\id 1TI - ዳውሮ 
\h 1 ፂሞቶሳ 
\toc1 ጳዉሎሲ ፂሞቶሳው ፃፌዳ ኮይሮ ኪታ 
\toc2 1 ፂሞቶሳ 
\toc3 1ፂም 
\mt2 ጳዉሎሲ 
\mt1 ፂሞቶሳው 
\mt2 ፃፌዳ ኮይሮ ኪታ 
\imt1 ጌሉዋ 
\ip ፂሞቶሳ ጌቴቲያ፥ ኣማኒያ ያላጋይ፥ ቄሪ ኢሲያ ጌቴቲያ ሳዓን ዬሌቴዳ። ኢ ባሬ ዳዪ ባጋና ኣዪሁዴ ኣሳ፤ ባሬ ኣቡ ባጋና ቃሲ ጊሪኬ ኣሳ። ኢ ጳዉሎሳና ኪታን ኢቲፔ ዙፔቲያ ኣሳ፤ ሚሺራቹዋ ቃላ ኪታካ ኣናና ማዴቲዴ ኦያዋ። ጳዉሎሲ ፂሞቶሳው ፃፌዳ ኮይሮ ኪታይ ሄዙ ኣይፌ ዬዋቱዋን ሻኬቴ። 
\ip ኡባፔ ካሴቲዴ ሃ ኪታይ ኣማኒያ ኣሳ ጊዶን ዴንዴዳ ዎርዶ ቲሚርቲያባ ሚኒሲዴ ኦዴ። ሃ ኢማ ጊዴዳ ቲሚርቲ ኣዪሁዳ ኣሳቱዋ ቆፋፔ ባጋኔ ሃራ ኣሳቱዋ ቆፋፔ ባጋ ኦይቄዳዋ፤ «ሃዌ ቤቲያ ኣላሚ ናጋራን ሃምባላቼቲ ዲጌዳዋ ጊዲያ ዲራው፥ ኣሳይ ኣቶቴ ዴማናው ዱማ ጊዴዳ ፁራ ኤራቴ ኤራናው፥ ኢቲ ኢቲ ቁማቱዋ ሜናን ኣጋናዉኔ ማቺያ ኣኬናኒኔ ኣሲና ጌሌናን ዴዓናው ኮሼ» ያጊያ ቆፋ ባሶ ኡዲዴ ኦይቄዳዋ። ሄዋ ቦላካ ጉጂዴ ኣ ኪታይ ኣማኒያ ኣሳ ኣዪሱዋባኔ ጎይኑዋ ዎጋባ ታማሪሲያ ቲሚርቲያ፤ ሄዋዳንካ ቃሲ ኣማኒያ ኣሳ ካሌያዋንቱኔ ኡንቱንታ ማዲያዋንቱ ኣይ ማላ ኤሻና ዴዒያዋንታ ጊዳናው ቤሲንቶ ኦዲያባ ኦይቄዳ። ዉርሴን ፂሞቶሲ ዬሱሲ ኪሪስቶሳሲ ኦያ ሎዖ ኦሳንቻ ዋኒዴ ጊዳናው ዳንዳይንቶኔ ቃሲ ዱማ ዱማ ኣማኒያ ኣሳ ማባራ ሲንን ኣው ዴዒያ ኣዎቴሲ፥ ጳዉሎሲ ኣ ዞሬዳ ዞሪያ ቤዔቶ። 
\iot ሼምፓቱዋ ኡባቱዋሲ ኢሜቴዳ ቃን ቆፋቱዋ 
\io1 ጌሉዋ (1፡1-2) 
\io1 ኣማኒያ ኣሳባኔ ኡንቱንቱ ጊዶን ኦያ ፆሳ ኦሳንቻቱዋባ (1፡3-3፡16) 
\io1 ፂሞቶሳው ኣ ኦሱዋሲ ኢሜቴዳ ቲሚርቲያ (4፡1-6፡21) 
\c 1  
\p  
\v 1 ኑና ኣሺያ ፆሳይኔ ኑኒ ቤዓና ጊዴ ናሼቻን ናጊያ ዬሱሲ ኪሪስቶሲ ኣዛዜዳ ኣዛዙዋዳን፥ ዬሱሲ ኪሪስቶሲ ኪቴዳዋ ጊዴዳ ታኒ ጳዉሎሲ፥  
\v 2 ኣማኑዋ ባጋና ታ ቱሙ ናዓው፥ ፂሞቶሳው ሃ ዳቢዳቢያ ፃፋይ። 
\s1 ዎርዶ ቲሚርቲያፔ ናጌቱሳ 
\p ፆሳ ኑ ኣዉዋፔኔ ኑ ጎዳ ኪሪስቶሳ ዬሱሳፔ ኣ ኬካቴይ፥ ማሮቴይኔ ሳሮቴይ ኔው ጊዶ። 
\p  
\v 3 ታኒ ማቂዶኒያ ባዴ ኔው ጌዳዋዳን፥ ኔኒ ኤፌሶኔን ጋሚዓና ማላ ኮያዲ። ኢቲ ኢቲ ኣሳቱ ዎርዱዋ ቲሚርቲያ ታማሪሲኖ፤ ሄዋንቱ ታማሪሴና ማላ፥ ኣጊቴ ጋዴ ኦዳ።  
