\id HOS - Lokpa Bible portions [dop] -Benin 1999 (web edition -2017)
\ide UTF-8
\h Osee
\toc1 ƖSƆ KƲYƆƔƆTƲTƲ TƐLƎSƲLƲ OSEE TƆM TAKƎLAƔA
\toc2 Osee
\toc3 Os
\mt2 ƖSƆ KƲYƆƔƆTƲTƲ TƐLƎSƲLƲ
\mt1 OSEE
\mt2 TƆM TAKƎLAƔA
\imt1 Kʋtʋlʋtʋ
\ip Ɩsɛɣɛlɩ tɛtʋ ilim ntɔɣɔŋ tɔɔ, timpi pɑ yɑɑ sɩ Sɑmɑlii tɔɣɔ Osee tɛlǝsɑɣɑ Ɩsɔ kʋyɔɣɔtʋtʋ kɛ yǝlɑɑ. Wɑɑtʋ ɩnɩ ɩ tɑɑ tɔ, tɛtʋ tɑ cɑɣɑ teitei. Yǝlɑɑ muɣuliɣi tǝmɑ, nɑ lɛlɑɑ nɑ́ɑ́ kʋlǝɣɩ tɛtʋ tɔkǝlɑɑ tɔɔ. Ɩsɔ sɛɛʋ mɑɣɑmɑɣɑ nɑ́ hɛɛwɑ nɑ Ɩsɛɣɛlɩ nyǝ́mɑ mǝlɩ lɑɑtʋ tɑɑ. Kʋpǝntǝŋ wei ɩ wɑhɑlɑ Osee tɔkɑɣɑ ɩ wɑɑtʋ tɑɑ tɔɣɔlɛ.
\iot Ɩsǝnɑ pɑ fɑɣɑ Osee tɑkǝlɑɣɑ tɔ:
\io1 Osee ɑkpɑɣɑlɛ nɑ ɩ tǝyɑɣɑ pǝ tɔm, titite \ior 1–3\ior*
\io1 Tɑcɑɑ kɑlǝɣǝnɑ Ɩsɛɣɛlɩ nyǝ́mɑ, titite \ior 4–13\ior*
\io1 Ɩsɔ sɔɔlʋɣʋ nɑ ɩ nɔɔsɩ sɩɩʋ, titite \ior 14\ior*
\c 1
\p
\v 1 Tɑkǝlɑɣɑ kɑnɛ kɑ tɑɑ kɛ́ pɑ kɛɛsɑ tɔm. Tɑcɑɑ kɑ heelinɑ-tǝɣɩ Peeli pǝyɑlʋ Osee. Sowɑsɩ pǝyɑlʋ Solopʋwɑm wei ɩ kɑ kɛ Ɩsɛɣɛlɩ wulɑʋ tɔ ɩ pɔɔlɛ tɑɑ kɛ́ Tɑcɑɑ kɛɛsɑ Osee kɛ tɔm ntɩ. Wɑɑtʋ kʋlʋm ɩnɩ ɩ tɑɑ tɔtɔɣɔ, Osiyɑsɩ nɑ Yotɑm nɑ Ahɑsɩ nɑ Ɩsekiyɑsɩ, pɛlɛ pɑ tɔkɑɣɑ kɑwulɑɣɑ kɛ Yutɑ tɑɑ, nɑ pɑ́ kɑɑsǝɣɩ tǝmɑ.
\s1 Ɩsɔ kʋyɔɣɔtʋtʋ tɛlǝsʋlʋ Osee ɑlʋ nɑ ɩ piyɑ pɑ tɔm
\p
\v 2 Tɔm kɑncɑɑlɑɣɑ nyǝntʋ nti Tɑcɑɑ heelɑ Osee tɔɣɔlɛ sɩ:
\q1 Polo nɑ ń kpɑɣɑ ɑpɑlɑɑ tǝnɑ ɑlʋ nɔɣɔlʋ.
\q1 Ɩ piyɑ ɩ́ tǝŋ sɩ too ɩkpɑtɛ.
\q1 Mpi tɔ, Ɩsɛɣɛlɩ nyǝ́mɑ tǝnɑ kisɑ Tɑcɑɑ mɑɣɑ,
\q1 nɑ pɑ́ hɑ pɑ tǝɣɩ tɩɩŋ lɑɑʋ tɑɑ.
\p
\v 3 Ḿpʋ́ɣʋ́ Osee polɑɑ nɑ ɩ́ kpɑɣɑ Tipilɑyim pɛɛlɔ Komɛɛ. Ɩlɛnɑ ɑlʋ ɩnɩ ɩ lʋlɩ-ɩ ɑpɑlʋpǝyɑɣɑ. 
\v 4 Ḿpʋ́ɣʋ́ Tɑcɑɑ tɔmɑ Osee sɩ:
\q1 Hɑ-kɛ sɩ, Sisilee.
\q1 Mpi tɔ, pǝ kɑɑsɑ pǝcɔ mɑɑ lɛɛtɩ Yehu lʋlʋɣʋ nyǝ́mɑ
\q1 kɛ yʋlʋkʋlɛ nte pɑ lɑpɑ Sisilee tɔ tǝ tɔɔ.
\q1 Ɩlɛnɑ mɑ́ sɩɩ Ɩsɛɣɛlɩ kɑwulɑɣɑ tǝnɑɣɑ.
\q1
\v 5 Mɑɑ wɑkǝlɩ pɑ yoolɑɑ toŋ kɛ
\q1 Sisilee tɛtɛkǝlɛ tɑɑ kɛ́ kʋyɑkʋ ŋkʋ.
\p
\v 6 Komɛɛ tɑsɑ hɔɣɔ hɑɣɑʋ, ɩlɛnɑ ɩ́ lʋlɩ ɑpɑlʋpǝyɑɣɑ, nɑ Tɑcɑɑ heeli Osee sɩ:
\q1 Hɑ-kɛ sɩ, Pǝtɔɔtǝlɛ fɛɩ.
\q1 Pǝ hʋwɛɛ ntɛ sɩ Tɑcɑɑ mɑ́ mɑ kɑɑ nyǝnɩ
\q1 pɑ pǝtɔɔtǝlɛ nɑ mɑ́ hʋlɩ-wɛɣɛ suulu.
\p
\v 7 Amɑ mɑ kɑɑ lɑ ḿpʋ́ɣʋ́ Yutɑ nyǝ́mɑ. Hɑlɩ pɑ Ɩsɔ Tɑcɑɑ mɑ́, mɑɑ wɑɑsɩ-wɛɣɛ. Mɑ pɑɑ fɛɩnɑ yoou yɑɑ tɔɔʋ, yɑɑ lɑɣɑtɛ, yɑɑ yoou kpɑɣɑnǝŋ, yɑɑ ɩ cɑɣɑlɑɑ.
\p
\v 8 Komɛɛ tisɑ Pǝtɔɔtǝlɛ fɛɩ, ɩlɛnɑ ɩ́ kpɑɣɑ hɔɣɔ nɑ ɩ́ lʋlɩ ɑpɑlʋpǝyɑɣɑ. 
\v 9 Ɩlɛnɑ Tɑcɑɑ heeli Osee sɩ:
\q1 Hɑ-kɛ sɩ, Pɑ tɑ kɛ mɑ nyǝ́mɑ.
\q1 Mpi tɔ, Ɩsɛɣɛlɩ nyǝ́mɑ tɑ kɛ mɑ yǝlɑɑ,
\q1 nɑ mɑ́ tɑ́ kɛ́ pɑ Ɩsɔ.
\s1 Sisilee cele kʋyɑkʋ sɔsɔɔŋkʋ
\q1
\v 10 Amɑ kʋyɑkʋ nɑkʋlɩ Ɩsɛɣɛlɩ
\q1 nyǝ́mɑ kɑ́ lɑ pɑɣɑʋ kɛ sɔsɔm.
\q1 Pɑɑ wɛɛ ɩsɩɩ lʋm nɔɣɔ kɑnyǝŋɑ.
\q1 Hɑlɩ pɑ kɑɑ pǝsɩ pɑ kɑlʋɣʋ.
\q1 Wɑɑtʋ ɩnɩ Ɩsɔ weesuɣu tʋ
\q1 mɑ́ mɑ kɑɑ tɑsɑ yɔɣɔtʋɣʋ sɩ,
\q1 pɑ tɑ kɛ mɑ yǝlɑɑ.
\q1 Mɑɑ yɑɑ-wɛɣɛ mɑ pǝyɑlɑɑ kɛ́.
\q1
\v 11 Ɩlɛnɑ Yutɑ nɑ Ɩsɛɣɛlɩ pɑ́ kpɛntɩ nɑ pɑ́ kpɑ wulɑʋ kʋlʋm,
\q1 nɑ pɑ́ pǝsɩ tɛtʋ nyǝ́mɑ.
\q1 Sisilee cele kʋyɑkʋ sɔsɔɔŋkʋ ntɛ́.
\c 2
\q1
\v 1 Tɑcɑɑ sɩ ɩ́ hɑ mǝ tɛɛtʋnɑɑ ɑpɑlʋnyǝmɑ sɩ:
\q1 Pɑ kɛ mɑ nyǝ́mɑ, nɑ ɑlʋnyǝ́mɑ sɩ: Pǝtɔɔtǝlɛ wɛɛ.
\s1 Ɩsɛɣɛlɩ wɛ kɛ ɩsɩɩ ɑlʋ tɛtɛlɑtʋ
\p
\v 2 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Ɩ́ kɑlǝnɑ mǝ too Ɩsɛɣɛlɩ,
\q1 ɩ́ tɑɑ yele-ɩ.
\q1 Mpi tɔ, ɩ tɑ kɛ mɑ ɑlʋ tɔtɔ,
\q1 pǝ́cɔ́ mɑ tɑ kɛ ɩ pɑɑlʋ.
\q1 Ɩ́ hɩɩsɩ tɛtɛlɑtǝtʋ cɑcɑɑsɩ kɛ ɩ ɩsɛntɑɑ,
\q1 nɑ ɩ́ lǝsɩ wɑsɑŋkɑlǝtʋ kɛ ɩ tɑɑ.
\q1
\v 3 Ye pǝ tɑɣɑ mpʋ,
\q1 mɑɑ yele-ɩ kpɛtɛ tǝyǝlǝyǝlɩ,
\q1 ɩsɩɩ kʋyɑŋku pɑ lʋlɑ-ɩ tɔ.
\q1 Mɑɑ yele nɑ ɩ tɛtʋ pǝsɩ wʋlɑɣɑ
\q1 nyǝntʋ nɑ tǝ wʋlɩ nɑ ɩ́ sǝnɑ lʋkɔtʋ.
\q1
\v 4 Mɑ fɛɩnɑ ɩ piyɑ pǝtɔɔtǝlɛ.
\q1 Mpi tɔ, sɩ tǝŋɑ ɩ ɩkpɑtɛ kɛ́.
\q1
\v 5 Pǝyele sɩ too kʋɣɩ ɩ tɩ nyʋɣʋ kɛ́ nɑ tɛtɛlɑtǝtʋ.
\q1 Hɑlɩ ɩ kpɑɑlǝɣɩ tɑm sɩ,
\q1 ɩnɩ ɩ kɑ tǝŋ ɩ tɑŋnɑɑ mpɑ pɑ hɑɑkɩ-ɩ
\q1 tɔɣɔnɑɣɑ nɑ lʋm tɔ.
\q1 Pɑɑ nɑ ɩ kʋtɑkǝm nɑ ɩ kʋtɔɣɔlǝm nɑ nim nɑ sʋlʋm.
\q1
\v 6 Amɑ Tɑcɑɑ mɑ́,
\q1 mɑɑ tǝkɩ-ɩ mpɑɑʋ nɑ sɔwɑ kɑlɑɑ.
\q1 Mɑɑ ŋmɑ koluŋɑ nɑ mɑ́ cɔɔnɑ-ɩ nɑ ɩ́ tɑɑ tɑsɑ lɩɩʋ.
\q1
\v 7 Ɩ kɑ́ mɑɣɑsɩ ɩsɩɩ ɩ́ pɛɛkɩ ɩ tɑŋnɑɑ
\q1 nɑ ɩ tǝŋ pɑ wɑɑlɩ, kpɛtɛ.
\q1 Wɑɑtʋ ɩnǝɣǝlɛ ɩ kɑ́ tɔ sɩ:
\q1 Pǝ wɛɛ sɩ mɑ́ mǝlɩ mɑ pɑɑlʋ kɑncɑɑlɑɣɑ nyǝŋ.
\q1 Mpi tɔ, mɑ nɩɩkɑɣɑ tǝnɑɣɑ leleŋ nɑ pǝ kǝlɩ nɔɔnɔɔ.
