\id EPH - Lokpa Bible portions [dop] -Benin 1999 (web edition -2017)
\ide UTF-8
\h Ɩfeesu
\toc1 TAKƎLAƔA ŊKA PƆƆLƖ NMAAWA ƖFEESU NYƎ́MA TƆ
\toc2 Ɩfeesu
\toc3 Ɩfe
\mt2 TAKƎLAƔA ŊKA PƆƆLƖ NMAAWA
\mt1 ƖFEESU
\mt2 NYƎ́MA TƆ
\imt1 Kʋtʋlʋtʋ
\ip Lom ɩcɑtɛ tɑɑ kɛ́ Pɔɔlɩ kɑ wɛ wɑɑtʋ wei ɩ ŋmɑɑ tɑkǝlɑɣɑ kɑnɛ tɔ. Pɑɣɑlɛ hʋʋkɩ sɩ Ɩfeesu hɔɣɔlʋɣʋ tɑɑ Yesu sɛɛlɑɑ kpekɑ pɑɣɑlɛ kɛ ɩ ŋmɑɑ-kɛ. Pɔɔlɩ hʋ́lǝ́ɣɩ́ ɩsǝnɑ Ɩsɔ tɑɣɑnɑ yǝlɑɑ nyʋɣʋ yɑpʋ tɔm tɔ, nɑ Yesu Kilisiti hɑɑkǝnɑ nyʋɣʋ yɑpʋ mpǝɣɩ sɑɑ wei yʋlʋ tɛŋɩ-ɩ nɑ ɩ tɑɑ tɔ. Pǝ kɛ́ Ɩsɔ kʋcɔɔʋ kɛ́. Ɩ hʋlɑɑ sɩ Yesu sɛɛlɑɑ wɛɛ kɛ́ ɩsɩɩ yʋlʋ tɔnʋɣʋ pilimile, nɑ tǝ tɔɔ niŋ nɑ nɔɔhɛɛ, nɑ pɑɑ wei nɑ ɩ kʋlɑpǝlɛ, ɩlɛnɑ pɑ wɛnɑ nɔɣɔ kʋlʋmɑɣɑ. Pɔɔlɩ cɑɑkɩ sɩ yǝlɑɑ ɩ́ nɩɩ teu ɩlɛnɑ ɩ́ kpǝnɑ ɩ sɛɣɛsʋɣʋ nɑ kutuluɣu sɩ Ɩsɔ sɛɛlɑɑ wɛɛ ɩsɩɩ kutuluɣu nɑ Yesu kɛlɛ kite tɛɛ pǝlɛ. Ɩ kpǝpǝnɑ tɔtɔɣɔ ɑpɑlʋ nɑ ɑlʋ kɛ tǝyɑɣɑ tɑɑ sɩ Yesu wɛnnɑ ɩsɩɩ pɑɑlʋ nɑ Ɩsɔ sɛɛlɑɑ nɑ́ɑ́ wɛɛ ɩsɩɩ ɑlʋ.
\iot Ɩsǝnɑ pɑ fɑɣɑ Ɩfeesu tɑkǝlɑɣɑ tɔ:
\io1 Yesu Kilisiti nyʋɣʋ yɑpʋ, titite \ior 1–3\ior*
\io1 Tɔntɛ kʋfɑtɛ, titite \ior 4–6\ior*
\c 1
\s1 Sɛɛtʋ
\p
\v 1 Mɑɣɑ Pɔɔlɩ, Ɩsɔ luɣu lɑpǝnɑ nɑ mɑ́ lɑ́ Yesu Kilisiti tillu, mɑ́ ŋmɑɑkǝnɑ tɑkǝlɑɣɑ kɑnɛɣɛ Ɩsɔ yǝlɑɑ mpɑ pɑ wɛ Ɩfeesu nɑ pɑ́ nɑ Yesu Kilisiti pɑ kpɛntɑɑ nɑ pɑ́ nɩɩkǝnɑ-ɩ tɔ. 
\v 2 Tɑcɑɑ Ɩsɔ nɑ tɑ́ sɔsɔ Yesu Kilisiti pɑ́ hʋ́lɩ́-mɛɣɛ pɛɛlɛɛ nɑ pɑ́ hɑ-mɛɣɛ ɑlɑɑfǝyɑ.
\s1 Ɩsɔ lɑpɑ-tʋɣʋ kʋpɑntʋnɑɑ mpɑɣɑ Kilisiti tɔɔ tɔ
\p
\v 3 Tǝ sɑ Ɩsɔ Tɑcɑɑ Yesu Kilisiti Cɑɑ kɛ teu. Tɑ́ nɑ Kilisiti tɑ́ kpɛntʋɣʋ tɔɔ Ɩsɔ ɩnɩ ɩ kpɑɣɑnɑ Ɩsɔ sɛɛʋ kʋpɑntʋnɑɑ nɑ ɩ́ lɑ-tʋɣʋ sɔsɔm kɛ hɑtuu ɩsɔtɑɑ. 
\v 4 Pǝ tɑɣɑ pʋlʋ, fɑɩɩ nɑ pǝ́cɔ́ Ɩsɔ lɑkɩ ɑntulinyɑ tɔɣɔ ɩ kɑ tɛmɑ lǝsʋɣʋ nɑ ɩ́ sɩɩ sɩ tɑ́ nɑ Kilisiti tǝ́ kpɛntɩ nɑ tǝ́ pǝsɩ ɩ nyǝ́mɑ nɑ tɑ́ tɔntɛ kɛɛsɩ teu kɛ ɩ ɩsɛntɑɑ nɑ kʋwɑkǝlǝm nɑpǝlɩ pǝ fɛɩ tɑ́ kiŋ. 
\v 5 Ɩ kɑ tɛmɑ sɩɩʋ kɛ hɑtuu lɔŋ kɛ ɩ sɔɔlʋɣʋ tɔɔ sɩ ɩ kɑ́ pǝsɩ-tʋɣʋ ɩ piyɑ mɑɣɑmɑɣɑ kɛ Yesu Kilisiti tɔɔ, ɩlɛ ɩ mɑɣɑmɑɣɑ ɩ luɣu lɑpǝnɑ mpʋ pǝ́cɔ́ pǝ lɑpʋ tɩɩ wɛ-ɩ leleŋ kɛ́. 
\v 6 Ye mpʋ tɩɩ sɑ Ɩsɔ kɛ́ teu kɛ ɩ hʋlʋɣʋ-tʋɣʋ ɩ pɛɛlɛɛ tɑɑ pɛɛlɛɛ kʋpɑnɑ nɑ luɣu kʋlʋmʋɣʋ nɑ ɩ luɣu tɛɛ Pǝyɑɣɑ kiŋ tɔ.
\p
\v 7 Pǝ tɑɣɑ pʋlʋ tɔɔ, Kilisiti weesuɣu lɩɩ tɑ́ tɔɔ tɔɣɔ pǝ yɑpɑ-tʋ nɑ pǝ́ hɩɩsɩ tɑ́ ɩsɑɣɑtʋnɑɑ. Tǝnɑɣɑ Ɩsɔ lɑpɑ nɑ tǝ́ nɑ́ ɩ pɛɛlɛɛ sɔsɔɔnɑ 
\v 8 nnɑ ɩ hʋlɑ-tʋ tɔ ɑ tɔɔʋ kɑtɑtǝlɑɣɑ, kɛ wɑɑtʋ wei ɩ hɑ-tʋɣʋ lǝmɑɣɑsɛɛ sɔsɔɔnɑ nɑ nyǝm sɔsɔɔm tɔ. 
\v 9 Nɑ ɩ lɑpɑ nɑ tǝ́ nyɩ mpi ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ nɑ pǝ́ wɛ ɩŋmɛlɑʋ tɔ. Nɑ hɑtuu lɔŋ kɛ ɩ mɑɣɑmɑɣɑ ɩ kɑ hʋʋ ɩ tɑɑ nɑ ɩ́ sɩɩ sɩ ɩ kɑ́ yoosi-wɩ nɑ Kilisiti kiŋ. 
\v 10 Pǝ kɔŋ nɑ pǝ́ tɑlɑ kʋyɛɛŋ kʋtɛɛsǝŋ tɑɑ nɑ Ɩsɔ koti ɩsɔtɑɑ nyǝm nɑ ɑtɛ nyǝm nɑ ɩ́ mǝlǝnɑ-wǝɣɩ Kilisiti tike tɛɛ nɑ ɩ́lɛ́ ɩ tɔɣɔ pɑ tɔɔ kɛ́ kɑwulɑɣɑ, ɩlɛ Ɩsɔ tʋ mpi ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ tɔ pǝ nyʋɣʋ ntɛ́. 
\v 11 Ɩsɔ tǝŋɑ ɩsǝnɑ ɩ sɩɩwɑ nɑ ɩ́ lɑkɩ tɔɣɔ ɩ lǝsɑ-tʋɣʋ hɑtuu lɔŋ sɩ tɑ́ nɑ Kilisiti tɑ́ kpɛntʋɣʋ tɔɔ tǝ́ hiki tɑ́ pɑɑ tete kɛ nyʋɣʋ yɑpʋ tɔm tɑɑ. Ɩsɔ ɩɩ lɑkɩ pʋlʋ nɑ pǝ́ coti nti ɩ sɩɩwɑ nɑ ɩ mɑɣɑmɑɣɑ ɩ luɣu lɑ sɩ ɩ́ lɑ tɔ. 
\v 12 Ye mpʋ tɑ́ mpɑ tǝ lɑɑlɑ Kilisiti tɔɔ kɛ́ tɛɛlʋɣʋ tɔ, tǝ́ sɑ Ɩsɔ kɛ́ ɩ sɔsɔɔntʋ tɔɔ.
\p
\v 13 Mǝ mɑɣɑmɑɣɑ wɑɑtʋ wei ɩ́ nɩɩ tɑmpɑnɑ tɔm, Lɑɑpɑɑlɩ Kʋpɑŋ wei ɩ yɑpɑ mǝ nyɔɔŋ tɔ, ɩ́ tɛmɑ Kilisiti nɑ mǝ tɑɑ kɛ́ ɩlɛnɑ Ɩsɔ nɑ́ɑ́ yʋsɩ-mɛ sɩ pǝ́ hʋ́lɩ́ sɩ ɩ́ kɛ́ ɩ nyǝ́mɑ nɑ ɩ kʋyʋsʋm mpǝɣǝlɛ Feesuɣu Nɑŋŋtʋ wei ɩ kɑ tɔmɑ sɩ ɩ kɑ́ hɑ-mɛ tɔ. 
