\id LAM - Lokpa Bible portions [dop] -Benin 1999 (web edition -2017)
\ide UTF-8
\h Wulɑ
\toc1 YOSALƐM TƆƆ WULA TAKƎLAƔA
\toc2 Wulɑ
\toc3 Wulɑ
\mt2 YOSALƐM TƆƆ
\mt1 WULA
\mt2 TAKƎLAƔA
\imt1 Kʋtʋlʋtʋ
\ip Selemii wiiki, mpi tɔ, kolontunɑɑ yɔkɑ Yosɑlɛm ɩcɑtɛ kɛ Yutɑ nyǝ́mɑ ɩsɑɣɑtʋ tɔɔ. Ɩ hʋlɑ-wɛɣɛ mpi pǝ tɔɔ ɩcɑtɛ wɑkǝlɑɑ tɔ. Ɩlɛnɑ ɩ́ hʋlɩ Yutɑ nyǝ́mɑ sɩ ye pɑ́ lɑɣɑsɑɑ nɑ pɑ́ mǝlɩ Ɩsɔ tɛɛ ɩ́lɛ́ ɩ kɑ́ wɑɑsɩ-wɛ. Pǝ tɑɣɑ pʋlʋ, ɩ kʋpɑntʋ wɛ tɑm tɔɔ kɛ́ tɩɩ tɛŋ.
\iot Ɩsǝnɑ pɑ fɑɣɑ Wulɑ tɑkǝlɑɣɑ tɔ:
\io1 Yosɑlɛm nyǝ́mɑ lɑŋwɑkǝllɛ, titite \ior 1\ior*
\io1 Tɑcɑɑ pǝsɑ ɩsɩɩ Yosɑlɛm kolontu, titite \ior 2\ior*
\io1 Wɑhɑlɑnɑɑ nɑ tɛɛlʋɣʋ, titite \ior 3\ior*
\io1 Yosɑlɛm wɑkǝlʋɣʋ wulɑ, titite \ior 4\ior*
\io1 Tɑcɑɑ mǝŋnɑ-tʋɣʋ nyɑ́ kiŋ, titite \ior 5\ior*
\c 1
\s1 Yosɑlɛm ɩcɑtɛ pǝsɑ ɩsɩɩ leelu wei pɑ lɔwɑ tɔ
\q1
\v 1 Hɑɩ, Yosɑlɛm ɩcɑtɛ nyɑ́ wei yǝlɑɑ wutɑɣɑ tɔɣɔlɛ.
\q1 Nyɑ́ hǝtɛ kɑ yɑɑwɑ piitimnɑɑ tɑɑ kɛ́.
\q1 Nyɑ́ ŋmɑkǝlɑɣɑnɑ tɛtʋ hɔɣɔlǝŋ.
\q1 Wɑɩyo, nyǝnɩ n wɛ nyɑ́ tike.
\q1 N pǝsɑ ɩsɩɩ leelu.
\q1 Pɑ tʋ-ŋ yomle tǝmɑ.
\q1
\v 2 Wulɑ ntɛ́ nyɑ́ tom kɛ ɑhoo,
\q1 nɑ ɩsǝlʋm lukiɣi yem.
\q1 Mpɑ pɑɑ sɔɔlɑ-ŋ tɔ,
\q1 pɑ tɑɑ nɔɣɔlʋ fɛɩ sɩ ɩ puɣusiɣi-ŋ.
\q1 Nyɑ́ tɑɑpɑlɑɑ tǝnɑ lɔ-ŋ
\q1 Pɑ pǝsɑ nyɑ́ kolontunɑɑ.
\q1
\v 3 Yomle nɑ wɑhɑlɑ tɑɑ kɛ́ pɑ tɛɛnɑ Yutɑ.
\q1 Mɑ tɑ nyɩ ɩsɔnɑɑ tɛɣɛ n wɛɛ.
\q1 N fɛɩnɑ nyʋɣʋ tǝtʋlɛ.
\q1 Nyɑ́ kʋnyɔntʋlɑɑ tǝnɑ tɑmɑ-ŋ kɛ́.
\q1
\v 4 Siyɔŋ mpɑɑŋ wɛ lǝyɑɣɑ tɑɑ kɛ́.
\q1 Nɔɣɔlʋ ɩɩ tǝŋǝɣɩ-ɩ sɩ ɩ puki ɑcimɑ.
\q1 Nɔnɔɔsɩ pǝsɑ ncɑɑ.
\q1 Kɔtǝlɑɑ ɑpɑlʋtʋ nɑ́ lepɑ nɑ pɑ́ lɑkɩ wɑhɑlɑ.
\q1 Ɩcɑtɛ pɛɛlɑɑ nɑ́ wɛ lɑŋwɑkǝllɛ tɑɑ.
\q1 Ɩsǝnyǝŋlɛ sunɑ ɩcɑtɛ nyɑ́ nyɑ́ tɑɑ.
\q1
\v 5 Nyɑ́ kolontunɑɑ ŋmɑkǝlɑ-ŋ kɛ.
\q1 Nyɑ́ pɑtɑnɑɑ lɑŋɑ hɛɛwɑɣɑ.
\q1 Mpi tɔ, Tɑcɑɑ hɔmɑ nyɑ́ ŋkpɑŋʋɣʋ.
\q1 Nyɑ́ kʋpǝntǝŋ pɑɣɑlɛ tɔɔ,
\q1 kolontunɑɑ kuuwɑ nyɑ́ piyɑ nɑ pɑ́ tuliɣi nɑ pɑ́ tɛɛkǝnɑ.
\q1
\v 6 Siyɔŋ kpekǝle nyǝ́mɑ mǝ teeli sǝpɑ.
\q1 Mǝ nyʋɣʋ nyǝ́mɑ nɑ́ wɛ ɩsɩɩ
\q1 nɑmǝŋ wei ɩ lɑŋɑ tǝtɔɣɔlɛ tɔ.
\q1 Ɩ kɑɑsǝɣɩ ɩ tɩ nɑ ɩ́ seeki lɑkɑtikɑ nyǝ́mɑ.
\q1
\v 7 Yosɑlɛm, n hotɑ kolontunɑɑ niŋ tɑɑ.
\q1 N lɑŋɑ wɑɑsǝlɑɑ.
\q1 Kolontunɑɑ nɑ́ mpʋ ɩlɛnɑ pɑ́ woŋ.
\q1 Mpi tɔ, pǝ kpiisɑ Yosɑlɛm.
\q1 Ḿpʋ́ɣʋ́ Yosɑlɛm n nɑwɑ sɩ n kɛ́ cɔɔlʋ,
\q1 n wɛ fɛɛlɛ tɑɑ.
\q1 Ɩlɛnɑ ń tɔɔsɩ kʋpɑm mpi pǝ tǝnɑ
\q1 n kɑ wɛnɑ lɔŋ tɑɑ tɔ pǝ tɔɔ.
\q1
\v 8 Ɩsɑɣɑtʋ nti n kɑ lʋlǝsɑɑ tɔ,
\q1 ntɩ tǝ tɔɔ kɛ́ n pǝsɑ ɑsilimɑ.
\q1 Mpɑ pɑɑ sɑŋɑɣɑ-ŋ tɔ, pɑ mǝlɑ-ŋ footuɣu.
\q1 Pɛlɛ pɑ nɑwɑ sɩ n wɛ kpɛtɛ kɛ nɔɔnɔɔ.
\q1 Pǝ wɛɛ sɩ Yosɑlɛm ń tisi feesiŋ kɛ́ nɑ ń mǝŋnɑ wɑɑlɩ.
\q1
\v 9 Yosɑlɛm nyɑ́ ɑsilimɑ tɑɑnɑ nyɑ́ cɑpɑnɑɑ kɛ́.
\q1 N tɑ tɛɛlɩ nti tǝ mɑɣɑnɑ-ŋ ɩsǝntɔ tɔ.
\q1 Kpisuɣu tutɑ-ŋ kɛ́,
\q1 nɔɣɔlʋ fɛɩ sɩ ɩ tɑsǝɣɩ-ŋ ɑpɑlʋtʋ.
\q1 N wiiki sɩ: Hɑɩ, Tɑcɑɑ, nyǝnɩ ɩsǝnɑ
\q1 kolontunɑɑ ŋmɑkǝlɑ-m nɑ mɑ́ tɔkɩ wɑhɑlɑ tɔ.
