\id COL - Lokpa Bible portions [dop] -Benin 1999 (web edition -2017)
\ide UTF-8
\h Kolosi
\toc1 TAKƎLAƔA ŊKA PƆƆLƖ NMAAWA KOLOSI NYƎ́MA TƆ
\toc2 Kolosi
\toc3 Kol
\mt2 TAKƎLAƔA ŊKA PƆƆLƖ NMAAWA
\mt1 KOLOSI
\mt2 NYƎ́MA TƆ
\imt1 Kʋtʋlʋtʋ
\ip Kolosi ɩcɑtɛ wɛ Asii tɛtʋ tɑɑ kɛ́ ɩsɩɩ ɑcɑlɛɛ lɛnnɑ. Pǝ cɑɣɑ ɩsɩɩ Pɔɔlɩ tɑɑpɑlʋ wei pɑ yɑɑ sɩ Ɩpɑfǝlɑsɩ tɔ ɩnɩ ɩ ponnɑ Ɩsɔ Tɔm kɛ Kolosi nyǝ́mɑ. Ɩpɑfǝlɑsɩ mɑɣɑmɑɣɑ tɑ lɑŋ Kolosi tʋ (1:7 nɑ 4:12). Pǝ cɑɣɑ ɩsɩɩ Ɩpɑfǝlɑsɩ kɛɛsɑ Pɔɔlɩ sɩ Ɩsɔ sɛɛʋ kpɑɩ nyǝm nɑpǝlɩ pǝ nyǝ́mɑ lɩɩwɑ. Nɑ pǝ nyǝ́mɑ sɛɣɛsǝɣɩ sɩ, ye yʋlʋ cɑɑ sɩ ɩ́ nyɩ Ɩsɔ nɑ pǝ́ yɑ ɩ nyʋɣʋ. Pǝ wɛɛ sɩ ɩ́ tǝŋ kɔtɑsɩ nɑ ɩ́ luŋ ɩsɔtɑɑ nyǝm mpi pɩɩ nɑɑkɩ tɔ. Pǝ́cɔ́ pǝ wɛɛ sɩ ɩ́ pɛlɩ nɑ ɩ́ kii tɔɣɔnɑsɩ nɑ kʋnyɔnyɔɔm nɑ pǝ polo. Pǝ tɔɔ kɛ́ Pɔɔlɩ ŋmɑɑ-wɛ nɑ ɩ́ heeli-wɛ sɩ nyʋɣʋ yɑpʋ mpi Yesu hɑwɑ tɔ pǝ mɑɣɑnɑɑ.
\iot Ɩsǝnɑ pɑ fɑɣɑ Kolosi tɑkǝlɑɣɑ tɔ:
\io1 Ɩsɔ sɑmtʋ nɑ Kolosi nyǝ́mɑ sɛɛtʋ, titite \ior 1:1-14\ior*
\io1 Yesu mɑɣɑnɑɑ, titite \ior 1:15–2:19\ior*
\io1 Kilisiti hɑɑkɩ weesuɣu kʋfɑlʋɣʋ, titite \ior 2:20–4:18\ior*
\c 1
\s1 Sɛɛtʋ
\p
\v 1 Mɑɣɑ Pɔɔlɩ, Ɩsɔ luɣu lɑpǝnɑ nɑ mɑ́ lɑ́ Yesu Kilisiti tillu. Mɑ́ nɑ tɑ́ tɑɑpɑlʋ Timotee tǝ ŋmɑɑkǝnɑ tɑkǝlɑɣɑ kɑnɛɣɛ.
\p
\v 2 Ɩsɔ yǝlɑɑ mpɑ mɛ ɩ́ wɛ kolosi nɑ ɩ́ kɛ́ tɑ́ tɑɑpɑlɑɑ kʋpɑmɑ kɛ Kilisiti tǝŋʋɣʋ tɑɑ tɔ. Tɑcɑɑ Ɩsɔ ɩ́ hʋ́lɩ́-mɛɣɛ pɛɛlɛɛ nɑ ɩ́ hɑ-mɛɣɛ ɑlɑɑfǝyɑ.
\s1 Pɔɔlɩ sɛɛ Ɩsɔ kɛ́ ɩ́ nɑ tǝmlɛ
\p
\v 3 Ye tǝ kʋlɑ mǝ tɔɔ kɛ́ sʋlʋmʋɣʋ, sɛɛtʋ kɛ tǝ sɛɛkɩ tɑm kɛ́ tɑ́ Sɔsɔ Yesu Kilisiti Cɑɑ Ɩsɔ. 
\v 4 Pɑ heelɑ-tʋɣʋ ɩsǝnɑ ɩ́ tɛmɑ mǝ tɑɑ nɑ Yesu Kilisiti, nɑ ɩsǝnɑ ɩ́ sɔɔlɑ Ɩsɔ yǝlɑɑ tǝnɑ tɔ. 
\v 5 Wɑɑtʋ wei tɑmpɑnɑ tɔm Lɑɑpɑɑlɩ Kʋpɑŋ cɑɑlɑ mǝ tɛɣɛ tɑtɛ tɔ pɑ hʋlɑ-mɛɣɛ tɛɛlʋɣʋ ŋku kʋ wɛ tɑmpɑnɑ tɔm ntɩ tǝ tɑɑ tɔ. Pǝ tɔɔ kɛ́ mǝ tɑɑ tɛmnɑʋ kɛ Ɩsɔ nɑ mǝ sɔɔlʋɣʋ teesinɑ mpi pɑ sɩɩ-mɛɣɛ hɑtuu ɩsɔtɑɑ nɑ ɩ́ tɛɛlǝɣɩ-wɩ tɔ. 
\v 6 Lɑɑpɑɑlɩ Kʋpɑŋ yɛkǝɣɩ kɛ́, nɑ pɑɑ ɩ tɑlɑ timpiɣi ɑntulinyɑ tǝnɑ tɑɑ ɩ lɑkɩ kʋpɑntʋ kɛ́. Ḿpʋ́ɣʋ́ ɩ lɑpɑ mǝ hɛkʋ kɛ kʋyɑŋku ɩ́ tɑɑlɑ Ɩsɔ pɛɛlɛɛ tɔm kɛ nɩɩʋ tɔ, ɩ́ hii lɔŋ nɑ ɩ́ nyɩ pɛɛlɛɛ ɑnɩ ɑ tɑmpɑnɑ. 
\v 7 Tɑ tǝmlɛ tɑɑ tɑɑpɑlʋ kʋpɑŋ Ɩpɑfǝlɑsɩ sɛɣɛsǝnɑ-mɛɣɛ mpʋ. Tɑ́ nɔɣɔ kɛ ɩ lɑkǝnɑ tǝmlɛ ɩsɩɩ Kilisiti tǝmlɛ tʋ kʋpɑŋ. 
