\id HAG - Lokpa Bible portions [dop] -Benin 1999 (web edition -2017)
\ide UTF-8
\h Asee
\toc1 ƖSƆ KƲYƆƔƆTƲTƲ TƐLƎSƲLƲ ASEE TƆM TAKƎLAƔA
\toc2 Asee
\toc3 Asee
\mt2 ƖSƆ KƲYƆƔƆTƲTƲ TƐLƎSƲLƲ
\mt1 ASEE
\mt2 TƆM TAKƎLAƔA
\imt1 Kʋtʋlʋtʋ
\ip Ɩsɔ kʋyɔɣɔtʋtʋ tɛləsʋlʋ Asee lʋpɑ sɩ, pɑ́ tɑɣɑnɩ Yosɑlɛm Ɩsɔ təsɛɛlɛ ŋmɑʋ. Ɩlɛ pɩɩ wɛɛ sɩ Yutɑ nyə́mɑ mpɑ pɑ lɑɑlɑ kɔntɛ nɑ Pɑpiloni tɔ mpɛ pɑ́ ŋmɑnɑ Ɩsɔ təsɛɛlɛ ńtɛ́. Amɑ pɛlɛ pɑ ɑpɑlʋtʋ tɑ lɑɑ yɔɔlʋɣʋ. Ntɛnɑ Asee tɑsɑ nyʋɣʋ nyə́mɑ kɛ ɑpɑlʋtʋ sɩ, pɑ́ sʋʋ təmlɛ tɑɑ.
\iot Ɩsənɑ pɑ fɑɣɑ Asee tɑkəlɑɣɑ tɔ:
\io1 Pɑ tɑɣɑnəɣɩ Ɩsɔ təsɛɛlɛ ŋmɑʋ tɔtɔ, titite \ior 1\ior*
\io1 Ɩsɔ təsɛɛlɛ kʋfɑtɛ teu, titite \ior 2:1-9\ior*
\io1 Yəlɑɑ ɑsilimɑ, titite \ior 2:10-19\ior*
\io1 Tɑcɑɑ nɔɔsɩ kʋpɑŋsɩ, titite \ior 2:20-23\ior*
\c 1
\s1 Pɑ tɑɣɑnəɣɩ Ɩsɔ təsɛɛlɛ ŋmɑʋ tɔtɔ
\p
\v 1 Ḿpʋɣʋ Pɛɛsɩ wulɑʋ sɔsɔ Tɑliyusi kɑwulɑɣɑ pənɑɣɑ nɑɑlɛ nyəŋkɑ ɩsɔtʋ nɑɑtoso nyəŋ kʋyɑkʋ kɑncɑɑlɑɣɑ nyəŋkʋ wule. Tɑcɑɑ heelɑ Ɩsɔ kʋyɔɣɔtʋtʋ tɛləsʋlʋ Asee kɛ tɔm sɩ ɩ́ tɛləsɩ-təɣɩ Yutɑ nyʋɣʋ tʋ Sɑlɑtiyɛɛlɩ pəyɑlʋ Solopɑpɛɛlɩ, nɑ kɔtʋlʋ sɔsɔ Yosɑtɑkɩ pəyɑlʋ Yesuwɑ. 
\v 2-3 Ntɛnɑ Asee yɔɣɔtɩ tɔm ntɩ sɩ: Pə tənɑ pə tʋ Tɑcɑɑ mɑ́ mɑ yɔɣɔtɑɑ sɩ, Ɩsɛɣɛlɩ yɔɣɔtəɣɩ sɩ, pə tɑ tɑtɑ Ɩsɔ təsɛɛlɛ ŋmɑʋ. 
\v 4 Ɩlɛ pə wɛ teu sɩ mɩɩ həntəɣɩ kutuluŋ wei pɑ lɑpɑ kɑcɔkɑ kɛ teu tɔ ɩ tɑɑ. Ɩlɛnɑ Ɩsɔ təsɛɛlɛ nɑ́ɑ́ kɛ́ ncɑɑlɛ nɑ? 