\q1
\v 8 N tɑɑ cɛkǝnɑ sɩ,
\q1 Ɩsɔ mɑ́, mɑ cɛlɑɣɑnɑ-ŋ kʋtɔɣɔʋ,
\q1 nɑ sʋlʋm, nɑ nim, nɑ mɑ́ sʋsɩ-ŋ toŋ,
\q1 nɑ mɑ́ hɑ-ŋ liɣitee nɑ wʋlɑ.
\q1 Ɩlɛnɑ ń kpɑɣɑ nɑ ń lɑkǝnɑ tʋɣʋ Pɑɑlɩ kɛ tǝmlɛ.
\q1
\v 9 Pǝ tɔɔ kɛ́ mɑɑ lɛɛkɩ mɑ tɔɣɔnɑɣɑ,
\q1 nɑ mɑ sʋlʋm kɛ kʋmtʋ wɑɑtʋ.
\q1 Ɩlɛnɑ mɑ lɛɛkɩ kponkpontu toŋ nyǝntʋ nɑ heeŋ hʋntʋ,
\q1 nɑ ń lɑŋ nyɑ́ kʋtɑkǝm nɑ nyɑ́ kʋtɔɣɔlǝm nɑ ń lɩɩ kpɛtɛ.
\q1
\v 10 Nyɑ́ tɑŋnɑɑ ɩsɛntɑɑ kɛ́ mɑɑ wɔɣɔsɩ nyɑ́ wontu,
\q1 pɑ tɑɑ nɔɣɔlʋ kɑɑ kpesi.
\q1
\v 11 Mɑɑ yele nɑ nyɑ́ lɑŋhʋlʋmlɛ,
\q1 nɑ nyɑ́ ɩsɔtʋ kʋfɑlʋ ɑcimɑnɑɑ,
\q1 nɑ nyɑ́ kʋyɛɛŋ kʋhɛɛsǝŋ,
\q1 nɑ nyɑ́ kɔtɑsɩ lɛnsǝnɑɑ pǝ́ sɩɩ tǝnɑɣɑ.
\q1
\v 12 Ɩlɛnɑ nyɩɩtʋ lɛɛkɩ nyɑ́ tɩɩŋ tɑwɑ
\q1 nnɑ n tɔŋɑɣɑ sɩ nyɑ́ tɑŋnɑɑ kʋfɛlʋɣʋ tɔ,
\q1 nɑ tɑɑlɛ wontu nɑ́ɑ́ tɔɣɔ.
\q1
\v 13 Mɑɑ hɔ nyɑ́ ŋkpɑŋʋɣʋ kɛ timpi n sɔɔ mɑ tɔɔ tɔ pǝ tɔɔ.
\q1 Pǝyele n lɑɑkɩ Pɑɑlǝnɑɑ,
\q1 nɑ ń lɑkɩ kɑcɔkɑ nɑ ń tǝŋǝɣɩ nyɑ́ tɑŋnɑɑ.
\q1
\v 14 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Mɑɑ tɑɣɑnɩ mɑ ɑlʋ kɛ mʋɣʋ
\q1 nɑ mɑ́ ponɑ-ɩ wʋlɑɣɑ tɛtʋ tɑɑ,
\q1 nɑ mɑ́ nɑ-ɩ tǝ́ lɑ ɑcɑcɑɑlɛ fɑɑci.
\q1
\v 15 Ɩlɛnɑ ɩ́ tǝŋɩ-m nɑ luɣu kʋlʋmʋɣʋ ɩsɩɩ ɩ pɛɛlǝtʋ wɑɑtʋ.
\q1 Yɑɑ ɩsɩɩ ɩ Icipiti lɩɩʋ sɑɑ.
\q1 Wɑɑtʋ ɩnǝɣɩ mɑɑ cɛlɛ-ɩ ɩ lɛsɛŋ tɩɩŋ.
\q1 Ɩlɛnɑ lɑŋpǝsǝlɛ tɛtɛkǝlɛ pǝsɩ ɩsɩɩ tɛɛlʋɣʋ nɔnɔɣɔ.
\s1 Ciikuɣu kʋyɑkʋ
\p
\v 16 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Kʋyɑŋkuɣu Ɩsɛɣɛlɩ n kɑ yɑɑ-m nyɑ́ pɑɑlʋ,
\q1 n kɑɑ tɑsɑ-m yɑɑʋ kɛ nyɑ́ Sɔsɔ Pɑɑlɩ.
\q1
\v 17 Mɑɑ lǝsɩ nyɑ́ nɔɣɔ tɑɑ kɛ́ Pɑɑlɩ nɑ tɩɩŋ lɛlǝŋ hǝlɑ,
\q1 n kɑɑ tɑsɑ-yɛɣɛ yɑɑʋ.
\q1
\v 18 Ɩlɛnɑ mɑ́ nɑ tɑɑlɛ wontu, nɑ sumɑsɩ,
\q1 nɑ ɑtɛ nyɑmɑnyɑmɑnɑɑ tǝ́ pɛɛlɩ nɔɣɔ sɩ wontu ntɩ
\q1 tǝ tɑɑ lɑ mɑ yǝlɑɑ kɛ pʋlʋ.
\q1 Ɩlɛnɑ mɑ kpiisi tɛtʋ tɔɔ kɛ́ yoou wontu tǝnɑ,
\q1 nɑ pǝ́ yele nɑ mɑ yǝlɑɑ hɛɛsɩ tǝpɑmm.
\q1
\v 19 Ɩsɛɣɛlɩ mɑ nɑ-ŋ tɑ ɑkpɑɣɑlɛ kɑ wɛɛ tɑm kɛ ḿpʋ́ɣʋ́.
\q1 Mɑɑ sɔɔlɩ-ŋ nɑ mɑ́ tǝŋǝɣɩ tɑmpɑnɑ,
\q1 nɑ mɑ́ pɑɑsǝɣǝnɑ-ŋ teu.
\q1
\v 20 Mɑ kɑɑ lɑɣɑsɩ.
\q1 Ɩlɛnɑ pǝ́cɔ́ ń nyɩ sɩ mɑ kɛ́ Tɑcɑɑ.
\q1
\v 21 Kʋyɑŋkuɣu mɑɑ mʋ mǝ kʋsǝlǝmʋtʋ,
\q1 nɑ ɩsɔtɔnʋɣʋ kʋsǝlǝmʋtʋ.
\q1 Ɩlɛnɑ ɩsɔtɔnʋɣʋ nɑ́ɑ́ mʋ tɛtʋ kʋsǝlǝmʋtʋ,
\q1
\v 22 nɑ tɛtʋ nɑ́ɑ́ mʋ tɔɣɔnɑɣɑ nɑ tɩɩŋ pǝ kʋsǝlǝmʋtʋ.
\q1 Kʋhɑlǝm mpɩ pǝlɛ pɩɩ mʋ Sisilee kʋsǝlǝmʋtʋ.
\q1 Ɩsɔ tuuki kɛ pɑ yɑɑ Sisilee nɑ pɑ tɛ tɑɑ.
\q1
\v 23 Mɑɑ mǝŋnɑ Pǝtɔɔtǝlɛ fɛɩ nyɑɣɑ tɛtʋ tɑɑ,
\q1 nɑ mɑ́ wɛɛnɑ nyɑ́ pǝtɔɔtǝlɛ.
\q1 Mɑɑ heeli Pɑ tɑ kɛ mɑ nyǝ́mɑ nyɑ́ sɩ n kɛ́ mɑ nyǝŋ,
\q1 nɑ ń yɑɑ-m sɩ nyɑ́ Ɩsɔ.
\c 3
\s1 Mɑɣɑsʋɣʋ
\p
\v 1 Ḿpʋ́ɣʋ́ Tɑcɑɑ heelɑ-m sɩ: Tɑsɑ nyɑ́ ɑlʋ kɛ kpɑɣɑʋ. Pɑɑ ɩ mǝlɑ ɑpɑlɑɑ tǝnɑ ɑlʋtʋ tɑɑ tɔ. Mɑ sɔɔlɑ ḿpʋ́ɣʋ́ Ɩsɛɣɛlɩ nyǝ́mɑ kɛ́ nɑ pɑ́ tǝŋǝɣɩ tɩɩŋ nɑ pɑ́ sɔɔlɑ pǝ lɛsɛŋ kɑkɑlɑsɩ. 
\v 2 Mɑ mʋwɑ mɑ ɑlʋ nɑ liɣitee nyǝɣǝtʋ nɑɑnʋwɑ nɑ kɑkpɑsɩ, nɑ tɔɣɔnɑɣɑ pee sɑɑkǝnɑɑ nɑɑtoso. 
\v 3 Mɑ heelɑ-ŋ sɩ: Cɑɣɑ nɑ pǝ tɑɑŋɩ, tɑŋɩ-m nɑ ń yele wɑsɑŋkɑlǝtʋ. Mɑ mɑɣɑmɑɣɑ mɑɑ tɑŋɩ-ŋ mpʋ tɔtɔ.
\p
\v 4 Mpʋ ɩnǝɣɩ Ɩsɛɣɛlɩ nyǝ́mɑ mɛ ɩ́ kɑ́ cɑɣɑ, ɩ́ kɑɑ wɛɛnɑ wulɑʋ nɑ pɑɑsǝnlʋ. Yɑɑ kɔtɑsɩ nɑ kɔtǝlɑɑ toko wei pɑ pɔɔsǝɣǝnɑ Tɑcɑɑ kɛ tɔm tɔ, yɑɑ tǝlɑɑlɛ. 
\v 5 Ɩ́ kɑ́ tɛ nɑ ɩ́ mǝlɩ mǝ tɛtʋ tɑɑ, nɑ ɩ́ mǝlǝnɑ mǝ Ɩsɔ nɑ mǝ wulɑʋ Tɑfiiti lʋlʋɣʋ tʋ tɔɔ. Ɩ́ kɑ́ nyɑnɑ Tɑcɑɑ mɑ́ nɑ mɑ́ɑ́ kooli-mɛɣɛ kʋpɑntʋ.
\c 4
\s1 Ɩsɔ hʋʋnɑʋ kɛ ɩ yǝlɑɑ
\q1
\v 1 Ɩsɛɣɛlɩ nyǝ́mɑ mɛ,
\q1 ɩ́ nɩɩ Tɑcɑɑ tɔm,
\q1 ɩ hʋʋkǝnɑ-mɛ sɩ,
\q1 yʋlʋ kʋpɑŋ yɑɑ kʋpɑntʋ lɑtʋ nɔɣɔlʋ ɩ fɛɩ.
\q1 Nɔɣɔlʋ ɩɩ tɑsǝɣɩ ɩnǝɣɩ nyǝnʋɣʋ kɛ Ɩsɔ.
\q1
\v 2 Yǝlɑɑ tǝŋsǝɣɩ tǝmɑɣɑ mpusinɑɑ kɛ́,
\q1 nɑ pɑ́ muɣuliɣi tǝmɑ.
\q1 Pɑ kʋɣɩ tǝmɑ,
\q1 nɑ pɑ́ ŋmɩɩlǝɣɩ,
\q1 nɑ pɑ́ lɑkɩ wɑsɑŋkɑlǝtʋ,
\q1 nɑ yʋlʋkʋlɛ kɛ kʋtɑmsɑ.
\q1
\v 3 Pǝ tɔɔ kɛ́ wʋlɑɣɑ kɑ́ lɑ tɛtʋ tɑɑ nɑ yǝlɑɑ
\q1 tǝnɑ nɑ wɑhɑlɑ nɑ pǝ́ kpɛnnɑ tɑɑlɛ wontu nɑ sumɑsɩ.
\q1 Hɑlɩ teŋku tɑɑ tiinɑ mɑɣɑmɑɣɑ kɑ́ sɑɑlɩ yem.
\s1 Ɩsɔ kɑlǝnɑʋ kɛ kɔtǝlɑɑ
\p
\v 4 Ḿpʋ́ɣʋ́ Tɑcɑɑ tɔmɑ sɩ:
\q1 Pǝ tɑɣɑ yǝlɑɑ tǝnɑɣɑ yem kɛ́
\q1 mɑɑ pɔɔsɩ yɑɑ mɑɑ kɑlǝnɑ.
\q1 Amɑ kɔtǝlɑɑ kɛ mɑ hʋʋkǝnɑ.
\q1
\v 5 Ilim nɑ pǝ ɩsǝlɛ kɛ pɩɩ tuuli kɔtǝlɑɑ mɛ.
\q1 Ɩlɛnɑ pǝ tuuli mǝ nɑ mǝ tɑɑpɑlɑɑ Ɩsɔ
\q1 kʋyɔɣɔtʋtʋ tɛlǝsǝlɑɑ kɛ ɑhoo,
\q1 nɑ mɑ́ kʋ mǝ piitim tǝnɑ.
