\id ZEP - Lokpa Bible portions [dop] -Benin 1999 (web edition -2017)
\ide UTF-8
\h Sofoni
\toc1 ƖSƆ KƲYƆƔƆTƲTƲ TƐLƎSƲLƲ SOFONI TƆM TAKƎLAƔA
\toc2 Sofoni
\toc3 Sof
\mt2 ƖSƆ KƲYƆƔƆTƲTƲ TƐLƎSƲLƲ
\mt1 SOFONI
\mt2 TƆM TAKƎLAƔA
\imt1 Kʋtʋlʋtʋ
\ip Yutɑ tɛtʋ tɑɑ kɛ́ Sofoni tɛlǝsɑɣɑ Ɩsɔ kʋyɔɣɔtʋtʋ kɛ wulɑʋ Sosiyɑsɩ pɔɔlɛ tɑɑ. Wulɑʋ ɩnɩ ɩ kpiisinɑ tɩɩŋ nɑ tǝlɑɑlɛnɑɑ tǝnɑ nɑ ɩ́ tɑɣɑnɩ ɩsɔsɛɛʋ, nɑ ɩ́ tʋlɩ Ɩsɔ tǝsɛɛlɛ nte pɑɑ tǝkɑɑ tɔ nɑ ɩ́ tɑɣɑnɩ. Sofoni heelɑ piitimnɑɑ lɛlɑɑ sɩ Ɩsɔ hʋʋlɛ kɔŋ. Amɑ wɑɑtʋ kɔŋ wei ɩ tɑɑ Tɑcɑɑ kɑ́ kɔɔ nɑ ɩ́ wɑɑsɩ Yosɑlɛm tɔ. Piitimnɑɑ mpɑ pɑɑ pɑsɑ pɑ tɩ tɔ pɑɑ sɛɛ Ɩsɔ kɛ́ nɔɣɔ kʋlʋmɑɣɑ.
\iot Ɩsǝnɑ pɑ fɑɣɑ Sofoni tɑkǝlɑɣɑ tɔ:
\io1 Ɩsɔ kɑ hʋʋnɑ Yutɑ tɛtʋ nɑ Yosɑlɛm ɩcɑtɛ nyǝ́mɑ, titite \ior 1:1–2:3\ior*
\io1 Ɩ kɑ wɑkǝlɩ piitimnɑɑ mpɑ pɑ cɔɔnɑ Yutɑ tɔ, titite \ior 2:4-15\ior*
\io1 Ɩsɔ kɑ́ mǝŋnɑ Yosɑlɛm nyǝ́mɑ kɛ pɑ wule tɑɑ, titite \ior 3\ior*
\c 1
\p
\v 1 Yutɑ wulɑʋ Sosiyɑsɩ wei ɩ kɛ́ Amoŋ pǝyɑlʋ tɔ. Ɩ pɔɔlɛ tɑɑ kɛ́ Tɑcɑɑ yɔɣɔtǝnɑ Sofoni. Ɩsekiyɑsɩ lʋlǝnɑ Amɑliyɑ nɑ Amɑliyɑ nɑ́ɑ́ lʋlɩ Ketɑliyɑ, nɑ Ketɑliyɑ nɑ́ɑ́ lʋlɩ Kusi, nɑ Kusi nɑ́ɑ́ lʋlɩ Sofoni. Tɔm nti Ɩsɔ heelɑ-ɩ tɔɣɔlɛ sɩ:
\s1 Tɑcɑɑ hʋʋlɛ kʋyɑkʋ tɔm
\q1
\v 2 Mɑɑ kʋ tɛtʋ tɔɔ weesuɣu nyǝm tǝnɑ.
\q1
\v 3 Pǝ kpɑɣɑʋ yǝlɑɑ, nɑ sumɑsɩ,
\q1 nɑ tiinɑ, nɑ wontu tǝnɑ tɔ.
\q1 Mɑɑ wɑkǝlɩ ɑsɑɣɑɑ nɑ pɑ kpɑɩ tǝmɑ.
