\id NAM - Lokpa Bible portions [dop] -Benin 1999 (web edition -2017)
\ide UTF-8
\h Nɑhum
\toc1 ƖSƆ KƲYƆƔƆTƲTƲ TƐLƎSƲLƲ NAHUM TƆM TAKƎLAƔA
\toc2 Nɑhum
\toc3 Nɑh
\mt2 ƖSƆ KƲYƆƔƆTƲTƲ TƐLƎSƲLƲ
\mt1 NAHUM
\mt2 TƆM TAKƎLAƔA
\imt1 Kʋtʋlʋtʋ
\ip Pɑ kɛɛsɑ Nɑhum tɔm tɑkǝlɑɣɑ tɑɑ kɛ́ Yutɑ nyǝ́mɑ kolontunɑɑ Asilii nyǝ́mɑ tɔm. Pɑ kɛɛsɑ ɩsǝnɑ Asilii nyǝ́mɑ kolontunɑɑ Pɑpiloni nyǝ́mɑ lɛɛkɑ pɑ ɩcɑtɛ sɔsɔɔlɛ Ninifi tɔ. Nɑhum sɩ mpʋ ɩnɩ pǝ kɛ́ Ɩsɔ hʋʋlɛ kɛ́. Pǝ tɑɣɑ pʋlʋ, ɩcɑtɛ ntɛ tɩɩ kɛ́ kɑlɑmpɑɑnɩ nyǝntɛ kɛ́. Tǝ lɑkɩ ɩsɑɣɑtʋ nɑ wɑsɑŋkɑlǝtʋ. Ninifi ɩcɑtɛ wɛ kɛ ɩsɩɩ toŋ wei ɑntulinyɑ yǝlɑɑ lɑkǝnɑ nɑ Ɩsɔ ɩɩ cɑɑkɩ-ɩ tɔ. Nɑhum sɩ mpʋ ɩnɩ pǝ tǝnɑ pɩɩ sɑɑlɩ.
\iot Ɩsǝnɑ pɑ fɑɣɑ Nɑhum tɑkǝlɑɣɑ tɔ:
\io1 Ɩsɔ toŋ tɛɛ kʋŋmɑŋmɑm tǝnɑ nɑ ɩ́ hʋʋkǝnɑ ɑntulinyɑ, titite \ior 1:2-8\ior*
\io1 Ninifi ɩcɑtɛ yɔkʋɣʋ nɑ Yutɑ nyǝ́mɑ wɑɑsʋɣʋ, titite \ior 1:9–2:3\ior*
\io1 Ninifi ncɑɑlɛ nɑ tǝ toŋ tɔm, titite \ior 2:4–3:19\ior*
\c 1
\p
\v 1 Ɩlǝkɔsɩ ɩcɑtɛ tʋ Nɑhum wei ɩ kɛ́ Ɩsɔ kʋyɔɣɔtʋtʋ tɛlǝsʋlʋ tɔ, ɩ tɔm tɑkǝlɑɣɑ ntɔ. Kɑ tɑɑ kɛ́ pɑ kɛɛsɑ Ninifi tɔm nti tǝ tɔɔ Ɩsɔ kulɑɑ nɑ ɩ́ hʋlɩ-ɩ tɔ.
\s1 Ɩsɔ kɛ kʋpɑŋ pǝcɔ pɑɑ liɣiliɣinɑ-ɩ
\q1
\v 2 Ɩsɔ Tɑcɑɑ cɑɑ kɛ́ sɩ yǝlɑɑ ɩ́ nɩɩnɑ-ɩ tǝlɑsɩ.
\q1 Ɩ hɔŋ mpɑ pɑ kpɛɛsǝɣǝnɑ-ɩ tɔ pɑ ŋkpɑŋŋ.
\q1 Ɩ lɛɛtǝɣɩ ɩ kolontunɑɑ nɑ pɑ́ɑ́nɑ́ sɔsɔɔnɑ.
\q1 Ɩɩ hʋlǝɣɩ-wɛɣɛ suulu.
\q1
\v 3 Tɑcɑɑ kɛ́ suulu tʋ kɛ́,
\q1 Ɩ wɛnɑ tomɑ.
\q1 Ɩɩ yeki tɑsǝkǝlɛ tʋ ŋkpɑŋʋɣʋ kɛ hɔm.
\q1 Ye ɩ tɔŋ, kɑcuculɑɣɑ ɑnɑɑm kʋlǝɣǝnɑ,
\q1 ɩ nɔɔhɛɛ mʋsʋɣʋ ntɛ́ ɩsɔŋmʋntʋ.