\q1
\v 10 Kolontunɑɑ tʋ niŋ kɛ mɑ kpɑncooŋ tǝnɑ tɔɔ.
\q1 Hɑlɩ mɑ nɑwɑ piitimnɑɑ sʋʋ Ɩsɔ tǝsɛɛlɛ tɑɑ nɑ toŋ.
\q1 Pǝyele Tɑcɑɑ kɑ kisinɑ-wɛɣɛ sɩ:
\q1 Pǝ fɛɩ sɩ pɑ́ sʋʋ mɑ yǝlɑɑ hɛkʋ.
\q1
\v 11 Yosɑlɛm pǝ nɩɩ-ŋ ɩlɛnɑ ń wiiki
\q1 nɑ ń pɛɛkǝɣɩ tɔɣɔnɑɣɑ.
\q1 Hɑlǝnɑ ń cɛlɑ nyɑ́ kʋpɑmpɑm sɩ ń hiki tɔɣɔnɑɣɑ.
\q1 Kɛlɛnɑ ń wiinɑ Ɩsɔ sɩ:
\q1 Hɑɩ Tɑcɑɑ, nyǝnɩ ɩsǝnɑ pɑ nyǝnǝɣɩ-m yem tɔ.
\b
\q1
\v 12 Ḿpʋ́ɣʋ́ Siyɔŋ tɔmɑ sɩ: Tɛɛlɑɑ mɛ,
\q1 ɩ́ nyǝnɩ nɑ ɩ́ nɑ́ wɑhɑlɑ wei mɑ tɔkɩ tɔ.
\q1 Wɑhɑlɑ nɔɣɔlʋ tɑ nǝɣǝsǝnɑ ɩ tɑkɑ.
\q1 Tɑcɑɑ n tʋmɩ-ɩ nyɑ́ pɑ́ɑ́nɑ́ sɔsɔɔnɑ wule kɛ́.
\q1
\v 13 Hɑtoo ɩsɔtɑɑ kɛ́ n tisinɑ kɔkɔ
\q1 nɑ kɑ́ sʋʋ-m nɑ kɑ́ tɑlɑ mʋwɑ.
\q1 N nyǝpɑ-m puluɣu kɛ mɑ nɔɔhɛɛ tɛɛ.
\q1 N lɑpɑ nɑ mɑ́ tuli tɑpǝŋ.
\q1 N yelɑ-m mɑ nyʋɣʋ tike.
\q1 Mɑ tɔkɩ wɑhɑlɑ kɛ pɑɑ kʋyɑkʋ ŋku.
\q1
\v 14 N kpeɣelɑ mɑ ɩsɑɣɑtʋ kɛ nyɑ́ niŋ tɑɑ.
\q1 N lɑpɑ-tǝɣɩ kpɑlɑhuu nɑ ń pɑɑ
\q1 mɑ luɣu tɛɛ nɑ tǝ́ nɩɩ-m.
\q1 Mɑ ɩsɑɣɑtʋ yɔkɑ mɑ toŋ nɑ tǝ́ tʋ-m mɑ kolontunɑɑ
\q1 mpɑ pɑ kǝlɑ-m tɔ pɑ niŋ tɑɑ.
\q1
\v 15 Tɑcɑɑ lɔwɑ mɑ yoolɑɑ tɑɑ yoolɑɑ mpɑ mɑɑ wɛnɑ tɔ.
\q1 N kɔnɑ kolontu kɛ mɑ tɔɔ sɩ ɩ́ wɑkǝlɩ mɑ ɩfepiyɑ.
\q1 Tɑcɑɑ nɑŋɑ Yutɑ yǝlɑɑ kɛ́ ɩsɩɩ lɛsɛŋ kɛ tǝnyɑɑsǝlɛ.
\q1
\v 16 Mpusi ɩnɛ ɩ tɔɔ kɛ́ mɑ wiiki.
\q1 Mɑ pǝlǝɣɩ ɩsǝlʋm nɑ pǝ́ leeliɣi.
\q1 Mpi tɔ, puɣusulu hɑtǝlǝnɑ-m kɛ́.
\q1 Ɩnɩ ɩ hɑɑkɑɣɑnɑ-m weesuɣu.
\q1 Pǝ yelɑ mɑ piyɑ kɛ sɩ tike.
\q1 Mpi tɔ, kolontu kǝlɑ-tʋɣʋ toŋ.
\b
\q1
\v 17 Ḿpʋ́ɣʋ́ Siyɔŋ tɛkɑ niŋ.
\q1 Amɑ nɔɣɔlʋ fɛɩ sɩ ɩ́ puɣusɩ-ŋ.
\q1 Tɑcɑɑ hɑ nɔɣɔ kɛ Yɑkɔpʋ nyɑ́ pɑtɑnɑɑ sɩ pɑ́ tɑ-ŋ kotɑɣɑ.
\q1 Yosɑlɛm n pǝsɑ ɩsɩɩ hute kɛ pɑ ɩsɛntɑɑ.
\b
\q1
\v 18 Amɑ Tɑcɑɑ n wɛnɑ tɑmpɑnɑ kɛ́.
\q1 Mpi tɔ, mɑ kisɑ nyɑ́ kʋsǝsɩɩtʋ.
\q1 Yǝlɑɑ mɛ mǝ tǝnɑ ɩ́ nɩɩ.
\q1 Ɩ́ nɑ mɑ kʋyɔntɔɣɔlɛ.
\q1 Pɑ kuuwɑ mɑ pɛɛlɑɑ nɑ mɑ ɩfepiyɑ nɑ pɑ́ tɛɛnɑ.
\q1
\v 19 Mɑ yɑɑwɑ mɑ tɑŋnɑɑ.
\q1 Amɑ pɛlɛ pɑ lɩɩ mɑ wɑɑlɩ.
\q1 Mɑ kɔtǝlɑɑ nɑ mɑ nyʋɣʋ nyǝ́mɑ sǝpɑ ɩcɑtɛ tɑɑ.
\q1 Pɑ pɛɛkɑɣɑ tɔɣɔnɑɣɑ sɩ pɑ́ wɛɛnɑ weesuɣu.
\q1
\v 20 Hɑɩ, Tɑcɑɑ nyǝnɩ mɑ lɑŋwɑkǝllɛ.
\q1 Mɑ tɑɑ pǝsɑɑ kɛ́.
\q1 Mɑ lɑŋlɛ wɑkǝlɑɑ kɛ́.
\q1 Mpi tɔ, mɑ kǝlɑ nyɑ́ tɔɔ kɛ́ kʋlʋɣʋ.
\q1 Amɑ lɑɣɑtɛ pɛmɑ-m piyɑ kɛ ɑwɑlɩ.
\q1 Mɑ tǝyɑɣɑ pǝsɑ sǝm nyǝŋkɑ.
\q1
\v 21 Pɑ nɩɩ mɑ wulɑ, ɑmɑ nɔɣɔlʋ fɛɩ sɩ ɩ́ puɣusi-m.
\q1 Mɑ kolontunɑɑ tǝnɑ nɑwɑ mɑ wɑhɑlɑ wei n tʋ-m tɔ,
\q1 nɑ pɑ́ pɑɑkǝnɑ-m.
\q1 Yele nɑ kʋyɑkʋ ŋku n kɑ sɩɩwɑ tɔ kʋ kɔɔ
\q1 nɑ pǝ́ lɛɛtɩ-wɛɣɛ mɑ lonte.
\q1
\v 22 Nyǝnɩ pɑ ɩsɑɣɑtʋ, nɑ ń hɔ pɑ ŋkpɑŋŋ
\q1 ɩsɩɩ n lɑpɑ-m mɑ kɑɑnɩɩtʋ tǝnɑ tɔɔ tɔ.
\q1 Mɔlɑ tike kɛ mɑ lɑkɩ, mɑ lɑŋlɛ pǝsɑɑ kɛ́.
\c 2
\s1 Tɑcɑɑ pǝsɑ ɩsɩɩ Yosɑlɛm kolontu
\q1
\v 1 Hɑɩ, wɑɩyo, Tɑcɑɑ nyɑ́ pɑ́ɑ́nɑ́ tɑɑ,
\q1 n wɑɑsɑ Siyɔŋ yǝlɑɑ tɔɔ kɛ́ sǝkpɛtʋɣʋ sɔsɔɔʋ.
