\id GAL - Lokpa Bible portions [dop] -Benin 1999 (web edition -2017)
\ide UTF-8
\h Kɑlɑtɩ
\toc1 TAKƎLAƔA ŊKA PƆƆLƖ NMAAWA KALATƖ NYƎ́MA TƆ
\toc2 Kɑlɑtɩ
\toc3 Kɑl
\mt2 TAKƎLAƔA ŊKA PƆƆLƖ NMAAWA
\mt1 KALATƖ
\mt2 NYƎ́MA TƆ
\imt1 Kʋtʋlʋtʋ
\ip Pɔɔlɩ ŋmɑɑ tɑkǝlɑɣɑ kɑnɛɣɛ Kɑlɑtɩ Ɩsɔ sɛɛlɑɑ mpɑ ɩ mɑɣɑmɑɣɑ ɩ ponɑ Lɑɑpɑɑlɩ kʋpɑŋ nɑ pɑ mʋ tɔ. Ɩ kɑ nɩɩwɑɣɑ sɩ yǝlɑɑ kɔmɑ nɑ pɑ sɛɣɛsǝɣɩ-wɛɣɛ Yutɑ nyǝ́mɑ kʋlɑpʋtʋ. Ɩlɛ ɩ lɑŋlɛ tɑ hɛɛnɑ pɑ kʋsɛɣɛsǝtʋ ntɩ. Pǝ tɔɔ kɛ́ ɩ tɔmɑ sɩ: Lɑɑpɑɑlɩ Kʋpɑŋ wei mɑ heelɑ-mɛ tɔ ɩ tɑ kɛ wei yʋlʋ lupɑ kʋlupu tɔ (1:11). Ɩ yɔɣɔtɑɑ tɔtɔ sɩ Ɩsɔ pɛɛlɛɛ yɑkǝnɑ yʋlʋ, pǝ tɑɣɑ kʋlɑpʋtʋ tǝŋʋɣʋ tɔɔ. Pǝ tɔɔ kɛ́ pǝ wɛɛ sɩ tǝ tǝŋ Feesuɣu Nɑŋŋtʋ nyǝntʋ pǝ tɑɣɑ yǝlɑɑ nyǝntʋ.
\iot Ɩsǝnɑ pɑ fɑɣɑ Kɑlɑtɩ tɑkǝlɑɣɑ tɔ:
\io1 Lɑɑpɑɑlɩ Kʋpɑŋ wɛ kʋlʋm kɛ́, titite \ior 1–2\ior*
\io1 Ɩsɔ pɛɛlɛɛ yɑkǝnɑ yʋlʋ nyʋɣʋ, titite \ior 3\ior*
\io1 Ɩsɔ sɛɛlʋ wei ɩ fitɑ yomle tɔ nɑ ɩ kʋlɑpǝlɛ, titite \ior 4–5\ior*
\io1 Kʋtǝkǝtʋ, titite \ior 6\ior*
\c 1
\s1 Sɛɛtʋ
\p
\v 1 Mɑɣɑ tillu Pɔɔlɩ, ɩlɛ pǝ tɑɣɑ ɩsɩɩ yǝlɑɑ tʋnɑ-m tiluɣu. Pǝyele pǝ tɑɣɑ ɩsɩɩ yʋlʋ nɔɣɔlʋ ɩ tɛlǝsǝnɑ-m tiluɣu mpɩ. Amɑ Yesu Kilisiti nɑ Cɑɑ Ɩsɔ wei ɩ kɑ feesɑ-ɩ wɑɑtʋ wei ɩ sǝpɑ tɔ mpɛ pɑ mɑɣɑmɑɣɑ pɑ tʋnɑ-m-wɩ. 
\v 2 Mɑ́ nɑ mɑ tɑɑpɑlɑɑ mpɑ pɑ tǝnɑ pɑ wɛ cǝnɛ tɔ tǝ tɑmsǝnɑ nɑ tǝ́ ŋmɑɑ tɑkǝlɑɣɑ kɑnɛɣɛ Kɑlɑtɩ Yesu sɛɛlɑɑ kpekɑ mɛ sɩ tǝ sɛɛkɩ-mɛ. 
\v 3 Tɑcɑɑ Ɩsɔ nɑ tɑ́ Sɔsɔ Yesu Kilisiti pɑ́ hʋ́lɩ́-mɛɣɛ pɛɛlɛɛ nɑ pɑ́ hɑ-mɛɣɛ ɑlɑɑfǝyɑ. 
\v 4 Kilisiti ɩnɩ ɩ hɑnɑ ɩ tɩ sɩ ɩ́ yɑ-tʋɣʋ tɑ́ ɩsɑɣɑtʋ tɑɑ nɑ ɩ́ lǝsɩ-tʋɣʋ kʋyɛɛŋ kʋtɑkɛɛsǝŋ ɩnɛ ɩ tɑɑ, nɑ mpʋ ɩnɩ pǝ kɛ́ Tɑcɑɑ luɣu nyǝntʋ kɛ́. 
\v 5 Tǝ́ tʋ́ Ɩsɔ kɛ́ teeli kɛ tɑm tɔɔ. Ami.
\s1 Lɑɑpɑɑlɩ kʋlʋm ɩnǝɣǝlɛ kʋlʋm tǝkoŋ
\p
\v 6 Mɑ tɑ hʋʋ sɩ ɩ́ kɑ́ hɑ siɣile kɛ ḿpʋ́ɣʋ́ lɔŋ kɛ wei ɩ yɑɑ-mɛɣɛ Kilisiti pɛɛlɛɛ tɔɔ tɔ nɑ ɩ́ tǝŋ Lɑɑpɑɑlɩ Kʋpɑŋ lɛlʋ, mɑ tutɑɑ kɛ́. 
\v 7 Mɑ yɔɣɔtʋɣʋ mpʋ tɔ pǝ tɑɣɑ ɩsɩɩ Lɑɑpɑɑlǝnɑɑ Kʋpɑmɑ wɛ nɑɑlɛ se. Amɑ mɑ nɑwɑɣɑ sɩ yǝlɑɑ wɛɛ nɑ pɑ́ lɑkɩ-mɛɣɛ yɛlɛyɛlɛ nɑ pɑ́ cɑɑ pɑ kɛɛ Kilisiti Lɑɑpɑɑlɩ Kʋpɑŋ ɩnɩ. 
\v 8 Ye nɔɣɔlʋ kɔmɑ nɑ ɩ́ heeli-mɛɣɛ Lɑɑpɑɑlɩ kʋfɑlʋ nɔɣɔlʋ nɑ pǝ́ tɑ́ kɛ́ wei tǝ tɛmɑ-mɛɣɛ heeluɣu tɔ, Ɩsɔ kɑ́ nɑnɑ pʋntʋ pɑɑ ɩ kɛ́ ɑwe. Pɑɑ tɑ́ tɑɑ yʋlʋ mɑɣɑmɑɣɑ, pɑɑ ɩsɔtɑɑ tillu nɔɣɔlʋ mɑɣɑmɑɣɑ. 
\v 9 Tɩɩ tɛmɑ-mɛɣɛ heeluɣu nɑ mɑ tɑsǝɣɩ-mɛɣɛ heeluɣu kɛ mpʋ, sɩ ye nɔɣɔlʋ kɔmɑ nɑ ɩ́ heeli-mɛɣɛ Lɑɑpɑɑlɩ kʋfɑlʋ nɔɣɔlʋ nɑ pǝ́ tɑ́ kɛ́ wei ɩ́ tɛmɑ mʋɣʋ tɔ, Ɩsɔ kɑ́ nɑ́nɑ́ pʋntʋ.
\p
\v 10 Ɩlɛ pǝ lɩɩwɑ sɩ yǝlɑɑ ɩsɑntɛ ntɛ́ mɑ cɑɑ yɑɑ we? Aɑɩ, ɑmɑ Ɩsɔ ɩsɑntɛ kɛ mɑ pɛɛkǝɣɩ. Mɑ cɑɑ sɩ yǝlɑɑ lɑŋɑ ɩ́ hɛɛnɑ-m? Ye mɑɑ cɑɑkɑɣɑ sɩ yǝlɑɑ lɑŋɑ ɩ́ hɛɛnɑ-m mɑ tɑɑ lɑ Kilisiti tǝmlɛ tʋ.
\s1 Ɩsǝnɑ pǝ lɑpɑ nɑ Pɔɔlɩ pǝsɩ tillu tɔ
\p
\v 11 Mɑ tɑɑpɑlɑɑ mɑ heeliɣi-mɛ tǝfoo sɩ Lɑɑpɑɑlɩ Kʋpɑŋ wei mɑ heelɑ-mɛ tɔ ɩ tɑ kɛ wei yʋlʋ lupɑ kʋlupu tɔ. 
\v 12 Mɑ tɑ nɩɩ-tǝɣɩ yʋlʋ nɔɣɔlʋ ɩ kiŋ. Pǝ tɑɣɑ yʋlʋ nɔɣɔlʋ sɛɣɛsǝnɑ-m, ɑmɑ Yesu Kilisiti mɑɣɑmɑɣɑ kulinɑ tǝ tɔɔ nɑ mɑ́ nyɩ-tɩ.
\p
\v 13 Ɩ́ nɩɩ ɩsǝnɑ mɑ yɑɑsi kɑ wɛ wɑɑtʋ wei mɑɑ sɛɛsɑ ɩsǝlɛ nɑ Yutɑ nyǝ́mɑ Ɩsɔ sɛɛʋ tɔ. Nɑ ɩ́ nyǝ́mɑ́ ɩsǝnɑ mɑɑ nɑɑsɑɣɑ Ɩsɔ sɛɛlɑɑ kpekɑ tǝkɑŋkɑŋ nɑ mɑ́ sɛɛsɑ ɩsǝlɛ sɩ mɑ wɑkǝlǝɣɩ-wɛ tǝkpɑtɑɑ tɔ. 
\v 14 Mpɑ pɑɑ kɛ́ mɑ piitim nyǝ́mɑ nɑ pɑ́ kɛ́ mɑ sɑɑlɑnɑɑ tɔ pɑ tɑɑ nɔɣɔlʋ tɑ hɑŋnɑ-m pʋlʋɣʋ tɑ́ Yutɑ Ɩsɔ sɛɛʋ tɑɑ. Ɩsǝnɑ mɑɑ tǝŋɑɣɑ tɑ́ cɑɑnɑɑ kɔtɑsɩ tɔ pǝ fɛɩ kɛɛsʋɣʋ.
\p
\v 15 Amɑ Ɩsɔ suulu tɔɔ ɩ lǝsɑ-m nɑ mɑ mpɑɑ kɛ wɑɑtʋ wei pɑ tɑ tɩɩ lʋlǝtɑ-m tɔ, nɑ ɩ́ yɑɑ-m sɩ mɑ́ lɑ ɩ tǝmlɛ. 