\q1 Pǝ kɑɑ kɑɑsɩ nɔɣɔlʋ.
\s1 Ɩsɔ kɑ hɔ Yutɑ nɑ Yosɑlɛm nyǝ́mɑ ŋkpɑŋŋ
\q1
\v 4 Mɑɑ hɔ Yutɑ nɑ Yosɑlɛm pǝ yǝlɑɑ ŋkpɑŋŋ.
\q1 Mɑɑ kpiisi tʋɣʋ Pɑɑlɩ nɑ kʋ kɔtǝlɑɑ tǝnɑ.
\q1
\v 5 Mɑɑ kʋ mpɑ pɑ kpɑɑkɩ kutuluŋ tɔɔ kɛ́ ɑhoo tɔ.
\q1 Pǝ tɛ yǝlɑɑ lɑɑkɩ ɩsɔtʋlʋŋɑsɩ kɛ́ pǝ́cɔ́ pɑ sɛɛkɩ-m.
\q1 Anɩ pɑ tuukinɑ mɑ hǝtɛ nɑ tʋɣʋ Milikom nyǝntɛ.
\q1
\v 6 Mɑɑ wɑkǝlɩ mpɑ pɑ hɑɑkɩ-m siɣile tɔ.
\q1 Mpi tɔ, pɑɑ pɛɛkǝɣɩ-m pǝ́cɔ́ pɑɑ cɑɑkɩ mɑ luɣu nyǝntʋ.
\q1
\v 7 Ɩ́ su, mɑ hʋʋlɛ kʋyɑkʋ kpɛɣɛtɑɑ.
\q1 Mɑ tɛmɑ kɔtɑsɩ tɔɣɔnɑɣɑ sɑɑʋ.
\q1 Mɑ tɑɣɑnɑ mpɑ mɑ yɑɑwɑ tɔ.
\q1
\v 8 Wʋlɛ ntɛɣɛ mɑɑ hɔ nyʋɣʋ nyǝ́mɑ nɑ wulɑʋ piyɑ pɑ ŋkpɑŋŋ.
\q1 Pɑɑ mpɑ pɑ kɛɛkǝnɑ kpɑɩ nyǝ́mɑ tɔ pɑ ŋkpɑŋŋ tɔtɔ.
\q1
\v 9 Mpɑ pɑ ŋmɑɑkɩ nɔnɔkpete ɩsɩɩ mɑ tɑ nyɩ ɩsɔnɑɑ tɔ.
\q1 Pǝyele pɑ suuliɣi pɑ tʋɣʋ kutuluŋ,
\q1 kɛ wɛnɑʋ mpi pɑ ŋmɩɩlǝnɑ yʋlʋkʋlɛ tɔ.
\q1 Mɑɑ hɔ pɑ ŋkpɑŋŋ.
\q1
\v 10 Kʋyɑŋkuɣu pɑɑ nɩɩ yoou kɑkiisɑsɩ
\q1 sɔsɔɔnsɩ kɛ Yosɑlɛm ɩcɑtɛ tɑɑ,
\q1 kɛ nɔnɔɣɔ ŋkɑ pɑ yɑɑ sɩ tiinɑ nɔnɔɣɔ tɔ kɑ kiŋ.
\q1 Pɑɑ nɩɩ lɑŋwɑkǝllɛ wulɑ kɛ ɩcɑtɛ hɔɣɔlʋɣʋ kʋfɑlʋɣʋ tɑɑ.
\q1 Pɑɑ nɩɩ tɔtɔɣɔ ɑcufu sɔsɔ kɛ pulɑsɩ tɔɔ.
\q1
\v 11 Ɩcɑtɛ pǝtɛɛ nyǝ́mɑ mɛ ɩ́ wii teu.
\q1 Mpi tɔ, mɑɑ kpiisi tɑɑtǝlɑɑ tǝnɑ.
\q1
\v 12 Wɑɑtʋ ɩnǝɣɩ mɑɑ kpɑɣɑ fǝtǝlɑ
\q1 nɑ mɑ́ pɛɛkɩ Yosɑlɛm ɩcɑtɛ tɑɑ.
