\id MIC - Lokpa Bible portions [dop] -Benin 1999 (web edition -2017)
\ide UTF-8
\h Misee
\toc1 ƖSƆ KƲYƆƔƆTƲTƲ TƐLƎSƲLƲ MISEE TƆM TAKƎLAƔA
\toc2 Misee
\toc3 Misee
\mt2 ƖSƆ KƲYƆƔƆTƲTƲ TƐLƎSƲLƲ
\mt1 MISEE
\mt2 TƆM TAKƎLAƔA
\imt1 Kʋtʋlʋtʋ
\ip Ɩsɔ kʋyɔɣɔtʋtʋ tɛlǝsʋlʋ Misee nɑ Ɩsɔ yʋlʋ Ɩsɑyii pɑ wɑɑtʋ kʋlʋm kɛ́. Wɑɑtʋnɑɑ mpɛ pɑ tɑɑ kɛ́ Yutɑ ɑwulɑɑ Akɑpɩ nɑ Ɩsekiyɑsɩ pɑ́ tɔɣɔ pɑ kɑwulɑsɩ. Ɩlɛnɑ Asilii yoolɑɑ nɑ́ɑ́ cɔɔsǝɣɩ Yutɑ nyǝ́mɑ. Ḿpʋ́ɣʋ́ Misee kpɑɑlɑɑ sɩ kolontunɑɑ kɑ́ tɔɣɔ Yutɑ ɩcɑtɛ sɔsɔɔlɛ Yosɑlɛm kɛ pɑ ɩsɑɣɑtʋ tɔɔ. Amɑ wɑɑtʋ kɑ kɔɔ wei ɩ tɑɑ Ɩsɔ kɑ lǝsɩ wɑɑsʋlʋ wei ɩ́ kɑ́ tɔɣɔ kɑwulɑɣɑ kɛ Ɩsɛɣɛlɩ tɔɔ tɔ (titite 5).
\iot Ɩsǝnɑ pɑ fɑɣɑ Misee tɑkǝlɑɣɑ tɔ:
\io1 Ɩsɔ kpɑɑlǝɣɩ sɩ ɩ kɑ́ hʋʋnɑ ɩ yǝlɑɑ nɑ ɩ́ hɔ pɑ ŋkpɑŋŋ, titite \ior 1–3 nɑ 6:1–7:7\ior*
\io1 Ɩsɔ sɩ ɩnɩ ɩ kɑ́ yɑ ɩ yǝlɑɑ, titite \ior 4–5 nɑ 7:8-20\ior*
\io1 Ɩsɔ sɩ ɩnɩ ɩ kɑ́ kpɑ-wɛɣɛ wulɑʋ kɛ Tɑfiiti lʋlʋɣʋ tɑɑ, titite \ior 5:1-4\ior*
\c 1
\p
\v 1 Ḿpʋ́ɣʋ́ Tɑcɑɑ tʋ Molɛsɩ tʋ Misee tɑɑ kɛ́ ɩ tɔm. Yutɑ ɑwulɑɑ Yotɑm nɑ Ahɑsɩ nɑ Ɩsekiyɑsɩ pɑ wɑɑtʋnɑɑ tɑɑ kɛ́ Ɩsɔ tʋwɑ ɩ tɔm ntǝɣɩ Misee tɑɑ. Ḿpʋ́ɣʋ́ Misee yɔɣɔtɑ Yosɑlɛm nɑ Sɑmɑlii pɑ ɑcɑlɛɛ tɔm.
\s1 Tɑcɑɑ kɑlǝnɑʋ kɛ ɩ yǝlɑɑ
\q1
\v 2-3 Tɛtʋ yǝlɑɑ mɛ mǝ tǝnɑ ɩ́ ke ŋkpɑŋŋ.
\q1 Tɑcɑɑ kɑ́ lɩɩ ɩ tǝcɑɣɑlɛ
\q1 nɑ ɩ́ tii pɔ́ɔ́ŋ comcom nɔɣɔ tɑɑ.
\q1 Ɩ kɑ́ kɔɔ nɑ ɩ́ kɛɛsɩ mǝ ɩsɑɣɑtʋ tǝnɑ.
\q1
\v 4 Nɑ pɔ́ɔ́ŋ hooki nɑ ɩ́ suuliɣi tɛtɛkɑ,
\q1 ɩsɩɩ kɔkɔ nyɑkʋɣʋ keetu nɑ tǝ́ hooki tɔ,
\q1 yɑɑ lʋm kpeŋuɣu tontoŋɑ tɔɔ tɔ.
\q1
\v 5 Ɩsɛɣɛlɩ nyǝ́mɑ wɑkǝlɑɑ nɑ pɑ́ pǝntǝnɑ
\q1 Ɩsɔ tɔɣɔ pǝ lɑkɩ mpʋ.
\q1 Sɑmɑlii ɩcɑtɛ sɔsǝnɑ Ɩsɛɣɛlɩ
\q1 nyǝntɛ sɩ tǝ́ kʋlɩ Ɩsɔ tɔɔ.
\q1 Nɑ Yosɑlɛm nɑ́ɑ́ sʋsɩ Yutɑ kɛ lɑɑtʋ tɑɑ.
\q1
\v 6 Ḿpʋ́ɣʋ́ Tɑcɑɑ tɔmɑ sɩ:
\q1 Pǝ tɔɔ kɛ́ mɑɑ yele nɑ
\q1 Sɑmɑlii pǝsɩ ncɑɑlɛ huɣule.
\q1 Nyɑ́ pɛɛ kɑ́ pilimi nɑ ɑ tii tɛtɛkǝlɛ tɑɑ,
\q1 nɑ pǝ́ yele kpɛtɛ nɑ tʋmǝŋ nyɔ.
\q1
\v 7 Pɑɑ yɔkɩ nyɑ́ tɩɩŋ kʋlɑlɑɑŋ tǝnɑɣɑ hɔɣɔlɑsɩ.
\q1 Pɑɑ wɔ kɔkɔ kɛ kʋcɔɔŋ wei pɑɑ lɑpɑ tɩɩŋ
\q1 wɑsɑŋkɑlǝnɑɑ tɔ.
\q1 Pǝ yeki nyǝɣǝtʋ ɩlɛnɑ kolontunɑɑ
\q1 kpɑɣɑ nɑ pɑ́ fɛlɩ wɑsɑŋkɑlǝnɑɑ lɛlɑɑ.
\s1 Tɑcɑɑ nɑɑsʋɣʋ kɛ Yosɑlɛm
\q1
\v 8 Ḿpʋ́ɣʋ́ Misee tɔmɑ sɩ:
\q1 Ye mɑ tɔɔsɑ nɑɑsʋɣʋ mpɩ pǝ tɔm,
\q1 mɑ lɑŋlɛ wɑkǝlǝɣɩ kɛ́.
\q1 Ɩlɛnɑ mɑ́ cɑsǝɣɩ kɑpusi ɩsɩɩ sʋnsʋmʋɣʋ,
\q1 nɑ mɑ́ sɑlǝmǝɣɩ nɑ mɑ luɣu tɛɛ lɛɛlɩ ɩsɩɩ tɑɑtɑɑnɑɑ,
\q1 nɑ mɑ́ wɔɣɔsɩ mɑ wontu nɑ mɑ́ tɔŋ nɔɔhɛɛ kpɛtɛ.
