\id TIT - Lokpa Bible portions [dop] -Benin 1999 (web edition -2017)
\ide UTF-8
\h Titʋ
\toc1 TAKƎLAƔA ŊKA PƆƆLƖ NMAAWA TITƲ TƆ
\toc2 Titʋ
\toc3 Titʋ
\mt2 TAKƎLAƔA ŊKA PƆƆLƖ NMAAWA
\mt1 TITƲ
\mt2 TƆ
\imt1 Kʋtʋlʋtʋ
\ip Titʋ tɑ kɛ Yutɑ tʋ, ɩ kɛ́ piitim lɛmpɩ tʋ kɛ́. Amɑ ɩ́ pǝsɑ Yesu tǝŋlʋ. Hɑlǝnɑ Pɔɔlɩ ŋmɑɑ-ɩ nɑ ɩ́ tʋ-ɩ sɩ, ɩ́ pɑɑsǝnɑ tɛtʋ nti lʋm cɔɔnɑɑ nɑ pɑ́ yɑɑkɩ-tɩ sɩ Kǝlɛtɩ tɔ, tǝ Ɩsɔ sɛɛlɑɑ.
\ip Pɔɔlɩ kpeɣelɑ ɩ kʋsɛɣɛsǝtʋ kɛ tɑkǝlɑɣɑ kʋtʋlʋtʋ tɑɑ. Pǝ wɑɑlɩ kɛ́ ɩ́ hʋlɑ yɑɑsinɑɑ mpɑ Ɩsɔ tǝsɛɛlɛ nyɔɔŋ nyǝ́mɑ kɑ́ wɛɛnɑ tɔ. Pɔɔlɩ hʋlɑ Titʋ tɔtɔɣɔ yǝlɑɑ mpɑ Ɩsɔ yʋlʋ kɑ́ pɑɑsǝnɑ Ɩsɔ tǝsɛɛlɛ tɑɑ tɔ. Kʋkpɑtǝlɑɑ, ɑlɑɑ sɔsɑɑ, nɑ ɩfepiyɑ nɑ pɛɛlɑɑ nɑ yomɑɑ. Ɩ́ hʋlɑ tǝmɑ nnɑ nnɑ pǝ wɛɛ sɩ Ɩsɔ sɛɛlʋ ɩ́ lɑ tɔ, nɑ ɩsǝnɑ pǝ wɛɛ sɩ yʋlʋ ɩ́ cɑɣɑnɑ hɛɛsʋɣʋ tɔ, nɑ ɩ́ hɑtǝlǝnɑ fɑɣɑʋ. Pǝ wɑɑlɩ ɩlɛnɑ ɩ́ tʋ Titʋ kɛ nti nti ɩ kɑ́ lɑ tɔ, nɑ sɛɛtʋ.
\iot Ɩsǝnɑ pɑ fɑɣɑ Titʋ tɑkǝlɑɣɑ tɔ:
\io1 Ɩsǝnɑ Ɩsɔ tǝsɛɛlɛ nyɔɔŋ nyǝ́mɑ kɑ tɔ tɔ, titite \ior 1\ior*
\io1 Ɩsǝnɑ leelɑɑ nɑ suluwɑɑ nɑ yomɑɑ pɑɑ wɛɛ tɔ, titite \ior 2\ior*
\io1 Ɩsǝnɑ Ɩsɔ sɛɛlɑɑ kɑ tɔ tɔ, titite \ior 3\ior*
\c 1
\s1 Sɛɛtʋ
\p
\v 1 Mɑɣɑ Ɩsɔ tǝmlɛ tʋ Pɔɔlɩ, Yesu Kilisiti tillu.
\p Pɑ tʋ-m kɛ́ sɩ mɑ́ lɑ nɑ mpɑ Ɩsɔ lǝsɑɑ tɔ pɑ́ mʋ Ɩsɔ, nɑ mɑ́ hʋ́lɩ́-wɛɣɛ tɑmpɑnɑ nnɑ tɑ́ Ɩsɔsɛɛlɛ mpɑɑʋ sɛɣɛsǝɣɩ tɔ, 
\v 2 nɑ pɑ́ tɛ pɑ tɑɑ sɩ pɑɑ hiki weesuɣu ŋku kɩɩ tɛŋ tɔ. Ɩsɔ kɑ tɔmnɑ hɑtuu lɔŋ kɛ yem tɑɑ sɩ ɩ kɑ́ hɑ-tʋɣʋ weesuɣu ŋkʋ, Ɩsɔ tɑ́ kɛ́ kɑloolɑɣɑ tʋ. 