\q1 Mɑɑ yoonɑ yǝlɑɑ mpɑ pɑ cɑɣɑnɑ pɑ tɩ
\q1 ɩsɩɩ sʋlʋm tɑɣɑtʋ kɛ ɑtiŋkpɑ tɑɑ tɔ.
\q1 Pǝ tɛ yǝlɑɑ tɔŋnɑ sɩ mɑɑ wɑɑsǝɣɩ pʋlʋ.
\q1 Pɑɑ kʋpɑntʋ pɑɑ ɩsɑɣɑtʋ.
\q1
\v 13 Pɑɑ lɛɛkɩ pɑ wɛnɑʋ nɑ pɑ́ yɔkɩ pɑ tɛɛsɩ.
\q1 Pɑɑ ŋmɑ kʋfɑsɩ yɑɑ.
\q1 Amɑ pɑ kɑɑ sʋʋ sɩ tɑɑ.
\q1 Pɑɑ sɔ lɛsɛŋ tɩɩŋ.
\q1 Amɑ pɑ kɑɑ tǝŋ pǝ sʋlʋmɑɣɑ.
\s1 Tɑcɑɑ kʋyɑkʋ
\q1
\v 14 Ḿpʋ́ɣʋ́ Sofoni tɑsɑɑ sɩ:
\q1 Tɑcɑɑ hʋʋlɛ kʋyɑkʋ sɔsɔɔʋ kpɛɣɛtɑɑ kɛlɛ.
\q1 Kʋ tɔŋɑ kɔntɛ kɛ lɔŋlɔŋ kɛ́.
\q1 Ye kʋ tɑlɑɑ,
\q1 yǝlɑɑ kɑ́ wii nɑ pǝ́ kpɛnnɑ yoolɑɑ tɑɑ yoolɑɑ.
\q1
\v 15 Mpi tɔ, kʋ kɛ́ pɑ́ɑ́nɑ́ sɔsɔɔnɑ kʋyɑkʋ kɛ́.
\q1 Yǝlɑɑ lɑŋɑ kɑ́ wɑkǝlɩ tǝtɔɣɔtɔɣɔ kɛ́ pǝ wule ńtɛ́.
\q1 Pɩɩ yɔkɩ nɑ pǝ yele ncɑɑ.
\q1 Ɩhunte kɑ́ kpɑ nɑ sǝkpɛtʋɣʋ ɑnɑɑm nyɑlɑ.
\q1
\v 16 Yoolɑɑ kɑ́ hʋlɩ ɑkɑntɛɛ.
\q1 Pɑɑ yɑɣɑ yoou kɑkiisɑsɩ.
\q1 Pɑɑ yoonɑ koloosi ɑcɑlɛɛ nɑ ɑ tǝfeŋle.
\q1
\v 17 Ḿpʋ́ɣʋ́ Tɑcɑɑ tɔmɑ sɩ:
\q1 Mɑɑ pɛtɩ yǝlɑɑ kɛ lɑŋwɑkǝllɛ tɑɑ.
\q1 Ɩ́ kɑ́ tutiɣi kɛ́ ɩsɩɩ yʋlʋmɑɑ.
\q1 Mpi tɔ, ɩ́ wɑkǝlǝnɑ-m tɔ pǝ tɔɔ.
\q1 Mǝ cɑlǝm kɑ́ yɑ ɩsɩɩ mʋsʋɣʋ,
\q1 nɑ mǝ nɑntʋ tɑsɑ ɩsɩɩ hute.
\q1
\v 18 Mǝ liɣitee yɑɑ mǝ wʋlɑ kɑɑ pǝsɩ
\q1 nɑ ɩ́ wɑɑsɩ-mɛɣɛ kʋyɑkʋ ŋkʋ kʋ wule.
\q1 Mɑ pɑ́ɑ́nɑ́ kɔkɔ kɑ nyɑɣɑ tɛtʋ tǝnɑ.
\q1 Mɑɑ kpiisi tǝ tɑɑ yǝlɑɑ tǝnɑ.