\v 16 Pǝ kɔmɑ nɑ pǝ́ mɑɣɑ Ɩsɔ nɑ ɩ́ kuli ɩ Pǝyɑlʋ tɔɔ sɩ mɑ́ nyǝmɩ-ɩ tǝcɛɩcɛɩ, nɑ mɑ́ sɛɣɛsɩ mpɑ pɑ tɑ kɛ Yutɑ nyǝ́mɑ tɔɣɔ ɩ tɔm Lɑɑpɑɑlɩ Kʋpɑŋ tɔ mɑ tɑ polo nɔɣɔlʋ cɔlɔɣɔ sɑɑwɑlɑ lɑpʋ. 
\v 17 Pǝyele mɑ tɑ polo Yosɑlɛm sɩ mɑ nɑɑ mpɑ pɑ lɑpɑ tillɑɑ nɑ mɑ tɔɔ tɔ. Amɑ mɑ tɛɛ Alɑpʋ kɛ kpɑkpɑɑ, pǝlɛ pǝ wɑɑlɩ ɩlɛnɑ mɑ́ mǝlɩ Tɑmɑsɩ. 
\v 18 Pǝlɛ pǝ wɑɑlɩ pǝ lɑpɑ pɩɩsɩ tooso tɔɣɔ mɑ polɑ Yosɑlɛm sɩ mɑ nyǝŋ Piyɛɛ. Ɩlɛnɑ mɑ́ nɑ ɩ́lɛ́ tǝ́ cɑɣɑ wɛɛ nɑɑnʋwɑ nɑ kɑkpɑsɩ. 
\v 19 Mɑ nɑ tillɑɑ tɑɑ nɔɣɔlʋ tǝ tɑ nɑ ye pǝ tɑɣɑ Tɑcɑɑ neu Sɑɑkɩ.
\p
\v 20 Tɑmpɑnɑ tɔm kɛ mɑ kɛɛsǝɣɩ-mɛɣɛ tɑkǝlɑɣɑ tɑɑ cǝnɛ, nɑ Ɩsɔ mɑɑ looliɣi.
\p
\v 21 Pǝlɛ pǝ wɑɑlɩ mɑ cɔɔ Silii nɑ Silisii pɑ tɛtʋnɑɑ tɑɑ. 
\v 22 Pǝ nɑ pǝ mpʋ tɔ Yutɑ tɛtʋ tɑɑ Yesu sɛɛlɑɑ kpekɑ tɑ keesitɑ-m. 
\v 23 Amɑ pɑ yɔɣɔtɑ mɑ tɔm kɛ́ nɑ mpɛ pɑ́ nɩɩ kʋnɩɩ, sɩ wei ɩnɩ ɩ kɑ nɑɑsɑɣɑ-tʋ tɔ kɑɣɑnɑ ɩ tɔŋnɑ Ɩsɔ sɛɛʋ mpi ɩ kɑ sɛɛsɑ ɩsǝlɛ sɩ ɩ́ wɑkǝlɩ tǝkpɑtɑɑ tɔ pǝ wɑɑsʋ lɑpʋ. 
\v 24 Nɑ pɑ́ sɑŋ Ɩsɔ kɛ́ mɑ tɔɔ.
\c 2
\s1 Pɔɔlɩ nɑ tillɑɑ lɛlɑɑ
\p
\v 1 Pǝ lɑpɑ pɩɩsɩ nɑɑnʋwɑ nɑ liɣiti ɩlɛnɑ mɑ́ mǝlɩ Yosɑlɛm, nɑ Pɑnɑpɑɑsɩ sɩɩ-m, nɑ mɑ́ kpɛnnɑ Titʋ tɔtɔ. 
\v 2 Pǝ tɑɣɑ pʋlʋ tɔɔ kɛ́ mɑ polɑ Yosɑlɛm, Ɩsɔ hʋlǝnɑ-m sɩ pǝ wɛɛ sɩ tǝlɑsɩ mɑ́ polo kɛ́. Mɑ nɑ tǝnɑ nyʋɣʋ nyǝ́mɑ tǝ kotɑ tɑ́ tike, ɩlɛnɑ mɑ́ kpɑɣɑ Lɑɑpɑɑlɩ Kʋpɑŋ wei mɑ lɑkɩ mpɑ pɑ tɑ kɛ Yutɑ nyǝ́mɑ tɔ ɩ tɔm nɑ mɑ́ kɛɛsɩ-wɛ tǝcɛɩcɛɩ. Mɑ luɣu tɑɑ fɛɩ sɩ mpi mɑ tɛmɑ lɑpʋ nɑ mpi mɑ tɔŋnɑ lɑpʋ tɔ pǝ́ pǝsɩ yem. 
\v 3 Nɑ Titʋ wei ɩ tǝŋɑ-m mpʋ nɑ ɩ́ kɛ́ Kǝlɛɛkɩ tʋ tɔ pɑ tɑ cɑɑlɩ-ɩ sɩ ɩ́ pɛlɩ. 
\v 4 Amɑ ɑcɛsɑɑcɛsɑɑ nyǝ́mɑ mpɑ pɑ sitɑ tɑ́ hɛkʋ tɔ pɛlɛ pɑ lʋpǝnɑ sɩ ɩ́ pɛlɩ. Acɛsɑɑcɛsɑɑ nyǝ́mɑ mpɛ, pɑ lɔɔlɑɑ kɛ́ tǝkɛʋ nɑ pɑ́ sʋʋ tɑ́ hɛkʋ, sɩ pɑ feŋiɣi nɑ pɑ́ nɑ́ tɑ́ nɑ Yesu Kilisiti tǝ kpɛntɑɑ nɑ tǝ wɛ kɑsɑɣɑmpiitu nti tǝ tɑɑ tɔ. Pɑ cɑɑkɑɣɑ kɛ́ sɩ pɑ́ pǝsɩ-tʋɣʋ yomɑɑ. 
\v 5 Amɑ tɑ́ tɑ́ hɑ-wɛɣɛ pǝ mpɑɑʋ kɛ pɑɑ pǝcɔ mɑɣɑmɑɣɑ. Tɑ́ sɔɔlɑɑ kɛ́ sɩ mǝ tɔɔ ɩlɛ tǝ́ tɔkɩ Lɑɑpɑɑlɩ Kʋpɑŋ tɑmpɑnɑ tǝkpɑŋkpɑŋkpɑ.
\p
\v 6 Mpɑ mɑ tɔŋ sɩ nyʋɣʋ nyǝ́mɑ kɛ mpʋ tɔ, tɔʋ, mɑ tɑ nyɩ sɩ tɑmpɑnɑ mpɛɣɛlɛ nyʋɣʋ nyǝ́mɑ yɑɑ we tɔ. Ɩlɛ pɑɑ pɑ tɩɩ kɛ́ mpɑ te, pǝ kʋlʋm. Ɩsɔ ɩlɛ ɩɩ nyǝnǝɣɩ tɔɔ tɔ se. Mpɛ ɩnɩ pɑ tɑɑ nɔɣɔlʋ tɑ tɑsɑ-m tɔm kʋfɑtʋ nɑtǝlǝɣɩ sɔɔsʋɣʋ sɩ mɑ́ lɑ. 
\v 7 Amɑ pɑ nɑwɑɣɑ tǝkelekele sɩ Ɩsɔ tʋ-m tǝmlɛ sɩ mɑ́ heeli Lɑɑpɑɑlɩ Kʋpɑŋ kɛ mpɑ pɑ tɑ kɛ Yutɑ nyǝ́mɑ tɔɣɔ teitei ɩsɩɩ ɩ tʋ Piyɛɛ ɩlɛ sɩ ɩ́ heeli Lɑɑpɑɑlɩ Kʋpɑŋ kɛ Yutɑ nyǝ́mɑ tɔ. 
\v 8 Ɩsɩɩ Ɩsɔ kpɑʋ Piyɛɛ kɛ tillu sɩ ɩ́ pɑɑsǝnɑ Yutɑ nyǝ́mɑ tɔ mpʋ tɔtɔɣɔ ɩ kpɑ mɑɣɑ tillu sɩ mɑ́ pɑɑsǝnɑ mpɑ pɑ tɑ kɛ Yutɑ nyǝ́mɑ tɔ. 
\v 9 Sɑɑkɩ nɑ Piyɛɛ nɑ Yohɑɑnɩ, mpɑ mpɛ pɑ nyǝnǝɣɩ mpʋ sɩ pɑ nyʋɣʋ nyǝ́mɑ tɔ, pɛlɛ pɑ nɑwɑ sɩ Ɩsɔ pɑɑsɑɑ kɛ́ nɑ ɩ́ tʋ tǝmlɛ ntɛɣɛ mɑ niŋ tɑɑ nɑ tǝ mpɑɑ. Ɩlɛnɑ pɑ́ kpɑ mɑ́ nɑ Pɑnɑpɑɑsɩ tɑ́ niŋ tɑɑ nɑ pɑ́ ciɣiti. Tǝ lɑpɑ nɔɣɔ kʋlʋmɑɣɑ kɛ mpʋ, ɩlɛnɑ tɑ́ tǝnɑ tǝ́ yɔɣɔtɩ nɑ tǝ́ tisi tǝmɑ sɩ tɑ́ɑ́ mǝlǝnɑ mpɑ pɑ tɑ kɛ Yutɑ nyǝ́mɑ tɔ pɑ kiŋ nɑ mpɛ pɑ́ polo Yutɑ nyǝ́mɑ kiŋ. 
\v 10 Amɑ nti pɑ wiinɑ-tʋ tɔɣɔlɛ sɩ, tǝ́ tɔɔsɩ pɑ kʋnyɔntʋnɑɑ mpɛ pɑ tɔɔ, nɑ mɑ lɑpɑ teu kɛ nti pɑ yɔɣɔtɑ mpʋ sɩ tǝ́ lɑ tɔ.
\s1 Pɔɔlɩ kɑlǝnɑʋ kɛ Piyɛɛ kɛ Antiyɔkɑ
\p
\v 11 Wɑɑtʋ wei Piyɛɛ kɔmɑ Antiyɔkɑ tɔ mɑ yoonɑ-ɩ yǝlɑɑ tɑɑ kɛ́ ɩ toolɑ mpɑɑʋ tɔ pǝ tɔɔ. 