\q1 Mpɩ pǝ wɛnnɑ ɩsɩɩ toto.
\q1
\v 6 Mɑ yǝlɑɑ tɑ nyɩ-m,
\q1 ɩlɛnɑ pɑ́ sǝkɩ.
\q1 Pɑɑ nɑ mpʋ kɔtǝlɑɑ mǝ tɑ́ sɔɔlɩ sɩ ɩ́ nyɩ-m.
\q1 Hɑlǝnɑ ɩ́ sɔɔ mɑ kʋsǝsɩɩtʋ.
\q1 Pǝ tɔɔ kɛ́ ɩ́ kɑɑ tɑsɑ mɑ kɔtǝlɑɑ kɛ lɑpʋ,
\q1 mɑɑ sɔɔ mǝ piyɑ tɔɔ.
\b
\q1
\v 7 Ɩsǝnɑ kɔtǝlɑɑ mɛ ɩ́ hukɑɑ tɔ mpʋ ɩnǝɣɩ ɩ́ wɑkǝlǝnɑ-m.
\q1 Ɩlɛ mɑɑ kɔɔlɩ mǝ teeli nɑ mɑ́ tɑɑ-mɛɣɛ fɛɛlɛ.
\q1
\v 8 Mɑ yǝlɑɑ ɩsɑɣɑtʋ kʋhɑɑŋ kɛ ɩ́ sʋʋkǝnɑ cǝncǝmǝŋ.
\q1 Mpi ɩ́ nyɩɩlǝɣɩ tɔɣɔlɛ sɩ pɛlɛ pɑ́ lɑkɩ ɩsɑɣɑtʋ.
\q1
\v 9 Mpi pǝ mɑɣɑnɑ mɑ yǝlɑɑ tɔ pɩɩ mɑɣɑnɑ-mɛ tɔtɔ.
\q1 Mɑɑ hɔ mǝ ŋkpɑŋʋɣʋ kɛ mǝ tɔntɛ ɩsɑɣɑlɛ tɔɔ.
\q1 Mɑɑ fɛlɩ-mɛɣɛ ɩsɑɣɑtʋ nti ɩ́ lɑpɑ tɔ.
\q1
\v 10 Ɩ́ kɑ́ li, ɑmɑ ɩ́ kɑɑ hɑɣɑ.
\q1 Ɩ́ kɑ́ hɑ mǝ tǝɣɩ wɑsɑŋkɑlǝtʋ tɑɑ.
\q1 Amɑ ɩ́ kɑɑ nɑ piyɑ.
\q1 Mpi tɔ, ɩ́ lɔ Tɑcɑɑ mɑɣɑ nɑ
\q1 mɑ kiiŋ nɑ ɩ́ pɑɑsǝnɑ tɩɩŋ.
\b
\q1
\v 11 Wɑsɑŋkɑlǝtʋ nɑ sʋlʋm kʋfɑm
\q1 pǝsɑ mɑ yǝlɑɑ nyɔɔŋ kɛ́.
\q1
\v 12 Tʋɣʋ kʋsɑɑkʋɣʋ kɛ mɑ yǝlɑɑ mɛ ɩ́ sǝlǝmǝɣɩ.
\q1 Tɑɑkukulɑɣɑ heeliɣinɑ-mɛɣɛ kʋŋmɛsǝtʋ.
\q1 Lɑɑtʋ heelim mɑpɑ-mɛ nɑ pǝ́ yɑsɩ-mɛ,
\q1 nɑ ɩ́ fɑɣɑnɑ mǝ Ɩsɔ mɑ́.
\q1
\v 13 Ɩ́ lɑɑkɩ pulɑsɩ nyɔɔŋ tɑɑ,
\q1 nɑ ɩ́ wɔkɩ tulɑɑlʋnɑɑ kɛ hɔtʋ tɛɛ ɩsotom kʋpɑm tɑɑ.
\q1 Pǝ tɔɔ kɛ́ mǝ pɛɛlɑɑ kɑ́ lɑ ɑpɑlɑɑ tǝnɑ ɑlɑɑ,
\q1 nɑ mǝ poolɑɑ nɑ́ɑ́ lɑ wɑsɑŋkɑlǝtʋ.
\q1
\v 14 Ɩlɛ pǝ tɑɣɑ pɛlɛ pɑ ŋkpɑŋʋɣʋ kɛ mɑɑ hɔ.
\q1 Amɑ cɛcɛnɑɑ mɛ mǝ mɑɣɑmɑɣɑ mǝ nyǝŋkʋ kɛ mɑɑ hɔ.
\q1 Mpi tɔ, ɩ́ ponɑ wɑsɑŋkɑlǝnɑɑ kɛ kpeeŋɑ
\q1 nɑ ɩ́ tɔɣɔ kɔtɑɣɑ tɔɣɔnɑɣɑ.
\q1 Pɑ tukɑ ɩtuule sɩ:
\q1 Yǝlɑɑ mpɑ pɑɑ cɛkǝɣǝnɑ tɔ pɑ lepɑɣɑ.
\b
\q1
\v 15 Ye Ɩsɛɣɛlɩ nyǝ́mɑ lɑɑkɩ tɩɩŋ,
\q1 ɩlɛ Yutɑ nyǝ́mɑ nɑ́ɑ́ tɑɑ kɛɛnɑ-wɛ.
\q1 Ɩ́ tɑɑ polo Kilikɑɑ, yɑɑ Petɛɛlɩ.
\q1 Tǝnɑɣɑ yǝlɑɑ pǝsǝnɑ tǝlɑɑlɛnɑɑ,
\q1 nɑ pɑ́ tuukinɑ Tɑcɑɑ.
\p
\v 16 Ɩsɛɣɛlɩ nyǝ́mɑ kǝlɑ nyɑlɑm nyɑlɑm, ɩsɩɩ nɑʋ ɑlʋnyǝŋ wei ɩ kisɑ ɑkuɣu kpɑ́tʋ́ɣʋ́ tɔ. Ɩlɛ pepe tɔɔ kɛ́ Tɑcɑɑ kɑ́ pɑɑsǝnɑ-mɛ ɩsɩɩ ɩwɛɛsɩ nsi pɑ pukinɑ tǝtiikile kʋpɑntɛ tɑɑ tɔ? 
\v 17 Ɩfǝlɑyim nyǝ́mɑ tǝŋǝɣɩ tɩɩŋ kɛ́, yele-wɛ. 
\v 18 Pɑ tɑ tɩɩ yelitɑ sʋlʋm nyɔɔʋ, ɩlɛnɑ pɑ́ sʋʋ wɑsɑŋkɑlǝtʋ tɑɑ kɛ́ yɑʋ. Pɑ nyʋɣʋ nyǝ́mɑ luɣu sʋʋwɑ fɛɛlɛ fɛɩ kɛ́. 
\v 19 Kɑcuculɑɣɑ kɑ́ pɑɑlǝnɑ-wɛ, nɑ pɑ kɔtɑsɩ tɔm lɑ-wɛɣɛ fɛɛlɛ.
\c 5
\s1 Ɩsɛɣɛlɩ pɑɑsǝnlɑɑ ɑsɑɣɑɑ tɔm
\p
\v 1 Ḿpʋ́ɣʋ́ Tɑcɑɑ tɔmɑ sɩ:
\q1 Kɔtǝlɑɑ nɑ Ɩsɛɣɛlɩ pɑɑsǝnlɑɑ
\q1 nɑ wulɑʋ tǝyɑɣɑ nyǝ́mɑ mɛ, ɩ́ nɩɩ teu.
\q1 Pɩɩ wɛɛ kɛ́ sɩ ɩ́ feŋ nɑ pǝ́ tɔ teu.
\q1 Pɑɑ nɑ mpʋ, ɩlɛnɑ mɩɩ pǝsɩ mɑ yǝlɑɑ ɩsɩɩ kɑtɔkɑ,
\q1 yɑɑ puluɣu kɛ Misipɑ,
\q1 kɛ Tɑpɔɔ pʋɣʋ tɔɔ,
\q1
\v 2 nɑ ɩsɩɩ pʋ́ʋ́ɣʋ́ ɑnɑɑm kɛ Sitim.
\q1 Amɑ mɑɑ sɛɣɛsɩ mǝ tǝnɑ nɑ ɩ́ nɑ́ nɑ ɩ́ tisi.
\b
\q1
\v 3 Mɑ nyǝmɑ́ Ɩsɛɣɛlɩ tɔm kɛ́,
\q1 tǝ fɛɩ-m sǝkpɛtʋɣʋ.
\q1 Mǝ tusinɑ Ɩfǝlɑyim nyǝ́mɑ kɛ lɑɑtʋ nɑ pǝ wɑsɑŋkɑlǝtʋ tɑɑ.
\q1 Ɩlɛnɑ pǝ́ tɛɛ mǝ tǝnɑ.
\b
\q1
\v 4 Ɩsɛɣɛlɩ nyǝ́mɑ mǝ kʋlɑpǝlɛ tɑ hɑ-mɛɣɛ mpɑɑʋ sɩ
\q1 ɩ́ mǝlɩ mǝ Ɩsɔ mɑ́ mɑ kiŋ.
\q1 Lɑɑtʋ lǝmɑɣɑsǝlɛ wɛnnɑ mǝ tɑɑ nɑ ɩ́ yǝɣɩ-m.
\q1
\v 5 Mpi Ɩsɛɣɛlɩ nyǝ́mɑ mɛ ɩ́ hʋlǝsǝnɑ lɑŋlɛ tɔ
\q1 mpɩ pǝ hʋlǝɣǝnɑ mǝ wɛɛtʋ.
\q1 Mǝ ɩsɑɣɑtʋ copinɑ-mɛ nɑ pǝ́ kpɛnnɑ Yutɑ nyǝ́mɑ.
\q1
\v 6 Ɩ́ ponɑ mǝ tɔlɑ sɩ ɩ́ lɑkɩ kɔtɑɣɑ,
\q1 ɩlɛnɑ ɩ́ kɔɔ-m yɔɣɔtǝnɑʋ.
\q1 Amɑ ɩ́ tɑ mɑɣɑnɑ-m.
\q1 Mpi tɔ, mɑ yelɑ-mɛ.
\q1
\v 7 Ɩ́ yelɑ-m nɑ ɩ́ lʋlɩ kpɑɩ piyɑ.
\q1 Mǝ ɩcɑtɛ kɑ pǝsɩ ncɑɑlɛ pǝ kɑɑ tɑlɑ ɩsɔtʋ.
\s1 Yutɑ nɑ Ɩsɛɣɛlɩ nyǝ́mɑ pɑ yoou
\p
\v 8 Ḿpʋ́ɣʋ́ Tɑcɑɑ tɑsɑɑ sɩ:
\q1 Ɩ́ hʋlɩ ɑpɑlʋtutuɣu kɛ Kipeyɑ,
\q1 nɑ ɑkɑntǝlɛ kɛ Lɑmɑ.
\q1 Ɩ́ yɑɣɑ ɑpɑlʋkɑkiisɑsɩ kɛ Petɛɛlɩ.
\q1 Pɛncɑmɛɛ, lɑ lɑɑkɑlɩ kɛ nyɑ́ wɑɑlɩ.
\q1
\v 9 Ɩsɛɣɛlɩ nyǝ́mɑ kɑ́ wɑkǝlɩ yem kɛ ŋkpɑŋʋɣʋ hɔm wule.
\q1 Nti mɑ kpɑɑlǝɣɩ-mɛɣɛ ɩsǝntɔ tɔ,
\q1 tǝ wɛ tɑmpɑnɑ kɛ́.
\q1
\v 10 Yutɑ nyʋɣʋ nyǝ́mɑ nɑ́ lɑɣɑsǝɣɩ tɛtʋ toosi kɛ́.
\q1 Amɑ mɑ pɑ́ɑ́nɑ́ kɑ́ huu mǝ tɔɔ ɩsɩɩ pɔɣɔ lʋm.
\q1
\v 11 Ɩ́ muɣulɑ Ɩsɛɣɛlɩ nyǝ́mɑ,
\q1 ɩ́ tɑ hɑ-wɛɣɛ pɑ tɑmpɑnɑ.
\q1 Mpi tɔ, ɩ́ cɑɑkɑɣɑ sɩ ɩ́ tǝŋ mǝ kʋsǝsɩɩtʋ.
\q1
\v 12 Mɑɑ kpɑ-mɛɣɛ ɩsɩɩ cɑlǝmʋlɑ,
\q1 nɑ Yutɑ nyǝ́mɑ ɩsɩɩ sǝmolɑ.
\q1
\v 13 Mǝ nɑɑlɛ ɩ́ cɛkǝnɑɑ sɩ ɩ́ fɛɩnɑ ɑlɑɑfǝyɑ.