\c 2
\s1 Tǝpɑsǝlɑɑ yɑɑʋ
\p
\v 1 Ḿpʋ́ɣʋ́ Sofoni tɔmɑ sɩ:
\q1 Fɛɛlɛfɛɩ nyǝ́mɑ mɛ.
\q1 Ɩ́ kpɑ mǝ tɩ nɑ ɩ́ mɑɣɑsɩ mǝ tɑɑ.
\q1
\v 2 Pǝ tɑɑ yɑsɩ-mɛ ɩsɩɩ nyɩɩtʋ kɛ kʋyɑkʋ kʋlʋmʋɣʋ tɑɑ,
\q1 nɑ pǝ́cɔ́ pɩɩ tɑkɩ kʋyɑkʋ ŋku Tɑcɑɑ kɑ́ mʋ-mɛ nɑ pɑ́ɑ́nɑ́
\q1 sɔsɔɔnɑ tɔ.
\q1
\v 3 Tɛtʋ tɑɑ tǝpɑsǝlɑɑ mɛ mpɑ ɩ́ tɔkǝɣɩ Ɩsɔ kiiŋ kɛ teu tɔ.
\q1 Ɩ́ kɛɛsǝnɑ Tɑcɑɑ tɔɔ.
\q1 Ɩ́ tɔkɩ mǝ tǝpɑsʋɣʋ nɑ ɩ́ tǝŋǝɣɩ tɑmpɑnɑ.
\q1 Ntɑnyɩ pɩɩ kenti mǝ tɔɔ kɛ́ Ɩsɔ pɑ́ɑ́nɑ́ kʋyɑkʋ wule.
\s1 Ilim tǝtʋlɛ tɔɔ nyǝ́mɑ ŋkpɑŋʋɣʋ hɔm
\q1
\v 4 Kɑsɑ ɩcɑtɛ kɑ́ pǝsɩ wʋlɑɣɑ tɛtʋ.
\q1 Asǝkɑlɔŋ nyǝntɛ kɑ́ yɔkɩ.
\q1 Pɑɑ tɔɣɔnɩ Asǝtɔtɩ yǝlɑɑ kɛ ilim tɑɑ.
\q1 Pɑɑ lǝsɩ Ɩkoloŋ nyǝ́mɑ.
\q1
\v 5 Kǝlɛtɩ nyǝ́mɑ mɛ mpɑ ɩ́ kɔmɑ teŋku nɔɣɔ tɔ,
\q1 mpusi wɛ mǝ tɔɔ kɛ́.
\q1 Tɑcɑɑ sɩ: Mɑɑ kpiisi Filiisi nyǝ́mɑ nɑ pɑ tɛtʋ tǝnɑ.
\q1
\v 6 Mǝ tɛtʋ kɛ teŋku nɔɣɔ tǝnɑ kɑ́ pǝsɩ tɔlɑ tǝtɔɣɔlɛ.
\q1 Tiikilɑɑ kɑ́ tɔŋ tǝ tɑɑ, nɑ pɑ́ lɑ pɑ heeŋ tǝtǝkǝlɛ.
\q1
\v 7 Yutɑ yǝlɑɑ kʋkɑɑsɑɑ kɑ́ tɔɣɔnɑ hɔɣɔlʋɣʋ ŋkʋ.
\q1 Tǝnɑɣɑ ɩ́ kɑ́ tiikiɣi mǝ kɑlǝkǝŋ,
\q1 ɩlɛnɑ ɩ́ puki Asǝkɑlɔŋ nɑ ɩ́ sʋʋkɩ tɑɑnɑsɩ.
\q1 Mǝ Ɩsɔ Tɑcɑɑ kɑ́ yoonɑ mǝ nɔɣɔ.
\q1 Ɩ kɑ́ mǝŋnɑ mǝ yǝlɑɑ mpɑ kolontunɑɑ kɑ kpɑwɑ yomle tɔ.