\q1
\v 9 Sɑmɑlii kɑɑ fiti sǝm, hɑlɩ pɩɩ tɑtɩ
\q1 Yutɑ tɛtʋ ɩcɑtɛ Yosɑlɛm timpi mɑ
\q1 yǝlɑɑ wɛɛ tɔ, pǝ nɔnɔɔsɩ.
\b
\q1
\v 10 Ɩ́ tɔkɩ mǝ ɩsǝlʋm kɛ Ako.
\q1 Ɩ́ tɑɑ heeli sǝm tɔm ntǝɣɩ
\q1 tɑ kolontunɑɑ Kɑtɩ ɩcɑtɛ nyǝ́mɑ.
\q1 Ɩ́ cɑɣɑ lǝyɑɣɑ kɛ Pɛtɩ-Lǝyɑfǝlɑ:
\q1 Mʋsʋɣʋ tǝyɑɣɑ kɛ pɑ yɑɑ mpʋ.
\q1
\v 11 Sɑfii ɩcɑtɛ nyǝ́mɑ: Ɩcɑtɛ kʋpɑntɛ kɛ pɑ yɑɑ mpʋ,
\q1 mɩɩ wɔɣɔsɩ mǝ wontu nɑ ɩ́ tɛɛ yomle nɑ fɛɛlɛ.
\q1 Sɑɑnɑɑ ɩcɑtɛ nyǝ́mɑ: Ɩcɑtɛ lɩɩʋ kɛ pɑ yɑɑ mpʋ,
\q1 pɛlɛ pɑ tɑ tɑlɑ pɑ́ lɩɩ.
\q1 Pɛtɩ-Sɛɛlɩ: Koluŋɑ ɩcɑtɛ kɛ pɑ yɑɑ mpʋ,
\q1 ɩcɑtɛ ɩɩ kentiɣi tǝ yǝlɑɑ tɔɔ,
\q1 nɑ pɑ́ wiiki lǝyɑɣɑ wulɑ.
\q1
\v 12 Mɑlo ɩcɑtɛ nyǝ́mɑ: Lɑŋwɑkǝllɛ ɩcɑtɛ kɛ pɑ yɑɑ mpʋ,
\q1 pɛlɛ pɑ nyɑŋ sɩ pɑ nyʋɣʋ yɑpʋ tɔm kɑ́ sɑɑlɩ.
\q1 Wɑhɑlɑ wei Tɑcɑɑ kɔnɑɑ tɔ ɩ tɑlɑ Yosɑlɛm ɩcɑtɛ kiŋ,
\q1 kɛ tǝ nɔnɔɣɔ.
\q1
\v 13 Lɑkisi ɩcɑtɛ nyǝ́mɑ: Pɑɑ kǝlǝɣɩ kɛ́ pɑ yɑɑ mpʋ,
\q1 ɩ́ kpɛɛlɩ mǝ kpɑɣɑnǝŋ nɑ ɩ́ se.
\q1 Ɩ́ kɛɛnɑ Ɩsɛɣɛlɩ nyǝ́mɑ kɑɑnɩɩtʋ.
\q1 Ɩ́ sʋsɩ Yosɑlɛm nyǝ́mɑ kɛ Ɩsɔ tɔɔ kʋlʋɣʋ tɑɑ.
\q1
\v 14 Pǝ tɔɔ kɛ́ Yutɑ nyǝ́mɑ mɛ,
\q1 ɩ́ kɑɑ tɑsɑ nɑ ɩ́ tɩ Molɛsɩ-Kɑtɩ ɩcɑtɛ:
\q1 Kɑtɩ tǝnnɑ kɛ pɑ yɑɑ mpʋ.
\q1 Akɑsipɩ ɩcɑtɛ nyǝ́mɑ: Puɣusuɣu kɛ pɑ yɑɑ mpʋ,
\q1 pɛlɛ pɑ kɑɑ sǝnɑ Ɩsɛɣɛlɩ ɑwulɑɑ.
\q1
\v 15 Mɑlesɑ ɩcɑtɛ nyǝ́mɑ:
\q1 Kǝllʋ ɩcɑtɛ kɛ pɑ yɑɑ mpʋ.
\q1 Tɑcɑɑ kɑ́ tɑsɑ-mɛɣɛ kǝllʋ niŋ tɑɑ kɛ́ tʋɣʋ.
\q1 Nɑ Ɩsɛɣɛlɩ wulɑʋ kɑ́ ŋmɛlɩ Atulɑm kʋkpɑmʋɣʋ pʋ́ʋ́ɣʋ́ tɑɑ:
\q1 Wulɑʋ kʋkpɑmʋɣʋ kɛ pɑ yɑɑ mpʋ
\b
\q1
\v 16 Yosɑlɛm nyǝ́mɑ ɩ́ looli mǝ nyɔɔŋ ɩsɩɩ yepelekunɑɑ,
\q1 ɩ́ wii mǝ piyɑ tɔɔ.
\q1 Mpi tɔ, pɑɑ kpɑɣɑ-wɛ nɑ pɑ́ tɛɛnɑ yomle kɛ pooluŋ.
\c 2
\s1 Mpi kʋnyɔntʋnɑɑ muɣullɑɑ kɑ tɛɛsǝnɑ tɔ
\q1
\v 1 Yǝlɑɑ hǝntǝɣɩ nɑ pɑ́ mɑɣɑsǝɣɩ ɩsɑɣɑtʋ,
\q1 pǝ nyɑɑlǝɣɩ ɩlɛnɑ pɑ́ lɑkɩ-tǝɣɩ wɑɑtʋ wei
\q1 pɑ wɛnɑ pǝ mpɑɑʋ tɔ.
\q1 Pǝ yǝlɑɑ tɔm wɛ wɑɩyo kɛ́.
\q1
\v 2 Ye tɑwɑ yɑɑ tɛɛsɩ kɛ pɑ nyɩɩlɑɑ pɑ lɛɛkɩ.
\q1 Pɑ lɑkǝnɑ mʋsʋŋ kɛ yǝlɑɑ nɑ pɑ wɛnɑʋ.
\q1
\v 3 Pǝ tɔɔ kɛ́ Tɑcɑɑ yɔɣɔtɑɑ sɩ:
\q1 Mɑ tɑɣɑnǝɣɩ ɩsɑɣɑtʋ kɛ mǝ nyʋɣʋ tɔɔ.
\q1 Ɩ́ kɑɑ fiti-tɩ,
\q1 pǝ́cɔ́ ɩ́ kɑ́ tɔŋ kɛ́ nɑ ɩ́ kɑmɑ nyɔɔŋ.
\q1 Mpi tɔ, wɑhɑlɑ kʋyɛɛŋ kɔŋnɑ.
\q1
\v 4 Wɑɑtʋ ɩnǝɣɩ ɩ́ kɑ́ wiiki nɑ lɛlɑɑ mɑɣɑsǝɣɩ-mɛ sɩ:
\q1 Ɩsɔ kpiisɑ-mɛ tǝnɑŋnɑŋ,
\q1 nɑ ɩ́ cɛlɑ mǝ tɛtʋ kɛ mǝ kolontunɑɑ.