\q1 Hɑtoo ɩsɔtɑɑ kɛ́ n pɛtǝnɑ Ɩsɛɣɛlɩ teeli kɛ ɑtɛ.
\q1 Wɑɑtʋ wei Tɑcɑɑ nyɑ́ pɑ́ɑ́nɑ́ kpɑwɑ tɔ,
\q1 n tɑ tɑsɑ tɔɔsʋɣʋ sɩ Siyɔŋ kɛ́ nyɑ́ nɔɔhɛɛ tǝsɩɩlɛ.
\q1
\v 2 Tɑcɑɑ n lipɑ Yɑkɔpʋ tɛɛsɩ tǝnɑ, pǝtɔɔtǝlɛ fɛɩ.
\q1 N yɔkɑ Yutɑ koloosi ɑcɑlɛɛ nɑ pɑ́ɑ́nɑ́.
\q1 N pɛtɑ-yɛɣɛ ɑtɛ.
\q1 N wɑkǝlɑ Yutɑ ɑwulumpiyɑ kɑwulɑɣɑ.
\q1
\v 3 Tɑcɑɑ n mʋ pɑ́ɑ́nɑ́ sɔsɔɔnɑ ɩlɛnɑ ń yɔkɩ Ɩsɛɣɛlɩ toŋ.
\q1 N kisɑ-wɛɣɛ wɑɑsʋɣʋ kɛ kolontu niŋ tɑɑ.
\q1 N lupɑ kɔkɔ kɛ nyɑ́ yǝlɑɑ tɛ nɑ kɑ́ nyɑɣɑ hɔɣɔlǝŋ tǝnɑ.
\q1
\v 4 N pɑmɑ nyɑ́ tɔɔʋ kɛ́ ɩsɩɩ kolontu.
\q1 N hʋlǝɣɩ nyɑ́ toŋ nɑ nyɑ́ yǝlɑɑ tɔɔ ɩsɩɩ pɑ pɑtɑ.
\q1 N wɑkǝlɑ pǝ tǝnɑ mpi tɩɩ nyǝnɑɣɑ
\q1 nɑ pǝ́ wɛ-tʋɣʋ teu tɔ.
\q1 Tɑcɑɑ nyɑ́ pɑ́ɑ́nɑ́ nyɑɣɑ Ɩsɔ
\q1 tǝsɛɛlɛ kɛ Yosɑlɛm ɩsɩɩ kɔkɔ.
\q1
\v 5 Tɑcɑɑ n pǝsɑ Ɩsɛɣɛlɩ kolontu kɛ́.
\q1 N lipɑ Ɩsɛɣɛlɩ nɑ ń kpɛnnɑ ɩ tɛɛsɩ kʋpɑŋsɩ.
\q1 N yɔkɑ ɩ koloosi ɑcɑlɛɛ.
\q1 Tɑcɑɑ lʋlǝsɑ lɑŋwɑkǝllɛ
\q1 nɑ ɩsǝnyǝŋlɛ kɛ Yutɑ yǝlɑɑ tɑɑ.
\q1
\v 6 N yɔkɑ Yosɑlɛm koluŋɑ ɩsɩɩ tɑɑlɛ kɑlɑɑ.
\q1 N wɑkǝlɑ tɑ nɑ-ɩ tɑ́ tǝsulle.
\q1 Tɑcɑɑ n lɑpɑ nɑ yǝlɑɑ sɔɔ ɑcimɑ
\q1 nɑ kʋyɛɛŋ kʋhɛɛsǝŋ tɔɔ.
\q1 N mʋ pɑ́ɑ́nɑ́ nɑ ń tʋ wulɑʋ
\q1 nɑ kɔtǝlɑɑ kɛ fɛɛlɛ.
\q1
\v 7 Tɑcɑɑ n kisɑ nyɑ́ kɔtɑɣɑ tǝlɑtɛ.
\q1 N lɔwɑ nyɑ́ tǝsɛɛlɛ.
\q1 N tʋ nyɑ́ tǝsɛɛlɛ nɑ Siyɔŋ
\q1 tɛɛsɩ kʋpɑŋsɩ kɛ kolontu niŋ tɑɑ.
\q1 Pɛlɛ pɑ kiisiɣinɑ ntɛɣɛ ɑkɑɩtʋ
\q1 kɑkiisɑɣɑ kɛ Ɩsɔ tǝsɛɛlɛ tɑɑ
\q1 ɩsɩɩ ɑcimɑ kʋyɑkʋ.
\q1
\v 8 Tɑcɑɑ n tʋ nyɑ́ tɑɑ kɛ́ sɩ n yɔkǝɣɩ Siyɔŋ koluŋɑ.
\q1 N yɔkɑ-kɛɣɛ tǝkpɑtɑɑ, n tɑ nyɑ́.
\q1 Nn kʋsǝɣɩ nyɑ́ niŋ nɑ ń tɑ yɔkǝtɑ-kɛ́.
\q1 N tʋ koluŋɑ sɔsɑɣɑ nɑ sǝkpelɑɣɑ kɛ lǝyɑɣɑ tɑɑ.
\q1 Sɩ nɑɑlɛ sɩ yɔkɑɑ tǝmʋɣʋmʋɣʋ.
\q1
\v 9 Ɩcɑtɛ nɔnɔɔsɩ sʋʋ tɛtʋ.
\q1 N pɛlɑ kʋkɑlǝsǝŋ, n wɑkǝlɑ-ɩ.
\q1 Wulɑʋ nɑ ɩ wɑɑlɩ nyǝ́mɑ pɑ wɛ piitimnɑɑ niŋ tɑɑ.
\q1 Kiiŋ fɛɩ tɔtɔ.
\q1 Tɑcɑɑ nn tɑsǝɣɩ Ɩsɔ kʋyɔɣɔtʋtʋ
\q1 tɛlǝsǝlɑɑ mɑɣɑmɑɣɑ kɛ nyɑ́ tɔm heeluɣu.
\q1
\v 10 Siyɔŋ lɑɣɑtʋ tɑsǝlɑɑ ɩ́ cɑɣɑ ɑtɛ nɑ ɩ́ sumɑ.
\q1 Ɩ́ pǝlǝɣɩ tɛtʋ kɛ mǝ nyʋɣʋ tɑɑ.
\q1 Mǝ lɑŋɑ wɑkǝlɑɑ nɑ ɩ́ suu lǝyɑɣɑ
\q1 wontu ɩsɩɩ fɔlǝtɔnɑɑ tɑkɑ.
\q1 Yosɑlɛm pɛɛlɑɑ, mǝ kɑmɑ nyɔɔŋ nɑ ɑtɛ.
\b
\q1
\v 11 Mɑ ɩsɛ kɑnɑ ɩsǝlʋm lukuɣu.
\q1 Ɩsǝkilim pɩɩ-m kɛ́.
\q1 Mɑ ɑpɑlʋtʋ hoowɑ mɑ yǝlɑɑ wɑhɑlɑ tɔɔ kɛ́.
\q1 Ahʋlʋmnɑɑ sǝkɩ lʋkɔtʋ kɛ ɩcɑtɛ hɑpɛɛ tɔɔ.
\q1
\v 12 Piyɑ wiinɑ sɩ toonɑɑ sɩ:
\q1 Leɣe tɔɣɔnɑɣɑ wɛɛ?
\q1 Leɣe sʋlʋm wɛɛ?
\q1 Sɩ hotiɣi mpɑɑŋ tɑɑ, ɩsɩɩ mpɑ pǝ kʋ yoou tɑɑ tɔ.
\q1 Sɩ tisiɣi feesiŋ nɑ sɩ́ hɛɛkɩ sɩ toonɑɑ niŋ tɑɑ.
\b
\q1
\v 13 Yosɑlɛm, suweɣe mɑɑ heeli-ŋ tɔtɔ?
\q1 Nyɑ́ nɑ nɔɣɔlʋ ɩ́ tɑ mɑɣɑ.
\q1 Siyɔŋ pɛɛlɔ, wentiɣi mɑɑ hɛɛsǝnɑ nyɑ́ lɑŋlɛ?
\q1 Nyɑ́ wɑhɑlɑ tɔɔwɑɣɑ ɩsɩɩ teŋku.
