዉ፥ ማጫዉና ባረ አስና አይሱዋፐ ጋርሳና ደእያዋ ኤርሳናዉነ ኪታንቻቱዋ ድራዉ፥ እዝ ሁጲያን ጎዝያባይ ደአናዉ በሴ።
\p
\v 11 ሽን ጎዳን ማጫዉና አቱማዌ ባይናን ደኡኩ፤ አቱማዌካ ማጫዉና ባይናን ደኤና። 
\v 12 አያዉ ጎፐ፥ ማጫዉና አቱማዋፐ መቴዳዋዳን፥ ቃይ አቱማዌካ ማጫዉንፐ የለቴዳ። ቃይ ኡባባይካ ጾሳፐ ዬ።
\p
\v 13 ህንተንቱ ህንተ ሁጰዉ ፕርድተ። ማጫዉና ባረ ሁጲያ ጎዘናን ጾሳ ዎሳናዉ በሲ? 
\v 14-15 አቱማዌ ባረ ሁጲያ ድቾፐ፥ አዉ ፖኮ። ሽን ማጫዉና ባረ ሁጲያ ድቾፐ፥ እዝዉ ቦንቾ ግድያዋ ሀራይ አቶ፥ መተንቶነ ህንተንታ ታማርሰኔ? አያዉ ጎፐ፥ ማጫዉን ሁጲ እዞ ካማናዉ እዝዉ እመቴዳ። 
\v 16 ሽን ኦንነ ሀ የዉዋን ፓሉመታናዉ ኮዮፐ፥ ኑዉ ግድና ዎይ ጾሳ አማንያዋንቶ ግድናካ፥ ሀዋፐ ሀራ ዎጋይ ባዋ።
\s1 ጎዳ ካዉዋ አክያ ዎጋ
\r (ማቶሳ 26:26-29፤ ማር. 14:22-25፤ ሉቃሳ 22:14-20)
\p
\v 17 ህንተ ሺቅያዌ ኢታባሳፐ አትን፥ ሎኦባሳ ግደና ድራዉ፥ ታን ሀ አዛዙዋ እማደ ህንተንታ ጋላትከ። 
\v 18 ሽን ህንተ ዎሳ ጎለን ሺቅያ ዎደ፥ ህንተ ግዶን ጳልቀይ ደእያዋ ታን ስሳይ። ቃይ ሄዌ እት ባጋና ቱማ ግድያዋ አማናይ። 
\v 19 አያዉ ጎፐ፥ ህንተ ማታን አማነቴዳዋንቱ ቆንጭ ኤረታና ማላ፥ ህንተ ግዶንካ ቃይ ሻኩ ደአናዉ በሴ። 
\v 20 ሄዋ ድራዉ፥ ህንተ እትፐ ሺቅያ ዎደ፥ ህንተ ሺቁ ጎዳ ካዉዋ ማናሳ ግደና። 
\v 21 አያዉ ጎፐ፥ ህንተ ቁማ ምያ ዎደ፥ ኡባይ ሁጲያን ሁጲያን ባረዋ ባረዋ ምያ ድራዉ፥ እቱ ኮሻቴ፤ እቱ ቃይ ማቴ። 
\v 22 ማናዉነ ኡሻናዉ ህንተንቶ ጎሊ ባዌ? ዎይ ጾሳ ዎሳ ጎልያ ካቴ? ቃይ አይነ ባይናዋንታ ዬላዪቴ? ታን ህንተንታ ዋጎ? ሀ የዉዋን ታን ህንተንታ ጋላቶ? ጋላትከ።
\p
\v 23 አያዉ ጎፐ፥ ታን ቃይ ህንተንቶ እሜዳ ትምርትያ ጎዳፐ አካድ። ጎዳ የሱስ ኡንቱንቱ አ አደ እሜዳ ቃማ ዳቡዋ አኪደ፥\x - \xo 11:23-24 \xo*\xt ማቶሳ 26:26-28፤ ማር. 14:22-24፤ ሉቃሳ 22:19፣ 20\xt*\x* 
\v 24 ጾሳ ጋላቴዳ፤ ዳቡዋ መንደ፥ “ሄይተ፤ ሚተ። ሀዌ ህንተ ግሻታዉ ባረና እሜዳ ታ አሹዋ። ሀዋን ታና ቆፕተ” ያጌዳ። 
\v 25 ሀዋዳንካ፥ ካዉዋ ሚደ ስምና፥ ጹኣ ቃይ አኪደ፥ “ሀዌ ጹአይ ታ ሱን ታን ጫቄዳ ኦራ ጫቁዋ። ህንተንቱ አፐ ኡሼዳ ዎደ ኡባን ሄዋን ታና ቆፕተ” ያጌዳ።\x - \xo 11:25 \xo*\xt ከሳ 24:6-8፤ ኤር. 31:31-34\xt*\x* 
\v 26 አያዉ ጎፐ፥ ህንተ ሀ ዳቡዋ ሜዳ ዎደ ኡባንነ ሀ ጹኣፐ ኡሼዳ ዎደ ኡባን ጎዳይ ያና ጋካናዉካ፥ አ ሀይቁዋ ኦዲታ።
\p
\v 27 ሄዋ ድራዉ፥ በሰናን ደኢደ ጎዳ ዳቡዋ ምያዌ፥ ዎይ ጎዳ ጹኣፐ ኡሽያዌ ኦንነ አ አሹዋነ አ ሱ አጮቴ። 
\v 28 ሽን አሳይ ባረ ሁጲያ ፓጮ። ያቲደ ዳቡዋ ሞ። ጹኣፐካ ኡሾ። 
\v 29 አያዉ ጎፐ፥ ጎዳ አሹዋ ሻኪደ ኤረናን ዳቡዋ ምያዌነ ጹኣፐካ ኡሽያዌ ባረ ሁጰዋ ፕርዳ ሜኔ ኡሼ። 
\v 30 ሄዋ ድራዉ፥ ህንተ ግዶን ጮራቱ ዳቡራንቻነ ሀርጋንቻ ግዴድኖ፤ ቃይ ኡንደኔዳዋንቱ ሀይቄድኖ። 
\v 31 ሽን ኑን ኑ ሁጲያ ቱሙ ፓጬደንቶ፥ ጾሳይ ኑና ፕርደና። 
\v 32 ኑን ፕርደትያ ዎደ፥ ሀ አላምያና እትፐ ፕርደተና ማላ፥ ጎዳይ ኑና ሴሬ።
\p
\v 33 ሄዋ ድራዉ፥ ታናዳን አማንያዋንቶ፥ ጎዳ ካዉዋ ማናዉ ህንተ ሺቅያ ዎደ፥ እቱ እቱዋ ናግተ። 
\v 34 ኦንነ ኮሻቴዳዋ ግዶፐ፥ እትፐ ሺቅያ ዎደ ጾሳ ፕርዳን ህንተ ገለና ማላ፥ ባረ ሶይን ሞ።
\p አቴዳዋ ታን ያ ባደ ጊግሳና።
\c 12
\s1 ጌሻ አያና እሞታቱዋ
\p
\v 1 ታናዳን አማንያዋንቶ፥ ጌሻ አያና እሞታባ ህንተ ኤራናዉ ኮያይ። 
\v 2 ህንተንቱ ጾሳ አማነና ዎደ፥ ኡባ ዎደ ካልያዋዳንካ፥ ሃሳየና ኤቃቱዋኮ ህንተ ቤዳዋ ኤሪታ። 
