\id SNG - Lokpa Bible portions [dop] -Benin 1999 (web edition -2017)
\ide UTF-8
\h Yontu Tɑɑ Yontu
\toc1 YONTU TAA YONTU
\toc2 Yontu Tɑɑ Yontu
\toc3 YTY
\mt1 YONTU TAA YONTU
\imt1 Kʋtʋlʋtʋ
\ip Yontu Tɑɑ Yontu tɑɑ cǝnɛɣɛ pɑ kɛɛsǝɣɩ wulɑʋ Sɑlʋmɔŋ nɑ ɩ tɑŋ pɑ sɔɔlʋɣʋ tɔm. Sɔɔlʋɣʋ ŋkʋ kʋ wɛnnɑ ɩsɩɩ ŋku Ɩsɔ sɔɔlǝnɑ ɩ yǝlɑɑ kpekǝle tɔ nɑ ŋku Ɩsɔ yǝlɑɑ kpekǝle sɔɔlǝnɑ Ɩsɔ tɔ.
\iot Ɩsǝnɑ pɑ fɑɣɑ Yontu Tɑɑ Yontu tɑkǝlɑɣɑ tɔ:
\io1 Kɑncɑɑlɑɣɑ yontu, titite \ior 1:1–2:7\ior*
\io1 Yontu nɑɑlɛ nyǝntʋ, titite \ior 2:8-17\ior*
\io1 Yontu tooso nyǝntʋ, titite \ior 3:1–5:1\ior*
\io1 Yontu liɣiti nyǝntʋ, titite \ior 5:2–6:3\ior*
\io1 Yontu kɑkpɑsɩ nyǝntʋ, titite \ior 6:4–7:11\ior*
\io1 Yontu nɑɑtoso nyǝntʋ, titite \ior 7:12–8:4\ior*
\io1 Yontu nɑɑtosompɔɣɔlɑɣɑ nyǝntʋ, titite \ior 8:5-14\ior*
\c 1
\p
\v 1 Sɑlʋmɔŋ yontu tɑɑ yontu ntɔ.
\s1 Sɔɔlʋɣʋ nyǝ́mɑ fɑɑci
\s2 (Pɛɛlɔ kʋyɔɣɔtʋtʋ)
\q1
\v 2 Wɑɣɑlɩ-m wɑɣɑlɩ-m,
\q1 nyɑ́ sɔɔlʋɣʋ kǝlɑ-m sʋlʋm.
\q1
\v 3 Nyɑ́ tulɑɑlʋ sɔɔsʋŋ kɛ́ kʋpɑŋ kɛ́.
\q1 Nɑ nyɑ́ hǝtɛ nɑ́ɑ́ wɛ ɩsɩɩ nim sɔɔsʋŋ nɩɩkʋɣʋ tɔ.
\q1 Pǝ tɔɔ kɛ́ pɛɛlɑɑ sɔɔlǝɣɩ-ŋ.
\q1
\v 4 Tɔkɩ mɑ niŋ tɑɑ, kpɑɣɑnɑ-m ɑsewɑ.
\q1 Wulɑʋ sʋsɑ-m ɩ kutuluŋ tɑɑ kɛ́.
\q1 Tɩɩ wɛɛnɑ lɑŋhʋlʋmlɛ nɑ tǝ́ ŋmɑɑlɩ nyɑ́ tɔɔ.
\q1 Tɩɩ yɔɔlǝnɑ nyɑ́ sɔɔlʋɣʋ nɑ pǝ́ kǝlɩ sʋlʋm.
\q1 Pɑ sɔɔlǝɣɩ-ŋ tɔ pɑ wɛnɑ tɑmpɑnɑ kɛ́.
\q1
\v 5 Yosɑlɛm pɛɛlɑɑ mɛ,
\q1 pɑɑ mɑ pilɑɑ tɔ,
\q1 mɑ tewɑɣɑ ɩsɩɩ Ketɑɑ cokɑ,
\q1 yɑɑ ɩsɩɩ Sɑlʋmɔŋ cokɑ pɔɔŋ.
\q1
\v 6 Ɩ́ tɑɑ nyɑnɑ-m sɩ mɑ kǝlɑ piliŋ.
\q1 Ilim piisinɑ-m mpʋ.
\q1 Mɑ tɑɑlʋnɑɑ mʋ-m nɑ pɑ́ɑ́nɑ́ kɛ́,
\q1 pɑ tʋ-m sɩ mɑ tɑŋ lɛsɛŋ tɩɩŋ tɑwɑ.
\q1 Ɩlɛ mɑ tɑ tɑŋ mɑ mɑɣɑmɑɣɑ mɑ nyǝntɛ.
\q1
\v 7 Nyɑ́ wei mɑ lǝsɑɣɑ sʋʋwɑ tɔ.
\q1 Heeli-m timpi n tiikiɣi nyɑ́ kɑlǝkʋ tɔ.
\q1 Kɛɛsɩ-m timpi n kɑ hɛɛsɩ ilim sikuɣu tɔ.
\q1 Mɑ tɑɑ cɔɔ yem kɛ́ nyɑ́ tɑɑpɑlɑɑ kɑlǝkǝŋ cɔlɔ.
\s2 (Tiikilɑɑ kʋyɔɣɔtʋtʋ)
\q1
\v 8 Alɑɑ telɑɑ tɑɑ telu nyɑ́.
\q1 Ye n tɑ nyɩ ɩlɛ n tǝŋ heeŋ kɑlǝkʋ nɔɔhɛɛ.
\q1 Tiiki nyɑ́ pinɑsɩ kɛ tiikilɑɑ cokɑ kiŋ.
\s2 (Ɩfepu nyǝntʋ)
\q1
\v 9 Mɑ kʋsɔɔlɑɣɑ nyɑ́, nyɑ́ teu nǝɣǝsǝnɑ kɛ́ ɩsɩɩ
\q1 pɑ kpɛɛlʋɣʋ Icipiti wulɑʋ kpɑɣɑnʋ ɑlʋnyǝŋ kɛɛkɛ nɑ kɑcɔkɑ tɔ.
\q1
\v 10 Nyɑ́ lukpuɣutu tewɑ nyɑ́ ŋkpɑŋyɑpǝlɑsɩ hɛkʋ kɛ́.
\q1 Nɑ nyɑ́ luɣu nɑ́ɑ́ sǝŋɑ teu kɛ lɩɩtʋ hɛkʋ tɑɑ.
\s2 (Tiikilɑɑ nyǝntʋ)
\q1
\v 11 Tɩɩ lu-ŋ wʋlɑ kɛ kɑcɔkɑ wontu
\q1 nɑ pɑ́ mɑtɩ tǝ tɔɔ kɛ́ liɣitee nyǝɣǝtʋ.
\s2 (Pɛɛlɔ nyǝntʋ)
\q1
\v 12 Wulɑʋ nɑ ɩ cɔlɔ nyǝ́mɑ pɑ cɑɣɑɑ tɔ
\q1 nɑ mɑ tɔɔ tulɑɑlʋ sɔɔsʋŋ nyɑlɑɑ kɛ́.
