\id 1PE - ዳውሮ 
\h 1 ጴፂሮሳ ኪታ 
\toc1 ጴፂሮሲ ፃፌዳ ኮይሮ ኪታ 
\toc2 1 ጴፂሮሳ ኪታ 
\toc3 1ጵፅ 
\mt1 ጴፂሮሲ 
\mt2 ፃፌዳ ኮይሮ ኪታ 
\imt1 ጌሉዋ 
\ip ዬሱሲ ኪቴዳ ጴፂሮሲ ፃፌዳ ኮይሮ ኪታይ ፃፌቴዳዌ፥ ሄ ኪታ ጊዶን «ዶሬቴዳ ፆሳ ኣሳቱዋ» ጌቴቲዴ ፄሴቲያኔ ቄሪ ኢሲያን ሁጲሳ ባጋ ሻኩዋን ላሌቴዳ ኣማኒያዋንቱሳ። ሃ ኪታ ዋና ቆፋይ፥ ኣማኑዋ ጋሱዋን ሜቱኔ ዋዪ ጋኬዳዋንታ ሚኒሳናሳኔ ሜንናሳ። ፃፊ ሃዋ ኦያዌ ኣ ሃይቁዋ፥ ኣ ዴንዱዋ፥ ኣ ላዔን ዩሳ ኦዲያ ዬሱሲ ኪሪስቶሳ ሚሺራቹዋ ቃላ ናባቢያዋንታ ሃሳዪሲያዋና። ኡንቱንቱ ዬሱሲ ኪሪስቶሳ ዴዑዋ ሌሚሱዋዳን ኣኪዴ፥ ሜቱዋ ጌንጪዴ ኣናዳን ሃሳዪሴ። ሃዋና ኢቲፔ ጋያ ዎዴ፥ ሜቱ ኡንቱንቱ ኣማኑዋ ፃልታቴ ፓጪያዋኔ ዬሱሲ ኪሪስቶሲ ቆንጪያ ጋላሲ ኡንቱንቱ ቤሲያ ጋቲያ ኣካናው ዴዒያዋ ኡንቱንታ ሃሳዪሴ። 
\ip ፃፊ፥ ኡንቱንቱ ሜቱዋን ጌንጫና ማላ ሜንያዋ ቦላካ፥ ኪሪስቶሳ ካሊያዋንቱ ዴዒያዋዳን ኡንቱንቱ ዴዓናዳን ቆፊሴ። 
\iot ሼምፓቱዋ ኡባቱዋሲ ኢሜቴዳ ቃን ቆፋቱዋ 
\io1 ጌሉዋ (1፡1-2) 
\io1 ፆሳ ኣሹዋባ (1፡3-12) 
\io1 ጌዬዳ ዴዑዋ ዴዓናዳን ኢሜቴዳ ማቁዋ (1፡13-2፡10) 
\io1 ሜቱዋ ዎዴ ኣማኒያ ኣሳይ ኦና ቤሲያ ኣዎቴ (2፡11-4፡19) 
\io1 ኣማኒያ ኣሳ ኣሺኬቴኔ ኦሱዋ (5፡1-11) 
\io1 ዉርሴ ቁቲያ (5፡12-14) 
\c 1  
\p  
\v 1 ታኒ፥ ዬሱሲ ኪሪስቶሲ ኪቴዳ ጴፂሮሲ፥ ፆሳይ ዶሬዳ ኣሳቶ ጳንፆሳ ጋዲያን፥ ጋላቲያ ጋዲያን፥ ቃጳዶቂያ ጋዲያን፥ ኢሲያ ጋዲያኒኔ ቢታኒያ ጋዲያን ቤቲያን ዴዒያዋንቶ ዳቢዳቢያ ፃፋይ።  
\v 2 ዬሱሲ ኪሪስቶሳው ሂንቴ ኣዛዜታና ማላኔ ኣ ሱን ጌያና ማላ፥ ፆሳይ ኣዉ ዶሬዳ ሂንቴንቶ ባሬ ኣያናን ጌሼዳዋንቶ፥ ኣ ኬካቴይኔ ሳሮቴይ ጊዶ። 
\s1 ዴዑዋ ኢማና ጌዳ ሂዶታ 
\p  
\v 3 ኑኒ ፆሳ፥ ኑ ጎዳ ዬሱሲ ኪሪስቶሳ ኣዉዋ፥ ባሬ ማሮቴ ዳሩዋዳንካ ኑና ላዔዋ ዬሌዳዋ፥ ዬሱሲ ኪሪስቶሳ ሃዪቁዋፔ ዴንዳዋን ኑሲ ዴዑዋ ሂዶታ ኢሜዳዋ ጋላቴቶ።  
\v 4 ቃሲ ፆሳይ ሂንቴንቶ ኢማና ዳሮ ላታይ ዎቄናዌ፥ ባዬናዌኔ ዬናዌ ሳሉዋን ናጌ።  
\v 5 ሄዌካ ሂንቴንቱሲ፥ ፆሳ ዎልቃን ኣማኑዋን ናጌቲ ኡቲዴ፥ ኣቶቴው ጊጌዳዋንቱሲ ዉርሴ ዎዲያን ቆንጫናዋ። 
\p  
\v 6 ሃዒ ጉ ዎዴው ሃራይ ኣቶ ዱማ ዱማ ፓጪያን ሂንቴ ፓጬታናው ኮሾፔካ፥ ሃዋን ዳሮ ናሼቲቴ።  