\q1 Nɔɣɔlʋ kɑɑ pǝsɩ nɑ ɩ́ wɑɑsɩ-ŋ.
\q1
\v 14 Kɑloolɑɣɑ nɑ kpɑɩ tɔm kɛ
\q1 Ɩsɔ kʋyɔɣɔtʋtʋ tɛlǝsǝlɑɑ mpɑ
\q1 pɑ wɛ nyɑ́ tɑɑ tɔ pɑ kpɑɑlǝɣɩ.
\q1 Pɑ tɑ kuli nyɑ́ ɩsɑɣɑtʋ tɔɔ,
\q1 sɩ pǝ tɑɑ kɔɔ nɑ kolontunɑɑ kuu-ŋ nɑ pɑ́ tɛɛnɑ.
\q1 Ɩsɔ kʋyɔɣɔtʋtʋ tɛlǝsǝlɑɑ
\q1 kʋkpɑɑlǝtʋ kɛ́ kʋtʋsʋtʋ kɛ́.
\q1
\v 15 Tɛɛlɑɑ tǝnɑ nɑɑkɩ-ŋ
\q1 nɑ pɑ́ kpɑsǝɣɩ ɑmʋkʋŋ kɛ
\q1 nyɑ́ wɑkǝlʋɣʋ kɛ́.
\q1 Pɑ hʋlǝɣɩ kɑcʋɣʋlɑsɩ nɑ pɑ́ pɑɑkǝnɑ-ŋ.
\q1 Pɑ yɔɣɔtǝɣɩ sɩ:
\q1 Ɩcɑtɛ tǝnɛɣɛ pɑ yɑɑkɑɣɑ lɔŋ kɛ kʋpɑntɛ
\q1 nɑ kʋtetele nɑ lɑŋhʋlʋmlɛ nyǝntɛ kɛ tɛtʋ tǝnɑ tɑɑ?
\q1
\v 16 Nyɑ́ kolontunɑɑ tǝnɑ hɑɑkɩ nɔɔsɩ nɑ nyɑ́ tɔɔ.
\q1 Pɑ kɛtǝɣɩ kɑkɛtɑsɩ, pɑ kpɑ ntompee.
\q1 Pɑ tɔŋ sɩ: Tǝ tɛmɑ ɩ tɔm.
\q1 Kʋyɑkʋ ŋku tɩɩ tɑŋɑɑ tɔɣɔlɛ.
\q1 Tǝ hikɑ-ɩ kɛ́, tǝ tɔŋnɑ-ɩ nɑʋ.
\q1
\v 17 Tɑcɑɑ n lɑpɑ ɩsǝnɑ n kɑ sɩɩwɑ tɔ.
\q1 N lɑpɑ ɩsɩɩ n kɑ yɔɣɔtʋɣʋ hɑtoo lɔŋtɑɑ tɔ.
\q1 N yɔkɑ nyɑ́ yǝlɑɑ kɛ́, pǝtɔɔtǝlɛ fɛɩ.
\q1 Kolontunɑɑ nɑɑkɩ Yosɑlɛm nɑ pɑ lɑŋɑ hʋlʋmǝɣɩ.
\q1 Ɩsɔ kpɑɑsɑ nyɑ́ kolontunɑɑ toŋ.
\b
\q1
\v 18 Yǝlɑɑ wiikinɑ Tɑcɑɑ kɛ hɑtoo pɑ lotu tɑɑ.
\q1 Siyɔŋ koloŋɑ nyɑ́, luki ɩsǝlʋm kɛ ilim
\q1 nɑ ɑhoo ɩsɩɩ pɔɣɔ.
\q1 Tɑɑ yele wulɑ, pǝ́cɔ́ nyɑ́ ɩsǝlʋm ɩ́ tɑɑ hɛɛsɩ kpente.
\q1
\v 19 Kʋlɩ, nyɑ́ wulɑ ɩ́ kpɑ ɑhoo tɑɑ.
\q1 Pǝ kpɑɣɑʋ tɑnɑŋ tǝhulu tɔ.
\q1 Hʋlɩ Tɑcɑɑ kɛ nyɑ́ lotu.
\q1 Tɛɣɛ-ɩ niŋ kɛ nyɑ́ piyɑ tɔm.
\q1 Pɑ tɔŋnɑ sǝpʋ kɛ nyɔɣɔsɩ kɛ hɑpɛɛ kpeesi.
\b
\q1
\v 20 Hɑɩ, Tɑcɑɑ, nyǝnɩ nɑ ń nɑ́, tɑɣɑ n lɑkɩ mpʋ.
\q1 Pǝ mʋnɑɑ sɩ ɑlɑɑ ɩ́ tɔɣɔ pɑ mɑɣɑmɑɣɑ pɑ lotu kʋlʋlʋm nɑ?
\q1 Pɑ piyɑ nsǝɣɩ pɑ sɔɔlɑ teu.
\q1 Pǝ mʋnɑɑ sɩ pɑ́ tɔɣɔ pɑ piyɑ mpɑ pɑ lʋlɑɑ,
\q1 nɑ pɑ́ pɑɑsǝnɑ teu tɔ?
\q1 Pǝ mʋnɑɑ sɩ pɑ́ kʋ kɔtǝlɑɑ nɑ Ɩsɔ kʋyɔɣɔtʋtʋ
\q1 tɛlǝsǝlɑɑ kɛ Tɑcɑɑ tǝsɛɛlɛ tɑɑ?
\q1
\v 21 Akpɑtǝlɑɑ nɑ ɩfepiyɑ pɑ hǝntɑ ɑtɛɣɛ
\q1 tɑpǝŋ nɑ tuluŋɑsɩ kɛ hɑpɛɛ nɔɔsɩ.
\q1 Pɑ kʋwɑ mɑ pɛɛlɑɑ nɑ mɑ ɩfepiyɑ.
\q1 Nyɑ́ pɑ́ɑ́nɑ́ kʋyɑkʋ wule kɛ n kʋ-wɛ.
\q1 N lɛntɑ-wɛɣɛ pǝtɔɔtǝlɛ fɛɩ.
\q1
\v 22 N yɑɑwɑ yǝlɑɑ sɔsɑɑ nɑ pɑɑ le ɩsɩɩ ɑcimɑ wule.
\q1 Kʋyɑŋku nyɑ́ pɑ́ɑ́nɑ́ kpɑwɑ tɔ, pǝ tɑ sɔɔ nɔɣɔlʋ.
\q1 Mpɑ mɑɑ tɔɔwɑ nɑ mɑ́ pɑɑsǝnɑ teu tɔ mɑ kolontu kʋ-wɛ.
\c 3
\s1 Wɑhɑlɑnɑɑ nɑ lɑŋhɛɛsǝlɛ
\q1
\v 1 Mɑ kɛ́ yʋlʋ wei ɩ nɑwɑ wɑhɑlɑ kɛ teu tɔɣɔ.
\q1 Tɑcɑɑ n mɑpɑ-m nyɑ́ kpɑ́tʋ́ɣʋ́ nɑ pɑ́ɑ́nɑ́.
\q1
\v 2 Sǝkpɛtʋɣʋ ɑnɑɑm tɑɑ kɛ́ n ponɑ-m nɑ ń sʋsɩ-m.
\q1 N tɑ sʋsɩ-m nyɑɑlǝm tɑɑ.
\q1
\v 3 Mɑ tike kɛ n mɑkɩ nɑ ń lɛlǝɣɩ,
\q1 pɑɑ kʋyɑkʋ ŋku.
\q1
\v 4 Mɑ tɛmɑ tɑɑsɩ kɛ́ tǝkɔŋɔkɔŋɔ.
\q1 N yɔkɑ mɑ mʋwɑ.
\q1
\v 5 N tʋ-m lɑŋwɑkǝllɛ nɑ wɑhɑlɑ pǝ tɑɑ kɛ́
\q1 nɑ pǝ́ cɔɔnɑ-m ɩsɩɩ koluŋɑ.
\q1
\v 6 N yelɑ-m sǝkpɛtʋɣʋ tɑɑ kɛ́ ɩsɩɩ
\q1 wei ɩ sǝpɑ nɑ pǝ́ leeli tɔ.
\q1
\v 7 N tɑmɑ-m koluŋɑ.
\q1 N tʋ-m ɑlukpɑlɑ yuŋ nyǝnɑ.