\v 5 Pə tənɑ pə tʋ Tɑcɑɑ mɑ́ mɑ tɔmɑ Ɩsɛɣɛlɩ nyə́mɑ sɩ ɩ́ hʋʋ mə tɔntɛ tɔm kɛ mə tɑɑ. 
\v 6 Ɩ́ tuuwɑ sɔsɔm ɑmɑ mə kʋmtʋ tɑ kpɑ. Mə tɔɣɔnɑɣɑ tɑ tɔɔ sɩ, ɩ́ tɔɣɔ nɑ ɩ́ hɑɣɑ. Pə́cɔ́ mə sʋlʋm tɑ tɔɔ sɩ, ɩ́ nyɔɔ nɑ pə́ kʋ mə lʋkɔtʋ. Ɩ́ fɛɩnɑ wontu sɩ ɩ́ suu nɑ pə́ hɑŋ-mɛ. Pəyele təmlɑtɑɑ kʋfɛlʋɣʋ kʋləɣɩ hʋntʋ kɛ yem. 
\v 7 Pə tənɑ pə tʋ Tɑcɑɑ tɔmɑ sɩ ɩ́ hʋʋ mə tɔntɛ tɔm kɛ mə tɑɑ. 
\v 8 Ɩlɛnɑ ɩ́ kpɑ pulɑɣɑ tɔɔ nɑ ɩ́ sɛtɩ tɑɑsɩ, nɑ ɩ́ ŋmɑ-m Ɩsɔ təsɛɛlɛ. Wɑɑtʋ ɩnəɣɩ pɩɩ kʋsɩ mɑ nyʋɣʋ kɛ ɩsənɑ pə mʋnɑɑ tɔ, nɑ mɑ lɑŋlɛ hɛɛ. 
\v 9 Ɩ́ kɑ tɑŋɑɑ sɩ ɩ́ kʋ tɔɣɔnɑɣɑ kɛ sɔsɔm. Amɑ ɩ́ tɑ hiki mpʋ. Ɩsɔ wosɑ heelim kɛ mpi ɩ́ kpeenɑ mə tɛɛsɩ tɑɑ tɔ ɩlɛnɑ pə́ sɑɑlɩ yem. Pə tənɑ pə tʋ Tɑcɑɑ mɑ́ mɑ pɔɔsəɣɩ-mɛ sɩ pepe tɔɔ kɛ́ mpʋ? Ɩ́ yelɑ Ɩsɔ təsɛɛlɛ kɛ ncɑɑlɛ, nɑ pɑɑ wei ɩ́ pɑɑsənɑ ɩ mɑɣɑmɑɣɑ ɩ təyɑɣɑ. 
\v 10 Mpʋ pə tɔɔ kɛ́ pɑɑ tɛʋ kʋlʋmʋɣʋ tɑ nɩɩ. Pə́cɔ́ pʋlʋpʋ tɑ nyɔ. 
\v 11 Ɩsɔ kɔnɑ wʋlɑɣɑ kɛ tɛtʋ tɑɑ nɑ pulɑsɩ tɔɔ. Mə tɔɣɔnɑɣɑ pee tɑwɑ, nɑ mə lɛsɛŋ nɑ olifinɑɑ pə tɩɩŋ nɑ mə hɑləmnɑɑ lɛmpɩ wʋlɑɑ. Yəlɑɑ nɑ tɔlɑ pɑ lɑkɩ wɑhɑlɑ. Mə wɑhɑlɑ sɑɑlɑ yem.
