\id PHP - Lokpa Bible portions [dop] -Benin 1999 (web edition -2017)
\ide UTF-8
\h Filipʋ
\toc1 TAKƎLAƔA ŊKA PƆƆLƖ NMAAWA FILIPƲ NYƎ́MA TƆ
\toc2 Filipʋ
\toc3 Flp
\mt2 TAKƎLAƔA ŊKA PƆƆLƖ NMAAWA
\mt1 FILIPƲ
\mt2 NYƎ́MA TƆ
\imt1 Kʋtʋlʋtʋ
\ip Pǝ nǝɣǝsǝnɑ ɩsɩɩ sɑɑ wei Pɔɔlɩ ŋmɑɑkɑɣɑ tɑkǝlɑɣɑ kɑnɛ tɔ sɑlǝkɑ tɑɑ kɛ́ ɩ wɛɛ. Mpɑ ɩ ŋmɑɑ-kɛ tɔ pɑ tɑɑ pɑɣɑlɛ tɑ kɛ Yutɑ nyǝ́mɑ. Pɔɔlɩ lɑpǝnɑ Ɩsɔ tǝsɛɛlɛ yǝlɑɑ mpɛɣɛ wɑɑsʋ nɑ pɑ́ mʋ Ɩsɔ Tɔm. Hɑlɩ pɑ tilinɑ Pɔɔlɩ kɛ kʋcɔɔŋ kɛ tɔm pɑɣɑlɛ. Pǝ tɔɔ kɛ́ Pɔɔlɩ ŋmɑɑ-wɛ nɑ ɩ́ sɛɛ-wɛ nɑ ɩ́ tɑsɑ-wɛɣɛ lɑɣɑtʋ sɩ pɑ́ wɛɛ nɔɣɔ kʋlʋmɑɣɑ nɑ pɑ́ pɑsɑ pɑ tɩ ɩsɩɩ Tɑcɑɑ Yesu. Ɩ sɛɣɛsǝɣɩ-wɛ sɩ pɑ́ lɑ lɑɑkɑlɩ nɑ sɛɣɛsǝlɑɑ pɔpɔtʋnɑɑ. Pɔɔlɩ sɛɣɛsʋɣʋ looŋɑ sɔsɑɣɑ ntɛ́ sɩ yʋlʋ ɩ́ wɛɛnɑ lɑŋhʋlʋmlɛ pɑɑ wɑhɑlɑ tɑɑ.
\iot Ɩsǝnɑ pɑ fɑɣɑ Filipʋ tɑkǝlɑɣɑ tɔ:
\io1 Pɔɔlɩ tǝmlɛ, titite \ior 1\ior*
\io1 Ɩsɔ sɛɛlɑɑ nɔɣɔ kʋlʋmɑɣɑ nɑ pɑ tɩ pɑsʋɣʋ, titite \ior 2:1-18\ior*
\io1 Timotee nɑ Ɩpɑfǝlotitɩ, titite \ior 2:19-30\ior*
\io1 Lɑɑkɑlɩ nɑ sɛɣɛsǝlɑɑ pɔpɔtʋnɑɑ, titite \ior 3:1–4:9\ior*
\io1 Sɛɛtʋ, titite \ior 4:10-23\ior*
\c 1
\s1 Sɛɛtʋ
\p
\v 1 Tɑɣɑ Yesu Kilisiti tǝmlɛ nyǝ́mɑ Pɔɔlɩ nɑ Timotee.
\p Tɑ́ ŋmɑɑkǝnɑ tɑkǝlɑɣɑ kɑnɛɣɛ Ɩsɔ yǝlɑɑ mpɑ pɑ wɛ Filipʋ nɑ pɑ́ tɛmɑ Yesu Kilisiti nɑ pɑ tɑɑ tɔ, nɑ Ɩsɔ tǝsɛɛlɛ sɔsɑɑ nɑ tǝ tɑɑ tǝmɑ lɑtɑɑ. 
\v 2 Tɑ́ Cɑɑ Ɩsɔ nɑ tɑ́ Sɔsɔ Yesu Kilisiti pɑ́ hʋ́lɩ́-mɛɣɛ pɛɛlɛɛ nɑ pɑ́ lɑ́ nɑ mǝ lɑŋɑ hʋlʋmɩ.
\s1 Filipʋ nyǝ́mɑ tɔɔ sǝlǝmʋɣʋ
\p
\v 3 Pɑɑ wɑɑtʋ wei kɛ́ mɑ tɔɔsɑ mǝ tɔɔ kɛ́ ɩsǝntɔ, mɑ sɛɛkɩ mɑ Ɩsɔ kɛ́ ɩ́ nɑ tǝmlɛ kɛ mǝ tǝnɑ tǝpɑɩ mǝ tɔɔ kɛ́. 
\v 4 Nɑ pɑɑ wɑɑtʋ wei kɛ́ mɑ sǝlǝmǝɣǝnɑ-mɛɣɛ Ɩsɔ, lɑŋhʋlʋmlɛ kɛ mɑ sǝlǝmǝɣǝnɑ. 
\v 5 Mpi tɔ, ɩ́ sǝnɑ-m kʋyɑkʋ kɑncɑɑlɑɣɑ nyǝŋkʋ wule nɑ hɑlǝnɑ sɑŋɑ nɑ mɑ́ yɑsǝɣɩ Lɑɑpɑɑlɩ Kʋpɑŋ tɔ. 
\v 6 Mɑ nyǝmɑ́ teu tǝkpɑtɑɑ sɩ Ɩsɔ wei ɩ cɑɑlɑ tǝmlɛ kʋpɑntɛ tǝnɛɣɛ mǝ kiŋ tɔ, ɩ kɑ́ lɑ-tɛɣɛ ḿpʋ́ɣʋ́ hɑlǝnɑ tǝ́ kɔɔ nɑ tǝ́ yoosi Yesu Kilisiti kʋyɑkʋ wule. 
\v 7 Pǝ mʋnɑ teu kɛ́ sɩ mɑ́ hʋʋ ḿpʋ́ɣʋ́ mǝ tǝnɑ tǝpɑɩ mǝ tɔɔ. Mɑ luɣu sʋʋ-mɛɣɛ sɔsɔm sɔsɔm kɛ́. Pǝ tɑɣɑ pʋlʋ tɔɔ, mǝ tǝnɑ tǝpɑɩ ɩ́ hikɑ mǝ pɑɑ nyǝm kɛ pɛɛlɛɛ nnɑ Ɩsɔ lɑpɑ mɑ tɔ ɑ tɑɑ kɛ́. Ɩlɛ pɑɑ pǝnɛntɛ mɑ wɛʋ sɑlǝkɑ tɑɑ ɩsǝntɔ yɑɑ tuu mɑ tɩɩ wɛʋ nɑ mɑ tɩ, sɩ mɑ́ tɑɑ yele nɑ Lɑɑpɑɑlɩ kʋpɑŋ pǝsɩ tɛtɛpʋlʋ, ɑmɑ sɩ mɑ́ sɩɩ-ɩ teu kɛ́ tǝkɑ. 