\v 3 ሄዋ ድራዉ፥ ጾሳ አያናይ ካለያ አሳይ ኦንነ፥ “የሱስ ሸቀቶ” ያጊደ ሃሳየናዋነ ቃይ ጌሻ አያናይ ካለፐፐ አትን፥ ሀራይ አቶ እት አሳይነ፥ “የሱስ ጎዳ” ጋናዉ ዳንዳየናዋ ታን ህንተንታ ኤርሳይ።
\p
\v 4 አያና እሞታይ ዱማ ዱማ፤ ሽን እምያ አያናይ እቱዋ።\x - \xo 12:4-11 \xo*\xt ሮመ 12:6-8\xt*\x* 
\v 5 ቃይ ኦያ ኦሱ ዱማ ዱማ፤ ሽን ጎዳይ እቱዋ። 
\v 6 ኦሱዋ ኦናዉ ዱማ ዱማ ኦጊ ደእሽን፥ ሄ ኦያ ኦግያ ኡባ አሳ ኡባዉ ቆንጭስያ ጾሳይ እቱዋ። 
\v 7 ሽን አሳ ኡባ ማዳናዉ፥ ጌሻ አያና ቆንጭስያ ዎልቃይ ኡባዉ ሁጲያን ሁጲያን እመቴዳ።
\p
\v 8 አያዉ ጎፐ፥ ጌሻ አያናይ እቶ አ ኤራተ ሃሳያ እሜዳ፤ ቃይ እቶ ኤራተ ሃሳያ እሜዳ። 
\v 9 ሄ ጌሻ አያናይ እቶ አማኑዋ እሚደ፥ የኮ ሀርጋንቻ ፓያ ዎልቃ እሜዳ። 
\v 10 ጌሻ አያናይ እቶ ማላታ ኦያ ዎልቃ እሚደ፥ እቶ ትምቢትያ ኦድያ ዎልቃ እሜዳ። እቶ አያናቱዋ ግዱዋን ደእያ ዱማተ ኤርያ ዎልቃ እሚደ፥ እቶ ዱማ ዱማ ቃላን ሃሳይያ ዎልቃ እሜዳ። ቃይ እቶ ዱማ ዱማ ቃላን ሃሳዬዳዋ ብልያ ዎልቃ እሜዳ 
\v 11 ሽን ሀ ኡባባ ኦያዌ ሄ እት ጌሻ አያና። አሳ ኡባዉ እ ባረ ኮይያዋዳን፥ ዱማ ዱማ እሞታ ሻክ ሻኪደ እሜዳ።
\s1 እት ቦላን ደእያ ዱማ ዱማ አሳተቱዋ
\p
\v 12 ክርስቶስ ጮራ አሳተቱ ደእያ እት ቦላ ማላ። ቦላይ ጮራ አሳተቱዋፐ መቴዳዋ ግዶፐካ፥ እት ቦላ።\x - \xo 12:12 \xo*\xt ሮመ 12:4-5\xt*\x* 
\v 13 አያዉ ጎፐ፥ ኑን አይሁዳ አሳ ግዶፐነ ዎይ ግሪከ አሳ ግዶፐ፥ ዎይ አይለ ግዶፐነ ዎይ ዎማኖ ግዶፐ፥ ኡባይ እት ጌሻ አያናን እት ቦላ ግዳናዉ ጻማቀቴዶ። ቃይ ኑን ኡባይ እት ጌሻ አያና ኡሼዶ።
\p
\v 14 አያዉ ጎፐ፥ ቦላዉ አሳተይ ጮራ ግድያዋፐ አትን፥ እቱዋ ግደና። 
\v 15 ገዲ፥ “ታን ኩሽያ ግደና ድራዉ፥ ቦላ ቆሞ ግድከ” ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 
\v 16 ሀይይካ፥ “ታን አይፍያ ግደና ድራዉ፥ ቦላ ቆሞ ግድከ” ጎፐ፥ እ ሄዋ ግያዌ ቦላ ቆሞ ግድያዋ ድጋኔ? 
\v 17 ቦላይ ኡባይ አይፍያ ጻላላ ግድንቶ፥ ዎቲደ ስሳናዉ ዳንዳዪ? ቃይ ቦላይ ኡባይ ሀይ ጻላላ ግድንቶ፥ ዎቲደ ስንጋናዉ ዳንዳዪ?
\p
\v 18 ሽን ጾሳይ ባረ ኮዬዳዋዳን፥ ቦላ አሳተቱዋ እቱዋ እቱዋ ቦላን ዎዳ። 
\v 19 ኡባይ እት ቆሞ ግድንቶ፥ ቦላይ ሀቃን ደአኔ? 
\v 20 ሽን አሳተቱ ጮራ ግዶፐካ፥ ቦላይ እቱዋ።
\p
\v 21 አይፊ ኩሽያ፥ “ኔን ታና ኮሻካ” ጋናዉ ዳንዳየና። ዎይ ቃይ ሁጲ ገዳቱዋ፥ “ህንተንቱ ታና ኮሽክታ” ጋናዉ ዳንዳየና። 
\v 22 ሽን ላፋ ማላትያ ቦላ አሳተቱ ሎይ ኮሽያዋንታ። 
\v 23 ቦላ አሳተቱዋፐ ቦንቼተናዋንታ ኑዉ ማላትያዋንታ ኑን ሎይ ቦንቼቶ። ቃይ ኑና ዬላይያ ቦላ አሳተቱዋካ ሎይ ቦንቼቶ። 
\v 24 ኑ ቦላፐ ቤትያ ባጋዉ ማዩ ኮሸና፤ ሽን ፖክያ ባጋ አሳተቱዋ ሎይ ማይዛናዳን፥ ጾሳይ አሳተ እትፐ ጋዳ። 
\v 25 ቦላ አሳተቱ እቱ እቶ እት ማላ ቆፋ ቆፓናፐ አትን፥ ቦላን ዱማተይ ደአናዉ በሰና። 
\v 26 ቦላ አሳተቱዋፐ እቱ ሴለቶፐ፥ ቦላ አሳተቱ ኡባይካ አናና ሴለቲኖ፤ ቦላ አሳተቱዋፐ እቱ ቦንቼቶፐ፥ ቦላ አሳተቱ ኡባይ አናና ናሸቲኖ።
\p
\v 27 ህንተንቱ ኡባይ ክርስቶሳ ቦላ፤ ቃይ ሁጲያን ሁጲያን ህንተ ኡባይካ አ ቦላ አሳተቱዋ። 
\v 28 ጾሳይ ዎሳ ጎለን እት እት አሳቱዋ፥ ኮይሩዋን የሱስ ኪቴዳዋንታ፥ ላኤንዋን ናባቱዋ፥ ሄዘንዋን ታማርስያዋንታ፥ ሄዋፐ ጉይያን፥ ማላታ ኦያዋንታ፥ ሄዋፐ ጉይያን፥ ፓያ ዎልቃይ ደእያዋንታ፥ ማድያዋንታ፥ ዎሳ ጎልያ አይስያዋንታ ዱማ ዱማ ቃላን ሃሳይያዋንታ ኦዳ።\x - \xo 12:28 \xo*\xt ኤፈ. 4:11\xt*\x* 
\v 29 ኡባቱ የሱስ ኪቴዳዋንቴ? ኡባቱ ናባቴ? ኡባቱ ታማርስያዋንቴ? ኡባቱ ማላታ ኦኖ? 