\v 8 Ɩ heelɑ-tʋɣʋ tǝmɑ sɔɔlʋɣʋ ŋku Ɩsɔ Feesuɣu tʋ-mɛ tɔ kʋ tɔm. 
\v 9 Pǝ tɔɔ kɛ́ tɩɩ hɛɛsǝɣɩ Ɩsɔ sǝlǝmʋɣʋ kɛ mǝ tɔɔ kɛ́ tuu kʋyɑŋku pɑ heelɑ-tʋɣʋ mǝ tɔm tɔ. Tǝ sǝlǝmǝɣɩ Ɩsɔ kɛ́ sɩ ɩ́ hɑ-mɛɣɛ ɩ Feesuɣu hɑɑkɩ nyǝm nɑ lɑɣɑtʋ nti tɔ tǝ tǝnɑ nɑ pǝ́ yele nɑ ɩ́ nyɩ ɩ luɣu nyǝntʋ kɛ teu. 
\v 10 Mpʋ pɩɩ yelinɑ nɑ mǝ tɔntɛ mɑɣɑ Tɑcɑɑ nɑ mǝ kʋlɑpʋtʋ lɑpɩ-ɩ teu kɛ tɑm. Nɑ pɩɩ yele nɑ ɩ́ lɑkɩ tǝmɑ kʋpɑnɑ ɑnɩ ɑ tǝnɑ, ɑ nɔɣɔ nɑ ɑ sukɑ, nɑ ɩ́ kɑ́ sɔɔsǝɣɩ Ɩsɔ kɛ́ nyǝm. 
\v 11 Tǝ sǝlǝmǝɣɩ Ɩsɔ kɛ́ sɩ ɩ́ lɑ-mɛ nɑ ɩ́ nyɔɔ toŋ kɛ teu nɑ ɩ pǝsʋɣʋ teeli nyǝŋkʋ toŋ tɑɑ, nɑ ɩ́ pǝsɩ nɑ ɩ́ kɑntǝlɩ pǝ tǝnɑ mpi pɩɩ mɑɣɑnɑ-mɛ tɔ pǝ tɑɑ nɑ suulu. 
\v 12 Ɩ́ sɛɛ Tɑcɑɑ kɛ ɩ́ nɑ tǝmlɛ nɑ lɑŋhʋlʋmlɛ, ɩnɩ ɩ yelinɑ nɑ mɛ ɩ́ mʋnɑ sɩ ɩ́ hiki mǝ pɑɑ nyǝm kɛ kʋpɑntʋnɑɑ mpɑ Ɩsɔ sɩɩ ɩ yǝlɑɑ kɛ tǝnɑŋŋ tɑɑ tɔ pɑ tɑɑ. 
\v 13 Ɩnɩ ɩ lɛɛkǝnɑ-tʋɣʋ ɑhoo sǝkpɛtʋɣʋ tɛɛ ɑsɑɣɑɑ sɔsɑɑ niŋ tɑɑ nɑ ɩ́ sʋsɩ-tʋɣʋ ɩ luɣu tɛɛ Pǝyɑɣɑ kɑwulɑɣɑ tɑɑ. 
\v 14 Nɑ ɩ pǝyɑɣɑ ŋkɛ kɑ tɔɔ kɛ́ pǝ yɑpɑ-tʋ nɑ pǝ́ hɩɩsɩ tɑ́ ɩsɑɣɑtʋ.
\s1 Kilisiti wɛɛtʋ nɑ ɩ tǝmlɛ
\p
\v 15 Kilisiti kɛlǝnɑ Ɩsɔ wei pɑɑ nɑɑkɩ tɔ tǝtɛŋɛlɛŋ. Ɩnǝɣǝlɛ Ɩsɔ kɑncɑɑlɑɣɑ kʋlʋlʋ wei ɩ kǝlɑ pǝ tǝnɑ mpi Ɩsɔ lɑpɑ tɔ. 
\v 16 Ɩnǝɣɩ Ɩsɔ lɑpǝnɑ pǝ tǝnɑ, pɑɑ ɩsɔtɑɑ nɑ ɑtɛ pǝ nyǝm mpi pɑ nɑɑ nɑ mpi pɑɑ nɑɑ tɔ. Pǝ kpɑɣɑʋ pǝsǝlɑɑ nɑ sɔsɑɑ nɑ ɑwulɑɑ nɑ toŋtʋnɑɑ pǝ loosi tǝnɑ tɔ ɩ niŋ kɛ Ɩsɔ lɑpǝnɑ pǝ tǝnɑ, nɑ ɩ tɔɔ kɛ́ Ɩsɔ lɑpɑ-wɩ. 
\v 17 Pǝ tǝnɑ pǝ lɩɩwɑɣɑ nɑ pǝ́ mɑɣɑnɑ-ɩ, nɑ pǝ tǝnɑ mpi pǝ lɑpɑ tɔ pǝ tɑmsǝnɑ-ɩ tɔɣɔ pǝ wɛ pǝ lonɑ tɑɑ. 
\v 18 Yesu sɛɛlɑɑ kpekɑ kɛnɑ tɔnʋɣʋ nɑ ɩnǝɣǝlɛ nyʋɣʋ. Ɩnɩ ɩ yelinɑ nɑ ɑ tǝnɑ ɑ wɛɛ. Ɩnɩ ɩ kɛnɑ Ɩsɔ kɑncɑɑlɑɣɑ kʋlʋlʋ wei ɩ sǝpɑ nɑ pǝ́ tɑɑlǝnɑ-ɩ feesuɣu sɩ ɩ́ lɑ pǝ tǝnɑ tǝpɑɩpɑɩ pǝ nɔɣɔ tʋ tɔ. 
\v 19 Pǝ tɑɣɑ pʋlʋ tɔɔ, Ɩsɔ luɣu lɑpǝnɑ sɩ ɩ wɛɛtʋ tǝnɑ ɩ́ mɑɣɑlɩ ɩ Pǝyɑɣɑ tɑɑ. 
\v 20 Nɑ ɩ luɣu lɑpɑ tɔtɔ sɩ ɩ Pǝyɑɣɑ kɑ́ yelinɑ nɑ ɩ nɑ kʋŋmɑŋmɑm tǝnɑ pɑ́ ciiki. Nɑ Ɩsɔ Pǝyɑɣɑ cɑlǝm lɩ́ɩ́ sǝm tesikɑ tɔɔ tɔɣɔ Ɩsɔ yelɑɑ nɑ pɑ́ lɑ́ hɛɛsʋɣʋ tɔm. Mpʋ pǝ yelinɑ nɑ Ɩsɔ nɑ pǝ tǝnɑ tǝpɑɩpɑɩ pɑ ciiki, pɑɑ ɩsɔtɑɑ nyǝm pɑɑ ɑtɛ nyǝm.
