\id ROM - ዳውሮ 
\h ሮሚያ 
\toc1 ጳዉሎሲ ሮሜ ኣሳው ፃፌዳ ኪታ 
\toc2 ሮሚያ 
\toc3 ሮም 
\mt2 ጳዉሎሲ 
\mt1 ሮሜ ኣሳው 
\mt2 ፃፌዳ ኪታ 
\imt1 ጌሉዋ 
\ip ዬሱሲ ኪቴዳ ጳዉሎሲ ሮሜ ኣሳው ፃፌዳ ኪታይ፥ ጳዉሎሲ ሮሜን ዴዒያ ዎሳ ጎሊያ ፆሞሳናው ቆፔዳ ዲራው፥ ኢ ባናሲ ኡንቱንቱ ጊጊዴ ናጋናዳን ኦናሳ። ጳዉሎሳ ቆፋይ ሮሜን ዴዒያ ኣማኒያዋንቱና ጉ ዎዲያ ኦዳዋፔ ጉዪያን፥ ኡንቱንቱ ማዲና ኢሲፔኔ ባናሳ። ኪሪስቲና ኣማኑዋባ ባሬ ኤሬዳዋኔ ሄዋ ቃሲ ኣማኒያ ኣሳይ ኦሱዋን ፔሻና ሃኖታ ቆንጪሲዴ ፃፌዳ። ጳዉሎሳ ቆፋይ ኩሜን ሃኖታን ቤቲያዌ ሃ ኪታና። 
\ip ጳዉሎሲ ሮሜን ዴዒያ ኣማኒያዋንቱሲ ሳሮታ ኣዋፔኔ ኡንቱንቶ ዎሳናዋካ ሂዶታ ኢሞዋፔ ጉዪያን፥ ኪታሲ ጊዶ ቆፋይ «ሚሺራቹዋ ቃላይ ፆሳይ ኣሳ ፂሊሲያዌ፥ ኮይሩዋፔ ዉርሴ ጋካናው ኣማኑዋና ጊዲያዋ ኦዴ» (1፡17) 
\ip ሄዋፔ ጉዪያን ጳዉሎሲ ሃ ቆፋ ኣሲዴ ፃፌ። ኣዪሁዳቱዋ ጊዲናካ ኣዪሁዳ ጊዴና ኣሳ ጊዲናካ ኡባይ ናጋራው ሞዴቲያዋንታ ጊዲያ ዲራው፥ ኡንቱንቱ ፆሳና ሲጌታናው ኮሼ። ኣሳይ ፆሳና ሲጌታናው ዳንዳዪያዌ ዬሱሲ ኪሪስቶሳን ኣማኒያዋና። ፆሳና ሜያ ኦራ ኢቲፔቴ ኣይፊ ኦራ ዴዑዋ ጊዲያዋ ጳዉሎሲ ኣሲዴ ኦዴዳ። ኣማኒያ ኣሳይ ፆሳና ሳሮ ዴዔ። ቃሲ ፆሳ ኣያና ባጋና ናጋራኔ ሃይቁዋ ዎልቃፔ ቢሌቴ። ጳዉሎሲ ፆሳ ቆፋይኔ ኣማኒያ ኣሳ ዴዑዋ ጊዶን ኦያ ፆሳ ኣያና ዎልቃ ቆፋይ ኣዬንቶ ኦዴ (5-8)። ሄዋፔ ካሊዴ ቃሲ ጳዉሎሲ፥ «ፆሳይ ኣሳ ናናሲ ቆፔዳ ቆፋ ጊዶን ኣዪሁዳቱኔ ኣዪሁዳ ጊዴና ኣሳቱ ዋኒዴ ኢቲፔ ዋፄታናው ዳንዳያናዋንቴሻ?» ያጊያ ኦሻ ዛራናው ባፄቲዴ ዴዔ። 
\ip ቃሲካ ጳዉሎሲ፥ ኣዪሁዳቱ ዬሱሳ ኣኬናን ኣጌዳዌ ፆሳ ቆፋ ጊዲያዋ ኦዴ። ኣዪሲ ጎፔ፥ ሃዋ ማላ ሃኖታን ኣሳ ዜሬይ ኡባይ ፆሳይ ዬሱሳ ባጋና ቆንጪሴዳ ኣ ኬካቴን ኢቲፔቴ ኦናሳ። ጊዶሺን፥ ኣዪሁዳቱ ዬሱሳ ኣካናው ዎዲ ያናዋ ጳዉሎሲ ኣማኔ። ዉርሴን ጳዉሎሲ ኪሪስቲና ዴዑዋ ዋኒዴ ዴዓናው ቤሲንቶ ኦዴ። ፆሳሲ ኦናባ፥ ኣማኒያ ኣሳቱ ባሬንቱ ጋዲያሲኔ ባሬንቱ ጊዶን ኢቱ ኢቱዋሲ ሲቁዋኒኔ ማታን ኦናባኔ ቆፋ ጋሱዋን ዴንዲያ ኦሻቱዋባ ቆንጪሲዴ ኦዴ። 
\iot ሼምፓቱዋ ኡባቱዋሲ ኢሜቴዳ ቃን ቆፋቱዋ 
\io1 ሮሜ ኪታ ሁጴ ቆፋ ጌሉዋ (1፡1-17) 
\io1 ኣቶቴይ ኣሳው ኮሺያዋ ጊዲያዋ (1፡18-3፡20) 
\io1 ፆሳ ኣሹዋ ኦጊያ (3፡21-4፡25) 
\io1 ዬሱሳን ቤቲያ ኦራ ዴዑዋ (5፡1-8፡39) 
\io1 ኢስራዔሊያ ኣሳው ዴዒያ ፆሳ ቆፋ (9፡1-11፡36) 
\io1 ኪሪስቲናሲ ቤሲያ ኦሱዋ (12፡1-15፡13) 
\io1 ዉርሴ ቆፋኔ ሳሮታ (15፡14-16፡27) 
\c 1  
\p  
\v 1 ባሬ ሚሺራቹዋ ቃላ ኦዳናው ፆሳይ ዶሪዴ ፄሴዳ ኪሪስቶሳ ዬሱሳ ቆማይ፥ ዬሱሲ ኪሪስቶሲ ኪቴዳ ጳዉሎሲ፥ ታኒ ሃ ዳቢዳቢያ ፃፋይ። 
\p  
\v 2 ፆሳይ ዳሮ ዎዴፔ ካሴ ባሬ ናባቱዋ ባጋና ሚሺራቹዋ ቃላ ኢማና ያጌዳዌ ፆሳ ጌሻ ማፃፋቱዋን ፃፌቴዳ፤  
\v 3 ሄ ሚሺራቹዋ ቃላይ ኣሳ ጊዲዴ ዳዊቴ ዛሪያፔ ዬሌቴዳ ፆሳ ናዓ፥ ኑ ጎዳ ዬሱሲ ኪሪስቶሳባ።  
\v 4 ቃሲ ኢ ባሬ ጌሻ ኣያናን \f + \fr 1:4 \fq ባሬ ጌሻ ኣያናን፡ \ft ዎይ «ኣኒ ዴዒያ ጌሻ ኣያና»\f* ሃይቁዋፔ ዴንዴዳዋን፥ ፆሳ ናዓ ጊዲያዋ ዎልቃማ ዎልቃን ቤሴዳ።  
\v 5 ኣዪሁዳ ጊዴና ኣሳይ ኡባይ ኣማናናዳኒኔ ኣዛዜታናዳን፥ ኑኒ ኡንቱንታ ካሌና ማላ፥ ፆሳይ ኪሪስቶሳ ሱን ዲራው፥ ኪሪስቶሳ ባጋና ኣ ኬካቴኔ ዬሱሲ ኪቴዳዋንታ ጊዲያ ማታ ኑሲ ኢሜዳ።  
\v 6 ዬሱሲ ኪሪስቶሳዋ ጊዳናዳን፥ ፆሳይ ፄሴዳ ሂንቴንቱካ ሄዋንቱ ጊዶን ዴዒታ። 
\p  
\v 7 ፆሳይ ሲቂያዋንቶኔ ጌሻባ ኦናው ፄሴዳ ሮሜ ጋዲያን ዴዒያ ኡባቶ ፆሳ ኑ ኣዉዋፔኔ ጎዳ ዬሱሲ ኪሪስቶሳፔ ኣ ኬካቴይኔ ሳሮቴይ ሂንቴንቶ ጊዶ። 
\s1 ጋላታ ዎሳ 
\p  
\v 8 ካሴታዴ ታኒ ሂንቴንቱ ኣማኑ ሳዓ ኡባን ሲሴቴዳ ዲራው፥ ዬሱሲ ኪሪስቶሳ ባጋና ሂንቴንቶ ታኒ ፆሳ ጋላታይ።  
\v 9-10 ኣዪሲ ጎፔ፥ ታኒ ኡባ ዎዴ ታ ዎሳን ሂንቴንታ ሃሳዪሲያዎ፥ ፆሳይ፥ ታኒ ኣ ናዓ ሚሺራቹዋ ቃላ ኦዲያዋን ታ ኣያናን ኣው ኦያዌ ማርካ። ፆሳይ፥ ባሬ ሼኒያን፥ ታኒ ሃዒ ሂንቴንቱኮ ባናው ታ ኦጊያ ሚኮያናዳን፥ ኡባ ዎዴ ዎሳይ።  
\v 11 ኣዪሲ ጎፔ፥ ታኒ ሂንቴንታ ሚኒሳናው፥ ሂንቴንቱና ኢቲፔ ኣያና ኢሞታ ሻካና ማላ፥ ሂንቴንታ ቤዓናው ላሞታይ።  
\v 12 ታኒ ጊያዌ፥ ሂንቴንቱካ ታካ ኢቲ ዎዴ ሚኔታና። ሂንቴንቱ ታ ኣማኑዋን፥ ቃሲ ታኒካ ሂንቴ ኣማኑዋን ሚኔታና። 
\p  
\v 13 ታናዳን ኣማኒያዋንቶ፥ ታኒ ኡባ ዎዴ ሂንቴንቱኮ ባናው ቆፓዲ። ሺን ታና ዲጊያባይ ዴዒያዋ ሂንቴ ኤራናው ቤሴ፤ ታኒ ሃራይ ኣቶ ኣዪሁዳ ጊዴና ሃራ ኣሳፔካ ኣይፊያ ዴሜዳዋዳን፥ ሂንቴንቱፔካ ኣይፊያ ዴማናው ኮያይ።  
\v 14 ታኒ ኣሳ ኡባው፥ ጊሪኬ ኣሳዉኔ ታማሪቤና ኣሳው ቃሲ ኣ ኤራንቻቶኔ ኤያቶ ቃንፃና ኣጩ ዴዔ። 
\p  
\v 15 ሄዋ ዲራው፥ ታው ዳንዳዬቴዳ ኬናን ሮሜን ዴዒያ ሂንቴንቱሲካ ሚሺራቹዋ ቃላ ኦዳናው ኣሞታይ። 
\s1 ሚሺራቹዋ ቃላይ ፆሳ ዎልቃ 
\p  
\v 16 ሚሺራቹዋ ቃላይ ታና ዬላዬና፤ ኢ ኣማኒያ ኡባ፥ ካሴቲዴ ኣዪሁዳ ኣሳ ቃሲ ኣዪሁዳ ጊዴና ኣሳ ኣሻናው ፆሳፔ ዪያ ዎልቃ።  
\v 17 ኣዪሲ ጎፔ፥ ፆሳ ማፃፋይ፥ «ፂሉ ፆሳን ኣማኔቲዴ ዴዓና» ያጊያዋዳን፥ ፆሳይ ኣሳ ኮይሮፔ ዉርሴ ጋካናው፥ ኣማኑዋን ፂሊሲያዋ ሚሺራቹዋ ቃላይ ቆንጪሴ። \x - \xo 1:17 \xt ኢምብ 2፡4\x* 
\s1 ኣሳ ኢታ ኦሱዋ 
\p  
\v 18 ቱማቴይ ኤሬታናዋ ባሬንቱ ኢታ ሃኖታን ዲጊያ ናጋራ ኦሱዋ ኡባ ቦላኒኔ ኣሳ ኢታ ኦሱዋ ኡባ ቦላን፥ ፆሳ ሃንቁ ሳሉዋፔ ዎዴ ቆንጫና።  
\v 19 ኡንቱንቱ ፆሳባ ኤራና ዳንዳዪያዌ ኡንቱንቶ ቆንጬ፤ ኣዪሲ ጎፔ፥ ፆሳይ ኡንቱንቶ ቆንጪሴዳ።  
\v 20 ቤቴና ኣ ሃኖታይ፥ ሄዌካ ኣ ሜና ዎልቃይኔ ኣ ፆሳቴይ ኢቲፔ ፆሳይ ሃ ኣላሚያ ሜዳዋፔ ዶሚዴ፥ ኡንቱንቶ ቆንጪዴ ቤቴዳ፤ ኡንቱንቱ ሄዋ ፆሳይ ሜዳባፔ ቤዓናው ዳንዳዪያ ዲራው፥ ኡንቱንቶ ጋሶዪያባይ ባዋ። 
\p  
\v 21 ኣዪሲ ጎፔ፥ ኡንቱንቱ ፆሳ ኤሮፔካ፥ ኣው ቤሲያ ቦንቹዋ ኢሚቤይኪኖ፤ ቃሲ ኣ ጋላቲኪኖ። ሺን ኡንቱንቱ ኣላሌ ኬሴናባ ቆፒኖ፤ ቃሲ ኡንቱንቱ ኣኬኬና ዎዛናይ ሜዳ።  
\v 22 ኡንቱንቱ ባሬንታ ኣዳ ኤራንቻ ጊኖ፤ ሺን ኡንቱንቱ ኤያ።  
\v 23 ኡንቱንቱ ሃይቄና ፆሳሲ ጎዪኒያዋ ኢፂዴ፥ ሃይቂያ ኣሳ ሜታ፥ ካፋቱዋ ሜታ፥ ዶዓቱዋ ሜታኔ ቲራን ጎሼቲያዋንቱ ሜታ ሜቴዳዋንቱሲ ጎዪኔዲኖ። \x - \xo 1:23 \xt ዛር 4፡16-18\x* 
\p  
\v 24 ሄዋ ዲራው፥ ኡንቱንቱ ኢቱ ኢቱዋና ፖኮባ ኦና ማላ፥ ፆሳይ ኡንቱንቱ ዎዛናይ ኣሞቲያ ቱናባ ኦናዳን ኡንቱንታ ኣጌዳ።  
\v 25 ኣዪሲ ጎፔ፥ ኡንቱንቱ ፆሳ ቱማቴ ዎርዱዋን ላሜዲኖ፤ ቃሲ ሜዳ ፆሳ ኣጊዴ፥ ኢ ሜዳባው ጎዪኔዲኖኔ ኦዲኖ። ፆሳይ ሜናው ጋላቴቴዳዋ። ኣሜንዒ። 
\p  
\v 26 ሄዋ ዲራው፥ ፆሳይ ኡንቱንቱ ፖኮባ ኣሞታና ማላ፥ ኡንቱንታ ኣጌዳ፤ ሃራይ ኣቶ ኡንቱንቱ ማጫዋንቱ ባሬንቶ ቤሲያዋ ኣጊዴ፥ ቤሴናዋ ሃኔዲኖ።  
\v 27 ሃዋዳንካ፥ ኣቱማ ኣሳይ ቃሲ ባሬንቶ ቤሲያዋዳን ማጫዋንቱና ጋኬቲያዋ ኣጊዴ፥ ኢቱ ኢቱዋና ጋኬታናው ኮዬዲኖ፤ ኣቱማ ኣሳይ ኢቱ ኢቱዋና ፖኮባ ኦዴ፥ ባሬንቱ ኦዳ ባላን ባሬንቶ ቤሲያ ፒርዳ ኣኬዲኖ። 
\p  
\v 28 ኡንቱንቱ ፆሳ ኤራናው ዶሴናን ኢፄዳዋ ኬና ፆሳይ ኡንቱንቱ ቤሴናዋ ኦና ማላ፥ ኡንቱንቶ ፓና ቆፋ ኢሜዳ።  
\v 29 ኡንቱንቱን ቱናቴይ፥ ኢታቴይ፥ ዮራቴይኔ ኢታ ሃኖታይ ኩሜዳ፤ ቃሲ ኡንቱንቱን ቃናቲ፥ ሼምፑዋ ዎያ ቆፋይ፥ ፓሉማይ፥ ጪሙሳይኔ ኢታ ቆፋይ ኩሜዳ፤ ቃሲ ኡንቱንቱ ሶቂያዋንታ፥  
\v 30 ዚጊሪያዋንታ፥ ፆሳ ኢፂያዋንታ፥ ቦሪያዋንታ፥ ኦቶሬቲያዋንታ፥ ጬቄቲያዋንታ፥ ኢታባ ኦናው ኮዪያዋንታኔ ባሬንቱ ኣዎኔ ኣቲው ኣዛዜቴናዋንታ፥  
\v 31 ቆፋይ ባይናዋንታ፥ ኣማኑ ባይናዋንታ፥ ሃራንቶ ቃሬቴናዋንታኔ ማሬናዋንታ።  
\v 32 ኡንቱንቱ ሃዋንቱ ማላ ኦያዋንቱሲ ሃይቁ ቤሴ ጊያ ፆሳ ሂጊያ ኤሪዴ፥ ሃዋንታ ኦኖ፤ ሄዋ ፃላላ ጊዴናን፥ ሃዋንታ ኦያዋንታካ ኦቴ ጊዴ ሚኒሲኖ። 
\c 2  
\s1 ፆሳ ፒርዳ 
\p  
\v 1 ሄዋ ዲራው፥ ኔኖ ሃራንቱ ቦላ ፒርዲያዎ፥ ኔው ጋሶዪያባይ ባዋ፤ ኣዪሲ ጎፔ፥ ኔኒ ሃራንቱ ቦላ ፒርዳዴ፥ ሄ ኔኒ ኡንቱንቱ ቦላ ፒርዲያዋ ማላ ኡዶፔ፥ ኔ ቦላ ፒርዳሳ።  
\v 2 ኑኒ ሃዋ ማላ ኦሱዋ ኦያዋንቱ ቦላ ፆሳይ ፂሎ ፒርዳ ፒርዲያዋ ኤሬቶ።  
\v 3 ኔኖ፥ ሃዋ ማላ ኦሱዋ ኦያዋንቱ ቦላ ፒርዲያዎ፥ ቃሲ ሄ ኔኒ ፒርዲያዋ ማላ ኦያዎ፥ ኔኒ ፆሳ ፒርዳፔ ኣቲያዋ ማላቲ?  