\q1
\v 4 Ɩ́ holinɑ teŋku, ɩ́lɛ́ ɩ lʋm nyɔɔ kɛ́,
\q1 nɑ ɩ́ lɑkɩ nɑ pusi lʋm nyɔɔkɩ.
\q1 Pɑsɑŋ nɑ Kɑmɛɛlɩ pǝ nyɩɩtʋ cɑɑ wʋlʋɣʋ.
\q1 Lipɑŋ yɑɑyenɑɑ lontilɑɑ.
\q1
\v 5 Pɔ́ɔ́ŋ seliɣi ɩ ɩsɛntɑɑ kɛ́,
\q1 nɑ pulɑsɩ nɑ́ɑ́ yɔkǝɣɩ.
\q1 Tɛtʋ nɑ tǝ tɑɑ yǝlɑɑ seliɣi.
\q1
\v 6 Ye Ɩsɔ mʋ pɑ́ɑ́nɑ́ sɔsɔɔnɑ ɑnɩ,
\q1 ɑwe kɑ́ sǝŋnɑ?
\q1 A mʋɣɩ kɛ́ ɩsɩɩ kɔkɔ.
\q1 Kʋkpɑmǝŋ mɑɣɑmɑɣɑ yɔkǝɣɩ ɩ ɩsɛntɑɑ tɔtɔɣɔ.
\q1
\v 7 Amɑ ɩ kɛ́ kʋpɑŋ kɛ́.
\q1 Ɩnɩ ɩ wɑɑsǝɣǝnɑ lɑŋwɑkǝllɛ wɑɑtʋ.
\q1 Ɩ pɑɑsǝɣǝnɑ mpɑ pɑ cɔɔsǝɣɩ ɩ tɛɛ tɔ.
\q1
\v 8 Ye wɑhɑlɑ ɩ́ wɑtɑɑ,
\q1 ɩ yɔkǝɣɩ ɩcɑtɛ kɛ́.
\q1 Ɩ wɑkǝlǝɣɩ ɩ kolontunɑɑ tǝnɑ,
\q1 nɑ ɩ́ lɔɣɔ-wɛɣɛ sǝm sǝkpɛtʋɣʋ tɑɑ.
\s1 Tɔmnɑɑ mpɑ pǝ yɔɣɔtǝnɑ Yutɑ nɑ Ninifi nyǝ́mɑ tɔ
\q1
\v 9 Pepe tɔɔ kɛ́ ɩ́ tɔkǝnɑ Tɑcɑɑ kɛ mǝ tɑɑ ye?
\q1 Ɩ kɑ́ lɑ nɑ mǝ kolontunɑɑ sɑɑlɩ yem,
\q1 pɑ kɑɑ tɑsɑ-mɛɣɛ ŋmɑkǝlʋɣʋ.
\q1
\v 10 Pɑ wɛ teitei kɛ́ ɩsɩɩ sɔwɑ mɛɛlʋɣʋ tǝmɑ tɑɑ tɔ.
\q1 Yɑɑ ɩsɩɩ pɑ nyɔɔwɑ nɑ pǝ́ kʋ-wɛ.
\q1 Pɑ mʋɣɩ kɔkɔ kɛ́ ɩsɩɩ nyɩɩtʋ kʋwʋlʋtʋ.
\b
\q1
\v 11 Ninifi ɩcɑtɛ nyɑ́,
\q1 nyɑ́ tɑɑ kɛ́ yʋlʋ ɩsɑɣɑʋ wei
\q1 ɩ́ kʋlǝɣɩ Tɑcɑɑ tɔɔ tɔ ɩ lɩɩwɑ.
\q1
\v 12 Ḿpʋ́ɣʋ́ Tɑcɑɑ heelɑ Yutɑ nyǝ́mɑ sɩ:
\q1 Pɑɑ kolontunɑɑ wɛ pɑɣɑlɛ nɑ pɑ́ wɛ tomɑ,
\q1 pɑɑ sɑɑlɩ yem kɛ́.
\q1 Mɑ yelɑɑ nɑ ɩ́ tɔɣɔ kʋnyɔmǝŋ pɑɣɑlɛ.
\q1 Amɑ mɑ kɑɑ tɑsɑ-mɛɣɛ mpʋ.
\q1
\v 13 Mɑɑ cɛ mǝ ɑlǝkpɑlɑ nɑ mɑ hɛtɩ-mɛɣɛ
\q1 kolontunɑɑ ŋmɑkǝlʋɣʋ tɑɑ.