\p
\v 21 Mɛ tɔtɔ tuu lɔŋ mɩɩ hɑtǝlǝnɑ Ɩsɔ kɛ́, nɑ mǝ hʋwɛɛ ɑsɑɣɛɛ nɑ mǝ ɩsɑɣɑkʋlɑpʋtʋ kɑ lɑpǝnɑ-mɛɣɛ ɩ kolontunɑɑ. 
\v 22 Amɑ ɩ Pǝyɑɣɑ sǝpʋ kɑ tɔnʋɣʋ kʋnɛ kʋ sǝm tɔ pǝnɛntɛ Ɩsɔ ciikɑ mǝ nɑ-ɩ kɛ́, sɩ pǝ́ yele nɑ ɩ́ lǝsɩ-mɛɣɛ ɩ ɩsɛntɑɑ nɑ ɩ́ wɛ tǝnɑŋŋ nɑ ɩ́ kɛ́ kʋpɑmɑ nɑ pɑɑ kɑwɑliyɑ kɑ fɛɩ mǝ kiŋ. 
\v 23 Amɑ kʋlʋmtʋ kɛ́ sɩ mɩɩ tɔkɩ Ɩsɔ sɛɛʋ kɛ ḿpʋ́ɣʋ́ tɑm, nɑ ɩ́ sǝŋ tǝcɑ kɛ teu kɛ ḿpʋ́ɣʋ́ tɑm, pʋlʋpʋ ɩ́ tɑɑ ciɣiti-mɛ, nɑ ɩ́ tɑɑ yele nɑ pǝ́ kʋ́ mǝ tɛɛlʋɣʋ ŋku ɩ́ tɛɛlǝɣɩ tuu kʋyɑŋku ɩ́ nɩɩ Lɑɑpɑɑlɩ Kʋpɑŋ tɔ. Lɑɑpɑɑlɩ Kʋpɑŋ ɩnǝɣɩ pɑ heelɑ ɑntulinyɑ tɑɑ yǝlɑɑ tǝnɑ, nɑ Pɔɔlɩ mɑ́ mɑ pǝsǝnɑ ɩ heellu.
\s1 Tǝmlɛ nte pǝ tʋ Pɔɔlɩ sɩ ɩ́ lɑ Yesu sɛɛlɑɑ kpekɑ tɑɑ tɔ
\p
\v 24 Kɑɣɑnɑ kʋnyɔntɔɣɔlɛnɑɑ mpɑ mɑ tɔkɩ mǝ tɔɔ tɔ pɑ hʋlǝsǝɣɩ mɑ lɑŋlɛ kɛ́. Pǝ tɑɣɑ pʋlʋ tɔɔ, Yesu sɛɛlɑɑ kpekǝle kɛnɑ Kilisiti tɔnʋɣʋ, nɑ ɩ tɔɣɑ kʋnyɔŋ kɛ pɑ tɔɔ nɑ mpi pǝ́ kɑɑsɩ tɔ pǝ tɔɔ kɛ́ mɑ sɑlǝmǝɣǝnɑ kʋnyɔŋ kɛ mɑ tɔnʋɣʋ tɑɑ, sɩ mɑ́ sǝnɑ nɑ pǝ́ yoosi-wɩ. 
\v 25 Ɩsɔ tʋ-m tǝmlɛ nte sɩ mɑ́ yoosi-tɛɣɛ mǝ cɔlɔ tɔ, mpʋ tɔtɔɣɔ pǝ tʋ-m sɩ mɑ́ lɑ Ɩsɔ yǝlɑɑ kpekǝle tǝmlɛ tʋ, nɑ ɩ tʋ-m kɛ́ sɩ mɑ́ heeli ɩ tɔm tǝfoo, mɑ́ tɑɑ ŋmɛsɩ. 
\v 26 Ɩ ŋmɛsɑ ɩ tɔm kʋŋmɛsǝtʋ tǝnɛɣɛ yǝlɑɑ tǝnɑɣɑ tǝkulɑkulɑ kɛ hɑtuu lɔŋ, nɑ pǝnɛntɛɣɛ ɩ kulɑ tǝ tɔɔ nɑ ɩ́ hʋ́lɩ́ mpi ɩ tɩ tɔ. 
\v 27 Mpi pǝ tɔɔ tɔ, Ɩsɔ sɔɔlɑɑ kɛ́ sɩ ɩ́ lɑ nɑ pɑ́ nyɩ ɩsǝnɑ ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ nɑ pǝ́ wɛ ɩŋmɛlɑʋ tɔ pǝ tɔɔʋ nɑ pǝ teu sɔsɔɔm. Ɩ sɩɩ mpɩ ɩnǝɣɩ sɩ ɩ kɑ́ lɑ yǝlɑɑ tǝnɑ. Kʋŋmɛsǝtʋ ntǝɣǝlɛ sɩ Kilisiti wɛ mǝ wɑɑlɩ nɑ ɩnɩ ɩ yekinɑ nɑ mɩɩ tɑɑkɩ sɩ ɩ́ kɑ́ hiki Ɩsɔ teeli tɑɑ kɛ́ mǝ pɑɑ tete. 
\v 28 Pǝ tɔɔ kɛ́ tǝ heeliɣi yǝlɑɑ tǝnɑɣɑ Kilisiti tɔm. Nɑ tǝ́ lɑkǝnɑ tɑ́ lɑɣɑtʋ tǝnɑ, nɑ tǝ́ kpɑɑlǝɣɩ pɑɑ wei kɛ́ pǝ tɔm tɑɑ, nɑ tǝ́ sɛɣɛsǝɣɩ sɩ pǝ́ tɑ́nɑ́ pɑɑ wei kɛ́ Ɩsɔ ɩsɛntɑɑ nɑ ɩ́ tɛmɑ pɩɩʋ kɛ ɩ́ nɑ Kilisiti pɑ kpɛntʋɣʋ tɔm tɑɑ. 
\v 29 Tǝmlɛ tǝnɛ tǝ yoosuɣu tɔɔ kɛ́ mɑ lɑkɩ nɑ mɑ́ lʋkǝnɑ tomɑ tɑɑ tomɑ nnɑ Kilisiti hɑɑkɩ tɔ, tomɑ ɑnɛ ɑ wɛnnɑ mɑ tɑɑ.
\c 2
\p
\v 1 Mɑ cɑɑ ɩ́ nyɩ sɩ, mǝ nɑ Lɑyotisee nyǝ́mɑ nɑ pɑ tǝnɑ mpɑ pɑ nɩɩ mɑ hǝtɛ kɛ kʋnɩɩ nɑ pɑ́ tɑ́ nyɩ mɑ mɑɣɑmɑɣɑ tɔ, mǝ kʋlʋkʋ kɛ mɑ wɛɛ nɑ mɑ́ lʋkɩ pǝ tɩɩ fɛɩ. 