\v 12 Nti tǝ tɑɑ ɩ toolɑɑ tɔɣɔlɛ sɩ, Sɑɑkɩ kɑ tilɑ nɑpǝlɩ, nɑ wɑɑtʋ wei pɛlɛ pɑ tɑ tɑtɑ tɔ, Piyɛɛ nɑ tɑ́ tɑɑpɑlɑɑ mpɑ pɑ tɑ kɛ Yutɑ nyǝ́mɑ tɔ pɑ tɔkɑɣɑnɑ. Amɑ pɛlɛ pɑ kɔmɑ nɑ pɑ́ tɑlɑ, ɩlɛnɑ ɩ́ se mpɑ pɑ tɑ kɛ Yutɑ nyǝ́mɑ tɔ pɑ cɔlɔɣɔ tɔɣɔʋ. Pǝ tɑɣɑ pʋlʋ, ɩ nyɑŋɑɣɑnɑ mpɑ pɑ sɔɔlɑ pɛlʋɣʋ tɔm tɔ. 
\v 13 Tɑ́ tɑɑpɑlɑɑ Yutɑ nyǝ́mɑ mpɑ pǝ kɑɑsɑɑ tɔ pɛlɛ pɑ tǝŋɑ Piyɛɛ ɩkpɑtɛ tɔtɔ, hɑlǝnɑ pǝ́ kpɛŋnɑ Pɑnɑpɑɑsɩ nɑ pɑ́ tɛlǝsɩ ɩlɛɣɛ pɑ ɩcɑntʋ ntɩ. 
\v 14 Sɑɑ wei mɑ nɑwɑ sɩ pɑ tɔntɛ tɑ mɑɣɑ nɑ pɑ tɑ tǝŋ Lɑɑpɑɑlɩ Kʋpɑŋ tɑmpɑnɑ kɛ teitei tɔ, mɑ tɔmɑ Piyɛɛ kɛ yǝlɑɑ tǝnɑ ɩsɛntɑɑ sɩ: N kɛ́ Yutɑ tʋ pǝyele n lɑpɑ cǝnɛɣɛ ɩsɩɩ wei ɩ tɑ kɛ Yutɑ tʋ tɔ, n tɑ lɑ ɩsɩɩ Yutɑ tʋ kɑ lɑ tɔ. Ɩlɛ ɩsǝnɑɣɑ n nyǝmɑ́ sɩ nɔɔnɔɔ n kɑ́ lɑ nɑ ń cɑɑlɩ mpɑ pɑ tɑ kɛ Yutɑ nyǝ́mɑ tɔ sɩ pɑ́ lɑ ɩsɩɩ Yutɑ nyǝ́mɑ?
\s1 Tɑ́ɑ́ tɛm nɑ Ɩsɔ yɑkǝnɑ pɑɑ wei ɩ nyʋɣʋ
\p
\v 15 Tɑ́ mɑɣɑmɑɣɑ tǝ kɛ́ Yutɑ nyǝ́mɑ kɛ́ tǝsiɣisiɣi, tǝ tɑ kɛ ɑsɑɣɑɑ ɩsɩɩ piitim lɛmpɩ nyǝ́mɑ. 
\v 16 Pɑɑ nɑ mpʋ tǝ nyǝmɑ́ sɩ pǝ tɑɣɑ ɩsɩɩ yʋlʋ tǝŋʋɣʋ kʋsǝsɩɩtʋ tɔɣɔ Ɩsɔ nyǝnǝɣɩ-ɩ yʋlʋpɑŋ. Amɑ ɩ tɛŋʋɣʋ ɩ tɑɑ nɑ Yesu Kilisiti tɔɣɔ. Tɑ́ mɑɣɑmɑɣɑ ɩsǝntɔ, tɑ́ tɛmnɑ Yesu Kilisiti ɩnǝɣɩ tɑ́ tɑɑ kɛnɑ Ɩsɔ nyǝnǝɣɩ-tʋɣʋ yʋlʋpɑmɑ. Tǝ tɛmɑ tɑ́ tɑɑ nɑ Yesu Kilisiti tɔɣɔ yoo, pǝ tɑɣɑ kʋsǝsɩɩɩtʋ tǝŋʋɣʋ tɔɔ. Pǝ tɑɣɑ pʋlʋ, Ɩsɔ kɑɑ nyǝnɩ nɔɣɔlʋɣʋ yʋlʋpɑŋ kɛ ɩ kʋsǝsɩɩtʋ tǝŋʋɣʋ tɔɔ. 
\v 17 Ye tǝ lʋkɩ sɩ Kilisiti tɔɔ pɑ nyǝnǝɣɩ-tʋɣʋ yʋlʋpɑmɑ tɔɣɔ pǝ nɑɑ sɩ tǝ kɛ́ ɑsɑɣɑɑ ɩsɩɩ mpɑ pɑ tɑ kɛ Yutɑ nyǝ́mɑ tɔ, ɩlɛ pǝ wɛɛ sɩ Kilisiti kɛlɛ ɩsɑɣɑtʋ cɑɑ yɑɑ ɩsǝnɑ? Aɑɩ, pǝ tɑɣɑ ḿpʋ́ɣʋ́ pɑɑ pǝcɔ. 
\v 18 Ye mɑ kʋlɑɑ nɑ mɑ́ tɑɣɑnǝɣɩ ŋmɑʋ kɛ mpi mɑ tɛmɑ yɔkʋɣʋ tɔ, pǝlɛ pǝ hʋ́lǝ́ɣɩ́ kɛ́ sɩ mɑ tɑ kɛ kʋsǝsɩɩtʋ tǝŋlʋ nɔɣɔlʋ. 
\v 19 Ye kʋsǝsɩɩtʋ tɔm tɑɑ, mɑ sǝpɑɣɑ tǝnɑŋnɑŋ, nɑ kʋsǝsɩɩtʋ ntɩ tǝ mɑɣɑmɑɣɑ tǝ kʋnɑ-m mpʋ. Nɑ pǝ lɑpɑ-m ḿpʋ́ɣʋ́ sɩ mɑ́ wɛɛ Ɩsɔ tike tɔɔ. Pɑ kʋ mɑ́ nɑ Kilisiti kɛ sǝm tesikɑ tɔɔ. 
\v 20 Nɑ mɑ wɛʋ ɩsǝntɔɣɔ kɑɣɑnɑ tɔ pǝ tɑɣɑ mɑ mɑɣɑmɑɣɑ mɑ wɛnnɑ. Amɑ Kilisiti wɛnnɑ mɑ tɑɑ. Weesuɣu ŋku mɑ wɛnɑ sɑŋɑ tɑɑ ɩsǝntɔ tɔ mɑ tɛŋ mɑ tɑɑ nɑ Ɩsɔ Pǝyɑlʋ tɔɣɔ mɑ wɛnɑ-kʋ. Ɩsɔ Pǝyɑlʋ ɩnɩ ɩ sɔɔlǝnɑ-m nɑ ɩ́ sɩ mɑ sǝm. 
\v 21 Mɑɑ kpɑlǝɣɩ Ɩsɔ kʋcɔɔʋ se. Ye kʋsǝsɩɩtʋ kɑ yekɑɣɑnɑ nɑ yʋlʋ pǝsǝɣɩ kʋpɑŋ kɛ Ɩsɔ ɩsɛntɑɑ, ɩlɛ pǝ wɛ ɩsɩɩ Kilisiti sǝpɑ yem kɛlɛ.
\c 3
\s1 Kʋsǝsɩɩtʋ nɑ tɑ́ɑ́ tɛm nɑ Ɩsɔ pǝ tɔm
\p
\v 1 Aɑɑ, Kɑlɑtɩ kʋmɛlɛmǝŋ mɛ, ɩlɛ nɔɣɔlʋ nyɑlɑ-mɛɣɛ kʋnyɑlʋ yɑɑ ɩsǝnɑ? Anɩ mɛɣɛ pɑ tɛmɑ kɛɛsʋɣʋ kɛ Kilisiti tesikɑ tɔɔ sǝm tɔm tǝkelekele kɛ teu. 
\v 2 Ɩlɛ tɔm kʋlʋmtʋ tǝkoŋ kɛ́ mɑ pɔɔsǝɣɩ-mɛ, sɩ ɩ́ tǝŋʋɣʋ Ɩsɔ kʋsǝsɩɩtʋ tɔɣɔ ɩ́ hikɑ Ɩsɔ Feesuɣu yɑɑ ɩ́ nɩɩʋ Lɑɑpɑɑlɩ Kʋpɑŋ nɑ ɩ́ mʋ-ɩ tɔɣɔ ɩ́ hikɑɑ? Ɩ́ cɔ-m nɑ mɑ́ nɩɩ. 
\v 3 Mǝ kʋmɛlɛntʋ tɔɔ ḿpʋ́ɣʋ́? Ɩsɔ Feesuɣu toŋ kɛ ɩ́ hikinɑ mǝ tǝɣɩ kɑncɑɑlɑɣɑ, ɩlɛnɑ nɔɔnɔɔ ɩ́ cɑɑ ɩ́ tɛɛsǝnɑ mǝ mɑɣɑmɑɣɑ mǝ toŋ nɑ? 
\v 4 Pǝ lɑpɑ pǝ lɑpɑ mǝ hɛkʋ nɑ ɩ́ hii lɑɣɑtʋnɑɑ mpɑ tɔ pɛlɛ pɑ pǝsɑ yem kɛlɛ yɑɑ? Aɑɩ, pǝ kɑɑ pǝsɩ yem kɛ́ mpʋ mɛɛ. 
\v 5 Ɩsɩɩ Ɩsɔ cɛlʋɣʋʋ-mɛɣɛ ɩ Feesuɣu nɑ ɩ́ lɑkɩ piti tǝmɑ kɛ mǝ hɛkʋ kɛ mpʋ tɔ, mǝ kʋsǝsɩɩtʋ tǝŋʋɣʋ tɔɔ, yɑɑ mǝ Lɑɑpɑɑlɩ Kʋpɑŋ nɩɩʋ nɑ ɩ mʋɣʋ tɔɔ kɛ́ pǝ lɑkɩ mpʋ?
\p
\v 6 Mpʋ ɩnɩ pǝ yelinɑ nɑ pɑ́ ŋmɑɑ Apǝlɑhɑm tɔm kɛ Ɩsɔ Tɔm tɑɑ sɩ: Ɩ tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́lɛ́ ɩ́ yɑɑ-ɩ yʋlʋpɑŋ nɑ ɩ́ mʋ-ɩ. 
\v 7 Pǝ tɔɔ kɛ́ ɩ́ kɑ́ nyɩ teu sɩ, mpɑ pɑ tɛmɑ pɑ tɑɑ nɑ Ɩsɔ tɔɣɔlɛ Apǝlɑhɑm piyɑ tǝsiɣisiɣi. 