\q1 Ntɛnɑ Ɩsɛɣɛlɩ nyǝ́mɑ tili Asilii wulɑʋ
\q1 sɔsɔ kiŋ nɑ pɑ́ yɔɣɔtǝnɑ-ɩ.
\q1 Amɑ ɩ́lɛ́ ɩ kɑɑ pǝsɩ mǝ sǝnɑʋ.
\q1 Hɑlɩ ḿpʋ́ɣʋ́ ɩ kɑ́ wɑɑ-mɛ.
\q1
\v 14 Pǝ tɑɣɑ pʋlʋ, Tɑcɑɑ mɑ,
\q1 mɑ kpɑnɑ Yutɑ nɑ Ɩsɛɣɛlɩ ɩsɩɩ tɔɣɔlɑɣɑ.
\q1 Ye mɑ kpɑ mɑ tɔɣɔnɑɣɑ mɑ tɛɛnɑ kɛ́,
\q1 nɔɣɔlʋ fɛɩnɑ tomɑ sɩ ɩ́ lɛɛkɩ-m.
\s1 Yǝlɑɑ mǝlʋɣʋ kɛ Ɩsɔ tɛɛ
\q1
\v 15 Mpʋ tɔ, mɑɑ mǝlɩ mɑ tɛ,
\q1 hɑlǝnɑ yǝlɑɑ cɛkǝnɑ pɑ ɩsɑɣɑtʋ
\q1 nɑ pɑ́ kɛɛsǝnɑ mɑ tɔɔ.
\q1 Ye pɑ sʋʋ wɑhɑlɑ tɑɑ, pɑɑ pɛɛkɩ-m kɛ́.
\q1 Tɑcɑɑ mɑ́ mɑ yɔɣɔtǝnɑ mpʋ.
\c 6
\p
\v 1 Wɑɑtʋ ɩnǝɣǝlɛ Ɩsɛɣɛlɩ nyǝ́mɑ kɑ́ tɔ sɩ:
\q1 Tǝ mǝlǝɣɩ Tɑcɑɑ nyɑ́ nyɑ́ tɔɔ.
\q1 Nyɑ́ kʋnɑ-tʋ.
\q1 Ɩlɛ n kɑ́ hɔkɔ tɑ hiŋ nɑ ń wɑɑ-tʋ,
\q1
\v 2 nɑ ń hɑ-tʋɣʋ weesuɣu.
\q1 Pǝ kɑɑsɑ kʋyɛɛŋ nɑɑlɛ,
\q1 ɩlɛnɑ ń kʋsɩ-tʋɣʋ tooso nyǝŋkʋ tɑɑ.
\q1
\v 3 Mpʋ tɔ, tǝ sɛɛsɩ ɩsǝlɛ kɛ teu nɑ tǝ́ nyɩ Tɑcɑɑ.
\q1 Ɩsɩɩ ilim lɩɩkʋɣʋ tɑnɑŋ nɑ tɛʋ nɑ́ɑ́ nɩɩ toomɑɣɑ tɔ.
\q1 Mpʋ tɔtɔɣɔ Tɑcɑɑ sǝnɑʋ tɔm wɛ nɑɑni.
\b
\q1
\v 4 Wɑɑtʋ ɩnǝɣɩ Tɑcɑɑ kɑ́ pɔɔsɩ ɩ tɩ sɩ:
\q1 Ɩsǝnɑɣɑ mɑɑ tɛnɑ Yutɑ nɑ Ɩsɛɣɛlɩ pɑ tɔm?
\q1 Anɩ pɑ luɣu ɩɩ lɑɑ-m lɩɩʋ kɛ́ ɩsɩɩ tɑnɑŋ ɩhunte,
\q1 yɑɑ cɔlɔʋ sɑɑlʋɣʋ tɔ.
\q1
\v 5 Pǝ tɔɔ kɛ́ mɑ yookinɑ-wɛ nɑ
\q1 Ɩsɔ kʋyɔɣɔtʋtʋ tɛlǝsǝlɑɑ wɑɑsʋ.
\q1 Mɑ kpɑɑlǝɣɩ-wɛ sɩ pɑɑ kʋ mǝ tǝnɑ.
\q1 Mɑ kʋsɔɔlǝm nɑɑ teu kɛ́ tǝcɛɩcɛɩ ɩsɩɩ ilim.
\q1
\v 6 Mɑ cɑɑ kɛ́ sɩ yǝlɑɑ ɩ́ nyɩ-m nɑ pɑ́ lɑkɩ kʋpɑntʋ.
\q1 Pǝlɛ pǝ kǝlɑ kɔtɑsɩ nsi kɔkɔ lusɑ sɩ tǝnɑ tɔ.
\s1 Ɩsɛɣɛlɩ tɑɑ ɑcɑɑlǝtʋ
\q1
\v 7 Teitei ɩsɩɩ yǝlɑɑ tǝnɑ lɑpʋ tɔ,
\q1 ḿpʋ́ɣʋ́ mǝ tɑ tɔkɩ ɩsǝnɑ
\q1 ɩ́ kɑ́ sɩɩ mǝ nɔɔsɩ tɔ.
\q1
\v 8 Kɑlɑɑtɩ nɑ́ kɛ́ ɑsɑɣɑɑ ɩcɑtɛ kɛ,
\q1 nɑ pɑ́ kʋɣɩ yǝlɑɑ.
\q1
\v 9 Kɔtǝlɑɑ kpekǝle nɑ́ pǝsɑ yʋlʋkʋlɑɑ kɛ́.
\q1 Pɑ cɛŋǝɣɩ yǝlɑɑ kɛ Sikɛm mpɑɑʋ tɑɑ.
\q1 Mpi tɔ, pɑ hɑ pɑ tǝɣɩ kɑwɑlɑɣɑ tɑɑ kɛ́.
\q1
\v 10 Mɑ nɑwɑ ɑcɑɑlǝtʋ kɛ Ɩsɛɣɛlɩ piitim tɑɑ.
\q1 Tɩɩŋ kɛ pɑ lɑɑkɩ nɑ pɑ́ pilisiɣi tǝmɑ.
\b
\q1
\v 11 Pǝ kɑɑsɑ Yutɑ nyǝ́mɑ tɔ,
\q1 mɑ tʋ mǝ hʋʋlɛ pǝlɛ kɛ́.
\c 7
\s1 Ɩsɛɣɛlɩ tɑɑ kʋwɑkǝlǝm
\p Ḿpʋ́ɣʋ́ Tɑcɑɑ tɔmɑ sɩ:
\q1 Wɑɑtʋ wei mɑɑ tɑɣɑnɩ mǝŋnɑʋ kɛ mɑ yǝlɑɑ
\q1 mpɑ pɑɑ kuuwɑ nɑ pɑ tɛɛnɑ tɔ.
\q1
\v 1 Sɑɑ wei mɑ tʋɣɩ mɑ tɑɑ sɩ mɑɑ tɑɣɑnɩ Ɩsɛɣɛlɩ nyǝ́mɑ tɔ,
\q1 pǝ kuliɣi mǝ ɩsɑɣɑtʋ nɑ mǝ mʋsʋŋ tɔɔ kɛ́.
\q1 Mpi tɔ, ɩ́ lɑkɩ puɣusuɣu tǝmɑ kɛ́,
\q1 nɑ ɩ́ ŋmɩɩlǝɣɩ tɛɛsɩ tɑɑ, nɑ mpɑtɔntɑɑ.
\q1
\v 2 Ɩɩ hʋʋkɩ sɩ mɑ nyǝmɑ́ mǝ ɩsɑɣɑtʋ tɔɔ.
\q1 Nɔɔnɔɔ tǝ sɑlǝkɑ kɛlɛ ɩ́ tɔkɩ nɑ mɑ́ nɑɑkɩ.
\q1
\v 3 Kɑwɑlɑɣɑ kɛ yǝlɑɑ cɛtǝɣǝnɑ wulɑʋ nɑ ɩ wɑɑlɩ nyǝ́mɑ,
\q1 nɑ pɑ́ wɛ lɑŋhʋlʋmlɛ tɑɑ.
\q1
\v 4 Ɩ kɛ wɑsɑŋkɑlǝnɑɑ kɛ mǝ tǝnɑɣɑ.
\q1 Ɩ wɛɛ kɛ́ ɩsɩɩ potopotonɑɑ tuɣuluɣu,
\q1 ŋku pɑ hɑŋsɑɑ nɑ pɑ́ yele kɔkɔ tikuɣu
\q1 nɑ pɑ́ nuɣutiɣi somtu tɔ,
\q1 hɑlǝnɑ tǝ kpɑ.
\q1
\v 5 Ye pɑ tɔkɩ wulɑʋ ɑcimɑ
\q1 ɩ wɑɑlɩ nyǝ́mɑ nyɔɔkɩ kɛ́ nɑ pɑ́ hɑɣɑ.
\q1 Sʋlʋm kʋɣɩ-wɛ,
\q1 ɩlɛnɑ pɑ́ sʋʋ yem yem yɔɣɔtɑɣɑ.
\q1
\v 6 Pɑ cɑkɩ wulɑʋ ɑcɑɣɑ kɛ́ nɑ pɑ́ hɑŋɑ ɩsɩɩ kɔkɔ.
\q1 Ahoo yuɣi, ɩlɛnɑ pɑ́ hɛɛ.
\q1 Kʋfeŋ ɩlɛnɑ pɑ́ kʋlɩ ɩ tɔɔ.
\q1
\v 7 Pɑ tǝnɑ pɑ hɑkɩ pɑ́ɑ́nɑ́ kɛ́.
\q1 Ɩlɛnɑ pɑ́ kʋɣɩ pɑ ɑwulɑɑ kɛ kʋlʋm kʋlʋm.
\q1 Pǝ́cɔ́ pɑ tɑɑ nɔɣɔlʋ tɑ yɑɑ-m sɩ mɑ́ sǝnɑ-ɩ.
\b
\q1
\v 8 Ɩsɛɣɛlɩ nyǝ́mɑ ɩ́ mɑtǝnɑ piitimnɑɑ lɛmpǝnɑɑ kɛ́.
\q1 Ɩ́ lɑpɑɣɑ ɩsɩɩ pɛtɛpɛtɑɣɑ ŋkɑ pɑ tɑ pǝsɩ nɑ kɑ́ nyɑɣɑ tɔ.
\q1
\v 9 Kpɑɩ nyǝ́mɑ nyɔɔkǝnɑ mǝ toŋ,
\q1 nɑ ɩ́ kpɑtǝlǝɣɩ, nɑ mǝ nyɔɔŋ hʋlǝmǝɣɩ, ɩ́ tɑ cɛkǝnɑ.
\q1
\v 10 Mpi Ɩsɛɣɛlɩ nyǝ́mɑ mɛ ɩ́ hʋlǝsǝnɑ lɑŋɑ tɔ,
\q1 mpɩ pǝ hʋlǝɣǝnɑ mǝ wɛɛtʋ.
\q1 Mɑ yǝlɑɑ mǝ kɑlɑmpɑɑnɩ kʋɣʋnɑ mǝ tɔm.
\q1 Pɑɑ nɑ mpʋ ɩɩ pɛɛkǝɣɩ sɩ ɩ́ mǝlɩ mɑ kiŋ.
\q1
\v 11 Ɩfǝlɑyim nyǝ́mɑ ɩ́ pǝsɑ ɩsɩɩ ɑlukuku kʋmɛlɛŋ kɛ́.
\q1 Hɑlɩ ɩ́ yɑɑ Icipiti nyǝ́mɑ nɑ Asilii nyǝ́mɑ sɩ pɑ́ wɑɑsɩ-mɛ.
\q1
\v 12 Ye ɩ́ puki mpʋ,
\q1 mɑɑ kpɑ-mɛɣɛ mɑ puluɣu
\q1 tɑɑ kɛ́ teitei ɩsɩɩ sumɑsɩ,
\q1 nɑ mɑ́ hɔ mǝ ŋkpɑŋŋ,
\q1 ɩsɩɩ mɑɑ kpɑɑlʋɣʋ-mɛ tɔ.
\b
\q1
\v 13 Ɩsɩɩ ɩ́ seekuɣu-m mpʋ tɔ, ɩ́ lepɑɣɑ.
\q1 Mɑɑ wɑkǝlɩ-mɛɣɛ ɩ́ kʋlʋɣʋ mɑ tɔɔ kɛ mpʋ tɔ pǝ tɔɔ kɛ́.
\q1 Mɑ cɑɑkɑɣɑ mǝ wɑɑsʋɣʋ kɛ́.
\q1 Amɑ mǝ ɩsɔsɛɛʋ kɛ kɑloolɑɣɑ kɛ́.