\v 8 Mɑ yɔɣɔtʋɣʋ sɩ mɑ sɔɔlɑ mǝ tǝnɑ tǝpɑɩ kɛ́ ɩsɩɩ ɩsǝnɑ mpi Yesu Kilisiti sɔɔlʋɣʋ-tʋɣʋ sɔsɔm tɔ, Ɩsɔ mɑɣɑmɑɣɑ nyǝmɑ́ sɩ tɑmpɑnɑ ḿpʋ́ɣʋ́.
\p
\v 9 Nti mɑ sǝlǝmǝɣɩ Ɩsɔ kɛ́ mǝ tɔɔ tɔɣɔlɛ sɩ mǝ sɔɔlʋɣʋ ɩ́ sɔɔsǝɣɩ tɑm, nɑ nyǝm kʋpɑmpɑm sɔsɔɔm nɑ pǝ tǝnɑ pǝ cɛkǝnɑʋ ɩ́ wɛɛ mǝ sɔɔlʋɣʋ tɑɑ. 
\v 10 Ɩlɛnɑ ɩ́ pǝsɩ nɑ ɩ́ lǝsɩ mpi pǝ wɛ teu tɔ. Ye pǝ lɑpɑ mpʋ ɩ́ kɑ́ lɑ kʋpɑmɑ nɑ pɑ kɑɑ nɑ mǝ kiŋ kɛ tɑɑlɩ nɔɣɔlʋɣʋ Kilisiti kʋyɑkʋ wule. 
\v 11 Nɑ ɩ́ kɑ lɑ tǝmɑ kʋpɑnɑ nnɑ Yesu Kilisiti kɔŋnɑ tɔɣɔ sɔsɔm, nɑ pǝ́ tʋ́ Ɩsɔ kɛ́ teeli nɑ sɑmtʋ.
\s1 Ɩsǝnɑ Kilisiti kɛ́ tɑ́ weesuɣu tɔ
\p
\v 12 Mɑ tɑɑpɑlɑɑ mɑ cɑɑ sɩ ɩ́ nyɩ sɩ tɑmpɑnɑ tɔɔ ɩsǝntɔ, mpi pǝ mɑɣɑnɑ-m tɔ pǝ wɑɑsɑɑ kɛ́, pǝ yelɑɑ kɛ́ nɑ Lɑɑpɑɑlɩ Kʋpɑŋ sɔɔsǝɣɩ yɑʋ. 
\v 13 Pǝ yelɑɑ nɑ wulɑʋ tǝyɑɣɑ tɑŋlɑɑ tǝnɑ nɑ yǝlɑɑ lɛlɑɑ tǝnɑ nyɩ sɩ Kilisiti tǝmlɛ lɑpʋ tɔɔ kɛ́ pɑ tʋ-m sɑlǝkɑ. 
\v 14 Tɑ́ tɑɑpɑlɑɑ tɑɑ pɑɣɑlɛ nɑwɑ mɑ wɛ sɑlǝkɑ tɑɑ, ɩlɛnɑ pɑ́ tɔkɩ tɔnǝŋ nɑ Tɑcɑɑ tɔm, hɑlǝnɑ pɑ́ nyɑɣɑ ɑpɑlʋtʋ nɑ pɑ́ heeliɣi Ɩsɔ Tɔm nɑ sɔɣɔntʋ fɛɩ-wɛ.
\p
\v 15 Pɑɑ nɑ mɑ ɩsǝsɛɛmlɛ tɔɔ kɛ́ lɛlɑɑ lɑkɩ Kilisiti wɑɑsʋ nɑ sɔsɔɔntʋ hɔm hʋwɛɛ tɔ, lɛlɑɑ nɑ́ lɑkɩ-ɩ nɑ hʋwɛɛ kʋpɑnɑ kɛ́. 
\v 16 Pɑnɛ ɩnɩ pɛlɛ pɑ lɑkʋɣʋ nɑ sɔɔlʋɣʋ wɛ pǝ tɑɑ tɔ, pɑ nyǝmɑ́ sɩ Ɩsɔ tʋ-m sɩ mɑ́ tɑɑ yele nɑ Lɑɑpɑɑlɩ Kʋpɑŋ pǝsɩ tɛtɛpʋlʋ tɔɣɔ. 
\v 17 Amɑ lɛlɑɑ ɩlɛ kǝlʋɣʋ pɛɛkʋɣʋ tɔɔ kɛ́, pɑɑ pɑɑsǝɣɩ nɑ pɑ́ heeli Kilisiti tɔm kɛ ɩsǝnɑ mpi pǝ mʋnɑɑ tɔ se, pɑ hʋʋ kɛ́ sɩ mɑ wɛʋ sɑlǝkɑ tɑɑ tɔ pɑɑ sɔɔsɩ-m kʋnyɔŋ nɑ mɑ́ nɑ́.
\p
\v 18 Kpɑɩ kɛ́. Ye kʋpɑntʋ yɑɑ ɩsɑɣɑtʋ kʋlʋkʋ kɛ pɑ lʋkɩ, mɑ lɑŋlɛ tɩɩ hɛɛwɑ. Mpi tɔ pɑ tɩɩ heelɑ Kilisiti tɔm. Nɑ mɑ lɑŋlɛ kɑ́ hɛɛ ḿpʋ́ɣʋ́ nɑ pǝ́ puki. 
\v 19 Pǝ tɑɣɑ pʋlʋ tɔɔ, mɑ nyǝmɑ́ sɩ mǝ sǝlǝmǝŋ nɑ Yesu Kilisiti Feesuɣu sǝnɑʋ tɔɔ pǝ tǝnɑɣɑ mpʋ pɩɩ mǝlɩ mɑ nyʋɣʋ yɑpʋ. 
\v 20 Mɑ tɑŋɑɑ nɑ mɑ́ tɛɛlǝɣɩ ḿpʋ́ɣʋ́ teu kɛ́ sɩ mɑ kɑɑ tɔɣɔ fɛɛlɛ nɑtǝlɩ. Amɑ pǝnɛntɛ nɑɑni kɛ́ mɑɑ lɑ teu ɩsɩɩ mɑ lɑkʋɣʋ tɑm tɔ, ɩlɛnɑ mɑ́ hʋ́lɩ́ Kilisiti sɔsɔɔntʋ kɛ mɑ tɔnʋɣʋ tǝnɑ tɑɑ, pɑɑ mɑ nɑ mɑ ɩsɛ, pɑɑ mɑ sǝkɩ. 
\v 21 Pǝ tɑɣɑ pʋlʋ, pɑɑ mɑɑ wɛɛ, Kilisiti kɛlɛ mɑ pǝ tǝnɑ. Nɑ mɑ́ tɩɩ sǝpɑ, ɩlɛ pǝ kǝlɑɑ kɛlɛ. 
\v 22 Ntɑnyɩ ye mɑ wɛnɑ mɑ ɩsɛ, mɑɑ tɑsɑ wɑɑsɑɣɑ nɑkǝlǝɣɩ lɑpʋ. Tɔʋ, mɑɑ nyǝŋ nti mɑ́ lǝsɩ tɔ se. 
\v 23 Pǝ kpǝpɑ-m kɛ́, mɑ nyɩɩlǝɣɩ kɛ́ sɩ mɑ́ kpe nɑ mɑ́ wɛɛ Kilisiti kiŋ. Nti tǝ kǝlɑ-m teu tɔɣɔlɛ. 
