\id ZEC - Lokpa Bible portions [dop] -Benin 1999 (web edition -2017)
\ide UTF-8
\h Sɑkɑlɩ
\toc1 ƖSƆ KƲYƆƔƆTƲTƲ TƐLƎSƲLƲ SAKALƖ TƆM TAKƎLAƔA
\toc2 Sɑkɑlɩ
\toc3 Sɑk
\mt2 ƖSƆ KƲYƆƔƆTƲTƲ TƐLƎSƲLƲ
\mt1 SAKALƖ
\mt2 TƆM TAKƎLAƔA
\imt1 Kʋtʋlʋtʋ
\ip Pɑ lʋlɑ Ɩsɔ kʋyɔɣɔtʋtʋ tɛləsʋlʋ Sɑkɑlɩ kɛ Pɑpiloni tɛtʋ tɑɑ timpi Yutɑ nyə́mɑ kɑ wɛ ɩsɩɩ yomɑɑ tɔ. Pə wɑɑlɩ kɛ pɑnɑ Solopɑpɛɛlɩ nɑ kɔtʋlʋ sɔsɔ Yosuwɑ pɑ kɔmɑ Yutɑ tɛtʋ tɑɑ. Wɑɑtʋ kʋlʋm kɛ Sɑkɑlɩ nɑ Asee pɑ lɑpɑ pɑ təmɑ. Sɑkɑlɩ tɑsɑ yəlɑɑ kɛ lɑɣɑtʋ sɩ pɑ́ məlɩ Ɩsɔ kiŋ nɑ pɑ́ ŋmɑ Ɩsɔ təsɛɛlɛ. Sɑkɑlɩ tɔm tɑkəlɑɣɑ fɑɣɑ tɔm nɑɑlɛɣɛ. Ɩsɔ təsɛɛlɛ ŋmɑʋ nɑ Yosɑlɛm məlʋɣʋ kɛ ɩ wule tɑɑ. Ɩsɔ kɑ́ tɑɣɑnɩ ɩ yəlɑɑ.
\ip Ɩsɔ kɑ tilinɑ wulɑʋ nɔɣɔlʋ, nɑ ɩ pɑsəɣɩ ɩ tɩ, pə́cɔ́ ɩ kɛ́ tiikilu. Yəlɑɑ kɑ tɛ nɑ pɑ́ kʋ-ɩ. Lɛlɑɑ nɑ́ nɑɑkɩ sɩ Yesu tɔm kɛ pɑ kɛɛsəɣɩ mpʋ.
\iot Ɩsənɑ pɑ fɑɣɑ Sɑkɑlɩ tɑkəlɑɣɑ tɔ:
\io1 Mpi mpi Ɩsɔ hʋlɑ Sɑkɑlɩ kɛ toosee tɑkɑ tɑɑ tɔ, titite \ior 1–8\ior*
\io1 Ɩsɛɣɛlɩ nyə́mɑ nɑ piitimnɑɑ lɛlɑɑ pɑ tɔm, titite \ior 9–14\ior*
\c 1
\ms1 TƆMNAA MPA PƎ HƲLA SAKALƖ TƆ
\s1 Tɑcɑɑ mələɣənɑ Ɩsɛɣɛlɩ nyə́mɑ
\p
\v 1 Pɛɛsɩ wulɑʋ sɔsɔ Tɑliyusi kɑwulɑɣɑ pənɑɣɑ nɑɑlɛ nyəŋkɑ, ɩsɔtʋ pəlefɛɩ nyəŋ, kɛ Tɑcɑɑ yɔɣɔtənɑ Pelekiyɑ pəyɑlʋ Sɑkɑlɩ. Ɩtoo sɑɑlɩ kɛlɛ. 
\v 2-3 Sɩ ɩ́ heeli Ɩsɛɣɛlɩ nyə́mɑ sɩ: Pə tənɑ pə tʋ Tɑcɑɑ mɑ́, mɑ mʋnɑ mə cɔsɔnɑɑ kɛ pɑ́ɑ́nɑ́ kɛ́ təsəɣəsəɣɩ. Ɩ́ məlɩ mɑ kiŋ, ɩlɛnɑ mɑ́ɑ́ kɛɛsənɑ mə tɔɔ. Mɑ sɩɩ ḿpʋɣʋ mɑ nɔɣɔ kɛ́. 
\v 4 Ɩ́ tɑɑ kɛɛnɑ mə cɑɑnɑɑ. Mɑɑ tɛmɑ mɑ kʋyɔɣɔtʋtʋ tɛləsəlɑɑ heeluɣu kɛ lɔŋtɑɑ sɩ pɑ́ tɛləsɩ-mɛ sɩ, ɩ́ lɔ mə tɔntɛ nɑ mə lɑkɑsɩ ɩsɑɣɑsɩ. Amɑ ɩ́ tɑ tisi nɑ ɩ́ mʋ mɑ tɔm nɑ ɩ́ nɩɩnɑ-m. 
\v 5 Ɩ́ nyə́mɑ teu sɩ mə cɔsɔnɑɑ nɑ mɑ kʋyɔɣɔtʋtʋ tɛləsəlɑɑ mpɛ pɑ səpɑ. 
\v 6 Pəyele mɑ kʋkpɑɑlətʋ nɑ mɑ kʋsəsɩɩtʋ nti tə tɔm mɑɑ heelɑ mɑ kʋyɔɣɔtʋtʋ tɛləsəlɑɑ sɩ, pɑ́ tɛləsɩ-mɛ tɔ, tə mɑɣɑnɑ-mɛɣɛ teitei kɛ́. Ɩlɛnɑ ɩ́ cɛkənɑ sɩ mə lɑkɑsɩ ɩsɑɣɑsɩ tɔɔ kɛ́ Tɑcɑɑ mɑ́, mɑ lɑpɑ-mɛɣɛ mpʋ. Ɩlɛnɑ ɩ́ lɑɣɑsɩ.
\s1 Sɑkɑlɩ toosee tɑkɑ kɑncɑɑlɑɣɑ nyənɑ
\p
\v 7 Ḿpʋɣʋ Tɑcɑɑ yɔɣɔtənɑ Pelekiyɑ pəyɑlʋ Ɩsɔ kʋyɔɣɔtʋtʋ tɛləsʋlʋ Sɑkɑlɩ. Wulɑʋ sɔsɔ Tɑliyusi kɑwulɑɣɑ wɑɑtʋ tɑɑ kɛ́ ɩ yɔɣɔtənɑ-ɩ, pənɑɣɑ nɑɑlɛ nyəŋkɑ ɩsɔtʋ nɑɑnʋwɑ nɑ kʋlʋm nyəŋ kʋyɑkʋ hiu nɑ liɣiti wule. 
\v 8 Ɩlɛnɑ pə́ lɑ́ Sɑkɑlɩ ɩsɩɩ toosee tɑkɑ nɑ ɩ́ nɑ́ nɔɣɔlʋ cɑɣɑ kpɑɣɑnʋsɛɛmɑɣɑ. Ɩlɛnɑ ɩ́ səŋɑ tiikɑsɩ nɑsəlɩ sɩ hɛkʋ kɛ tɛtɛkəlɛ nɑtəlɩ tə tɑɑ. Ɩ wɑɑlɩ kɛ́ kpɑɣɑnʋsɛɛmɑsɩ nɑ kpɑɣɑnʋhʋlʋmɑsɩ nɑ huluhuluŋ. 
\v 9 Ntɛnɑ mɑ́ pɔɔsɩ ɩsɔtɑɑ tillu wei ɩ kɑ yɔɣɔtənɑ-m tɔ sɩ: Tɑcɑɑ, kpɑɣɑnəŋ ɩnɩ, ɩ kʋtoluɣu suwe? Mpʋɣʋlɛ sɩ: Mɑɑ kɛɛsɩ-ŋ.
\p
\v 10 Ḿpʋɣʋ ɑpɑlʋ wei ɩ səŋɑ tiikɑsɩ hɛkʋ tɑɑ tɔ ɩ́ tɔmɑ sɩ: Tɑcɑɑ tilinɑ-wɛ sɩ, pɑ́ cɔɔ tɛtʋ.
\p
\v 11 Ntɛnɑ kpɑɣɑnəŋ cɑɣɑlɑɑ mpɛ pɑ kɛɛsəɣɩ ɩsɔtɑɑ tillu sɩ: Tə cɔɔwɑ tɛtʋ tənɑ. Amɑ hɛɛsʋɣʋ wɛnnɑ pɑɑ timpi, yoou fɛɩ tiili.
\p
\v 12 Ntɛnɑ ɩsɔtɑɑ tillu nɔɣɔ təkpɑʋ sɩ: Tɑcɑɑ Pə tənɑ pə tʋ, pɩɩsɩ hiu nɑ nɑɑnʋwɑ kɔlɔ n mʋ Yosɑlɛm nɑ Yutɑ ɑcɑlɛɛ lɛnnɑ nɑ pɑ́ɑ́nɑ́. Pəlee kɛ́ n kɑ́ hʋlɩ-yɛɣɛ suulu?
\p
\v 13 Mpʋɣʋlɛ Tɑcɑɑ heelɑ-ɩ tɔm nɑɑni nyəntʋ nti tə kpɑɑsəɣɩ ɑpɑlʋtʋ tɔ.
\s1 Tɑcɑɑ pɑɑsəɣənɑ Yosɑlɛm tɔtɔ
\p
\v 14 Ḿpʋɣʋ ɩsɔtɑɑ tillu wei ɩ yɔɣɔtɑɣɑnɑ-m tɔ ɩ tɔmɑ-m sɩ: Kpɑɑlɩ Pə tənɑ pə tʋ Tɑcɑɑ mɑ́ mɑ tɔm.
\q1 Mɑ sɔɔlɑ Yosɑlɛm nɑ Siyɔŋ pulɑɣɑ
\q1 kɛ́ ɩsɩɩ yem nɑ kpɛtɛ.
\q1
\v 15 Amɑ mɑ tɑɑ kpɑɑnɑ piitimnɑɑ mpɑ mɛ ɩ́ hɔŋ mə tɩ tɔɣɔ.
\q1 Mpi tɔ, pəciiu kɛ mɑ mʋnɑ Ɩsɛɣɛlɩ nɑ pɑ́ɑ́nɑ́.
\q1 Ɩlɛnɑ mɩɩ pəsəɣɩ-ɩ ncɑɑlɛ.
\q1
\v 16 Pə tɔɔ kɛ́ mɑ kpɑɑləɣɩ
\q1 sɩ mɑɣɑ Pə tənɑ pə tʋ Tɑcɑɑ,
\q1 mɑɑ məlɩ Yosɑlɛm.
\q1 Mɑɑ lɑ kʋpɑntʋ nɑ ɩ́ tɑɣɑnɩ Ɩsɔ təsɛɛlɛ kɛ ŋmɑʋ,
\q1 nɑ ɩ́ kʋsɩ ɩcɑtɛ tɔtɔ.
\p
\v 17 Ḿpʋɣʋ ɩsɔtɑɑ tillu tɑsɑ-m heeluɣu sɩ:
\q1 Kpɑɑlɩ tɔtɔ sɩ,
\q1 mɑɑ tɑsɑ Yosɑlɛm kɛ ləsʋɣʋ.
\q1 Mɑɑ wɑɑsɩ Siyɔŋ nɑ pə́ cɑɣɑnɑ mə ɑcɑlɛɛ təpɔkɛɛ.
\s1 Sɑkɑlɩ toosee tɑkɑ nɑɑlɛ nyənɑ
\p
\v 18 Ḿpʋɣʋ pə tɑsɑ-m ɩsɩɩ toosee tɑkɑ tɔtɔ nɑ mɑ nɑ́ həŋ liɣiti. 
\v 19 Ɩlɛnɑ mɑ́ pɔɔsɩ ɩsɔtɑɑ tillu wei ɩ yɔɣɔtəɣənɑ-m tɔ sɩ: Həŋ ɩnɩ ɩ kʋtoluɣu suwe? Mpʋɣʋlɛ sɩ: Ɩnɩ ɩ hʋləɣənɑ piitimnɑɑ toŋ nyəm. Mpɩ pə yɑsənɑ Yutɑ nɑ Ɩsɛɣɛlɩ nɑ Yosɑlɛm pə yəlɑɑ.
\p
\v 20 Ɩlɛnɑ Tɑcɑɑ hʋlʋ-m koolɑɑ liɣiti. 
\v 21 Ḿpʋɣʋ mɑ pɔɔsɑ-ɩ sɩ: Pepeɣe pɑ kɔmɑ lɑpʋ kɛ cənɛ? Ɩlɛnɑ ɩ́ cɔ-m sɩ: Pɑ kɔmɑɣɑ sɩ, pɑ nyɑɑsəɣɩ piitimnɑɑ. Mpɛ pɑ yoonnɑ Yutɑ nyə́mɑ nɑ pɑ́ yɑsɩ pɑ yəlɑɑ. Ɩlɛnɑ pɑ́ yɔkɩ pɑ toŋ.