\q1 Pǝ tɑ kɑɑsɩ-mɛɣɛ pʋlʋ.
\q1
\v 5 Mǝ tɑɑ nɔɣɔlʋ kɑɑ hiki ɩ pɑɑ nyǝm
\q1 kɛ tɛtʋ nti Tɑcɑɑ yǝlɑɑ kɑ́ tɑɣɑnɩ
\q1 tɑlʋɣʋ tɔ tǝ tɑɑ.
\s1 Tɑcɑɑ tɔm kisilɑɑ
\q1
\v 6 Lɛlɑɑ nɑ́ sɔɔ pɑ nyǝntʋ tɔɔ,
\q1 nɑ pɑ́ tɔŋ mɑ́ sɩ mɑ́ su,
\q1 sɩ mɑ kǝlǝɣɩ kɑkɑlɑɣɑ.
\q1 Sɩ fɛɛlɛ kɑɑ tɔɣɔ mpɛ.
\q1
\v 7 Hɑlǝnɑ pɑ́ tɔŋ sɩ Ɩsɔ kɑɑ mʋ pɑ́ɑ́nɑ́
\q1 kɛ lɔŋ nɑ ɩ́ lɑ mpɛɣɛ mpʋ.
\q1 Mpɑ pɑ tɔŋ kʋsiɣisim tɑɑ tɔ,
\q1 pɑ tike kɛ mɑ heeliɣi tɔm kʋpɑntʋ.
\q1
\v 8 Amɑ Tɑcɑɑ yɔɣɔtǝɣɩ mǝ tɔm sɩ:
\q1 Hɑtoo lɔŋ kɛ ɩ́ pǝsǝɣɩ mɑ yǝlɑɑ kolontunɑɑ.
\q1 Ɩ́ lɛɛkǝɣɩ yʋlʋpɑmɑ mpɑ pɑ lɩɩnɑ yoou nɑ ɑlɑɑfǝyɑ tɔ,
\q1 pɑ sɑɣɑtɑnɑɑ kɛ mʋsʋŋ.
\q1
\v 9 Ɩ́ tɔɣɔnǝɣɩ pɑ ɑlɑɑ kɛ pɑ tɛ.
\q1 Ɩ́ tɔŋ sɩ ɩ́ lɛɛkǝɣɩ pɑ piyɑ kɛ kʋpɑntʋ nti Ɩsɔ hɑ-wɛ tɔ.
\q1
\v 10 Ɩ́ polo ɩ́ tɛɛ yoo,
\q1 mǝ hɛɛsʋɣʋ tɛmɑɣɑ.
\q1 Wɑhɑlɑnɑɑ tɑŋɑ-mɛɣɛ mǝ ɩsɑɣɑtʋ tɔɔ kɛ́.
\b
\q1
\v 11 Ɩsɔ kʋyɔɣɔtʋtʋ tɛlǝsǝlɑɑ
\q1 tɛtɛlɑtɑɑ mpɑ pɑ cɔɔkɩ yem,
\q1 nɑ pɑ́ looliɣi-mɛ sɩ ɩ́ kɑ́ yɑ́
\q1 sʋlʋmnɑɑ tɑɑ tɔɣɔ ɩ́ cɑɑkɩ.
\s1 Ɩsɔ kpeɣeliɣi Ɩsɛɣɛlɩ kɑkɑɑsɑɣɑ
\q1
\v 12 Ḿpʋ́ɣʋ́ Tɑcɑɑ tɔmɑ sɩ:
\q1 Mɑɑ kpeɣeli Ɩsɛɣɛlɩ kɑkɑɑsɑɣɑ mɛ
\q1 ɩsɩɩ heeŋ kɛ tǝtǝkǝlɛ,
\q1 yɑɑ tǝtɔɣɔlɛ tɑɑ nɑ ɩ́ cɑɣɑnɑ mǝ tɩ.
\q1
\v 13 Mɑ́ɑ́ hɛɛnɑ-mɛɣɛ yomle nɔnɔɣɔ,
\q1 nɑ ɩ́ pǝsɩ nɑ ɩ́ fiti.
\q1 Mɑɣɑlɛ mǝ wulɑʋ,
\q1 mɑ́ɑ́ tiikinɑ-mɛ.
\c 3
\s1 Nyʋɣʋ nyǝ́mɑ kʋkpɑɑlǝtʋ
\p
\v 1 Ḿpʋ́ɣʋ́ Misee pɔɔsɑ Ɩsɛɣɛlɩ nyʋɣʋ nyǝ́mɑ sɩ:
\q1 Pǝ tɑɣɑ mǝ nyǝntɛ ntɛ́ sɩ ɩ́ tǝŋ tɑmpɑnɑ?
\q1
\v 2-3 Amɑ ɩ́ kisɑ kʋpɑntʋ,
\q1 nɑ ɩ́ sɔɔlɩ ɩsɑɣɑtʋ.
\q1 Ɩ́ tɔɔkǝnɑ mǝ tǝɣɩ mɑ yǝlɑɑ nɑ ɩ́ litiɣi pɑ tɔnǝŋ.
\q1 Ɩ́ kɔɔlǝɣɩ pɑ nɑntʋ nɑ pǝ yeki mʋwɑ.
\q1 Ɩ́ cɔtǝɣɩ-wɛ nɑ ɩ́ hiisiɣi ɩsɩɩ nɑntʋ nti
\q1 pɑɑ tʋ tiipile tɑɑ tɔ.
\q1
\v 4 Pǝ tɔɔ kɛ́ pɑɑ ɩ́ wiinɑ Tɑcɑɑ sɩ
\q1 ɩ́ wɑɑsɩ-mɛ, ɩ́lɛ́ ɩ kɑɑ cɔ.
\q1 Ɩ kɑ́ hɑ-mɛɣɛ siɣile kɛ mǝ ɩsɑɣɑtʋ tɔɔ kɛ́.
\s1 Ɩsɔ kɑlǝɣǝnɑ ɩ kʋyɔɣɔtʋtʋ tɛlǝsǝlɑɑ tʋsǝlɑɑ
\q1
\v 5 Tɑcɑɑ yɔɣɔtǝɣɩ Ɩsɔ kʋyɔɣɔtʋtʋ tɛlǝsǝlɑɑ
\q1 mpɑ pɑ tʋsǝɣɩ ɩ yǝlɑɑ tɔ sɩ:
\q1 Ye ɩ́ hikiɣi nɑ ɩ́ mʋlǝɣɩ,
\q1 ɩlɛ wɑɑtʋ ɩnǝɣǝlɛ ɩ́ heeliɣi ɑlɑɑfǝyɑ tɔm.
\q1 Ye ɩ́ lɑŋɑɑ, ɩlɛ ɩ́ kpɑɑlǝɣɩ yooŋ kɔntɛ tɔm.
\q1
\v 6 Mpʋ tɔ, mǝ toosee tɛmɑ.
\q1 Ahoo kɑ́ yu mǝ tɔɔ.
\q1 Cele tɔm nɑʋ sɩɩ tǝnɑɣɑ.
