\id 1CO - Lokpa Bible portions [dop] -Benin 1999 (web edition -2017)
\ide UTF-8
\h Kɔlɛntɩ I
\toc1 TAKƎLAƔA KANCAALAƔA NYƎŊKA ŊKA PƆƆLƖ NMAAWA KƆLƐNTƖ NYƎ́MA TƆ
\toc2 Kɔlɛntɩ I
\toc3 Kɔl I
\mt2 TAKƎLAƔA KANCAALAƔA NYƎŊKA ŊKA PƆƆLƖ NMAAWA
\mt1 KƆLƐNTƖ
\mt2 NYƎ́MA TƆ
\imt1 Kʋtʋlʋtʋ
\ip Pɔɔlɩ nɩɩwɑ Kɔlɛntɩ Ɩsɔ tǝsɛɛlɛ tɑɑ ɩsɑɣɑtʋ tɔm ɩsɩɩ yooŋ, nɑ fɑɣɑʋ, nɑ wɑsɑŋkɑlǝtʋ, nɑ ɑkpɑɣɑlɛ, nɑ nɑntʋ kʋlɑlɑɑtʋ tɔɣɔʋ, nɑ nsǝmɑ lɛnnɑ yɔɣɔtʋɣʋ, nɑ sǝtɑɑ fem tɔm.
\iot Ɩsǝnɑ pɑ fɑɣɑ Kɔlɛntɩ I tɑkǝlɑɣɑ tɔ:
\io1 Kɔlɛntɩ Ɩsɔ tǝsɛɛlɛ wɛɛtʋ, titite \ior 1–6\ior*
\io1 Pɔɔlɩ cɔɔkɩ Ɩsɔ yǝlɑɑ kpekǝle kʋpɔɔsʋtʋ, titite \ior 7–15\ior*
\io1 Kɑntǝkɑɣɑ kʋtʋtʋtʋ nɑ sɛɛtʋ, titite \ior 16\ior*
\c 1
\s1 Sɛɛtʋ
\p
\v 1 Mɑɣɑ Pɔɔlɩ, Ɩsɔ luɣu lɑpǝnɑ nɑ mɑ́ lɑ Yesu Kilisiti tillu. Mɑ́ nɑ tɑ́ tɑɑpɑlʋ Sɔsǝtɛɛnɩ tǝ ŋmɑɑkǝnɑ tɑkǝlɑɣɑ kɑnɛ.
\p
\v 2 Ɩsɔ sɛɛlɑɑ kpekǝle nyǝ́mɑ mpɑ mɛ ɩ́ wɛ Kɔlɛntɩ tɑɑ tɔɣɔ tǝ ŋmɑɑ-kɛ. Mɛ mpɑ Ɩsɔ yɑɑwɑ sɩ ɩ́ lɑ ɩ nyǝ́mɑ, nɑ mǝ nɑ Yesu Kilisiti mǝ kpɛntʋɣʋ tɔɔ ɩ́ tɩ-mɛ tɔ. Mǝ nɑ pɑ tǝnɑ mpɑ pɑ wɛ pɑɑ timpi nɑ pɑ́ yɑɑkɩ Tɑcɑɑ Yesu Kilisiti wei ɩ kɛ́ tɑ́ nɑ-wɛ tɑ́ Sɔsɔ tɔ ɩ hǝtɛ tɔ. 
\v 3 Tɑcɑɑ Ɩsɔ nɑ tɑ́ Sɔsɔ Yesu Kilisiti pɑ́ lɑ-mɛɣɛ pɛɛlɛɛ nɑ pɑ́ hɑ-mɛɣɛ ɑlɑɑfǝyɑ.
\s1 Ɩsɔ kʋpɑntʋnɑɑ
\p
\v 4 Mɑ sɛɛ mɑ Ɩsɔ kɛ́ tɑm sɩ ɩ́ nɑ tǝmlɛ kɛ mǝ tɔɔ kɛ́ pɛɛlɛɛ nnɑ ɩ lɑpɑ-mɛɣɛ Yesu Kilisiti kiŋ tɔ ɑ tɔɔ. 
\v 5 Kʋpɑm mǝ nɑ Kilisiti mǝ kpɛntʋɣʋ tɔɔ pǝ sɑɑ-mɛɣɛ tǝcɑm. Ɩlɛnɑ pǝ́ tɩɩ kǝlǝnɑ yɔɣɔtɑɣɑ nɑ nyǝm pǝ sɑɑʋ. 
\v 6 Tɑmpɑnɑ nnɑ pɑ yɔɣɔtɑ Kilisiti tɔɔ tɔ ɑ sǝŋɑ mǝ hɛkʋ kɛ teu tǝcɑ. 
\v 7 Nɑ pǝ wɛ mpʋ tɔɣɔ Ɩsɔ yelɑɑ nɑ pǝ tǝnɑ pǝ́ sɑɑ-mɛ. Mɛ mpɑ ɩ́ tɑŋɑ wʋlɛ nte Tɑcɑɑ Yesu Kilisiti kɑ́ hʋ́lɩ́ ɩ tɩ tɔ. 
\v 8 Tɑcɑɑ Yesu Kilisiti ɩnɩ ɩ kɑ tɔkǝnɑ-mɛɣɛ teu hɑlǝnɑ tǝnɑɣɑ. Ɩlɛnɑ kʋyɑŋku ɩ kʋyɑkʋ kɑ́ tɑlɑ tɔ pɑ́ tɑɑ nɑ kɑwɑlɑɣɑ nɑkǝlǝɣɩ mǝ kiŋ. 
\v 9 Ɩsɔ wei ɩ yɑɑ-mɛ sɩ mǝ nɑ ɩ Pǝyɑɣɑ Tɑcɑɑ Yesu Kilisiti ɩ́ kpɛntɩ tɔ, mpi mpi ɩ tɔmɑ sɩ ɩ kɑ́ lɑ tɔ, ɩ tɔkɑ-wǝɣɩ, ɩɩ yeki.
\s1 Kɔlɛntɩ Ɩsɔ sɛɛlɑɑ fɛɩ nɔɣɔ kʋlʋmɑɣɑ
\p
\v 10 Tɔʋ, mɑ tɑɑpɑlɑɑ mɑ wiikǝnɑ-mɛ sɩ ɩ́ nyǝnnɑ Tɑcɑɑ Yesu Kilisiti nɑ ɩ́ lɑ́ nɔɣɔ kʋlʋmɑɣɑ, nɑ fɑɣɑsʋɣʋ ɩ́ tɑɑ wɛɛ mǝ hɛkʋ. Ɩ́ kpɛntɩ teu, ɩ́ mɑɣɑsǝɣɩ lǝmɑɣɑsɛɛ kʋlʋmɛɛ, ɩ́ hʋʋkɩ hʋwɛɛ kʋlʋmɛɛ. 
\v 11 Mɑ tɑɑpɑlɑɑ, pǝ tɑɣɑ pʋlʋ tɔɔ, Kolowee tǝyɑɣɑ nyǝ́mɑ heelɑ-m sɩ ɩ́ yooki kɛ́. 
\v 12 Nti mɑ cɑɑ yɔɣɔtʋɣʋ tɔɣɔlɛ sɩ mǝ tɑɑ pɑɑ wei nɑ ɩ nyǝntʋ kɛ́ nɑ tǝ mpɑɑ. Lɛlʋ tɔŋ sɩ: Pɔɔlɩ tɔɔ kɛ́ mɑ wɛɛ. Nɑ ɩnɛ ɩ́lɛ́ sɩ Apɔlɔɔsɩ tɔɔ kɛ́ mɑ wɛɛ. Ɩnɛ ɩ́lɛ́ sɩ Piyɛɛ tɔɔ kɛ́ mɑ wɛɛ. Nɑ ɩnɛ ɩ́lɛ́ sɩ Kilisiti tɔɔ kɛ́ mɑ wɛɛ. 
\v 13 Ɩ́ hʋʋkɩ sɩ Kilisiti fɑɣɑ ɩ tɑɑ tǝyǝpǝlɛɛ kɛ́? Pɔɔlɩ sǝpǝnɑ sǝm tesikɑ tɔɔ kɛ́ mǝ tɔɔ? Pɔɔlɩ hǝtɛ kɛ pɑ yɑɑnɑɑ nɑ pɑ́ sɔ-mɛɣɛ Ɩsɔ lʋm nɑ?
\p
\v 14 Mɑ sɑmɑ Ɩsɔ kɛ́ timpi mɑ tɑ sɔ mǝ tɑɑ nɔɣɔlʋɣʋ Ɩsɔ lʋm tɔ, ye pǝ tɑɣɑ Kǝlisipusi nɑ Kɑyusi pɑ pɑɑsi. 
\v 15 Pǝ tɔɔ kɛ́ nɔɣɔlʋ kɑɑ yɔɣɔtɩ tǝfoo sɩ Pɔɔlɩ hǝtɛ kɛ pɑ yɑɑnɑɑ nɑ pɑ́ sɔnɑ-mɛɣɛ Ɩsɔ lʋm. 
\v 16 Ɛɛhɛɛ mɑ sɔɔwɑ, mɑ sɔ Sǝtefɑnɑsɩ tǝyɑɣɑ nyǝ́mɑ tɔtɔɣɔ Ɩsɔ lʋm. Ye pǝ kɑɑsɑ lɛlɑɑ mɑ tɑ tɔɔsɩ pɑ tɔɔ. 
\v 17 Pǝ tɑɣɑ Ɩsɔ lʋm sɔʋ tɔɔ kɛ́ Kilisiti tilɑ-m. Amɑ ɩ tilɑ-m kɛ́ sɩ mɑ́ kpɑɑlɩ Lɑɑpɑɑlɩ Kʋpɑŋ. Nɑ ye mɑ kpɑɑlǝɣɩ-ɩ, mɑ́ tɑɑ kpɑɑlǝnɑ yʋlʋ lǝmɑɣɑsɛɛ nɔɔleleŋ. Pǝ́cɔ́ pǝ́ tɑɑ kɔɔ nɑ Kilisiti tesikɑ tɔɔ sǝm tɔm mǝlɩ yem.
\s1 Yesu Kilisiti kɛnɑ Ɩsɔ tomɑ nɑ ɩ lǝmɑɣɑsɛɛ
\p
\v 18 Letɑɑ ɩsɛntɑɑ, Yesu tesikɑ tɔɔ sǝm tɔm kɛ́ kʋmɛlɛntʋ tɔm kɛ́. Amɑ tɑ́ mpɑ pǝ tɔŋnɑ tɑ́ nyɔɔŋ yɑpʋ tɔ Ɩsɔ tomɑ ntɛ́ tɑɣɑ tǝnɑ. 
\v 19 Pɑ ŋmɑɑwɑ Ɩsɔ Tɔm tɑɑ sɩ:
\q1 Mɑɑ wɑkǝlɩ lǝmɑɣɑsɛɛ nyǝ́mɑ lǝmɑɣɑsɛɛ,
\q1 mɑɑ lɔ nyǝntɑɑ nyǝm.
\m
\v 20 Lǝmɑɣɑsɛɛ tʋ tɑsǝɣɩ ntiɣi yɔɣɔtʋɣʋ tɔtɔ? Nɑ ntiɣi ɑkewe kɑ́ tɑsɑ yɔɣɔtʋɣʋ? Yɑɑ ntiɣi ɑntulinyɑ ɩnɛ ɩ tɑɑ lǝmɑɣɑsɛɛ tʋ kɑ́ mɑɣɑsɩ tɔtɔ? Ɩsɔ hʋlɑɑ sɩ ɑntulinyɑ ɩnɛ ɩ tɑɑ, mpi pɑ yɑɑ lǝmɑɣɑsɛɛ tɔ, pǝ kɛ́ kʋmɛlɛntʋ kɛ́.
\p
\v 21 Pǝ tɑɣɑ pʋlʋ, ɑntulinyɑ tɑɑ yǝlɑɑ nɑ pɑ lǝmɑɣɑsɛɛ pɑ kpisɑ Ɩsɔ kɛ́ nyǝm kɛ timpi Ɩsɔ nɑ́ lɑpǝnɑ ɩ lǝmɑɣɑsɛɛ sɩ pɑ́ nyǝnɑ-ɩ tɔ. Pǝ tɔɔ kɛ́ Ɩsɔ hʋʋ teu sɩ, ɩ kɑ́ yɑ mpɑ pɑ tɛŋnɑ-ɩ pɑ tɑɑ tɔ, nɑ Lɑɑpɑɑlɩ Kʋpɑŋ wei tǝ kpɑɑlǝɣɩ tɔ. Lɑɑpɑɑlɩ kʋpɑŋ ɩnǝɣɩ wei ɩ tɑ nɑ tɔ ɩ yɑɑ sɩ kʋmɛlǝtɔm. 
\v 22 Yutɑ nyǝ́mɑ nɑ́ cɑɑ pɑ́ nɑ́ piti tǝmɑ nɑ pǝ́cɔ́. Amɑ lǝmɑɣɑsɛɛ kɛ Kǝlɛɛkɩ nyǝ́mɑ nɑ́ pɛɛkǝɣɩ. 
\v 23 Amɑ tɑ́ ɩlɛ, Kilisiti wei pɑ kɑmɑ sǝm tesikɑ tɔɔ tɔ ɩ tɔm kɛ tǝ kpɑɑlǝɣɩ. Tɔm tǝnɛ tǝ huɣi Yutɑ nyǝ́mɑ, nɑ mpɑ pɛlɛ pɑ tɑ kɛ Yutɑ nyǝ́mɑ tɔ pɑ nyǝnǝɣɩ-tǝɣɩ kʋmɛlǝtɔm kɛ́. 
\v 24 Amɑ mpɑ Ɩsɔ yɑɑwɑ tɔ, pɑɑ Yutɑ nyǝ́mɑ tɑɑ, pɑɑ mpɑ pɑ tɑ kɛ Yutɑ nyǝ́mɑ tɔ pɑ tɑɑ tɔ, Kilisiti kɛnɑ-wɛɣɛ Ɩsɔ tomɑ nɑ Ɩsɔ lǝmɑɣɑsɛɛ. 
\v 25 Pǝ tɑɣɑ pʋlʋ tɔɔ, yʋlʋ pǝyɑɣɑ lǝmɑɣɑsɛɛ tǝnɑ tɑ tɑlɑ Ɩsɔ kʋmɛlɛntʋ, nɑ pɑ tomɑ tǝnɑ tɑ tɑlɑ Ɩsɔ ɩcɑntʋ tete.
\p
\v 26 Kʋpɑm, mɑ tɑɑpɑlɑɑ, ɩ́ nyǝnɩ nɑ ɩ́ nɑ́ sɩ Ɩsɔ yɑɑʋ-mɛ nɑ ɩ́ lɑ kpekǝle tɔ, ɑntulinyɑ tɑɑ cǝnɛ mpɑ pɑ yɑɑ lǝmɑɣɑsɛɛ nyǝ́mɑ tɔ pɑ fɛɩ pɑɣɑlɛ kɛ mǝ hɛkʋ, nɑ toŋtʋnɑɑ fɛɩ pɑɣɑlɛ, nɑ ɑwulumpiyɑ fɛɩ pɑɣɑlɛ. 
\v 27 Ɩsɔ lǝsǝnɑ mpi ɑntulinyɑ yǝlɑɑ yɑɑ sɩ kʋmɛlǝnyǝm tɔ sɩ pǝ́ tʋ lǝmɑɣɑsɛɛ nyǝ́mɑ kɛ fɛɛlɛ. Nɑ ɩ lǝsɑ mpi ɑntulinyɑ yǝlɑɑ yɑɑ sɩ ɩcɑntʋ tɔ sɩ pǝ́ tʋ ɑkpɑlɑ nyǝ́mɑ kɛ fɛɛlɛ. 
\v 28 Nɑ ɩ lǝsɑ mpi ɑntulinyɑ yǝlɑɑ nyǝnǝɣɩ tɑɑlǝm nɑ pɑ́ footiɣi nɑ pɑɑ nyǝnǝɣɩ-wǝɣɩ pʋlʋ mɑɣɑmɑɣɑ tɔ, sɩ pǝ́ wɑkǝlɩ mpi pɑ tʋɣʋnɑ nyʋɣʋ tɔ. 
\v 29 Ɩlɛ yʋlʋ pǝyɑɣɑ nɑkǝlɩ kɑ kɑɑ sɑ kɑ tǝɣɩ Ɩsɔ ɩsɛntɑɑ. 
\v 30 Amɑ Ɩsɔ kpɛntɑ mǝ nɑ Yesu Kilisiti kɛ́, nɑ ɩ lɑpɑ nɑ Kilisiti pǝsɩ tɑ́ lǝmɑɣɑsɛɛ. Kilisiti tɔɔ kɛ́ Ɩsɔ nyǝnǝɣɩ-tʋɣʋ yʋlʋpɑmɑ. Ɩnɩ ɩ lɑpǝnɑ nɑ tǝ́ pǝsɩ Ɩsɔ nyǝ́mɑ, nɑ kʋlʋm ɩnɩ ɩ yɑpǝnɑ tɑ́ nyɔɔŋ. 
\v 31 Pǝ tɔɔ kɛ́ pɑ ŋmɑɑwɑ Ɩsɔ Tɔm tɑɑ sɩ: Ye wei ɩ́ cɑɑ ɩ sɑ, ɩ́ sɑ nti Tɑcɑɑ lɑpɑ tɔ, ɩ́ tɑɑ sɑ ɩ tɩ.
\c 2
\s1 Kilisiti sǝm tɔm heeluɣu
\p
\v 1 Mɑ tɑɑpɑlɑɑ, wɑɑtʋ wei mɑ kɔmɑ mǝ tɛ sɩ mɑ heeliɣi-mɛɣɛ Ɩsɔ tɑmpɑnɑ nnɑ ɑ ŋmɛlɑɑ tɔ ɑ tɔm tɔ, pǝ tɑɣɑ nɔɔleleŋ wɑwɑwɑ nɩɩlɩ, yɑɑ nyǝmtʋ nɑtǝlǝɣɩ mɑ lɑpǝnɑɑ. 
\v 2 Mɑ cɑɣɑlɛ tǝnɑɣɑ mǝ kiŋ mɑ tɑ cɑɑ sɩ mɑ́ lɑ nɑtǝlǝɣɩ mǝ hɛkʋ kɛ yem nɑ pǝ́ tɑ́ kɛ́ Yesu Kilisiti tɔm. Ɩsɩɩ pɑ kɑmɑ-ɩ sǝm tesikɑ tɔɔ tɔ pǝ tɔm mɑɣɑmɑɣɑ kɛ mɑ siɣisinɑɑ. 
\v 3 Pǝ tɔɔ kɛ́ mɑ poluɣu mǝ tɛ tɔ ɩcɑntʋ tɑɑ kɛ́, nɑ mɑ selɑɣɑnɑ sɔɣɔntʋ kɛ́. 
\v 4 Pǝ tɑɣɑ yʋlʋ lǝmɑɣɑsɛɛ yekuɣu nɑ pɑ́ yɔɣɔtǝɣɩ tɔmnɑɑ nɑ cɑŋǝm kɛ ɩsǝnɑ mpi tɔɣɔ mɑ sɛɣɛsǝnɑ mɑ sɛɣɛsǝŋ nɑ mɑ́ lɑnɑ mɑ wɑɑsʋ. Amɑ Ɩsɔ Feesuɣu tomɑ kɛ mɑ lɑpǝnɑɑ, nɑ ɑ nɑɑ mpʋ tǝkeelee. 
\v 5 Ɩlɛnɑ mǝ Ɩsɔ sɛɛʋ sǝŋ Ɩsɔ tomɑ tɔɔ, pǝ́ tɑɑ sǝŋ yǝlɑɑ lǝmɑɣɑsɛɛ tɔɔ.
\s1 Mpi Ɩsɔ yɑɑ lǝmɑɣɑsɛɛ tǝsiɣisiɣi tɔ
\p
\v 6 Pɑɑ nɑ mpʋ tɔ, mpɑ pɑ pɩɩ Ɩsɔ nyǝm tɑɑ tɔ lǝmɑɣɑsɛɛ mpɑɑʋ kɛ mɑ hʋlǝɣɩ-wɛ. Amɑ pǝ tɑɣɑ lǝmɑɣɑsɛɛ nnɑ ɑntulinyɑ ɩnɛ nɑ mpɑ pɑ kɛ́ ɩ toŋtʋnɑɑ nɑ pɑɑ tɛ nɑ pɑ́ kpiisi-wɛ tɔ pɑ yɑɑ lǝmɑɣɑsɛɛ tɔ. 
\v 7 Amɑ Ɩsɔ lǝmɑɣɑsɛɛ mukɑɣɑ tɛɛ nyǝnɑ nnɑ ɑ ŋmɛlɑ yǝlɑɑ tɔ ɑ tɔm kɛ mɑ kpɑɑlǝɣɩ. Ɩsɔ kɑ lǝsǝnɑ-yɛ nɑ ɩ́ sɩɩ tɑ́ teeli tɔɔ nɑ pǝcɔ pɑ́ lɑ ɑntulinyɑ. 
\v 8 Antulinyɑ tɑɑ cǝnɛ toŋtʋnɑɑ tɑɑ nɔɣɔlʋ tɑ cɛkǝnɑ Ɩsɔ lǝmɑɣɑsɛɛ ɑnɛ. Pǝ tɑɣɑ pʋlʋ, ye pɑɑ cɛkǝnɑɑ pɑ tɑɑ kɑ́ Tɑcɑɑ teeli tʋ kɛ sǝm tesikɑ tɔɔ. 
\v 9 Pǝ lɑpɑɣɑ ɩsɩɩ pɑ ŋmɑɑʋ Ɩsɔ Tɔm tɑɑ tɔ sɩ:
\q1 Mpi yʋlʋ tɑ tɩɩ nɑʋ nɑ ɩ tɑ nɩɩ pǝ tɔm tɔ.
\q1 Mpi pǝ tɔɔ yʋlʋ tɑ tɩɩ hʋʋ tɔ,
\q1 Ɩsɔ tɑɣɑnɑ-wǝɣɩ mpɑ pɑ sɔɔlɑ-ɩ tɔ pɑ tɔɔ.
\m
\v 10 Tɑ́ tɔɔ kɛ́ Ɩsɔ kulɑ kʋŋmɛlǝtʋ tǝnɛ nɑ Feesuɣu Nɑŋŋtʋ kiŋ. Mmm Feesuɣu Nɑŋŋtʋ wiiliɣi pǝ tǝnɑ pǝ tɑɑ kɛ́ sɩ kʋ nɑɑ. Pɑɑ nti tǝ pǝlɛ Ɩsɔ tʋɣɩ nɑ tǝ́ ŋmɛlɑɑ tǝkulukulu tɔ mɑɣɑmɑɣɑ. 
\v 11 Pǝ wɛʋ yǝlɑɑ tɑɑ tɔ ɑwe nyǝŋ lɛlʋ tɑɑ tɔm? Ye pǝ tɑɣɑ yʋlʋ lǝmɑɣɑsǝlɛ nte tǝ wɛ ɩ tɑɑ tɔ ńtɛ́ tɩɩ nyǝnɑ ɩ tɔm. Mpʋ tɔtɔɣɔ nɑ Ɩsɔ Feesuɣu, ŋkʋ kʋ nyǝmnɑ Ɩsɔ nyǝntʋ tǝnɑ. 
\v 12 Pǝ tɑɣɑ ɑntulinyɑ ɩnɛ ɩ lǝmɑɣɑsǝlɛ kɛ pǝ tʋ-tʋ. Amɑ Feesuɣu ŋku kʋ lɩɩnɑ Ɩsɔ kiŋ tɔɣɔ, sɩ tǝ́ cɛkǝnɑ pǝ tǝnɑ mpi Ɩsɔ hɑ-tʋ tɔ pǝ tɔm. 
\v 13 Pǝ tɑɣɑ yʋlʋ lǝmɑɣɑsɛɛ sɛɣɛsʋɣʋ nɔɔleleŋ wei tɔɣɔ tǝ yɔɣɔtǝɣǝnɑ pǝ tɔm. Amɑ nti Ɩsɔ Feesuɣu sɛɣɛsǝɣɩ tɔɣɔ. Pǝ tɔɔ kɛ́ mpɑ pɑ wɛnɑ Ɩsɔ Feesuɣu tɔ tǝ kɛɛsǝɣɩ-wɛɣɛ Ɩsɔ nyǝm tɑmpɑnɑ.
\p
\v 14 Wei ɩ fɛɩnɑ Ɩsɔ Feesuɣu tɔ ɩɩ pǝsǝɣɩ nɑ ɩ́ mʋ Feesuɣu kʋnɛ kʋ tɑmpɑnɑ. Ɩ yɑɑ-tǝɣɩ kʋmɛlǝtɔm kɛ́, nɑ ɩɩ tɩɩ pǝsǝɣɩ tǝ cɛkǝnɑʋ mɑɣɑmɑɣɑ. Mpi pǝ tɔɔ tɔ, wei ɩ wɛnɑ Feesuɣu tɔ ɩnɩ ɩ pɑɑsi ɩ cɛkǝɣǝnɑnɑ-tɩ. 
\v 15 Yʋlʋ wei ɩ wɛnɑ Ɩsɔ Feesuɣu tɔ ɩnɩ ɩ cɛkǝɣǝnɑnɑ tǝ tǝnɑ. Nɔɣɔlʋ fɛɩ wei ɩ pǝsǝɣɩ nɑ ɩ́ cɛkǝnɑ Feesuɣu ŋkʋ kʋ tɔm tɔ. 
\v 16 Pɑ ŋmɑɑ Ɩsɔ Tɔm tɑɑ sɩ:
\q1 Awe nyǝmnɑ Tɑcɑɑ hʋwɛɛ?
\q1 Awe pǝsǝɣǝnɑ nɑ ɩ́ tɑsɑ-ɩ tɔm?
\m Amɑ tɑ́ ɩlɛ, Kilisiti hʋwɛɛ kɛ tɑ́ wɛnɑ.
\c 3
\s1 Ɩsɔ tǝmlɛ nyǝ́mɑ
\p
\v 1 Mɑ tɑɑpɑlɑɑ, tɑmpɑnɑ tɔɔ ɩsǝntɔ, mɑ ɩlɛ mɑ tɑ pǝsɩ nɑ mɑ́ yɔɣɔtǝnɑ-mɛ ɩsɩɩ pɑ yɔɣɔtʋɣʋnɑ mpɑ pɑ wɛnɑ Ɩsɔ Feesuɣu tɔ. Amɑ mɑ yɔɣɔtǝnɑ-mɛɣɛ ɩsɩɩ pɑ yɔɣɔtʋɣʋnɑ mpɑ pɑ tǝŋǝɣɩ ɑntulinyɑ ɩnɛ ɩ hʋwɛɛ tɔ, ɩsɩɩ piyɑ kɔsǝkɔsǝnɑɑ kɛ Ɩsɔ sɛɛʋ tɑɑ. 
\v 2 Pǝ wɛ ɩsɩɩ kɑfɑ kɛ mɑ suukɑɣɑ-mɛ, pǝ tɑɣɑ mʋtʋ. Ɩ́ tɑɑ nyǝntɑ tɔɣɔʋ tɔ pǝ tɔɔ, nɑ hɑlǝnɑ sɑŋɑ ɩ́ tɑ nyǝntɑ tɔɣɔʋ. 