\q1
\v 14 Ɩ́ wiiki yem kɛ́ nɑ ɩ́ pilimiɣi nɑ ɩ́ hɛɛtǝɣɩ mǝ tɩ.
\q1 Amɑ ɩɩ tɛŋ mǝ tɑɑ,
\q1 nɑ ɩ́ sǝlǝmǝɣɩ-m tɔɣɔnɑɣɑ pǝ́cɔ́ ɩ́ kʋlǝɣɩ mɑ tɔɔ.
\q1
\v 15 Anɩ mɑ sʋsǝnɑ-mɛɣɛ toŋ.
\q1 Ɩlɛnɑ mɑ kʋcɔɔʋ pǝsɩ ɩkpɑtǝlɛ.
\q1
\v 16 Ɩ́ kisɑ mɑ tɔɔ kɛ́ mǝlǝnɑʋ,
\q1 nɑ ɩ́ yɔɔlǝɣɩ ɑpɑlʋtʋ ɩsɩɩ tɔɔʋ kpɑɩ nyǝŋkʋ.
\q1 Mǝ kolontunɑɑ kɑ́ kʋ mǝ sɔsɑɑ kɛ pɑ kɑlɑmpɑɑnɩ tɔɔ.
\q1 Ɩlɛnɑ pǝ́ wɑɑsɩ Icipiti nyǝ́mɑ nɑ pɛlɛ pɑ pɑɑnɑ-mɛ.
\c 8
\s1 Ye Yʋlʋ tuu heelim, kɑcuculɑɣɑ kɛ ɩ kʋŋ
\p
\v 1 Ḿpʋ́ɣʋ́ Tɑcɑɑ tɔmɑ sɩ:
\q1 Ɩ́ hʋlɩ ɑpɑlʋtutuɣu.
\q1 Kolontu tii mɑ tɛtʋ tɔɔ kɛ́ ɩsɩɩ yepeleku.
\q1 Mpi tɔ, Ɩsɛɣɛlɩ nyǝ́mɑ ɩ́ yɔkɑ mɑ kiiu,
\q1 nɑ ɩ́ wɑkǝlɩ mɑ́ nɑ-mɛ tɑ́ nɔɣɔ pɛɛlʋɣʋ.
\q1
\v 2 Ɩlɛnɑ ɩ́ wiinɑ-m sɩ,
\q1 mɛɣɛ Ɩsɛɣɛlɩ nyǝ́mɑ,
\q1 ɩ́ nyǝmɑ-m sɩ mɑɣɑ mǝ Ɩsɔ.
\q1
\v 3 Ɩ́ lɔwɑ tɑmpɑnɑ tɔɣɔ
\q1 kolontu kɑ tɔɣɔnɩ-mɛ.
\q1
\v 4 Ɩ́ kpɑɑkɩ ɑwulɑɑ,
\q1 nɑ pɑ wɑɑlɩ nyǝ́mɑ,
\q1 ɩɩ pɔɔsǝɣɩ-m nɑtǝlɩ.
\q1 Mǝ liɣitee nɑ mǝ wʋlɑnɑɑ kɛ
\q1 ɩ́ kpɑkǝɣɩ nɑ ɩ́ lɔɔkɩ yem sɩ,
\q1 ɩ́ luki tɩɩŋ.
\q1 Pǝ tɔɔ kɛ́ pɑɑ wɑkǝlɩ-mɛ.
\q1
\v 5 Sɑmɑlii nyǝ́mɑ mɛ,
\q1 ɩ lɔ mǝ wʋlɑ nɑʋle.
\q1 Ɩ́ kpɑɑsǝɣɩ mɑ pɑ́ɑ́nɑ́ kɛ́.
\q1 Wɑɑtʋ wei kɛ́ ɩ́ kɑ́ yele ɩsɑɣɑtʋ
\q1 nɑ mɑ́ yele-mɛɣɛ kɑlǝnɑʋ?
\q1
\v 6 Ɩsɛɣɛlɩ koolu lɑpǝnɑ mǝ nɑʋle ńtɛ́.
\q1 Tǝ fɛɩnɑ Ɩsɔ pʋlʋpʋ.
\q1 Pǝ tɔɔ kɛ́ tɩɩ yɔkɩ.
\q1
\v 7 Timpi ɩ́ tuukuɣu heelim tɔ,
\q1 ɩsɩɩ ɩ kʋmɑ kɑcuculɑɣɑ.
\q1 Teitei ɩsɩɩ pɑ tukuɣu ɩtuule tɔ sɩ:
\q1 Ye tɔɣɔnɑɣɑ tɑ tʋ nyɔɔŋ mʋlʋm fɛɩ.
\q1 Pɑɑ mʋlʋm tɩɩ wɛɛ, cɑɣɑlɑɑ kɑ́ tɔɣɔnɑ-wɩ.
\b
\q1
\v 8 Ɩsɛɣɛlɩ nyǝ́mɑ mɛ,
\q1 mǝ tɔm tɛmɑ.
\q1 Ɩ wɛ piitimnɑɑ tɑɑ kɛ́ ɩsɩɩ
\q1 tiyɑɣɑ ŋkɑ pɑɑ lɑkǝnɑ tɔ.
\q1
\v 9 Pepe tɔɔ kɛ́ ɩ́ polɑ Asilii,
\q1 ɩsɩɩ tɑɑlɛ kpɑŋɑɣɑ ŋkɑ kɑ yɛlǝɣɩ kɑ tɩ tɔɔ tɔ,
\q1 sɩ pɑ́ wɑɑsɩ-mɛ?
\q1 Hɑlǝnɑ ɩ́ hɑ kʋhɑɑŋ sɩ ɩ́ hiki cewɑɑ?
\q1 Ɩ́ tɑ́ kisi ŋmɑkǝlʋɣʋ,
\q1 ɩsɩɩ tɑɑlɛ kpɑŋɑsɩ suwe?
\q1
\v 10 Pɑɑ ɩ hɑɑkɩ lɛlɑɑ kɛ kʋhɑɑŋ tɔ,
\q1 mǝ kpeɣeluɣu wɑɑtʋ kɔmnɑ ntɔ.
\q1 Pǝ kɑɑsɑ pǝcɔ, ɩ́ kɑ́ tɔɣɔ wɑhɑlɑ,
\q1 nɑ sǝɣǝlɑ nnɑ wulɑʋ sɔsɔ kɑ́ sʋkɩ-mɛ tɔ.
\q1
\v 11 Ɩ́ ŋmɑwɑ kɔtɑɣɑ tǝlɑtɛnɑɑ kɛ sɔsɔm sɩ ɩ́ pǝntǝɣɩ.
\q1 Mǝ kɔtɑsɩ tǝlɑtɛnɑɑ yelinɑ nɑ ɩ́ pǝntǝɣɩ.
\q1
\v 12 Pɑɑ mɑɑ ŋmɑɑ-mɛɣɛ lɑɣɑtʋ
\q1 tɑsʋɣʋnɑɑ kɛ tɔm ɩsǝnɑ,
\q1 ɩ́ kɑɑ pɑɑsǝnɑ.
\q1
\v 13 Luluɣu tɔɔ kɛ́ ɩ́ lɑkɩ mǝ kɔtɑsɩ.
\q1 Amɑ mɑɑ mʋɣɩ.
\q1 Mpi tɔ, mɑɑ sɔɔkɩ mǝ ɩsɑɣɑtʋ tɔɔ.
\q1 Ɩsɩɩ mɑ ponɑ-mɛɣɛ Icipiti nɑ pǝ́ hɔ mǝ ŋkpɑŋʋɣʋ.
\b
\q1
\v 14 Ɩsɛɣɛlɩ nyǝ́mɑ mɛ,
\q1 ɩ́ sɔɔwɑ mǝ ŋmɑlʋ tɔɔ,
\q1 nɑ ɩ́ ŋmɑ mǝ tǝɣɩ kutuluŋ kʋpɑŋ.
\q1 Yutɑ nyǝ́mɑ nɑ́ ŋmɑ koloosi nɑ pɑ́ cɔɔnɑ ɑcɑlɛɛ tuutuumɑ.
\q1 Amɑ ɩsɩɩ mɑ wɔpɑ mǝ ɑcɑlɛɛ nɑ mǝ kutuluŋ kʋpɑŋ kɛ kɔkɔ.
\c 9
\s1 Ɩsɛɣɛlɩ nyǝ́mɑ kɑ́ lɑŋ pǝ tǝnɑ
\q1
\v 1 Ɩsɛɣɛlɩ nyǝ́mɑ ɩ́ tɑɑ yɔɔlǝɣǝnɑ
\q1 kʋmtʋ ɩsɩɩ piitimnɑɑ lɛlɑɑ.
\q1 Mpi tɔ, ɩ́ lɔwɑ mǝ Ɩsɔ nɑ ɩ́ tǝŋǝɣɩ tɩɩŋ.
\q1 Pǝ́cɔ́ ɩ́ sɔɔlɑ kʋfɛlʋɣʋ ɑsilimɑ
\q1 nyǝŋkʋ kɛ tǝfɑllɛnɑɑ tɑɑ.
\q1
\v 2 Amɑ mǝ tɔɣɔnɑɣɑ pee nɑ mǝ nim,
\q1 nɑ mǝ sʋlʋm kʋfɑm mpi ɩ́ tɑŋɑɑ tɔ,
\q1 pǝ tɑ kɛ mǝ nyǝm.
\q1
\v 3 Ɩ kɑɑ pǝsɩ nɑ ɩ́ cɑɣɑ Tɑcɑɑ tɛtʋ tɑɑ.
\q1 Pǝ wɛɛ sɩ ɩ́ mǝlɩ Icipiti,
\q1 yɑɑ Asilii nɑ ɩ́ tɔɣɔ ɑsilimɑ tɔɣɔnɑɣɑ.
\q1
\v 4 Ɩ́ kɑɑ pǝsɩ nɑ ɩ́ lɑ Tɑcɑɑ kɛ kɔtɑsɩ,
\q1 yɑɑ ɩ́ liisi-ɩ sʋlʋm nɑ ɩ lɑŋlɛ hɛɛ.
\q1 Mǝ tɔɣɔnɑɣɑ kɑ́ pǝsɩ-mɛɣɛ lǝyɑɣɑ nyǝŋkɑ kɛ́.
\q1 Wei ɩ́ tɔɣɑɑ ɩ pǝsɩ ɑsilimɑ pʋlʋ.
\q1 Mǝ nyɔɣɔsɩ tike kɛ mǝ tɔɣɔnɑɣɑ kɑ́ kʋ.
\q1 Ɩ́ kɑɑ sʋʋnɑ-kɛɣɛ Ɩsɔ tǝsɛɛlɛ tɑɑ.
\b
\q1
\v 5 Ɩsǝnɑɣɑ ɩ́ kɑ́ lɑ Tɑcɑɑ
\q1 ɑcimɑ kʋyɑkʋ sɔsɔɔʋ wule?
\q1
\v 6 Ye pǝ wɑkǝlɑ mǝ ɩcɑtɛ nɑ ɩ́ cɔɔsɩ Icipiti tɑɑ,
\q1 pɛlɛ pɑɑ pi-mɛɣɛ Mɑmfi ɩcɑtɛ tɑɑ.
\q1 Ɩlɛnɑ mǝ liɣitee nyǝɣǝtʋ wontu wɑkǝlɩ,
\q1 nɑ nyɩɩtʋ nɑ sɔwɑ pǝ nyɑlɑ tǝ tɑɑ.
\q1
\v 7 Tɑcɑɑ hʋʋlɛ wɑɑtʋ tɑpǝnɑ ntɔ,
\q1 ɩ kɑ́ fɛlɩ-mɛ.
\q1 Mɛ sɩ Ɩsɔ kʋyɔɣɔtʋtʋ tɛlǝsʋlʋ nɑ́ sʋʋ kpɑŋʋɣʋ,
\q1 nɑ yʋlʋ wei Ɩsɔ yɔɣɔtǝnɑɑ tɔ ɩ lɑkɩ yɛlɛyɛlɛ.
\q1 Ɩlɛ mǝ ɩsɑɣɑtʋ nɑ mǝ kʋwɑkǝlǝm kǝlǝnɑ tɔɔʋ nɑ pǝ wɛ mpʋ.
\q1
\v 8 Ɩsɔ kʋyɔɣɔtʋtʋ tɛlǝsʋlʋ wei ɩ́ yɑɑkɩ kpɑŋtʋ tɔ
\q1 ɩ́ nɑ Ɩsɔ pɑ feŋiɣinɑ Ɩsɛɣɛlɩ tɔɔ.
