\id 2TI - Lokpa Bible portions [dop] -Benin 1999 (web edition -2017)
\ide UTF-8
\h Timotee II
\toc1 TAKƎLAƔA NAALƐ NYƎŊKA ŊKA PƆƆLƖ NMAAWA TIMOTEE TƆ
\toc2 Timotee II
\toc3 Tim II
\mt2 TAKƎLAƔA NAALƐ NYƎŊKA ŊKA PƆƆLƖ NMAAWA
\mt1 TIMOTEE
\mt2 TƆ
\imt1 Kʋtʋlʋtʋ
\ip Pɔɔlɩ wɛ sɑlǝkɑ tɑɑ kɛ́ Lom nɑ ɩ tɑɑpɑlɑɑ pɑɣɑlɛ lɔ-ɩ. Ɩ nɑwɑ sɩ ɩ sǝm kpɛɣɛtɑɑ ɩlɛnɑ ɩ́ tʋɣɩ ɩ pǝyɑlʋ Timotee kɛ mpi mpi pǝ wɛ lɑpʋ tɔ. Ɩ́ hʋlɑ-ɩ sɩ ɩ́ yoo ɩsɔsɛɛlɛ yoou kʋpɑŋkʋ ɩsɩɩ Kilisiti sɔɔcɛ kʋpɑŋ. Sɩ ɩ́ tǝŋ ɩnɩ ɩ ɩkpɑtɛ nɑ ɩ́ kisi tɔm kpɑɩ nyǝntʋ tɔɔ kɛ hɔm. Nɑ ɩ́ kisi yooŋ wei ɩ́ hɑtǝlǝɣǝnɑ yʋlʋ kɛ tɑɑ tɛm tɔ. Sɩ ɩ́ tɔkɩ Ɩsɔ Tɔm nɑŋŋ nyǝntʋ nti ɩ́ mʋwɑ hɑtuu ɩ pǝcɑɑtʋ tɔ. Pɔɔlɩ tɑlɑ tɑkǝlɑɣɑ tǝkʋlɛ tɔ, ɩ́ tɑsɑ Timotee kɛ ɑpɑlʋtʋ sɩ ɩ́ kɑntǝlɩ wɑhɑlɑ tɑɑ nɑ ɩ yoo ɩsɔsɛɛlɛ tɑɑ yoou. Pǝ tɔɔ kɛ́ ɩ́ tɑsǝɣɩ tɑkǝlɑɣɑ kɑllɑɑ tǝnɑɣɑ ɑpɑlʋtʋ sɩ pɑ́ nyɔɔ toŋ nɑ pɑ́ yoo ɩsɔsɛɛlɛ yoou ŋkʋ.
\iot Ɩsǝnɑ pɑ fɑɣɑ Timotee II tɑkǝlɑɣɑ tɔ:
\io1 Ɩsɔ sɑmtʋ nɑ ɑpɑlʋtʋ tɑsʋɣʋ, titite \ior 1:1–2:13\ior*
\io1 Lɑɣɑtʋ tɑsʋɣʋ nɑ kʋtʋtʋtʋ, titite \ior 2:14–4:5\ior*
\io1 Pɔɔlɩ yoou kʋpɑŋkʋ, titite \ior 4:6-22\ior*
\c 1
\s1 Sɛɛtʋ
\p
\v 1 Mɑɣɑ Pɔɔlɩ, Ɩsɔ luɣu lɑpǝnɑ nɑ mɑ́ lɑ Yesu Kilisiti tillu sɩ mɑ kpɑɑlǝɣɩ weesuɣu ŋku Ɩsɔ kɑ tɔmɑ sɩ ɩ kɑ́ hɑ mpɑ nɑ Yesu Kilisiti pɑ kpɛntɑɑ tɔ kʋ tɔm.
\p
\v 2 Mɑ́ ŋmɑɑkǝnɑ tɑkǝlɑɣɑ kɑnɛɣɛ mɑ pu kʋpɑŋ Timotee. Tɑcɑɑ Ɩsɔ nɑ tɑ́ Sɔsɔ Yesu Kilisiti pɑ́ hʋ́lɩ́-ŋ pɛɛlɛɛ nɑ suulu nɑ pɑ́ hɑ-ŋ ɑlɑɑfǝyɑ.
\s1 Apɑlʋtʋ sɔɔsʋɣʋ
\p
\v 3 Ɩsɔ wei ɩ tǝmlɛ mɑ lɑkǝnɑ lotu kʋlʋmtʋ ɩsɩɩ mɑ cɑɑnɑɑ lɑkɑɣɑ tɔɣɔ mɑ sɛɛkɩ. Mɑɑ hɔsǝɣɩ nyɑ́ tɔɔ kɛ́ tɔɔsʋɣʋ kɛ mɑ sǝlǝmǝŋ tǝnɑ tɑɑ kɛ́ ilim nɑ ɑhoo, nɑ mɑ́ sɛɛkɩ Ɩsɔ kɛ́ ɩ́ nɑ tǝmlɛ. 
\v 4 Mɑ tɔɔsɑ nyɑ́ wulɑ, nɑ mɑ́ nyɩɩlǝɣɩ sɔsɔm sɩ mɑ́ nɑ-ŋ tǝ́ nɑ́ nɑ mɑ lɑŋlɛ hʋlʋmɩ teu. 
