\id 2PE - ዳውሮ 
\h 2 ጴፂሮሳ ኪታ 
\toc1 ጴፂሮሲ ፃፌዳ ላዔን ኪታ 
\toc2 2 ጴፂሮሳ ኪታ 
\toc3 2ጵፅ 
\mt1 ጴፂሮሲ 
\mt2 ፃፌዳ ላዔን ኪታ 
\imt1 ጌሉዋ 
\ip ዬሱሲ ኪቴዳ ጴፂሮሲ ፃፌዳ ላዔን ኪታይ ፃፌቴዳዌ፥ ዱማ ዱማ ሳዓን ዴዒያ፥ ቤኒ ኣማኒያ ኣሳቱዋሳ። ኪታው ሁጴ ቆፋይ ዎርዶ ኣስታማራቱዋ ኢታ ኦሱዋኔ ኡንቱንቱ ቲሚርቲያ ጋሱዋን ሜቴዳ ፖኮ ዴዑዋ ኤቄቲያዋ። ሜቴዳ ሜታቱዋ ቃራናው ማዶ ጊዲያዌ ዬሱሳ ባሬንቱ ኣዪፊያን ቤዔዳኔ ኢ ታማሪሲያ ዎዴ ባሬንቱ ሃዪን ሲሴዳ ኣሳቱ ታማሪሴዳ ቲሚርቲያ ባጋና ፆሳባኔ ጎዳ ዬሱሲ ኪሪስቶሳዋ ኣማንያ ኤራ ዴሚያዋ። ፃፊ ዱማ ናጊዴ ኦዴዳባይ፥ «ኪሪስቶሲ ላዔ ዬና» ያጊያ ዎርዱዋ ቲሚርቲያባ። ሄዋ ፄሊያዋን ሃሳዪዴ፥ «ኪሪስቶሲ ሲሚዴ ዬናን ጋሚዔዳዌ፥ ፆሳይ፥ ኣሳይ ኡባይ ባሬ ናጋራፔ ሲማናዋፔ ኣቲን፥ ኦኒኔ ያናዋ ኮዬና ዲራሳ» ያጌ። 
\iot ሼምፓቱዋ ኡባቱዋሲ ኢሜቴዳ ቃን ቆፋቱዋ 
\io1 ጌሉዋ (1፡1-2) 
\io1 ኣማኒያ ኣሳ ፄሳ (1፡3-21) 
\io1 ዎርዶ ኣስታማራቱዋ (2፡1-22) 
\io1 ዬሱሳ ላዔን ዩሳ (3፡1-18) 
\c 1  
\p  
\v 1 ታኒ ሲሞኒ ጴፂሮሲ፥ ዬሱሲ ኪሪስቶሳ ፂሎቴ ባጋና ኑዋ ማላ ኣማኑዋ ኣኬዳዋንቶ፥ ሃ ዳቢዳቢያ ፃፋይ። 
\p  
\v 2 ፆሳኔ ኑ ጎዳ ዬሱሳ ሂንቴ ኤሪያዋን ኣ ኬካቴይኔ ሳሮቴይ ሂንቴንቶ ፓላሂዴ ጊዶ። 
\s1 ፆሳ ፄሳኔ ኣ ዶሩዋ 
\p  
\v 3 ኑኒ ፆሳ ቦንቹዋኔ ሎዖቴ ላታና ማላ፥ ኑና ፄሴዳዋ ኑኒ ኤሪያዋን፥ ዴዑዋሲኔ ፆሳ ማላቱሳሲ ኑና ኮሺያዋ ኡባ ፆሳ ዎልቃይ ኑሲ ኢሜዳ።  
\v 4 ሂንቴ ኣ ኢሙዋ ባጋና ሳዓን ዴዒያ ባዪዚያ ኣሙዋፔ ኬሲ ኣካናዳኒኔ ፆሳ ፆሳቴ ላታናዳን፥ ኢ ባሬ ኢማና ጌዳ ዳሮ ዎልቃማኔ ኣልዖ ኢሙዋ ኑሲ ኢሜዳ።  
\v 5 ሄዋ ዲራው፥ ሂንቴና ቤሲያዋ ኡባ ሚኒ ኦዴ፥ ሂንቴ ኣማኑዋ ቦላ ሎዖቴ፥ ሎዖቴ ቦላ ኤራቴ፥  