\c 2
\s1 Sɑkɑlɩ toosee tɑkɑ tooso nyənɑ
\p
\v 1 Ḿpʋɣʋ pə lɑpɑ-m ɩsɩɩ toosee tɑkɑ nɑ mɑ nɑ́ yʋlʋ nɑ ɩ́ tɔkɑ ŋmənɑɣɑ kʋmɑɣɑsɑɣɑ. 
\v 2 Ɩlɛnɑ mɑ́ pɔɔsɩ-ɩ sɩ: Leɣe n puki? Ḿpʋɣʋ sɩ: Mɑ puki sɩ mɑ mɑɣɑsəɣɩ Yosɑlɛm ɩcɑtɛ wɑŋ nɑ tə tɑɣɑləŋ.
\p
\v 3 Ntɛnɑ ɩsɔtɑɑ tillu wei ɩ yɔɣɔtənɑ-m tɔ ɩ́ kpətənɑ ɩsɔtɑɑ tillu lɛlʋ wei ɩ səŋɑ-ɩ tɔ. 
\v 4 Ḿpʋɣʋ ɩ tɔmɑ-ɩ sɩ: Polo ń heeli ɩfepu wei ɩ tɔkɑ ŋmənɑɣɑ tɔ sɩ, pɑ kɑɑ ŋmɑ koluŋɑ nɑ pɑ́ cɔɔnɑ Yosɑlɛm. Mpi tɔ, ɩ tɑɑ yəlɑɑ nɑ tɔlɑ pɑ kəlɑ pɑɣɑlɛ. 
\v 5 Amɑ Tɑcɑɑ yɔɣɔtɑɑ sɩ: Mɑ́ɑ́ wɛɛnɑ ɩsɩɩ ɩcɑtɛ koluŋɑ kɔkɔ nyəŋkɑ nɑ mɑ teu nɑɑkɩ tə tɑɑ.
\s1 Tɑcɑɑ yɑɑkɩ yomle nyə́mɑ
\q1
\v 6 Ḿpʋɣʋ Tɑcɑɑ tɔmɑ sɩ:
\q1 Mpɑ mɛ mɑ yɑsɑ tɛtʋ tənɑ tɑɑ tɔ,
\q1 ɩ́ lɩɩ ilim ntɔɣɔŋ tɔɔ tɛtʋ tɑɑ nɑ ɩ́ se.
\q1
\v 7 Yosɑlɛm nyə́mɑ mpɑ mɛ
\q1 ɩ́ wɛ yomle tɑɑ kɛ Pɑpiloni tɔ,
\q1 ɩ́ tɑɣɑnɩ mə tɩ nɑ ɩ́ se.
\p
\v 8 Ḿpʋɣʋ Sɑkɑlɩ tɔmɑ sɩ: Pə tənɑ pə tʋ Tɑcɑɑ tilinɑnɑ-m tɔm sɔsɔɔntʋ tənɛ. Ɩ yɔɣɔtəɣənɑ piitimnɑɑ mpɑ pɑ yoonɑ ɩ yəlɑɑ mɛ tɔ sɩ:
\q1 Ye wei ɩ́ tokinɑ-mɛ pə wɛ ɩsɩɩ mɑɣɑ pʋntʋ tokinɑɑ.
\q1
\v 9 Mɑɑ kʋlɩ piitimnɑɑ
\q1 mpɑ pɑ ŋmɑkəlɑ-mɛ tɔ pɑ tɔɔ.
\q1 Mɑɑ yele nɑ mə yomɑɑ ŋmɑkəlɩ-mɛ.
\m Pɩɩ kɔɔ nɑ pə lɑ mpʋ ɩlɛ pəlɛɣɛlɛ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m.
\m
\v 10 Tɑcɑɑ sɩ:
\q1 Yosɑlɛm nyə́mɑ ɩ́ ŋmɑɑlənɑ lɑŋhʋlʋmlɛ.
\q1 Mɑɑ kɔɔ nɑ mɑ́ cɑɣɑ mə cɔlɔ.
\q1
\v 11 Wɑɑtʋ ɩnəɣɩ piitimnɑɑ pɑɣɑlɛ kɑ kpɛntənɑ-m.
\q1 Ɩ́ kɑ́ pəsɩ mɑ yəlɑɑ.
\q1 Ɩlɛnɑ mɑ́ wɛɛ mə hɛkʋ.
\m Wɑɑtʋ wei mpʋ ɩnɩ pɩɩ lɑ tɔɣɔ ɩ́ kɑ́ nyɩ sɩ, mɑɣɑlɛ Pə tənɑ pə tʋ Tɑcɑɑ wei ɩ tilɑ-m mə kiŋ tɔ.
\q1
\v 12 Yutɑ kɑ́ tɑɣɑnɩ pəsʋɣʋ kɛ mɑ kpəntɛ kɛ mɑ tɛtʋ tɑɑ.
\q1 Ɩlɛnɑ Yosɑlɛm nɑ́ɑ́ pəsɩ mɑ ɩcɑtɛ kʋləsəlɛ.
\q1
\v 13 Yəlɑɑ tənɑ ɩ́ su.
\q1 Tɑcɑɑ lɩɩnɑ ɩ təyɑɣɑ tɑɑ.
\c 3
\s1 Sɑkɑlɩ toosee tɑkɑ liɣiti nyənɑ
\p
\v 1 Ḿpʋɣʋ Tɑcɑɑ hʋlɑ-m kɔtʋlʋ sɔsɔ Yesuwɑ. Ɩ səŋɑ ɩsɔtɑɑ tillu ɩsɛntɑɑ. Sɑtɑnɩ nɑ́ wɛ ntɔɣɔŋ tɔɔ sɩ, ɩ cɑɑ-ɩ tɔm suuu. 
\v 2 Ntɛnɑ ɩsɔtɑɑ tillu təkɩ Sɑtɑnɩ sɩ: Su, Tɑcɑɑ ləsənɑ Yosɑlɛm. Yesuwɑ nɑ́ wɛ ɩsɩɩ tuputuɣu ŋku pɑ ləsɑ kɔkɔ tɑɑ tɔ.
\p
\v 3 Yesuwɑ kɑ səŋɑ tənɑ tɔ nɑ ɩ́ suu ɑsilimɑ wontu kɛ. 
\v 4 Ḿpʋɣʋ ɩsɔtɑɑ tillu tɔmɑ ɩ́ nɑ mpɑ tɔ sɩ: Ɩ́ wɔɣɔsɩ-tɩ. Mɑ hɩɩsɑ ɩ ɩsɑɣɑtʋ. Ɩ́ kɑ́ suu-ɩ ɑcimɑ wontu.
\p
\v 5 Nɑ ɩ́ tɑsɑ sɩ: Ɩ́ temi-ɩ sɑɑlɑɣɑ kʋpɑŋkɑ. Ɩlɛnɑ pɑ́ lɑ mpʋ. Pɑ suu-ɩ wontu kʋpɑntʋ tɔtɔɣɔ nɑ ɩsɔtɑɑ tillu wɛ tənɑ. 
\v 6 Tənɑɣɑ ɩsɔtɑɑ tillu tɔmɑ sɩ: 
\v 7 Pə tənɑ pə tʋ Tɑcɑɑ mɑ́ mɑ sɩɩ mɑ nɔɣɔ sɩ:
\q1 Ye Ɩsɛɣɛlɩ nyə́mɑ tɔkɑ mɑ kiiŋ
\q1 nɑ pɑ́ təŋəɣɩ mɑ kʋtʋtʋtʋ
\q1 mɑɑ kpɑ-mɛɣɛ Ɩsɔ təsɛɛlɛ
\q1 sɔsɑɑ sɔsɑɑ nɑ mɑ tɑɣɑ pɑɑsənlɑɑ.
\q1 Mɑɑ tʋ-mɛɣɛ ɩsɔtɑɑ tillɑɑ mpɑ
\q1 pɑ wɛ mɑ təmlɛ tɑɑ ɩsəntɔ tɔ pɑ tɑɑ.
\s1 Ɩsɔ kɔnɑʋ kɛ ɩ təmlɛ tʋ
\q1
\v 8 Ḿpʋɣʋ Tɑcɑɑ yɔɣɔtɑɑ sɩ:
\q1 Kɔtʋlʋ sɔsɔ Yesuwɑ nɑ ɩ tɑɑpɑlɑɑ mɛ.
\q1 Mə hʋləɣənɑ nyʋɣʋ yɑpʋ mpi pɩɩ kɔɔ tɔ pə tɔm.
\q1 Ɩ́ ke ŋkpɑŋŋ nɑ ɩ́ nɩɩ.
\q1 Mɑɑ yele nɑ mɑ təmlɛ tʋ Tɑfiiti Hoole lɩɩ.
\q1
\v 9 Mɑ sɩɩkɩ pəlɛ nte tə wɛnɑ ɩsɛ
\q1 nɑɑtosompɔɣɔlɑɣɑ tɔɣɔ Yesuwɑ ɩsɛntɑɑ.
\q1 Ɩlɛnɑ mɑ́ ŋmɑɑ tə tɔɔ kɛ́ mɑ tɔm.
\q1 Mɑɑ kɔɔlɩ ɩsɑɣɑtʋ nti tə pilisiɣi
\q1 ɩcɑtɛ tənɑ tɔɣɔ kʋyɑkʋ kʋlʋmʋɣʋ.
\q1 Pə tənɑ pə tʋ Tɑcɑɑ mɑ́,
\q1 mɑ yɔɣɔtənɑ mpʋ.
\q1
\v 10 Kʋyɑkʋ ŋkʋ kʋ kɔmɑ,
\q1 ɩlɛ ɩ́ kɑ́ yɑɑ lɛlɑɑ nɑ mə nɑ-wɛ ɩ́ yɔɔlɩ
\q1 mə tɩɩŋ kʋlʋlʋŋ nɑ mə fikinɑɑ tɛɛ nɑ hɛɛsʋɣʋ.
\c 4
\s1 Sɑkɑlɩ toosee tɑkɑ kɑkpɑsɩ nyənɑ
\p
\v 1 Ḿpʋɣʋ ɩsɔtɑɑ tillu wei ɩ yɔɣɔtəɣənɑ-m tɔ, ɩ kɔmɑ nɑ ɩ́ ciɣiti-m ɩsɩɩ pɑ feesuɣu yʋlʋ wei ɩ tooki tɔ. 
\v 2 Ɩlɛnɑ ɩ́ pɔɔsɩ-m sɩ: Pepeɣe n nɑɑkɩ? Mɑ cɔ-ɩ sɩ: Mɑ nɑɑkɩ wʋlɑ fətəlɑ. Nɑ nim tətʋlɛ kɛ ɩ nyʋɣʋ tɑɑ. Nɑ fətəlɑnɑɑ kɛ nɑɑtosompɔɣɔlɑɣɑ, nɑ pɑ kpoŋkpontu nɑ tə kɔkɔ. 
\v 3 Pə kɑɑsɩ nɑ Olifi tɩɩŋ nɑɑlɛ səŋɑ tənɑɣɑ ŋwɑɑŋ nɑ mpəlɛ tɔɔ.
\p
\v 4 Ntɛnɑ mɑ́ pɔɔsɩ ɩsɔtɑɑ tillu wei ɩnɩ ɩ yɔɣɔtənɑ-m tɔ sɩ: Mɑ cɑɑ, pepeɣe pə tənɑ ɩsəntɔ pə hʋləɣɩ?
\p
\v 5 Ɩlɛnɑ ɩ́ pɔɔsɩ-m sɩ: Ye mpʋ n tɑ nyɩ? Mɑ sɩ: Aɑɩ, mɑ cɑɑ. 
\v 6 Mpʋɣʋlɛ sɩ, Tɑcɑɑ heelɑ-m tɔm sɩ mɑ́ tɛləsɩ Solopɑpɛɛlɩ sɩ:
\q1 Pə tɑɣɑ toŋ yɑɑ nɑntʋ tɑɑ ɑlɑɑfəyɑ tɔm.
\q1 Amɑ mɑ feesuɣu toŋ kɛ́.
\q1 Pə tənɑ pə tʋ mɑ́ mɑ yɔɣɔtənɑ mpʋ.
\s1 Nɔɔsɩ nsi pɑ sɩɩ Solopɑpɛɛlɩ tɔ
\q1
\v 7 Pɑɑ wɑhɑlɑnɑɑ kɑɑwɑ ɩsɩɩ pʋɣʋ,
\q1 Tɑcɑɑ kɑ́ yɔkɩ-wɛɣɛ.
\q1 Solopɑpɛɛlɩ kɑ́ ləsɩ kɑntəkɑɣɑ pəlɛ nte
\q1 pɑ kʋnɑ Ɩsɔ təsɛɛlɛ nyʋɣʋ tɔ.