\v 3 Pǝ tɔɔ kɛ́ pǝ kɔmɑ nɑ pǝ́ tɑlɑ wɑɑtʋ wei ɩ kɑ sɩɩwɑ tɔ ɩlɛnɑ ɩ́ yele nɑ ɩ́ tɔm kuli weesuɣu ŋkʋ kʋ tɔɔ nɑ pǝ́ hʋ́lɩ́. Tɑ́ Yɑtʋ Tɑcɑɑ Ɩsɔ ɩnɩ ɩ tʋ-m sɩ mɑ́ kpɑɑlɩ ɩ tɔm nɑ mɑ́ tɔŋnɑ-tǝɣɩ kpɑɑlʋɣʋ tɔ, ntɩ tǝ kuliɣinɑ mpʋ nɑ tǝ́ hʋ́lǝ́ɣɩ́.
\p
\v 4 Titʋ, mɑ́ ŋmɑɑkǝnɑ-ŋ tɑkǝlɑɣɑ kɑnɛ. Nyɑ́ kɛnɑ mɑ pǝyɑlʋ nɑ tɑmpɑnɑ kɛ Ɩsɔsɛɛlɛ mpɑɑʋ ŋku tɑ́ tǝnɑ tǝ tǝŋǝɣɩ tɔ kʋ tɑɑ. Tɑcɑɑ Ɩsɔ nɑ tɑ́ Yɑtʋ Yesu Kilisiti pɑ́ hʋlɩ-ŋ pɛɛlɛɛ nɑ pɑ́ hɑ-ŋ ɑlɑɑfǝyɑ.
\s1 Tǝmlɛ nte pɑ tʋ Titʋ sɩ ɩ́ lɑ Kǝlɛɛtɩ tɔ
\p
\v 5 Mɑɑ yelɑ-ŋ Kǝlɛɛtɩ kɛ́ sɩ ń tɑɣɑnɩ mpi pǝ kɑɑsɑ tɑɣɑnʋɣʋ tɔ tǝtetete, nɑ ń kpɑ pɑɑ ɩcɑtɛ nte tǝ Ɩsɔ tǝsɛɛlɛ sɔsɑɑ. Tɔɔsɩ nti mɑ kɛɛsɑ-ŋ tɔ sɩ: 
\v 6 Wei ɩ kiŋ pɑ kɑɑ nɑ kɑwɑliyɑ nɑkǝlɩ tɔ ɩnɩ ɩ kɑ́ tɔɣɔnɑ Ɩsɔ tǝsɛɛlɛ sɔsɔɔntʋ. Alʋ kʋlʋm kɛ pʋntʋ ɩnɩ ɩ kɑ́ wɛɛnɑ. Nɑ ɩ piyɑ kɑ́ lɑ Ɩsɔ sɛɛlɑɑ, sɩ tɑɑ wɛɛ piyɑ nsi yǝlɑɑ tɔŋ sɩ sɩ kɛ yem yem lɑtɑɑ sɩɩ nɩɩkǝnɑ yǝlɑɑ tɔ. 
\v 7 Ɩsɔ tǝsɛɛlɛ sɔsɔ wɛɛkʋɣʋ Ɩsɔ tǝsɛɛlɛ tɑɑ tɔ Ɩsɔ tǝmɑ kɛ pǝ tʋ-ɩ sɩ ɩ́ pɑɑsǝɣǝnɑ. Pǝ tɔɔ kɛ́ pǝ fɛɩ sɩ pɑ́ nɑ́ kɑwɑliyɑ nɑkǝlǝɣɩ ɩ kiŋ. Ɩ kɑɑ wɛɛ kɑlɑmpɑɑnɩ tʋ yɑɑ wei ɩɩ lɑɑ pɑ́ɑ́nɑ́ mʋɣʋ tɔ, yɑɑ sʋlʋnyɔɔlʋ yɑɑ mʋsʋŋ tʋ, yɑɑ wei ɩ muɣuliɣi sɩ ɩ́ hiki liɣitee tɔ. 