\v 4 ዎይ ፆሳ ዎልቃማ ኬካቴ፥ ጌንጩዋኔ ዳንዳያ ካዪሻ? ፆሳይ ኔና ናጋራፔ ዛራናው ኮዪያ ዲራው፥ ኢ ኬካ ጊዲያዋ ኔኒ ኤራሳ። 
\p  
\v 5 ሺን ሂንቴንቶ ጉዙማ ዎዛናይኔ ናጋራፔ ሲሜና ዎዛናይ ዴዔ፤ ሄዋ ዲራው፥ ፆሳ ሃንቁኔ ፂሎ ፒርዳይ ቆንጪያ ጋላሲ፥ ኔኒ ኔ ቦላ ሃንቁዋ ካሴዋፔ ዳሪሳሳ።  
\v 6 ፆሳይ ኣሳ ኡባው ኣ ኦሱዋ ማላ ኢማናዋ። \x - \xo 2:6 \xt ማዝ 62፡12፤ ሌም 24፡12\x* 
\v 7 ኢቲ ኢቲ ኣሳቱ ሎዖባ ዳንዳያን ኦኖ፤ ቃሲ ጋላታ፥ ቦንቹዋኔ ባዬና ዴዑዋ ኮዪኖ፤ ኡንቱንቶ ፆሳይ ሜና ዴዑዋ ኢማና።  
\v 8 ሺን ሃራንቱ ኢታባ ኦናው ያሬቲኖኔ ቱማቴ ኢፂኖ፤ ፆሳይ ኡንቱንቱ ቦላ ባሻኔ ሃንቁዋ ዬዳና።  
\v 9 ኢታባ ኦያ ኣሳይ ኡባይ ሜቶታናኔ ዋዬታና፤ ሄዌ ካሴቲዴ፥ ኣዪሁዳ ኣሳ ጋካና፤ ሄዋፔ ቃሲ ኣዪሁዳ ጊዴና ኣሳ ጋካና።  
\v 10 ሺን ፆሳይ ሎዖ ኦሱዋ ኦያ ኡባቶ ጋላታ፥ ቦንቹዋኔ ሳሮቴ ኢማና። ካሴቲዴ ኣዪሁዳቶ ኢማና፤ ሄዋፔ ቃሲ ኣዪሁዳ ጊዴናዋንቶ ኢማና።  
\v 11 ኣዪሲ ጎፔ፥ ፆሳ ኣዪፊያን ኣሳይ ኡባይ ኢቲ ማላ። \x - \xo 2:11 \xt ዛር 10፡17\x* 
\p  
\v 12 ሙሴ ሂጊ ባይናን ናጋራ ኦዳ ኡባይ ሂጊ ባይናን ያና። ሙሴ ሂጊ ዴዒሺን፥ ናጋራ ኦዳ ኡባይ ሂጊያን ፒርዴታና።  
\v 13 ኣዪሲ ጎፔ፥ ፆሳ ሲንን ሂጊያ ናጊያዋንቱ ፂሊኖፔ ኣቲን፥ ሂጊያ ሲሲያዋንቱ ፂሊኪኖ።  
\v 14 ኣዪሁዳ ጊዴና ኣሳው ሂጊ ባዋ፤ ሺን ባሬንቱ ቲላ ቆፋን ሂጊ ኣዛዚያዋ ኦኖ፤ ኡንቱንቶ ሂጊ ዮፔካ፥ ኡንቱንቱ ባሬንቱ ሁጴው ሂጌ።  
\v 15 ሂጊ ኣዛዚያዌ ኡንቱንቱ ዎዛና ጊዶን ፃፌቴዳዋ ኡንቱንቱ ሃኖታይ ቤሴ፤ ኢቲ ኢቲ ካላ ኡንቱንቱ ቲላ ቆፋይ ኡንቱንቶ ማርካቲያ ዲራዉኔ ቃሲ ኢቲ ኢቲ ካላ ኡንቱንቱ ቆፋይ ኡንቱንታ ሞቲያ ዲራው፥ ዎይ ቃሲ ኡንቱንቱና ጋዳቲያ ዲራው፥ ሄዌ ቱማ ጊዲያዋ ኤሪሴ።  
\v 16 ታኒ ታማሪሴዳ ሚሺራቹዋ ቃላዳን፥ ኣሳ ዎዛናን ጌሜዳ ቆፋ ፆሳይ ዬሱሲ ኪሪስቶሳ ባጋና ሃዋዳን ፒርዳና። 
\s1 ኣዪሁዳቱዋኔ ሙሴ ሂጊያ 
\p  
\v 17 ሺን ኔኒ ኔና ኣዪሁዳ ጋሳ፤ ሂጊያን ዜምፓዴ ፆሳን ጬቄታሳ።  
\v 18 ኔኒ ኦና ማላ፥ ፆሳይ ኮዪያዌ ኣዬንቶ ኤራ፤ ቃሲ ቱማ ጊዲያዋ ዶራናው ሂጊያፔ ታማራዳ።  
\v 19-20 ኔኒ ቆቃቱዋ ካሌያዋ፥ ቃሲ ማኒ ዴዒያዋንቶካ ፖዒሲያዋ፥ ኤሬናዋንታ ኤሪሲያዋኔ ናናቱዋ ታማሪሲያዋ ጊዲያዋ ኤራዲ፤ ሂጊያፔ ኔኒ ኩሜን ኤራቴኔ ቱማቴ ዴሚያዋ ኤራሳ።  
\v 21 ያቲና፥ ኔኒ ሃራቱዋ ታማሪሲያዌ ኔና ኔ ሁጴው ኣዪሲ ታማሪሲኪ? ኔኒ፥ «ዉዖፓ» ያጋዴ ቃላ ኦዳሳ። ሺን ኔኒ ኔ ሁጴው ዉዓዬ?  
\v 22 ኔኒ፥ «ዎሹሞፓ» ያጋ። ሺን ኔኒ ኔ ሁጴው ዎሹማይ? ኔኒ ኤቃ ሼኔታ። ሺን ኤቃይ ዴዒያ ጎሊያ ቦንቃይ?  
\v 23 ፆሳ ሂጊ ኔው ዴዒያ ዲራው፥ ኔኒ ጬቄታሳ፤ ሺን ሄ ሂጊያ ሜንዴ ፆሳ ዬላያይ?  
\v 24 ኣዪሲ ጎፔ፥ ፆሳ ማፃፋይ፥ «ኣዪሁዳ ኣሳቶ፥ ሂንቴ ጋሱዋን ኣዪሁዳ ጊዴና ኣሳቱዋ ጊዶን ፆሳ ሱንይ ባዬ» ያጌ። \x - \xo 2:24 \xt ኢሳ 52፡5\x* 
\p  
\v 25 ኔኒ ሂጌው ኣዛዜቶፔ፥ ኔ ቃፃራይ ማዱዋና ዴዔ፤ ሺን ኔኒ ሂጊያ ሜንፔ፥ ኔኒ ቃፃሬቴዳዌ ቃፃሬቲቤናዋዳን ፓይዴቴ።  
\v 26 ኣዪሁዳ ጊዴና ኣሳይ ቃፃሬቴናን ሂጊ ኣዛዚያዋ ናጎፔ፥ ፆሳይ ኣ ቃፃሬቴዳዋዳን ፓይዴኔ?  
\v 27 ሂንቴንቱ፥ ኣዪሁዳ ኣሳቱ፥ ሂንቴንቶ ፃፌቴዳ ሂጊ ዴዖፔካ ቃሲ ሂንቴ ቃፃሬቶፔካ፥ ሂጊያ ሂንቴ ሜንያ ዲራው፥ ኣዪሁዳ ጊዴና ኣሳይ ቦላ ቃፃሬታና ዮፔካ፥ ሂጌው ኣዛዜቲዴ፥ ሂንቴ ቦላ ፒርዳና። 
\p  
\v 28 ኣዪሲ ጎፔ፥ ኣዪሁዳ ኣሳ ማላቲያ ኡባይ ቱሙ ኣዪሁዳ ኣሳ ጊዴና፤ ቃሲ ኣሳይ ባሬ ኣሹዋ ኣሳቴ ቃፃሬቴዳ ዲራው፥ ቱሙ ኣዪሁዳ ኣሳ ጊዴና።  
\v 29 ሺን ቱሙ ኣዪሁዳ ኣሳ ጊያ ኡራይ ጋርሳ ባጋና ኣዪሁዳ ኣሳ \f + \fr 2:29 \ft ኣዪሁዳ ጉሳይ ጋላቴቲያዋ ጊዲዴ ሱንይ ዪሁዳፔ ዬዳ።\f* ጊዴዳዋ፤ ቃፃሬቲያዋ ፆሳ ኣያናን ኦሴቲያ ዎዛና ቃፃራፔ ኣቲን፥ ፃፌቴዳ ሂጊያና ጊዴና፤ ሄ ኡራይ ባሬ ጋላታ ፆሳፔ ኣኪያዋፔ ኣቲን፥ ኣሳፔ ኣኪቤና። \x - \xo 2:29 \xt ዛር 30፡6\x* 
\c 3  
\s1 ኣዪሁዳቱ ኣማኔናን ኣጉሳን ባዪዜዲኖ 
\p  
\v 1 ያቲና፥ ኣዪሁዳ ኣሳቱ ኣያኒ ኣዪሁዳ ጊዴና ኣሳፔ ኣኖ? ዎይ ቃፃሬቲያዋን ኣይ ማዱ ዴዒ?  
\v 2 ሃዌ ኣዪሁዳቱዋ ኡባባኒ ሎይ ማዴ፤ ኡባባፔ ካሴ ፆሳይ ባሬ ኪታ ሃዳራ ኣዪሁዳቶ ኢሜዳ። 
\p  
\v 3 ያቲና ኡንቱንቱፔ ኢቱ ኢቱ ኣማኔቴናዋ ጊዶፔ፥ ዋኒ? ሄዋ ዲራው፥ ፆሳይ ኣማኔቴና ያጊያዌ?  
\v 4 ሄዋ ጊዴና፤ ኣሳይ ኡባይ ዎርዳንቻ ጊዶፔካ፥ ፆሳይ ጊያዌ ቱማ ጊዳናው ቤሴ። ፆሳ ማፃፋይ፥ «ኔኒ ሃሳዪያ ዎዴ፥ ኔኒ ፂሎ ጊዲያዋ ኤሪሳናው ኮሼ፤ ኔኒ ሞቴቲያ ዎዴ፥ ሻቲማናው ቤሴ» ያጌ። \x - \xo 3:4 \xt ማዝ 51፡4\x* 
\p  
\v 5 ሺን ኑ ባዪዙ ፆሳ ፂሎ ኦሱዋ ኤሪሲንቶ፥ ኑኒ ዋጋኔ? ኑ ቦላ ሃንቁዋ ኣሂያ ፆሳይ ባዪዛንቼ? ታኒ ኣሳይ ጊያዋዳን ጋይ።  
\v 6 ሄዌ ዋዪ ሃናና። ኣዪሲ ጎፔ፥ ሄዋዳን ጊዶፔ፥ ፆሳይ ሃ ኣላሚያ ቦላ ዎቲ ፒርዳኔ? 
\p  
\v 7 ሺን ታ ዎርዱዋን ፆሳ ቱማቴይ ኣ ቦንቾ ዳሮፔ፥ ያቲና፥ ሃዋ ጋካናው ኣዪሲ ታ ቦላ ናጋራንቻዳን ፒርዲ?  
\v 8 ያቲና ኑኒ፥ «ሎዑ ያናዳን፥ ኣኔ ኢታባ ኦይቴ» ኣዪሲ ጎኮ? ኢቲ ኢቲ ኣሳይ ሃዋ ታና ሞቲዴ ቦሬዲኖ፤ ኡንቱንቱ ፆሳፔ ቤሲያ ፒርዳ ኣካና። 
\s1 ኣሳይ ኡባይ ናጋራንቻ 
\p  
\v 9 ሄዋ ዲራው፥ ኑኒ ዋጋኔ? ኑኒ ኣዪሁዳቱ፥ ኣዪሁዳ ጊዴና ኣሳፔ ዳሬቶ? ሄዋ ጊዴና፤ ኣዪሲ ጎፔ፥ ኣዪሁዳቱካ ኣዪሁዳ ጊዴና ኣሳቱካ ኡባይ ኢቲፔ ናጋራፔ ጋርሳን ዴዒያዋ ታኒ ካሴ ሂንቴንቶ ኦዳዲ። 
\p  
\v 10 ፆሳ ማፃፋይ ሃዋዳን ያጌ፤ \x - \xo 3:10 \xt ማዝ 14፡1-3\x* 
\q1 «ፂሎ ኣሳይ ኢቱኔ ባዋ። 
\q1  
\v 11 ኣኬኪያ ኣሳይካ ባዋ፤ 
\q2 ዎይ ፆሳ ኮዪያዌካ ባዋ። 
\q1  
\v 12 ኣሳይ ኡባይ ኦጊያፔ ካሬ ኬሴዲኖ፤ 
\q2 ኡባይ ሙሌካ ማዴናዋ ጊዴዳ። 
\q2 ሎዖባ ኦያ ኦኒኔ ባዋ፤ 
\q2 ሃራይ ኣቶ ኢቱኔ ባዋ። 
\q1  
\v 13 ኡንቱንቱ ዶናይ ዶያ ዴዒያ ዱፉዋ ማላ። 
\q2 ባሬንቱ ኢንፃርሳን ዎርዶቴዲኖ። 
\q2 ኡንቱንቱ ዶናፔ ኣሳ ዎያ ሾሻ 
\q2 ዪሻ ማላ ሃሳያይ ኬሴ። \x - \xo 3:13 \xt ማዝ 5፡9\x* 
\q1  
\v 14 ኡንቱንቱ ዶናን ሼቃይኔ ጫሞባይ ኩሜዳ። \x - \xo 3:14 \xt ማዝ 10፡7\x* 
\q1  
\v 15 ኡንቱንቱ ሱ ጉሳናው 
\q2 ዳሪ ኤሌሊኖ። \x - \xo 3:15 \xt ኢሳ 59፡7-8\x* 
\q1  
\v 16 ባይዙኔ ኮሌይ 
\q2 ኡንቱንቱ ቤዳሳን ሃቃኒኔ ዬና። 
\q1  
\v 17 ኡንቱንቱ ሳሮቴ ኦጊያካ ኤሪኪኖ። 
\q1  
\v 18 ቃሲ ፆሳው ያዪያባይ 
\q2 ኡንቱንቱ ቆፋን ባዋ» 
\m ያጌ። \x - \xo 3:18 \xt ማዝ 36፡1\x* 
\p  
\v 19 ኣሳ ኡባ ሃሳያ ዲጋና ማላኔ ኩሜን ሳዓ ፆሳ ፒርዳፔ ጋርሳው ኣና ማላ፥ ሂጊያ ጊዶን ኦዴቴዳ ኡባባይ ሂጊያፔ ጋርሳን ዴዒያ ኣሳው ሃሳዪያዋ ኑኒ ኤሬቶ።  
\v 20 ፆሳ ሲንን ኦኒኔ ሂጊ ኣዛዚያዋ ኦያዋን ፂሌና፤ ሂጊ ኢቲ ኣሳይ ናጋራ ኦዳዋ ኤራናዳን ኡዴ። \x - \xo 3:20 \xt ማዝ 143፡2፤ ጋል 2፡16\x* 
\s1 ኣሳይ ፂሊያዌ ኣማኑዋና 
\p  
\v 21 ሺን ፆሳይ ኣሳ ፂሊሲያ ኦጊ ሂጊ ባይናን ሃዒ ቆንጬዳ፤ ሂጊኔ ናባቱ ሄ ፂሎቴባ ማርካቴዲኖ።  
\v 22 ፆሳይ ኣሳ ዬሱሲ ኪሪስቶሳ ኣማኒያዋን ፂሊሴ፤ ፆሳይ ሄዋ ኣ ኣማኒያ ኡባው ኦ፤ ኣይ ሻኮቴይኔ ባዋ። 
\p  
\v 23 ኣዪሲ ጎፔ፥ ኣሳይ ኡባይ ናጋራ ኦዳ፤ ፆሳ ቦንቹካ ኡንቱንቶ ጉፄዳ።  
\v 24 ሺን ኡንቱንቱ ፆሳይ ኢሚያ ኣ ኣ ኬካቴን፥ ባሬንታ ዎዚያ ኪሪስቶሲ ዬሱሳ ባጋና ጮ ፂሌዲኖ።  
\v 25 ዬሱሳ ሱን ኣሳይ ኣ ኣማኒዴ፥ ባሬ ናጋራው ማሮቴ ዴማናው፥ ፆሳይ ኣ ኢሜዳ፤ ፆሳይ ሄዋ ባሬ ፂሎቴ ቤሳናው ኦዳ፤ ኢ ቤኒ ዎዲያን ኣሳ ናጋራ ዳንዳዪዴ፥ ካ ባሺ ኣጌዳ፤ ሺን  
\v 26 ሃ ዎዲያን ባሬ ፂሎቴ ቤሳናው ኣሳ ናጋራ ኣጌና፤ ፆሳይ ሄዋ ኦያዋን ኢ ባሬ ሁጴው ፂሎ ጊዲያዋኔ ዬሱሳ ኣማኒያ ኡባ ፂሊሲያዋ ቤሴ። 
\p  
\v 27 ያቲና፥ ኑኒ ኣያው ጬቄታኔ? ኣይኔ ባዋ። ኣያ ጋሱዋኔ? ኑኒ ሂጌው ኤኖ ጊያዋኔ? ጊዴና፤ ኣማኑዋ ሂጊያናፔ ኣቲን።  
\v 28 ኣዪሲ ጎፔ፥ ኣሳይ ኣማኑዋን ፂላናፔ ኣቲን፥ ሂጊ ኣዛዚያዋ ኦያዋና ጊዴና ያጊዴ ቆፔቶ። 
\p  
\v 29 ዎይ ፆሳይ ኣዪሁዳቱዋ ፃላላው ፆሴ? ኣዪሁዳ ጊዴና ኣሳው ፆሳ ጊዴኔ? ቱማ፥ ኣዪሁዳ ጊዴናዋንቶካ ኢ ቃሲ ፆሳ።  
\v 30 ኢቲ ፆሳ ፃላላይ ዴዔ፤ ኣዪሁዳቱዋ ኡንቱንቱ ኣማኑዋን ኢ ፂሊሳና፤ ቃሲ ኣዪሁዳ ጊዴናዋንታካ ኡንቱንቱ ኣማኑዋን ፂሊሳና። \x - \xo 3:30 \xt ዛር 6፡4፤ ጋል 3፡20\x* 
\v 31 ያቲና፥ ኑኒ ሂጊያ ኣማኑዋን ጋፃ ሱጋኔ? ጊዴና፤ ሂጊያ ሚኒሶይቴፔ ኣቲን። 
\c 4  
\s1 ኣብራሃሞ ኣማኑዋን ፂሌዳ 
\p  
\v 1 ያቲና፥ ኑኒ ኑሲ ኣሹዋን ዛሬ ጊዲያ ኣብራሃሞ ኣያ ዴሜዳ ጋኔ?  