\v 5 Mɑ tɔɔsǝɣɩ ɩsǝnɑ n tɛmɑ nyɑ́ tɑɑ nɑ Ɩsɔ nɑ tɑmpɑnɑ tɔ. Nyɑ́ neese Loisi nɑ nyɑ́ too Iniisi pɛlɛ pɑɑ tɛmɑ pɑ tɑɑ nɑ Ɩsɔ kɛ́ ḿpʋ́ɣʋ́ nɑ pǝ́cɔ́ pǝ́ tɑkɩ nyɑ́. Mɑ nyǝmɑ́ teu tǝkpɑtɑɑ sɩ nyɑ́ mɑɣɑmɑɣɑ n tɛmɑ nyɑ́ tɑɑ nɑ Ɩsɔ kɛ́ ḿpʋ́ɣʋ́. 
\v 6 Pǝ tɔɔ kɛ́ mɑ tɔɔsǝɣɩ-ŋ sɩ mɑɑ tǝnɑ mɑ niŋ kɛ nyɑ́ tɔɔ nɑ Ɩsɔ yele nɑ mpi pǝ lɑpʋ sɑɑ-ŋ tɔ tɑɑ yele nɑ pǝ́ sɩ pɑɑ pǝcɔ. 
\v 7 Pǝ tɑɣɑ pʋlʋ, Ɩsɔ tɑ́ hɑ-tʋɣʋ ɩ Feesuɣu sɩ kʋ́ lɑ-tʋɣʋ sɔɣɔntʋnɑɑ. Amɑ sɩ kʋ́ lɑ-tʋɣʋ kpelikpekɑ nyǝ́mɑ nɑ tǝmɑ sɔɔllɑɑ nɑ lǝmɑɣɑsɛɛ nyǝ́mɑ kɛ́.
\p
\v 8 Pǝ tɔɔ ɩlɛ tɑɑ sɩ fɛɛlɛ nɑ Tɑcɑɑ tɔm heeluɣu. Tɑɑ sɩ fɛɛlɛ nɑ mɑ́ wei mɑ kɛ́ sɑlǝkɑ tʋ kɛ Yesu Kilisiti tɔɔ tɔ mɑ tɔm. Amɑ nyɑɑ tɔɣɔ Lɑɑpɑɑlɩ Kʋpɑŋ kʋnyɔŋ kɛ ɩsǝnɑ Ɩsɔ hɑ-ŋ pǝ tomɑ tɔ. 
\v 9 Ɩnɩ ɩ yɑpǝnɑ tɑ́ nyɔɔŋ nɑ ɩ́ yɑɑ-tʋ sɩ tǝ́ lɑ ɩ yǝlɑɑ. Pǝ tɑɣɑ tɑ́ lɑkɑsɩ kʋpɑŋsɩ nɑsǝlɩ sɩ tɔɔ. Amɑ ɩsǝnɑ mpi ɩ sɩɩwɑ nɑ ɩ́ tǝŋǝɣɩ nɑ ɩ́ lɑkɩ tɔ, nɑ ɩ pɛɛlɛɛ pǝ tɔɔ kɛ́ ɩ lɑpɑ mpʋ. Hɑtuu yem tɑɑ kɛ́ ɩ tɑɣɑnɑ ɩ pɛɛlɛɛ ɑnɩ sɩ ɩ hʋ́lǝ́ɣɩ́-tʋɣʋ-yɛ nɑ Yesu Kilisiti kiŋ. 
\v 10 Amɑ kɑɣɑnɑ Tɑcɑɑ Yesu Kilisiti kɔmɑ tɔɣɔ ɩ hʋlɑ-tʋɣʋ-yɛ nɑ tǝ́ nɑ́. Pǝ tɑɣɑ pʋlʋ, Yesu Kilisiti kʋnɑ sǝm ɑpɑlʋtʋ, nɑ ɩ́ kuli weesuɣu ŋku kɩɩ tɛŋ tɔ kʋ tɔɔ nɑ Lɑɑpɑɑlɩ Kʋpɑŋ.
\p
\v 11 Ɩsɔ lɑpɑ nɑ mɑ́ pǝsɩ Lɑɑpɑɑlɩ Kʋpɑŋ ɩnɛ ɩ kpɑɑllʋ nɑ ɩ tillu nɑ ɩ sɛɣɛsǝlʋ. 
\v 12 Pǝ tɔɔ kɛ́ mɑ tɔkɩ kʋnyɔŋ kɛ ɩsǝntɔ. Pɑɑ nɑ mpʋ mɑ tɑ lɔ tɔɔŋ. Pǝ tɑɣɑ pʋlʋ, mɑ nyǝmɑ́ wei mɑ lɑkɩ nɑ mɑ́ tɛɛlǝɣɩ tɔ, nɑ mɑ nyǝmɑ́ teu tǝkpɑtɑɑ sɩ ɩ pǝsǝɣɩ nɑ ɩ́ tɔkɩ mpi mɑ yelinɑ-ɩ tɔ hɑlǝnɑ kʋyɑkʋ ŋkʋ ɩnɩ kʋ wule. 