\v 4 ኡንቱንቱ ቶሳ ኦዲያዋኔ ባሬንቱ ዛሪያ ጋይሪያዋ ኣጋናዳን ኦዳ። ኣዪሲ ጎፔ፥ ሄዋ ማላባይ ፓሉማ ካሌ፤ ቃሲ ፆሳ ቆፋ ኣማኑዋን ኤሬቲያዋ ኦኪኖ።  
\v 5 ሃ ኣዛዞ ዋና ቆፋይ ጌሻ ዎዛናፔ፥ ሎዖ ሱሬ ዎዛናፔ፥ ኣሳይ ቤዖ ጊያባይ ባይና ኣማኑዋፔ ቤቲያ ሲቁዋ ዴንናሳ።  
\v 6 ኢቲ ኢቲ ኣሳቱ ሃዋ ኣጊዴ፥ ማዴና ሃሳያኮ ሲሜዲኖ።  
\v 7 ኡንቱንቱ ኣያ ሃሳዪንቶኔ ዎይ ባሬንቱን ኣማኔቲዴ ኦዲያባይ ኣዬንቶ ኤሪኪኖ፤ ሺን ፆሳ ሂጊያ ታማሪሲያዋንታ ጊዳናው ኮዪኖ። 
\p  
\v 8 ኣሳይ ቤሲያዋዳን ሂጊያን ጎዔቶፔ፥ ሂጊ ሎዓ ጊዲያዋ ኑኒ ኤሬቶ።  
\v 9 ኢቲባ ኣኬካናው ኮሼ። ሂጊ ሎዖ ኣሳው ሜቲቤና። ሺን ሂጊያ ሜንያዋንቶ፥ ኣዛዜቴናዋንቶ፥ ማካላንቻቶ፥ ናጋራንቻቶ፥ ጌሻቴይ ባይናዋንቶ፥ ቱናቶ፥ ባሬንቱ ዳዮ ዎይ ኣባ ዎያዋንቱሲ፥ ሼምፑዋ ዎያዋንቱሲ፥  
\v 10 ዎሹማናው ካጄሊያዋንቶ፥ ኣቱማ ኣሳይ ኣቱማ ኣሳና ዎሹሚያዋንቶ፥ ኣሳ ዛሊዒያዋንቶ፥ ዎርዳንቻቶኔ ዎርዱዋን ጫቂያዋንቶ፥ ዎይ ቱሙ ቲሚርቲያና ጋኬቴና ኣይ ኦሱዋ ጊዲናካ ኦያዋንቶ ኬሴዳ።  
\v 11 ሄ ቱሞ ቲሚርቲ ኣንጄቴዳ ፆሳይ ታኒ ኣዋጃና ማላ፥ ታው ሃዳራ ኢሜዳ ቦንቾ ዎንጋላ ጊዱዋን ዴዔ። 
\s1 ጳዉሎሲ ፆሳው ሺሼዳ ጋላታ 
\p  
\v 12 ታኒ ኦያ ኪታን ታው ዎልቃ ኢሜዳ ኑ ጎዳ ኪሪስቶሳ ዬሱሳ ጋላታይ። ታና ባሬ ኦሳንቻ ሱንዴ፥ ታና ሄ ኦሶ ቤሲያ ኣማኔቶዋ ጊዴ ፓይዴዳ ዲራዉካ ኣ ጋላታይ።  
\v 13 ታኒ ሃዋፔ ካሴ ኣ ቦሪያዋ፥ ኣ ዬዴርሲያዋኔ ቱጋዪያዋ ጊዶፔኔ፥ ታው ሃዋ ኢ ኦዳ። ሺን ታኒ ኤሬናን ኦዳ ዲራዉኔ ኣማናቤና ዲራው፥ ፆሳይ ታና ማሬዳ።  
\v 14 ቃሲ ኑ ጎዳይ ዛዋይ ባይና ባሬ ኣ ኬካቴ ታ ቦላን ጉሲዴ፥ ኪሪስቶሳ ዬሱሳ ባጋና ኑባ ጊዴዳ ኣማኑዋኔ ሲቁዋ ታው ኢሜዳ። 
\p  
\v 15 ኪሪስቶሳ ዬሱሲ ናጋራንቻቱዋ ኣሻናው ሃ ሳዓ ዬዳ ጊያ ሃሳያይ ኣማኔቴዳዋኔ ኣሳይ ኡባይ ቱማ ጊዴ ኣካናው ቤሲያዋ። ኡባፔ ኣያ ናጋራንቻይ ታና።  
\v 16 ሺን ሜና ዴዑዋ ኣካናው ኣኒ ኣማናናው ቤሲያ ኣሳው ታኒ ሌሚሱዋ ጊዳናዳን፥ ኡባፔ ኣያ ናጋራንቻው ታው ዬሱሲ ኪሪስቶሳ ዳሮ ዳንዳያዳን፥ ፆሳይ ታና ማሬዳ።  
\v 17 ኣይፊያን ቤቴና ሜና ፆሳው ኢቱዋሲ፥ ሜና ካቴው፥ ሜናፔ ሜና ጋካናው ጋላታይኔ ቦንቹ ጊዶ። ኣሜንዒ! 