\v 3 Mpi tɔ, ɩ́ tɔŋnɑ ɑntulinyɑ ɩnɛ ɩ hʋwɛɛ kɛ tǝŋʋɣʋ kɛ́. Ɩsǝsɛɛmlɛ nɑ yoou pǝ wɛʋ ḿpʋ́ɣʋ́ mǝ hɛkʋ tɔ, mpʋ ɩnɩ pɩɩ hʋ́lǝ́ɣɩ́ sɩ ɑntulinyɑ hʋwɛɛ kɛ ɩ́ tǝŋǝɣɩ? Pɩɩ hʋ́lǝ́ɣɩ́ tɔtɔ sɩ ɩ́ lɑkɩ kɛ́ ɩsɩɩ yǝlɑɑ kɛ yem, pǝ tɑɣɑ Ɩsɔ sɛɛlɑɑ? 
\v 4 Pǝ tɑɣɑ pʋlʋ, lɛlʋ tɔŋʋɣʋ sɩ Pɔɔlɩ tɔɔ kɛ́ mɑ wɛɛ, nɑ ɩnɛ ɩ́lɛ́ sɩ Apɔlɔɔsɩ tɔɔ kɛ́ mɑ wɛɛ tɔ, pǝ tɑɣɑ mɑ tɑ nyɩ ɩsɔnɑɑ kʋlɑpʋtʋ kɛ ɩ́ lɑkɩ mpʋ?
\p
\v 5 Aweɣe pɑ yɑɑ Apɔlɔɔsɩ? Nɑ ɑweɣe Pɔɔlɩ ye? Tɑ nɑɑlɛ tǝ kɛ́ Ɩsɔ tǝmlɛ nyǝ́mɑ mpɑ pɑ lɑpɑ-mɛ nɑ ɩ́ tɛ Ɩsɔ nɑ mǝ tɑɑ tɔɣɔ. Pɑɑ tɑ́ tɑɑ wei ɩ lɑpɑ nɑ ɩ́ yoosi nti Tɑcɑɑ tʋ-ɩ sɩ ɩ́ lɑ tɔɣɔ. 
\v 6 Mɑɣɑlɛ tʋɣʋ sɔlʋ nɑ Apɔlɔɔsɩ pǝlǝnɑ lʋm kɛ kʋ tɔɔ. Amɑ Ɩsɔ lɑpǝnɑ nɑ kʋ tɛɛ. 
\v 7 Pǝ tɔɔ kɛ́ tʋɣʋ sɔlʋ nɑ lʋm pǝllʋ pɑ tɑ kɛ pʋlʋ. Amɑ Ɩsɔ kɛlɛ tɔm tʋ, ɩnɩ ɩ lɑpǝnɑ nɑ tʋɣʋ tɛɛ. 
\v 8 Tʋɣʋ sɔlʋ nɑ kʋ tɔɔ lʋm pǝllʋ pɑ teitei kɛ́. Ɩsɔ kɑ́ kɛɛsǝnɑ pɑɑ wei ɩ tǝmlɛ nɑ ɩ́ fɛlɩ-ɩ. 
\v 9 Pǝ tɑɣɑ pʋlʋ tɔɔ, tɑ́ tǝmlɛ tɑɑ tǝ kɛ́ tǝmɑ tɑɑpɑlɑɑ kɛ́, nɑ Ɩsɔ kɛ́ tǝ lɑkɩ tǝmlɛ, nɑ mǝ kɛnɑ Ɩsɔ tǝmlɛ.
\p Ɩ́ wɛɛ tɔtɔɣɔ ɩsɩɩ kutuluɣu ŋku Ɩsɔ ŋmɑɑkɩ tɔ. 
\v 10 Ɩsɔ yelinɑ nɑ pǝ sɑɑ-m, nɑ mɑ tɩɩ pɑɑsɑɑ kɛ́ nɑ mɑ́ sɩɩ kite ɩsɩɩ ŋmɑlʋ kʋpɑŋ sɩɩkʋɣʋ tɔ. Amɑ pǝnɛntɛ lɛlʋ tǝnǝɣǝnɑ pǝ tɔɔ. Pɑɑ wei ɩ́ lɑ lɑɑkɑlɩ nɑ ɩ́ kenɑ ɩsǝnɑ ɩ tǝnǝɣɩ tɔ yoo. 
\v 11 Pǝ tɑɣɑ pʋlʋ tɔɔ, Yesu Kilisiti mɑɣɑmɑɣɑ kɛnɑ kite, nɑ pǝ fɛɩ ɩsɩɩ yʋlʋ nɔɣɔlʋ pǝsǝɣɩ nɑ ɩ́ tɑsɑ kʋfɑtɛ nɑtǝlǝɣɩ sɩɩʋ. 
\v 12 Lɛlɑɑ wɛɛ nɑ wʋlɑnɑɑ nɑ nyǝɣǝlʋɣʋ kʋhʋlʋmʋɣʋ nɑ liɣitee pɛɛ kɛ pɑ tǝnǝɣɩ pǝ tɔɔ. Amɑ lɛlɑɑ ɩlɛ tɑɑsɩ nɑ nyɩɩtʋ nɑ kiisi kɛ pɛlɛ pɑ tǝnǝɣɩ. 
\v 13 Amɑ hʋʋlɛ wule pɩɩ kuli pɑɑ wei ɩ tǝmlɛ tɔɔ nɑ pɑ́ nɑ́ tǝ cɑkǝlɛ. Kʋyɑkʋ kʋhʋʋnɑʋ ŋkʋ kʋ wule tɔ kɔkɔ kɛ́. Kɔkɔ kɑ́ mɑɣɑsǝnɑ pɑɑ wei ɩ tǝmlɛ sɩ kɑ nɑɑ mpi tǝ kɛnɑɑ tɔ. 
\v 14 Ye wei ɩ tǝnɑ kite tɔɔ kɛ́ tǝmlɛ nte kɔkɔ kɑɑ nyɑɣɑ tɔ, ɩ kɑ́ hiki ɩ kʋfɛlʋɣʋ. 
\v 15 Amɑ wei ɩ nyǝntɛ ɩ́ mʋwɑ, ɩ́lɛ́ ɩ kʋfɛlʋɣʋ lepɑ-ɩ kɛ́. Amɑ pɑɑ yɑ ɩ mɑɣɑmɑɣɑ nɑ pǝ́ mɑɣɑnɑ ɩsɩɩ kɔkɔ mpee pɔɔŋ kɛ ɩ lɩɩnɑɑ.
\p
\v 16 Ɩ́ nyɩ teu sɩ ɩ́ kɛ́ Ɩsɔ tǝcɑɣɑlɛ, nɑ Ɩsɔ Feesuɣu cɑkǝnɑ mǝ tɑɑ. 
\v 17 Ye pǝ cǝpɑ wei nɑ ɩ́ wɑkǝlɩ Ɩsɔ tǝcɑɣɑlɛ, Ɩsɔ kɑ́ wɑkǝlɩ pʋntʋ. Pǝ tɑɣɑ pʋlʋ, Ɩsɔ tǝcɑɣɑlɛ wɛ kɛ́ tǝnɑŋŋ nɑ mǝ kiŋ kɛ ɩ cɑkɩ.
\p
\v 18 Mǝ tɑɑ nɔɣɔlʋ ɩ́ tɑɑ puɣusi ɩ tɩ. Ye mǝ tɑɑ nɔɣɔlʋ hʋʋ sɩ ɑntulinyɑ ɩnɛ ɩ tɑɑ pʋntʋ ntɛ́ lǝmɑɣɑsɛɛ tʋ ɩ́ pǝsɩ kʋmɛlɛŋ, ɩlɛnɑ ɩ́ wɛɛnɑ lǝmɑɣɑsɛɛ kɛ tɑmpɑnɑ. 
\v 19 Pǝ tɑɣɑ pʋlʋ, Ɩsɔ nɑ́ nyǝnǝɣɩ ɑntulinyɑ ɩnɛ ɩ tɑɑ lǝmɑɣɑsɛɛ kɛ kʋmɛlɛntʋ kɛ́. Pɑ ŋmɑɑwɑ Ɩsɔ Tɔm tɑɑ kɛ́ mpʋ sɩ: Lǝmɑɣɑsɛɛ nyǝ́mɑ lǝmɑɣɑsɛɛ kɛ Ɩsɔ nyǝkǝnɑ-wɛɣɛ kɑtɔsɩ nɑ ɩ́ kpɑɑ-wɛ. 
\v 20 Pɑ tɑsɑ ŋmɑɑʋ tɔtɔ sɩ: Tɑcɑɑ nyǝ́mɑ sɩ lǝmɑɣɑsɛɛ nyǝ́mɑ hʋwɛɛ tɑ kɛ pʋlʋ. 
\v 21 Pǝ tɔɔ kɛ́ yʋlʋ kɑɑ yɔɔlǝnɑ yǝlɑɑ lɛlɑɑ. Pǝ tɑɣɑ pʋlʋ tɔɔ, mǝ tǝnnɑ pǝ tǝnɑ. 
\v 22 Pɑɑ Pɔɔlɩ, pɑɑ Apɔlɔɔsɩ, pɑɑ Piyɛɛ, pɑɑ ɑntulinyɑ, pɑɑ weesuɣu, pɑɑ sǝm pɑɑ sɑŋɑ nyǝm, pɑɑ cele nyǝm, mǝ tǝnnɑ pǝ tǝnɑ. 
\v 23 Amɑ Kilisiti tǝnnɑ-mɛ, nɑ Ɩsɔ tǝnnɑ Kilisiti ɩ́lɛ́.
\c 4
\s1 Kilisiti tillɑɑ
\p
\v 1 Pǝ tɔɔ ɩlɛ, ɩ́ nyǝnǝɣɩ-tʋɣʋ Kilisiti tǝmlɛ lɑtɑɑ mpɑ pɑ niŋ tɑɑ pǝ tʋ Ɩsɔ tɑmpɑnɑ nnɑ ɑ ŋmɛlɑɑ tɔ. 
\v 2 Ye pɑ tʋ pʋlʋ lɑpʋ kɛ yʋlʋ niŋ tɑɑ, tɑmpɑnɑ kɛ ɩ kɑ́ tǝŋ nɑ ɩ́ lɑkǝnɑ-wɩ. 
\v 3 Ye mɑ kiŋ ɩlɛ, pɑɑ mɛ yɑɑ yǝlɑɑ kɑ cɑɣɑnɑ sɩ pɑ pɛɛkǝɣɩ mɑ tɔm tɑɑ nɑ pɑ́ nɑ, pǝlɛ pǝ tɑ nɑ mɑ́. Mɑ mɑɣɑmɑɣɑ mɑɑ pɛɛkǝɣɩ mɑ kiŋ sɩ mɑ́ nɑ́ sɩ mɑ tewɑ yɑɑ mɑ tɑ te tɔ. 
\v 4 Tɑmpɑnɑ tɔɔ ɩsǝntɔ, mɑ mɑɣɑmɑɣɑ mɑ kiŋ mɑ tɑ nɑ tɑɑlɩ nɔɣɔlʋ se. Pɑɑ nɑ mpʋ tǝlɛ tɩɩ hʋ́lǝ́ɣɩ́ sɩ mɑ tewɑ tǝkpɑtɑɑ se. Amɑ Tɑcɑɑ kɑ́ pɛɛkǝnɑ nɑ ɩ́ nɑ́ sɩ mɑ tewɑ yɑɑ mɑ tɑ te tɔ. 
\v 5 Pǝ tɔɔ ɩlɛ, ɩ́ tɑɑ hulinɑ nɔɣɔlʋ tɔm tɑmpɑnɑ pɛɛkʋɣʋ nɑ pǝ wɑɑtʋ tɑ tɑtɑ. Ɩ́ yele nɑ hɑlɩ Tɑcɑɑ kɔɔ. Ɩnɩ ɩ kɑ kulinɑ mpi pǝ ŋmɛlɑ sǝkpɛtʋɣʋ tɛɛ tɔ pǝ tɔɔ tǝyelele. Nɑ ɩ kɑ́ kuli yǝlɑɑ lotu tɑɑ hʋwɛɛ. Pǝlɛɣɛ Ɩsɔ kɑ́ sɑ pɑɑ wei ɩsɩɩ pǝ mʋnɑ ɩ́ sɑmɩ-ɩ tɔ.
\p
\v 6 Mɑ tɑɑpɑlɑɑ, mɑ kpɑɣɑ mɑ́ nɑ Apɔlɔɔsɩ tɑ́ tɔm nɑ mɑ́ kɛɛsǝnɑ mpʋ sɩ ɩ́ cɛkǝnɑ ɩtuule nte pɑ tukɑɑ sɩ: Nti pɑ ŋmɑɑwɑ tɔ, tɑɑ sɔɔsɩ tǝ tɔɔ. Pǝ tɔɔ kɛ́ mǝ tɑɑ nɔɣɔlʋ ɩ́ tɑɑ yɔɔlǝnɑ lɛlʋ nɑ ɩ́ footiɣi lɛlʋ. 
\v 7 Awe yelɑɑ nɑ ń hiki nɑ ń kǝlɩ lɛlɑɑ? Pǝ tǝnɑ mpi n wɛnɑ tɔ pǝ tɑɣɑ Ɩsɔ hɑnɑ-ŋ? Ye pɑ hɑ-ŋ kʋhɑʋ ɩlɛ pepe tɔɔ kɛ́ n hɔŋ nyɑ́ tɩ ɩsɩɩ nyɑ́ lʋpʋ tɔɔ kɛ́ n hikɑɑ?
\p
\v 8 Pʋwɛ, ɩ tɛmɑ hikuɣu kɛ pǝ tǝnɑ mpi ɩ́ nyɩɩlǝɣɩ tɔ, ɩ́ tɛmɑ piluɣu. Ɩ́ tɛmɑ ɑwulɑɑ kɛ pǝsʋɣʋ kɛ́, nɑ tɑɑ wɛ tɑ́ kʋnyɔntʋtʋ tɑɑ. Ye pɩɩ kɛ́ ɩsɩɩ ɩ́ kɛ́ ɑwulɑɑ tǝsiɣisiɣi kɔlɔ pɩɩ lɑpɑ-m leleŋ. Pǝ tɑɣɑ pʋlʋ tɔɔ, sɑɑ ɩnɩ tɑ́ nɑ-mɛ tɩɩ kpɛntɑ kɑwulɑɣɑ tɔɣɔʋ. 
\v 9 Pǝ cɑɣɑ ɩsɩɩ tillɑɑ tɑɣɑ Ɩsɔ pǝsǝnɑ wɑɑlɩ. Pǝ tɑɣɑ pʋlʋ, tǝ wɛ kɛ́ ɩsɩɩ yǝlɑɑ mpɑ pɑ sɩɩwɑ sɩ pɑɑ kʋ pɑtǝmɑ tɑɑ tɔ. Tǝ kɛ́ mpɑ pɑ tǝnɑ pɑ nyǝnǝɣɩ tǝcooo tɔ, pɑɑ ɩsɔtɑɑ tillɑɑ pɑɑ yǝlɑɑ. 
\v 10 Tɑ pǝsɑ kʋmɛlɛmǝŋ, nɑ mɩɩ kɛ́ lǝmɑɣɑsɛɛ nyǝ́mɑ kɛ Kilisiti kʋlʋm ɩnɩ ɩ tɔɔ. Tɑ́ kɛ́ ɑcɑmɑɑ, nɑ mɛɣɛ toŋtʋnɑɑ. Pɑ tʋɣʋnɑ-mɛ, ɑmɑ yem kɛ́ pɑ nyǝnǝɣɩ tɑ́. 
\v 11 Hɑlǝnɑ sɑŋɑ wʋlɛ tǝnɛ, nyɔɣɔsɩ nɑ lʋkɔtʋ kʋɣǝnɑ-tʋ, nɑ tǝ fɛɩnɑ pǝcɛkǝlɛ. Pɑ mɑkɩ-tʋɣʋ nɑ tǝ cɔɔkɩ yem, tǝ fɛɩnɑ tɑpɑsopile. 
\v 12 Tɑ́ mɑɣɑmɑɣɑ tɑ́ kookɑlɩ kɛ́ tǝ lɑkɩ nɑ tǝ́ tɔkǝnɑ. Pɑ tʋʋkɩ-tʋ, nɑ tɑɑ sɛɛkɩ-wɛ. Pɑ tʋɣɩ-tʋɣʋ kʋnyɔŋ, tɑ́ sumɑɣɑ sɩ pɑ́ tʋ-tʋ. 
\v 13 Pɑ́ kʋɣɩ tɑ nyɔɔŋ, tɩɩ lɛɛtǝɣɩ-wɛɣɛ pɑ ɩsɑɣɑtʋ. Hɑlǝnɑ sɑŋɑ pɑɑ nyǝnǝɣɩ-tʋ sɩ tǝ kɛ́ pʋlʋpʋɣʋ ɑntulinyɑ ɩnɛ ɩ tɑɑ. Pɑ nyǝnǝɣɩ-tʋɣʋ ɩsɩɩ hute yɑɑ pʋntʋ mɑɣɑmɑɣɑ.
\p
\v 14 Pǝ tɑɣɑ mɑ cɑɑ sɩ mɑ́ tʋ-mɛɣɛ fɛɛlɛ tɔɣɔ mɑ ŋmɑɑwɑ nɑ mɑ́ kɛɛsɩ-mɛɣɛ mpʋ. Amɑ mɑ luɣu wɛɛ kɛ́ sɩ mɑ́ sɛɣɛsɩ-mɛ ɩsɩɩ mɑ piyɑ nsi mɑ luɣu wɛɛ tɔ. 
\v 15 Pɑɑ ɩ́ kɑ́ hiki sɛɣɛsǝlɑɑ kɛ iyisi nɑɑnʋwɑ (10000) kɛ́ Kilisiti mpɑɑʋ tɔm tɑɑ mǝ cɑɑ kɛlɛ kʋlʋm. Mɑɣɑlɛ mǝ cɑɑ kɛ Kilisiti tǝŋʋɣʋ tɔm tɑɑ. Pǝ tɑɣɑ pʋlʋ, mɑ́ kɔnnɑ-mɛɣɛ Lɑɑpɑɑlɩ Kʋpɑŋ. 
\v 16 Pǝ tɔɔ kɛ́ mɑ heeliɣi-mɛ sɩ ɩ́ tǝŋ mɑ yɑɑsi. 
\v 17 Nɑ pǝ mɑɣɑmɑɣɑ pǝ nyʋɣʋ tɔɔ kɛ́ mɑ kʋsɑ Timotee sɩ ɩ́ polo mǝ tɛ. Ɩnɩ ɩ kɛnɑ mɑ pǝyɑlʋ wei mɑ sɔɔlɑɑ tɔ. Tɑcɑɑ tɔm tɑɑ ɩ kɛ́ yʋlʋ wei pɑɑ lɑnɑ nɑɑni tɔɣɔ. Ɩ kɑ́ kɛɛsɩ-mɛɣɛ yɑɑsi wei mɑ tɔkɑɑ nɑ mɑ́ tɔŋnɑ Kilisiti tɔm tɑɑ nɑ mɑ́ hʋ́lǝ́ɣɩ́ pɑɑ leɣe Yesu sɛɛlɑɑ kpekɑ tɑɑ sɩ pɑ́ tǝŋ tɔ.
\p
\v 18 Mǝ tɑɑ lɛlɑɑ hʋʋwɑ sɩ mɑ kɑɑ kɔɔ, ɩlɛnɑ pɑ́ sʋʋ kɑlɑmpɑɑnɩ lɑpʋ. 
\v 19 Ye Tɑcɑɑ tisɑɑ mɑɑ kɔɔ mǝ tɛɣɛ nɔɔnɔɔ. Wɑɑtʋ ɩnǝɣɩ mɑɑ nɑ́ sɩ kɑlɑmpɑɑnɩ nyǝ́mɑ mpɛ, nɔɣɔ tɑɑ tike kɛ pɑ lɑkɩ, yɑɑ pɑ wɑɑsǝɣɩ kʋlɩ. 
\v 20 Pǝ tɑɣɑ pʋlʋ tɔɔ, Ɩsɔ Kɑwulɑɣɑ tɔm tɑ kɛ nɔɣɔ tɑɑ tɔm tike. Amɑ sɩ ń pǝsɩ nɑ ń lɑkɩ kɛ́. 
\v 21 Ɩ́ lǝsɩ mpi ɩ́ cɑɑ tɔ ɩlɛ. Ɩ́ cɑɑ sɩ mɑ́ kɔnnɑ kpɑ́tʋ́ɣʋ́, yɑɑ mɑ kɔɔ tǝpɑmmm nɑ sɔɔlʋɣʋ?
\c 5
\s1 Yesu sɛɛlɑɑ kpekɑ tɑɑ ɑsilimɑ
\p
\v 1 Pɑ tɔŋnɑ mǝ tɔm kɛ yɔɣɔtʋɣʋ kɛ teu kɛ́ sɩ mǝ kʋlɑpʋtʋ wɛ ɑsilimɑ kɛ sɔsɔm. Pɑɑ mɑ tɑ nyɩ ɩsɔnɑɑ mɑɣɑmɑɣɑ kiŋ pɑ kɑɑ nɑ ɑsilimɑ ɑnɩ ɑ tɑkɑ. Pɑ yɔɣɔtɑɑ sɩ mǝ tɑɑ nɔɣɔlʋ nɑ́ kpɑɣɑ ɩ cɑɑ ɑlʋ. 
\v 2 Pɑɑ nɑ mpʋ mɩɩ tɔŋnɑ mǝ tǝɣɩ sɑm pǝ tɩɩ fɛɩ. Pɩɩ nǝɣǝsǝnɑ kɛ́ ɩsɩɩ kʋlɑpʋtʋ ntɩ tǝ́ wɑkǝlɩ mǝ lɑŋɑ kɛ sɔsɔm, nɑ ɩ́ lǝsɩ mǝ hɛkʋ kɛ wei ɩnɩ ɩ lɑpɑ mpʋ tɔ. 
\v 3-4 Pɑɑ mɑ nɑ-mɛ tǝ wɛ tǝmɑ nɑ pooluŋ tɔ, mɑ lǝsɑɣɑ wɛ mǝ kiŋ kɛ tɑm kɛ́. Ye mɑ, nɑ Tɑcɑɑ Yesu tomɑ tɑɑ mɑ tɛmɑ ɑpɑlʋ ɩnɩ ɩ tɔm kʋɣʋ kɛ́ ɩsɩɩ ye mɑɑ wɛ mǝ kiŋ mɑɑ lɑpɑ tɔ. Wɑɑtʋ wei ɩ́ kɑ́ koti nɑ mɑ lǝsɑɣɑ kɑ́ wɛɛ mǝ hɛkʋ tɔ, Tɑcɑɑ tomɑ kɑ́ wɛɛ tɑ́ tǝnɑ tɑ́ hɛkʋ tɑɑ tǝnɑ. 
\v 5 Ɩ́ kpɑɣɑ ɑpɑlʋ ɩnɩ nɑ ɩ́ pɛtɩ Sɑtɑnɩ niŋ tɑɑ nɑ pǝ́ nɑɑsɩ-ɩ nɑ ɩ ɩsɛ, ɩlɛnɑ pǝ́ wɑɑsɩ-ɩ kʋyɑŋku Tɑcɑɑ Yesu Kilisiti kɑ́ kɔɔ tɔ.
\p
\v 6 Kʋkʋsʋm pǝciimɑɣɑ kpɑɑsǝɣǝnɑ somtu tǝnɑ tǝfʋʋ. 
\v 7 Ɩ́ lǝsɩ mǝ hɛkʋ tɑɑ kɛ́ mpi pǝ lɑpɑ-mɛɣɛ ɑsɑɣɑɑ tɔ, ɩlɛnɑ ɩ́ pǝsɩ kʋpɑmɑ tǝkpɑtɑɑ. Wɑɑtʋ ɩnɩ ɩ́ kɑ́ nǝɣǝsǝnɑ somtu kʋfɑtʋ nti tǝ tɑɑ kʋkʋsʋm fɛɩ tɔ. Mpʋ pǝ mɑɣɑmɑɣɑ kɛ ɩ́ tɩɩ wɛɛ. Pǝ tɑɣɑ pʋlʋ tɔɔ, tǝ nikɑ tɑ́ Tɛɛʋ ɑcimɑ tɔɣɔʋ kɛ́. Mpi tɔ pɑ tɛmɑ tɑ́ Tɛɛʋ ɑcimɑ ɩwǝyɑɣɑ kʋɣʋ tɔ se, ŋkɛɣɛlɛ Kilisiti. 
\v 8 Ye mpʋ ɩlɛ tǝ́ tɔɣɔ tɑ ɑcimɑ. Ye tǝ tɔkɩ-yɛ, tǝ́ tɑɑ tɔɣɔ-yɛ nɑ potopoto wei ɩ tɑɑ kʋkʋsʋm kʋpǝm wɛɛ tɔ. Ɩsɑɣɑtʋ nɑ ɑsilimɑ pǝ lite ntɛ́. Amɑ tǝ́ tɔɣɔ tɑ́ ɑcimɑ nɑ potopoto wei ɩ tɑɑ kʋkʋsʋm fɛɩ tɔ. Ɩnɩ ɩ kɛnɑ potopoto kʋpɑŋ nɑ tɑmpɑnɑ nyǝŋ.
\p
\v 9 Tɑkǝlɑɣɑ ŋkɑ mɑɑ ŋmɑɑ-mɛ tɔ kɑ tɑɑ mɑ heelɑ-mɛ sɩ mǝ nɑ yǝlɑɑ mpɑ pɑ lɑkɩ ɑsilimɑ tɔ ɩ́ tɑɑ kpɛntɩ. 
\v 10 Pǝ tɑɣɑ yǝlɑɑ tǝnɑɣɑ yem kɛ́ mɑ yɔɣɔtǝɣɩ. Mpi tɔ, ɑntulinyɑ tɑɑ cǝnɛ mǝ nɑ ɑsilimɑ nyǝ́mɑ nɑ nyɩɩllɑɑ nɑ ŋmɩɩlɑɑ nɑ tɩɩŋ lɑɑlɑɑ ɩ́ sitinɑ. Ye ɩ́ tɔmɑ sɩ ɩ́ cɔlǝɣɩ-wɛ, pǝ wɛɛ sɩ ɩ́ kɑ́ lɩɩ ɑntulinyɑ ɩnɛ ɩ tɑɑ kɛlɛ. 
\v 11 Nti tɔɣɔlɛ sɩ ye yʋlʋ nyǝnǝɣɩ ɩ tǝɣɩ Ɩsɔ sɛɛlʋ pǝyele ɩ lɑkɩ ɑsilimɑ, nɑ ɩ́ tɑ yele nyɩɩlʋɣʋ nɑ tɩɩŋ lɑɑʋ nɑ yǝlɑɑ tʋʋʋ nɑ sʋlʋm nyɔɔʋ nɑ ŋmɩɩlǝm, ɩ́ tɑɑ kpǝtǝnɑ pʋntʋ. Mǝ nɑ yʋlʋ ɩsɩɩ mpʋ ɩ́ tɑɑ tɔɣɔ tɔɣɔʋ mɑɣɑmɑɣɑ.