\v 13 Kɛɛsǝɣǝnɑ sɛɣɛsǝŋ kʋpɑŋ wei mɑ kɛɛsɑ-ŋ nɑ ɩ́ wɑɑsǝɣɩ yǝlɑɑ tɔ, nɑ ń tɔkɩ teu kɛ Ɩsɔ sɛɛʋ nɑ tǝmɑ sɔɔlʋɣʋ mpi tǝ hikɑ tɑ́ nɑ Yesu Kilisiti tɑ́ kpɛntʋɣʋ tɑɑ tɔ. 
\v 14 Feesuɣu Nɑŋŋtʋ wei ɩ́ cɑkɩ tɑ́ tɑɑ tɔ ɩ́ sǝnɑ-ŋ nɑ ń tɔkɩ teu kɛ sɛɣɛsʋɣʋ kʋpɑŋkʋ ŋku pɑ sɛɣɛsɑ-ŋ tɔ.
\p
\v 15 Asii tɛtʋ nyǝ́mɑ tǝnɑ lɔ-m tɔ n nyǝmɑ́ mpʋ. Mpɑ pɑ hɑ-m siɣile kɛ mpʋ tɔ pɑ tɑɑ mpɛɣɛlɛ Fisɛɛlɩ nɑ Hɛɛmɔsɛɛnɩwɛ. 
\v 16 Honesifɔɔ temnɑ-m tɔm pɑɣɑlɛ. Ɩsɔ ɩ́ fɛlɩ ɩ́ nɑ ɩ nyǝ́mɑ kɛ kʋpɑntʋ. Mɑ sɑlǝkɑ tǝkʋɣʋ tɑ lɑpɩ-ɩ fɛɛlɛ, 
\v 17 ɩ tɑlɑ Lom tɔ, ɩ pɛɛkɑ-m kɛ́ nɑ ɩsǝlɛ kʋsɛɛmlɛ nɑ hɑlǝnɑ ɩ́ nɑ-m. 
\v 18 Tɑcɑɑ ɩ́ yele nɑ ɩ́ hiki kʋpɑntʋ kɛ kʋyɑkʋ ŋkʋ ɩnɩ kʋ wule. Nyɑ́ mɑɣɑmɑɣɑ n nɑnɑ nyɑ́ ɩsǝlɛ kɛ kookɑlǝnɑɑ mpɑ ɩ lɑpɑ-m Ɩfeesu tɔ.
\c 2
\s1 Kilisiti yoolu kʋpɑŋ yɑɑsi
\p
\v 1 Mɑ pu, ye nyɑ́ ɩlɛ tɔkɩ pɛɛlɛɛ nnɑ pǝ hʋlɑ-tʋɣʋ tɑ́ nɑ Yesu Kilisiti tɑ́ kpɛntʋɣʋ tɔɔ tɔ nɑ ń nyɔɔ toŋ. 
\v 2 Tuu n wɛ mɑ kiŋ nɑ mɑ́ sɛɣɛsǝɣɩ nti nti tɔ n nɩɩ-tɩ, nɑ yǝlɑɑ pɑɣɑlɛ nɑ́ mpʋ. Ɩlɛ kɛlɩ tǝ tǝnɑ nɑ ń hʋ́lɩ́ ɑpɑlɑɑ mpɑ n wɛnɑ nɑɑni nɑ pɑɑ pǝsɩ nɑ pɑ́ tɛlǝsɩ-tǝɣɩ pɑ lɛlɑɑ tɔ.
\p
\v 3 Nyɑɑ tɔɣɔ nyɑ́ kʋnyɔŋ ɩsɩɩ Yesu Kilisiti yoolu kʋpɑŋ. 
\v 4 Yʋlʋ wei ɩ wɛ yoou tɑɑ tɔ, kʋ tɔm kɛ ɩ pɑɑsǝɣǝnɑ sɩ ɩ sɔsɔ wei ɩ kpɑɣɑ-ɩ tɔ ɩ lɑŋlɛ ɩ́ hɛɛnɑ-ɩ, ɩ kɑɑ cɑɣɑ nɑ ɩ́ pɑɑsǝɣǝnɑ kpɑɩ nyǝntʋ kɛ yem. 
\v 5 Nɑ yʋlʋ lʋtʋ ɩ́ suuwɑ nɑ ɩ́ lʋkɩ nɑ ɩ́ tɑ tǝŋ ɩsǝnɑ mpi pǝ wɛɛ sɩ pɑ́ lʋ tɔ, pɑɑ ɩ huwɑ, nɔɣɔlʋ nɑ́ kɑɑ sɑmɩ-ɩ. 
\v 6 Nɑ wei ɩ kontɑ hɑŋɑsɩ kɛ tǝhɑtɛ nɑ ɩ́ lɔ tɔ, ɩnɩ ɩ lɑɑlǝɣǝnɑ ɩ hɑtǝmʋtʋ tǝŋʋɣʋ. 
\v 7 Mɑɣɑsǝɣɩ tɔm nti mɑ yɔɣɔtǝɣɩ tɔɣɔ nyɑ́ tɑɑ, Tɑcɑɑ kɑ́ hɑ-ŋ tǝ nyǝm nɑ ń cɛkǝnɑ.