\v 30 ኡባዉ ፓያ ዎልቃይ ደኢ? ኡባቱ ዱማ ዱማ ቃላን ሃሳዪኖ? ቃይ ዱማ ዱማ ቃላን ሃሳዬዳዋ ኡባቱ ብሊኖ? 
\v 31 ሽን ኡባፐ አያ እሞታ ሎይ ኮይተ።
\p ቃይ ኡባፐ ሎይ አያ ኦግያ ታን ህንተንታ በሳና።
\c 13
\s1 ቱሙ ሲቁዋ
\p
\v 1 ታን አሳ ቃላንነ ኪታንቻ ቃላን ሃሳዮፐካ ታዉ ሲቁ ዮፐ፥ ታ ሃሳያይ ጮ ዋስያ ዳዋላ ማላ፤ ዎይ ቆልጫካትያ ጽናጽልያ ማላ። 
\v 2 ናበተ እሞታይ ታዉ ደኦፐካ፥ ታን ጌሜዳ የዉዋ ኡባነ ኤራተ ኡባ ኤርንቶካ፥ ቃይ ደርያ ደን ድግያ አማኑ ታዉ ደኦፐካ፥ ሲቁ ዮፐ፥ ታን አያነ ግድከ።\x - \xo 13:2 \xo*\xt ማቶሳ 17:20፤ 21:21፤ ማር. 11:23\xt*\x* 
\v 3 ታዉ ደእያዋ ኡባ ህዬሳቱዋ ምዛናዉ እምንቶካ ሀራይ አቶ፥ ታ ቦላ ታማን ጉዳናዉ አ እምንቶካ ሲቁ ዮፐ፥ ታና አይነ ማደና።
\p
\v 4 ሲቁ ዳንዳያንቻ። ሲቁ ኬኬ። ሲቁ ቃናተና። ጬቀተና፤ ቃይ ኦቶረተና። 
\v 5 ሲቁ ባረዉ በሰናዋ ኦና፤ ኡዜተና፤ ይሎተና፤ ሲቁ ናቀቴዳዋካ ፓይደና። 
\v 6 ሲቁ ቱማተን ናሸትያዋፐ አትን፥ ዎርዱዋን ናሸተና። 
\v 7 ሲቁ ኡባባ ዳንዳዬ። ኡባባይካ ሀናናዋ ጊደ፥ ናሸቻን ናጌ። ኡባባን ገንጬ።
\p
\v 8 ሲቁ ሙለካ የና። ሽን ናበተይካ አታና። ዱማ ዱማ ቃላን ሃሳይያዌካ አታና። ኤራተይካ ያና። 
\v 9 አያዉ ጎፐ፥ ኑን ኤራተፐ ፓጫ ኤሬቶ፤ ትምቢትያፐካ ፓጫ ኦዴቶ። 
\v 10 ሽን ኩመን ግዴዳዌ ይያ ዎደ፥ ፓጫይ ያና።
\p
\v 11 ታን ናአተን ደእያ ዎደ፥ ናኣዳን ሃሳያይ። ናኣዳን ቆፓይ። ቃይ ናኣዳንካ አኬካይ። ዎዳላ ግዴዳ ዎደ፥ ናአተ ሀኑዋ አጋድ። 
\v 12 ኑን ሀእ በእያዌ ማስቶትያን በእያ ለምእ ለምእያ ማላ ማላ፤ ሽን ሄ ዎደ ኑን ኑ አይፍያን ቆንጭያን በአና። ሀእ ታን ኤራተፐ ፓጫ ኤራይ፤ ሽን ጾሳይ ታና ዉርሲደ ኤርያዋዳን፥ ሄ ዎደ ታንካ ዉርሳ ኤራና።
\p
\v 13 ሽን ሄዋ ግዶፐ፥ አማኑ፥ ሀናናዋ ጊደ ናሸቻን ናግያዌነ ሲቁ፥ ሀዋንቱ ሄዛቱ ምኒደ ደኢኖ። ሀዋንቱፐ አያዌ ሲቁዋ።
\c 14
\s1 ጌሻ አያና እሞታነ ኡንቱንቱ ማዱዋ
\p
\v 1 ሲቁዋ ካልተ። አያና እሞታካ ሎይ ኮይተ። ሽን ኡባፐ አደ፥ ናበተ ኮይተ። 
\v 2 አያዉ ጎፐ፥ ዱማ ዱማ ቃላን ሃሳይያ ኡራይ ጾሳዉ ሃሳዬፐ አትን፥ አሳዉ ሃሳየና። አያዉ ጎፐ፥ እ ሃሳይያዋ ኦንነ አኬከና። ሽን አሳዉ ቆንጭቤና የዉዋ አያና ዎልቃን ሃሳዬ። 
\v 3 ሽን ናቢ አሳ ማዳናዉ፥ ዞራናዉነ ምንሳናዉ አሳዉ ሃሳዬ። 
\v 4 ዱማ ዱማ ቃላን ሃሳይያ ኡራይ ባረና ማዴ። ሽን ናቢ ዎሳ ጎልያ ማዴ።
\p
\v 5 ህንተንቱ ኡባይ ዱማ ዱማ ቃላን ሀሳያናዋ ታን ዶሳይ። ሽን ናበተ ሄዋፐ አደ ዶሳይ። አያዉ ጎፐ፥ ዱማ ዱማ ቃላን ሃሳይያዌ ሄ ሃሳዬዳዋ ዎሳ ጎልያ ማዳናዉ ብልያ አሳይ ዮፐ፥ ዱማ ዱማ ቃላን ሃሳይያዋፐ ናበተይ አ።
\p
\v 6 ሽን ታናዳን አማንያዋንቶ፥ ሀእ ታን ህንተንቱኮ ባደ፥ ዱማ ዱማ ቃላን ሃሳያደ፥ ሳጻን ዎይ ኤራተን ዎይ ናበተን ዎይ ታማርስያዋን ህንተንቶ ኦዳና ዮፐ፥ ታን ህንተንታ አያ ማዳይታ? 