\v 8 Pǝ mɑɣɑmɑɣɑ pǝ tɩɩ wɛ Ɩsɔ Tɔm tɑɑ kɛ́ mpʋ sɩ: Mpɑ pɑ tɑ kɛ Yutɑ nyǝ́mɑ tɔ pɑɑ kɔɔ nɑ pɑ́ tɛ pɑ tɑɑ nɑ Ɩsɔ, ɩlɛnɑ pɑ́ pǝsɩ yʋlʋpɑmɑ. Nɑ pǝ tɔɔ ɩnǝɣɩ hɑtuu lɔŋ Ɩsɔ heelɑ Apǝlɑhɑm kɛ tɔm kʋpɑntʋ tǝnɛ nɑ tǝ́ wɛ ŋmɑɑtʋ tɑɑ sɩ: Nyɑ́ tɔɔ kɛ́ Ɩsɔ kɑ́ lɑ ɑtɛ yǝlɑɑ tǝnɑɣɑ kʋpɑntʋ. 
\v 9 Apǝlɑhɑm tɛmɑ Ɩsɔ nɑ ɩ tɑɑ nɑ Ɩsɔ lɑpɩ-ɩ kʋpɑntʋ. Nɑ mpʋ tɔtɔɣɔ pɑ tǝnɑ mpɑ pɑ tɛŋ pɑ tɑɑ nɑ Ɩsɔ tɔ, ɩ́lɛ́ ɩ lɑkɩ-wɛɣɛ kʋpɑntʋ kɛ mpʋ tɔtɔɣɔ.
\p
\v 10 Mpɑ pɑ wɛɛ nɑ pɑ́ tɛɛlǝɣɩ sɩ pɑ kʋsǝsɩɩtʋ tǝŋʋɣʋ tɔɔ kɛ́ pɑ hikiɣi kʋpɑntʋ tɔ pɑ́ nɑ mpusi kɛlɛ. Tǝ mɑɣɑmɑɣɑ kɛ pɑ yɔɣɔtɑ Ɩsɔ Tɔm tɑɑ sɩ: Mpusi tʋ ntɛ wei ɩɩ tǝŋǝɣɩ pǝ tǝnɑ mpi pɑ ŋmɑɑwɑ kʋsǝsɩɩtʋ tɑkǝlɑɣɑ tɑɑ tɔɣɔ tɑm tɔ. 
\v 11 Pǝ tɩɩ nɑɑkɩ mpʋ tǝkelekele sɩ nɔɣɔlʋ kɑɑ pǝsɩ yʋlʋpɑŋ kɛ Ɩsɔ ɩsɛntɑɑ kɛ́ kʋsǝsɩɩtʋ tǝŋʋɣʋ tɔɔ. Amɑ pɑ ŋmɑɑ Ɩsɔ Tɔm tɑɑ tǝkpɑtɑɑ sɩ: Wei ɩ kɛ́ yʋlʋpɑŋ kɛ Ɩsɔ ɩsɛntɑɑ sɩ ɩ tɛmɑ ɩ tɑɑ tɔ pǝ tɔɔ tɔ, pʋntʋ tike tʋlǝɣǝnɑ-tɩ. 
\v 12 Pǝ tɑɣɑ pʋlʋ tɔɔ, kʋsǝsɩɩtʋ tǝŋʋɣʋ nɑ tɑ́ɑ́ tɛmnɑʋ kɛ Ɩsɔ tɑ́ kɑɑ pʋlʋ. Amɑ pǝ wɛɛ kɛ́ ɩsɩɩ pɑ yɔɣɔtʋɣʋ Ɩsɔ Tɔm tɑɑ tɔ sɩ: Wei ɩ tɔkɑ kʋsǝsɩɩtʋ tɔmnɑɑ tǝnɑ tɔ, pʋntʋ kɑ́ tʋlɩ-tǝɣɩ tǝ tɔɔ.
\p
\v 13 Ɩsǝnɑ Kilisiti lɑpɑ nɑ ɩ́ sǝɣǝlɩ tɑ́ mpusi kɛ ɩ mɑɣɑmɑɣɑ ɩ nyʋɣʋ tɑɑ tɔ pǝ tɔɔ kɛ́ ɩ pǝsɑɑ nɑ ɩ́ lǝsɩ kʋsǝsɩɩtʋ mpusi ɩnǝɣɩ tɑ́ tɔɔ. Tǝ mɑɣɑmɑɣɑ kɛ pɑ yɔɣɔtɑ Ɩsɔ Tɔm tɑɑ sɩ: Ye pɑ lɑɑlɑɑ nɑ pɑ́ pusi wei nɑ tʋɣʋ, mpusi tʋ kɛ́. 
\v 14 Pǝ lɑpɑ ḿpʋ́ɣʋ́ sɩ kʋpɑntʋ nti Ɩsɔ kɑ tɔmɑ sɩ ɩ lɑkɩ Apǝlɑhɑm tɔ, ɩ́ lɑ-tǝɣɩ mpɑ pɑ tɑ kɛ Yutɑ nyǝ́mɑ tɔɣɔ Yesu Kilisiti tɔɔ. Nɑ tɑ́ tɑ́ɑ́ tɛmnɑʋ kɛ Ɩsɔ yelinɑ nɑ tǝ́ hiki Feesuɣu Nɑŋŋtʋ wei Ɩsɔ kɑ tɔmɑ sɩ ɩ kɑ́ hɑ-tʋ tɔ.
\s1 Kʋsǝsɩɩtʋ nɑ Ɩsɔ kʋpɑntʋnɑɑ pǝ tɔm
\p
\v 15 Mɑ tɑɑpɑlɑɑ mɑ kɛɛsǝɣɩ-mɛɣɛ yǝlɑɑ tɑ́ tɑ kʋlɑpʋtʋ nɑ ɩ́ cɛkǝnɑ. Ye yʋlʋ cɑɣɑɑ nɑ ɩ́ tɑɣɑnɩ pǝ tǝnɑ tǝmɑmɑm kɛ́ ɩsǝnɑ ɩ cɑɑ pɑ́ lɑnɑ ɩ wɛnɑʋ kɛ ɩ sǝm wɑɑlɩ, nɑ ɩ́ tʋ tɑkǝlɑɣɑ tɑɑ nɑ ɩ́ sɩɩ, nɔɣɔlʋ ɩɩ pǝsǝɣɩ nɑ ɩ́ kʋ-tɩ yɑɑ ɩ́ sɔɔsɩ ɩ nyǝntʋ kɛ tǝ tɔɔ. 
\v 16 Aŋhɑ, ḿpʋ́ɣʋ́ pǝ wɛɛ nɑ nti Ɩsɔ kɑ tɔmɑ sɩ ɩ kɑ́ lɑ Apǝlɑhɑm nɑ ɩ pǝyɑɣɑ tɔ. Pɑ tɑ ŋmɑɑ Ɩsɔ Tɔm tɑɑ sɩ ɩ piyɑ, sɩ pǝ tɑɑ kɔɔ nɑ pǝ́ lɑ́ ɩsɩɩ yǝlɑɑ pɑɣɑlɛ. Amɑ pɑ tɔmɑɣɑ sɩ: Nyɑ́ pǝyɑɣɑ, sɩ pǝ́ hʋ́lɩ́ sɩ yʋlʋ kʋlʋm kɛ pɑ pɑɑsǝnɑɑ, nɑ yʋlʋ ɩnǝɣǝlɛ Kilisiti. 
\v 17 Nti mɑ cɑɑ mɑ hʋ́lɩ́ tɔɣɔlɛ sɩ: Ɩsɔ kɑ tɑɣɑnɑ nti ɩ cɑɑ ɩ́ nɑ ɩ yǝlɑɑ pɑ́ lɑ tɔ, hɑlǝnɑ ɩ́ tɔ sɩ ɩ kɑ́ tɔkɩ ɩ nɔɣɔ sɩɩʋ. Pǝ kɔmɑ nɑ pɩɩsɩ lɑ nɑsǝlɛ nɑ hiu nɑ nɑɑnʋwɑ (430) kɛ́, ɩlɛnɑ kʋsǝsɩɩtʋ tɔm lɩɩ. Kʋsǝsɩɩtʋ tɔm lɩɩʋ mpʋ tɔ, pǝ fɛɩ sɩ tǝlɛ tǝ́ kʋ nti Ɩsɔ tɛmɑ tɑɣɑnʋɣʋ tɔ, nɑ mpi mpi ɩ tɔmɑ sɩ ɩ kɑ́ lɑ yǝlɑɑ tɔ tǝlɛ tǝ sɑɑlɩ yem. 
\v 18 Pǝ tɑɣɑ pʋlʋ, ye ɩsɩɩ kʋsǝsɩɩtʋ tɔkǝlɑɑ kɛ Ɩsɔ tǝŋǝɣɩ nɑ ɩ́ hɑɑ ɩ kʋcɔɔŋ wei ɩ kɑ sɩɩwɑ ɩ yǝlɑɑ tɔɔ tɔ, ɩlɛ pǝ tɑɣɑ nɔɣɔ sɩɩʋ ntɛ́. Amɑ cǝnɛ ɩlɛ Ɩsɔ kɑ tɔmɑ sɩ ɩ kɑ́ lɑ Apǝlɑhɑm kɛ kʋpɑntʋ tɔɣɔ ɩ lɑpɑ-ɩ-tǝɣɩ fɑɑlɑɑ.
\p
\v 19 Pepe nyʋɣʋ tɔɔ kɛ́ pɑ sɩɩ kiiŋ ɩlɛ? Pɑ sɔɔsɑ ɩlɛɣɛ sɩɩʋ kɛ́ sɩ pǝ́ hʋ́lɩ́ yǝlɑɑ kɛ pɑ kʋlɑpʋtʋ nti Ɩsɔ ɩɩ cɑɑ tɔ. Pǝ wɛɛ sɩ kʋsǝsɩɩtʋ ntɩ tǝ́ cɑɣɑ mpʋ, hɑlǝnɑ Apǝlɑhɑm pǝyɑɣɑ ŋkɑ kɑ tɔɔ Ɩsɔ kɑ tɔmɑ sɩ ɩ kɑ́ lɑ kʋpɑntʋ ntɩ tɔ kɑ́ kɔɔ. Nɑ ɩsɔtɑɑ tillɑɑ kɛ Ɩsɔ tilinɑ kʋsǝsɩɩtʋ ntɩ, nɑ yʋlʋ kɛ pɛlɛ pɑ cɛlɑɑ sɩ ɩ́ tɛlǝsɩ ɩ lɛlɑɑ. 
\v 20 Amɑ ye timpi pǝ kɛ́ sɩ yʋlʋ kʋlʋm tɔm kɛ pǝ pɑɑsǝnɑɑ, ɩlɛ tɛlǝsǝlʋ nɔɣɔlʋ ɩ kɑɑ wɛɛ pǝ tɑɑ tɔtɔ. Nɑ mpʋ ɩnǝɣɩ pǝ tɩɩ wɛɛ, Ɩsɔ wɛ kʋlʋm kɛ́.