\q1 Sǝkpɛtʋɣʋ kɑ́ nyɑlǝnɑ mǝ tɔɔ ɩsɩɩ ilim tʋwɑ,
\q1 ɩ́ kɑɑ nɑ pʋlʋ.
\q1
\v 7 Cele tɔm nɑlɑɑ tǝnɑ kɑ́ kɑ nyɔɔŋ nɑ fɛɛlɛ.
\q1 Mpi tɔ, Ɩsɔ ɩɩ cɔɔkɩ-mɛ.
\q1
\v 8 Misee sɩ: Amɑ mɑ́ ɩlɛ
\q1 Tɑcɑɑ hɑ mɑɣɑ ɩ Feesuɣu.
\q1 Mɑ wɛnɑ toŋ nɑ mɑ́ tǝŋǝɣɩ siɣisuɣu
\q1 nɑ mɑ́ wɛnɑ ɑpɑlʋtʋ,
\q1 nɑ mɑ́ kuliɣi ɩsɛɣɛlɩ nyǝ́mɑ kɑwɑlɑɣɑ tɔɔ.
\s1 Yosɑlɛm wɑkǝlʋɣʋ tɔm kpɑɑlʋɣʋ
\q1
\v 9 Ɩsɛɣɛlɩ nyʋɣʋ nyǝ́mɑ mɛɣɛ mɑ wɛnɑ.
\q1 Ɩ́ kisiɣi siɣisuɣu tǝŋʋɣʋ,
\q1 nɑ ɩ́ pɛŋ tɑmpɑnɑ kɛ ɑ nyǝ́mɑ.
\q1
\v 10 Ɩ́ ŋmɑɑkɩ Yosɑlɛm nɑ muɣuluɣu nɑ yʋlʋkʋlɛ.
\q1
\v 11 Kʋhɑʋ tɔɔ kɛ́ hʋʋlɑɑ nɑ́ pɑɑsǝɣǝnɑ tɔm.
\q1 Kɔtǝlɑɑ nɑ́ mʋɣʋ kʋfɛlʋɣʋ nɑ pǝ́cɔ́ pɑ́ sɛɣɛsǝɣɩ.
\q1 Ɩsɔ kʋyɔɣɔtʋtʋ tɛlǝsǝlɑɑ nɑ́ kpɑɑlǝɣɩ liɣitee tɔɔ.
\q1 Ɩlɛnɑ pɑɑ nɑ mpʋ pɑ́ yɑɑkɩ pɑ tǝɣɩ Tɑcɑɑ nyǝ́mɑ.
\q1 Hɑlɩ pɑ tɔŋ sɩ: Ɩsɔ wɛ tɑ wɑɑlɩ kɛ́,
\q1 mpusi nɔɣɔlʋ ɩ kɑɑ mɑɣɑnɑ tʋ.
\q1
\v 12 Mɩɩ yelinɑ nɑ Siyɔŋ ɩcɑtɛ pǝsɩ hɑlǝm.
\q1 Nɑ Yosɑlɛm nɑ́ɑ́ pǝsɩ pɛɛ kɑŋmɑɑɣɑ.
\q1 Tɩɩŋ kɑ́ wɑɑsɩ Ɩsɔ tǝsɛɛlɛ pulɑɣɑ.
\c 4
\s1 Hɛɛsʋɣʋ ɩcɑtɛ Yosɑlɛm tɔm
\q1
\v 1 Kʋyɑkʋ nɑkʋlɩ Ɩsɔ tǝsɛɛlɛ pulɑɣɑ
\q1 kɑ́ tɛɛ lɛnsɩ tǝnɑɣɑ kʋŋkʋlʋmǝŋ.
\q1 Wɑɑtʋ ɩnǝɣɩ piitimnɑɑ kɑ́ kpɑ kɑ tɔɔ kɛ́ tuutuumɑ.
\q1
\v 2 Pɑɑ heeli tǝmɑ sɩ:
\q1 Tǝ́ kpɑ Ɩsɛɣɛlɩ Ɩsɔ Tɑcɑɑ tǝyɑɣɑ kɛ pulɑɣɑ tɔɔ,
\q1 nɑ ɩ́ hʋlɩ-tʋɣʋ ɩ mpɑɑʋ nɑ tǝ́ tǝŋ-kʋ.
\q1 Mpi tɔ, Siyɔŋ kɛ Tɑcɑɑ tɔm lɩɩkǝnɑ.
\q1
\v 3 Ɩ kɑ́ hʋʋnɑ yǝlɑɑ pɑɣɑlɛ
\q1 nɑ ɩ́ fɑɣɑsɩ piitimnɑɑ toŋ nyǝm,
\q1 pɑɑ mpi pǝ wɛ pooluŋ tɔ.
\q1 Nɑ pɑ́ mǝŋnɑ pɑ lɑɣɑlɛɛ nɑ pɑ
\q1 ŋmɑntɑɑsɩ nɑ pɑ́ lu ɑkuŋ nɑ ɑsɑntǝnɑɑ.
\q1 Piitim nɑpǝlɩ pǝ kɑɑ yoonɑ lɛmpɩ,
\q1 pǝ́cɔ́ yoou fɑlǝsʋɣʋ kɑɑ tɩɩ wɛɛ tɔtɔ.
\q1
\v 4 Pɑɑ wei ɩ kɑ́ hɑlǝnɑ hɛɛsʋɣʋ kɛ ɩ tɩɩŋ tɑwɑ,
\q1 nɔɣɔlʋ kɑɑ nyɑɑsɩ-ɩ.
\q1 Tomɑ tǝnɑ tʋ Tɑcɑɑ yɔɣɔtǝnɑ mpʋ.
\b
\q1
\v 5 Tɩɩŋ kɛ piitimnɑɑ lɛlɑɑ nɑ́ lɑɑkɩ.
\q1 Amɑ Tɑcɑɑ tɑ́ Ɩsɔ kɛ́ Ɩsɛɣɛlɩ nyǝ́mɑ tɑ́,
\q1 tɑ́ sɛɛkɩ nɑ tǝ́ tǝŋǝɣɩ tɑm tɔɔ.
\s1 Tɑcɑɑ kɑwulɑɣɑ tɔɣɔʋ kɛ Yosɑlɛm tɔɔ tɔtɔ
\q1
\v 6-7 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Kʋyɑkʋ nɑkʋlɩ mɑɑ mʋ mpɑ pɑ ŋkpɑŋʋɣʋ
\q1 mɑ hɔmɑ nɑ mɑ́ yele nɑ pǝ́ kʋ-wɛ tɔ.
\q1 Mɑɑ mǝlǝnɑ mpɑ pɑ kuuwɑ tɔ,
\q1 nɑ mɑ́ pǝsɩ-wɛɣɛ piitim toŋ nyǝm.
\q1 Mɑɑ tɔɣɔ pɑ tɔɔ kɛ́ kɑwulɑɣɑ kɛ Siyɔŋ
\q1 pʋɣʋ tɑɑ kɛ́ wɑɑtʋ ɩnɩ,
\q1 hɑlǝnɑ pǝ́ polo tɑm tɔɔ.