\p
\v 12-13 Ye pǝ kɑɑsɑ mpɑ pɑ tɑ kɛ Ɩsɔ sɛɛlɑɑ tɔ, pǝ tɑɣɑ mɑɑ lɑnɑ pɛlɛ pɑ tɔm. Amɑ Ɩsɔ kɑ́ hʋʋnɑnɑ pɛlɛ. Mǝ nɑ mpɑ ɩ́ kɑɑ kpekǝle tɔ pǝ tɑɣɑ pɑ tɔm kɛ ɩ́ kɑ lɑ? Pɑ ŋmɑɑwɑ Ɩsɔ Tɔm tɑɑ sɩ: Yʋlʋ ɩ́ lɑkɩ ɩsɑɣɑtʋ ɩ́ lǝsɩ-ɩ mǝ hɛkʋ.
\c 6
\s1 Tǝmɑ tɔmnɑɑ tɑɣɑnʋɣʋ
\p
\v 1 Ye mǝ tɑɑ nɔɣɔlʋ nɑ ɩ tɑɑpɑlʋ pɑ wɛnɑ tɔm, pǝ mʋnɑ pɑ́ yɑɑ tǝmɑɣɑ nɔnɔɣɔ kɛ mɑ tɑ nyɩ ɩsɔnɑɑ kiŋ nɑ Ɩsɔ yǝlɑɑ wɛɛ? 
\v 2 Ɩ́ tɑ́ nyɩ sɩ Ɩsɔ yǝlɑɑ kɑ́ hʋʋnɑnɑ yǝlɑɑ tǝnɑɣɑ tɔm kɛ cele? Ye mɩɩ hʋʋnɑnɑ yǝlɑɑ kɛ tɔm kɛ cele, ɩlɛ pepe tɔɔ kɛ́ ɩ́ kɑɑ pǝsɩ nɑ ɩ́ hʋʋ wenti tǝ wɛ pǝciiu tɔ? 
\v 3 Ɩ́ tɑ́ nyɩ sɩ tɑɑ hʋʋnɑnɑ ɩsɔtɑɑ tillɑɑ kɛ tɔm? Tǝ kɑɑ kpisi ɩsɔtɑɑ tillɑɑ kɛ tɔm hʋʋnɑʋ, kɑcɑŋfɑnɑ ɑntulinyɑ tɑɑ cǝnɛ nyǝntʋ nɑ? 
\v 4 Tɔmnɑɑ ɩsɩɩ mpʋ pǝ tɑkɑ mɑɣɑnɑ-mɛ, ɩlɛnɑ ɩ́ mǝlɩ nɑ ɩ́ kpɑɣɑ-tɩ nɑ ɩ́ pukinɑ mpɑ pɑ tɑ kɛ Yesu sɛɛlɑɑ kpekǝle pʋlʋ tɔ? 
\v 5 Mɑ yɔɣɔtǝɣɩ ḿpʋ́ɣʋ́ sɩ fɛɛlɛ ɩ́ kpɑ-mɛ. Ɩsɩɩ ɩ́ wɛʋ mpʋ tɔ lǝmɑɣɑsɛɛ tʋ nɔɣɔlʋ ɩ fɛɩ mǝ tɑɑ kɛlɛ sɩ yǝlɑɑ ɩ yoowɑ ɩ tɑɣɑnɩ-wɛ? 
\v 6 Pǝ nǝɣǝsǝnɑ mǝ tɑɑ nɔɣɔlʋ ɩ́ wɛnɑ ɩ tɔɣɔntǝlɛ nɑ tɔm, pɑ́ yɑɑ tǝmɑɣɑ nɔnɔɔsɩ kɛ mɑ tɑ nyɩ ɩsɔnɑɑ kiŋ nɑ?
\p
\v 7 Ɩsɩɩ ɩ́ yɑɑkʋɣʋ tǝmɑɣɑ nɔnɔɔsɩ kɛ mpʋ tɔ pǝ hʋ́lǝ́ɣɩ́ kpɑkpɑɑ kɛ́ sɩ ɩ kpisɑɑ tǝkpɑtɑɑ. Pepe tɔɔ kɛ́ yʋlʋ ɩ́ lɑpɑ-mɛɣɛ nti ɩɩ hɑɑkɩ mǝ tǝɣɩ suulu? Pɑɑ pɩɩ nǝɣǝsǝnɑ ɩ́ yɑɑ-ɩ nɔnɔɣɔ? Pepe tɔɔ kɛ́ ɩɩ yeki sɩ ye pɑ ŋmɩɩlǝɣɩ-mɛ pɑ ŋmɩɩlɩ? 
\v 8 Pǝyele mǝ tɔŋnɑ ɩsɑɣɑtʋ lɑpʋ nɑ ŋmɩɩlǝm kɛ mǝ tɑɑ mǝ tike. 
\v 9 Anɩ mǝ mɑɣɑmɑɣɑ ɩ́ nyǝmɑ teu sɩ ɩsɑɣɑlɑtɑɑ kɑɑ nɑ Ɩsɔ Kɑwulɑɣɑ. Ɩ́ tɑɑ puɣusi mǝ tɩ, ɑsilimɑ lɑtɑɑ, nɑ tɩɩŋ lɑɑlɑɑ, nɑ wɑsɑŋkɑlǝnɑɑ, nɑ ɑpɑlɑɑ mpɑ pɑ sʋʋkǝnɑ tǝmɑ tɔ, 
\v 10 nɑ ŋmɩɩlɑɑ, nɑ nyɩɩllɑɑ, nɑ sʋlʋnyɔɔlɑɑ, nɑ tʋʋlɑɑ, nɑ ŋmɩɩlɑɑ kpitikpitinɑɑ, pɑ tǝnɑɣɑ mpʋ pɑ tɑɑ nɔɣɔlʋ kɑɑ keesi Ɩsɔ Kɑwulɑɣɑ. 
\v 11 Anɩ mǝ tɑɑ lɛlɑɑ kɑ wɛ ḿpʋ́ɣʋ́. Amɑ pɑ lǝsɑ-mɛɣɛ ɩsɑɣɑtʋ tɑɑ nɑ ɩ́ pǝsɩ kʋpɑmɑ. Nɑ pǝ́ fɑɣɑsɑ-mɛ nɑ mǝ mpɑɑ sɩ ɩ́ pǝsɩ Ɩsɔ nyǝ́mɑ. Tɑcɑɑ Yesu Kilisiti toŋ tɑɑ, tɑ́ Ɩsɔ Feesuɣu yelɑɑ nɑ ɩ́ pǝsɩ kʋpɑmɑ kɛ Ɩsɔ ɩsɛntɑɑ.
\s1 Mpi ɩ́ lɑkǝnɑ mǝ tɔnǝŋ tɔ ɩ́ yele nɑ pǝ́ hʋ́lɩ́ Ɩsɔ teeli
\p
\v 12 Mǝ tɑɑ lɛlɑɑ tɔŋ sɩ ye pɑ nɔkɑ mpi pɑ lɑ. Tɑmpɑnɑ mpɑɑʋ wɛɛ yɑɑ, ɩlɛ pǝ tɑɣɑ pǝ tǝnɑ pǝ tɑɑ kɛ́ ɩ́ kɑ́ wɑɑ. Mɑ pǝsǝɣɩ mɑ́ yɔɣɔtɩ sɩ mɑ wɛnɑ mpɑɑ sɩ mɑ́ lɑ pǝ tǝnɑ yɑɑ. Amɑ mɑ kɑɑ yele kɛ́ sɩ pʋlʋpʋ ɩ́ pǝsɩ-m pǝ yom. 
\v 13 Mɛ ɩ́ tɔŋ sɩ hiluɣu tɔɔ kɛ́ pǝ lǝsɑ kʋtɔɣɔʋ nɑ kʋtɔɣɔʋ tɔɔ kɛ́ pǝ tʋ hiluɣu. Mm, pǝ wɛ mpʋ mɛɛ. Pɑɑ nɑ mpʋ Ɩsɔ kɑ́ wɑkǝlɩ pǝ tɔm nɑɑlɛ ɩnɩ. Pǝ tɑ lɑ yʋlʋ tɔnʋɣʋ kɛ ɑsilimɑ lɑpʋ tɔɔ, ɑmɑ Tɑcɑɑ tɔɔ kɛ́. Nɑ tɔnʋɣʋ ŋkʋ kʋ tɔɔ kɛ́ Tɑcɑɑ wɛɛ. 
\v 14 Nɑ ɩsɩɩ Ɩsɔ feesuɣu Tɑcɑɑ tɔ, ɩ kɑ́ tɛ nɑ ɩ́ feesi tɑɣɑ mpʋ tɔtɔ nɑ ɩ tomɑ tɑɑ.
\p
\v 15 Anɩ ɩ́ nyǝmɑ́ sɩ mǝ tɔnǝŋ kɛ́ Kilisiti tɔnʋɣʋ hɔɣɔlǝŋ kɛ́. Mɑ wɛʋ ɩsǝntɔ tɔ pǝ nǝɣǝsǝnɑ mɑ́ kpɑɣɑ Kilisiti tɔnʋɣʋ tɔɔ pʋlʋ nɑ mɑ́ kpǝtǝnɑ ɑpɑlɑɑ tǝnɑ ɑlʋ nɑ? Pǝlɛ pǝ kɑɑ lɑ pɑɑ pǝcɔ. 
\v 16 Yɑɑ ɩ́ tɑ́ nyɩ sɩ yʋlʋ ɩ́ sʋʋnɑ ɑpɑlɑɑ tǝnɑ ɑlʋ, ɩ́ nɑ-ɩ pɑ kpɛntɑ tɔnʋɣʋ kʋlʋmʋɣʋ? Pɑ ŋmɑɑwɑ Ɩsɔ Tɔm tɑɑ sɩ: Pɑ nɑɑlɛ pɑ pǝsɑ tɔnʋɣʋ kʋlʋmʋɣʋ kɛ́. 
\v 17 Amɑ wei nɑ Tɑcɑɑ pɑ kpɛntɑɑ tɔ pɑ pǝsɑ kʋlʋm kɛ pɑ lǝmɑɣɑsɛɛ tɑɑ kɛ́.
\p
\v 18 Ɩ́ tɑɑ kpǝtǝnɑ ɑsilimɑ. Ɩsɑɣɑtʋnɑɑ mpɑ pǝ kɑɑsɑɑ nɑ yʋlʋ lɑkɩ tɔ tɩɩ tokiɣinɑ ɩ tɔnʋɣʋ. Amɑ yʋlʋ wei ɩ hɑ ɩ tǝɣɩ ɑsilimɑ lɑpʋ tɑɑ tɔ ɩ mɑɣɑmɑɣɑ ɩ tɔnʋɣʋ kɛ ɩ lɑkɩ ɩsɑɣɑtʋ. 
\v 19 Ɩ́ tɑ nyɩ sɩ mǝ tɔnǝŋ wɛ ɩsɩɩ Feesuɣu Nɑŋŋtʋ tǝcɑɣɑlɛ yɛɛ? Feesuɣu Nɑŋŋtʋ wei Ɩsɔ hɑ-mɛ nɑ ɩ́ wɛ mǝ tɑɑ tɔɣɔ mɑ tɔŋ. Ɩ́ tɑ́ tɩ mǝ tɩ se. 
\v 20 Ɩsɔ yɑpɑ-mɛɣɛ hɑlǝnɑ ɩ́ fɛlɩ. Mpʋ tɔ, ɩ́ lɑnɑ mǝ tɔnǝŋ kɛ mpi pǝ hʋ́lǝ́ɣɩ́ Ɩsɔ teeli tɔ.
\c 7
\s1 Akpɑɣɑlɛ tɔɔ kʋpɔɔsʋtʋ
\p
\v 1 Pǝnɛntɛ tǝ́ pɑɑsǝnɑ tɔm nti ɩ́ kɑ pɔɔsɑ-m mǝ tɑkǝlɑɣɑ tɑɑ tɔ ɩlɛ. Pǝ kǝlɑ teu sɩ yʋlʋ ɩ́ tɑɑ kpɑɣɑ ɑlʋ yɑɑ. 
\v 2 Amɑ ɑsilimɑ wenɑ ɑ tɔɔ sɔsɔm kɛ kɑtɑtǝlɑɣɑ tɔ ɑ tɔɔ, pǝ nǝɣǝsǝnɑ sɩ pɑɑ ɑpɑlʋ wei ɩ́ wɛɛnɑ ɩ ɑlʋ, nɑ pɑɑ ɑlʋ wei ɩ́ wɛɛnɑ ɩ pɑɑlʋ kɛ́ mpʋ tɔtɔ. 
\v 3 Apɑlʋ ɩ́ lɑ ɩ ɑlʋ kɛ ɩsǝnɑ pǝ nǝɣǝsǝnɑ ɑpɑlʋ kɑ́ lɑ ɩ ɑlʋ tɔ, nɑ ɑlʋ nɑ́ɑ́ lɑ ɩ pɑɑlʋ kɛ́ ɩsǝnɑ pǝ nǝɣǝsǝnɑ ɑlʋ kɑ́ lɑ ɩ pɑɑlʋ tɔ. 
\v 4 Pǝ fɛɩ ɩsɩɩ ɑlʋ kɑ́ lɑnɑ ɩ tǝɣɩ ɩsǝnɑ ɩ sɔɔlɑɑ tɔ. Ɩ pɑɑlʋ tǝnnɑ-ɩ, ɩ niŋ nɑ ɩ nɔɔhɛɛ. Nɑ mpʋ tɔtɔɣɔ nɑ ɑpɑlʋ, pǝ fɛɩ sɩ ɩ kɑ́ lɑnɑ ɩ tǝɣɩ ɩsǝnɑ ɩ sɔɔlɑɑ tɔ, ɩ ɑlʋ tǝnnɑ-ɩ, ɩ niŋ nɑ ɩ nɔɔhɛɛ. 
\v 5 Ɩ́ tɑɑ pɛ tǝmɑ, ye pǝ tɑɣɑ ɩsɩɩ mǝ tǝnɑ ɩ́ lɑpɑ nɔɣɔ kʋlʋmɑɣɑ nɑ ɩ́ tisi tǝmɑ sɩ: Tǝ́ yele ḿpʋ́ɣʋ́ wɛɛ nɑɑlɛ nɑ tǝ́ pɑɑsǝnɑ Ɩsɔ sǝlǝmʋɣʋ. Amɑ pǝlɛ pǝ wɑɑlɩ, ɩ́ mǝlɩ nɑ ɩ́ kpɛntɩ nɑŋ. Ye ɩ́ tɑ kpɛntɩ nɑŋ kɛ lɔŋ kɛ mpʋ ɩ́ kɑ́ kɔɔ nɑ ɩ́ kpisi tɔnǝŋ nɑ ɩ́ hoti Sɑtɑnɩ mɑɣɑsǝŋ tɑɑ.
\p
\v 6 Nti mɑ yɔɣɔtɑ ɩsǝntɔ tɔ pǝ tɑɣɑ kʋcɑɑlʋɣʋ tɔm, ɑmɑ ɑyɛɛnɛɛ kɛ́. 
\v 7 Tɑmpɑnɑ tɔɔ, mɑ nyɩɩlɑɑ ɩsɩɩ pɑɑ yʋlʋ wei ɩ́ wɛɛ ɩsɩɩ mɑ wɛʋ ɩsǝntɔ tɔ. Amɑ pɑɑ wei nɑ ɩ Ɩsɔ hɑtɛ kɛ́. Pǝ hɑɑ ɩnɛɣɛ pǝnɛɣɛ, nɑ pǝ́ hɑ ɩnɛɣɛ pǝnɛ.
\p
\v 8 Tɔm nti tǝ wɛɛ sɩ mɑ́ heeli ɑtɑmɛɛ nɑ ɑlɑɑ leelɑɑ tɔɣɔlɛ sɩ, ye pɑ tɔkɑ pɑ ɩtɑntʋ ɩsɩɩ mɑ tɔkʋɣʋ mɑ nyǝntʋ tɔ pɩɩ kǝlɩ-wɛɣɛ sɛɛʋ. 
\v 9 Amɑ ye ɩ́ kɑɑ pǝsɩ tɔnǝŋ tɔkʋɣʋ, ɩlɛ ɑpɑlɑɑ nɑ́ɑ́ kpɑɣɑ ɑlɑɑ, nɑ leelɑɑ nɑ́ɑ́ sɑɑ ɑpɑlɑɑ. Pǝ kǝlɑ teu sɩ ɑpɑlʋ ɩ́ kpɑɣɑ ɑlʋ, nɑ ɑlʋ nɑ́ɑ́ sɑɑ, nɑ mpi yʋlʋ kɑ́ cɑɣɑ nɑ kɔtɔɩ kʋɣɩ-ɩ tɔ.
\p
\v 10 Nti mɑ heeliɣi mpɑ pɑ tɛmɑ tǝmɑɣɑ kpɑɣɑʋ tɔɣɔlɛ sɩ: Alʋ ɩ́ tɛmɑ sɑɑʋ pǝ fɛɩ sɩ ɩ́ kisi ɩ pɑɑlʋ. Tɑcɑɑ tɩɩ yɔɣɔtǝnɑ-tɩ. 
\v 11 Nɑ ɩ́ kisɑ-ɩ kɔlɔ, ɩ́ cɑɣɑ mpʋ, ɩ́ tɑɑ sɑɑ kʋfɑlʋ. Ye ɩ kɑ́ mǝlɩ kʋpǝŋ ɩ́ mǝlɩ-ɩ. Apɑlʋ nɑ́ fɛɩnɑ mpɑɑʋ sɩ ɩ́ tɔɣɔnɩ ɩ ɑlʋ.
\p
\v 12 Mpɑ pǝ kɑɑsɑɑ tɔ, mɑ heeliɣi pɛlɛ sɩ, ye ɑpɑlʋ ɩ́ kɛ́ Ɩsɔ sɛɛlʋ nɑ ɩ ɑlʋ kɛ́ mɑ tɑ nyɩ Ɩsɔ, pǝyele ɑlʋ ɩnɩ ɩ luɣu wɛɛ sɩ ɩ́ nɑ-ɩ pɑ́ cɑɣɑ, ɑpɑlʋ ɩ́ tɑɑ tɔ sɩ ɩ kisiɣi-ɩ. 
\v 13 Mpʋ tɔtɔɣɔ ɑlʋ ɩ́ kɛ́ Ɩsɔ sɛɛlʋ nɑ ɩ pɑɑlʋ nɑ́ɑ́ kɛ́ mɑ tɑ nyɩ Ɩsɔ, pǝyele ɑpɑlʋ ɩnɩ ɩ luɣu wɛɛ sɩ ɩ́ nɑ-ɩ pɑ́ cɑɣɑ, ɑlʋ ɩ́ tɑɑ tɔ sɩ ɩ kisiɣi-ɩ. Mɑ mɑɣɑmɑɣɑ mɑ yɔɣɔtǝnɑ tǝlɛ, tǝ tɑ lɩɩnɑ Tɑcɑɑ kiŋ. 
\v 14 Ɩsɔ tɑ́ kisi ɑpɑlʋ wei ɩ tɑ kɛ Ɩsɔ sɛɛlʋ tɔɣɔ ɩ́ nɑ ɩ ɑlʋ Ɩsɔ sɛɛlʋ pɑ cɑɣɑlɛ tɔɔ, pǝ́cɔ́ ɩ tɑ kisi ɑlʋ wei ɩ tɑ kɛ Ɩsɔ sɛɛlʋ tɔɣɔ ɩ́ nɑ ɩ pɑɑlʋ Ɩsɔ sɛɛlʋ pɑ cɑɣɑlɛ tɔɔ. Ye pǝ tɑɣɑ mpʋ pǝ tɔɔ pɑ piyɑ kɑ́ wɛɛ ɩsɩɩ mɑ tɑ nyɩ ɩsɔnɑɑ, pǝyele sɩ kɛ́ ɩsɔ nyǝnsɩ kɛ́. 
\v 15 Amɑ ye wei ɩ tɑ kɛ Ɩsɔ sɛɛlʋ tɔ ɩ́lɛ́ ɩ cɑɑnɑ fɑɣɑʋ, wɑɑtʋ ɩnɩ pɑ tɑɑ wei ɩ kɛ́ Ɩsɔ sɛɛlʋ tɔ ɩ wɛnɑ mpɑɑʋ sɩ ɩ́ yele nɑ pɑ́ fɑɣɑ. Pǝ tɑɣɑ pʋlʋ tɔɔ, Ɩsɔ yɑɑ-mɛɣɛ sɩ ɩ́ cɑɣɑ tǝmɑ kiŋ nɑ leleŋ. 
\v 16 Alʋ Ɩsɔ sɛɛlʋ nyɑ́ n nɑnɑ-we sɩ nyɑɑ tɛnɑ nɑ ń yɑ nyɑ́ pɑɑlʋ nyʋɣʋ? Nɑ ɑpɑlʋ Ɩsɔ sɛɛlʋ nyɑ́ n nɑnɑ-we sɩ nyɑɑ tɛnɑ nɑ ń yɑ nyɑ́ ɑlʋ nyʋɣʋ?
\s1 Ɩsɔ ɩ́ yɑɑ-ŋ nɑ ń wɛ ɩsǝnɑ cɑɣɑ mpʋ
\p
\v 17 Amɑ nti tɔɣɔlɛ sɩ Tɑcɑɑ ɩ́ hɑ-ŋ mpi nɑ́ɑ́ tǝŋ pǝlɛ. Nɑ ye Ɩsɔ yɑɑ-ŋ ɩ mpɑɑʋ tɑɑ nɑ ń wɛ ɩsǝnɑ nɑ́ɑ́ cɑɣɑ mpʋ. Sɛɣɛsʋɣʋ ŋku mɑ sɛɣɛsǝɣɩ Yesu sɛɛlɑɑ kpekɑ tǝnɑ sɩ ɑ́ tǝŋ tɔɣɔlɛ. 
\v 18 Ye Ɩsɔ yɑɑ wei kɛ́ ɩ mpɑɑʋ tɑɑ nɑ ɩ́ tɛmɑ pɛlʋɣʋ, pʋntʋ ɩ́ cɑɣɑ mpʋ, ɩ́ tɑɑ hʋʋ sɩ ɩ mǝlǝɣɩ ɩsɩɩ ɩ tɑɑ pɛlɩ. Nɑ Ɩsɔ ɩ́ yɑɑ wei kɛ́ ɩ mpɑɑʋ tɑɑ nɑ ɩ́ tɑ́ pɛlɩ, pʋntʋ ɩ́ tɑɑ pɛɛkɩ sɩ ɩ pɛlǝɣɩ. 
\v 19 Pɑɑ n pɛlɑɑ, pɑɑ n tɑ pɛlɩ, tǝlɛ tǝ wɛ yem kɛ́. Amɑ Ɩsɔ kʋheelitu tɔkʋɣʋ ntɛ́ sɔsɔɔntʋ. 
\v 20 Pɑɑ wei ɩ́ wɛɛ ɩsǝnɑ ɩ kɑ wɛɛ nɑ pǝ́cɔ́ Ɩsɔ yɑɑkɩ-ɩ ɩ mpɑɑʋ tɑɑ tɔ. 
\v 21 Ye n kɑ kɛ́ yom kɛ́ nɑ Ɩsɔ yɑɑ-ŋ ɩ mpɑɑʋ tɑɑ, tɑɑ nǝɣǝsɩ sɩ n pǝsǝɣɩ kɑsɑɣɑmpu. Amɑ ye pǝ kɔmɑ sɩ ń lɩɩ nyɑ́ yomle tɑɑ, ɩlɛ tɑɑ kisi. 
\v 22 Pǝ tɑɣɑ pʋlʋ tɔɔ, ye Tɑcɑɑ yɑɑ yom kɛ ɩ mpɑɑʋ tɑɑ, pʋntʋ pǝsɑ Tɑcɑɑ kɑsɑɣɑmpu kɛ́. Ḿpʋ́ɣʋ́ pǝ wɛɛ tɔtɔ, ye Kilisiti ɩ́ yɑɑ kɑsɑɣɑmpu, pʋntʋ pǝsɑ ɩ yom kɛ́. 
\v 23 Ɩsɔ yɑpɑ-mɛɣɛ hɑlǝnɑ ɩ́ fɛlɩ, ɩlɛ ɩ́ tɑɑ pǝsɩ mǝ tǝɣɩ yǝlɑɑ yomɑɑ. 
\v 24 Mɑ tɑɑpɑlɑɑ, pɑɑ wei ɩ́ cɑɣɑ Ɩsɔ sɛɛʋ tɑɑ ɩsɩɩ ɩsǝnɑ ɩ kɑ wɛɛ nɑ pǝ́cɔ́ Ɩsɔ yɑɑ-ɩ ɩ mpɑɑʋ tɑɑ tɔ.
\s1 Atɑmɛɛ nɑ leelɑɑ pɑ tɔm
\p
\v 25 Ye ɑpɑlɑɑ mpɑ pɑ tɑ kpɑɣɑtɑ ɑlɑɑ, nɑ ɑlɑɑ mpɑ pɑ tɑ sɑɑtɑ tɔ. Tɑcɑɑ tɑ heeli-m pɑ tɔm sɩ pʋlʋ. Amɑ Tɑcɑɑ pɛɛlɛɛ tɔɔ mɑ nǝɣǝsǝnɑ yʋlʋ wei ɩ́ yɔɣɔtɑ nti pɑ́ mʋ-tɩ tɔɣɔ. Pǝ tɔɔ kɛ́ mɑ heeliɣi-mɛɣɛ nti mɑ mɑɣɑmɑɣɑ mɑ hʋʋkɩ tɔ.
\p
\v 26 Kɑɣɑnɑ wɑhɑlɑnɑɑ pɑnɛ pɑ tɔɔ ɩlɛ, mɑ hʋʋkɩ sɩ pǝ kǝlɑ teu sɩ yʋlʋ ɩ́ cɑɣɑ mpʋ. 
\v 27 Ye n wɛnɑ ɑlʋ, tɑɑ lʋ sɩ n kisiɣi-ɩ, nɑ ń tɩɩ fɛɩnɑ tɑɑ pɛɛkɩ sɩ ń kpɑɣɑ. 
\v 28 Pɑɑ nɑ mpʋ, ye n tɩɩ kpɑɣɑ ɑlʋ, nɑ ye pɛɛlɔ sɑɑnɑ, ɩ tɑ lɑ ɩsɑɣɑtʋ tɔtɔ. Amɑ ɑpɑlɑɑ mpɑ pɑ kpɑkǝɣɩ ɑlɑɑ nɑ ɑlɑɑ mpɑ pɑ sɑɑkɩ tɔ, pɑɑ ɩfemle nte pɑ nɑɑkɩ wɑhɑlɑ kɛ́. Wɑhɑlɑ ɩnǝɣɩ mɑ cɑɑ mɑ kɛɛlɩ mǝ nyɔɔŋ tɔɔ.
\p
\v 29 Mɑ tɑɑpɑlɑɑ, nti mɑ yɔɣɔtǝɣɩ tɔɣɔlɛ sɩ wʋlɛ pɩɩwɑɣɑ. Pǝ tɔɔ tɔ, pǝ kpɑɣɑʋ sɑŋɑ wɑɑlɩ tɔ, mpɑ pɑ wɛnɑ ɑlɑɑ tɔ pɑ́ lɑ ɩsɩɩ pɑ fɛɩnɑ, 
\v 30 nɑ mpɑ pɛlɛ pɑ wiliɣi tɔ pɑ́ lɑ ɩsɩɩ pɑ fɛɩnɑ lɑŋwɑkǝllɛ. Mpɑ pɑ yɑkɩ tɔ pǝ́ lɑ-wɛ ɩsɩɩ pǝ tɑɣɑ mpɛ pɑ tǝnnɑ pɑ kʋyɑpǝm mpɩ. 