\b
\q1
\v 14 Ḿpʋ́ɣʋ́ Tɑcɑɑ yɔɣɔtɑ Ninifi nyǝ́mɑ tɔm sɩ:
\q1 Ɩ́ kɑɑ wɛɛnɑ lʋlʋɣʋ nyǝ́mɑ mpɑ pɑɑ yɑɑkǝnɑ mǝ hǝlɑ tɔ.
\q1 Mɑɑ yɔkɩ mǝ tɩɩŋ lɛɛsǝŋ kɛ ɩ kutuluɣu tɑɑ.
\q1 Ɩ́ tɔŋɑ mǝ pǝlɑɑŋ huluɣu kɛ́.
\q1 Mpi tɔ, ɩ́ tɑ́ tɑlɑ pʋlʋɣʋ mɑ ɩsɛntɑɑ.
\p
\v 15 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Ɩɩ nɑɑkɩ tɔm kʋpɑntʋ kpɑɑllʋ
\q1 kɔŋnɑ ntɛɣɛ pɔ́ɔ́ŋ nyɔɔŋ tɑɑ.
\q1 Hɛɛsʋɣʋ tɔm kɛ ɩ́ kpɑɑlǝɣɩ.
\q1 Yutɑ nyǝ́mɑ mɛ,
\q1 ɩ́ tɔɣɔ Ɩsɔ ɑcimɑ.
\q1 Ɩ́ ponɑ-ɩ mpi ɩ́ kɑ sɩɩwɑ sɩ ɩ́ hɑɑ-ɩ tɔ.
\q1 Kolontu wei ɩ tʋkɑɣɑ-mɛɣɛ wɑhɑlɑ tɔ,
\q1 pǝ pɛlɑ ɩ niŋ, ɩ kɑɑ tɑsɑ mpʋ.
\c 2
\b
\q1
\v 1 Hei Ninifi, kolontu kpɑɑkɩ nyɑ́ tɔɔ.
\q1 Ɩ́ kpɑɣɑ yoou wontu,
\q1 pɑɑ wei ɩ́ sǝŋ ɩ tǝsǝŋlɛ nɑ ɩ́ feŋ hɑpɛɛ.
\q1 Ɩ́ tɔɣɔ ɑpɑlʋtʋ.
\q1
\v 2 Tɑcɑɑ kɑ́ mǝŋnɑ Yɑkɔpʋ lʋlʋɣʋ nyǝ́mɑ
\q1 kɛ teeli wei pɑɑ wɛnɑ lɔŋ tɔ ɩ tɑɑ.
\q1 Mpi tɔ, ɩ́ pǝsɑ kɛ́ ɩsɩɩ
\q1 lɛsɛŋ tʋɣʋ ŋku ŋmɩɩlɑɑ koolɑɑ,
\q1 ɩlɛnɑ pɑ́ wɑkǝlɩ tɔ.
\s1 Ninifi ɩcɑtɛ wɑkǝlʋɣʋ
\q1
\v 3 Kolontunɑɑ kɔŋ kɛ́ nɑ pɑ́ sɛɛsɑ
\q1 pɑ kpɑlǝŋ nɑ pɑ wontu kususuutu tǝcǝŋcǝŋ.
\q1 Pɑ yoou kɛɛkɛnɑɑ mʋɣɩ kɔkɔ nɑ pɑ́ teɣetiɣi
\q1 pɑ ŋmɑntɑɑsɩ kɛ yoou wule.
\q1
\v 4 Kɛɛkɛnɑɑ ŋmɑɑkɩ hɑpɛɛ tɔɔ kɛ́,
\q1 pɑ tɔŋ nɔnɔɔsɩ tɛɛ,
\q1 ɩsɩɩ pɑ lɔɣɔ kɑhulɑsɩ,
\q1 yɑɑ tɛʋ nyǝɣǝsʋɣʋ.
\q1
\v 5 Ninifi wulɑʋ yɑɑwɑ ɩ yoolɑɑ nyʋɣʋ nyǝ́mɑ
\q1 nɑ pɑ́ puki nɑ pǝ́ coki-wɛ.
\q1 Kolontu sewɑ nɑ ɩ́ kpǝtǝnɑ koluŋɑ nɑ ɩ́ cɔɔsǝnɑ-kɛ.