\v 7 ሀራይ አቶ፥ ሸምፑ ባይናባይ ሱሱልያ ግድና ዎይ ዲ ግድና ካኢደ፥ ባረ ካሳ ዱማተ ኤርሳና ዮፐ፥ ሱሱልያ ፑኖፐነ፥ ዎይ ዲ ዲጾፐ፥ አሳይ ዎቲደ ኤራኔ? 
\v 8 ቃይ ጹሩምባ ዋሱ ሎይ ኤረታና ዮፐ፥ ኦላዉ ኦኔ ጊገታናዌ? 
\v 9 ሀዋዳንካ፥ ቃይ ዱማ ዱማ ቃላን ህንተ ሃሳይያዌ ቆንጨ ግደናን ዮፐ፥ ህንተ ሃሳይያዋ አሳይ ዎት አኬካኔ? አያዉ ጎፐ፥ ጫርኮ ህንተ ሃሳዪታ።
\p
\v 10 ሀ አላምያን ጮራ ቃላይ ደኤ፤ ሽን ብለይ ባይና ቃላይ እቱነ ባዋ። 
\v 11 ሽን እት አሳይ ሃሳይያ ቃላ ታን ኤራና ዮፐ፥ ሄ ሃሳይያዌ ታዉ እማ ግዴ፤ ታንካ አዉ እማ ግዳይ። 
\v 12 ሀዋዳንካ፥ ቃይ ጌሻ አያና እሞታ ህንተ አካናዉ ሎይ ኮይያዋንታ ግድያ ድራዉ፥ ዎሳ ጎልያ ድቻናዉ ማዳዋ ኡባባፐ አደ ኮይተ።
\p
\v 13 ሄዋ ድራዉ፥ ዱማ ዱማ ቃላን ሃሳይያዌ ባረ ሃሳዬዳዋ ብላናዉ ዳንዳያና ማላ፥ ጾሳ ዎሶ። 
\v 14 አያዉ ጎፐ፥ ታን ዱማ ዱማ ቃላን ጾሳ ዎሶፐ፥ ታ አያናይካ ዎሴ፤ ሽን ታ ጋርሳ ቆፋይ አይነ ጎኤተና። 
\v 15 ያትና፥ ታን ዎቶ? ታን ታ አያናን ጾሳ ዎሳና፤ ቃይ ታ ቆፋንካ ጾሳ ዎሳና። ታ አያናን የጻና፤ ቃይ ታ ቆፋንካ የጻና። 
\v 16 ሄዋ ግዳና ዮፐ፥ ኔን ነ አያና ጻላላን ጾሳ ጋላትያዋ ግዶፐ፥ ሄ ሳኣን ኔን ግያዋ ኤረና አሳይ ኔን ጾሳ ጋላትያዋ ኤረናን፥ ኔን ጋላቴዳዋን ዎቲደ፥ “አመንእ” ጋኔ? 
\v 17 ኔን ጾሳ ጋላትያዌ ሎአ፤ ሽን ሄዌ የኮ ብታንያ ማደና።
\p
\v 18 ታን ዱማ ዱማ ቃላን ህንተ ኡባፐ አደ ሃሳይያ ድራዉ፥ ጾሳ ጋላታይ። 
\v 19 ሽን ታን ዎሳ ጎለን ሀራቱዋ ታማርሳናዉ ዱማ ዱማ ቃላን ታሙ ሻአ ቃላቱዋ ሃሳይያዋፐ እቼሹ ቃላቱዋ ታ ዎዛና ቆፋን ሃሳያናዉ ዶሳይ።
\p
\v 20 ታናዳን አማንያዋንቶ፥ ህንተ ኢታ የዉዋን ጉ ናና ማላ ግዳናፐ አትን፥ ቆፋን ጉ ናና ማላ ግዶፕተ፤ ህንተ ጋርሳ ቆፋን ዎዛናማቱዋ ግድተ። 
\v 21 ጾሳ ማጻፋን፥
\q1 “ጎዳይ፥ ‘ታን ሀ አሳዉ፥
\q2 ዱማ ዱማ ቃላን ሃሳይያ አሳንነ፥
\q2 እማቱዋ ዶናን ሃሳያና።
\q2 ሽን ሄዋንካ፥
\q2 ታን ግያዋ ኡንቱንቱ ስስክኖ’ ያጌ”
\m ጌተቲደ ጻፈቴዳ።\x - \xo 14:21 \xo*\xt ኢሳ. 28:11-12\xt*\x*
\p
\v 22 ስም ዱማ ዱማ ቃላን ሃሳይያዌ አማነናዋንቶ ማላታ ግድያዋፐ አትን፥ አማንያዋንቶ ማላታ ግደና። ቃይ ናባቱዋፐ ሃሳየትያዌ አማንያዋንቶ ማላታ ግድያዋፐ አትን፥ አማነናዋንቶ ማላታ ግደና።
\p
\v 23 ሄዋ ድራዉ፥ አማንያ አሳይ ኡባይ እትፐ ሺቂደ፥ ቃይ ኡባይካ ዱማ ዱማ ቃላን ሃሳዮፐ፥ ታማርቤና አሳይ ዎይ አማነና አሳይ ገሊደ፥ ህንተንታ ኡባ፥ “ጎዪታ” ጌኔ? 