\v 2 ኣዪሲ ጎፔ፥ ኣብራሃሞ ኦሱዋን ፂሌዳዋ ጊዶፔ፥ ኣው ጬቄቲያባይ ዴዔ፤ ሺን ፆሳ ሲንን ጬቄታና ዳንዳዬና።  
\v 3 ኣዪሲ ጎፔ፥ ፆሳ ማፃፋይ ዋጊ? «ኣብራሃሞ ፆሳ ኣማኔዳ፤ ፆሳይ ሄዋ ኣው ፂሎቴን ፓይዴዳ» ያጌ። \x - \xo 4:3 \xt ዶም 15፡6፤ ጋል 3፡6\x* 
\p  
\v 4 ኦያ ኡራይ ኣኪያ ሚሻ ባሬው ቤሲና ኣኬፔ ኣቲን፥ ኣው ጮ ኢሜቲያዋዳን ፓይዴቴና።  
\v 5 ሺን ኦሱዋ ኦናን፥ ናጋራንቻ ፂሊሲያ ፆሳ ኣማኒያ ኡራ፥ ፆሳይ ኣ ኣማኑዋን ኣ ፂሊሴ።  
\v 6 ሃዋዳንካ፥ ኣይ ኦሱኔ ባይናን፥ ፆሳይ ፂሉዋዳን ፓይዴዳ ኣሳ ናሼቺያባ ዳዊቴ ሃሳዬዳ ዎዴ ጌዳዌ ሃዋ። 
\q1  
\v 7 «ፆሳይ ኡንቱንቱ ባዪዙዋ 
\q2 ኣቶ ጌዳዋንቱኔ 
\q1 ኡንቱንቱ ናጋራ ካሜዳዋንቱ 
\q2 ኣንጄቴዳዋንታ። \x - \xo 4:7 \xt ማዝ 32፡1-2\x* 
\q1  
\v 8 ጎዳይ ኣ ናጋራ ፓይዴና ኣሳይ 
\q2 ኣንጄቴዳዋ» 
\m ያጌ። 
\p  
\v 9 ያቲና፥ ሃ ዳዊቴ ሃሳዬዳ ኣንጁ ቃፃሬቴዳ ኣሳ ፃላላሴዬ? ዎይ ቃሲ ቃፃሬቲቤና ኣሳቱዋሴ? ኣዪሲ ጎፔ ኑኒ፥ «ፆሳ ማፃፋይ፥ ‹ኣብራሃሞ ፆሳ ኣማኔዳ፤ ፆሳይ ሄዋ ኣው ፂሎቴን ፓይዴዳ› ያጌ» ጎይቴ።  
\v 10 ያቲና፥ ሃዌ ኣዉዴ ሃኔዴ? ኣብራሃሞ ቃፃሬቲ ሲሚኔዬ? ዎይ ቃፃሬታናፔ ካሴኔ? ቃፃሬታናፔ ካሴናፔ ኣቲን፥ ቃፃሬቲና ጊዴና። 
\p  
\v 11 ጉዬፔ ኢ ቃፃሬቴዳ፤ ፆሳይ ኣ ኣማኑዋ ዲራው፥ ኢ ቃፃሬታናፔ ካሴ ኣ ፂሎ ኡዴዳዋ ኤሪሳናው፥ ኣ ቃፃራይ ማላ ጊዴዳ። ሄዌካ ቃሲ ቃፃሬቴናን ፆሳ ኣማኒያ ኡባቱዋ ፆሳይ ፂሎ ኦዴ ፓይዳናዳን፥ ኡንቱንቶ ኣብራሃሞ ኣዉዋ ጊዳናሳ። \x - \xo 4:11 \xt ዶም 17፡10\x* 
\v 12 ኢ ቃፃሬቴዳዋንቶካ ኣዉዋ፤ ጊዶፔካ፥ ኡንቱንቱ ቃፃሬቴዳ ዲራሳ ጊዴና፤ ሺን ኑ ኣዉዋ ኣብራሃሞ ቃፃሬታናፔ ካሴ ኣማኒያ ኣማኑዋ ማላ ካሊያዋንቶካ ኣዉዋ። 
\s1 ፆሳይ ኢማና ጌዳባይ ኣማኑዋን ኣኬቴ 
\p  
\v 13 ኣብራሃሞሲኔ ኣ ዜሬው ፆሳይ፥ «ሃ ሳዓ ታኒ ሂንቴንቶ ኢማና» ያጌዳዌ፥ ኣብራሃሞ ፆሳ ኣማኒዴ ፂሌዳ ዲራሳፔ ኣቲን፥ ሂጌው ኢ ኣዛዜቴዳ ዲራሳ ጊዴና። \x - \xo 4:13 \xt ዶም 17፡4-6፤ 22፡17-18፤ ጋል 3፡29\x* 
\v 14 ኣዪሲ ጎፔ፥ ሂጌው ኣዛዜቲያዋንቱ ፆሳይ ኢማና ጌዳዋ ላቲያዋንታ ጊዶፔ፥ ኣሳ ኣማኑ ማዴናባ ጊዴዳ፤ ፆሳይ ጌዳዌካ ሜላ ጊዴዳ፤  
\v 15 ሂጊ ፆሳ ቦሻ ኣሄ፤ ሺን ሂጊ ባይናሳን ሂጊያ ሜንያባይ ባዋ። 
\p  
\v 16-17 ሄዋ ዲራው፥ ሂጊያ ናጊያዋንቱ ፃላላው ጊዴናን፥ ቃሲ ኣብራሃሞ ኣማኔዳዋዳን፥ ኣማኒያ ኣብራሃሜ ዜሬ ኡባው ፆሳይ ኢማና ጌዳዌ፥ ዎይታዳን ቱማታናዌ ኣማኑዋና። ኣብራሃሞ ኑሲ ኡባው ኣዉዋ። ፆሳ ማፃፋይ፥ «ታኒ ኔና ጮራ ካዉቴቶ ኣዎ ኦዲ» ጊያዋዳን፥ ሃይቄዳዋንቶ ዴዑዋ ኢሚያ፥ ባሬ ኣዛዙዋን ባይናባ ዴዒያባዳን ኦዴ ፄሲያ፥ ኢ ኣማኔዳ ፆሳ ሲንን ኣብራሃሞ ኑሲ ኡባው ኣዉዋ። \x - \xo 4:16-17 \xt ዶም 17፡5\x* 
\p  
\v 18 ፆሳ ማፃፋይ ኣብራሃሞሲ፥ «ኔ ዜሬይ ሃዋ ኬና ጊዳና» ያጌዳዋዳን፥ ሃዋ ኬና ጊዳና ጊዴ፥ ናሼቻን ናጋናው ዳንዳዬና ዎዴ፥ ኣብራሃሞ ኣማኒዴኔ ሲንፔ ዴማና ጊዴ፥ ናሼቻን ናጊዴ፥ ጮራ ዜሬው ኣዉዋ ጊዴዳ። \x - \xo 4:18 \xt ዶም 15፡5\x* 
\v 19 ሄ ዎዴ፥ ኣብራሃሞ ዬሌቶዴፔ ፄቱ ላይ ኩማና ሃኒያ ጪማ፤ ሺን ባሬ ዳቡራንቻ ኣሳቴኔ ሳራ ናዓ ዬላናው ዳንዳዬናዋ ቆፔዳ ዎዴ፥ ኢ ባሬ ኣማኑዋን ዳቡሪቤና። \x - \xo 4:19 \xt ዶም 17፡17\x* 
\p  
\v 20-21 ፆሳ ኢ ቦንቺዴ፥ ኣው ኢማና ጌዳ ፆሳይ ቃሲ ፖላናው ዳንዳዪያዋ ሎይ ኤሪዴ ባሬ ኣማኑዋን ሚኔዳዋፔ ኣቲን፥ ኣማኔናን ኢፂዴ፥ ፆሳይ ኢማና ጌዳዋ ሲቤና።  
\v 22 ሄዋ ዲራው፥ ፆሳይ ቃሲ ኣ ኣማኑዋ ፂሎቴን ፓይዴዳ። 
\p  
\v 23 «ኣው ፂሎቴን ፓይዴዳ» ጊያ ቃላይ ኣ ፃላላው ፃፌቲቤና።  
\v 24 ሄ ቃላይ ኑ ጎዳ ዬሱሳ ሃይቁዋፔ ዴንዳ ፆሳ ኣማኒያ ኑሲካ ፂሎቴን ፓይዴታና ማላ ፃፌቴዳ።  
\v 25 ፆሳይ ኣ ኑ ናጋራ ዲራው፥ ሃይቆ ኣዴ ኢሚና፥ ኢ ኑና ፂሊሳናው ሃይቁዋፔ ዴንዴዳ። \x - \xo 4:25 \xt ኢሳ 53፡4-5\x* 
\c 5  
\s1 ኣማኑዋን ቤቲያ ሳሮቴኔ ሲጋቴ 
\p  
\v 1 ሄዋ ዲራው፥ ኑኒ ኣማኑዋን ፂሌዳዋን፥ ኑ ጎዳ ዬሱሲ ኪሪስቶሳ ባጋና ኑሲ ፆሳና ሳሮቴይ ዴዔ፤  
\v 2 ቃሲ ኢ ኑና ሃዒ ኑኒ ዴዒያ ፆሳ ኣ ኬካቴ ጊዶ ኣማኑዋን ኣሄዳ፤ ያቲና፥ ኑኒ ፆሳ ቦንቹዋ ሻካናው ኑሲ ዴዒያ ሂዶታን ጬቄቴቶ። 
\p  
\v 3-4 ሄዋ ፃላላ ጊዴና፤ ኑኒ ኑ ዋዪያንካ ናሼቴቶ፤ ኣዪሲ ጎፔ፥ ዋዪያፔ ዳንዳያይ፥ ቃሲ ዳንዳያፔ ፓጪያን ሚኒያዌ፥ ፓጪያን ሚኖታፔ ሂዶታይ ዪያዋ ኑኒ ኤሬቶ።  
\v 5 ፆሳይ ኑሲ ኢሜዳ ጌሻ ኣያና ባጋና ባሬ ሲቁዋ ኑ ዎዛናን ጉሴዳ ዲራው፥ ሄ ኑኒ ዴማናው ናሼቻን ናጊ ኡቴዳዌ ኑና ዬላዬና። 
\p  
\v 6 ኣዪሲ ጎፔ፥ ኑኒ ቢሮ ዎልቃይ ባይናዋንታ ጊዲዴ ዴዒሺን፥ ፆሳይ ዶሬዳ ዎዲ ጋኪና፥ ኪሪስቶሲ ናጋራንቻቱዋ ዲራው ሃይቄዳ።  
\v 7 ፂሎ ኡራ ዲራው፥ ኢቲ ኡራይ ሃይቃናዌ ዳሮ ሜቶባ፤ ሺን ሎዖ ኣሳ ዲራው ሃይቃናው፥ «ኤኖ» ጊያ ኡራይ ኦኒ ኤሪ ቤቴናን ኣጌና።  
\v 8 ሺን ኑኒ ቢሮ ናጋራንቻ ጊዲዴ ዴዒሺን፥ ኪሪስቶሲ ኑ ዲራው ሃይቄዳ፤ ሄዌ ፆሳይ ኑና ኣይ ኬና ሲቂንቶኔ ኣ ሲቁዋ ኤሪሴ።  
\v 9 ሲሚ ኑኒ ሃዒ ኣ ሱን ፂሌዳዋ ጊዶፔ፥ ኣ ባጋና ፆሳ ሃንቁዋፔ ኣታና።  
\v 10 ኣዪሲ ጎፔ፥ ኑኒ ፆሳና ካሴ ሞርኬ፤ ሺን ኣ ናዓ ሃይቁዋን ኣናና ሲጌቴዶ። ሄዋፔ ኣዴ፥ ሃዒ ኑኒ ፆሳና ሲጌቴዳዋፔ ጉዪያን፥ ኢ ፓፃ ጊዲያ ዲራው ኑና ኣሻና።  
\v 11 ሺን ሄዋ ፃላላ ጊዴና፤ ሃዒ ኑና ፆሳና ሲጌዳ ኑ ጎዳ ዬሱሲ ኪሪስቶሳ ባጋና ኑና ፆሳባይ ናሼቼ። 
\s1 ሃይቁ ኣዳማን ዪና፥ ዴዑ ኪሪስቶሳን ዬዳ 
\p  
\v 12 ሄዋ ዲራው፥ ናጋራይ ሃ ሳዓ ኢቲ ኣሳ ባጋና ጌሌዳ፤ ሄ ናጋራይ ባሬናና ሃይቁዋ ኣሄዳ፤ ሄዋ ጋሱዋን፥ ኣሳይ ኡባይ ኣዳማ ባጋና ናጋራ ኦዳ ዲራው፥ ሃይቁ ኣሳ ዛሪያ ኡባ ጋኬዳ። \x - \xo 5:12 \xt ዶም 3፡6\x* 
\v 13 ሂጊ ኢሜታናፔ ካሴ፥ ሃ ኣላሚያን ናጋራይ ዴዔ፤ ሺን ሂጊ ባይና ዎዴ ናጋራይ ፓይዴቴና።  
\v 14 ሺን ኣዳማ ዎዲያፔ፥ ሙሴ ዎዲያ ጋካናሲ፥ ሃይቁ ኣሳ ኡባ ሞዴዳ፤ ሃራይ ኣቶ ኣዳሚ ፆሳ ሂጌው ኣዛዜቴናን ኢፄዳዋዳን፥ ናጋራ ኦቤናዋንታካ ሃይቁ ሞዴዳ። 
\p ኣዪሲ ጎፔ፥ ኣዳሚ ያናዎ ሌሚሱዋ።  
\v 15 ሺን ፆሳ ኢሞታይ ኣዳማ ናጋራ ኬና ጊዴና ዲራው፥ ኡንቱንቱ ኢቲ ማላ ጊዲኪኖ፤ ኢቲ ቢታኒያ ናጋራ ዲራው፥ ጮራ ኣሳይ ሃይቄዳዌ ቱማ፤ ሺን ፆሳ ኣ ኬካቴይኔ ኣ ኢሞታይ ኢቲ ኣሳ ኣ ኬካቴ ባጋና፥ ዬሱሲ ኪሪስቶሳ ኣ ኬካቴ ባጋና ጮራ ኣሳው ዳሬዳ።  
\v 16 ፆሳ ኢሞታይ ናጋራ ኦዳ ቢታኒያ ባጋና ዬዳዋ ማላ ጊዴና፤ ኣዪሲ ጎፔ፥ ኣዳሚ ኢቲ ናጋራ ኦዳዋፔ ጉዪያን፥ ፆሳይ ኣ ባዪዜዳዋዳን ፒርዴዳ፤ ሺን ኣሳይ ዳሮ ናጋራ ኦዳዋፔ ጉዪያን ፆሳይ፥ «ሂንቴንቱ ባዪዚቤይኪታ» ጊዴ፥ ባሬ ኣ ኬካቴ ኡንቱንታ ቤሴ።  
\v 17 ኣዪሲ ጎፔ፥ ኢቲ ቢታኒያ ናጋራ ጋሱዋን፥ ኣ ናጋራ ባጋና፥ ሃይቁ ካዉቴዳዌ ቱማ፤ ሺን ኢቲ ኡራይ፥ ዬሱሲ ኪሪስቶሲ ኦዳባይ ኣይ ኬና ዳሬ፤ ፆሳ ዳሮ ኣ ኬካቴኔ ፂሎቴ ኢሞታ ኣኪያ ኡባይ ኪሪስቶሳ ባጋና ፆኒዴ ዴዓና። 
\p  
\v 18 ሲሚ ኢቲ ኡራይ ናጋራ ኦዳ ጋሱዋን ኣሳ ኡባ ቦላ ባዪዜዳዋዳን ፒርዳይ ዬዳ። ሄዋዳንካ ኢቲ ኡራይ ፂሎባ ኦዳ ጋሱዋን፥ ፆሳይ ኣሳ ኡባ፥ «ባይዚቤይኪታ» ጊዴ ኡንቱንቶ ዴዑዋ ኢሜዳ።  
\v 19 ኣዪሲ ጎፔ፥ ኢቲ ኡራይ ኣዛዜቴናን ኢፄዳ ጋሱዋን፥ ዳሮ ኣሳይ ናጋራንቻ ጊዴዳ፥ ሃዋዳንካ ቃሲ ኢቱ ኤኖ ጌዳዋን ጮራ ኣሳይ ፂላና። 
\p  
\v 20 ናጋራ ዳሪሳናው፥ ሂጊ ዬዳ፤ ሺን ናጋራይ ዳሪያ ዎዴ ፆሳ ኣ ኬካቴይ ሎይ ዳሬዳ።  
\v 21 ናጋራይ ሃይቁዋ ዎልቃን ካዉቴዳዋዳን፥ ሃዋዳንካ ቃሲ ፆሳ ኣ ኬካቴይ ፂሎቴ ዎልቃን ካዉቲዴ፥ ኑ ጎዳ ዬሱሲ ኪሪስቶሳ ባጋና፥ ኑና ሜና ዴዖ ካሌ። 
\c 6  
\s1 ናጋራፔ ሻኬቲዴ ኪሪስቶሳን ዴዑሳ 
\p  
\v 1 ያቲና፥ ኑኒ ዋጋኔ? ፆሳ ኣ ኬካቴይ ዳራናዳን፥ ናጋራን ሚኒዴ ዴዓኔ?  
\v 2 ጊዴና፤ ኑኒ ናጋራ ኦና ማላ ሃይቂዲጌዶ። ያቲና፥ ኑኒ ሃዋፔ ሲንው ዎቲ ኣ ጊዶን ዴዓኔ?  
\v 3 ዎይ ኑኒ ኡባቱ ኪሪስቶሳ ዬሱሳና ኢቲፔ ጊዳናው፥ ፃማቄቴዳ ዎዴ፥ ኣ ሃይቁዋንካ ኣናና ኢቲፔ ጊዳናው ፃማቄቴዳዋ ኤሪኪቴ?  