\v 24 Amɑ mǝ tɔɔ ɩlɛ, pǝ wɛɛ kɛ́ sɩ mɑ́ wɛɛnɑ mɑ ɩsɛ. 
\v 25 Mɑ tɛmɑ mɑ tɑɑ kɛ́ teu nɑ tǝlɛ, pǝ tɔɔ kɛ́ mɑ nyǝmɑ́ sɩ mɑ kɑɑ kpe. Nɑ mɑ nyǝmɑ́ sɩ mɑ́ nɑ mǝ tǝnɑ tǝpɑɩ tɩɩ wɛɛ, nɑ mɑɑ sǝnɑ-mɛ nɑ ɩ́ polo lɔlɔ kɛ́ mǝ Ɩsɔ sɛɛʋ mpɑɑʋ tɑɑ, nɑ ɩ́ hiki lɑŋhʋlʋmlɛ kɛ pǝ tɑɑ. 
\v 26 Pǝ tɔɔ kɛ́ ye mɑ kɔmɑ nɑ mɑ́ mǝlɩ mǝ tɛ ɩ́ kɑ́ hiki mɑ kiŋ kɛ mpi ɩ́ kɑ́ yɔɔlǝnɑ mǝ Yesu Kilisiti mpɑɑʋ tɑɑ tɔ.
\p
\v 27 Kʋlʋmtʋ kɛ́ sɩ ɩ́ tɔkɩ yɑɑsi wei ɩ kɛɛsǝnɑ Kilisiti Lɑɑpɑɑlɩ Kʋpɑŋ tɔ. Ɩlɛ pɑɑ mɑɑ kɔɔ mǝ nɑʋ yɑɑ mɑ tɑ tɩɩ kɔm, mɑ́ nɩɩ sɩ ɩ́ nyɔɔ toŋ te, nɑ ɩ́ kpɛntɑ hʋwɛɛ, nɑ ɩ́ yoo tɑɑ tɛm mpi Lɑɑpɑɑlɩ Kʋpɑŋ tʋɣʋ-mɛ tɔ pǝ yoou nɑ lotu kʋlʋmtʋ kɛ mǝ tǝnɑ. 
\v 28 Ɩ́ tɑɑ yele nɑ mǝ kolontunɑɑ nyɑɑsǝɣɩ-mɛɣɛ pʋlʋ tɑɑ. Mpi pǝ hʋ́lǝ́ɣɩ́ pɛlɛ sɩ pɑ tɔm kɑ́ tɛ tǝnɑŋnɑŋ tɔɣɔlɛ. Nɑ pǝ hʋ́lǝ́ɣɩ́-mɛ sɩ pɩɩ tɛ nɑ pǝ́ yɑ mǝ nyɔɔŋ, nɑ Ɩsɔ lɑkǝnɑ mpʋ. 
\v 29 Pǝ tɑɣɑ pʋlʋ, Ɩsɔ hɑnɑ-mɛɣɛ mpɑɑʋ sɩ ɩ́ lɑ Kilisiti tǝmlɛ. Ɩlɛ pǝ tɑɣɑ ɩ tɔɔ yuŋ tisuɣu tike tɔm, ɑmɑ nɑ ɩ tɔɔ kʋnyɔntɔɣɔlɛ tɔtɔɣɔ. 
\v 30 Mǝ sɛɛwɑ mɑ tɔɔ kɛ́ pǝnɛntɛɣɛ nɑ tǝ́ yoo yoou. Yoou ŋku ɩ́ nɑ́ mɑ yoo hɑtuu lɔŋ nɑ ɩ́ tɩɩ nyǝmɑ́ tɔtɔ sɩ mɑ tɩɩ tɔŋnɑ-kʋɣʋ yoou tɔ, ŋkʋɣʋlɛ mpʋ nɑ ŋku ɩ́ yookuɣu tɔ.
\c 2
\s1 Kilisiti tɩ pɑsʋɣʋ nɑ ɩ Ɩsɔ nɩɩnɑʋ
\p
\v 1 Mǝ nɑ Kilisiti ɩ́ kpɛntʋɣʋ mpʋ tɔ pǝ sɔɔsǝɣɩ-mɛɣɛ toŋ ntɛ? Ɩ sɔɔlʋɣʋ sɔɔsǝɣɩ-mɛɣɛ ɑpɑlʋtʋ ntɛ? Mǝ nɑ Feesuɣu Nɑŋŋtʋ ɩ́ kpɛntɑ kʋlʋm nɑ? Ɩ́ lɑkɩ tǝmɑɣɑ yǝllɛ nɑ kʋpɑntʋ nɑ? 
\v 2 Tɔʋ, ye pǝ wɛ mpʋ ɩlɛ, mɑ wiinɑ-mɛ sɩ ɩ́ kpɛntɩ teu, nɑ ɩ́ sɔɔlǝɣɩ mǝ tǝmɑ, nɑ ɩ́ wɛnɑ lotu kʋlʋmtʋ nɑ hʋwɛɛ kʋlʋmɛɛ, nɑ pǝ́ hʋlʋsɩ mɑ lɑŋlɛ kɛ sɔsɔm. 
\v 3 Ɩ́ tɑɑ lɑ pʋlʋɣʋ tǝmɑ kǝlʋɣʋ tɔɔ, yɑɑ teeli yem tɔɔ. Amɑ ɩ́ pɑsɑ mǝ tɩ, nɑ pɑɑ wei ɩ́ nyǝnɩ ɩ lɛlʋ ɩsɩɩ wei ɩ kǝlɑ-ɩ tɔ. 
\v 4 Nɔɣɔlʋ ɩ́ tɑɑ pɛɛkɩ ɩ mɑɣɑmɑɣɑ ɩ nyʋɣʋ nyǝntʋ tike, ɑmɑ ɩ́ tɔɔsǝɣɩ ɩ tɔɣɔntǝlɛnɑɑ tɔɔ. 
\v 5 Ɩ́ wɛɛnɑ hʋwɛɛ nnɑ Yesu Kilisiti kɑ hʋʋkɑɣɑ tɔɣɔ mǝ tɑɑ.
\q1
\v 6 Hɑtuu tɔ ɩ kɑ tɩɩ wɛnɑ Ɩsɔ wɛɛtʋ kɛ́.
\q1 Pǝ nɑ pǝ mpʋ tɔ, pǝ tɑ tʋ-ɩ sɩ ɩ pɛɛkǝɣɩ
\q1 nɑ ɩ́ lɑnɑ toŋ nɑ ɩ́ kpɑ Ɩsɔ tɔɔ sɩ ɩ sɑɑlɑ.
\q1
\v 7 Amɑ ɩ mɑɣɑmɑɣɑ ɩ yelinɑ pǝ tǝnɑ mpi ɩ kɑ wɛnɑ tɔ
\q1 nɑ ɩ́ kpɑɣɑ yom wɛɛtʋ.
\q1 Ɩ kpɑɣɑ yǝlɑɑ wɛɛtʋ kɛ́ tǝtɛŋɛlɛŋ,
\q1 nɑ ɩ kɔmɑɣɑ ɩsɩɩ yʋlʋ wɛʋ tɔ.