\v 7 ሄዌ ሃራይ ኣቶ፥ ታማን ዬጊና ዪያ ዎርቃፔካ ሂንቴ ኣማኑ ዳሮ ኣልዖኔ ባሊ ባዪናዋ ጊዲያዋ ቤሳናሳ፤ ያቲዴ ዬሱሲ ኪሪስቶሲ ቤቲያ ዎዴ፥ ጋላታ፥ ቦንቹዋኔ ሳባ ሂንቴ ኣካና።  
\v 8-9 ሂንቴ ኣ ኤራና ዮፔካ፥ ሲቂታ፤ ሂንቴ ሃዒ ኣ ቤዓና ዮፔካ፥ ኣማኒታ። ቃሲ ሂንቴ ሂንቴ ኣማኖ ፖሎ ጊዲያ ሂንቴ ሼምፑዋ ኣቶቴ ኣኪያ ዲራው፥ ኦዳናው ዳንዳዬቴና ቦንቹ ኩሜዳ ናሼቻ ናሼቲታ። 
\p  
\v 10 ፆሳይ ሂንቴንቶ ኢማና ኣ ኬካቴባው ቲምቢቲያ ኦዴዳ ናባቱ ሎይ ቢዲዴ፥ ሃ ኣቶቴባ ኮዬዲኖ።  
\v 11 ኡንቱንቱን ዴዒያ ኪሪስቶሳ ኣያናይ ኪሪስቶሳ ቱጋባኔ ሄዋፔ ጉዪያን ያና ቦንቹዋባ ካሴቲዴ ማርካቲዴ፥ ኣዉዴ ዎይ ዋኔዳ ዎዲያን ያኔንቶኔ ኣኬኪሴዳዋዳን፥ ኡንቱንቱ ኮዬዲኖ።  
\v 12 ሄ ቲምቢቲያ ኦዲያዋንቱ ኦዳ ኦሱ ሂንቴሳፔ ኣቲን፥ ኡንቱንቱ ሁጲያሳ ጊዴናዋ ፆሳይ ኡንቱንቶ ቆንጪሴዳ፤ ሃዒ ሂንቴ ሲሴዳ ሚሺራቹዋ ቃላ ሂንቴንቶ ኦዴዳ ኣሳቱ፥ ባሬው ሳሉዋፔ ኪቴቴዳ ጌሻ ኣያና ዎልቃን ኦዴዲኖ። ሄዋ ኪታንቻቱካ ቤዓናው ኣሞቲኖ። 
\s1 ጌሻቴን ዴዒያዋ 
\p  
\v 13 ሄዋ ዲራው፥ ኦሱዋ ኦናው ሂንቴ ዎዛናን ቆፋ ጊጊሲዴ ሂንቴ ሁጲያ ናጊቴ። ዬሱሲ ኪሪስቶሲ ቆንጪያ ዎዴ ኣ ኬካቴ ሂንቴ ኣኪያ ዲራው፥ ኩሜን ሂዶታን ናጊቴ።  
\v 14 ፆሳው ኣዛዜቲያ ናናዳን፤ ሂንቴ ካሴ ኤሬናን ኣሞቴዳ ኣሙዋ ካሎፒቴ።  
\v 15-16 ሺን ሂንቴና ፄሴዳ ፆሳይ ጌሻ ጊዴዳዋዳን፥ ሂንቴካ ሂንቴ ኦሱዋ ኡባን ጌሻ ጊዲቴ። ፆሳ ማፃፋን፥ «ታኒ ጌሻ ጊዲያ ዲራው፥ ሂንቴካ ጌሻ ጊዲቴ» ጌቴቲዴ ፃፌቴዳ። \x - \xo 1:15-16 \xt ዎግ 11፡44-45፤ 19፡2\x* 
\p  
\v 17 ኣሳ ሁጲያን ሁጲያን ዴሙዋ ፄሌናን ኣ ኦሱዋዳን ፒርዲያ ፆሳ ዎሲዴ ሂንቴ፥ «ኑ ኣቦ» ጊዴ ኣ ፄሲያዋ ጊዶፔ፥ ሃ ኣላሚያን ቤቴ ጊዲዴ ሂንቴ ዴዒያ ዎዲያን ያሻቴን ዴዒቴ።  
\v 18-19 ሂንቴ ሂንቴ ኣዋቱዋፔ ላቴዳ ፓና ዴዑዋፔ ዎዜቴዳዌ፥ ዪያ ቢራ ዎይ ዎርቃ ማላና ጊዴናዋ ኤሪታ፤ ቦሪሲያባይ ዎይ ቂታይ ባዪና ዶርሳ ሱዳን፥ ኣልዖ ኪሪስቶሳ ሱን ሂንቴ ዎዜቴዲታ።  
\v 20 ፆሳይ ሳዓይ ሜታናፔ ካሴ ኪሪስቶሳ ዶሪ ዎዳ፤ ሺን ሂንቴ ዲራው፥ ሃ ዎዲያ ዉርሴን ኢ ቤቴዳ።  
\v 21 ሂንቴ ኣማኑኔ ሂንቴ ኣካና ጊዴ ናሼቻን ናጊ ኡቴዳባይ ፆሳን ዴዓና ማላ፥ ፆሳይ ሃዪቁዋፔ ኣ ዴንዴ፥ ኣው ቦንቹዋ ኢሜዳዋ ኣኒ ኣማኒታ። 