\p  
\v 18 ታ ናዓ ፂሞቶሳ፥ ካሴ ኔባ ቲምቢቲያ ኦዴዳዋዳን፥ ሄ ኦዴዳዋዳን ሎዖ ኦላ ኔኒ ኦሌታና ማላ፥ ሃ ኣዛዙዋ ኔው ሃዳራ ኢማይ።  
\v 19 ኣማኑኔ ሎዖ ሱሬ ዎዛናይ ኔው ዴዖ። ኢቱ ኢቱ ባሬንቱ ሱሬ ዎዛና ዬጊ ኣጊዴ፥ ላጊያዌ ባይና ማርካቢ ባዪያዋዳን፥ ባሬንቱ ኣማኑዋ ባዪዜዲኖ።  
\v 20 ፆሳ ቦሪያዋ ኣጋና ማላ፥ ሄዋ ታማራናው ታኒ ሴፃናው ኣ ኢሜዳ ሄሜኔዮሲኔ ኢስኪንዲሪ ኡንቱንቱ ጊዶን ዴዒኖ። 
\c 2  
\s1 ዎሳ ጎሊያ ዎሳ 
\p  
\v 1-2 ኑኒ ፆሳ ማላቲያዋን፥ ጌሻቴ ኡባን፥ ሳሮቴኒኔ ኣሺኬቴን ዴዓና ማላ፥ ኣሳ ኡባው፥ ካቴቶኔ ሱንቴይ ዴዒያ ኡባቶ፥ ፆሳ ኦቻናው፥ ዎሳናው፥ ጋናታናዉኔ ጋላታናው ቤሲያዋ ኡባባፔ ካሴታዴ ታኒ ኔና ኤሪሳይ።  
\v 3-4 ኣሳይ ኡባይ ኣታናዳኒኔ ቱማቴ ኤራናዳን ኮዪያ ኑና ኣሺያ ፆሳ ሲንን ሃዌ ሎዒያባኔ ናሼቺያዋ።  
\v 5 ኣዪሲ ጎፔ፥ ኢቲ ፆሳይ ዴዔ፤ ፆሳፔኔ ኣሳፔ ጊዱዋን ጊዲዴ ጋናቲያ ኢቱ ዴዔ። ሄዌካ ኪሪስቶሲ ዬሱሳ ጊያ ኣሳ።  
\v 6 ኢ ኣሳ ኡባ ዎዛናው ባሬና ኡባው ኢሜዳ። ፆሳይ ባሬ ዎዲያን ኣሳ ኡባ ዎዛናው ኮዪያዋ ቤሲያ ማርካይ ሃዋ።  
\v 7 ታኒ ፆሳ ቃላ ኦዲያዋ፥ ዬሱሲ ኪቴዳዋኔ ቃሲ ኣማኑዋኒኔ ቱማቴን ኣዪሁዳ ጊዴና ኣሳ ታማሪሲያዋ ጊዳዴ ሱንቴዳዌ ሃዋሳ። ታኒ ዎርዶቲኬ፤ ቱሙዋ ሃሳያይ። 
\p  
\v 8 ሄዋ ዲራው፥ ኡባሳን ዴዒያ ኣቱማ ኣሳይ ሃንቁኔ ፓሉሚ ባይናን፥ ባሬ ጌሻ ኩሺያ ፑዴ ዴንዴ፥ ፆሳ ዎሳናዳን፥ ታኒ ኮያይ። 
\p  
\v 9-10 ሄዋዳን ቃሲ ማጫዋንቱካ ቤሲያ ማዩዋ ያሻቴኒኔ ባሬንታ ሞዲያዋን ማዪኖ። ፆሳው ያያይ ጊያ ማጫ ኣሳ ቤሲያዋዳን፥ ሎዖባ ኦያዋናፔ ኣቲን፥ ሁጲያ ሹሩባ ዳዲያዋን፥ ዎርቃን ዎይ ኢንቁዋን፥ ዎይ ዳሮ ኣልዖ ኣፊላን ባሬና ኣሌቂሶፒኖ። 
\p  
\v 11 ማጫዉና ኡባባኒ ሞዴታዴ፥ ጮዑ ጋዴ ታማሩ።  
\v 12 ታኒ ማጫዉና ጮዑ ጋዴ ዴዑ ጋዪፔ ኣቲን፥ ኣቱማ ኣሳ ታማሪሱኔ ዎይ ኡንቱንቱ ቦላ ኣዎቱ ጊኬ።  
\v 13 ኣዪሲ ጎፔ፥ ኣዳሚ ኮይሮ ሜቴዳ፤ ሄዋና ጉዬፔ ሜታዱ። \x - \xo 2:13 \xt ዶም 2፡7፣ 21-22\x* 
\v 14 ሄዋና ጪሜታዴ ፆሳ ሂጊያ ሜንዱፔ ኣቲን፥ ኣዳሚ ጪሜቲቤና። \x - \xo 2:14 \xt ዶም 3፡1-6\x* 
\v 15 ሺን ማጫዉና ኣማኑዋን፥ ሲቁዋን፥ ጌሻቴኒኔ ባሬና ሞዳዴ ዴዖፔ፥ ናና ዬሊያዋን ኣታና። \f + \fr 2:15 \fq ናና ዬሊያዋን ኣታና፡ \ft ናና ዬሊያዋን ናጌታ ዴዓና ጉሳ።\f* 