\s1 Ilim tǝlɩɩlɛ nyǝ́mɑ ŋkpɑŋʋɣʋ hɔm
\q1
\v 8 Ḿpʋ́ɣʋ́ Tɑcɑɑ tɔmɑ sɩ:
\q1 Mɑ nɩɩwɑ ɩsǝnɑ Mowɑpʋ nyǝ́mɑ
\q1 nɑ Amoŋ nyǝ́mɑ pɑ woŋɑ mɑ yǝlɑɑ mɛ,
\q1 nɑ pɑ́ footi-mɛ tɔ.
\q1 Pɑ tʋʋ-mɛ,
\q1 pɑ cusɑ mǝ tɛtʋ nɑ kɑlɑmpɑɑnɩ
\q1 nɑ pɑ́ sɔɔsɩ pɑ nyǝntʋ tɔɔ.
\q1
\v 9 Pǝ tǝnɑ pǝ tʋ Ɩsɔ Tɑcɑɑ mɑ́,
\q1 mɑ tuuki sɩ ɩsɩɩ mɑ kpiisɑ Mowɑpʋ
\q1 nɑ Amoŋ pǝ nyǝ́mɑ ɩsɩɩ Sɔtɔm nɑ Kɔmɔɔ.
\q1 Pɑ tɛtʋ kɑ́ pǝsɩ tɔm tǝhulle nɑ wʋlɑɣɑ tɛtʋ
\q1 nɑ sɔwɑ tike nyɑlɑ.
\q1 Mɑ yǝlɑɑ kɑkɑɑsɑɣɑ kɑ́ kɔnnɑ nɑ pɑ́ kuu pɑ wɛnɑʋ,
\q1 nɑ pɑ́ tɔɣɔ pɑ tɛtʋ.
\q1
\v 10 Ɩsǝnɑ mɑɑ hɔ pɑ ŋkpɑŋʋɣʋ tɔɣɔlɛ.
\q1 Mpi tɔ, pɑ kǝlɑ kɑlɑmpɑɑnɩ kɛ́
\q1 nɑ pɑ́ tʋʋ Pǝ tǝnɑ pǝ tʋ mɑ́,
\q1 mɑ yǝlɑɑ.
\q1
\v 11 Tɑcɑɑ mɑ́, mɑɑ nyǝŋsɩ pɑ ɩsɛ kɛ teu kɛ tǝnɑɣɑ.
\q1 Mɑɑ wɑkǝlɩ ɑntulinyɑ tǝnɑ tɑɑ tɩɩŋ.
\q1 Ɩlɛ piitimnɑɑ tǝnɑ kɑ́ sɛɛ-m pɑ tɛtʋ tɑɑ.
\q1 Hɑlǝnɑ pǝ kpɛnnɑ hɑtǝlɑɣɑ nyǝ́mɑ tǝnɑ.
\s1 Ilim ntɔɣɔŋ nɑ pǝ mpǝtǝŋ nyǝ́mɑ ŋkpɑŋʋɣʋ hɔm
\q1
\v 12 Ḿpʋ́ɣʋ́ Tɑcɑɑ tɔmɑ sɩ:
\q1 Mɑɑ kʋ Ɩtiyopii nyǝ́mɑ mɛ mǝ tǝnɑɣɑ yoou tɑɑ.
\q1
\v 13 Mɑɑ tʋ ilim ntɔɣɔŋ tɔɔ hɔɣɔlʋɣʋ Asilii nyǝ́mɑ kɛ niŋ.
\q1 Mɑɑ wɑkǝlɩ-kʋ nɑ Ninifi ɩcɑtɛ sɔsɔɔlɛ pǝsɩ ncɑɑlɛ
\q1 nɑ wʋlɑɣɑ tɛtʋ.
\q1
\v 14 Kɑlǝkǝŋ kɑ́ hǝntǝɣǝnɑ ɩcɑtɛ lonte tɑɑ,
\q1 nɑ tɑɑlɛ wontu kɛ wɑɑnɩ wɑɑnɩ.
\q1 Kpiisiŋ nɑ ɑluɣucɑnɑ kɑ́ cɑɣɑ ɑkelenɑɑ ncɑɑ tɑɑ.