\p  
\v 22 ቱማቴው ሂንቴ ኣዛዜቲያዋን፥ ሎዓ ማላቲያ ኢታቴይ ባዪናን ሂንቴ ኢሻቱዋ ሲቃናው ሂንቴ ሁጲያ ጌሺዴ፥ ኢቱ ኢቱዋና ሚኒሲዴ ዎዛናፔ ሲቄቲቴ። 
\p  
\v 23 ሂንቴ ሃዪቂያ ዜሬፔ ላዔንዋ ዬሌቲቤይኪታ፤ ሺን ሜናው ዴዒያዋኔ ሲንዉካ ዴዓና ፆሳ ቃላን ሃይቄና ዜሬፔ ዬሌቴዲታ።  
\v 24 ኣዪሲ ጎፔ፥ ፆሳ ማፃፋይ፥ «ኣሳይ ኡባይ ማታ ማላ፤ ኣ ቦንቹ ኡባዪካ ማታ ጪሻ ማላ። ማታይ ሜሌ፤ ጪሻዪካ ቆቆፌቴ። \x - \xo 1:24 \xt ኢሳ 40፡6-8\x* 
\v 25 ሺን ጎዳ ቃላይ ሜናው ዴዔ» ያጌ። ሃዌ ሂንቴንቶ ጎዳይ ኦዴዳ ሚሺራቹዋ ቃላ። 
\c 2  
\s1 ዴዑዋ ሹቻኔ ጌሻ ኣሳ 
\p  
\v 1 ሄዋ ዲራው፥ ሂንቴፔ ኢታቴ ኡባ፥ ጪሚያዋ ኡባ፥ ሎዓ ማላቲያ ኢታቴ፥ ቃናቲያኔ ዚጊርሳ ኡባ ዲጊቴ።  
\v 2-3 ጎዳይ ኬካ ጊዴዳዋ ሂንቴ ዴዑዋን ቤዔዳዋ ጊዶፔ፥ ሃዒ ዬሌቴዳ ጋጪኖ ናናቱዋዳን፥ ኡሺዴ ዲጫናዉኔ ኣታናው ፂሎ ጊዴዳ ኣያና ማ ላሞቲቴ። \x - \xo 2:2-3 \xt ማዝ 34፡8\x* 
\p  
\v 4 ጎዳኮ ዴዖ ሹቻኮ ሺቂቴ። ኣሳይ ኣ ኢፄዳ፤ ሺን ፆሳ ማታን ኢ ዶሬቴዳ ኣልዖ።  
\v 5 ሂንቴካ ቃሲ ዴዖ ሹቻዳን፥ ጌሻ ቄሳ ጊዲዴ፥ ዬሱሲ ኪሪስቶሳ ባጋና ፆሳ ናሼቺያ ኣያና ያርሹዋ ፆሳው ያርሻናው፥ ሂንቴ ሂንቴ ሁጴው ኣያና ኬዳን ኬፄቲቴ።  
\v 6 ኣዪሲ ጎፔ፥ ፆሳ ማፃፋይ፥ «ቤዒቴ፥ ታኒ ፂዮኔ ጊያ ካታማን ጎሊያ ጎዳ ፃጱዋ ሚኒሲያ፥ ዶሬቴዳ፥ ኣልዖ ሹቻ ዎይ፤ ኣኒ ኣማኒያ ኦኒኔ ዬላቴና» ያጌ። \x - \xo 2:6 \xt ኢሳ 28፡16\x* 
\v 7 ሄዋ ዲራው፥ ሃ ሹቻይ ሂንቴንቶ ኣማኒያዋንቶ ዳሮ ኣልዓ፤ ሺን ኣማኔናዋንቶ፥ «ጊምቢያዋንቱ ካዳ ሹቻይ ጎዳ ፃጱዋ ሚኒሲያ፥ ኡባፔ ኣያ ሹቻ ጊዴዳ» ያጌ።  
\v 8 ቃሲካ፥ «ሃ ሹቻይ ኣሳ ቢያ ሹቻኔ ኣሳ ኩንዲሲያ ዛላ» ያጌ፤ ኡንቱንቱ ፆሳ ቃላ ኣማኔና ዲራው፥ ኡንቱንቶ ካሴና ቆፌቴዳዋዳን ቤቴዲኖ። \x - \xo 2:8 \xt ኢሳ 8፡14-15\x* 
\p  
\v 9 ሺን ፆሳይ ማፔ ማላሊሲያ ባሬ ፖዖ ሂንቴና ፄሴዳ፤ ሂንቴ ኣ ኦራ ኦሱዋ ኦዳናው ዶሬቴዳ ዛሬ፤ ሂንቴ ካቲያ ቄሳቱዋ፤ ጌሻ ኣሳኔ ፆሳሲ ቡዞ ኣሳ። \x - \xo 2:9 \xt ኬስ 19፡5-6፤ ኢሳ 43፡20፣ 21፤ ዛር 4፡20፤ 7፡6፤ 14፡2፤ ቲት 2፡14፤ ኢሳ 9፡2\x* 