\q1 Ɩsɩɩ ɩ nyǝkʋɣʋ sumɑsɩ kɛ kɑtɔŋmɩɩsɩ tɔ,
\q1 ḿpʋ́ɣʋ́ ɩ lɑkɩ Ɩsɔ kʋyɔɣɔtʋtʋ tɛlǝsʋlʋ mɑɣɑ pɑɑ timpi.
\q1 Pɑɑ Ɩsɔ tǝsɛɛlɛ tɑɑ yǝlɑɑ,
\q1 pɑ nyǝnǝɣɩ-m pɑ kolontu kɛ́.
\q1
\v 9 Mǝ ɩsɑɣɑtʋ nti ɩ́ kɑ lɑpɑ Kipeyɑ tɔɣɔ ɩ́ tɔkɑɑ.
\q1 Ɩlɛ Tɑcɑɑ kɑɑ sɔɔ tǝ tɔɔ.
\q1 Ɩ kɑ yele nɑ ɩ́ nɑ́ pǝ nɑʋ.
\s1 Tɑcɑɑ lɑŋwɑkǝllɛ kɛ Ɩsɛɣɛlɩ tɔɔ
\p
\v 10 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Ɩsɛɣɛlɩ nyǝ́mɑ kɑ wɛ-m lɔŋ kɛ́ ɩsɩɩ
\q1 yʋlʋ hikuɣuu lɛsɛŋ pǝle kʋpɑmpɑntɛ kɛ wʋlɑɣɑ tɛtʋ tɑɑ tɔ.
\q1 Pǝyele nɑ mɑ nyǝnǝɣɩ mǝ cɑɑnɑɑ ɩsɩɩ fiki kɑlɑɑlɑɣɑ.
\q1 Amɑ ɩ́ tǝŋɑ tʋɣʋ ɩsɑɣɑʋ Pɑɑlɩ-Peyɔɔ*fɑ*.
\q1 Ɩlɛnɑ ɩ́ pǝsɩ ɑcɑɑlǝtʋ nyǝ́mɑ kɛ teitei ɩsɩɩ kʋ wɛɛ tɔ. \f ɑ \fr 9:10 \fr*\fk Pɑɑlɩ-Peyɔɔ: \fk*\ft Pɑɑlɩ-Peyɔɔ kʋlʋm ɩnǝɣɩ pɑ yɑɑkɩ tɔtɔ sɩ Pɛtɩ-Peyɔɔ.\ft*\f* Tʋɣʋ kʋlɑlɑɑʋ hǝtɛ kɛ.
\q1
\v 11 Mǝ yǝlɑɑ teeli kɑ́ kʋlɩ hʋntʋ ɩsɩɩ sumɑɣɑ.
\q1 Ɩ́ kɑɑ tɑsɑ husi hɑɣɑʋ,
\q1 ḿpʋ́ɣʋ́ pɩɩ lɑkɩ lʋlʋɣʋ.
\q1
\v 12 Pɑɑ ɩ́ pǝsɑɑ nɑ ɩ́ hiki piyɑ nɑpǝlɩ,
\q1 ɩsɩɩ mɑ kpiisɑ sɩ tǝnɑ nɑ sɩ tɑ lɑtɑ yǝlɑɑ.
\q1 Ye mɑ hɑ-mɛɣɛ siɣile mǝ tɔm tɛmɑ.
\q1
\v 13 Mɑ nɑwɑ Ɩsɛɣɛlɩ nyǝ́mɑ,
\q1 nɑ pɑ́ sǝŋɑ lonte kʋpɑntɛ tɑɑ ɩsɩɩ Tiii nyǝ́mɑ.
\q1 Amɑ pɑɑ ponɑ pɑ piyɑ kɛ kʋlɑɑ ɩsɛntɑɑ kɛ́.
\b
\q1
\v 14 Ḿpʋ́ɣʋ́ Osee tɔmɑ sɩ:
\q1 Tɑcɑɑ, pepeɣe n kɑ́ hɔnɑ yǝlɑɑ pɑnɛ pɑ ŋkpɑŋʋɣʋ?
\q1 Lɑ nɑ pɑ ɑlɑɑ husi lɩɩkɩ,
\q1 nɑ hǝlǝm nyɔɔ pɑ hǝlɑ tɑɑ.
\b
\q1
\v 15 Ḿpʋ́ɣʋ́ Tɑcɑɑ tɔmɑ sɩ:
\q1 Kilikɑɑ kɛ mɑ nɑwɑ mǝ ɩsɑɣɑtʋ tǝnɑ.
\q1 Ɩlɛnɑ mɑ mʋnɑ-mɛɣɛ pɑ́ɑ́nɑ́.
\q1 Mɑɑ tɔɣɔnɩ-mɛɣɛ mɑ tɛɣɛ mǝ tǝmɑ ɑsɑɣɛɛ tɔɔ.
\q1 Mǝ nyʋɣʋ nyǝ́mɑ tǝnɑ kʋlǝɣɩ mɑ tɔɔ kɛ́.
\q1 Mɑ kɑɑ tɑsɑ-mɛɣɛ sɔɔlʋɣʋ.
\q1
\v 16 Pǝ hikɑ-mɛ nɑ mǝ lilɑ tǝnɑ wʋlɩ.
\q1 Ɩ́ kɑɑ tɑsɑ pǝle kɛ lʋlʋɣʋ.
\q1 Pɑɑ nɑ mǝ ɑlɑɑ tɑsɑ piyɑ lʋlʋɣʋ,
\q1 mɑ kʋɣɩ sɩ tǝnɑɣɑ.
\b
\q1
\v 17 Ḿpʋ́ɣʋ́ Osee tɔmɑ sɩ:
\q1 Mɑ Ɩsɔ luɣu fɛɩ-mɛ tɔtɔɣɔ timpi ɩ́ kisɑ-ɩ nɩɩnɑʋ tɔ.
\q1 Ɩ́ kɑ́ lɑ cɔɔlɑɑ kɛ piitimnɑɑ lɛlɑɑ tɑɑ kɛ́.
\c 10
\s1 Ɩsɛɣɛlɩ nyǝ́mɑ kɑwulɑɣɑ nɑ pɑ lɑɑtʋ tǝnɑɣɑ sɩɩʋ
\q1
\v 1 Ɩsɛɣɛlɩ nyǝ́mɑ mɛ ɩ́ kɑ wɛ kɛ́ ɩsɩɩ tɩɩŋ
\q1 wei pɑ yɑɑ sɩ lɛsɛŋ tɔ ɩ tɑɑlɛ kʋpɑntɛ,
\q1 nte tǝ lʋlǝɣɩ teu tɔ.
\q1 Ɩsǝnɑ ɩ́ lʋlɑɣɑ tɔɣɔ
\q1 ɩ́ lʋlǝsɑɣɑ tǝlɑɑlɛnɑɑ nɑ tɩɩŋ.
\q1 Ɩlɛnɑ ɩ́ tɑɣɑnǝɣɩ-ɩ teitei,
\q1 ɩsɩɩ pɑ tɑɣɑnʋɣʋ ɩcɑtɛ tɔ.
\q1
\v 2 Yǝlɑɑ mɛ ɩ́ kɛ́ pɔpɔtʋnɑɑ kɛ hɑtoo mǝ tɑɑ kɛ́.
\q1 Pǝ tɔɔ kɛ́ Tɑcɑɑ kɑ́ yɔkɩ mǝ tǝlɑɑlɛnɑɑ,
\q1 nɑ mǝ ɩsɑɣɑtʋ mǝlɩ mǝ nyɔɔŋ tɑɑ.
\q1
\v 3 Ɩ́ kɑ́ yɔɣɔtɩ kɛ́ sɩ:
\q1 Ye tǝ fɛɩnɑ wulɑʋ,
\q1 tǝ tɑ sɛɛ Tɑcɑɑ tɔɣɔ.
\q1 Ye ɩ́lɛ́ ɩ fɛɩ pepeɣe pǝ kʋ-tʋ?
\q1
\v 4 Mǝ yɔɣɔtɑɣɑ nɑ mǝ tuunɑʋ kɑtɑtǝlɑɣɑ tɑkɑ.
\q1 Pǝyele kʋtɑmsɑ kɛ́ ɩ́ pɛɛlɑ pɔpɔtʋ nɔɔsɩ.
\q1 Siɣisuɣu wɑkǝlɑɑ kɛ́,
\q1 ɩsɩɩ kpɑŋkɑlɑɣɑlɑɣɑ nyɔɔkʋɣʋ kʋtɔɣɔʋ tɑɑ tɔ.
\b
\q1
\v 5 Sɑmɑlii nyǝ́mɑ nɑ́ luŋiɣi wʋlɑ nɑʋle nte tǝ wɛ Petɛɛlɩ tɔ.
\q1 Ɩlɛnɑ kɔtǝlɑɑ nɑ yǝlɑɑ pɑ́ seliɣi nɑ pɑ́ cɑɣɑ tǝ lǝyɑɣɑ.
\q1 Mpi tɔ, tǝ yuŋ cɑɑ kʋlʋɣʋ kɛ mǝ hɛkʋ kɛ́.
\q1
\v 6 Pɑɑ ponɑ wʋlɑ nɑʋle ntɛ tǝ mɑɣɑmɑɣɑ kɛ Asilii kɛ́,
\q1 nɑ pɑ́ hɑ wulɑʋ sɔsɔ.
\q1 Pɩɩ pɑsɑ Ɩsɛɣɛlɩ nyǝ́mɑ mɛɣɛ sɔsɔm kɛ́,
\q1 nɑ ɩ́ tɔɣɔ fɛɛlɛ kɛ yɑɑsi ɩnɩ ɩ tɔɔ.
\q1
\v 7 Sɑmɑlii nyɑ́ tɔm tɛmɑ.
\q1 Pǝ tɑlɑ nyɑ́ wulɑʋ tǝnɑɣɑ kɛ́ ɩsɩɩ lʋm kpɑɣɑ tɑɑʋ.
\q1
\v 8 Pǝ kpiisɑ Petɛɛlɩ tǝlɑɑlɛnɑɑ mpɑ
\q1 pɑ tʋsɑ Ɩsɛɣɛlɩ nyǝ́mɑ tɔ pɑ tǝnɑ, nɑ sɔwɑ nyɔ.
\q1 Wɑɑtʋ ɩnǝɣɩ ɩ́ kɑ́ wiikinɑ pɔ́ɔ́ŋ sɩ
\q1 ɩ́ tɑkɩ-mɛ nɑ pulɑsɩ sɩ sɩ nyǝkɩ-mɛ.
\s1 Ɩsɛɣɛlɩ nyǝ́mɑ kʋm kɛ pɑ kututuum
\q1
\v 9 Hɑtoo Ɩsɛɣɛlɩ nyǝ́mɑ mɛ ɩ́ lɑpʋ
\q1 mǝ kɑɑnɩɩtʋ ntiɣi Kipeyɑ tɔ, ɩ́ tɑ lɑɣɑsɩ.
\q1 Ɩlɛ pǝ wɛɛ kɛ́ sɩ kolontu ɩ́ nɑŋ-mɛɣɛ tǝnɑ.
\q1
\v 10 Mɑɑ yele nɑ piitimnɑɑ hɔ mǝ ŋkpɑŋʋɣʋ,
\q1 kɛ mǝ ɩsɑɣɑtʋ kʋlɛlǝtʋ ntɩ tǝ tɔɔ.
\b
\q1
\v 11 Ɩ́ kɑ wɛ kɛ́ ɩsɩɩ nɑʋ ɑlʋnyǝŋ kʋfɑlʋ
\q1 wei pɑ fɑlǝsɑɑ nɑ ɩ́ mɑkɩ kʋtɔɣɔʋ tɔ.
\q1 Tɑcɑɑ nɑwɑ sɩ ɩ luɣu kii teu.
\q1 Ɩlɛnɑ ɩ́ nyɩɩlɩ sɩ ɩ tʋɣɩ-ɩ ɑkuɣu kpɑ́tʋ́ɣʋ́.
\q1 Yutɑ kɑ lukiɣi, nɑ Ɩsɛɣɛlɩ nɑ́ɑ́ tɑɣɑnǝɣɩ.
\q1
\v 12 Ɩ́ tuu kʋsiɣisim nɑ ɩ́ kʋ sɔɔlʋɣʋ.
\q1 Ɩ́ toosi tɑɑlɛ kʋfɑtɛ.
\q1 Pǝ tɑlɑɑ sɩ ɩ́ kɛɛsǝnɑ Tɑcɑɑ mɑ́ mɑ tɔɔ
\q1 nɑ mɑ́ kɔɔ nɑ mɑ́ kooli-mɛɣɛ kʋpɑntʋ.
\q1
\v 13 Amɑ ɩsɑɣɑtʋ kɛ mǝ hɑlɑɑ nɑ ɩ́ kʋŋ-tɩ,
\q1 nɑ ɩ́ tɔɣɔ kɑloolɑɣɑ pǝle.