\p
\v 8 Tɔɔsǝɣɩ Tɑfiiti lʋlʋɣʋ tɑɑ tʋ Yesu Kilisiti wei ɩ femɑ sǝtɑɑ tɑɑ tɔ ɩ tɔm. Ntǝɣɩ Lɑɑpɑɑlɩ Kʋpɑŋ wei mɑ kpɑɑlǝɣɩ tɔ ɩ hʋ́lǝ́ɣɩ́. 
\v 9 Nɑ Lɑɑpɑɑlɩ Kʋpɑŋ ɩnɩ ɩ kpɑɑlʋɣʋ tɔɔ kɛ́ mɑ tɔkɩ kʋnyɔŋ, hɑlǝnɑ pɑ́ cɑŋ nɑ pɑ́ hɔkɔ-m ɩsɩɩ ɩsɑɣɑlɑtʋ sɔsɔ nɔɣɔlʋ. Pɑɑ nɑ mpʋ tɔ pǝ tɑɣɑ Ɩsɔ Tɔm kɛ pɑ hɔkɑɑ. 
\v 10 Pǝ tɔɔ kɛ́ pɑ tʋɣʋ-m kʋnyɔmǝŋ nɑ mɑ́ sumɑ, sɩ pǝ́ wɑɑsɩ mpɑ Ɩsɔ lǝsɑɑ tɔ nɑ pǝ́ yɑ pɑ nyʋɣʋ, nɑ pɑ́ hiki teeli wei ɩɩ tɛŋ tɔɣɔ Yesu Kilisiti kiŋ. 
\v 11 Tɔm nti tǝ kɛ́ tɑmpɑnɑ tɔɣɔlɛ sɩ:
\q1 Ye tɑ́ nɑ-ɩ tǝ kɑɑ sǝm,
\q1 tɑ́ nɑ-ɩ tɩɩ kɑɑ weesuɣu tɔtɔ.
\q1
\v 12 Ye tǝ nyɑɣɑ ɑpɑlʋtʋ,
\q1 tɑ́ nɑ-ɩ tɩɩ tɔɣɔ kɑwulɑɣɑ.
\q1 Ye tǝ kisɑ-ɩ,
\q1 ɩnɩ ɩ kɑ́ kisi-tʋ tɔtɔ.
\q1
\v 13 Ye tǝ lɩɩ ɩ wɑɑlɩ,
\q1 ɩ́lɛ́ ɩ tɑ kɛ pǝ tʋ.
\q1 Pǝ tɑɣɑ pʋlʋ,
\q1 ɩ kɑɑ pǝsɩ nɑ ɩ́ kpɛɛsǝɣǝnɑ ɩ tɩ.
\s1 Tǝmlɛ lɑtʋ kʋpɑŋ
\p
\v 14 N tɑ nɑ nti n kɑ́ tɔɔsǝɣɩ-wɛ tɔɣɔlɛ. Heeli-wɛ nɑ ɩsǝlɛ kʋsɛɛmlɛ kɛ Ɩsɔ ɩsɛntɑɑ sɩ pɑ́ yele tɔmnɑɑ tɔɔ yoou kɛ pɑ hɛkʋ. Mpi tɔ yooŋ ɩnɩ ɩɩ wɑɑsǝɣɩ nɔɣɔlʋ. Amɑ wɑkǝlʋɣʋ tike kɛ ɩ kɔŋnɑ mpɑ pɑ cɑɣɑɑ nɑ pɑ́ nɩɩkɩ tɔ. 
\v 15 Kɑɑsɩ nyɑ́ tɩ sɩ ń lɑ nɑ Ɩsɔ tike sɑ-ŋ. Lɑ ɩsɩɩ tǝmlɛ lɑtʋ wei ɩ fɛɩ fɛɛlɛ nɑ ɩ tǝmlɛ, nɑ ɩ́ heeliɣi Ɩsɔ tɑmpɑnɑ tɔm kɛ teitei kɛ́ tǝ lonɑ tɑɑ tɔ. 
\v 16 Kisiɣi kpɑɩ fɑɑcinɑɑ mpɑ pɑɑ lɑkɩ nɑ yʋlʋ tɛ ɩ tɑɑ nɑ Ɩsɔ tɔ. Pǝ tɑɣɑ pʋlʋ, mpɑ pɑ sɔpɑ nyʋɣʋ nɑ fɑɑcinɑɑ mpɛ tɔ pɑ nɑ Ɩsɔ pɑ tɔŋnɑ hɑtǝlʋɣʋ kɛ́ nɑ pɑ́ puki. 
\v 17 Nti nti pɑ sɛɣɛsǝɣɩ tɔ tǝ wɑkǝlǝɣɩ yǝlɑɑ kɛ teitei kɛ́ ɩsɩɩ sʋʋlʋ sʋʋkʋɣʋ sǝmote tɑɑ tɔ. Fɑɑcinɑɑ mpɛ pɑ lɑtɑɑ tɑɑ wɛɣɛlɛ nɑ Himenee nɑ Filɛɛtɩ. 
\v 18 Yǝlɑɑ pɑnɛ pɑ lɔɣɔ tɑmpɑnɑ tɔm nɑ lumɑɣɑ wɑɑlɩ kɛ́, hɑlǝnɑ pɑ́ sɛɣɛsǝɣɩ sɩ tɑ́ sǝtɑɑ fem tɔm tɛmɑ tɛɛʋ. Nɑ pɑ sɛɣɛsǝŋ ɩnɛ ɩ tʋsɑ lɛlɑɑ nɑ pɑ́ yele Ɩsɔ sɛɛʋ. 