\p
\v 12 Ḿpʋɣʋ Sɑlɑtiyɛɛlɩ pəyɑlʋ Solopɑpɛɛlɩ, nɑ Yosɑtɑkɩ pəyɑlʋ kɔtʋlʋ sɔsɔ Yesuwɑ, nɑ Ɩsɛɣɛlɩ nyə́mɑ kɑkɑɑsɑɣɑ tənɑ, pɑ mʋwɑ Tɑcɑɑ tɔm nti Ɩsɔ kʋyɔɣɔtʋtʋ tɛləsʋlʋ heelɑ-wɛɣɛ mpʋ tɔɣɔ niŋ nɑɑlɛ. Ɩlɛnɑ Asee nɑ́ɑ́ pəsɩ nɑ ɩ́ lɑ ɩ təmlɛ kɛ teu. Kʋyɑkʋ ŋkʋ yəlɑɑ kɑ wɛnɑ Ɩsɔ sɔɣɔntʋ kɛ́. 
\v 13 Ḿpʋɣʋ ɩ tɑsɑ-mɛɣɛ Ɩsɔ Tɔm lɛntɩ kɛ heeluɣu sɩ Tɑcɑɑ yɔɣɔtɑɑ sɩ: Mɑ sɩɩ nɔɣɔ sɩ, mɑɑ wɛɛ mə wɑɑlɩ.
\p
\v 14 Ḿpʋɣʋ Tɑcɑɑ hɑwɑ Yutɑ nyʋɣʋ tʋ kɛ ɑpɑlʋtʋ, nɑ Yesuwɑ, nɑ kɔtʋlʋ sɔsɔ, nɑ pɑ tənɑ mpɑ pɑ lɩɩnɑ yomle tɔ. Ɩlɛnɑ pɑ́ sʋʋ pɑ Ɩsɔ Pə tənɑ pə tʋ Tɑcɑɑ təsɛɛlɛ kɛ ŋmɑʋ. 
\v 15 Wulɑʋ Tɑliyusi kɑwulɑɣɑ pənɑɣɑ nɑɑlɛ nyəŋkɑ, ɩsɔtʋ nɑɑtoso nyəŋ kʋyɑkʋ hiu nɑ liɣiti nyəŋkʋ kɛ pɑ cɑɑlɑ təmlɛ.
\c 2
\s1 Ɩsɔ təsɛɛlɛ kʋfɑtɛ teu
\p
\v 1 Ḿpʋɣʋ wulɑʋ Tɑliyusi pənɑɣɑ nɑɑlɛ nyəŋkɑ, ɩsɔtʋ nɑɑtosompɔɣɔlɑɣɑ nyəŋ, kʋyɑkʋ hiu nɑ kʋlʋmʋɣʋ wule. Tɑcɑɑ tɑsɑ Ɩsɔ kʋyɔɣɔtʋtʋ tɛləsʋlʋ Asee kɛ tɔm heeluɣu. 
\v 2 Ɩ tɔmɑ-ɩ kɛ́ sɩ: Heeli Solopɑpɛɛlɩ nɑ kɔtʋlʋ sɔsɔ Yesuwɑ nɑ pɑ tənɑ mpɑ pɑ lɩɩnɑ yomle tɔ sɩ 
\v 3 mə tɑɑ nɔɣɔlʋ tɔɔsəɣɩ ɩsənɑ Ɩsɔ təsɛɛlɛ ńtɛ́ tɩɩ tewɑ lɔŋtɑɑ tɔ? Amɑ nɔɔnɔɔ tə teu mpɩ pə səpɑ. 
\v 4 Pə tɔɔ kɛ́ Tɑcɑɑ mɑ́ mɑ tɔmɑ sɩ, Solopɑpɛɛlɩ nɑ Yesuwɑ nɑ tɛtʋ yəlɑɑ tənɑ ɩ́ kɑɑsɩ mə tɩ nɑ ɩ́ sʋʋ pə təmlɛ tɑɑ. Mpi tɔ, mɑ wɛ mə wɑɑlɩ kɛ́. 
\v 5 Wɑɑtʋ wei ɩ́ lɩɩnɑ Icipiti tɔɣɔ mɑɑ sɩɩ mpʋ. Ɩlɛnɑ mɑ feesuɣu wɛ mə wɑɑlɩ, ɩlɛ ɩ́ tɑɑ nyɑ́. 