\q1
\v 8 Mɑ kiisɑ teu nɑ mɑ́ wiinɑ-ŋ.
\q1 Nn nɩɩkɩ mɑ kʋsǝlǝmʋtʋ.
\q1
\v 9 N tǝkɑ mɑ mpɑɑŋ tǝnɑ nɑ pɛɛ kʋyɑsǝlɛɛ.
\q1 N yelɑɑ nɑ mɑ hɑpǝlɛ tɔntɛ wɛ kɑtɛ.
\q1
\v 10 N feŋiɣi-m kɛ́ ɩsɩɩ wusi cɛŋʋɣʋ
\q1 yɑɑ tɔɣɔlɑɣɑ pɑpʋɣʋ tɔ.
\q1
\v 11 N lǝsɑ-m mpɑɑʋ tɑɑ.
\q1 N cǝlɑ-m hɔɣɔlɑsɩ.
\q1 N pǝsɑ-m ɩsɩɩ tɛtʋ nti pǝ wɑkǝlɑɑ tɔ.
\q1
\v 12 N pɑmɑ nyɑ́ tɔɔʋ nɑ ń siɣisinɑ-m.
\q1
\v 13 N tʋlɑ mɑ timpee kɛ pɔɔŋ nɑ nyɑ́ kɔɔkɑ tɑɑ nyǝmɑ́.
\q1
\v 14 Yǝlɑɑ tǝnɑ woŋiɣi-m kɛ́.
\q1 Pɑ yookinɑ-m yontu kɛ ilim nɑ pǝ tɛm.
\q1
\v 15 N hɑɣɑsɑ-m nyɩɩtʋ nyɑŋ nyǝntʋ.
\q1 N yelɑɑ nɑ mɑ́ nyɔɔ kʋnyɔnyɔɔm nyɑŋ nyǝm.
\q1
\v 16 N lɑpɑ nɑ mɑ́ sɑlɩ pǝtuwee nɑ mɑ kelɑ pɛlɩ.
\q1 N wɑɑsɑ mɑ tɔɔ kɛ́ tɔlʋmɑ.
\q1
\v 17 N hɑtǝlǝnɑ-m hɛɛsʋɣʋ nɑ ń lɔ-m.
\q1 Mɑ tɑ nyɩ lɑŋhʋlʋmlɛ leleŋ.
\q1
\v 18 Ɩlɛnɑ mɑ́ tɔ sɩ:
\q1 Mpi mɑɑ tɛɛsǝnɑ tɔ pǝ tɛmɑ.
\q1 Mɑɑ tɛɛlǝɣɩ Tɑcɑɑ kiŋ kɛ pʋlʋ.
\b
\q1
\v 19 Hɑɩ, tɔɔsɩ mɑ kʋnyɔŋtɔɣɔlɛ nɑ mɑ wɑhɑlɑ tɔm.
\q1 Nɑ sɔtʋ nɑ nyɑŋ lʋm mpi mɑ nyɔɔwɑ tɔ.
\q1
\v 20 Tɑm kɛ́ mɑ tɔɔsǝɣɩ pǝ tɔɔ.
\q1 Ɩlɛnɑ mɑ ɑpɑlʋtʋ yɔɔlǝɣɩ.
\q1
\v 21 Hʋwɛɛ nnɑ mɑ tɔɔsǝɣɩ mɑ tɑɑ
\q1 nɑ ɑ tɔɔ mɑ́ tɛɛlǝɣɩ tɔɣɔlɛ sɩ:
\q1
\v 22 Ɩsɔ nyɑ́ kʋpɑntʋ tɑ sɩɩ tǝnɑɣɑ.
\q1 Pǝyele nyɑ́ sɔɔlʋɣʋ tɑ tɛ.
\q1
\v 23 Nyɑ́ kʋpɑntʋ wɛ pɑɑ tɑnɑŋ ŋkuɣu.
\q1 Tɑcɑɑ, nyɑ́ teu tɔɔwɑɣɑ.
\q1
\v 24 Mɑ tɔŋ sɩ: Tɑcɑɑ kɛlɛ mɑ kpɑncoou.
\q1 Pǝ tɔɔ kɛ́ mɑ tɛɛlǝɣɩ-ŋ.
\q1
\v 25 Tɑcɑɑ n wɛ teu kɛ mpɑ pɑ tɛɛlǝɣɩ-ŋ tɔɣɔ.
\q1 Nɑ mpɑ pɑ kɛɛsǝɣǝnɑ nyɑ́ tɔɔ tɔ.
\q1
\v 26 Pǝ wɛ teu sɩ yʋlʋ ɩ́ su
\q1 nɑ ɩ́ tɑŋ Tɑcɑɑ nyɑ́ wɑɑsʋɣʋ.
\q1
\v 27 Pǝ wɛ teu sɩ yʋlʋ ɩ́ mʋ Ɩsɔ tǝlɑsɩ kɛ ɩ pǝcɑɑtʋ.
\q1 Pɑɑ pǝ wɛ kɑtɛ.
\q1
\v 28 Ye Tɑcɑɑ n kɔnɑ wei kɛ́ wɑhɑlɑ,
\q1 pʋntʋ ɩ́ su tǝpɑmm nɑ ɩ́ cɑɣɑnɑ ɩ mpɑɑ.
\q1
\v 29 Ɩ́ hǝntɩ ɑtɛ nɑ ɩ́ suli ɩ nɔɣɔ tɔɔ,
\q1 nɑ ɩ́ tɛɛlǝɣɩ sɩ ntɑnyɩ Tɑcɑɑ kɑ́ wɑɑsɩ-ɩ.
\q1
\v 30 Ɩ́ kɛɛsɩ lǝkpɑɣɑsɑɣɑ kɛ wei ɩ cɑɑ-ɩ mɑpʋ tɔ.
\q1 Ɩ́ mʋɣɩ kʋtʋɣʋ.
\q1
\v 31 Tɑcɑɑ nn lɔɔkɩ yʋlʋ kɛ tɑm tɔɔ.
\q1
\v 32 Amɑ wɑɑtʋ wei n hɔŋ yʋlʋ ŋkpɑŋʋɣʋ
\q1 tɔ n wɛnɑ ɩ pǝtɔɔtǝlɛ kɛ́.
\q1 Mpi tɔ, nyɑ́ kʋpɑntʋ tɔɔwɑɣɑ.
\q1
\v 33 Pǝ tɑɣɑ ɑyɛɛnɛɛ kɛ n hɔŋnɑ yʋlʋ ŋkpɑŋʋɣʋ
\q1 nɑ ń tʋɣɩ-ɩ wɑhɑlɑ.
\b
\q1
\v 34 Wɑɑtʋ wei ɩ́ fɛlǝɣɩ nɔɔhɛɛ kɛ
\q1 tɛtʋ piyɑ sɑlǝkɑtʋnɑɑ tǝnɑ tɔ.
\q1
\v 35 Wɑɑtʋ wei ɩ́ pɛŋ tɑmpɑnɑ tʋ kɛ ɩ tɑmpɑnɑ tɔ,
\q1 ɩsɔtɑɑ Ɩsɔ sɔsɔ nɑɑkɩ kɛ́.
\q1
\v 36 Wɑɑtʋ wei ɩ́ tɔkɩ yʋlʋ ɩsɛ kɛ hʋʋlɛ tɑɑ tɔ,
\q1 Tɑcɑɑ ɩɩ nɑɑkɩ?
\q1
\v 37 Awe yɔɣɔtǝɣǝnɑ nɑ pǝ́ lɑ́?
\q1 Awe ŋmɑkǝlǝɣǝnɑ, pǝ tɑɣɑ Tɑcɑɑ?
\q1
\v 38 Ɩsɔtɑɑ Ɩsɔ sɔsɔ nɔɣɔ kɛ
\q1 kʋpɑntʋ yɑɑ ɩsɑɣɑtʋ lɩɩkǝnɑ.
\q1
\v 39 Ɩlɛ pepe tɔɔ kɛ́ yʋlʋ weesuɣu tʋ kʋntǝɣɩ?
\q1 Pɑɑ wei ɩ́ kʋntǝnɑ ɩ mɑɣɑmɑɣɑ ɩ kʋpǝntǝŋ.