\v 14 Feesuɣu Nɑŋŋtʋ ɩnǝɣɩ Ɩsɔ sɩɩ-tʋɣʋ tɔlʋmɑ sɩ pǝ́ hʋ́lɩ́ sɩ nyʋɣʋ yɑpʋ mpi pǝ tɔm ɩ kɑ heelɑ ɩ yǝlɑɑ sɩ ɩ kɑ́ kɔnɑ nɑ pǝ́ wɛɛ-wɛ ɩsɩɩ pɑ pʋlʋ tɔ pǝ́ kɔmɑ nɑ pǝ́ yɑ-tʋ tǝkpɑtɑɑ ɩlɛ tɩɩ tɩ tɑ́ pʋlʋ ɩnɩ. Ye mpʋ tǝ́ sɑ Ɩsɔ kɛ́ ɩ sɔsɔɔntʋ tɔɔ.
\s1 Pɔɔlɩ Ɩsɔ sǝlǝmʋɣʋ kɛ Ɩfeesu nyǝ́mɑ
\p
\v 15 Pǝ tǝnɑ ɩsǝntɔ pǝ tɔɔ nɑ mɑ tɩɩ nɩɩʋ pǝnɛntɛ tɔtɔ sɩ ɩ́ tɛmɑ Tɑcɑɑ Yesu nɑ mǝ tɑɑ nɑ ɩ́ sɔɔlɑ Ɩsɔ yǝlɑɑ tǝnɑ tɔ, 
\v 16 mɑɑ hɛɛsǝɣɩ Ɩsɔ kɛ́ sɛɛtʋ sɩ ɩ́ nɑ tǝmlɛ kɛ mǝ tɔɔ se. Nɑ mɑ tɔɔsǝɣɩ mǝ tɔɔ kɛ́ mɑ Ɩsɔ sǝlǝmǝŋ tɑɑ kɛ́ nɑ mɑ́ sǝlǝmǝɣɩ mǝ tɔɔ. 
\v 17 Nti mɑ sǝlǝmǝɣɩ tɑ́ Sɔsɔ Yesu Kilisiti Ɩsɔ, Tɑcɑɑ teeli tǝnɑ tʋ tɔɣɔlɛ sɩ ɩ́ hɑ-mɛɣɛ ɩ Feesuɣu, kʋlɛ kɩɩ yelinɑ nɑ ɩ́ cɛkǝnɑ, nɑ kɩɩ hʋ́lɩ́-mɛɣɛ Ɩsɔ nɑ ɩ́ nyǝmɩ-ɩ teu. 
\v 18 Mɑ sǝlǝmǝɣɩ Ɩsɔ kɛ́ sɩ pǝ́ tʋ-mɛɣɛ lɑɣɑtʋ kɛ hɑtuu mǝ tɑɑ nɑ ɩ́ nyɩ mpi pǝ tɔɔ Ɩsɔ yɑɑ-mɛ nɑ ɩ́ tɛɛlǝɣɩ tɔ, nɑ ɩ́ nyɩ kʋpɑntʋ sɔsɔɔntʋ teu teu nyǝntʋ nti ɩ sɩɩ mpɑ ɩ tɩ tɔ pɑ tɔɔ tɔ. 
\v 19 Nɑ ɩ́ nyɩ ɩ tomɑ sɔsɔɔnɑ tɑɑ sɔsɔɔnɑ nnɑ ɩ wɛnɑ nɑ ɩ́ lɑkǝnɑ Ɩsɔ sɛɛlɑɑ tɑ́ tɑ́ kiŋ tɔ. Tomɑ sɔsɔɔnɑ ɑnǝɣǝlɛ mpʋ nɑ nnɑ ɩ hʋlǝnɑ toŋ nɑ toŋ 
\v 20 kɛ wɑɑtʋ wei ɩ feesɑ Kilisiti nɑ ɩ́ kpɑɑsɩ-ɩ ɩsɔtɑɑ nɑ ɩ́ cɑɣɑsɩ-ɩ ɩ kɔŋkɔŋ tɑɑ tɔ. 
\v 21 Kilisiti wɛʋ tǝnɑ tɔ ɩ kǝlɑ pǝ tǝnɑ tǝpɑɩ kɛ́, pɑɑ toŋtʋnɑɑ, pɑɑ pǝsʋɣʋ ŋku, pɑɑ tomɑ nnɑ, pɑɑ kɑwulɑsɩ nsi, nɑ hǝlɑ tǝnɑ nnɑ pɑ yɑɑ tɔ, nɑ pǝ tɑɣɑ ɑntulinyɑ ɩnɛ ɩ tɑɑ tike, ɑmɑ pǝ kpɛntǝnɑ wei ɩ kɑ kɔɔ tɔ ɩ kǝlɑ ḿpʋ́ɣʋ́ ɩ́lɛ́ ɩ tɑɑ tɔtɔɣɔ. 
\v 22 Ɩsɔ mǝlǝnɑ pǝ tǝnɑ tǝpɑɩ kɛ́ Kilisiti nɔɔhɛɛ tɛɛ nɑ ɩnǝɣɩ ɩ hʋlɑɑ sɩ Yesu sɛɛlɑɑ kpekɑ ɩ́ nyǝnǝɣɩ ɑ wulɑʋ sɔsɔ. 
\v 23 Yesu sɛɛlɑɑ kpekɑ wɛʋ mpʋ tɔ ɑ kɛ́ Kilisiti tɔnʋɣʋ kɛ́, nɑ ɑ kiŋ kɛ ɩ wɛɛ tǝkpɑtɑɑ, ɩnɩ wei ɩ mɑɣɑlɑ pɑɑ timpi tɔ.
\c 2
\s1 Ɩ́ fitɑ sǝm nɑ ɩ́ hiki weesuɣu
\p
\v 1 Tuu lɔŋ mǝ kʋpǝntǝŋ nɑ mǝ ɩsɑɣɑtʋ kɑ yelɑɑ kɛ́ nɑ ɩ́ wɛ ɩsɩɩ sǝtɑɑ kɛ Ɩsɔ nyǝntʋ tɑɑ. 
\v 2 Pǝ tɑɣɑ pʋlʋ, ɑntulinyɑ ɩnɛ ɩ mpɑɑʋ ɩsɑɣɑʋ kɛ ɩ́ kɑ tǝŋɑɣɑ nɑ ɩ́ nɩɩkɑɣɑnɑ ɑlɔɣɑɑ toŋ nyǝ́mɑ mpɑ pɑ wɛ ɩsɔtɑɑ tɔ pɑ sɔsɔ. Alɔɣɑɑ sɔsɔ ɩnɩ ɩ wɛnnɑ nɑ ɩ́ lɑkɩ ɩ nyǝntʋ kɛ yǝlɑɑ mpɑ pɑ kisɑ Ɩsɔ kɛ́ nɩɩnɑʋ tɔ pɑ tɑɑ. 
\v 3 Tɑ́ tǝnɑ ɩsǝntɔ ḿpʋ́ɣʋ́ tɩɩ wɛɛ, tǝ tǝŋɑɣɑ tɑ́ yʋlʋwɛɛtʋ kʋpǝntʋ kʋnyɩɩlǝŋ kɛ yem kɛ́. Nɑ mpi tɑ́ tɔnǝŋ nɑ tɑ́ hʋwɛɛ cɑɑkɑɣɑ tɔ mpʋ teitei kɛ́ tǝ lɑkɑɣɑ. Pǝ lʋlɑ-tʋ nɑ tǝ́ wɛ ɩsǝnɑ tɔ pǝ wɛɛ sɩ Ɩsɔ pɑ́ɑ́nɑ́ kɑ́ huu tɑ́ tɔɔ kɛ́ ɩsɩɩ ɑ kɑ huu lɛlɑɑ tɔɔ tɔ.
\p
\v 4 Amɑ Ɩsɔ hʋlɑ-tʋɣʋ suulu kɛ sɔsɔm, nɑ ɩsǝnɑ ɩ sɔɔlɑ-tʋ tɔ pǝ fɛɩ nyǝnʋɣʋ. 
\v 5 Pǝ tɔɔ kɛ́ tɩɩ wɛʋ ɩsɩɩ sǝtɑɑ kɛ Ɩsɔ nyǝntʋ tɑɑ kɛ́ tɑ́ kʋpǝntǝŋ tɔɔ tɔ, ɩ kpɛntɑ tɑ́ nɑ Kilisiti kɛ weesuɣu hɑʋ. Ɩsɔ suulu tɔɔ kɛ́ pǝ yɑpɑ mǝ nyɔɔŋ. 
\v 6 Tɑ́ nɑ Yesu Kilisiti tɑ́ kpɛntʋɣʋ tɔɔ kɛ́ Ɩsɔ feesɑ tɑ́ nɑ-ɩ sɩ tǝ́ tɔɣɔ kɑwulɑɣɑ kɛ hɑtuu ɩsɔtɑɑ. 
\v 7 Ɩ lɑpɑ ḿpʋ́ɣʋ́ sɩ pǝ́ hʋ́lǝ́ɣɩ́ tɑm tɔɔ kɛ́ ɩsǝnɑ ɩ suulu tɔɔ kɑtɑtǝlɑɣɑ nɑ ɩ́ hʋ́lɩ́-tʋɣʋ suulu nɑ Yesu Kilisiti kiŋ tɔ. 
\v 8 Pǝ tɑɣɑ pʋlʋ Ɩsɔ pɛɛlɛɛ tɔɔ kɛ́ pǝ yɑpɑ mǝ nyɔɔŋ nɑ ɩ́ tɛmnɑ-ɩ nɑ mǝ tɑɑ tɔɣɔ pǝ lɑpɑ mpʋ. Nɑ mpʋ ɩnɩ pǝ lɑpɑ tɔ pǝ tɑ lɩɩnɑ mǝ mɑɣɑmɑɣɑ mǝ kiŋ, ɑmɑ Ɩsɔ hɑtɛ kɛ́. 
\v 9 Pǝ tɑɣɑ mǝ ɩwɩɩlɛ tɔɔ, pǝ tɔɔ ɩlɛ nɔɣɔlʋ ɩ́ tɑɑ kɔɔ nɑ ɩ́ sɑ tɩ. 