\v 19 Pɑɑ nɑ mpʋ Ɩsɔ sɩɩ kite nte tɔ tǝ sǝŋɑ ḿpʋ́ɣʋ́ tɑm kɛ́ teu kɛ́ tǝcɑ. Nɑ pǝ ŋmɑɑ tǝ tɔɔ sɩ: Tɑcɑɑ nyǝmɑ́ mpɑ pɑ kɛ́ ɩ yǝlɑɑ tɔ. Nɑ tɔtɔ sɩ: Pɑ tǝnɑ mpɑ pɑ yɑɑ pɑ tǝɣɩ Tɑcɑɑ yǝlɑɑ tɔ pǝ wɛɛ sɩ pɑɑ kisi ɩsɑɣɑtʋ lɑpʋ kɛ́.
\p
\v 20 Toŋtʋ tǝyɑɣɑ wɛʋ mpʋ tɔ, pǝ tɑɣɑ wontu nti pɑ lupǝnɑ wʋlɑ yɑɑ liɣitee nyǝɣǝtʋ tɔ tǝ tike kɛ pɑ lɑkǝnɑ kɑ tɑɑ. Amɑ tʋɣʋ nyǝntʋ nɑ cʋɣʋ nyǝntʋ wɛɛ tɔtɔɣɔ nɑ pɑ́ lɑkǝnɑ pǝ tǝnɑ. Pɑ sɩɩkɩ lɛntɩ kɛ́ nɑ pɑ́ lɑkǝnɑ fɛɛlɛ kʋyɑkʋ kʋyɑkʋ, ɩlɛnɑ pǝ́ kɑɑsɩ nɑ pɑ́ lɑkǝnɑ lɛntɩ kɛ pɑɑ ɩfemle nte. 
\v 21 Ḿpʋ́ɣʋ́ pǝ wɛɛ nɑ yʋlʋ, ye n kisɑ ɩsɑɣɑtʋ nti tǝ tɔm mɑ yɔɣɔtɑɑ tɔɣɔ lɑpʋ, n wɛ teitei ɩsɩɩ wontu nti pɑ sɩɩwɑ nɑ pɑ́ lǝsǝɣɩ fɛɛlɛ kʋyɑkʋ tɔɣɔ. Mpi tɔ nyɑ́ cɑɑ tǝnnɑ-ŋ, nɑ n wɑɑsǝɣɩ-ɩ kɛ́. Nɑ n mʋnɑ pɑ lɑnɑ-ŋ pɑɑ tǝmlɛ kʋpɑntɛ nte. 
\v 22 Se ɩfeputu kʋnyɩɩlǝŋ ɩsɑɣɑŋ. Lʋkɩ tɑm sɩ ń tǝŋ siɣisuɣu, nɑ ń tɛ Ɩsɔ nɑ nyɑ́ tɑɑ, nɑ ń sɔɔlǝɣɩ nyɑ́ yǝlɑɑ lɛlɑɑ, nɑ nyɑ́ nɑ mpɑ pɑ tǝŋǝɣɩ Tɑcɑɑ nɑ luɣu kʋlʋmʋɣʋ tɔ ɩ́ mɑɣɑ teu, pʋlʋ ɩ́ tɑɑ yɑsɩ-mɛ. 
\v 23 Yele hɔm kɛ kʋmɛlǝtɔmnɑɑ nɑ kpɑɩ nyǝntʋ pǝ tɔɔ. Nyɑ́ mɑɣɑmɑɣɑ n nyǝmɑ́ sɩ yoou kɛ tɔm ɩsɩɩ mpʋ tɛɛsǝɣǝnɑ. 
\v 24 Pǝyele Tɑcɑɑ tǝmlɛ tʋ nɑ́ wɛɛ tɔ pǝ fɛɩ sɩ ɩ kɑ́ wɛɛ yoolu. Amɑ ɩ kɑ́ wɛɛ wei ɩ tɔm yǝlɑɑ tǝnɑ cɑɑkɩ tɔɣɔ, nɑ ɩ kɑ́ wɛɛ wei ɩ pǝsɑ lɛlɑɑ kɛ sɛɣɛsʋɣʋ nɑ suulu hʋ́lʋ́ɣʋ́ tɔ. 
\v 25 Nɑ ɩ kɑ́ sɛɣɛsǝɣɩ mpɑ pɑɑ nɩɩkǝnɑ-ɩ tɔ tǝpɑmm tǝpɑmm. Ntɑnyɩ Ɩsɔ kɑ́ yele nɑ pɑ́ lɑɣɑsɩ nɑ pɑ́ tisi tɑmpɑnɑ. 
\v 26 Pǝlɛɣɛ pɑɑ mǝlɩ yɑɑsi kʋpɑŋ tɑɑ, nɑ pɑ́ kpɛɛ pɑ tǝɣɩ Ɩlɔɣɔʋ nyǝpɑ nyǝpǝtʋ nti nɑ ɩ́ kpɑ-wɛ nɑ ɩ́ ŋmɑkǝlǝɣɩ-wɛ nɑ pɑ́ lɑkɩ ɩ luɣu nyǝntʋ tɔ tǝ tɑɑ.
