\id JON - Lokpa Bible portions [dop] -Benin 1999 (web edition -2017)
\ide UTF-8
\h Yonɑɑsɩ
\toc1 ƖSƆ KƲYƆƔƆTƲTƲ TƐLƎSƲLƲ YONAASƖ TƆM TAKƎLAƔA
\toc2 Yonɑɑsɩ
\toc3 Yonɑɑsɩ
\mt2 ƖSƆ KƲYƆƔƆTƲTƲ TƐLƎSƲLƲ
\mt1 YONAASƖ
\mt2 TƆM TAKƎLAƔA
\imt1 Kʋtʋlʋtʋ
\ip Apɑlʋ wei pɑ yɑɑkɩ Yonɑɑsɩ tɔ ɩ kɛ́ Ɩsɛɣɛlɩ tʋ kɛ́ nɑ Ɩsɔ tili-ɩ piitim lɛmpɩ nyǝ́mɑ tɛɣɛ Asilii tɛtʋ tɑɑ kɛ́ Ninifi ɩcɑtɛ tɑɑ sɩ ɩ́ polo nɑ ɩ́ kuli pɑ ɩsɑɣɑtʋ tɔɔ. Amɑ mpɛ ɩnɩ pɑɑ kɛ́ Ɩsɛɣɛlɩ nyǝ́mɑ kolontunɑɑ kɛ́. Pǝ tɔɔ kɛ́ Yonɑɑsɩ kisɑɣɑ pote. Pɑɑ nɑ mpʋ Ɩsɔ ponɑ-ɩ nɑ toŋ nɑ Yonɑɑsɩ kpɑɑlɩ-wɛ nɑ pɑ́ mʋ ɩ tɔm nɑ pɑ́ lɑɣɑsɩ tɔntɛ nɑ Ɩsɔ wii-wɛ.
\iot Ɩsǝnɑ pɑ fɑɣɑ Yonɑɑsɩ tɑkǝlɑɣɑ tɔ:
\io1 Ɩsɔ tʋwɑ Yonɑɑsɩ kɛ tǝmlɛ nɑ ɩ́ kisi, titite \ior 1\ior*
\io1 Yonɑɑsɩ lɑɣɑsɑɑ nɑ pǝ́ yɑ ɩ nyʋɣʋ, titite \ior 2\ior*
\io1 Yonɑɑsɩ kpɑɑlʋɣʋ kɛ Ninifi nyǝ́mɑ, titite \ior 3\ior*
\io1 Tɑcɑɑ wɑɑsɑ Ninifi nyǝ́mɑ, titite \ior 4\ior*
\c 1
\s1 Yonɑɑsɩ mɑɣɑsɑɣɑ sɩ ɩ kisiɣi Tɑcɑɑ tiluɣu
\p
\v 1 Ḿpʋ́ɣʋ́ kʋyɑkʋ nɑkʋlɩ Tɑcɑɑ heelɑ Amitɑyi pǝyɑlʋ Yonɑɑsɩ sɩ: 
\v 2 Kʋlɩ nɑ ń polo Ninifi ɩcɑtɛ sɔsɔɔlɛ nɑ ń kpɑɑlɩ-tɛ. Mɑ nyǝɣǝsɑ tǝ ɩsɑɣɑtʋ.
\p
\v 3 Ɩlɛnɑ Yonɑɑsɩ kʋlɩ sɩ ɩ́ seeki Tɑcɑɑ. Pǝ tɔɔ kɛ́ ɩ tiiwɑ kpɩɩlǝŋ teesɑŋ kɛ Yopee. Ɩ mɑɣɑnɑ kpɩɩlʋɣʋ sɔsɔɔʋ ŋku kʋ puki Tɑɑsisi tɔ. Ɩlɛnɑ ɩ́ fɛlɩ kʋ liɣitee nɑ ɩ́ sʋʋ sɩ ɩ́ puki tǝnɑ.