\v 10 Pǝ tɑɣɑ pʋlʋ tɔɔ Ɩsɔ ŋmɑnɑ-tʋ, nɑ tɑ́ nɑ Yesu Kilisiti tǝ kpɛntɑɑ tɔɣɔ ɩ ŋmɑ-tʋɣʋ mpʋ sɩ tǝ́ lɑkɩ tǝmɑ kʋpɑnɑ nnɑ ɩ kɑ tɑɣɑnɑɑ nɑ ɩ́ sɩɩ tɔɣɔ sɔsɔm.
\s1 Mǝ nɑ Yesu Kilisiti mǝ kʋlʋm pǝsʋɣʋ
\p
\v 11 Mɛ mpɑ ɩ́ kɑ́ kɛ́ Yutɑ nyǝ́mɑ tǝsiɣisiɣi nɑ Yutɑ nyǝ́mɑ yɑɑkɑɣɑ-mɛɣɛ kʋtɑpɛlǝŋ nɑ mpɛ pɑ yɑɑkɩ pɑ tǝɣɩ pɛllɑɑ tɔ, pǝyele yʋlʋ niŋ pɛlǝnɑ-wɛɣɛ kʋpɛlʋ sɩ pǝ́ hʋ́lɩ́ sɩ kɔtɑɣɑ kɛ́. Ɩ́ tɔɔsɩ ɩsǝnɑ ɩ́ kɑ wɛɛ tɔ nɑ ɩ́ nɑ́. 
\v 12 Pɩɩ wɛɛ tɔ ɩ́ kɑ hɑtǝlǝnɑ Kilisiti kɛ́, ɩ́ kɑ́ kɛ́ kpɑɩ nyǝ́mɑ kɛ́, ɩ́ fɛɩ mpɑ Ɩsɔ lǝsɑɑ sɩ ɩ yǝlɑɑ tɔ pɑ tɑɑ. Nɑ pǝ tǝnɑ mpi Ɩsɔ kɑ tɔmɑ ɩ yǝlɑɑ sɩ ɩ kɑ́ lɑ-wɛ, hɑlǝnɑ ɩ́ nɑ-wɛ pɑ́ cɑŋ pɑ́ sɩɩ tǝmɑɣɑ nɔɔsɩ kɛ pǝ tɔm tɑɑ tɔ, mǝ tɑɑ fɛɩ pɑ tɑɑ se. Ɩ́ kɑ wɛ yem kɛ́ ɑtɛ cǝnɛɣɛ, ɩ fɛɩnɑ mpi pǝ tɔɔ ɩ́ tɛɛlǝɣɩ tɔ pǝ́cɔ́ ɩ́ tɑɑ nyɩ Ɩsɔ. 
\v 13 Amɑ pǝnɛntɛ mǝ nɑ Yesu Kilisiti mǝ kpɛntʋɣʋ tɔɔ ɩ weesuɣu lɩɩʋ yelɑɑ kɛ́ nɑ ɩ́ kɑ hɑtǝlǝnɑʋ pǝ tǝnɑ tɔ ɩ́ tɑɣɑnɩ-wǝɣɩ kpǝtǝnɑʋ. 
\v 14 Pǝ tɑɣɑ pʋlʋ, Kilisiti mɑɣɑmɑɣɑ kpɑɣɑnɑ Yutɑ nyǝ́mɑ nɑ mpɑ pɑ tɑ kɛ Yutɑ nyǝ́mɑ tɔ nɑ ɩ́ lɑ́ nɑ tǝ́ pǝsɩ piitim kʋlʋmǝm nɑ hɛɛsʋɣʋ kɔɔ. Ɩ tɔnʋɣʋ kɛ ɩ kpɑɣɑɑ nɑ ɩ́ yɑsǝnɑ koloŋɑ ŋkɑ kɑɑ kɑɣɑ pɑ hɛkʋ tɑɑ ɩsɩɩ koluŋɑ tɔ. 
\v 15 Nɑ ɩ kʋwɑ Yutɑ nyǝ́mɑ kʋsǝsɩɩtʋ nɑ tǝ kʋheelitu nɑ tǝ kʋkʋkiim sɩ ɩ kpɑkǝɣɩ Yutɑ nyǝ́mɑ nɑ mpɑ pɑ tɑ kɛ Yutɑ nyǝ́mɑ tɔ, piitim mpɩ pǝ nɑɑlɛ nɑ ɩ́ kpɛntǝnɑ ɩ tɩ nɑ pɑ́ pǝsɩ piitim kʋlʋmǝm kɛ kʋfɑm nɑ hɛɛsʋɣʋ kɔɔ. 
\v 16 Kilisiti sǝm kɛ tesikɑ tɔɔ lɑpǝnɑ nɑ tɑɑ kpɑnɑʋ kɛ tǝmɑ sɑɑlɩ, nɑ tesikɑ tɔɔ tǝnɛɣɛ ɩ kpɛntɑ piitim mpɩ pǝ tɔm nɑɑlɛ nɑ pǝ́ pǝsɩ piitim kʋlʋmǝm nɑ ɩ́ ciiki pǝ nɑ Ɩsɔ. 
\v 17 Kilisiti kɔmnɑ nɑ ɩ́ kpɑɑlɩ Lɑɑpɑɑlɩ Kʋpɑŋ wei ɩ hɛɛsǝɣɩ yǝlɑɑ lɑŋɑ tɔ pɑɑ mpɑ mɛ ɩ́ tɑ́ kɛ́ Yutɑ nyǝ́mɑ nɑ ɩ́ kɑ hɑtǝlǝnɑ Ɩsɔ tɔ, pɑɑ Yutɑ nyǝ́mɑ mpɑ pɑɑ kpǝtǝnɑ-ɩ tɔ. 
\v 18 Kilisiti ɩnɩ ɩ tɔɔ kɛ́ tɑ́ tǝnɑ tǝ pǝsǝɣɩ nɑ tǝ́ sǝŋ Ɩsɔ ɩsɛntɑɑ nɑ Feesuɣu Nɑŋŋtʋ kʋlʋm ɩnɩ ɩ toŋ tɑɑ.
\p
\v 19 Ye mpʋ mɛ mpɑ ɩ́ tɑ́ kɛ́ Yutɑ nyǝ́mɑ tɔ ɩ́ tɑ́ kɛ́ kpɑɩ nyǝ́mɑ yɑɑ cɑɣɑlɑɑ. Amɑ pǝnɛntɛ mǝ nɑ Ɩsɔ yǝlɑɑ ɩ́ kɑɑ ɩcɑtɛ, nɑ ɩ́ pǝsɑ Ɩsɔ tǝyɑɣɑ nyǝ́mɑ mɑɣɑmɑɣɑ tǝkpem. 
\v 20 Ɩ́ pǝsɑ ɩsɩɩ pɑ ŋmɑɑkʋɣʋ kutuluɣu tɔɣɔ. Yesu kɛlɛ kɑncɑɑlɑɣɑ cɛɛɣɑ, nɑ ɩ́lɛ́ ɩ tɔɔ kɛ́ tillɑɑ nɑ Ɩsɔ kʋyɔɣɔtʋtʋ tɛlǝsǝlɑɑ, nɑ pǝ́ kɑɑsɩ-mɛɣɛ ɩsɔtɑɑ. 
\v 21 Ɩ tɔɔ kɛ́ kutuluɣu ŋmɑtʋ tǝnɑ sǝŋɑ teu, nɑ tǝ́ tɔŋnɑ pɩɩʋ sɩ timpi tɑ́ nɑ Tɑcɑɑ tǝ kpɛntɑ mpʋ tɔ tǝ́ pǝsɩ Ɩsɔ tǝcɑɣɑlɛ nɑŋŋ nyǝntɛ. 
\v 22 Ɩ́ kpɛntʋɣʋnɑ-ɩ tɔ pɑ tǝnɑ-mɛ tɔtɔɣɔ kutuluɣu tɔɔ kɛ́ sɩ mǝ nɑ lɛlɑɑ ɩ́ kpɛntɩ nɑ ɩ́ pǝsɩ kutuluɣu ŋku kʋ tɑɑ Ɩsɔ Feesuɣu kɑ́ cɑɣɑ nɑ pǝ́ hʋ́lɩ́ sɩ Ɩsɔ wɛnnɑ kʋ tɑɑ tɔ.
\c 3
\s1 Tǝmlɛ nte pɑ tʋ Pɔɔlɩ tɔ
\p
\v 1 Pǝ tɔɔ kɛ́ Pɔɔlɩ mɑ́ wei mɑ kɛ́ sɑlǝkɑ tʋ kɛ Yesu Kilisiti tɔɔ sɩ pǝ́ wɑɑsɩ mpɑ mɛ ɩ́ tɑ́ kɛ́ Yutɑ nyǝ́mɑ tɔ, mɑ sǝlǝmǝɣɩ Ɩsɔ. 
\v 2 Mɑ hʋʋ teu sɩ ɩsǝntɔ ɩ́ nɩɩwɑ ɩsǝnɑ Ɩsɔ lɑpɑ-m suulu nɑ ɩ́ tʋ-m sɩ mɑ́ lɑ tǝmlɛ kɛ mǝ kiŋ tɔ. 
\v 3 Ɩsɔ sɩɩ ɩsǝnɑ mpi nɑ ɩ́ tǝŋǝɣɩ nɑ ɩ́ lɑkɩ nɑ pǝ́ ŋmɛlɑɑ tɔɣɔ ɩ kulɑɑ nɑ ɩ́ hʋ́lɩ́-m nɑ mɑ́ nyɩ. Hɑlɩ mɑ tɛmɑ-mɛɣɛ pǝ tɔm kɛɛsʋɣʋ kɛ cǝnɛ ɩnǝɣɩ pǝcɔ. 
\v 4 Nɑ ye ɩ́ kɑlɑɑ ɩ́ kɑ́ nɑ́ ɩsǝnɑ mpi mɑ nyǝmɑ́ Kilisiti tɔm nti ɩnɩ nɔɣɔlʋ tɑɑ cɛkǝnɑ mpʋ tɔ. 