\v 2 Mɑ lʋkɩ kɛ́ sɩ pǝ́ kpɑɑsɩ pɑ ɑpɑlʋtʋ sɩ pɑ́ lɑ nɔɣɔ kʋlʋmɑɣɑ kɛ sɔɔlʋɣʋ tɔm tɑɑ, nɑ pɑ́ hiki nɑɑni wei yʋlʋ ɩ́ nyǝmɑ́ teu ɩ hikiɣi tɔɣɔ teu tǝmɑmmɑm. Ye pǝ lɑpɑ mpʋ pɑɑ nyɩ Ɩsɔ kʋŋmɛsǝm. Mpǝɣǝlɛ Kilisiti mɑɣɑmɑɣɑ. 
\v 3 Kilisiti ɩnɩ ɩ kiŋ kɛ Ɩsɔ hɑɑ nyǝm nɑ lɑɣɑtʋ nti tɔ pǝ kiŋkinte wɛɛ nɑ pǝ́ ŋmɛlɑɑ.
\p
\v 4 Mɑ yɔɣɔtɑɑ tɔ ɩ́ nɩɩwɑɣɑlɛ, ɩ́ tɑɑ yele nɑ nɔɣɔlʋ tolisi-mɛ nɑ lɑɣɑtʋ tɔmnɑɑ. 
\v 5 Pɑɑ mɑ nɑ-mɛ tǝ wɛʋ tǝmɑ nɑ pooluŋ tɔ, mɑ lǝsɑɣɑ wɛ mǝ kiŋ kɛ́, nɑ mɑ lɑŋlɛ hʋlʋmɑɑ ɩsɩɩ mɑ nɑʋ mǝ tǝnɑ ɩ́ tɛmɑ mǝ tɑɑ nɑ Kilisiti, nɑ ɩ́ kpɛntɑɑ nɑ ɩ́ sǝŋɑ tǝcɑ kɛ́ pǝ tɑɑ tɔ.
\s1 Kilisiti tɔɔ tǝ hikɑ tɑ́ tɩ
\p
\v 6 Tɔʋ, ɩ́ tisuɣu sɩ Yesu Kilisiti ɩ́ lɑ mǝ Sɔsɔ tɔ, ɩ́ yele nɑ mǝ nɑ-ɩ ɩ́ kpɛntɩ mǝ tɔntɛ tɑɑ. 
\v 7 Ɩ́ nyɔɔnɑ-ɩ teu ɩsɩɩ tʋɣʋ nyɔɔkʋɣʋnɑ tɛtʋ tɔ. Kilisiti ɩ́ wɛɛ mǝ kʋlɑpʋtʋ tǝnɑ kite. Pɑɑ kʋyɑŋku ɩ́ nyɔɔkɩ toŋ kɛ Ɩsɔ sɛɛʋ tɑɑ. Ḿpʋ́ɣʋ́ pɑ sɛɣɛsɑ-mɛ sɩ ɩ́ lɑkɩ. Ɩ́ sɛɛkɩ Ɩsɔ kɛ́ ɩ́ nɑ tǝmlɛ kɛ teu.
\p
\v 8 Ɩ́ feŋ teu, ɩ́ tɑɑ yele nɑ nɔɣɔlʋ kɔɔ nɑ ɩ́ hii-mɛ nɑ ɩ yʋlʋlɑɣɑtʋ nyǝm tɔm kʋpuɣusutu kpɑɩ nyǝntʋ nti yǝlɑɑ sɛɣɛsɑɑ nɑ pɑ́ tɛlǝsɩ tǝmɑ tɔ. Tɔmnɑɑ mpɛ pɑ kɛ́ pǝ tǝnɑ pǝ kɑncɑɑlɑɣɑ nyǝm kɛ ɑntulinyɑ tɑɑ, pɑ tɑ kɛ Kilisiti nyǝntʋ. 
\v 9 Pǝ tɑɣɑ pʋlʋ, Ɩsɔ wɛɛtʋ tǝnɑɣɑ Kilisiti kpɑɣɑ ɩ tɔnʋɣʋ tɑɑ nɑ pǝ́ mɑɣɑlɩ ɩ tɑɑ. 
\v 10 Nɑ mǝ nɑ-ɩ ɩ́ kpɛntʋɣʋ kʋlʋm tɔ ɩ́ hikɑ pǝ tǝnɑɣɑ, ɩnɩ ɩ kǝlǝnɑ kɑwulɑsɩ tǝnɑ nɑ toŋtʋnɑɑ tǝnɑ.
\p
\v 11 Mǝ nɑ-ɩ ɩ́ kpɛntɑ kʋlʋm kɛ mpʋ tɔ pǝ pɛlɑ-mɛɣɛ, nɑ pɛlʋɣʋ mpɩ pǝ fɛɩ ɩsɩɩ yʋlʋ pɛlʋɣʋʋ tɔ. Amɑ pǝ kɛ́ Kilisiti pɛlʋɣʋ kɛ́. Mpǝɣǝlɛ pǝ lǝsʋɣʋʋ yʋlʋtɔnʋɣʋ ɩsɑɣɑtʋ tomɑ kɛ yʋlʋ tɑɑ tɔ. 
\v 12 Pɑ sɔ-mɛɣɛ Ɩsɔ lʋm tɔ pǝ hʋlɑɑ kɛ́ sɩ pɑ pimɑ mǝ nɑ Kilisiti nɑ mǝ nɑ-ɩ ɩ́ tɑɣɑnɩ fem. Nɑ ɩ́ tisɑɑ sɩ Ɩsɔ wei ɩ feesɑ Yesu kɛ́ sǝtɑɑ tɑɑ tɔ ɩ wɛnɑ tomɑ tɔ pǝ tɔɔ kɛ́ pǝ lɑpɑ mpʋ. 
\v 13 Tuu lɔŋ ɩsɩɩ ɩ tɑɑ nyɩ Ɩsɔ tɔ mǝ ɩsɑɣɑtʋ kɑ yelɑɑ kɛ́ nɑ ɩ́ wɛɛ ɩsɩɩ sǝtɑɑ kɛ Ɩsɔ nyǝntʋ tɑɑ. Amɑ pǝnɛntɛ Ɩsɔ kpɛntɑ mǝ nɑ Kilisiti kɛ weesuɣu hɑʋ. Nɑ Ɩsɔ hɩɩsɑ mǝ ɩsɑɣɑtʋ tǝnɑ. 