\q1
\v 6 Ḿpʋ́ɣʋ́ pɑ cɑŋsɑ pusi hɔɣɔlʋɣʋ tɔɔ ɩcɑtɛ
\q1 nɔnɔɔsɩ nɑ pɑ́ lɛɛkɩ kɑwulɑɣɑ tǝyɑɣɑ.
\q1
\v 7 Pɑ tɛmɑ ɩcɑtɛ tɔm,
\q1 Pɑ kuu tǝ yǝlɑɑ,
\q1 Tǝ ɑlɑɑ kpɑ pɑ lɑŋɑ
\q1 nɑ pɑ́ cɑsǝɣɩ kɑpusi kɛ sɔsɔm.
\q1
\v 8 Ɩsɩɩ lʋm cɑɑtʋɣʋ ɑkɔlɑ nɑ pǝ kpeŋ tɔ.
\q1 Ḿpʋ́ɣʋ́ Ninifi nyǝ́mɑ lɩɩ ɩcɑtɛ tɑɑ nɑ pɑ́ seeki
\q1 nɑ pɑ́ kpɛɛsǝɣɩ-wɛ sɩ pɑ́ sǝŋ.
\q1 Amɑ nɔɣɔlʋ tɑ pǝsɩ.
\q1
\v 9 Kolontu kuu wʋlɑ nɑ liɣitee nyǝɣǝtʋ.
\q1 Pǝnɑ wontu kʋpɑmpɑntʋ pǝ kɑɑwɑ ɩcɑtɛ tɑɑ kɛ́,
\q1 pǝ fɛɩ tɛm.
\q1
\v 10 Pɑ ŋmɩɩlǝɣɩ nɑ pɑ́ kuuki pǝ tǝnɑ
\q1 tǝkpɑtɑkpɑtɑ nɑ pɑ́ wɑkǝlǝɣɩ.
\q1 Ɩlɛnɑ ɩcɑtɛ yǝlɑɑ tǝnɑ lɔɔkɩ ɑpɑlʋtʋ
\q1 nɑ pɑ ɩsɛntɑɑ lɑɣɑsǝɣɩ.
\q1 Pɑ nɔɔhɛɛ nukiɣi nɑ pɑ tɔnǝŋ seliɣi.
\s1 Ninifi wɛ ɩsɩɩ tɔɣɔlɑɣɑ ŋkɑ pǝ kǝlɑɑ tɔ
\q1
\v 11 Ninifi wɛ kɛ́ ɩsɩɩ tɔɣɔlɑɣɑ pʋ́ʋ́ɣʋ́ ŋku
\q1 kʋ tɑɑ kɑ lɩɩkɩ nɑ kɑ́ yɛlɩ nɑ kɑ́ kpɑ wontu
\q1 nɑ kɑ́ cǝlɩ nɑ kɑ́ kɔnɑ kɑ ɑlʋ nɑ kɑ piyɑ kɛ
\q1 nɑntʋ nɑ kɑ́ sɔɣɔtǝnɑ-kʋ tɔ.
\q1 Ɩcɑtɛ ńtɛ́ tǝ tɛmnɑ weɣe nɔɔnɔɔ?
\q1
\v 13 Ḿpʋ́ɣʋ́ Tomɑ tǝnɑ tʋ Tɑcɑɑ tɔmɑ sɩ:
\q1 Mɑɑ pɑɑsǝnɑ Ninifi,
\q1 nɑ mɑ́ yele nɑ kɔkɔ nyɑɣɑ ɩ yoou kɛɛkɛnɑɑ,
\q1 nɑ pǝ́ kʋ ɩ yoolɑɑ nɑ mɑ́ sɩɩ ɩ lɛɛkʋɣʋ kɛ tǝnɑɣɑ.
\q1 Nɔɣɔlʋ kɑɑ tɑsɑ ɩ tillɑɑ ŋmɑkǝlʋɣʋ tɔm nɩɩʋ.
\c 3
\s1 Ninifi ɩcɑtɛ mpusi tǝŋsʋɣʋ
\q1
\v 1 Ninifi ɩcɑtɛ tɔm tɛɛsǝnɑ mpusi kɛlɛ.
\q1 Yʋlʋkʋlɛ nɑ kɑloolɑɣɑ nɑ mʋsʋŋ su tǝ tɑɑ
\q1 kɛ́ nɑ tǝ yǝlɑɑ kɛ lɛɛkǝlɑɑ.
\q1
\v 2 Ɩ́ nɩɩ tǝ tɑɑ ɑkpɑtɛɛ wulɑ,
\q1 nɑ yoou kɛɛkɛnɑɑ tɑŋ,
\q1 nɑ kpɑɣɑnǝŋ ɑcʋwɑ.