\v 5 Ɩsɔ tɑ́ɑ́ hʋ́lɩ́-tǝɣɩ sɔsɑɑ tɑɑ yǝlɑɑ ɩsɩɩ kɑɣɑnɑ ɩ lɑpɑ nɑ ɩ Feesuɣu kuli-tɩ nɑ kʋ́ hʋ́lɩ́ tillɑɑ nɑ Ɩsɔ kʋyɔɣɔtʋtʋ tɛlǝsǝlɑɑ mpɑ pɑ kɛ́ ɩ yǝlɑɑ kʋpɑmɑ tɔ. 
\v 6 Nɑ tɔm kʋŋmɛlǝtʋ ntǝɣǝlɛ sɩ: Lɑɑpɑɑlɩ Kʋpɑŋ lɑpɑ nɑ mpɑ pɑ tɑ kɛ Yutɑ nyǝ́mɑ tɔ nɑ Yutɑ nyǝ́mɑ pɑ tǝnɑ pɑ́ hiki pɑ pɑɑ tete kɛ kʋpɑntʋ nti Ɩsɔ sɩɩ ɩ yǝlɑɑ tɔ tǝ tɑɑ, nɑ pɑ́ pǝsɩ kʋlʋm tǝkpɑtɑɑ, nɑ Ɩsɔ tɔmɑ sɩ ɩ lɑkɩ mpi nɑ Yesu Kilisiti kiŋ tɔ piitim lɛmpɩ nyǝ́mɑ nɑ́ wɛ pǝ tɑɑ tɔtɔɣɔ.
\p
\v 7 Suulu kɛ Ɩsɔ hʋlɑɑ nɑ ɩ́ tʋnɑ-m nɑ ɩ́ pɑɑsɩ nɑ ɩ́ hɑ-m tomɑ sɩ mɑ́ lɑ Lɑɑpɑɑlɩ Kʋpɑŋ ɩnɛ ɩ tǝmlɛ. 
\v 8 Mɑɣɑlɛ Ɩsɔ yǝlɑɑ sǝkpemɑ tɑɑ sǝkpelu, pɑɑ nɑ mpʋ mɑ ɩnǝɣɩ Ɩsɔ tʋnɑɑ nɑ ɩ́ hʋ́lɩ́ suulu ɩnɛ sɩ mɑ́ cɔɔ nɑ mɑ́ heeli mpɑ pɑ tɑ kɛ Yutɑ nyǝ́mɑ tɔɣɔ Kilisiti teu sɔsɔɔm mpi pǝ fɛɩnɑ ɑkpele tɔ pǝ Lɑɑpɑɑlɩ Kʋpɑŋ. 
\v 9 Nɑ mɑ́ lɑ nɑ yǝlɑɑ tǝnɑ cɛkǝnɑ Ɩsɔ sɩɩ ɩsǝnɑ mpi nɑ ɩ́ tǝŋǝɣɩ nɑ ɩ́ lɑkɩ nɑ pǝ́ ŋmɛlɑɑ tɔ, ɩsǝnɑ pǝ wɛɛ sɩ pǝ́ lɑ tɔ. Ɩsɔ wei ɩ lɑpɑ pǝ tǝnɑ nɑ pǝ́ wɛɛ tɔ ɩ ŋmɛsɑ hɑtuu lɔŋtɑɑ kɛ́ ɩsǝnɑ mpi ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ mpʋ tɔɣɔ. 
\v 10 Sɩ pǝ́ kɔmɑ nɑ pǝ́ tɑlɑ wɑɑtʋ ɩnɛ ɩlɛ ɩ yele nɑ ɩsɔtɑɑ kɑwulɑɣɑ nyʋɣʋ nyǝ́mɑ nɑ kɑ toŋtʋnɑɑ nɑnɑ Yesu sɛɛlɑɑ kpekɑ kiŋ kɛ Ɩsɔ nyǝm yɑɑsi tǝnɑ. 
\v 11 Ɩ kɑ hʋʋkɑɣɑ ntiɣi tɑm tɔ Tɑcɑɑ Yesu Kilisiti kiŋ kɛ ɩ lɑpɑ-tɩ. Nɑ pǝ nɔɣɔ tɑɑ tǝkʋlʋŋkʋlʋ kɛ́ ɩ lɑpɑ. 
\v 12 Nɑ tɑ́ nɑ-ɩ tǝ kpɛntɑɑ nɑ tǝ́ tɛmɩ-ɩ nɑ tɑ́ tɑɑ tɔɣɔ tǝ hikɑ mpɑɑʋ nɑ tǝ́ sǝŋ Ɩsɔ ɩsɛntɑɑ nɑ nɑɑni kɛ teu. 
\v 13 Ye mpʋ ɩlɛ mɑ wiikǝnɑ-mɛ sɩ ɩ́ tɑɑ lɔ tɔɔŋ kɛ kʋnyɔŋ ŋku mɑ tɔkɩ mǝ tɔɔ tɔ kʋ tɔɔ. Pǝ tɑɣɑ pʋlʋ pɩɩ tɛ nɑ pǝ́ kʋsɩ mǝ nyʋɣʋ.
\s1 Kilisiti sɔɔlʋɣʋ kɛ yǝlɑɑ
\p
\v 14 Pǝ tɔɔ kɛ́ mɑ luŋɑ ɑkulɑ kɛ Tɑcɑɑ 
\v 15 wei ɩ hɑɑkɩ ɑtɛ nɑ ɩsɔtɑɑ piitimnɑɑ tǝnɑɣɑ pǝ hǝlɑ tɔ, 
\v 16 sɩ ɩ teeli sɔsɔ tɔɔ ɩ́ yele nɑ ɩ Feesuɣu lɑ nɑ mɩɩ hiki pǝsʋɣʋ nɑ ɩ́ nyɔɔ toŋ kɛ hɑtuu mǝ lǝmɑɣɑsɛɛ tɑɑ, 
\v 17 nɑ ɩ́ tɛ Ɩsɔ nɑ mǝ́ tɑɑ kɛ́ teu, nɑ Kilisiti wɛɛ mǝ wɑɑlɩ kɛ́ tɑm. Nɑ mɑ sǝlǝmǝɣɩ Ɩsɔ kɛ́ sɩ ɩ́ sɔɔlǝɣɩ tǝmɑ nɑ ɩ́ sǝŋ pǝ tɑɑ kɛ́ teu tǝkeŋkeŋ. 
\v 18 Nɑ mǝ nɑ Ɩsɔ yǝlɑɑ tǝnɑ ɩ́ kpɛntɩ nɑ ɩ́ hiki pǝsʋɣʋ nɑ ɩ́ cɛkǝnɑ ɩsǝnɑ Kilisiti sɔɔlʋɣʋ tɔɔwɑ tɔ hɑlǝnɑ kʋ fɛɩ tǝnɑɣɑ. Nwɑɑŋ nɑ mpǝlɛ, ɩsɔtɑɑ nɑ ɑtɛ. 
\v 19 Nɑ pɑɑ Kilisiti sɔɔlʋɣʋ fɛɩ sɩ nɔɣɔlʋ pǝsǝɣɩ nɑ ɩ́ cɛkǝnɑ kʋ tǝnɑ tɔ, mɩɩ cɛkǝnɑ-kʋ, nɑ ɩ́ hiki Ɩsɔ nyǝm tǝnɑ nɑ pǝ́ mɑɣɑlɩ mǝ tɑɑnɑɑ tǝpɑmpɑm.
\p
\v 20 Tɔʋ, tomɑ nnɑ ɑ wɛ tɑ́ tɑɑ nɑ ɑ́ wɑɑsǝɣɩ-tʋɣʋ tɑm tɔ ɑnǝɣɩ Ɩsɔ pǝsǝɣɩ nɑ ɩ́ lɑnɑ-tʋɣʋ kʋpɑntʋ nɑ pǝ́ tɛɛ tɑ́ sǝlǝmʋɣʋ tɔɔ tǝcɑɣɑcɑɣɑ, hɑlǝnɑ pǝ́ tɩɩ tɛɛ mpi mpi tǝ pǝsǝɣɩ nɑ tǝ́ hʋʋ tɑ́ tɑɑ tɔ. 
\v 21 Ɩsɔ ɩnɩ ɩ sɛɛlɑɑ tǝnɑ tǝpɑɩ, nɑ Yesu Kilisiti pɑ́ tʋɣɩ-ɩ teeli nɑ pǝ́ polo ḿpʋ́ɣʋ́ tɑm hɑlǝnɑ tɑm. Ami.
\c 4
\s1 Yesu sɛɛlɑɑ wɛ kɛ́ ɩsɩɩ Kilisiti tɔnʋɣʋ
\p
\v 1 Ye mpʋ mɑ wei mɑ kɛ́ sɑlǝkɑ tʋ kɛ Tɑcɑɑ tǝmlɛ lɑpʋ tɔɔ tɔ, mɑ tɛɛkǝɣɩ-mɛ nɑ wiinɑʋ sɩ ɩ́ yele nɑ mǝ tɔntɛ te teu, nɑ pǝ́ kɛɛsǝnɑ tɔntɛ nte Ɩsɔ cɑɑ nɑ ɩ́ yɑɑ-mɛ sɩ ɩ́ tɔ tɔ. 
\v 2 Ɩ́ pɑsǝɣɩ mǝ tɩ, ɩ́ lɑkɩ tǝhɛɛ, ɩ́ hʋ́lǝ́ɣɩ́ tǝmɑɣɑ suulu, ɩ́ sǝŋnɑ tǝmɑ nɑ sɔɔlʋɣʋ. 
\v 3 Ɩsǝnɑ Ɩsɔ Feesuɣu yelɑɑ nɑ ɩ́ kpɛntɩ tɔ ɩ́ sɛɛsɩ ɩsǝlɛ nɑ mǝ kpɛntʋɣʋ ŋkʋɣʋ tɔkʋɣʋ, nɑ nɔɣɔ kʋlʋmɑɣɑ ŋkɑ ɩ́ wɛnɑ tɔ kɑ́ yele nɑ ɩ́ lɑ́ mpʋ. 
\v 4 Tɔnʋɣʋ kʋlʋmʋɣʋ tike tǝkoŋ wɛnnɑ, nɑ Feesuɣu Nɑŋŋtʋ kʋlʋm tike tǝkoŋ wɛnnɑ, nɑ tǝtɛɛllɛ nte tǝ tɔɔ Ɩsɔ lǝsɑ-mɛ tɔ tǝlɛ tǝ wɛ kʋlʋm tɔtɔɣɔ. 
