\id RUT - Lokpa Bible portions [dop] -Benin 1999 (web edition -2017)
\ide UTF-8
\h Luuti
\toc1 LUUTI TƆM TAKƎLAƔA
\toc2 Luuti
\toc3 Luut
\mt1 LUUTI
\mt2 TƆM TAKƎLAƔA
\imt1 Kʋtʋlʋtʋ
\ip Ɩsɛɣɛlɩ nyǝ́mɑ pɑɑsǝnlɑɑ wɑɑtʋ tɑɑ kɛ́ Luuti tɔm lɑpɑ. Tǝ kɑlǝɣɩ tɑkǝlɑɣɑ tɑɑ sɩ Luuti wei ɩnɩ ɩ kɑ kɛ́ piitim lɛmpɩ tʋ tɔ, ɩ sʋʋwɑ Ɩsɔ piitim tɑɑ. Ɩ lɑpɑ Ɩsɔ kɛ́ kʋpɑntʋ nɑ ɩ pɑɑlʋ sɔlʋ piitim nyǝ́mɑ tɔtɔ. Ɩsɔ lɛɛtǝɣɩ kʋpɑntʋ kɛ mpɑ pɑ́ lɑkɩ-tǝɣɩ lɛlɑɑ tɔɣɔ. Yɑɑsi ɩnɩ ɩ lɑpɑ nɑ Luuti nɑ ɩ pɑŋ pɑ́ cɑɣɑnɑ pɑ tɩ. Tɔm tǝnɛ tǝ́ hʋlǝɣǝnɑ-tʋɣʋ ɩsǝnɑ Ɩsɔ lǝsɑ piitim lɛmpɩ tʋ nɑ ɩ́ sʋsɩ-ɩ Yutɑ piitim nyǝ́mɑ tɑɑ tɔ. Hɑlɩ piitim lɛmpɩ tʋ ɩnɩ ɩ lʋlǝnɑ nɑ pǝ́ lʋlɩ Ɩsɛɣɛlɩ wulɑʋ sɔsɔ Tɑfiiti nɑ tɑ́ Wɑɑsʋlʋ sɔsɔ Yesu Kilisiti.
\iot Ɩsǝnɑ pɑ fɑɣɑ Luuti tɑkǝlɑɣɑ tɔ:
\io1 Noyomii tʋwɑ ɩ tɑɑ sɩ ɩ́ mǝlǝɣɩ Pɛtǝlɛhɛm, titite \ior 1\ior*
\io1 Luuti nɑ Poosi pɑ sulɑɑ, titite \ior 2–3\ior*
\io1 Poosi hɔmɑ Luuti kɛ leelu, titite \ior 4\ior*
\c 1
\s1 Ilimɛlɛkɩ nɑ ɩ nyǝ́mɑ pɑ wɑhɑlɑ
\p
\v 1 Ḿpʋ́ɣʋ́ nyɔɣɔsɩ ɑnɑɑm nɔɣɔlʋ ɩ lɩɩwɑ Ɩsɛɣɛlɩ tɛtʋ tɑɑ kɛ́ wɑɑtʋ wei Pɑɑsǝnlɑɑ nyǝnɑɣɑ yǝlɑɑ tɔɔ tɔ. Mpʋ pǝ lɑpǝnɑ nɑ Yutɑ tɛtʋ ɩcɑtɛ Pɛtǝlɛhɛm ɑpɑlʋ nɔɣɔlʋ nɑ ɩ ɑlʋ nɑ ɩ pǝyɑlɑɑ nɑɑlɛ pɑ polo Mowɑpʋ tɛtʋ tɑɑ nɑ pɑ́ cɔɔsɩ tǝnɑ. 
\v 2 Pɑ yɑɑkɑɣɑ ɑpɑlʋ ɩnɩ sɩ Ilimɛlɛkɩ nɑ ɩ ɑlʋ sɩ Noyomii, nɑ ɩ pǝyɑlʋ kɑncɑɑlɑɣɑ nyǝŋ sɩ Mɑlɔŋ nɑ nɑɑlɛ nyǝŋ sɩ Kiliyoŋ. Pɑɑ kɛ́ Ɩfǝlɑtɑ lʋlʋɣʋ nyǝ́mɑ kɛ́.
\p
\v 3 Tǝnɑɣɑ Noyomii pɑɑlʋ Ilimɛlɛkɩ sǝpɑ nɑ pǝ́ yele ɩ nɑ ɩ pǝyɑlɑɑ nɑɑlɛ. 
\v 4 Ḿpʋ́ɣʋ́ pɛlɛ pɑ kpɑɣɑ Mowɑpʋ ɑlɑɑ. Pɑ yɑɑ lɛlʋ sɩ Opɑ, nɑ lɛlʋ sɩ Luuti. Pɑ cɑɣɑ tǝnɑ ɩsɩɩ pɩɩsɩ nɑɑnʋwɑ. 
\v 5 Ɩlɛnɑ Mɑlɔŋ nɑ Kiliyoŋ pɛlɛ pɑ sɩ tɔtɔ, nɑ pǝ́ yele Noyomii kɛ ɩ tike.