\v 31 Mpɑ pɑ tɔkǝnɑ ɑntulinyɑ ɩnɛ tɔ pɑ́ lɑ ɩsɩɩ mpɑ pɑɑ tɔkǝnɑ-ɩ tɔ. Pǝ tɑɣɑ pʋlʋ tɔɔ, wɛɛtʋ nti tǝ tɑɑ ɑntulinyɑ ɩnɛ ɩ wɛɛ tɔ ɩ kɑɑ tɑsɑ tɑɑŋʋɣʋ se.
\p
\v 32 Mpi mɑ nyɩɩlǝɣɩ tɔɣɔlɛ sɩ ɩ́ lɩɩ nǝɣǝsɛɛ tɔm tɑɑ tǝkpɑtɑɑ. Apɑlʋ wei ɩ tɑ kpɑɣɑ ɑlʋ tɔ Tɑcɑɑ tǝmlɛ kɛ ɩ sɔkǝnɑ nyʋɣʋ, nɑ ɩ́ lʋkɩ sɩ Tɑcɑɑ luɣu ɩ́ lɑpɩ-ɩ. 
\v 33 Amɑ wei ɩ kpɑɣɑ ɑlʋ tɔ ɑtɛ cǝnɛ nyǝm kɛ ɩ sɔkǝnɑ nyʋɣʋ, nɑ ɩ́ lʋkɩ sɩ ɩ ɑlʋ luɣu ɩ́ lɑpɩ-ɩ. 
\v 34 Mpʋ ɩnɩ pǝ tʋ-ɩ hɛkʋ kɛ́. Mpʋ tɔtɔɣɔ nɑ ɑlʋ yɑɑ pɛɛlɔ wei ɩ tɑ sɑɑ tɔ. Tɑcɑɑ tǝmlɛ kɛ pɑ sɔpǝnɑ nyʋɣʋ. Pǝ tɑɣɑ pʋlʋ, pɑ cɑɑ kɛ́ sɩ Tɑcɑɑ ɩ́ tɩ pɑ tɔnǝŋ nɑ pɑ lǝsɑsɩ. Amɑ ɑlʋ wei ɩ lɑɑlɑɑ nɑ ɩ́ sɑɑ tɔ ɑtɛ cǝnɛ nyǝm kɛ ɩ sɔkǝnɑ nyʋɣʋ, nɑ ɩ́ pɛɛkǝɣɩ sɩ ɩ pɑɑlʋ luɣu ɩ́ lɑpɩ-ɩ.
\p
\v 35 Mɑ yɔɣɔtǝɣɩ ḿpʋ́ɣʋ́ sɩ pǝ́ sǝnɑ-mɛ, pǝ tɑɣɑ ɩsɩɩ kɑtɔkɑ kɛ mɑ tʋɣɩ-mɛ. Amɑ mɑ cɑɑ kɛ́ sɩ mɑ́ tusi-mɛɣɛ mpi pǝ wɛ teu tɔ pǝ tɑɑ nɑ ɩ́ kpɛntǝnɑ Tɑcɑɑ kɛ teu nɑ ɩ́ tɔ ɩsɩɩ pǝ mʋnɑɑ tɔ.
\p
\v 36 Tɔʋ, pǝnɛntɛ tǝ́ pɑɑsǝnɑ yʋlʋ wei ɩ luɣu fɛɩ sɩ ɩ pɛɛlɔ ɩ́ sɑɑ tɔ pǝ tɔm ɩlɛ. Ye ɩ kɔmɑ nɑ ɩ́ nɑ́ sɩ pǝ fɛɩ teu sɩ ɩ́ yele ɩ pɛɛlɔ nɑ ɩ́ tɛɛ pǝ tɑɑ, ɩ́ lɑ ɩsɩɩ ɩ luɣu wɛɛ tɔ. Ɩ́ yele-ɩ nɑ ɩ́ sɑɑ, ɩ tɑ lɑ ɩsɑɣɑtʋ. 
\v 37 Amɑ ye ɩnɩ ɩ nɔkǝnɑ nɑ ɩ́ tɛmɑ ɩ tɑɑ tǝkpɑtɑɑ sɩ ɩ pɛɛlɔ ɩ́ cɑɣɑ mpʋ, nɑ pǝ tɑ́ kɛ́ nɔɣɔlʋ kisinɑnɑ-ɩ kʋkisu, ɩnɩ ɩ tɔkǝnɑ tɔnʋɣʋ nɑ ɩ́ kisinɑ ɩ luɣu kɛ mpʋ, ɩ pɛɛlɔ ɩnɩ ɩ́ tɑ sɑɑ pǝ wɛ teu. 
\v 38 Mpʋ tɔ, wei ɩ́ yelɑɑ nɑ ɩ pɛɛlɔ sɑɑ ɩ tɑ lɑ tɑɑlɩ. Amɑ wei ɩ́ tɑ yele nɑ ɩ́ sɑɑ pǝlɛ pǝ kǝlɑ teu.
\p
\v 39 Alʋ pɑɑlʋ ɩ́ wɛnɑ ɩ weesuɣu, ɩ ɑlʋ ɩnɩ ɩ fɛɩnɑ mpɑɑʋ sɩ ɩ́ kʋlɩ-ɩ. Amɑ ye ɩ pɑɑlʋ sǝpɑ, pǝ hɑ-ɩ mpɑɑʋ kɛ́, ɩ luɣu ɩ́ wɛ wei, ɩ sɑɑ. Ɩlɛ kʋlʋmtʋ kɛ́, pɩɩ wɛɛ Ɩsɔ sɛɛlʋ kɛ́. 
\v 40 Pɑɑ nɑ mpʋ mɑ hʋʋ sɩ ye ɩ cɑɣɑɑ ɩsɩɩ ɩ wɛɛ tɔ ɩ kɑ́ kǝlɩ leleŋ nɩɩʋ. Mɑ nyǝmɑ́ sɩ mɑ hʋwɛɛ ɑnɛ ɑ lɩɩnɑ Feesuɣu Nɑŋŋtʋ kiŋ.
\c 8
\s1 Nɑntʋ kʋlɑlɑɑtʋ tɔm
\p
\v 1 Pǝnɛntɛ tǝ́ pɑɑsǝnɑ nɑntʋ kʋlɑlɑɑtʋ tɔm ɩlɛ.
\p Tǝ nyǝmɑ́ sɩ tɑ́ tǝnɑ tǝ wɛnɑ pǝ nyǝm mɛɛ. Nɑ tǝ nyǝmɑ́ tǝ nyǝmɑ́ ɩnɩ ɩ yekinɑ nɑ yʋlʋ hɔŋ ɩ tɩ. Amɑ sɔɔlʋɣʋ nɑ́ lɑkɩ nɑ tǝ́ nyɔɔ toŋ. 
\v 2 Ye nɔɣɔlʋ hʋʋ sɩ ɩ nyǝmɑ́ pʋlʋpʋ, ɩ tɑ cɛkǝntɑ-wɩ ɩsɩɩ pǝ wɛ tǝkpɑtɑɑ sɩ ɩ́ cɛkǝnɑ-wɩ tɔ. 
\v 3 Wei ɩlɛ ɩ sɔɔlǝɣɩ Ɩsɔ, Ɩsɔ nɑ́ nyǝmɑ́ pʋntʋ tɔɔ kɛ́.
\p
\v 4 Nti ɩ́ kɑ pɔɔsɑɑ tɔɣɔlɛ sɩ, ye pɑ lɑɑwɑ, yʋlʋ kɑ́ tɔɣɔ yɑɑ ɩ kɑɑ tɔɣɔ? Tǝ nyǝmɑ́ teu sɩ tɩɩŋ nɑ́ nɑɑ ɩsɛntɔɔ kɛ́ yem kɛ́. Amɑ Ɩsɔ tike koŋ wɛnnɑ. 
\v 5 Ɩsɔtɑɑ nyǝm pɑɣɑlɛ nɑ ɑtɛ nyǝm pɑɣɑlɛ kɛ yǝlɑɑ yɑɑ pɑ ɩsɔnɑɑ. Pɑɑ yɑɑ mpʋ sɩ ɩsɔnɑɑ nɑ mpɑ pɑ nyǝnǝɣɩ sɩ pɑ tɩ-wɛ tɔ pɑ wɛ pɑɣɑlɛ. 
\v 6 Amɑ tɑ́ kiŋ ɩlɛ, Ɩsɔ wɛ kʋlʋm tǝkoŋ kɛ́. Ɩnǝɣǝlɛ Tɑcɑɑ wei ɩ lɑpɑ pǝ tǝnɑ tɔ, nɑ ɩ tɔɔ kɛ́ tǝ wɛnɑ weesiŋ. Nɑ Tɑcɑɑ kɛlɛ kʋlʋm, ɩnǝɣǝlɛ Yesu Kilisiti wei ɩ yelɑɑ nɑ pǝ tǝnɑ pǝ wɛɛ, nɑ wei ɩ tɔɔ tǝ wɛnɑ weesiŋ tɔ.
\p
\v 7 Amɑ yǝlɑɑ tǝnɑ tɑ nyɩ mpʋ. Lɛlɑɑ wɛɛ nɑ pǝ́ tɛɛnɑ-wɛɣɛ tɩɩŋ tɔm tɑɑ, nɑ ye hɑlǝnɑ sɑŋɑ pɑ tɔŋnɑ nɑntʋ kʋlɑlɑɑtʋ tɔɣɔʋ, pǝ wɛ ɩsɩɩ tɩɩŋ kɛ pɑ tǝŋǝɣɩ. Pɑ nyǝm wɛ tǝtɑntǝlɑɑ, ɩlɛnɑ pɑ́ mǝlǝɣɩ nɑʋ sɩ kʋtɔɣɔʋ ŋkʋ kʋ wɑkǝlǝɣɩ-wɛɣɛ. 
\v 8 Pǝ tɑɣɑ kʋtɔɣɔʋ yekinɑ nɑ tǝ́ kpǝtǝnɑ Ɩsɔ kiŋ. Pɑɑ tǝ tɑ tɔɣɔ pǝ tɑɣɑ pǝ pɑsǝɣɩ-tʋɣʋ pʋlʋ, pɑɑ tǝ tɔɣɑɑ pǝ tɑɣɑ pǝ sɔɔsǝɣɩ-tʋɣʋ pʋlʋ.
\p
\v 9 Pɑɑ nɑ mpʋ mɛ mpɑ mpɑɑʋ wɛɛ fɑɑ sɩ ɩ́ lɑkɩ mpi ɩ́ lɑ́ tɔ, ɩ́ lɑ lɑɑkɑlɩ, pǝ tɑɑ kɔɔ nɑ ɩ́ hu Ɩsɔ sɛɛʋ tɑɑ ɑcɑmɑɑ. 
\v 10 Ye nɔɣɔlʋɣʋ yem nɑwɑ nyɑ́ wei sɩ n nyǝmɑ́ tɔ nɑ ń cɑɣɑ tʋɣʋ tɛɛ nɑ ń tɔŋnɑ tɔɣɔʋ, ɩcɑm ɩnɩ ɩ lɑɑkɑlɩ kɑɑ polo ɩsɩɩ ɩ́ tɔɣɔ nɑntʋ kʋlɑlɑɑtʋ ntɩ? 
\v 11 Wɑɑtʋ ɩnɩ nyɑ́ nyǝm mpɩ pǝ lɑpɑ nɑ nyɑ́ tɔɣɔntǝlɛ ɩcɑm wei ɩ tɔɔ Kilisiti sǝpɑ tɔ ɩ́ lɑ yem kɛlɛ. 
\v 12 Ye ɩ́ pǝntǝɣǝnɑ mǝ tɔɣɔntǝlɛnɑɑ nɑ ɩ́ kpɛsǝɣɩ pɑ lɑɑkɑlǝnɑɑ mpɑ pɑ wɛ tǝtɑntǝlɑɑ kɛ́ mpʋ tɔ, Kilisiti kɛ ɩ́ pǝntǝɣǝnɑ. 
\v 13 Pǝ tɔɔ kɛ́ ye mɑ tɔkɩ mpi nɑ pɩɩ hu mɑ tɔɣɔntǝlɛ, mɑ kɑɑ tɔɣɔ. Pɑɑ pǝcɔ mɑɣɑmɑɣɑ mɑ kɑɑ tɩɩ tɔɣɔ nɑntʋ. Pǝ́ tɑɑ kɔɔ nɑ mɑ́ hu mɑ tɔɣɔntǝlɛ.
\c 9
\s1 Tillu tǝmɑ tɔm
\p
\v 1 Mɑ fɛɩnɑ mpɑɑʋ sɩ ye mɑ lɑkɩ mpi mɑ lɑ? Mɑ tɑ kɛ tillu? Mɑ tɑ nɑ Tɑcɑɑ Yesu? Pǝ tɑɣɑ mǝ kɛnɑ mɑ lɑpɑ Tɑcɑɑ tǝmlɛ nɑ pǝ́ lɩɩ mpi tɔ? 
\v 2 Ye lɛlɑɑ ɩɩ nyǝnǝɣɩ-m tillu pǝ kpɛnnɑ-mɛ? Mpi tɔ, ɩsɩɩ mǝ nɑ Tɑcɑɑ ɩ́ kpɛntʋɣʋ tɔ pǝ hʋ́lǝ́ɣɩ́ tǝkelekele kɛ́ sɩ mɑ kɛ́ tillu.
\p
\v 3 Ḿpʋ́ɣʋ́ mɑ cɔɔkɩ mpɑ pɑ kotiɣinɑ-m pɑɑ timpi nɑ pɑ́ tɔŋ sɩ mɑ tɑ kɛ pʋlʋ tɔ. 
\v 4 Ye pɑ fɛlǝɣɩ-m kʋtɔɣɔʋ nɑ kʋnyɔnyɔɔm kɛ mɑ tǝmlɛ tɔɔ mɑ yʋwɑ? 
\v 5 Ye mɑ tǝŋsɑ ɑlʋ Ɩsɔ sɛɛlʋ nɔɣɔlʋɣʋ mɑ wɑɑlɩ nɑ tǝ́ cɔɔkɩ ɩsɩɩ tillɑɑ lɛlɑɑ nɑ Tɑcɑɑ newɑɑ nɑ Piyɛɛ pɑ lɑkʋɣʋ tɔ mɑ yʋwɑ? 
\v 6 Yɑɑ mɑ nɑ Pɑɑnɑpɑsɩ tɑ́ tike kɛ pǝ wɛɛ sɩ tǝ́ lɑnɑ tɑ́ niŋ nɑ tǝ́ tɔɣɔnɑ tɑ́ nɔɣɔ? 
\v 7 Yóólú wei ɩ puki yoou nɑ ɩ́ tɔɔkɩ ɩ tɩ? Nɑ ɑwe sɔɔkɩ lɛsɛŋ tʋɣʋ nɑ ɩ́ kɑɑ tɔɣɔ kʋ pee? Nɑ ɑwe tiikiɣi kɑlǝkʋ nɑ ɩ́ kɑɑ nyɑɑsɩ nɑɑlǝm?
\p
\v 8 Nti mɑ tɔŋ tɔ, yǝlɑɑ yɔɣɔtǝɣǝnɑ-tǝɣɩ kʋyɔɣɔtʋ, kʋsǝsɩɩtʋ tɑɑ pǝ fɛɩ mpʋ? 
\v 9 Moisi kʋsǝsɩɩtʋ tɑɑ pɑ ŋmɑɑwɑ sɩ: N kɑɑ hɔkɔ nɑʋ wei n mɑkǝnɑ nyɑ́ mǝlɑ tɔ ɩ nɔɣɔ. Nɑɑŋ tɔɔ tike kɛ Ɩsɔ sɔɣɔmǝɣǝnɑ? 
\v 10 Pǝ tɑɣɑ tɑ́ mɑɣɑmɑɣɑ tɑ́ nyʋɣʋ tɔɔ kɛ́ ɩ yɔɣɔtɑ mpʋ? Tɑ́ mɑɣɑmɑɣɑ tɑ́ nyʋɣʋ tɔɔ tǝkpem kɛ́ pɑ ŋmɑɑwɑ sɩ: Wei ɩ́ hɑlǝɣɩ ɩ́ hɑlǝnɑ tɛɛlʋɣʋ, nɑ wei ɩ́ kʋŋ ɩ́ kʋnɑ tɛɛlʋɣʋ, sɩ ɩ kɑ́ hiki ɩ pɑɑ nyǝm. 
\v 11 Ye tǝ tuuwɑ Ɩsɔ nyǝm kɛ mǝ hɛkʋ nɑ kɑɣɑnɑ tǝ́ hiki mpi pɩɩ wɑɑsɩ tɑ́ tɔnǝŋ tɔɣɔ mǝ kiŋ tǝ yʋwɑ? 
\v 12 Lɛlɑɑ tɑ kisi mpɑɑʋ kɛ hikuɣu sɩ pɑ́ hikiɣi-wɩ, kɑcɑŋfɑnɑ tɑ́ nɑ?
\p Pɑɑ nɑ mpʋ tɑ́ tɑ́ nyǝnnɑ tǝnɑ. Amɑ tǝ tɔɣɑ pǝ tǝnɑ pǝ kʋnyɔŋ sɩ tǝ tɑɑ kɔɔ tǝ wɑkǝlɩ Kilisiti tɔɔ Lɑɑpɑɑlɩ kʋpɑŋ tǝmlɛ. 
\v 13 Anɩ ɩ́ nyǝmɑ́ teu sɩ mpɑ pɑ lɑkɩ tǝmɑ kɛ Ɩsɔ tǝsɛɛlɛ tɑɑ tɔ Ɩsɔ tǝsɛɛlɛ cɑlǝsǝɣǝnɑ-wɛ. Nɑ mpɑ pɑ lɑkɩ kɔtɑsɩ kɛ kɔtɑɣɑ tǝlɑtɛ tɔɔ tɔ pɑ hikiɣi pɑ pɑɑ nyǝm kɛ kɔtɑsɩ nsɩ sɩ tɑɑ kɛ́. 
\v 14 Ḿpʋ́ɣʋ́ pǝ wɛɛ. Mpɑ pɑ kpɑɑlǝɣɩ Lɑɑpɑɑlɩ Kʋpɑŋ tɔ Tɑcɑɑ hɑ-wɛɣɛ nɔɣɔ sɩ pɑ́ tɔɣɔnɑ kɔtɑsɩ nsǝɣɩ.
\p
\v 15 Amɑ mɑ́, mɑ tɑ lɑ tǝnɛ ɩnɩ tǝ tɑɑ nɑtǝlɩ, nɑ mɑ ŋmɑɑʋ ɩsǝntɔ tɔ, pǝ tɑɣɑ sɩ mɑ pɔɔsǝɣɩ sɩ mɑ́ hiki se. Sɑnɑ sǝm nɑ mpʋ ɩnɩ pǝ lɑpʋ. Nɔɣɔlʋ kɑɑ wɑkǝlɩ mpi mɑ yɔɔlǝɣǝnɑ mpʋ tɔ. 
\v 16 Pǝ tɑɣɑ mɑ tɩ sɑm tɔɔ kɛ́ mɑ kpɑɑlǝɣɩ Lɑɑpɑɑlɩ Kʋpɑŋ se. Amɑ cɑɑlʋɣʋ nɑ cɑɑlʋɣʋ kɛ́. Nɑ ye pǝ cǝpɑ-m nɑ mɑ́ tɑ́ kpɑɑlɩ Lɑɑpɑɑlɩ Kʋpɑŋ, mɑɣɑlɛ. 
\v 17 Ye mɑ mɑɣɑmɑɣɑ mɑɑ tʋnɑ mɑ tɩ sɩ mɑ́ lɑ tǝmlɛ tǝnɛ, mɑ́ nɔkɑɑ mɑ hɑɑkɩ nɔɣɔ kɛ́ nɑ mɑ́ tɑŋɑ kʋfɛlʋɣʋ. Ɩsɩɩ pɑ tʋ-m-tɛɣɛ kʋtʋɣʋ tɔ, pǝ wɛɛ sɩ mɑ́ lɑ-tɛɣɛ nɑ mɑ́ lɩɩ tǝsoo. 
\v 18 Mɑ kʋfɛlʋɣʋ ntɛ́ ŋku ɩlɛ? Nkʋɣʋlɛ sɩ mɑ́ hʋlǝsɩ lɑŋlɛ nɑ Lɑɑpɑɑlɩ Kʋpɑŋ kpɑɑlʋɣʋ. Mɑ́ kpɑɑlǝɣɩ fɑɑlɑɑ, mɑ́ tɑɑ hɑɑ nɔɣɔ nɑ mɑ́ tɑŋɑɑ ɩsɩɩ Lɑɑpɑɑlɩ Kʋpɑŋ kpɑɑllʋ lɑkɩ tɔ.
\p
\v 19 Mɑ tɩ mɑ tǝɣɩ, mɑ tɑ kɛ yom. Pɑɑ nɑ mpʋ mɑ lɑpɑ mɑ tǝɣɩ yǝlɑɑ tǝnɑ yom sɩ mɑ́ hiki yǝlɑɑ pɑɣɑlɛ kɛ sɔsɔm kɛ ɩsǝnɑ pǝ wɛɛ tɔ. 
\v 20 Yutɑ nyǝ́mɑ tɑɑ, mɑ lɑkɩ kɛ́ ɩsɩɩ Yutɑ tʋ, ɩlɛnɑ mɑ́ hiki-wɛ. Pɑɑ nɑ mɑɑ tǝŋǝɣɩ Moisi kʋsǝsɩɩtʋ tɔ, ye mɑ wɛ mpɑ pɑ tǝŋǝɣɩ Moisi kʋsǝsɩɩtʋ tɔ pɑ hɛkʋ, mɑ lɑkɩ kɛ́ ɩsɩɩ mɑ tǝŋǝɣɩ-tɩ ɩlɛnɑ mɑ́ hiki-wɛ. 
\v 21 Nɑ mpʋ tɔtɔɣɔ ye mɑ wɛ mpɑ pɑ tɑ nyɩ Moisi kʋsǝsɩɩtʋ tɔm tɔ pɑ hɛkʋ, mɑ wɛ kɛ́ ɩsɩɩ pɑ wɛʋ tɔ, mɑɑ pɑɑsǝɣǝnɑ kʋsǝsɩɩtʋ, ɩlɛnɑ mɑ́ hiki-wɛ. Pǝ tɑɣɑ ɩsɩɩ mɑ tɔŋ sɩ mɑ lɔ Ɩsɔ kʋsǝsɩɩtʋ se, Kilisiti kʋsǝsɩɩtʋ tǝnɑ mɑ tǝŋǝɣɩ kɛ́. 
\v 22 Mpɑ pɑ wɛ ɩcɑntʋ kɛ Ɩsɔ sɛɛʋ tɑɑ tɔ, mɑ lɑpɑ pɑ hɛkʋ kɛ́ ɩsɩɩ ɩcɑm nɑ pǝ́cɔ́ mɑ́ hiki ɑcɑmɑɑ mpɛ. Ḿpʋ́ɣʋ́ mɑ lɑkɩ pɑɑ mpɑ pɑ hɛkʋ, ɩlɛnɑ pɑɑ pǝ kǝlɩ we mɑ́ yɑ pɑ tɑɑ lɛlɑɑ. 
\v 23 Mɑ lɑkɩ pǝ tǝnɑɣɑ ḿpʋ́ɣʋ́ Lɑɑpɑɑlɩ Kʋpɑŋ tɔɔ kɛ́, ɩlɛnɑ mɑ mɑɣɑmɑɣɑ mɑɑ wɑɑ pǝ tɑɑ.
\p
\v 24 Ntɔŋ ɩ́ nyǝmɑ́ sɩ pɑ tɔɔkʋɣʋ ɑsewɑ tɛtɛ tɔ pɑɣɑlɛ seenɑ, ɑmɑ kʋlʋm tǝkoŋ tɔkǝnɑ. Mɛ tɔtɔ ɩ́ kɑɑsɩ mǝ tǝɣɩ mpʋ nɑ sewɑ, nɑ ɩ́ lɑɑlɩ nɑ ɩ́ tɔɣɔ nɔɣɔ. 
\v 25 Lʋtɑɑ nɑ selɑɑ pɑ tǝnɑ pɑ lɑkʋɣʋ mpʋ tɔ, pɑ wɛnɑ pɑ kʋkʋkiimnɑɑ kɛ́ nɑ ɩsǝlɛ kʋsɛɛmlɛ. Pɑ lɑkɩ ḿpʋ́ɣʋ́ sɩ pɑ́ hiki sɑm ntenuɣu ŋku kɩɩ tɑɑŋǝɣɩ tɔ. Amɑ tɑ́ ɩlɛ, tɑ́ lɑkɩ kɛ́ sɩ tǝ́ hiki sɑm ntenuɣu ŋku kʋ wɛ tɑm tɔɔ tɔ. 
\v 26 Pǝ tɔɔ kɛ́ mɑ́ tɔŋnɑ sewɑ nɑ mɑ́ yɑɣɑ ɩsǝlɛ kɛ timpi ɩnɩ tɔ. Mɑ wɛ kɛ́ ɩsɩɩ ŋkumɑ mɑtʋ wei ɩɩ hɑɣɑlǝɣɩ yem tɔ. 
\v 27 Amɑ mɑ wʋsǝɣɩ mɑ tɔnʋɣʋ kɛ́ nɑ mɑ́ tɔkǝɣɩ mɑ tǝɣɩ teu sɩ pǝ́ tɑɑ kɔɔ nɑ mɑ wei mɑ lɑpɑ lɛlɑɑ kɛ wɑɑsʋ tɔ mɑ́ kpisi nɑ pɑ́ lɔ-m.
\c 10
\s1 Tɩɩŋ tɔm lɑɑkɑlɩ lɑpǝnɑʋ
\p
\v 1 Mɑ tɑɑpɑlɑɑ mɑ luɣu wɛɛ sɩ ɩ́ tɔɔsɩ mpi pǝ mɑɣɑnɑ tɑ́ cɑɑnɑɑ cɑɑnɑɑ mpɑ nɑ Moisi pɑ tɔmɑ tɔ pɑ tɔm. Pɑ tǝnɑ tǝpɑɩ ɩsɔŋmʋntʋɣʋ kentinɑ pɑ tɔɔ, nɑ pɑ tǝnɑ tǝpɑɩ pɑ tɛsǝnɑ sǝsǝncɑɑsɩ teŋku. 
\v 2 Nɑ ɩsɔŋmʋntʋɣʋ ŋkʋ kʋ tɛɛ kɛ́ teŋku tɑɑ kɛ́ pǝ sɔ pɑ tǝnɑ tǝpɑɩ kɛ́ Ɩsɔ lʋm kɛ pɑ mʋɣʋ Moisi nɑ pɑ́ tǝŋǝɣɩ-ɩ tɔ pǝ tɔɔ. 
\v 3 Pɑ tǝnɑ tǝpɑɩ pɑ tɔɣɔnɑ piti tɔɣɔnɑɣɑ kʋlʋmɑɣɑ ŋkɛ. 