\c 3
\s1 Kɑntǝkɑɣɑ kʋyɛɛŋ
\p
\v 1 Tɔɔsɩ teu sɩ pǝ tǝnɑ pɩɩ lɑ kɑtɛ kɛ sɔsɔm kɛ kʋyɛɛŋ kɑntǝkɑɣɑ nyǝŋ tɑɑ. 
\v 2 Pǝ tɑɣɑ pʋlʋ, yǝlɑɑ kɑ wɛɛ mpɑ pɑɑ kɑ nyɔɔŋ nɑ pɑ mɑɣɑmɑɣɑ pɑ leleŋ pɛɛkʋɣʋ tɔ, liɣitee ɩsǝlɛ tɑɑ kɛ́ pɑɑ nyǝnǝɣɩ. Pɑɑ hɔ pɑ tɩ, nɑ pɑɑ lɑ ɩsǝcɑʋ. Pɑɑ yɔɣɔtɩ Ɩsɔ tɔɔ kɛ́ ɩsɑɣɑtʋ, pɑ kɑɑ seeki pɑ cɑɑnɑɑ. Pɑɑ lɑ fɔɔfɛɩnɑɑ, pɑ kɑɑ seeki Ɩsɔ. 
\v 3 Pɑɑ lɑ tǝkɑtɩɩ, pɑ kɑɑ wɛɛnɑ lɛlɑɑ pǝtɔɔtǝlɛ. Pɑɑ lɑ nɔɔhɛɛ tɛɛ kuulɑɑ nɑ mpǝle tɛlǝsǝlɑɑ nɑ nyɑŋ nyǝ́mɑ. Pɑ kɑɑ sɔɔlɩ kʋpɑntʋ. 
\v 4 Pɑɑ lɑ kɔlɔmɔtɔ nyǝ́mɑ nɑ pɑ́ɑ́nɑ́ nyǝ́mɑ. Pɑɑ sɑŋ pɑ tɩ, nɑ pɑɑ yele Ɩsɔ nɑ pɑ́ pɑɑsǝnɑ mpi pǝ hɛɛsǝɣɩ pɑ lɑŋɑ tɔ tike. 
\v 5 Pɑɑ cɛsɩ ḿpʋ́ɣʋ́ ɩsɔ ɩsɔ kɛ́ sɩ pɑ tǝŋǝɣɩ Ɩsɔsɛɛlɛ mpɑɑʋ pǝyele pɑ kʋ pǝ tomɑ kɛ pɑ tɑɑ. Yele yǝlɑɑ ɩsɩɩ mpʋ pǝ tɑkɑnɑɑ. 
\v 6 Pɑ tɑɑ lɛlɑɑ cɛŋǝɣǝnɑ tɛɛsɩ tɑɑ nɑ pɑ́ puɣusiɣi ɑlɑɑ mpɑ pɩɩ kɑntǝlǝɣɩ nɑ pɑ́ teelɑ ɩsɑɣɑtʋ nɑ kʋnyɩɩlǝŋ ɩnɩ ɩ tǝnɑ ɩ kʋɣɩ-wɛ tɔ. 
\v 7 Pǝ ɑlɑɑ pɛɛkǝɣɩ tɑm kɛ́ sɩ pɑ́ sɛɣɛsǝɣɩ-wɛ, pǝ́cɔ́ pɑɑ pɑ sɛɣɛsɑ-wɛ, pɑɑ pǝsǝɣɩ nɑ pɑ́ cɛkǝnɑ tɑmpɑnɑ nɑɑlɩ. 
\v 8 Ɩsɩɩ Yɑnɛɛsɩ nɑ Yɑmpǝlɛɛ pɑɑ kpɛɛsǝnɑ Moisi tɔ, mpʋ tɔtɔɣɔ yǝlɑɑ pɑnɛ pɑ kpɛɛsǝɣǝnɑ tɑmpɑnɑ. Pɑ lǝmɑɣɑsɛɛ sǝpɑɣɑ pɑ Ɩsɔsɛɛlɛ tɑ tǝŋ. 
\v 9 Pɑ nyʋɣʋ kɑɑ tɑsɑ kʋlʋɣʋ, mpi tɔ pɩɩ kuli pɑ wɑɑlɩ kɛ́ nɑ yǝlɑɑ tǝnɑ cɛkǝnɑ sɩ pɑ kɛ́ kʋmɛlɛmǝŋ. Yɑnɛɛsɩ nɑ Yɑmpǝlɛɛ pɑ nyǝntʋ kɑ lɑpɑ ḿpʋ́ɣʋ́ teitei kɛ́.