\q1
\v 13 Mɑ kʋsɔɔlʋ nyɑ́, n wɛ-m kɛ́ ɩsɩɩ
\q1 tulɑɑlʋ miili kɛ pɑ sɩɩ mɑ hǝlɑ hɛkʋ.
\q1
\v 14 N wɛ-m kɛ́ ɩsɩɩ lɑɑlinɑɑ kʋpɑmɑ tɩɩŋ kɛ
\q1 Aŋ-Ketii lɛsɛŋ tɑwɑ tɑɑ.
\s2 (Ɩfepu nyǝntʋ)
\q1
\v 15 Mɑ kʋsɔɔlɑɣɑ nyɑ́, ɑmɑ n tewɑ yoo!
\q1 Nyɑ́ ɩsǝpee tewɑ ɩsɩɩ ɑlukukunɑɑ.
\s2 (Pɛɛlɔ nyǝntʋ)
\q1
\v 16 Mɑ kʋsɔɔlʋ nyɑ́, teu ntɛ́ yɑɑ.
\q1 Tɑ́ kʋhǝntʋɣʋ ntɛ́ kɑteŋɑ nyɩɩtʋ kʋlɛkǝlɛkǝtʋ.
\q1
\v 17 Tɩɩŋ kʋpɑŋ piliŋɑsɩ ntɛ́ tɑ kutuluɣu.
\c 2
\q1
\v 1 Mɑ wɛ kɛ́ ɩsɩɩ Sɑlɔŋ tɛtɛkǝlɛ yɑɑye.
\q1 Mɑɣɑlɛ tɛtʋ ɩhǝntɑʋ tɑɑ hɛtʋ.
\s2 (Ɩfepu nyǝntʋ)
\q1
\v 2 Ɩsɩɩ yɑɑye wɛʋ sɔwɑ hɛkʋ tɔ,
\q1 ḿpʋ́ɣʋ́ mɑ kʋsɔɔlɑɣɑ nyɑ́ n wɛ pɛɛlɑɑ lɛlɑɑ tɑɑ.
\s2 (Pɛɛlɔ nyǝntʋ)
\q1
\v 3 Ɩsɩɩ tʋɣʋ kʋtɔtɔɣɔʋ wɛʋ hɔtʋɣʋ tɩɩŋ tɑɑ tɔ,
\q1 ḿpʋ́ɣʋ́ mɑ kʋsɔɔlʋ nyɑ́ n wɛ ɩfepiyɑ lɛlɑɑ tɑɑ.
\q1 Nyɑ́ ɩsotom tɑɑ kɛ́ mɑ nyɩɩlɑ cɑɣɑʋ.
\q1 Nyɑ́ pee wɛ leleŋ kɛ mɑ nɔɣɔ tɑɑ kɛ́.
\q1
\v 4 Acimɑ tɑɑ kɛ́ n ponɑ-m nyɑ́ tɛ.
\q1 Nyɑ́ tuutɑ wei n kpɑɑsɑ mɑ nyʋɣʋ tɑɑ tɔɣɔlɛ sɔɔlʋɣʋ.
\q1
\v 5 N cɛlɑ-m tʋɣʋ ŋku pɑ yɑɑ sɩ lɛsɛŋ tɔ kʋ pee
\q1 kɑkɑlɑsɩ nɑ mɑ́ tɔɣɔ nɑ pǝ́ sǝnɑ-m.
\q1 N hɑ-m tʋɣʋ pee nɑ mɑ́ mʋʋ nɑ pǝ́ hɑ-m tomɑ.
\q1 Mpi tɔ, sɔɔlʋɣʋ kʋtɔŋ kpɑ-m kɛ́.
\q1
\v 6 Te mɑ nyʋɣʋ nɑ nyɑ́ niŋ mpǝtǝŋ.
\q1 Kpɛkǝnɑ-m nɑ nyɑ́ ntɔɣɔŋ.
\s2 (Ɩfepu nyǝntʋ)
\q1
\v 7 Hɑɩ, Yosɑlɛm pɛɛlɑɑ mɛ,
\q1 mɑ tuukinɑ nɑmǝŋ nɑ nɑsɛŋ sɩ:
\q1 Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.
\s1 Ɩfepu kɔntɛ
\s2 (Pɛɛlɔ nyǝntʋ)
\q1
\v 8 Ɩ́ nɩɩ mɑ kʋsɔɔlʋ nɔɣɔ.
\q1 Ɩ ŋmɑɑkǝnɑ ntɛɣɛ pɔɔŋ nɑ pulɑsɩ tɔɔ nɑ ɩ́ kɔŋ.
\q1
\v 9 Mɑ kʋsɔɔlʋ nǝɣǝsǝnɑ kɛ́ ɩsɩɩ nɑsɛm
\q1 yɑɑ kɑpǝlǝŋɑ kʋfɑlɑɣɑ.
\q1 Hɑlɩ ɩnǝɣǝlɛ tɑ́ koluŋɑ wɑɑlɩ nɑ ɩ́ nyǝnǝɣǝnɑ pǝtote.
\q1
\v 10 Ɩ yɑɑkɩ-m sɩ: Mɑ kʋsɔɔlɑɣɑ nyɑ́.
\q1 Kʋlɩ nɑ ń kɔɔ.
\q1
\v 11 Mpi tɔ, yolumɑ tɛmɑ.
\q1 Tɛʋ tɛmɑ, kʋ sɩɩ tǝnɑɣɑ.
\q1
\v 12 Tɑwɑ tɑɑ kʋtɔɣɔŋ tʋ hɛtʋ kɛ tɛtʋ tɑɑ.
\q1 Yoŋkpɑɑmɑ wɑɑtʋ tɑpɑɣɑlɛ.
\q1 Ɩhokɑɣɑ wiiwɑ tɑ́ tɛtʋ tɑɑ.
\q1
\v 13 Tɩɩŋ wei pɑ yɑɑ sɩ fikinɑɑ kɑncɑɑlɑɣɑ nyǝŋ tɔŋɑ lʋlʋɣʋ,
\q1 nɑ tʋɣʋ ŋku pɑ yɑɑ sɩ lɛsɛŋ tɔ kʋ hɛtʋ sɔɔsʋŋ nɑ́ɑ́ nyɑlɑɑ.
\q1 Kʋlɩ nɑ ń kɔɔ, mɑ kʋsɔɔlɑɣɑ kʋpɑŋkɑ.
\q1
\v 14 Mɑ kʋpɑŋkɑ nyɑ́ɣɑ́ kʋkpɑmǝŋ pɔɔŋ tɑɑ.
\q1 Nyɑ́ wei n wɛ ɩpilisɑʋ tɑɑ timpi wɛ kɑtɛ tɔ.