\v 4 ሄዋ ዲራው፥ ኪሪስቶሲ ባሬ ኣዉዋ ቦንቾ ዎልቃን ሃይቁዋፔ ዴንዶዋዳን፥ ኑኒካ ኦራ ዴዑዋ ዴዓናው፥ ኣ ሃይቁዋ ኣናና ሻካናው ፂንቃታኒ ኣናና ኢቲፔ ሞጌቴዶ። 
\p  
\v 5 ኣዪሲ ጎፔ፥ ኑኒ ኢ ሃይቄዳዋዳን ሃይቂዴ፥ ኣናና ኢቱዋ ጊዶፔ፥ ሃዋዳንካ፥ ሃይቁዋፔ ኢ ዴንዶዋዳን ኑኒካ ዴንዲዴ፥ ኣናና ኢቱዋ ጊዳና።  
\v 6 ኑኒ ሃዋፔ ሲንው ናጋራው ኣይሌ ጊዴና ማላ፥ ቃሲ ኑ ናጋራንቻ ኣሳቴ ዎልቃይ ያና ማላ፥ ኑ ኤጫ ኣሳቴ ኪሪስቶሳና ማስቃሊያ ቦላ ሚሲማሪያን ሼቲ ካቄቴዳዋ ኤሬቶ።  
\v 7 ኣዪሲ ጎፔ፥ ኢቲ ኡራይ ሃይቂያ ዎዴ ናጋራ ዎልቃይ ኣ ሞዴና፤ ሺን  
\v 8 ኑኒ ኪሪስቶሳና ሃይቄዳዋ ጊዶፔ፥ ኣናና ቃሲ ዴዓናዋ ኣማኔቶ።  
\v 9 ኣዪሲ ጎፔ፥ ኪሪስቶሲ ሃይቁዋፔ ዴንዴዳዋ፥ ቃሲ ላዔንዋ ኢ ሃይቄናዋኔ ሃይቁ ሲንፔ ኣ ሞዴናዋ ኑኒ ኤሬቶ።  
\v 10 ኢ ኢቲ ካላካ ሃይቄዳ፤ ናጋራው ኣ ቦላ ዎልቃይ ባዋ፤ ሺን ኢ ሃ ዴዒያ ዴዑዋ ፆሳው ዴዔ።  
\v 11 ሃዋዳን ቃሲ ሂንቴ ናጋራ ኦናዳን፥ ሂንቴንታ ሃይቄዳዋዳን ቆፒቴ፤ ሺን ጎዳ ኪሪስቶሳ ዬሱሳ ባጋና ፆሳው ሂንቴ ፓፃ ዴዒያዋዳን፥ ሂንቴንታ ቆፒቴ። 
\p  
\v 12 ሄዋ ዲራው፥ ሂንቴ ሂንቴንቱ ኣሳቴ ኣሙዋሲ ኣዛዜታና ማላ፥ ናጋራይ ሃይቂያ ሂንቴ ኣሳቴ ሞዶፖ።  
\v 13 ቃሲ ሂንቴ ኣሳቴፔ ኢቲ ሳኔ ኢታ ኦሱዋ ኦናው ናጋራው ኢሞፒቴ፤ ሺን ሃይቁዋፔ ዴንዴዳ ኣሳዳን ሂንቴንታ ፆሳው ኢሚቴ፤ ቃሲ ሂንቴ ኩሜን ኣሳቴካ ፂሎ ኦሱዋ ኦናው ፆሳው ኢሚቴ፤  
\v 14 ኣዪሲ ጎፔ፥ ናጋራይ ሂንቴንታ ሞዳናው ዳንዳዬና፤ ሂንቴ ፆሳ ኣ ኬካቴ ጋርሳና ዴዒታፔ ኣቲን፥ ሂጊያፔ ጋርሳና ዴዒኪታ። 
\s1 ፂሎቴው ኣይሌ ጊዲያዋ 
\p  
\v 15 ያቲና፥ ዋናኔ? ፆሳ ኣ ኬካቴ ጋርሳና ዴዒኖፔ ኣቲን፥ ሂጊያፔ ጋርሳና ዴዔና ዲራው፥ ናጋራ ኦኔ? ጊዴና፤  
\v 16 ሂንቴ ሂንቴንታ ኢቲ ኡራው ኣዛዜታናው፥ ኣይሊያዳን ኦዴ ኢሚያ ዎዴ፥ ሄ ሂንቴንታ ኣዛዚያዎ ኣይሌቱዋ ጊዲያዋ ኤሪታ፤ ዎይ ሂንቴ ሂንቴንቶ ሃይቁዋ ኣሂያ ናጋራው ኤኖ ጊታ፤ ዎይ ሂንቴ ሂንቴንታ ፂሎ ኦያ ኣዛዞ ኤኖ ጊታ።  
\v 17 ሺን ፆሳው ጋላታይ ጊዶ፤ ኣዪሲ ጎፔ፥ ናጋራው ካሴ ሂንቴ ኣይሌ፤ ሺን ጉዬፔ ሂንቴ ኣኬዳ ቲሚርቲያ ጊዶን ዴዒያ ቱማቴው ሂንቴ ኩሜን ዎዛናፔ ኣዛዜቴዲታ።  
\v 18 ሂንቴንቱ ናጋራ ኣይሌቴፔ ኬሲዴ፥ ፂሎቴው ኣይሌ ጊዴዲታ። 
\p  
\v 19 ሂንቴንቱ ሜታን ዳቡራንቻ ጊዲያ ዲራው፥ ታኒ ኦሲካ ጌሊያ ሃሳያ ሃሳያይ፤ ሂንቴ ካሴ ሂንቴ ኩሜን ኣሳቴ ናቁዋ ኦናው፥ ቱናቴዉኔ ናቆ ኣይሌ ኡዲዴ ኢሜዲታ፤ ሃዒ ሄዋዳንካ ሂንቴ ኩሜን ኣሳቴ ጌሻባ ኦናው፥ ፂሎቴው ኣይሌ ኡዲዴ ኢሚቴ። 
\p  
\v 20 ሂንቴንቱ ናጋራው ኣይሌቲዴ ዴዒያ ዎዴ፥ ፂሎቴይ ሂንቴንቶ ጎዳ ጊዴና።  
\v 21 ሂንቴንታ ሃዒ ዬላዪያ ዬዋቱዋ ሄ ዎዴ ኦዳዋፔ ኣይ ማዱዋ ዴሜዲቴ? ኣዪሲ ጎፔ፥ ሄ ዬዋቱዋ ዉርሴይ ሃይቁዋ።  
\v 22 ሺን ናጋራ ኣይሌቴፔ ሂንቴ ኬሲዴ፥ ፆሳው ኤኖጌዲታ፤ ቃሲ ሂንቴ ኦያ ኡባባኒ ሂንቴንታ ኡባካ ኣው ኣዴ ኢሜዲታ። ሄዌ ሂንቴንቶ ዎሬ፤ ሄዋ ዉርሴይ ሜና ዴዑዋ።  
\v 23 ኣዪሲ ጎፔ፥ ናጋራ ጋቲ ሃይቁዋ። ሺን ፆሳይ ኑ ጎዳ ኪሪስቶሳ ዬሱሳ ባጋና ኢሚያ ኢሞታይ ሜና ዴዑዋ። 
\c 7  
\s1 ሙሴ ሂጊያ ቃሹዋፔ ቢሌቲያዋ 
\p  
\v 1 ታናዳን ኣማኒያዋንቶ፥ ሂንቴንቱ ኡባይ ሂጊያ ኤሪያ ዲራው፥ ታኒ ጊያዋ ሎይ ኤሪታ፤ ሂጊ ኢቲ ኣሳይ ፓፃ ዴዔዳ ዎዴ ፃላላን ኣ ሞዴ።  
\v 2 ኣዪሲ ጎፔ፥ ኣሲና ጌሌዳ ሚሺራታ ኢዚ ኣሲናይ ፓፃ ዴዔዳ ኬናን፥ ሂጊያን ኣናና ቃሼታ ኡታዱ፤ ሺን ኢዚ ኣሲናይ ሃይቆፔ፥ ኣናና ጫቄዳ ሂጊ ኢዞ ሞዴና።  
\v 3 ሄዋ ዲራው፥ ኢዛ ባሬ ኣሲናይ ፓፃ ዴዒሺን፥ ሃራ ኣቱማዋ ጌሎፔ፥ ኣሳይ ኢዞ፥ «ዎሹሜዉኖ» ጋና። ሺን ኢዚ ኣሲናይ ሃይቆፔ፥ ሂጊ ኢዞ ሞዴና፤ ኢዛ ሃራ ኣሲና ጌሎፔኔ ኢዞ ኦኒኔ፥ «ዎሹሜዉኖ» ጌና። 
\p  
\v 4 ታናዳን ኣማኒያዋንቶ፥ ሄዋዳን ሂንቴንቱ ቃሲ ኪሪስቶሳ ኣሳቴፔ ኢቲ ባጋ ጊዲያ ዲራው፥ ሂንቴንቱ ኣባጋና ሃይቄዲታ። ቃሲ ኑኒ ፆሳ ማዲያ ኦሱዋ ኦና ማላ፥ ሂንቴንቱ ፆሳይ ሃይቁዋፔ ዴንዳ ኪሪስቶሳዋንታ።  
\v 5 ኣዪሲ ጎፔ፥ ኑኒ ኑ ኣሳቴይ ኮዬዳዋዳን ዴዒያ ዎዴ፥ ሂጊ ኑኒ ናጋራ ኦናዳን፥ ኑና ዴን፤ ኑ ኣሳቴ ጊዶን ኢታ ኣሙ ዴዒያ ዲራው፥ ኑኒ ሃይቆ ኣይፊያ ኣይፌዶ።  
\v 6 ሺን ሃዒ ኑኒ ኑና ቃቼዳዎ ሃይቄዳ ዲራው፥ ፆሳይ ኑና ሂጊያ ቃሹዋፔ ቢሌዳ። ሄዋ ዲራው፥ ኑኒ ጌሻ ኣያናይ ጊጊሴዳ ኦራ ኦጊያን ፆሳው ኤኖ ጋናዋፔ ኣቲን፥ ፃፌቴዳ ሂጊ ኑሲ ጊጊሴዳ ኤጫ ኦጊያን ኤኖ ጎኮ። 
\s1 ሂጊያኔ ናጋራ 
\p  
\v 7 ያቲና፥ ኑኒ ዋጋኔ? ሂጊ ባሬ ሁጴው ናጋሬ? ሄዋ ጊዴና፤ ሺን ሂጊ ናጋራይ ኣዬንቶ ታና ኤሪሴዳ። ኣዪሲ ጎፔ፥ ታኒ ሂጊ፥ «ኣሳባ ኣሞቶፓ» ጊቤኔንቶ፥ ኣሳባ ኣሞቲያዌ ኣዬንቶ ኤሪኬ። \x - \xo 7:7 \xt ኬስ 20፡17\x* 
\v 8 ሺን ናጋራይ ታኒ ኡባባ ኣሞታና ማላ፥ ኣዛዙዋ ባጋና ታ ቦላ ኦጊያ ዴሜዳ፤ ኣዪሲ ጎፔ፥ ሂጊ ባዌንቶ፥ ናጋራው ዎልቃይ ባዋ። 
\p  
\v 9 ካሴ ሂጊ ባይና ዎዴ ታኒ ፓፃ፤ ሺን ኣዛዙ ዬዳ ዎዴ ናጋራይ ዴዖ ሲሚና፥  
\v 10 ታኒ ቃሲ ሃይቃዲ፤ ታና ፓፃ ዎናው ፆሳይ ቆፔዳ ኣዛዙ፥ ታው ሃይቁዋ ኣሄዳ።  
\v 11 ኣዪሲ ጎፔ፥ ናጋራይ ኣዛዙዋ ባጋና ታና ጪሚያ ኦጊያ ዴሚዴ፥ ሄ ኣዛዙዋን ታና ዎዳ። \x - \xo 7:11 \xt ዶም 3፡13\x* 
\p  
\v 12 ሄዋ ዲራው፥ ሂጊ ጌሻ፤ ኣዛዙካ ጌሻ፥ ፂላኔ ሎዓ። 
\p  
\v 13 ያቲና፥ ሎዖባይ ታው ሃይቁዋ ኣሄዴ? ሄዋ ጊዴና፤ ሺን ታው ሄዋ ናጋራይ ኣሄዳ፤ ኣሳይ ናጋራይ ኣዬንቶ ሻኪዴ ኤራና ማላ፥ ናጋራይ ሎዖባ ባጋና፥ ታው ሃይቁዋ ኣሄዳ። ቃሲ ኣዛዙ፥ «ኦኒኔ ናጋራ ኦናው ቤሴና» ያጊያ ዲራው፥ ናጋራይ ካሴዋፔ ኣ ኢቴዳ። 
\s1 ኣሳ ዴዑዋ ጋርሳን ዴዒያ ባፂያ 
\p  
\v 14 ኑኒ ሂጊ ፆሳዋ ጊዲያዋ ኤሬቶ፤ ሺን ታኒ ታና ናጋራው ዛሊዔዳ ሃይቂያ ኣሳ፤  
\v 15 ታኒ ኦያዋ ዎዛና ኣኬ፤ ኣዪሲ ጎፔ፥ ታኒ ኢፂያዋ ኦይፔ ኣቲን፥ ታኒ ኦናው ዶሲያዋ ኦኬ።\x - \xo 7:15 \xt ጋል 5፡17\x* 
\v 16 ታኒ ኢፂያዋ ኦያዋ ጊዶፔ፥ ሂጊ ሎዓ ጊዲያዋ ማርካታይ።  
\v 17 ሄዋ ጊዶፔ፥ ሄ ዬዉዋ ታ ቦላ ዴዒያ ናጋራይ ኦያዋፔ ኣቲን፥ ሃዒ ታኒ ኦኬ። 
\p  
\v 18 ታናን፥ ሄዌኔ ታ ኣሳቴን ሎዖባይ ዴዔናዋ ታኒ ኤራይ፤ ኣዪሲ ጎፔ፥ ሎዖባ ኦያ ኣሙ ታ ቦላ ዴዖፔካ፥ ታኒ ሄ ሎዖባ ኦናናው ዳንዳዪኬ።  
\v 19 ታኒ ኢፂያ ኢታባ ኦይፔ ኣቲን፥ ታኒ ዶሲያ ሎዖባ ኦኬ።  
\v 20 ሺን ታኒ ኢፂያዋ ኦያዋ ጊዶፔ፥ ሄዋ ታ ቦላ ዴዒያ ናጋራይ ኦያዋፔ ኣቲን፥ ሃዒ ሄዋ ኦያዌ ታና ጊዲኬ። 
\p  
\v 21 ሲሚ ታኒ ሎዖባ ኦናው ዶሲሺን፥ ኢታባ ኦያዌ ታው ሂጌ ጊዲያዋ ዴማዲ።  
\v 22 ኣዪሲ ጎፔ፥ ታኒ ታ ዎዛና ጊዶን ፆሳ ሂጊያን ናሼታይ፤  
\v 23 ሺን ታ ቦላ ጊዶን ዴዒያ ታ ዎዛና ቆፋ ሂጊያና ዋቲያ ዱማ ሂጊያ ቤዓይ። ሄ ሂጊ ታ ቦላ ጊዶን ዴዒያ ናጋራ ኦሲሲያ ሂጊያን ታና ቃሺሴ።  
\v 24 ታኒ ኣይባ ናሼቺ ባይና ኣሴ! ታና ሃይቆ ኣፊያ ሃ ኣሳቴፔ ኣሻናዌ ኦኔ?  
\v 25 ኑ ጎዳ ዬሱሲ ኪሪስቶሳ ባጋና ፆሳው ጋላታይ ጊዶ። 
\p ሲሚ ታኒ ታ ዎዛና ቆፋን ፆሳ ሂጌው ኤኖ ጋይ። ሺን ታ ኣሳቴን ታና ናጋራ ኦሲሲያ ሂጌው ኤኖ ጋይ። 
\c 8  
\s1 ጌሻ ኣያናይ ኮዪያዋዳን ዴዑሳ 
\p  
\v 1 ሄዋ ዲራው፥ ኪሪስቶሳ ዬሱሳና ዴዒያዋንቱ ቦላን ፒርዳይ ሃዒ ባዋ፤  
\v 2 ኣዪሲ ጎፔ፥ ኪሪስቶሳ ዬሱሳ ባጋና ኑሲ ዴዑዋ ኢሚያ ጌሻ ኣያና ሂጊ ታና \f + \fr 8:2 \fq ታና፡ \ft ኢቲ ኢቲ ጌሻ ቃላ ቢሌይ፥ ኔና ዎይ ሂንቴንታ ያጌ፤ ሃራይ ቃይ ኑና ያጌ።\f* ናጋራ ሂጊያ ኣይሌቴፔኔ ሃይቁዋ ሂጊያ ኣይሌቴፔ ኬሴዳ።  
\v 3 ኣሳ ኣሳቴይ ዳቡራንቻ ጊዲያ ዲራው፥ ሂጊ ኦናው ዳንዳዪቤናዋ ፆሳይ ኦዳ፤ ናጋራንቻቱዋ ኣሳቴ ማላ ኣሳቴና ዴዒያ ባሬ ናዓ፥ ኣሳይ ኦዳ ናጋራው ያርሹዋ ጊዳናው ፆሳይ ኪቲዴ፥ ኣሳ ኣሳቴ ጊዶን ዴዒያ ናጋራ ፒርዴዳ።  
\v 4 ጌሻ ኣያናይ ኮዪያዋዳን ዴዒያዋንቱፔ ኣቲን፥ ኑ ኣሳቴይ ኮዪያዋዳን ዴዓናዋንቱ ቦላ፥ ኑ ቦላ፥ ሂጊያ ፂሎ ኣዛዙ ፖሌታና ማላ፥ ፆሳይ ሃዋ ኦዳ። 
\p  
\v 5 ባሬንቱ ኣሳቴይ ኮዪያዋዳን ዴዒያዋንቱ ባሬንቱ ኣሳቴባ ቆፒኖ፤ ሺን ጌሻ ኣያናይ ኮዪያዋዳን ዴዒያዋንቱ ጌሻ ኣያናባ ቆፒኖ።  
\v 6 ኣሳቴባ ቆፑሳይ ሃይቁዋ ኣሄ፤ ሺን ጌሻ ኣያናባ ቆፑሳይ ዴዑዋኔ ሳሮቴ ኣሄ።  
\v 7 ኣሳቴባ ቆፑሳይ ፆሳው ኢፆ፤ ኣያው ጎፔ፥ ኣሳቴይ ፆሳ ሂጌው ኤኖ ጌና፤ ቃሲ ኤኖ ጋናዉካ ኣው ዳንዳዬቴና።  
\v 8 ባሬንቱ ኣሳቴው ኤኖ ጊያዋንቱ ፆሳ ናሼቻናው ዳንዳይኪኖ። 
\p  
\v 9 ሺን ፆሳ ኣያናይ ሂንቴንቱን ዴዖፔ፥ ጌሻ ኣያናይ ጊያዋዳን ዴዒታፔ ኣቲን፥ ሂንቴ ኣሳቴይ ኮዪያዋዳን ዴዒኪታ። ሺን ኦኒኔ ኪሪስቶሳ ኣያናይ ባይናዋ ጊዶፔ፥ ሄ ኡራይ ኪሪስቶሳዋ ጊዴና።  
\v 10 ሺን ኪሪስቶሲ ሂንቴንቱን ዴዖፔ፥ ሂንቴ ኣሳቴይ ናጋራ ጋሱዋን ሃይቄዳዋ፤ ሺን ሂንቴ ኣያናይ ፂሎቴ ጋሱዋን ሂንቴንቱን ፓፃ ዴዔ።  
\v 11 ሺን ዬሱሳ ሃይቁዋፔ ዴንዳ ፆሳ ኣያናይ ሂንቴ ጊዶን ዴዖፔ፥ ሃይቁዋፔ ኪሪስቶሳ ዴንዳ ፆሳይ ቃሲ ሂንቴንቱን ዴዒያ ባሬ ጌሻ ኣያናን፥ ሃይቂያ ሂንቴ ኣሳቴዉካ ዴዑዋ ኢማና። 
\p  
\v 12 ሲሚ ታናዳን ኣማኒያዋንቶ፥ ኑኒ ኣጩዋና ዴዔቶ፤ ኑ ኣሳቴይ ኮዪያዋዳን ዴዓናው ኑሲ ቤሴና።  
\v 13 ኣዪሲ ጎፔ፥ ሂንቴ ሂንቴ ኣሳቴይ ጊያዋዳን ዴዖፔ፥ ሂንቴ ሃይቃና፤ ሺን ሂንቴ ሂንቴ ናጋራ ኦሱዋ ጌሻ ኣያናን ዎፔ፥ ፓፃ ዴዓና።  
\v 14 ፆሳ ኣያናይ ካሌያ ኡባቱ ፆሳ ናና።  
\v 15 ኣዪሲ ጎፔ፥ ኑኒ ኑ ኮሻ ቁ ኦዴ፥ «ኣባ! ታ ኣቦ» ያጊዴ ፄሲያ፥ ኑና ፆሳ ናና ኬሲያ ጌሻ ኣያና ፆሳፔ ኣኬዶፔ ኣቲን፥ ላዔዋ ያያናው ኣይሌ ኬሲያ ኣያና ኣኪቤይኮ።  
\v 16 ፆሳ ኣያናይ ባሬ ሁጴው ኑ ኣያናና ጊዲዴ፥ ኑኒ ፆሳ ናና ጊዲያዋ ማርካቴ።  
\v 17 ኑኒ ኣ ናና ጊዶፔ፥ ኢ ባሬ ኣሳው ሚንጄዳ ኣንጁዋ ላታና፤ ቃሲ ኑኒ ፆሳይ ኪሪስቶሳው ሚንጄዳዋካ ኣናና ላታና፤ ኑኒ ኪሪስቶሳ ዋዪያ ኣናና ሻኮፔ፥ ኣ ቦንቹዋካ ኣናና ሻካና። 
\s1 ፆሳ ናናው ቆንጫናው ዴዒያ ቦንቹዋ 
\p  
\v 18 ኣዪሲ ጎፔ፥ ኑኒ ሃዒ ዋዬቲያ ዋዪያ ኑሲ ሲንፔ ቆንጫና ቦንቹዋና ጋናው፥ ኡባካ ዳንዳዬቴና ጋዴ ታኒ ቆፓይ።  
\v 19 ፆሳይ ሜዳ ሜታ ኡባይ ፆሳ ናናይ ቆንጫናዋ ሎይ ላሞቲ ኡቴዳ።  
\v 20 ኣዪሲ ጎፔ፥ ሜታ ኡባይ ማዱ ባይናባ ጊዳናዳን፥ ፆሳይ ኣ ቦላ ፒርዴዳ፤ ሲንፔ ዴማና ጊዴ ናሼቻን ናጊ ኡታናዳን ኡዴዳ ፆሳይ ኮዬዳ ዲራው ሃኔዳፔ ኣቲን፥ ሜታ ኡባይ ባሬ ሁጴው ኮዬዳዋን ጊዴና።  
\v 21 ሜታ ኡባይ ባሬ ሁጴው ባሻ ኣይሌቴፔ ኢቲ ጋላሲ ኬሳናዋ፤ ቃሲ ሄ ሜታቱ ፆሳ ናናይ ኣይሌቴፔ ኬሴዳ ቦንቾ ኬሳ ሻካና።  
\v 22 ኣዪሲ ጎፔ፥ ሜታ ኡባይ ኢቲፔ ሃዋ ጋካናው፥ ማጫ ኣሳ ዬሉ ኦይቂና ኦሊያዋዳን፥ ሳኩዋን ኦሊያዋ ኑኒ ኤሬቶ።  
\v 23 ቃሲ ሄዋ ፃላላ ጊዴና፤ ኑኒ፥ ጌሻ ኣያና ፆሳ ባይራ ኢሞታዳን ኡዲዴ ኣኬዳዋንቱ፥ ኑ ሁጴው ቃሲ ፆሳይ ኑና ባሬ ናና ኦናዳኒኔ ኑ ኩሜን ኣሳቴ ዎዛናዳን ናጊዴ፥ ኑ ጊዶን ኦሌቶ።  
\v 24 ኣዪሲ ጎፔ፥ ኑኒ ፆሳይ ኢማና ጌዳዋን ኣቴዶ። ሺን ኑኒ ፆሳይ ኢማና ጌዳዋ ቤዖፔ፥ ያቲና፥ ሄዌ ናሼቻን ናጊያዋ ጊዴና፤ ኣዪሲ ጎፔ፥ ባሬ ቤዒያዋ ዴማና ጊዴ፥ ናሼቻን ናጊያዌ ኦኔ?  