\v 14 Tɑ́ kǝmɑ nnɑ ɑ fɛɩ nyʋɣʋ nɑ pǝ́ pɛlǝɣɩ tɑ́ niŋ tɔ Ɩsɔ yelɑ ɑ nyʋɣʋ mɑpʋ nɑ pǝ́ sɑɑlɩ yem. Kǝmɑ ɑnɛ ɑ nyʋɣʋ mɑpʋ kɑ wɛʋ tǝlɑsɩ tɔ pǝ cɑɑlɑ-tʋɣʋ. Kǝmɑ ɑnɛɣɛ ɩ kɑmɑ sǝm tesikɑ tɔɔ nɑ ɩ́ lɔ ɑ tɔm. 
\v 15 Kilisiti tesikɑ kɛ Ɩsɔ kpɑnɑ ɑwulɑɑ nɑ toŋtʋnɑɑ pɑ nyǝm. Ɩsɔ tʋ-wɛɣɛ Pǝyɑɣɑ ɑkɑɩtʋ looŋɑ tɑɑ kɛ́ ɩsɩɩ sɑlǝkɑtʋnɑɑ nɑ ɩ́ tɛɛkǝnɑ nɑ pɑ́ nyǝnǝɣɩ-wɛ tǝcoo.
\p
\v 16 Pǝ tɔɔ ɩlɛ ɩ́ tɑɑ yele nɑ nɔɣɔlʋ footi-mɛɣɛ mǝ tɔɣɔnɑɣɑ nɑ mǝ kʋnyɔnyɔɔm nɑ ɑcimɑ kʋyɛɛŋ nɑ ɩsɔtʋ kʋfɑlʋ nɑ kʋyɛɛŋ kʋhɛɛsǝŋ pǝ tɔɔ. 
\v 17 Kʋpɑntʋ nti tɩɩ kɔɔ tɔ tǝ nyɑlǝmǝlɛ ntɛ́ pǝ tǝnɑɣɑ ɩsǝntɔ, nɑ Kilisiti kɛnɑ pǝ kiŋkinte. 
\v 18 Ɩ́ tɑɑ tisi nɑ nɔɣɔlʋɣʋ yem wei ɩ́ sɔɔlɑɑ ɩ pɑsɑ ɩ tǝɣɩ yǝlɑɑ ɩsɛntɑɑ nɑ ɩ́ sɛɛkɩ ɩsɔtɑɑ tillɑɑ tɔ pʋntʋ kʋ mǝ tɔm. Yʋlʋ ɩ́ lɑkɩ mpʋ, ɩ toosee nnɑ ɩ toosɑɑ tɔɣɔ ɩ tǝŋǝɣɩ nɑ ɩ́ lɑkɩ. Nɑ wei ɩ wɛ mpʋ tɔ yʋlʋhʋwɛɛ kɑlɑmpɑɑnɩ kʋɣʋnɑ-ɩ nɑ ɩ fɛɩnɑ tɑmpɑnɑ. 
\v 19 Ɩɩ cɑɑ ɩ́ mɑtǝnɑ Kilisiti wei ɩ kɛ́ nyʋɣʋ tɔ, pǝyele Kilisiti ɩnɩ ɩ yelinɑ nɑ tɔnʋɣʋ hikiɣi kʋ tɔɣɔnɑɣɑ nɑ kʋ ɑtɑmɑ nɑ kʋ nɑntʋ pǝ kpɛntɑɑ nɑ pǝ́ tɔkɑ teu nɑ kʋ pɩɩkɩ ɩsɩɩ Ɩsɔ cɑɑ tɔ.
\s1 Tɑ́ nɑ Kilisiti tǝ sǝpɑ tɑ́ nɑ-ɩ tɩɩ wɛɛnɑ weesuɣu
\p
\v 20 Mǝ nɑ Kilisiti ɩ́ sǝpʋ tɔ pǝ lǝsɑ-mɛɣɛ ɑntulinyɑ ɩnɛ ɩ pǝ tǝnɑ pǝ kɑncɑɑlɑɣɑ nyǝm tɑɑ kɛ́. Ɩlɛ pepe tɔɔ kɛ́ ɩ́ tɑsǝɣɩ tɔntɛ ɩsɩɩ ɑntulinyɑ tǝnnɑ-mɛ? Ɩlɛ pepe tɔɔ kɛ́ ɩ́ tisiɣi nɑ pɑ́ tʋɣʋ-mɛɣɛ kiiŋ 
\v 21 sɩ: Tɑɑ kpɑɣɑ pǝnɛ, tɑɑ tǝŋ pǝnɛ, tɑɑ tokinɑ pǝnɛ? 
\v 22 Mpi pǝ lǝsɑɑ sɩ yʋlʋ ɩ́ lɑnɑ-wɩ nɑ pǝ́ tɛ́ tɔ pǝ tɔɔ kɛ́ pɑ sɩɩ kiiŋ ɩnɛ. Yǝlɑɑ tǝkelekele sɩɩnɑ kʋsɛɣɛsǝtʋ nɑ kiiŋ ɩnɛ. 
\v 23 Kiiŋ ɩnɛ ɩ nǝɣǝsǝnɑ lǝmɑɣɑsɛɛ kʋpɑnɑ kɛ́, mpi tɔ, ɩ yelɑɑ nɑ yʋlʋ cɛsǝɣǝnɑ Ɩsɔ sɛɛʋ, nɑ ɩ yelɑɑ nɑ yʋlʋ pɑsǝɣɩ ɩ tɩ, nɑ ɩ cɑɑlɑ yʋlʋ sɩ ɩ́ tʋ ɩ tɔnʋɣʋ kɛ wɑhɑlɑ. Amɑ pǝsʋɣʋ kɛ kiiŋ ɩnɛ ɩ fɛɩnɑ sɩ ɩ́ kpɑ yʋlʋ tɔnʋɣʋ kɛ kʋ kʋnyɩɩlǝŋ tǝlɑtɛ.
\c 3
\p
\v 1 Mǝ nɑ kilisiti kɛ pɑ feesɑɑ. Pǝ tɔɔ ɩlɛ timpi Kilisiti cɑɣɑ ɩsɔtɑɑ kɛ́ Ɩsɔ kɔŋkɔŋ tɑɑ tɔ tǝnɑ nyǝm ɩkpɑtɛ kɛ ɩ́ kɑ́ huli. 
\v 2 Ɩ́ sɛɛsɩ ɩsǝlɛ nɑ ɩsɔtɑɑ nyǝm tɔm, ɩ́ tɑɑ sɛɛsɩ ɩsǝlɛ nɑ ɑtɛ nyǝm pɛɛkʋɣʋ. 
\v 3 Pǝ tɑɣɑ pʋlʋ tɔɔ, ɩ sǝpʋ tɔ pǝ ŋmɛsɑ mǝ weesiŋ kɛ Kilisiti kiŋ kɛ Ɩsɔ cɔlɔɣɔ. 