\v 8 Ɩ kɑ́ wɛɛ wei yǝlɑɑ ɩ́ kɔmɑ ɩ tɛ ɩ nyǝmɑ́ mʋʋllɛ lɑpʋ, nɑ ɩ́ sɔɔlɑ mpi pǝ wɛ teu, nɑ ɩ́ wɛnɑ lǝmɑɣɑsɛɛ tɔ. Ɩ kɑ́ wɛɛ wei ɩ tǝŋǝɣɩ tɑmpɑnɑ, nɑ ɩ́ kɛ́ Ɩsɔ yʋlʋ, nɑ ɩ́ nyǝmɑ́ ɩ tɩ tɔkʋɣʋ tɔ. 
\v 9 Ɩ kɑ́ wɛɛ wei ɩ nyɔɔnɑ Ɩsɔ Tɔm mɑɣɑmɑɣɑ tǝkpɑŋkpɑŋkpɑ kɛ teitei ɩsɩɩ pɑɑ sɛɣɛsɑ-ɩ tɔ, ɩlɛnɑ ɩ́ pǝsɩ nɑ ɩ́ sɛɣɛsɩ lɛlɑɑ kɛ sɛɣɛsǝŋ kʋpɑŋ wei ɩ wɑɑsǝɣɩ yǝlɑɑ tɔ nɑ ɩ́ tɑsɑ-wɛɣɛ tɔm. Pǝ kɑɑsɑ kpɛɛsǝlɑɑ pɔpɔtʋnɑɑ mpɑ pɛlɛ tɔ, ɩ́ hʋ́lɩ́-wɛɣɛ ɩsǝnɑ mpi pɑ toolɑɑ tɔ.
\p
\v 10 Pǝ tɑɣɑ pʋlʋ tɔɔ, yǝlɑɑ wɛ pɑɣɑlɛ nɑ pǝ́ tɩɩ kǝlǝnɑ Yutɑ nyǝ́mɑ mpɑ pɑ mʋ Yesu nɑ pɑ́ kɛ́ kɑɑnɩɩtʋnɑɑ tɔ. Kpɑɩ tɔmnɑɑ kɛ pɑ sɛɣɛsǝɣɩ nɑ pɑ́ puɣusiɣinɑ lɛlɑɑ. 
\v 11 Tǝkɩ-wɛ sɩ pɑ́ su mpʋ. Pǝ tɑɣɑ pʋlʋ, pɑ kɛ́ tɛɛsɩ yɔkǝlɑɑ kɛ́, nɑ nti tǝ fɛɩ sɛɣɛsʋɣʋ tɔ ntǝɣɩ pɑ sɛɣɛsǝɣɩ nɑ pɑ́ mʋɣɩ liɣitee kɛ tulum. 
\v 12 Kǝlɛɛtɩ nyǝ́mɑ Ɩsɔ kʋyɔɣɔtʋtʋ tɛlǝsǝlɑɑ tɑɑ nɔɣɔlʋ wei ɩ mɑɣɑmɑɣɑ ɩ kɛ́ Kǝlɛɛtɩ tʋ tɔ ɩ kɑ yɔɣɔtɑ ḿpʋ́ɣʋ́ sɩ: Kǝlɛɛtɩ nyǝ́mɑ nyǝntʋ ntɛ́ cɛsʋɣʋ. Pɑ kɛ́ nyǝmǝŋtʋnɑɑ kɛ́ ɩsɩɩ tɑɑlɛ wontu. Hilikpɑɑkʋnɑɑ kɛ́, pǝcɔ pɑɑ cɑɑ lɑpʋ. 
\v 13 Nti ɩ yɔɣɔtɑ mpʋ tɔ ɩ nɑ-tǝɣɩ. Pǝ tɔɔ ɩlɛ kpɩɩlɩ-wɛɣɛ teu nɑ pǝ́ lɑ nɑ pɑ́ tɛ Ɩsɔ nɑ pɑ tɑɑ kɛ́ teu. 
\v 14 Nɑ pɑ́ yele Yutɑ nyǝ́mɑ sɔsɑɑ tɑɑ tɔmnɑɑ kpɑɩ nyǝntʋ nɑ kʋsǝsɩɩtʋ nti yǝlɑɑ mpɑ pɑ kisɑ tɑmpɑnɑ tǝŋʋɣʋ nɑ pɑ́ lu tɔ tǝ tǝŋʋɣʋ. 