\s1 Luuti tǝŋʋɣʋ kɛ ɩ pɑŋ
\p
\v 6-7 Ḿpʋ́ɣʋ́ kʋyɑkʋ nɑkʋlɩ Noyomii nɩɩwɑ Mowɑpʋ tɑɑ sɩ Tɑcɑɑ pɑɑsǝnɑ Ɩsɛɣɛlɩ nyǝ́mɑ nɑ ɩ́ hɑ-wɛɣɛ tɔɣɔnɑɣɑ. Ɩlɛnɑ ɩ́ kʋlɩ sɩ ɩ kpeŋ. Ɩ́ nɑ ɩ poolɑɑ nɑɑlɛ pɑ tʋ mpɑɑʋ sɩ pɑ mǝlǝɣǝnɑ Yutɑ tɛtʋ tɑɑ. 
\v 8 Ntɛnɑ Noyomii tɔ ɩ poolɑɑ mpɛ sɩ: Pɑɑ wei ɩ́ kpe ɩ cɑlɑɣɑ. Tɑcɑɑ ɩ́ lɑ-mɛɣɛ kʋpɑntʋ ɩsɩɩ mǝ lɑpʋ mɑ nɑ mɑ sɔlʋnɑɑ tɔ. 
\v 9 Ɩsɔ ɩ́ hɑ-mɛɣɛ ɑpɑlɑɑ nɑ ɩ́ hɛɛsɩ pɑ tɛɛsɩ tɑɑ.
\p Ɩlɛnɑ Noyomii lɑ-wɛɣɛ pǝlɑpɑ wulee nɑ pɛlɛ pɑ́ tʋlɩ nɔɔsɩ nɑ pɑ́ wii tǝkpoo. 
\v 10 Ḿpʋ́ɣʋ́ pɑ tɔmɑ pɑ pɑŋ sɩ: Aɑɩ yoo, tɩɩ tǝŋɩ-ŋ kɛ́ nɑ tǝ́ polo nyɑ́ nyǝ́mɑ tɛ.
\p
\v 11 Tǝnɑɣɑ Noyomii cɔwɑ sɩ: Ɩ́ mǝlɩ mɑ pɛɛlɑɑ. Pepe tɔɔ kɛ́ ɩ́ tǝŋǝɣɩ-m? Piyɑ tɑ kɑɑsɩ mɑ tɑɑ sɩ ɩ́ kɑ́ sɑɑ-sɩ. 
\v 12 Mpʋ tɔ, ɩ́ mǝlɩ. Mɑ sulɑ pɩɩʋ, mɑ kɑɑ tɑsɑ sɑɑʋ. Nɑ ye mɑ tɩɩ tɛɛlǝɣɩ pǝyɑɣɑ ntɛnɑ mɑ́ kpǝtǝnɑ ɑpɑlʋ kɛ ɑhoo ɑnɛ ɑ mɑɣɑmɑɣɑ, nɑ mɑ́ lʋlɩ ɑpɑlʋpiyɑ, 
\v 13 ɩlɛ ɩ́ yele ɑpɑlɑɑ sɑɑʋ ntɛ́ nɑ ɩ́ tɑŋ mpɛ ɩnɩ nɑ pɑ́ lɑ yǝlɑɑ nɑ ɩ́ sɑɑ-wɛ? Aɑɩ, mɑ pɛɛlɑɑ, mɑ lɑŋlɛ wɑkǝlǝnɑ-mɛɣɛ. Mpi pǝ tɔɔ tɔ Tɑcɑɑ hʋlɑ-m mpǝle kɛ́.
\p
\v 14 Ɩlɛnɑ Noyomii poolɑɑ mpɛ pɑ tɑsɑ nɔɔsɩ tʋlʋɣʋ tɔtɔ nɑ pɑ́ wii sɔsɔm. Ḿpʋ́ɣʋ́ wei pɑ yɑɑ sɩ Opɑ tɔ ɩ lɑpɑ ɩ pɑŋ kɛ́ pǝ lɑpɑ wulee nɑ ɩ́ mǝlɩ kpente. Amɑ Luuti nɑ́ nyɔkǝlǝnɑ Noyomii.
\p
\v 15 Tǝnɑɣɑlɛ Noyomii tɔmɑ Luuti sɩ: Nyǝnɩ, nyɑ́ tɑɑpɑlʋ mǝlɑ ɩ nyǝ́mɑ nɑ ɩ ɑtɛtʋnɑɑ pɑ cɔlɔ, nyɑɑ mǝlɩ mpʋ tɔtɔ.
\p
\v 16 Ntɛnɑ Luuti cɔ-ɩ sɩ: Tɑɑ cɑɑlɩ-m sɩ mɑ́ yele-ŋ nɑ mɑ́ mǝlɩ. Nyɑ́ tǝpote mɑ tǝpote, nyɑ́ tǝcɑɣɑlɛ mɑ nyǝntɛ, nyɑ́ piitim kɑ́ wɛɛ mɑ nyǝm, nyɑ́ Ɩsɔ kɑ́ wɛɛ mɑ nyǝŋ. 
\v 17 Timpi n kɑ sɩ tɔ tǝnɑɣɑ mɑɑ sɩ nɑ pɑ́ pi-m. Ye mɑ nɑ-ŋ tǝ yɑwɑ nɑ pǝ́ tɑ́ kɛnɑ sǝm pɑɑsi. Tɑcɑɑ ɩ́ lɑnɑ-m ɩsǝnɑ ɩ sɔɔlɑɑ tɔ.