\v 5 Tɑcɑɑ wɛ kʋlʋm kɛ́ tǝkoŋ, nɑ ɩ mpɑɑʋ wɛ kʋlʋmʋɣʋ kɛ́ tǝkoŋ, nɑ Ɩsɔ lʋm sɔʋ wɛ kʋlʋmǝm kɛ́ tǝkoŋ. 
\v 6 Kʋlʋm tike tǝkoŋ kɛnɑ yǝlɑɑ tǝnɑ Ɩsɔ nɑ pɑ Cɑɑ. Ɩnǝɣǝlɛ pɑ tǝnɑ tǝpɑɩ pɑ wulɑʋ, nɑ kʋlʋm ɩnɩ ɩ lɑkǝnɑ pǝ tǝnɑɣɑ ɩsǝnɑ ɩ nɔkɑɑ tɔ, nɑ kʋlʋm ɩnɩ ɩ wɛnɑ pɑ tǝnɑ pɑ wɑɑlɩ.
\p
\v 7 Ɩsɔ yelɑɑ kɛ́ nɑ pʋlʋ lɑpʋ sɑɑ pɑɑ tɑ́ tɑɑ wei kɛ́ ŋkɑŋkɑ nɑ pǝ́ kɛɛsǝnɑ ɩsǝnɑ mpi Kilisiti yelɑɑ sɩ pǝ lɑpʋ ɩ́ sɑɑ yʋlʋ tɔ. 
\v 8 Hɑlǝnɑ Ɩsɔ Tɔm tɑɑ pɑ ŋmɑɑ ḿpʋ́ɣʋ́ sɩ:
\q1 Wɑɑtʋ wei ɩ kpɑwɑ hɑtuu ɩsɔtɑɑ tɔ,
\q1 ɩ kpɛnnɑ ɩ kʋkpɑkpɑmɑ pɑɣɑlɛ nɑ ɩ́ kpɑɑnɑ,
\q1 nɑ ɩ lɑpɑ yǝlɑɑ kɛ kʋcɔɔŋ.
\m
\v 9 Tɔʋ, pɑ yɔɣɔtʋɣʋ mpʋ sɩ ɩ kpɑwɑ tɔ wentiɣilɛ mpʋ? Ntǝɣǝlɛ sɩ ɩ tiiwɑ kɑtɑtǝlɑɣɑ, hɑlǝnɑ ɩ́ tɑlɑ tɛtʋ tɛɛ mɑɣɑmɑɣɑ kɛ́ nɑ pǝ́cɔ́ ɩ́ kpɑɑkɩ. 
\v 10 Wei ɩnɩ ɩ tii mpʋ tɔ kʋlʋm ɩnɩ ɩ kpɑnɑ hɑlǝnɑ ɩ́ tɛɛ ɩsɔtɑɑ tǝyɑmyɑm sɩ ɩ́ wɛɛ nɑ ɩ́ mɑɣɑlɩ pɑɑ timpi. 
\v 11 Nɑ kʋlʋm ɩnɩ ɩ yelinɑ nɑ kʋlɑpǝlɛnɑɑ sɑɑ yǝlɑɑ kɛ ŋkɑ ŋkɑ. Ɩ tʋ lɛlɑɑ sɩ pɑ́ lɑ tillɑɑ sɔsɑɑ, lɛlɑɑ kɛ Ɩsɔ kʋyɔɣɔtʋtʋ tɛlǝsǝlɑɑ, nɑ lɛlɑɑ sɩ pɛlɛ pɑ́ cɔɔnɑ Lɑɑpɑɑlɩ Kʋpɑŋ, nɑ lɛlɑɑ sɩ pɛlɛ pɑ́ lɑ pɑɑsǝnlɑɑ nɑ Ɩsɔ Tɔm sɛɣɛsǝlɑɑ. 
\v 12 Ɩ lɑpɑ ḿpʋ́ɣʋ́ sɩ pɑ hʋ́lɩ́ Ɩsɔ yǝlɑɑ kɛ ɩsǝnɑ pɑɑ lɑ ɩ tǝmlɛ nɑ kilisiti tɔnʋɣʋ tuusi lɔlɔ kɛ Ɩsɔ sɛɛʋ tɑɑ tɔ. 
\v 13 Ye pǝ tɑɣɑ mpʋ tɑ́ tǝnɑ tǝpɑɩ tɑ́ tɑɑ tɛmnɑʋ kɛ Ɩsɔ kɑ́ lɑ kʋlʋmǝm, nɑ tɑ́ nyǝm kɛ Ɩsɔ Pǝyɑɣɑ kɑ́ lɑ kʋlʋmǝm tɔtɔ. Nɑ tɩɩ lɑ sɔsɑɑ kɛ ɩ tɔm tɑɑ hɑlǝnɑ tɑ́ teu tɑlɑ Kilisiti teu sɔsɔɔm. 
\v 14 Tǝ kɑɑ tɑsɑ pǝcɑɑtʋ tɑɑ kɛ́ wɛɛʋ nɑ pɑɑ puɣusulu wei ɩ́ lɑŋtǝɣɩ-tʋ nɑ ɩ kʋsɛɣɛsǝtʋ, tǝ mǝŋnɑ cǝnɛ tǝ mǝŋnɑ cǝnɛ, ɩsɩɩ heelim lɑkʋɣʋ tɔ. Puɣusulɑɑ mpɛ pɑ lukǝnɑ-tɩ nɑ pɑ ɑcilɑɣɑtʋ, nɑ pɑ́ tʋsǝɣǝnɑ lɛlɑɑ. 
\v 15 Amɑ ye tǝ heeliɣi tǝmɑɣɑ tɑmpɑnɑ nɑ sɔɔlʋɣʋ ɩlɛ tɩɩ sɔɔsǝɣɩ pɩɩʋ kɛ pǝ tǝnɑ pǝ tɑɑ nɑ tǝ́ tɑlɑ Kilisiti wei ɩ kɛ́ tɑ́ tɔnʋɣʋ nyʋɣʋ tɔ. 
\v 16 Ɩ tɔɔ kɛ́ niŋ nɑ nɔɔhɛɛ nɑ pǝ tǝnɑ pǝ wɛʋ ḿpʋ́ɣʋ́ wɑɑnɩ wɑɑnɩ kɛ tɔnʋɣʋ tɔɔ tɔ pǝ tɔkǝnɑ tǝmɑɣɑ teu, nɑ tɔnʋɣʋ ɑtɑmɑ ɑtɑmɑ tɑmsǝnɑ tǝmɑɣɑ teu tɔɣɔ pǝ kpɛntɑ pilimile. Pǝ tɔɔ kɛ́ pǝ tǝnɑ mpi pǝ wɛ tɔnʋɣʋ tɔɔ tɔ pǝ lɑkɩ pǝ tǝmlɛ kɛ teu, tɔnʋɣʋ tǝnɑ pɩɩkɩ kɛ́, nɑ kʋ sɔɔlʋɣʋ tɔŋnɑ sɔɔsʋɣʋ.
\s1 Tɔntɛ kʋfɑtɛ kɛ Kilisiti mpɑɑʋ tɑɑ
\p
\v 17 Ye pǝ wɛ mpʋ, nɑ Tɑcɑɑ mɑ heeliɣi-mɛ tǝfoo sɩ ɩ́ tɑɑ tɑsɑ tɔntɛ ɩsɩɩ cefelinɑɑ. Pɛlɛ pɑ tǝŋǝɣɩ pɑ kpɑɩ hʋwɛɛ kɛ yem kɛ́. 
\v 18 Pɑ lɑɣɑtʋ tɑ tʋlɩ. Pɑ ɩsǝkpɛɛtɛɛ nɑ pɑ lɑŋkpɩɩsǝŋ kɑtɑtǝlɑɣɑ tɔɔ pɑ pɑɑ fɛɩ weesuɣu ŋku Ɩsɔ hɑɑ tɔ kʋ tɑɑ. 
\v 19 Pɑ kɛ́ fɛɛlɛ fɛɩ nyǝ́mɑ kɛ́, yɑɑsi ɩsɑɣɑʋ tɑɑ kɛ́ pɑ hɑ pɑ tɩ tǝkpɑtɑɑ, nɑ pɑ́ huliɣi ɑsilimɑ tǝlɑtɛnɑɑ.
\p
\v 20 Amɑ Kilisiti tɔm nti mɛ ɩ́ nyǝmɑ́ tɔ pǝ tɑɣɑ ḿpʋ́ɣʋ́ tǝ wɛɛ. 
\v 21 Ntɔŋ ɩ́ tɛmɑ ɩ tɔm nɩɩʋ nɑ? Hɑlǝnɑ ɩ́ kɛʋ Kilisiti nyǝ́mɑ tɔ pɑ sɛɣɛsɑ-mɛɣɛ ɩ tɔm tǝnɑ tɑmpɑnɑ mɛɛ. 
\v 22 Ye mpʋ pǝ wɛɛ kɛ́ sɩ ɩ́ wɔɣɔsɩ mǝ yɑɑsi kʋpǝŋ wei ɩ́ tɔkɑ hɑtuu lɔŋ tɔ. Yɑɑsi kʋpǝŋ ɩnɩ ɩ kʋnyɩɩlǝŋ kʋpuɣusiŋ pukinɑ tǝlete tɑɑ kɛ́. 
\v 23 Pǝ wɛɛ kɛ́ sɩ ɩ́ lɑɣɑsɩ mǝ lotunɑɑ tɑɑ nɑ mǝ lǝmɑɣɑsɛɛ tɑɑ tǝkpɑtɑɑ. 
\v 24 Nɑ ɩ́ kɛlɩ yɑɑsi kʋfɑlʋ wei Ɩsɔ lǝsɑɑ nɑ ɩ́ kɛ́ ɩ mɑɣɑmɑɣɑ ɩ nyǝŋ tɔ. Mǝ tɔntɛ ɩ́ kɛɛsɑɑ nɑ tǝ teu ɩsɩɩ tɑmpɑnɑ hʋ́lǝ́ɣɩ́ tɔ ɩlɛ pɩɩ hʋ́lɩ́ sɩ ɩ́ kpɑɣɑ yɑɑsi ɩnɩ.