\b
\q1 Yoou kɛɛkɛnɑɑ nɑ yoolɑɑ
\q1 tuutuumɑ kɛ ɩ́ lɑkɑɣɑ nɑ ɩ́ tɑɑkɩ.
\q1
\v 14 Pǝ tɔɔ kɛ́ pɩɩ wiisinɑ-mɛɣɛ yoou tɑɑ,
\q1 nɑ pǝ́ kpiisi mǝ koloosi ɑcɑlɛɛ tǝnɑ.
\q1 Teitei ɩsɩɩ Mowɑpʋ wulɑʋ Sɑlǝmɑŋ kɑ yoonɑ
\q1 Pɛtɩ-Apɛɛlɩ nyǝ́mɑ nɑ ɩ́ nɑŋtɩ totonɑɑ nɑ pɑ piyɑ tɔ,
\q1
\v 15 ḿpʋ́ɣʋ́ mɑɑ lɑnɑ-mɛɣɛ
\q1 mǝ ɩsɑɣɑtʋ kɑtɑtǝlɑɣɑ tɔɔ.
\q1 Mǝ wulɑʋ tomle ntɛ́ tɑnɑŋ tɛɛ.
\c 11
\s1 Ɩsɛɣɛlɩ nyǝ́mɑ kɑɑnɩɩtʋ nɑ Ɩsɔ sɔɔlʋɣʋ
\p
\v 1 Ḿpʋ́ɣʋ́ Tɑcɑɑ tɔmɑ sɩ:
\q1 Wɑɑtʋ wei Ɩsɛɣɛlɩ n kɑ kɛ́ ɩfepu tɔ,
\q1 mɑɑ sɔɔlɑ-ŋ kɛ́.
\q1 Hɑlǝnɑ mɑ́ yɑɑ-ŋ mɑ pǝyɑɣɑ,
\q1 nɑ mɑ́ lǝsɩ-ŋ Icipiti tɑɑ.
\q1
\v 2 Mɑ tɔŋnɑ-ŋ yɑɑʋ,
\q1 ɩlɛnɑ nyɑɑ seeki-m nɑ ń lɑɑkɩ Pɑɑlɩ nɑ tɩɩŋ lɛlǝŋ.
\q1 Ɩlɛnɑ n wɔkɩ-ɩ kɔtɑɣɑ tulɑɑlʋ.
\q1
\v 3 Pǝyele mɑ́ tɔkǝnɑ nyɑ́ niŋ nɑ mɑ́ hɔ-ŋ tɑɑtɑɑ.
\q1 Amɑ n tɑ nyǝnnɑ tǝnɑ.
\q1
\v 4 Mɑ sɔɔlɑ-ŋ kɛ́,
\q1 nɑ mɑ́ pɑɑsǝnɑ-ŋ tǝpɑmm,
\q1 nɑ mɑ́ wɑɣɑlǝɣɩ-ŋ,
\q1 ɩsɩɩ cɛcɛ lɑkʋɣʋ ɩ pǝyɑɣɑ tɔ.
\q1 Mɑ sopɑ nyɑ́ tɛɛ,
\q1 nɑ mɑ́ hɑɑkɩ-ŋ tɔɣɔnɑɣɑ.
\b
\q1
\v 5 Icipiti nyǝ́mɑ kɑɑ tɑsɑ-mɛɣɛ yomle kpɑʋ yɑɑ.
\q1 Amɑ Asilii nyǝ́mɑ kɑ́ ŋmɑkǝlǝnɑ-mɛɣɛ
\q1 timpi ɩ́ kisɑ mɑ kiŋ kɛ kɔntɛ tɔ.
\q1
\v 6 Pǝ tɔɔ kɛ́ yoou kɑ wɛɛ mǝ ɑcɑlɛɛ tɑɑ,
\q1 nɑ kʋ wɑkǝlɩ ɑ kʋkentim.
\q1 Ɩsɛɣɛlɩ nyǝ́mɑ kʋmɑɣɑsǝm kɑsǝyɑɣɑ ntɛ́.
\q1
\v 7 Mɑ yǝlɑɑ cɑɑkɩ-m kisuɣu
\q1 nɑ pɑ́ yɑɑkɩ-wɛ nɑ Ɩsɔ tɔɔ, pɑɑ nɩɩkɩ.
\b
\q1
\v 8 Ɩsǝnɑɣɑ mɑɑ pǝsɩ nɑ mɑ́ lɔ Ɩsɛɣɛlɩ nɑ pǝ sɑɑlɩ?
\q1 Nɑ mɑ́ wɑkǝlɩ-ŋ ɩsɩɩ mɑ lɑpʋ Atǝmɑ,
\q1 nɑ Sepoyim pǝ ɑcɑlɛɛ tɔ?
\q1 Tɔfɔ pɩɩ wɑkǝlɩ mɑ lɑŋlɛ nɑ mɑ́ nyɑsɑ mɑ tǝɣɩ kelɑ.
\q1
\v 9 Mɑ kɑɑ tɑsɑ Ɩfǝlɑyim nyǝ́mɑ kɛ wɑkǝlʋɣʋ.
\q1 Mpi tɔ, mɑ kɛ́ Ɩsɔ Nɑŋŋ tʋ kɛ́,
\q1 mɑ tɑ kɛ yʋlʋ.
\q1
\v 10 Ɩsɔ kɑ́ yɑɑ ɩ yǝlɑɑ mpɑ pɑ kuuwɑ
\q1 nɑ pɑ́ tɛɛnɑ hɑtoo teŋku wɑɑlɩ tɔ nɑ pɑ́ kɔɔ.
\q1 Teitei ɩsɩɩ tɔɣɔlɑɣɑ wiikuɣu nɑ kɑ́ kotiɣi kɑ piyɑ tɔ.
\q1
\v 11 Ɩ́ kɑ lɩɩ Icipiti nɑ Asilii kɛ lɔŋ,
\q1 ɩsɩɩ sumpɩʋpɩʋ, yɑɑ ɑlukuku kʋlʋɣʋ tɔ.
\q1 Ɩlɛnɑ mɑ́ mǝŋnɑ-mɛɣɛ mǝ tɛ.
\q1 Tɑcɑɑ mɑ́, mɑ yɔɣɔtǝnɑ mpʋ.
\s1 Kpou ɩɩ lʋlǝɣɩ pite
\p
\v 12 Ḿpʋ́ɣʋ́ Tɑcɑɑ tɔmɑ sɩ:
\q1 Kɑloolɑɣɑ tike kɛ Ɩsɛɣɛlɩ nyǝ́mɑ mɛ ɩ́
\q1 lɑkɩ-m nɑ ɩ́ puɣusuɣu-m tɑm.
\q1 Amɑ Yutɑ nɑ́ tɑmsǝnɑ Nɑŋŋ tʋ mɑ́.
\c 12
\q1
\v 1 Ɩsɛɣɛlɩ nyǝ́mɑ hɑɑkɩ Icipiti nyǝ́mɑ kɛ nim sɩ pɑ́ hii cɑmtɛ.
\q1 Mǝ nɑ Asilii nyǝ́mɑ ɩ́ pɛɛlǝɣɩ nɔɔsɩ.
\q1 Ɩ́ lʋlǝsǝɣɩ mǝ kɑloolɑɣɑ,
\q1 nɑ mǝ mʋsʋŋ tǝmɑ kɛ pɑɑ kʋyɑkʋ ŋku.
\q1 Amɑ mǝ cɑmtɛ kɑɑ kǝlɩ heelim kɛ́ leeluɣu.
\b
\q1
\v 2 Tɑcɑɑ mɑ́ mɑɑ hʋʋnɑ Yutɑ nyǝ́mɑ mɛɣɛ.
\q1 Mɑɑ pɑɑsǝnɑ Yɑkɔpʋ lʋlʋɣʋ nyǝ́mɑ mɛɣɛ mǝ tɔntɛ ɩsɑɣɑlɛ tɔɔ.
\q1 Mɑɑ yele nɑ ɩ́ tɔɣɔ mǝ ɩsɑɣɑtʋ sɑlǝkɑ.
\q1
\v 3 Hɑtoo toto lotu tɑɑ kɛ́ Yɑkɔpʋ nyɑ́ n cɑɑlɑ nyɑ́ tɛɛtʋ tɔɔ kɛ́ kʋlʋɣʋ.
\q1 Pǝ kɔɔ nɑ nyɑ́ nɑ Ɩsɔ ɩ́ lʋ wɑɑtʋ wei nyɑ́ ɩsɛ nyɑɑlɑɑ tɔ.
\q1
\v 4 Nyɑ́ nɑ ɩsɔtɑɑ tillu ɩ́ lʋpɑ nɑ ń kǝlɩ ɩ́lɛ́.
\q1 Ɩlɛnɑ ń wii nɑ ń sǝlǝmɩ-ɩ sɩ ɩ́ kooli-ŋ kʋpɑntʋ.
\q1 N polɑ Petɛɛlɩ, ɩlɛnɑ Tɑcɑɑ lɩɩ nyɑ́ tɔɔ nɑ ɩ́ heeli-ŋ sɩ:
\q1
\v 5 Mɑɣɑlɛ Tomɑ tǝnɑ tʋ Tɑcɑɑ.
\q1
\v 6 Mɑɑ yele nɑ ń mǝlɩ cǝnɛ.
\q1 Amɑ pǝ wɛɛ sɩ ń tǝŋ tɑmpɑnɑ nɑ ń lɑkɩ kʋpɑntʋ kɛ́.
\q1 Tʋ nyɑ́ Ɩsɔ mɑ́, mɑ tike kɛ nɑɑni.
\b
\q1
\v 7 Ɩsɛɣɛlɩ nyǝ́mɑ ɩ́ tɔkɑ mǝ niŋ tɑɑ kɛ́
\q1 mǝ sɑnǝyɑ ɩsɑɣɑʋ kɛ́,
\q1 ɩsɩɩ tɑɑtǝlɑɑ.
\q1 Ɩ́ sɔɔlɑ kɑmuɣulɑɣɑ.
\q1
\v 8 Ɩ́ tɔŋ sɩ mǝ hikuɣu kɛ mǝ tǝmlɛ sote kɛ́,
\q1 pǝ tɑɣɑ kɑwɑlɑɣɑ tɔm.
\q1 Ɩlɛ ɩsɑɣɑtʋ fɛɩ toŋ sʋʋʋ tɑɑ se.
\q1 Pǝ tɑɣɑ kʋpɑntʋ kɛ tǝnɑ.
\q1
\v 9 Ntɛnɑ Tɑcɑɑ sɩ:
\q1 Hɑtoo ɩ́ wɛʋ Icipiti tɑɑ tɔɣɔ mɑ kɛ́ mǝ Ɩsɔ.
\q1 Ɩlɛ mɑɑ yele nɑ ɩ́ mǝlɩ cokɑ tɑɑ cɑɣɑlɛ,
\q1 ɩsɩɩ mǝ ɑcimɑ wɑɑtʋnɑɑ.
\q1
\v 10 Ɩsɔ kʋyɔɣɔtʋtʋ tɛlǝsǝlɑɑ kɛ mɑ heeliɣi mɑ tɔm.
\q1 Mɑ hʋlǝɣɩ-mɛɣɛ mɑ luɣu nyǝntʋ,
\q1 nɑ mɑ́ sɛɛ-mɛɣɛ ɩsɔnɑɑ kɛ toosee tɑkɑ tɑɑ sɩ,
\q1 pɑ́ tɛlǝsɩ-mɛ.
\q1
\v 11 Kɑlɑɑtɩ nyǝ́mɑ mǝ pǝsɑ ɑsɑɣɑɑ kpitikpitinɑɑ kɛ́.
\q1 Sǝm kɛ pǝ kɑɑsǝnɑ-mɛ.
\q1 Nɑɑŋ kɑtɑɑsɩ kɛ ɩ́ hɑɑkɑɣɑ kʋhɑɑŋ kɛ Kilikɑɑ.
\q1 Amɑ mǝ kɔtɑsɩ tǝlɑtɛ pǝsɑ hɑlǝm tɑɑ kɑŋmɑɑsɩ huwɑ.
\b
\q1
\v 12 Yɑkɔpʋ kɑ cɔɔsɑ Mesopotɑmi tɛtʋ tɑɑ,
\q1 nɑ ɩ́ pǝsɩ lɛlʋ ntiɣilu kɛ ɑlʋ tɔɔ.
\q1
\v 13 Amɑ Ɩsɔ kʋyɔɣɔtʋtʋ tɛlǝsʋlʋ kɛ Ɩsɔ tilɑɑ sɩ
\q1 ɩ́ lǝsɩ Ɩsɛɣɛlɩ nyǝ́mɑ mɛɣɛ Icipiti tɑɑ.