\s1 Nti Timotee kɑ́ lɑkɩ tɔ
\p
\v 10 Ye nyɑ́ ɩlɛ n tǝŋɑ mɑ sɛɣɛsʋɣʋ tǝnɑ, nɑ mɑ yɑɑsinɑɑ, nɑ mpi pǝ lɑpʋ mɑɑ tʋ mɑ lotu tɑɑ tɔ, nɑ ɩsǝnɑ mɑ tɛmɑ mɑ tɑɑ nɑ Ɩsɔ tɔ, nɑ mɑ suulu, nɑ ɩsǝnɑ mɑ sɔɔlǝɣɩ lɛlɑɑ tɔ, nɑ mɑ ɩsǝlɛ sɛɛsʋɣʋ 
\v 11 kɛ mɑ kʋnyɔntɔɣɔlɛnɑɑ nɑ mɑ wɑhɑlɑnɑɑ tɑɑ. Pɔpɔtʋ fɛɩ leleŋ, mɑ pɑɑsɑɑ kɛ́ nɑ mɑ́ tɔɣɔ kʋnyɔmǝŋ kɛ Antiyɔkɑ nɑ Ɩkʋniyɔm nɑ Lisitǝlɑ, nɑ nyɑ́ mɑɣɑmɑɣɑ n nyǝmɑ́ mpʋ. Amɑ Tɑcɑɑ yɑpɑ-m pǝ tǝnɑ pǝ tɑɑ. 
\v 12 Aɑɩ ḿpʋ́ɣʋ́ pǝ tɩɩ wɛɛ, mpɑ pɑ sɔɔlɑɑ sɩ pɑ́ nɑ Yesu Kilisiti pɑ́ kpɛntɩ nɑ pɑ́ nɩɩnɑ Ɩsɔ kɛ́ pɑ tɔntɛ tǝnɑ tɑɑ tɔ ḿpʋ́ɣʋ́ pɑɑ tʋɣʋ-wɛɣɛ kʋnyɔŋ. 
\v 13 Amɑ pǝ kɑɑsɑ ɑsɑɣɑɑ nɑ puɣusilɑɑ tɔ pɛlɛ pɑ ɩsɑɣɑtʋ kɑɑ wɛɛ tǝnɑɣɑ. Pɑɑ puɣusiɣi lɛlɑɑ kɛ ḿpʋ́ɣʋ́ nɑ pɑ́ kpɛŋnɑ pɑ mɑɣɑmɑɣɑ tɔtɔ nɑ pɑ́ puɣusiɣi. 
\v 14 Amɑ nyɑ́ ɩlɛ, nyɑɑ tɔkɩ teu kɛ sɛɣɛsʋɣʋ ŋku pɑ sɛɣɛsɑ-ŋ nɑ ń mʋ-kʋ nɑ n tɛmɑ-kʋ nɑ nyɑ́ tɑɑ tɔ. Tɔɔsɩ mpɑ pɑɑ sɛɣɛsɑ-ŋ sɛɣɛsǝŋ ɩnɩ tɔ pɑ tɔɔ. 
\v 15 Nɑ ń tɔɔsɩ tɔtɔ sɩ hɑtuu nyɑ́ pǝcɑɑtʋ kɛ n nyǝmɑ́ Ɩsɔ Tɔm nɑŋŋ nyǝntʋ, nɑ ntɩ tǝ pǝsǝɣǝnɑ nɑ tǝ́ hɑ-ŋ lɑɣɑtʋ nti n kɑ́ lɑnɑ nɑ ń tɛ́ nyɑ́ tɑɑ nɑ Yesu Kilisiti nɑ pǝ yɑ nyɑ́ nyʋɣʋ tɔ. 
\v 16 Ɩsɔ yelinɑ nɑ pɑ́ ŋmɑɑ ɩ tɔm kɛ tɑkǝlɑsɩ tɑɑ. Nɑ tǝ wɑɑsǝɣɩ yǝlɑɑ, pǝ tɑɣɑ pʋlʋ, tǝ sɛɣɛsǝɣɩ-wɛ nɑ tǝ́ kisiɣinɑ-wɛɣɛ pɔpɔtʋ, nɑ tǝ́ tɑɣɑnǝɣɩ-wɛɣɛ timpi timpi pɑ pǝntǝɣɩ tɔ, nɑ tǝ́ hʋ́lǝ́ɣɩ́-wɛɣɛ ɩsǝnɑ pɑɑ tǝŋ tɑmpɑnɑ mɑmmɑm kɛ pɑ kʋlɑpʋtʋ tɑɑ tɔ. 
\v 17 Tǝ lɑkɩ ḿpʋ́ɣʋ́ sɩ tǝ tɑɣɑnǝɣɩ Ɩsɔ yǝlɑɑ nɑ pɑ́ te teu, nɑ pɑ́ tɑɑ lɑŋ mpi pɑɑ lɑnɑ pɑ tǝmɑ kʋpɑnɑ tɔ.
\c 4
\p
\v 1 Mɑ heeliɣi-ŋ nɑ ɩsǝlɛ kʋsɛɛmlɛ kɛ Ɩsɔ nɑ Yesu Kilisiti wei ɩ kɑ́ hʋʋnɑ weesuɣu nyǝ́mɑ nɑ sǝtɑɑ kɛ tɔm tɔ pɑ ɩsɛntɑɑ, nɑ Yesu Kilisiti ɩnɩ ɩ kɔntɛ nɑ ɩ kɑwulɑɣɑ pǝ tɔɔ sɩ, 
\v 2 ń lɑkɩ Ɩsɔ wɑɑsʋ, nyɑɑ sɛɛsɩ ɩsǝlɛ te, pɑɑ pǝ mɑɣɑ-ŋ pɑɑ pǝ tɑ mɑɣɑ-ŋ. Kɑɑnɑ-wɛ nɑ ń lɑ nɑ pɑ́ mʋ-tɩ. Kɑlǝɣǝnɑ-wɛɣɛ timpi timpi pɑ pǝntǝɣɩ tɔ. Sɛɣɛsǝɣɩ-wɛ nɑ suulu sɔsɔ nɑ pǝ́ sɔɔsɩ-wɛɣɛ ɑpɑlʋtʋ. 