\q1 Hʋlʋ-m nyɑ́ ɩsɛntɑɑ,
\q1 yele nɑ mɑ́ nɩɩ nyɑ́ nɔɣɔ.
\q1 Nyɑ́ ɩsɛntɑɑ tewɑɣɑ nɑ nyɑ́ yɔɣɔtɑɣɑ wɛ leleŋ.
\s2 (Toto nyǝntʋ)
\q1
\v 15 Ɩ́ kpɑ tɑɑlɛ wontu sǝkpetu nti tǝ wɑkǝlǝɣɩ tɑ lɛsɛŋnɑɑ tɔ.
\q1 Pǝ tɑɣɑ pʋlʋ, pɑ tʋ hɛtʋ.
\s2 (Pɛɛlɔ nyǝntʋ)
\q1
\v 16 Mɑ tǝnnɑ mɑ luɣu tɛɛ kʋsɔɔlʋ.
\q1 Nɑ ɩ́lɛ́ ɩ tǝnnɑ mɑ́.
\q1 Yɑɑyenɑɑ tɑɑ kɛ́ ɩ tiikiɣi ɩ kɑlǝkǝŋ.
\q1
\v 17 Mɑ luɣu tɛɛ kʋsɔɔlʋ nyɑ́, tɔ pulɑsɩ tɔɔ,
\q1 nɑ ń kɔɔ ɩsɩɩ nɑsɛm yɑɑ kɑpǝlǝŋɑ kʋfɑlɑɣɑ,
\q1 nɑ pǝ́cɔ́ ɑhoo yu nɑ nikɑɣɑ kpɑ.
\c 3
\s1 Pɛɛlɔ toosiɣinɑ ɩfepu
\s2 (Pɛɛlɔ nyǝntʋ)
\p
\v 1 Ḿpʋ́ɣʋ́ mɑ toosɑ ɑhoo sɩ
\q1 mɑ kʋsɔɔlʋ ntɛ́ mɑ pɛɛkɑ kɑto tɔɔ.
\q1 Nɑ mɑ́ pɛɛkɩ, nɑ mɑ́ pɛɛkɩ, mɑ tɑ nɑ-ɩ.
\q1
\v 2 Ɩlɛnɑ mɑ́ kʋlɩ nɑ mɑ́ cɔɔ ɩcɑtɛ.
\q1 Nɑ mɑ́ pɛɛkɩ-ɩ nɔnɔɔsɩ tɛɛ,
\q1 nɑ hɑpɛɛ tɔɔ, mɑ tɑ nɑ-ɩ.
\q1
\v 3 Ɩlɛnɑ mɑ́ sulinɑ tɑŋlɑɑ mpɑ pɑ cɔɔkɩ ɩcɑtɛ tɔ
\q1 nɑ mɑ́ pɔɔsɩ-wɛ sɩ:
\q1 Ɩ́ nɑwɑ mɑ kʋsɔɔlʋ nɑ?
\q1
\v 4 Mɑ polɑɑ sɩ mɑ tɛɛkɩ pɑ tɔɔ ɩlɛ,
\q1 mɑ nɑ́ mɑ kʋsɔɔlʋ ntɛ́.
\q1 Nɑ mɑ́ kpipi-ɩ nɑ mɑ́ tɔkɩ-ɩ teu nɑ mɑ́ ponɑ-ɩ mɑ too tɛ.
\q1 Nɑ mɑ́ sʋʋnɑ-ɩ wei ɩ lʋlɑ-m tɔ ɩ nɑŋ tɑɑ.
\q1
\v 5 Hɑɩ, Yosɑlɛm pɛɛlɑɑ mɛ,
\q1 mɑ tuukinɑ nɑmǝŋ nɑ nɑsɛŋ.
\q1 Ɩ́ tɑɑ pɑɑtɩ tɑ́ sɔɔlʋɣʋ nɑ kʋ wɑɑtʋ tɑ tɑtɑ.
\s2 (Pɛɛlɔ nyǝntʋ)
\q1
\v 6 Pepe lɩɩnɑ wʋlɑɣɑ tɛtʋ tɑɑ nɑ pǝ́ kɔŋ
\q1 ɩsɩɩ wontu pee tulɑɑlʋ nyɔɔsɩ?
\q1
\v 7 Wulɑʋ Sɑlʋmɔŋ ɑmɑkɑ kɔŋnɑ.
\q1 Nɑ Ɩsɛɣɛlɩ yoolɑɑ tɑɑ yoolɑɑ nɩɩtoso kɛ ɩ wɑɑlɩ.
\q1
\v 8 Pɑ tǝnɑ pɑ kpɛlǝmɑ yoou kɛ́.
\q1 Pɑ pɑɑ lɑɣɑlɛɛ kɛ pɑ kɔŋkɔmǝŋ tɑɑ.
\q1 Nɑ pɑ́ tɑŋɑ ɑsolɑ nnɑ ɑ kɔŋ ɑhoo tɔ.
\q1
\v 9 Lipɑŋ tɑɑsɩ kʋpɑŋsɩ kɛ pɑ sɑɑkɑ
\q1 wulɑʋ Sɑlʋmɔŋ ɑmɑkɑ ɩnɩ.
\q1
\v 10 Liɣitee nyǝɣǝtʋ kɛ pɑ lupɑ ɩ kpɑtǝŋ,
\q1 nɑ tǝteesile kɛ wʋlɑ.
\q1 Tǝcɑɣɑlɛ kɛ pʋʋɣʋ kʋsɛɛmʋɣʋ kʋpɑŋkʋ.
\q1 Ɩlɛnɑ Yosɑlɛm pɛɛlɑɑ nɑ́ɑ́ pɔ pǝ tɑɑ kɛ́
\q1 pɔɔŋ wei pɑ sɔpǝnɑ sɔɔlʋɣʋ tɔ.
\q1
\v 11 Siyɔŋ pɛɛlɑɑ mɛ,
\q1 ɩ́ lɩɩ nɑ ɩ́ nɑ́ wulɑʋ Sɑlʋmɔŋ ntenuɣu
\q1 ŋku ɩ too temɑ-ɩ ɩ ɑkpɑɣɑlɛ wule tɔ.
\q1 Kʋ kɛ́ ɩ lɑŋhʋlʋmlɛ sɔsɔɔlɛ kʋyɑkʋ kɛ́.
\c 4
\s2 (Ɩfepu nyǝntʋ)
\q1
\v 1 Mɑ kʋsɔɔlɑɣɑ nyɑ́,
\q1 ɑmɑ n tewɑ, n tewɑɣɑ tǝkpɑpɑ.
\q1 Nyɑ́ ɩsǝpee wɛ nyɑ́ tɛkɛntɛ tɛɛ kɛ́ ɩsɩɩ ɑlukuku.
\q1 Nyɑ́ nyɔɔsɩ hǝntɑ ɩsɩɩ pǝŋ kɑlǝkʋ tiiki Kɑlɑɑtɩ pʋɣʋ.