\c 3  
\s1 ዎሳ ጎሊያ ካሌያዋንታ 
\p  
\v 1 ኦኒኔ ዎሳ ጎሊያ ካሌያዋ ጊዳናው ኮዮፔ፥ ሎዖባ ኣሞቴዳ ጊያ ሃሳያይ ቱማ።  
\v 2 ዎሳ ጎሊያ ካሌያ ኡራይ ቦሪሴናዋ፥ ኢቲ ማቻቲ ፃላላይ ዴዒያዋ፥ ባሬና ሞዲያዋ፥ ባሬና ናጊያዋ፥ ባሬው ቤሲያዋ ኦያዋ፥ ኢማ ሞኪያዋ፥ ታማሪሳናው ዳንዳዪያዋ፥ \x - \xo 3:2 \xt ቲት 1፡6-9\x* 
\v 3 ማቴናዋ፥ ኣሺኬቴፔ ኣቲን ዋላቄቴናዋ፥ ፓሉሜቴናዋ፥ ሻሉዋ ሲቄናዋ፥  
\v 4 ናናይ ኣው ኣዛዜቲያዋኔ ቦንቺያዋ፥ ቃሲ ባሬ ጎሊያ ኣዪሳናው ዳንዳዪያዋ ጊዳናው ቤሴ።  
\v 5 ኣዪሲ ጎፔ፥ ኢቲ ኡራይ ባሬ ጎሊያ ኣዪሳናው ዳንዳዬናዋ ጊዶፔ፥ ፆሳ ኣማኒያዋንታ ዎቲ ኣዪሳናው ዳንዳዪ? 
\p  
\v 6 ኦቶሩዋን ሱጌቲዲ፥ ፃላሂያ ካፑ ፆሳ ፒርዳን ኩንዴዳዋዳን ኩንዴና ማላ፥ ኦራ ኣማኔዳ ኣሳ ጊዳናው ቤሴና።  
\v 7 ፃላሂያ ካፑዋ ቦሪያኒኔ ጲሪያን ጌሌና ማላ፥ ሄ ኡራይ ዎሳ ጎሊያፔ ካሬና ዴዒያ ኣሳን ናሼቲያዋ ጊዳናው ቤሴ። 
\s1 ዎሳ ጎሌን ማዲያዋንቱባ 
\p  
\v 8 ሄዋዳን ቃሲ ዎሳ ጎሊያ ማዲያዋንቱ ኣሳይ ቦንቺያዋንታ፥ ላዑ ዶና ሃሳዬናዋንታ፥ ዳሮ ዎዪኒያ ኤሳ ኡሼናዋንታ፥ ሚሻው ያሬቴናዋንታ፥  
\v 9 ኣማኑዋ ፁራ ጌሻ ዎዛና ቆፋን ናጊያዋንታ ጊዳናው ቤሴ።  
\v 10 ሄዋንቱ ካሴቲዴ ፓጬታናው ኮሼ። ፓጪያ ኣዋፔ ጉዪያን፥ ዎሳ ጎሌን ኦያዋንታ ጊዲዴ ኦኖ። 
\p  
\v 11 ሄዋዳንካ ቃሲ ኡንቱንቱ ማቻቱ ኣሳይ ቦንቺያዋንታ፥ ዚጊሬናዋንታ፥ ባሬና ሞዲያዋንታ፥ ኡባባኒ ኣማኔቲያዋንታ ጊዳናው ቤሴ። 
\p  
\v 12 ዎሳ ጎሊያ ማዲያዌ ኢቲ ማቻቲ ፃላላይ ዴዒያዋኔ ቃሲ ባሬ ናናኔ ባሬ ጎሊያ ሎይ ኣዪሲያዋ ጊዳናው ቤሴ።  
\v 13 ኣዪሲ ጎፔ፥ ዎሳ ጎሊያ ማዲያዋንታ ጊዲዴ፥ ሎዖ ኦሱዋ ኦያዋንቱ ባሬንቱ ሁጴው ዎልቃማ ቦንቹዋ ዴሚኖ፤ ቃሲ ኪሪስቶሳ ዬሱሳን ባሬንቶ ዴዒያ ኣማኑዋ ሎይ ፃሊዴ ሃሳያናው ዳንዳዪኖ። 
\s1 ዎልቃማ ፁራ 
\p  
\v 14 ታኒ ኔኮ ኤሌካ ባና ጋዴ ሃዋ ኔው ፃፋይ።  
\v 15 ሺን ታኒ ቤናን ጋሚዖፔ፥ ፆሳ ጎሌን ኔኒ ዎታ ዴዓናው ቤሲንቶ ኤራና ማላ ፃፋይ። ሄ ጎሊ ቱማቴው ቱሳኔ ባሶ ጊዲያ ዴዑዋ ፆሳ ዎሳ ጎሊያ።  
\v 16 ኑ ኣማኑዋ ፁራይ ዎልቃማ ጊዲያዋ ኦኒኔ ሲናው ዳንዳዬና። 