\p
\v 25 Pǝ tɔɔ ɩlɛ ɩ́ yele tǝmɑɣɑ pɔpɔtʋ pɛlʋɣʋ tǝkpɑtɑɑ, nɑ pɑɑ mǝ tɑɑ wei ɩ́ yɔɣɔtǝɣɩ tɑmpɑnɑ kɛ ɩ lɛlɑɑ kiŋ. Pǝ tɑɣɑ pʋlʋ, tɑ́ tǝnɑ tǝ wɛ kɛ́ ɩsɩɩ niŋ nɑ nɔɔhɛɛ wɛʋ tɔnʋɣʋ tɔɔ tɔ. 
\v 26 Nɑ ye pɑ́ɑ́nɑ́ kpɑ-mɛ ɩ́ tɑɑ yele nɑ ɑ́ ponɑ-mɛɣɛ wɑkǝlʋɣʋ tɑɑ. Nɑ pɑ́ɑ́nɑ́ ɩ́ tɑɑ leeli nɑ ɑ́ wɛ mǝ tɑɑ. 
\v 27 Ɩ́ tɑɑ hɑ mǝ tǝɣɩ ɩlɔɣɔʋ kɛ pɑɑ pǝcɔ mɑɣɑmɑɣɑ. 
\v 28 Ye wei ɩ́ kɑ ŋmɩɩlɑɣɑ pʋntʋ ɩ́ tɑɑ tɑsɑ ŋmɩɩlʋɣʋ. Amɑ ɩ́ sɛɛsɩ ɩsǝlɛ nɑ tǝmlɛ lɑpʋ nɑ ɩ́ hiki ɩ mɑɣɑmɑɣɑ ɩ niŋ nyǝm mpi pǝ tɔɔ ɩ wɩɩ teu tɔ, nɑ ɩ́ pǝsɩ nɑ ɩ́ sǝnɑ mpɑ pɑ fɛɩnɑ pʋlʋ tɔ. 
\v 29 Kɑwɑlɑɣɑ tɔm nɑtǝlɩ tǝ́ tɑɑ lɩɩkǝnɑ mǝ nɔɔsɩ. Amɑ ɩ́ yɔɣɔtǝɣɩ tɔmnɑɑ kʋpɑmɑ mpɑ pɑ wɑɑsǝɣɩ yǝlɑɑ nɑ pɑ́ yeki nɑ tǝ́ tuusiɣi lɔlɔ kɛ́ Ɩsɔ sɛɛʋ tɑɑ tɔ, ɩlɛ tɩɩ wɑɑsɩ tǝ nɩɩlɑɑ tǝnɑ. 
\v 30 Ɩ́ tɑɑ wɑkǝlǝɣɩ Ɩsɔ Feesuɣu Nɑŋŋtʋ lɑŋlɛ. Pǝ tɑɣɑ pʋlʋ, ɩnǝɣǝlɛ Ɩsɔ kʋyʋsʋm mpi ɩ yʋsǝnɑ-mɛ tɔ. Nɑ ɩnǝɣɩ Ɩsɔ sɩɩ-mɛɣɛ tɔlʋmɑ sɩ pǝ́ hʋ́lɩ́ sɩ kʋyɑkʋ wɛɛ kʋ kɔŋ, ŋku kʋ wule Ɩsɔ kɑ́ yɑ-mɛ tǝkpɑtɑɑ tɔ. 
\v 31 Ɩ́ yele hʋwɛɛ nyɑŋ nyǝnɑ tǝnɑ nɑ tǝmɑ tɔkǝnɑʋ kɛ tɑ́ɑ́ nɑ pɑ́ɑ́nɑ́ mʋɣʋ. Ɩ́ yele holɑ nɑ kʋtʋɣʋ. Ɩ́ yele ɩsɑɣɑtʋ tǝnɑɣɑ lɑpʋ, pɑɑ tǝ kɛ́ nti. 
\v 32 Ɩ́ lɑkɩ tǝmɑɣɑ yǝllɛ nɑ ɩ́ wii tǝmɑ pǝtɔɔtɛɛ. Ye ɩ́ pǝntǝnɑ tǝmɑ ɩ́ hʋ́lɩ́ tǝmɑɣɑ suulu ɩsɩɩ Ɩsɔ nɑ́ hʋlʋɣʋ-mɛɣɛ suulu kɛ Kilisiti tɔɔ tɔ.
\c 5
\s1 Mǝ lɑkɑsɩ ɩ́ te teu
\p
\v 1 Ɩsɩɩ ɩ́ kɛʋ ɩsǝntɔɣɔ Ɩsɔ piyɑ nsi ɩ sɔɔlɑɑ tɔ ɩ́ sɛɛsɩ ɩsǝlɛ nɑ ɩ́ kpɑɣɑ ɩ yɑɑsi tǝnɑ ɩlɛ. 
\v 2 Ɩ́ hʋ́lǝ́ɣɩ́ tǝmɑɣɑ sɔɔlʋɣʋ kɛ mǝ lɑkɑsɩ tǝnɑ tɑɑ ɩsɩɩ Kilisiti nɑ́ sɔɔlʋɣʋ-tʋ hɑlǝnɑ ɩ́ pǝsɩ ɩ tǝɣɩ kʋhɑhɑm kʋpɑm, nɑ ɩ́ kpɑɣɑ ɩ tɩ nɑ ɩ́ lɑ kɔtɑɣɑ kɛ tɑ́ tɔɔ sɩ pǝ́ lɑ Ɩsɔ kɛ́ teu nɑ sɔɔsʋŋ kʋpɑŋ tɔ.
\p
\v 3 Asilimɑ nɑ tɛtɛlɑkɑsɩ ɩsɑɣɑsɩ nɑ kʋnyɩɩlʋɣʋ, pǝ tǝnɑɣɑ mpʋ pǝ tɔm mɑɣɑmɑɣɑ ɩ́ tɑɑ lɩɩ mǝ nɔɔsɩ tɑɑ, pǝ tɑɣɑ pʋlʋ, lɑkɑsɩ nsɩ sɩ tɑkɑ tɑ́ mʋnɑ Ɩsɔ yǝlɑɑ. 
\v 4 Nɑ pǝ tɑ mʋnɑ tɔtɔ sɩ ɩ́ yɔɣɔtǝɣɩ fɛɛlɛ fɛɩ tɔm, yɑɑ tɔm kpɑɩ nyǝntʋ, yɑɑ kɛɛsǝlɑɣɑ tɔm nɑtǝlɩ. Amɑ ɩ́ pɑɑsǝnɑ Ɩsɔ kɛ́ sɛɛʋ sɩ ɩ́ nɑ tǝmlɛ. 
\v 5 Ɩ́ nyɩ teu sɩ ɑsilimɑ lɑtʋ, nɑ tɛtɛlɑkɑsɩ ɩsɑɣɑsɩ lɑtʋ, yɑɑ liɣitee kɔtɔɩ tʋ, pɑ tɑɑ nɔɣɔlʋ kɑɑ fɛlɩ nɔɔhǝlɛ kɛ Kilisiti nɑ Ɩsɔ pɑ kɑwulɑɣɑ tɑɑ. Hɑlɩ liɣitee kɔtɔɩ tʋ nɑ tɩɩŋ lɑɑlʋ pɑ ɩsɑɣɑtʋ lɩɩ kʋlʋm kɛ́.
\p
\v 6 Ɩ́ pɑɑsǝnɑ teu nɑ nɔɣɔlʋ ɩ́ tɑɑ tolisi-mɛ nɑ ɩ kʋmɛlǝtɔm, hɑlɩ ntɩ ɩnɩ tǝ tɔɔ kɛ́ Ɩsɔ kɑ́ lɑnɑ mpɑ pɑɑ cɑɑ ɩ luɣu nyǝntʋ lɑpʋ tɔ nɑ pɑ́ɑ́nɑ́. 
\v 7 Mǝ nɑ pǝ yǝlɑɑ ɩ́ tɑɑ kɑɑ pʋlʋɣʋ pɑɑ hoolɑɣɑ. 
\v 8 Lɔŋ ɩ́ kɑ wɛ kɛ́ ɩsɩɩ yʋlʋ tɔŋʋɣʋ ɑhoo kɛ sǝkpɛtʋɣʋ tɑɑ tɔ. Amɑ kɑɣɑnɑ mǝ nɑ Tɑcɑɑ ɩ́ kpɛntɑɑ, ɩlɛ pǝ wɛ ɩsɩɩ ilim lɩɩ mǝ tɔɔ kɛ́. Pǝ tɔɔ ɩlɛ mǝ lɑkɑsɩ ɩ́ te ɩsɩɩ kʋpɑmɑ mpɑ pɑ wɛ ilim tɑɑ tɔ pɑ nyǝŋsɩ. 
\v 9 Pǝ tɑɣɑ pʋlʋ timpi pǝ nyɑɑlɑɑ tɔ kʋpɑntʋnɑɑ lɑpʋ nɑ siɣisiŋ tǝŋʋɣʋ nɑ tɔm tɑmpɑnɑ yɔɣɔtʋɣʋ kɛ pǝ kɔŋnɑ. 
\v 10 Ɩ́ sɛɛsɩ ɩsǝlɛ nɑ ɩ́ cɛkǝnɑ mpi pǝ wɛ Tɑcɑɑ kɛ teu tɔ. 
\v 11 Mǝ nɑ mpɑ pɑ lɑkɩ sǝkpɛtʋɣʋ tɛɛ tǝmɑ kpɑɩ nyǝnɑ tɔ ɩ́ tɑɑ kɑɑ pʋlʋ pɑɑ hoolɑɣɑ. Amɑ ɩ́ lɑ nɑ pǝ́ kuli ɑ tɔɔ nɑ pɑɑ wei ɩ́ nɑ́. 
\v 12 Yǝlɑɑ mpɛ, mpi pɑ ŋmɛlǝɣɩ nɑ pɑ́ lɑkɩ tɔ sɩ pǝ tɔm ɩ́ tɩɩ lɩɩ yʋlʋ nɔɣɔ tɑɑ tɔ pǝ wɛ fɛɛlɛ kɛ́. 
\v 13 Ye pɑ lɑkɑsɩ nsɩ sɩ tɔɔ ɩ́ kulɑɑ nɑ pǝ́ nɑ́, ɩlɛ pɑɑ wei ɩ kɑ́ nɑ́ pɑ wɛɛtʋ cɑkǝlɛ tǝkelekele. 