\q1
\v 2 Nyɑ́ kelɑ hʋlʋmɑɑ kɛ́ ɩsɩɩ heeŋ kʋhʋlʋmǝŋ kɑlǝkʋ
\q1 ŋku kʋ hʋntʋ pɑ kɔwɑ nɑ kʋ́ lɩɩnɑ lʋm tǝnyɔɔlɛ tɔ.
\q1 Pɑɑ heu wei nɑ ɩ tompiyɑ, nɔɣɔlʋ tɑ lɑŋ.
\q1
\v 3 Nyɑ́ ntompee wɛ ɩsɩɩ kpoŋkpontuɣu kʋsɛɛmʋɣʋ.
\q1 Nyɑ́ lukpuɣutu nɑɑkɩ nyɑ́ tɛkɛntɛ tɛɛ
\q1 ɩsɩɩ pɑ fɑɣɑ tʋɣʋ nɑkʋlɩ kʋ pǝle kʋsɛɛmlɛ.
\q1 Nɑ nyɑ́ yɔɣɔtɑɣɑ nɑ leleŋ.
\q1
\v 4 Nyɑ́ luɣu wɛ kɛ́ ɩsɩɩ Tɑfiiti kutuluɣu kʋkʋlʋɣʋ
\q1 ŋku pɑ ŋmɑwɑ sɩ pɑ sɩɩkɩ yoou wontu tɔ.
\q1 Kʋ tɑɑ kɛ́ pɑ pusɑ kpɑlǝŋ iyɑɣɑ (1000).
\q1 Yoolɑɑ tɑɑ yoolɑɑ kpɑlǝŋ kɛ́.
\q1
\v 5 Nyɑ́ hǝlɑ nɑɑlɛ wɛ kɛ́ ɩsɩɩ nɑsɛm tompiyɑ nɑɑlɛ
\q1 tɔkʋɣʋ yɑɑyenɑɑ hɛkʋ tɔ.
\q1
\v 6 Mɑɑ polo tulɑɑlʋ miili pʋɣʋ tɔɔ,
\q1 nɑ tulɑɑlʋ kʋwɔpʋ pulɑɣɑ tɔɔ.
\q1 Nɑ pǝ́cɔ́ pǝ nyɑɑlɩ nɑ sǝkpɛtʋɣʋ yɑ́.
\q1
\v 7 Mɑ kʋsɔɔlɑɣɑ nyɑ́, n tewɑɣɑ tǝkpɑpɑ.
\q1 Nyɑ tiili tɑ́ pǝntɩ pɑɑ pǝcɔ.
\q1
\v 8 Mɑ tɑŋiyɑɣɑ nyɑ́, kɔɔ.
\q1 Kɔɔ nɑ tǝ́ lɩɩ Lipɑŋ pʋɣʋ tɑɑ.
\q1 Hɑtoo Amɑnɑ, nɑ Senii,
\q1 nɑ Hɛɛmɔŋ pǝ pɔ́ɔ́ŋ nyɔɔŋ tɑɑ kɛ́ n kɑ́ nyǝnɩ tɛtɛkǝlɛ.
\q1 Tɔɣɔlɑsɩ lonɑ wɛ tǝnɑɣɑ.
\q1 Nɑ kpooŋ tǝcɑɣɑlɛ.
\q1
\v 9 Mɑ newɑɣɑ, mɑ tɑŋiyɑ nyɑ́, n hɛɛsǝɣɩ mɑ lɑŋlɛ kɛ́.
\q1 Ye n nyǝnɑ-m tɔm kʋlʋm pǝ lɑkɩ-m teu kɛ́.
\q1 Ye mɑ nɑwɑ nyɑ́ lɩɩlʋɣʋ pile kʋlʋmtǝlɛ pǝ lɑkɩ-m leleŋ.
\q1
\v 10 Mɑ newɑɣɑ, mɑ tɑŋiyɑ nyɑ́,
\q1 Nyɑ́ sɔɔlʋɣʋ wɛ teu kɛ́.
\q1 Nyɑ́ sɔɔlʋɣʋ kǝlɑ-m sʋlʋm tǝcɑɣɑcɑɣɑ.
\q1 Nyɑ́ tulɑɑlʋ sɔɔsʋŋ tɛɛwɑ lɛmpɑ tǝnɑ.
\q1
\v 11 Mɑ tɑŋiyɑ nyɑ́, tɩɩŋ nim kpeŋ nyɑ́ ntompee tɔɔ kɛ́.
\q1 Nyɑ́ nsǝmlɛ tɔɔ wɛ ɩsɩɩ nɑɑlǝm nɑ tɩɩŋ nim.
\q1 Nɑ nyɑ́ wontu sɔɔsʋŋ nɑ́ɑ́ wɛ ɩsɩɩ Lipɑŋ tɛtʋ hɔtʋɣʋ hɛtʋ.
\q1
\v 12 Mɑ newɑɣɑ, mɑ tɑŋiyɑ nyɑ́.
\q1 N wɛ kɛ́ ɩsɩɩ hɑlǝm mpi pɑ lɔpɑ kɑlɑɑ tɔ.
\q1 Yɑɑ hite nte tǝ tɔɔ pɑ sulɑɑ tɔ,
\q1 yɑɑ sɛɛlʋ wei ɩ tɔɔ pɑ tɑɑlɑɑ tɔ.
\q1
\v 13 Nyɑ́ lɔɔŋ lʋm niɣitiɣinɑ tɩɩŋ tɑɑlɛ
\q1 nte tǝ pee wɛ leleŋ kɛ teu tɔ.
\q1 Tulɑɑlʋnɑɑ kʋpɑmɑ tɩɩŋ nyɔɔkɩ
\q1
\v 14 tǝnɑɣɑ wɑɑnɩ wɑɑnɩ kɛ́,
\q1 nɑ pǝ kpɛnnɑ kʋsɑɣɑlɑɑ kʋpɑmɑ.
\q1
\v 15 N wɛ kɛ́ ɩsɩɩ hɑlǝmnɑɑ sɛɛlʋ
\q1 yɑɑ lʋm kʋpɑm lɔkɔ.
\q1 Yɑɑ lʋm mpi pǝ lɩɩkǝnɑ Lipɑŋ tontoŋɑ tɔɔ tɔ.
\s2 (Pɛɛlɔ nyǝntʋ)
\q1
\v 16 Ilim ntɔɣɔŋ nɑ pǝ mpǝtǝŋ heelim ɩ́ kʋlɩ
\q1 nɑ pǝ́ mɑ́ mɑ hɑlǝm tɔɔ nɑ pǝ tulɑɑlʋnɑɑ sɔɔsʋŋ nyɑlɑ.
\q1 Mɑ kʋsɔɔlʋ nyɑ́ sʋʋ nyɑ́ hɑlǝm tɑɑ,
\q1 nɑ n tɔɣɔ pǝ pee leleŋ nyǝnɑ.
\c 5
\s2 (Ɩfepu nyǝntʋ)
\q1
\v 1 Mɑ newɑɣɑ, mɑ tɑŋiyɑ nyɑ́.