\v 6 ኤራቴ ቦላ ሂንቴና ናጊያዋ፥ ሂንቴና ናጊያዋ ቦላ ጌንጫ፥ ጌንጫ ቦላ ፆሳ ማላቲያዋ፥  
\v 7 ፆሳ ማላቲያዋ ቦላ ኢሻቴ ሲቁዋ፥ ኢሻቴ ሲቁዋ ቦላ ሲቁዋ ጉጂቴ።  
\v 8 ኣዪሲ ጎፔ፥ ሃዋንቱ ሂንቴንቶ ሎይ ዳሪያዋ ጊዶፔ፥ ሂንቴና ጎዳ ዬሱሲ ኪሪስቶሳ ኤራቴን ቲሻኔ ኣዪፊያና ዴዒያዋንታ ኦና።  
\v 9 ሺን ሄዋንቱ ባይና ኡራይ ባሬ ማታን ዴዒያዋ ፃላላ ዴሜ፤ ቃሲ ኢ ቆቃ፤ ኢ ካሴ ኦዳ ናጋራይ ኣቶ ጌቴቴዳዋ ዶጌዳ። 
\p  
\v 10 ሄዋ ዲራው፥ ታናዳን ፆሳ ካሊያዋንቶ፥ ሂንቴና ፆሳይ ፄሴዳዋኔ ዶሬዳዋ ሎይ ኤሪሳናው፥ ካሴዋፔ ኣ ሚኒቴ፤ ኣዪሲ ጎፔ፥ ሂንቴ ሄዋ ኦያዋ ጊዶፔ፥ ቤቲኪታ። \f + \fr 1:10 \fq ቤቲኪታ፡ \ft ናጋራን ኩንዲኪታ።\f* 
\v 11 ሄዋዳን ቃሲ ኑ ጎዳኔ ኑና ኣሺያ ዬሱሲ ኪሪስቶሳ ሜና ካዉቴ ጌሊያ ኩሜን ማታይ ሂንቴንቶ ኢሜታና። 
\p  
\v 12 ሄዋ ዲራው፥ ሂንቴ ሃ ዬዋቱዋ ኤሪያዋ ጊዶፔካ፥ ቃሲ ሂንቴ ኦይቄዳ ቱሙዋን ሚኔዳዋንታ ጊዶፔካ፥ ታኒ ሂንቴና ሃ ዬዋቱዋ ኡባ ዎዴ ሃሳዪሲያዋ ኣጊኬ።  
\v 13 ታኒ ፓፃ ዴዔዳ ኬናን፥ ሂንቴና ሃሳዪሳዴ ቃሴናው ኮሺያዋ ታው ማላቴ።  
\v 14 ኑ ጎዳይ ዬሱሲ ኪሪስቶሲ ታው ቆንጪያን ኦዴዳዋዳን፥ ታኒ ሃ ሃዪቂያ ኣሳቴ ጋሚዔናን ቃራ ኦላናዋ ኤራይ።  
\v 15 ታኒ ሃይቄዳዋፔ ጉዪያን ጊዲናካ፥ ሂንቴ ሃ ዬዋቱዋ ኡባ ዎዴ ቆፓናው ዳንዳያና ማላ፥ ታው ዳንዳዬቴዳዋ ኡባ ኦና። 
\s1 ኪሪስቶሳ ቦንቹዋ ባሬ ኣዪፊያን ቤዔዳ ማርካቱዋ 
\p  
\v 16 ኑኒ ኣ ዎልቃማ ቦንቹዋ ኑ ኣይፊያን ቤዒዴ ኦዴቶፔ ኣቲን፥ ሜ ኣኬዳ ቶሳን ኑ ጎዳ ኪሪስቶሳ ዎልቃኔ ዩሳ ሂንቴንቶ ኦዲቤይኮ።  
\v 17 ኣዪሲ ጎፔ፥ ዳሮ ዎልቃማ ቦንቹዋፔ፥ «ታኒ ኣኒ ዳሮ ናሼቲያ ታ ሲቆ ናዓይ ሃዋ» ያጊያ ኮሻይ ዬዳ ዎዴ፥ ፆሳ ኣዉዋፔ ቦንቹዋኔ ጋላታ ኢ ኣኬዳ።  
\v 18 ቃሲ ኑኒካ ጌሻ ዴሪያ ቦላን ኣናና ዴዒዴ፥ ሄ ኮሻይ ሳሉዋፔ ዬዳዋ ሲሴዶ። 
\p  