\v 25 ሺን ኑኒ ቤዔናዋ ዴማና ጊዴ፥ ናሼቻን ናጎፔ፥ ሄዋ ዳንዳዪዴ ናጌቶ። 
\p  
\v 26 ሃዋዳን ቃሲ ጌሻ ኣያናይ ኑ ዳቡራ ማዳናው ዬ፤ ኣዪሲ ጎፔ፥ ኑኒ ፆሳ ዎቲ ዎሳናው ቤሲንቶ ኤሮኮ፤ ሺን ጌሻ ኣያናይ ባሬ ሁጴው ቃላን ቆንጪሳናው ዳንዳዬቴና ኦሊያን ኑሲ ጋናቴ።  
\v 27 ቃሲ ኣሳ ዎዛና ቢዲያ ፆሳይ፥ ጌሻ ኣያናይ ኢ ኮዪያዋዳን፥ ፆሳ ናቶ ጋናቲያ ዲራው፥ ጌሻ ኣያና ቆፋይ ኣዬንቶ ኤሬ። 
\p  
\v 28 ፆሳይ ባሬና ሲቂያዋንቶ፥ ባሬ ቆፋዳን ፄሴዳዋንቶ፥ ኡባ ዬዉዋ ሎዖቴው ኦያዋ ኑኒ ኤሬቶ።  
\v 29 ፆሳይ ባሬ ናዓይ ጮራ ኢሻቱዋ ጊዶን ባይራ ጊዳናዳን፥ ኢ ካሴ ኤሬዳዋንታ ቃሲ ባሬ ናዓ ማላታናዳን፥ ካሴቲዴ ቆፋ ቃቼዳ።  
\v 30 ፆሳይ ካሴቲዴ ቆፔዳዋንታ፥ ኡንቱንታ ቃሲ ፄሴዳ፤ ሄ ፄሴዳዋንታካ ጌሼዳ፤ ሄ ጌሼዳዋንታካ ቃሲ ቦንቼዳ። 
\s1 ፆሳ ሲቁዋ 
\p  
\v 31 ያቲና፥ ኑኒ ሃዋ ኡባ ዋጋኔ? ፆሳይ ኑ ባጋ ጊዶፔ፥ ኑና ኦኒ ኤቄታናዌ?  
\v 32 ኢ ሃራይ ኣቶ ባሬ ናዓካ ዋዪያፔ ጉዬ ኣሺቤና፤ ሺን ኣ ኑሲ ኡባው ኣዴ ኢሚ ኣጌዳ። ኢ ባሬ ናዓ ኢሜዳዌ ቃሲ ኑሲ ኡባባ ጮ ኢሜኔ? 
\p  
\v 33 ፆሳይ ዶሬዳዋንታ ኦኔ ሞታናዌ? ፆሳይ ባሬ ሁጴው ኡንቱንታ ፂሊሴዳ።  
\v 34 ያቲና፥ ኡንቱንቱ ቦላ ፒርዳናው ዳንዳዪያዌ ኦኔ? ሄዋ ጎፔ፥ ሃይቁዋፔ ዴንዲዴ፥ ፆሳፔ ኡሼቻ ባጋና ኡቴዳ፥ ኪሪስቶሲ ዬሱሳ፤ ኢ ቃሲ ኑሲ ጋናቴ። 
\p  
\v 35 ሲሚ ኑና ኪሪስቶሳ ሲቁዋፔ ሻካናዌ ኦኔ? ዋዪ ዎይ ሜቱ ዎይ ዬዴርሱ ዎይ ኮሻይ ዎይ ካሉ ዎይ ያሻይ ዎይ ኦላይ ኑና ሻካኔ?  
\v 36 ፆሳ ማፃፋይ፥ «ኑኒ ኔ ዲራው፥ ኡባ ጋላሲ ሃይቄቶ፤ ሹካው ኣፊያ ዶርሳዳን ፓይዴቴቶ» ያጌ። \x - \xo 8:36 \xt ማዝ 44፡22\x* 
\v 37 ሺን ኑኒ ኑና ሲቄዳ ኣኒ ሃ ዬዉዋ ኡባን ኑና ፆኒያዋንቱፔ ኣቶ። 
\p  
\v 38-39 ኣዪሲ ጎፔ፥ ሃይቁዋ ጊዲና፥ ዴዑዋ፥ ኪታንቻቱዋ ጊዲና፥ ሞዲያዋንታ፥ ሃዒ ዴዒያዋንታ ጊዲና፥ ሲንፔ ያናዋ፥ ዎልቃማቱዋ ጊዲና፥ ቦላ ሳሉዋ ጊዲና፥ ጋርሳ ሳዓ፥ ኣይ ሜታ ጊዲናካ፥ ኑ ጎዳ ኪሪስቶሳ ዬሱሳን ዴዒያ ፆሳ ሲቁዋፔ ኑና ሻካናው ዳንዳዬናዋ ታኒ ኤራዲ። 
\c 9  
\s1 ፆሳይ ካሴ ዶሬዳ ኢስራዔሊያ ኣሳ 
\p  
\v 1 ታኒ ቱሙዋ ሃሳያይ፤ ታኒ ኪሪስቶሳሳ፤ ቃሲ ዎርዶቲኬ። ጌሻ ኣያናይ ሞዲያ ታ ቲላ ዎዛናይ ታኒ ዎርዶቴናዋ ታው ማርካቴ።  
\v 2-3 ታው ኣሹዋን ዛሬ ጊዲያ ታናዳን ኣማኒያዋንቶ፥ ታ ዎዛናን ዳሮ ቃሬታይኔ ኣጌና ቆፋይ ዴዔ። ኣዪሲ ጎፔ፥ ታኒ ታ ሁጴው ኡንቱንቱ ዲራው፥ ፆሳ ሼቃፔ ጋርሳና ዴዓሪኪታሻ! ቃሲ ኪሪስቶሳፔካ ሻኬታሪኪታሻ!  
\v 4 ኡንቱንቱ ኢስራዔሊያ ኣሳቱዋ፤ ፆሳይ ኡንቱንታ ባሬ ናና ኡዲዴ፥ ባሬ ቦንቹዋ ኡንቱንቱና ሻኬዳ። ኡንቱንቱና ቃላ ጌሊዴ፥ ሂጊያ ኡንቱንቶ ኢሜዳ። ኡንቱንቱ ፆሳው ቤሲያ ኦጊያን ጎዪኒኖ፤ ቃሲ ፆሳይ ኢማና ጌዳዋካ ኣኬዲኖ። \x - \xo 9:4 \xt ኬስ 4፡22\x* 
\v 5 ኡንቱንቱ ዜሬኒ ካሴ ኣዋቱዋ ዛሬ፤ ቃሲ ኪሪስቶሲካ ኣሹዋን ኡንቱንቱ ዛሬ። ኢ፥ ኡባፔ ቦላ ጊዲዴ ሞዲያ፥ ሜናው ጋላቴቴዳዌ ፆሳ። ኣሜንዒ። 
\p  
\v 6 ሺን ታኒ፥ «ፆሳይ ኢማና ጌዳዌ ኣታና» ያጊኬ። ኣዪሲ ጎፔ፥ ኢስራዔሊያ ኣሳ ኡባቱ ፆሳይ ዶሬዳዋንታ ጊዲኪኖ።  
\v 7 ቃሲ ኣብራሃሜ ዜሬቱ ኡባቱ ፆሳ ናና ጊዲኪኖ። ፆሳይ ኣብራሃሞሲ፥ «ኔ ዜሬይ ዪሳቃ ባጋና ፄሴታናዋ» ያጌዳ። \x - \xo 9:7 \xt ዶም 21፡12\x* 
\v 8 ሄዋ ጉሳይ ኡንቱንቱ ፆሳይ ኢማና ጌዳ ኦጊያን ዬሌቴዳ ናናይ ዛሪያዳን ፓይዴታና፤ ሺን ኣሳ ቆፋዳን ዬሌቴዳዋንቱ ፆሳ ናና ጊዲኪኖ ጉሳ።  
\v 9 ኣዪሲ ጎፔ፥ ፆሳይ ኢማና ጊዴ ሃሳዬዳዌ ሃዋ፤ «ታኒ ሃ ጌቴቴዳዋዳን ሄዎዴ ያና፤ ሳራካ ኣቱማ ናዓ ዬላና» ያጌዳ። \x - \xo 9:9 \xt ዶም 18፡10\x* 
\p  
\v 10 ሄዋ ፃላላካ ጊዴና፤ ኢርቢቃ ዬሌዳ ማንቴ ናና ኣዉ ኢቱዋ፤ ኢካ ኑ ኣዉዋ ዪሳቃ።  
\v 11-12 ሺን ኢቲ ናዓ ዶሬዳ ፆሳይ ባሬ ሁጴው ቆፔዳዋ ጊዳናዳን፥ ፆሳይ ኢርቢቂው፥ «ባይራይ ቴፋው ኣዛዜታና» ያጌዳ፤ ኢ ሄዋ ኡንቱንቱ ዬሌታናፔኔ ኢታባ ዎይ ሎዖባ ኣይኔ ኦናፔ ካሴና ጌዳ። ሄዋ ዲራው፥ ፆሳ ዶሩ ኣ ፄሴዳዋዳኒፔ ኣቲን፥ ኡንቱንቱ ኦዳዋና ጊዴና። \x - \xo 9:11-12 \xt ዶም 25፡33\x* 
\v 13 ፆሳ ማፃፋይ፥ «ያዪቆባ ሲቃዲ፤ ሺን ኤሳ ኢፃዲ» ያጌ። 
\p  
\v 14 ያቲና፥ ኑኒ ዋጋኔ? ፆሳይ ዴሺሲዴ ፒርዲ? ሄዋ ጊዴና።  
\v 15 ኣዪሲ ጎፔ፥ ሙሴው ኢ፥ 
\q1 «ታኒ ማራናው ኮዪያዋንታ ማራና፤ 
\q2 ቃሲ ቃሬታናው ኮዪያዋንቱሲካ ቃሬታና» 
\m ያጌዳ። \x - \xo 9:15 \xt ኬስ 33፡19\x* 
\v 16 ሲሚ ፆሳይ ኣሳ ማሪያዌ ኢ ማራናው ኮዪያ ዲራሳፔ ኣቲን፥ ኣሳይ ኮዪያ ዎይ ኦያ ዲራሳ ጊዴና። 
\p  
\v 17 ኣዪሲ ጎፔ፥ ፆሳ ማፃፋይ ጊብፄ ካቲያሲ፥ «ታኒ ታ ዎልቃ ኔናን ቤሳናዉኔ ታ ሱንይ ኣላሚያ ኡባን ኦዴታናው፥ ሄዋሲ ታኒ ኔና ካዉዲ» ያጌ። \x - \xo 9:17 \xt ኬስ 9፡16\x* 
\v 18 ሲሚ ፆሳይ ማራና ኮዪያዋ ማሬ፤ ቃሲ ዎዛና ጎርዳና ኮዪያዋ ዎዛና ጎርዴ። 
\s1 ፆሳ ሃንቁዋኔ ማሮታ 
\p  
\v 19 ሲሚ ሂንቴ ታና፥ «ሄዌ ቱማ ጊዶፔ፥ ፆሳይ ኣሳ ባዪዙዋሲ ኣያው ቶሺ? ፆሳይ ጌዳዋ ኢፃዲ ጋናዌ ኦኔ?» ያጋናው ዳንዳዪታ። 
\p  
\v 20 ሺን ታ ላጌው፥ ፆሳሲ ዛራናው ኔኒ ኦኔ? ኡርቃፔ ሜቴዳ ሚሻይ ጉዬ ዛሪዴ ባሬና ሜዳዋ፥ «ታና ሃዋዳን ኣዪሲ ሜዲ?» ጊዴ ኦቻናው ዳንዳይ? \x - \xo 9:20 \xt ኢሳ 29፡16፤ 45፡9\x* 
\v 21 ዎይ ኡርቃ ሜያዌ ባሬ ሜያ ኡርቃ ባሬ ኮዪያዋዳን ኦናዉኔ ኢቲ ማላ ኡርቃፔ ኢቱዋ ቦንቾ ሚሻ ኡዲዴ፥ ቃሲ ኢቱዋ ቶሼቴዳ ኦሱዋ ኦያ ሚሻ ኡዲዴ ሜናው ኣው ማቲ ባዌ? 
\p  
\v 22 ፆሳይ ኦዳዌ ሃዋና ኢቱዋ። ኢ ባሬ ሃንቁዋ ቤሳናዉኔ ባሬ ዎልቃ ኤሪሳናው ኮዬዳ፤ ኢ ባሬ ሃንቁዋን ፒርዳናዋንታ፥ ባዪዛናው ጊጊ ኡቴዳዋንታ፥ ዳሮ ጌንጩዋን ዳንዳዬዳ።  
\v 23 ቃሲ ኢ ማሬዳዋንቶ፥ ባሬ ቦንቹዋ ኣካናው ጊጊሲ ዎዳዋንቱሲ ኢ ኣይ ኬና ቦንቼቲንቶኔ ቤሳናው ኮዬዳ።  
\v 24 ኑኒ ኢ ፄሴዳዋንታ፤ ሺን ኣዪሁዳ ኣሳ ፃላላፔ ጊዴናን፥ ኣዪሁዳ ጊዴና ኣሳ ጊዶፔካ ፄሴዳ። 
\p  
\v 25 ሆሴዓ ማፃፋን ኢ ጊያዌ ሃዋ፤ 
\q2 «ታ ኣሳ ጊዴናዋንታ፥ 
\q2 ‹ታ ኣሳ› ጋዴ ፄሳና። 
\q2 ታኒ ሲቃቤና ዛሪያካ፥ 
\q2 ‹ታ ሲቃቶ› ጋዴ ፄሳና። \x - \xo 9:25 \xt ሆስ 2፡23\x* 
\q1  
\v 26 ‹ሂንቴንቱ ታ ኣሳ ጊዲኪታ› ጊያዋ 
\q2 ኡንቱንቱ ሲሴዳ ሄ ሳዓን፥ 
\q2 ኡንቱንቱ፥ ‹ዴዑዋ ፆሳ ናና› ጌቴቲዴ ፄሴታናዋንታ» 
\m ያጌ። \x - \xo 9:26 \xt ሆስ 1፡10\x* 
\v 27 ኢሲያሲ ኢስራዔሊያ ኣሳባ ያጊዴ ሃሳዬዳ፤ 
\q2 «ኢስራዔሊያ ኣሳይ ኣባ ማታን 
\q2 ዴዒያ ሻፊያ ኬና ጊዶፔካ፥ 
\q1 ኡንቱንቱፔ ኣማሬዳዋንቱ ፃላላይ ኣታና። \x - \xo 9:27 \xt ኢሳ 10፡22-23\x* 
\q1  
\v 28 ኣዪሲ ጎፔ፥ ጎዳይ ሳዓ ቦላን 
\q1 ዴዒያ ኣሳ ኡባ ቦላ 
\q2 ኤሌካ ፒርዳና» 
\m ያጌዳ።  
\v 29 ኢሲያሲ ካሴቲዴ፥ 
\q2 «ኡባፔ ዎልቃማ ጎዳይ ኑሲ 
\q2 ኣማሬዳ ዜሬ ኣሼኔንቶ፥ 
\q2 ኑኒ ሶዶማ ካታማዳኒኔ 
\q2 ጋሞራ ካታማዳን ሃኔዶሺን» 
\m ያጊ ሃሳዬዳ። \x - \xo 9:29 \xt ኢሳ 1፡9\x* 
\p  
\v 30 ያቲና፥ ኑኒ ዋጋኔ? ፂሎቴ ኮዪቤና ኣዪሁዳ ጊዴና ኣሳይ ኣማኑዋን ፂሌዳ፤  
\v 31 ሺን ኢስራዔሊያ ኣሳይ ባሬንታ ፂሊሲያ ሂጊያ ኮዬዳዋንቱ ሄ ሂጊያ ዴሚቤይኪኖ።  
\v 32-33 ኣዪሲ ዴሚቤይኪኖ? ኡንቱንቱ ኦሱዋናፔ ኣቲን፥ ኣማኑዋን ፂሎቴ ኮዪቤና ዲራሳ። ኡንቱንቱ ፆሳ ማፃፋይ፥ 
\q1 «ኣኬኪቴ፤ ታኒ ፂዮኔን ኣሳ ቢያ ሹቻ፥ 
\q2 ኡንቱንቱ ኦጊያን ዛላ ዎና። 
\q1 ሺን ኣኒ ኣማኒያ ኦኒኔ ዬላቴና» 
\m ያጊዴ ፃፌቶዋዳን ቢያ ሹቻን ቤቴዲኖ። \x - \xo 9:32-33 \xt ኢሳ 28፡16\x* 
\c 10  
\s1 ኢስራዔሊያ ኣሳይ ፆሳ ኦጊያ ካሊቤና 
\p  
\v 1 ታናዳን ኣማኒያዋንቶ፥ ታኒ ኢስራዔሊያ ኣሳው ታ ኩሜን ዎዛናፔ ኣሞቲያዌኔ ፆሳ ዎሲያዌ ኡንቱንቱ ኣታናሳ፤  
\v 2 ኣዪሲ ጎፔ፥ ኡንቱንቱ ፆሳው ኦናው ሎይ ኮዪያዋ ታኒ ማርካታይ፤ ሺን ኡንቱንቱ ፆሳው ኦናው ሎይ ኮዪያ ኮሻይ ቱሙ ኤራቴፔ ጊዴና።  
\v 3 ኣዪሲ ጎፔ፥ ፆሳይ ኣሳ ፂሊሲያ ኦጊያ ኡንቱንቱ ኤሬናን፥ ባሬንቱ ሁጴ ፂሎቴ ኤሳናው ኮዬዲኖ፤ ቃሲ ባሬንቱ ሁጴው ፆሳይ ኣሳ ፂሊሲያ ኦጌው ኤኖ ጊቤይኪኖ።  
\v 4 ኣዪሲ ጎፔ፥ ኣማኔዳ ኡባይ ፂላናዳን፥ ኪሪስቶሲ ሂጊያ ቆፋ ፖሌዳ። 
\s1 ኣቶቴይ ኡባሳ 
\p  
\v 5 ኣሳይ ሂጌው ኣዛዜቲዴ ፂሊያባው ሙሴ፥ «ሂጊ ኣዛዚያዋ ኦያ ኦኒኔ ሄ ሂጊያን ፓፃ ዴዓና» ያጊ ፃፌዳ፤ \x - \xo 10:5 \xt ዎግ 18፡5\x* 
\v 6 ሺን ኣማኑዋን ፂሊያባው ጌቴቴዳዌ ሃዋ፤ «ኔ ዎዛናን፥ ‹ኦኒ ሳሉዋ ፑዴ ባኔ?› ጎፓ። ሄዌ ኪሪስቶሳ ዱጌ ዎናሳ፤ \x - \xo 10:6 \xt ዛር 30፡12-14\x* 
\v 7 ዎይ ‹ዱጌ ሳዓ ጋርሳ ዎናዌ ኦኔ?› ጎፓ። ሄዌ ኪሪስቶሳ ሃይቁዋፔ ዴንናሳ።  
\v 8 ሺን ኢ ጊያዌ ሃዋ፤ ‹ፆሳ ቃላይ ኔ ማታና፤ ኔ ዶናኒኔ ኔ ዎዛናን ዴዔ› ጌቴቴዳ» ያጌ። ሄዌካ ኑኒ ሂንቴንቶ ኦዲያ ኣማኑዋ ቃላ። 
\p  
\v 9 ኔኒ፥ «ዬሱሲ ጎዳ» ጋዴ ኔ ዶናን ማርካቶፔ፥ ቃሲ ፆሳይ ሃይቁዋፔ ኣ ዴንዳዋ ኔ ዎዛናን ኣማኖፔ፥ ኔኒ ኣታና።  
\v 10 ኣዪሲ ጎፔ፥ ኣሳይ ባሬ ዎዛናን ኣማኒዴ ፂሌ፤ ባሬ ዶናንካ ማርካቲዴ ኣቴ።  
\v 11 ፆሳ ማፃፋይ፥ «ኣኒ ኣማኒያ ኦኒኔ ዬላቴና» ያጌ። \x - \xo 10:11 \xt ኢሳ 28፡16\x* 
\v 12 ኣዪሁዳ ኣሳኔ ኣዪሁዳ ጊዴና ኣሳ ጊዶን ዱማቴይ ባዋ። ኢቲ ፆሳይ ኡባ ጎዳ፤ ኢ ባሬና ፄሲያ ኡባቶ ዳሮ ኬካ።  
\v 13 ኣዪሲ ጎፔ፥ ፆሳ ማፃፋይ፥ «ጎዳ ሱን ፄሲያ ኦኒኔ ኣታና» ያጌ። \x - \xo 10:13 \xt ኢዩ 2፡32\x* 
\p  
\v 14 ያቲና፥ ኡንቱንቱ ኣ ኣማኒቤናዋንታ ጊዶፔ፥ ዎቲ ኣ ፄሳናው ዳንዳዪኖ? ቃሲ ቃላ ሲሲቤናዋንቱ ዋኒ ኣማናናው ዳንዳዪኖ? ቃላ ኦዲያዌ ዮፔ፥ ኡንቱንቱ ዋኒ ሲሳናው ዳንዳዪኖ?  