\v 14 Ḿpʋ́ɣʋ́ pǝ tɩɩ wɛɛ, ye pǝ kulɑ pʋlʋ tɔɔ nɑ pǝ́ nɑɑkɩ tǝcɛɩcɛɩ, pǝlɛ pǝ pǝsǝɣɩ fǝtǝlɑ kɛ́. Pǝ tɔɔ kɛ́ pɑ yɔɣɔtǝɣɩ sɩ:
\q1 Nyɑ́ wei n tooki tɔ fe mpʋ.
\q1 Kʋlɩ nɑ ń lɩɩ sǝtɑɑ tɑɑ,
\q1 Kilisiti kɑ́ cɛ nyɑ́ sǝkpɛtʋɣʋ.
\p
\v 15 Ye mpʋ ɩlɛ ɩ́ lɑ lɑɑkɑlɩ nɑ mǝ tɔntɛ kɛ teu, ɩ́ tɑɑ tɔ ɩsɩɩ kʋmɛlɛmǝŋ, ɑmɑ ɩ́ tɔ ɩsɩɩ lǝmɑɣɑsɛɛ nyǝ́mɑ. 
\v 16 Ɩ́ tɑɑ yele nɑ ɑlǝsɛkɛ kʋyɛɛŋ fiti-mɛɣɛ yem. Pǝ tɑɣɑ pʋlʋ ɩsɑɣɑtʋ hukinɑ tɑ́ kɑɣɑnɑ kʋyɛɛŋ ɩnɛ ɩ tɑɑ. 
\v 17 Ɩ́ tɑɑ lɑ ɩsɩɩ kʋmɛlɛmǝŋ lɑkʋɣʋ tɔ. Amɑ ɩ́ sɛɛsɩ ɩsǝlɛ nɑ ɩ́ nyɩ mpi Tɑcɑɑ luɣu wɛɛ sɩ mɛ ɩ́ lɑ tɔ.
\p
\v 18 Ɩ́ tɑɑ yele nɑ sʋlʋm kʋ-mɛ. Sʋlʋm kʋɣʋ kɑ́ tʋ-mɛɣɛ yem yem lɑkɑsɩ. Amɑ ɩ́ yele nɑ Feesuɣu Nɑŋŋtʋ hɑɣɑ mǝ tɑɑ tǝmɑmɑm. 
\v 19 Ye ɩ́ cɑɣɑ tǝmɑ kiŋ mǝ nɔɔsɩ tɑɑ ɩ́ wɛɛ Ɩsɔ Tɔm yontu nɑ ɑpɑlʋtʋ nyǝntʋ nɑ Ɩsɔ sɑmtʋ nyǝntʋ. Ɩ́ sɑ Tɑcɑɑ nɑ sɑmtʋ yontu nɑ Ɩsɔ Tɔm nyǝntʋ nɑ luɣu kʋlʋmʋɣʋ. 
\v 20 Ɩ́ sɛɛkɩ Tɑcɑɑ Ɩsɔ kɛ́ ɩ́ nɑ tǝmlɛ kɛ pɑɑ wɑɑtʋ wei kɛ́ pɑɑ mpi pǝ tɔɔ kɛ́ Tɑcɑɑ Yesu Kilisiti tɔɔ.
\s1 Apɑlɑɑ nɑ pɑ ɑlɑɑ pɑ tɔm
\p
\v 21 Ɩ́ nɩɩkǝnɑ tǝmɑɣɑ teu kɛ Kilisiti sɔɣɔntʋ tɔɔ.
\p
\v 22 Alɑɑ-mɛ ɩ́ seeki mǝ pɑɑlɑɑ ɩsɩɩ ɩ́ seekuɣu Tɑcɑɑ tɔ. 
\v 23 Pǝ tɑɣɑ pʋlʋ, ɩsǝnɑ mpi Kilisiti nɑ́ kǝlɑ Yesu sɛɛlɑɑ kpekǝle tɔ mpʋ tɔtɔɣɔ ɑpɑlʋ nɑ́ kǝlɑ ɑlʋ. Yesu sɛɛlɑɑ kpekǝle kɛnɑ Kilisiti tɔnʋɣʋ pilimile, nɑ Kilisiti mɑɣɑmɑɣɑ kɛnɑ pɑ nyʋɣʋ yɑtʋ. 
\v 24 Nɑ ɩsɩɩ Yesu sɛɛlɑɑ kpekɑ seekuɣu Kilisiti tɔ, mpʋ tɔtɔɣɔ ɑlɑɑ kɑ́ seeki pɑ pɑɑlɑɑ kɛ pǝ tǝnɑ pǝ tɑɑ.
\p
\v 25 Apɑlɑɑ mɩɩ sɔɔlɩ mǝ ɑlɑɑ ɩsɩɩ Kilisiti sɔɔlʋɣʋ Yesu sɛɛlɑɑ kpekɑ nɑ ɩ́ sɩ ɑ sǝm tɔ. 
\v 26 Ɩ lɑpɑ ḿpʋ́ɣʋ́ sɩ ɩ́ nyɑɑlɩ-wɛ nɑ lʋm nɑ ɩ́ tɑɣɑnɩ-wɛ nɑ ɩ tɔm nɑ pɑ́ te teu nɑ pɑ́ mʋnɑ Ɩsɔ yǝlɑɑ. 
\v 27 Pǝ tɑɣɑ pʋlʋ ɩ cɑɑkɑɣɑ kɛ́ sɩ ɩ́ kpɑɣɑ Yesu sɛɛlɑɑ kpekɑ nɑ ɑ teu tǝkpɑtɑɑ nɑ ɩ́ sɩɩnɑ ɩ tɩ, nɑ ɑ́ wɛɛ tǝnɑŋŋ, ɑ tiili tɑ́ wɑkǝlɩ, nɑ pɑɑ ɑsilimɑ ɑ fɛɩnɑ, nɑ ɑ́ tɑ́ cɑɑmɩ. Pǝyele kʋwɑkǝlǝm nɑpǝlɩ fɛɩ ɑ kiŋ. 
\v 28 Ye mpʋ pǝ wɛɛ sɩ ɑpɑlɑɑ ɩ́ sɔɔlǝɣɩ pɑ ɑlɑɑ kɛ teitei kɛ́ ɩsɩɩ pɑ sɔɔlʋɣʋ pɑ tɩ tɔ. Ye yʋlʋ sɔɔlǝɣɩ ɩ ɑlʋ pǝ wɛ ɩsɩɩ ɩ mɑɣɑmɑɣɑ kɛ ɩ sɔɔlǝɣɩ. 
\v 29 Amɑ tɑmpɑnɑ tɔɔ nɔɣɔlʋ fɛɩ wei ɩ tɑɑ kpɑnɑ ɩ mɑɣɑmɑɣɑ tɔ, hɑlɩ pɑɑ wei ɩ pɑɑsǝɣǝnɑ ɩ tɔnʋɣʋ tɔɔ kɛ́ teu kɛ́ nɑ ɩ́ tɑɣɑnǝɣɩ ɩ tɩ tǝtetete ɩsɩɩ Kilisiti pɑɑsʋɣʋnɑʋ Yesu sɛɛlɑɑ kpekɑ tɔ. 
\v 30 Pǝ tɑɣɑ pʋlʋ, tɑ́ kɛnɑ ɩ tɔnʋɣʋ pilimile tɔɔ niŋ nɑ nɔɔhɛɛ nɑ pǝ tǝnɑɣɑ mpʋ. 
\v 31 Hɑlɩ pɑ ŋmɑɑ ḿpʋ́ɣʋ́ Ɩsɔ Tɔm tɑɑ sɩ: Pǝ tɔɔ kɛ́ yʋlʋ kɑ́ cɛ ɩ cɑɑ nɑ ɩ too sɩ ɩ́ nɑ ɩ ɑlʋ pɑ́ cɑɣɑ. Nɑ pɑ nɑɑlɛ pɑ́ kpɛntɩ nɑ pɑ́ pǝsɩ yʋlʋ kʋlʋm. 
\v 32 Amɑ tɑmpɑnɑ sɔsɔɔnɑ kɛ pǝ kulɑ looŋɑ kɑnɛ kɑ tɔɔ cǝnɛ. Kilisiti nɑ Yesu sɛɛlɑɑ pɑ tɔm lɑpɑ ɩsǝnɑ tɔɣɔ mɑ nɑɑ kɑ tɑɑ. 
\v 33 Pɑɑ nɑ mpʋ mɛɣɛ pǝ heeliɣi sɩ pɑɑ wei ɩ́ sɔɔlǝɣɩ ɩ ɑlʋ ɩsɩɩ ɩ sɔɔlʋɣʋ ɩ tɩ tɔ. Nɑ pɑɑ ɑlʋ wei ɩ́lɛ́ ɩ́ seeki ɩ pɑɑlʋ tɔtɔ.
\c 6
\s1 Piyɑ nɑ sɩ cɑɑnɑɑ pɑ tɔm
\p
\v 1 Piyɑ mɛ, Tɑcɑɑ ɩsɛntɑɑ mǝ nyǝntʋ ntɛ́ sɩ ɩ́ nɩɩnɑ mǝ nyǝ́mɑ. Mpi tɔ, ntɩ ɩnɩ tǝ wɛnnɑ teu. 
\v 2 Kʋsǝsɩɩtʋ nti pǝ sɩɩwɑ tɔɣɔlɛ sɩ: Seeki nyɑ́ cɑɑ nɑ nyɑ́ too. Tǝ tɔɔ kɛ́ pǝ cɑɑlɑ kʋpɑntʋ tǝnɑ kɑsǝyɑɣɑ kɛ sɛɛʋ sɩ: 
\v 3 N kɑ́ nɩɩ leleŋ nɑ nyɑ́ weesuɣu kɑ́ tɑɣɑlɩ ɑtɛ cǝnɛ.
\p
\v 4 Cɛcɛnɑɑ mɛ, mɩɩ tɑɑ lɑ nɑ pɑ́ɑ́nɑ́ kpɑ mǝ piyɑ. Amɑ ɩ́ tɔkɩ-sɩ nɑ ɩ́ sɛɣɛsǝɣɩ-sǝɣɩ kʋpɑntʋ, nɑ ɩ́ hʋ́lǝ́ɣɩ́-sǝɣɩ lɔŋ ɩsɩɩ Tɑcɑɑ luɣu wɛɛ tɔ.