\q1 ኪሪስቶሲ ኣሹዋን ቆንጬዳ፤ 
\q2 ኢ ፂሉዋ ጊዲያዋ ጌሻ ኣያናይ ማርካቴዳ። 
\q1 ኪታንቻቱካ ኣ ቤዔዲኖ፤ 
\q2 ኣዪሁዳ ጊዴና ኣሳይ ኣባ ኦዲና ሲሴዳ። 
\q1 ሳዓን ዴዒያ ኣሳይ ኣ ኣማኔዳ፤ 
\q2 ቦንቹዋን ኢ ሳሉዋ ቤዳ። 
\c 4  
\s1 ዎርዶ ኣስታማራቱዋ 
\p  
\v 1 ኢቲ ኢቲ ኣሳይ ዉርሴ ዎዲያን ኣማኑዋ ኣጋናዋ ጌሻ ኣያናይ ቆንጪያን ኦዴዳ። ኡንቱንቱ ዎርዶ ኣያናቱዋሲ ኣዛዜታና፤ ቃሲ ፃላሃቱዋ ቲሚርቲያ ካላና።  
\v 2 ሃዋ ማላ ቲሚርቲ፥ ቲላ ዎዛና ታማን ቦንቄዳ ቢራታን ጉዴዳዋዳን ዶንጪሌዳ ዎርዶ ኣሳቱዋ ባጋና ዬዳ። 
\p  
\v 3 ሃዋንቱ ማላ ኣሳቱ ኣኪያዋኔ ጌሊያዋ ቃሲ ኢቲ ኢቲ ቆሞ ካ ሚያዋ ዲጊኖ። ሺን ኣማኒያዋንቱኔ ቱማቴ ኤሪያዋንቱ ፆሳ ጋላቴዳዋፔ ጉዪያን ማና ማላ፥ ፆሳይ ካ ሜዳ።  
\v 4 ኣዪሲ ጎፔ፥ ፆሳይ ሜዳባይ ኡባባይካ ሎዓ። ፆሳ ጋላቲዴ ኣኮፔ፥ ኦሌቲያዌ ኣያይኔ ባዋ።  
\v 5 ኣዪሲ ጎፔ፥ ሄ ኡባባይ ፆሳ ቃላኒኔ ዎሳን ኣንጄቴዳዋ። 
\s1 ኪሪስቶሳሲ ሎዖ ኦሳንቻ ጊዲያዋ 
\p  
\v 6 ሄዋ ዲራው፥ ኔኒ ኢሻቱዋ ሄዋ ሃሳዪሲያዋ ጊዶፔ፥ ኣማኑዋኔ ኔኒ ካሌዳ ሎዖ ቲሚርቲያ ቃላን ኤቆፔ ኔኒ ኪሪስቶሲ ዬሱሳው ሎዖ ኦሳንቻ ጊዳናሳ።  
\v 7 ሺን ኣማኒያ ኣሳው ሎዔና ሃሳያፔኔ ቃሲ ጪማ ማጫ ኣሳ ቶሳፔ ባቃታ። ቃሲ ፆሳ ማላቲያዋን ኔና ሎሂሳ።  
\v 8 ኣዪሲ ጎፔ፥ ኣሳይ ባሬ ቦላ ሚኒሲያዌ ላፋ ጎዔ። ሺን ፆሳ ማላቲያዋን ሎሂሲያዌ ሃዒካ ሲንፔካ ዴዑዋ ኢማና ጊያ ዲራው፥ ኡባባዉካ ጎዔ።  
\v 9 ሃ ሃሳያይ ኣሳይ ኡባይ ኣካናው ቤሲያ ቱሙ ሃሳያ።  
\v 10 ኑኒ ሄዋ ዴማናው ዳቡሬቶኔ ሎይ ኦቶ፤ ሄዋሲ ኑኒ ሂዶታ ዎዳዌ ኣሳ ኡባ፥ ኡባፔ ኣዴ፥ ኣማኒያዋንታ ኣሺያ ዴዑዋ ፆሳ። 
\p  
\v 11 ሃዋ ኣዛዛኔ ታማሪሳ።  
\v 12 ኔኒ ያላጋ ጊዲያ ዲራው፥ ኔና ኦኒኔ ካፖ። ሺን ኣማኒያዋንቶ ኔ ሃሳያን፥ ሃኖቴን፥ ሲቁዋን፥ ኣማኑዋኒኔ ጌሻቴን ሌሚሱዋ ጊዳ።  
\v 13 ታኒ ያና ጋካናው ኣሳሲ ፆሳ ማፃፋ ናባቢያዋኒ፥ ፆሳ ቃላ ኦዲያዋኒኔ ታማሪሲያዋኒ ሚና።  
\v 14 ቲምቢቲያ ኦዲያዋንቱ ሃሳዪናኔ ጪማቱ ባሬንቱ ኩሺያ ኔ ቦላ ዎና፥ ኔኒ ኣኬዳ፥ ኔናን ዴዒያ ጌሻ ኣያና ኢሙዋ ቶቾፓ። 
\p  
\v 15 ኔ ዲቻይ ኣሳ ኡባው ቆንጫና ማላ፥ ሄዋ ሚኒሳ ቆፓ። ሃዋ ኡባ ዎዴ ኦ።  