\p
\v 18 Noyomii nɑwɑ sɩ Luuti sɛɛsɑ ɩsǝlɛ sɩ ɩ kɑ́ tǝŋɩ-ɩ kɛ́ ɩ kɑ́ tǝŋɩ-ɩ, ɩlɛnɑ ɩ́ yele-ɩ cɑɑlʋɣʋ.
\p
\v 19 Ɩlɛnɑ pɑ́ kpɛntɩ nɑ pɑ́ tɛɛ Pɛtǝlɛhɛm. Noyomii pɑ tɑlɑɑ ɩlɛnɑ ɩcɑtɛ tǝnɑ ɑlɑɑ yǝpǝlǝɣɩ ɩ tɔm sɩ: Ɩsɩɩ Noyomii kɛlɛ? 
\v 20 Ntɛnɑ ɩ nɔɣɔ tǝkpɑʋ sɩ: Ɩ́ tɑɑ yɑɑ-m Noyomii, ɩ́ yɑɑ-m Mɑlɑ. Mpi tɔ, Tomɑ tǝnɑ tʋ wɑkǝlɑ mɑ lɑŋlɛ kɛ sɔsɔm kɛ́. 
\v 21 Mɑ tɛɛkɑɣɑ wɑɑtʋ wei tɔ pǝ cɑɣɑnɑ-m kɛ́. Ɩlɛnɑ Tɑcɑɑ mǝlǝɣǝnɑ-m mɑ niŋ kɑkpɑsɩ, ɩ lɑŋlɛ tɑ hɛɛnɑ-m. Tomɑ tǝnɑ tʋ mɑpɑ-m kpɑ́tʋ́ɣʋ́, ɩlɛ pepe tɔɔ kɛ́ ɩ́ tɑsǝɣɩ-m Noyomii kɛ yɑɑʋ?
\p
\v 22 Ɩsǝnɑ Noyomii nɑ ɩ poolu Mowɑpʋ tʋ Luuti pɑ mǝlʋɣʋ lɑpɑ tɔɣɔlɛ. Pɑ tɑlɑ Pɛtǝlɛhɛm tɑɑ ɩlɛ pɑ cɑɑlǝɣɩ kʋmtʋ ntɛ́.
\c 2
\s1 Luuti cɑlǝsʋɣʋ kɛ kumkum
\p
\v 1 Noyomii pɑɑlʋ yʋlʋ nɔɣɔlʋ ɩ kɑ wɛnnɑ. Apɑlʋ ɩnɩ ɩ sʋʋ toŋ kɛ́ nɑ ɩ́ wɛnɑ nyʋɣʋ. Pɑ yɑɑkɑɣɑ-ɩ sɩ: Poosi nɑ ɩ kɛ́ Ilimɛlɛkɩ lʋlʋɣʋ tʋ. 
\v 2 Ḿpʋ́ɣʋ́ kʋyɑkʋ nɑkʋlɩ Luuti tɔmɑ Noyomii sɩ: Mɑɑ kpɑ tɑɑlɛ nɑ mɑ́ cɑlǝsɩ kumkum kɛ́ kʋpɑŋ nɔɣɔlʋ ɩ hɑlǝm tɑɑ. Ntɛnɑ ɩ́ cɔ-ɩ sɩ: Polo, mɑ pɛɛlɔ.
\p
\v 3 Ɩlɛnɑ Luuti kpɑ tɑɑlɛ nɑtǝlɩ tǝ tɑɑ nɑ ɩ́ tǝŋǝɣɩ kʋntɑɑ nɑ ɩ́ cɑlǝsǝɣɩ. Sɛsɛ ɩlɛ Poosi tɑɑlɛ ntɛ́.
\p
\v 4 Ḿpʋ́ɣʋ́ kʋyɑkʋ ŋkʋ Poosi kpɑ tɑɑlɛ kɛ kʋntɑɑ cɔlɔ nɑ ɩ́ sɛɛ-wɛ sɩ: Tɑcɑɑ ɩ́ wɛɛ mǝ wɑɑlɩ. Nɑ pɛlɛ pɑ́ tisi sɩ: Ɩsɔ ɩ́ kooli-ŋ kʋpɑntʋ.
\p
\v 5 Mpʋɣʋlɛ Poosi pɔɔsɑ tǝmlɛ tʋ wei ɩ feŋiɣi kʋntɑɑ tɔɔ tɔ sɩ: Le tʋ kɛ ɑsɑɑlʋ ɩnɛ?
\p
\v 6 Kɛlɛnɑ tǝmlɛ tʋ cɔ-ɩ sɩ: Mowɑpʋ tʋ kɛ́, ɩ́ nɑ Noyomii pɑ kɔmnɑ. 
\v 7 Ɩ sǝlǝmɑ-tʋɣʋ sɩ ɩ tǝŋǝɣɩ kʋntɑɑ nɑ ɩ́ cɑlǝsɩ nɑ ɩ́ tɔɔsǝɣɩ lɔɔtʋ nti nti pǝ sɔɔwɑ tɔ. Hɑtoo tɑnɑŋ tɛɛ ɩ kɔm nɑ ɩ́ luŋ tɔ nɔɔnɔɔ tike ntɛ́ ɩ hɛɛsɑ tɔm kʋlʋm.