\q1 Mɑ sʋʋkɩ mɑ hɑlǝm tɑɑ nɑ mɑ́ cɑɑ
\q1 mɑ tulɑɑlʋ miili nɑ tulɑɑlʋnɑɑ lɛlɑɑ.
\q1 Mɑɑ tɔɣɔ mɑ tɩɩŋ sɛtɑɣɑ.
\q1 Nɑ mɑ́ nyɔɔ mɑ sʋlʋm nɑ mɑ nɑɑlǝm.
\s2 (Tɑɑpɑlɑɑ nyǝntʋ)
\q1 Mɑ tɑɑpɑlɑɑ mɛ ɩ́ tɔɣɔ nɑ ɩ́ nyɔɔ.
\q1 Sɔɔlʋɣʋ ɩ́ kʋ-mɛ ɩsɩɩ sʋlʋm.
\s1 Pɛɛlɔ tʋlɑ nɔnɔɣɔ ɩlɛ, ɩfepu sɩ n kɑ sɩɩ-m le
\s2 (Pɛɛlɔ nyǝntʋ)
\q1
\v 2 Mɑ tookɑɣɑ yɑɑ, pɑɑ nɑ mpʋ mɑ́ nɑ mɑ ɩsɛ.
\q1 Ḿpʋ́ɣʋ́ mɑ nɩɩwɑ mɑ kʋsɔɔlʋ nɔɣɔ nɑ ɩ́ lɑkɩ
\q1 kɑɑfɑlɑ nɑ ɩ́ tɔŋ sɩ:
\s2 (Ɩfepu nyǝntʋ)
\q1 Tʋlʋ-m, mɑ newɑɣɑ, mɑ kʋsɔɔlɑɣɑ.
\q1 N wɛ-m teu kɛ́ ɩsɩɩ ɑlukuku,
\q1 nyɑɣɑlɛ mɑ kʋpɑŋkɑ.
\q1 Mpi tɔ, ɑhoo cɔlɔʋ kpɑ-m kɛ́ nɑ mɑ nyɔɔsɩ tɔɔ nɑ lʋm.
\s2 (Pɛɛlɔ nyǝntʋ)
\q1
\v 3 Mɑ tɛmɑ mɑ wontu wɔɣɔsʋɣʋ.
\q1 Ɩsǝnɑɣɑlɛ mɑɑ tɑɣɑnɩ-tǝɣɩ suuu?
\q1 Pǝ́cɔ́ mɑ kɔwɑ mɑ nɔɔhɛɛ.
\q1 Ɩlɛ ɩsǝnɑɣɑ mɑɑ tɑɣɑnɩ-yɛɣɛ pilisuɣu tɔtɔ?
\q1
\v 4 Ḿpʋ́ɣʋ́ mɑ kʋsɔɔlʋ sʋsɑ ɩ niŋ nɑ pɔɣɔtɛ.
\q1 Nɑ mɑ lɑŋlɛ tɑɑ lɑ tǝnyɑɩɩ.
\q1
\v 5 Ɩlɛnɑ mɑ́ kʋlɩ sɩ mɑ tʋlǝɣɩ mɑ kʋsɔɔlʋ,
\q1 nɑ mɑ ntɑntɑkʋ nɑ mɑ mpee tɔɔ tulɑɑlʋ
\q1 tɑɑnɑ kɑmpʋ tǝtɔkǝlɛ.
\q1
\v 6 Ḿpʋ́ɣʋ́ mɑ tʋlɑ mɑ kʋsɔɔlʋ, ɩlɛ ɩ tɛmɑ tɛɛʋ.
\q1 Amɑ ɩ kʋyɔɣɔtʋtʋ wɑkǝlɑ mɑ lɑŋlɛ.
\q1 Ɩlɛnɑ mɑ pɛɛkɩ-ɩ mɑ tɑ nɑ-ɩ.
\q1 Nɑ mɑ́ yɑɑ-ɩ ɩ tɑ cɔ.
\q1
\v 7 Ḿpʋ́ɣʋ́ mɑ sulɑ tɑŋlɑɑ mpɑ pɑ cɔɔkɩ ɩcɑtɛ tɔ.
\q1 Nɑ pɑ́ mɑ-m nɑ pǝ́ kʋ-m, nɑ pɑ́ lɛɛkɩ mɑ tɛkɛntɛ.
\q1
\v 8 Hɑɩ, Yosɑlɛm pɛɛlɑɑ mɛ, mɑ wiinɑ-mɛ.
\q1 Ye ɩ́ sulɑ mɑ kʋsɔɔlʋ,
\q1 ɩ́ heeli-ɩ sɩ sɔɔlʋɣʋ kʋtɔŋ kpɑ-m.
\s2 (Pɛɛlɑɑ nyǝntʋ)
\q1
\v 9 Hɑɩ, ɑlɑɑ tɑɑ telu nyɑ́,
\q1 weɣe nyɑ́ kʋsɔɔlʋ nɑ́ tɛɛwɑ,
\q1 nɑ ń wiikinɑ-tʋɣʋ mpʋ?
\s2 (Pɛɛlɔ nyǝntʋ)
\q1
\v 10 Mɑ kʋsɔɔlʋ nyɑ́ n sɛɛwɑɣɑ tǝkpɑŋkpɑŋ.
\q1 Pɑɑ n wɛ yǝlɑɑ iyisi nɑɑnʋwɑ (10000) tɑɑ,
\q1 pɑ nyǝŋɩ-ŋ kpɑkpɑɑ kɛ́.
\q1
\v 11 Nyɑ́ ɩsɛntɑɑ tewɑɣɑ ɩsɩɩ wʋlɑ mɑɣɑmɑɣɑ.
\q1 Nɑ nyɑ́ nyɔɔsɩ nɑ́ɑ́ yɑwɑ tǝpolopolo ɩsɩɩ pɑ́ɑ́ʋ hɛtʋ,
\q1 nɑ sɩ pilɑ kilikili ɩsɩɩ kɑtǝkɑtʋɣʋ.
\q1
\v 12 Nyɑ́ ɩsǝpee wɛɛ kɛ́ ɩsɩɩ ɑlukukunɑɑ kɛ lʋm kʋkpemim nɔɣɔ.
\q1 Nɑ pɑ́ yɑɑkɩ nɑɑlǝm tɑɑ nɑ pɑ́ hɛɛsǝɣɩ timpi pǝ tɔɔlǝnɑ-wɛ tɔ.
\q1
\v 13 Nyɑ́ lukpuɣutu tewɑɣɑ ɩsɩɩ tulɑɑlʋnɑɑ tɩɩŋ tɑɑlɛ.
\q1 Nɑ nyɑ́ ntompee wɛ ɩsɩɩ yɑɑyenɑɑ
\q1 mpɑ pɑ tɔɔ tulɑɑlʋ miili kpeŋ tɔ.