\v 4 Mǝ weesiŋ mɑɣɑmɑɣɑ ntɛ́ Kilisiti, ɩ kɔŋ ɩ́ lɩɩkɩ tɔ mǝ nɑ-ɩ ɩ́ lɩɩkǝnɑ, nɑ ɩ́ kɑ hiki ɩ teeli tɑɑ kɛ́ mǝ pɑɑ nyǝm.
\s1 Tɔntɛ kʋpǝntɛ nɑ kʋfɑtɛ pǝ tɔm
\p
\v 5 Ye mpʋ ɑtɛ cǝnɛ nyǝntʋ tǝnɑ nti ɩ́ kɑ tɔkɑɑ tɔ ɩ́ kʋ-tǝɣɩ mǝ kiŋ. Ntǝɣǝlɛ ɑsilimɑ, tɛtɛlɑkɑsɩ, wɑsɑŋkɑlǝtʋ, nɑ kʋnyɩɩlǝŋ ɩsɑɣɑŋ, nɑ liɣitee kɔtɔɩ, hɑlɩ liɣitee kɔtɔɩ tʋ nɑ tɩɩŋ lɑɑlʋ pɑ ɩsɑɣɑtʋ lɩɩ kʋlʋm kɛ́. 
\v 6 Ɩsɑɣɑtʋ tǝnɛwɛ tǝ tɔɔ kɛ́ Ɩsɔ kɑ́ mʋ pɑ́ɑ́nɑ́ nɑ ɩ́ mɑ́ mpɑ pɑɑ nɩɩkǝnɑ-ɩ tɔ. 
\v 7 Ɩsɑɣɑtʋ tǝnɛ tɩɩ ŋmɑkǝlʋɣʋ-mɛɣɛ lɔŋ tɔ, ḿpʋ́ɣʋ́ ɩ́ tǝŋɑɣɑ teitei.
\p
\v 8 Amɑ pǝnɛntɛ ɩ́ lɔ pǝ tǝnɑ mpi pǝ wɛ mpʋ tɔ, pɑ́ɑ́nɑ́ mʋɣʋ nɑ kɑkɑlɑɣɑ kɛkɛkɛ nɑ nyɑŋ. Kʋtʋɣʋ yɑɑ kɛɛsǝlɑɣɑ tɔm nɑtǝlɩ tǝ́ tɑɑ lɩɩnɑ mǝ nɔɔsɩ tɑɑ. 
\v 9 Ɩ́ tɑɑ pɛlǝɣɩ tǝmɑɣɑ pɔpɔtʋ, pǝ tɑɣɑ pʋlʋ, ɩ́ hɔɣɔsɑ mǝ yʋlʋwɛɛtʋ kʋpǝntʋ nɑ tǝ yɑɑsinɑɑ tǝnɑɣɑ nɑ ɩ́ lɔ. 
\v 10 Nɑ yʋlʋwɛɛtʋ kʋfɑtʋ kɛ ɩ́ kpɑɣɑɑ nɑ ɩ́ suu. Yʋlʋ kʋfɑlʋ ɩnɩ ɩ tɔŋnɑ ɩ ŋmɑlʋ Ɩsɔ kɛ́ kɛlʋɣʋ tǝtɛŋɛlɛŋ kɛ́ sɩ pǝ́ yele nɑ ɩ́ nyɩ Ɩsɔ kɛ́ teu tǝkpǝsǝkpǝsɩ. 
\v 11 Pǝ lɑpɑ mpʋ tɔ, pǝ fɛɩ sɩ pǝ tɑsǝɣɩ tɔtɔ sɩ pɑnɛ pɑ tɑ kɛ Yutɑ nyǝ́mɑ, Yutɑ nyǝ́mɑ ntɔ, nɑ pɛllɑɑ ntɔ kʋtɑpɛlǝŋ ntɔ, ɩsǝkpɛɛtɛɛ nyǝ́mɑ ntɔ sɔsɑɑ tɑɑ nyǝ́mɑ ntɔ, yomɑɑ yɑɑ kɑsɑɣɑmpiyɑ ntɔ. Aɑɩ, Kilisiti kɛnɑ pǝ tǝnɑ, nɑ ɩ́ wɛ pɑ tǝnɑ pɑ wɑɑlɩ.
\p
\v 12 Ɩ́ kɛ́ Ɩsɔ yǝlɑɑ kɛ́. Ɩsɔ sɔɔlǝnɑ-mɛ nɑ ɩ́ lǝsɩ-mɛ sɩ ɩ́ lɑ ɩ nyǝ́mɑ. Pǝ tɔɔ ɩlɛ ɩ́ tɔkɩ kʋpɑntʋ tɑɑ kʋpɑntʋ nɑ ɩ́ lɑkɩ. Ɩ́ hʋ́lǝ́ɣɩ́ yʋlʋtʋ, nɑ ɩ́ pɑsǝɣɩ mǝ tɩ, nɑ ɩ́ wɛɛ tǝpɑmm, nɑ ɩ́ tɔkɩ suulu. 
\v 13 Ɩ́ tɔkɩ tǝmɑ, mǝ tɑɑ lɛlʋ ɩ́ pǝntɑ lɛlʋ nɑ nti ɩ́ hʋ́lɩ́ tǝmɑɣɑ suulu. Ɩ́ hʋ́lǝ́ɣɩ́ tǝmɑɣɑ suulu, Tɑcɑɑ nɑ́ hʋlɑ-mɛɣɛ ḿpʋ́ɣʋ́. 
\v 14 Pǝ tǝnɑɣɑ mpʋ tǝpɑɩ ɩlɛ tǝmɑ sɔɔlʋɣʋ kɛ ɩ́ kɑ́ tɔkɩ teu. Tǝmɑ sɔɔlʋɣʋ mpɩ pɩɩ yelinɑ nɑ ɩ́ kpɛntɩ yʋlʋ kʋlʋm. 
\v 15 Ɩ́ yele nɑ Kilisiti sɔɔlʋɣʋ hʋ́lǝ́ɣɩ́ mǝ lotu tɑɑ kɛ́ mpi ɩ́ kɑ́ lɑkɩ tɔ. Hɛɛsʋɣʋ kʋnɛ kʋ mɑɣɑmɑɣɑ kʋ tɔɔ kɛ́ Ɩsɔ kpɛntɑ-mɛ nɑ ɩ́ yɑɑ, nɑ ɩ́ wɛ kɛ́ ɩsɩɩ yʋlʋ tɔnʋɣʋ tɔɔ niŋ nɑ nɔɔhɛɛ nɑ pǝ tǝnɑɣɑ mpʋ pǝ wɛʋ nɑ pǝ́ kpɛntɑɑ tɔ. Ɩ́ sɛɛkɩ Ɩsɔ sɩ ɩ́ nɑ tǝmlɛ. 