\v 15 Mpɑ pɑ tɑɑ tewɑ tɔ pǝ tǝnɑ pǝ te pɛlɛɣɛ. Amɑ mpɑ pɑ tɑɑ tɑ́ te pǝyele pɑɑ tɛŋ Ɩsɔ nɑ pɑ tɑɑ tɔ pǝ tǝnɑ pǝ kɛ́ ɩsɑɣɑm kɛ pɛlɛ pɑ kiŋ kɛ́. Pǝ tɑɣɑ pʋlʋ, ɩsɑɣɑtʋ tɔɔ kɛ́ pɑ lɑɣɑtʋ nɑ pɑ lɑɑkɑlǝnɑɑ lɑɣɑlɑɑ. 
\v 16 Pɑ́ cɑɣɑɑ ɩlɛ sɩ pɑ nyǝmɑ́ Ɩsɔ. Amɑ ń nyǝnnɑ pɑ lɑkɑsɩ pɩɩ hʋ́lǝ́ɣɩ́ sɩ pɑ nyǝmɑ́ Ɩsɔ se. Pɑ lɩɩ yǝlɑɑ kɛ sɔŋ kɛ́, nɑ pɑ kɛ́ kɑɑnɩɩtʋnɑɑ, pɑɑ pǝsǝɣɩ tǝmlɛ kʋpɑntɛ nɑtǝlǝɣɩ lɑpʋ nɑ ń nɑ́.
\c 2
\s1 Sɛɣɛsʋɣʋ kʋpɑŋkʋ
\p
\v 1 Ye nyɑ́ ɩlɛ sɛɣɛsɩ-wɛɣɛ sɛɣɛsǝŋ kʋpɑŋ wei ɩ wɑɑsǝɣɩ yǝlɑɑ tɔ. 
\v 2 Heeli ɑpɑlɑɑ kʋkpɑtǝlɑɑ sɩ pɑ́ kpɑ pɑ tɩ, nɑ pɑ́ wɛɛnɑ yɑɑsi kʋpɑŋ, nɑ pɑ́ kpɑkǝɣɩ lǝmɑɣɑsɛɛ. Pɑ́ tɔkɩ Ɩsɔsɛɛlɛ mpɑɑʋ nɑ lɛlɑɑ sɔɔlʋɣʋ nɑ suulu hʋ́lʋ́ɣʋ́ kɛ teu. 
\v 3 Heeli ɑlɑɑ kʋkpɑtǝlɑɑ sɩ pɛlɛ pɑ́ tɔkɩ yɑɑsi kʋpɑŋ ɩsɩɩ Ɩsɔ yǝlɑɑ wɛɛkʋɣʋ tɔ. Pɑ́ tɑɑ cɑkǝnɑ yǝlɑɑ, nɑ pɑ́ tɑɑ yele nɑ sʋlʋm hɔkɔ-wɛ. Amɑ pɑ́ wɛɛ mpɑ pɑ tɑsǝɣɩ ɑlɑɑ sǝkpemɑ kɛ tɔm 
\v 4 kɛ ɩsǝnɑ pɛlɛ pɑɑ sɔɔlɩ pɑ pɑɑlɑɑ nɑ pɑ piyɑ tɔ, 
\v 5 nɑ ɩsǝnɑ pɑɑ kpɑɣɑ lǝmɑɣɑsɛɛ nɑ pɑ́ hɑtǝlǝnɑ wɑsɑŋkɑlǝtʋ tɔ, nɑ ɩsǝnɑ pɑɑ lɑkɩ pɑ tɑɑsɩ tǝmɑ kɛ teu tɔ, nɑ ɩsǝnɑ mpi pɑɑ lɑkɩ kʋpɑntʋ nɑ pɑ́ seeki pɑ pɑɑlɑɑ tɔ. Ɩlɛ nɔɣɔlʋ kɑɑ kʋ Ɩsɔ Tɔm nyʋɣʋ kɛ pɑ tɔɔ.
\p
\v 6 Sɛɣɛsɩ ɩfepiyɑ kɛ teu tɔtɔ sɩ pɑ́ kpɑɣɑ lǝmɑɣɑsɛɛ kɛ teu. 