\s1 Kʋsǝsɩɩtʋ nyʋɣʋ
\p
\v 21 Ɩlɛ pǝ lɩɩwɑ sɩ kʋsǝsɩɩtʋ nɑ mpi mpi Ɩsɔ tɔmɑ sɩ ɩ kɑ́ lɑ tɔ pɩɩ kpɛntǝɣɩ kɛlɛ? Aɑɩ, pǝ tɑɣɑ mpʋ se, pɑɑ pǝcɔ. Ye pɑɑ tʋ kʋsǝsɩɩtʋ nɑtǝlɩ nti tǝ pǝsǝɣɩ nɑ tǝ́ lɑ́ nɑ yǝlɑɑ hiki weesuɣu, ɑŋhɑɑ, ɩlɛ kʋsǝsɩɩtʋ tǝŋʋɣʋ kɑ yekɑɣɑnɑ ntɛ́ nɑ yʋlʋ pǝsǝɣɩ kʋpɑŋ kɛ Ɩsɔ ɩsɛntɑɑ. 
\v 22 Amɑ pɑ ŋmɑɑwɑ Ɩsɔ Tɔm tɑɑ sɩ ɩsɑɣɑtʋ ŋmɑkǝlɑ yǝlɑɑ tǝnɑ tǝpɑɩ. Nɑ pǝ wɛ mpʋ, sɩ mpɑ pɑ tɛmɑ pɑ tɑɑ nɑ Yesu Kilisiti tɔ, pɑ́ hiki kʋcɔɔŋ wei Ɩsɔ kɑ tɔmɑ sɩ ɩ kɑ́ hɑ tɔɣɔ pɑ tɑɑ tɛmnɑʋ tɔɔ.
\p
\v 23 Tɑ́ɑ́ tɛmnɑʋ kɛ Ɩsɔ tɑɑ kɔntɑ ɩlɛ, kʋsǝsɩɩtʋ kɑ tɔkǝnɑ-tʋ ɩsɩɩ sɑlǝkɑtʋnɑɑ, nɑ pǝ́ tɑŋɑɑ sɩ pǝ́ kɔɔ pǝ́ kuli-tʋɣʋ Ɩsɔ tɑ́ɑ́ tɛmnɑʋ tɔm ntɩ tǝ tɔɔ. 
\v 24 Ḿpʋ́ɣʋ́ pǝ lɑpɑ nɑ kʋsǝsɩɩtʋ wɛɛ ɩsɩɩ tɑ́ tɔɔ nyǝnlʋ hɑlǝnɑ Kilisiti kɔɔ, sɩ tǝ tɛ́ tɑ́ tɑ́ɑ́ nɑ Ɩsɔ nɑ pǝ́ lɑ́ nɑ tǝ́ pǝsɩ kʋpɑmɑ kɛ Ɩsɔ ɩsɛntɑɑ. 
\v 25 Pǝnɛntɛ Ɩsɔ tɑ́ɑ́ tɛmnɑʋ tɔm ntɩ tǝlɛ tǝ kɔmɑ ɩlɛ kʋsǝsɩɩtʋ nɑ́ fɛɩ ɩsɩɩ tɑ́ tɔɔ nyǝnlʋ tɔtɔ.
\p
\v 26 Tɔʋ, mɛ mǝ tɛmɑ mǝ tɑɑ nɑ Ɩsɔ tɔɣɔ ɩ́ pǝsɑ ɩ piyɑ kɛ mǝ nɑ Yesu Kilisiti mǝ kpɛntʋɣʋ tɔɔ. 
\v 27 Pǝ tɑɣɑ pʋlʋ, mǝ tǝnɑ tǝpɑɩ pɑ sɔ-mɛɣɛ Ɩsɔ lʋm sɩ mǝ nɑ Kilisiti ɩ́ kpɛntɩ nɑ ɩ́ kpɑɣɑ Kilisiti kiŋ kɛ yɑɑsi kʋfɑlʋ nɑ ɩ́ tɔkɩ. 
\v 28 Wɑɑtʋ ɩnɩ, pǝ fɛɩ sɩ Yutɑ tʋ ntɔ, ɩnɛ ɩ́lɛ́ ɩ tɑ kɛ Yutɑ tʋ. Yɑɑ yom ntɔ, kɑsɑɣɑmpu ntɔ. Yɑɑ ɑpɑlʋ ntɔ, ɑlʋ ntɔ. Amɑ mǝ nɑ Yesu Kilisiti ɩ́ kpɛntɑ mǝ tǝnɑɣɑ kʋlʋm kɛ́, fɑɣɑʋ fɛɩ. 
\v 29 Ye Kilisiti tǝnnɑ-mɛ ɩlɛ ɩ́ kɛ́ Apǝlɑhɑm piyɑ kɛ́, nɑ ɩ́ kɑ́ hiki kʋpɑntʋnɑɑ mpɑ Ɩsɔ tɔmɑ sɩ ɩ kɑ́ hɑ-mɛ nɑ pǝ́ pǝsɩ mǝ nyǝm tǝkpɑtɑɑ tɔ.
\c 4
\p
\v 1 Nti mɑ wɛnɑ nɑ mɑ́ cɑɑ mɑ tɑsǝnɑ-mɛɣɛ kilisinɑʋ tɔɣɔlɛ sɩ, pǝyɑɣɑ ŋkɑ kɑ wɛɛ nɑ kɑ́ɑ́ tɛ nɑ kɑ́ tɔɣɔ kɑ cɑɑ wɛnɑʋ tǝnɑ tɔ, kɑ pǝcɑɑtʋ kɑ wɛɛ kɛ́ ɩsɩɩ yom wɛʋ tɔ. Pǝyele ŋkɛ kɑɑ tɛnɑ nɑ kɑ́ tɩ pǝ tǝnɑ. 
\v 2 Kɑ pǝcɑɑtʋ tǝnɑ tɑɑ kɑ wɛ pɑɑsǝnlɑɑ niŋ tɑɑ, nɑ pɛlɛ pɑ lɑkǝnɑ-kɛɣɛ pǝ tǝnɑ hɑlǝnɑ kɑ́ kɔɔ kɑ́ tɑlɑ pɩɩsɩ ɩsǝnɑ kɑ cɑɑ kɑ sɩɩwɑ tɔ. 
\v 3 Tɑ́ tɔtɔ wɑɑtʋ wei tɩɩ wɛ ɩsɩɩ piyɑ tɔ, tɩɩ wɛ ɑntulinyɑ ɩnɛ ɩ pǝ tǝnɑ pǝ kɑncɑɑlɑɣɑ nyǝm tɑɑ kɛ́ nɑ pǝ́ kpɑ-tʋɣʋ yomɑɑ. 
\v 4 Amɑ pǝ kɔmɑ pǝ tɑlɑ sɑɑ wei Ɩsɔ kɑ sɩɩwɑ tɔ, ɩlɛnɑ ɩ́ tili ɩ pǝyɑɣɑ, nɑ ɑlʋ lʋlǝnɑ-kɛ, nɑ kɑ́ tǝŋ Yutɑ nyǝ́mɑ kʋlɑpʋtʋ. 
\v 5 Kɑ kɔmɑ mpʋ sɩ kɑ cɛkɩ mpɑ kʋsǝsɩɩtʋ kɑ tɔkɑɑ tɔ nɑ tǝ hiki mpɑɑʋ nɑ tǝ́ pǝsɩ Ɩsɔ piyɑ.
\p
\v 6 Ɩsɔ tʋ ɩ Pǝyɑɣɑ Feesuɣu kɛ tɑ́ tɑɑ sɩ pǝ́ hʋ́lɩ́ teu sɩ tǝ kɛ́ ɩ piyɑ mɑɣɑmɑɣɑ, nɑ Feesuɣu ŋkʋ kʋ yelinɑ nɑ tǝ́ yɑɑ Ɩsɔ sɩ mɑ Cɑɑ Pɑɑpɑ. 
\v 7 Ye mpʋ ɩlɛ n tɑ kɛ yom tɔtɔ, ɑmɑ n pǝsɑ pǝyɑlʋ kɛ. Nɑ ɩsɩɩ n kɛʋ ɩ pǝyɑlʋ kɛ mpʋ tɔ, Ɩsɔ kɑ́ hɑ-ŋ kʋpɑntʋnɑɑ mpɑ ɩ sɩɩ ɩ piyɑ tɔɔ tɔ.
\s1 Kɑlɑtɩ nyǝ́mɑ tɔm cɑɑlǝɣɩ Pɔɔlɩ
\p
\v 8 Tuu lɔŋ ɩ́ tɑɑ nyɩ Ɩsɔ, nɑ ɩ́ tǝŋɑɣɑ mpi pǝ tɑ kɛ Ɩsɔ mɑɣɑmɑɣɑ tɔ nɑ ɩ́ pǝsɩ pǝlɛ pǝ yomɑɑ. 
\v 9 Amɑ pǝnɛntɛ ɩsɩɩ ɩ́ nyǝmɑ́ Ɩsɔ, yɑɑ ɩsɩɩ Ɩsɔ ɩ́lɛ́ ɩ nyǝmɑ-mɛ tɔ, pepe tɔɔ kɛ́ ɩ́ cɑɑ ɩ́ mǝlɩ pǝ tǝnɑ pǝ kɑncɑɑlɑɣɑ nyǝm mpi pǝ tɑɑ fɛɩ wɑɑʋ nɑ pǝ́ wɛ yem kɛ́ mpʋ tɔ pǝ tɑɑ? Nɑ pǝ kɔmɑ suwe tɔtɔ nɑ ɩ́ cɑɑ ɩ́ tɑsɑ pǝ yomɑɑ lɑpʋ? 
\v 10 Mǝ ɩsɛ sɛɛnɑ mǝ kʋyɛɛŋ kʋpɑmpɑŋ fɑɣɑsʋɣʋ nɑ mǝ ɩsɔtʋnɑɑ kʋpɑmɑ nɑ mǝ wɑɑtʋnɑɑ kʋpɑmɑ nɑ mǝ pɩɩsɩ kʋpɑŋsɩ fɑɣɑsʋɣʋ kɛ teitei. 
\v 11 Mǝ tɔm cɛpɑ mɑ lɑŋlɛ kɛ teu kɛ́. Ɩsɩɩ mɑ ɩwɩɩlɛ ntɛ́ tǝ tǝnɑɣɑ mǝ tɔɔ kʋlɑ hʋntʋ ntɛ́ yɑɑ?
\p
\v 12 Mɑ tɑɑpɑlɑɑ, mɑ wiikinɑ-mɛ sɩ ɩ́ tǝŋ mɑ ɩkpɑtɛ ɩsɩɩ mɑ mɑɣɑmɑɣɑ mɑ tǝŋɑ mǝ ɩkpɑtɛ tɔ. Ɩ́ tɑ lɑ-m ɩsɑɣɑtʋ nɑtǝlǝɣɩ tiili se. 