\q1
\v 8 Ɩ tisɑɑ nɑ ɩ́ pɑsɑ ɩ tɩ nɑ ɩ́ nɩɩnɑ Ɩsɔ kɛ́ ḿpʋ́ɣʋ́,
\q1 hɑlǝnɑ ɩ sǝm, sǝm mpi ɩ sǝpɑ tesikɑ tɔɔ tɔ.
\q1
\v 9 Pǝ tɔɔ kɛ́ Ɩsɔ kʋsɑ ɩ nyʋɣʋ kɛ teu kɛ sɔsɔm,
\q1 nɑ ɩ́ hɑ-ɩ hǝtɛ nte tǝ kǝlɑ hǝlɑ tǝnɑ tǝpɑɩpɑɩ tɔ.
\q1
\v 10 Pǝ tǝnɑ mpi pǝ wɛnɑ weesuɣu
\q1 nɑ pǝ wɛ ɩsɔtɑɑ nɑ tɛtʋ tɔɔ
\q1 nɑ tɛtʋ tɛɛ tɔ pǝ́ hǝntɩ-ɩ ɑtɛ.
\q1
\v 11 Nɑ pǝ tǝnɑ pǝ́ tisi sɩ Yesu kɛlɛ Sɔsɔ,
\q1 nɑ pǝ́ hɑ Tɑcɑɑ Ɩsɔ kɛ́ teeli.
\s1 Ɩsǝnɑ tɩɩ tee ɩsɩɩ kɔkɔsɩ kɛ ɑntulinyɑ tɑɑ tɔ
\p
\v 12 Ye mpʋ ɩlɛ mɑ tɑɑpɑlɑɑ, wɑɑtʋ wei mɑɑ wɛ mǝ cɔlɔ tɔ ɩ́ nɩɩnɑ-m pǝ tǝnɑ pǝ tɑɑ kɛ́. Nɑ pɑɑ pǝnɛntɛ mɑ fɛɩ mǝ cɔlɔ, pǝ kǝlɑ teu sɩ ɩ́ nɩɩnɑ-m mpʋ tɔtɔ. Ɩ́ pɛɛkǝɣɩ mǝ nyɔɔŋ yɑpʋ tɔm nɑ sɔɣɔntʋ nɑ seluɣu. 
\v 13 Pǝ tɑɣɑ pʋlʋ, Ɩsɔ wɛɛ kɛ́ nɑ ɩ́ lɑkɩ mǝ tɑɑ kɛ́ tɑm, sɩ mɛ mɩɩ pǝsɩ nɑ ɩ́ sɔɔlɩ nɑ ɩ́ lɑ́ mpi ɩ kɑ sɩɩwɑ nɑ ɩ́ tǝŋǝɣɩ nɑ ɩ́ lɑkɩ tɔ.
\p
\v 14 Kʋntʋɣʋ nɑ ntɔŋkpɛɛsɑɣɑ ɩ́ tɑɑ wɛɛ pǝ tǝnɑ mpi ɩ́ lɑkɩ tɔ pǝ tɑɑ. 
\v 15 Ɩlɛ ɩ́ kɑ́ pǝsɩ yǝlɑɑ mpɑ pɑ fɛɩnɑ tɑɑlɩ nɑ pɑ́ wɛ tǝnɑŋŋ tɔ, nɑ ɩ́ pǝsɩ Ɩsɔ piyɑ nsi sɩ fɛɩnɑ kɑwɑlɑɣɑ nɑkǝlǝɣɩ ɑntulinyɑ yǝlɑɑ kʋtɑkɛɛsǝŋ nɑ ɑsɑɣɑɑ pɑ hɛkʋ tɑɑ tɔ. Pǝ́cɔ́ pǝ wɛɛ kɛ́ sɩ mɩɩ mʋɣʋnɑ kɔkɔ kɛ pɑ hɛkʋ tɑɑ kɛ́ nyǝnǝnyǝnɩ ɩsɩɩ ɩsɔtʋlʋŋɑsɩ kɛ ɩsɔtɑɑ 
\v 16 nɑ ɩ́ heeliɣinɑ-wɛɣɛ weesuɣu tɔm. Ye ɩ́ lɑkɩ mpʋ, mɑɑ pǝsɩ nɑ mɑ́ yɔɔlǝnɑ-mɛɣɛ Kilisiti kʋyɑkʋ wule kɛ teu. Tɑmpɑnɑ tɔɔ ɩsǝntɔ, mpʋ pɩɩ hʋlǝnɑ sɩ mɑ tǝmɑ tǝnɑ nɑ mɑ lʋpʋ tǝnɑ tɑ mǝlɩ yem.
\p
\v 17 Ntɑnyɩ mɑ cɑlǝm kɑ́ lɩɩ, mɑ sǝm tɔm kɛ mɑ wɛnɑ mpʋ. Nɑ ye pɩɩ tɩɩ lɑpɑ mpʋ, pǝ wɛ ɩsɩɩ kɔtɑɣɑ ŋkɑ mǝ Ɩsɔ sɛɛtʋ tɑsɑ Ɩsɔ kɛ́ lɑpʋ tɔɣɔlɛ. Ye pɩɩ lɑ mpʋ, mɑ lɑŋlɛ hɛɛwɑɣɑ. Nɑ mɑ́ nɑ mǝ tǝnɑ tɑ́ lɑŋɑ hɛɛnɑ. 
\v 18 Nɑ mpʋ tɔtɔɣɔ nɑ mɛ, pǝ wɛɛ kɛ́ sɩ mǝ lɑŋɑ ɩ́ hɛɛ, pǝ wɛɛ sɩ mɑ́ nɑ mɛ tɑ́ lɑŋɑ ɩ́ hɛɛnɑ.
\s1 Timotee nɑ Ɩpɑfǝlotitɩ
\p
\v 19 Mɑ hʋʋ sɩ, nɑ Ɩsɔ toŋ tɑɑ ye pǝ wɛ ɩsǝnɑ, mɑɑ tili Timotee kɛ mǝ tɛɣɛ nɔɔnɔɔ nɑ mɑ́ nɩɩ mǝ cɑkǝlɛ tɔm, nɑ pǝ́ sɔɔsɩ mɑ mɑɣɑmɑɣɑ kɛ ɑpɑlʋtʋ. 
\v 20 Ɩ tike ɩ wɛnnɑ, nɑ ɩ sǝnɑ-m mpi mɑ sɔpǝnɑ nyʋɣʋ tɔ pǝ tɑɑ, nɑ ɩ pɑɑsǝɣǝnɑ mǝ tɔm kɛ nɑ tɑmpɑnɑ. 
\v 21 Lɛlɑɑ ɩlɛ, pɛlɛ pɑ mɑɣɑmɑɣɑ pɑ niŋ nyǝm tike tɔɔ kɛ́ pɑ nǝɣǝsǝɣɩ, pǝ tɑɣɑ Yesu Kilisiti nyǝm tɔɔ. 