\v 16 ኔ ሁጲያኔ ኔ ቲሚርቲያ ናጋ። ኔኒ ሄዋ ኦፔ፥ ኔናኔ ኔኒ ጊያዋ ሲሲያዋንታ ኣሺያ ዲራው፥ ኣጌናን ኦ። 
\c 5  
\s1 ኣምዔቱዋ ዞሬዳ ዞሪያ 
\p  
\v 1 ጪማ ኣሳ ኔ ኣባ ቦንቺያዋዳን ቦንቻፔ ኣቲን፥ ቶቾፓ። ያላጋቱዋ ኔ ኢሻዳን፥  
\v 2 ቃሲ ጪማ ማጫ ኣሳ ኔ ኣቲዳን፥ ያላጋ ማጫ ኣሳ ኔ ሚቻቲዳን፥ ኩሜን ጌሻቴን ቦንቻ። 
\p  
\v 3 ባሬ ፃላላ ጊዴዳ ቱሙ ኣምዔቱዋ ቦንቻ።  
\v 4 ሺን ኣምዓቲው ናናይ ዎይ ናና ናናይ ዴዖፔ፥ ሄ ናናይ ፆሳ ማላቲያዋ ባሬንቱ ሶይ ኣሳ ቤሲያዋኒኔ ቃሲ ሄዋ ኦያዋን ባሬንታ ዬሌዳዋንቱ ኩሺያ ዛሪያዋ ታማሪኖ። ኣዪሲ ጎፔ፥ ሄዌ ፆሳ ናሼቺያዋ። 
\p  
\v 5 ኣያ ማዱካ ባይና ባሬ ዴዒያ ቱሙ ኣምዓታ ፆሳይ ኢማና ጋዴ ናሼቻን ናጋ ኡታዱ። ቃሲ ጋላሲኔ ቃማ ፆሳይ ኢዞ ማዳና ማላ፥ ዎሳዉኔ ኦቻው።  
\v 6 ሺን ባሬና ኢሻሊሲያ ኣምዓታ ፓፃ ዴዖፔካ፥ ኢዛ ሃይቃዲጋዱ።  
\v 7 ቃሲ ኦኒኔ ኡንቱንታ ቦሬና ማላ፥ ሃ ኣዛዙዋ ኢማ።  
\v 8 ሺን ባሬንቱዎ ቃሲ ኡባፔ ኣዴ፥ ባሬ ሶይ ኣሳው ቆፔና ኡራይ ኦናኔ ጊዶፔ፥ ሄዌ ባሬ ኣማኑዋ ካዴዳዋ። ኣማኔና ኣሳፔካ ኣዴ ኣው ኢታ። 
\p  
\v 9 ኡሱፑን ታሙ ላይይ ኩሚቤና ኣምዓቲ ሱን ማዚጎቢያን ፃፎፓ። ሄዋ ቦላን ቃሲ ኢዛ ኢቲ ኣሲናፔ ሃራ ጌላቤናዉኖ ጊዳናው ኮሼ።  
\v 10 ናና ዲቺያዋን፥ ኢማ ሞኪያዋን፥ ጌሻቱዋ ጌዲያ ሜጪያዋን፥ ዋዬቴዳ ኣሳ ማዲያዋን፥ ሎዖ ኦሱዋ ኡባ ካሊያዋን፥ ሃ ሎዖ ኪታ ኪቴቲያዋን ኤሬቴዳዉኖ ጊዳናው ቤሴ። 
\p  
\v 11 ሺን ያላጋ ኣምዔቱዋ ዮኮንቱ ሱንና ጋ ፃፎፓ። ኣዪሲ ጎፔ፥ ኡንቱንቱ ባሬንታ፥ ኣሲና ጌላ ጌላ ጊያ ዎዴ፥ ኪሪስቶሳ ኣጋናዋንታ።  
\v 12 ኮይሮ ኣማኑዋ ካዳ ዲራው፥ ኡንቱንቱ ፒርዴታና።  
\v 13 ሄዌ ባይናን ኦሱዋ ዪዴ ኢቲ ጎሊያፔ ሃራ ጎሊያ ዩዪዴ፥ ሃሜቲያዋ ፃላላ ጊዴናን፥ ባሬንቶ ቤሴናባ ሃሳዪዴ፥ ዚጊርሳኔ ዬዉዋን ጮ ጌሊያዋ ታማሪኖ።  
\v 14 ሄዋ ዲራው፥ ኑ ሞርኬቱ ኑ ቦላ ሃሳዪያ ኢታባ ዴሜና ማላ፥ ያላጋ ኣምዓቱ ኣሲና ጌሊዴ፥ ናዓ ዬሊዴ፥ ባሬንቱ ጎሊያ ኣዪሳና ማላ ዞራይ።  
\v 15 ኣዪሲ ጎፔ፥ ሃዋፔ ካሴ ኣማሬዳ ኣምዓቱ ሴፃና ካላናው ኣጊዴ ጉዬ ሲሜዲኖ። 
\p  
\v 16 ኣማኒያ ሚሺራቲው ሃቃንካ ዳቦ ኣምዓቱ ዴዖፔ፥ ኢዛ ኡንቱንታ ማዳናው ቤሴ። ኣማኒያ ኣሳቱ ማዱ ቤሲያ ቱሙ ኣምዔቱዋ ማዳና ማላ፥ ኡንቱንቱ ኣማኒያዋንቶ ቶኮ ጊዶፒኖ። 