\v 6 Pə tənɑ pə tʋ Tɑcɑɑ sɩ, pə kɑɑsɑ pəcɔ. Mɑɑ ciɣiti ɩsɔtɔnʋɣʋ nɑ tɛtʋ nɑ teŋkunɑɑ tənɑ. 
\v 7 Mɑɑ liɣiti piitimnɑɑ kɛ yem yem. Mɑɑ kɔnɑ mə wɛnɑʋ kɛ cənɛ. Mɑɑ yele nɑ Ɩsɔ təsɛɛlɛ lɑ teu kɛ sɔsɔm. 
\v 8 Pə tɑɣɑ pʋlʋ, mɑ tənnɑ ɑntulinyɑ wʋlɑ nɑ pə liɣitee tənɑ. 
\v 9 Ɩlɛ Ɩsɔ təsɛɛlɛ nɑɑlɛ nyəntɛ kɑ́ tɛɛ kɑncɑɑlɑɣɑ nyəntɛ kɛ teu təkpɑtɑɑ. Lonte tənɛ tə tɑɑ kɛ́ mɑɑ yele nɑ ɩ́ hɛɛsɩ. Pə tənɑ pə tʋ Tɑcɑɑ mɑ́ mɑ yɔɣɔtənɑ mpʋ.
\s1 Yəlɑɑ ɑsilimɑ
\p
\v 10 Ḿpʋɣʋ Tɑliyusi kɑwulɑɣɑ pənɑɣɑ nɑɑlɛ nyəŋkɑ, ɩsɔtʋ pɔɣɔlɑɣɑfɛɩ nyəŋ, kʋyɑkʋ hiu nɑ liɣiti nyəŋkʋ wule. Pə tənɑ pə tʋ Tɑcɑɑ tɑsɑ Asee kɛ tɔm heeluɣu 
\v 11 Sɩ: Pɔɔsɩ kɔtəlɑɑ sɩ 
\v 12 ntɑnyɩ mə tɑɑ nɔɣɔlʋ tʋ kɔtɑɣɑ nɑntʋɣʋ ntɛ́ ɩ toko tɑɑ. Ɩlɛnɑ toko ɩnɩ ɩ́ tokinɑ potopoto yɑɑ tuusi hɑtʋ, yɑɑ sʋlʋm yɑɑ nim yɑɑ tɔɣɔnɑɣɑ nɑkəlɩ. Pə mʋnɑɑ sɩ ɩ́ tɑsɑ-kɛɣɛ Ɩsɔ kɛ́ hɑʋ nɑ? Ntɛnɑ kɔtəlɑɑ sɩ: Aɑɩ.
\p
\v 13 Ɩlɛnɑ Asee tɑsɑ sɩ: Ye nɔɣɔlʋ tokinɑ sətʋ ɩlɛnɑ pʋntʋ tokinɑ tɔɣɔnɑɣɑ. Kɑɑ pəsɩ ɑsilimɑ nyəŋkɑ nɑ? Ntɛnɑ kɔtəlɑɑ sɩ: Ɛɛ.
\p
\v 14 Mpʋɣʋlɛ Asee tɔmɑ sɩ: Tɑcɑɑ sɩ, ḿpʋɣʋ mɑ nyənəɣɩ tɛtʋ tənɛ tə yəlɑɑ, nɑ mə kʋlɑpəm tənɑ. Pə tənɑ mpi ɩ́ lɑkɩ-m kɔtɑɣɑ tɔ pə kɛ́ ɑsilimɑ kɛ́.
\s1 Ɩ́ pɑɑsənɑ teu kɛ pə kpɑɣɑʋ sɑŋɑ tɔ
\p
\v 15 Mpʋ tɔ, ɩ́ pɑɑsənɑ teu. Ɩ́ nɑ́ mpi too pə́ kpɑɣɑ lɑpʋ nɑ pə́ sɩɩnɑ sɑŋɑ, nɑ pə́cɔ́ ɩ́ kpeɣeli pɛɛ nɑ Ɩ́ ŋmɑɑkɩ Ɩsɔ təsɛɛlɛ tɔ. 