\q1
\v 3 Kpɑɣɑnǝŋ cɑɣɑlɑɑ nikɑɑ,
\q1 nɑ lɑɣɑlɛɛ mʋɣɩ kɔkɔ,
\q1 nɑ ŋmɑntɑɑsɩ ŋmɛlǝsǝɣɩ.
\q1 Sǝtɑɑ nɑ mpɑ pǝ kʋwɑ tɔ,
\q1 pɑ sɔɣɔtɑ pɑɑ timpi.
\q1 Pɑ kɑɑ huwɑ huwɑ,
\q1 pɑ coki yǝlɑɑ, pɑ fɛɩ kɑlʋɣʋ.
\s1 Fɛɛlɛ pɩɩwɑ Ninifi nyǝ́mɑ
\q1
\v 4 Ninifi kɛ́ ɑpɑlɑɑ tǝnɑ ɑlʋ kɛ́,
\q1 ɩ teu nɑ ɩ topotopo tǝmɑ kɛ ɩ hɔŋɑɣɑnɑ piitimnɑɑ,
\q1 nɑ ɩ́ ŋmɑkǝlǝɣɩ yǝlɑɑ nɑ ɩ tɩɩtʋ.
\q1
\v 5 Ḿpʋ́ɣʋ́ Tomɑ tǝnɑ tʋ Tɑcɑɑ tɔmɑ sɩ:
\q1 Pǝ tɔɔ kɛ́ mɑɑ pɑɑsǝnɑ-mɛ nɑ mɑ́ cɛ
\q1 mǝ wontu nɑ mɑ́ sɩɩnɑ mǝ luuŋ tɛɛ.
\q1 Piitimnɑɑ ɩ́ nɑ́ ɩsǝnɑ pǝ pɑsɑ-mɛ tɔ.
\q1
\v 6 Mɑɑ tuu-mɛɣɛ ɑfǝlɑ tɑɑ
\q1 nɑ yǝlɑɑ pɑɑkǝnɑ-mɛ.
\q1
\v 7 Pɑ tǝnɑ mpɑ pɑɑ nɑ-mɛ tɔ,
\q1 pɑɑ seeki nɑ pɑ́ tɔŋ sɩ:
\q1 Ninifi pǝsɑ ncɑɑlɛ.
\q1 Awe nɑ́ wɛnɑ tǝ pǝtɔɔtǝlɛ sɩ ɩ kɑ́ puɣusi-tɛ?
\s1 Mpi pɩɩ mɑɣɑnɑ Tɛɛpɩ ɩcɑtɛ tɔ pɩɩ mɑɣɑnɑ Ninifi nyǝntɛ
\q1
\v 8 Ninifi ɩcɑtɛ nyɑ́,
\q1 n hʋʋ sɩ n tɛɛ Tɛɛpɩ ɩcɑtɛ nte tǝ wɛ Nili pɔɣɔ tɑɑ,
\q1 nɑ lʋm tɑmɑ-tɛɣɛ kotɑɣɑ nɑ pǝ kentɑ-tɛ tɔ?
\q1
\v 9 Yoou ɩ́ tiiwɑ, Ɩtiyopii, nɑ Puti,
\q1 nɑ Lipii pɑ kɔŋnɑ nɑ pɑ́ sǝnɑ-tɛ.
\q1
\v 10 Pɑɑ nɑ mpʋ,
\q1 pɑ kuu pɛlɛ pɑ ɑcɑlɛɛ yǝlɑɑ nɑ pɑ́ tɛɛnɑ.
\q1 Pɑ tʋ pɑ nyʋɣʋ nyǝ́mɑ kɛ ɑlukpɑlɑ.
\q1 Ɩlɛnɑ pɑ́ tɔ tɛtɛ nɑ pɑ́ tɑlǝnɑ-wɛ.
\q1 Pɑ nɑŋɑ pɑ piyɑ kɛ hɑpɛɛ kɔŋkɔmǝŋ tɔɔ.
\q1
\v 11 Ninifi pǝ tɑlɑ nyɑɣɑlɛ sɩ,
\q1 wʋsɑsɩ ɩ́ kʋ-ŋ sʋlʋm tǝlɛ nɑ pǝ́ kǝlɩ-ŋ.
\q1 N kɑ́ pɛɛkɩ tǝcɔɔsǝlɛ sɩ,
\q1 ń fiti nyɑ́ kolontunɑɑ, n kɑɑ nɑ́.