\v 13 Nɑ ɩ́ nyǝmɑ́ teu sɩ mɑ kʋtɔŋ tɔɔ kɛ́ mɑ heelɑ-mɛɣɛ Lɑɑpɑɑlɩ Kʋpɑŋ kɛ tɔm kɑncɑɑlɑɣɑ nyǝm. 
\v 14 Nɑ ɩ́ nɑ́ cɔɔsɛɛ kɛ sɔsɔm kɛ mɑ wʋsɑsɩ nsɩ sɩ tɑɑ, pɑɑ nɑ mpʋ ɩ́ tɑ́ cʋtɩ sɩ mɑ tɔm ntɩ tǝ nɩɩ-mɛ. Pǝyele ɩ́ tɑ lɔ-m, ɑmɑ ɩ́ tɔkɑ-m teu kɛ́ ɩsɩɩ ɩsɔtɑɑ tillu nɔɣɔlʋ, yɑɑ ɩsɩɩ Yesu Kilisiti mɑɣɑmɑɣɑ. 
\v 15 Wɑɑtʋ ɩnɩ mǝ lɑŋhʋlʋmlɛ tɔ pɑɑ pɔɔsǝɣɩ. Ɩlɛ kɑɣɑnɑ ɩ́ nɑ-we tɔtɔ? Hɑlɩ mɑ pǝsǝɣɩ mɑ́ lǝsɩ mǝ nyɩɩlʋɣʋ sɩ wɑɑtʋ ɩnɩ ɩ tɑɑ, pɩɩ lɑkɑɣɑ mpʋ, pɑɑ mǝ ɩsɛ mɑɣɑmɑɣɑ ɩ́ kɑ lǝsɑɑ nɑ ɩ́ tʋ-m. 
\v 16 Ɩsɩɩ mɑ heeluɣu-mɛɣɛ tɑmpɑnɑ tɔɣɔlɛ mɑ pǝsɑ mǝ kolontu yɑɑ?
\p
\v 17 Yǝlɑɑ pɑnɛ pɑ lɑkɩ kɛ́ nɑ n nɑwɑ n tɔ sɩ pɑ sɔɔlɑ-mɛɣɛ teu. Aɑɩ, pǝ tɑɣɑ mpʋ se, pɑɑ pǝcɔ. Pɑ cɑɑkɩ kɛ́ sɩ mɑ́ nɑ-mɛ tǝ́ wɑkǝlɩ, nɑ ɩ́ mǝlǝnɑ mpɛ pɑ tɔɔ nɑ ɩ́ nyǝnǝɣɩ pɑ tike. 
\v 18 Pǝ wɛ teu sɩ yʋlʋ ɩ́ sɔɔlǝɣɩ ɩ lɛlʋ kɛ mpʋ yɑɑ. Amɑ kʋpɑntʋ lɑpʋ tɑɑ kɛ́ ɩ́ kɑ́ sɔɔlǝɣɩ ḿpʋ́ɣʋ́ tɑm, pǝ́ tɑɑ wɛɛ wɑɑtʋ wei mɑ wɛ mǝ kiŋ tɔ tike. 
\v 19 Mɑ piyɑ kʋpɑmɑ, mɑ tɑɣɑnɑ wʋsɑsɩ tɑɑ kɛ́ sʋʋʋ kɛ mǝ tɔɔ. Nɑ wʋsɑsɩ nsɩ sɩ nǝɣǝsǝnɑ ɩsɩɩ lʋlʋɣʋ wʋsɑsɩ tɑkʋɣʋ ɑlʋ tɔ, sɩ pǝ́ lɑ nɑ ɩ́ kpɑɣɑ Kilisiti yɑɑsi nɑ mǝ nɑ-ɩ́ ɩ́ nǝɣǝsǝnɑ tǝmɑɣɑ teu. 
\v 20 Pepe pukinɑ-m mǝ hɛkʋ kɛ nɔɔnɔɔ ɩsǝntɔ nɑ mɑ́ heeli-mɛɣɛ kʋfɑtʋnɑɑ. Pǝ tɑɣɑ pʋlʋ tɔɔ, mǝ tɔm cɑɑlɑ-m sɔsɔm kɛ cǝnɛɣɛ.
\s1 Akɑɑ nɑ Sɑɑlɑ pɑ tɔm
\p
\v 21 Mɛ mpɑ ɩ́ cɑɑ kʋsǝsɩɩtʋ ɩ́ tɔkɩ-mɛ tɔ, mɑ pɔɔsǝɣɩ-mɛ sɩ ɩ́ nɩɩwɑ nti pɑ ŋmɑɑwɑ kʋsǝsɩɩtʋ ntɩ tǝ tɑkǝlɑsɩ tɑɑ tɔ, yɑɑ ɩ́ tɑ́ nɩɩ? 
\v 22 Pɑ ŋmɑɑwɑ sɩ Apǝlɑhɑm kɑ wɛnɑ piyɑ nɑɑlɛɣɛ, kɑsɑɣɑmpu nɑ́ lʋlɑ-ɩ lɛŋkɑ nɑ yom nɑ́ɑ́ lʋlɩ-ɩ lɛŋkɑ. 
\v 23 Ɩsɔ kɑ tɔmnɑ sɩ kɑsɑɣɑmpu kɑ́ lʋlɩ. Ḿpʋ́ɣʋ́ kɑsɑɣɑmpu kɔmɑ nɑ ɩ́ lʋlɩ nɑ pǝ mʋ Ɩsɔ nɔɣɔ tɑɑ tɔm tǝkɛlɛ. Amɑ yom nɑ́ lʋlɑ ɩ nyǝŋkɑ kɛ yem kɛ́ pʋlʋ fɛɩ. 
\v 24 Tɔm tǝnɛ tǝ hʋ́lǝ́ɣɩ́-tʋɣʋ yɑɑsi nɔɣɔlʋɣʋ. Alɑɑ mpɛ pɑ wɛ kɛ́ ɩsɩɩ Ɩsɔ nɔɔsɩ nsi ɩ́ nɑ ɩ yǝlɑɑ pɑ kpɛntɑɑ nɑ pɑ́ pɛɛlɩ tɔm nɑɑlɛ tɔ. Kɑncɑɑlɑɣɑ nɔɣɔ ntɛ́ Akɑɑ, nɑ ŋkɛ kɑ kɛnɑ Sinɑyi pʋɣʋ nyǝŋkɑ, nɑ kɑ́ lʋlǝɣɩ yomɑɑ. 
\v 25 Akɑɑ ɩnɩ ɩ kɛnɑ ɩsɩɩ Alɑpʋ Sinɑyi pʋɣʋ, nɑ ɩ nǝɣǝsǝnɑ Yosɑlɛm ɩcɑtɛ nte tǝ wɛ sɑŋɑ ɩsǝntɔ tɔ, nɑ tǝ nɑ tǝ yǝlɑɑ tǝnɑ mpɑ pɑ kɛ́ yomɑɑ tɔ. 
\v 26 Yosɑlɛm wei ɩ́lɛ́ ɩ wɛ ɩsɔtɑɑ nɑ ɩ́ kɛ́ tɑ́ tǝnɑ tɑ́ too tɔ ɩ́lɛ́ ɩ kɛ́ kɑsɑɣɑmpu kɛ́. 
\v 27 Tǝ mɑɣɑmɑɣɑ kɛ pɑ ŋmɑɑwɑ Ɩsɔ Tɔm tɑɑ sɩ:
\q1 Alʋ kɑɑlʋlɑɣɑ nyɑ́ nyɑ́ lɑŋlɛ ɩ́ hʋlʋmɩ.
\q1 Nyɑ́ wei n tɑ tɩɩ mɔlɩ pɑɑ tɔm kʋlʋm tɔ, wiliti teu.
\q1 Alʋ wei pɑ lɔ yem tɔ ɩ kɑ́ kǝlɩ piyɑ kɛ
\q1 ɑlʋ wei ɩ wɛnɑ pɑɑlʋ tɔ.
\p
\v 28 Mɑ tɑɑpɑlɑɑ, ye mɛ ɩlɛ Ɩsɔ kɑ tɔmɑ sɩ pɑɑ lʋlɩ-mɛ tɔɣɔ pɑ lʋlɑ-mɛ. Nɑ pǝ lɑpɑ teitei ɩsɩɩ ɩ kɑ tɔmɑ sɩ pɑɑ lʋlɩ Ɩsɑɑkɑ nɑ tɑmpɑnɑ pɑ́ lʋlɩ-ɩ tɔ. 
\v 29 Pǝyɑɣɑ ŋkɑ pɑɑ lʋlɑ yem kɛ́ mpʋ tɔ kɑ tʋkɑɣɑ ŋkɑ pɑ lʋlǝnɑ Ɩsɔ Feesuɣu toŋ tɔɣɔ kʋnyɔŋ. Nɑ mpʋ ɩnǝɣɩ pǝ wɛ sɑŋɑ wʋlɛ tǝnɛ tɔtɔ. 
\v 30 Nɑ ntiɣi pɑ ŋmɑɑwɑ Ɩsɔ Tɔm tɑɑ yee? Pɑ ŋmɑɑwɑɣɑ sɩ: Tɔɣɔnɩ ɑlʋ yom ɩnɩ nɑ ɩ pǝyɑɣɑ nɑ pɑ́ tɛɛ. Pǝ tɑɣɑ pʋlʋ tɔɔ, yom pǝyɑɣɑ nɑ kɑsɑɣɑmpu pǝyɑɣɑ pɑ kɑɑ kpɛntɩ nɑ pɑ́ tɑlɑ pɑ cɑɑ wontu. 
\v 31 Pǝ tɔɔ ɩlɛ mɑ tɑɑpɑlɑɑ, tǝ tɑ kɛ yom piyɑ se, ɑmɑ tǝ kɛ́ kɑsɑɣɑmpu piyɑ kɛ́.
\c 5
\s1 Ɩ́ tɑɑ yele nɑ ɩ́ pǝsɩ yomɑɑ tɔtɔ
\p
\v 1 Kilisiti cɛpɑ-tʋɣʋ tɑ́ yomle tɑɑ kɛ́ sɩ tǝ́ pǝsɩ kɑsɑɣɑmpiyɑ tǝkpem. Pǝ tɔɔ ɩlɛ ɩ́ sǝŋ tǝcɑ, nɑ ɩ́ tɑɑ yele nɑ cɛpʋ pǝnɛ pǝ tɔm liɣiti-mɛ nɑ ɩ́ tɑɣɑnɩ yomɑɑ kɛ pǝsʋɣʋ tɔtɔ.