\q1 Ɩlɛnɑ yəlɑɑ wiliti teu.
\p
\v 8 Ḿpʋɣʋ Tɑcɑɑ heelɑ-m sɩ:
\q1
\v 9 Solopɑpɛɛlɩ kɑ́ ŋmɑnɑ Ɩsɔ təsɛɛlɛ tənɛ
\q1 nɑ ɩ niŋ nɑ ɩ́ tɛ-tɛ.
\p Wɑɑtʋ ɩnəɣɩ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m mə kiŋ.
\q1
\v 10 Mpɑ pɑ nyənəɣɩ yem kɛ́ təmisi sənɛ tɔ,
\q1 pɑ lɑŋɑ kɑ́ hʋlʋmɩ wɑɑtʋ wei pɑɑ nɑ́
\q1 kʋmɑɣɑsʋɣʋ kɛ Solopɑpɛɛlɩ niŋ tɑɑ tɔ.
\q1 Fətəlɑnɑɑ nɑɑtosompɔɣɔlɑɣɑ ɩnəɣəlɛ
\q1 Tɑcɑɑ ɩsɛ nnɑ ɩ nɑɑkənɑ tɛtʋ tənɑ tɔ.
\p
\v 11 Ḿpʋɣʋ mɑ́ pɔɔsɑ-ɩ sɩ: Olifinɑɑ tɩɩŋ wei ɩ səŋnɑ ḿpʋɣʋ fətəlɑ ŋwɑɑŋ nɑ ɩ mpəlɛ tɔɔ?
\p
\v 12 Ɩlɛnɑ mɑ́ tɑsɑ pɔɔsʋɣʋ sɩ: Olifinɑɑ tɩɩŋ wei kɛlɛ wʋlɑ fusi nsi sɩ tɑɑ nim lɩɩkɩ tɔ? 
\v 13 Ntɛnɑ ɩ́lɛ́ ɩ́ pɔɔsɩ-m sɩ: N tɑ nyɩ? Mɑ sɩ: Aɑɩ. 
\v 14 Ḿpʋɣʋ ɩ́ cɔ-m sɩ: Olifinɑɑ tɩɩŋ ɩnəɣəlɛ ɑpɑlɑɑ nɑɑlɛ wei pɑ pəlɑ nim nɑ pɑ́ kpɑ-wɛɣɛ Pə tənɑ pə tʋ Tɑcɑɑ təmlɛ nyə́mɑ tɔ.
\c 5
\s1 Sɑkɑlɩ toosee tɑkɑ nɑɑtoso nyənɑ
\p
\v 1 Ḿpʋɣʋ pə lɑpɑ-m ɩsɩɩ toosee tɑkɑ. Ɩlɛ mɑ nɑwɑ tɑkəlɑɣɑ nɑ kɑ́ kʋləɣɩ hʋntʋ ntɛ. 
\v 2 Ɩlɛnɑ ɩsɔtɑɑ tillu pɔɔsɩ-m sɩ: Pepeɣe n nɑɑkɩ? Mɑ sɩ: Tɑkəlɑɣɑ hɛtənɑ nɑ kɑ́ kʋləɣɩ hʋntʋ. Kɑ tɑɣɑləŋ wɛ mɛɛtələnɑɑ nɑɑnʋwɑ. Kɑ wɑŋ kɛ mɛɛtələnɑɑ kɑkpɑsɩ.
\p
\v 3 Ḿpʋɣʋ ɩ tɔmɑ-m sɩ: Mpusi kɑ́ mɑɣɑnɑ tɛtʋ tɑɑ ŋmɩɩlɑɑ, nɑ mpɑ pɑ tuukinɑ yem yem tɔ, pɑɑ ləsɩ-wɛɣɛ tɛtʋ. Mpɛɣɛ pɑ ŋmɑɑ kɑ tɑɑ nɑ kɑ wɑɑlɩ. 
\v 4 Pə tənɑ pə tʋ Tɑcɑɑ sɩ: Mɑ mɑɣɑmɑɣɑ mɑɑ kɔnnɑ mpusi ɩnɩ. Mpusi ɩnɩ ɩ kɑ́ sʋʋ pɑɑ ŋmɩɩlʋ wei, nɑ mpɑ pɑ tuukinɑ mɑ hətɛ kɛ yem yem tɔ, pɑ tɛɛsɩ tɑɑ. Ɩ kɑ́ cɑɣɑ tənɑ nɑ ɩ́ wɑkəlɩ kutuluɣu nɑ kʋ pɛɛ nɑ kʋ kpɑtəŋ.
\s1 Sɑkɑlɩ toosee tɑkɑ nɑɑtosompɔɣɔlɑɣɑ nyənɑ
\p
\v 5 Ḿpʋɣʋ ɩsɔtɑɑ tillu wei ɩ yɔɣɔtənɑ-m tɔ ɩ kɔmɑ nɑ ɩ́ tɔ-m sɩ: Kʋsɩ ɩsɛ. Pepe nɑ pepeɣe n nɑɑkɩ tənɑ? 
\v 6 Ɩlɛnɑ mɑ́ pɔɔsɩ-ɩ sɩ: Pepeɣelɛ? Mpʋɣʋlɛ sɩ: Tɔkʋ ŋku kʋ tɑɑ wɛ ɩsɑɣɑtʋ tənɑ tɔɣɔlɛ.
\p
\v 7 Wɑɑtʋ ɩnəɣɩ tɔkʋ ŋkʋ kʋ pəle nyəɣəlʋɣʋ nyəntɛ kulɑɑ nɑ mɑ́ nɑ́ ɑlʋ nɔɣɔlʋ nɑ ɩ́ cɑɣɑ kʋ tɑɑ. 
\v 8 Ntɛnɑ ɩsɔtɑɑ tillu sɩ: Alʋ ɩnɛ ɩ kɛnɑ ɩsɑɣɑtʋ. Ɩlɛnɑ ɩ́ tusi-ɩ nɑ ɩ́ məŋnɑ kʋ tɑɑ tənɑ nɑ ɩ́ pɑ́ pəle. 
\v 9 Mɑ kʋsɑ ɩsɛ, ɩlɛ heelim kpɑɣɑ ɑlɑɑ nɑpələɣəlɛ nɑɑlɛ nɑ pə́ kɔnɑ. Pɑ keŋ nəɣəsənɑ kɛ́ ɩsɩɩ kʋlɑɑləŋ. Ḿpʋɣʋ pɑ kpɑɣɑ tɔkʋ ŋkʋ nɑ pɑ́ tɛɛnɑ. 
\v 10 Ḿpʋɣʋ mɑ pɔɔsɑ ɩsɔtɑɑ tillu sɩ: Leɣe pɑ pukinɑ-kʋ? 
\v 11 Ntɛnɑ ɩ́ cɔ-m sɩ: Pɑpiloni kɛ pɑ puki sɩ pɑ ŋmɑ kutuluɣu nɑ pɑ́ sɩɩ-ɩ nɑ pɑ́ lɑɑkɩ.
\c 6
\s1 Sɑkɑlɩ toosee tɑkɑ pəlefɛɩ nyənɑ
\p
\v 1 Ḿpʋɣʋ pə lɑpɑ-m ɩsɩɩ toosee tɑkɑ, ɩlɛnɑ mɑ́ nɑ́ yoou kɛɛkɛnɑɑ liɣiti. Nɑ pɑ́ lɩɩkənɑ nyəɣəlʋɣʋ kʋsɛɛmʋɣʋ pɔ́ɔ́ŋ nɑɑlɛ hɛkʋ tɑɑ. 
\v 2 Kpɑɣɑnəŋ kʋsɛɛməŋ hɔŋnɑ kɑncɑɑlɑɣɑ kɛɛkɛ. Kpɑɣɑnəŋ kʋkpɛɛtəŋ kɛ kɛɛkɛ nɑɑlɛ nyəŋ. 
\v 3 Kpɑɣɑnʋhʋlʋmɑsɩ kɛ kɛɛkɛ tooso nyəŋ. Ɩlɛnɑ kpɑɣɑnəŋ wei ɩ wɛnɑ cʋntʋ tʋlʋŋɑsɩ tɔɣɔ kɛɛkɛ liɣiti nyəŋ. Kpɑɣɑnəŋ ɩnɩ ɩ tənɑ ɩ kɑ wɛnɑ toŋ kɛ́. 
\v 4 Ḿpʋɣʋ mɑ pɔɔsɑ ɩsɔtɑɑ tillu wei ɩ yɔɣɔtənɑ-m tɔ sɩ: Kpɑɣɑnəŋ nɑ ɩ kɛɛkɛnɑɑ mpɛ pɑ kʋtoluɣu suwe?
\p
\v 5 Ɩlɛnɑ pɛlɛ pɑ́ cɔ-m sɩ: Tɛtʋ tənɑ tʋ Tɑcɑɑ kiŋ kɛ feesiŋ liɣiti ɩnɩ ɩ lɩɩnɑɑ. Ɩlɛnɑ ɩ́ puki ɑntulinyɑ hɔɣɔləŋ tənɑ tɑɑ.
\p
\v 6 Ḿpʋɣʋ kpɑɣɑnʋkpɛɛtəŋ kɛɛkɛ nɑ́ məŋnɑ ilim ntɔɣɔŋ tɔɔ, kɛ́ Pɑpiloni tɛtʋ tɑɑ. Ɩlɛnɑ kpɑɣɑnʋhʋlʋmɑsɩ nɑ́ɑ́ məŋnɑ ilim tətʋlɛ tɔɔ. Nɑ cʋntʋ tʋlʋŋɑsɩ nyəŋ kɛ ilim mpətəŋ tɔɔ. 
\v 7 Ḿpʋɣʋ cʋntʋ tʋlʋŋɑsɩ nyəŋ ɩnɩ ɩ sələmɑɑ sɩ ɩ kɑ́ cɔɔ tɛtʋ. Ɩlɛnɑ Tɑcɑɑ sɩ pɑ́ cɔɔ-tɩ. 
\v 8 Ḿpʋɣʋ Tɑcɑɑ yɑɑ-m nɑ ɩ́ heeli-m sɩ: Kpɑɣɑnəŋ wei ɩ polɑ Pɑpiloni tɛtʋ tɑɑ tɔ. Ɩnɩ ɩ kɑ́ yelinɑ nɑ mɑ Feesuɣu tii hɔɣɔlʋɣʋ ŋkʋ kʋ tɑɑ.
\s1 Yesuwɑ kɑwulɑɣɑ tɔɣɔʋ
\p
\v 9 Ḿpʋɣʋ Tɑcɑɑ heelɑ-m sɩ: 
\v 10 Mʋ kʋcɔɔʋ kɛ mpɑ Pɑpiloni nyə́mɑ kuuwɑ tɔ pɑ kiŋ. Mpɛɣɛlɛ Hɛlətɑyi, nɑ Topiyɑ, nɑ Yetɑyɑ. Polo sɑŋɑ mɑɣɑmɑɣɑ kɛ Sefɑniyɑ pəyɑlʋ Yosiyɑ təyɑɣɑ tɑɑ. Tənɑɣɑ yəlɑɑ mpɛ pɑ wɛɛ. 
\v 11 Cɑɑ wʋlɑ nɑ liɣitee nyəɣətʋ. Ɩlɛnɑ ń lu ntenuɣu ŋku n kɑ́ te Yosɑtɑkɩ pəyɑlʋ kɔtʋlʋ sɔsɔ Yesuwɑ nyʋɣʋ tɔ. 
\v 12 Heeli-ɩ sɩ, Pə tənɑ pə tʋ Tɑcɑɑ yɔɣɔtɑɑ sɩ:
\q1 Yʋlʋ nɔɣɔlʋ wɛ cənɛ nɑ pɑ́ yɑɑ-ɩ sɩ Hoole.
\q1 Ɩ kɑ́ lɩɩ ɩ tɛtʋ tɑɑ.
\q1 Ɩnɩ ɩ kɑ́ ŋmɑnɑ Ɩsɔ təsɛɛlɛ.
\q1
\v 13 Ɩnɩ ɩ kɑ́ tɑɣɑnənɑ-tɛɣɛ ŋmɑʋ.
\q1 Ɩ kɑ́ wɛɛnɑ kɑwulɑɣɑ kʋyʋsʋm,
\q1 ɩ kɑ́ cɑɣɑ kɑ kumte tɔɔ nɑ ɩ́ tɔɣɔ-kɛ.
\q1 Kɔtʋlʋ kɑ́ wɛɛ ɩ kɔŋkɔŋ tɑɑ,
\q1 nɑ pɑ́ nɩɩkənɑ təmɑɣɑ teu.