\q1 Pɑɑ pɛlɩ kutuluŋ tɑɑ kpeŋkpelɑsɩ kʋpɑŋsɩ,
\q1 nɑ sɩ sɔɣɔtɩ nɔnɔɣɔ.
\q1 Kɑtǝkɑtǝŋ kɑ́ wiiki ncɑɑ pǝtolee tɔɔ.
\q1
\v 15 Ɩsǝnɑ ɩcɑtɛ ńtɛ́ tɩɩ tɛnɑ tɔɣɔlɛ.
\q1 Pɑɑ nɑ tǝ yǝlɑɑ nyǝnɑɣɑ-tɛɣɛ sɔsɔɔlɛ,
\q1 nte tǝ fɛɩnɑ sɑɑlɑ tɔ.
\q1 Tɩɩ pǝsɩ ncɑɑlɛ nɑ pǝ́ yelinɑ tɑɑlɛ wontu.
\q1 Ɩlɛnɑ tɛɛlɑɑ tǝnɑ kpɛɛtǝɣɩ nyɔɔŋ nɑ pɑ́ sɔ́ɔ́lǝ́ɣɩ́-tɛ.
\c 3
\s1 Yosɑlɛm nyǝ́mɑ tɑ nɩɩ Ɩsɔ yɑɑʋ
\p
\v 1 Ḿpʋ́ɣʋ́ Sofoni tɔmɑ sɩ:
\q1 Yosɑlɛm ɩcɑtɛ yǝlɑɑ mpɑ mɛ
\q1 ɩ́ lɑkɩ ɩsɑɣɑtʋ tɔ.
\q1 Ɩ́ ŋmɑkǝlǝɣɩ lɛlɑɑ,
\q1 pǝyele ɩ́ kʋlǝɣɩ Tɑcɑɑ tɔɔ tɔ.
\q1 Mpusi wɛ mǝ tɔɔ kɛ́.
\q1
\v 2 Mpi tɔ, ɩ́ tɑ nɩɩ Tɑcɑɑ tɔm.
\q1 Ɩ́ kisɑ ɩ kpɑɑlʋɣʋ mpi ɩ kpɑɑlɑ-mɛ tɔ.
\q1 Pǝyele ɩ́ tɑ́ tʋ-ɩ nɑɑni,
\q1 ɩ́ tɑ́ pɛɛkɩ sɩ Ɩsɔ ɩ́ sǝnɑ-mɛ.
\q1
\v 3 Mǝ nyʋɣʋ nyǝ́mɑ wɛ kɛ́ ɩsɩɩ
\q1 tɔɣɔlɑsɩ nsi sɩ mʋ pɑ́ɑ́nɑ́ tɔ.
\q1 Mǝ hʋʋlɑɑ nɑ́ wɛ ɩsɩɩ sʋnsʋmǝŋ
\q1 likuɣu nɑ ɩɩ tɔɔsǝɣɩ cele tɔɔ tɔ.
\q1
\v 4 Mǝ Ɩsɔ kʋyɔɣɔtʋtʋ tɛlǝsǝlɑɑ ɩɩ pɑɑsǝɣǝnɑ pɑ tǝmlɛ.
\q1 Pɑ kooki yem nɑ pɑ́ kisiɣi pɑ tilitu.
\q1 Mǝ kɔtǝlɑɑ nɑ́ nyǝnǝɣɩ Ɩsɔ nyǝm kɛ yem kɛ́
\q1 nɑ pɑ́ yɔkǝɣɩ ɩ kiiu.
\q1
\v 5 Tɑcɑɑ wɛ ɩcɑtɛ tɑɑ kɛ́,
\q1 nɑ ɩ́ tɔkɩ kɑwulɑɣɑ nɑ siɣisuɣu.
\q1 Ɩɩ lɑkɩ ɩsɑɣɑtʋ.
\q1 Ɩ tǝŋǝɣɩ tɑmpɑnɑ kɛ́,
\q1 nɑ ɩ́ hʋʋkǝnɑ pɑɑ tɑnɑŋ ŋku.