\v 10 ሂንቴ ካሴ ፆሳ ኣሳ ጊዲኪታ፤ ሺን ሃዒ ሂንቴ ኣ ኣሳ፤ ሂንቴ ካሴ ማሮቴ ኣኪቤይኪታ፤ ሺን ሃዒ ማሮቴ ኣኬዲታ። \x - \xo 2:10 \xt ሆስ 2፡23\x* 
\s1 ፆሳ ኣይላቱዋ 
\p  
\v 11 ታ ዳባቶ፥ ሂንቴ ሃ ሳዓን ኢማኔ ቤቴ ጊዲዴ ዴዒያዋንታ ጊዴዳዋዳን፥ ኡባ ዎዴ ሂንቴ ሼምፑዋና ኦሌቲያ ኣሳቴ ኣሙዋፔ ሂንቴ ሃካና ማላ፥ ታኒ ሂንቴና ዎሳይ።  
\v 12 ኣሜኔና ኣሳይ ሂንቴና ኢታባ ኦያዋንቱዳን ዚጊሪያ ዎዴ፥ ኪሪስቶሲ ዪያ ጋላሲ ሂንቴ ሎዖ ኦሱዋ ኡንቱንቱ ኣኬኪዴ፥ ፆሳ ጋላታና ማላ፥ ሂንቴ ዴዑዋ ኡንቱንቱ ጊዶን ሎይ ናጊቴ። 
\p  
\v 13 ጎዳ ዲራው፥ ኣሳ ሂጊያ ኡባው ሞዴቲቴ፤ ካቲካ ኡባፔ ቦላ ጊዲያ ዲራው፥ ኣው ሞዴቲቴ።  
\v 14 ቃሲ ጋዲያ ሞዲያዋንቶካ ሞዴቲቴ። ኣዪሲ ጎፔ፥ ኡንቱንቱ ኢታባ ኦያዋንታ ሙራናዉኔ ሎዖባ ኦያዋንታ ጋላታናው ካቲያፔ ኪቴቴዲኖ።  
\v 15 ኣዪሲ ጎፔ፥ ፆሳይ ሂንቴ ሂንቴ ሎዖ ኦሱዋን ካያ ኤያ ኣሳቱዋ ሃሳያ ጮዑ ኡዳናዋ ኮዬ።  
\v 16 ኣይሌቴፔ ኬሲዴ፥ ፆሳ ኣዪሊያዳን ዴዒቴፔ ኣቲን፥ ሄ ኣዪሌቴፔ ኬሴዳዋ ኢታቴ ጌንያዋ ኦፒቴ።  
\v 17 ኣሳ ኡባ ቦንቺቴ። ሂንቴ ኢሻቱዋ ሲቂቴ። ፆሳው ያዪቴ። ካቲያ ቦንቺቴ። 
\s1 ኪሪስቶሳ ጋኬዳ ሜቱዋ ሌሚሱዋ 
\p  
\v 18 ኣይላቶ፥ ሂንቴ ሎዖ ጎዳቱዋ ፃላላዉኔ ኣሺኬ ጎዳቱዋ ፃላላው ጊዴናን፥ ኢታቶካ ዳሮ ያዪዴ ሞዴቲቴ።  
\v 19 ኣዪሲ ጎፔ፥ ኣሳይ ናቂያ ዎዴ ዋዬቲያ ኡራይ ፆሳ ቆፒዴ፥ ኦጌ ባይናን ናቄቶፔ ፆሳይ ኣ ኣንጃና።  
\v 20 ኣዪሲ ጎፔ፥ ሂንቴ ናጋራ ኦና፥ ሂንቴና ዴቺያ ዎዴ፥ ሂንቴ ዳንዳዮፔ፥ ሂንቴንቶ ኣይ ጋላታይ ዴዒ? ሺን ሎዖባ ኦዴ ዋዪያ ሂንቴ ዳንዳዮፔ፥ ፆሳይ ሂንቴና ሄዎ ኣንጃና።  
\v 21 ፆሳይ ሂንቴና ፄሴዳዌ ሄዋ ዲራሳ፤ ኣዪሲ ጎፔ፥ ኪሪስቶሲ ሂንቴንቶ ዋዬቴ፤ ሂንቴ ኣ ቃታማ ካላና ማላ፥ ሂንቴንቶ ሌሚሱዋ ጊዴዳ።  
\v 22 ናጋራ ኢ ኦቤና፤ ባሬ ዶናፔ ዎርዱዋ ሃሳዪቤና። \x - \xo 2:22 \xt ኢሳ 53፡9\x* 
\v 23 ኣሳይ ባሬና ቦሪያ ዎዴ፥ ዛሪዴ ቦሪቤና፤ ዋዬቲያ ዎዴካ ማንዲቤና። ሺን ፂሉዋ ፒርዲያ ፆሳው ባሬና ኣዴ ኢሜዳ። \x - \xo 2:23 \xt ኢሳ 53፡7\x* 
\v 24 ኑኒ ናጋራው ሃዪቂዴ፥ ፂሎቴው ዴዓና ማላ፥ ኪሪስቶሲ ባሬ ሁጴው ባሬ ኣሹዋን ኑ ናጋራ ማስቃሊያን ቶኬዳ፤ ሂንቴ ኣ ማይን ፓፄዲታ። \x - \xo 2:24 \xt ኢሳ 53፡5\x* 