\q1
\v 14 Nyɑ́ niŋ wɛ kɛ́ ɩsɩɩ wʋlɑ kukuwee
\q1 nnɑ ɑ tɔɔ pɑ tʋ liɣitee pɛɛ tɔ.
\q1 Nɑ nyɑ́ tɔnʋɣʋ tɔɔ nɑ́ɑ́ wɛ ɩsɩɩ tuu kete kʋsotile
\q1 nte tǝ tɔɔ pɑ tʋ liɣitee pɛɛ tɔ.
\q1
\v 15 Nyɑ́ nɔɔhɛɛ wɛ kɛ́ ɩsɩɩ liɣitee pɛɛ kʋhʋlʋmɛɛ
\q1 ɑkelenɑɑ mpɑ pɑ tɑpǝŋ tɛɛ pɑ temɑ wʋlɑ tɔ.
\q1 Nɑ nyɑ́ nyǝnʋɣʋ tɑɑ wɛ ɩsɩɩ Lipɑŋ pɔ́ɔ́ŋ.
\q1 Nyɑ́ nyʋɣʋ kʋlɑɑ kɛ́ ɩsɩɩ tɩɩŋ sɔsɔɔŋ, n fɛɩnɑ sɑɑlɑ.
\q1
\v 16 Nyɑ́ kʋyɔɣɔtʋtʋ tǝnɑ nɑ leleŋ kɛ́.
\q1 Nɑ nyɑ́ pǝ tǝnɑ pǝ wɛ teu.
\q1 Yosɑlɛm pɛɛlɑɑ mɛ,
\q1 mɑ kʋsɔɔlʋ ntɛ́, mɑ pɑɑlʋ kɛlɛ.
\c 6
\s2 (Pɛɛlɑɑ nyǝntʋ)
\q1
\v 1 Alɑɑ tɑɑ ɑcɛpɑ nyɑ́,
\q1 leɣe nyɑ́ kʋsɔɔlʋ polɑɑ?
\q1 Nkuɣu ɩ tǝŋɑɑ?
\q1 Tɑ nɑ-ŋ tǝ pɛɛkɩ-ɩ.
\s2 (Pɛɛlɔ nyǝntʋ)
\q1
\v 2 Mɑ kʋsɔɔlʋ n polɑ nyɑ́ tɑɑlɛ nte tǝ tɑɑ tulɑɑlʋ
\q1 sɔɔsʋŋ nyɑlɑɑ tɔɣɔ sɩ n cɑɑkɩ yɑɑyenɑɑ
\q1 nɑ ń tiiki nyɑ́ kɑlǝkʋ.
\q1
\v 3 Mɑ́ tǝnnɑ mɑ kʋsɔɔlʋ nyɑ́ nɑ nyɑ́ tǝnnɑ mɑ́ tɔtɔ.
\q1 Yɑɑyenɑɑ tɑɑ kɛ́ n tiikiɣi nyɑ́ kɑlǝkʋ.
\s1 Pɛɛlɔ wɛɛtʋ
\s2 (Ɩfepu nyǝntʋ)
\q1
\v 4 Mɑ kʋsɔɔlɑɣɑ nyɑ́,
\q1 n tewɑɣɑ ɩsɩɩ Tiisɑ ɩcɑtɛ.
\q1 N wɛ leleŋ ɩsɩɩ Yosɑlɛm tɑɑ cɑɣɑlɛ.
\q1 Amɑ n wɛ sɔɣɔntʋ ɩsɩɩ yoolɑɑ nɑ pɑ tuutɑnɑɑ.
\q1
\v 5 Kɛɛsɩ nyɑ́ ɩsɛ ɑnɩ ɑ cɔɔsǝɣɩ-m kɛ́.
\q1 Nyɑ́ nyɔɔsɩ hǝntɑ ɩsɩɩ pǝ́ŋ kɑlǝkʋ tiiki Kɑlɑɑtɩ pʋɣʋ.
\q1
\v 6 Nyɑ́ kelɑ hʋlʋmɑɑ kɛ́ ɩsɩɩ heeŋ kʋhʋlʋmǝŋ kɑlǝkʋ,
\q1 ŋku kʋ lɩɩnɑ lʋm tǝnyɔɔlɛ,
\q1 nɑ pɑɑ heu wei nɑ ɩ tompiyɑ tɔ.
\q1 Nɔɣɔlʋ tɑ hɛlǝmɩ.
\q1
\v 7 Nyɑ́ lukpuɣutu nɑɑkɩ nyɑ́ tɛkɛntɛ tɛɛ
\q1 kɛ́ ɩsɩɩ pɑ fɑɣɑ tʋɣʋ nɑkʋlɩ kʋ pile.
\q1
\v 8 Wulɑʋ pǝsǝɣɩ nɑ ɩ́ wɛɛnɑ tɑɣɑ ɑlɑɑ kɛ nɩɩtoso.
\q1 Nɑ ɑsɑɑlɑɑ kɛ nɩɩnɑɑsɑ, nɑ sɑɑlɑɑ nɑ́ɑ́ fɛɩ kɑlʋɣʋ.
\q1
\v 9 Amɑ nyɑ́ tike kɛ nyɑ́ too lʋlɑ ɑlʋpǝyɑɣɑ nɑ ɩ kǝlɑ-ŋ sɔɔlʋɣʋ.
\q1 Nyɑɣɑlɛ mɑ kʋpɑŋkɑ, n wɛ-m teu kɛ́ ɩsɩɩ ɑlukuku.
\q1 Pɛɛlɑɑ nɑɑkɩ-ŋ nɑ pɑ́ yɑɑkɩ-ŋ lɑŋhʋlʋmlɛ tʋ.
\q1 Nɑ tɑɣɑ ɑlɑɑ nɑ ɑsɑɑlɑɑ tɔtɔ nɑ́ sɑŋɩ-ŋ.
\q1
\v 10 Alʋ wei ɩ lɩɩkǝnɑ mpʋ nɑ ɩ́ teeki kɔkɔ ɩsɩɩ ilim,
\q1 nɑ ɩ́ tewɑ ɩsɩɩ ɩsɔtʋ?
\q1 Nɑ ɩ́ wɛ sɔɣɔntʋ ɩsɩɩ yoolɑɑ nɑ pɑ tuutɑnɑɑ?
\q1
\v 11 Mɑ tiiwɑ tɩɩŋ pee tɑɑlɛ tɑɑ
\q1 sɩ mɑ nɑɑkɩ tɛtɛkǝlɛ tɑɑ mǝhoo kʋfɑnɑ.
\q1 Nɑ mɑ́ nɑ́ sɩ tɩɩŋ wei pɑ yɑɑ sɩ lɛsɛŋ tɔ ɩ hɛlǝɣɩ,
\q1 nɑ tɩɩŋ lɛlǝŋ tʋɣɩ hɛtʋ nɑ.