\p
\v 4 Ḿpʋ́ɣʋ́ Tɑcɑɑ lɑpɑ nɑ heelim sɔsɔɔm mɑ teŋku tɔɔ. Kɑcuculɑɣɑ sɔsɑɣɑ kʋlǝnɑ nɑ kɑ́ cɑɑ kpɩɩlʋɣʋ yɔkʋɣʋ sɩ lʋm ɩ́ tɔɣɔ-wɛ. 
\v 5 Ntɛnɑ sɔɣɔntʋ sɔsɔɔntʋ kpɑ kpɩɩlʋɣʋ sɑɑlɑɑ. Ɩlɛnɑ pɑ́ yɑɑkɩ pɑ tɩɩŋ hǝlɑ. Nɑ pɑ́ lǝsǝɣɩ wontu nɑ pɑ́ pɛtǝɣɩ lʋm tɑɑ sɩ pǝ́ lɑ kpɩɩlʋɣʋ tǝfʋŋɑfʋŋɑ. Amɑ Yonɑɑsɩ nɑ́ tiiwɑ kpɩɩlʋɣʋ nɑŋ lɛŋkʋ tɑɑ nɑ ɩ́ tooki sɔsɔm. 
\v 6 Ḿpʋ́ɣʋ́ kpɩɩlʋɣʋ sɑɑlɑɑ nyʋɣʋ tʋ polɑ Yonɑɑsɩ kiŋ nɑ ɩ́ pɔɔsɩ-ɩ sɩ: Nyɑ́ tooki yɑɑ? Kʋlɩ nɑ ń yɑɑ nyɑ́ tʋɣʋ. Ntɑnyɩ kɩɩ wɑɑsɩ-tʋ, nɑ tǝ́ tɑɑ sɩ́.
\p
\v 7 Ḿpʋ́ɣʋ́ kpɩɩlʋɣʋ sɑɑlɑɑ yɑɑ tǝmɑ sɩ: Ɩ́ kɔɔ nɑ tǝ́ tɔ tɛtɛ nɑ tǝ́ nyɩ wei ɩ kɔnɑ-tʋɣʋ mpusi ɩnɛ tɔ. Ḿpʋ́ɣʋ́ pɑ tɔ tɛtɛ ɩlɛnɑ pǝ kpɑ Yonɑɑsɩ. 
\v 8 Ntɛnɑ pɑ́ tɔmɩ-ɩ sɩ: Heeli-tʋɣʋ mpi pǝ kɔnɑ mpusi ɩnɛ tɔ. Nyɑ́ tɛɣɛ le. Nyɑ́ piitim kɛ mpi. Nyɑ́ kʋlɑpǝlɛ kɛ nte?
\p
\v 9 Ḿpʋ́ɣʋ́ ɩ cɔ-wɛ sɩ: Mɑ kɛ́ Hepǝlɑ tʋ kɛ́. Ɩsɔtɑɑ Ɩsɔ Tɑcɑɑ wei ɩ lɑpɑ tɛtʋ nɑ teŋku tɔɣɔ mɑ sɛɛkɩ.
\p
\v 10 Ɩlɛnɑ ɩ́ kɛɛsɩ-wɛ sɩ ɩnɩ ɩ seeki Tɑcɑɑ. Ntɛnɑ sɔɣɔntʋ sɔsɔɔntʋ kpɑ mpɛ ɩnɩ. Kɛnɑ pɑ́ pɔɔsɩ-ɩ sɩ: Pepe tɔɔ kɛ́ n lɑpɑ mpʋ? 
\v 11 Nɑ ɩsǝnɑɣɑ tɩɩ lɑ-ŋ nɑ pǝ́cɔ́ teŋku hɛɛ?
\p Mpi tɔ, lʋm pɑ́ɑ́nɑ́ tɔŋnɑ sɔɔsʋɣʋ kɛ́. 
\v 12 Ɩlɛnɑ ɩ́ cɔ-wɛ sɩ: Ɩ́ pɛtɩ-m teŋku tɑɑ, ɩlɛnɑ lʋm hɛɛ. Mpi tɔ, mɑ nyǝmɑ́ sɩ mɑ́ kɔnnɑ kɑcuculɑɣɑ sɔsɑɣɑ kɑnɛɣɛ mǝ tɔɔ.