\v 25 ኣዪሲ ጎፔ፥ ሂንቴ ኦጊ ባሌዳ ዶርሳ ማላ፤ ሺን ሃዒ ሂንቴ ሼምፑዋ ሄሚያዋኮኔ ናጊያዋኮ ሲሜዲታ። \x - \xo 2:25 \xt ኢሳ 53፡6\x* 
\c 3  
\s1 ኣሲናዋኔ ማቺያዋ 
\p  
\v 1-2 ሄዋዳንካ ማቼቶ፥ ሂንቴ ኣሲናቱዋፔ ፆሳ ቃላው ኣዛዜቴና ኢቱ ኢቱ ዴዖፔካ፥ ሂንቴ ፓሉሜቴናን፥ ኡንቱንቱ ሂንቴ ያሻቴኔ ሂንቴ ጌሻ ዴዑዋ ቤዒዴ ፆኔታና ማላ፥ ኡንቱንቶ ሞዴቲቴ።  
\v 3 ሂንቴ ሂንቴ ሁጲያ ኣልዖ ባን ጊጊሲያዋኒኔ ዎርቃ ዎያዋን ዎይ ኣልዖ ማዩዋ ማዪያዋን ሂንቴንቱ ቦላ ባጋ ሎይፒቴ።  
\v 4 ሺን ሂንቴ ጋርሳን ቆሴቴዳ ኣሳቴ ሎዖቴይ ፆሳ ሲንን ሂንቴንቶ ዳሮ ኣልዖ ጊዲዴ፥ ዬና ኣሺኬኔ ዎፑ ጌዳ ኣያና ጊዶ።  
\v 5 ኣዪሲ ጎፔ፥ ሄዋዳን ፆሳን ሂዶቴዳ ጌሻ ማጫ ኣሳቱ ቤኒ ዎዴ ባሬንቱ ኣሲናው ሞዴቲዴ፥ ባሬንታ ዳሮ ሎይዲኖ።  
\v 6 ሄዋዳን ሳራ ኣብራሃማ፥ «ታ ጎዳው» ያጋ ፄሳዴ፥ ኣው ኣዛዜታዱ፤ ሂንቴካ ኢቲባዉኔ ያዬናን ሎዖባ ኦፔ፥ ኢ ናናቱዋ። \x - \xo 3:6 \xt ዶም 18፡12\x* 
\p  
\v 7 ሄዋዳን ኣሲናቶ፥ ሂንቴ ማጫ ኣሳቱዋና ኣኬካን ኢቲፔ ዴዒቴ። ኡንቱንቶ ዳቡራንቻ ኣሳቴይ ዴዒያ ዲራው፥ ኡንቱንታ ቦንቺቴ፤ ሂንቴ ዎሳይ ቤቴና ማላ፥ ፆሳይ ኢሜዳ ዴዑዋ ኣ ኬካቴ ኡንቱንቱ ሂንቴናና ኢቲፔ ላቲኖ። 
\s1 ሎዖባ ኦዴ ሜቱዋ ኣኪያዋ 
\p  
\v 8 ዉርሴን፥ ኡባይ ኢቲ ቆፋን ዴዒቴ። ኢቱ ኢቶ ቃሬቲቴ፤ ኢሻቱዋዳን ሲቄቲቴ፤ ቃሲ ኢቱ ኢቶ ኬኪያዋንታኔ ሂንቴ ሁጲያ ካዉሺያዋንታ ጊዲቴ።  
\v 9 ኢታ ዲራው ኢታ ዎይ ሼቃ ዲራው ሼቃ ዛሮፒቴ፤ ሄዋ ኣጊዴ፥ ፆሳይ ሂንቴንቱ ኣንጁዋ ላታናዳን ሂንቴና ፄሴዳ ዲራው፥ ኣንጂቴ።  
\v 10 ኣዪሲ ጎፔ፥ ፆሳ ማፃፋይ ሃዋዳን ያጌ፤ «ዴዑዋ ዶሲያዌኔ ሎዖ ጋላሳ ቤዓናው ኮዪያዌ ኦና ጊዶፔኔ ባሬ ኢንፃርሳን ኢታባ ሃሳዪያዋኔ ዎርዱዋ ኦዲያዋ ኣጎ። \x - \xo 3:10 \xt ማዝ 34፡12-16\x* 
\p  
\v 11 «ኢታባ ኦያዋ ኣጊዴ፥ ሎዖባ ኦ፤ ሳሮቴካ ሎይ ኮዮኔ ካላናው ባፄቶ። 
\p  
\v 12 «ኣዪሲ ጎፔ፥ ጎዳ ኣይፊ ፂሎቱዋኮ ፄሌ፤ ቃሲ ኣ ሃይይ ኡባ ዎዴ ኡንቱንቱ ዎሳው ዶያ ዴዔ። ሺን ጎዳይ ኢታባ ኦያዋንታ ባሬ ሃንቁዋ ሶምዒያን ፄሌ» ያጌ። 
\p  
\v 13 ሂንቴ ሎዖባ ኦናው ኣሞቶፔ፥ ሂንቴና ቆሃናዌ ኦኔ?  