\v 16 Kilisiti tɔm nɑ tǝ tɔɔʋ tǝnɑ ɩ́ wɛɛ mǝ kiŋ kɛ teu. Ɩ́ sɛɣɛsǝɣɩ tǝmɑ, ɩ́ kpɑɑlǝɣɩ tǝmɑ nɑ lɑɣɑtʋ sɔsɔɔntʋ. Ɩ́ yoonɑ luɣu kʋlʋmʋɣʋ kɛ Ɩsɔ kɛ́ yontu nɑ Ɩsɔ Tɔm yontu nɑ Ɩsɔ sɑm nyǝntʋ nɑ yontu nti tǝ sɔɔsǝɣɩ ɑpɑlʋtʋ tɔ, nɑ ɩ́ sɛɛnɑ-ɩ ɩ́ nɑ tǝmlɛ. 
\v 17 Pɑɑ mpiɣi ɩ́ lɑkɩ, yɑɑ pɑɑ ntiɣi ɩ́ yɔɣɔtǝɣɩ, ɩ́ yɑɑnɑ tɑ́ Sɔsɔ Yesu hǝtɛ, nɑ ɩ́ sɛɛkɩ Tɑcɑɑ Ɩsɔ kɛ́ ɩ́ nɑ tǝmlɛ kɛ ɩ tɔɔ.
\s1 Ɩsǝnɑ tɔntɛ kʋfɑtɛ cɑkǝlɛ wɛɛ tɔ
\p
\v 18 Alɑɑ mɛ́ ɩ́ seeki mǝ pɑɑlɑɑ, Tɑcɑɑ ɩsɛntɑɑ, nti pǝ mʋnɑ ɩ́ lɑ tɔɣɔlɛ. 
\v 19 Apɑlɑɑ mɩɩ sɔɔlɩ mǝ ɑlɑɑ nɑ ɩ́ tɑɑ lɑ-wɛɣɛ nyɑŋ kɛ pɑɑ pǝcɔ.
\p
\v 20 Piyɑ mɛ Tɑcɑɑ ɩsɛntɑɑ mǝ nyǝntʋ ntɛ́ sɩ ɩ́ nɩɩnɑ mǝ nyǝ́mɑ kɛ pǝ tǝnɑ pǝ tɑɑ. Ye ɩ́ nɩɩkǝnɑ mǝ nyǝ́mɑ pǝ lɑkɩ Ɩsɔ kɛ́ teu kɛ́ pǝ tɩɩ fɛɩ.
\p
\v 21 Cɛcɛnɑɑ mɛ ɩ́ tɑɑ lɑ nɑ pɑ́ɑ́nɑ́ kpɑ mǝ piyɑ nɑ sɩ kɔɔ sɩ lɔ ɑpɑlʋtʋ.
\p
\v 22 Yomɑɑ, mɩɩ nɩɩkǝnɑ mǝ cɑɑnɑɑ mpɑ pɑ tɔkɑ-mɛɣɛ ɑntulinyɑ tɑɑ cǝnɛ tɔɣɔ pǝ tǝnɑ pǝ tɑɑ. Ɩ́ tɑɑ seeki-wɛɣɛ wɑɑtʋ wei pɑ wɛɛkɩ tɔ tike sɩ pǝ́ lɑ-wɛɣɛ leleŋ. Amɑ ɩ́ nɩɩnɑ-wɛ nɑ luɣu kʋlʋmʋɣʋ kɛ seu mpi ɩ́ seeki Tɑcɑɑ tɔ pǝ tɔɔ. 
\v 23 Pɑɑ tǝmlɛ nteɣe pɑ tʋ-mɛ te, ɩ́ lɑ-tɛ nɑ luɣu kʋlʋmʋɣʋ, nɑ pǝ́ wɛɛ ɩsɩɩ Tɑcɑɑ tǝmlɛ kɛ ɩ́ lɑkɩ, pǝ tɑɣɑ yǝlɑɑ nyǝntɛ. 
\v 24 Ɩ́ nyɩ teu sɩ ɩ́ lɑkʋɣʋ tɔ Tɑcɑɑ kɑ́ tɛnɑ nɑ ɩ́ fɛlɩ-mɛɣɛ mǝ kʋfɛlʋɣʋ. Ɩ́ kɑ́ hiki kʋpɑntʋ nti ɩ sɩɩ ɩ nyǝ́mɑ tɔɔ tɔ. Pǝ tɑɣɑ pʋlʋ, Kilisiti kɛnɑ mǝ Cɑɑ mɑɣɑmɑɣɑ wei ɩ tǝmlɛ ɩ́ lɑkɩ tɔ. 
\v 25 Pǝ tɔɔ kɛ́ ye wei ɩ lɑkɩ ɩsɑɣɑtʋ, pɩɩ tɛ nɑ pǝ́ fɛlɩ-ɩ ɩsɑɣɑtʋ nti ɩ lɑpɑ tɔ. Ɩsɔ ɩɩ fɑɣɑsǝɣɩ nɔɣɔlʋ se.
\c 4
\p
\v 1 Yomɑɑ cɑɑnɑɑ mɛ, ɩ́ tɔkɩ mǝ yomɑɑ kɛ ɩsǝnɑ mpi pǝ kɛɛsɑɑ nɑ pǝ siɣisɑ teu tɔ. Ɩ́ nyɩ teu sɩ mɛ́ tɔtɔ mǝ wɛnɑ Cɑɑ kɛ ɩsɔtɑɑ.
\s1 Nti Pɔɔlɩ sɩ pɑ́ lɑkɩ tɔ
\p
\v 2 Ɩ́ sǝlǝmɣɩ Ɩsɔ, ɩ́ tɑɑ yele. Ɩ́ feŋiɣi nɑ ɩ́ sɛɛkɩ-ɩ ɩ́ nɑ tǝmlɛ kɛ mǝ Ɩsɔ sǝlǝmʋɣʋ tɑɑ. 
\v 3 Ɩ́ kpɛntǝnɑ tɑ́ nɑ ɩ́ sǝlǝmǝɣǝnɑ Ɩsɔ nɑ ɩ́ hɑ-tʋɣʋ ɩkpɑtɛ nɑ tǝ́ lɑ ɩ wɑɑsʋ nɑ tǝ́ kpɑɑlɩ Kilisiti tɔm kʋŋmɛsǝtʋ. Tɔm kʋŋmɛsǝtʋ tǝnɛ tǝ tɔɔ kɛ́ mɑ wɛ sɑlǝkɑ tɑɑ kɛ́ ɩsǝntɔ. 
\v 4 Ɩ́ sǝlǝmɩ Ɩsɔ nɑ mɑ́, ɩlɛnɑ mɑ́ yɑsɩ ɩ tɔm tǝcɛɩcɛɩ nɑ pɑ́ nyǝmɩ-ɩ teu, mpi pǝ tʋ mɑ́ sɩ mɑ́ lɑ tɔɣɔlɛ.