\p
\v 14 Ntenuɣu kɑ́ cɑɣɑ Ɩsɔ təsɛɛlɛ tɑɑ. Pɩɩ tɔɔsəɣɩ-wɛɣɛ Hɛlətɑyi, nɑ Topiyɑ, nɑ Yetɑyɑ, nɑ Sefɑniyɑ pəyɑlʋ pɑ kʋpɑntʋ tɔɔ.
\p
\v 15 Yəlɑɑ kɑ́ lɩɩnɑ pooluŋ nɑ pɑ́ kɔɔ nɑ pɑ́ sənɑ Ɩsɔ təsɛɛlɛ ŋmɑʋ. Ɩlɛ ɩ́ kɑ́ nyɩ sɩ Pə tənɑ pə tʋ Tɑcɑɑ tilinɑ-m mə kiŋ.
\p Ye ɩ́ nɩɩkənɑ mə Ɩsɔ Tɑcɑɑ kɛ teu pɩɩ lɑ mpʋ.
\c 7
\s1 Nɔhɔkʋtʋ kɛ Yosɑlɛm ncɑɑlɛ tɔɔ
\p
\v 1 Ḿpʋɣʋ Tɑcɑɑ heelɑ-m tɔm. Tɑliyusi kɑwulɑɣɑ pənɑɣɑ liɣiti nyəŋkɑ ɩsɔtʋ pɔɣɔlɑɣɑfɛɩ nyəŋ wei pɑ yɑɑ sɩ kisile tɔ ɩ kʋyɑkʋ liɣiti nyəŋkʋ wule kɛ ɩ heelɑ-m tɩ. 
\v 2 Petɛɛlɩ nyə́mɑ kɑ tilinɑ Sɑlesee nɑ Lekem-Mɛlɛkɩ sɩ pɑ́ kɔɔ Tɑcɑɑ wiinɑʋ kɛ ɩsɔ təsɛɛlɛ tɑɑ. 
\v 3 Ḿpʋɣʋ pɑ pɔɔsɑ kɔtəlɑɑ nɑ Ɩsɔ kʋyɔɣɔtʋtʋ tɛləsəlɑɑ sɩ: Pə́ wɛɛ sɩ, tə́ wiiki nɑ tə́ hɔkəɣɩ nɔɔsɩ, kɛ pɑɑ pənɑɣɑ ŋkɑ kɑ ɩsɔtʋ kɑkpɑsɩ nyəŋ, ɩsɩɩ too tə lɑkɑɣɑ pɩɩsɩ pɑɣɑlɛ tɑɑ tɔ?
\p
\v 4 Ḿpʋɣʋ Pə tənɑ pə tʋ Tɑcɑɑ tɔmɑ-m sɩ, 
\v 5 tɛləsɩ kɔtəlɑɑ nɑ tɛtʋ tɑɑ yəlɑɑ tənɑ tɔm sɩ:
\q1 Too pɩɩsɩ nɩɩtoso nɑ nɑɑnʋwɑ
\q1 kɔlɔ ɩ́ hɔkəɣɩ nɔɔsɩ,
\q1 nɑ ɩ́ wiiki pɑɑ ɩsɔtʋ kɑkpɑsɩ nyəŋ
\q1 nɑ ɩsɔtʋ nɑɑtosompɔɣɔlɑɣɑ nyəŋ wei.
\q1 Ɩlɛ pə tɑɣɑ mɑ lɑŋhʋlʋmlɛ kɛ ɩ́ cɑɑkɩ nɑ ɩ́ lɑkɩ mpʋ.
\q1
\v 6 Hɑlɩ wɑɑtʋ wei ɩ́ tɔkɩ nɑ ɩ́ nyɔɔkɩ tɔ,
\q1 mə tɩ leleŋ kɛ ɩ́ pɛɛkəɣɩ.
\p
\v 7 Ɩsɔ kʋyɔɣɔtʋtʋ tɛləsəlɑɑ kɑ́ tɛmɑ Tɑcɑɑ kʋkpɑɑlətʋnɑɑ pɑnɛ pɑ nəɣəsəlɛ nɑʋ kɛ hɑtoo lɔŋtɑɑ. Wɑɑtʋ ɩnɩ ɩ tɑɑ Yosɑlɛm nɑ ɩ cɔlɔ ɑcɑlɛɛ wɛ hɛɛsʋɣʋ tɑɑ. Pəcɔ yəlɑɑ kɑ́ wɛ ilim ntɔɣɔŋ nɑ pə mpətəŋ tɛtʋ tɑɑ.
\p
\v 8-9 Ḿpʋɣʋ Pə tənɑ pə tʋ Tɑcɑɑ tɔɔsɑ-m nti ɩ kɑ yɔɣɔtʋɣʋ tɔ sɩ:
\q1 Ɩ́ təŋ tɑmpɑnɑ nɑ ɩ́ hʋʋkənɑ.
\q1 Ɩ́ lɑkɩ kʋpɑntʋ, ɩ́ hʋləɣɩ təmɑɣɑ suulu.
\q1
\v 10 Ɩ́ tɑɑ muɣuli suluwɑɑ, yɑɑ leelɑɑ,
\q1 yɑɑ mʋʋlɑɑ, yɑɑ kʋnyɔntʋnɑɑ.
\q1 Ɩ́ tɑɑ mɑɣɑsɩ ɩsɑɣɑtʋ kɛ mə təmɑ tɔɔ.
\p
\v 11 Amɑ yəlɑɑ mɛ ɩ́ kisɑ-tɩ. Ɩ́ təkɑ mə ŋkpɑŋŋ sɩ ɩ́ tɑɑ nɩɩ. 
\v 12 Ɩ́ lɑpɑ mə nyɑmɑ kɛ kpɩɩsəŋ ɩsɩɩ pɛɛ. Ɩ́ kisɑ Pə tənɑ pə tʋ Tɑcɑɑ mɑ́ mɑ kʋsɛɣɛsətʋ. Ntəɣɩ mɑ Feesuɣu heelɑ Ɩsɔ kʋyɔɣɔtʋtʋ tɛləsəlɑɑ, nɑ pɑ́ tɛləsɩ-mɛɣɛ too lɔŋtɑɑ ɩlɛnɑ ɩ́ kisi nɩɩʋ. Ḿpʋɣʋ mɑ pɑ́ɑ́nɑ́ huunɑ-mɛ. 
\v 13 Ɩlɛnɑ mɑ tɔ sɩ:
\q1 Timpi mɑ yɑɑ-mɛ nɑ ɩ́ kisi tɔ.
\q1 Pə tɔɔ kɛ́ mə yɑɑ-m sɩ mɑ́ wɑɑsɩ-mɛ nɑ mɑɑ kisi cɔʋ.
\q1
\v 14 Mɑɑ yɑsɩ-mɛɣɛ yəlɑɑ mpɑ ɩ́ tɑ nyɩ tɔ pɑ hɛkʋ.
\q1 Ɩ́ kɑ yele mə tɛtʋ kɛ kpɛtɛ.
\q1 Mə tɑɑ nɔɣɔlʋ ɩɩ puki,
\q1 pə́cɔ́ nɔɣɔlʋ ɩɩ kɔŋ.
\q1 Ɩ́ kʋ mə tɛtʋ nɑ mə niŋ nɑ tə́ pəsɩ tɛsəpɑɣɑ.
\c 8
\s1 Tɑcɑɑ sɩɩ ɩ yəlɑɑ kɛ nɔɣɔ kʋpɑŋkɑ
\p
\v 1 Ḿpʋɣʋ Pə tənɑ pə tʋ Tɑcɑɑ heelɑ-m sɩ:
\q1
\v 2 Mɑɣɑ Tɑcɑɑ mɑ luɣu sʋʋ Yosɑlɛm
\q1 nyə́mɑ kɛ teu nɑ mɑ́ səkɩ pɑ səm.
\q1 Nɑ mɑ tɑɑ kpɑɑkənɑ pɑ kolontunɑɑ.
\q1
\v 3 Pə tɔɔ kɛ́ mɑ yɔɣɔtɑɑ sɩ mɑɑ məlɩ Yosɑlɛm.
\q1 Mɑɑ tɑsɑ Siyɔŋ ɩcɑtɛ tɑɑ kɛ́ cɑɣɑʋ tɔtɔ.
\q1 Hɑlɩ mɑɑ yɑɑ Siyɔŋ sɩ tɑmpɑnɑ ɩcɑtɛ.
\q1 Mɑɑ lɑɣɑsɩ Siyɔŋ ɩcɑtɛ pulɑɣɑ sɩ nɑŋŋ nyəŋkɑ.
\q1
\v 4 Kʋkpɑtəlɑɑ kɑ́ nyəkɩ pɑ kpɑtəŋ tɔɔ
\q1 nɑ pɑ́ kɔɔ pɑ́ cɑɣɑ Yosɑlɛm tɑɑ.
\q1
\v 5 Yəlɑɑ kɑ́ tɑsɑ Yosɑlɛm tɑɑ kɛ məlʋɣʋ.
\q1 Piyɑ kɑ́ tɑsɑ lɩɩʋ kɛ tuutuumɑ nɑ pɑ́ liɣiliɣi
\q1 ɩcɑtɛ hɑpɛɛ tɔɔ.
\q1
\v 6 Ɩsɛɣɛlɩ yəlɑɑ kɑkɑɑsɑɣɑ ɩɩ hʋʋkɩ sɩ mpʋ ɩnɩ pə wɛ lɑpʋ.
\q1 Amɑ Pə tənɑ pə tʋ Tɑcɑɑ nɑ́ pəsəɣənɑ nɑ ɩ́ lɑ piti təmlɛ ńtɛ́.
\q1
\v 7 Mɑɑ wɑɑsɩ mɑ yəlɑɑ mpɑ mɛ pɑ kpɑwɑ yomle tɔ.
\q1 Ilim təlɩɩlɛ nɑ pə tətʋlɛ ɑcɑlɛɛ tɑɑ kɛ pɑ ponɑ-mɛ.
\q1
\v 8 Mɑɑ kɔnɑ-mɛɣɛ Yosɑlɛm nɑ ɩ́ wɛɛ mɑ yəlɑɑ.
\q1 Mɑɑ wɛɛ mə Ɩsɔ,
\q1 nɑ mɑ́ tɔkɩ mə tɔɔ kɛ́ kɑwulɑɣɑ nɑ siɣisuɣu.
\q1
\v 9 Ḿpʋɣʋ Pə tənɑ pə tʋ Tɑcɑɑ yɔɣɔtɑɑ sɩ:
\q1 Ɩ́ kɑɑsɩ mə tɩ.
\q1 Mpi tɔ, nɔɔnɔɔ ɩ́ nɩɩkɩ mɑ nɔɔsɩ nsi mɑɑ sɩɩwɑ tɔ.
\q1 Nsəɣɩ Ɩsɔ kʋyɔɣɔtʋtʋ tɛləsəlɑɑ kɑ kpɑɑlɑ wɑɑtʋ wei
\q1 pɑ tɑɣɑnɑ Ɩsɔ təsɛɛlɛ kite sɩɩʋ sɩ pɑ ŋmɑɑkɩ-tɛ tɔ.
\q1
\v 10 Nɑ pə́cɔ́ pə́ tɑkɩ wɑɑtʋ ɩnɩ tɔ,
\q1 yəlɑɑ yɑɑ tɔlɑ tɑɑ hikiɣi kʋfɛlʋɣʋ.
\q1 Pə́cɔ́ pɑ sʋʋkɩ pɑɑ lɩɩkɩ.
\q1 Mɑ yelɑ yəlɑɑ kɛ́ sɩ pɑ́ lɑkɩ təmɑɣɑ ɩsənɑ pɑ sɔɔlɑɑ tɔ.
\q1
\v 11 Amɑ pənɛntɛ mɑ heeliɣi-mɛ sɩ,
\q1 mɑ kɑɑ tɑsɑ mɛ mpɑ pə kɑɑsɑɑ
\q1 tɔɣɔ lɑpʋ ɩsɩɩ lɔŋtɑɑ nyə́mɑ.
\q1
\v 12 Mɑɑ lɑ-mɛɣɛ kʋpɑntʋ ntɩ tə tənɑ.
\q1 Tɛʋ kʋpɑŋkʋ kɑ́ nɩɩ.
\q1 Lɛsɛŋnɑɑ nɑ kʋtutuum kɑ́ lɑ teu nɑ ɩ́ hɛɛsɩ.
\q1
\v 13 Yutɑ nɑ Ɩsɛɣɛlɩ pɑ kɑwulɑsɩ mɛ.
\q1 Ɩ́ kɑ wɛ piitimnɑɑ lɛmpɑ hɛkʋ kɛ́ ɩsɩɩ mpusinɑɑ.
\q1 Amɑ pənɛntɛ mɑɑ wɑɑsɩ-mɛ.
\q1 Ɩ́ kɑ́ pəsɩ piitimnɑɑ mpi pɑ təŋsɑ nɔɔsɩ kʋpɑŋsɩ tɔ.