\p
\v 13 Mpʋɣʋlɛ kpɩɩlʋɣʋ sɑɑlɑɑ mɑɣɑsɑ sɑɑʋ ɩsɩɩ pɑɑ tɑlɑ kʋteŋ, pɑ tɑ pǝsɩ. Mpi tɔ, teŋku pɑ́ɑ́nɑ́ tɔŋnɑ sɔɔsʋɣʋ kɛ́. 
\v 14 Ɩlɛnɑ pɑ́ sǝlǝmɩ Tɑcɑɑ sɩ: Hɑɩ, tɑɑ kʋ-tʋɣʋ yʋlʋ ɩnɛ ɩ weesuɣu tɔɔ. Pǝyele tɑɑ yele nɑ ɩ cɑlǝm tɔm mǝlɩ tɑ́ nyɔɔŋ tɑɑ. Mpi tɔ, Tɑcɑɑ nyɑ́, n lɑkɩ mpi n sɔɔlɑɑ tɔɣɔ.
\p
\v 15 Ntɛnɑ pɑ́ kpɑɣɑ Yonɑɑsɩ nɑ pɑ́ pɛtɩ teŋku tɑɑ nɑ lʋm hɛɛ kpɑkpɑɑ. 
\v 16 Ḿpʋ́ɣʋ́ Tɑcɑɑ tɔm kpɑ yǝlɑɑ mpɛɣɛ sɔɣɔntʋ kɛ sɔsɔm. Ɩlɛnɑ pɑ́ lɑpɩ-ɩ kɔtɑsɩ nɑ pɑ́ sɩɩ pɑ nɔɔsɩ sɩ pɑɑ sɛɛ-ɩ.
\s1 Yonɑɑsɩ sǝlǝmʋɣʋ kɛ tinte lotu tɑɑ
\p
\v 17 Ḿpʋ́ɣʋ́ Tɑcɑɑ lɑpɑ nɑ tinte sɔsɔɔlɛ nɑtǝlɩ kɔɔ nɑ tǝ́ li Yonɑɑsɩ. Ḿpʋ́ɣʋ́ ɩ cɑɣɑ tǝ lotu tɑɑ kɛ́ kʋyɛɛŋ tooso nɑ ɑhoo tooso.
\c 2
\p  
\v 1 Ɩlɛnɑ ɩ́ sǝlǝmɩ ɩ Ɩsɔ Tɑcɑɑ kɛ tinte lotu tɑɑ sɩ:
\q1
\v 2 Tɑcɑɑ, mɑ yɑɑ-ŋ mɑ wɑhɑlɑ tɑɑ nɑ ń nɩɩ.
\q1 Mɑ kiisɑ ɑtɛtǝlɛ tɑɑ nɑ ń nɩɩ mɑ nɔɣɔ.
\q1
\v 3 N pɛtɑ-m lʋhǝyɑɣɑ tɑɑ kɛ́ teŋku hɛkʋ tɑɑ.
\q1 Lʋm kʋlɑɑ ɩsɩɩ koloosi nɑ pǝ́ tɑ-m,
\q1 lʋm koloosi tɛɛkɩ mɑ tɔɔ kɛ́ kʋlʋm kʋlʋm.
\q1
\v 4 Mɑɑ hʋʋwɑ sɩ n tɔɣɔnɑ-m kɛ́,
\q1 mɑ kɑɑ tɑsɑ nyɑ́ tǝsɛɛlɛ kɛ nɑʋ.
\q1
\v 5 Lʋm lipɑ-m nɑ pǝ́ tɑŋɩ-m tɔɣɔʋ.
\q1 Pǝ lipɑ-m nɑ sǝsǝncɑɑsɩ hɔkɔ mɑ nyʋɣʋ.
\q1
\v 6 Mɑ tiiwɑ hɑlǝnɑ mɑ́ tɑlɑ pɔɔŋ kilɑ.
\q1 Atɛtǝlɛ nɔnɔɔsɩ tǝkɑɣɑ mɑ tɔɔ kɛ́ tɑm tɔɔ.