\p
\v 8 Ɩlɛnɑ Poosi tɑsɑ Luuti kɛ lɑɣɑtʋ sɩ: Tɑɑ kʋlɩ sɩ ń puki nɔɣɔlʋ tɑɑlɛ tɑɑ kɛ cɑlǝsʋɣʋ. Cɑɣɑ mɑ tǝmlɛ nyǝ́mɑ ɑlʋnyǝmɑ kiŋ cǝnɛ. 
\v 9 Nyǝnǝɣɩ timpi pɑ kʋŋ tɔ nɑ ń tǝŋ pɑ wɑɑlɩ. Mɑ heelɑ mɑ tǝmlɛ nyǝ́mɑ ɑpɑlʋnyǝmɑ sɩ pɑ́ tɑɑ kɑɣɑtɩ-ŋ. Ye lʋkɔtʋ ɩ́ kpɑ-ŋ n polo hǝyɑɣɑ tɑɑ nɑ ń nyɔɔ lʋm mpi pɑ́ luwɑ tɔ.
\p
\v 10 Tǝnɑɣɑlɛ Luuti hǝntɑ Poosi kɛ ɑtɛ nɑ ɩ́ tɔ sɩ: Ɩsǝnɑɣɑ pǝ lɑpɑ nɑ ń pɑɑsǝɣǝnɑ-m nɑ ń lɑkɩ-m kʋpɑntʋ, ɑnɩ mɑɣɑ mʋʋlʋ?
\p
\v 11 Kɛlɛnɑ Poosi cɔ-ɩ sɩ: Pɑ kɛɛsɑ-m pǝ tǝnɑ mpi n lɑpɑ nyɑ́ pɑŋ kɛ́ nyɑ́ pɑɑlʋ sǝm wɑɑlɩ tɔ. Nɑ ɩsǝnɑ n yelɑ nyɑ́ cɑɑ nɑ nyɑ́ too nɑ nyɑ́ tɛtʋ nti tǝ tɑɑ pɑ lʋlɑ-ŋ tɔ, nɑ ń polo yǝlɑɑ mpɑ n tɑɑ nyɩ tɔ pɑ tɛ tɔ. 
\v 12 Ɩsɛɣɛlɩ Ɩsɔ Tɑcɑɑ wei n kɔmɑ sɩ n tʋɣɩ kpʋlʋɣʋ tɔ ɩ́ lɛɛtɩ-ŋ mpi n lɑpɑ tɔ tǝcɩʋcɩʋ.
\p
\v 13 Ɩlɛnɑ Luuti cɔ sɩ: Hɑɩ, mɑ cɛ n pɑɑsǝnɑ-m teu kɛ́. Mpi tɔ, nyɑ́ hɛɛsǝnɑ mɑ lɑŋlɛ nɑ ń yɔɣɔtǝnɑ-m ɩsɩɩ n kɑ nyǝmɑ-m. Pɑɑ nɑ mpʋ tɔ, mɑ tɑ hɑŋnɑ nyɑ́ tǝmlɛ tʋ nɔɣɔlʋ.
\p
\v 14 Pǝ kɔmɑ nɑ pǝ́ tɑlɑ tɔɣɔʋ ɩlɛnɑ Poosi tɔ Luuti sɩ: Kɔɔ tǝ tɔɣɔ. Cosiɣi tɔɣɔnɑɣɑ nɑ ń liiki tuusi tɑɑ.
\p Ɩlɛnɑ Luuti cɑɣɑ kʋntɑɑ cɔlɔ, nɑ pɑ́ cosi-ɩ pee wenɑ pɑ toŋɑɑ tɔ nɑ ɩ́ tɔɣɔ nɑ ɩ́ hɑɣɑ nɑ pǝ́ kɑɑsɩ nɑ ɩ́ sɩɩ. 
\v 15 Ɩlɛnɑ ɩ́ kʋlɩ cɑlǝsʋɣʋ, nɑ Poosi heeli ɩ tǝmlɛ nyǝ́mɑ sɩ: Ɩ́ yele nɑ Luuti cɑlǝsɩ cɑmnɑɑ kilɑ tɔtɔ, ɩ́ tɑɑ tɑŋɩ-ɩ. 
\v 16 Ɩ́ yeki lɔɔtʋ lɛntɩ nɑ ɩ́ tɔɔsǝɣɩ, ɩ́ tɑɑ kɑlǝnɑ-ɩ.
\p
\v 17 Ḿpʋ́ɣʋ́ Luuti cɑlǝsɑ tɑɑlɛ ńtɛ́ tǝ tɑɑ hɑlǝnɑ tɑɑnɑɣɑ. Ɩlɛnɑ ɩ́ mɑ́ nɑ pee mɑɣɑnɑ ɩsɩɩ kiloonɑɑ hiu nɑ nɑɑnʋwɑ. 
\v 18 Nɑ ɩ́ kpɑɣɑ nɑ ɩ́ kpeenɑ nɑ ɩ́ hʋlɩ ɩ pɑŋ. Ɩlɛnɑ ɩ́ lǝsɩ tɔɣɔnɑɣɑ ŋkɑ kɑɑ kɑɑsɑɑ tɔ nɑ ɩ́ cɛlɛ-ɩ tɔtɔ. 