\q1 Pɑɑ nɑ mpʋ tɔ, ɑsɑɣɑɑ fɛɩ fɛɛlɛ.
\q1
\v 6 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Mɑ tɛmɑ piitimnɑɑ tǝcu kɛ́ ḿpʋ́ɣʋ́ kpiisuɣu.
\q1 Mɑ yɔkɑ pɑ koloosi ɑcɑlɛɛ.
\q1 Mɑ wɑkǝlɑ pɑ hɑpɛɛ.
\q1 Tɔntɑɑ mɑɣɑmɑɣɑ fɛɩ tɔtɔ.
\q1 Pɩɩ kpiisi pɑ ɑcɑlɛɛ,
\q1 nɔɣɔlʋ kɑɑ wɛɛ.
\q1
\v 7 Mɑ tɔŋɑɣɑ sɩ,
\q1 Yosɑlɛm nyǝ́mɑ mɛ ɩ́ kɑ́ nyɑnɑ-m,
\q1 ɩ́ kɑ́ nɩɩ mɑ kpɑɑlʋɣʋ.
\q1 Ɩlɛ mɑ kɑɑ yɔkɩ mǝ tǝcɑɣɑlɛ ɩsɩɩ mɑɑ kɑlǝnɑ-mɛ tɔ.
\q1 Amɑ mǝ mǝlɑɑ kɛ́ nɑ ɩ́ tɛlǝsǝɣɩ mpǝle.
\q1
\v 8 Ɩ tɑŋ kʋyɑkʋ ŋku mɑɑ kɔɔ mǝ wɑɑlɩ ɩsɩɩ tɔɣɔlɑɣɑ tɔ.
\q1 Mɑ tʋ mɑ tɑɑ sɩ,
\q1 mɑ kotiɣi piitimnɑɑ nɑ kɑwulɑsɩ.
\q1 Mɑɑ yele nɑ mɑ pɑ́ɑ́nɑ́ nyɑɣɑ pɑ nɑ
\q1 ɑntulinyɑ tǝnɑ ɩsɩɩ kɔkɔ.
\s1 Tɑcɑɑ lɑɣɑsʋɣʋ kɛ yǝlɑɑ yɑɑsi
\q1
\v 9 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Mɑɑ lɑɣɑsɩ yǝlɑɑ,
\q1 mɑɑ nyɑɑlɩ mǝ ɩsɑɣɑtʋ.
\q1 Ɩlɛnɑ ɩ́ sɛɛ-m nɑ lotu kʋlʋmtʋ.
\q1
\v 10 Pɑɑ mɑ yǝlɑɑ mpɑ mɛ ɩ́ yɑwɑ nɑ
\q1 ɩ́ tɛɛ Ɩtiyopii tɔɔ tǝcɑɣɑcɑɣɑ tɔ.
\q1 Ɩ́ kɑ́ kɔɔ nɑ ɩ́ lɑ-m kɔtɑsɩ.
\s1 Ɩsɛɣɛlɩ yǝlɑɑ kɑkɑɑsɑɣɑ
\q1
\v 11 Kʋyɑŋku tɔ mɑ yǝlɑɑ kɑɑ wɛɛnɑ
\q1 ɩsǝnɑ pɑɑ pǝntǝnɑ-m tɔ pǝ fɛɛlɛ.
\q1 Mɑɑ lǝsɩ mpi pǝ lɑkɩ-mɛɣɛ kɑlɑmpɑɑnɩ nyǝ́mɑ tɔ.
\q1 Ɩlɛnɑ ɩ́ yele mǝ tǝɣɩ hɔm kɛ mɑ pʋɣʋ nɑŋŋ nyǝŋkʋ tɔɔ.
\q1
\v 12 Mɑɑ kenti mǝ tɑɑ mpɑ pɑ pɑsǝɣɩ pɑ tɩ tɔ
\q1 nɑ kʋnyɔntʋnɑɑ mpɑ pɑ tɛɛlǝɣɩ-m tɔ pɑ tɔɔ.