\v 4 Nɑ pɑ tǝnɑ tǝpɑɩ pɑ nyɔɔnɑ piti kʋnyɔnyɔɔm kʋlʋmǝm mpi pǝ lɩɩnɑ pɩɩʋ tɑɑ tɔ. Nɑ pɩɩʋ ŋkʋ kʋ hʋ́lǝ́ɣɩ́ kɛ́ sɩ pɑ́ nɑ Kilisiti pɑ tɔŋnɑ. 
\v 5 Pɑɑ nɑ mpʋ tɔ Ɩsɔ lɑŋlɛ tɑ hɛɛnɑ pɑ tɑɑ pɑɣɑlɛ, mpʋ pǝ yelinɑ nɑ pɑ́ sɩ wʋlɑɣɑ tɛtʋ tɑɑ.
\p
\v 6 Pǝnɛ ɩnɩ pǝ lɑpɑɣɑ sɩ pǝ́ hʋ́lɩ́-tʋɣʋ lɔŋ nɑ pǝ́ tɑɑ kɔɔ nɑ tǝ́ nyɩɩlɩ ɩsɑɣɑkʋnyɩɩlǝŋ ɩsɩɩ mpɛ ɩnɩ pɑɑ nyɩɩlʋɣʋ tɔ. 
\v 7 Nɑ pǝ́ tɑɑ kɔɔ nɑ ɩ́ kɛɛsɩ nɑ ɩ́ sʋʋ tɩɩŋ lɑɑʋ tɑɑ ɩsɩɩ pɑ tɑɑ lɛlɑɑ kɑ lɑpʋ tɔ. Ɩsɔ tɔm tɑɑ pɑ ŋmɑɑwɑ mpʋ sɩ: Yǝlɑɑ cɑɣɑɑ nɑ pɑ́ tɔɣɔ nɑ pɑ́ nyɔɔ, ɩlɛnɑ pɑ́ nyǝkɩ nɑ pɑ́ kʋlɩ sɩ pɑ pɑɑkɩ. 
\v 8 Nɑ tǝ́ tɑɑ lɑ wɑsɑŋkɑlǝtʋ ɩsɩɩ pɑ tɑɑ lɛlɑɑ kɑ pɑɑsǝnɑʋ-tɩ nɑ kʋyɑkʋ kʋlʋmʋɣʋ tike yʋlʋnyɔɔŋ iyisi hiu nɑ tooso (23000) lɩɩ nɑ pɑ́ sɩ tɔ. 
\v 9 Tǝ tɑɑ mɑɣɑsɩ Tɑcɑɑ sɩ tǝ nɑɑ ɩ wɑɑlɩ. Ḿpʋ́ɣʋ́ pɑ tɑɑ lɛlɑɑ kɑ lɑpɑ nɑ pɑ́ sǝnɑ tʋmɑɑ. 
\v 10 Tǝ tɑɑ miiti, mpi tɔ, pɑ tɑɑ lɛlɑɑ kɑ miitɑɣɑ ḿpʋ́ɣʋ́ nɑ wɑkǝllʋ kʋ-wɛ tɔ.
\p
\v 11 Pǝ tǝnɑ mpi pǝ mɑɣɑnɑ-wɛ tɔ pǝ hʋ́lǝ́ɣɩ́ lɛlɑɑ kɛ lɔŋ kɛ́. Pɑ ŋmɑɑ-tǝɣɩ sɩ pɑ kpɑɑlǝɣɩ-tʋ yoo. Pǝ tɑɣɑ pʋlʋ, wɑɑtʋ wei ɩ tɑɑ tǝ wɛ ɩsǝntɔ tɔ tǝnɑɣɑ wɑɑtʋ kɛ́. 
\v 12 Pǝ tɔɔ ɩlɛ ye wei ɩ hʋʋ sɩ ɩ sǝŋɑɑ pʋntʋ ɩ́ lɑ lɑɑkɑɑlɩ, ɩ́ tɑɑ kɔɔ nɑ ɩ́ hoti. 
\v 13 Mɑɣɑsʋɣʋ nɑkʋlɩ kʋ tɑ mɑɣɑnɑ-mɛ nɑ pǝ́ kǝlɩ ɩsɩɩ mɑɣɑsʋɣʋ mɑkʋɣʋnɑ yʋlʋ tɔ. Ɩsɔ tɔmɑ sɩ ɩ lɑkɩ mpi tɔ ɩɩ yeki-wɩ. Pǝ tɔɔ kɛ́ ɩ kɑɑ yele nɑ mɑɣɑsʋɣʋ mɑɣɑnɑ-mɛ nɑ pǝ́ kǝlɩ-mɛ. Amɑ mɑɣɑsǝŋ ɩnɩ ɩ́ kɔmɑ ɩ kɑ́ hʋ́lɩ́-mɛɣɛ ɩsǝnɑ ɩ́ kɑ́ lɑ nɑ ɩ́ tʋlɩ nɑ ɩ́ pǝsɩ-ɩ tɔ.
\p
\v 14 Pǝ tɔɔ ɩlɛ mɑ tɑɑpɑlɑɑ kʋpɑmɑ mɛ, ɩ́ lɑ lɑɑkɑlɩ nɑ tɩɩŋ tɔm. 
\v 15 Mɑ yɔɣɔtǝɣǝnɑ-mɛ ɩsɩɩ yǝlɑɑ lɑɣɑtʋnɑɑ, ɩlɛ nti mɑ yɔɣɔtǝɣɩ tɔ ɩ́ hʋʋ mǝ mɑɣɑmɑɣɑ nɑ ɩ́ nɑ́. 
\v 16 Ɩ́ nyǝnnɑ tǝ tɔkʋɣʋ kɔpʋ nɑ ɩ́ sunɑ Ɩsɔ kʋpɑntʋ nɑ tǝ sɛɛ-ɩ ɩ́ nɑ tǝmlɛ kɛ pǝ tɔɔ tɔ nɑ ɩ́ nɑ́. Tǝ nyɔɔkʋɣʋ tɔ, pɩɩ kpɛntǝɣɩ-tʋɣʋ ḿpʋ́ɣʋ́ Kilisiti cɑlǝm tɔɔ? Nɑ potopoto wei tǝ fɑkɩ tɔ, tǝ tɔkʋɣʋ tɔ, pɩɩ kpɛntǝɣɩ-tʋɣʋ ḿpʋ́ɣʋ́ Kilisiti tɔnʋɣʋ tɔɔ? 
\v 17 Ɩsɩɩ potopoto wɛʋ kʋlʋm nɑ tɑɑ wɛ kʋpiŋ nɑ tǝ́ tɑlǝɣɩ-ɩ tɔ tǝ kpɛntɑ kʋlʋm kɛ́. Mpi tɔ potopoto kʋlʋm kɛ tǝ tɔkɩ tɔ se.
\p
\v 18 Ɩ́ nyǝnnɑ Ɩsɛɣɛlɩ yǝlɑɑ nɑ ɩ́ nɑ. Mpɑ pɑ tɔkɩ mpi pɑ lɑpɑ kɔtɑɣɑ tɔ pɑ́ nɑ Ɩsɔ wei ɩ tike ɩ tǝ kɔtɑɣɑ tǝlɑtɛ tɔ pɑ kpɛntɑɑ kɛ́. 
\v 19 Ɩlɛ ɩsǝnɑɣɑ pǝ wɛɛ ɩlɛ? Tʋɣʋ kʋlɑlɑɑm kɛnɑ pʋlʋ? Yɑɑ tʋɣʋ mɑɣɑmɑɣɑ kɛnɑ pʋlʋ? Pʋlʋ fɛɩ pɑɑ pǝcɔ. 
\v 20 Amɑ pɑ lɑɑkʋɣʋ tɔ ɑlɔɣɑɑ tɔɔ kɛ́ pɑ lɑɑkɩ, pǝ tɑɣɑ Ɩsɔ. Nɑ mɑ kisɑɑ sɩ mǝ nɑ ɑlɔɣɑɑ ɩ́ tɑɑ wɛɛ tǝmɑ tɔm tɑɑ ɩlɛ. 
\v 21 Ɩ́ kɑɑ pǝsɩ nɑ ɩ́ nyɔɔ Tɑcɑɑ kɔpʋ nɑ ɩ́ tɑsɑ ɑlɔɣɑɑ nyǝŋ kɛ nyɔɔʋ. Nɑ ɩ́ kɑɑ pǝsɩ nɑ ɩ́ cɑɣɑ Tɑcɑɑ nyǝnɑɣɑ tɛɛ nɑ ɩ́ tɑsɑ ɑlɔɣɑɑ nyǝŋkɑ tɛɛ kɛ́ cɑɣɑʋ tɔtɔ. 
\v 22 Yɑɑ tǝ cɑɑ tǝ sʋsɩ Tɑcɑɑ kɛ ɩsǝsɛɛmlɛ tɑɑ? Tɑ́ kǝlǝnɑ-ɩ tomɑ yɑɑ ɩsǝnɑ?
\s1 Ɩsɔ teeli tʋɣʋ kɛ pɑɑ mpi pǝ tɑɑ
\p
\v 23 Mǝ tɑɑ lɛlɑɑ tɔŋ sɩ mpɑɑʋ wɛɛ sɩ tǝ́ nɔkɑ mpi tǝ lɑ́. Tɑmpɑnɑ, mpɑɑʋ wɛɛ yɑɑ. Amɑ pǝ tǝnɑ pǝ fɛɩnɑ kɑwɑɑɣɑ kɛ́. Mpɑɑʋ wɛɛ sɩ tǝ́ nɔkɑ mpi tǝ lɑ. Amɑ pǝ tɑɣɑ pǝ tǝnɑ pǝ lɑpʋ sɔɔsǝɣǝnɑ pʋlʋpʋɣʋ Ɩsɔ sɛɛʋ tɑɑ. 
\v 24 Nɔɣɔlʋ ɩ́ tɑɑ pɛɛkɩ ɩ mɑɣɑmɑɣɑ ɩ nyʋɣʋ nyǝntʋ tike. Amɑ pɑɑ wei ɩ́ pɛɛkǝɣɩ ɩ tɔɣɔntǝlɛnɑɑ nyǝntʋ tɔtɔ.
\p
\v 25 Nɑntʋ tǝnɑ nti pɑ pɛɛtǝɣɩ kʋyɑkʋ tɑɑ tɔ ɩ́ tɔɣɔ, ɩ́ tɑɑ kpeɣe mpi mǝ tɑɑ ɩ́ wɛnɑ sikɑ tɔ. 
\v 26 Pǝ tɑɣɑ pʋlʋ, pɑ ŋmɑɑwɑ Ɩsɔ Tɔm tɑɑ sɩ: Tɑcɑɑ tǝnnɑ tɛtʋ nɑ pǝ tǝnɑ mpi pǝ wɛ tǝ tɑɑ tɔ.
\p
\v 27 Ye mɑ tɑ nyɩ Ɩsɔ yɑɑ-ŋ tɔɣɔʋ nɑ nyɑ́ luɣu wɛɛ sɩ n puki, ń polɑɑ, tɔɣɔ pǝ tǝnɑ mpi ɩ kɑ́ sɑɑ-ŋ tɔ, tɑɑ kpeɣe mpi nyɑ́ lɑɑkɑlɩ tɑɑ n wɛnɑ sikɑ tɔ. 
\v 28 Amɑ ye nɔɣɔlʋ heelɑ-ŋ sɩ tǝnɛ ɩnɩ pɑ lɑɑwɑɣɑ, ɩlɛ tɑɑ tɔɣɔ, kɛ wei ɩ cǝpɑ-ŋ ḿpʋ́ɣʋ́ sǝkpɑlʋɣʋ tɔ ɩ́lɛ́ ɩ tɔɔ, nɑ nyɑ́ lɑɑkɑlɩ tɑ cɑɣɑ ɩ tǝcɑɣɑlɛ tɔ pǝ tɔɔ. 
\v 29 Pǝ tɑɣɑ nyɑ́ lɑɑkɑlɩ kɛ mɑ yɔɣɔtǝɣɩ cǝnɛ. Amɑ wei ɩnɩ ɩ heelɑ-ŋ tɔ ɩ nyǝŋ tɔɔ kɛ́.
\p Ɩlɛ pepe nyʋɣʋ tɔɔ kɛ́ lɛlʋ lɑɑkɑlɩ tɔm kɑ́ pɛlɩ mɑ niŋ kɛ mpʋ? 
\v 30 Ye mɑ sɛɛkɩ Ɩsɔ kɛ́ ɩ́ nɑ tǝmlɛ nɑ pǝ́cɔ́ mɑ́ tɔkɩ, pepe tɔɔ kɛ́ pɑɑ tʋʋ-m timpi mɑ tɔkǝnɑ sɛɛtʋ tɔ?
\p
\v 31 Pǝ wɛɛ sɩ pɑɑ ɩ́ tɔkɩ, pɑɑ ɩ́ nyɔɔkɩ, pɑɑ ɩ́ lɑkɩ mpi, ɩ́ lɑ nɑ Ɩsɔ hiki teeli kɛ pǝ tǝnɑ pǝ tɑɑ. 
\v 32 Ɩ́ tɑɑ hu nɔɣɔlʋ, pɑɑ Yutɑ nyǝ́mɑ, pɑɑ mpɑ pɑ tɑ kɛ Yutɑ nyǝ́mɑ tɔ, pɑɑ Yesu sɛɛlɑɑ. 
\v 33 Ɩ́ lɑ ɩsɩɩ mɑ lɑkʋɣʋ tɔ. Mɑ lʋkɩ kɛ́ sɩ pǝ tǝnɑ mpi mɑ lɑkɩ tɔ pǝ́ lɑ yǝlɑɑ tǝnɑɣɑ leleŋ. Pǝ tɑɣɑ mɑ mɑɣɑmɑɣɑ mɑ nyʋɣʋ nyǝntʋ kɛ mɑ pɛɛkǝɣɩ. Amɑ yǝlɑɑ tǝnɑ nyǝntʋ kɛ́ sɩ pǝ́ yɑ pɑ nyɔɔŋ.
\c 11
\p
\v 1 Ɩ́ kɛɛsǝɣǝnɑ-m ɩsɩɩ mɑ́ kɛɛsǝnɑ Kilisiti tɔ.
\s1 Alʋ kɑ te sɑɑlɑɣɑ kɛ Ɩsɔ tǝsɛɛlɛ
\p
\v 2 Ɩ́ tɔɔsɑ mɑ tɔm kɛ pǝ tǝnɑ pǝ tɑɑ nɑ ɩ́ tɔkɑ kʋlɑpʋtʋnɑɑ kɛ teitei ɩsɩɩ mɑ kɛɛsʋɣʋ-mɛ tɔ mɑ sɑmɑ-mɛ. 
\v 3 Amɑ mɑ cɑɑ kɛ́ sɩ ɩ́ nyɩ sɩ Kilisiti kɛlɛ pɑɑ ɑpɑlʋ wei ɩ sɔsɔ, nɑ ɑpɑlʋ ntɛ́ ɑlʋ sɔsɔ, nɑ Ɩsɔ kɛlɛ Kilisiti ɩ́lɛ́ ɩ sɔsɔ. 
\v 4 Ye ɑpɑlʋ ɩ́ sǝlǝmǝɣɩ yɑɑ ɩ kpɑɑlǝɣɩ Ɩsɔ kʋheelitu kɛ Ɩsɔ tǝsɛɛlɛ nɑ ɩ́ tɑ́ kuli ɩ nyʋɣʋ tɔɔ, Kilisiti kɛ ɩ kpɛɛnɑɑ. 
\v 5 Nɑ ye ɑlʋ ɩ́ sǝlǝmǝɣɩ yɑɑ ɩ kpɑɑlǝɣɩ Ɩsɔ kʋheelitu nɑ ɩ́ tɑ́ te sɑɑlɑɣɑ, ɩ pɑɑlʋ kɛ́ ɩ kpɛɛnɑɑ, nɑ pǝ pǝsɑ ɩsɩɩ pɑ loolɑ-ɩ kɛ́. 
\v 6 Nɑ ye ɑlʋ kɑɑ te sɑɑlɑɣɑ ɩlɛ pɑ́ kɔ́ ɩ nyɔɔsɩ. Amɑ ye pǝ wɛ-ɩ fɛɛlɛ sɩ pɑ́ kɔ-ɩ yɑɑ pɑ́ looli-ɩ, ɩlɛ ɩ́ te sɑɑlɑɣɑ. 
\v 7 Apɑlʋ kɑɑ pɑ ɩ nyʋɣʋ tɔɔ kɛ́ pʋlʋ, mpi tɔ, ɩ kɛ́ Ɩsɔ lɛɛsʋɣʋ nɑ ɩ kiŋ kɛ Ɩsɔ teu nɑɑkɩ. Amɑ ɑlʋ kiŋ kɛ ɑpɑlʋ teu nɑ́ nɑɑkɩ. 
\v 8 Pǝ tɑɣɑ ɑlʋ kɛ pɑ cosɑɑ nɑ pɑ́ ŋmɑnɑ ɑpɑlʋ. Amɑ ɑpɑlʋ kɛ pɑ cosɑɑ nɑ pɑ́ ŋmɑnɑ ɑlʋ. 
\v 9 Nɑ pǝ tɑɣɑ ɑlʋ tɔɔ kɛ́ pɑ ŋmɑ ɑpɑlʋ. Amɑ ɑpɑlʋ tɔɔ kɛ́ pɑ ŋmɑ ɑlʋ. 
\v 10 Pǝ tɔɔ kɛ́ ɩsɔtɑɑ tillɑɑ tɔɔ, ɑlʋ kɑ́ wɛɛnɑ ɩ nyʋɣʋ tɔɔ kɛ́ mpi pǝ hʋ́lǝ́ɣɩ́ sɩ ɩ tɑ tɩ ɩ tɩ, ɑmɑ ɑpɑlʋ tǝnnɑ-ɩ tɔ. 
\v 11 Pɑɑ nɑ mpʋ tɔ, Tɑcɑɑ tɔm tɑɑ ɑlʋ fɛɩ ɩ tɩ tɔɔ tike, nɑ ɑpɑlʋ kɛ ɩ́lɛ́ ɩ tɩ tɔɔ tike, pɑ tǝnɑ pɑ tɩ pɑ tǝmɑɣɑ. 
\v 12 Pǝ tɑɣɑ pʋlʋ tɔɔ, ɑpɑlʋ kɛ pɑ cosɑɑ nɑ pɑ́ ŋmɑnɑ ɑlʋ, nɑ mpʋ tɔtɔɣɔ ɑlʋ nɑ lʋlɑ ɑpɑlʋ, nɑ pǝ tǝnɑɣɑ mpʋ Ɩsɔ kiŋ kɛ pǝ lɩɩnɑɑ.
\p
\v 13 Mǝ mɑɣɑmɑɣɑ ɩ́ mɑɣɑsɩ-tǝɣɩ mǝ tɑɑ nɑ ɩ́ nɑ́, sɩ wɑɑtʋ wei ɑlʋ puki Ɩsɔ sɛɛʋ nɑ ɩ́ sǝlǝmǝɣɩ tɔ, ɩ cɑɣɑ nyʋɣʋ kpɛtɛ nɑ? 
\v 14 Antulinyɑ tɑɑ cǝnɛ mɑɣɑmɑɣɑ se, ye ɑpɑlʋ yɛlǝɣǝnɑ nyɔɔsɩ kʋtɑɣɑlɑsɩ, fɛɛlɛ sɔsɔɔlɛ kɛ́. 
\v 15 Amɑ ye ɑlʋ nyɔɔsɩ tɑɣɑlǝnɑ mpʋ, ɩsɑntɛ sɔsɔɔlɛ ntɛ́. Tɑmpɑnɑ yɑɑ pǝ hɑ pɑɑ ɑlʋ wei kɛ́ nyɔɔsɩ kʋtɑɣɑlɑsɩ kɛ́ sɩ sɩ tɑkǝɣɩ-ɩ ɩsɩɩ tɛkɛntɛ. 
\v 16 Amɑ ye nɔɣɔlʋ tɑsǝɣɩ tǝnɛ ɩnǝɣɩ kpɛɛsǝnɑʋ pʋntʋ ɩ́ nyɩ sɩ, pɑɑ tɑ, pɑɑ Ɩsɔ sɛɛlɑɑ kpekɑ, tǝ fɛɩnɑ lɑkɑsɩ nɑsǝlɩ tɔtɔɣɔ tɑ́ Ɩsɔ sɛɛʋ wule nɑ pǝ́ tɑ́ kɛnɑ sǝnɛ.
\s1 Tɑ Cɑɑ sǝm tɔɔsʋɣʋ
\r (Mɑtiyee 26:26-29; Mɑlǝkɩ 14:22-25; Luku 22:15-20)
\p
\v 17 Tɔʋ, nti mɑ nɑwɑ nɑ mɑ cɑɑ mɑ yɔɣɔtɩ-tɩ tɔ, pǝ tɑ mʋnɑ mɑ́ sɑ-mɛɣɛ pɑɑ pǝcɔ se. Pǝ tɑɣɑ pʋlʋ, mǝ kotuŋ wei ɩ́ kotiɣi tɔ, ye pǝ tɑɣɑ ɩsɑɣɑtʋ, ɩɩ sɔɔsǝɣɩ-mɛɣɛ kʋpɑntʋ nɑtǝlɩ. 
\v 18 Kɑncɑɑlɑɣɑ nyǝntʋ ɩlɛ, pɑ heelɑ-m kɛ́ sɩ ɩ́ kotiɣi tɔ, mǝ kotuɣu fɑɣɑ kpekɑ kpekɑ kɛ́, nɑ ɩɩ cɑɑ tǝmɑ. Ɩlɛ mɑ tisɑ-tǝɣɩ ɩsɩɩ mɑ tɑ tisi. 
\v 19 Ye fɑɣɑsʋɣʋ ɩ́ wɛ mǝ hɛkʋ tɑɑ kɔlɔ, kʋ́ wɛɛ nɑ pǝ́cɔ́ pɑ́ nyɩ mǝ tɑɑ mpɑ pɑ kɛ́ kʋpɑmɑ nɑ tɑmpɑnɑ tɔ. 
\v 20 Ɩ́ kotuɣu tɔ, pǝ tɑɣɑ Tɑcɑɑ tɔɣɔnɑɣɑ kɛ ɩ́ tɔkɩ. 
\v 21 Pǝ wɛ ḿpʋ́ɣʋ́ kʋpɑm mɛɛ, ɩ́ cɑkʋɣʋ nyɑnɑɣɑ tɛɛ tǝkpem tɔ pɑɑ wei ɩ huliɣinɑ ɩ mɑɣɑmɑɣɑ ɩ tɔɣɔnɑɣɑ kɛ́. Nyɔɣɔsɩ nɑ́ tɔŋnɑ lɛlɑɑ kɛ kʋɣʋ nɑ sʋlʋm nɑ́ɑ́ kʋɣɩ lɛlɑɑ. 
\v 22 Ɩ́ kɑ́ tɔkɩ nɑ ɩ́ nyɔɔkɩ mǝ tɛɛsɩ nsi sɩ tɑɑ tɔɣɔ ɩ́ fɛɩnɑ yɑɑ we? Yɑɑ Ɩsɔ sɛɛlɑɑ kpekǝle kɛ ɩ́ nyǝnǝɣɩ yem? Nɑ mpɑ pɛlɛ pɑ fɛɩnɑ pʋlʋ tɔɣɔlɛ ɩ́ cɑɑ fɛɛlɛ tʋɣʋ nɑ? Yɑɑ ɩ́ cɑɑ mɑ́ heeli-mɛ suwe? Pǝ nǝɣǝsǝnɑ mɑ sɑ-mɛ? Pɑɑ pǝcɔ mɑ kɑɑ sɑ-mɛ se.
\p
\v 23 Pǝ tɑɣɑ pʋlʋ tɔɔ, tɔmnɑɑ mpɑ Tɑcɑɑ tɑsɑ-m nɑ mɑ́ cɑɑ mɑ heeli-mɛ tɔɣɔlɛ sɩ, ɑhoo nnɑ ɑ tɑɑ pɑ yelɑɑ nɑ pɑ́ kpɑ Tɑcɑɑ Yesu ɩnɩ tɔɣɔ ɩ kpɑɣɑ potopoto. 
\v 24 Ɩ sɛɛ Ɩsɔ kɛ́ ɩ́ nɑ tǝmlɛ nɑ ɩ́ tɛ ɩlɛnɑ ɩ́ fɑɣɑ-ɩ nɑ ɩ́ tɔ sɩ: Ɩnɛ ɩ kɛnɑ mɑ tɔnʋɣʋ ŋku pǝ hɑ mǝ tɔɔ tɔ, ḿpʋ́ɣʋ́ ɩ́ kɑ́ lɑkɩ nɑ ɩ́ tɔɔsǝɣɩ mɑ tɔɔ. 
\v 25 Pɑ tɛmɑ tɔɣɔʋ kɛ mpʋ ɩlɛnɑ ɩ́ kpɑɣɑ kɔpʋ nɑ ɩ́ tɔ sɩ: Kɔpʋ ɩnɛ ɩ kɛnɑ Ɩsɔ nɔɣɔ pɛɛlʋɣʋ kʋfɑm yoo, nɑ mɑ cɑlǝm hʋlǝnɑ pǝ tɑmpɑnɑ. Pɑɑ wɑɑtʋ wei kɛ́ ɩ́ nyɔɔkɩ ɩ nyɔɔkɩ mpʋ nɑ ɩ́ tɔɔsǝɣǝnɑ mɑ tɔɔ yoo. 
\v 26 Kʋpɑm ye ɩ́ wɛɛ nɑ ɩ́ tɔkɩ potopoto ɩnɛ nɑ ɩ́ nyɔɔkɩ kɔpʋ ɩnɛɣɛ mpʋ, ɩ́ heeliɣi Tɑcɑɑ sǝm tɔm, hɑlǝnɑ ɩ́lɛ́ ɩ kɔɔ ɩ́ mǝlɩ.
\p
\v 27 Pǝ tɔɔ kɛ́ ye nɔɣɔlʋ wɛɛ nɑ ɩ́ tɔkɩ Tɑcɑɑ potopoto nɑ ɩ́ nyɔɔkɩ ɩ kɔpʋ pǝyele ɩ tɑ nǝɣǝsǝnɑ sɩ ɩ́ tɔɣɔ nɑ ɩ́ nyɔɔ pʋntʋ ɩ́ nyɩ sɩ Tɑcɑɑ tɔnʋɣʋ nɑ ɩ cɑlǝm pǝ tɔm wɛ ɩ nyʋɣʋ tɑɑ kɛ́. 
\v 28 Pǝ wɛɛ sɩ pɑɑ wei ɩ́ pɔɔsɩ ɩ tǝɣɩ ɩ mɑɣɑmɑɣɑ nɑ ɩ́ nɑ́ nɑ pǝ́cɔ́ ɩ́ tɔɣɔ potopoto ɩnɛ nɑ ɩ nyɔɔ kɔpʋ ɩnɛ. 
\v 29 Pǝ tɑɣɑ pʋlʋ tɔɔ, ye wei ɩ tɔkɩ potopoto nɑ ɩ́ nyɔɔkɩ kɔpʋ kɛ yem tɔɔ nɑ ɩ́ tɑ́ cɛkǝnɑ sɩ pǝ kɛ́ Tɑcɑɑ tɔnʋɣʋ, ɩ kɔŋnɑ ɩ mɑɣɑmɑɣɑ ɩ nyʋɣʋ tɑɑ kɛ́ tɔm kɛ ɩ tɔɣɔʋ nɑ ɩ nyɔɔʋ mpɩ pǝ tɑɑ kɛ́. 