\q1 Ɩlɛ ɩ́ kɑɑsɩ mə tɩ, ɩ́ tɑɑ nyɑ́.
\q1
\v 14 Mɑɑ tʋ mɑ tɑɑ kɛ́ sɩ mɑ lɔɔkɩ-mɛɣɛ wɑhɑlɑ tɑɑ.
\q1 Mpi tɔ, mə cɑɑnɑɑ kɑ kpɑɑsɑ mɑ pɑ́ɑ́nɑ́ kɛ́,
\q1 nɑ mɑ́ tɔkɑ-yɛ.
\q1
\v 15 Amɑ nɔɔnɔɔ mɑ tʋ mɑ tɑɑ sɩ mɑɑ kɑtɩ
\q1 Yosɑlɛm nɑ Yutɑ nyə́mɑ mɛɣɛ kʋpɑntʋ.
\q1 Ɩlɛ ɩ́ tɑɑ nyɑ́.
\q1
\v 16 Ɩsənɑ ɩ́ kɑ́ lɑ tɔɣɔlɛ sɩ
\q1 pɑɑ wei ɩ́ heeli ɩ tɔɣɔntəlɛ kɛ tɑmpɑnɑ.
\q1 Ɩ́ təŋəɣɩ siɣisuɣu kɛ mə hʋʋlɛnɑɑ tɑɑ,
\q1 nɑ ɩ́ pɛɛkəɣɩ hɛɛsʋɣʋ.
\q1
\v 17 Ɩ́ tɑɑ lɑ təmɑɣɑ ɩsɑɣɑtʋ yɑɑ ɩ́ tuunɑ yem.
\q1 Mpi tɔ, Tɑcɑɑ mɑ́, mɑɑ cɑɑkɩ yɑɑsinɑɑ mpɛ pɑ tɑkɑ.
\s1 Nɔhɔkʋtʋ kʋyɛɛŋ pəsɑ ɑcimɑ nyəŋ
\p
\v 18 Ḿpʋɣʋ Pə tənɑ pə tʋ Tɑcɑɑ heelɑ-m sɩ, 
\v 19 mɑ́ tɛləsɩ-mɛ sɩ: Nɔhɔkʋtʋ nti ɩ́ hɔkəɣɩ ɩsɔtʋ liɣiti nyəŋ nɑ kɑkpɑsɩ nyəŋ nɑ nɑɑtosompɔɣɔlɑɣɑ nyəŋ nɑ nɑɑnʋwɑ nyəŋ kɛ pənɑɣɑ tɑɑ tɔ. Tɩɩ tɛ nɑ tə́ pəsɩ ɑcimɑ sɔsɔɔnɑ kɛ Yutɑ nyə́mɑ. Amɑ ɩ́ sɔɔlɩ siɣisuɣu nɑ hɛɛsʋɣʋ kɛ́. 
\v 20 Pə tənɑ pə tʋ Tɑcɑɑ yɔɣɔtɑɑ sɩ:
\q1 Piitimnɑɑ kpɑɩ nyə́mɑ nɑ ɑcɑlɛɛ pɑɣɑlɛ
\q1 yəlɑɑ kɑ́ tɑɣɑnɩ Yosɑlɛm kɛ kɔntɛ.
\q1
\v 21 Hɑlənɑ ɩcɑtɛ lɛntɛ yəlɑɑ heeli lɛntɛ nyə́mɑ sɩ:
\q1 Tə́ polo nɑ tə́ sɛɛ Pə tənɑ pə tʋ Tɑcɑɑ nɑ tə́ wiinɑ-ɩ.
\q1 Ɩlɛnɑ pɛlɛ pɑ́ tisi.
\q1
\v 22 Piitimnɑɑ toŋ nyəm
\q1 nɑ yəlɑɑ pɑɣɑlɛ kɑ́ kɔɔ
\q1 Yosɑlɛm nɑ pɑ́ sɛɛ-m nɑ pɑ́ wiinɑ-m.
\q1
\v 23 Mɑ heeliɣi-mɛ sɩ,
\q1 wɑɑtʋ ɩnəɣɩ piitimnɑɑ wɑɑnɩ wɑɑnɩ nɑɑnʋwɑ
\q1 yəlɑɑ kɑ́ kpɑ Yutɑ tʋ nɔɣɔlʋ ɩ toko tɑɑ sɩ:
\q1 Tə cɑɑ tə́ təŋ-mɛɣɛ ɩsɔsɛɛlɛ.
\q1 Mpi tɔ, tə nɩɩwɑ sɩ Ɩsɔ wɛ mə wɑɑlɩ.
\ms1 ƖSƐƔƐLƖ NYƎ́MA NA PIITIM LƐMPƖ NYƎ́MA
\c 9
\s1 Ɩsɔ hʋʋnɑʋ kɛ piitimnɑɑ lɛlɑɑ
\q1
\v 1 Tɑcɑɑ yɔɣɔtɑ ɩ tɔm
\q1 nɑ tə́ tɑlɑ Hɑtəlɑkɩ tɛtʋ tɑɑ.
\q1 Tə nɩɩ Tɑmɑsɩ ɩcɑtɛ tɑɑ.
\q1 Ɩlɛ pə tɑɣɑ Ɩsɛɣɛlɩ nyə́mɑ tike kɛ ɩ pɑɑsəɣənɑ.
\q1 Amɑ yəlɑɑ tənɑɣɑ.
\q1
\v 2 Tɑmɑsɩ ɩcɑtɛ cɔlɔ Hɑmɑtɩ ɩcɑtɛ,
\q1 nɑ Tiii nɑ Sitɔŋ ɑcɑlɛɛ nnɑ ɑ wɛnɑ
\q1 kpelikpekɑ sɔsɑɣɑ tɔɣɔ Tɑcɑɑ yɔɣɔtəɣənɑ.
\q1
\v 3 Tiii nyə́mɑ ɩ́ ŋmɑwɑ mə ɩcɑtɛ kɛ koluŋɑ kɛ́.
\q1 Ɩ́ kɑɑ liɣitee ɩsɩɩ kɑnyəŋɑ nɑ wʋlɑ ɩsɩɩ ɑfəlɑ.
\q1
\v 4 Amɑ Tɑcɑɑ kɑ́ lɛɛkɩ-tɛ.
\q1 Ɩ kɑ́ tusi tə koluŋɑ kɛ teŋku tɑɑ
\q1 nɑ ɩ́ nyɑɣɑsɩ-tɛɣɛ kɔkɔ.
\q1
\v 5 Filiisi ɑcɑlɛɛ Asəkɑlɔŋ, nɑ Kɑsɑ,
\q1 nɑ Ɩkoloŋ nyə́mɑ kɑ́ nɑ́ mpʋ.
\q1 Sɔɣɔntʋ kɑ́ kpɑ-wɛ nɑ pɑ́ kpisi kɑntəlʋɣʋ.
\q1 Wulɑʋ kɑɑ kɑɑsɩ Kɑsɑ.
\q1 Pəyele Asəkɑlɔŋ ɩcɑtɛ nɑ́ kɑɑ nɑ tə yəlɑɑ.
\q1
\v 6 Yəlɑɑ sitɑɑ kɛ́ nɑ pɑ́ kɔɔ pɑ́ cɑɣɑ Asətɔtɩ.
\q1 Mɑɑ ləsɩ mpi pə tʋɣɩ Filiisi nyə́mɑ kɛ kɑlɑmpɑɑnɩ tɔ.
\q1
\v 7 Mɑɑ ləsɩ mə nɔɔsɩ tɑɑ kɛ́
\q1 nɑntʋ nti pɑ tɑ lɛntɩ tɔ,
\q1 yɑɑ kʋlɑlɑɑtʋ.
\q1 Mə tɑɑ mpɑ pə kɑɑsɑɑ tɔ,
\q1 nɑ Yutɑ nyə́mɑ ɩ́ kɑ́ yɑɑnɑ-m mə Ɩsɔ.
\q1 Ɩkoloŋ nyə́mɑ kɑ́ sʋʋ mə yəlɑɑ tɑɑ ɩsɩɩ
\q1 Yepusi nyə́mɑ lɑpɑ tɔ.
\q1
\v 8 Mɑɑ tɑŋ Ɩsɛɣɛlɩ tɛtʋ kɛ́.
\q1 Yoolɑɑ nɑpəlɩ kɑɑ pəsɩ-tɩ,
\q1 pɑɑ tɛɛlɑɑ yɑɑ kɔntɑɑ.
\q1 Pə́cɔ́ ŋmɑkəllʋ kɑɑ tɑsɑ mə tɔɔ kɛ́ təŋnɑʋ.
\q1 Mpi tɔ, mɑ pɑɑsəɣənɑ-mɛɣɛ.
\s1 Yosɑlɛm wɑɑsʋɣʋ
\q1
\v 9 Ḿpʋɣʋ Tɑcɑɑ tɑsɑɑ sɩ:
\q1 Yosɑlɛm ɩcɑtɛ nyɑ́,
\q1 nyɑ́ lɑŋlɛ ɩ́ hʋlʋmɩ sɔsɔm.
\q1 Siyɔŋ nyə́mɑ mɛ,
\q1 mə wulɑʋ kɔŋnɑ ntɛɣɛ mə cɔlɔ.
\q1 Ɩ siɣisɑɑ nɑ ɩ kɛ́ ɑkɑ.
\q1 Ɩ pɑsɑ ɩ tɩ nɑ ɩ́ cɑɣɑ kpɑŋɑɣɑ tɔɔ.
\q1
\v 10 Mɑɑ ləsɩ Ɩfəlɑyim tɑɑ kɛ́ yoou kɛɛkɛnɑɑ
\q1 nɑ Yosɑlɛm tɑɑ kɛ́ pə kpɑɣɑnəŋ nɑ pə tɔɔŋ.
\q1 Wulɑʋ ɩnɩ ɩ kɑ́ tʋ piitimnɑɑ kɛ hɛɛsʋɣʋ.
\q1 Ɩ kɑ́ tɔɣɔ kɑwulɑɣɑ kɛ ɑntulinyɑ tənɑ təpɑɩ.
\s1 Sɑləkɑtʋnɑɑ hɛtʋɣʋ
\q1
\v 11 Ḿpʋɣʋ Tɑcɑɑ yɔɣɔtɑɑ sɩ:
\q1 Mɑɑ cɛ mə nyə́mɑ mpɑ pɑ təkɑ sɑləkɑ
\q1 kɛ lɔkɔ wei ɩ tɑɑ lʋm fɛɩ tɔ.
\q1 Mɑ́ nɑ mɛ tɑ́ nɔɣɔ pɛɛlʋɣʋ kɔtɑɣɑ
\q1 cɑləm tɔɔ kɛ́ mɑɑ lɑ mpʋ.
\q1
\v 12 Sɑləkɑtʋnɑɑ mɛ,
\q1 ɩ́ məlɩ koluŋɑ ɩcɑtɛ tɑɑ nɑ tɛɛlʋɣʋ.
\q1 Sɑŋɑ mɑ tɑsəɣɩ yɔɣɔtʋɣʋ sɩ
\q1 mɑɑ lɛɛtɩ-mɛɣɛ kʋpɑntʋ kɛ tɔm nɑɑlɛ.
\q1
\v 13 Mɑɑ pəsɩ Yutɑ kɛ tɔɔʋ,
\q1 nɑ Ɩfəlɑyim kɛ nyəmɑ́.
\q1 Mɑɑ kʋsɩ Siyɔŋ nyə́mɑ
\q1 nɑ pɑ́ yoonɑ Kəlɛɛkɩ nyə́mɑ
\q1 nɑ mɑ́ lɑ́ nɑ pɑ́ pəsɩ ɩsɩɩ ɑkɑ lɑɣɑtɛ.
\q1
\v 14 Tɑcɑɑ mɑ́ mɑɑ sɔɔsɩ mɑ yəlɑɑ tɔɔ.
\q1 Mɑɑ yɑɣɑ ɑpɑlʋtutuɣu ɩsɩɩ tɛʋ holɑ.
\q1 Mɑɑ tɔ nyəmɑ́ ɩsɩɩ tɛʋ ŋmɛləsʋɣʋ.
\q1 Mɑɑ hɔkɔ mə wɑɑlɩ ɩsɩɩ ilim mpətəŋ tɔɔ kɑcuculɑɣɑ.
\q1
\v 15 Pə tənɑ pə tʋ Tɑcɑɑ mɑ́ mɑɑ kenti mɑ yəlɑɑ tɔɔ.
\q1 Mɑɑ tɔ mə kolontunɑɑ kɛ pəntɔlʋpɛɛ nɑ mɑ́ wɑkəlɩ-wɛ.
\q1 Ɩsɛɣɛlɩ nyə́mɑ ɩ́ kɑ́ kʋ mə kolontunɑɑ.
\q1 Cɑləm kɑ́ kpe ɩsɩɩ sʋlʋm.