\q1
\v 8 Yosɑlɛm, nyɑ́ wei nyɑ́ pǝsɑ ɩsɩɩ
\q1 tiikilɑɑ kɑlǝkǝŋ tǝfeŋle tɔ,
\q1 pɩɩ tʋ-ŋ nyɑ́ toŋ kɑwulɑɣɑ nyǝŋ.
\q1 N kɑ́ mǝlɩ ɩcɑtɛ sɔsɔɔlɛ,
\q1 ɩsɩɩ n kɑ wɛʋ tɔ.
\s1 Yosɑlɛm mɑɣɑsʋɣʋ nɑ ɩ wɑɑsʋɣʋ
\q1
\v 9 Yosɑlɛm yǝlɑɑ mɛ ɩ́ fɛɩnɑ wulɑʋ,
\q1 mǝ tɔm tɑsǝlɑɑ sǝpɑ.
\q1 Pǝ tɔɔ kɛlɛ ɩ́ mɑkɩ kɑpusi nɑ ɩ́
\q1 sɑlǝmǝɣɩ ɩsɩɩ wʋsɑsɩ tɑlɑ ɑhonto?
\q1
\v 10 Siyɔŋ nyǝ́mɑ mɛ ɩ́ Sɑlǝmɩ nɑ ɩ́ wii ɩsɩɩ ɑlʋllʋ.
\q1 Mpi tɔ, pɩɩ lǝsɩ-mɛɣɛ ɩcɑtɛ tɑɑ kɛ́,
\q1 nɑ ɩ́ polo tɑɑlɛ, hɑlǝnɑ Pɑpiloni.
\q1 Tǝnɑɣɑ Tɑcɑɑ kɑ́ wɑɑsɩ-mɛ,
\q1 nɑ ɩ́ lɛɛkɩ-mɛɣɛ mǝ kolontunɑɑ niŋ tɑɑ.
\q1
\v 11 Piitimnɑɑ pɑɣɑlɛ tɛmɑ kotuɣu kɛ mǝ tɔɔ.
\q1 Ɩlɛnɑ pɑ́ tɔŋ sɩ,
\q1 Yosɑlɛm ɩ́ pilisi nɑ pɑ́ pɑɑnɑ ɩ ncɑɑ.
\q1
\v 12 Yǝlɑɑ mpɛ pɑ tɑ nyɩ nti Tɑcɑɑ lǝsɑɑ nɑ ɩ́ sɩɩ tɔ.
\q1 Ɩ cɑɑ kɛ́ sɩ ɩ́ kpeɣeli-wɛ ɩsɩɩ mǝhɔwɑ kɛ timpi ɩ́ kɑ́ mɑ-wɛ tɔ.
\q1
\v 13 Yosɑlɛm yǝlɑɑ mɛ ɩ́ kʋlɩ nɑ ɩ́ hɔ pɑ ŋkpɑŋŋ.
\q1 Mɑɑ hɑ-mɛɣɛ toŋ,
\q1 ɩsɩɩ nɑʋ wei ɩ wɛnɑ nyǝɣǝlʋɣʋ hǝŋ tɔ.
\q1 Yɑɑ nyǝɣǝlʋɣʋ kʋsɛɛmʋɣʋ ɑcʋwɑ tɔ.
\q1 Ɩ́ kɑ́ kʋ piitimnɑɑ pɑɣɑlɛ.
\q1 Ɩlɛnɑ ɩ́ sɩɩ Tɛtʋ tǝnɑ tʋ Tɑcɑɑ mɑɣɑ
\q1 wɛnɑʋ sɔsɔɔm mpi ɩ́ kɑ́ kuu tɔ.
\c 5
\q1
\v 1 Pǝnɛntɛ Yosɑlɛm yǝlɑɑ mɛ ɩ́ kpeɣeli
\q1 nɑ ɩ́ hɛɛtɩ mǝ tɩ nɑ lɑŋwɑkǝllɛ.
\q1 Pɑ tɔŋɑ-mɛɣɛ kotɑɣɑ tɑm kɛ́.
\q1 Pɑ mɑkɩ Ɩsɛɣɛlɩ wulɑʋ ɩsɛntɑɑ kɛ kpɑ́tʋ́ɣʋ́.
\s1 Wɑɑsʋlʋ ɩcɑtɛ Pɛtǝlɛhɛm tɔm
\p
\v 2 Ḿpʋ́ɣʋ́ Tɑcɑɑ tɔmɑ sɩ:
\q1 Pɛtǝlɛhɛm ɩcɑtɛ nyɑɣɑ Ɩfǝlɑtɑ tɑɑ,
\q1 n kɛ́ Yutɑ ɑcɑlɛɛ tɑɑ sǝkpete kɛ́.
\q1 Amɑ nyɑ́ tɑɑ kɛ́ mɑɑ lǝsɩ wei ɩ kɑ́
\q1 tiiki Ɩsɛɣɛlɩ nyǝ́mɑ nɑ mɑ hǝtɛ tɔ.
\q1 Pʋntʋ ɩnɩ ɩ lʋlʋɣʋ hoolɑɣɑ lɩɩ sɔsɑɑ tɑɑ kɛ́.
\q1
\v 3 Tɑcɑɑ kɑ́ lɔ ɩ yǝlɑɑ,
\q1 hɑlǝnɑ pǝ́ tɑlɑ wɑɑtʋ wei
\q1 ɑlʋ nɔɣɔlʋ ɩ kɑ́ lʋlɩ pǝyɑɣɑ tɔ.
\q1 Mpɑ pɩɩ sɔɔ mpɑ pɑ kuuwɑ tɔ pɑ tɑɑ tɔ,
\q1 pɛlɛ pɑɑ kɔɔ nɑ pɑ́ sɔɔsɩ Ɩsɛɣɛlɩ nyǝ́mɑ lɛlɑɑ tɔɔ.
\q1
\v 4 Pǝyɑɣɑ ŋkɛ, kɑ Ɩsɔ Tɑcɑɑ toŋ kɛ kɑɑ
\q1 tiikinɑ Ɩsɛɣɛlɩ nyǝ́mɑ nɑ pɑ́ cɑɣɑnɑ pɑ tɩ.
\q1 Mpi tɔ, ɑntulinyɑ yǝlɑɑ tǝnɑ kɑ́
\q1 yɔɣɔtǝɣɩ kɑ pǝsʋɣʋ tɔm kɛ́.
\q1
\v 5 Nkɛ kɑɑ yelinɑ nɑ tǝ́ hɛɛsɩ.
\q1 Pɑɑ Asilii nyǝ́mɑ kɔmɑ nɑ pɑ́ wɑtɩ tɑ́ tɛtʋ
\q1 nɑ pɑ́ sʋʋ tɑ́ tɛɛsɩ tɑɑ.
\q1 Tɩɩ kʋsɩ tɑ́ nyʋɣʋ nyǝ́mɑ tuutuumɑ,
\q1 nɑ pɑ́ polo pɑ tɔɔ.
\b
\q1
\v 6 Pɑɑ lɛɛkɩ Nimloti Asilii nyǝ́mɑ nɑ toŋ.
\q1 Pɑɑ wɑɑsɩ-tʋɣʋ pɑ niŋ tɑɑ kɛ́ wɑɑtʋ wei pɛlɛ
\q1 pɑɑ tɛsɩ tɑ́ kɑŋmɑɑɣɑ nɑ pɑ́ wɑtɩ-tʋ tɔ.