\v 15 ቃሲ ቃላ ኦዲያዋንቱ ኪቴቴናን ኣጎፔ፥ ኦሱ ዎቲ ኦዴታናው ዳንዳዪ? ኣዪሲ ጎፔ፥ ፆሳ ማፃፋይ፥ «ናሼቺያ ሚሺራቹዋ ኦዲያዋንቱ ዩሳይ ዎቲ ሎዒ!» ያጌ። \x - \xo 10:15 \xt ኢሳ 52፡7\x* 
\p  
\v 16 ሺን ኡንቱንቱ ኡባይ ዎንጋላው ኣዛዜቲቤይኪኖ፤ ኣዪሲ ጎፔ ኢሲያሲ፥ «ታ ጎዳው፥ ኑኒ ማርካቴዳዋ ኦኒ ኣማኔዴ?» ያጌዳ። \x - \xo 10:16 \xt ኢሳ 53፡1\x* 
\v 17 ሲሚ ኣሳይ ቃላ ሲሲዴ ኣማኔ፤ ቃሲ ኢቲ ኡራይ ኪሪስቶሳ ቃላ፥ ኦዲና ሲሴ። 
\p  
\v 18 ሺን ኡንቱንቱ ቃላ ሲሲቤናዌ ቱሜ ጋዴ ታኒ ኦቻይ። ቱማ ኡንቱንቱ ሲሴዲኖ፤ ፆሳ ማፃፋይ፥ 
\q1 «ኡንቱንቱ ሃሳያ ኮሻይ 
\q2 ሳዓ ኡባን ላሌቴዳ፤ 
\q1 ኡንቱንቱ ቃላይካ ሳዓ ጋፃ ጋኬዳ» 
\m ያጌዳ። \x - \xo 10:18 \xt ማዝ 19፡4\x* 
\v 19 ሺን ኢስራዔሊያ ኣሳቱ ኤሪቤይኪኖዬ ጋዴ ታኒ ኦቻይ። ሙሴ ካሴ፥ 
\q1 «ታኒ ሂንቴንታ ኣሳ ጊዴና ኣሳቱዋን ሴሊሳና፤ 
\q2 ቃሲ ኤያ ኣሳቱዋን ታኒ ሂንቴንታ ሃንቄሳና» 
\m ያጌዳ። \x - \xo 10:19 \xt ዛር 32፡21\x* 
\v 20 ቃሲ ኢሲያሲ ዳሮ ፃሊዴ፥ 
\q1 «ታና ኮዪቤናዋንቶ ቤታዲ፤ 
\q2 ታና ኦቺቤናዋንቶካ ቆንጫዲ» 
\m ያጌ። \x - \xo 10:20 \xt ኢሳ 65፡1\x* 
\v 21 ሺን ኢስራዔላቱዋባ ኢ ሃሳዪዴ፥ 
\q1 «ጋላሳ ኡባ ኣዛዜቴናዋንቶኔ 
\q2 ታዋ ኢፂያዋንቶ ታ ኩሺያ ሚጫዲ» 
\m ያጌ። \x - \xo 10:21 \xt ኢሳ 65፡2\x* 
\c 11  
\s1 ፆሳይ ኢስራዔሊያ ኣሳ ዉርሲ ኦሊቤና 
\p  
\v 1 ያቲና፥ ፆሳይ ባሬ ኣሳ ኢፄዴ ጋዴ ኦቾ? ሄዋ ጊዴና፤ ኣዪሲ ጎፔ፥ ታኒ ታ ሁጴው ኢስራዔሊያ ኣሳ፤ ኣብራሃሜ ዛሬ፤ ቢኒያማ ያራ።  
\v 2 ፆሳይ ኮይሮ ዶሬዳ ባሬ ኣሳቱዋ ኢፄና፤ ፆሳ ማፃፋይ፥ ኤላሳ ታሪኪያ ጊዶን፥ ኤላሲ ኢስራዔላቱዋ ፆሳ ሲንን ዎቲ ሞቲንቶ፥ ሂንቴ ኤሪታ።  
\v 3 «ጎዳው፥ ኡንቱንቱ ሄ ሱንን ናባቱዋ ዎዲኖ፤ ኔ ያርሺያሳካ ኮሌዲኖ። ያቲና፥ ታኒ ታ ፃላላይ ኣታዲ። ቃሲ ኡንቱንቱ ታናካ ዎናው ኮዪኖ» ያጌዳ። \x - \xo 11:3 \xt 1ካት 19፡10፣ 14\x* 
\p  
\v 4 ፆሳይ ኣው ዋጊ ዛሬዴ? «ታኒ ኤቃ ባዓላው ጉልባቲቤና ላፑ ሻዓ ኣሳ ታው ኣሻዲ» ያጌዳ። \x - \xo 11:4 \xt 1ካት 19፡18\x* 
\p  
\v 5 ሃዋዳንካ ቃሲ ሃ ዎዲያን፥ ፆሳይ ባሬ ኣ ኬካቴን ዶሬዳ ኣማሬዳ ኣሳቱ ዴዒኖ።  
\v 6 ሺን ኢ ባሬ ኣ ኬካቴን ዶሬዳፔ ኣቲን፥ ኡንቱንቱ ኦሱዋን ኡንቱንታ ዶሪቤና፤ ሄዌ ዮፔ፥ ኣ ኣ ኬካቴይ ቱሙ ኣ ኬካቴ ጊዴና። 
\p  
\v 7 ያቲና፥ ኣዬ? ኢስራዔሊያ ኣሳቱ ባሬንቱ ኮዪያዋ ዴሚቤይኪኖ፤ ሺን ፆሳይ ዶሬዳ ኣማሬዳዋንቱ ዴሜዲኖ። ዮኮንቱ ዎዛናይ ሚኔዳ።  
\v 8 ሃዋዳንካ፥ ፆሳ ማፃፋይ፥ 
\q2 «ፆሳይ ኡንቱንቱ ባሬንቱ ኣይፊያን ቤዔናዳኒኔ 
\q2 ባሬንቱ ሃይን ሲሴናዳን፥ 
\q2 ሃዋ ጋካናው ኡንቱንቶ 
\q2 ኣዛላ ኣያና ኢሜዳ» 
\m ያጌዳ። \x - \xo 11:8 \xt ዛር 29፡4፤ ኢሳ 29፡10\x* 
\v 9 ቃሲ ዳዊቴ ያጌዳ፤ 
\q2 «ኡንቱንቱ ሚያ ጋይታይ ኡንቱንታ ጲሪያዳን ኦይቆ፤ 
\q2 ኡንቱንታ ጉፋን፤ ኡንቱንቶ ኩሺያ ሺሪ ጪጎ። \x - \xo 11:9 \xt ማዝ 69፡22-23\x* 
\q1  
\v 10 ኡንቱንቱ ፄሌናዳን፥ ኡንቱንቱ ኣይፊ ጎዜቶ፤ 
\q1 ኡባ ዎዴ ባሬንቱ ሜቱዋን ቁኒዴ ዴዒኖ» 
\m ያጌዳ። 
\p  
\v 11 ያቲና፥ ኣዪሁዳቱ ቤቴዳ ዎዴ፥ ዴንዴናዳን ኩንዴዲኖ? ሄዋ ጊዴና፤ ኡንቱንቱ ናጋራ ኦዳ ዲራው፥ ኣቶቴይ ኡንቱንቱ ኣዪሁዳ ጊዴና ኣሳቱዋ ቃናታናዳን፥ ኣዪሁዳ ጊዴና ኣሳው ዬዳ።  
\v 12 ሺን ኣዪሁዳቱ ናጋራ ኦዳ ዲራው፥ ኣላሜው ዳሮ ኣንጁ ዬዳ፤ ቃሲ ኡንቱንቱ ኩንዴይካ ኣዪሁዳ ጊዴና ኣሳው ዳሮ ኣንጁዋ ኣሄዳ። ያቲና፥ ኣዪሁዳቱ ኡባይ ጉጄቲያ ዎዴ፥ ኣንጁ ዎይሳ ኬና ዳራንዴሻ! 
\s1 ኣዪሁዳ ጊዴና ኣሳይ ኣታና ኣቶቴ 
\p  
\v 13 ሺን ታኒ ሃዒ ሂንቴንቶ፥ ኣዪሁዳ ጊዴና ኣሳው ሃሳያይ፤ ታኒ ኣዪሁዳ ጊዴና ኣሳው ዬሱሲ ኪቴዳዋ ጊዲያ ዲራው፥ ታ ኦሱዋ ቦንቻና።  
\v 14 ታኒ ታ ዛሬ ጊዲያ ኣሳቱዋ ቃናታንቻቱዋ ኡዶፔ፥ ኦኒ ኤሪ ኡንቱንቱፔ ኣማሬዳዋንታ ኣሼናን ኣጊኬ።  
\v 15 ኣዪሲ ጎፔ፥ ፆሳይ ኡንቱንታ ኢፄዳ ዎዴ፥ ሃ ኣላሚ ፆሳና ሲጌቴዳ። ያቲና ፆሳይ ኡንቱንታ ሺሺ ኣኪያ ዎዴ፥ ሃይቄዳዌ ዴዑዋ ዴማናፔ ኣቲን፥ ኣዬ ሃናኔ? 
\p  
\v 16 ኮይሮ ኣይፌ ባጋ ሙናቃይ ኣንጄቴዳዋ ጊዶፔ፥ ሙሜ ሙናቃይካ ቃሲ ኣንጄቴዳዋ ጊዳና፤ ኢቲ ሚ ፃጱ ኣንጄቴዳዋ ጊዶፔ፥ ሃይይ ኡባይካ ቃሲ ኣንጄቴዳዋ ጊዳና።  
\v 17 ሺን ዎራን ዶሌዳ ዎጋራ ሚ ቃንካፔ ኢቱዋ ኢቱዋ ካሬዳሳን፥ ኔና ዎራን ዶሌዳ ዎጋራ ሚ ማላ ሄ ዎጋራና ጋ ቃቼዶ፤ ኔኒ ቃሲ ዛይቲ ኬሲያ ዎጋራ ሚ ፃጱዋና ኢቲፔ ዴዓ።  
\v 18 ሲሚ ኔኒ ሄ ካሬቲ ዎዳ ቃንካቱዋ ቦላን ኦቶሬታናው ቤሴና፤ ሺን ኔኒ ኦቶሬቲያዋ ጊዶፔካ፥ ፃጱ ኔና ቶኬፔ ኣቲን፥ ኔኒ ፃጱዋ ቶኬናዋ ኣኬካ። 
\p  
\v 19 ሄዋ ዲራው ኔኒ፥ «ኤ፤ ሺን ቃንካቱ ታኒ ኡንቱንቱ ሳዓን ጌላናዳን ካሬቴዲኖ» ያጋና።  
\v 20 ሄዌ ቱማ፤ ኡንቱንቱ ኣማኒቤና ዲራው፥ ካሬቴዲኖ፤ ኔኒ ኣማኔዳ ዲራው፥ ሄ ሳዓን ኤቃዳ። ሺን ያያፔ ኣቲን፥ ኦቶሮ ቆፋ ቆፖፓ።  
\v 21 ኣዪሲ ጎፔ፥ ፆሳይ ሜታ ቃንካ ማላቲያዋንቶ፥ ኣዪሁዳቶ ቃሬቲቤናዋ ጊዶፔ፥ ኔው ቃሬቲያዋ ማላቲ? 
\p  
\v 22 ሲሚ ፆሳ ኬካቴኔ ፃላቴ ቤዓ። ኩንዴዳዋንቶ ኢ ፃላ፤ ሺን ኔኒ ኣ ኬካቴኒ ሚናዴ ዴዖፔ፥ ኢ ኔው ኬካ፤ ሄዌ ዮፔ፥ ኔኒካ ቃሲ ካሬታና።  
\v 23 ኣዪሁዳቱካ ቃሲ ኣማኔናን ኢፂያዋ ኣጎፔ፥ ፆሳይ ካሴ ኡንቱንቱ ዴዒያሳን ዛሪዴ ዎና፤ ኣዪሲ ጎፔ፥ ኢ ኡንቱንታ ዛሪዴ ዎናው ዳንዳዬ።  
\v 24 ኣዪሲ ጎፔ፥ ፆሳይ ሂንቴንታ ዎራን ዴዒያ ኮይሮ ሜታ ዎጋራ ሚፔ ቃንፂዴ፥ ሂንቴንቱ ሜታን ዎራን ዶሎዋንቱዳን ጊዴናን ጋዴን ቶኬዳ ዎጋራ ሚና ጋ ኦይዳዋ ጊዶፔ፥ ያቲና፥ ሄ ካሬቲ ዎዳ ኮይሮ ሜታ ቃንካቱዋ ዛሬዴ፥ ኡንቱንታ ኮይሮ ሜታን ዶሌዳ ባሬንቱ ዎጋራ ሚና ጋ ቃቻናው፥ ኣ ኣዬ ፆናናዌ? 
\s1 ፆሳ ማሮታይ ኡባሳ 
\p  
\v 25 ታናዳን ኣማኒያዋንቶ፥ ታኒ ሂንቴ ኤራናዳን ኮዪያ ቱሙ ፁራ ዬዉ ዴዔ፤ ሄዌ ሂንቴ ሂንቴንታ ሂንቴሬካ፥ ኑኒ ኣዳ ኤራንቻ ያጊዴ ቆፒያዋ ዲጌ፤ ኢስራዔሊያ ኣሳፔ ባጋይ ሲሴናን ኢፄዳ፤ ሺን ሄ ሲሴናን ኢፂያዌ ኣዪሁዳ ጊዴና ኣሳ ኩሜን ፓይዱ ፆሳኮ ጋካናሲ ጋሚዓና።  
\v 26 ሃዋዳንካ፥ ኢስራዔሊያ ኣሳይ ኡባይ ኣታና፤ ፆሳ ማፃፋይ ሃዋዳን ያጌ፤ 
\q2 «ኣሺያዌ ፂዮኔ ጌቴቲያ ካታማፔ 
\q2 ዪዴ፥ ናጋራ ኦሱዋ ኡባ ያዪቆባ ዛሪያፔ ዲጋና። \x - \xo 11:26 \xt ኢሳ 59፡20\x* 
\q1  
\v 27 ታኒ ኡንቱንቱ ናጋራ ኣቶ ያጊያ ዎዴ፥ 
\q2 ኡንቱንቱና ጌላና ቃላ ጫቁ ሃዋ» 
\m ያጌ። \x - \xo 11:27 \xt ኤርም 31፡33-34\x* 
\p  
\v 28 ኣዪሁዳ ጊዴና ኣሳቶ፥ ኣዪሁዳቱ ዎንጋላ ሚሺራቹዋ ባጋና ሂንቴ ዲራው፥ ፆሳና ሞርኬ፤ ሺን ፆሳ ዶሩዋ ባጋና ኣዋቱዋ ዲራው፥ ኡንቱንቱ ኢ ሲቂያዋንታ።  
\v 29 ኣዪሲ ጎፔ፥ ፆሳይ ባሬ ኢሜዳዋ ጉዬ ኣኬና፤ ቃሲ ባሬ ፄሴዳዋ ኢፃዲ ጌና።  
\v 30 ኣዪሁዳ ጊዴናዋንቶ፥ ፆሳው ሂንቴ ካሴና ኣዛዜቲቤይኪታ፤ ሺን ኣዪሁዳቱ ኣዛዜቴናን ኢፄዳ ዲራው፥ ፆሳ ማሮቴ ሃዒ ሂንቴ ኣኬዲታ።  
\v 31 ሃዋዳን፥ ሂንቴ ኣኬዳ ማሮቴ ዲራው፥ ኣዪሁዳቱ ቃሲ ፆሳ ማሮቴ ሃዒ ኣካናዳን፥ ፆሳው ኣዛዜቴናን ኢፄዲኖ።  
\v 32 ኣዪሲ ጎፔ፥ ፆሳይ ኣሳ ኡባ ማራና ማላ፥ ኣሳይ ኡባይ ኣው ኣዛዜቴናን ኢፂያ ሃኖታን ቃቼዳ። 
\p  
\v 33 ፆሳ ዱሬቴይ ዎይሳ ኬና ዳሬ? ኣ ኣ ኤራቴይኔ ኣ ኤራቴይ ዎይሳ ኬና ጪሜ? ኣ ፒርዳ ኦዳናዌ ኦኔ? ኢ ባሬ ኦያዋ ኣዪሲ ኦንቶ፥ ኦኔ ኣኬኪያዌ? \x - \xo 11:33 \xt ኢሳ 55፡8\x* 
\v 34 ሄዋ ፆሳ ማፃፋይ፥ «ጎዳ ዎዛና ኤሪያዌ ኦኔ? ኣ ዞራናው ዳንዳዪያዌ ኦኔ? \x - \xo 11:34 \xt ኢሳ 40፡13\x* 
\v 35 ዎይ ባሬ ኩሺያ ዛራና ማላ፥ ኣው ኢቲባ ኢሜዳዌ ዴዒ?» ያጌ። \x - \xo 11:35 \xt ዮብ 41፡11\x* 
\p  
\v 36 ኣዪሲ ጎፔ፥ ኡባባ ኢ ሜዳ፤ ቃሲ ኡባባይካ ኣ ማታኒኔ ኣዉኔ ዴዔ፤ ፆሳው ሜናው ቦንቹ ጊዶ። ኣሜንዒ። \x - \xo 11:36 \xt 1ቆር 8፡6\x* 
\c 12  
\s1 ፆሳው ኦናዳን ኑኒ ዋኒዴ ዴዓናው ቤሲ? 