\q1 Yɑɑ ɩsɩɩ kɔtɑɣɑ təlɑtɛ cɑləm sukuɣu poosiisi,
\q1 nɑ pɑ́ ŋmɩɩsɩ tə ŋkuluŋɑsɩ tɔɔ tɔ.
\q1
\v 16 Wɑɑtʋ ɩnɩ ɩ tɑɑ kɛ́
\q1 Ɩsɔ Tɑcɑɑ kɑ́ wɑɑsɩ ɩ yəlɑɑ.
\q1 Ɩsɩɩ tiikilu wɑɑsʋɣʋ ɩ kɑləkʋ tɔ.
\q1 Ɩ́ kɑ́ teeki kɔkɔ ɩsɩɩ liɣitee pɛɛ.
\q1
\v 17 Mə tɛtʋ tɑɑ,
\q1 lɑŋhʋlʋmlɛ nɑ kɑcɔkɑ kɑ́ wɛɛ.
\q1 Tɔɣɔʋ nɑ nyɔɔʋ kɑ́ hɑ ɩfepiyɑ kɛ kpelikpekɑ.
\c 10
\s1 Ɩ́ sələmɩ Tɑcɑɑ kɛ tɛʋ
\q1
\v 1 Ɩ́ sələmɩ Tɑcɑɑ sɩ ɩ́ hɑ-mɛɣɛ tɛʋ kɛ toomɑɣɑ.
\q1 Ɩ kɑ́ yele nɑ kʋ nɩɩ-mɛɣɛ sɔsɔm
\q1 nɑ tɔɣɔnɑɣɑ nyɑlɑ tɑwɑ tɑɑ.
\q1
\v 2 Ɩ́ kʋɣɩ mə təɣɩ yem kɛ́ nɑ tɩɩŋ,
\q1 ɩ wɛ kpɛtɛ kɛ́.
\q1 Pə́cɔ́ tʋwɑɑ nɑɑ nɑɑkɩ mə pee.
\q1 Pɑ puɣusiɣi-mɛ nɑ pɔpɔtʋ toosee sɩ,
\q1 pɑ hɛɛsəɣɩ mə lɑŋɑ.
\q1 Ḿpʋɣʋ mə cɑɑnɑɑ lɑpɑ nɑ pə́ yɑsɩ-wɛ
\q1 ɩsɩɩ heeŋ wei ɩ fɛɩnɑ tiikilu tɔ.
\s1 Wɑɑsʋɣʋ tɔm yɔɣɔtʋɣʋ
\q1
\v 3 Pə tənɑ pə tʋ Tɑcɑɑ mɑ́,
\q1 mɑ mʋ pɑ́ɑ́nɑ́ nɑ kpɑɩ nyə́mɑ.
\q1 Mpɛ pɑ tiikiɣinɑ Ɩsɛɣɛlɩ nyə́mɑ nɑ mʋsʋŋ.
\q1 Mɑɑ səŋ pɑ tɔɔ.
\q1 Mɑɑ pɑɑsənɑ mɑ Yutɑ yəlɑɑ
\q1 nɑ mɑ́ tʋ-mɛɣɛ toŋ ɩsɩɩ mɑ yoou kpɑɣɑnəŋ.
\q1
\v 4 Mə tɑɑ kɛ́ ɑwulɑɑ kɑ́ lɩɩ wɑɑnɩ wɑɑnɩ.
\q1 Mə toŋ kɑ́ wɛɛ ɩsɩɩ kutuluɣu kite tɛɛ pəlɛ.
\q1 Ɩ́ səŋɑɑ kɛ́ təcɑ ɩsɩɩ lɑŋɑɣɑ tesikɑ,
\q1 nɑ ɩ́ wɛnɑ pəsʋɣʋ ɩsɩɩ yoou tɔɔʋ.
\q1
\v 5 Ɩ́ kɑ́ wɛɛ ɩsɩɩ yoou ɑkɑnɑɑ,
\q1 nɑ ɩ́ fɛləɣɩ mə kolontunɑɑ kɛ ɑtɛ.
\q1 Ḿpʋɣʋ ɩ́ kɑ́ yoo.
\q1 Mpi tɔ, Tɑcɑɑ mɑ́,
\q1 mɑɑ wɛɛ mə wɑɑlɩ kɛ́.
\q1 Fɛɛlɛ kɑ́ kpɑ mə kolontunɑɑ kpɑɣɑnəŋ cɑɣɑlɑɑ.
\q1
\v 6 Mɑɑ yele nɑ Yutɑ nyə́mɑ nyɔɔ toŋ.
\q1 Mɑɑ wɑɑsɩ Yosɛɛfʋ təyɑɣɑ nyə́mɑ.
\q1 Mɑɑ məŋnɑ-mɛɣɛ mə tɛtʋ tɑɑ ɩsɩɩ mɑ tɑɑ lɔ-mɛ.
\q1 Mpi tɔ, mɑɣɑlɛ mə Ɩsɔ,
\q1 mɑ wɛnɑ mə pətɔɔtəlɛ kɛ́, mɑɑ cɔ-mɛ.
\q1
\v 7 Ɩsɛɣɛlɩ nyə́mɑ kɑ́ pəsɩ ɑkɑnɑɑ kɛ́.
\q1 Mə lɑŋɑ kɑ́ hʋlʋmɩ ɩsɩɩ ɩ́ nyɔɔ sʋlʋm.
\q1 Mə piyɑ kɑ́ nɑ mə ɑkɑɩtʋ ntɩ.
\q1 Ɩlɛnɑ pɛlɛ pɑ tɑɑ hɛɛnɑ Tɑcɑɑ.
\q1
\v 8 Mɑɑ yɑɑ mɑ yəlɑɑ mɛ nɑ mɑ́ hɛtɩ-mɛ nɑ mɑ́ kpeɣeli-mɛ.
\q1 Ɩ́ kɑ́ huki ɩsɩɩ pɑ hukɑɣɑ lɔŋ tɔ.
\q1
\v 9 Mpi tɔ, mɑɑ ŋmɩɩsɩ-mɛɣɛ piitimnɑɑ tɑɑ.
\q1 Amɑ ɩ́ kɑ́ tɔɔsɩ mɑ tɔɔ kɛ́ pooluŋ tɑɑ tənɑ.
\q1 Mənɑ mə pəyɑlɑɑ ɩ́ kɑ́ cɑɣɑ tənɑ.
\q1 Ɩlɛnɑ ɩ́ tɑɣɑnɩ məlʋɣʋ.
\q1
\v 10 Mɑɑ ləsɩ-mɛɣɛ Icipiti nɑ Asilii pɑ tɛtʋnɑɑ tɑɑ.
\q1 Mɑɑ məŋnɑ-mɛɣɛ mə tɛ nɑ mɑ́ sɔɔsɩ-mɛɣɛ Kɑlɑɑtɩ
\q1 nɑ Lipɑŋ tɛtʋ.
\q1 Pɑɑ nɑ mpʋ tɔ, təcɑɣɑlɛ kɑɑ tɑlɑ-mɛ.
\q1
\v 11 Pɑɑ lɑŋwɑkəllɛ mɑɣɑnɑ-mɛ ɩsɩɩ teŋku.
\q1 Mɑɑ cɛ mə holɑ nɑ hɑlɩ Nili pɔɣɔ pəle mɑɣɑmɑɣɑ wʋlɩ.
\q1 Kɑlɑmpɑɑnɩ tʋ Asilii kɑ́ hoti ɩsɩɩ tɑɑʋ.
\q1 Icipiti ɩ́lɛ́ ɩ toŋ kɑ́ yɔkɩ.
\q1
\v 12 Mɑɑ yele nɑ Ɩsɛɣɛlɩ nyə́mɑ nyɔɔ toŋ.
\q1 Ɩ́ kɑ́ nɩɩnɑ-m nɑ ɩ́ tɔkɩ mɑ kiiŋ.
\q1 Tɑcɑɑ mɑ́, mɑ yɔɣɔtəɣənɑ mpʋ.
\c 11
\s1 Piitimnɑɑ toŋ nyəm yoonɑʋ
\q1
\v 1 Lipɑŋ tɛtʋ tʋlɩ nyɑ́ nɔnɔɔsɩ
\q1 nɑ kɔkɔ nyɑɣɑ nyɑ́ tɩɩŋ sɔsɔɔŋ.
\q1
\v 2 Tɩɩŋ mɛ, ɩ́ wii, pɑ hɛɛlɑ mə tɩɩŋ kʋpɑŋ lɛləŋ.
\q1 Pɑsɑŋ tɩɩŋ sɔsɔɔŋ mɛ, mɩɩ wii,
\q1 pɑ hɛɛlɑ mə hɔtʋɣʋ ɑnɑɑm.
\q1
\v 3 Tiikilɑɑ nyʋɣʋ kʋlʋɣʋ wɑɑtʋ tɛɛwɑ,
\q1 ɩlɛnɑ pɑ́ wiiki.
\q1 Pɑ hɛɛlɑ tɔɣɔlɑsɩ hɔtʋ kʋpɑntʋ
\q1 ɩlɛnɑ səlɛ sɩ wiliɣi nɑ sɩ́ mɑləɣɩ Yɑɑtɑnɩ pɔɣɔ.
\s1 Tiikilɑɑ nɑɑlɛ tɔm
\p
\v 4 Ḿpʋɣʋ kʋyɑkʋ nɑkʋlɩ mɑ Ɩsɔ Tɑcɑɑ tɔmɑ-m sɩ: Pəsɩ heeŋ wei pɑ puki kʋɣʋ tɔ ɩ tiikilu. 
\v 5 Ɩ yɑtɑɑ nɑ́ lɛntəɣɩ-ɩ kɛ́ pɑɑ nɑɑkɩ pɑ tɑsəkəlɛ. Pə kɑɑsɩ nɑ ɩ pɛɛtəlɑɑ nɑ́ɑ́ woŋiɣi nɑ pɑ́ sɑŋ Ɩsɔ sɩ pɑ sʋʋ toŋ. Heeŋ mɑɣɑmɑɣɑ tiikilɑɑ nɑ́ fɛɩ ɩ pətɔɔtəlɛ. 
\v 6 Tɑcɑɑ yɔɣɔtənɑ sɩ: Mɑ kɑɑ wɛɛnɑ ɑtɛ yəlɑɑ pətɔɔtəlɛ. Mɑɑ tʋ pɑɑ wei kɛ́ ɩ wulɑʋ yɑɑ ɩ cɔlɔ tʋ niŋ tɑɑ. Awulɑɑ kɑ́ kpiisi tɛtʋ, mɑ kɑɑ fiti nɔɣɔlʋɣʋ pɑ niŋ tɑɑ.
\p
\v 7 Ḿpʋɣʋ Sɑkɑlɩ tɔmɑ sɩ: Mɑ́ pəsənɑ ntɛɣɛ tiikilu wei ɩ heeŋ yɑmpɑɣɑtəlɑɑ yɑkɩ nɑ pɑ́ kʋɣɩ tɔ. Mɑɑ cɑɑ kpɑtəŋ kɛ nɑɑlɛ nɑ mɑ́ hɑ lɛŋkʋ sɩ: Sɔɔlʋɣʋ. Ɩlɛnɑ lɛŋkʋ sɩ: Nɔɣɔ kʋlʋmɑɣɑ. Mɑɑ pɑɑsənɑ mɑ heeŋ. 
\v 8 Ɩsɔtʋ kʋlʋm tɑɑ kɛ́ mɑ yɑsɑ tiikilɑɑ tooso. Mɑ suulu tɛmɑ mɑ heeŋ tɔɔ, nɑ ɩ́lɛ́ ɩ́ nyəɣəsɩ-m. 
\v 9 Ɩlɛnɑ mɑ tɔmɩ-ɩ sɩ: Mɑ kɑɑ tɑsɑ-mɛɣɛ pɑɑsənɑʋ nɑ pə́ tɑɑŋɩ. Ɩlɛ mpɑ pɛlɛ pɑ cɑɑkɩ səm tɔ pɑ́ sɩ. Pɑ́ kʋ mpɑ pə wɛɛ sɩ pɑ́ kʋ tɔ. Ye pə kɑɑsɑ mpɑ ɩlɛ pɛlɛ pɑ li təmɑ.
\p
\v 10 Ɩlɛnɑ mɑ́ kpɑɣɑ kpɑ́tʋɣʋ ŋku pɑ yɑɑ sɩ Sɔɔlʋɣʋ tɔ nɑ mɑ́ pɛlɩ-kʋ. Ɩlɛnɑ mɑ́ yɔkɩ nɔɣɔ ŋkɑ mɑ́ nɑ piitimnɑɑ tɩɩ pɛɛlɑɑ tɔ. 