\v 14 ሺን ሃራይ ኣቶ፥ ፂሎቴ ዲራው ሂንቴ ዋዬቶፔካ፥ ኣንጄቴዳዋንታ። ኣሳው ያዮፒቴኔ ሂርጎፒቴ። \x - \xo 3:14 \xt ማት 5፡10፤ ኢሳ 8፡12-13\x* 
\v 15 ሺን ኪሪስቶሳ ሂንቴ ዎዛናን ቦንቺቴኔ ኣ ሂንቴ ጎዳ ኦቴ። ፆሳይ ሂንቴንቶ ሂዶቴዳ ዴዑዋሲ ጋሱዋ ኦቺያ ኦሲኔ ዛሩዋ ኢማናው ኡባ ዎዴ ጊጊ ኡቲቴ፤  
\v 16 ሺን ሄዋ ኣሺኬቴኒኔ ያሻቴን ኦቴ። ቃሲ ኪሪስቶሳን ሂንቴ ዴዒያ ሎዖ ዴዑዋ ኢታባ ኦዳዋዳን፥ ሂንቴ ቦላን ኢታባ ሃሳዪያ ኣሳይ ባሬ ዚጊሪያዋን ዬላታና ማላ፥ ሂንቴ ዎዛናይ ጌሻ ጊዶ።  
\v 17 ኣዪሲ ጎፔ፥ ፆሳይ ጌዳዋ ጊዶፔ፥ ኢታባ ኦዳ ዲራው ዋዬቲያዋፔ፥ ሎዖባ ኦዳ ዲራው ዋዬቲያዌ ኬካ።  
\v 18 ኣዪሲ ጎፔ፥ ኪሪስቶሲ ኑና ፆሳኮ ኣፋናው፥ ባሬው ፂሎ ጊዲዴ፥ ማካላንቻቱዋ ዲራው፥ ኢቲ ጌዴ ኡባ ናጋራው ሃዪቄዳ፤ ኢ ባሬ ኣሳቴን ሃዪቄዳ፤ ሺን ኣያናን ፓፄዳ።  
\v 19 ቃሲ ሄ ኣያናን፥ ቃሹዋን ዴዒያ ኣያናቱዋኮ ቢዴ፥ ኡንቱንቶ ቃላ ኦዴዳ።  
\v 20 ሄ ኣያናቱ ኣማሬዳ፥ ሆስፑን ኣሳቱ ሃን ኣቴዳ ማርካቢያ ኖሄ ኬፂሺን፥ ፆሳይ ዳንዳዪዴ ጋሚዔዳ ዎዴ፥ ፆሳው ኣዛዜቲቤና ኣሳ ኣያናቱዋ። \x - \xo 3:20 \xt ዶም 6፡1-7፡24\x* 
\v 21 ሄዌ ፂንቃታው ሌሚሱዋ ጊዲዴ፥ ሂንቴና ሃዒ ኣሼ፤ ሱሬ ዎዛናፔ ፆሳ ዎሲያዋፔ ኣቲን፥ ቦላ ቂታ ሜጪያዋ ጊዴና፤ ሄዌ ሂንቴና ዬሱሲ ኪሪስቶሲ ሃዪቁዋፔ ዴንዴዳዋን ኣሼ።  
\v 22 ሳሉዋ ቢዴ ፆሳፔ ኡሼቻ ባጋን ኢ ኡቲዴ፥ ኪታንቻ ኡባ፥ ማታና ዴዒያዋንታኔ ዎልቃማቱዋ ሞዴ። 
\c 4  
\s1 ጌሻቴን ዴዓና ዴዑዋባ 
\p  
\v 1 ሄዋ ዲራው፥ ኪሪስቶሲ ባሬ ኣሹዋን ኑሲ ዋዬቴዳ ዲራው፥ ሂንቴካ ሄ ቆፋን ዳንጬቲቴ። ኣዪሲ ጎፔ፥ ባሬ ኣሹዋን ዋዬቴዳ ኡራይ ናጋራ ኦያዋ ኣጌዳ።  
\v 2 ሃዋፔ ሲንን፥ ሃ ሳዓን ሼምፑዋና ዴዓናው ኣቴዳ ዎዲያን፥ ፆሳይ ኮዪያዋዳን ዴዓናው ቤሲያዋፔ ኣቲን፥ ኣሳ ኣሙዋዳን ዴዓናው ቤሴና።  
\v 3 ኣዪሲ ጎፔ፥ ኣማኔና ኣሳይ ኦናው ዶሲያዋ ሂንቴ ኦዴ፥ ዎሹማናው ካጄሊያዋን፥ ኣሙዋን፥ ማዋን፥ ዬን፥ ኡሻን፥ ፖኪያ ኤቃው ጎዪኒያዋን፥ ዴዔዳ ካሴ ኣዳ ዎዲ ሂንቴንቶ ጊዳናዋ።  