\p
\v 2 Ɩ́ tʋ ŋkpɑŋŋ kɛ teu, Pɔɔlɩ mɑ́ mɑ tʋlǝɣɩ-mɛɣɛ tǝfoo sɩ, ye ɩ́ tɛmɑ mǝ tɑɑ nɑ ɩ́ pɛlɩ, pǝ wɛ ɩsɩɩ Kilisiti kɔntɛ lɑpɑ mǝ kiŋ ntɛ́ yem. 
\v 3 Mɑ tɑsǝɣɩ yǝlɑɑ tǝnɑɣɑ kpɑɑlʋɣʋ sɩ, wei ɩ́ pɛlɑɑ, tǝlɑsɩ ɩsɩɩ ɩ tɔkɑ kʋsǝsɩɩtʋ tǝnɑ tǝpɑɩ, ɩ kɑɑ sɛkɩ pʋlʋ. 
\v 4 Mɛ mpɑ ɩ́ cɑɑ sɩ Ɩsɔ ɩ́ nyǝnɩ-mɛɣɛ kʋpɑmɑ kɛ mǝ kʋsǝsɩɩtʋ tǝŋʋɣʋ tɔɔ tɔ, mǝ nɑ Kilisiti ɩ́ yɑɑ kɛ́ nɑ ɩ́ pɛŋ mǝ tǝɣɩ Ɩsɔ pɛɛlɛɛ. 
\v 5 Ye tɑ ɩlɛ tǝ nyǝmɑ́ sɩ Ɩsɔ kɑ́ pǝsɩ-tʋɣʋ yʋlʋpɑmɑ nɑ tǝ tɑŋɑ ḿpʋ́ɣʋ́ nɑ Ɩsɔ Feesuɣu toŋ wei ɩ lɑkɩ tɑ́ kiŋ kɛ tɑ́ tɛm Ɩsɔ nɑ tɑ́ tɑ́ɑ́ tɔ pǝ tɔɔ tɔ. 
\v 6 Pǝ tɑɣɑ pʋlʋ tɔɔ, ye tɑ́ nɑ Yesu Kilisiti tǝ lɑɑlɑɑ nɑ tǝ́ kpɛntɩ, pɑɑ tǝ pɛlɑɑ pɑɑ tǝ tɑ pɛlɩ pǝ lɩɩ kʋlʋm kɛ́. Amɑ mpi pɑ cɑɑ tɔɣɔlɛ sɩ tǝ́ tɛ Ɩsɔ nɑ tɑ́ tɑ́ɑ́ nɑ tɑ́ɑ́ tɛm mpɩ pǝ tɑɑ kɛ́ sɔɔlʋɣʋ nɑ́ wɛɛ nɑ kʋlɛ kʋ tɔŋɑ.
\p
\v 7 Ɩ́ kɑ lɑkɑɣɑ teu ɩlɛ nɔɔnɔɔ ɑwe lɑpɑ nɑ ɩ́ mǝlɩ hɛɛʋ kɛ tɑmpɑnɑ tǝŋʋɣʋ tɑɑ? 
\v 8 Nti pɑ heelɑ-mɛ nɑ ɩ́ tɛ mǝ tɑɑ nɑ ɩ́ tisi tɔ tǝ tɑ lɩɩnɑ Ɩsɔ wei ɩ yɑɑ-mɛ tɔ ɩ kiŋ. 
\v 9 Pɑ tukɑ ɩtuule sɩ: Kʋkʋsʋm kɛ pǝciimɑɣɑ kpɑɑsǝɣǝnɑ somtu tǝfʋʋʋ. 
\v 10 Pɑɑ nɑ mpʋ Tɑcɑɑ yelɑɑ nɑ mɑ́ wɛɛnɑ nɑɑni kɛ mǝ tɔɔ tǝkpɑtɑɑ sɩ ɩ́ kɑɑ kpɑɣɑ hʋwɛɛ nnɑ ɑ fɑɣɑnɑ mɑ nyǝnɑ tɔ. Amɑ wei ɩ lɑkɩ-mɛɣɛ yɛlɛyɛlɛ tɔ pɑɑ ɩ kɛ́ wei te Ɩsɔ kɑ́ nɑnɑ pʋntʋ.
\p
\v 11 Mɑ tɑɑpɑlɑɑ ye pɛlʋɣʋ tɔm wɑɑsʋ kɛ mɑ tɔŋnɑ lɑpʋ tɔtɔ, pɑɑ tʋkɑɣɑ-m kʋnyɔŋ suwe tɔtɔ? Ye pɩɩ wɛ ḿpʋ́ɣʋ́ tɑmpɑnɑ, Kilisiti wei pɑ kɑmɑ tesikɑ tɔɔ nɑ mɑɑ kpɑɑlǝɣɩ ɩ tɔm tɔ ɩ tɔm ntɩ tǝ tɑɑ wɩɩ nɔɣɔlʋ. 
\v 12 Amɑ mɑ kooliɣi kɛ́ sɩ mpɑ pɑ lɑkɩ-mɛɣɛ yɛlɛyɛlɛ kɛ́ mpʋ tɔ pɛlɛ pɑ́ lɑkɩ mpʋ nɑ pɑ́ puki te, hɑlǝnɑ pɑ́ pǝsɩ kɑtɑɑsɩ kɛ pɑ mɑɣɑmɑɣɑ.
\p
\v 13 Mɑ tɑɑpɑlɑɑ ye mɛ ɩlɛ pɑ lǝsɑ-mɛɣɛ sɩ ɩ́ pǝsɩ kɑsɑɣɑmpiyɑ. Amɑ kʋlʋmtʋ kɛ́ sɩ ɩ́ tɑɑ hʋʋ sɩ ye ɩ́ pǝsɑ kɑsɑɣɑmpiyɑ kɛ mpʋ ɩ́ hikɑ mǝ tǝɣǝlɛ sɩ ɩ́ tǝŋǝɣɩ mǝ yʋlʋwɛɛtʋ kʋnyɩɩlǝŋ. Aɑɩ pǝ fɛɩ mpʋ se. Amɑ nti tɔɣɔlɛ sɩ ɩ́ sɔɔlǝɣɩ tǝmɑ, nɑ ɩ́ teŋ tǝmɑ, nɑ mpʋ ɩnɩ pǝ lɑpʋ sʋʋnɑ-mɛɣɛ teu. 
\v 14 Kʋsǝsɩɩtʋ tǝnɑ nyʋɣʋ ntɛ́ sɩ: Sɔɔlɩ nyɑ́ tɔɣɔntǝlɛ ɩsɩɩ n kɑ́ sɔɔlɩ nyɑ́ tɩ tɔ. 
\v 15 Amɑ ye ɩ́ lɑkɩ ɩsɩɩ tɑɑlɛ wontu nɑ ɩ́ cǝlǝɣɩ tǝmɑɣɑ sǝkpɑŋ nɑ kelɑ nɑ ɩ́ wɑkǝlǝɣɩ tǝmɑɣɑ mpʋ, ɩ́ lɑ lɑɑkɑlɩ, tɔfɔ ɩ́ kɑ́ kɔɔ nɑ ɩ́ kʋ tǝmɑ tǝkpɑtɑɑ kɛ́ ɑtɛ cǝnɛ.
\s1 Ɩ tǝŋ Ɩsɔ Feesuɣu nyǝm
\p
\v 16 Nti mɑ wɛnɑ sɩ mɑ heeliɣi-mɛ tɔɣɔlɛ sɩ ɩ́ tǝŋǝɣɩ nti Feesuɣu Nɑŋŋtʋ hʋ́lǝ́ɣɩ́-mɛ tɔɣɔ tɑm, ɩ́ tɑɑ nɩɩnɑ mǝ yʋlʋwɛɛtʋ kʋnyɩɩlǝŋ. 
\v 17 Pǝ tɑɣɑ pʋlʋ, yʋlʋwɛɛtʋ kʋnyɩɩlǝm nɑ Feesuɣu kʋnyɩɩlǝm pǝ tɑ kɑɑ pʋlʋ, hɑlǝnɑ pɩɩ tɩɩ cɑɑ pǝ́ nɩɩ tǝmɑ sɔŋ. Pǝ tɔɔ kɛ́ ɩɩ pǝsǝɣɩ nɑ ɩ́ lɑ́ ɩsɩɩ mǝ mɑɣɑmɑɣɑ ɩ cɑɑ tɔ. 
\v 18 Ye nti Feesuɣu Nɑŋŋtʋ hʋ́lǝ́ɣɩ́-mɛ tɔɣɔ ɩ́ tǝŋǝɣɩ ɩlɛ ɩ́ tɑ kɛ́ kʋsǝsɩɩtʋ yomɑɑ tɔtɔ.
\p
\v 19 Pɑɑ wei ɩ nyǝmɑ́ teu kɛ ɩsǝnɑ yǝlɑɑ mpɑ pɑ tǝŋǝɣɩ pɑ yʋlʋwɛɛtʋ tɔ pɑ kʋlɑpʋtʋ wɛɛ tɔ. Asilimɑ nɑ tɛtɛlɑkɑsɩ ɩsɑɣɑsɩ nɑ yɑɑsi ɩsɑɣɑʋ. 
\v 20 Pɑ pɑɑsǝɣǝnɑ tɩɩŋ lɑɑʋ nɑ topotopo tǝmɑnɑɑ. Pɑ lɩɩkɩ tǝmɑɣɑ koloŋɑ nɑ pɑ́ yookinɑ tǝmɑɣɑ tɑm nɑ ɩsɛsɛɛmɛɛ hɑŋɑ pɑ hɛkʋ, pɑ kǝlɑ pɑ́ɑ́nɑ́ nɑ ɩkǝllɛ pɛɛkʋɣʋ, n kɑ́ nɑ́ pɑ fɑɣɑɑ nɑ pɑ́ tɑlɑ kpekɑ kpekɑ nɑ pɑ́ sʋʋ tǝmɑɣɑ yoonɑʋ. 
\v 21 Ye ɩ nɑwɑ ɩ tɔɣɔntǝlɛ pʋlʋ ɩ tɑɑ hɑŋ, pɑ kɛ́ sʋlʋnyɔɔlɑɑ, pɑ fɛɩ pɑ tɩ kpɑʋ kɛ leleŋ nɩɩlɩ ɩ tɑɑ, nɑ pɑ́ lɑkɩ ɩsɑɣɑtʋ lɛntǝnɑɑ kɛ mpʋ tɔtɔ. Mɑ tɑsǝɣɩ-mɛɣɛ heeluɣu ɩsɩɩ mɑ tɛm-mɛɣɛ heeluɣu tɔ, pɑ tǝnɑ mpɑ pɑ lɑkɩ mpʋ tɔ pɑ kɑɑ fɛlɩ nɔɔhǝlɛ kɛ Ɩsɔ Kɑwulɑɣɑ tɑɑ.