\v 30 Ɩsǝntɔ ɩnɩ ɩ mɑɣɑmɑɣɑ ɩ lɑpʋ tɔɔ kɛ́ mǝ tɑɑ pɑɣɑlɛ kɛ́ kʋtɔntʋnɑɑ nɑ ɑcɑmɑɑ nɑ yǝlɑɑ kʋpiŋ sǝpɑ. 
\v 31 Ye tɑ mɑɣɑmɑɣɑ tǝ pɔɔsǝɣǝnɑ tɑ́ tǝɣɩ tɔmnɑɑ nɑ pǝ́cɔ́ ɩlɛ, tǝ kpɛɛ tɑ́ tǝɣɩ tɔm nti Ɩsɔ kɑ́ hʋʋnɑ-tʋ tɔ tǝ tɑɑ kɛ́. 
\v 32 Amɑ Tɑcɑɑ ɩlɛ ɩ hʋʋkǝnɑ-tʋɣʋ nɑ ɩ́ hɔŋ tɑ́ ŋkpɑŋŋ kɛ sɩ pǝ́ tɑɑ kɔɔ nɑ pǝ́ kɑɑ tɑ́ nɑ ɑntulinyɑ kɛ kpɑtǝtɛ kʋlʋmtǝlɛ.
\p
\v 33 Pǝ tɔɔ ɩlɛ mɑ tɑɑpɑlɑɑ wɑɑtʋ wei ɩ́ kotiɣi sɩ ɩ́ tɔkɩ Tɑcɑɑ tɔɣɔnɑɣɑ tɔ ɩ́ tɑŋ tǝmɑ. 
\v 34 Ye nyɔɣɔsɩ ɩ́ pɩɩ wei pʋntʋ ɩ́ tɔɣɔ ɩ tǝyɑɣɑ, nɑ pǝ́ tɑɑ kɔɔ nɑ mǝ kotuŋ tɔɔ Ɩsɔ kɔɔ ɩ́ nɑnɑ-mɛɣɛ nɑtǝlǝɣɩ lɑpʋ. Nti nti pǝ kɑɑsɑɑ tɔ mɑ́ kɔmɑ nɑ mɑ́ kɔɔ ɩlɛ mɑ tɛɛsɩ tǝlɛɣɛ tɑɣɑnʋɣʋ.
\c 12
\s1 Mpi mpi pǝ lɑpʋ sɑɑkɩ yǝlɑɑ tɔ
\p
\v 1 Pǝnɛntɛ tǝ́ pɑɑsǝnɑ mpi mpi Ɩsɔ Feesuɣu Nɑŋŋtʋ yeki nɑ pǝ́ sɑɑ yǝlɑɑ tɔ pǝ tɔm ɩlɛ.
\p Mɑ tɑɑpɑlɑɑ mɑ cɑɑ kɛ́ sɩ mpi mpi pǝ sɑɑkʋɣʋ yǝlɑɑ tɔ ɩ́ nyɩ tɑmpɑnɑ nnɑ ɑ tɔɔ pǝ sɑɑ mpʋ tɔ. 
\v 2 Ɩ́ nyǝmɑ́ teu sɩ ɩ́ kɑ kɛʋ mɑ tɑ nyɩ ɩsɔnɑɑ tɔ tɩɩŋ wei ɩɩ yɔɣɔtǝɣɩ nɑtǝlɩ tɔ ɩ tɔm tɑɑ kɛ́ pǝ hɑnɑ mǝ ɩsɛ nɑ cʋɣʋlʋɣʋ fɛɩ. 
\v 3 Pǝ tɔɔ mɑɣɑmɑɣɑ kɛ mɑ cɑɑ sɩ ɩ́ nyɩ nɑ ɩ́ tɛ mǝ tɑɑ sɩ yʋlʋ nɔɣɔlʋ ɩ fɛɩ wei Ɩsɔ Feesuɣu tiikiɣi nɑ pʋntʋ lɩɩnɑ pǝ wɑɑlɩ nɑ ɩ́ tɔ sɩ Yesu kɛ́ mpusi tɔ. Nɑ ye Feesuɣu Nɑŋŋtʋ ɩɩ tiikiɣi wei pʋntʋ kɑɑ pǝsɩ nɑ ɩ́ tʋlǝɣɩ nɑ ɩ́ yeki sɩ Yesu kɛlɛ Tɑcɑɑ.
\p
\v 4 Mpi mpi pǝ sɑɑkɩ yǝlɑɑ kɛ Ɩsɔ mpɑɑʋ tɑɑ tɔ pǝ wɛ ŋkɑ ŋkɑ kɛ́. Amɑ Ɩsɔ Feesuɣu kʋlʋmʋɣʋ ŋkʋ kʋ yekinɑ nɑ pǝ́ sɑɑkɩ yǝlɑɑ. 
\v 5 Tǝmɑ lɑpʋ wɛ fɑkɑsɩ fɑkɑsɩ. Amɑ Tɑcɑɑ kʋlʋm ɩnɩ ɩ tǝmɑ kɛ pɑ lɑkɩ. 
\v 6 Kʋlɑpǝm wɛ ŋkɑ ŋkɑ, ɩlɛ Ɩsɔ kʋlʋm ɩnɩ ɩ tʋɣʋnɑ pɑ tǝnɑɣɑ kʋlɑpǝmnɑɑ mpɛ pɑ tǝnɑ. 
\v 7 Ɩsɔ Feesuɣu hʋ́lǝ́ɣɩ́ pɑɑ wei ɩ kiŋ kɛ́ sɩ kʋ wɛɛ nɑ kʋ yeki nɑ pʋlʋ lɑpʋ sɑɑ pʋntʋ ɩlɛnɑ pɑ tǝnɑ pɑ́ hiki kʋpɑntʋ kɛ pǝ tɑɑ. 
\v 8 Ɩsɔ Feesuɣu hɑɑ nɔɣɔlʋ ɩlɛɣɛ lǝmɑɣɑsɛɛ tɔm yɔɣɔtɑɣɑ. Nɑ Feesuɣu kʋlʋmʋɣʋ ŋkʋ kʋ hɑ nɔɣɔlʋ ɩlɛ tɔtɔ sɩ ɩ́ yɔɣɔtǝɣǝnɑ nyǝm. 
\v 9 Ɩsɔ Feesuɣu kʋlʋmʋɣʋ kʋnɛ kʋ yekinɑ nɑ nɔɣɔlʋ nɑ́ɑ́ tisiɣi Ɩsɔ tɔɔ kɛ́ yuŋ kɛ teu. Nɑ kʋ́ hɑɑ nɔɣɔlʋ ɩlɛɣɛ kʋtɔntʋnɑɑ wɑɑsʋɣʋ pǝsʋɣʋ. 
\v 10 Ɩsɔ Feesuɣu yeki nɑ nɔɣɔlʋ nɑ́ɑ́ lɑkɩ piti tǝmɑ, nɑ kʋ tʋɣʋ nɔɣɔlʋ ɩlɛ sɩ ɩ́ kpɑɑlǝɣɩ Ɩsɔ kʋheelitu, nɑ kʋ yeki nɑ nɔɣɔlʋ nɑ́ɑ́ nyǝŋ nɑ ɩ́ fɑɣɑsǝɣɩ ɑlɔɣɑɑ nyǝntʋ nɑ Ɩsɔ Feesuɣu nyǝntʋ. Kʋ yeki nɑ nɔɣɔlʋ ɩ́lɛ́ ɩ́ yɔɣɔtǝɣǝnɑ tɔmnɑɑ mpɑ nɔɣɔlʋ ɩɩ nɩɩkɩ tɔ, nɑ kʋ yeki nɑ nɔɣɔlʋ nɑ́ɑ́ cɛkǝɣǝnɑ-tɩ nɑ ɩ́ tɛlǝsǝɣɩ. 
\v 11 Ɩsɔ Feesuɣu kʋlʋmʋɣʋ kʋnɛ kʋ tɑɑ kʋ tike kʋ lɑkǝnɑ pǝ tǝnɑɣɑ mpʋ. Kʋ yeki nɑ pɑɑ mpi mpi pǝ lɑpʋ sɑɑ pɑɑ wei kɛ́ ŋkɑ ŋkɑ ɩsɩɩ kʋ nɔkɑɑ tɔɣɔ.
\s1 Tɔnʋɣʋ pilimile kʋlʋmtǝlɛ
\p
\v 12 Tɑmpɑnɑ tɔɔ Kilisiti wɛɛ kɛ́ ɩsɩɩ yʋlʋ tɔnʋɣʋ pilimile wɛʋ nɑ kʋ́ wɛnɑ nɔɔhɛɛ nɑ niŋ nɑ ŋkpɑŋŋ nɑ ɩsɛ nɑ pǝ tǝnɑɣɑ mpʋ tɔ. Tɔnʋɣʋ wɛʋ tɔ pɑɑ kʋ tɔɔ kʋ wɛnɑ ḿpʋ́ɣʋ́ wɑɑnɩ wɑɑnɩ tɔ pǝ tǝnɑ pǝ kpɛntɑ kʋlʋm kɛ́ sɩ tɔnʋɣʋ. 
\v 13 Mpʋ tɔtɔɣɔ nɑ tɑ tǝnɑ, pɑɑ tǝ kɛ́ Yutɑ nyǝ́mɑ yɑɑ tǝ tɑ kɛ Yutɑ nyǝ́mɑ, pɑɑ tǝ kɛ́ yomɑɑ yɑɑ kɑsɑɣɑmpiyɑ, Ɩsɔ Feesuɣu kʋlʋmʋɣʋ ŋkʋɣʋ pɑ sɔnɑ-tʋɣʋ Ɩsɔ lʋm sɩ tǝ́ kpɛntɩ ɩsɩɩ yʋlʋ tɔnʋɣʋ pilimile wɛʋ tɔ, nɑ Ɩsɔ Feesuɣu kʋlʋmʋɣʋ ŋkʋ kʋ lʋm kɛ tǝ nyɔɔkɩ teu kɛ tɑ́ tǝnɑ.
\p
\v 14 Yʋlʋ tɔntʋɣʋ pilimile wɛʋ tɔ pǝ tɑɣɑ nɔɔhɛɛ tike yɑɑ niŋ yɑɑ ŋkpɑŋŋ yɑɑ ɩsɛ tike wɛnnɑ. Amɑ pǝ tǝnɑɣɑ mpʋ pǝ wɛnnɑ kʋ tɔɔ. 
\v 15 Nɔɔhǝlɛ kɑ pǝsɩ nɑ tǝ́ tɔ sɩ: Mɑ tɑ kɛ niŋ tɔ, mɑ tɑ kɛ tɔnʋɣʋ? Pɑɑ tɩɩ yɔɣɔtɑ mpʋ pɩɩ lǝsɩ-tɛɣɛ tɔnʋɣʋ tɔɔ? 
\v 16 Nkpɑŋʋɣʋ kɑ́ pǝsɩ nɑ kʋ́ tɔ sɩ: Mɑ tɑ kɛ ɩsǝlɛ tɔ mɑ tɑ kɛ tɔnʋɣʋ? Pɑɑ kʋ tɩɩ yɔɣɔtɑ mpʋ pɩɩ lǝsɩ-kʋɣʋ tɔnʋɣʋ tɔɔ? 
\v 17 Nɑ pǝ wɛʋ mpʋ tɔ, ye ɩsǝlɛ tike tǝkoŋ wɛnnɑ yʋlʋ tɔnʋɣʋ tǝnɑ tɔɔ, pepeɣe yʋlʋ kɑ́ nɩɩnɑ tɔm? Nɑ ye ŋkpɑŋʋɣʋ tike wɛnnɑ, pepeɣe yʋlʋ kɑ́ nɩɩnɑ sɔŋ? 
\v 18 Tɑmpɑnɑ tɔɔ Ɩsɔ nɔkɑ ɩsǝnɑ tɔ ḿpʋ́ɣʋ́ ɩ lɑpɑ, ɩ tʋ yʋlʋ tɔnʋɣʋ tɔɔ kɛ́ pɑɑ mpiɣi wɑɑnɩ wɑɑnɩ. 
\v 19 Ye kʋlʋmǝm kɑ wɛnnɑ yʋlʋ tɔnʋɣʋ tǝnɑ ɩlɛ pǝ tɑɑ kɛ́ yʋlʋtɔnʋɣʋ ntɛ́. 
\v 20 Amɑ yʋlʋtɔnʋɣʋ nɑ wɛʋ tɔ kʋ wɛnɑ nɔɔhɛɛ nɑ niŋ nɑ ŋkpɑŋŋ nɑ ɩsɛ nɑ pǝ tǝnɑɣɑ ḿpʋ́ɣʋ́.
\p
\v 21 Pǝ tɔɔ kɛ́ ɩsɛ nɑ́ kɑɑ pǝsɩ nɑ ɑ́ tɔ niŋ sɩ ye ɩ́lɛ́ ɩ fɛɩ pǝ lɑ́ ɩsǝnɑ? Nɑ nyʋɣʋ nɑ́ kɑɑ pǝsɩ nɑ kʋ tɔ nɔɔhɛɛ sɩ ye ɑlɛ ɑ fɛɩ pǝ lɑ́ ɩsǝnɑ? 
\v 22 Pǝ fɛɩ ḿpʋ́ɣʋ́ pɑɑ pǝcɔ, mpi mpi pǝ kɛ́ tɑɑlǝm nyǝm kɛ yʋlʋ tɔnʋɣʋ tɑɑ tɔ mpǝɣǝlɛ weesuɣu. 
\v 23 Mpi tǝ nyǝnǝɣɩ ḿpʋ́ɣʋ́ tɑɑlǝm tɔ mpǝɣɩ tǝ mǝlɑ nɑ tǝ́ seenɑ nɑ pǝ́ kǝlɩ lɛmpǝnɑɑ. Nɑ pǝ kɑɑsɑ lɛmpɩ, pǝlɛ pǝ yɑɑʋ wɛ fɛɛlɛ, pǝlɛɣɛ pɑ kǝlǝɣɩ ŋmɛsʋɣʋ tǝkulɑkulɑ, 
\v 24 nɑ pǝ kǝlɩ tɑ́ tɔnʋɣʋ tɔɔ lɛmpǝnɑɑ mpi pɩɩ mʋnɑɑ sɩ tǝ lɑ mpʋ tɔ. Ɩsɔ lɑpɑ yʋlʋ tɔnʋɣʋ kɛ ḿpʋ́ɣʋ́ sɩ lɛmpɩ ɩ́ tɑkǝɣɩ lɛmpɩ wɑɑlɩ. 
\v 25 Pǝ tɔɔ kɛ́ fɑɣɑsʋɣʋ fɛɩ yʋlʋ tɔnʋɣʋ tɔɔ. Amɑ pǝ tǝnɑ mpi pǝ wɛ tɔnʋɣʋ tɔɔ tɔ pɩɩ nǝɣǝsǝɣɩ tǝmɑ tɔɔ kɛ́ tɑm kɛ́. 
\v 26 Ye yʋlʋ tɔnʋɣʋ tɔɔ lɛmpɩ sɑlǝmǝɣɩ, pǝ tǝnɑ pǝ sɑlǝmǝɣǝnɑ, nɑ ye pɑ sɑmɑ yʋlʋ tɔnʋɣʋ tɔɔ lɛmpɩ, pǝ tǝnɑ pǝ sɑmtʋ kɛ́.
\p
\v 27 Mǝ tǝnɑ ɩ́ kɛ́ Kilisiti tɔnʋɣʋ kɛ́, nɑ pɑɑ mǝ tɑɑ wei ɩ kɛ́ Kilisiti tɔnʋɣʋ kʋnɛ kʋ tɔɔ pʋlʋpʋ kɛ́. 
\v 28 Pǝ tɔɔ kɛ́ Ɩsɔ kpɑ tillɑɑ kɛ Yesu sɛɛlɑɑ kpekǝle tɑɑ kɛ́ kɑncɑɑlɑɣɑ, pǝ wɑɑlɩ kɛ́ Ɩsɔ kʋyɔɣɔtʋtʋ tɛlǝsǝlɑɑ, pɛlɛ pɑ wɑɑlɩ kɛ́ sɛɣɛsǝlɑɑ, pǝ wɑɑlɩ kɛ́ ɩ kpɑ piti tǝmɑ lɑtɑɑ, nɑ kʋtɔntʋnɑɑ wɑɑsǝlɑɑ, nɑ lɛlɑɑ tentɑɑ, nɑ nyʋɣʋ nyǝ́mɑ, nɑ mpɑ tɔmnɑɑ mpɑ nɔɣɔlʋ ɩɩ nɩɩkɩ tɔ pɑ yɔɣɔtʋɣʋ sɑɑwɑ tɔ. 
\v 29 Pɑ tǝnɑ pɑ tɑ kɛ tillɑɑ se, pǝyele pɑ tǝnɑ pɑ tɑ kɛ Ɩsɔ kʋyɔɣɔtʋtʋ tɛlǝsǝlɑɑ yɑɑ sɛɣɛsǝlɑɑ. Pɑ tǝnɑ pɑɑ pǝsǝɣɩ piti tǝmɑ lɑpʋ. 
\v 30 Pǝ tɑɣɑ pɑ tǝnɑ pɑ wɑɑsǝɣǝnɑ kʋtɔntʋnɑɑ, pǝyele pǝ tɑɣɑ pɑ tǝnɑ pɑ yɔɣɔtǝɣǝnɑ nɑ tɔmnɑɑ mpɑ nɔɣɔlʋ ɩɩ nɩɩkɩ tɔ, yɑɑ tɔmnɑɑ mpɛ pɑ tɛlǝsʋɣʋ. 
\v 31 Ye ɩ nyɩɩlǝɣɩ sɩ pʋlʋ lɑpʋ ɩ́ sɑɑ-mɛ, ɩ́ nyɩɩlɩ mpi pǝ kǝlɑ nyʋɣʋ tɔ.
\p Mɑɑ hʋ́lɩ́-mɛɣɛ pǝnɛntɛɣɛ mpɑɑʋ ŋku kʋ kǝlɑ ɩ tǝnɑ tɔ.
\c 13
\s1 Tǝmɑ sɔɔlʋɣʋ tɔm
\p
\v 1 Pɑɑ mɑ yɔɣɔtǝɣɩ yǝlɑɑ nsǝmɑ nɑ ɩsɔtɑɑ tillɑɑ nsǝmɑ tɔtɔ, ye mɑɑ sɔɔlǝɣɩ yǝlɑɑ mɑ yɔɣɔtɑɣɑ tǝnɑ wɛ yem kɛ́ ɩsɩɩ suule wiikuɣu tɔ yɑɑ kɑŋkonte wiikuɣu tɔ. 
\v 2 Pɑɑ pǝ wɛɛ sɩ Ɩsɔ kʋheelitu kpɑɑlʋɣʋ sɑɑnɑ-m, yɑɑ pɑɑ mɑɑ nyɩ pǝ tǝnɑ nɑ mɑ́ cɛkǝnɑ kʋŋmɛsǝm tǝnɑ, yɑɑ pɑɑ mɑɑ tisɑ Ɩsɔ tɔɔ kɛ́ mɑ yuŋ kɛ teu nɑ mɑ́ yɔɣɔtǝɣǝnɑ pɔɔŋ sɩ ɩ́ kpɛsɩ nɑ ɩ́ lɑɣɑsɩ, nɑ ɩ́ kpɛsǝɣɩ nɑ ɩ́ lɑɣɑsǝɣɩ, nɑ mɑɑ sɔɔlǝɣɩ yǝlɑɑ, mɑ wɛ yem kɛ́. 
\v 3 Pɑɑ mɑ ɑpititu tǝnɑɣɑ mɑɑ kpɑɣɑ nɑ mɑ́ tɑlɑ kʋnyɔntʋnɑɑ, yɑɑ pɑɑ mɑ tɔnʋɣʋ mɑɣɑmɑɣɑ kɛ mɑ lɑpɑ ɑwusɑ sɩ ye pɑ wɔkɩ kɔkɔ pɑ wɔ, ye mɑɑ sɔɔlǝɣɩ yǝlɑɑ pǝ tǝnɑɣɑ mpʋ yem kɛ́.
\p
\v 4 Sɔɔlʋɣʋ ɩ́ wɛɛ ɩsɑɣɑkʋnyɩɩlʋɣʋ fɛɩ, tɩ hɔm fɛɩ, ɩsǝcɑʋ fɛɩ. 
\v 5 Ye sɔɔlʋɣʋ ɩ́ wɛɛ fɛɛlɛ fɛɩ nyǝntʋ nɑtǝlɩ tɩɩ kɔŋ, ye sɔɔlʋɣʋ ɩ́ wɛɛ yʋlʋ ɩɩ pɛɛkǝɣɩ ɩ nyʋɣʋ nyǝntʋ tike. Sɔɔlʋɣʋ ɩ́ wɛɛ pɑ́ɑ́nɑ́ mʋɣʋ fɛɩ, sɔɔlʋɣʋ ɩ́ wɛɛ té kɩɩ tisiɣi sɩ mɑɑ nɑ́ mɑɑ nɑ́ pǝ́ wɛɛ. 
\v 6 Sɔɔlʋɣʋ ɩ́ wɛɛ kɩɩ cɑɑ kʋ nɩɩ kɑwɑlɑɣɑ tɑŋ. Amɑ tɑmpɑnɑ tɑŋ kɛ kʋ cɑɑkɩ. 
\v 7 Ye sɔɔlʋɣʋ wɛɛ cʋtʋɣʋ fɛɩ pɑɑ mpi pǝ tɑɑ. Ye sɔɔlʋɣʋ wɛ pɑɑ mpi pǝ tɑɑ nɑɑni nɑ tɛɛlʋɣʋ nɑ suulu pǝ wɛɛ kɛ́.
\p
\v 8 Sɔɔlʋɣʋ tɔm kɑ wɛɛnɑ tɑm tɔɔ, Ɩsɔ kʋheelitu kpɑɑlʋɣʋ kɑ́ sɩɩ tǝnɑɣɑ. Wei pǝ sɑɑwɑ nɑ ɩ́ yɔɣɔtǝɣǝnɑ tɔmnɑɑ mpɑ nɔɣɔlʋ ɩɩ nɩɩkɩ tɔ pɩɩ tɛ nɑ pǝ́ tɛ́. Nyǝm kɑ́ tɛ nɑ pǝ́ sɑɑlɩ yem. 
\v 9 Pǝ tɑɣɑ pʋlʋ tɔɔ, mpi mpi tǝ nyǝmɑ́ tɔ titite kɛ́, nɑ Ɩsɔ kʋheelitu nti tǝ kpɑɑlǝɣɩ tɔ tǝlɛ tǝ sɛkǝɣɩ kɛ́. 
\v 10 Amɑ pǝ kɔmɑ nɑ mpi pǝ tewɑ tǝkpɑtɑɑ tɔ pǝ kɔɔ, mpi mpi pǝ sɛkɑɑ tɔ pǝ sɑɑlǝɣɩ yem kɛ́.
\p
\v 11 Mɑɑ kɛ́ pǝyɑɣɑ tɔ mɑ yɔɣɔtɑɣɑ nɑ mɑ hʋwɛɛ nɑ mɑ kʋmɑɣɑsǝm pǝcɛnyǝm kɛ́. Amɑ mɑ ɩsɛ kɔmɑ nɑ ɑ́ nyɑɑlɩ tɔ mɑ lɔ pǝcɛnyǝm tǝnɑ. 
\v 12 Kɑɣɑnɑ tǝ nɑɑ kɛ́ ɩsɩɩ pɑ nɑɑkʋɣʋ pʋlʋ ɩlɛɛmʋɣʋ tǝcɑntǝlɑɑ kɛ tiŋ tɑɑ tɔ. Amɑ tɩɩ tɛ nɑ tǝ́ nɑ́ tǝkelekele. Kɑɣɑnɑ mpi mpi mɑ nyǝmɑ́ tɔ titite kɛ́. Amɑ mɑɑ tɛ nɑ mɑ́ nyɩ pǝ tǝnɑ tǝpɑɩpɑɩ ɩsɩɩ Ɩsɔ nyǝmɑ-m tɔ.
\p
\v 13 Pǝnɛntɛ pǝ́ yelinɑ yɑɑsinɑɑ pɑnɛ pɑ tooso ɩlɛ, nɑɑni nɑ tɛɛlʋɣʋ nɑ sɔɔlʋɣʋ. Amɑ sɔɔlʋɣʋ ntɛ́ pɑ tooso tɑɑ ɑcɛpɑ.
\c 14
\s1 Mpi mpi pǝ lɑpʋ sɑɑkɩ yǝlɑɑ tɔ pǝ tɔm tɔtɔ
\p
\v 1 Ye mpʋ ɩlɛ ɩ́ niinɑ ɩsɛ kɛ sɔɔlʋɣʋ tɔm. Ɩ́ nyɩɩlɩ teu sɩ pʋlʋ lɑpʋ ɩ́ sɑɑ-mɛɣɛ Ɩsɔ mpɑɑʋ tɑɑ tɔtɔ, ɩlɛ pǝ́ kǝlǝnɑ Ɩsɔ kʋheelitu kpɑɑlʋɣʋ. 
\v 2 Wei ɩ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ pǝ tɑɣɑ yǝlɑɑ kɛ ɩ yɔɣɔtǝɣǝnɑ, ɑmɑ Ɩsɔ kɛ́. Pǝ tɑɣɑ pʋlʋ, ɩ́ nɑ ɩ yɔɣɔtʋɣʋ nɑ ɩ tɛm nɔɣɔlʋ ɩɩ nɩɩ ɩ tɔm tɔ se. Tɑmpɑnɑ nnɑ ɑ kɑ pɑmɑ tɔ ɑnǝɣɩ ɩ kuliɣinɑ Ɩsɔ Feesuɣu toŋ. 
\v 3 Amɑ wei ɩ kpɑɑlǝɣɩ Ɩsɔ kʋheelitu tɔ ɩ lɑkɩ kɛ́ nɑ yǝlɑɑ nyɔɔkɩ toŋ kɛ Ɩsɔsɛɛlɛ mpɑɑʋ tɑɑ. Ɩ kpɑɑsǝɣɩ pɑ ɑpɑlʋtʋ nɑ ɩ́ hɛɛsǝɣɩ pɑ lɑŋɑ kɛ́. 
\v 4 Amɑ wei ɩ́lɛ́ ɩ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ ɩ tǝɣɩ ɩ sɔɔsǝɣɩ toŋ, nɑ wei ɩ́lɛ́ ɩ kpɑɑlǝɣɩ Ɩsɔ kʋheelitu tɔ Yesu sɛɛlɑɑ kpekǝle tǝnɑɣɑ ɩ sɔɔsǝɣɩ toŋ.
\p
\v 5 Mɑ sɔɔlɑ teu sɩ mǝ tǝnɑ ɩ́ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ. Amɑ mɑ kǝlɑ nyɩɩlʋɣʋ kɛ teu sɩ Ɩsɔ kʋheelitu kpɑɑlʋɣʋ ɩ́ sɑɑ-mɛ. Pɔpɔtʋ fɛɩ, wei ɩ kpɑɑlǝɣɩ Ɩsɔ kʋheelitu tɔ ɩ wɑɑsǝɣɩ nɑ pǝ́ kǝlɩ wei ɩ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ. Amɑ ye nɔɣɔlʋ wɛɛ nɑ ɩ́ kɑ́ pǝsɩ nɑ ɩ́ tɛlǝsɩ nɑ Yesu sɛɛlɑɑ sɔɔsɩ toŋ pǝ pɑɑsi. 