\v 4 ኣማኔና ኣሳና ሂንቴ ሾራይ ባዪና ኦሱዋ ኢቲፔ ኦና ዲራው ማላሌቲዴ፥ ሂንቴና ቦሪኖ።  
\v 5 ሺን ኡንቱንቱ ፓፃ ዴዒያ ኣሳ ቦላኔ ሃይቄዳ ኣሳ ቦላ ፒርዳናው ጊጊ ኡቴዳ ፆሳው ዛሩዋ ኢማና።  
\v 6 ሃይቄዳ ኣሳይ \f + \fr 4:6 \fq ሃይቄዳ ኣሳይ፡ \ft ዬሱሳ ኣማናናፔ ካሴና ሃይቄዳዋንታ ዎይ ኖሄ ዎዴ ኣሳቱዋ። 3፡19 ፄሊቴ።\f* ባሬ ኣሳቴን ኣሳይ ፒርዴቲያዋዳን ፒርዴታናዉኔ ቃሲ ኣያናን ፆሳይ ዴዒያዋዳን ዴዓናው፥ ዎንጋላ ሚሺራቹ ኡንቱንቶ ሄዎ ኦዴቴዳ። 
\s1 ፆሳይ ኢሜዳ ኢሞታቱዋ ሎይ ኣዪሲያዋ 
\p  
\v 7 ኡባባዉካ ዉርሴይ ማታቴዳ። ሄዋ ዲራው፥ ፆሳ ዎሳናው ቆፋን ጌዪዴ፥ ሂንቴና ናጊቴኔ ሚኒቴ።  
\v 8 ሲቁ ዳሮ ናጋራ ካሚያ ዲራው፥ ኡባባፔ ኣዴ ኢቱ ኢቱዋና ዎዛናፔ ሲቄቲቴ። \x - \xo 4:8 \xt ሌም 10፡12\x* 
\v 9 ዙዙሜናን ኢቱ ኢቱዋ ኢማቴን ሞኪቴ።  
\v 10 ሂንቴ ሁጲያን ሁጲያን ፆሳፔ ዱማ ዱማ ኣ ኬካቴ ኣኬዳዋዳንካ፥ ፆሳ ዱማ ኢሙዋ ሃዳራ ሎይ ኬሲያዋንቱዳን፥ ኢቱ ኢቶ ኦቴ።  
\v 11 ዬሱሲ ኪሪስቶሳ ባጋና ኡባባኒ ፆሳይ ጋላቴታና ማላ፥ ኦኒኔ ኦዲያዋ ጊዶፔ፥ ቃላ ፆሳፔ ኣኪዴ ኦዲያዋዳን ኦዶ። ቃሲ ኦኒኔ ማዲያዋ ጊዶፔ፥ ፆሳይ ኣው ኢሚያ ዎልቃን ማዶ። ቦንቹኔ ጎዳቴይ ፆሳሲ ሜናፔ ሜናው ጊዶ። ኣሜንዒ። 
\s1 ሜቱዋ ዎዴ ሚኒያዋ 
\p  
\v 12 ታ ሲቃቶ፥ ሂንቴ ጊዶን ታማዳን ጉዲዴ ፓጪያ ዋዪ ዪያዋ ኦራባይ ሃኒያዋዳን ማላሌቶፒቴ።  
\v 13 ሺን ኪሪስቶሳ ቦንቹ ቤቲያ ዎዴ ሂንቴ ናሼታና ማላ፥ ኣናና ዋዬቲያዋን ናሼቲቴ።  
\v 14 ኣሳይ ሂንቴና ኪሪስቶሳ ሱን ዲራው ቦሪያዋ ጊዶፔ፥ ሂንቴ ኣንጄቴዳዋንታ፤ ኣዪሲ ጎፔ፥ ቦንቾ ኣያናይ፥ ፆሳ ኣያናይ፥ ሂንቴ ቦላ ሼምፓና።  
\v 15 ሂንቴፔ ኦኒኔ ሼምፑዋ ዎዳዋዳን፥ ዎይ ካዪሱዋዳን፥ ዎይ ኢታባ ኦዳ ኣሳዳን፥ ዎይ ሃራ ኣሳ ዬዉዋ ጌሌዳዋዳን ዋዬቶፖ።  
\v 16 ሺን ኦኒኔ ኪሪስታኒያ ጊዲያ ዲራው ዋዬቶፔ፥ ኪሪስቶሳ ሱን ዲራው፥ ፆሳ ጋላታናፔ ኣቲን፥ ዬላቶፖ። 
\p  
\v 17 ኣዪሲ ጎፔ፥ ፒርዳይ ፆሳ ጎሊያን ዶሜቲያ ዎዲ ጋኬዳ። ቃሲ ሄ ፒርዳይ ኮዪሮ ኑ ቦላ ዶሜቲያዋ ጊዶፔ፥ ኣ ዎንጋላው ኣዛዜቴናዋንቱ ዉርሴይ ኣያ ጊዳኔ?  