\v 11 Mɑ nɑ-mɛ tɑ́ nɔɣɔ pɛɛlʋɣʋ yɔkɑɑ. Ɩlɛnɑ heeŋ pɑɣɑtəlɑɑ mpɑ pɑ keŋnɑ-m tɔ pɑ́ cɛkənɑ sɩ Tɑcɑɑ nɔɣɔ wɛ pə tɑɑ. 
\v 12 Ɩlɛnɑ mɑ́ heeli-wɛ sɩ: Ye pə mɑɣɑ-mɛ ɩ́ fɛlɩ-m liɣitee, ye pə tɑɣɑ mpʋ ɑwusɑ. Ntɛnɑ pɑ́ mɑɣɑsɩ-yɛɣɛ nyəɣətʋ hiu nɑ nɑɑnʋwɑ. 
\v 13 Ḿpʋɣʋ Tɑcɑɑ tɔmɑ-m sɩ: Pɛtɩ liɣitee sɔsɔɔnɑ nnɑ pɑ mɑɣɑsənɑ-m mpʋ tɔɣɔ koolu. Ɩlɛnɑ mɑ́ pɛtɩ-yɛɣɛ koolu kɛ Ɩsɔ təsɛɛlɛ tɑɑ. 
\v 14 Pəlɛ pə wɑɑlɩ, ɩlɛnɑ mɑ́ pɛlɩ mɑ kpɑ́tʋɣʋ ŋku pɑ yɑɑ sɩ Nɔɣɔ kʋlʋmɑɣɑ tɔ. Ɩlɛnɑ pə́ yɑsɩ Ɩsɛɣɛlɩ nɑ Yutɑ. 
\v 15 Ḿpʋɣʋ Tɑcɑɑ tɑsɑ-m heeluɣu sɩ: Pəsɩ tiikilu kʋmɛlɛŋ. 
\v 16 Pəlɛ pə pɑɑsi mɑɑ ponɑ-mɛɣɛ tiikilu kʋfɑlʋ. Ɩ́lɛ́ ɩ kɑɑ pɑɑsənɑ heeŋ, hɑlɩ ɩ kɑ́ pɛɛkɩ ɩ kʋɣʋ kɛ́. Ɩ kɑɑ pɛɛkɩ kʋlepiŋ, yɑɑ ɩ́ fɛ wei pə wɩɩkɩ tɔ. Yɑɑ ɩ́ pɑɑsənɑ ɑlɑɑfəyɑ nyəŋ. Hɑlɩ ɩ kɑ́ tɔɣɔ ɩ tɑɑ kʋyɑsələŋ. Ɩ kɑ́ sɛtɩ lɛləŋ ɑcʋwɑ sɩ ɩ́ tɑɑ tɔ.
\q1
\v 17 Tiikilu kʋmɛlɛŋ nyɑ́ wei nn pɑɑsəɣənɑ heeŋ tɔ,
\q1 nyɑ́ tɔm wɛ wɑɩyo kɛ́.
\q1 Yoou ɩ́ pɛlɩ nyɑ́ niŋ
\q1 nɑ kʋ yɔkɩ nyɑ́ ɩsəlɛ ntɔɣɔŋ nyəntɛ.
\q1 Pə́ lɑ-ŋ ɩsəkpʋlʋɣʋ,
\q1 nyɑ́ ŋkpɑləŋɑ ɩ́ kpɛkɩ.
\c 12
\s1 Yosɑlɛm wɑɑsʋɣʋ
\p
\v 1 Ɩsɛɣɛlɩ tɔm nti Tɑcɑɑ yɔɣɔtɑɑ tɔɣɔlɛ sɩ: Mɑ́ sɩɩnɑ ɑtɛ nɑ ɩsɔtɑɑ. Mɑ́ tʋnɑ yʋlʋ kɛ weesuɣu. 
\v 2 Mɑɑ pəsɩ Yosɑlɛm ɩsɩɩ sʋlʋm ɑtiŋkpɑ. Pəcɔlɔ piitimnɑɑ mɛ ɩ́ kɑ́ nyɔɔ nɑ pə́ cɔɔ mə ɩsɛntɑɑ. Kolontunɑɑ kɑ́ tɑ Yosɑlɛm nɑ Yutɑ tɛtʋ tənɑ. 
\v 3 Wɑɑtʋ ɩnɩ ɩ tɑɑ kɛ́ mɑɑ pəsɩ Yosɑlɛm ɩsɩɩ pɩɩʋ, nɑ mpɑ pɑɑ kuli-kʋ tɔ pɩɩ kʋ-wɛ. Antulinyɑ piitimnɑɑ tənɑ kɑ́ pɛɛkɩ sɩ pɑ́ seki-kʋ. Pɑɑ kpeɣeli nɑ pɑ́ kɔɔ ɩcɑtɛ kɛ yoonɑʋ. 
\v 4 Pəlɛɣɛlɛ mɑɑ yele nɑ sɔɣɔntʋ kpɑ pɑ kpɑɣɑnəŋ. Ɩ kɑ́ seliɣi ɩsɩɩ sʋlʋm kʋɣʋ-ɩ, nɑ ɩ cɑɣɑlɑɑ nɑ́ɑ́ sʋʋ kpɑŋʋɣʋ. Mɑɑ feŋ Yutɑ nyə́mɑ mɛ mə tɔɔ. Pʋlʋ ɩ́ tɑɑ tokinɑ-mɛ. Ɩlɛnɑ mɑ yʋlʋsɩ piitimnɑɑ tənɑ kpɑɣɑnəŋ ɩsɛ, nɑ ɩ́ tutiɣi yem. 
\v 5 Hɑlɩ Yutɑ nyʋɣʋ nyə́mɑ kɑ́ tɔ sɩ: Pə tənɑ pə tʋ Tɑcɑɑ kiŋ kɛ Yosɑlɛm yəlɑɑ hikiɣinɑ toŋ. 
\v 6 Ɩlɛnɑ mɑɑ yele nɑ ɩ́ yoonɑ piitimnɑɑ mpɑ pɑ cɔɔnɑ-mɛ tɔɣɔ cemɑce. Nɑ ɩ́ kəlɩ-wɛ ɩsɩɩ kɔkɔ mʋkʋɣʋ hɔtʋɣʋ tɔ, yɑɑ ɩsɩɩ kɔkɔ mʋkʋɣʋ cɑmhuɣule tɔ. Amɑ pʋlʋ kɑɑ tokinɑ Yosɑlɛm yəlɑɑ.
\p
\v 7 Tɑcɑɑ kɑ́ kɔɔ nɑ ɩ́ wɑɑsɩ Yutɑ nyə́mɑ. Ɩlɛ Tɑfiiti lʋlʋɣʋ nyə́mɑ nɑ Yosɑlɛm nyə́mɑ ɩ́ kɑɑ hʋʋ sɩ ɩ́ tɛɛ Yutɑ nyə́mɑ lɛlɑɑ. 
\v 8 Wɑɑtʋ ɩnɩ ɩ tɑɑ kɛ́ Tɑcɑɑ kɑ́ kenti Yosɑlɛm nyə́mɑ tɔɔ. Ɩlɛnɑ mə tɑɑ ɑcɑmɑɑ pəsɩ toŋtunɑɑ ɩsɩɩ Tɑfiiti. Ɩlɛnɑ Tɑfiiti lʋlʋɣʋ nyə́mɑ nɑ́ɑ́ pəsɩ-mɛ ɩsɩɩ Ɩsɔ. Yɑɑ Tɑcɑɑ ɩsɔtɑɑ tillu wei ɩ tɔŋ mə nɔɣɔ tɔɔ tɔ.
\s1 Pɑ cɑɣɑ ləyɑɣɑ kɛ tɛtʋ tənɑ tɑɑ
\p
\v 9 Ḿpʋɣʋ Tɑcɑɑ yɔɣɔtɑɑ sɩ: Wɑɑtʋ ɩnɩ ɩ tɑɑ kɛ́ mɑɑ kʋ piitimnɑɑ tənɑ mpɑ pɑ kɔŋ Yosɑlɛm kɛ yoonɑʋ tɔ. 
\v 10 Mɑɑ tʋ Tɑfiiti lʋlʋɣʋ nyə́mɑ nɑ Yosɑlɛm nyə́mɑ mɛɣɛ luɣu kʋlʋmʋɣʋ nɑ sələmʋɣʋ ləmɑɣɑsəlɛ. Ɩlɛnɑ ɩ́ kɛɛsənɑ mɑ wei pɑɑ tʋlɑ pɔ́ɔ́ŋ kɛ mʋsʋŋ tɔ mɑ tɔɔ. Ɩ́ kɑ́ cɑɣɑ ləyɑɣɑ ɩsɩɩ pɑ cɑkʋɣʋ pəyɑɣɑ ɩkpɑmlɛ ləyɑɣɑ tɔ. Ɩ́ kɑ́ wii-m ɩsɩɩ ɩ́ səkɩ ɩ́ səkɩ, ɩsɩɩ kɑncɑɑlɑɣɑ pəyɑɣɑ. 
\v 11 Wɑɑtʋ ɩnɩ ɩ tɑɑ, Yosɑlɛm tɑɑ ləyɑɣɑ kɑ́ tɔɔ kɛ́. Kɑɑ wɛɛ ɩsɩɩ Mekito tɛtɛkəlɛ tɑɑ Hɑtɑtɩ-Limɔŋ nyəŋkɑ. 
\v 12-14 Pɑɑ lʋlʋɣʋ ŋku kʋ tike kɩɩ cɑɣɑnɑ kʋ ləyɑɣɑ. Pɑɑ Tɑfiiti lʋlʋɣʋ, pɑɑ Nɑtɑŋ nyəŋkʋ, pɑɑ Lefii nyəŋkʋ, pɑɑ Simeyi nyəŋkʋ, nɑ pə́ polo lʋlʋŋ lɛləŋ kɛ mpʋ. Pɑɑ lʋlʋɣʋ ŋku kʋ ɑpɑlɑɑ nɑ ɑlɑɑ pɑɑ cɑɣɑ mpɑɑ mpɑɑ kɛ́.
\c 13
\p
\v 1 Ḿpʋɣʋ Tɑcɑɑ yɔɣɔtɑɑ sɩ: Wɑɑtʋ ɩnɩ ɩ tɑɑ kɛ́ sɛɛlʋ nɔɣɔlʋ ɩ kɑ́ tʋlɩ. Ɩ kɑ́ nyɑɑlɩ Tɑfiiti lʋlʋɣʋ nyə́mɑ nɑ Yosɑlɛm nyə́mɑ mɛ mə ɩsɑɣɑtʋ.
\s1 Ɩsɔ kɑ́ kpiisi tɩɩŋ nɑ Ɩsɔ kʋyɔɣɔtʋtʋ tɛləsəlɑɑ kʋcɛsɑɑ
\p
\v 2 Ɩlɛnɑ Pə tənɑ pə tʋ tɑsɑ yɔɣɔtʋɣʋ sɩ: Wɑɑtʋ ɩnɩ ɩ tɑɑ kɛ́ mɑɑ kpiisi tɛtʋ tənɑ tɑɑ tɩɩŋ tənɑ, nɑ ɩ kɔtəlɑɑ. Nɔɣɔlʋ kɑɑ tɑsɑ ɩ hətɛ yɑɑʋ. Mɑɑ ləsɩ lɑɑtʋ kʋnyɩɩlʋɣʋ kɛ mə tɑɑ. 
\v 3 Hɑlənɑ ye pə cəpɑ mə tɑɑ wei nɑ ɩ́ yɔɣɔtɩ pɔpɔtʋ tɔm nɑtəlɩ, ɩ cɑɑ nɑ ɩ too pɑɑ tɔmɩ-ɩ sɩ: Timpi n looliɣinɑ Ɩsɔ Tɔm tɔ, ɩsɩɩ ń səpɑ. Pɑ mɑɣɑmɑɣɑ pɑɑ tɩɩ kʋnɑ-ŋ pə təlɑtɛ. 
\v 4 Wɑɑtʋ ɩnɩ ɩ tɑɑ Ɩsɔ kʋyɔɣɔtʋtʋ tɛləsəlɑɑ kɑ́ wɛɛnɑ pɑ tɔm kpɑɑlʋɣʋ, nɑ pɑ toosee heeluɣu fɛɛlɛ. Hɑlɩ pɑ kɑɑ tɩɩ suu pɑ təmlɛ tokonɑɑ mpɑ pɑ puɣusiɣinɑ yəlɑɑ tɔ. 
\v 5 Pɑɑ wei ɩ kɑ́ tɔ sɩ: Mɑ kɛ́ hɑ́tʋ kɛ́, mɑ tɑ kɛ Ɩsɔ kʋyɔɣɔtʋtʋ tɛləsʋlʋ. Hɑtoo mɑ pəcɑɑtʋ kɛ mɑ wɛnɑ tɑwɑ nɑ mɑ́ hɑləɣɩ. 