\s1 Yomɑɑ nɑ pɑ cɑɑnɑɑ pɑ tɔm
\p
\v 5 Yomɑɑ mɩɩ nɩɩkǝnɑ mǝ cɑɑnɑɑ mpɑ pɑ tɔkɑ-mɛɣɛ ɑntulinyɑ tɑɑ cǝnɛ tɔ nɑ luɣu kʋlʋmʋɣʋ. Ɩ́ wɛɛnɑ pɑ sɔɣɔntʋ nɑ ɩ́ nyɑnɑ-wɛɣɛ teitei ɩsɩɩ ye pɩɩ kɛ Kilisiti ɩ kɑ lɑpɑ tɔ. 
\v 6 Ɩ́ tɑɑ seeki-wɛɣɛ wɑɑtʋ wei pɑ wɛɛkɩ tɔ tike sɩ pǝ́ lɑ-wɛɣɛ leleŋ. Amɑ ɩ́ lɑ Ɩsɔ luɣu nyǝntʋ nɑ luɣu kʋlʋmʋɣʋ ɩsɩɩ Kilisiti yomɑɑ. 
\v 7 Yomle tǝmlɛ nte pɑ tʋɣɩ-mɛ tɔ ɩ́ lɑ-tɛ nɑ luɣu kʋlʋmʋɣʋ nɑ pǝ́ wɛɛ ɩsɩɩ Tɑcɑɑ tǝmlɛ kɛ ɩ́ lɑkɩ, pǝ tɑɣɑ yǝlɑɑ tike nyǝntɛ. 
\v 8 Ɩ́ nyɩ teu sɩ pɑɑ yom pɑɑ kɑsɑɣɑmpu Tɑcɑɑ kɑ́ tɛ nɑ ɩ́ fɛlɩ pɑɑ wei kɛ́ kʋpɑntʋ nti ɩ lɑpɑ tɔ.
\p
\v 9 Nɑ mpɑ mɛ ɩ́ kɛ yomɑɑ cɑɑnɑɑ tɔ mɩɩ lɑ-wɛɣɛ mpʋ tɔtɔ, ɩ́ kpɑ mǝ tɩ nɑ pɑ nyɑɑsʋɣʋ. Nɑ ɩ́ tɔɔsɩ sɩ mǝ nɑ wɛ ɩ́ kɑɑ cɑɑ kʋlʋm kɛ ɩsɔtɑɑ nɑ ɩ́lɛ́ ɩɩ fɑɣɑsǝɣɩ nɔɣɔlʋ se.
\p
\v 10 Nti tǝ kɑɑsɑɑ tɔɣɔlɛ sɩ mɩɩ pɛɛkǝɣɩ sɩ ɩ́ nyɔɔ toŋ kɛ mǝ nɑ Tɑcɑɑ mǝ kpɛntʋɣʋ tɑɑ nɑ ɩ toŋ sɔsɔɔŋ tɑɑ. 
\v 11 Ɩ́ tʋ mǝ tɔɔ kɛ́ yoou wontu tǝnɑ nti Ɩsɔ hɑɑkɩ-mɛ tɔ, nɑ ɩ́ sǝŋ tǝcɑ nɑ ɩ́ tɑŋ Ɩlɔɣɔʋ nɑ ɩ ɑcilɑɣɑtʋ tǝnɑ. 
\v 12 Pǝ tɑɣɑ yǝlɑɑ kɛ tǝ yoonɑ, ɑmɑ mpɑ tǝ yoonɑ tɔɣɔlɛ ɑlɔɣɑɑ toŋtʋnɑɑ ɑsɑɣɑɑ mpɑ pɑ wɛ ɩsɔtɑɑ tɔ, nɑ sǝkpɛtʋɣʋ tɑɑ cǝnɛ ɑwulɑɑ nɑ toŋtʋnɑɑ nɑ sɔsɑɑ. 
\v 13 Pǝ tɔɔ tɔ ɩ́ co Ɩsɔ yoou wontu ntɩ tǝ tǝnɑɣɑ kpɑkpɑɑ, nɑ pǝ kɔmɑ nɑ pǝ́ tɑlɑ kʋyɛɛŋ ɩsɑɣɑŋ tɑɑ nɑ mǝ kolontu kʋlǝɣɩ mǝ tɔɔ, ɩ́ pǝsɩ nɑ ɩ́ tɑŋɩ-ɩ teu. Nɑ ye ɩ́ tɔkɑ mǝ tǝɣɩ teu nɑ ɩ́ yoo hɑlǝnɑ ɩ́ tʋ yoou ŋkʋ kʋ nyʋɣʋ, ɩlɛ ɩ́ kɑ́ nyɔɔ toŋ kɛ ḿpʋ́ɣʋ́ tɑm.
\p
\v 14 Ye mpʋ ɩ́ tɑntɩ nɑ ɩ́ tɑŋɑɑ, nɑ ɩ́ tǝŋ tɑmpɑnɑ kɛ teu nɑ pǝ́ wɛɛ ɩsɩɩ pɑ lǝlʋɣʋ tɑmpɑlɑ kɛ tǝnɑɣɑ tɑɑ tɔ. Nɑ ɩ́ tǝŋ siɣisuɣu kɛ pǝ tǝnɑ pǝ tɑɑ nɑ pǝ́ wɛɛ ɩsɩɩ nyǝɣǝtʋ toko kɛ ɩ́ suuwɑ. 
\v 15 Ɩ́ sɛɛsɩ ɩsǝlɛ nɑ Lɑɑpɑɑlɩ Kʋpɑŋ wei ɩ kɔŋnɑ hɛɛsʋɣʋ tɔɣɔ kpɑɑlʋɣʋ nɑ pǝ́ wɛɛ ɩsɩɩ ntɑŋkpɑlɑ kʋpɑnɑ kɛ ɩ́ lɛɛwɑ. 
\v 16 Ɩ́ tɛ mǝ tɑɑ nɑ Ɩsɔ kɛ́ tɑm nɑ pǝ́ wɛɛ ɩsɩɩ kpɑ́lʋ́ɣʋ́ ŋku ɩ́ kɑ́ kentiɣinɑ ɩsɑɣɑtʋ tʋ nyǝ́mɑ́ sɔtʋ nyǝnɑ tɔ. 
\v 17 Ɩ́ nyǝnɩ yɑpʋ mpi Ɩsɔ yɑkɩ-mɛ tɔ ɩsɩɩ yoou kɑhukɑ, nɑ ɩ́ tɔkɩ Ɩsɔ Tɔm ɩsɩɩ lɑɣɑtɛ nte ɩ Feesuɣu cɛlɑ-mɛ tɔ. 
\v 18 Ɩ́ lɑkɩ pǝ tǝnɑɣɑ mpʋ nɑ Ɩsɔ sǝlǝmʋɣʋ, nɑ ɩ́ wiikinɑ-ɩ sɩ ɩ́ sǝnɑ-mɛ. Ɩ́ sǝlǝmǝɣɩ pɑɑ mpi pǝ tɑɑ, nɑ Feesuɣu Nɑŋŋtʋ ɩ́ hʋ́lɩ́-mɛɣɛ ɩsǝnɑ ɩ́ kɑ́ sǝlǝmɩ tɔ. Ɩ́ lɑ kpelikpekɑ nyǝ́mɑ nɑ ɩ́ sɛɛsɩ ɩsǝlɛ kɛ ḿpʋ́ɣʋ́ tɑm. Ɩ́ sǝlǝmǝɣǝnɑ Ɩsɔ yǝlɑɑ tǝnɑ. 
\v 19 Nɑ ɩ́ sǝlǝmǝnɑ mɑ tɔtɔ, nɑ wɑɑtʋ wei mɑ́ cɑɑkɩ mɑ nɔɣɔ tɔɔ kɛ́ kuluɣu, Ɩsɔ ɩ́ tʋ mɑ tɑɑ kɛ́ tɔm nti tǝ tǝŋɑ teu tɔ, nɑ mɑ́ hʋ́lɩ́ Lɑɑpɑɑlɩ Kʋpɑŋ tɔm nti tɩɩ ŋmɛlɑɑ tɔ nɑ ɑpɑlʋtʋ. 
\v 20 Pɑɑ nɑ pɑ tǝkɑ-m sɑlǝkɑ tɑɑ tɔ mɑ́ kɛnɑ Lɑɑpɑɑlɩ Kʋpɑŋ ɩnɛ ɩ tǝmlɛ tʋ sɔsɔ. Pǝ tɔɔ tɔ ɩ́ sǝlǝmǝnɑ-m nɑ mɑ́ yɔɣɔtɩ ɩ tɔm nɑ ɑpɑlʋtʋ kɛ ɩsǝnɑ mpi pǝ nǝɣǝsǝnɑɑ tɔ. 
\v 21 Tɑ tɑɑpɑlʋ Tisikɩ wei ɩ lɑkɩ Tɑcɑɑ tǝmlɛ nɑ luɣu kʋlʋmʋɣʋ tɔ ɩ kɑ́ kɛɛsɩ-mɛɣɛ mɑ tɔm nɑ ɩ́ nyɩ ɩsǝnɑ tɑɑ mɑ wɛɛ tɔ. 
\v 22 Pǝ tɔɔ mɑɣɑmɑɣɑ kɛ mɑ tiliɣi-ɩ mǝ kiŋ, sɩ mɛ ɩ́ nyɩ ɩsǝnɑ tɑɑ tǝ wɛ cǝnɛ tɔ, nɑ pǝ́ sɔɔsɩ-mɛɣɛ ɑpɑlʋtʋ.
\p
\v 23 Tɑcɑɑ Ɩsɔ nɑ tɑ́ Sɔsɔ Yesu Kilisiti pɑ́ hɑ tɑ́ tɑɑpɑlɑɑ tǝnɑɣɑ ɑlɑɑfǝyɑ nɑ pɑ tǝmɑ sɔɔlʋɣʋ nɑ tɑ́ɑ́ tɛmnɑʋ kɛ Ɩsɔ. 
\v 24 Ɩsɔ ɩ́ hʋ́lɩ́ pɛɛlɛɛ kɛ pɑ tǝnɑ mpɑ pɑ sɔɔlɑ Tɑcɑɑ Yesu Kilisiti kɛ tɑm tɔ.