\s1 Ɩsɛɣɛlɩ nyǝ́mɑ mpɑ pǝ sɔɔwɑ lɛlɑɑ tɑɑ tɔ
\q1
\v 7 Ɩsɛɣɛlɩ nyǝ́mɑ kɑkɑɑsɑɣɑ kɑ wɛɛ
\q1 piitimnɑɑ lɛlɑɑ tɑɑ ɩsɩɩ cɔlɔʋ.
\q1 Yɑɑ tɛʋ ŋku Tɑcɑɑ yeki nɑ kʋ nɩɩkɩ
\q1 nɑ pǝ́ tɑ́ lɩɩnɑ yʋlʋ toŋ tɑɑ tɔ.
\b
\q1
\v 8 Pɑɑ wɛɛ toŋ kɛ́,
\q1 ɩsɩɩ tɔɣɔlɑɣɑ kɛ tɑɑlɛ wontu hɛkʋ,
\q1 yɑɑ heeŋ kɑlǝkʋ tɑɑ.
\q1 Pɑɑ timpiɣi pɑ tɔŋ pɑ kpiki pɑ tɔɣɔnɑɣɑ kɛ́,
\q1 nɑ pɑ́ cǝlɩ, nɔɣɔlʋ ɩɩ lɛɛkǝɣɩ-wɛ.
\b
\q1
\v 9 Ɩsɛɣɛlɩ kpɑ nyɑ́ kolontunɑɑ
\q1 tǝnɑ nɑ n cǝlɩ-wɛ.
\s1 Ɩsɔ kɑ́ wɑkǝlɩ yoou wontu nti yǝlɑɑ wɛnɑ nɑɑni tɔ
\q1
\v 10 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Kʋyɑkʋ nɑkʋlɩ kɩɩ kɔɔ,
\q1 ŋku kʋ tɑɑ mɑɑ kʋ mǝ kpɑɣɑnǝŋ
\q1 nɑ mɑ́ wɑkǝlɩ mǝ yoou kɛɛkɛnɑɑ tɔ.
\q1
\v 11 Mɑɑ yɔkɩ mǝ ɑcɑlɛɛ
\q1 nɑ mǝ koloosi nyǝnɑ.
\q1
\v 12 Mɑɑ wɑkǝlɩ nyɑ́ topotopo tǝmɑ,
\q1 hɑlɩ pɑ kɑɑ nɑ nyɑ́ tɛɣɛ tʋ́ʋ́.
\q1
\v 13 Mɑɑ yɔkɩ mǝ tɩɩŋ nɑ pɛɛ kʋlɑlɑɑnɑ.
\q1 Ɩ́ kɑɑ tɑsɑ luŋuɣu kɛ wontunɑɑ
\q1 mpɑ ɩ́ lupɑ mǝ mɑɣɑmɑɣɑ tɔ.
\q1
\v 14 Mɑɑ kpɛsɩ mǝ tʋɣʋ ɑlʋnyǝŋkʋ
\q1 Asǝtɑtɩ tesikɑ kʋlɑlɑɑɣɑ,
\q1 nɑ mɑ́ yɔkɩ mǝ ɑcɑlɛɛ.
\q1
\v 15 Mɑɑ mʋ pɑ́ɑ́nɑ́ sɔsɔɔnɑ,
\q1 nɑ mɑ́ lɛɛtɩ piitimnɑɑ mpɑ pɑɑ tʋɣʋnɑ-m tɔ.
\c 6
\s1 Tɑcɑɑ kɑlǝnɑʋ kɛ ɩ yǝlɑɑ
\p
\v 1 Ḿpʋ́ɣʋ́ Misee tɔmɑ sɩ:
\q1 Ɩ́ ke ŋkpɑŋŋ nɑ ɩ́ nɩɩ Tɑcɑɑ tɔm.
\q1 Ɩ́ kʋlɩ nɑ ɩ́ wiinɑ pɔ́ɔ́ŋ
\q1 nɑ pulɑsɩ nɑ sɩ́ nɩɩ mǝ nɔɣɔ.
\q1
\v 2 Pɔ́ɔ́ŋ, nɑ tɛtʋ kite nyɑ́ wei nn ciɣitiɣi tɔ.
\q1 Ɩ́ nɩɩ sɩ Tɑcɑɑ kɑlǝɣǝnɑ ɩ yǝlɑɑ
\q1 nɑ ɩ́ pɔɔsǝɣɩ-wɛɣɛ pɑ kʋlɑpʋtʋ sɩ:
\q1
\v 3 Mɑ yǝlɑɑ mɛ,
\q1 ɩsɑɣɑtʋ ntiɣi mɑ lɑpɑ mɛ?
\q1 Wenteɣe mɑ tʋ-mɛ nɑ tǝ́ tɛɛ-mɛ?
\q1 Ɩ́ cɔ-m.
\q1
\v 4 Anɩ mɑ cɛpɑ-mɛɣɛ mǝ yomle tɑɑ kɛ́ Icipiti.
\q1 Mɑ lǝsɑ-mɛ nɑ mɑ́ kpɑ Moisi nɑ Alɔŋ nɑ Mɑlǝyɑm,
\q1 nɑ pɑ́ pɑɑsǝnɑ-mɛ.
\q1
\v 5 Ɩ́ tɔɔsɩ ɩsɑɣɑtʋ nti Mowɑpʋ wulɑʋ
\q1 Pɑlɑkɩ cɑɑkɑɣɑ-mɛɣɛ lɑpʋ tɔ,
\q1 nɑ nti Peyɔɔ pǝyɑlʋ Pɑlɑɑm cɔ-ɩ tɔ.
\q1 Ɩ́ tɔɔsɩ ɩsǝnɑ mɑ tɛsǝnɑ-mɛɣɛ Yɑɑtɑnɩ pɔɣɔ tɔ.
\q1 Sitim nɑ Kilikɑɑ pɑ hɛkʋ kɛ mɑ lɑpɑ-mɛɣɛ kʋpɑntʋ.
\s1 Mpi Tɑcɑɑ cɑɑnɑ yǝlɑɑ tɔ
\q1
\v 6 Ɩ́ pɔɔsǝɣɩ mǝ tɩ sɩ
\q1 ye ɩ́ kɔŋ Tɑcɑɑ Tomɑ tǝnɑ tʋ sɛɛʋ,
\q1 pǝnɑɣɑ kʋlʋmɑɣɑ kʋlʋmɑɣɑ nɑɑŋ kɛ
\q1 ɩ́ kɑ́ lɑpɩ-ɩ kɔtɑɣɑ ŋkɑ kɔkɔ nyɑɣɑ kɑ tǝnɑ tɔ,
\q1
\v 7 yɑɑ ɩwɑɑŋ tuutuumɑ, nɑ nim kɛ sɔsɔm,
\q1 yɑɑ mǝ kɑncɑɑlɑɣɑ piyɑ kɛ mɑ tɑŋɑɑ sɩ
\q1 ɩ́ lɑ-m kɔtɑɣɑ nɑ pǝ́cɔ́ mɑ́ tɑɣɑnɩ mǝ ɩsɑɣɑtʋ nɑ?