\v 19 Ḿpʋ́ɣʋ́ Noyomii pɔɔsɑ-ɩ sɩ: Leɣe n cɑlǝsɑ sɑŋɑ? Awe tɑɑlɛ kɛ n kpɑwɑ? Ɩsɔ ɩ́ kooli kʋpɑntʋ kɛ wei ɩnɩ ɩ pɑɑsǝnɑ-ŋ tɔ.
\p Ɩlɛnɑ Luuti sɩ: Pɑ yɑɑ-ɩ sɩ Poosi. 
\v 20 Ḿpʋ́ɣʋ́ Noyomii tɔmɑ sɩ: Mɑ nyǝ́mɑ sɩ Tɑcɑɑ lɑpɑ weesiŋ nyǝ́mɑ tɑɣɑ kʋpɑntʋ nɑ tɑ sǝtɑɑ tɔtɔ. Ɩsɔ ɩ́ kooli ɑpɑlʋ ɩnǝɣɩ kʋpɑntʋ.
\p Apɑlʋ ɩnɩ ɩ kɛ́ tɑ́ lʋlʋɣʋ nyǝ́mɑ tɑɑ lɛlʋ wei ɩ pǝsǝɣɩ nɑ ɩ́ pɑɑsǝnɑ-tʋ tɔɣɔ.
\p
\v 21 Kɛlɛnɑ Luuti sɩ: Hɑlɩ ɑpɑlʋ ɩnɩ ɩ heelɑ-m kɛ́ sɩ mɑ́ tǝŋǝɣɩ ɩ tǝmlɛ nyǝ́mɑ nɑ mɑ́ cɑlǝsǝɣɩ, hɑlǝnɑ ɩ kʋmtʋ nɑ tǝ tɛm.
\p
\v 22 Ntɛnɑ Noyomii sɩ: Pǝ wɛ teu mɑ pɛɛlɔ, tǝŋ mpɛ. Ye nɔɣɔlʋ tɑɑlɛ tɑɑ pɑ tɔɣɔnǝɣɩ-ŋ kɛ́.
\p
\v 23 Ḿpʋ́ɣʋ́ Luuti sɑɑlɑ Poosi tǝmlɛ nyǝ́mɑ kiŋ kɛ mpʋ nɑ ɩ́ cɑlǝsǝɣɩ, hɑlǝnɑ kʋmtʋ tɛ́. Nɑ ɩ́ nɑ ɩ pɑŋ pɑ́ wɛ mpʋ.
\c 3
\s1 Noyomii tɑɣɑnʋɣʋ kɛ Luuti ɑsɑsɑɑlɛ
\p
\v 1 Ḿpʋ́ɣʋ́ Noyomii tɔmɑ ɩ poolu sɩ: Mɑ pɛɛlɔ, mɑ cɑɑ kɛ́ sɩ ń hiki tǝcɑɣɑlɛ nɑ ń hɛɛsɩ. 
\v 2 Ntɔŋ ń nyǝmɑ́ sɩ nyɑnɑ Poosi wei ɩnɩ ɩ tǝmlɛ nyǝ́mɑ ɩ́ kʋmɑ tɔ ɩ kɛ́ tɑ́ yʋlʋ kɛ́. Tɑɑnɑɣɑ kɑnɛ pɑ mɑkɩ ɩ tɔɣɔnɑɣɑ kɛ kɑtɑɣɑ tɑɑ. 
\v 3 Mpʋ tɔ, sɔ lʋm, tʋ tulɑɑlʋ, suu nyɑ́ wontu kʋpɑntʋ. Ɩlɛnɑ ń tii kɑtɑɣɑ tɑɑ. Amɑ yele nɑ ɩ́ tɛ tɔɣɔʋ ɩlɛnɑ ɩ́ nɑ-ŋ. 
\v 4 Pǝlɛ pǝ wɑɑlɩ ɩlɛnɑ ń feŋ nɑ ń nɑ́ ɩ tǝhǝntǝlɛ, ɩlɛnɑ ń kɛɛlɩ\f ɑ \fr 3:4 \fr*\fk kɛɛlɩ: \fk*\ft Kɛɛlɩ nɔɔhɛɛ tɔɔ hʋwɛɛ ntɛ́ sɩ Luuti\ft*\f* ɩ nɔɔhɛɛ tɔɔ nɑ ń hǝntɩ. Ɩ mɑɣɑmɑɣɑ ɩ kɑ́ heelinɑ-ŋ nti ń kɑ lɑ tɔ. cɑɑkɩ sɩ Poosi ɩ́ hɔmɩ-ɩ leelu.
\p
\v 5-6 Ḿpʋ́ɣʋ́ Luuti cɔwɑ sɩ: Mɑɑ lɑ ɩsɩɩ n heeluɣu-m tɔ. Ɩlɛnɑ ɩ́ tɛɛ. 
\v 7 Poosi tɔɣɑɑ nɑ ɩ́ nyɔɔ nɑ ɩ lɑŋlɛ hʋlʋmɩ, ɩlɛnɑ ɩ́ polo ɩ́ hǝntɩ tɔɣɔnɑɣɑ huɣule kite. Ntɛnɑ Luuti polo tǝhɛɛ kɛ wɑɑtʋ wei ɩ toowɑ tɔ nɑ ɩ́ kɛɛlɩ ɩ nɔɔhɛɛ tɔɔ nɑ ɩ́ hǝntɩ. 