\p  
\v 1 ሲሚ ታናዳን ኣማኒያዋንቶ፥ ሂንቴ ሂንቴ ኦናቴ ፆሳ ናሼቺያ ዴዖኔ ጌሻ ያርሹዋ ኡዲዴ፥ ፆሳው ሺሻናዳን፥ ታኒ ሂንቴንታ ፆሳ ማሮቴን ዎሳይ፤ ፆሳው ሂንቴ ጎዪናናው ቤሲያ ቱሙ ኦጊ ሄዋ።  
\v 2 ፆሳይ ሂንቴ ቆፋ ኡባና ዱማዪዴ፥ ሂንቴንታ ላሞፔ ኣቲን፥ ሃ ኣላሚያ ኣሳ ማላቶፒቴ። ሄ ዎዴ ሂንቴ፥ ፆሳ ሼኒ፥ ሎዖባይ፥ ኣ ናሼቺያባይኔ ቃሲ ፖሎ ጊዴዳባይ ኣዬንቶ ኤራኒታ። 
\p  
\v 3 ፆሳይ ታው ኢሜዳ ኣ ኬካቴን ታኒ ሂንቴንቶ ኦዳይ። ሂንቴንቱ ቆፓናው ቤሲያዋፔ ኣዴ፥ ኦቶሩዋን ቆፖፒቴ፤ ሄዋ ኣጊዴ፥ ዎዛናማ ኣሳዳን ቆፒቴ፤ ፆሳይ ሂንቴንቶ ሁጲያን ሁጲያን ኢሜዳ ኣማኑዋ ኬናን ሂንቴ ቦላ ፒርዲቴ።  
\v 4 ኑ ኢቲ ቦላ ጊዶን፥ ጮራ ቦላ ቆሞቱ ዴዒኖ፤ ሄ ቆሞቱዋ ኡባዉካ ዱማ ዱማ ኦሱ ዴዔ።  
\v 5 ሃዋዳን፥ ኑኒ ጮራ ኣሳ ጊዶፔካ፥ ኪሪስቶሳ ባጋና ኢቲ ኣሳ። ቃሲ ኑኒ ኢቲ ኣሳቴ ቆሞቱዋዳን፥ ኢቱ ኢቱዋና ኦይቄቲ ኡቴዶ።  
\v 6 ፆሳይ ኑሲ ኢሜዳ ኣ ኬካቴን ዱማ ዱማ ኢሞታይ ዴዔ። ኑ ኢሞታይ ናቤቴ ጊዶፔ፥ ኑሲ ዴዒያ ኣማኑዋ ኬና ኦዳናው ቤሴ።  
\v 7 ሃራቱዋ ማዱሳ ጊዶፔ፥ ሄ ኦሱዋን ሚናናው ቤሴ፤ ታማሪሱሳ ጊዶፔ፥ ሄ ታማሪሱዋን ሚናናው ቤሴ።  
\v 8 ሃራ ኣሳቱዋ ሚኒሱሳ ጊዶፔ፥ ሄ ኦሱዋን ሚናናው ቤሴ። ባሬ ሁጴው ዴዒያባፔ ሃራቱዋሲ ኢሚያ ኦኒኔ ዎዛናፔ ኢሞ። ማታይ ዴዒያ ኡራይ ሚኒሲ ኦናው ቤሴ፤ ሃራቱዋሲ ኬኪያ ኡራይ ናሼቻን ኬካናው ቤሴ። 
\p  
\v 9 ሂንቴንቱ ሲቁ ኣሳ ቤሳናው ሲቄቲያዋ ጊዳናው ቤሴና። ኢታባ ኢፂቴ፤ ሎዖባ ሚኒሲዴ ኦይቂቴ።  
\v 10 ኢቱ ኢቱዋና ኢሻቱዋዳን ሲቄቲቴ፤ ኢቱ ኢቱዋ ቦንቺያዋን ናሼቲቴ።  
\v 11 ሚኒዴ ኦቴ፤ ኣዛሎፒቴ፤ ሂንቴ ኩሜን ዎዛናፔ ጎዳው ኦቴ። \f + \fr 12:11 \fq ኩሜን ዎዛናፔ ጎዳው ኦቴ፡ \ft ጌሻ ኣያናኒ ካሌሴቲዴ ኪቴቲያዋንታ ጊዲቴ።\f* 
\v 12 ፆሳይ ሂንቴንቶ ኢማና ጌዳዋን ናሼቲቴ፤ ዋዪያን ጌንጪቴ። ኡባ ዎዴ ፆሳ ዎሲቴ፤  
\v 13 ፆሳ ኣሳቱዋ ኮሺያባን ማዲቴ፤ ኢማ ሞኪቴ። 
\p  
\v 14 ሂንቴንታ ዬዴርሲያዋንታ ኣንጂቴ፤ ኡንቱንታ ኣንጂቴፔ ኣቲን፥ ሼቆፒቴ።  
\v 15 ናሼቲያዋንቱና ናሼቲቴ፤ ዬኪያዋንቱናካ ዬኪቴ።  
\v 16 ኣሳ ኡባው ኢቲ ማላ ቆፋ ቆፒቴ፤ ኦያባን ኡባን ሂንቴንታ ቶቺዴ ዴዒቴፔ \f + \fr 12:16 \fq ሂንቴንታ ቶቺዴ ዴዒቴ፡ \ft ኣሺኬ ጊዲቴ ጉሳ።\f* ኣቲን፥ ኦቶሬቶፒቴ፤ ሂንቴንታ ሂንቴሬካ ኣ ኤራንቻ ጊዴ ቆፖፒቴ። \x - \xo 12:16 \xt ሌም 3፡7\x* 
\p  
\v 17 ኦኒኔ ሂንቴንቶ ኢታባ ኦፔ፥ ሄ ኡራው ኢታባ ኦ ዛሮፒቴ፤ ኣሳ ኡባው ሎዖባ ኦናው ቆፒቴ።  
\v 18 ኣሳ ኡባና ሳሮቴን ዴዓናው፥ ሂንቴ ባጋና፥ ሂንቴንቶ ዳንዳዬቴዳባ ኡባ ኦቴ።  
\v 19 ታናዳን ኣማኒያዋንቶ፥ ሂንቴ ሂንቴ ሁጴው ኣሳው ሃሉዋ ኬሶፒቴ። ፆሳይ ሃሉዋ ኬሳናዳን፥ ኣ ቦላ ኦሊቴ። ኣዪሲ ጎፔ፥ ፆሳ ማፃፋይ፥ 
\q1 «ጎዳይ፥ ‹ታኒ ሃሉዋ ኬሳና፤ 
\q2 ታኒ ኩሺያ ጪጋና› ጌ» 
\m ያጌ። \x - \xo 12:19 \xt ዛር 32፡35\x* 
\p  
\v 20 ሺን ፆሳ ማፃፋይ፥ 
\q1 «ኔ ሞርኪ ኮሻቶፔ፥ ሚዛ። 
\q2 ሳሜቶፔ፥ ኡሻ። 
\q1 ኣዪሲ ጎፔ፥ ኔኒ ሄዋ ኦያዋን 
\q2 ኣ ዳሪሳ ዬላያሳ» 
\m ያጌ። \x - \xo 12:20 \xt ሌም 25፡21-22\x* 
\p  
\v 21 ኢታባ ሎዖባን ፆናፔ ኣቲን፥ ኢታባይ ኔና ፆኖፖ። 
\c 13  
\s1 ጋዲያ ኣዪሲያዋንቱሲ ኤኖ ጋናው ቤሴ 
\p  
\v 1 ኣሳይ ኡባይ ጋዲያ ኣዪሲያዋንቱሲ ኤኖ ጋናው ቤሴ፤ ኣዪሲ ጎፔ፥ ፆሳይ ጌናን ዴዒሺን፥ ጋዲያ ኣዪሲያዌ ዴዓናው ዳንዳዬና። ሃዒ ዴዒያ ኣዪሲያዋንቱካ ፆሳይ ዎዳዋንታ።  
\v 2 ሄዋ ዲራው፥ ሃዒ ዴዒያ ኣዪሲያዋንታ ኢፂያ ኦኒኔ ፆሳ ኣዛዙዋ ኢፄ፤ ባሬ ቦላ ፒርዳ ኣሄ።  
\v 3 ኣዪሲ ጎፔ፥ ኣዪሲያዋንቱ ኢታባ ኦያዋንታ ያሻናዋፔ ኣቲን፥ ሎዖባ ኦያዋንታ ያሺኪኖ። ኣዪሲያዎ ያዬናን ኣጋናው ኮያይ? ያቶፔ ሎዖባ ኦ፤ ኢ ኔና ጋላታና።  
\v 4 ኣዪሲ ጎፔ፥ ኢ ኔው ሎዖባ ኦናው፥ ፆሳው ቆማ። ሺን ኔኒ ኢታባ ኦፔ፥ ኢታባ ኦዳዋ ኢ ሴሪያ ዲራው፥ ኣው ያያ፤ ኢ ፆሳ ቆማ። ቃሲ ኢታባ ኦያዋንቱ ቦላ ፆሳ ሃንቁዋ ኢ ኣሄ።  
\v 5 ሄዋ ዲራው፥ ጋዲያ ኣዪሲያዋንቱሲ ኤኖ ጊያዌ ፆሳ ሙራ ፃላላሳ ጊዴናን፥ ሂንቴንቱ ዎዛና ቆፋ ዲራዉካ ኤኖ ጋናው ቤሴ። 
\p  
\v 6 ኣዪሲ ጎፔ፥ ጋዲያ ኣዪሲያዋንቱ ባሬንቱ ኦሱዋ ኦያ ዎዴ፥ ፆሳው ኦያ ዲራው፥ ሂንቴ ቃራፃ ቃንፂያዌ ሄዋሳ።  
\v 7 ኡባ ኣሳዉካ ቤሲያዋ ኢሚቴ። ጊራ ጊራናው ቤሲያዎ ጊሪቴ፤ ቃራፃ ቃንፃናው ቤሲያዎ ቃንፂቴ፤ ያያናው ቤሲያዎ ያዪቴ፤ ቦንቹ ቤሲያዋ ቦንቺቴ። 
\s1 ኢቱ ኢቱዋና ሲቄቲቴ 
\p  
\v 8 ሂንቴንቱ ኢቱ ኢቱዋና ሲቄታናፔ ኣቲን፥ ሃራ ኣጩ ኦ ቦላኒኔ ዴዖፖ። ኣዪሲ ጎፔ፥ ሃራ ሲቂያ ኦኒኔ ሂጊ ጊያዋ ፖሌዳ።  
\v 9 «ዎሹሞፓ፤ ዎፓ፤ ዉዖፓ፤ ኣሳባ ኣሞቶፓ» ጊያ ኣዛዛቱኔ ሃራ ኣዛዛቱ ኡባቱ፥ «ኔ ሾሩዋ ኔ ሁጲያዳን ሲቃ» ጊያ ኣዛዙዋን ኩሚኖ። \x - \xo 13:9 \xt ኬስ 20፡13-15፣ 17፤ ዛር 5፡17-19፣ 21፤ ዎግ 19፡18\x* 
\v 10 ባሬ ሾሩዋ ሲቂያ ኦኒኔ ኣው ኢታባ ኦና፤ ሄዋ ዲራው፥ ሾሩዋ ሲቂያዌ ሂጊያ ኡባው ኤኖ ጊያዋ። 
\p  
\v 11 ጌሚዑሹዋፔ ሂንቴ ቤጎቲያ ሳቲ ሃዒ ጋኬዳ ዲራው፥ ሃ ዎዲያ ኣኬኪቴ። ኣዪሲ ጎፔ፥ ኑኒ ኮይሮ ኣማኔዳ ዎዲያፔ፥ ኑኒ ኣቲያ ዎዲ ሃዒ ኑኮ ማታቴዳ።  
\v 12 ቃማይ ኣናው ሃኔ፤ ጋላሳይ ማታቴዳ። ሲሚ ኑኒ ማ ኦሱዋ ኣጊዴ፥ ፖዑዋን ኦሌታናው፥ ኦላ ሚሻ ማዮይቴ፤  
\v 13 ጋላሲ ፖዑዋን ዴዒያ ኣሳዳን፥ ኣኔ ማራ ዴዖይቴ። ዬኒኔ ማዋን ጊዶፖ፤ ዎሹሙሳኒኔ ዎሹማናው ካጄሉሳና ጊዶፖ፤ ፓሉማኒኔ ቃናቲያን ጊዶፖ።  
\v 14 ሺን ጎዳ ዬሱሲ ኪሪስቶሳ፥ ኦላ ሚሻ ኣ ማዪቴ፤ ሂንቴ ናጋራንቻ ኣሳቴይ ባሬ ዎዛና ኣሙዋ ፖላናዳን፥ ኣው ቆፖፒቴ። 
\c 14  
\s1 ኣሳ ቦላ ፒርዴናን ኣጉሳ 
\p  
\v 1 ኣማኑዋን ኣዛሊያ ኡራ ሺሺ ኣኪቴ። ሺን ኢ ባሬ ሁጴው ቆፒያባን ኣናና ፓሉሜቶፒቴ።  
\v 2 ኢቲ ኡራ ኣማኑ ኢ ኣያ ሚናኔ ዲጌና። ሺን ኣማኑዋን ኣዛሊያ ኡራይ ጋዴን ሞኬዳባ ፃላላ ሜ።  
\v 3 ኡባባ ሚያ ኡራይ ኡባባ ሜና ኡራ ካፖ፤ ኡባባ ሜና ኡራይካ ኡባባ ሚያ ኡራ ቦላ ፒርዶፖ። ኣዪሲ ጎፔ፥ ፆሳይ ኣ ሺሺ ኣኬዳ።  
\v 4 ሃራ ኣሳ ቆማ ቦላ ፒርዲያዌ ኔኒ ኦኔ? ኢ ኩንዲና ዎይ ዴንዲና ባሬ ጎዳሳ፤ ሺን ጎዳይ ኣ ዴንናው ዳንዳዪያ ዲራው፥ ኢ ኤቃና። 
\p  
\v 5 ኢቲ ኡራይ፥ «ሂቃ ጋላሳይ ሃራ ጋላሳቱዋፔ ኣ» ያጊዴ ቆፒያ ዎዴ፥ ሃራይ፥ «ኡባ ጋላሳቱካ ኢቲ ማላ» ጊዴ ቆፔ። ኣሳይ ኡባይ ሁጲያን ሁጲያን ሄዋዳን ኣዪሲ ቆፒንቶ ኣኬኮ።  
\v 6 ኢቲ ጋላሳ ሃራ ጋላሳቱዋፔ ኣዴ ቦንቺያ ኡራይ ጎዳ ቦንቾ ቦንቼ፤ ቁማ ሚያ ኡራይካ ጎዳ ቦንቾ ሜ። ኣዪሲ ጎፔ፥ ኢ ሄ ቁማ ዲራው፥ ፆሳ ጋላቴ። ቁማ ሜናዌካ ጎዳ ቦንቾ ሜናን ኣጌዳ፤ ቃሲ ፆሳ ጋላቴ።  
\v 7 ኣዪሲ ጎፔ፥ ኑፔ ኦኒኔ ባሬ ሁጴ ፃላላው ዴዔና፤ ቃሲ ኦኒኔ ባሬ ሁጴ ፃላላው ሃይቄና።  
\v 8 ኑኒ ፓፃ ዴዖፔ፥ ጎዳው ዴዔቶ፤ ቃሲ ሃይቆፔካ፥ ጎዳው ሃይቄቶ። ሲሚ ኑኒ ፓፃ ዴዖፔ ዎይ ሃይቆፔካ ጎዳሳ። 
\p  
\v 9 ሄዋ ዲራው፥ ኪሪስቶሲ ፓፃ ዴዒያዋንቶኔ ሃይቄዳዋንቶ ጎዳ ጊዳናው ሃይቂዴ፥ ሃይቁዋፔ ዴንዴዳ።  
\v 10 ያቲና፥ ኔኒ ኔ ኢሻ ቦላ ኣዪሲ ፒርዳይ? ዎይ ኔኒ ኔ ኢሻ ኣዪሲ ካይ? ኑኒ ኡባይካ ፆሳ ፒርዳ ኦይዲያ ሲንን ኤቃና።  
\v 11 ኣዪሲ ጎፔ፥ ፆሳ ማፃፋይ፥ 
\q1 « ‹ታኒ ጎዳይ ታ ዴዑዋን ጫቃይ፤ 
\q2 ኣሳይ ኡባይ ታ ሲንን ጉልባታና። 
\q1 ቃሲ ታኒ ፆሳ ጊዲያዋ 
\q2 ኣሳይ ኡባይ ማርካታና› ያጋይ» 
\m ያጌ። \x - \xo 14:11 \xt ኢሳ 45፡23\x* 
\v 12 ሲሚ ኑኒ ሁጲያን ሁጲያን ኑባ ፆሳው ኦዳና። 
\s1 ናጋራ ኦሱዋሲ ጋሱዋ ጊዶፓ 
\p  
\v 13 ሄዋ ዲራው፥ ኑኒ ኢቱ ኢቱዋ ቦላ ፒርዲያዋ ሃዋፔ ሲንው ኣኔ ኣጎይቴ። ሺን ኡባፔ ኣዴ፥ ሂንቴ ኢሻ ቢያባ ዎይ ናጋራን ኦሊያባ ኦናዳን ቆፋ ቃቺቴ።  
\v 14 ታኒ ጎዳ ዬሱሲ ኪሪስቶሳና ዴዒያዋን፥ ባሬ ሁጴው ቱና ጊዲያባይ ባይናዋ ኤራይኔ ኣኬካይ። ሺን ኢቲ ኡራይ ኢቲባ ቱና ጊዴ ቆፖፔ፥ ሄዌ ኣው ቱና ጊዴ።  
\v 15 ኔኒ ሚያባ ዲራው፥ ኔ ኢሻ ቆሆፔ፥ ሲሚ ኔኒ ሲቁዋን ዴዓካ። ኪሪስቶሲ ኣ ዲራው ሃይቄዳ ኣሳ ኔ ሚያ ቁማን ባዪዞፓ።  
\v 16 ሲሚ ኔኒ ሎዖባ ጊያዋ ኣሳይ ካፖ።  
\v 17 ኣዪሲ ጎፔ፥ ፆሳ ካዉቴይ ጌሻ ኣያናይ ኢሚያ ፂሎቴ፥ ሳሮቴኔ ናሼቻ ጊዲያዋፔ ኣቲን፥ ሙሳኔ ኡሻ ጊዴና።  
\v 18 ኣዪሲ ጎፔ፥ ኪሪስቶሳው ሃዋዳን ኦያ ኡራይ ኦኒኔ ፆሳ ናሼቼ፤ ኣሳይካ ኣ ጋላቴ። 
\p  
\v 19 ያቶፔ፥ ኣኔ ኑኒ ሳሮቴ ኣሂያባኔ ኑና ኢቱዋ ኢቱዋና ሚኒሲያባ ኡባ ኮዬቶ።  
\v 20 ፆሳ ኦሱዋ ቁማ ዲራው ባዪዞፓ። ቁማይ ኡባይ ጌሻ፤ ሺን ሃራ ኡራ ናጋራን ዬጊያዋ ሙሳይ ኢታ።  
\v 21 ሄዋሲ ኣሹዋ ሜናን ዎይ ኡሻ ኡሼናን ኣጊያዌ ዎይ ኔ ኢሻ ቢያባ ኣያኔ ኦናን ኣጊያዌ ሎዓ። 
\p  
\v 22 ሃ ዬዉዋን ኔ ኣማኑዋ ኔፔኔ ፆሳፔ ጊዱዋን ናጋ። ኢቲ ኡራይ ሎዓ ጊዴ ኢ ኣማኔቴዳዋ ኦያ ዎዴ፥ «ታኒ ሎዑዋ ኦዲ» ጊዴ ባሬ ዎዛናኒ ኣማኔቶፔ፥ ሄ ኡራይ ቱሙ ኣንጄቴዳዋ።  
\v 23 ሺን ኢ ሄ ሚያባን ሲፔ፥ ኣ ሙሳይ ኣማኑዋና ጊዴና ዲራው፥ ፆሳይ ኣ ቦላ ፒርዴ፤ ቃሲ ኣማኑ ባይናን ኦዳዌ ኣያዪኔካ ናጋራ። 
\c 15  
\s1 ኣሳ ናሼቻናው ቤሲያ ኦጊያ 
\p  
\v 1 ኑኒ ኣማኑዋን ሚኔዳዋንቱ ዳቡራንቻቱዋ ቶኩዋ ቶካናው ቤሴ፤ ኑኒ ኑ ፃላላ ናሼቻናው ቤሴና።  
\v 2 ኑኒ ሁጲያን ሁጲያን ኑ ኢሻ ማዳናው፥ ኣማኑዋን ኣ ሚኒሳናዉኔ ናሼቻናው ቤሴ።  