\q1 Amɑ mɑ Ɩsɔ Tɑcɑɑ nyɑ́, n lǝsɑ-m nɑ weesuɣu.
\q1
\v 7 Wɑɑtʋ wei mɑ lǝsɑɣɑ cɑɑkɑɣɑ lɩɩʋ kɛ mɑ tɔnʋɣʋ tɑɑ tɔ.
\q1 Mɑ tisɑɣɑ feesuɣu ɩlɛnɑ mɑ́ tɔɔsɩ nyɑ́ tɔɔ.
\q1 Ɩlɛnɑ ń mʋ mɑ sǝlǝmʋɣʋ kɛ nyɑ́ tǝsɛɛlɛ tɑɑ.
\q1
\v 8 Mpɑ pɑ lɑɑkɩ tɩɩŋ tɔ pɑ lɑŋǝɣɩ nyʋɣʋ yɑpʋ kɛ́.
\q1
\v 9 Amɑ mɑɑ sɛɛ-ŋ kɛ́.
\q1 Mɑɑ lɑ-ŋ nyɑnɑ tǝmlɛ sɛɛtʋ kɔtɑsɩ,
\q1 Mɑɑ yoosi ɩsɩɩ mɑɑ sɩɩʋ nɔɣɔ tɔ.
\q1 Mpi tɔ, Tɑcɑɑ nyɑɣɑlɛ nyʋɣʋ yɑtʋ.
\p
\v 10 Ḿpʋ́ɣʋ́ Tɑcɑɑ tɔmɑ tinte sɩ tǝ́ polo tǝ́ tɔ Yonɑɑsɩ kɛ kʋteŋ tɔɔ.
\c 3
\s1 Yonɑɑsɩ kpɑɑlʋɣʋ kɛ Ninifi wɑkǝlʋɣʋ tɔm
\p
\v 1 Ḿpʋ́ɣʋ́ Tɑcɑɑ tɑsɑ Yonɑɑsɩ kɛ heeluɣu kɛ tɔm nɑɑlɛ nyǝm sɩ: 
\v 2 Kʋlɩ nɑ ń polo Ninifi ɩcɑtɛ sɔsɔɔlɛ ńtɛ́. Kpɑɑɑlɩ-tɛɣɛ tɔm nti mɑɑ heelɑ-ŋ tɔ.
\p
\v 3 Ḿpʋ́ɣʋ́ ɩ kʋlɑɑ nɑ ɩ́ polo Ninifi, ɩsɩɩ Tɑcɑɑ yɔɣɔtɑɑ tɔ. Ɩcɑtɛ ńtɛ́ tɩɩ wɑlɑ kɑtɑtǝlɑɣɑ kɛ́. Pɩɩ wɛɛ sɩ kʋyɛɛŋ tooso kɛ yʋlʋ ɩ́ tɔ nɑ pǝ́cɔ́ ɩ́ tɛsɩ-tɛ. 
\v 4 Amɑ Yonɑɑsɩ nɑ́ tɔmɑ tǝ tɑɑ kɛ́ kʋyɑkʋ kʋlʋmʋɣʋ. Ɩ tɔŋɑɣɑ tɔ nɑ ɩ́ kiisiɣi kɛ́ sɩ: Pǝ kɑɑsɑ kʋyɛɛŋ kɛ nɩɩlɛ, nɑ pɑ́ wɑkǝlɩ Ninifi ɩcɑtɛ. 
\v 5 Ḿpʋ́ɣʋ́ ɩcɑtɛ nyǝ́mɑ tǝnɑ, pǝ kpɑɣɑʋ sɔsɑɑ nɑ pǝ sǝkpemɑ tɔ. Pɑ lɑŋɑ wɑkǝlɑɑ, nɑ pɑ́ mʋ Ɩsɔ tɔm ntɩ nɑ pɑ́ hɔkɔ nɔɔsɩ. Ɩlɛnɑ pɑ́ tɑkɩ lǝyɑɣɑ wontu ɩsɩɩ fɔlǝtɔnɑɑ tɑkɑ sɩ pǝ́ hʋlɩ sɩ pɑ lɑɣɑsɑɑ. 