\p  
\v 17 ሎይ ሄሚያ ጪማቱ፥ ቃሲ ኡባፔ ኣዴ፥ ቃላ ኦዲያዋኒኔ ታማሪሲያዋን ዳቡሪያዋንቱ፥ ዳኮ ቦንቹዋ ኣካናው ቤሲኖ።  
\v 18 ኣዪሲ ጎፔ፥ ፆሳ ማፃፋይ፥ «ኡዱማን ካ ዬያ ቦራ ዶና ቃቾፓ» ቃሲ፥ «ኦሳንቻይ ባሬ ዲርጉዋ ኣካናው ቤሴ» ያጌ። \x - \xo 5:18 \xt ዛር 25፡4፤ ማት 10፡10፤ ሉቅ 10፡7\x* 
\p  
\v 19 ላዑ ዎይ ሄዙ ማርካይ ባይናን፥ ዎሳ ጎሊያ ጪማ ሞቲያዋ ሲሶፓ። \x - \xo 5:19 \xt ዛር 17፡6፤ 19፡15\x* 
\v 20 ሃራቱ ያያና ማላ፥ ናጋራ ኦያ ኡባቱዋ ኣሳ ኡባ ሲንን ሴራ። 
\p  
\v 21 ኔኒ ኣይኔ ኣሳ ዴሙዋ ፄሌናን፥ ኢቱዋ ኢቱዋፔ ዱማዬናን ሃ ኣዛዙዋ ናጋና ማላ፥ ፆሳኒኔ ዬሱሲ ኪሪስቶሳን ዶሬቴዳ ኪታንቻቱዋ ሲንን ኔና ታኒ ዞራይ።  
\v 22 ኦ ቦላኒኔ ኤሌላዴ ኔ ኩሺያ ዎፓ። ሃራቱዋ ናጋራን ጌሎፓ። ኔና ጌሻቴን ናጋ። 
\p  
\v 23 ኔኒ ኡባ ዎዴ ሳኬቲያ ዲራዉኔ ኔ ኡሉዋ ዲራው፥ ጉ ዎዪኒያ ኤሳ ኡሻፔ ኣቲን፥ ሃ ፃላላ ኡሾፓ። 
\p  
\v 24 ኢቲ ኢቲ ኣሳቱዋ ናጋራይ ቤዓናው ቆንጬ፤ ኡንቱንቱ ናጋራይ ኡንቱንታ ፒርዳናው ኡንቱንቱፔ ሲንው ኣ። ሺን ሃራቱ ናጋራይ ጉዬፔ ቆንጬ።  
\v 25 ሄዋዳንካ፥ ሎዖ ኦሱካ ቆንጬ። ቆንጪቤናባ ጊዶፔኔ፥ ጌማናው ዳንዳዬና። 
\c 6  
\s1 ኣይሌቱዋሲ ኢሜቴዳ ዞሪያ 
\p  
\v 1 ፆሳ ሱንይኔ ኑ ቲሚርቲ ቦሬቴና ማላ፥ ኣይሌቴ ሞርጌ ሚ ጊዶን ዴዒያዋንቱ ባሬና ሞዲያ ጎዳቶ ቦንቹ ቤሲያዋ ኤሪኖ።  
\v 2 ኣማኒያ ኣሳ ኣይሊያ ጊዴዳዋንቶ ኡንቱንቱ ጎዳቱ ኡንቱንቶ ኢሻ ጊዲያ ዲራው፥ ኡንቱንታ ካፒኖ። ሺን ባሬንቱ ኪታን ጎዔቲያዋንቱ ኡንቱንቱ ሲቂያ ኣማኒያዋንታ ጊዲያ ዲራው፥ ኡንቱንቱ ካሴዋፔ ኣዴ ኦናው ቤሴ። 
\s1 ዎርዶ ቲሚርቲያኔ ቱሙ ዱሬቴ 
\p ኔኒ ሃ ዬዋቱዋ ታማሪሳናዉኔ ኦዳናው ቤሴ።  
\v 3-4 ኦኒኔ ዱማ ቲሚርቲያ ታማሪሲያዋ ጊዶፔ፥ ቃሲ ኑ ጎዳ ዬሱሲ ኪሪስቶሳ ቱሙ ቃላናኔ ኑ ኣማኑዋ ቲሚርቲያና ጋኬቴና ኡራይ ዳሮ ኦቶሬቴ፤ ኣይኔ ኤሬና። ቃሲ ቃላ ቦላን ፓሉሜታናዉኔ ዋላቄታናው ኡንቱንቶ ጊጌና ቆፋይ ዴዔ። ሄዌ ቃናቲያ፥ ፓሉማ፥ ቦሪያ፥ ኢታ ሲያ ካሌ።  
\v 5 ቃሲ ኡንቱንቱ ሁጲ ኦና። ቱማቴይ ባይና ኣሳቱዋናካ ፓሉማ ካሌ። ኡንቱንቱ ፆሳ ማላቲያዋን ዱሬታና ጊዴ ቆፒኖ። ኔኒ ሄ ኣሳቱዋፔ ሻኬታ። 