\b
\q1
\v 8 Pɑ sɛɣɛsɑ-mɛɣɛ ɩsǝnɑ mɑ cɑɑkɩ sɩ
\q1 ɩ́ tǝŋ tɑmpɑnɑ tɔ.
\q1 Ɩlɛnɑ ɩ́ lɑkɩ tǝmɑɣɑ kʋpɑntʋ nɑ ɩ́ pɑsɑ
\q1 mǝ tɩ nɑ mɑnɑ-mɛ tǝ́ tɔŋ.
\s1 Ɩsɔ kɑ́ hʋʋnɑ ŋmɩɩlɑɑ nɑ mʋsʋŋtʋnɑɑ
\q1
\v 9 Yutɑ yǝlɑɑ mɛ mpɑ mǝ tǝnɑ
\q1 ɩ́ kotɑ ɩcɑtɛ tɑɑ tɔ ɩ́ nɩɩ.
\q1 Mɛɣɛ mɑ yɔɣɔtǝɣǝnɑ
\q1 nɑ mɑ wɑɑsǝɣɩ mpɑ pɑ wɛnɑ mɑ sɔɣɔntʋ tɔ.
\q1
\v 10 Pǝ fɛɩ-m teu sɩ
\q1 ɑsɑɣɑɑ ɩ́ kɑɑ pɑ tɛɛsɩ tɑɑ kɛ́
\q1 pɑ ŋmɩɩlǝm wɛnɑʋ, nɑ pɑ́ lɑkǝnɑ.
\q1 Mɑɑ cɑɑkɩ mǝ mpusi mɑɣɑsǝlɑɣɑ kʋtʋsɑɣɑ.
\q1
\v 11 Mɑ kɑɑ hʋlɩ suulu kɛ yǝlɑɑ mpɑ
\q1 pɑ lɑkǝnɑ sɑnǝyɑnɑɑ mpɑ pɑ tɑ tǝŋ tɔ.
\q1
\v 12 Mʋsʋŋ ɑkpɑɑ kɛ ɩcɑtɛ tǝnɛ tǝ toŋtʋnɑɑ tǝŋǝɣɩ.
\q1 Mǝ tǝnɑ ɩ́ kɛ́ tʋsʋlɑɑ.
\q1
\v 13 Tɔʋ, mɑ nɑɑlɑ-mɛɣɛ lɑpʋ ntɛ́ mpi
\q1 pɩɩ wɑkǝlɩ-mɛ tɔɣɔ mǝ ɩsɑɣɑtʋ tɔɔ.
\q1
\v 14 Ɩ́ kɑ́ tɔɣɔ ɩ́ kɑɑ hɑɣɑ,
\q1 pɑɑ wiliɣi nyɔɣɔsɩ kɛ mǝ tɛɣɛ tɑm.
\q1 Pɑɑ mpiɣi ɩ́ kɑ́ ŋmɛsɩ ɩsɩɩ mɑ kɔnɑ
\q1 yoou nɑ kʋ wɑkǝlɩ-wɩ.
\q1
\v 15 Ɩ́ kɑ́ tuu ɩ́ kɑɑ kʋ,
\q1 Ɩ́ kɑ́ mʋlɩ nim, ɩ́ kɑɑ lɑnɑ-wɩ.
\q1 Ɩ́ kɑ́ puu sʋlʋm ɩ́ kɑɑ nyɔɔ-wɩ.
\q1
\v 16 Wulɑʋ Omili nɑ ɩ pǝyɑlʋ Akɑpɩ,
\q1 nɑ ɩ piitim pɑ ɩkpɑtɛ ɩsɑɣɑlɛ kɛ
\q1 ɩ́ tɔkɑɑ tǝkem nɑ ɩ́ tǝŋǝɣɩ.
\q1 Pǝ tɔɔ kɛ́ mɑɑ yele nɑ mǝ ɩcɑtɛ
\q1 pǝsɩ ncɑɑlɛ nɑ pɑ́ woŋiɣi-mɛ.
\q1 Ɩ́ kɑ́ tɔɣɔ mɑ yǝlɑɑ tǝnɑ fɛɛlɛ.
\c 7
\s1 Ɩsɔ kʋyɔɣɔtʋtʋ tɛlǝsʋlʋ lɑŋwɑkǝllɛ
\p
\v 1 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsʋlʋ yɔɣɔtɑɑ sɩ:
\q1 Wɑɩyo, mɑ wɛ kɛ́ ɩsɩɩ pɑ tɛŋʋɣʋ tʋɣʋ kooluɣu
\q1 nɑ yʋlʋ polo kʋ tɛɛ nɑ ɩ́ lɑŋ tɔ.
\q1
\v 2 Pǝ tɑ kɑɑsɩ yʋlʋ kʋpɑŋ kɛ tɛtʋ tɑɑ.
\q1 Yʋlʋkʋlɛ tɔm nɑ tǝmɑ cɛŋʋɣʋ tike kɛ pɑ lɑkɩ.
\q1
\v 3 Pɑ kɛ́ cɛcɛnɑɑ kɛ ɩsɑɣɑtʋ lɑpʋ tɑɑ kɛ́.
\q1 Akewenɑɑ nɑ́ pɛɛkǝɣǝnɑ pɑ sipɑnɑɑ.
\q1 Hʋʋlɑɑ nɑ́ lɑkɩ kʋcɔɔŋ tɔɔ.
\q1 Toŋtʋnɑɑ nɑ́ yɔɣɔtǝɣɩ nti tǝ mɑɣɑ-wɛ tɔ
\q1 nɑ pɑ́ kpɛntǝɣɩ nɔɔsɩ.
\q1
\v 4 Pɑ tɑɑ kʋpɑŋ wɛɛ kɛ́ ɩsɩɩ sɔwɑ tʋɣʋ.
\q1 Ɩlɛnɑ tɑmpɑnɑ tǝŋlʋ nɑ́ɑ́ wɛɛ ɩsɩɩ sɔwɑ tiikiyɑ.
\q1 Mǝ wɑhɑlɑ kʋyɑkʋ ŋku Ɩsɔ kʋyɔɣɔtʋtʋ tɛlǝsǝlɑɑ
\q1 kpɑɑlɑɑ tɔɣɔlɔ. Ɩ́ kɑ́ tǝŋ ŋku?
\q1
\v 5 Ɩ́ tɑɑ tɛ mǝ tɑɑ nɑ mǝ ɑsǝmɑɑ nɑ mǝ cewɑɑ.
\q1 Ɩ́ tɑɑ tɩɩ kuli nɔɣɔ kɛ mǝ ɑlɑɑ kiŋ.
\q1
\v 6 Hɑlɩ pǝyɑlʋ tʋʋkɩ cɛcɛ kɛ́,
\q1 nɑ pɛɛlɔ nɑ́ɑ́ kʋlǝɣɩ toto tɔɔ,
\q1 nɑ poolu ɩɩ cɑɑkɩ pɑŋ.
\q1 Pɑɑ wei ɩ kolontunɑɑ ntɛ́
\q1 ɩ mɑɣɑmɑɣɑ ɩ lʋlʋɣʋ nyǝ́mɑ.