\v 24 ሽን ታማርቤና አሳይ ዎይ አማነና አሳይ ዎሳ ጎለ ገልያ ዎደ፥ አሳይ ኡባይ ትምቢትያ ኦዶፐ፥ እ ባረ ስስያዋን ባረ ናጋራ አኬኬ። ቃይ ሄ ስሴዳባ ኡባንካ እ ፕርደታና። 
\v 25 አ ዎዛናን ጌሜዳ ቆፋይካ ቆንጫና። ሀዋዳንካ ቃይ፥ “ጾሳይ ቱሙ ህንተ ግዶን ደኤ” ያጊደ ማርካቲደ፥ ጉፋኒደ ጾሳዉ ጎይናና።
\s1 አሳይ እትፐ ዎስያ ዎደ ደአናዉ በስያ ዎጋ
\p
\v 26 ስም ታናዳን አማንያዋንቶ፥ አዬ? ህንተንቱ እትፐ ሺቅያ ዎደ፥ ሁጲያን ሁጲያን፥ እቶ ማዝሙሪ ደኤ፤ እቶ ታማርስያዌ ደኤ፤ እቶ ሳጻይ ደኤ፤ ቃይ እቶ ዱማ ዱማ ቃላን ሃሳይያዌ ደኤ፤ እቶ ብልያዌ ደኤ። ኡባይካ ዎሳ ጎልያ ማድያዋ ግዳናዉ በሴ። 
\v 27 ኦንነ ዱማ ዱማ ቃላን ሃሳዮፐ፥ ላኡ ግዲደ፥ ዎይ ዳሮፐ ሄዙ ግዲደ፥ ካላን ካላን ሃሳያናዉ በሴ። ቃይ ሀራ እቱ ኡንቱንቱ ሃሳዬዳዋ ብሎ። 
\v 28 ሽን ብልያ አሳይ ዮፐ፥ ዱማ ዱማ ቃላን ሃሳይያዌ ዎሳ ጎልያን ጮኡ ጎ። ባረ ሁጰዉነ ጾሳዉ ሃሳዮ።
\p
\v 29 ናባቱካ ላኡ ግዲደ ዎይ ሄዙ ግዲደ ሃሳይኖ። ቃይ ሀራንቱ ኡንቱንቱ ግያዋ ሻክኖ። 
\v 30 ሽን ጾሳይ ሄ ሳኣን ኡቴዳ ሀራዉ እትባ ቆንጭሶፐ፥ ካሰና ሃሳይያዌ ጮኡ ጎ። 
\v 31 አያዉ ጎፐ፥ ኡባይ ታማራና ማላነ ኡባይ ምናና ማላ፥ ካላን ካላን ትምቢትያ ኦዳናዉ ዳንዳዪታ። 
\v 32 ትምቢትያ ኦድያዋንቱ እሞታይ ኡንቱንቶ አዛዘቴ። 
\v 33 አያዉ ጎፐ፥ ጾሳይ ሳሮተ ጾሳፐ አትን፥ ጫቡዋ ጾሳ ግደና።
\p ጌሻቱ ዎሳ ጎለቱዋ ኡባን፥ 
\v 34 ማጫዋንቱ ሺቁዋ ጋርሳን ጮኡ ጊኖ። አያዉ ጎፐ፥ አይሁዳቱዋ ህጊ ግያዋዳንካ ኡንቱንቱ ሞደታናፐ አትን፥ ሺቁዋ ጋርሳን ሃሳያናዉ ኡንቱንቶ ማት ባዋ። 
\v 35 ማጫዋንቱ ሺቁዋ ጋርሳን ሃሳይያዌ ፖኮ ግድያ ድራዉ፥ አየንቶ ኤራናዉ ኮዮፐነ ሶይን ባረንቱ አስና ኦችኖ።
\p
\v 36 ጾሳ ቃላይ ኮይሮ ህንተፐ ዬዴ? ዎይ ህንተ ጻላላኮ ዬዴ? 
\v 37 ኦንነ ባረና ናብያ ዎይ ጾሳ አያናይ ደእያ አሳ ያጊደ ቆፖፐ፥ ታን ህንተንቶ ጻፍያዌ ጎዳ አዛዙዋ ግድያዋ አኬኮ። 
\v 38 ሽን ኦንነ አኬካና ዮፐ፥ አኬኮፖ ባሽ አጎ።
\p
\v 39 ሄዋ ድራዉ፥ ታናዳን አማንያዋንቶ፥ ትምቢትያ ኦዳናዉ ሎይ አሞትተ። ቃይ ዱማ ዱማ ቃላን ሃሳይያዋካ ድጎፕተ። 
\v 40 ሽን ኡባባይካ ዎጋንነ ማራን ሀኖ።
\c 15
\s1 ክርስቶስ ሀይቁዋፐ ደንዴዳባ
\p
\v 1 ታናዳን አማንያዋንቶ፥ ታን ህንተንቶ ኦዴዳ ምሽራቹዋ ቃላ ህንተ አኬዳዋነ ቃይ ህንተ አማኑ አን ኤቄዳዋ ህንተንታ ቆፈይ። 
\v 2 ህንተንቱ አማኑ መላ ግዳና ዮፐ፥ ቃይ ታን ህንተንቶ ኦዴዳ ቃላ ሎይ ኦይቆፐ፥ ህንተ ሄ ምሽራቹዋ ቃላን አቴድታ።
\p
\v 3 አያዉ ጎፐ፥ ታን ቃይ አኬዳዋ ኡባባፐ አደ ኮሽያዋ ካሰታደ ህንተንቶ እማድ። ሄዌ አዬ ጎፐ፥ ጾሳ ማጻፋይ ግያዋዳን፥ ክርስቶስ ኑ ናጋራ ድራዉ\x - \xo 15:3 \xo*\xt ኢሳ. 53:5-12\xt*\x* 
\v 4 ሀይቂደ ሞገቴዳ። ጾሳ ማጻፋይ ግያዋዳንካ፥ ሄዘንያ ጋላስ ሀይቁዋፐ\x - \xo 15:4 \xo*\xt ማዝ. 16:8-10፤ ማቶሳ 12:40፤ ኪታ 2:24-32\xt*\x* 
\v 5 ደንዲደ፥ ጰጽሮሳዉ ቆንጬዳ። ሄዋፐ ጉይያን፥ ባረ ኪቴዳ ታማነ ላአቶ ቆንጬዳ።\x - \xo 15:5 \xo*\xt ማቶሳ 28:16-17፤ ማር. 16:14፤ ሉቃሳ 24:34፣ 36፤ ዮሃ. 20:19\xt*\x* 
\v 6 ሄዋፐ ጉይያን፥ እቼሹ ጼቱዋፐ ዳርያ ባረና ካልያ አሳዉ እት ካላ ቆንጬዳ። ኡንቱንቱፐ ዳርያ ባጋይ ሀኖ ጋካናስካ ፓጻ ደኢኖ፤ ሽን አማሬዳዋንቱ ሀይቄድኖ። 
\v 7 ሄዋፐ ጉይያን፥ ያቆባዉ ቆንጬዳ፤ ጉየፐ ባረ ኪቴዳ ኡባቶ ቆንጬዳ።
\p
\v 8 ቃይ ኡባፐ ዉርሰን፥ ዎዲ ጋከናን የለቴዳ ታዉካ ቆንጬዳ።\x - \xo 15:8 \xo*\xt ኪታ 9:3-6\xt*\x* 
\v 9 አያዉ ጎፐ፥ የሱስ ኪቴዳ ኡባፐ ታን ላፋ፤ ታን ጾሳ ዎሳ ጎልያ ዋይሴዳ ድራዉ፥ የሱስ ኪቴዳዋ ጌተታደ ጼሰታናዉካ በስከ። 
\v 10 ሽን ጾሳ አ ኬካተን ታን ታናካ። ቃይ ታዉ እ እሜዳ አ ኬካተይ መላ ግድቤና፤ ሽን ታን ኡንቱንታ ኡባፐ አደ ኦድ። ሽን ታናና ደእያ ጾሳ አ ኬካተይ ኦዳፐ አትን፥ ታና ግድከ። 
\v 11 ስም ታና ግዶፐካ፥ ዎይ ኡንቱንታ ግዶፐካ፥ ኑን ኡባይ ኦድያዌ ሀዋ፤ ህንተንቱካ ሀዋ አማኔድታ።
\s1 አሳይ ሀይቁዋፐ ደንዳናባ
\p
\v 12 ክርስቶስ ሀይቁዋፐ ደንዴዳዋ ኦድያዋ ግዶፐ፥ ህንተንቱፐ እት እት አሳቱ ያትና ዎቲደ፥ “ሀይቄዳ አሳይ ሀይቁዋፐ ደንደና” ያጊኖ? 