\v 7 Nyɑ́ mɑɣɑmɑɣɑ lɑkɩ tǝmɑ kʋpɑnɑ nɑ pɑ́ nyǝnǝɣǝnɑ-ŋ nɑ pɑ́ lɑkɩ. Pɑɑsɩ nɑ ń sɛɣɛsǝnɑ tɑmpɑnɑ nɑ ɩsǝlɛ kʋsɛɛmlɛ. 
\v 8 Tɑɣɑnǝɣɩ nyɑ́ tɔm, tɑɑ yele nɑ ń kɔɔ nɑ ń pǝntǝɣɩ nyɑ́ yɔɣɔtɑɣɑ tɑɑ nɑ pɑ́ footuɣu-ŋ nɑ-kɛ. Ye n tɑɣɑnɑ-kɛɣɛ teu ɩlɛ pɩɩ tʋ tɑ́ kolontunɑɑ kɛ fɛɛlɛ. Mpi tɔ pɑ kɑɑ nɑ ɩsɑɣɑtʋ nti pɑɑ yɔɣɔtɩ tɑ́ tɔɔ tɔ.
\p
\v 9 Yomɑɑ kɑ́ nɩɩnɑ pɑ cɑɑnɑɑ nɑ pɑ́ lɑ́ nɑ pɛlɛ pɑ lɑŋɑ hɛɛnɑ-wɛɣɛ pɑ kʋlɑpǝlɛ tǝnɑ tɑɑ, nɑ pɑ́ tɑɑ kɛɛsǝɣɩ-wɛɣɛ nɑtǝlɩ. 
\v 10 Pɑ́ tɑɑ ŋmɩɩlɩ pɑɑ pʋlʋ cǝcǝkɑ. Amɑ pɑ́ lɑkɩ tɑm nɑ pɑ cɑɑnɑɑ nɑɑkɩ sɩ pɑ yomɑɑ kɛ kʋpɑmɑ nɑ pɑ́ nɩɩkǝnɑ-wɛ, nɑ pɩɩ lɑ nɑ tɑ́ Yɑtʋ Ɩsɔ tɔɔ tɔm nti tǝ sɛɣɛsǝɣɩ tɔ tǝ nyʋɣʋ kʋlɩ pǝ tǝnɑ pǝ tɑɑ.
\p
\v 11 Pǝ tɑɣɑ pʋlʋ, Ɩsɔ kulinɑ ɩ pɛɛlɛɛ tɔɔ nɑ ɩ́ hʋ́lɩ́ sɩ pǝ yɑ pɑɑ wei ɩ nyʋɣʋ. 
\v 12 Pɛɛlɛɛ ɑnɩ ɑ sɛɣɛsǝnɑ-tʋ sɩ tǝ́ yele ɩsɑɣɑtʋ tɑɑ kɛ́ tɔntɛ nɑ ɑtɛ cǝnɛ kʋnyɩɩlǝŋ kɛ mpʋ, nɑ tǝ́ kpɑɣɑ lǝmɑɣɑsɛɛ nɑ tǝ́ tǝŋ siɣisuɣu, nɑ tǝ́ nɩɩkǝnɑ Ɩsɔ kɛ́ tɑm kɛ́ tɑ́ tɔntɛ tɑɑ kɛ́ ɑntulinyɑ tɑɑ cǝnɛ. 
\v 13 Pɛɛlɛɛ sɛɣɛsǝɣɩ-tʋɣʋ sɩ tǝ́ cɑɣɑ mpʋ nɑ tǝ́ tɑŋɑ leleŋ nɩɩʋ kʋyɑkʋ ŋku tǝ wɛɛ nɑ tǝ́ tɛɛlǝɣɩ tɔ. Kʋ wule kɛ tɑ́ Yɑtʋ Yesu Kilisiti Ɩsɔ Sɔsɔ teeli kɑ́ kɔɔ. 
\v 14 Yesu Kilisiti ɩnɩ ɩ hɑnɑ ɩ tǝɣɩ tɑ́ tɔɔ nɑ ɩ́ yɑ-tʋɣʋ ɩsɑɣɑtʋ tǝnɑ tɑɑ, nɑ ɩ́ tɑɣɑnɩ-tʋɣʋ teu nɑ tǝ́ pǝsɩ yǝlɑɑ mpɑ ɩ tike ɩ tɩ tɔ, nɑ tɑ́ ɩsǝlɛ sɛɛnɑ tǝmɑ kʋpɑnɑ lɑpʋ.