\b
\q1
\v 7 Amɑ mɑ́ ɩlɛ Tɑcɑɑ tɔɔ kɛ́ mɑ kɛɛsǝɣǝnɑ
\q1 nɑ mɑ́ nyǝnǝɣɩ Ɩsɔ wei ɩ wɑɑsǝɣɩ-m tɔ,
\q1 ɩ kɑ́ nɩɩ mɑ yɑɑʋ kɛ́.
\s1 Tɑcɑɑ kɔnɑ nyʋɣʋ yɑpʋ
\q1
\v 8 Hɑɩ, tɑ kolontunɑɑ mɛ ɩ́ tɑɑ pɑɑnɑ-tʋ.
\q1 Pɑɑ tǝ hotɑɑ tɔ, tɩɩ tɛ nɑ tǝ́ kʋlɩ.
\q1 Pɑɑ tǝ wɛ sǝkpɛtʋɣʋ tɑɑ tɔ,
\q1 Tɑcɑɑ kɛlɛ tɑ́ nyɑɑlǝm.
\q1
\v 9 Pǝ wɛɛ kɛ́ sɩ
\q1 Tɑcɑɑ ɩ́ kɑlǝnɑ-tʋɣʋ mpʋ nɑ tǝ́ sumɑ.
\q1 Mpi tɔ, tǝ wɑkǝlǝnɑ-ɩ kɛ́.
\q1 Amɑ wɑɑtʋ kɑ́ kɔɔ,
\q1 wei ɩ tɑɑ ɩ kɑ́ tɑɣɑnɩ tɑ́ tɔm tɔ.
\q1 Tɩɩ wɛɛnɑ tɑ́ lonɑ,
\q1 nɑ ɩ́ mǝŋnɑ-tʋɣʋ nyɑɑlǝm tɑɑ,
\q1 nɑ ɩ́ hɑɣɑsɩ-tʋɣʋ kʋpɑntʋ.
\q1
\v 10 Ye tɑ kolontunɑɑ ɩ́ nɑ mpʋ fɛɛlɛ kɑ pɩɩ-wɛ.
\q1 Mpi tɔ, mpɛ pɑ pɔɔsɑɣɑnɑ sɩ tɑ́ Ɩsɔ Tɑcɑɑ mǝlɑ ɩsǝnɑ?
\q1 Pɩɩ fɛlɩ-wɛɣɛ nɔɔhɛɛ ɩsɩɩ hɑpǝlɛ tɛtʋ,
\q1 nɑ tɑ́ɑ́ nyǝnǝɣɩ.
\b
\q1
\v 11 Kʋyɑkʋ kɑ kɔɔ, ŋku kʋ tɑɑ pɩɩ tɑɣɑnɩ
\q1 mǝ ɩcɑtɛ sɔsɔɔlɛ koloosi kɛ ŋmɑʋ tɔ.
\q1 Pɑɑ tuusi mǝ tɛtʋ toosi kɛ pooluŋ.
\q1
\v 12 Ɩlɛ mǝ nyǝ́mɑ kɑ́ lɩɩnɑ pɑɑ timpi.
\q1 Pǝ kpɑɣɑʋ Asilii, nɑ Icipiti, nɑ Ɩfǝlɑtɩ pɔɣɔ tɔ.
\q1 Hɑlǝnɑ hɔɣɔlǝŋ teŋkunɑɑ nɔɔsɩ,
\q1 nɑ pǝ́ sɩɩnɑ pɔ́ɔ́ŋ.
\q1
\v 13 Amɑ pɩɩ kpiisi tɛtʋ yǝlɑɑ nɑ pǝ́ yele-tǝɣɩ
\q1 kpɛtɛ kɛ tǝ yǝlɑɑ ɩsɑɣɑtʋ tɔɔ.
\b
\q1
\v 14 Tɑcɑɑ, pɑɑsǝnɑ nyɑ́ yǝlɑɑ tɑ́
\q1 ɩsɩɩ tiikulu nɑ ɩ kɑlǝkʋ.
\q1 Tǝ wɛ tɛsǝpɑɣɑ tɑɑ kɛ́ kpeeŋɑ tɔɔ kɛ́.
\q1 Ponɑ-tʋɣʋ tɛtʋ kʋpɑntʋ nti
\q1 tǝ cɔɔnɑ-tʋ tɔ tǝ tɑɑ kɛ́ Pɑsɑŋ,
\q1 nɑ Kɑlɑɑtɩ, ɩsɩɩ tɩɩ wɛʋ lɔŋtɑɑ tɔ.
\q1
\v 15 Lɑ-tʋɣʋ piti tǝmɑ ɩsɩɩ wɑɑtʋ wei
\q1 n lǝsɑ-tʋɣʋ Icipiti tɛtʋ tɑɑ tɔ.
\q1
\v 16 Piitimnɑɑ kɑ́ nɑ́ tɑ toŋ sɔsɔɔŋ tǝnɑ.
\q1 Wɑɑtʋ wei pɑɑ nɑ́ mpʋ tɔ,
\q1 pɩɩ liɣiti-wɛ nɑ pɑ́ kpɑ nɔɔsɩ nɑ pǝ́ tɑɑmɩ-wɛ.
\q1
\v 17 Pɑɑ tuu mʋsʋɣʋ tɑɑ kɛ́ ɩsɩɩ tʋmɑɑ,
\q1 nɑ pɑ́ lɩɩ pɑ koloosi ɑcɑlɛɛ tɑɑ,
\q1 nɑ pɑ́ kɔɔ Tɑcɑɑ tɑ́ Ɩsɔ nyɑ́ nyɑ́ kiŋ,
\q1 nɑ sɔɣɔntʋ nɑ wɑtʋ.
\q1
\v 18 Tʋɣʋ nɑkʋlɩ tɑ nǝɣǝsǝnɑ Tɑcɑɑ nyɑ́.
\q1 N tɑɣɑnǝɣɩ nyɑ́ yǝlɑɑ kʋkɑɑsɑɑ ɩsɑɣɑtʋ kɛ́.
\q1 Nn tɔkǝɣɩ nyɑ́ pɑ́ɑ́nɑ́ kɛ tɑm tɔɔ.
\q1 Nɑ nyɑ́ luɣu wɛ-tʋ nɑ ń lɑkɩ-tʋɣʋ kʋpɑntʋ.
\q1
\v 19 N kɑ́ nyǝnɩ tɑ́ pǝtɔɔtǝlɛ,
\q1 nɑ ń fɛlɩ tɑ́ ɩsɑɣɑtʋ kɛ nɔɔhɛɛ.
\q1 N kɑ́ lɔ-tǝɣɩ hɑtoo teŋku tɑpʋɣʋ tɛɛ.
\q1
\v 20 N kɑ́ hʋlɩ nyɑ́ sɔɔlʋɣʋ kʋpɑŋkʋ kɛ
\q1 Apǝlɑhɑm nɑ Yɑkɔpʋ pɑ lʋlʋɣʋ.
\q1 Ɩsɩɩ n kɑ sɩɩʋ hɑtoo lɔŋtɑɑ kɛ́ tɑ́ cɔsɔnɑɑ tɔ.