\q1
\v 40 Tǝ́ nyǝnɩ tɑ tɔntɛ kɛ teu nɑ tǝ́ mɑɣɑsɩ tǝ tɔm.
\q1 Tǝ́ mǝlǝnɑ Tɑcɑɑ tɔɔ.
\q1
\v 41 Tǝ́ sǝlǝmǝnɑ lotu kʋlʋmtʋ nɑ tǝ́ tɛɣɛ niŋ
\q1 kɛ Ɩsɔ wei ɩ wɛ ɩsɔtɑɑ tɔ.
\q1
\v 42 Tɩɩ kisɑ Ɩsɔ kɛ́ nɩɩnɑʋ kɛ́ nɑ tǝ́ kʋlɩ ɩ tɔɔ.
\q1 Amɑ ɩ́lɛ́ ɩ tɑ wii-tʋ.
\q1
\v 43 N hɑɣɑ-tʋ nɑ pɑ́ɑ́nɑ́ kɛ́.
\q1 N tɔɣɔnɑ-tʋ nɑ ń kʋ-tʋ,
\q1 n tɑ lɑ pǝtɔɔtǝlɛ.
\q1
\v 44 N kentɑ nyɑ́ tɔɔ kɛ́ ɩsɔŋmʋntʋɣʋ
\q1 sɩ ń tɑɑ nɩɩ tɑ́ kʋsǝlǝmʋtʋ.
\q1
\v 45 N pǝsɑ-tʋɣʋ ɩsɩɩ nyɩɩtʋ nti pɑ hɑsɑɑ tɔ.
\q1 Tǝ pǝsɑ ɩsɩɩ hute kɛ piitimnɑɑ lɛlɑɑ tɑɑ.
\q1
\v 46 Tɑ kolontunɑɑ tǝnɑ kuliɣi nɔɔsɩ,
\q1 nɑ pɑ́ cɑɑkɩ-tʋɣʋ tɔm.
\q1
\v 47 Tɑ́ nyǝntʋ ntɛ́ sɔɣɔntʋ, nɑ ɩsǝpille,
\q1 nɑ wɑkǝlʋɣʋ, nɑ mpusi.
\q1
\v 48 Mɑ pǝlǝɣɩ ɩsǝlʋm kɛ sɔsɔm kɛ
\q1 wɑhɑlɑ wei ɩ mɑɣɑnɑ mɑ yǝlɑɑ tɔ ɩ tɔɔ.
\q1
\v 49 Tɑm kɛ́ mɑ wiiki, hɛɛsʋɣʋ fɛɩ.
\q1
\v 50 Mɑ tɑŋɑɑ kɛ́ sɩ Tɑcɑɑ
\q1 ɩ́ nyǝnnɑ ɩsɔtɑɑ nɑ ɩ́ nɑ́.
\q1
\v 51 Mpi pǝ mɑɣɑnɑ mɑ ɩcɑtɛ ɑlɑɑ tɔ,
\q1 pǝ tʋɣʋ-m wɑhɑlɑ kɛ́.
\b
\q1
\v 52 Mpɑ pɑ tɑɑ kpɑɑnɑ-m mʋsʋŋ tɔ,
\q1 pɑ tʋ mɑ wɑɑlɩ kɛ́ ɩsɩɩ sumɑɣɑ.
\q1
\v 53 Pɑ tʋsɑ-m lɔkɔ tɑɑ kɛ́ nɑ mɑ ɩsɛ
\q1 sɩ pɑ lǝsǝɣɩ mɑ weesuɣu.
\q1 Pɑ yɑɣɑ-m pɛɛ.
\q1
\v 54 Lʋm wɑɑsɑ mɑ nyʋɣʋ.
\q1 Hɑlɩ mɑ hʋʋwɑ sɩ mɑ lepɑɣɑ.
\q1
\v 55 Ḿpʋ́ɣʋ́ mɑ yɑɑ Tɑcɑɑ
\q1 kɛ hɑtoo pʋ́ʋ́ɣʋ́ ŋkʋ kʋ tɑɑ.
\q1
\v 56 N nɩɩwɑ mɑ nɔɣɔ,
\q1 tɑɑ tǝkɩ nyɑ́ ŋkpɑŋŋ kɛ mɑ feesiŋ tisuɣu,
\q1 nɑ mɑ lɑŋwɑkǝllɛ kɑpusi.
\q1
\v 57 Kʋyɑkʋ ŋku mɑ yɑɑ-ŋ tɔ, n kpǝtǝnɑ-m.
\q1 N heelɑ-m sɩ: Tɑɑ nyɑ́.
\q1
\v 58 Tɑcɑɑ, n sɛɛnɑ mɑ tɔɔ, n yɑpɑ mɑ weesuɣu.
\q1
\v 59 N nɑwɑ ɩsǝnɑ pɑ kʋ mɑ tɔm tɔ.
\q1 Ɩlɛ hɑ-m mɑ tɑmpɑnɑ.
\q1
\v 60 N nɑwɑ ɩsǝnɑ pɑ lɛɛtǝɣɩ-m tɔ.
\q1 Pɑ kʋlǝɣɩ mɑ tɔɔ kɛ́.
\q1
\v 61 Tɑcɑɑ n nɩɩwɑ pɑ kʋtʋɣʋ ŋku pɑ tʋʋkʋ-m tɔ.
\q1 Nɑ ɩsǝnɑ pɑ cɑɣɑ mɑ ɑcɑɣɑ tɔ.
\q1
\v 62 N nɩɩwɑ mpɑ pɑɑ cɑɑkɩ-m tɔ pɑ kʋyɔɣɔtʋtʋ.
\q1 Pɑ hʋʋkɩ tɑm sɩ pɑɑ lɑ-m ɩsɑɣɑtʋ.
\q1
\v 63 Pɑɑ pɑ cɑɣɑɑ yɑɑ pɑ sǝŋɑɑ, n nyǝmɑ́.
\q1 Mɑɣɑ pɑ tʋɣʋnɑ yontu.
\q1
\v 64 Tɑcɑɑ, n kɑ́ lɛɛtɩ-wɛɣɛ
\q1 ɩsǝnɑ pɑ lɑpɑ-m nɑ pɑ niŋ tɔɣɔ.
\q1
\v 65 N kɑ́ lɑ pɑ lɑŋɑ kɛ kpɩɩsǝŋ kɛ́.
\q1 Nyɑ́ mpusi ɩ́ tǝŋ-wɛ.
\q1
\v 66 N kɑ́ tʋ pɑ wɑɑlɩ kɛ́ nɑ pɑ́ɑ́nɑ́
\q1 nɑ ń kpiisi-wɛɣɛ tɛtʋ tɔɔ.
\c 4
\s1 Yosɑlɛm wɑkǝlʋɣʋ wulɑ
\q1
\v 1 A ɑ, Ɩsɔ tǝsɛɛlɛ wʋlɑ teu sǝpɑ.
\q1 Wʋlɑ kʋpɑŋ ɩnɩ ɩ cɔɔlɑɑ.
\q1 Ɩsɔ tǝsɛɛlɛ pɛɛ yɑwɑ yem yem kɛ́ hɑpɛɛ nɔɔsɩ.
\q1
\v 2 Wɑɩyo Siyɔŋ piyɑ mpɑ pɑɑ tewɑ ɩsɩɩ wʋlɑ kʋpɑŋ tɔ,
\q1 pɑ pǝsɑ ɩsɩɩ cʋɣʋ wontu nti cʋɣʋ ŋmɑlɑɑ lɑpɑ tɔ?
\q1
\v 3 Ɩ́ nyǝnɩ, tɑɑlɛ hɑsɩ,
\q1 nɑ cɛlǝɣɩ sɩ piyɑ kɛ hǝlǝm.
\q1 Amɑ mɑ yǝlɑɑ nɑ́ kɛ́ ɑsɑɣɑɑ kɛ́,
\q1 pɑ fɛɩnɑ pǝtɔɔtǝlɛ ɩsɩɩ
\q1 tɑɑtɑɑ kɛ wʋlɑɣɑ tɛtʋ tɑɑ.
\q1
\v 4 Lʋkɔtʋ pɩɩ ɑhʋlʋmnɑɑ,
\q1 pɑ nsǝmɑ mɑtǝnɑ pɑ tɑntɑhɑɑŋ.
\q1 Piyɑ nɑ́ wiiki tɔɣɔnɑɣɑ tɔɔ.