\v 19 ኣሳይ ሄዋፔ ሎይ ኣያ ቲምቢቲያ ኦዲያዋንቱ ሃሳዬዳ ኑና ሎይ ኣማንያ ቃላይ ኑሲ ዴዔ፤ ሂንቴ ሄ ቃላ ናጊያዋ ጊዶፔ ሎይዲታ። ኣዪሲ ጎፔ፥ ሄዌ ሳዓይ ዎንታና ጋካናሲኔ ዎንታ ፆሊንቲያ ፖዑ ሂንቴ ዎዛናን ፖዓና ጋካናው፥ ማኒ ፖዒያ ፖዑዋ ማላ።  
\v 20 ኡባፔ ካሴቲዴ፥ ሃዋ ኤሪቴ፤ ፆሳ ማፃፋን ፃፌቴዳ ቲምቢቲያ ኦዴዳዋ ኦኒኔ ባሬካ ቢላናው ዳንዳዬና።  
\v 21 ኣዪሲ ጎፔ፥ ቲምቢቲያ ኦዴዳዌ ኡባይ ጌሻ ኣሳቱ ጌሻ ኣያናይ ካሌና፥ ፆሳ ቃላ ሃሳዬዲኖፔ ኣቲን፥ ኣሳ ሼኒያን ሃሳዬቲቤና። 
\c 2  
\s1 ዎርዶ ኣስታማራቱዋ 
\p  
\v 1 ሺን ቲምቢቲያ ኦዲያ ዎርዳቱ ኣሳ ጊዶን ካሴ ዴዒያዋዳን፥ ሂንቴ ጊዶኒካ ዎርዱዋ ታማሪሲያዋንቱ ዴዓና። ኡንቱንቱ ባሬና ዎዜዳ፥ ጎዳ ካዲዴ፥ ባዪዚያ ዎርዶ ቲሚርቲያ ኣሃና፤ ቃሲ ኡንቱንቱ ኣኬኬና ባሻ ባሬንቱ ቦላ ኣሃና።  
\v 2 ቃሲ ዳሮ ኣሳይ ዬላዪያ ኡንቱንቱ ኢታ ኦጊያ ካላና፤ ኡንቱንቱ ጋሱዋን ቱሙዋ ኦጊ ቦሬታና።  
\v 3 ዎርዱዋ ታማሪሲያ ሄዋንቱ ሻሎ ያሬቲያዋን ባሬንቱ ሜ ኣኬዳ ቶሳን ሂንቴና ቦንቃና፤ ቤኒፔ ዶሚዴ፥ ኡንቱንቱ ፒርዳይ ጊጊ ኡቴዳ፤ ኡንቱንታ ዪሲያዌ ቤጎቲዴ ናጌ። 
\p  
\v 4 ናጋራ ኦዳ ኪታንቻቶ ፆሳይ ቃሬቴናን፥ ፒርዳ ጋላሳይ ጋካናው ማ ኦላን ኡንቱንቱ ቃሼቲ ኡቴዳ ጋናሚያን ዬጌዳ።  
\v 5 ፆሳይ ናጋራንቻቱዋ ቦላ ባሻ ሃ ዬዴዳፔ ኣቲን፥ ቤኒ ኣሳው ኬኪቤና፤ ሺን ፂሎቴባ ኦዴዳ ኖሃኔ ሃራ ላፑ ኣሳቱዋ ኣሼዳ። \x - \xo 2:5 \xt ዶም 6፡1-7፡24\x* 
\v 6 ፆሳይ ሶዶማኔ ጋሞራ ጊያ ካታማቱዋ ቢታ ቢዲን ኡዲዴ፥ ጉዲ ዪሲዴ፥ ናጋራንቻ ጊዲያዋንታ ጋካናባው ሌሚሱዋ ኦዳ። \x - \xo 2:6 \xt ዶም 19፡24\x* 
\v 7 ሂጌው ኣዛዜቴና ቱናቴ ኦያ ኣሳቱዋ ጊዶን ቱጋቲዴ ዴዒያ ፂሉዋ ሎፃ ፆሳይ ኣሼዳ። \x - \xo 2:7 \xt ዶም 19፡1-16\x* 
\v 8 ሄ ሎዖ ቢታኒ ኡንቱንቱ ጊዶን ዴዒዴ፥ ኡንቱንቱ ኦያ ኢታ ኦሱዋ ጋላሲ ጋላሲ ቤዔዳ ዎዴኔ ሲሴዳ ዎዴ ኣ ሎዖ ዎዛናይ ኡንዔቴዳ።  