\v 22 Mǝ mɑɣɑmɑɣɑ ɩ́ nyǝmɑ́ ɩsǝnɑ Timotee ɩnɩ ɩ hʋlɑɑ sɩ ɩ kɛ́ yʋlʋpɑŋ tɔ, nɑ ɩsǝnɑ mɑ́ nɑ-ɩ tǝ lɑpɑ tǝmlɛ ɩsɩɩ yʋlʋ nɑ ɩ pǝyɑɣɑ kɛ Lɑɑpɑɑlɩ Kʋpɑŋ tɔm tɑɑ tɔ. 
\v 23 Mɑ hʋʋ sɩ ye mɑ kɔmɑ nɑ mɑ́ cɛkǝnɑ teu kɛ nti tǝ tɑɑ mɑ wɛɛ tɔ, ɩlɛ mɑɑ tili-ɩ mǝ cɔlɔ. 
\v 24 Nɑ mɑ wɛnɑ nɑɑni kɛ́ teu kɛ Tɑcɑɑ toŋ tɔɔ sɩ mɑ mɑɣɑmɑɣɑ mɑɑ polo mǝ tɛɣɛ nɔɔnɔɔ nɑ mɑ́ nɑ́-mɛ.
\p
\v 25 Mɑ mɑɣɑsɑɑ nɑ mɑ́ nɑ́ sɩ pǝ kǝlɑ teu sɩ tɑ́ tɑɑpɑlʋ Ɩpɑfǝlotitɩ, wei mɛ ɩ́ kɑ hɑ-m mpi mɑɑ lɑŋɑɑ nɑ ɩ́ tilinɑ-m sɩ ɩ́ kɔnɑ-m, nɑ mɑ́ nɑ-ɩ tǝ lɑkǝnɑ tǝmlɛ nɑ tǝ́ yooki yoou tɔ, ɩnǝɣɩ mɑɑ yele nɑ ɩ́ mǝlɩ mǝ kiŋ. 
\v 26 Ɩ nyɩɩlǝɣɩ kɛ́ sɩ ɩ́ nɑ́ mǝ tǝnɑ, hɑlǝnɑ pǝ pɛkǝlɑ-ɩ. Mpi tɔ, mɛ ɩ́ kɑ nɩɩʋ ɩ wʋsɑsɩ tɔ pǝ tɔɔ. 
\v 27 Tɑmpɑnɑ tɔɔ ɩsǝntɔ, pǝ wɩɩ-ɩ teu kɛ́, hɑlǝnɑ ɩ cɑɑkɑɣɑ sǝm. Amɑ Ɩsɔ wii ɩ pǝtɔɔtǝlɛ. Nɑ pǝ tɑɣɑ ɩ tike ɩ nyǝntɛ, nɑ mɑ nyǝntɛ tɔtɔɣɔ, sɩ pǝ́ tɑɑ kɔɔ pǝ́ sɔɔsɩ-m lɑŋwɑkǝllɛ kɛ lɛntɛ tɔɔ. 
\v 28 Pǝ tɔɔ kɛ́ mɑ hʋʋ sɩ mɑɑ kʋsɩ-ɩ lɔŋ tǝcɑʋ nɑ ɩ́ mǝlɩ mǝ tɛ, nɑ mɩɩ nɑ-ɩ nɑ mǝ lɑŋɑ tɑsɑ hʋlʋmʋɣʋ, nɑ mɑ mɑɣɑmɑɣɑ mɑ lɑŋwɑkǝllɛ tɛ mpʋ. 
\v 29 Pǝ tɔɔ ɩlɛ ɩ́ mʋ-ɩ niŋ nɑɑlɛ nɑ lɑŋhʋlʋmlɛ sɔsɔɔlɛ, ɩsɩɩ pɑ mʋkʋɣʋ tɑɑpɑlʋ kɛ Tɑcɑɑ tɔm tɑɑ tɔ. Yǝlɑɑ ɩsɩɩ pɑnɛ ɩnɩ wɛɣɛ pǝ wɛɛ sɩ ɩ́ seeki. 
\v 30 Pǝ tɑɣɑ pʋlʋ tɔɔ, Kilisiti tǝmlɛ nyʋɣʋ tɔɔ kɛ́ sǝm cɛɛ-ɩ. Ɩ lɑpɑ ɩ weesuɣu kɛ ɑwusɑ kɛ́ nɑ ɩ́ kɔnɑ-m kʋsǝnɑm mpi mǝ mɑɣɑmɑɣɑ ɩ́ tɑɑ pǝsǝɣɩ sɩ ɩ́ kɔnɑ-m tɔ.
\c 3
\s1 N pɛlɑɑ yɑɑ n tɑ pɛlɩ pǝ kʋlʋm
\p
\v 1 Mɑ tɑɑpɑlɑɑ, pǝnɛntɑɑ ɩ́ yɔɔlǝɣɩ Tɑcɑɑ tɔm tɑɑ ɩlɛ. Kʋlʋmtʋ tǝnɛ tǝ ŋmɑɑʋ kɛ tɑm ɩɩ kʋɣʋ mɑ, nɑ ntɩ ɩnɩ tǝ tɩɩ kǝlǝɣǝnɑ-mɛɣɛ tɑmpɑnɑ hʋlʋɣʋ. 
\v 2 Ɩ́ lɑ lɑɑkɑlɩ nɑ ɩsɑɣɑlɑtɑɑ, hɑsɩ nsɩ, yǝlɑɑ mpɑ pɑ kɑmɑ nyʋɣʋ sɩ pɛlʋɣʋ kɛ pɛlʋɣʋ tɔ. 
\v 3 Mpɛ pɑ pɛlʋɣʋ kɛ mpi? Tɑɣɑlɛ pɛllɑɑ nɑ tɑmpɑnɑ. Pǝ tɑɣɑ pʋlʋ tɔɔ, Ɩsɔ Feesuɣu wɛnnɑ tɑ́ kiŋ nɑ tɑ́ɑ́ lɑkɩ Ɩsɔ tǝmlɛ. Nɑ Yesu Kilisiti kɛ tɑ lɑkɩ nɑ tɑɑ tɑɑkɩ, nɑ pǝ tɑɣɑ yʋlʋ kʋlɑpǝlɛ hɑɑnɑ tɑɣɑ nɑɑni. 
\v 4 Ye mɑɑ nɔkɑɑ kɔlɔ, mɑ pǝsǝɣɩ nɑ mɑ́ tʋ kʋlɑpǝlɛnɑɑ pɑnɛɣɛ nɑɑni. Nɑ ye nɔɣɔlʋ wɛɛ nɑ ɩ́ hʋʋkɩ sɩ yʋlʋ kʋlɑpǝlɛ kɑ́ yelinɑ nɑ ɩ́ tʋlɩ-tɩ ɩlɛ, mɑ tɛɛ pʋntʋ kɛ kʋlɑpǝlɛnɑɑ kɛ́ tǝpɑɩpɑɩ. 
\v 5 Nyǝnɩ, mɑ lʋlʋɣʋ kʋyɛɛŋ pǝlefɛɩ wule kɛ pɑ pɛlɑ-m, nɑ mɑ kɛ́ Ɩsɛɣɛlɩ tʋ kɛ́ tǝsiɣisiɣi. Nɑ mɑ kpekǝle ntɛ́ Pɛnsɑmɛɛ nyǝntɛ, nɑ mɑ kɛ́ Hepǝlɑ tʋ kɛ́ tǝsiɣisiɣi. Nɑ tɑɣɑlɛ Fɑlisɑnɑɑ kɛ Yutɑ nyɛ́mɑ Ɩsɔsɛɛlɛ tǝŋʋɣʋ tɑɑ. 