\v 13 ሀይቄዳ ኡራይ ሀይቁዋፐ ደንድቤናዋ ግዶፐ፥ ያትና ሄኮ ክርስቶስካ ሀይቁዋፐ ደንድቤና ግያዋ። 
\v 14 ክርስቶስ ሀይቁዋፐ ደንድቤናዋ ግዶፐ፥ ያትና ኑን ኦድያዌካ መላ፤ ቃይ ህንተ አማኑካ መላ። 
\v 15 ቃይ ኑን፥ “ክርስቶሳ ሀይቁዋፐ ደንዳ” ያጊደ ጾሳባ ማርካቴዳ ድራዉ፥ አ ዎርዶ ማርካቱዋ ግዲደ ቤቴዶ። ሽን ሀይቄዳዋንታ ሀይቁዋፐ እ ደንቤናዋ ግዶፐ፥ ክርስቶሳካ ደንቤና። 
\v 16 አያዉ ጎፐ፥ ሀይቄዳዋንቱ ሀይቁዋፐ ደንደናዋ ግዶፐ፥ ስም ክርስቶስካ ደንድቤና። 
\v 17 ክርስቶስ ሀይቁዋፐ ደንድቤናዋ ግዶፐ፥ ህንተ አማኑካ መላ፤ ቃይ ህንተ ሀዋ ጋካናዉካ ናጋራና ደኢታ። 
\v 18 ስም ክርስቶሳ አማኒደ ሀይቄዳዋንቱካ ቃይ ዬድኖ ግያዋ። 
\v 19 ኑን ሀ ደኡዋ ጻላላዉ ክርስቶሳን ህዶቴዳ\f + \fr 15:19 \fr*\fqa ህዶታ፦ \fqa*\ft ክርስቶሳን ኑ ዎዳ ኑ ኡባ ህዶታይ፥ ሀ አላምያን ደኡዋሳ ግዶፐ፥ ሀ አላምያን ደእያ ሀራ አሳቱዋ ኡባፐካ ኑባይ አደ ኢታ፥ ጉሳ።\ft*\f* ግዶፐ፥ ሀ አላምያን ደእያ አሳ ኡባፐካ ኑባይ ሎኤና።
\p
\v 20 ሽን ክርስቶስ ሀይቄዳዋንቱ ደንዶ ባይራ ግዲደ፥ ሀይቁዋፐ ደንዴዳዌ ቱማ። 
\v 21 አያዉ ጎፐ፥ ሀይቁ እት አሳ ባጋና ሀ አላምያ ዬዳ፥ ሀይቄዳዋንቱ ደንዱካ ቃይ እት አሳ ባጋና ዬዳ። 
\v 22 አያዉ ጎፐ፥ አሳይ ኡባይ አዳማና እትፐተ መዳ ድራዉ ሀይቄዳዋዳን፥ ክርስቶሳና እትፐተ መዳ ድራዉ፥ ኡባይ ደኦ ደንዳና። 
\v 23 ሽን ኡባይካ ባረ ካላን ካላን ደንዳና። ክርስቶስ ኡባፐ ካሰቲደ ደንዴዳ፤ ሄዋፐ ጉይያን፥ ክርስቶሳዋንቱ ክርስቶስ ይያ ዎደ ደንዳና።
\p
\v 24 ሄዋፐ ጉይያን፥ ክርስቶስ ማታ ኡባ፥ ጎዳተ ኡባነ ዎልቃ ኡባ ይሲደ፥ ጾሳዉ ባረ አቦ ካዉተ እምያ ዎደ፥ ዎድያ ዉርሰይ ያናዋ። 
\v 25 አያዉ ጎፐ፥ ጾሳይ አ ሞርከቱዋ ኡባ አ ገድያፐ ጋርሳና ዎና ጋካናዉ፥ ክርስቶስ ሞዳናዉ በሴ።\x - \xo 15:25 \xo*\xt ማዝ. 110:1\xt*\x* 
\v 26 ኡባፐ ዉርሰን ዪደ ደእያ ሞርኪ ሀይቁዋ። 
\v 27 አያዉ ጎፐ፥ ጾሳ ማጻፋይ፥ “ጾሳይ ኡባባ አ ገድያፐ ጋርሳና ዎደ ሞድሴዳ” ያጌ። ሽን ኡባባ አ ገድያፐ ጋርሳና ዎደ ሞድሴዳ ግያ ዎደ፥ ኡባባ ኦዳ ጾሳፐ አትን፥ የኮ ኡባይ ሞደቴዳ ግያዌ ቆንጨ።\x - \xo 15:27 \xo*\xt ማዝ. 8:6\xt*\x* 
\v 28 ሽን ኡባባይ ክርስቶሳዉ ሞደቴዳዋፐ ጉይያን፥ ክርስቶስ ቃይ ባረ ሁጰዉ ኡባባ ባረና ሞድሴዳ ጾሳዉ ሞደታና። ጾሳይ ቃይ ኡባባ ዉርሲደ ሞዳና።
\p
\v 29 ሄዋ ግዳና ዮፐ፥ ሀይቄዳዋንቱ ኮታ ጻማቀትያዋንቱ አያ ኦኖ? ሀይቄዳዋንቱ ኡባካ ደንደናዋ ግዶፐ፥ አሳይ ሀይቄዳዋንቱ ኮታ አያዉ ጻማቀቲ?
\p
\v 30 ያትና፥ ኑን ኡባ ዎደ አያዉ ሀሳየና መቱዋን ገሌቶ? 