\q1
\v 12 Mɑ tɑ cɛkǝnɑ, ɑmɑ mɑ kʋnyɩɩlʋɣʋ pǝsɑ-m kɛ́
\q1 ɩsɩɩ mɑ yǝlɑɑ kɑsɑɣɑmpiyɑ yoou kɛɛkɛnɑɑ.
\s2 (Alɑɑ nɑ pɛɛlɑɑ nyǝntʋ)
\q1
\v 13 Sulɑmii pɛɛlɔ nyɑ́, kɔɔ, kɔɔ,
\q1 Kɔɔ, nɑ tǝ́ nyǝnɩ-ŋ.
\q1 Pepe tɔɔ kɛ́ ɩ́ nyǝnǝɣɩ Sulɑmii tʋ?
\q1 Ɩ wɛ kɛ́ ɩsɩɩ kpekɑ nɑɑlɛ pɑɑlɛ.
\c 7
\s2 (Ɩfepu nyǝntʋ)
\q1
\v 1 Awulumpu pɛɛlɔ nyɑ́,
\q1 ɑmɑ nyɑ́ nɔɔhɛɛ tewɑ nyɑ́ ntɑŋkpɑlɑ tɑɑ.
\q1 Nɑ nyɑ́ tǝnɑɣɑ nɑ́ɑ́ wɛ ɩsɩɩ lɩɩtʋ nti niŋ tǝmlɛ tʋ lupɑ tɔ.
\q1
\v 2 Nyɑ́ lotu kulutɑɑ kɛ́.
\q1 Tǝ tɑɑ ɩɩ lɑŋǝɣɩ sʋlʋm sɔɔsʋŋ nyǝm.
\q1 Pǝyele tǝ cɑɣɑ kɛ́ ɩsɩɩ tɔɣɔnɑɣɑ pee huɣule kɛ yɑɑyenɑɑ hɛkʋ.
\q1
\v 3 Nyɑ́ hǝlɑ nɑɑlɛ wɛ kɛ́ ɩsɩɩ nɑsɛm tompiyɑ.
\q1
\v 4 Nyɑ́ luɣu nǝɣǝsǝnɑ ɩsɩɩ tuuŋ kelɑ ɑkele.
\q1 Nyɑ́ ɩsǝpee wɛ ɩsɩɩ Hɛsǝpɔŋ ɩcɑtɛ nɔɣɔ lɩɩnɑ.
\q1 Nɑ nyɑ́ mǝntɛ nɑ́ɑ́ sǝŋɑ ɩsɩɩ Lipɑŋ ɑkele,
\q1 wei ɩ tɔɔ pɑ feŋiɣinɑ Tɑmɑsɩ hɔɣɔlʋɣʋ tɔ.
\q1
\v 5 Nyɑ́ nyʋɣʋ sǝŋɑɑ kɛ́ ɩsɩɩ Kɑmɛɛlɩ pʋɣʋ
\q1 nɑ nyɑ́ nyɔɔsɩ nɑ́ɑ́ wɛ ɩsɩɩ nyɑɑlʋɣʋ ŋku
\q1 pɑ lii ɑkpɑɑyɑlɑ tɔ.
\q1 Pǝ tɔkɑ wulɑʋ nɔɣɔlʋ kɛ nyɑ́ nyɔɔsɩ kpɑsɩ tɑɑ.
\q1
\v 6 Mɑ sɔɔlʋɣʋ tʋ nyɑ́, ɑmɑ n tewɑɣɑ.
\q1 Nyɑ́ nyǝnʋɣʋ tɑɑ wɛ teu.
\q1
\v 7 N sǝŋɑɑ kɛ́ ɩsɩɩ pɑ́ɑ́ʋ.
\q1 Nɑ nyɑ́ hǝlɑ nɑ́ɑ́ wɛ ɩsɩɩ kpɑkpɑtukuŋ.
\q1
\v 8 Mɑ tʋ mɑ tɑɑ sɩ mɑɑ kpɑ pɑ́ɑ́ʋ ŋkʋ.
\q1 Nɑ mɑ́ sɛtɩ kʋ tukuŋ.
\q1 Nyɑ́ hǝlɑ ɑnɩ ɑ wɛ-m tɔtɔɣɔ ɩsɩɩ lɛsɛŋ tukuŋ.
\q1 Nyɑ́ feesiŋ wɛ-m sɔɔsʋŋ ɩsɩɩ tʋɣʋ pee.
\q1
\v 9 Nyɑ́ kʋyɔɣɔtʋtʋ wɛ leleŋ kɛ́ ɩsɩɩ sʋlʋm kʋpɑm.
\s2 (Pɛɛlɔ nyǝntʋ)
\q1 Pǝ kɛ́ mɑ kʋsɔɔlʋ sʋlʋm kɛ́.
\q1 Ɩsɩɩ pǝ kpeŋuɣu mpɑ pǝ kʋwɑ tɔ pɑ ntompee tɔɔ tɔ.
\q1
\v 10 Mɑ kʋsɔɔlʋ tǝnnɑ-m nɑ ɩ kʋnyɩɩlʋɣʋ wɛ mɑ tɔɔ.
\s1 Ye pɑ sɔɔlɑ-ŋ pǝ lɑŋhʋlʋmlɛ
\s2 (Pɛɛlɔ nyǝntʋ)
\q1
\v 11 Mɑ kʋsɔɔlʋ nyɑ́, kɔɔ nɑ tǝ́ lɩɩ.
\q1 Tɩɩ sʋʋ ɑcɑlɛɛ tɑɑ kɛ́ ɑhoo.
\q1
\v 12 Ɩlɛnɑ tǝ́ kpɑ lɛsɛŋ tɩɩŋ tɑɑlɛ kɛ tɑnɑŋ kʋpɑŋkʋ
\q1 nɑ tǝ nɑ́ sɩ pɑ tʋ hɛtʋ nɑ tǝ́ yɛɣɛlǝɣɩ?
\q1 Nɑ tɩɩŋ lɛlǝŋ tʋwɑ yɑɑ ɩ tɑ tʋ?
\q1 Tǝnɑɣɑ mɑɑ hʋlɩ-ŋ mɑ sɔɔlʋɣʋ tǝnɑ.
\q1
\v 13 Tɩɩŋ wei ɩ kʋsǝɣɩ ɑpɑlɑɑ kʋnyɩɩlǝŋ tɔ ɩ sɔɔsʋŋ kpɑwɑ.
\q1 Tǝ wɛnɑ tɑ́ nɔnɔɔsɩ tɛɛ kɛ́ tɩɩŋ pee kʋpɑnɑ.
\q1 Pɑɑ kʋpǝnɛɛ pɑɑ kʋfɑnɑ.
\q1 Mɑ kʋsɔɔlʋ nyɑ́, nyɑɣɑ mɑ sɩɩ-yɛ.
\c 8
\q1
\v 1 Ye mɑ nɑ-ŋ tɩɩ kɑɑwɑ too kʋlʋm,
\q1 mɑɑ wɑɣɑlɑɣɑ-ŋ ɑwɑlɩ kɛlɛ timpi timpi mɑ suliɣi-ŋ tɔ.