\v 6 Nɑ mɑɑ sɛɛsɑ ɩsǝlɛ kɛ́ pǝ tɑɑ kɛ́ pǝ fɛɩnɑ, hɑlǝnɑ mɑ́ tʋkɑɣɑnɑ Yesu sɛɛlɑɑ kpekɑ kɛ kʋnyɔŋ. Nɑ ye pɑ tɔmɑ sɩ kʋsǝsɩɩtʋ tɑɑ tɔm tǝŋʋɣʋ sɩ yʋlʋ ɩ́ tǝŋ nɑ pǝ́ lɑpɩ-ɩ kʋpɑŋ tɔ tɑ́ tǝŋɑɣɑnɑ, tɑɑlɩ nɔɣɔlʋ ɩ tɑɑ wɛɛ mɑ kiŋ. 
\v 7 Pǝnɛntɛ Kilisiti tɔɔ ɩlɛ, mɑ nyǝnǝɣɩ kʋpɑntʋnɑɑ mpɑ mɑ mʋɣʋlɑɣɑnɑ tɔɣɔ mpi pɩɩ wɑɑsǝɣɩ pʋlʋ tɔɣɔ. 
\v 8 Nɑ pǝ tɑɣɑ kʋpɑntʋnɑɑ pɑnɛ pɑ tike kɛ mɑ nyǝnǝɣɩ mpʋ, nɑ kɑwɑɑsɩ nsɩ sɩ tǝnɑɣɑ mɑ nyǝnǝɣɩ mpi pɩɩ wɑɑsǝɣɩ pʋlʋ tɔɣɔ mɑ nyǝm mɑ Sɔsɔ Yesu Kilisiti tɔ pǝ tɔɔ. Tǝpɑntɛ tɑɑ tǝpɑntɛ ntɛ́ tǝnɛ ɩnɩ. Ɩ tɔɔ kɛ́ mɑ kɛɛlɑ pǝ tǝnɑ mpi pǝ kʋsǝɣɩ mɑ nyʋɣʋ tɔ nɑ mɑ́ sɩɩnɑ kpeeŋɑ, nɑ mɑ nyǝnǝɣɩ pǝ tǝnɑ ɩsɩɩ hute sɩ pǝ́ yele nɑ mɑ́ hiki Yesu Kilisiti, 
\v 9 nɑ mɑ́ nɑ-ɩ tǝ́ kpɛntɩ teu kɛ kʋlʋm. Mɑɑ yɔɔlǝɣɩ sɩ mɑ kʋsǝsɩɩtʋ tɔkʋɣʋ tɔɔ kɛ́ pɑ́ yɑɑ-m kʋpɑŋ. Amɑ mɑ tɛmɑ mɑ tɑɑ nɑ Kilisiti tɔɣɔ mɑ lɑpɑ kʋpɑŋ. Tǝnɑɣɑ Ɩsɔ hɑnɑ pǝsʋɣʋ sɩ yǝlɑɑ ɩ́ lɑ kʋpɑmɑ, nɑ ye wei ɩ́ mʋwɑ tɑ́ Sɔsɔ tɔm, pʋntʋ kɛ Ɩsɔ hɑɑ pǝ pǝsʋɣʋ. 
\v 10 Mpi mɑ nyɩɩlǝɣɩ teu tɔɣɔlɛ sɩ mɑ́ nyɩ Kilisiti nɑ ɩ sǝm tɑɑ fem tomɑ, sɩ mɑɑ hiki ɩ wɑhɑlɑnɑɑ tɑɑ kɛ́ mɑ nyǝ́mɑ nɑ mɑ́ɑ́ tɔɣɔ, nɑ mɑ́ sɩ ɩsɩɩ ɩ sǝpʋ tɔ. 
\v 11 Nɑ mɑ́ tɛɛlǝɣɩ sɩ pɑɑ feesi mɑɣɑ mpʋ tɔtɔ.
\s1 Tǝ kɑɑsʋɣʋ
\p
\v 12 Mɑɑ yɔɔlǝɣɩ sɩ mɑ tɛmɑ hikuɣu kɛ mpi mɑ pɛɛkɑɣɑ tɔ se, yɑɑ mɑ tɛmɑ teu tǝkpɑtɑɑ. Amɑ mɑ tɔŋnɑ lʋpʋ kɛ́ nɑ mɑ́ kɑɑsǝɣɩ mɑ tɩ sɩ mɑ́ hiki mɑ ɑsewɑ fɔɔtɔ. Mpi pǝ tɔɔ tɔ, Yesu Kilisiti tɛmɑ-m hikuɣu nɑ ɩ́ kpɑ-m ɩ kpɑ-m kɛ́. 
\v 13 Mɑ tɑɑpɑlɑɑ, mɑɑ hʋʋkɩ sɩ mɑ tɛmɑ pǝ fɔɔtɔ hikuɣu se. Amɑ kʋlʋmtʋ nti mɑ nyǝmɑ́ tɔɣɔlɛ sɩ, mɑ yelɑ mɑ wɑɑlɩ nyǝntʋ kɛ́, nɑ mɑ́ kɑɑsǝɣɩ mɑ tɩ sɩ mɑ́ hiki mpi pǝ wɛ mɑ nɔɣɔ tɔɔ tɔ. 
\v 14 Pǝ tɔɔ kɛ́ mɑ see nɑ mɑ́ pukinɑ mpi pǝ sɩɩwɑ tɔ pǝ tɔɔ, sɩ mɑ́ hiki pǝ fɔɔtɔ wei Ɩsɔ yɑɑ-tʋ sɩ tǝ́ hiki ɩsɔtɑɑ kɛ Yesu Kilisiti kiŋ tɔ.
\p
\v 15 Tɑ́ tǝnɑ mpɑ tɑ́ tǝ kɛ́ yʋlʋkpɑsɑɑ kɛ Ɩsɔ nyǝntʋ tɑɑ tɔ, tǝ́ hʋʋ hʋwɛɛ kʋlʋmɛɛ ɑnɛ. Nɑ ye mǝ tɑɑ lɛlɑɑ ɩɩ hʋʋ ḿpʋ́ɣʋ́ hʋwɛɛ ɑnɛ ɑ tɔɔ, ɩlɛ Ɩsɔ kɑ́ kilisi-mɛɣɛ-tɩ. 
\v 16 Mpɑɑʋ ŋku tǝ tǝŋǝɣɩ hɑlǝnɑ sɑŋɑ tɔ, pɑɑ pǝ lɑ ɩsǝnɑ tǝ́ tǝŋǝɣɩ-kʋɣʋ mpʋ.