\v 8 Apɑlʋ ɩnɩ ɩ nyɑmɑ nɑ ɩ́ fe ɑhoo hɛkɑ nɑ ɩ́ nyǝnɩ ɩlɛnɑ ɩ́ mɑɣɑnɑ ɑlʋ hǝntɑ ɩ nɔɔhɛɛ tɛɛ. 
\v 9 Ɩlɛnɑ ɩ́ pɔɔsɩ sɩ: Aweɣe-ɩ?
\p Ntɛnɑ Luuti cɔ sɩ: Mɑɣɑ nyɑ́ pɛɛlɔ Luuti kɛ́. Hɑɩ, wɑɑsɩ-m. Mpi tɔ, nyɑ́ wɛnnɑ mpɑɑʋ sɩ ń yɑ-m.
\p
\v 10 Ɩlɛnɑ Poosi tɔmɩ-ɩ sɩ: Tɑcɑɑ ɩ́ kooli-ŋ kʋpɑntʋ, mɑ pɛɛlɔ. Nyɑ́ yɑɑsi kɑntǝkɑɣɑ nyǝŋ ɩnɛ ɩ hʋlǝɣǝnɑ ɩsǝnɑ n mɑtǝnɑ nyɑ́ pɑŋ yǝlɑɑ tɔ nɑ pǝ́ kǝlɩ kɑncɑɑlɑɣɑ nyǝŋ. Mpi tɔ, n tɑ pɛɛkɩ ɩfepiyɑ liɣitee nyǝ́mɑ yɑɑ kʋnyɔntʋnɑɑ. 
\v 11 Mpʋ tɔ, mɑ pɛɛlɔ tɑɑ nǝɣǝsɩ. Mpi n cɑɑkɩ tɔ mpǝɣɩ mɑɑ lɑ-ŋ. Mpi tɔ, ɩcɑtɛ yǝlɑɑ tǝnɑ nyǝ́mɑ sɩ n kɛ́ ɑlʋ kʋpɑŋ. 
\v 12 Tɑmpɑnɑ pǝ wɛɛ sɩ mɑ́ yɑ-ŋ yɑɑ, ɩlɛ nɔɣɔlʋ nɑ nyɑ́ pɑŋ pɑ lʋlʋɣʋ kǝlɑ kɑɑʋ kɛ mɑ. 
\v 13 Sʋʋ cǝnɛ, ye pǝ femɑ mɑɑ pɔɔsɩ-ɩ nɑ mɑ́ nɑ́ sɩ ɩ kɑ́ yɑ-ŋ yɑɑ ɩsǝnɑ? Ye ɩ luɣu fɛɩ ɩlɛ, mɑ tuukinɑ Tɑcɑɑ sɩ mɑɑ yɑ-ŋ. Hǝntɩ mpʋ nɑ pǝ nyɑɑlɩ.
\p
\v 14 Ɩlɛnɑ Luuti hǝntɩ ḿpʋ́ɣʋ́ Poosi nɔɔhɛɛ tɛɛ. Poosi tɑɑ cɑɑkɩ sɩ nɔɣɔlʋ ɩ́ nyɩ sɩ Luuti kɔmɑ kɑtɑɣɑ tɑɑ. Pǝ tɔɔ kɛ́ ɩ kʋsɑ-ɩ sɑɑ wei pǝ wɛ tǝŋmɛntɛŋmɛntɛ tɔ sɩ nɔɣɔlʋ ɩ́ tɑɑ nyǝmɩ-ɩ. 
\v 15 Ɩlɛnɑ Poosi tɔmɩ-ɩ sɩ: Hɛtɩ nyɑ́ tɛkɛntɛ nɑ ń tɔkɩ-ɩ teu.
\p Ɩlɛnɑ ɩ́ mɑɣɑsɩ tɔɣɔnɑɣɑ pee ɩsɩɩ kiloonɑɑ nɑɑnʋwɑ nɑ kɑkpɑsɩ nɑ ɩ́ sʋkɩ-ɩ. Ɩlɛnɑ ɩnɩ ɩ kpɑ ɩcɑtɛ tɑɑ. 
\v 16 Luuti mǝlɑ ɩ pɑŋ cɔlɔ ɩlɛnɑ ɩ́ pɔɔsɩ-ɩ ɩ mpɑɑʋ ɑlɑɑfǝyɑ tɔɔ.
\p Ḿpʋ́ɣʋ́ Luuti kɛɛsɑ-ɩ ɩsǝnɑ ɑpɑlʋ ɩnɩ ɩ pɑɑsǝnɑ-ɩ tɔ. 
\v 17 Nɑ ɩ́ tɑsɑ sɩ: Hɑlɩ ɩnɩ ɩ hɑnɑ-m tɔɣɔnɑɣɑ pee ɑnɛ ɑ tǝnɑ sɩ pǝ fɛɩ sɩ mɑ́ mǝlɩ nyɑ́ kiŋ kɛ niŋ kɑkpɑsɩ.