\s1 Ninifi ɩɩ pǝsǝɣɩ sɩ ɩ́ kisi
\q1
\v 12 Nyɑ́ koloosi ɑcɑlɛɛ wɛ kɛ́
\q1 ɩsɩɩ fiki tʋɣʋ pee pɩɩkʋɣʋ,
\q1 nɑ pɑ́ nyɑmsɩ-kʋ, nɑ pee hotiɣi tɔɣɔlɑɑ nɔɔsɩ tɑɑ tɔ.
\q1
\v 13 Acɑmisi tike kɛ pǝ kɑɑ-ŋ.
\q1 Ɩcɑtɛ nɔnɔɔsɩ toŋ nyǝnsɩ,
\q1 tʋlǝɣɩ sɩ tǝɣɩ yem.
\q1 Mpi tɔ, kɔkɔ nyɑɣɑ kʋkɑlǝsǝŋ.
\q1
\v 14 Ninifi nyǝ́mɑ mɛ,
\q1 ɩ́ lú lʋm.
\q1 Ɩ́ puu tɛtʋ, nɑ ɩ́ loo pilikinɑɑ,
\q1 nɑ ɩ́ tɑɣɑnɩ mǝ koluŋɑ.
\q1
\v 15 Amɑ mǝ ɩcɑtɛ kɔkɔ kɑ́ nyɑɣɑnɑ-mɛ,
\q1 yɑɑ pɑ́ kʋ-mɛɣɛ yoou tɑɑ.
\q1 Pɑɑ wɑkǝlɩ-mɛɣɛ ɩsɩɩ
\q1 kɑhʋsɩ tɔkʋɣʋ hɑtʋ tɔ.
\s1 Ɩcɑtɛ yǝlɑɑ sɑɑlǝɣɩ yem
\q1 Mǝ ɩcɑtɛ yǝlɑɑ kɑ́ nyǝpǝlǝɣɩ kɛ́ ɩsɩɩ kʋtoloŋ sɛsɛkʋ.
\q1
\v 16 Mǝ tɑɑtǝlɑɑ pɑɣɑlɛ kɑ tɛɛwɑ ɩsɔtʋlʋŋɑsɩ.
\q1 Pɑ nǝɣǝsǝnɑ ɩsɩɩ kʋtoloŋ kʋlʋɣʋ tɔ.
\q1 Amɑ pǝ sɑɑlɑ yem kɛ́ nɔɔnɔɔ.
\q1
\v 17 Mǝ tɔɔ feŋlɑɑ, nɑ mǝ ɑkewenɑɑ wɛ kɛ́ ɩsɩɩ
\q1 kʋtoloŋ cɑkʋɣʋ koluŋɑ pɔɣɔlɛɛ
\q1 tɑɑ kɛ́ wɑtʋ wɑɑtʋ tɔ.
\q1 Ilim hɑŋǝɣɩ ɩlɛnɑ kʋ́ yɑ,
\q1 n tɑ nyɩ timpi kʋ tɛɛnɑɑ tɔ.
\s1 Asɑlɑʋ wei ɩ fɛɩ tɑɣɑnʋɣʋ tɔ
\q1
\v 18 Asilii wulɑʋ,
\q1 nyɑ́ wɑɑlɩ nyǝ́mɑ toowɑ tɑm tɔɔ tom.
\q1 Nyɑ yoolɑɑ sɔsɑɑ nɑ́ hǝntɑɑ nɑ pǝ sumɑ.
\q1 Nyɑ́ yǝlɑɑ yɑ pɔ́ɔ́ŋ tɑɑ,
\q1 nɔɣɔlʋ kɑɑ tɑsɑ-wɛɣɛ kpeɣeluɣu.
\q1
\v 19 Pǝ kʋ-ŋ ɩsɑɣɑkʋɣʋ kɛ́.
\q1 Pǝ́cɔ́ nyɑ́ wɑkǝlʋɣʋ kɑɑ tɑɣɑnɩ.
\q1 Pɑ tǝnɑ mpɑ pɑɑ nɩɩ nyɑ́ tɔm tɔ,
\q1 pɑɑ kpɑsɩ ɑmʋkǝŋ kɛ́.
\q1 Mpi tɔ, yǝlɑɑ tǝnɑ tɔɣɔnɑ nyɑ́ yʋlʋkʋlɛ
\q1 tɑm nyǝntɛ ntɛ́ tǝ kʋnyɔŋ.