\v 6 Ḿpʋ́ɣʋ́ tɔm ntɩ tǝ tɑlɑ Ninifi wulɑʋ. Ɩlɛnɑ ɩ́ kʋlɩ ɩ kʋmte tɔɔ. Ḿpʋ́ɣʋ́ ɩ́ wɔɣɔsɑ kɑwulɑɣɑ kpɑɩ nɑ lɑŋwɑkǝllɛ nɑ ɩ́ tɑkɩ lǝyɑɣɑ wontu ɩsɩɩ fɔlǝtɔ tɑkɑ. Ɩlɛnɑ ɩ́ cɑɣɑ tɔlʋmɑ tɑɑ. 
\v 7 Ḿpʋ́ɣʋ́ ɩ́ nɑ ɩ wɑɑlɩ nyǝ́mɑ pɑ kpɑɑlɑɑ sɩ, yǝlɑɑ nɑ tɔlɑ pɑ́ tɑɑ tǝŋ lʋm yɑɑ tɔɣɔnɑɣɑ. 
\v 8 Pɑ lɑŋɑ ɩ́ wɑkǝlɩ nɑ pɑ́ tɑkɩ lǝyɑɣɑ wontu ɩsɩɩ fɔlǝtɔnɑɑ tɑkɑ nɑ pɑ́ wiinɑ Ɩsɔ nɑ ɩsǝlɛ kʋsɛɛmlɛ. Pɑ́ lɩɩ pɑ mpɑɑʋ ɩsɑɣɑʋ tɑɑ, pɑ́ yele pɑ ɩsɑɣɑtʋ kʋlɑpʋtʋ. 
\v 9 Ntɑnyɩ Ɩsɔ kɑ́ hɛɛsɩ ɩ pɑ́ɑ́nɑ́ sɔsɔɔnɑ, ɩlɛ pɑ kɑɑ sɩ́.
\p
\v 10 Ḿpʋ́ɣʋ́ Ɩsɔ nɑwɑ pɑ kʋlɑpʋtʋ ntɩ. Nɑ ɩsǝnɑ pɑ yelɑ pɑ ɩsɑɣɑtʋ tɔ. Ɩlɛnɑ ɩ́ yele ɩsǝnɑ ɩ kɑ hʋʋwɑ sɩ ɩ kɑ́ lɑ-wɛ tɔ.
\c 4
\s1 Yonɑɑsɩ mʋ pɑ́ɑ́nɑ́ sɩ Ɩsɔ hʋlɑ Ninifi nyǝ́mɑ kɛ suulu
\p
\v 1 Ḿpʋ́ɣʋ́ Yonɑɑsɩ lɑŋlɛ tɑ hɛɛnɑ ɩsǝnɑ Tɑcɑɑ hʋlɑ Ninifi nyǝ́mɑ kɛ suulu kɛ mpʋ tɔ. Ntɛnɑ ɩ́ mʋ pɑ́ɑ́nɑ́ kɛ sɔsɔm. 
\v 2 Hɑlǝnɑ ɩ́ yɔɣɔtɩ Tɑcɑɑ sɩ: Aŋhɑɑ, pǝ tɑɣɑ ntǝɣɩ mɑɑ hʋʋwɑ mɑ tɑɑ kɛ́ mɑɑ wɛʋ mɑ tɛ tɔ? Pǝ mɑɣɑmɑɣɑ pǝ tɔɔ kɛ́ mɑ seekɑɣɑ sɩ mɑ tɛɛ Tɑɑsisi. Mpi tɔ, mɑ nyǝmɑ́ sɩ n wɛnɑ yǝlɑɑ pǝtɔɔtǝlɛ. N hʋlǝɣɩ suulu, nɑ ń lɑkɩ kʋpɑntʋ kɛ sɔsɔm. Nyɑ́ sɔɔlʋ pɩɩwɑ sɩ ń tɑɑ lɛɛtɩ. 
\v 3 Pǝ tɔɔ tɔ, Tɑcɑɑ kpɑɣɑ-m. Sǝm kǝlɑ-m weesuɣu kɛ teu. 