\p
\v 15 Tǝnɛ ɩnǝɣɩ n kɑ heeliɣi-wɛ. Lɑkǝnɑ sɔsɔɔntʋ nti pɑ tʋ-ŋ tɔ tǝ tomɑ tǝnɑ, nɑ ń sɔɔsǝɣɩ nyɑ́ yǝlɑɑ kɛ ɑpɑlʋtʋ, yɑɑ ye kɑlǝnɑʋ kɑlǝnɑ-wɛ. Tɑɑ yele nɑ nɔɣɔlʋ kpɛɛnɑ-ŋ.
\c 3
\s1 Ɩsɔ sɛɛlʋ yɑɑsi
\p
\v 1 Tɔɔsɩ pɑ tǝnɑ sɩ pǝ wɛɛ sɩ pɑ́ seeki tɛtʋ tɔkǝlɑɑ. Pǝ wɛɛ sɩ pɑ́ nɩɩkǝnɑ-wɛɣɛ. Nɑ pɑ sɔɔlʋ ɩ́ pɩɩ tǝmɑ kʋpɑnɑ lɑpʋ tɔɔ. 
\v 2 Pɑ́ tɑɑ tʋʋkɩ nɔɣɔlʋ, ɑmɑ pɑ́ wɛɛ tǝpɑmm, nɑ pɑ́ wɛnɑ yǝllɛ, nɑ pɑ nɑ yǝlɑɑ tǝnɑ pɑ wɛnɑ tǝmɑ nɑ leleŋ. 
\v 3 Tɑ́ mɑɣɑmɑɣɑ ɩsǝntɔ tɩɩ kɛ́ tuutuu lɑtɑɑ tɔtɔɣɔ hɑtuu lɔŋ kɛ́, nɑ kɑɑnɩɩtʋnɑɑ, nɑ tɩɩ toolɑɑ kɛ́. Nɑ kʋnyɩɩlǝŋ nɑ mpi pǝ hɛɛsǝɣɩ tɑ́ lɑŋɑ tɔ pǝ tǝnɑɣɑ mpʋ pǝ nɔɣɔ nɑ pǝ sukɑ kɑ kpɑnɑ-tʋɣʋ yomle, nɑ ɩsɑɣɑtʋ nɑ kʋnyɩɩlǝŋ pǝ tɑɑ kɛ́ tɩɩ wɛɛ. Tǝ tɑɑ cɑɑkɩ tɑ́ tǝmɑɣɑ pɑɑ pǝcɔ mɑɣɑmɑɣɑ. 
\v 4 Amɑ pǝ kɔmɑ nɑ Ɩsɔ tɑ́ Yɑtʋ hʋ́lɩ́ yǝlɑɑ kɛ ɩ kʋpɑntʋ nɑ ɩ pɛɛlɛɛ, 
\v 5 ɩlɛnɑ ɩ́ yɑ-tʋ. Ɩlɛ pǝ tɑɣɑ tɑ́ tǝmɑ kʋsiɣisee tɔɔ. Amɑ tɑ́ pǝtɔɔtǝlɛ kɛ ɩ wiiwɑ nɑ ɩ́ lɑ mpʋ. Ɩsɔ lʋm mpi pɑ sɔ-tʋ nɑ Feesuɣu Nɑŋŋtʋ nɑ́ɑ́ wɛ pǝ tɑɑ nɑ ɩ́ lɑɣɑsǝɣɩ-tʋ nɑ tǝ́ pǝsǝɣɩ kʋfɑmɑ nɑ tǝ́ tɔŋ tɔntɛ kʋfɑtɛ tɔ mpǝɣɩ ɩ yɑpǝnɑ-tʋ. 
\v 6 Pǝ tɑɣɑ pʋlʋ, Ɩsɔ yelinɑ tɑ́ Yɑtʋ Yesu Kilisiti kɛ́ nɑ ɩ́ tisi Feesuɣu Nɑŋŋtʋ kɛ tɑ́ tɔɔ pǝ tɩɩ fɛɩ, 
\v 7 sɩ ɩ́ hʋ́lǝ́ɣɩ́-tʋɣʋ ɩ pɛɛlɛɛ nɑ tǝ́ pǝsɩ kʋpɑmɑ kɛ Ɩsɔ ɩsɛntɑɑ, nɑ tǝ́ hiki weesuɣu ŋku kɩɩ tɛŋ nɑ tǝ́ wɛɛ nɑ tǝ́ tɛɛlǝɣɩ-kʋ tɔ. 