\v 9-10 ሄዋ ጊዶፔ፥ ጎዳይ ፆሳው ጎዪኒያ ኣሳቱዋ ፓጪያፔ ዎቲ ኣሻኔንቶ ኤሬ፤ ናጋራንቻቱዋ ቃሲ ኡባፔ ኣዴ፥ ቱና ኣሙዋን ኣሹዋ ኣሙዋ ካሊያዋንታኔ ቃሲ ፆሳ ዎልቃ ካያዋንታ፥ ፒርዳ ጋላሳይ ጋካናው ጎዳይ ሙሪዴ ዎናዋካ ኤሬ። 
\p ዎርዱዋ ታማሪሲያ ሄዋንቱ ፃላኔ ኦቶራንቻ ጊዴዳዋን፥ ቦላን ዴዒያ ቦንቾ ሜታ ቦሪኖፔ ኣቲን፥ ቦንቺኪኖ።  
\v 11 ሄ ዎርዱዋ ታማሪሲያ ኣሳቱዋፔ ዳሮ ሚኖኔ ዎልቃማ ጊዲያ ኪታንቻቱካ ኡንቱንታ ጎዳ ሲንን ቦሪያን ሞታናው ኮዪኪኖ።  
\v 12 ሺን ሄ ኣሳቱ ኦይቄቲዴ ያናው ዬሌቴዳ ባሬንቱ ሜታን ዎዛናይ ባዪና ዎራ ዶዓቱዋዳን ሃኒኖ፤ ኡንቱንቱ ኤሬናባ ቦሪኖ፤ ቃሲ ባሬንቱ ባዪዙዋን፥ ኡንቱንቱ ጮ ያና።  
\v 13 ኡንቱንቱ ባሬንቱ ሜዳ ሜቱዋን ሜቶታና፤ ጋላሲ ዬፂዴ ዱሪያዋ ናሼቺያባ ጊዴ ቆፒኖ፤ ኡንቱንቱ ካዉሺሲያዋንታኔ ቱናቱዋ ጊዲ ኡቲዴ፥ ሂንቴናና ሚያ ቁማ ሙሳን ናሼቲኖ።  
\v 14 ጫራቲያ ማጫ ኣሳ ፄሊያዋ ኣጌና ኣይፊ ኡንቱንቶ ዴዔ፤ ቃሲ ናጋራ ኦያዋካ ኣጊኪኖ። ኣማኑዋን ሚኒቤና ኣሳ ጪሚኖ። ኣሙዋ ዶዬዳ ዎዛናይ ኡንቱንቶ ዴዔ፤ ኡንቱንቱ ሼቄቴዳዋንታ።  
\v 15 ሱሬ ኦጊያ ኣጊዴ ባሌዲኖ። ቢዖራ ናዓ ባላማ ኦጊያና ቤዲኖ፤ ባላሚ ማካላን ሚሻ ኣካናው ኮዬዳ። \x - \xo 2:15 \xt ፓይ 22፡4-35\x* 
\v 16 ኢ ቲምቢቲያ ኦዲያዋ፤ ሺን ኣ ናጋራ ዲራው፥ ኣ ሃሪ ኣሳዳን ሃሳያን ሴሪዴ፥ ጎሻ ማላ ሃኑዋፔ ኣ ቴዔዳ። 
\p  
\v 17 ሄ ኣሳቱ ሜሊዲጌዳ ፑልቱዋ ማላ፤ ቃሲ ጎቱ ቶኪዴ ኣፊያ ሻሪያ ማላ፤ ፆሳይ ኡንቱንቶ ሳካና ማ ጊጊሲ ዎዳ።  
\v 18 ኣዪሲ ጎፔ፥ ኡንቱንቱ ሜላኔ ኦቶሮ ሃሳያ ሃሳዪኖ፤ ባሊዴ ዴዒያ ኣሳፔ ኬሲ ዬዳዋንታ ዎልቃማ ኣሹዋ ኣሙዋን ጪሚኖ።  
\v 19 ኡንቱንቱ ባሬው ባሻ ኣሙዋና ዴዒዴ ኡንቱንታ፥ «ሂንቴ ኣዪሌቴፔ ኬሳና» ያጊኖ፤ ኣዪሲ ጎፔ፥ ኢቲ ኣሳይ ባሬና ፆኔዳባው ኣያዉኔ ኣዪሊያ።  