\q1
\v 13 Ɩsɛɣɛlɩ nyǝ́mɑ mɛ mǝ kɑkɑɑsɑɣɑ
\q1 kɑɑ tɑsɑ mpi pǝ tɑ siɣisi tɔɣɔ lɑpʋ.
\q1 Pǝyele ɩ́ kɑɑ looli,
\q1 yɑɑ ɩ́ tʋsɩ nɔɣɔlʋ.
\q1 Ɩ́ kɑ tɔkɩ kɛ́ nɑ ɩ́ hɛɛsɩ,
\q1 nɔɣɔlʋ kɑɑ nyɑɑsɩ-mɛ.
\s1 Yosɑlɛm lɑŋhɛɛsǝlɛ
\q1
\v 14 Yosɑlɛm ɩcɑtɛ yǝlɑɑ,
\q1 nɑ Ɩsɛɣɛlɩ nyǝ́mɑ mɛ,
\q1 mǝ tǝnɑ mǝ lɑŋɑ ɩ́ hʋlʋmɩ,
\q1 Ɩ́ yɔɔlǝnɑ mǝ lotu tǝnɑ.
\q1
\v 15 Tɑcɑɑ yelɑ mǝ ŋkpɑŋʋɣʋ kɛ hɔm.
\q1 Ɩ tɔɣɔnɑ mǝ kolontunɑɑ.
\q1 Ɩsɛɣɛlɩ nyǝ́mɑ wulɑʋ Tɑcɑɑ wɛ mǝ wɑɑlɩ kɛ́.
\q1 Pǝ fɛɩ sɩ ɩ́ nyɑnɑ wɑhɑlɑ nɔɣɔlʋ.
\q1
\v 16 Kʋyɑkʋ ŋkʋɣʋ yǝlɑɑ kɑ́ tɔ sɩ:
\q1 Yosɑlɛm nyǝ́mɑ mɛ,
\q1 ɩ́ tɑɑ nyɑ́,
\q1 mǝ ɑpɑlʋtʋ ɩ́ tɑɑ le.
\q1
\v 17 Tɑcɑɑ mǝ Ɩsɔ wɛ mǝ wɑɑlɩ,
\q1 nɑ ɩ toŋ.
\q1 Ɩ kɑ́ yele nɑ ɩ́ lɑ ɑkɑnɑɑ.
\q1 Mǝ tɔɔ kɛ́ ɩ lɑŋlɛ hʋlʋmɑɑ.
\q1 Ɩ sɔɔlɑ-mɛɣɛ nɑ ɩ́ hɑɑkɩ-mɛɣɛ weesuɣu kʋfɑlʋɣʋ.
\q1
\v 18 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Yosɑlɛm yǝlɑɑ mpɑ mɛ ɩ́ hɑtǝlǝnɑ ɑcimɑ,
\q1 nɑ mǝ lɑŋlɛ wɑkǝlɑɑ tɔ.
\q1 Mɑɑ kpeɣeli-mɛ nɑ mɑ́ kɛɛlɩ mǝ fɛɛlɛ.
\q1
\v 19 Wɑɑtʋ ɩnǝɣɩ mɑɑ hɔ mǝ muɣullɑɑ ŋkpɑŋŋ.
\q1 Mɑɑ lɑ kɔɔlɛ kɛ mpɑ pǝ kʋwɑ tɔ.
\q1 Mɑɑ mǝŋnɑ mǝ yǝlɑɑ mpɑ pɑ kpɑwɑ yomle tɔ.
\q1 Mɑɑ yele nɑ mǝ kʋtʋɣʋ pǝsɩ ɩsɑntɛ.
\q1
\v 20 Ɩlɛnɑ mɑ́ kpeɣeli-mɛ nɑ mɑ́ kɔnɑ.
\q1 Mɑɑ tʋ-mɛɣɛ teeli nɑ mɑ́ kʋsɩ mǝ nyʋɣʋ
\q1 kɛ ɑtɛ yǝlɑɑ tǝnɑ tɑɑ.
\q1 Tɑcɑɑ mɑ́ mɑ yɔɣɔtǝnɑ mpʋ.