\v 16 Wɑɑtʋ ɩnɩ tɔ, ye nɔɣɔlʋ polɑ kpóú lɔʋ kɛ tɔkəŋ hiu. Nɑɑnʋwɑ tike kɛ ɩ kɑ́ mɑɣɑnɑ. Yɑɑ wei ɩ́ polɑ sʋlʋm liitilinɑɑ nɩɩlɛ nɑ nɑɑnʋwɑ kɛ́ cosuɣu hiu tike kɛ ɩ kɑ́ mɑɣɑnɑ. 
\v 17 Mɑ yelinɑ nɑ mə tɔɣɔnɑɣɑ pee nyəŋkɑ wʋlɩ nɑ tɔmpɛɛ wɑkəlɩ mə kʋtɔɣɔʋ. Pɑɑ nɑ mpʋ mə tɑɑ nɔɣɔlʋ tɑ pəsənɑ mɑ tɔɔ. 
\v 18 Pə kpɑɣɑʋ sɑŋɑ tɔ ɩ́ pɑɑsənɑ teu kɛ mpi pɩɩ lɑ tɔ. Mpi tɔ, ɩsɔtʋ pɔɣɔlɑɣɑfɛɩ nyəŋ kʋyɑkʋ hiu nɑ liɣiti nyəŋkʋ kʋnɛɣɛ ɩ́ sɩɩ Ɩsɔ təsɛɛlɛ kite. Ɩ́ pɑɑsənɑ-təɣɩ teu. 
\v 19 Ntɔŋ pʋlʋ tɑ kɑɑsɩ kpeeŋ tɑɑ? Pɑɑ mə tɩɩŋ kʋtɔtɔɣɔŋ, ɩ tɑ lʋlɩ. Amɑ pə kpɑɣɑ sɑŋɑ wɑɑlɩ tɔ, mɑɑ kooli-mɛɣɛ kʋpɑntʋ.
\s1 Tɑcɑɑ nɔɔsɩ kʋpɑŋsɩ
\p
\v 20 Ḿpʋɣʋ Tɑcɑɑ tɑsɑ Asee kɛ heeluɣu kɛ tɔm nɑɑlɛ nyəm kɛ kʋyɑkʋ kʋlʋmʋɣʋ ŋkʋ sɩ: 
\v 21 Heeli Yutɑ wulɑʋ Solopɑpɛɛlɩ sɩ, mɑɑ ciɣiti ɩsɔtɔnʋɣʋ nɑ tɛtʋ. 
\v 22 Mɑɑ kʋsɩ ɑtɛ ɑwulɑɑ, nɑ mɑ yele nɑ ɑtɛ kɑwulɑsɩ sɩɩ tənɑɣɑ. Mə kɛɛkɛnɑɑ nɑ pɑ cɑɣɑlɑɑ kɑ́ pəsɩ nyɑɣɑɩnɑɑ, nɑ kpɑɣɑnəŋ nɑ́ɑ́ sɩ. Kpɑɣɑnəŋ cɑɣɑlɑɑ kɑ́ kʋ təmɑ. 
\v 23 Amɑ kʋyɑkʋ ŋkʋ mɑ təmlɛ tʋ Solopɑpɛɛlɩ nyɑɣɑ mɑɑ kpɑ wulɑʋ nɑ ń wɛɛ ɩsɩɩ mɑ kʋyʋsʋɣʋ. Mpi tɔ, nyɑɣɑ mɑ kpɑwɑ sɩ ń tɔɣɔ kɑwulɑɣɑ nɑ mɑ hətɛ. Pə tənɑ pə tʋ Tɑcɑɑ mɑ́, mɑ yɔɣɔtənɑ mpʋ.