\p
\v 17 Mɑ tɑɑpɑlɑɑ, ɩ́ kɛɛsǝnɑ-m mǝ tǝnɑ. Tǝ tɛmɑ hʋ́lʋ́ɣʋ́ kɛ ɩsǝnɑ ɩ́ kɑ́ lɑ tɔ, ɩlɛ ɩ́ nyǝnǝɣǝnɑ mpɑ pɑ lɑkɩ ɩsɩɩ tǝ hʋlʋɣʋ sɩ pɑ́ lɑkɩ tɔ. 
\v 18 Tɑm kɛ́ mɑ heeliɣi-mɛɣɛ-tɩ, nɑ pǝnɛntɑɑ ɩsǝlʋm kɛ mɑ tɑsǝɣǝnɑ-mɛɣɛ-tǝɣɩ heeluɣu kɛ ɩsǝntɔ. Pɑɣɑlɛ wɛnnɑ nɑ pɑ́ wɑkǝlǝɣɩ mpi Kilisiti lɑpɑ ɩ sǝm tesikɑ tɔɔ tɔ nɑ pɑ yɑɑsinɑɑ ɑsɑɣɑɑ. 
\v 19 Pɑ tɔm kɑ tɛ tǝnɑŋnɑŋ, pǝ tɑɣɑ pʋlʋ tɔɔ, pɑ hiliŋ kɛ pɑ tǝŋǝɣɩ, pǝ tɑɣɑ Ɩsɔ. Nɑ mpi pǝ nǝɣǝsǝnɑ pǝ́ lɑ-wɛɣɛ fɛɛlɛ tɔɣɔ pɑ yɔɔlǝɣǝnɑ. Nɑ ɑtɛ cǝnɛ nyǝm tike tɔɔ kɛ́ pɑ lɑɑkɑlǝnɑɑ wɛɛ. 
\v 20 Pǝ kɑɑsɑ tɑ́ tɔ tɑ́ tɛɣɛlɛ ɩsɔtɑɑ, nɑ tǝ tɑŋɑ teu tǝtɛɣɛtɛɣɛ sɩ tɑ́ Yɑtʋ tɑ́ Sɔsɔ Yesu Kilisiti ɩ́ lɩɩnɑ ɩsɔtɑɑ nɑ ɩ́ tii. 
\v 21 Ɩ tomɑ nnɑ ɩ hʋlɑɑ nɑ ɩ́ mǝŋnɑ pǝ tǝnɑɣɑ ɩ tɛɛ tɔ, ɑnǝɣɩ ɩ kɑ́ hʋ́lɩ́ nɑ ɩ́ lɑɣɑsɩ tɑ́ ɑtɛ tɔnǝŋ pǝtɔɔtǝlɛ nyǝŋ ɩnɛ, nɑ tǝ́ nǝɣǝsǝnɑ tɔnʋɣʋ teeli nyǝŋkʋ.
\c 4
\s1 Pɔɔlɩ cɑɑkɩ sɩ pɑ́ lɑkɩ nti tɔ
\p
\v 1 Pǝ tɔɔ ɩlɛ mɑ tɑɑpɑlɑɑ mpɑ mɛ mɑ nyɩɩlǝɣɩ teu sɩ mɑ́ tɑsɑ nɑʋ tɔ, mǝ hɛɛsǝɣǝnɑ mɑ lɑŋlɛ kɛ sɔsɔm, nɑ mɛɣɛ mɑ yɔɔlǝɣǝnɑ. Mɑ yǝlɑɑ mɛ, ɩsǝnɑ pǝ wɛɛ sɩ ɩ́ tɔ teu kɛ Ɩsɔ mpɑɑʋ tɑɑ tɔɣɔlɛ.
\p
\v 2 Hɑɩ, mɑ wiikinɑ Ɩfoti nɑ Sɛntisi, mɑ hǝntɑ-wɛɣɛ ɑtɛɣɛ cǝnɛ, sɩ pɑ́ ciiki ɩsɩɩ Tɑcɑɑ tɔm tɑɑ tɛɛtʋnɑɑ lɑkʋɣʋ tɔ. 
\v 3 Nɑ mɑ tǝmlɛ tɑɑ ɑkpele kʋpɑŋ nyɑ́, mɑ wiikinɑ-ŋ sɩ ń sǝnɑ ɑlɑɑ mpɛ tɔtɔ. Mɑ nɑ-wɛ tǝ yoonɑ yoou nɑ tǝ́ yɑsɩ Lɑɑpɑɑlɩ Kʋpɑŋ kɛ pɑɑ timpi, nɑ tɑ́ nɑ Kǝlemɑŋ nɑ tɑ́ tǝmlɛ tɑɑ tɑɑpɑlɑɑ lɛlɑɑ tǝnɑ mpɑ pɑ hǝlɑ pɑ ŋmɑɑ weesuɣu tɑkǝlɑɣɑ tɑɑ tɔ.
\p
\v 4 Ɩ́ yɔɔlǝɣɩ Tɑcɑɑ mpɑɑʋ tɑɑ kɛ́ tɑm. Mɑ tɑsǝɣɩ-tǝɣɩ yɔɣɔtʋɣʋ sɩ ɩ́ yɔɔlǝɣɩ.
\p
\v 5 Ɩ́ wɛɛ tǝpɑmm kɛ yǝlɑɑ tǝnɑ kiŋ. Tɑcɑɑ kɔŋ nɔɔnɔɔ kɛ́. 
\v 6 Ɩ́ tɑɑ nǝɣǝsǝɣɩ nɑtǝlɩ, pɑɑ nti tǝ mɑɣɑnɑ-mɛ ɩ́ heeli Ɩsɔ kɛ́ sǝlǝmʋɣʋ tɑɑ kɛ́ mpi ɩ́ nyɩɩlǝɣɩ tɔ, nɑ ɩ́ sɛɛ-ɩ nyɑnɑ tǝmlɛ. 
\v 7 Ye pǝ lɑpɑ mpʋ ɩlɛ lɑŋhʋlʋmlɛ nte Ɩsɔ hɑɑ nɑ yʋlʋ ɩɩ pǝsǝɣɩ nɑ ɩ́ cɛkǝnɑ tǝ tǝnɑɣɑ tɔ tɩɩ wɛɛ mǝ lotunɑɑ tɑɑ nɑ mǝ lǝmɑɣɑsɛɛ tɑɑ kɛ́ Yesu Kilisiti tɔm tɑɑ, nɑ pʋlʋ kɑɑ pɛkǝlɩ-mɛ.
\p
\v 8 Tɔʋ, mɑ tɑɑpɑlɑɑ, mpi pǝ kɛ́ kʋpɑm nɑ pǝ nǝɣǝsǝnɑ sɑmtʋ tɔ pǝ tɔɔ kɛ́ ɩ́ kɑ́ ponɑ lɑɑkɑlɩ. Mpǝɣǝlɛ mpi pǝ kɛ́ tɑmpɑnɑ nyǝm, nɑ mpi pǝ nǝɣǝsǝnɑ pɑ tʋnɑ-wɩ, nɑ mpi pǝ kɛɛsɑɑ tɔ, nɑ mpi pǝ fɛɩ ɑsilimɑ, nɑ mpi pǝ wɛ teu, nɑ mpi pǝ kʋsǝɣɩ nyʋɣʋ tɔ. 