\p
\v 18 Tǝnɑɣɑlɛ Noyomii sɩ: Mɑ pɛɛlɔ cɑɣɑ tǝpɑmm, nɑ ń nɑ́ ɩsǝnɑ pɩɩ tɛɛsǝnɑ tɔ. Mpi tɔ, ye ɑpɑlʋ ɩnɛ ɩ tɑ nɑ tɔm tǝnɛ tǝ tǝnɑɣɑ kɛ sɑŋɑ ɩɩ hɛɛsǝɣɩ.
\c 4
\s1 Poosi hɔŋ Luuti kɛ leelu
\p
\v 1 Ḿpʋ́ɣʋ́ Poosi lɩɩ nɔnɔɣɔ timpi pɑ hʋʋkɩ tɔm tɔ nɑ ɩ́ cɑɣɑ. Ɩlɛ Ilimɛlɛkɩ lʋlʋɣʋ tʋ wei ɩ tɔm ɩ kɑ yɔɣɔtɑɑ sɩ pɩɩ wɛɛ sɩ ɩ́ wɑɑsɩ sǝtʋ tǝyɑɣɑ yǝlɑɑ tɔ ɩ tɛɛ kɛlɛ. Ɩlɛnɑ ɩ́ yɑɑ-ɩ sɩ: Apɑŋ nyɑ́, kɔɔ ń cɑɣɑ.
\p Ɩlɛnɑ ɑpɑlʋ ɩnɩ ɩ polo. 
\v 2 Ḿpʋ́ɣʋ́ Poosi sǝŋsɑ ɩcɑtɛ sɔsɑɑ kɛ nɑɑnʋwɑ. Pɑ kɔmɑ nɑ pɑ́ cɑɣɑ 
\v 3 ɩlɛnɑ ɩ́ tɔ wei ɩnɩ pɩɩ wɛɛ sɩ ɩ wɑɑsɩ sǝtʋ tǝyɑɣɑ yǝlɑɑ tɔ sɩ: Noyomii wei ɩ lɩɩnɑ Mowɑpʋ tɔ ɩ pɛɛtǝɣɩ tɑ́ yʋlʋ Ilimɛlɛkɩ tɛtʋ. 
\v 4 Ɩlɛ mɑ heeliɣi-ŋ sɩ, ń yɑ-tǝɣɩ ɩcɑtɛ nyǝ́mɑ nɑ sɔsɑɑ pɑ ɩsɛntɑɑ. Ye n kɑ yɑ-tɩ ɩlɛ n yɑ-tɩ. Ye nyɑ́ luɣu fɛɩ ɩlɛ n heeli-m nɑ mɑ́ cɛkǝnɑ. Mpi pǝ tɔɔ tɔ, nyɑɣɑlɛ nɔɣɔ tʋ, nyɑ́ wɑɑlɩ kɛ́ mɑ́.
\m Ntɛnɑ ɩ́lɛ́ ɩ cɔ-ɩ sɩ: Tɔʋ, mɑ nɩɩwɑ. 
\v 5 Kɛlɛnɑ Poosi sɩ ye n kɑ yɑ-tǝɣɩ Noyomii niŋ tɑɑ ɩlɛ n kpɛnnɑ sɔlʋ ɩnɩ ɩ leelu Mowɑpʋ tʋ Luuti nɑ ń hɔ. Pǝ́ tɑɑ kɔɔ nɑ sǝtʋ hǝtɛ sɑɑlɩ nɑ ɩ tɛtʋ pǝsɩ nɔɣɔlʋ nyǝntʋ.
\p
\v 6 Mpʋɣʋlɛ ɑpɑlʋ ɩnɩ sɩ: Ye mpʋ mɑ mɑɣɑmɑɣɑ mɑ kɑɑ pǝsɩ nɑ mɑ́ yɑ-tɩ. Pǝ́ tɑɑ kɔɔ nɑ mɑ wɛnɑʋ sɑɑlɩ. Mpʋ tɔ, yɑ-tɩ nɑ mɑ nɔɣɔ, mɑ kɑɑ pǝsɩ.
\p
\v 7-8 Ɩlɛnɑ ɩ́ wɔɣɔsɩ ɩ ntɑŋkpɑtɛ nɑ ɩ́ cɛlɑ Poosi. Pɩɩ wɛ lɔŋtɑɑ kɛ́ Ɩsɛɣɛlɩ nyǝ́mɑ kiŋ tɔ, ye pɑ yɑpɑ pʋlʋ yɑɑ pɑ lɑɣɑsɑ tɛtʋ ḿpʋ́ɣʋ́ pɑ lɑkɑɣɑ sɩ pǝ́ hʋ́lɩ́ sɩ pǝ tɛmɑ. 
\v 9 Ntɛnɑ Poosi tɔ sɔsɑɑ nɑ sɑmɑɑ sɩ: Mɛɣɛlɛ mɑ ɑseetɑ nyǝ́mɑ kɛ sɑŋɑ sɩ mɑ yɑpɑ Noyomii niŋ tɑɑ kɛ́ pǝ tǝnɑ mpi pǝ kɛ́ Ilimɛlɛkɩ nɑ ɩ pǝyɑlɑɑ Kiliyoŋ nɑ Mɑlɔŋ pɑ nyǝm tɔ, 
\v 10 nɑ mɑ́ kpɛnnɑ Mɑlɔŋ leelu Mowɑpʋ tʋ Luuti nɑ mɑ́ hɔ nɑ mɑ́ kʋsɩ sǝtʋ hǝtɛ. Pǝ́ tɑɑ kɔɔ nɑ tǝ́ sɑɑlɩ yem kɛ́ ɩ ɩcɑtɛ kʋlʋllɛ nɑ ɩ yǝlɑɑ tɑɑ. Mɛɣɛlɛ ɑseetɑ nyǝ́mɑ kɛ sɑŋɑ.