\v 31 ታናዳን አማንያዋንቶ፥ ታን ኑ ጎዳ ክርስቶሳ የሱሳን ታዉ ደእያ ህንተናን ጬቀታደ፥ ጋላሳን ጋላሳን ሀይቃይ። 
\v 32 ታን ኤፈሶነን አሳ ቆፋዳን ዱኣና ባጸቴዳዌ ታና አያ ማዲ? ሽን ሀይቄዳዋንቱ ሀይቁዋፐ ደንደናዋ ግዶፐ፥
\q1 “ስም ሞይተነ ኡሾይተ፤
\q2 አያዉ ጎፐ፥ ኑን ዎንት ሀይቃና” ግያዋ ማላ።\x - \xo 15:32 \xo*\xt ኢሳ. 22:13\xt*\x*
\p
\v 33 ጭመቶፕተ፤ ኢታ ላገተይ ሎኦ ሀኖታ ባይዜ። 
\v 34 ጽሎተኮ ስምተ። ናጋራ ኦፕተ። ህንተንቱፐ እት እት አሳይ ጾሳ ኤረና፤ ታን ሀዋ ህንተንታ ዬላያናዉ ጋይ።
\s1 ሀይቁዋፐ ደንዴዳ ቦላ ሀኖታ
\p
\v 35 ሽን እት አሳይ፥ “ሀይቄዳ አሳይ ዋኒደ ደንዳኔ? ኡንቱንቱ አያ ማላ ቦላና ያኔ?” ያገናን አገና። 
\v 36 ኔኖ ኤያዉ፥ ኔን ጋድያን ዘርያ ዘረይ ሀይቀናን ሞከና። 
\v 37 ኔን ዘርያዌ ዛርጋ ግድና ዎይ ሀራ ቆሞ ካ ግድና፥ አይፍያ ጻላላፐ አትን፥ ላም ዶሊደ ከስያዋ ግደና። 
\v 38 ሽን ጾሳይ ዘረዉ ባረ ዶሴዳ ቦላ እሜ፤ ቃይ ዘረ ኡባዉካ ሁጲያን ሁጲያን ኡንቱንቱ ቦላ እሜ። 
\v 39 መታ ኡባ አሹ እቱዋ ግደና። ሽን አሳ አሹ እቱዋ፤ መህያ አሹ ዱማ፤ ካፋቱዋ አሹካ ዱማ፤ ቃይ ሞልያ አሹካ ዱማ።
\p
\v 40 ቃይ ሳሉዋ አሳተቱነ ሳኣ አሳተቱ ደኢኖ። ሽን ሳሉዋ ቦላ ቦንቹ ዱማ፤ ቃይ ሳኣ ቦላ ቦንቹ ዱማ። 
\v 41 አዋይፍያዉ አ ሁጰ ቦንቹ ደኤ። አገናዉካ አ ሁጰ ቦንቹ ደኤ። ቃይ ጾልንታቶካ ዱማ ቦንቹ ደኤ፤ አያዉ ጎፐ፥ እት ጾልንቲ የኮ ጾልንትያፐ ቦንቹዋን ዱማቴ።
\p
\v 42 ቃይ ሀይቄዳዋንቱ ሀይቁዋፐ ደንድያ ዎደ ሄዋዳን ሀናና፤ ሀይቂያ ቦላይ ሞገቲደ፥ ሀይቀና ቦላ ግዲደ ደንዳና። 
\v 43 ቦላይ ቶሽያን ሞገቲደ፥ ቦንቹዋን ደንዳና። ቃይ ዳቡራን ሞገቲደ፥ ዎልቃን ደንዳና። 
\v 44 መታ ቦላይ ሞገቲደ፥ ጌሻ አያናን ካለሰትያ ቦላ ግዲደ ደንዳና። መታ ቦላይ ደኦፐ፥ ቃይ ጌሻ አያናን ካለሰትያ ቦላይካ ደኤ።
\p
\v 45 ሀዋዳንካ፥ ቃይ ጾሳ ማጻፋን፥ “ኮይሮ ብታኒ፥ አዳም፥ ፓጻ ደእያ አሳ ግዲደ መቴዳ” ያጌ። ሽን ዉርሰ አዳም ደኡዋ እምያ አሳ ግዴዳ።\x - \xo 15:45 \xo*\xt ዶመ 2:7\xt*\x* 
\v 46 ሽን መታ አሳይ ኮይሮ ዪና፥ ጌዶፐ አያና አሳይ ዬዳፐ አትን፥ አያናዌ ኮይሮ ይቤና። 
\v 47 ኮይሮ አዳም ቢታፐ መቴዳ፤ እ ቢታፐ መቴዳዋ። ላኤንዋ አዳም ሳሉዋፐ ዬዳ። 
\v 48 ሀ ሳኣ አሳቱ ቢታፐ መቴዳዋ ማላቲኖ። ቃይ ሳሉዋ አሳቱ ሳሉዋፐ ዬዳዋ ማላቲኖ። 
\v 49 ኑን ቢታፐ መቴዳዋ ማላ ማዬዳዋዳን፥ ሳሉዋፐ ዬዳዋ ማላካ ቃይ ማያና።
\p
\v 50 ታናዳን አማንያዋንቶ፥ ታን ግያዌ ሀዋ፤ አሹነ ሱይ\f + \fr 15:50 \fr*\ft ሀ ሳኣ ቦላ ደኢደ አሳይ ማዬዳ አሹዋነ ሱ፥ ጉሳይ ሀ አላምያ አሳተ ጉሳ።\ft*\f* ጾሳ ካዉተ ላታና ዳንዳየና። ቃይ ዎቂያዌ ዎቀናዋ ላተና።
\p
\v 51-52 ስስተ! ታን ህንተንቶ እትባ ጹራይ። ኑን ኡባይ ሀይቆኮ። ሽን ዉርሰ ጹሩምባይ ፑነትያ ዎደ፥ ልጴዳ አይፊ ጼላናዉ ዎዛና አናን ላመታና። አያዉ ጎፐ፥ ጹሩምባይ ፑነትያ ዎደ፥ ሀይቄዳ አሳይ ዎቀና አሳ ግዲደ ደንዳና፤ ኑንካ ላመታና።\x - \xo 15:51-52 \xo*\xt 1 ተስ. 4:15-17\xt*\x* 
\v 53 አያዉ ጎፐ፥ ሀዌ ዎቂያዌ ዎቀናዋ ማያናዉ በሴ፤ ቃይ ሀዌ ሀይቂያዌ ሀይቀናዋ ማያናዉ በሴ።
\p
\v 54 ሽን ሀዌ ዎቂያዌ ዎቀናዋ ማይያ ዎደ፥ ቃይ ሀዌ ሀይቂያዌ ሀይቀናዋ ማይያ ዎደ፥ ሄ ዎደ፥ ጾሳ ማጻፋይ፥
\q1 “ሀይቁ ጾነቲደ ምተቴዳ።\x - \xo 15:54 \xo*\xt ኢሳ. 25:8\xt*\x*
\q1
\v 55 ሀይቆ፥ ነ ይሻይ ሀቃኔ?
\q2 ሀይቆ፥ ነ ጾኑ ሀቃኔ?”