\v 6 Mɑ tɑɑpɑlɑɑ mɑ pɔɔsǝɣɩ-mɛ sɩ ye mɑ kɔmɑ mǝ tɛ nɑ mɑ́ yɔɣɔtǝɣǝnɑ-mɛɣɛ tɔmnɑɑ mpɑ nɔɣɔlʋ ɩɩ nɩɩkɩ tɔ nti tǝ tɑɑ kɛlɛ mɑ wɑɑsɑ-mɛ ɩlɛ? Mɑ tɑ wɑɑsɩ-mɛɣɛ nɑtǝlɩ tǝ tɑɑ kɛ́ pɑɑ pǝcɔ pǝcɔ. Amɑ ye mɑ kɔmɑ nɑ mɑ́ heelɑ-mɛɣɛ tɔm kʋŋmɛsǝtʋ nɑtǝlɩ, yɑɑ nyǝm tɔm nɑtǝlɩ, yɑɑ Ɩsɔ kʋheelitu nɑtǝlɩ, yɑɑ sɛɣɛsʋɣʋ, ɩlɛ teu ntɛ́.
\p
\v 7 Tǝ́ kɛɛsǝnɑ pɑɑlɛ wontu nɑ tǝ́ nɑ́. Ye pɑ hʋlǝɣɩ hǝlɑɣɑ yɑɑ pɑ mɑkɩ sɑŋkʋ, nɑ pǝ hʋlʋɣʋ nɑ pǝ mɑpʋ tɑ tǝŋ, ɩsǝnɑɣɑ pɑɑ cɛkǝnɑ sɩ tǝnɛɣɛ hǝlɑɣɑ hʋllʋ hʋlǝɣɩ nɑ sɑŋkʋ mɑtʋ mɑkɩ? 
\v 8 Tutuɣu hʋllʋ ɩ́ tɑ yɑɣɑ ɑpɑlʋ tutuɣu, ɩsǝnɑɣɑ yʋlʋ kɑ́ nyǝnɑ sɩ ɩ tɑɣɑnǝɣɩ ɩ tǝɣɩ yoou tɔɔ? 
\v 9 Mpʋ tɔtɔɣɔ pǝ wɛɛ, ɩsǝnɑɣɑ yʋlʋ kɑ́ pǝsɩ nɑ ɩ́ cɛkǝnɑ tɔm nti lɛlʋ yɔɣɔtǝɣɩ tɔ, ye tɔm nti nɔɣɔlʋ ɩɩ nɩɩkɩ tɔɣɔ ɩ yɔɣɔtǝɣǝnɑ ɩ tɔm ntɩ? Ye mpʋ yɔɣɔtʋlʋ lɔɔ ɩ tɔm kɛ yem kɛ́. 
\v 10 Antulinyɑ tɑɑ cǝnɛ nsǝmɑ tɔɔwɑɣɑ, nɑ ɑ tɑɑ kʋlʋmtǝlɛ fɛɩ nte tǝ tɑ kɛ tɔm tɔ. 
\v 11 Pɑɑ nɑ mpʋ ye wei ɩ yɔɣɔtǝɣǝnɑ-m nɑ mɑɑ nɩɩkɩ ɩ tɔm, tǝ nyǝnǝɣɩ tǝmɑ nɑ ɩsɛ kɛ́. 
\v 12 Mpʋ tɔ ɩsɩɩ ɩ́ sɔpʋ nyʋɣʋ sɩ Ɩsɔ Feesuɣu ɩ́ yele nɑ pʋlʋ lɑpʋ sɑɑ-mɛ tɔ, ɩ́ pɛɛkǝɣɩ sɩ pǝ sɑɑ-mɛɣɛ teu. Amɑ pǝ́ kǝlǝnɑ mpi pɩɩ sɔɔsɩ Yesu sɛɛlɑɑ kɛ toŋ tɔ.
\p
\v 13 Pǝ tɔɔ kɛ́ wei ɩ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ, pʋntʋ ɩ́ sǝlǝmɩ Ɩsɔ nɑ ɩ́ hiki tɔm ntɩ tǝ tɛlǝsʋɣʋ nyǝm tɔtɔ. 
\v 14 Pǝ tɑɣɑ pʋlʋ, ye mɑ sǝlǝmǝɣǝnɑ tɔmnɑɑ mpɑ nɔɣɔlʋ ɩɩ nɩɩkɩ tɔ, mɑ tɑɑ kɛ́ pǝ sǝlǝmǝɣɩ yem nɑ mɑ lǝmɑɣɑsǝlɛ nɑ́ɑ́ cɑɣɑ kpɛtɛ. 
\v 15 Ye mpʋ ɩsǝnɑɣɑ mɑɑ lɑ? Mɑɑ sǝlǝmɩ hɑtuu mɑ tɑɑ kɛ́, nɑ mɑ́ sǝlǝmǝnɑ mɑ lǝmɑɣɑsǝlɛ tɔtɔ. Ye yontu mɑ yoo mɑ tɑɑ, nɑ mɑ́ yoonɑ mɑ lǝmɑɣɑsǝlɛ tɔtɔ. 
\v 16 Ḿpʋ́ɣʋ́ pǝ wɛɛ mɛɛ, ye hɑtuu nyɑ́ tɑɑ tike kɛ n sɛɛ Ɩsɔ kɛ́ ɩ́ nɑ tǝmlɛ, ɩsǝnɑɣɑ wei ɩ wɛ sɑmɑɑ tɑɑ kɛ́ yem nɑ ɩ́ tɑ́ cɛkǝnɑ tɔ ɩ kɑ́ nyǝnɑ timpi ɩ́lɛ́ ɩ kɑ́ tɔ sɩ: Ami, tɔɣɔ nyɑ́ sɛɛtʋ tǝnɛ tǝ tɑɑ? Ɩ kɑɑ pǝsɩ nɑ ɩ́ nyɩ nti n yɔɣɔtǝɣɩ tɔ. 
\v 17 Pɑɑ nɑ nyɑ́ Ɩsɔ sɛɛʋ sɩ ɩ́ nɑ tǝmlɛ tewɑ teu tɔ, lɛlʋ nɑ́ tɑ wɑɑ pʋlʋɣʋ pǝ tɑɑ.
\p
\v 18 Mɑ sɑmɑ Ɩsɔ, mpi tɔ mɑ yɔɣɔtǝɣɩ tɔmnɑɑ mpɑ nɔɣɔlʋ ɩɩ nɩɩkɩ tɔ nɑ pǝ kǝlɩ mǝ tǝnɑ tǝpɑɩ. 
\v 19 Amɑ ɩsɩɩ Yesu sɛɛlɑɑ sɛɛkʋɣʋ tǝcǝɣǝcǝɣɩ tɔ pǝ kǝlɑ-m teu sɩ mɑ́ yɔɣɔtɩ tɔm pee kɑkpɑsɩ tike nti pɑɑ nɩɩ teu nɑ pǝ kuliɣi lɛlɑɑ ɩsɛ tɔ, nɑ mpi mɑɑ hutiɣi tɔmǝŋ tɔmǝŋ nɑ tɔmnɑɑ mpɑ nɔɣɔlʋ ɩɩ nɩɩkɩ tɔ pɑ tɑɑ tɔ.
\p
\v 20 Mɑ tɑɑpɑlɑɑ, ye ɩ́ hʋʋkɩ hʋwɛɛ, ɩ́ yele pǝcɛ nyǝnɑ. Amɑ ye ɩsɑɣɑtʋ tɔm tɑɑ ɩlɛ, ɩ́ lɑkɩ ɩsɩɩ piyɑ nsi sɩ tɑ nyɩ ɩsɑɣɑtʋ lɑpʋ tɔ. Amɑ ɩ́ wɛɛnɑ sɔsɔhʋwɛɛ kɛ mǝ hʋwɛɛ tɑɑ. 
\v 21 Ɩsɔ Tɔm tɑɑ pɑ ŋmɑɑwɑ sɩ:
\q1 Tɑcɑɑ tɔmɑ sɩ mɑɑ yɔɣɔtǝnɑ piitim pǝnɛɣɛ.
\q1 Mɑɑ yele nɑ yǝlɑɑ kpɑɩ nyǝ́mɑ
\q1 yɔɣɔtǝnɑ-wɛ nɑ pɛlɛ pɑ tɛ tɑɑ.
\q1 Kpɑɩ nyǝ́mɑ kɑ́ yɔɣɔtǝnɑ-wɛ.
\q1 Pɑɑ nɑ mpʋ tɔ mɑ yǝlɑɑ kɑɑ nɩɩnɑ-m.
\m
\v 22 Pǝ tɔɔ kɛ́ tɔmnɑɑ mpɑ nɔɣɔlʋ ɩɩ nɩɩkɩ tɔ pɑ yɔɣɔtʋɣʋ sɑɑkʋɣʋ yʋlʋ nɑ ɩ́ yɔɣɔtǝɣɩ tɔ, ɩ yɔɣɔtǝɣɩ kɛ́ sɩ pǝ hʋ́lɩ́ mpɑ pɑ tɑ kɛ Ɩsɔ sɛɛlɑɑ tɔɣɔ pʋlʋɣʋ. Amɑ mpɑ pɑ kɛ́ Ɩsɔ sɛɛlɑɑ tɔ pɩɩ hʋ́lǝ́ɣɩ́ pɛlɛɣɛ mpʋ. Nɑ Ɩsɔ kʋheelitu kpɑɑlʋɣʋ sɑɑʋ nɑ́ hʋ́lǝ́ɣɩ́ Ɩsɔ sɛɛlɑɑ kiŋ kɛ pʋlʋɣʋ. Amɑ mpɑ pɑ tɑ kɛ Ɩsɔ sɛɛlɑɑ tɔ pɩɩ hʋ́lǝ́ɣɩ́ pɛlɛɣɛ mpʋ.
\p
\v 23 Ye Yesu sɛɛlɑɑ kpekǝle tǝnɑ ɩ́ kotɑɑ nɑ pɑ́ tǝnɑ pɑ́ sʋʋ tɔmnɑɑ mpɑ nɔɣɔlʋ ɩɩ nɩɩkɩ tɔɣɔ yɔɣɔtʋɣʋ, nɑ mpɑ pɑ tɑ cɛkǝnɑ yɑɑ mpɑ pɑ tɑ kɛ Ɩsɔ sɛɛlɑɑ tɔ pɑ́ mɑɣɑnɑ-mɛ, pɑ kɑɑ yɑɑ-mɛɣɛ kpɑŋtʋnɑɑ? 
\v 24 Amɑ ye Ɩsɔ kʋheelitu kɛ mǝ tǝnɑ ɩ́ kpɑɑlǝɣɩ, nɑ wei ɩ tɑɑ kɛ́ Ɩsɔ sɛɛlʋ yɑɑ yʋlʋ wei ɩ tɑ cɛkǝnɑ pʋlʋ tɔ ɩ́ sʋʋ, tǝ tǝnɑ nti ɩ nɩɩkɩ mpʋ tɔ tɩɩ yele nɑ pǝ́ kuli ɩ wɑɑlɩ nɑ ɩ́ nɑ́ sɩ ɩsɑɣɑtʋ kɛ ɩ lɑkɩ. 
\v 25 Nɑ pɩɩ kuli ɩ tɑɑ hʋwɛɛ tɔɔ tǝkelekele nɑ ɩ́ hǝntɩ Ɩsɔ tɛɛ nɑ ɩ́ sɛɛ-ɩ nɑ ɩ́ tɔŋ sɩ tɑmpɑnɑ Ɩsɔ wɛ pɑnɛ pɑ hɛkʋ.
\s1 Liɣituɣu kɑɑ wɛɛ Yesu sɛɛlɑɑ kpekǝle tɑɑ
\p
\v 26 Pǝnɛntɛ mɑ tɑɑpɑlɑɑ suweɣe tɩɩ yɔtɔtɩ nɑ tǝ́ sɩɩ yee? Ɩ́ kotiɣi Ɩsɔ sɛɛʋ tɔ, nɔɣɔlʋ nɑ́ wɛnɑ yontu, nɔɣɔlʋ ɩlɛɣɛ sɛɣɛsʋɣʋ, nɔɣɔlʋ ɩlɛɣɛ tɔm kʋŋmɛsǝtʋ nɑtǝlɩ nɔɣɔlʋ ɩlɛɣɛ tɔmnɑɑ mpɑ nɔɣɔlʋ ɩɩ nɩɩkɩ tɔ tǝ yɔɣɔtʋɣʋ, nɑ nɔɣɔlʋ ɩlɛɣɛ tǝ tɛlǝsʋɣʋ nyǝm. Tɔʋ pǝ tǝnɑɣɑ mpʋ pǝ wɛɛ kɛ́ sɩ pǝ́ sǝnɑ Yesu sɛɛlɑɑ kpekǝle nɑ tǝ́ polo lɔlɔ. 
\v 27 Ye pɑ yɔɣɔtǝɣǝnɑ tɔmnɑɑ mpɑ nɔɣɔlʋ ɩɩ nɩɩkɩ tɔɣɔlɔ, yǝlɑɑ nɑɑlɛ yɑɑ tooso ɩ́ yɔɣɔtǝɣɩ nɑ pɑ́ kɑɑsǝɣɩ tǝmɑ, pɑ tɑɑ tɛɛ mpʋ. Nɑ nɔɣɔlʋ nɑ́ɑ́ tɛlǝsǝɣɩ-tɩ. 
\v 28 Ye nɔɣɔlʋ fɛɩ sɩ ɩ kɑ́ pǝsɩ nɑ ɩ́ tɛlǝsɩ pǝ hʋwɛɛ ɩlɛ yɔɣɔtǝlɑɑ mpɛ pɑ tɑɑ nɔɣɔlʋ ɩ́ tɑɑ yɔɣɔtǝnɑ nɔɣɔ sɔsɔɣɑ kɛ sɑmɑɑ tɑɑ. Amɑ ɩ́ yɔɣɔtǝɣɩ ɩ tɑɑ nɑ pǝ́ wɛɛ ɩ́ nɑ Ɩsɔ pɑ nɑɑlɛ pɑ tɔm. 
\v 29 Ye Ɩsɔ kʋyɔɣɔtʋtʋ tɛlǝsǝlɑɑ ɩlɛ, yǝlɑɑ nɑɑlɛ yɑɑ tooso ɩ́ yɔɣɔtǝɣɩ nɑ pǝ́ kɑɑsɑ mpɑ, pɛlɛ pɑ mɑɣɑsǝɣɩ teu kɛ nti yɔɣɔtǝlɑɑ yɔɣɔtǝɣɩ tɔ nɑ pɑ́ nɑ́. 
\v 30 Amɑ ye yʋlʋ nɔɣɔlʋ wɛ sɑmɑɑ tɑɑ tǝnɑ nɑ Ɩsɔ hʋlɑ-ɩ tɔm kʋŋmɛsǝtʋ nɑtǝlɩ, wei ɩ kɑ yɔɣɔtɑɣɑ tɔ ɩ́lɛ́ ɩ́ su nɑ pǝ́cɔ́. 
\v 31 Ɩ́ pǝsǝɣɩ nɑ ɩ́ kpɑɑlɩ Ɩsɔ kʋheelitu kɛ mǝ tǝnɑɣɑ kʋlʋm kʋlʋm, ɩlɛnɑ pǝ́ kuliɣi yǝlɑɑ ɩsɛ nɑ pǝ́ hɑ-wɛɣɛ ɑpɑlʋtʋ. 
\v 32 Ɩsɔ kʋyɔɣɔtʋtʋ tɛlǝsǝlɑɑ mpɛ, pɑ́ nyɩ pɑ tɩ kpɑʋ kɛ pǝ tɑɑ. 
\v 33 Mpi tɔ, hɛɛsʋɣʋ kɛ Ɩsɔ kɔŋnɑ pǝ tɑɣɑ liɣituɣu.
\p Yesu sɛɛlɑɑ kpekɑ tǝnɑ tɑɑ ḿpʋ́ɣʋ́ pǝ wɛɛ. 
\v 34 Ye Yesu sɛɛlɑɑ ɩ́ kotɑɑ, ɑlɑɑ nɔɔsɩ tɑɑ ɩ́ tɑɑ lɩɩ fɛŋ. Pɑ fɛɩnɑ mpɑɑ sɩ pɑ́ yɔɣɔtǝɣɩ. Kʋsǝsɩɩtʋ yɔɣɔtɑ mpʋ sɩ ɑlɑɑ kɑ́ pɑsɑ pɑ tǝɣɩ. 
\v 35 Amɑ ye pɑ cɑɑ nɑtǝlǝɣɩ pɔɔsʋɣʋ, pɑ́ kpemɑ tǝyɑɣɑ ɩlɛ pɑɑ pɔɔsɩ pɑ pɑɑlɑɑ. Yesu sɛɛlɑɑ ɩ́ kotɑɑ, pǝ tɑ mʋnɑ ɑlɑɑ ɩ́ yɔɣɔtɩ.
\p
\v 36 Pǝ lɑpɑ mpʋ tɔ mǝ kiŋ kɛ Ɩsɔ Tɔm kɑ lɩɩnɑɑ kɛ́ yee? Yɑɑ mǝ tike ɩ́ nɩɩnɑ-tɩ? 
\v 37 Ye nɔɣɔlʋ hʋʋ sɩ ɩ kɛ Ɩsɔ kʋyɔɣɔtʋtʋ tɛlǝsʋlʋ, yɑɑ ɩnǝɣɩ Ɩsɔ mpɑɑʋ tɑɑ pʋlʋ lɑpʋ sɑɑwɑ, pʋntʋ ɩ́ nyɩ teu sɩ, nti mɑ ŋmɑɑ-mɛ tɔ Tɑcɑɑ kʋsǝsɩɩtʋ kɛ́. 
\v 38 Amɑ wei ɩ́ tɑ nyɩ mpʋ, pɑ́ tɑɑ nyǝnɩ-ɩ sɩ pʋlʋ.
\p
\v 39 Pǝ tɔɔ ɩlɛ mɑ tɑɑpɑlɑɑ ɩ́ kɑ́ nyɩɩlǝɣɩ Ɩsɔ kʋheelitu kpɑɑlʋɣʋ kɛ́, ɩlɛ ɩ́ tɑɑ kisi tɔmnɑɑ mpɑ nɔɣɔlʋ ɩɩ nɩɩkɩ tɔ pɑ yɔɣɔtʋɣʋ tɔtɔ. 
\v 40 Pǝ tǝnɑ mpi ɩ lɑkɩ tɔ ɩ́ lɑ ɩsɩɩ pǝ nǝɣǝsǝnɑɑ tɔ, ɩ́ tɑɑ lɑ yem yem.
\c 15
\s1 Kilisiti sǝm nɑ ɩ fem pǝ tɔm
\p
\v 1 Mɑ tɑɑpɑlɑɑ, mɑ sɔɔlɑ teu sɩ pǝnɛntɛ mɑ́ tɔɔsɩ-mɛɣɛ Lɑɑpɑɑlɩ Kʋpɑŋ wei mɑɑ kpɑɑlɑ-mɛ tɔ, wei ɩ́ nɩɩwɑ nɑ ɩ́ tɛmnɑ-ɩ mǝ tɑɑ kɛ́ teu tǝkpɑtɑɑ tɔ. 
\v 2 Lɑɑpɑɑlɩ Kʋpɑŋ ɩnɩ ɩ tɔɔ kɛ́ pǝ yɑpɑ mǝ nyʋɣʋ, ye ɩ́ tɔkɑ-ɩ teu ɩsɩɩ mɑɑ sɛɣɛsʋɣʋ-mɛɣɛ-ɩ tɔ. Ye pǝ tɑɣɑ mpʋ ɩ́ tɛm mǝ tɑɑ tɔ yem tɔɔ kɛ́.
\p
\v 3 Sɛɣɛsʋɣʋ sɔsɔɔʋ ŋku pɑ sɛɣɛsɑ mɑ́ nɑ mɑɑ sɛɣɛsɩ-mɛɣɛ-kʋ tɔɣɔlɛ sɩ: Kilisiti sǝpɑ tɑ́ ɩsɑɣɑtʋ tɔɔ ɩsɩɩ Ɩsɔ Tɔm tɑɑ yɔɣɔtɑɑ tɔ. 
\v 4 Pɑ pimɑ-ɩ ɩlɛnɑ kʋyɛɛŋ tooso wule ɩ́ fe, nɑ Ɩsɔ Tɔm tɑɑ kɑ yɔɣɔtɑ ḿpʋ́ɣʋ́. 
\v 5 Ḿpʋ́ɣʋ́ ɩ lɩɩ Piyɛɛ tɔɔ, pǝ wɑɑlɩ kɛ́ ɩ lɩɩ tillɑɑ nɑɑnʋwɑ nɑ nɑɑlɛ tɔɔ. 
\v 6 Pǝ wɑɑlɩ wɑɑlɩ kɛ́ ɩ lɩɩ ɩ ɩfɑlɑɑ mpɑ pɑ nyʋɣʋ kǝlɑ nɑsǝlɛ nɑ nɩɩnʋwɑ (500) tɔ pɑ tɔɔ kɛ́ nɔɣɔ kʋlʋmɑɣɑ. Pɑ tɑɑ lɛlɑɑ wɛnɑ pɑ ɩsɛ, ɑmɑ lɛlɑɑ nɑ́ sǝpɑ. 
\v 7 Pǝ wɑɑlɩ kɛ́ ɩ lɩɩ Sɑɑkɩ tɔɔ, Sɑɑkɩ tɔɔ lɩɩʋ wɑɑlɩ kɛ́ ɩ lɩɩ tillɑɑ tǝnɑ tɔɔ.
\p
\v 8 Ɩ lɩɩ ḿpʋ́ɣʋ́ pɑ tǝnɑ pɑ tɔɔ nɑ pǝ́ tɛ, ɩlɛnɑ ɩ́ lɩɩ mɑ wei mɑ wɛ ɩsɩɩ yʋlʋ wei pǝ hɔlʋsɑ kʋhɔlʋsʋ tɔ mɑ tɔɔ tɔtɔ. 
\v 9 Tillɑɑ tɑɑ sǝkpelu ntɛ́ mɑ́, nɑ mɑ tɑ tɩɩ nǝɣǝsǝnɑ pɑ́ yɑɑ-m tillu. Mpi tɔ, mɑ́ nɑɑsɑɣɑnɑ Ɩsɔ sɛɛlɑɑ kpekɑ. 
\v 10 Amɑ Ɩsɔ pɛɛlɛɛ tɔɔ ɩlɛ, mɑ kɛ́ mpi mɑ kɛ́ ɩsǝntɔ tɔ. Nɑ pɛɛlɛɛ nnɑ Ɩsɔ lɑpɑ-m mpʋ tɔ, ɑ tɑ sɑɑlɩ yem. Amɑ ɑ tɔɔ mɑ lɑpɑ tǝmlɛ nɑ pǝ́ kǝlɩ tillɑɑ lɛmpɑ tǝnɑ. Tɑmpɑnɑ pǝ tɑɣɑ mɑ toŋ tɑɑ kɛ́ mɑ lɑpǝnɑɑ. Amɑ Ɩsɔ pɛɛlɛɛ nnɑ ɩ hʋlɑ-m tɔ ɑ tɔɔ kɛ́. 
\v 11 Pǝ tɔɔ kɛ́ pɑɑ mɑ cɔlɔɣɔ pɩɩ lɩɩnɑɑ yɑɑ pɛlɛ pɑ cɔlɔ, tɑ́ wɑɑsʋ ɩnǝɣǝlɛ, nɑ nti ɩ́ mʋwɑ tɔɣɔlɛ.
\s1 Tɑ́ sǝm nɑ tɑ́ fem pǝ tɔm
\p
\v 12 Ɩsǝnɑɣɑ pǝ wɛɛ nɑ mǝ tɑɑ lɛlɑɑ tɔŋ sɩ sǝtɑɑ kɑɑ tɛ nɑ pɑ́ fe? Pǝyele Kilisiti fem nɑ sǝm tɑɑ tɔ pǝ wɑɑsʋ kɛ tǝ wɛɛ nɑ tǝ́ lɑkɩ. 
\v 13 Ye tɑmpɑnɑ sǝtɑɑ kɑɑ tɛ nɑ pɑ́ fe ɩlɛ pǝ wɛɛ sɩ Kilisiti nɑ́ tɑ́ fe ntɛ́. 
\v 14 Nɑ ye tɑmpɑnɑ Kilisiti tɑɑ fe ntɔ, tɑ́ wɑɑsʋ tɑ́ɑ́ fɛɩnɑ nyʋɣʋ tǝtʋlɛ, nɑ ɩ́ tɑɑ nyɩ nti ɩ́ kɑ́ lɑnɑ nɑɑni tɔ. 
\v 15 Ye tɑmpɑnɑ sɩ sǝtɑɑ kɑɑ tɛ nɑ pɑ́ fe, pɩɩ kulɑ tɑ́ wɑɑlɩ kɛ́. Mpi tɔ, pǝ wɛ ɩsɩɩ tǝ tʋ Ɩsɔ kɛ́ tɔm ntɛ́. Pǝ tɑɣɑ pʋlʋ tɔɔ, tɑ́ yɔɣɔtǝnɑ nɑ tɑ́ nɔɔsɩ sɩ Ɩsɔ feesɑ Kilisiti pǝyele yem. 
\v 16 Mpi tɔ, ye sǝtɑɑ ɩ tɑɑ tɛŋ sɩ pɑ fe, Kilisiti nɑ́ tɑɑ fe mpʋ. 
\v 17 Nɑ ye Kilisiti ɩ́ tɑɑ fe ntɔ, ɩ́ tɛm ḿpʋ́ɣʋ́ mǝ tɑɑ tɔ pǝ puɣusɑ-mɛɣɛ, nɑ ɩ́ lepɑ mǝ ɩsɑɣɑtʋ tɑɑ tɔtɔɣɔ. 
\v 18 Nɑ pǝ wɛɛ tɔtɔ sɩ mpɑ pɑ tɛmɑ pɑ tɑɑ nɑ Kilisiti hɑlǝnɑ pɑ sǝm tɔ pɑ lepɑ. 
\v 19 Ye tǝ wɛʋ nɑ tɑ́ ɩsɛ kɛ ɩsǝntɔ tɔ pǝ tɔɔ tike kɛ tǝ tɛɛlǝɣɩ Kilisiti kiŋ ɩlɛ yǝlɑɑ tǝnɑ tɑɑ tɑɣɑlɛ ɑsɑlɑʋ nyǝ́mɑ mɑɣɑmɑɣɑ.
\p
\v 20 Amɑ tɑmpɑnɑ tɔɔ Kilisiti femɑɣɑ sɩ pǝ́ hʋ́lɩ́ tǝkpɑtɑɑ sɩ mpɑ pɑ sǝpɑ tɔ pɑɑ tɛ nɑ pɑ́ fe mpʋ tɔtɔ. 