\q1 Kʋlʋm ɩnǝɣɩ ɩ tʋwɑ sɩ ɩ́ tiiki ɩ yǝlɑɑ.
\q1
\v 14 Ɩsɛɣɛlɩ yǝlɑɑ mɛ ɩ́ yɔɔlɑ Tɑcɑɑ ɑpɑlʋtʋ,
\q1 nɑ ɩ́ wɑkǝlɩ ɩ lɑŋlɛ tǝnɑŋnɑŋ.
\q1 Amɑ ɩ́lɛ́ ɩ kɑ́ lɛɛtɩ-mɛɣɛ mǝ fɛɛlɛ.
\q1 Ɩ kɑ́ mǝlǝnɑ mǝ yʋlʋkʋlɛ kɛ mǝ nyɔɔŋ tɑɑ kɛ́.
\c 13
\s1 Ɩsɔ tɔɔ kʋllɑɑ sǝm
\q1
\v 1 Ɩfǝlɑyim kpekǝle nyǝ́mɑ mɛ
\q1 ɩ́ kɑ ŋmɑkǝlɑɣɑnɑ Ɩsɛɣɛlɩ tɑɑ,
\q1 nɑ ɩ́ yɔɣɔtǝɣɩ nɑ yǝlɑɑ tǝnɑ tɛɛ sʋʋkǝnɑ-mɛ.
\q1 Amɑ ɩ́ kʋ mǝ tɩ tɔm nɑ tɩɩŋ lɑɑʋ, ɩlɛnɑ ɩ́ sɩ.
\q1
\v 2 Pɑɑ nɑ mpʋ, ɩ́ kɑmɑ nyʋɣʋ kɛ mǝ ɩsɑɣɑtʋ tɑɑ kɛ́.
\q1 Ɩ́ luki mǝ liɣitee nyǝɣǝtʋ kɛ tʋɣʋ lɛɛsʋɣʋ.
\q1 Pǝyele koolu lupinɑ nɑwee lɛɛsǝŋ ɩnɩ.
\q1 Ɩlɛnɑ mɛ sɩ ɩ́ wɑɣɑlǝɣɩ-ɩ nɑ ɩ́ lɑɑkɩ-ɩ.
\q1
\v 3 Pǝ tɔɔ kɛ́ Ɩ́ kɑ sɑɑlɩ yem, ɩsɩɩ tɑnɑŋ ɩhunte.
\q1 Yɑɑ ɑŋkpǝlɛɛ, yɑɑ lɔɔtʋ kʋlʋɣʋ tɔɣɔnɑɣɑ tǝmɑtɛ tɔ.
\q1 Yɑɑ ɩsɩɩ nyɔɔsɩ lɩɩkʋɣʋnɑ kutuluɣu lɔpʋtʋ tɑɑ tɔ.
\p
\v 4 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Mɑ́ kɛnɑ mǝ Ɩsɔ kɛ hɑtoo ɩ́ lɩɩʋ Icipiti tɑɑ tɔ.
\q1 Ɩ́ tɑ nɑtɑ nɔɣɔlʋ nɑ ɩ́ nǝɣǝsǝnɑ-m.
\q1 Pǝyele nɔɣɔlʋ fɛɩ nɑ ɩ́ wɑɑsǝɣɩ ɩsɩɩ mɑ́.
\q1
\v 5 Mɑ́ feŋnɑ mǝ tɔɔ kɛ́ wʋlɑɣɑ tɛtʋ
\q1 tɑɑ kɛ́ timpi nikɑɣɑ fɛɩ mpʋ tɔ.
\q1
\v 6 Ɩ́ hikɑɑ nɑ ɩ́ hɑɣɑ.
\q1 Ɩlɛnɑ ɩ́ sʋʋ kɑlɑmpɑɑnɩ tɑɑ,
\q1 nɑ ɩ́ sɔɔ mɑ tɔɔ.
\q1
\v 7 Pǝ tɔɔ kɛ́ mɑ pǝsɑ mǝ tǝnɑ,
\q1 ɩsɩɩ tɔɣɔlɑɣɑ yɑɑ kpou wei ɩ pɑpɑ mpɑɑʋ tɑɑ tɔ.
\q1
\v 8 Mɑ kʋlɑ mǝ tɔɔ kɛ́,
\q1 ɩsɩɩ pɑ kpɑkʋɣʋ tɑɑlɛ wontuɣu ɩsɑɣɑʋ pǝyɑɣɑ tɔ.
\q1 Mɑɑ cǝlɩ-mɛ nɑ mɑ́ li-mɛ, ɩsɩɩ tɔɣɔlɑɣɑ.
\q1 Tɑɑlɛ wontu kɑ́ cǝlɩ-mɛ tǝyɔtɔyɔtɔ.
\b
\q1
\v 9 Ɩ́ lɔ mɑ wei pɩɩ wɛɛ sɩ mɑ́ wɑɑsɩ-mɛ tɔ,
\q1 pǝ tɔɔ kɛ́ pǝ wɑkǝlɑ-mɛɣɛ mpʋ.
\q1
\v 10 Mǝ sǝlǝmǝnɑ-m sɩ mɑ́ kpɑ-mɛɣɛ wulɑʋ nɑ pɑɑsǝnlɑɑ.
\q1 Pɛlɛ pɑ tɛmnɑ we? Pɑ́ yɑ-mɛ ɩlɛ.
\q1
\v 11 Pɑ́ɑ́nɑ́ kɛ mɑ kpɑnɑ-mɛɣɛ wulɑʋ,
\q1 nɑ kʋlʋmɛɛ ɑnǝɣɩ mɑɑ tɔɣɔnǝnɑ-ɩ.
\b
\q1
\v 12 Pɑ ŋmɑɑ Ɩsɛɣɛlɩ nyǝ́mɑ mɛ mǝ tɑsǝkǝlɛ tǝnɑɣɑ,
\q1 nɑ pɑ́ ŋmɛsɩ teu.
\q1
\v 13 Ɩ́ nǝɣǝsǝnɑ kɛ́ ɩsɩɩ ɑhʋlʋm kʋmɛlɛŋ
\q1 lʋlʋɣʋ tɑkʋɣʋ nɑ ɩ́ kisi lɩɩʋ tɔ.
\q1
\v 14 Amɑ mɑ kɑɑ lɛɛkɩ-mɛɣɛ sǝm nɔɣɔ tɑɑ,
\q1 nɑ mɑ́ yɑ-mɛɣɛ ɑtɛtǝlɛ tɑɑ.
\q1 Pǝ tɔɔ tɔ, sǝm nyɑ́ kʋ-wɛ.
\q1 Atɛtǝlɛ, nyɑɑ li-wɛ.
\q1 Mɑ fɛɩnɑ mǝ pǝtɔɔtǝlɛ.
\q1
\v 15 Pɑɑ Ɩsɛɣɛlɩ nyǝ́mɑ ɩ́ kɑ́ lɛɛsɩ mǝ tɛɛtʋnɑɑ hɛkʋ.
\q1 Mɑɑ yele nɑ kolontunɑɑ lɩɩ mǝ tɔɔ kɛ́.
\q1 Hilimɑtɛ nyɔɔkʋɣʋ hilɑ nɑ lɔkɔnɑɑ kɛ ɩsǝnɑ tɔ,
\q1 ḿpʋ́ɣʋ́ pɛlɛ pɑ kuu mǝ kpɑncoou tǝnɑ.
\q1
\v 16 Pǝ wɛɛ sɩ Sɑmɑlii nyǝ́mɑ mɛ
\q1 ɩ́ tɔɣɔ mǝ ɩsɑɣɑtʋ sɑlǝkɑ kɛ́.
\q1 Mpi tɔ, ɩ́ kʋlɑ mɑ tɔɔ.
\q1 Pɑɑ kʋ mǝ nɑ mǝ piyɑ kɛ yoou tɑɑ,
\q1 nɑ pɑ́ tʋlɩ mǝ ɑhontonɑɑ lotu.
\c 14
\s1 Ɩsɔ wɑɑsʋɣʋ kɛ ɩ yǝlɑɑ
\p
\v 1 Ḿpʋ́ɣʋ́ Tɑcɑɑ yɔɣɔtɑɑ sɩ:
\q1 Ɩsɛɣɛlɩ nyǝ́mɑ ɩ́ mǝlɩ mǝ Ɩsɔ Tɑcɑɑ mɑ mɑ kiŋ.
\q1 Mpi tɔ, mǝ ɩsɑɣɑtʋ pɛtɑ-mɛɣɛ.
\q1
\v 2 Ɩlɛ ɩ́ lɑɣɑsɩ nɑ ɩ́ mǝlɩ mɑ kiŋ nɑ ɩ́ wiinɑ-m sɩ:
\q1 Tɑɣɑnɩ-tʋɣʋ tɑ ɩsɑɣɑtʋ,
\q1 nɑ ń mʋ tɑ sɛɛtʋ ɩsɩɩ kʋhɑɑŋ.
\q1
\v 3 Pǝ tɑɣɑ Asilii kɑ́ wɑɑsǝnɑ-tʋ.
\q1 Pǝ́cɔ́ tǝ kɑɑ tɑsɑ yoou kpɑɣɑnǝŋ kɛ nɑɑni tʋɣʋ.
\q1 Tǝ kɑɑ tɑsɑ tɩɩŋ ɩnǝɣɩ luŋuɣu ɩsɩɩ tɑ Ɩsɔ nyɑ́.
\q1 Mpi tɔ, nyɑ́ tike n wɛnnɑ kɑtɑyǝlɑɣɑ pǝtɔɔtǝlɛ.
\b
\q1
\v 4 Ɩlɛnɑ Tɑcɑɑ sɩ:
\q1 Ye ɩ́ mǝlǝnɑ mɑ tɔɔ,
\q1 mɑɑ tɑɣɑnɩ mǝ ɩsɑɣɑtʋ.
\q1 Mɑɑ kʋ mɑ pɑ́ɑ́nɑ́ kɛ mǝ tɔɔ nɑ mɑ́ sɔɔlɩ-mɛɣɛ teu.
\q1
\v 5 Mɑɑ wɛɛ Ɩsɛɣɛlɩ nyǝ́mɑ ɩsɩɩ cɔlɔʋ kʋpɑŋkʋ kpɑɑkʋɣʋ tɔ.
\q1 Nyɩɩtʋ kɑ́ tʋ hɛtʋ, nɑ Lipɑŋ tʋɣʋ sɔsɔɔʋ kɑ lilɑ.
\q1
\v 6 Ɩ́ kɑ́ hɛlɩ piliŋɑsɩ kɛ teu ɩsɩɩ tʋɣʋ ŋku pɑ yɑɑ sɩ olifi tɔ.
\q1 Mǝ sɔɔsʋŋ kɑ́ nyɑlɑ ɩsɩɩ Lipɑŋ hɔtʋɣʋ.
\q1
\v 7 Ɩ́ kɑ́ kɔɔ nɑ mɑ́ kenti mǝ tɔɔ
\q1 nɑ ɩ́ hɑlɑ tɔɣɔnɑɣɑ nɑ pǝ́ lɑ́ teu.
\q1 Ɩ́ kɑ tʋ hɛtʋ ɩsɩɩ lɛsɛŋ tɑɑlɛ,
\q1 nɑ mǝ hǝtɛ yɑɑ ɩsɩɩ Lipɑŋ sʋlʋm.
\q1
\v 8 Mǝ nɑ tɩɩŋ kʋlɑlɑɑŋ ɩ́ kɑɑ we?
\q1 Mɑ́ mʋɣʋnɑ mǝ sǝlǝmǝŋ nɑ mɑ́ feŋiɣi mǝ tɔɔ.
\q1 Mɑ wɛ-mɛɣɛ ɩsɩɩ tʋɣʋ ŋku kʋ hɑtʋ ɩɩ tɔɔkɩ tɔ.
\q1 Mɑ́ hɑɑkǝnɑ-mɛɣɛ mǝ tɑwɑ kʋlʋlʋm.
\b
\q1
\v 9 Yʋlʋ wei ɩ kɛ́ lɑɣɑtʋ
\q1 nɑ nyǝntʋ tɔ ɩ́ cɛkǝnɑ tɔm tǝnɛ.
\q1 Tɑcɑɑ mpɑɑʋ hʋlǝɣǝnɑ weesuɣu nɑ ɑlɑɑfǝyɑ.
\q1 Tɑmpɑnɑ tǝŋlɑɑ pǝsǝɣɩ nɑ pɑ́ tǝŋ-kʋ.
\q1 Amɑ tɔɔ kʋllɑɑ nɑ́ hotiɣi.