\q1 Ɩlɛ nɔɣɔlʋ ɩɩ hɑɑkɩ-sɩ.
\q1
\v 5 Mpɑ pɑ tɔkɑɣɑ teu kɛ lɔŋ tɔ pɑ lɑŋɑɑ.
\q1 Pɑ fiɣiniɣi nɑ pɑ́ sǝkɩ hɑpɛɛ tɔɔ.
\q1 Mpɑ pɑɑ wɛ toŋtʋnɑɑ tɛɛsɩ tɑɑ tɔ,
\q1 pɑ cɑlǝsǝɣɩ tɔɣɔnɑɣɑ kɛ hulɑ tɑɑ.
\q1
\v 6 Mɑ yǝlɑɑ kpekǝle nyǝ́mɑ pǝntɑ kʋpǝntʋɣʋ.
\q1 Kʋ kǝlɑ tɔɔʋ kɛ Sɔtɔm nyǝ́mɑ mpɑ
\q1 pǝ wɑkǝlɑ tɔm kʋlʋm ɩsɩɩ ɩsɛ cǝpǝlʋɣʋ tɔ.
\q1 Yʋlʋ niŋ fɛɩ pǝ tɑɑ.
\q1
\v 7 Tɑ ɑwulumpiyɑ kɑ teekɑɣɑ kɔkɔ kɛ́,
\q1 ɩsɩɩ tɛʋ tɔmpɛɛ.
\q1 Hɑlɩ pɑ hʋlʋmǝŋ kɑ tɛɛwɑ nɑɑlǝm.
\q1 Pɑ tɔnǝŋ kɑ wɛ ɩsɛɛʋ kɛ́
\q1 ɩsɩɩ kɔŋkɔlǝmǝlɑ pɔɣɔlǝŋ.
\q1 Nɑ pɑ ɩsɛntɑɑ lɩɩwɑ ɩsɩɩ
\q1 liɣitee pǝlɛ pooku nyǝntɛ.
\q1
\v 8 Pɑ mǝlɑ kʋkpɛɛtɑɑ tǝkilikili
\q1 nɑ pǝ́ kǝlɩ nyɔɔm kɛ pǝnɛntɛ.
\q1 Nɔɣɔlʋ ɩɩ tɑsǝɣɩ-wɛɣɛ
\q1 nyǝm kɛ hɑpɛɛ tɔɔ.
\q1 Pɑ tɛmɑ tɑɑsɩ kɛ́ tǝkɔŋɔkɔŋɔ.
\q1 Yʋlʋ pǝsǝɣɩ ɩ́ kɑlɑ pɑ mʋwɑ.
\q1 Pɑ tɔnǝŋ wʋlɑɑ kɛ́ ɩsɩɩ tɑɑsɩ.
\q1
\v 9 Mpɑ lɑɣɑtɛ kʋwɑ tɔ pɑ kǝlɑ nyʋleleŋ
\q1 kɛ mpɑ nyɔɣɔsɩ kʋwɑ tɔ.
\q1 Nyɔɣɔsɩ nuɣutuɣu-ŋ kɛ́ nɑ sɩ cɑɑmɩ-ŋ.
\q1 Mpi tɔ, tɑwɑ kʋlʋlʋm lɑŋɑɑ.
\q1
\v 10 Nyɔɣɔsɩ pɩɩ mɑ yǝlɑɑ.
\q1 Hɑlɩ totonɑɑ tǝsɩ pɑ piyɑ kʋlʋlɑsɩ,
\q1 nsi pɑ sɔɔlɑ teu tɔ, nɑ pɑ́ tɔɣɔ.
\b
\q1
\v 11 Tɑcɑɑ n mʋwɑ nyɑ́ pɑ́ɑ́nɑ́ sɔsɔɔnɑ
\q1 nɑ ń tɑlɑ ɑ tǝnɑɣɑ.
\q1 N pǝlɑ nyɑ́ pɑ́ɑ́nɑ́ sɔsɔɔnɑ.
\q1 N mʋsɑ kɔkɔ kɛ Siyɔŋ tɑɑ.
\q1 A nyɑɣɑ Siyɔŋ ɩcɑtɛ nɑ ɑ́ kpɛnnɑ tǝ kite.
\q1
\v 12 Antulinyɑ ɑwulɑɑ, nɑ ɑtɛ yǝlɑɑ tɑɑ tʋ pɑ tɑɑ sɩ
\q1 kolontu ɑkɑ ɩnɛ ɩ kɑ́ sʋʋnɑ Yosɑlɛm nɔnɔɔsɩ.
\q1
\v 13 Ɩsɔ kʋyɔɣɔtʋtʋ tɛlǝsǝlɑɑ
\q1 mǝ kʋpǝntǝŋ tɔɔ kɛ́.
\q1 Ɩsɑɣɑtʋ nti kɔtǝlɑɑ mɛ ɩ́ lɑpɑ tɔ tǝ tɔɔ kɛ́.
\q1 Mǝ kʋnɑ tɑmpɑnɑ tǝŋlɑɑ kɛ ɩcɑtɛ tɑɑ.
\q1
\v 14 Ɩ́ tutɑɣɑ ɩcɑtɛ tɑɑ kɛ́ ɩsɩɩ yʋlʋmɑɑ.
\q1 Mǝ tǝnɑ nɑ cɑlǝm.
\q1 Nɔɣɔlʋ ɩɩ pǝsǝɣɩ
\q1 nɑ ɩ́ tokinɑ mǝ wontu mɑɣɑmɑɣɑ.
\q1
\v 15 Ye ɩ́ kɔŋ, yǝlɑɑ kiisiɣi kɛ sɩ:
\q1 Ɩ́ hɛlɩ, ɑsilimɑ nyǝ́mɑ.
\q1 Ɩ́ hɛlɩ, ɩ́ tɑɑ kpǝtǝnɑ.
\q1 Pɑ seeki mpʋ nɑ pɑ́ cɔɔkɩ yem
\q1 ɩlɛnɑ piitimnɑɑ yɔɣɔtɩ sɩ:
\q1 Pǝ fɛɩ sɩ ɩ́ cɑɣɑ tɑ tɛ.
\q1
\v 16 Tɑcɑɑ nyɑ́ mɑɣɑmɑɣɑ n yɑsǝnɑ-wɛ.
\q1 Nn cɑɑ ń tɑsɑ-wɛɣɛ nɑʋ.
\q1 Pɑɑ tʋɣʋnɑ kɔtǝlɑɑ.
\q1 Pɑɑ nyɑŋnɑ ɑkpɑtǝlɑɑ.
\b
\q1
\v 17 Tɑ́ ɩsɛ kɑnɑ nyǝnʋɣʋ sɩ yɑɑ nɔɣɔlʋ
\q1 kɑ́ kɔɔ tɑ́ wɑɑsʋɣʋ kɛ́, kpɛtɛ.
\q1 Tǝ tɑŋɑɑ ɩsɩɩ tǝ tɑŋɑɑ sɩ
\q1 piitimnɑɑ nɑpǝlɩ pɑ́ wɑɑsɩ-tʋ.
\q1 Pɑ tɑ kɔɔ.
\q1
\v 18 Kolontunɑɑ feŋiɣi-tʋɣʋ,
\q1 pɑɑ cɑɑ tǝ́ mǝlɩ tɑ́ tɛ.
\q1 Tɩɩ pǝsǝɣɩ nɑ tǝ́ tɔ tɑ hɑpɛɛ tɔɔ.
\q1 Tɑ́ wɑɑtʋ tɛmɑ, tɑ́ tǝnɑɣɑ wʋsɑɑ.
\q1 Tɑ́ kʋyɛɛŋ tɛmɑ.
\q1 Tɑ́ tǝnɑɣɑ kɔŋ.
\q1
\v 19 Tɑ́ wɑɑlɩ selɑɑ pǝsɑ lɔŋlɔŋ lɑpʋ kɛ́
\q1 ɩsɩɩ hɛkǝlɛnɑɑ.
\q1 Pɑ tɔɣɔnǝɣɩ-tʋɣʋ pɔ́ɔ́ŋ tɑɑ.
\q1 Pɑ nyǝkɩ-tʋɣʋ kɑtɔsɩ kɛ wʋlɑɣɑ tɛtʋ tɑɑ.