\p
\v 11 Mpʋɣʋlɛ nɔnɔɣɔ yǝlɑɑ nɑ sɔsɑɑ pɑ tɔmɑ sɩ: Tǝ kɛ́ ɑseetɑ nyǝ́mɑ. Tɑcɑɑ ɩ́ kooli kʋpɑntʋ kɛ ɑlʋ wei ɩ sʋʋkɩ nyɑ́ tǝyɑɣɑ kɛ ɩsǝntɔ tɔ, nɑ ɩ́ nǝɣǝsǝnɑ ɩsɩɩ Lɑsɛɛlɩ nɑ Leyɑɑ mpɑ pɑ lʋlɑ Ɩsɛɣɛlɩ piitim yǝlɑɑ tɔ. Hʋ́lɩ́ nyɑ́ toŋ kɛ nyɑ́ lʋlʋɣʋ tɑɑ nɑ ń lɑ nɑ nyɑ́ hǝtɛ yɑɑ Pɛtǝlɛhɛm. 
\v 12 Piitim mpi Tɑcɑɑ kɑ́ hɑnɑ-ŋ nɑ ɑsɑɑlʋ ɩnɛ tɔ, pǝ huki nɑ pǝ́ nǝɣǝsǝnɑ ɩsɩɩ Yutɑ nɑ ɩ ɑlʋ Tɑmɑɑ pɑ pǝyɑlʋ Pɛlɛsɩ tǝyɑɣɑ.
\s1 Poosi kpɑɣɑʋ kɛ Luuti
\p
\v 13 Ḿpʋ́ɣʋ́ Poosi kpɑɣɑ Luuti nɑ ɩ́ nɑ-ɩ pɑ́ kpǝtɩ nɑ Tɑcɑɑ yele nɑ ɩ́ lɑ teu nɑ ɩ́ lʋlɩ ɑpɑlʋpǝyɑɣɑ. 
\v 14 Ḿpʋ́ɣʋ́ Pɛtǝlɛhɛm ɩcɑtɛ ɑlɑɑ sɛɛ Noyomii nɑ pɑ́ tɔŋ sɩ: Tǝ sɑmɑ Ɩsɔ ɩsɩɩ ɩ hɑ-ŋ yʋlʋ wei ɩ kɑ wɑɑsɩ-ŋ tɔ. Pǝyele ɩ hǝtɛ kɑ́ yɑɑ Ɩsɛɣɛlɩ tɑɑ. 
\v 15 Pǝyɑɣɑ kɑnɛ kɑɑ kpɑɑsǝnɑ nyɑ́ toŋ nɑ kɑ́ te-ŋ nyɑ́ kpɑtǝlɑɣɑ wɑɑtʋ. Pǝ tɑɣɑ pʋlʋ, nyɑ́ poolu wei ɩ sɔɔlɑ-ŋ teu nɑ ɩ́ tɛɛ-ŋ ɑpɑlʋpiyɑ nɑɑtosompɔɣɔlɑɣɑ tɔ ɩnɩ ɩ lʋlʋnɑ-kɛ.
\p
\v 16 Ɩlɛnɑ Noyomii mʋ-kɛ nɑ ɩ́ nʋkɩ-kɛ nɑ ɩ́ pɑɑsǝnɑ-kɛ ɩsɩɩ ɩ kʋlʋlɑɣɑ. 
\v 17 Mpʋɣʋlɛ pɑ cɔlɔ ɑlɑɑ hɑ-kɛɣɛ hǝtɛ sɩ: Opɛtɩ, nɑ pɑ́ tɔŋ sɩ pɑ lʋlɑ Noyomii kɛ ɑpɑlʋpǝyɑɣɑ. Tɑfiiti cɑɑ Sesee cɑɑ kɛlɛ Opɛtɩ.
\s1 Tɑfiiti cɔsɔnɑɑ hǝlɑ
\p
\v 18 Tɑfiiti cɑɑnɑɑ lʋlʋɣʋ nyǝ́mɑ ntɔ, pǝ kpɑɣɑʋ Pɛlɛsɩ tɔ. Pɛlɛsɩ lʋlʋnɑ Hɛsǝlɔŋ, 
\v 19 nɑ Hɛsǝlɔŋ lʋlɩ Lɑm, nɑ Lɑm lʋlɩ Aminɑtɑpɩ, 
\v 20 nɑ Aminɑtɑpɩ lʋlɩ Nɑsɔŋ, nɑ Nɑsɔŋ lʋlɩ Sɑlǝmɑ, 
\v 21 nɑ Sɑlǝmɑ lʋlɩ Poosi, nɑ Poosi lʋlɩ Opɛtɩ, 
\v 22 nɑ Opɛtɩ lʋlɩ Sesee, nɑ Sesee lʋlɩ Tɑfiiti.