\v 3 ኣዪሲ ጎፔ፥ ሃራይ ኣቶ ኪሪስቶሲካ ባሬና ናሼቺቤና። ሺን ፆሳ ማፃፋይ፥ «ኔና ቦሬዳዋንቱ ቦሬዳ ቦሪ ታ ቦላ ዎዳ» ጌዳዋዳን ሃኔዳ። \x - \xo 15:3 \xt ማዝ 69፡9\x* 
\v 4 ፆሳ ማፃፋይ ኑሲ ኢሚያ ጌንጫኒኔ ሚኖታን ኑኒ ዴማና ጊዴ ናሼቻን ናጊ ኡቴዳዌ ዴዓና ማላ፥ ፆሳ ማፃፋን ፃፌቴዳ ኡባባይ ኑና ታማርሳናው ፃፌቴዳ። 
\p  
\v 5-6 ሂንቴንቱ ኡባይ ኢቲ ዎዛና ጊዲዴ፥ ኢቲ ቃላን ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ቦንቻና ማላ፥ ጌንጩዋኔ ሚኖቴ ኢሚያ ፆሳይ፥ ሂንቴንቶ ኪሪስቶሲ ዬሱሲ ኦዳዋዳን፥ ኢቱ ኢቱዋና ኢቲፔ ዴዒያ ኢቲ ቆፋ ኢሞ። 
\s1 ጳዉሎሳ ኦሱዋኔ ኣማኔና ኣሳው ጋኬዳ ሚሺራቹዋ ቃላ 
\p  
\v 7 ሄዋ ዲራው፥ ኪሪስቶሲ ሂንቴንታ ሞኬዳዋዳን፥ ፆሳ ቦንቾ ኢቱ ኢቱዋ ሞኪቴ።  
\v 8-9 ኣዪሲ ጎፔ፥ ፆሳይ ኣማኔቴዳዋ ጊዲያዋ ኤሪሳናው፥ ፆሳይ ኣዋቶ ኢማና ጌዳዋ ቱማያናዉኔ ኣዪሁዳ ጊዴና ኣሳይ ፆሳ ኣ ማሮቴ ዲራው ቦንቻናው ኪሪስቶሲ ኣዪሁዳቶ ቆማ ጊዴዳዋ ሂንቴንቶ ኦዳይ። ሄዋ ፆሳ ማፃፋይ፥ 
\q1 «ሄዋ ዲራው፥ ታኒ ኔና 
\q2 ኣዪሁዳ ጊዴና ኣሳ ጊዶን ጋላታና፤ 
\q1 ኔ ሱንካ ሳባና» 
\m ያጌ። \x - \xo 15:8-9 \xt 2ሳም 22፡50፤ ማዝ 18፡49\x* 
\q1  
\v 10 ቃሲካ፥ 
\q1 «ኣዪሁዳ ጊዴና ኣሳቶ፥ 
\q2 ፆሳ ኣሳቱዋና ናሼቲቴ» 
\m ያጌ። \x - \xo 15:10 \xt ዛር 32፡43\x* 
\q1  
\v 11 ቃሲካ ጉጂዴ፥ 
\q1 «ሂንቴንቶ፥ ኣዪሁዳ ጊዴና ኣሳቶ ኡባቶ፥ 
\q2 ጎዳ ጋላቲቴ፤ ኣሳው ኡባው፥ ኣ ጋላቲቴ» 
\m ያጌ። \x - \xo 15:11 \xt ማዝ 117፡1\x* 
\q1  
\v 12 ቃሲካ ኢሲያሲ፥ 
\q1 «ኢሴይ ዜሬይ ዪዴ 
\q2 ኣዪሁዳ ጊዴና ኣሳ ሞዳናው ዴንዳና። 
\q1 ቃሲ ኡንቱንቱ ኣ ባጋና ዴማና 
\q2 ጊዴ ናሼቻን ናጋና» 
\m ያጌ። \x - \xo 15:12 \xt ኢሳ 11፡10\x* 
\p  
\v 13 ሂንቴንቱ ኣካና ጊዴ ናሼቻን ናጊያዌ ጌሻ ኣያና ዎልቃን ዲጫናዳን፥ ሂንቴንቶ ኢማና ጌዳ ፆሳይ፥ ሂንቴ ኣ ኣማኒያ ዲራው፥ ሂንቴንቶ ናሼቻኔ ሳሮቴ ኩንዴ ኢሞ። 
\s1 ጳዉሎሲ ፃሊዴ ፃፌዳ ጋሱዋ 
\p  
\v 14 ታናዳን ኣማኒያዋንቶ፥ ሂንቴንቱን ሎዖቴይኔ ኤራቴይ ኡባይ ኩሜዳዋኔ ቃሲ ኢቱ ኢቱዋ ዞራናው ዳንዳዪያዋ ታኒ ታ ሁጴው ኤራዲ።  
\v 15-16 ሺን ታኒ ሂንቴንታ ኢቲባ ኢቲባ ጉጃ ቆፊሳናው፥ ሃ ዳቢዳቢያ ጊዶን ኣይኔ ያዬናን ሂንቴንቶ ፃፋዲ። ታኒ ኪሪስቶሳ ዬሱሳ ቆማ ጊዳዴ፥ ኣዪሁዳ ጊዴና ኣሳው ኦናዳን፥ ፆሳይ ታው ኣ ኬካቴ ኢሜዳ ዲራው፥ ታኒ ኣይኔ ያያቤይኬ፤ ኣዪሁዳ ጊዴና ኣሳይ ጌሻ ኣያና ባጋና ፆሳው ጌሻ ጊዲዴ፥ ኣ ናሼቺያ ያርሹዋ ጊዳናዳን፥ ፆሳ ዎንጋላ ሚሺራቹዋ ኦዲያዋን ጌሻቴን ኦይ። 
\p  
\v 17 ሄዋ ዲራው፥ ታኒ ኪሪስቶሳ ዬሱሳን ጊዳዴ ፆሳው ኦያባን ጬቄታናው ዳንዳያይ።  
\v 18-19 ኣዪሁዳ ጊዴና ኣሳይ ፆሳው ኣዛዜታናዳን፥ ኪሪስቶሲ ታ ባጋና ቃላን፥ ኦሱዋን፥ ማላን፥ ማላታ ዎልቃኒኔ ጌሻ ኣያና ዎልቃን ኦዳዋ ፃላላ ታኒ ኦዳናፔ ኣቲን፥ ሃራባ ኦዳናው ፃሊኬ። ሄዋ ዲራው፥ ዬሩሳላሜፔ ዶማዴ፥ ኢሊዋሪቆና ጌቴቲያ ጋዲያ ጋካናው ዩያዴ፥ ኪሪስቶሳ ዎንጋላ ሚሺራቹዋ ዉርሳ ኦዳዲ።  
\v 20 ሃዋዳንካ፥ ታኒ ሃራ ኣሳይ ዶሜዳዋ ቦላን ዶሜናዳን፥ ኪሪስቶሳ ሱንይ ፄሴቲቤናሳን ዎንጋላ ሚሺራቹዋ ኦዳናው ኣሞታዲ።  
\v 21 ሺን ፆሳ ማፃፋይ፥ 
\q1 «ኣባይ ሃዋ ጋካናው ኦዴቲቤናዋንቱ ኣ ቤዓናዋንታ፤ 
\q2 ቃሲ ኣባ ሲሲቤናዋንቱ ኣኬካናዋንታ» 
\m ያጌ። \x - \xo 15:21 \xt ኢሳ 52፡15\x* 
\s1 ጳዉሎሲ ሮሜ ባናው ቆፔዳ 
\p  
\v 22 ሄዋ ዲራው፥ ታኒ ጮራ ዎዴ ሂንቴንቱኮ ያናው ኮያይ፤ ሺን ያናው ዳንዳያቤይኬ።  
\v 23 ሺን ታኒ ሃዒ ሃ ሄራን ታ ኦሱዋ ዉርሴዳ ዲራዉኔ ጮራ ላይፔ ዶማዴ ሂንቴንታ ባዴ ቤዓናው ላሞቴዳ ዲራው  
\v 24 ሃዒካ ሂንቴንቱኮ ባና ጋዴ ቆፓይ፤ ታኒ ኢሲፔኔ ጌቴቲያ ጋዲያ ባዴ ሂንቴንታ ቤዓናው ኮያይ፤ ቃሲ ኣማሬዳ ዎዲያ ሂንቴንታ ቤዓዴ ናሼቶዋፔ ጉዪያን፥ ኢሲፔኔ ቢሺን፥ ሂንቴ ታና ማዳና ማላ ኮያይ። 
\p  
\v 25 ሺን ሃዒ ታኒ ፆሳ ኣሳቱዋ ማዳናው፥ ዬሩሳላሜ ባይ።  
\v 26 ኣዪሲ ጎፔ፥ ማቂዶኒያኔ ኣካዪያ ጌቴቲያ ጋዲያን ዴዒያ ዎሳ ጎሌ ኣሳቱ ዬሩሳላሜን ዴዒያ ሂዬሳቱዋሲ ሚሻ ኢማናው ኮዬዲኖ።  
\v 27 ኡንቱንቱ ባሬንቱ ሁጴው ሃዋ ኦናው ቆፋ ቃቼዲኖ። ኡንቱንቱ ሄ ሂዬሳቱዋ ማዳናዌ ኡንቱንቶ ኣጩ ዴዔ፤ ኣዪሲ ጎፔ፥ ኣዪሁዳቱ ባሬንቱ ኣያና ኣንጁዋ ኣዪሁዳ ጊዴና ኣሳቱዋና ሻኬዳዋ ጊዶፔ፥ ኣዪሁዳ ጊዴና ኣሳቱካ ቃሲ ባሬንቶ ዴዔዳባን ኣዪሁዳቱዋ ማዳናው ቤሴ።  
\v 28 ሄዋ ዲራው፥ ታኒ ሃ ኦሱዋ ዉርሴዳዋፔ ጉዪያኒኔ ኡንቱንቶ ሺቄዳ ሚሻ ኡባ ኢሜዳዋፔ ጉዪያን፥ ኢሲፔኔ ባዴ ሂንቴ ማታና ኣና።  
\v 29 ታኒ ሂንቴንቱኮ ቢያ ዎዴ፥ ኪሪስቶሳ ኣንጁ ታናን ኩሚና ባናዋ ኤራይ። 
\p  
\v 30 ታናዳን ኣማኒያዋንቶ፥ ታው ፆሳ ሂንቴ ዎሲዴ፥ ዎሳን ሂንቴ ታናና ሚናናዳን፥ ጎዳ ዬሱሲ ኪሪስቶሳ ባጋናኔ ጌሻ ኣያናይ ኢሚያ ሲቆቴን ታኒ ሂንቴንታ ዎሳይ።  
\v 31 ታኒ ዪሁዳን ዴዒያ ኣማኔናዋንቱፔ ኣታናዳኒኔ ቃሲ ታኒ ዬሩሳላሜን ኦያ ኦሱ ያኒ ዴዒያ ፆሳ ኣሳቱዋ ናሼቺያዋ ጊዳናዳን፥ ፆሳ ዎሲቴ።  
\v 32 ቃሲ ፆሳይ ጎፔ፥ ታኒ ሂንቴንቱኮ ናሼቻን ባዴ፥ ሂንቴ ማታን ሼምፓና።  
\v 33 ሳሮቴ ፆሳይ ሂንቴንቱና ኡባና ጊዶ። ኣሜንዒ። 
\c 16  
\s1 ሳሮታ 
\p  
\v 1 ኪንኪሪያ ጌቴቲያ ካታማን ዴዒያ ኣማኒያ ኣሳና ኦያ ኑ ሚቻታ ፔባ ሎዖ ማጫ ኣሳ ጊዲያዋ ታኒ ሂንቴንታ ኤሪሳይ።  
\v 2 ሂንቴንቱ ኢዞ ጌሻቱ ጎዳ ሱንን ሞኪያዋዳን ሞኪቴ፤ ቃሲ ኢዛ ሂንቴንቱፔ ኮዪያዌ ኣያ ጊዶፔካ፥ ኢዞ ማዲቴ፤ ኣዪሲ ጎፔ፥ ኢዛ ባሬ ሁጴው ጮራ ኣሳ ማዳው፤ ቃሲ ታና ታ ሁጴዉካ ዳሪሳ ማዳው። 
\p  
\v 3 ኪሪስቶሳ ዬሱሳ ኦሱዋ ታናና ኢቲፔ ኦያ ጲሪስቂሊሲኔ ኢዚ ኣሲና ኣቂላሲ ታ ሳሮቶዋ ኦዲቴ።  
\v 4 ኡንቱንቱ ታ ሼምፑዋ ዲራው፥ ባሬንቱ ሼምፑዋ ኣ ኢሜዲኖ። ኡንቱንታ ታ ፃላላ ጊዴናን፥ ኣዪሁዳ ጊዴና ኣሳ ኣማኒያ ኣሳይ ኡባይካ ጋላቴ።  
\v 5 ቃሲ ኡንቱንቱ ጎሊያ ኣማኒያ ኣሳይ ሺቂያሳ ኡዲዴ ጋኬቲያ ኣሳ ኡባ ሳሮ ጊቴ። ኢሲያ ጋዲያን ኪሪስቶሳ ኮይሮ ኣማኔዳ ታ ሲቂያ ኤፓኔቶሳው፥ ታ ሳሮቶዋ ኦዲቴ።  
\v 6 ሂንቴንቶ ሎይ ዳቡሬዳ ማይራሞ ሳሮቲቴ።  
\v 7 ታናና ቃሾ ጎሌን ዴዔዳ ታ ዳቦ ጊዴዳ ኣዪሁዳቱዋ፥ ኣንዲሮኒቆሳኔ ዩኒያሳ ሳሮቲቴ። ዬሱሲ ኪቴዳዋንቱ ጊዶን ኡንቱንቱ ሎይ ኤሬቴዳዋንታ። ቃሲ ኡንቱንቱ ኪሪስቶሳ ታፔ ካሴና ኣማኔዲኖ። 
\p  
\v 8 ጎዳና ኢቲፔቴን ዴዒያ ታ ሲቆ ላጊያ ኣምፒሊያቶሳው ታ ሳሮቶዋ ኦዲቴ።  
\v 9 ኪሪስቶሳ ኦሱዋ ኑናና ኢቲፔ ኦያ ኡርባኖሳኔ ታኒ ሲቂያ ኢስፃኩሳ ሳሮቲቴ።  
\v 10 ኪሪስቶሳና ኢ ዴዒያዌ ኤሬቲና ፓጪያ ፆኔዳ ኣጴሊሳው ታ ሳሮቶዋ ኦዲቴ፤ ኣሪስፆቢሎሳ ሶይ ኣሳዉካ ታ ሳሮቶዋ ኦዲቴ።  
\v 11 ታ ዳቦ ጊዴዳ ኣዪሁዳዊያ ሄሮዲዮናኔ ኪሪስቶሳ ኣማኒያ ናርሲሴሳ ሶይ ኣሳ ሳሮቲቴ። 
\p  
\v 12 ጎዳ ኦሱዋን ዳቡሪያ ቲሩፋይናኔ ቲሩፎሶ ጌቴቲያ ማጫዋንታ ሳሮቲቴ፤ ቃሲ ጎዳው ዳሮ ዳቡራዴ ኦያ ሲቂያ ፔርሲሶ ሳሮቲቴ።  
\v 13 ጎዳ ኦሱዋን ሎይ ኤሬቴዳ ሩፎሳዬዉኔ ታና ባሬ ናዓዳን ማዴዳ ኣ ዳዪው ታ ሳሮቶዋ ኦዲቴ።  
\v 14 ታ ሳሮቶዋ ኣሲንኪሪቶሳው፥ ፒሌጎናው፥ ሄርሜሳው፥ ፓቲሮባሳዉኔ ኡንቱንቱና ዴዒያ ኣማኒያ ኢሻቱዋ ኡባው ኦዲቴ።  
\v 15 ፒሌጎና፥ ዩሎ፥ ኔሪያ፥ ኣ ሚቻቶ፥ ኦሉምፖሳኔ ኡንቱንቱና ዴዒያ ፆሳ ኣሳቱዋ ኡባ ሳሮቲቴ። 
\p  
\v 16 ጌሻ ኣሳው ቤሲያ ዬሬታ ዬሬቲዴ፥ ኢቱ ኢቱዋ ሳሮቲቴ፤ ኪሪስቶሳን ኣማኒያዋንቱ ኡባቱ ሂንቴንታ ሳሮ ያጌዲኖ። 
\s1 ዉርሴ ዞሪያ 
\p  
\v 17 ታናዳን ኣማኒያዋንቶ፥ ኣሳ ጊዶን ሻኮቴ ሜያዋንታ፥ ኣሳ ኣማኖ ቦ ጊዲያዋንታኔ ሂንቴ ታማሬዳ ቲሚርቲያና ጋኬቴናዋ ታማሪሲያዋንታ ኣኬካናዳን፥ ታኒ ሂንቴንታ ዎሳይ። ኡንቱንቱኮ ሺቆፒቴ።  
\v 18 ኣዪሲ ጎፔ፥ ሄዋ ማላባ ኦያዋንቱ ባሬንቱ ኡሉዋሲ ኦኖፔ ኣቲን፥ ኑ ጎዳ ዬሱሲ ኪሪስቶሳው ኦኪኖ፤ ባሬንቱ ላቢያ ሃሳያኒኔ ቂያን ኢታባ ቆፔና ኣሳ ዎዛና ባሌኖ።  
\v 19 ዎንጋላው ሂንቴ ኣዛዜቴዳዋ ኣሳይ ኡባይ ሲሴዳ። ሄዋ ዲራው፥ ታኒ ሂንቴባን ናሼታይ፤ ሺን ሎዖቴው ሂንቴ ኣዳ ኤራንቻ ጊዳናዳኒኔ ቃሲ ኢታባው ኣሺኬ ጊዳናዳን ኮያይ።  
\v 20 ሳሮቴ ፆሳይ ሴፃና ሂንቴ ጌዲያፔ ጋርሳና ሃኬና ማታ ዎዴ ጋጫና። 
\p ኑ ጎዳ ዬሱሲ ኪሪስቶሳ ኣ ኬካቴይ ሂንቴንቱና ጊዶ። 
\p  
\v 21 ታናና ኦያ ፂሞቶሴ ሂንቴንታ ሳሮ ያጌ፤ ቃሲ ሃዋዳንካ፥ ታ ዳባቱ ሉቂዮሲ፥ ያሶኒኔ ሶሲጳፂሮሲ ሂንቴንታ ሳሮ ያጊኖ። 
\p  
\v 22 ታኒ፥ ፃርፂዮሲ፥ ሃ ዳቢዳቢያ ፃፌዳዌ፥ ሂንቴንቶ ጎዳ ሱንን ሳሮታ ኪታይ። 
\p  
\v 23 ኣማኒያ ኣሳይ ኡባይ ኣ ሶዪን ሺቂያ ታ ሲራ ጋዮሲ ሂንቴንታ ሳሮ ያጌ፤ ካታማ ሚሻ ኦይቂያ ኤራስፆሲኔ ኑ ኢሻይ ቁዋርፆሲ ሂንቴንታ ሳሮ ያጊኖ።  
\v 24 ኑ ጎዳ ዬሱሲ ኪሪስቶሳ ኣ ኬካቴይ ሂንቴንቱና ኡባና ጊዶ። ኣሜንዒ። 
\p  
\v 25 ኑኒ ፆሳ ጋላቴቶ። ታኒ ዎንጋላ ባጋና ዬሱሲ ኪሪስቶሳባ ኦዴዳዋዳኒኔ ዳሮ ዎዲያፔ ጌሚዴ፥ ሃዒ ቆንጬዳ ቱማቴዳን፥ ሂንቴ ኣማኑዋን ሂንቴንታ ፆሳይ ሚኒሳናው ዳንዳዬ።  
\v 26 ሺን ሃዒ ናባቱ ፃፌዳዋ ባጋና ቱማቴይ ቆንጪያን ኤሬታናዳን ኦዳ፤ ቃሲ ኣሳ ኡባይ ፆሳ ኣማኒዴ ኣዛዜታናዳን፥ ሜና ፆሳ ኣዛዙዋን፥ ሃ ኣላሚያን ዴዒያ ኣሳ ዜሬ ኡባው ቆንጬዳ። 
\p  
\v 27 ኣዳ ኤራቴይ ኣ ፃላላው ዴዒያ ኢቲ ፆሳው ዬሱሲ ኪሪስቶሳ ባጋና ሜናው ቦንቹ ጊዶ። ኣሜንዒ።