\p
\v 22 Amɑ Ɩsɔ Feesuɣu nɑ́ lɑkɩ nɑ yǝlɑɑ sɔɔlǝɣɩ tǝmɑ nɑ pɑ́ hikiɣi lɑŋhʋlʋmlɛ, nɑ pʋlʋ ɩɩ pɛkǝlǝɣɩ-wɛ, nɑ pɑ́ wɛnɑ tǝmɑ nɑ suulu, nɑ pɑ wɛnɑ pɛɛlɛɛ nɑ pɑ lɑkɩ tǝmɑɣɑ kʋpɑntʋ nɑ pɑ́ tǝŋǝɣɩ tɑmpɑnɑ. 
\v 23 Nɑ pɑ wɛ tǝpɑmm nɑ pɑ́ tɔkǝɣɩ pɑ tǝɣɩ teu. Kiiu fɛɩ ŋku kʋ kʋɣɩ tǝnɛ ɩnɩ tǝ tɑɑ nɑtǝlɩ tɔ. 
\v 24 Mpɑ pɑ pǝsɑ Yesu Kilisiti nyǝ́mɑ tɔ pʋntʋnɑɑ kpɛŋnɑ pɑ yʋlʋwɛɛtʋ nɑ tǝ kʋnyɩɩlǝŋ nɑ tǝ kɔtɔɩnɑɑ kɛ́ nɑ pɑ́ kʋ́ tǝnɑŋnɑŋ. 
\v 25 Feesuɣu lɑpǝnɑ nɑ tǝ́ hiki weesuɣu pǝ tɔɔ kɛ́ tɩɩ yele nɑ tǝ́ tǝŋ mpi kʋ hʋ́lǝ́ɣɩ́-tʋ tɔ. 
\v 26 Tǝ́ tɑɑ hɔŋ tɑ́ tɩ nɑ tǝ́ kpɑɑsǝɣɩ, tǝ́ tɑɑ kʋsǝɣɩ tɑ́ tǝmɑ pɑ́ɑ́nɑ́ nɑ tǝ́ lɑkɩ tǝmɑɣɑ ɩsɛsɛɛmɛɛ.
\c 6
\s1 Ɩ́ teŋ tǝmɑ
\p
\v 1 Mɑ tɑɑpɑlɑɑ, ye nɔɣɔlʋ ɩ́ pǝntɑ nɑtǝlɩ, mɛ mpɑ ɩ́ tǝŋǝɣɩ Ɩsɔ Feesuɣu kɛ teu tɔ ɩ́ mǝŋnɑ pʋntʋ kɛ mpɑɑʋ kʋpɑŋkʋ tɑɑ nɑ ɩ́ lɑpɩ-ɩ tǝpɑmm. Mɑ tɑsǝɣɩ-mɛɣɛ sɛɣɛsʋɣʋ sɩ pɑɑ mǝ tɑɑ wei ɩ́ feŋ ɩ tɩ nɑ ɩ́lɛ́ ɩ́ tɑɑ kɔɔ nɑ ɩ́ tɑsɑ mɑɣɑsʋɣʋ tɑɑ kɛ́ hotuɣu tɔtɔ. 
\v 2 Ɩ́ sǝŋnɑ tǝmɑɣɑ mǝ kʋpɛkǝlǝmnɑɑ tɑɑ. Ye ɩ́ lɑpɑ mpʋ ɩ yoosɑ Kilisiti kʋsǝsɩɩtʋ tǝnɑ ntɛ́. 
\v 3 Ye yʋlʋ hɔŋ ɩ tɩ, pǝyele ɩ tɑ tɑlɑ pʋlʋ, pʋntʋ puɣusiɣi ɩ tǝɣɩ. 
\v 4 Ye wei ɩ cɑɑ ɩ́ yɔɔlǝnɑ ɩ yɑɑsi teu nyǝŋ pʋntʋ ɩ́ tɑɑ tʋʋ lɛlɑɑ nɑ ɩ́ sɑ ɩ tǝɣɩ yem. Amɑ ɩ́ wiili ɩ mɑɣɑmɑɣɑ ɩ yɑɑsi tɑɑ nɑ ye pǝ nǝɣǝsǝnɑ yɔɔlʋɣʋ ɩlɛ ɩ yɔɔlɩ. 
\v 5 Pǝ tɑɣɑ pʋlʋ tɔɔ, pɑɑ wei ɩ kʋlɑpʋtʋ mǝlǝɣɩ ɩ nyʋɣʋ tɑɑ kɛ́.
\p
\v 6 Ye nɔɣɔlʋ sɛɣɛsǝɣɩ wei kɛ́ Ɩsɔ Tɔm pʋntʋ ɩ́ cosiɣi ɩ wɛnɑʋ tǝnɑ tɑɑ nɑ ɩ́ hɑɑkɩ ɩ sɛɣɛsǝlʋ ɩnɩ.
\p
\v 7 Hei ɩ tɑɑ puɣusi mǝ tɩ yoo, pɑɑ nyǝnǝɣɩ Ɩsɔ kɛ́ yem fɑ. Yʋlʋ ɩ́ tuu mpi mpǝɣɩ ɩ kʋŋ. 
\v 8 Ye yʋlʋwɛɛtʋ kʋnyɩɩlǝm kɛ ɩ tǝŋɑɑ nɑ ɩ́ tuu, yʋlʋwɛɛtʋ ntɩ tɩɩ yelinɑ nɑ ɩ́ kɔɔ ɩ́ kʋ sǝm. Amɑ ye mpi Ɩsɔ Feesuɣu cɑɑkɩ tɔɣɔ ɩ tǝŋɑɑ nɑ ɩ́ tuu, kʋlɛ kɩɩ yelinɑ nɑ ɩ́ kɔɔ ɩ́ kʋ weesuɣu ŋku kɩɩ tɛŋ tɔ. 
\v 9 Tǝ́ tɑɑ lɑ felentu nɑ kʋpɑntʋ lɑpʋ. Pǝ tɑɣɑ pʋlʋ tɔɔ, ye tǝ tɑ lɔ tɑ́ ɑpɑlʋtʋ hɑlǝnɑ pǝ́ tɑlɑ pǝ wɑɑtʋ mpi tɩɩ kʋ tɔ pɩɩ tɔɔ sɔsɔm. 
\v 10 Pǝ tɔɔ kɛ́ ye tǝ hikɑ mpɑɑ kɛ timpi tǝ́ lɑ yǝlɑɑ tǝnɑɣɑ kʋpɑntʋ. Ɩlɛ pǝ́ kǝlǝnɑ tɑ́ nɑ mpɑ tǝ kɑɑ Ɩsɔ sɛɛʋ tɔ.
\s1 Pɔɔlɩ tɑsǝɣɩ-wɛɣɛ kpɑɑlʋɣʋ nɑ ɩ sɛɛtʋ
\p
\v 11 Tɔʋ, ɩ́ nɑ́ ɩsǝnɑ mɑ ŋmɑɑkɩ-mɛ nɑ mɑ mɑɣɑmɑɣɑ mɑ niŋ kɛ cǝnɛ nɑ ŋmɑɑtʋ pee kʋyɑsǝlɛɛ tɔ. 
\v 12 Mpɑ pɑ yɔɔlǝɣǝnɑ tɔɔ nyǝm nɑ pɑ́ cɑɑ yǝlɑɑ ɩ́ sɑ-wɛ tɔ mpɛ pɑ cɑɑnɑ sɩ pɑ́ cɑɑlɩ-mɛ nɑ ɩ́ pɛlɩ. Ɩlɛ pɑɑ cɑɑ sɩ pɑ́ tʋ-wɛɣɛ kʋnyɔmǝŋ kɛ Kilisiti sǝm tesikɑ tɔm tɔɔ tɔɣɔ. 
\v 13 Yǝlɑɑ mpɑ ɩnɩ pɑ pɛlǝɣɩ mpʋ tɔ pɑɑ tǝŋǝɣɩ kʋsǝsɩɩtʋ se. Amɑ pɑ cɑɑ kɛ́ sɩ ye mɩɩ nɩɩnɑ-wɛ nɑ ɩ́ pɛlɩ ɩlɛ pɑ sɑ pɑ tɩ sɩ mpɛ pɑ yelinɑ ɩ́ kɔtɑ mǝ tɔnʋɣʋ tɔɔ kɛ́ kʋkɔtǝm pǝnɛ. 
\v 14 Mɑ ɩlɛ ye pǝ tɑɣɑ Yesu Kilisiti sǝm tesikɑ mɑ kɑɑ yɔɔlǝnɑ pʋlʋ. Tesikɑ ŋkɛ kɑ tɔɔ kɛ́ mɑ́ nɑ ɑntulinyɑ tǝ fɑɣɑnɑ tǝmɑ tǝkpɑtɑkpɑtɑ nɑ lɛlʋ tɑ nyɩ sɩ lɛlʋ wɛɛ. 
\v 15 Pɑɑ n pɛlɑɑ pɑɑ n tɑ pɛlɩ pǝ lɩɩ kʋlʋm kɛ́. Amɑ nti tǝ wɛɛ tɔɣɔlɛ sɩ ń lɑɣɑsɩ nɑ ń pǝsɩ yʋlʋ kʋfɑlʋ. 
\v 16 Mpɑ pɑɑ tɛlǝsǝɣɩ pɛlʋɣʋ tɔm kɛ lɔlɔ kɛ pɑ weesuɣu tɑɑ tɔ mɑ kooliɣi kɛ́ sɩ Ɩsɔ ɩ́ hɑ pɑ tǝnɑɣɑ ɑlɑɑfǝyɑ nɑ ɩ́ lɑ-wɛɣɛ kʋpɑntʋ nɑ ɩ́ kpɛnnɑ ɩ yǝlɑɑ sɑmɑɑ tǝnɑ tǝpɑɩ nɑ ɩ́ lɑ mpʋ.
\p
\v 17 Pǝ kɑɑsʋɣʋ tɔ, nɔɣɔlʋ ɩ́ tɑɑ tɑsɑ-m wɑhɑlɑ tʋɣʋ tɔtɔ. Pǝ tɑɣɑ pʋlʋ tɔɔ, tɔntɔɔlǝŋ wei ɩ wɛ mɑ tɔɔ ɩsǝntɔ tɔ ɩ hʋ́lǝ́ɣɩ́ kpɑkpɑɑ kɛ́ sɩ mɑ kɛ́ Yesu yom.
\p
\v 18 Mɑ tɑɑpɑlɑɑ mɛ Tɑcɑɑ Yesu Kilisiti ɩ́ hʋ́lɩ́ mǝ tǝnɑɣɑ pɛɛlɛɛ. Ami.