\v 9 Mɑ hʋlɑ-mɛɣɛ nɑ mɑ́ kɛɛsɩ-mɛ, ɩ́ lɑkɩ nti ɩ́ nɩɩ mɑ yɔɣɔtɑɑ nɑ ɩ́ nɑwɑ mɑ lɑpɑ tɔ. Ɩsɔ wei ɩ hɑɑ-tʋɣʋ ɑlɑɑfǝyɑ tɔ ɩ kɑ́ wɛɛ mǝ wɑɑlɩ.
\s1 Pɔɔlɩ sɛɛtʋ kɛ Filipʋ nyǝ́mɑ
\p
\v 10 Mɑ lɑŋlɛ hʋlʋmɑ Tɑcɑɑ tɔm tɑɑ kɛ́ ɩsǝnɑ mpi ɩ́ hikɑ pǝsʋɣʋ nɑ ɩ́ tɑsɑ-m hʋ́lʋ́ɣʋ́ sɩ ɩ́ tɔɔsǝɣɩ mɑ tɔm tɔ. Ɩlɛ pǝ tɑɣɑ ɩsɩɩ mɑ yɔɣɔtǝɣɩ sɩ ɩ́ kɑ yelɑ mɑ tɔm kɛ hʋʋʋ. Amɑ pǝ mpɑɑʋ kɛ ɩ́ tɑɑ hikitɑ sɩ ɩ́ hʋ́lɩ́-m sɩ ɩ́ hʋʋkɩ mɑ tɔm. 
\v 11 Nɑ pǝ tɑɣɑ pǝ cɑɑlɑ-m tɔɣɔ mɑ yɔɣɔtɑ ɩsǝntɔ. Ye mɑ wɛ ɩsǝnɑ, mɑ tɛmɑ pǝlɛ pǝ tɑɑ cɑɣɑlɛ lɑɣɑtʋ hiiu kɛ́. 
\v 12 Ye mɑ wɛ kʋnyɔŋ tɑɑ, mɑ nyǝmɑ́ mɑ kʋnyɔntʋlɛ tɔntɛ. Nɑ ye mɑ wɛ hɑɣɑnɑɣɑ tɑɑ, mɑ nyǝmɑ́ pǝlɛ pǝ tɑɑ tɔntɛ. Pɑɑ le nɑ pǝ tǝnɑ pǝ tɑɑ, mɑ tɛmɑ ɩsǝnɑ mɑɑ cɑɣɑ nɑ pǝ́ kɛɛsǝnɑ-m tɔ pǝ lɑɣɑtʋ hiiu kɛ́. Ye mɑ wɛnɑ tɔɣɔnɑɣɑ kɛ sɔsɔm, mɑ nyǝmɑ́ tǝlɛ. Nɑ ye mɑ wɛ nyɔɣɔsɩ tɑɑ, mɑ nyǝmɑ́ tǝlɛ. Ye pǝ tɔɔlǝnɑ-m mɑ nyǝmɑ́. Ye pǝcɔɣɔ mɑ wɛnɑ, mɑ nyǝmɑ́. 
\v 13 Mɑ pǝsǝɣɩ pǝ tǝnɑɣɑ ḿpʋ́ɣʋ́ Kilisiti wei ɩ hɑɑ-m tomɑ tɔ ɩ tɔɔ kɛ́. 
\v 14 Pɑɑ nɑ mpʋ, ɩ́ tɔɣɔʋ mɑ kʋnyɔŋ tɔ ɩ́ lɑpɑ teu kɛ́.
\p
\v 15 Filipʋ nyǝ́mɑ mɛ, mǝ mɑɣɑmɑɣɑ ɩ́ nyǝmɑ́ sɩ mɑ lɩɩnɑʋ Mɑsetoni kɛ wɑɑtʋ wei nɑ Lɑɑpɑɑlɩ Kʋpɑŋ heeluɣu tɔm cɑɑlɑɣɑ kɔntɛ tɔ, mǝ Yesu sɛɛlɑɑ kpekǝle tike sǝnnɑ-m. Mǝ tike ɩ́ tʋnɑ-m niŋ kɛ mɑ kɑwɑɑɣɑ nɑ mɑ ɑsɑlɑʋnɑɑ pǝ tɑɑ. 
\v 16 Ɩ́ kɑ tɛmɑ-m mǝ kʋsǝnɑmnɑɑ tilinɑʋ kɛ mɑɑ wɛʋ Tɛsɑlonikɩ tɔ nɑ pǝ temɑ-m teu. 
\v 17 Pǝ tɑɣɑ ɩsɩɩ kʋcɔɔŋ ɩsǝlɛ tɑɑ mɑɣɑmɑɣɑ kɛ mɑ nyǝnǝɣɩ se, ɑmɑ mɑ cɑɑ kɛ́ sɩ pǝ́ mǝŋnɑ-mɛɣɛ mǝ tǝlǝsǝlɛnɑɑ. 
\v 18 Mɑ nɑwɑ pǝ tǝnɑ mpi ɩ́ tilinɑɑ tɔ, nɑ pǝ tɔɔʋ fɛɩnɑ tɑkɑ. Ɩpɑfǝlotitɩ kɔnɑ-m mǝ kʋcɔɔŋ tɔ, pǝnɛntɑɑ pǝ tǝnɑ pǝ tɔlǝnɑ-m yem kɛ́. Mǝ kʋcɔɔŋ wɛ kɛ́ ɩsɩɩ kɔtɑɣɑ wɛʋ sɔɔsʋŋ kɛ teu, nɑ Ɩsɔ mʋɣɩ-kɛ nɑ kɑ́ wɛ-ɩ teu pǝ tɩɩ fɛɩ tɔ. 
\v 19 Mɑ Ɩsɔ kɑ́ kpɑɣɑ ɩ ɑpititu kʋpɑntʋ nti tǝ wɛ Yesu Kilisiti kiŋ tɔ tǝ tɑɑ nɑ ɩ́ hɑ-mɛɣɛ mpi mpi ɩ́ lɑŋɑɑ tɔ. 
\v 20 Tɑ́ Cɑɑ Ɩsɔ ɩnǝɣǝlɛ teeli tʋ kɛ tɑm tɔɔ. Ami.
\s1 Kɑntǝkɑɣɑ sɛɛtʋ
\p
\v 21 Ɩ́ sɛɛ Ɩsɔ yǝlɑɑ tǝnɑ mpɑ pɑ wɛ Yesu Kilisiti mpɑɑʋ tɑɑ tɔ. Tɑ́ tɑɑpɑlɑɑ mpɑ pɑ wɛ mɑ kiŋ cǝnɛ tɔ pɑ sɛɛ-mɛ. 
\v 22 Ɩsɔ yǝlɑɑ tǝnɑ mpɑ pɑ wɛ cǝnɛ tɔ pɑ sɛɛ-mɛ, ɩlɛnɑ pǝ tɩɩ kǝlǝnɑ Ɩsɔ yǝlɑɑ mpɑ pɑ wɛ Lom wulɑʋ tǝyɑɣɑ tɑɑ tɔ.
\p
\v 23 Tɑ́ Sɔsɔ Yesu Kilisiti ɩ́ hʋ́lɩ́ mǝ tǝnɑɣɑ ɩ pɛɛlɛɛ.