\p
\v 5 Ɩ́ nyɩ mǝ tɔntɛ kɛ mpɑ pɑ tɑ kɛ Ɩsɔ sɛɛlɑɑ tɔ pɑ kiŋ, nɑ ɩ́ tɑɑ yele nɑ ɑlǝsɛkɛ kʋyɛɛŋ fiti-mɛɣɛ yem. 
\v 6 Pɑɑ kʋyɑŋku ɩ́ yɔɣɔtǝɣɩ kʋpɑntʋ, nɑ kɑwɑɑɣɑ nyǝntʋ ɩ́ lɩɩkǝnɑ mǝ nɔɔsɩ tɑɑ. Ɩ́ nyɩ ɩsǝnɑ pǝ mʋnɑ ɩ́ cɔ tɔm tɔ nɑ ɩ́ cɔɔkɩ pɑɑ wei.
\s1 Kɑntǝkɑɣɑ sɛɛtʋ
\p
\v 7 Tɑ́ tɑɑpɑlʋ kʋpɑŋ Tisikɩ kɑ́ heelinɑ-mɛɣɛ mɑ tɔm tǝnɑ tǝpɑɩpɑɩ. Mɑ nɑ-ɩ tǝ lɑkǝnɑ Tɑcɑɑ tǝmlɛ nɑ ɩ kɛ tǝmlɛ lɑtʋ kʋpɑŋ kɛ́. 
\v 8 Pǝ mɑɣɑmɑɣɑ pǝ nyʋɣʋ tɔɔ kɛ́ mɑ kʋsɑ-ɩ sɩ ɩ́ polo ɩ́ nɑ-mɛ nɑ ɩ́ heeli-mɛɣɛ tɑ́ ɑlɑɑfǝyɑ tɔm nɑ pǝ́ hɛɛsɩ mǝ lɑŋɑ. 
\v 9 Tɑ́ tɑɑpɑlʋ kʋpɑmpɑŋ Honesim wei ɩ kɛ́ mǝ tɑɑ lɛlʋ tɔ ɩ́lɛ́ ɩ sɩɩnɑ-ɩ. Ɩ kɑ́ kɛɛsɩ-mɛɣɛ tǝ tǝnɑ nti tǝ lɑkɩ cǝnɛ tɔ.
\p
\v 10 Mɑ sɑlǝkɑ tɑɑ ɑkpele Alisitɑɑkɩ nɑ Pɑɑnɑpɑsɩ kɔɣɔ pǝyɑɣɑ Mɑlǝkɩ sɩ pɑ́ sɛɛ-mɛ yoo. Pɑ tɛmɑ-mɛɣɛ Mɑlǝkɩ ɩnɩ ɩ tɔm heeluɣu, ɩlɛ ye ɩ tɑlɑ mǝ tɛ ɩ́ tɔkɩ-ɩ teu. 
\v 11 Yesu wei pɑ yɑɑ sɩ Yutusi tɔ ɩ sɛɛ-mɛ tɔtɔ. Yǝlɑɑ tooso ɩnɛ ɩ tike ɩ lɩɩnɑ Yutɑ nyǝ́mɑ mpɑ pɑ lɑɣɑsɑɑ tɔ pɑ tɑɑ, nɑ mɑ́ nɑ-wɛ tǝ lɑkǝnɑ Ɩsɔ kɑwulɑɣɑ tǝmlɛ, nɑ pɑ pɑɑsɑɑ kɛ́ nɑ pɑ́ sɔɔsɩ-m ɑpɑlʋtʋ.
\p
\v 12 Ɩpɑfǝlɑsɩ wei ɩ kɛ́ mǝ tɑɑ lɛlʋ tɔ ɩ sɛɛ-mɛ. Ɩ kɛ́ Yesu Kilisiti tǝmlɛ tʋ kɛ́ nɑ ɩ sɛɛsɑ ɩsǝlɛ nɑ Ɩsɔ sǝlǝmʋɣʋ kɛ mǝ tɔɔ kɛ́ teu sɩ ɩ́ sǝŋ tǝcɑ nɑ pʋlʋ ɩ́ tɑɑ ciɣiti-mɛ, nɑ ɩ́ pɩɩ Ɩsɔ nyǝntʋ tɑɑ, nɑ ɩ́ tɑŋɑɑ tǝtɛɣɛtɛɣɛ sɩ ɩ́ lɑ pǝ tǝnɑ mpi Ɩsɔ cɑɑ tɔ. 
\v 13 Mɑ lǝsǝɣɩ ɩ nyɩɩlʋɣʋ, ye n nɑ ɩsǝnɑ ɩ kʋɣɩ ɩ tǝɣɩ mǝ nɑ Lɑyotisee nɑ Hiyelɑpolisi nyǝ́mɑ mǝ tɔɔ tɔ pǝ fɛɩ kɛɛsʋɣʋ. 
\v 14 Tɑ́ lokotulo kʋpɑŋ Luku nɑ Temɑsɩ sɩ pɑ́ sɛɛ-mɛ.
\p
\v 15 Ɩ́ sɛɛ tɑ́ tɑɑpɑlɑɑ mpɑ pɑ wɛ Lɑyotisee tɔ, nɑ ɩ́ sɛɛ Nɛmfɑ nɑ Yesu sɛɛlɑɑ kpekǝle nte tǝ kotiɣi ɩ tǝyɑɣɑ kɛ Ɩsɔ sɛɛʋ tɔ. 
\v 16 Ye mɩɩ tɛmɑ tɑkǝlɑɣɑ kɑnɛɣɛ kɑlʋɣʋ ɩlɛ ɩ́ tɛlǝsɩ Lɑyotisee Yesu sɛɛlɑɑ nɑ pɛlɛ pɑ́ kɑlɑ-kɛ tɔtɔ. Mɛ tɔtɔ mɩɩ mʋ Lɑyotisee nyǝ́mɑ nyǝŋkɑ nɑ ɩ́ kɑlɑ. 
\v 17 Ɩ́ heeli Aɑsipi sɩ ɩ́ pɑɑsǝnɑ Tɑcɑɑ tǝmlɛ nte pɑ tʋ-ɩ sɩ ɩ́ lɑ tɔɣɔ teu.
\p
\v 18 Mɑ mɑɣɑmɑɣɑ mɑ niŋ ŋmɑɑtʋ ntɛ́ cǝnɛ. Pɔɔlɩ mɑ́ mɑ sɛɛ-mɛ. Ɩ́ tɑɑ sɔɔ sɩ mɑ wɛ sɑlǝkɑ tɑɑ yoo.
\p Ɩsɔ ɩ́ hʋ́lɩ́-mɛɣɛ pɛɛlɛɛ.