\v 20 ኡንቱንቱ ኑ ጎዳኔ ኑና ኣሺያ ዬሱሲ ኪሪስቶሳ ኤራቴን ሃ ሳዓ ቱናቴፔ ኬሲ ኣኬዳዋፔ ጉዪያን፥ ጉዬ ሲሚዴ፥ ኣኒ ቤቲዴ ፆኔቲያዋ ጊዶፔ፥ ካሴ ዴዒያ ዴዑዋፔ ጉዬዌ ኡንቱንቶ ኢታና።  
\v 21 ኣዪሲ ጎፔ፥ ኡንቱንቶ ኢሜቴዳ ጌሻ ኣዛዙዋ ኤሪዴ ኣጊያዋፔ ኡንቱንቱ ፂሎቴ ኦጊያ ኤሬናን ኣጊንቶ ሎዓ ሺን።  
\v 22 «ካናይ ባሬ ጮሻኮ ጉዬ ሲሜ» ጊያ ሌሚሱኔ ቃሲ፥ «ሜጬቴዳ ጉዱንይ ጉዬ ሲሚዴ፥ ኡርቃን ጎንዶሬቴ» ጊያ ሌሚሱ ቱማ ጊዲያዋ ኡንቱንታ ጋኬዳዌ ቤሴ። \x - \xo 2:22 \xt ሌም 26፡11\x* 
\c 3  
\s1 ጎዳይ ዬሱሲ ያና ናሼቻ 
\p  
\v 1 ታ ሲቃቶ፥ ሃዌ ታኒ ሂንቴንቶ ፃፌዳ ላዔን ዳቢዳቢያ፤ ታኒ ሄ ላዑ ዳቢዳባቱዋካ ሂንቴ ሱሬ ቆፋ ቆፓናዳን ዴንናው ሂንቴና ሃሳዪሳናዳን ፃፋዲ።  
\v 2 ጌሻ ጊዴዳ ናባቱ ቤኒ ኦዴዳ ቃላ ሂንቴ ሃሳያና ማላኔ ጎዳይ ሂንቴና ኣሺያዌ፥ ባሬ ኪቴዳዋንቱ ባጋና ሂንቴና ኣዛዜዳ ኣዛዙዋ ሂንቴ ሃሳያና ማላ ኮያይ።  
\v 3 ዎዲያ ዉርሴን፥ ኣሳ ቶቺያ ባሬንቱ ኣሙዋዳን ዴዒያዋንቱ ኣሳ ቶቺዴ ዴንዳናዋ ኡባፔ ካሴቲዴ ኤሪቴ።  
\v 4 ኡንቱንቱ፥ «ኢ ‹ያና› ያጌዳ። ጊቤኔ? ያቲና ሃቃን ዴዒ? ኣዪሲ ጎፔ፥ ኑ ኣዎቱ ሃዪቂ ዲጌዲኖ፤ ሺን ኡባባይካ ሳዓይ ሜቶዴፔ ዶሚዴ ዴዒያዋዳንካ ዴዔ» ያጋና።  
\v 5 ዳሮ ዎዲያፔ ካሴ ፆሳይ ሃሳዪና፥ ሳሉኔ ሳዓይ ሜቴዳዋ ኤሪዴ፥ ኡንቱንቱ ኣኬኬናን ኢፄዲኖ። ሳዓይ ሃፔኔ ሃን ሜቴዳ። \x - \xo 3:5 \xt ዶም 1፡6-9\x* 
\v 6 ቃሲ ሄዋ ጋሱዋን፥ ሄ ዎዴ ዴዒያ ሳዓይ ሄ ሃን ሚቴቲ ዬዳ። \x - \xo 3:6 \xt ዶም 7፡11\x* 
\v 7 ሺን ሃዒ ዴዒያ ሳሉኔ ሳዓይ፥ ፆሳው ጎዪኔና ኣሳቱ ፒርዴቲያ ጋላሳይኔ ዪያ ጋላሳይ ጋካናው ታኪዴ፥ ሄ ቃላን ታማ ናጊኖ። 
\p  