\m ጌዳ ቃላይ ፖለታና።\x - \xo 15:55 \xo*\xt ሆሰ 13:14\xt*\x* 
\v 56 ሀይቁ ዱክያ ዎልቃ ናጋራፐ ደሜ፤ ቃይ ናጋራይ ዎልቃ ህግያፐ ደሜ። 
\v 57 ሽን ኑ ጎዳ የሱስ ክርስቶሳ ባጋና ኑና ጾንስያ ጾሳ ጋላታይ ጋኮ።
\p
\v 58 ታን ሲቅያ ታናዳን አማንያዋንቶ፥ ሄዋ ድራዉ፥ ቃጸናን ምን ኤቂተ። ህንተንቱ ዳቡራይ ጎዳ ባጋና መላ ግደናዋ ኤሪደ፥ ኡባ ዎደ ጎዳ ኦሱዋ አዛለናን ኦተ።
\c 16
\s1 የሩሳላመን ደእያ አማንያ አሳዉ ሺቄዳ ሚሻ ማዱዋ
\p
\v 1 ጾሳ አሳቶ ሚሻ ሺሻናዉ ጋላትያን ደእያ አማንያ አሳቶ ታን ቃላ ገሌዳዋዳን፥ ህንተንቱካ ቃይ ሄዋዳን ኦተ። 
\v 2 ህንተንቱ ታን ያ ብያ ዎደ፥ ሚሻ ሺሸና ማላ፥ ህንተ ኡባይ ዎጋ ጋላስ ጋላስ፥ ህንተ ደምያ ኬናፐ ህንተ ጎለን ዳጋይተ። 
\v 3 ታን ያ ጋክያ ዎደ፥ ህንተ አማንያ አሳ ኦና ግዶፐነ፥ ህንተ እሜዳዋ ጋና ማላ፥ ዳብዳቢያና ኡንቱንታ የሩሳላመ ኪታና። 
\v 4 ቃይ ታን ኡንቱንቱና ባናዉ ኮሾፐ፥ ኡንቱንቱ ታናና እትፐ ባናዋንታ።
\s1 ጳዉሎሳ ቆፋቱዋ
\p
\v 5 ታን ማቅዶንያና አአደ፥ ህንተንቱኮ ባና፤ አያዉ ጎፐ፥ ታን ማቅዶንያና አይ። 
\v 6 ታን ብያሳ ሀቃ ግዶፐነ፥ ታ ቡሳን ህንተ ታና ማዳና ማላ፥ ህንተ ማታን አማሬዳ ዎድያ ጋምኤናን አግከ። ዎይ ባልጉዋካ ህንተ ማታን ሻጨናን ዋያ አጋና። 
\v 7 አያዉ ጎፐ፥ ታን ሀእ ያና አአደ ሄ ኦግያና ህንተንታ በአናዉ ኮይከ። ጎዳይ ጎፐ፥ ህንተ ማታን አማሬዳ ዎድያ ታካናዉ ቆፓይ።
\p
\v 8 ሽን ታን ጰንጸቆስተ ግያ ጋላሳይ ጋካናዉ ኤፈሶነን ጋምአና። 
\v 9 ታዉ ኦሱ ኩሜዳ አኮ ፐንጊካ ያን ዶየቴዳ። ቃይ ታዉ ጮራ ሞርከቱ ደኢኖ።
\p
\v 10 ጽሞቶሰ ህንተንቱኮ ዮፐ፥ ህንተ ማታን እ ያየናን ደአናዳን፥ አ ሎይ ኦይቂተ። አያዉ ጎፐ፥ እካ ቃይ ጎዳ ኦሱዋ ኦ። 
\v 11 ሄዋ ድራዉ፥ ኦንነ አ ካፖ። ሽን እ ታኮ ሳሮ ስማና ማላ፥ አ ማዲደ ሳሮተን ሞይዝተ። አያዉ ጎፐ፥ ታን እ እሻቱዋና ስማናዋ ናጋ ኡታድ።
\p
\v 12 ሽን ኑ እሻ አጲሎስ የኮ እሻቱዋና ህንተንቱኮ ባና ማላ፥ ታን አ ምንሳ ዎሳድ። ሽን ሀእ ህንተንቱኮ ባናዉ ኮይቤና፤ እ ባረዉ ሚክያ ዎደ ህንተንቱኮ ባናዋ።
\s1 ዉርሰ ዞርያነ ሳሮታ
\p
\v 13 ቤጎትተ። አማኑዋን ምን ኤቂተ። ጻልተ። ጎብተ። 
\v 14 ኦሱዋ ኡባ ሲቁዋን ኦተ።
\p
\v 15-16 ታናዳን አማንያዋንቶ፥ እስጽፋኖስነ አ ሶይ አሳይ ግሪከን ኮይሮ አማኔዳዋንታ ግድያዋነ ጾሳ አሳቶ ኦናዉ ባረንታ እሜዳዋ ህንተ ኤሪታ። ህንተንቱካ ኡንቱንቱ ማላ አሳዉነ፥ ኡንቱንቱና ኦያ ኡባዉ ዳቡርያ ኡባዉ ኤኖ ጋናዳን፥ ታን ህንተንታ ዎሳይ።
\p
\v 17 እስጽፋኖስ፥ ፓርዶናጽስነ አካይቆስ ህንተ ባይናሳን ታና ቦራስስቤና ድራዉ፥ ኡንቱንቱ ዩሳን ታን ናሸታይ። 
\v 18 ኡንቱንቱ ህንተንታ አያናን ምንሴዳዋዳን፥ ታናካ አያናን ምንሴዳ ድራዉ፥ ሄዋንቱ ማላ አሳቱዋ ዶጎፕተ።
\p
\v 19 ኢስያን ደእያ አማንያ አሳይ ህንተንታ፥ “ሳሬ፥ ሎኤ” ጊኖ። አቂላይነ ጵርስቂላ ባረንቱ ሶይን ሺቅያ ዎሳ ጎለ አሳናካ ህንተንቶ ጎዳ ሳሮታ ዎዛናፐ ኪቲኖ። 
\v 20 እሻቱ ኡባይ ህንተንቶ ሳሮታ ኪቲኖ።
\p እቱ እቱዋና ጌሻ የረታ የረቲደ ሳሮተትተ። 
\v 21 ታን ጳዉሎስ ሀ ሳሮታ ታ ኩሽያን ጻፋድ።
\p
\v 22 ጎዳ የሱስ ክርስቶሳ ሲቀና አሳይ ደኦፐ፥ እ ሸቀቴዳዋ ግዶ። ኑ ጎዳዉ፥ ሃያ።
\p
\v 23 ጎዳ የሱስ ክርስቶሳ አ ኬካተይ ህንተንቱና ግዶ።
\p
\v 24 ክርስቶሳ የሱሳን ደእያ ህንተንቱ ኡባና ታ ሲቁ ግዶ። አመንእ።