\v 4 Ntɛnɑ Tɑcɑɑ pɔɔsɩ Yonɑɑsɩ sɩ nyɑ́ pɑ́ɑ́nɑ́ mʋɣʋ mɑɣɑɑ?
\p
\v 5 Ḿpʋ́ɣʋ́ Yonɑɑsɩ lɩɩ ɩcɑtɛ tɑɑ. Ɩlɛnɑ ɩ́ tuusinɑ ilim tǝlɩɩlɛ tɔɔ kɛ́ pǝcɔ. Ntɛnɑ ɩ́ siki cokǝle nɑ ɩ́ cɑɣɑ tǝ ɩsotom tɑɑ. Ɩlɛnɑ ɩ́ tɑŋɑɑ sɩ ɩ nɑɑkɩ ɩsǝnɑ ɩcɑtɛ kɑ́ tɛnɑ tɔ. 
\v 6 Ḿpʋ́ɣʋ́ Tɑcɑɑ lɑpɑ nɑ ɑloolɑɣɑ nɑkǝlɩ kɑ́ nyɔ. Kɑ pɩɩ tʋɣʋ ɩlɛnɑ kɑ́ lɑpɩ-ɩ ɩsotom, nɑ kɑ́ hɛɛsɩ ɩ pɑ́ɑ́nɑ́. Ɩlɛnɑ ɩ lɑŋlɛ hɛɛnɑ-kɛɣɛ sɔsɔm. 
\v 7 Amɑ tɛʋ femɑ, ɩlɛnɑ Tɑcɑɑ kɔnɑ sonsompǝle. Ḿpʋ́ɣʋ́ tǝ tɔɣɔ ɑloolɑɣɑ ŋkɛɣɛ tefemle nɑ kɑ́ wʋlɩ. 
\v 8 Ɩlɛnɑ Tɑcɑɑ kɔnɑ tɛʋ kite heelim kʋhɑŋǝm kɛ ilim kpɑʋ. Pǝ nyɑɣɑ Yonɑɑsɩ nyʋɣʋ ɩlɛnɑ ɩ tɔnʋɣʋ hoo nɑ ɩ́ cɛɛ fiɣinuɣu. Tǝnɑɣɑlɛ Yonɑɑsɩ koolɑɑ sɩ: Sǝm kǝlɑ-m weesuɣu kɛ teu. 
\v 9 Ḿpʋ́ɣʋ́ Tɑcɑɑ pɔɔsɑ Yonɑɑsɩ sɩ: Nyɑ́ pɑ́ɑ́nɑ́ mʋɣʋ mɑɣɑ ɑloolɑɣɑ ŋkɛ kɑ tɔm tɑɑ?
\p Ɩlɛnɑ Yonɑɑsɩ cɔ sɩ: Mɑ pɑ́ɑ́nɑ́ mʋɣʋ mɑɣɑɑ kɛ́ hɑlǝnɑ sǝm.
\p
\v 10 Ntɛnɑ Tɑcɑɑ sɩ: Nyɑ́ tɑ́ tɔɣɔ ɑloolɑɣɑ ŋkɛ kɑ wɑhɑlɑ nɔɣɔlʋ. Ahoo kɛ kɑ́ nyɔwɑ, nɑ kɑ́ sɩ́ ɑhoo lɛnnɑ. Pɑɑ nɑ mpʋ n wɛnɑ kɑ pǝtɔɔtǝlɛ. 
\v 11 Pǝ tɔɔ kɛ́ mɑɑ wɛɛnɑ Ninifi ɩcɑtɛ sɔsɔɔlɛ ńtɛ́ tǝ pǝtɔɔtǝlɛ. Tǝ tɑɑ yʋlʋnyɔɔŋ kǝlɑ iyisi nɩɩnʋwɑ nɑ hiu (120000). Pɑ tɑ nyɩ pɑ ntɔɣɔŋ nɑ pɑ mpǝtǝŋ pǝ fɑɣɑʋ. Pǝyele tǝ tɑɑ tɔlɑ wɛ pɑɣɑlɛ.