\v 21 Pǝ tɑɣɑ pʋlʋ tɔɔ, yʋlʋ lɛlʋ kɔnnɑ sǝm, nɑ lɛlʋ nɑ́ɑ́ kɔnɑ tɔtɔɣɔ sǝtɑɑ feesuɣu tɔm. 
\v 22 Yǝlɑɑ tǝnɑ nɑ Atɑm pɑ kpɛntɑɑ kɛ́, pǝ tɔɔ kɛ́ pɑ sǝkɩ. Amɑ pɑ́ nɑ Kilisiti pɑ kpɛntɑɑ tɔɣɔ pɑ tǝnɑ pɑɑ tɛ nɑ pɑ́ kʋlɩ. 
\v 23 Amɑ pɑɑ wei nɑ ɩ looŋɑ kɛ́. Kilisiti kɛ pɑ tɑɑlǝnɑ feesuɣu kɛ pɑ tǝnɑ pɑ tɑɑ, nɑ kʋyɑŋku ɩ kɑ́ kɔɔ tɔɣɔ pɑ tǝnɑ mpɑ ɩ tɩ tɔ pɛlɛ pɑɑ fe. 
\v 24 Pǝ wɑɑlɩ ɩlɛ pǝ kɔŋ tɛm ntɛ́. Pǝ tɑɣɑ pʋlʋ, Kilisiti kɑ́ wɑkǝlɩ kɑwulɑsɩ tǝnɑ, ɩ kɑ́ lǝsɩ pǝsʋɣʋ tǝnɑ nɑ ɩ́ yɔkɩ tomɑ sɔsɔɔnɑ tǝnɑ nɑ ɩ́ mǝŋnɑ kɑwulɑɣɑ nɑ ɩ́ cɛlɑ Tɑcɑɑ Ɩsɔ. 
\v 25 Pǝ tɑɣɑ pʋlʋ, pǝ wɛɛ sɩ Kilisiti kɑ́ tɔkɩ kɑwulɑɣɑ kɛ ḿpʋ́ɣʋ́ hɑlǝnɑ Ɩsɔ tɛ kolontunɑɑ tǝnɑɣɑ kǝlʋɣʋ nɑ ɩ́ mǝŋnɑ-wɛɣɛ Kilisiti tɛɛ. 
\v 26 Kɑntǝkɑɣɑ kolontu wei pɑɑ wɑkǝlɩ tɔɣɔlɛ sǝm. 
\v 27 Ḿpʋ́ɣʋ́ mɛɛ, Ɩsɔ Tɔm tɑɑ yɔɣɔtɑɑ sɩ: Ɩsɔ mǝŋnɑ pǝ tǝnɑɣɑ Kilisiti tɛɛ. Nɑ pɑ yɔɣɔtʋɣʋ mpʋ sɩ pǝ tǝnɑ tɔ, pǝ hʋ́lǝ́ɣɩ́ tǝkelekele sɩ pɑ tɑ kpɛŋnɑ Ɩsɔ wei ɩ tʋ pǝ tǝnɑɣɑ Kilisiti tɛɛ tɔ. 
\v 28 Pǝ tǝnɑ pǝ kɔŋ pǝ́ mǝlɩ Kilisiti tɛɛ ɩlɛnɑ Kilisiti mɑɣɑmɑɣɑ wei ɩ kɛ́ pǝyɑlʋ tɔ ɩ́ mǝlɩ Ɩsɔ wei ɩ mǝŋnɑ pǝ tǝnɑɣɑ ɩ tɛɛ tɔ ɩ́lɛ́ ɩ tɛɛ. Ɩlɛnɑ Ɩsɔ tɔɣɔ kɑwulɑɣɑ tǝkpɑtɑɑ kɛ pǝ tǝnɑ pǝ tɔɔ.
\p
\v 29 Ɩ́ mɑɣɑsɩ mpɑ pɑ yeki sɩ pɑ́ sɔɔ-wɛɣɛ Ɩsɔ lʋm kɛ sǝtɑɑ lonɑ tɔ nɑ ɩ́ nɑ. Pɑ tɛɛlǝɣɩ sɩ pɑɑ hiki weɣelɛ ɩlɛ yee? Nɑ ye tɑmpɑnɑ tɔɔ sɩ sǝtɑɑ kɑɑ fe, pepe tɔɔ kɛ́ pɑ yeki nɑ pɑ́ sɔɔ-wɛɣɛ Ɩsɔ lʋm kɛ pɑ lonɑ? 
\v 30 Nɑ tɑ́, pepe mɑɣɑmɑɣɑ nyʋɣʋ tɔɔ kɛ́ tǝ wɩɩ tɑ́ tɩ nɑ tǝ wɛ sǝm nɔɣɔ tɑɑ kɛ́ pɑɑ kʋyɑŋku? 
\v 31 Mɑ tɑɑpɑlɑɑ, pɑɑ kʋyɑŋku mɛʋmɛʋ tɑɑ kɛ́ mɑ wɛɛ. Pǝ tɑɣɑ pʋlʋ tɔɔ kɛ́ mɑ heeliɣi-mɛɣɛ mpʋ, mɑ mʋɣʋlǝɣǝnɑ mǝ Yesu Kilisiti tǝŋʋɣʋ kɛ teu kɛ́. 
\v 32 Ye ɑtɛ cǝnɛ kɑwɑɑɣɑ nɑkǝlɩ kɑ tɔɔ kɛ́ mɑ nɑ tɑɑlɛ wontu tǝ suu hɑŋ kɛ Ɩfeesu cǝnɛ ɩlɛ pepeɣelɛ pǝ wɑɑsɑ-m? Ye sǝtɑɑ kɑɑ tɛ nɑ pɑ́ fe tǝ́ lɑ ɩsɩɩ yǝlɑɑ yɔɣɔtʋɣʋ tɔ sɩ: Tǝ́ tɔɣɔ nɑ tǝ́ nyɔɔ kpɑkpɑɑ, cele tɩɩ sɩ tɔ pǝ tɔɔ.
\p
\v 33 Ɩ́ tɑɑ puɣusi mǝ tɩ, tɑɑpɑlɑɑ ɑsɑɣɑɑ kiŋ kɛ yɑɑsi ɩsɑɣɑʋ tɛɛkǝnɑ. 
\v 34 Ɩ́ cʋkɩ mǝ tɑɑ kɛ́ teu kɛ ɩsǝnɑ mpi pǝ wɛɛ tɔ nɑ ɩ́ yele ɩsɑɣɑtʋ. Mǝ tɑɑ lɛlɑɑ tɑ nyɩ Ɩsɔ, ɩ́ tɛɛ ɩ́ fɛɩ fɛɛlɛ.
\s1 Mpɑ pɑɑ fe tɔ pɑ wɛɛtʋ
\p
\v 35 Ntɑnyɩ nɔɣɔlʋ nɑ́ wɛɛ nɑ ɩ́ mɑɣɑsǝɣɩ sɩ ɩsǝnɑɣɑ sǝtɑɑ kɑ́ tɛ nɑ pɑ́ fe ɩlɛ yee? Nɑ pɑ tɔnǝŋ kɑ́ wɛɛ ɩsǝnɑɣɑlɛ? 
\v 36 Kʋmɛlɛŋ nyɑ́, n tuukuɣu pʋlʋ pǝle kɛ ɑtɛ tɔ, pǝle ńtɛ́ tǝ sɑɑlǝɣɩ tɛtʋ tɛɛ kɛ́ ɩlɛnɑ hoole nɑ́ɑ́ nyɔ. 
\v 37 Pǝ tɑɣɑ pǝle kɛ yem kɛ́ n tuuki? Pǝ pǝsǝɣɩ pǝ wɛɛ sɩ tɔɣɔnɑɣɑ pǝle yɑɑ pʋlʋ kʋtutuum pɑɑ mpi. N kɑ tuukɑɣɑ tɔ, pǝ fɛɩ ɩsɩɩ kɑɣɑnɑ pǝ nyɔʋ ɩsǝntɔ nɑ pǝ wɛ hɑtʋ tɔ. 
\v 38 Mpi Ɩsɔ nɔkɑɑ tɔ mpǝɣɩ ɩ lɑkɩ nɑ pǝle ńtɛ́ tǝ́ nyɔ, nɑ ɩ́ yeki nɑ pɑɑ pǝle nte tǝ nyɔ ɩsɩɩ tǝ wɛʋ tɔ.
\p
\v 39 Weesiŋ nyǝm tǝnɑ tɔnǝŋ fɛɩ kʋlʋmǝŋ, yǝlɑɑ tɔnǝŋ wɛnɑ ɩ mpɑɑ nɑ wontu nyǝŋ nɑ́ wɛnɑ ɩ́lɛ́ ɩ mpɑɑ tɔtɔ. Sumɑsɩ tɔnǝŋ wɛnɑ ɩ mpɑɑ kɛ́ nɑ tiinɑ tɔnǝŋ nɑ́ɑ́ wɛnnɑ ɩ́lɛ́ ɩ mpɑɑ tɔtɔ.
\p
\v 40 Ɩsɔtɔnʋɣʋ tɑɑ nyǝm wɛɛtʋ wɛɛ kɛ́ nɑ ɑtɛ nyǝm wɛɛtʋ nɑ́ɑ́ wɛɛ, nɑ ɩsɔtɔnʋɣʋ tɑɑ nyǝm wɛɛtʋ teu fɑɣɑnɑ ɑtɛ nyǝm wɛɛtʋ teu. 
\v 41 Ilim wɛnɑ pǝ mɑɣɑmɑɣɑ pǝ teu kɛ́, nɑ ɩsɔtʋ nɑ́ɑ́ wɛnɑ ɩ́lɛ́ ɩ nyǝm, nɑ ɩsɔtɔlʋŋɑsɩ nɑ́ɑ́ wɛnɑ sǝlɛ sɩ nyǝm nɑ sɩ mpɑɑ, nɑ ɩsɔtʋlʋŋɑsɩ mɑɣɑmɑɣɑ teu tɛɛ tǝmɑ.
\p
\v 42 Sǝtɑɑ kɑ́ tɛ nɑ pɑ́ fe tɔ ḿpʋ́ɣʋ́ pɑɑ wɛɛ. Pɑ piŋuɣu yʋlʋ tɔ, ɩ sǝpɑɣɑ. Amɑ pɩɩ kɔɔ nɑ yʋlʋ fe sǝm tɑɑ tɔ ɩɩ tɑsǝɣɩ sǝpʋ. 
\v 43 Pɑ piŋuɣu yʋlʋ tɔ ɩ fɛɩ teu se. Pǝyele ɩ kɛ́ ɩcɑm kɛ́, ɑmɑ pɩɩ kɔɔ nɑ ɩ́ fe sǝm tɑɑ tɔ ɩ teu nɑ ɩ tomɑ pǝ tɑkɑ. 
\v 44 Pɑ piŋuɣu yʋlʋ tɔ, tɔnʋɣʋ kʋnɛɣɛ pɑ piŋ. Amɑ pɩɩ kɔɔ nɑ yʋlʋ fe sǝm tɑɑ tɔ tɔnʋɣʋ ŋku ɩ kɑ́ lɩɩnɑ tɔ kʋ kɛ́ ŋku Feesuɣu tɩ tɔɣɔ. Pǝ tɑɣɑ pʋlʋ, tɔnʋɣʋ kʋnɛ kʋ wɛɛtʋ wɛɛ kɛ́ nɑ tɔnʋɣʋ ŋku Feesuɣu tɩ tɔ kʋlɛ kʋ wɛɛtʋ nɑ́ɑ́ wɛɛ. 
\v 45 Kʋpɑm kɛ́, Ɩsɔ Tɔm tɑɑ yɔɣɔtǝɣɩ sɩ: Kɑncɑɑlɑɣɑ yʋlʋ ntɛ́ Atɑm nɑ pǝ ŋmɑ-ɩ tɔ pǝ tʋ-ɩ weesuɣu kɛ́. Amɑ wɑɑlɩ wɑɑlɩ Atɑm nɑ́ kɛ́ Ɩsɔ Feesuɣu ŋku kʋ hɑɑ weesuɣu tɔɣɔ. 
\v 46 Pǝ tɑɣɑ wei Feesuɣu tɩ tɔ ɩnɩ ɩ cɑɑlǝnɑ lɩɩʋ. Amɑ tɔnʋɣʋ kʋnɛɣɛ, pǝ wɑɑlɩ kɛ́ wei Feesuɣu tɩ tɔ ɩ lɩɩwɑ. 
\v 47 Atɛ tɛtʋ kɛ pɑ ŋmɑnɑ kɑncɑɑlɑɣɑ Atɑm. Amɑ wɑɑlɩ wɑɑlɩ Atɑm nɑ́ lɩɩnɑ ɩsɔtɑɑ kɛ́. 
\v 48 Mpɑ pɑ kɛ́ tɛtʋ tɔɔ nyǝ́mɑ tɔ pɑ nǝɣǝsǝnɑ wei pɑ ŋmɑnɑ tɛtʋ tɔɣɔ, nɑ mpɑ pɑ kɛ́ ɩsɔtɑɑ nyǝ́mɑ tɔ pɑ nǝɣǝsǝnɑ wei ɩ lɩɩnɑ ɩsɔtɑɑ tɔɣɔ. 
\v 49 Ɩsɩɩ tǝ nǝɣǝsǝnɑʋ yʋlʋ wei pɑ ŋmɑnɑ tɛtʋ tɔ, ḿpʋ́ɣʋ́ tɩɩ tɛ nɑ tǝ́ nǝɣǝsǝnɑ wei ɩ lɩɩnɑ ɩsɔtɑɑ tɔ.
\p
\v 50 Mɑ tɑɑpɑlɑɑ nti mɑ yɔɣɔtǝɣɩ tɔɣɔlɛ sɩ, yʋlʋ tɔnʋɣʋ ŋku pǝ ŋmɑwɑ nɑ kʋ tɑɑ nɑ cɑlǝm tɔ kɩɩ pǝsǝɣɩ nɑ kʋ tɔɣɔ Ɩsɔ Kɑwulɑɣɑ kɛ pɑɑ pǝcɔ. Pǝyele kʋsǝpǝm nɑ́ kɑɑ pǝsɩ nɑ pǝ́ cɑɣɑ tɑm nɑ pǝ́ kɑɑ sɩ.
\p
\v 51 Nɑtǝlɩ tǝ wɛnnɑ nɑ tǝ́ ŋmɛlɑɑ, mɑɑ kuli-tɩ nɑ ɩ́ nɑ́. Ntǝɣǝlɛ sɩ tɑ́ tǝnɑ tǝ kɑɑ sɩ. Amɑ tɑ́ tǝnɑ pɩɩ tɛ nɑ pǝ́ lɑɣɑsɩ-tʋɣʋ wɛɛtʋ kɛ 
\v 52 tɔm kʋlʋm tɔɔ kɛ́ kpɑkpɑɑ ɩsɩɩ ɩsɛ cǝpǝlʋɣʋ kɛ wɑɑtʋ wei pɑɑ hʋlɩ ɑkɑntǝlɛ sɩ pǝ tǝnɑ pǝ́ sɩɩ tǝnɑɣɑ tɔ. Pǝ tɑɣɑ pʋlʋ, pɑ́ kɔmɑ nɑ pɑ́ hʋlɩ-tɛ, sǝtɑɑ feŋ kɛ́, pɑ kɑɑ tɑsɑ sǝpʋ, nɑ pɩɩ lɑɣɑsɩ tɑɣɑ wɛɛtʋ kɛ kʋlɑɣɑsʋ. 
\v 53 Tɑmpɑnɑ tɔɔ ḿpʋ́ɣʋ́ mɛɛ, ɩsɩɩ mpi pɩɩ cɑkɩ tɑm tɔ pǝ kpɑɣɑ mpi pǝ cɑkɩ tɑm tɔ nɑ pǝ tʋ pǝ tɔɔ, nɑ mpi pǝ sǝkɩ tɔ ɩsɩɩ pǝ kpɑɣɑ mpi pɩɩ sǝkɩ tɔ nɑ pǝ́ tʋ pǝ tɔɔ. 
\v 54 Pǝ́ kɔmɑ nɑ mpi pɩɩ cɑkɩ tɑm tɔ pǝ́ kpɑɣɑ mpi pǝ cɑkɩ tɑm tɔ nɑ pǝ́ tʋ pǝ tɔɔ, nɑ mpi pǝ sǝkɩ tɔ pǝ́ kpɑɣɑ mpi pɩɩ sǝkɩ tɔ, ɩlɛ nti pɑ ŋmɑɑwɑ Ɩsɔ Tɔm tɑɑ sɩ pɑ nɑŋtɑ sǝm tǝnɑŋnɑŋ tɔ tǝ lɑpɑ tɑmpɑnɑ ntɛ́.
\m
\v 55 Sǝm leɣe nyɑ́ ɑkɑɩtʋ wɛɛ?
\p Sǝm leɣe nyɑ́ tomɑ wɛɛ sɩ ń kʋ́?
\m
\v 56 Ɩsɑɣɑtʋ hɑɑnɑ sǝm kɛ tomɑ sɩ pǝ́ kʋ, nɑ kʋsǝsɩɩtʋ sɔsǝɣǝnɑ ɩsɑɣɑtʋ. 
\v 57 Amɑ Ɩsɔ fɔɔ. Ɩnɩ ɩ yelinɑ nɑ Tɑcɑɑ Yesu Kilisiti lɑkɩ nɑ tǝ́ kǝlǝɣɩ.
\p
\v 58 Pǝ tɔɔ ɩlɛ mɑ tɑɑpɑlɑɑ kʋpɑmɑ, ɩ́ tɔkɩ mǝ tǝɣɩ teu nɑ pʋlʋ ɩ́ tɑɑ ciɣiti-mɛ. Pɑɑ kʋyɑŋku ɩ́ sɛɛsɩ ɩsǝlɛ nɑ Tɑcɑɑ tǝmlɛ lɑpʋ. Pǝ tɑɣɑ pʋlʋ, ɩ́ nyǝ́mɑ́ sɩ mǝ́ nɑ Tɑcɑɑ ɩ́ kpɛntɑɑ nɑ ɩ́ lɑkɩ tǝmlɛ nte tɔ pǝ kɑɑ sɑɑlɩ yem.
\c 16
\s1 Lɛlɑɑ sǝnɑʋ tɔm
\p
\v 1 Mɑ tɑsǝɣɩ-mɛɣɛ lɛntɩ, ntǝɣǝlɛ Ɩsɔ yǝlɑɑ mpɑ pɑ wɛ Yosɑlɛm tɔ pɑ sǝnɑʋ tɔm. Ɩ́ lɑ teitei ɩsɩɩ mɑɑ kɛɛsʋɣʋ Kɑlɑtɩ Yesu sɛɛlɑɑ kpekɑ tɔ. 
\v 2 Pɑɑ mǝ tɑɑ wei ɩ́ lǝsǝɣɩ liɣitee kɛ cimɑɑsɩ cimɑɑsɩ nɑ pǝ́ kɛɛsǝnɑ ɩsǝnɑ mpi ɩ hikɑɑ tɔ nɑ ɩ́ sɩɩkǝnɑ ɑ mpɑɑ. Ye mɑ kɔmɑ mɑ́ tɑlɑ, pǝ́ tɑɑ wɛɛ sɩ ɩ́ kɔnɑ mǝ kʋhɑʋ mǝ kʋhɑʋ. 
\v 3 Mɑ́ kɔmɑ mɑ kɔɔ mɑɑ tili yǝlɑɑ mpɑ ɩ́ kɑ́ lǝsɩ tɔ nɑ mɑ́ lɑ-wɛɣɛ tɑkǝlɑɣɑ nɑ pɑ́ kpɛntǝnɑ mǝ kʋcɔɔʋ nɑ pɑ́ ponɑ Yosɑlɛm. 
\v 4 Nɑ ye pǝ tɩɩ wɛɛ sɩ mɑ́ɑ́ ponɑ, pɑɑ sɩɩ-m nɑ mɑ́ nɑ-wɛ tǝ́ polo.
\s1 Nti nti Pɔɔlɩ kɑ́ lɑ tɔ
\p
\v 5 Mɑɑ kɔɔ mǝ tɛ te, ɑmɑ Mɑsetoni tɛtʋ tɑɑ kɛ́ mɑɑ tǝŋnɑ nɑ pǝ́cɔ́ mɑ́ kɔɔ. Ɩsɩɩ mɑ tǝŋnɑ Mɑsetoni nɑ pǝ́cɔ́. 
\v 6 Ntɑnyɩ mɑɑ cɑɣɑ wɛɛ nɑɑlɛɣɛ mǝ tɛ. Pǝ tɑ tɩɩ sǝŋ tǝcɑ, hilimɑtɛ wɑɑtʋ tǝnɑ mɑɑ wɛɛ, nɑ mɑ́ tɩɩ kɔmɑ sɩ mɑ puki pɑɑ timpi, ɩ́ kɑ́ sǝnɑ-m kɛ́ nɑ mɑ́ polo. 
\v 7 Pǝ tɑɣɑ pʋlʋ, mɑɑ cɑɑ sɩ pǝ́ wɛɛ sɩ tɛɛʋ tɑɑ kɛ́ mɑ tǝŋɑɑ nɑ mɑ́ nɑ-mɛɣɛ kʋnɑʋ. Mɑ tɑɑ wɛɛ sɩ ye Tɑcɑɑ luɣu ɩ́ lɑpɑ, mɑ́ tɑlɑɑ mɑɑ cɑɣɑ mǝ tɛɣɛ wɛɛ nɑɑlɛ.
\p
\v 8 Pɑɑ nɑ mpʋ mɑ hʋʋ sɩ Ɩfeesu tɑɑ cǝnɛɣɛ Pɛntɑkɔntɑ kɑ́ mɑɣɑnɑ-m. 
\v 9 Pǝ tɑɣɑ pʋlʋ tɔɔ, pɑɑ nɑ kolontunɑɑ tɔɔ cǝnɛ tɔ, pǝ hɑ-m mpɑɑʋ kɛ teu kɛ́ sɩ mɑ́ lɑ tǝmlɛ sɔsɔɔlɛ.
\p
\v 10 Timotee ɩ́ kɔmɑ ɩ tɑlɑ, ɩ́ mʋ-ɩ teu nɑ ɩ lɑŋlɛ hɛɛ. Pǝ tɑɣɑ pʋlʋ, ɩ lɑkɩ Tɑcɑɑ tǝmlɛ kɛ teu kɛ́ ɩsɩɩ mɑ lɑkʋɣʋ tɔ. 
\v 11 Nɔɣɔlʋ ɩ́ tɑɑ kpɛɛnɑ-ɩ. Ɩ́ sǝnɑ-ɩ nɑ pǝ sǝnɑ-ɩ ɩ mpɑɑʋ tɑɑ nɑ lɑŋhʋlʋmlɛ nɑ ɩ́ mǝlɩ mɑ cɔlɔ, mɑ́ nɑ tɑ́ tɑɑpɑlɑɑ tǝ tɑŋɑ-ɩ kɛ́.
\p
\v 12 Ye tɑ́ tɑɑpɑlʋ Apɔlɔɔsɩ tɔm ɩlɛ, tɑm kɛ́ mɑ kɑɑnɑ-ɩ sɩ ɩ́ nɑ tɑ́ tɑɑpɑlɑɑ lɛlɑɑ pɑ kɔɔ mǝ tɛ. Amɑ ɩ luɣu fɛɩ pɑɑ pǝcɔ sɩ ɩ́ kɔɔ nɔɔnɔɔ. Amɑ ɩ́ hikɑ pǝ kʋyɑkʋ ɩ tɛŋ ɩ́ kɔɔ.
\s1 Kɑntǝkɑɣɑ kʋtʋtʋtʋ nɑ sɛɛtʋ
\p
\v 13 Ɩ́ feŋ nɑ ɩ́ tɔkɩ Ɩsɔ sɛɛʋ mpɑɑʋ kɛ teu. Ɩ́ nyɑɣɑ ɑpɑlʋtʋ, ɩ́ nyɔɔ toŋ. 
\v 14 Pɑɑ mpiɣi ɩ́ lɑkɩ ɩ́ lɑ tǝmɑ sɔɔlʋɣʋ tɔɔ.
\p
\v 15 Ntɔŋ ɩ́ nyǝmɑ́ Sǝtefɑnɑsɩ nɑ ɩ nyǝ́mɑ nɑ? Ɩ́ nyǝmɑ́ sɩ Akɑyi tɛtʋ tɑɑ mpɛ pɑ cɑɑlǝnɑ Ɩsɔ sɛɛʋ mʋɣʋ, nɑ pɑ lɑpɑ Ɩsɔ yǝlɑɑ pɑɣɑlɛ kɛ kookɑlɩ. Mɑ tɑɑpɑlɑɑ mɑ heeliɣi-mɛ sɩ, 
\v 16 yǝlɑɑ ɩsɩɩ mpɛ nɑ pɑ tǝnɑ mpɑ pɑ́ nɑ-wɛ pɑ ɩsǝlɛ sɛɛnɑ tǝmlɛ lɑpʋ tɔ, ɩ́ tǝŋǝɣɩ nti pɑ heeliɣi-mɛ tɔ.
\p
\v 17 Mɑ lɑŋlɛ hɛɛnɑ Sǝtefɑnɑsɩ nɑ Fɔɔtunɑtusi nɑ Akɑikusi pɑ kɔntɛ kɛ́. Ye mɩɩ wɛnnɑ mɑ kiŋ timpi ɩ́ kɑɑ ɩ́ sǝnɑ-m tɔ mpɛ pɑ kɔmɑ ɩlɛ pɑ sǝnɑ-m yoo. 
\v 18 Pɑ kpɑɑsɑ mɑ ɑpɑlʋtʋ ɩsɩɩ pɑ kpɑɑsʋɣʋ mǝ nyǝntʋ tɔ. Yǝlɑɑ ɩsɩɩ mpʋ pǝ tɑkɑ kɛ́ pǝ mʋnɑ ɩ́ sɑŋ teu.
\p
\v 19 Asii tɛtʋ tɑɑ Yesu sɛɛlɑɑ kpekɑ sɛɛ-mɛ. Akilɑɑsɩ nɑ Pilisilɑ nɑ Ɩsɔ sɛɛlɑɑ mpɑ pɑ kotiɣi pɑ tǝyɑɣɑ tɔ pɑ hɑ-mɛɣɛ Ɩsɔ sɛɛlɑɑ sɛɛtʋ kʋpɑntʋ. 
\v 20 Tɑ tɑɑpɑlɑɑ tǝnɑ mpɑ pɑ wɛ cǝnɛ tɔ pɑ sɛɛ-mɛ.
\p Ɩ́ sɛɛ tǝmɑɣɑ teu nɑ ɩ́ lɛlɩ.
\p
\v 21 Pɔɔlɩ mɑ́ mɑ mɑɣɑmɑɣɑ mɑ niŋ kɛ mɑ ŋmɑɑnɑ tɔm tǝnɛ sɩ mɑ sɛɛ-mɛ.
\p
\v 22 Ye wei ɩɩ cɑɑ Tɑcɑɑ, mpusi ɩ́ tǝŋɩ-ɩ.
\p Mɑlɑnɑtɑ, Tɑcɑɑ kɔɔ mpʋ.
\p
\v 23 Tɑcɑɑ Yesu ɩ́ lɑ-mɛɣɛ pɛɛlɛɛ.
\p
\v 24 Yesu Kilisiti tɔm tɑɑ mɑ sɔɔlɑ mǝ tǝnɑɣɑ.