\q1 Ɩlɛ nɔɣɔlʋ tɑɑ yɩ-m.
\q1
\v 2 Mɑɑ ponɑ-ŋ nɑ mɑ́ sʋsɩ-ŋ mɑ too tɛ́ nɑ ń sɛɣɛsɩ-m.
\q1 Nɑ mɑ́ yele nɑ ń nyɔɔ mɑ sʋlʋm sɔɔsʋŋ nyǝm.
\q1 Mpi pǝ kɛ́ mɑ tʋɣʋ pile nyǝm tɔ.
\q1
\v 3 Te mɑ nyʋɣʋ nɑ nyɑ́ niŋ mpǝtǝŋ,
\q1 Kpɛkǝnɑ-m nɑ nyɑ́ ntɔɣɔŋ.
\q1
\v 4 Hɑɩ, Yosɑlɛm pɛɛlɑɑ mɛ, mɑ tuukinɑ-mɛ.
\q1 Ɩ́ tɑɑ pɑɑtɩ tɑ́ sɔɔlʋɣʋ nɑ pǝ wɑɑtʋ tɑ tɑtɑ.
\s2 (Pɛɛlɑɑ nyǝntʋ)
\q1
\v 5 Pɛɛlɔ wei ɩ kɔŋnɑ ntɛ́ nɑ wʋlɑɣɑ tɛtʋ tɔɔ,
\q1 nɑ ɩ́ nyǝkɑ ɩ kʋsɔɔlʋ tɔɔ?
\s1 Sɔɔlʋɣʋ toŋ
\s2 (Pɛɛlɔ nyǝntʋ)
\q1 Tʋɣʋ tɛɛ kɛ́ mɑ feesɑ-ŋ.
\q1 Tǝnɑɣɑ nyɑ́ too wei ɩ lʋlɑ-ŋ tɔ ɩ kpɑɣɑ nyɑ́ hɔɣɔ.
\q1
\v 6 Sɩɩ-m nyɑ́ lɑŋlɛ nɑ nyɑ́ ŋkpɑlǝŋɑ tɔɔ ɩsɩɩ kʋyʋsʋɣʋ.
\q1 Mpi tɔ, Sɔɔlʋɣʋ wɛ toŋ kɛ́ ɩsɩɩ sǝm.
\q1 Nɑ ɩsǝsɛɛmlɛ nɑ́ɑ́ wɛ tomɑ ɩsɩɩ ɑtɛtǝlɛ.
\q1 Sɔɔlʋɣʋ nyǝmɑ́ kɛ kɔkɔ nyǝnɑ kɛ́.
\q1 Kʋ kɛ́ Tɑcɑɑ kɔkɔ kɛ́.
\q1
\v 7 Lʋm sɔsɔɔm ɩɩ pǝsǝɣɩ nɑ pǝ́ teesi kʋ kɔkɔ.
\q1 Pǝyele pusi sɔsɔɔnsɩ kɑɑ li-kʋ.
\q1 Ye yʋlʋ cɛlɑ ɩ tǝyɑɣɑ wɛnɑʋ tǝnɑ
\q1 sɩ ɩ lɑɣɑsǝɣǝnɑ sɔɔlʋɣʋ, ɩsɩɩ pɑ tʋʋ-ɩ.
\s2 (Pɛɛlɔ tɑɑlʋnɑɑ)
\q1
\v 8 Tǝ wɛnɑ newɑɣɑ ɑlʋnyǝŋkɑ ŋkɑ kɑ tɑ lɩɩtɑ hǝlɑ tɔ.
\q1 Ɩsǝnɑɣɑ tɩɩ lɑ kʋyɑkʋ ŋku
\q1 pɑɑ yɔɣɔtɩ kɑ́ ɑsɑsɑɑlɛ tɔm tɔ?
\q1
\v 9 Ye kɑ tɔkɑ kɑ tɩ nɑ kɑ́ kisi yɛlɛyɛlɛ,
\q1 tɩɩ yɔɔlǝnɑ-kɛ nɑ kɑcɔkɑ wontu.
\q1 Amɑ ye kɑ pǝsɑ ɩsɩɩ yǝlɑɑ tǝnɑ nɔnɔɣɔ,
\q1 tɩɩ tǝkɩ-kɛ nɑ kpeŋkpelɑsɩ toŋ nyǝnsɩ.
\s2 (Pɛɛlɔ nyǝntʋ)
\q1
\v 10 Mɑ tɔkɑ mɑ tǝɣɩ, mɑ fɛɩ yɛlɛyɛlɛ tɑɑ.
\q1 Mɑ hǝlɑ sǝŋɑɑ kɛ́ ɩsɩɩ ɑkelenɑɑ.
\q1 Mpʋ tɔ, mɑ kʋsɔɔlʋ nyǝnǝɣɩ-m wei ɩ kɔŋnɑ hɛɛsʋɣʋ tɔɣɔ.
\s2 (Ɩfepu nyǝntʋ)
\q1
\v 11 Ḿpʋ́ɣʋ́ Sɑlʋmɔŋ tɔmɑ sɩ:
\q1 Mɑ wɛnɑ tɩɩŋ wei pɑ yɑɑ sɩ lɛsɛŋ tɔ ɩ tɑɑlɛ
\q1 kɛ timpi pɑ yɑɑ sɩ Pɑɑlɩ-Hɑmɔŋ tɔɣɔ.
\q1 Mɑ yelinɑ-tɛɣɛ tɑŋlɑɑ,
\q1 pɑɑ wei ɩ kɔŋnɑ-m tǝ kʋlʋlʋm kɛ liɣitee nyǝɣǝtʋ iyɑɣɑ (1000).
\q1
\v 12 Mɑ tɩɩŋ tɑɑlɛ wɛ mɑ kiŋ kɛ́.
\q1 Sɑlʋmɔŋ nyɑɑ kpɑɣɑ liɣitee nyǝɣǝtʋ iyɑɣɑ (1000).
\q1 Lǝsɩ tǝ tɑɑ kɛ́ nyǝɣǝtʋ ŋmʋnʋɣʋ (200) nɑ ń cɛlɑ tɑŋlɑɑ.
\q1
\v 13 Nyɑ́ wei n wɛ hɑlǝm tɑɑ tɔ,
\q1 nyɑ́ tɑɑpɑlɑɑ kemɑ ŋkpɑŋŋ sɩ pɑ nɩɩkɩ nyɑ́ nɔɣɔ.
\q1 Ɩlɛ yele nɑ mɑ́ nɩɩ-kɛ.
\q1
\v 14 Mɑ kʋsɔɔlʋ nyɑ́ kpɑɣɑ ɑsewɑ ɩsɩɩ nɑsɛm yɑɑ
\q1 kɑpǝlǝŋɑ kɛ tulɑɑlʋnɑɑ pʋɣʋ tɑɑ nɑ ń kɔɔ.