\v 8 ሺን ታ ሲቃቶ፥ ሃ ኢቲ ዬዋቶ ዶጎፒቴ፤ ጎዳ ማታን፥ ኢቲ ጋላሳይ ሻዓ ላይ ማላ ጊዲያዋኔ፥ ቃሲ ሻዓ ላይይ ኢቲ ጋላሳ ማላ ጊዲያዋ ዶጎፒቴ። \x - \xo 3:8 \xt ማዝ 90፡4\x* 
\v 9 ኢቱ ኢቱ ቆፒያዋዳን፥ ጎዳይ ባሬ ኦና ጌዳዋ ኦናው ታኬና፤ ሺን ኦኒኔ ባሬ ናጋራፔ ሲማናዳን ኮዬፔ ኣቲን፥ ኦኒኔ ያና ማላ ኮዬና ዲራው፥ ሂንቴሲ ጊዴ ዳንዳያን ጋምዔ። 
\p  
\v 10 ሺን ጎዳ ጋላሳይ ካዪሱዋዳን ያና። ሄ ጋላሲ ሳላቱ ዎልቃማ ጉንን ያና፤ ሳሉዋ ሜታቱ ዎልቃማ ሴላን ሲላና፤ ሳዓይኔ ኣ ቦላን ዴዒያ ኡባባይ ያና።  
\v 11 ኡባባይካ ሄዋዳን ዪያዋ ጊዶፔ፥ ሂንቴ ኣይ ማላ ኣሳ ጊዳናው ቤሲ? ሂንቴ ዴዑ ጌሻኔ ፆሳ ማላቲያዋ ጊዳናው ኮሼ።  
\v 12 ሂንቴ ፆሳ ጋላሳ ናጊሺና፥ ሄ ጋላሳይ ኤሌካ ጋካናዳን፥ ሂንቴንቶ ዳንዳዬቲያዋ ኦቴ፤ ሄ ጋላሲ ሳላቱ ጉዴቲዴ ያናኔ ሳሉዋ ሜታቱካ ዎልቃማ ሴላን ሲላና።  
\v 13 ሺን ኑኒ ፆሳይ ኢማና ጌዳ ኦራ ሳሉዋኔ ኦራ ሳዓ ፂሉ ዴዓናሳ ናጌቶ። \x - \xo 3:13 \xt ኢሳ 65፡17፤ 66፡22፤ ሳፅ 21፡1\x* 
\p  
\v 14 ሄዋ ዲራው፥ ታ ሲቃቶ፥ ሄ ጋላሳ ናጊዴ፥ ፖኩኔ ዬላዪያባይ ባዪናዋንታ ጊዲዴ፥ ኣናና ሳሮቴን ዴዓና ማላ ሎዖባ ኡባ ኦቴ።  
\v 15 ጎዳ ዳንዳያይ ኣቶቴ ጊዲያዋ ሂንቴ ዎዛናን ቆፒቴ፤ ሄዋዳን ቃሲ ኑ ሲቆ ኢሻይ ጳዉሎሲ፥ ፆሳይ ባሬው ኢሜዳ ኣዳ ኤራቴን ሂንቴንቶ ፃፌዳ።  
\v 16 ባሬ ፃፊያ ዳቢዳቢያን፥ ሄ ዬዉዋባ ፃፊያ ዎዴ፥ ታማሪቤና ኣሳቱኔ ሚኒቤና ኣሳቱ ሃራ ፆሳ ማፃፋቱዋ ጌላዪያዋዳንካ፥ ሄ ዳቢዳቢያ ጊዶን ዴዒያ ኣኬካናው ዋዪሲያ ዬዉዋ ጌላዪኖ። ኡንቱንቱ ሄዋ ኦያዋን ባሬንቱ ቦላ ባሻ ኣሂኖ። 
\p  
\v 17 ሄዋ ዲራው፥ ታ ሲቃቶ፥ ሂንቴ ሄዋ ኤሪያ ዲራው፥ ማካላንቻቱዋ ባላን ጪሜቲዴ፥ ዎራ ቤና ማላኔ፥ ቃሲ ሚኒዴ ዴዒያ ሳዓፔ ኩንዴና ማላ ናጌቲቴ።  
\v 18 ሺን ሂንቴ ኑ ጎዳ፥ ኑና ኣሺያ ዬሱሲ ኪሪስቶሳ ኣ ኬካቴኒኔ ኤራቴን ዲጪቴ። ኣው ሃዒኔ ሜና ጋላሳይ ጋካናው ጋላታይ ጋኮ። ኣሜንዒ።