\p  
\v 6 ሺን ታው ዴዒያባይ ታው ጊዳና ጊያ ኡራ ፆሳ ማላቲያዌ ዱሬዬ።  
\v 7 ኣዪሲ ጎፔ፥ ኑኒ ሃ ኣላሚያ ኣይኔ ኣሂቤይኮ፤ ቃሲ ኣፔ ኣይኔ ኣፎኮ።  
\v 8 ሺን ሚያባይኔ ማዪያባይ ዴዖፔ፥ ሄዌ ኑሲ ጊዳናዋ።  
\v 9 ሺን ዱሬታናው ኮዪያዋንቱ ፓጪያኒኔ ጲሪያን ጌሊኖ፤ ቃሲ ዳሮ ኣሳ ባሻዉኔ ዮ ጎቺ ኣፊያ ዳሮ ኤያኔ ቆሂያ ኣሙዋን ኩንዲኖ።  
\v 10 ኣዪሲ ጎፔ፥ ሻሉዋ ሲቂያዌ ኢታቴ ኡባው ፑልቱዋ። ኢቱ ኢቱ ሄዋ ኣሞቲዲ፥ ኣማኑዋፔ ባሌቲዴ፥ ዳሮ ሜቱዋን ባሬንታ ቆሄዲኖ። 
\s1 ጳዉሎሲ ፂሞቶሳ ዞሬዳ ዞሪያኔ ኣዛዜዳ ኣዛዙዋ 
\p  
\v 11 ሺን ኔኖ፥ ፆሳ ኣሳው፥ ሄዋፔ ባቃታ። ፂሎቴ፥ ፆሳ ማላቲያዋ፥ ኣማኑዋ፥ ሲቁዋ፥ ዳንዳያኔ ኣሺኬቴ ካላ።  
\v 12 ኣማኑዋ ባፂያ ሎይ ባፄታ። ዳሮ ኣሳ ሲንን ሎዖ ማርካ ማርካታዴ፥ ኔና ፆሳይ ፄሴዳ ሜና ዴዑዋ ኦይቃ።  
\v 13 ኡባባው ዴዑዋ ኢሚያ ፆሳ ሲንኒኔ፥ ቃሲ ጴንፄናዊያ ጲላፆሳ ጌቴቲያ ጋዲያ ሞዲያዋ ሲንን ሎዖ ማርካ ማርካቴዳ ኪሪስቶሲ ዬሱሳ ሲንን ታኒ ኔና ሃዋ ኣዛዛይ። \x - \xo 6:13 \xt ዮህ 18፡37\x* 
\v 14 ኑ ጎዳ ዬሱሲ ኪሪስቶሲ ቆንጫና ጋካናው፥ ቂታይ ባዪናኒኔ ቦሪ ባይናን ሄ ኣዛዙዋ ናጋ።  
\v 15 ኣ ቆንጬ፥ ኢቲ ሱንይ ዴዒያ ኣንጄቴዳ ፆሳይ፥ ካታቱዋ ካቲ፥ ጎዳቱዋ ጎዳይ፥ ባሬ ቤሲያ ዎዲያን ቤሳና።  
\v 16 ሃይቄናዌ ኢቲ ኣ ፃላላ። ኦኒኔ ኣኮ ሺቃናው ዳንዳዬና ፖዑዋን ዴዔ። ኦኒኔ ኣ ቤዒቤና፤ ቃሲ ቤዓናዉካ ዳንዳዬና። ቦንቹኔ ሜና ዎልቃይ ኣው ጊዶ። ኣሜንዒ። 
\p  
\v 17 ሃዒ ሃ ዎዲያን ዱሬ ጊዲያዋንቱ ኦቶሬቴናዳኒኔ ቃሲ ኑኒ ናሼታናዳን፥ ኡባባ ፓላሂሲዴ ኑሲ ኢሚያ ዴዑዋ ፆሳን ኣማኔታናዋፔ ኣቲን፥ ኣያ ዱሬቴን ኡንቱንቱ ኣማኔቴናዳን፥ ኡንቱንታ ኣዛዛ።  
\v 18 ኡንቱንቱ ሎዖባ ኦናዳን፥ ሎዖ ኪታን ዱሬታናዳን፥ ኬኪያዋንታኔ ሃራቱዋና ሻኪ ኣኪያዋንታ ጊዳናዳን ኣዛዛ።  
\v 19 ሄዋ ያቲያዋን ኡንቱንቱ ሲንው ሚኖ ባሶ ጊዲያ ሻሉዋ ባሬንቶ ሺሺኖ። ሄዋፔ ጉዪያን፥ ኡንቱንቱ ቱሙ ዴዑዋ ኣካና። 
\p  
\v 20 ፂሞቶሳ፥ ኢቲ ኢቲ ኣሳይ ባላን ኤራቴ ጊያ ኤያ ፓሉሚያፔኔ ሜላ ሃሳያፔ ባቃታዴ፥ ኔው ኢሜቴዳ ሃዳራ ናጋ።  
\v 21 ኣዪሲ ጎፔ፥ ኢቱ ኢቱ ኑሲ ኤራቴይ ዴዔ ያጊዴ፥ ኣማኑዋ ባሌዲኖ። 
\p ፆሳ ኣ ኬካቴይ ሂንቴናና ኡባና ጊዶ።