\v 8 Tɔm tǝnɛ tɑmpɑnɑ tɔm tike tǝkelekele kɛ́.
\p Mɑ cɑɑ kɛ́ sɩ ń sɛɛsɩ ɩsǝlɛ nɑ tɔm tǝnɛ tǝ sɛɣɛsʋɣʋ, nɑ mpɑ pɑ tɛmɑ Ɩsɔ nɑ pɑ tɑɑ tɔ pɑ́ hɑ pɑ tǝɣɩ tǝmɑ kʋpɑnɑ lɑpʋ tɑɑ kɛ́ tɑm. Mpi pǝ tewɑ nɑ pǝ wɑɑsǝɣɩ tɔɣɔlɛ. 
\v 9 Amɑ cɔlǝɣɩ kʋmɛlǝtɔmnɑɑ tɔɔ hɔm nɑ lʋlǝŋ loosi tǝŋʋɣʋ. Cɔlǝɣɩ yooŋ nɑ ntɔŋkpɛɛsɑsɩ kɛ Moisi kʋsǝsɩɩtʋ tɔɔ. Ntɩ ɩnɩ tǝ kʋɣɩ tǝmɑ kɛ teu kɛ́, pǝcɔ tɩɩ wɑɑsǝɣɩ pʋlʋ. 
\v 10 Mpɑ pɑ yeki nɑ fɑɣɑʋ kɔŋ yǝlɑɑ tɑɑ tɔ, ye n kpɑɑlɑ-wɛɣɛ tɔm nɑɑlɛ nɑ pɑ́ tɑ́ nɩɩ n tɔɣɔnɩ-wɛ. 
\v 11 Pǝ tɑɣɑ pʋlʋ, n nyǝmɑ́ teu sɩ yʋlʋ ɩ́ wɛ mpʋ pǝ hʋ́lǝ́ɣɩ́ kɛ́ sɩ ɩ yelɑ mpɑɑʋ kʋsiɣisuɣu tǝŋʋɣʋ kɛ́. Nɑ ɩsɑɣɑtʋnɑɑ mpɑ ɩ lɑkɩ tɔ pǝ hʋ́lǝ́ɣɩ́ kɛ́ sɩ ɩ toolɑɑ.
\s1 Kɑntǝkɑɣɑ kʋkpɑɑlǝtʋ
\p
\v 12 Ye mɑ kɔmɑ nɑ mɑ́ tili Aɑtemɑ yɑɑ Tisikɩ kɛ nyɑ́ kiŋ, ɩlɛ n nyǝkɩ lɔŋ nɑ ń kɔɔ nɑ ń mɑɣɑnɑ-m Nikopoli. Mpi tɔ mɑ tʋwɑ sɩ tǝnɑɣɑ mɑɑ cɑɣɑ hilimɑtɛ wɑɑtʋ. 
\v 13 Pɑɑsǝnɑ tɔm hʋʋlʋ Senɑsɩ nɑ Apɔlɔɔsɩ kɛ teu nɑ pɑ́ tɑɑ lɑŋ pʋlʋɣʋ wɑɑtʋ wei pɑɑ tʋɣɩ pɑ mpɑɑʋ tɔ. 
\v 14 Pǝ wɛɛ sɩ tɑ́ yǝlɑɑ tɔtɔ kɑ́ nyɩ ɩsǝnɑ pɑɑ pɑɑsǝnɑ tǝmɑ kʋpɑnɑ lɑpʋ kɛ tɑm tɔ, nɑ ye pǝ cɑɑlɑ wei kɛ́ teu, pɑ wɑɑsǝnɑ-ɩ, nɑ pɑ́ tɑɑ cɑɣɑ yem tǝkpɑsɑ.
\p
\v 15 Pɑ tǝnɑ mpɑ pɑ wɛ mɑ kiŋ cǝnɛ tɔ pɑ sɛɛkɩ-ŋ. Sɛɛ tɑ́ Ɩsɔsɛɛlɛ tɑɑ tɑɑpɑlɑɑ kʋpɑmɑ.
\p Ɩsɔ ɩ́ hʋ́lɩ́ mǝ tǝnɑɣɑ ɩ pɛɛlɛɛ.