\v 18 ፂሎ ኣሳይ ቱጋን ኣቲያዋ ጊዶፔ፥ ማካላንቻይኔ ናጋራንቻይ ያቲና ዋናኔ? \x - \xo 4:18 \xt ሌም 11፡31\x* 
\v 19 ሄዋ ዲራው ቃሲ፥ ፆሳይ ጌዳዋዳን ዋዬቲያዋንቱ ሎዖባ ኦዴ፥ ባሬንቱ ሼምፑዋ ሃዳራ ባሬና ሜዳ ኣማኔቲያ ፆሳው ኢሚኖ። 
\c 5  
\s1 ፆሳ ኣሳ ኣዪሳናው ኢሜቴዳ ዞሪያ 
\p  
\v 1 ሲሚ ታኒ ዎሳ ጎሊያ ጪማቱዋና ጪማ ጊዲያዌኔ፥ ኪሪስቶሳ ዋዪያ ማርካቲያዌ፥ ቃሲ ቆንጫና ቦንቹዋ ሻካናዌ ሂንቴ ጊዶን ዴዒያ ጪማቱዋ ዞራይ።  
\v 2 ሂንቴ ጊዶን ዴዒያ ፆሳ ዉዲያ ፆሳይ ኮዪያዋዳን ሄሚቴ። ዶሱዋናፔ ኣቲን፥ ዎልቃን ጊዴና። ቃሲ ሂንቴ ጎዓ ፃላላ ፄሌናን፥ ሎዖ ቆፋን ሄሚቴ።  
\v 3 ዉዴው ሂንቴ ሌሚሱዋ ጊዲቴፔ ኣቲን፥ ሂንቴ ሄሚያዋንታ ዎልቃን ሄሞፒቴ።  
\v 4 ቃሲ ሄሚያዋንቱ ካፑ ቆንጪያ ዎዴ፥ ባዬና ቦንቾ ኣኪሊሊያ ሂንቴ ኣካና። 
\p  
\v 5 ሄዋዳንካ ያላጋ ኣሳቶ፥ ጪማቶ ሞዴቲቴ። ኡባይካ ኢቱ ኢቶ ኦናው ሂንቴ ሁጲያ ካዉሺያዋ ኣፊላዳን ማዪቴ። ኣዪሲ ጎፔ፥ ፆሳይ ኦቶሬቲያዋንታ ኢፄ፤ ሺን ባሬና ካዉሺያዋንቶ ኣ ኬካቴ ኢሜ። \x - \xo 5:5 \xt ሌም 3፡34\x* 
\v 6 ፆሳይ ባሬ ሎዖ ዎዲያን ሂንቴና ቁ ኦና ማላ፥ ዎልቃማ ፆሳ ኩሺያፔ ጋርሳና ሂንቴና ቶቺቴ።  
\v 7 ኢ ሂንቴንቶ ቆፒያ ዲራው፥ ሂንቴና ሂርጊሲያ ኡባባ ኣ ቦላ ኦሊቴ። 
\p  
\v 8 ፃላሂያ ካፑ፥ ሂንቴ ሞርኪ፥ ሚቲያ ኡራ ኮዪዴ፥ ጉዲያ ጋሙዋዳን ሂንቴ ዩሹዋን ዩዪያ ዲራው ናጌቲቴኔ ቤጎቲቴ።  
\v 9 ሳዓን ዴዒያ ሂንቴ ኢሻቱ ሄዋዳን ዋዬቲያዋ ኤሪዴ፥ ኣማኑዋን ሚኒዴ፥ ኣናና ኤቄቲቴ።  
\v 10 ኣ ኬካቴ ኡባ ፆሳይ፥ ባሬ ሜና ቦንቾ ኪሪስቶሲ ዬሱሳ ባጋና ሂንቴና ፄሴዳዌ፥ ኣማሬዳ ዎዲያ ሂንቴ ዋዬቴዳዋፔ ጉዪያን፥ ኢ ባሬ ሁጴው ሂንቴና ሺሪ ኦራናኔ ሚኒሳና። ቃሲ ኢ ሂንቴና ማዳናኔ ባሲ ኤሳና።  
\v 11 ዎልቃይ ሜናፔ ሜና ጋካናው ኣው ጊዶ። ኣሜንዒ። 
\s1 ዉርሴ ሳሮታ 
\p  
\v 12 ሃዌ ፆሳ ቱሙ ኣ ኬካቴ ጊዲያዋ ታኒ ሂንቴንቶ ማርካታዴኔ ሂንቴና ዞራዴ፥ ሂንቴንቶ ቃንን ፃፌዳ ዳቢዳቢያ ኣማኔቲያ ኢሻ ጋዴ ታኒ ቆፒያ ሲላሴ ቦላ ኪታዲ፤ ሄ ኣ ኬካቴን ሚኔዲታ። 
\p  
\v 13 ሂንቴናና ኢቲፔ ዶሬቴዳ ባቢሎኔን \f + \fr 5:13 \fq ባቢሎኔ፡ \ft ሳፃ ማፃፋ ቆፋዳን፥ ሃ ሱንይ ሮሜ ጉሳ ጊዴናን ኣጌና።\f* ዴዒያ ዎሳ ጎሊያ ኣሳይኔ ታ ናዓይ ማርቆሲ ሂንቴና «ሳሮ ሳሮ» ጊኖ።  
\v 14 ሲቁዋ ዬሬታ ዬሬቲዴ፥ ኢቱ ኢቱዋ ሳሮቲቴ። 
\p ሂንቴው፥ ኪሪስቶሳና ኢቱዋ ጊዴዳዋንቶ ኡባቱዋሲ ሳሮቴይ ጊዶ። ኣሜንዒ።