\q1
\v 20 Tɑ́ wulɑʋ wei Tɑcɑɑ lǝsɑɑ
\q1 nɑ ɩ́ pǝlɩ-ɩ nim tɔ.
\q1 Wei ɩ hɑɑkɑɣɑ-tʋɣʋ weesuɣu tɔ,
\q1 pɑ kpɑ-ɩ pɑ kɑtɔsɩ tɑɑ.
\q1 Pǝyele tɑ́ yɔɣɔtɑɣɑ sɩ:
\q1 Ɩnɩ ɩ kɑ́ kentinɑ tɑ tɔɔ kɛ́ piitimnɑɑ tɑɑ.
\b
\q1
\v 21 Ɩtɔm nyǝ́mɑ mɛ,
\q1 ɩ́ nɔkɑɑ mǝ lɑŋɑ ɩ́ hʋlʋmɩ nɑ ɩ́ pɑɑ.
\q1 Usi nyǝ́mɑ mɛ, Tɑcɑɑ kɑ́ mʋ-mɛ nɑ pɑ́ɑ́nɑ́.
\q1 Mǝ ɩsɛ kɑ́ pili nɑ ɩ́ lɩɩ kpɛtɛ tǝyǝlǝyǝlɩ.
\q1
\v 22 Siyɔŋ nyǝ́mɑ mɛ,
\q1 mǝ ŋkpɑŋʋɣʋ hɔm tǝnɑɣɑ ntɔ.
\q1 Pɑ kɑɑ tɑsɑ-mɛɣɛ kuuu nɑ pɑ́ tɛɛnɑ.
\q1 Amɑ Ɩtɔm nyǝ́mɑ mǝ ŋkpɑŋʋɣʋ kɛ
\q1 pɑɑ hɔ mǝ ɩsɑɣɑtʋ tɔɔ.
\q1 Ɩsɔ kɑ́ kuli mǝ kɑwɑlɑɣɑ tɔɔ kɛ́.
\c 5
\s1 Tɑcɑɑ mǝŋnɑ-tʋɣʋ nyɑ́ kiŋ
\q1
\v 1 Tɑcɑɑ, tɑɑ sɔɔ mpi pǝ mɑɣɑnɑ-tʋ tɔ.
\q1 Nyǝnɩ, nɑ ń pɑɑsǝnɑ ɩsǝnɑ pɑ tʋʋkɩ-tʋ tɔ.
\q1
\v 2 Kpɑɩ nyǝ́mɑ lɛɛkɑ tɑ́ tɛtʋ.
\q1 Mpɑ tǝ tɑ nyɩ tɔ pɑ cɑɣɑ tɑ́ tɛɛsɩ tɑɑ.
\q1
\v 3 Tɑ́ cɑɑnɑɑ fɛɩ, nɑ pǝ́ yele tɑ́ toonɑɑ
\q1 kɛ leelɑɑ, nɑ tɑɣɑ suluwɑɑ.
\q1
\v 4 Tǝ yɑkɩ tɑ́ mɑɣɑmɑɣɑ tɑ́ lʋm.
\q1 Tǝ fɛlǝɣɩ tɑ́ tɑɑsɩ.
\q1
\v 5 Tɑ kʋnyɔntʋlɑɑ wɛ tɑ́ wɑɑlǝɣɩ tɑm kɛ́.
\q1 Tǝ kɑwɑ tǝtɔɣɔtɔɣɔ,
\q1 pɑɑ yeki-tʋ sɩ tǝ́ hɛɛsɩ.
\q1
\v 6 Tǝ tiɣisiɣi Icipiti
\q1 nɑ Asilii pǝ nyǝ́mɑ kɛ niŋ kɛ́,
\q1 nɑ pǝ́cɔ́ tǝ́ tɔɣɔ nɑ tǝ́ hɑɣɑ.
\q1
\v 7 Tɑ́ cɑɑnɑɑ lɑpǝnɑ ɩsɑɣɑtʋ.
\q1 Amɑ pɛlɛ pɑ sǝpɑ.
\q1 Ɩlɛnɑ tɑɑ tɔkɩ tǝ nyɑŋ.
\q1
\v 8 Yomɑɑ pǝsǝnɑ ntɛɣɛ tɑ́ cɑɑnɑɑ.
\q1 Pǝ́cɔ́ nɔɣɔlʋ kɑɑ yɑ-tʋɣʋ pɑ niŋ tɑɑ.
\q1
\v 9 Tǝ lɑkɩ tɑ́ weesiŋ kɛ ɑwusɑ kɛ
\q1 wʋlɑɣɑ tɛtʋ tɑɑ ŋmɩɩlɑɑ niŋ tɑɑ kɛ́,
\q1 nɑ pǝ́cɔ́ tǝ́ hiki nɑ tǝ́ tɔɣɔ.
\q1
\v 10 Nyɔɣɔsɩ hɑŋɑ tɑ́ tɔnǝŋ kɛ́ ɩsɩɩ
\q1 tǝ wɛ mǝsɑsɩ tɑɑ.
\q1
\v 11 Pɑ kpipɑ Siyɔŋ nɑ Yutɑ ɑcɑlɛɛ tɑɑ ɑlɑɑ,
\q1 nɑ pɛɛlɑɑ, nɑ pɑ́ wɑkǝlǝɣɩ-wɛ.
\q1
\v 12 Pɑ pusɑ wulɑʋ wɑɑlɩ nyǝ́mɑ nɑ tɩɩŋ.
\q1 Pɑ tɑ tʋnɑ ɑkpɑtǝlɑɑ kɛ pɑɑ pǝcɔ.
\q1
\v 13 Nɑmlɛ nɑŋʋɣʋ nɩɩ ɩfepiyɑ.
\q1 Piyɑ nɑ́ sǝɣǝlɑ tɑɑsɩ nɑ sɩ́ seliɣi.
\q1
\v 14 Ɩcɑtɛ sɔsɑɑ nɑɑ tɑsǝɣɩ hʋʋlɛ tɑɑ kɛ́ cɑɣɑlɛ.
\q1 Pǝyele ɩfepiyɑ nɑ́ hɛɛsɑ sɑŋkʋnɑɑ.
\q1
\v 15 Tɑ́ lɑŋhʋlʋmlɛ yɑwɑ.
\q1 Lǝyɑɣɑ lɛɛtɑ tɑ́ pɑɑlɛ lonte.
\q1
\v 16 Tɑ́ teeli sǝpɑ.
\q1 Tǝ pǝsɑ mpusi nyǝ́mɑ kɛ́.
\q1 Mpi tɔ, tǝ lɑpɑ ɩsɑɣɑtʋ.
\q1
\v 17 Tɑ́ lɑŋɑ wɑkǝlɑ sɔsɔm.
\q1 Ɩsǝlʋm yʋlǝsǝɣɩ tɑ́ ɩsɛ.
\q1
\v 18 Mpi tɔ, Siyɔŋ pʋɣʋ pǝsɑ wʋlɑɣɑ tɛtʋ
\q1 nɑ tɑɑlɛ hɑsɩ cɔɔkɩ.
\q1
\v 19 Amɑ Tɑcɑɑ nyɑɣɑlɛ wulɑʋ kɛ tɑm tɔɔ.
\q1 Nyɑ́ kɑwulɑɣɑ fɛɩ tǝnɑɣɑ.
\q1
\v 20 Pepe tɔɔ kɛ́ n lɔ-tʋɣʋ tɑm tɔɔ?
\q1 Pepe tɔɔ kɛ́ n sɔɔ tɑ́ tɔɔ kɛ́ tɑ́ weesuɣu tǝnɑ?
\q1
\v 21 Mǝlǝnɑ-tʋɣʋ nyɑ́ kiŋ nɑ tǝ́ pǝsɩ
\q1 nyɑ́ nyǝ́mɑ tǝkpɑtɑɑ.
\q1 Lɑɣɑsɩ tɑ́ weesiŋ ɩsɩɩ hɑtoo ɩlɛ.
\q1
\v 22 Nyɑ́ tɑɑ wɛɛ sɩ n kɑ́ lɔ-tʋ tǝkpɑtɑɑ nɑ?
\q1 N kɑ́ mʋ-tʋ nɑ pɑ́ɑ́nɑ́ nɑ pǝ́ tɛɛ mpǝle nɑ?