\v 3 Pǝ tɑɣɑ pʋlʋ tɔɔ, pɩɩ kɔɔ nɑ pǝ́ kɛɛsɩ wɑɑtʋ nɔɣɔlʋ tɔ, yǝlɑɑ kɑɑ cɑɑ sɩ pɑ́ tɑsɑ sɛɣɛsǝŋ kʋpɑŋ wei ɩ wɑɑsǝɣɩ yǝlɑɑ tɔɣɔ mʋɣʋ tɔtɔ. Amɑ pɑ mɑɣɑmɑɣɑ pɑ kʋnyɩɩlǝŋ kɛ pɑɑ tǝŋǝɣɩ, nɑ pɑ́ koti sɛɣɛsǝlɑɑ pɑɣɑlɛ nɑ pɛlɛ pɑ́ sɛɣɛsɩ-wɛɣɛ ntiwɛ ntiwɛ pɑ cɑɑ pɑ́ nɩɩkɩ tɔ. 
\v 4 Pɑɑ kisi tɔm tɑmpɑnɑ nyǝntʋ, nɑ pɑ́ pɑɑsǝnɑ sɔsɑɑ tɑɑ kpɑɩ tɔmnɑɑ. 
\v 5 Amɑ nyɑ́ ɩlɛ, kpɑ nyɑ́ tǝɣɩ pǝ tǝnɑ pǝ tɑɑ. Kɑntǝlǝɣɩ kʋnyɔntɔɣɔlɛnɑɑ tɑɑ. Lɑ Lɑɑpɑɑlɩ Kʋpɑŋ kpɑɑllʋ tǝmlɛ. Pɑɑsǝnɑ nyɑ́ tǝmlɛ tǝnɑɣɑ teu tǝtetete ɩsɩɩ Ɩsɔ tǝmlɛ tʋ lɑkɩ tɔ.
\p
\v 6 Tɔʋ, ye mɑ ɩlɛ wule nte pɑɑ lɑnɑ-m kɔtɑɣɑ tɔ tǝ tɑlɑɑ kɛ́, mɑ kʋyɑkʋ kʋkpemuɣu tɑlɑɑ. 
\v 7 Mɑ yoowɑ tǝcɑm. Mɑ sewɑ nɑ mɑ́ tɑlɑ mɑ tǝnɑɣɑ. Ɩsɔ kɛ́ mɑ tɛmnɑ mɑ tɑɑ kɛ́ tɑm. 
\v 8 Nɑ pǝnɛntɛ tɑmpɑnɑ tǝŋlɑɑ teeli ntenuɣu tɑŋnɑ-m, ŋkʋɣʋ Tɑcɑɑ wei ɩ tǝŋǝɣɩ tɑmpɑnɑ nɑ ɩ́ hʋʋkǝnɑ tɔ ɩ kɑ́ hɑ-m kʋyɑkʋ ŋkʋ kʋ wule. Nɑ pǝ tɑɣɑ mɑ tike kɛ ɩ kɑ́ hɑ, ɑmɑ nɑ pɑ tǝnɑ mpɑ pɑ cɑɣɑɑ nɑ pɑ́ nyɩɩlǝɣɩ ɩ kɔntɛ wule tɔ.
\s1 Pɔɔlɩ lɔlɑɑ nɑ ɩ tɔkǝlɑɑ
\p
\v 9 Lɑ kookɑlɩ nɑ ń kɔɔ mɑ kiŋ kɛ lɔŋ. 
\v 10 Mpi tɔ Temɑsɩ sɔɔlɑ kɑɣɑnɑ ɑntulinyɑ ɩnɛ ɩ nyǝntʋ kɛ́ nɑ ɩ́ lɔ-m nɑ ɩ́ tɛɛnɑ Tɛsɑlonikɩ. Kǝlɛɛsɑŋ nɑ́ tɛɛnɑ Kɑlɑtɩ nɑ Titʋ ɩlɛɣɛ Tɑlɑmɑtii. 
\v 11 Luku tike kɛ pǝ yelinɑ-m. Ye n kɔŋ kpɛŋnɑ Mɑlǝkɩ nɑ nyɑ́ nɑ-ɩ ɩ́ kɔɔ, ɩ kɑ sǝŋnɑ-m mɑ tǝmlɛ. 
\v 12 Mɑ tilɑ Tisikɩ ɩlɛɣɛ Ɩfeesu. 
\v 13 Mɑ yelɑ mɑ kpɑɩ kɛ Kɑlǝpusɩ tɛɣɛ Tʋlʋwɑsɩ, ye n kɔŋ ɩlɛ n kpɛŋnɑ nɑ ń kɔnɑ. Kpɛŋnɑ tɔtɔɣɔ mɑ tɑkǝlɑsɩ, nɑ nsi mɑ tɩɩ kǝlɑ nyɩɩlʋɣʋ tɔɣɔlɛ tɔnǝŋ nyǝnsɩ.