\v 6 Ye pɑ pɔɔsɑ-ɩ sɩ: Pepe kʋnɑ-ŋ nyɑ́ lɑŋlɛ tɑɑ kɛ́ ɩsəntɔ? Ɩlɛ ɩ cɔ sɩ: Mɑ nɑ mɑ cɑmnɑnɑɑ kɛ́, nɑ pə́ kʋ-m mpʋ.
\s1 Tɑcɑɑ sɛɛʋ
\p
\v 7 Ḿpʋɣʋ Pə tənɑ pə tʋ Tɑcɑɑ tɔmɑ sɩ:
\q1 Lɑɣɑtɛ nyɑ́, kʋ mɑ sənlʋ wei ɩ kɛ́ tiikilu tɔ,
\q1 nɑ heeŋ yɑ yem yem.
\q1 Ɩlɛnɑ mɑ́ kʋlɩ ɩwɛɛsɩ tɔɔ.
\p
\v 8 Tɛtʋ heeŋ hɔɣɔləŋ nɑɑlɛ kɑ́ sɩ nɑ pə́ kɑɑsɩ kʋlʋmʋɣʋ tike. 
\v 9 Mɑɑ tɑɣɑnɩ kʋkɑɑsɑɑ mɛ ɩsɩɩ pɑ wɔkʋɣʋ wʋlɑ nɑ liɣitee nyəɣətʋ kɛ kɔkɔ nɑ pə́ nyɑɑlɩ-tɩ tɔ. Ɩlɛnɑ ɩ́ sələmɩ-m nɑ mɑ́ mʋ, nɑ mɑ́ yɑɑ-mɛɣɛ mɑ yəlɑɑ. Ɩlɛnɑ mɩɩ yɔɣɔtəɣɩ sɩ: Tɑcɑɑ kɛlɛ Ɩsɔ.
\c 14
\s1 Tɑcɑɑ kʋyɑkʋ
\p
\v 1 Tɑcɑɑ pɑ́ɑ́nɑ́ kʋyɑkʋ kpɛɣɛtənɑ ntɔ. Yosɑlɛm nyə́mɑ mɛ, pɑɑ tɑlɑ mə kʋpɑm nɑ ɩ́ nyənəɣɩ.
\q1
\v 2 Tɑmpɑnɑ tɔɔ,
\q1 Tɑcɑɑ kɑ́ kpeɣeli piitimnɑɑ.
\q1 Pɑɑ kʋlɩ Yosɑlɛm tɔɔ nɑ pɑ́ lɛɛkɩ-tɛ.
\q1 Pɑɑ kuu tɛɛsɩ tɑɑ wontu, nɑ pɑ́ kpi ɑlɑɑ.
\q1 Pɑɑ kuu yəlɑɑ hɔɣɔlʋɣʋ nɑ pɑ́ tɛɛnɑ.
\q1 Amɑ pɩɩ yele kʋkɑɑsɑɑ kɛ ɩcɑtɛ tɑɑ.
\q1
\v 3 Pə wɑɑlɩ kɛ́ Tɑcɑɑ kɑ́ yoonɑ piitimnɑɑ mɛ,
\q1 ɩsɩɩ too ɩ tɩɩ lɑkʋɣʋ yoou wɑɑtʋ tɑɑ tɔ.
\q1
\v 4 Wɑɑtʋ ɩnəɣɩ ɩ kɑ́ tənɩ ɩ nɔɔhəlɛ kɛ
\q1 Olifinɑɑ pulɑɣɑ tɔɔ kɛ́ Yosɑlɛm kiŋ kɛ ilim təlɩɩlɛ tɔɔ.
\q1 Pulɑɣɑ kɑ́ fɑɣɑ nɑ kɑ́ təŋ ilim.
\q1 Ɩlɛnɑ hɔɣɔlʋɣʋ lɛŋkʋ nɑ́ɑ́ məŋnɑ
\q1 ilim mpətəŋ nɑ lɛŋkʋ nɑ pə ntɔɣɔŋ.
\q1
\v 5 Pulɑɣɑ tɛtɛkəlɛ ńtɛ́ tɩɩ wɛɛ ḿpʋɣʋ hɑlənɑ Asɑɑlɩ ɩcɑtɛ.
\q1 Ntɛɣɛ ɩ́ kɑ́ təŋ nɑ ɩ́ se,
\q1 ɩsɩɩ mə lɔŋcɛnɑɑ kɑ lɑpʋ pənɑɣɑ ŋkɑ
\q1 tɛtʋ selɑ Yutɑ wulɑʋ Osiyɑsɩ pɔɔlɛ tɑɑ tɔ.
\q1 Wɑɑtʋ ɩnəɣɩ Tɑcɑɑ Ɩsɔ nɑ ɩsɔtɑɑ tillɑɑ pɑɑ tɑlɑ. \f ɑ \fr 14:5 \fr*\fk Asɑɑlɩ ɩcɑtɛ: \fk*\ft Lonte tənɛ ɩnɩ tə tɑ nyɩ sɩ ɩcɑtɛ yɑɑ pɔɣɔ yɑɑ pepe hətɛ. Amɑ\ft*\f* pə nəɣəsənɑ kɛ́ ɩsɩɩ ɩcɑtɛ hətɛ. Ɩlɛ tɑ́ tʋ Ləkpɑ tɑɑ sɩ ɩcɑtɛ.
\q1
\v 6-7 Pə kpɑɣɑʋ wɑɑtʋ ɩnɩ tɔ,
\q1 pə fɛɩ sɩ ilim ntɔ ɑhoo ntɔ.
\q1 Səkpɛtʋɣʋ kɑ́ mʋkɩ kɛ́ nɑ nyɑɑləm wɛɛ tɑm tɔɔ.
\q1 Tɑcɑɑ tike nyəmnɑ kʋyɑkʋ ŋkʋ.
\q1
\v 8 Wɑɑtʋ ɩnɩ ɩ tɑɑ sɛɛlʋ kɑ́ lɩɩ Yosɑlɛm
\q1 nɑ ɩ lʋm lɛmpɩ kpeŋ Teŋku Kʋsəpʋ tɑɑ,
\q1 nɑ lɛmpɩ kɛ Metitelɑnee Teŋku tɑɑ.
\q1 Pɩɩ kpe ḿpʋɣʋ tɑm kɛ́,
\q1 pɑɑ lʋŋlɛ pɑɑ yolumɑ.
\q1
\v 9 Tɑcɑɑ tike kɑ́ tɔɣɔnɑ kɑwulɑɣɑ kɛ tɛtʋ tənɑ tɑɑ.
\q1 Nyɑ́ tike təkoŋ kɛ́ yəlɑɑ tənɑ kɑ́ nyɩ nɑ pɑ́ sɛɛkɩ-ŋ.
\q1
\v 10 Pə cɔɔnɑʋ Yosɑlɛm tɔ pɩɩ pəsɩ ɩsɩɩ tɛtɛkəlɛ.
\q1 Pə kpɑɣɑʋ Kepɑ ɩcɑtɛ kɛ ilim ntɔɣɔŋ tɔɔ tɔ,
\q1 nɑ pə́ polo pə mpətəŋ tɔɔ kɛ Limɔŋ ɩcɑtɛ tɔ.
\q1 Yosɑlɛm kɑ́ kəlɩ ɩ cɔlɔ ɑcɑlɛɛ kɛ kʋŋkʋlʋməŋ.
\q1 Ɩcɑtɛ wɑŋ kɑ́ kpɑɣɑ Pɛncɑmɛɛ nɔnɔɣɔ,
\q1 hɑlənɑ nɔnɔɣɔ kʋpənɑɣɑ kɛ ŋkuluŋɑ tɑɑ.
\q1 Ɩlɛnɑ pə́ polo Hɑnɑneyɛɛlɩ kutuluɣu sɔsɔɔʋ.
\q1 Hɑlənɑ wulɑʋ lɛsɛŋ tənyɑɑsəlɛ.
\q1 Ɩlɛnɑ tɛtɛkəlɛ nɑ́ɑ́ kpɑɣɑ Kipeyɑ nɑ tə́ polo Limɔŋ.
\q1
\v 11 Ɩ́ kɑ́ cɑɣɑ tə tɑɑ təpɑmm,
\q1 nɔɣɔlʋ kɑɑ nyɑɑsɩ-tɛ nɑ yɔkʋɣʋ.
\q1
\v 12 Ye pə kɑɑsɑ piitimnɑɑ mpɑ mɛ
\q1 ɩ polɑ Yosɑlɛm kɛ yoonɑʋ tɔ.
\q1 Mpi mpi Tɑcɑɑ kɑ́ lɑ-mɛ tɔɣɔlɔ.
\q1 Mə nɑntʋ kɑ́ tɑsənɑ mə ɩsɛ.
\q1 Mə ɩsəpee kɑ́ tɑsɑ ɑ pɔɣɔləŋ tɑɑ.
\q1 Mə nsəmɑ kɑ́ tɑsɑ mə nɔɔsɩ tɑɑ.
\q1
\v 13 Wɑɑtʋ ɩnɩ ɩ tɑɑ kɛ́ Tɑcɑɑ
\q1 kɑ́ yele nɑ sɔɣɔntʋ ɑnɑɑm kpɑ-mɛ,
\q1 nɑ ɩ́ kʋlɩ təmɑ tɔɔ.
\q1
\v 14 Yutɑ nyə́mɑ kɑ́ yoonɑ Yosɑlɛm nɔɣɔ,
\q1 pɑɑ lɛɛkɩ piitimnɑɑ lɛmpɑ wɛnɑʋ.
\q1 Pə kpɑɣɑʋ wʋlɑ, nɑ liɣitee nyəɣətʋ tɔ,
\q1 nɑ wontu kɛ tuutuumɑ.
\q1
\v 15 Kʋtɔŋ ŋku kʋ kpɑɑ kolontunɑɑ tɔ,
\q1 kɩɩ kpɑ pɑ tɔlɑ kɛ teitei kɛ́ ḿpʋɣʋ.
\q1
\v 16 Wɑɑtʋ ɩnɩ ɩ tɑɑ kɛ́ Yosɑlɛm
\q1 kolontunɑɑ kɑkɑɑsɑɣɑ kɑ́ puki Yosɑlɛm tɑɑ kɛ́
\q1 pɑɑ pənɑɣɑ ŋkɑɣɑ Pə tənɑ pə tʋ Tɑcɑɑ wulɑʋ kɛ sɛɛʋ.
\q1 Ɩ́ kɑ́ tɔkɩ cokɑ ɑcimɑ.
\q1
\v 17 Ye tɛtʋ yəlɑɑ mpɑ pɑ tɑ polo
\q1 Yosɑlɛm kɛ Tɑcɑɑ sɛɛʋ,
\q1 tɛʋ kɑɑ nɩɩ pɛlɛ pɑ tɛ.
\q1
\v 18 Ye Icipiti nyə́mɑ mɛ ɩ́ kisɑ Yosɑlɛm
\q1 kɛ pote sɩ ɩ́ tɔɣɔ cokɑ ɑcimɑ,
\q1 wɑhɑlɑnɑɑ kɑ́ mɑɣɑnɑ-mɛ ɩsɩɩ piitimnɑɑ
\q1 lɛmpɑ mpɑ pɑɑ puki ɑcimɑ ɑnɩ tɔ.
\q1
\v 19 Ḿpʋɣʋ pɩɩ hɔnɑ mə nɑ piitimnɑɑ mpɑ
\q1 pɑɑ kisi ɑcimɑ ɑnɩ ɑ tɔɣɔʋ tɔ mə ŋkpɑŋŋ.
\q1
\v 20 Wɑɑtʋ ɩnɩ ɩ tɑɑ, pɑɑ ŋmɑɑ nɑ pɑ́ kpɛŋnɑ
\q1 kpɑɣɑnəŋ luuŋ tɛɛ kɑŋkoŋlee tɔɔ sɩ:
\q1 Tɑcɑɑ tənnɑ.
\q1 Hɑlɩ Ɩsɔ təsɛɛlɛ tɑɑ tiipee kpɑɩ nyənɑ kɑ́ pəsɩ ɩsɩɩ
\q1 cɑləm poosiyɑnɑɑ mpɑ pɑ sɩɩ kɔtɑɣɑ təlɑtɛ tɔ.
\q1
\v 21 Yosɑlɛm nɑ Yutɑ tɑɑ tiipee tənɑ kɑ́ pəsɩ Tɑcɑɑ nyənɑ.
\q1 A tɑɑ kɛ́ kɔtəlɑɑ tənɑ kɑ́ təsɩ pɑ nɑntʋ.
\q1 Pɑɣɑtəlɑɑ kɑɑ tɑsɑ wɛɛʋ kɛ Pə tənɑ pə tʋ Tɑcɑɑ
\q1 Ɩsɔ təsɛɛlɛ tɑɑ kɛ́ wɑɑtʋ ɩnɩ ɩ tɑɑ.