\id EPH - Ndendeule Bible Version \ide UTF-8 \h Akaepecho \toc1 Baluwa jha Pauli kwa Akaepecho \toc2 Akaepecho \toc3 Akae \mt2 Baluwa jha Pauli kwa \mt1 Akaepecho \imt Ulongolelo \ip Baluwa jha Pauli kwa bando bha ku Epecho kikajhandikwe pamonga na baluwa jha Akakolochahe muchaka cha makome chita pabhelwika njwe Yecho Kilichitu. Mundo jwajhandika amanyikina ngita Ntenga Pauli, mu chula jha 1:1. Akachomi twe bhajheketela kubhehe Pauli ndi jwajhandika baluwa kwa Akaepecho, pamonga na gheniya baluwa jhene atei jhe nyambuchilo yake jwenio ngita chateii kwa baluwa jha Akakolochahe. Kwa nhwalo ghongo, pange ipalitwa itindile kwa malongo gha bhando ghighannyeketii Kilichitu ghughabhii ku muche gwenio. Helahela Pauli ichimulila pajhandikila baluwa jhenje akibha mukipungo mu chula jha 3:1; 4:1; na 6:20. Pauli akankamwii Tikiko baluwa jhenje pakibha atyangila makunde gha bhando ghighannyeketii Kilichitu gha ku Epecho mu chula jha 6:21-22. \ip Epecho ukibha ndi muche nkolongwa gwa ulongoche gwa Kiloma mu Asiya Njokombe. Epecho ukamanyikine hake kwa nyumba jha chapanga jhichengwitwe mwenio jhikapihitwe palonge jha ichapanga mwikeghe jwa Kiyunane jwakemitwa Atemi mukitabo cha mahengo gha Akatenga, mu chula jha 19: 23-31. Likunde lya bhando lilinnyeketii Kilichitu lya bhando bha ku Epecho likibha na makakala hake pulitumbwila nambo paligha lijhakuhobheya makakala ghake, Ulot 2:1-7. \ip Munucho jha baluwa jhenje jha Akaepecho, Pauli ichimulila Chapanga chabhahagwii bhando na kwakombola kubhoka muhakaho gwabhe kwa ndela jha Yecho Kilichitu. Na alandanikiya likunde lya bhando lilinnyeketii Kilichitu na yegha, Kilichitu ndi muto, na helahela alandanikiya likunde lya bhando lilinnyeketii Kilichitu ndi nyumba, na Kilichitu ndi nchinge. Na chehemo jha ubhele jha baluwa chenje Pauli ilangii akakilichitu bhoha chiipalwa bhatame pamonga na Kilichitu mutamo gwabhe. \iot Ghughabhii mukitabo \io Pauli itumbuu kukilongele jwenio na ajhambucha bha ku Epecho, mu chula jha 1:1-2. \io Peniya ichimulila chibhajhelana pakate jha likunde lya bhando lilinnyeketii Kilichitu na Kilichitu, mu chula jha 1:3-3:21. \io Pauli ijhandika kone ilangii chiipalwa kwa Nkilichitu kubhegha, mu chula jha 4:1-6:20. \io Pauli akajhomolile kwa kupiya malaghilo ghake, mu chula jha 6:21-24. \c 1 \p \v 1 Ne Pauli, natenga jwa Yecho Kilichitu kwa kupala Chapanga. \p Ninyandikila mangota mabhando bha Chapanga bhumii kwenio ku Epecho, bhinnyeketii njwe mu kulombana na Yecho Kilichitu. \p \v 2 Ninyope umbone na uteeke kuhumii kwa Chapanga Tate gwito na Bhambo Yecho Kilichitu. \s Mota ya kihuke kwa kulombana na Kilichitu \p \v 3 Alombwe Chapanga, Tate jwa Bhambo gwito Yecho Kilichitu! Nhwalo kwa kulombana na Kilichitu atupekii mota yoha ya ki Uhuke mu nnema gwa kihuke. \v 4 Kabula jha kupanganwa kwa nnema, Chapanga akatuhagwii njwe twenga tubhehe bhake kwa kulombana na Kilichitu kupala tubhehe nyahinyahi na twanga malemo palonge jhake. \p Kwa nhwalo gwa mapalo ghake, \v 5 Chapanga akahamwii na kutuhaghuu tubhehe twakayana yake kwa ndela jha Yecho Kilichitu. Yene ndi chahalilwa na chapalita. \v 6 Ngohe tunombe Chapanga nhwalo jha umbone gwake gwamaha gwatupekii jhajhe kupete Mwana mundo jwampahile! \v 7 Nhwalo gwa miyahe jha Kilichitu, twenga tukombolilwe, yane uhakaho gwito ulekekekiwe. Yene ndi chibhii kwa ukolongwa gwa umbone gwake, \v 8 atupekii mbwe mwenio, \p kwa malango na kumanya kwake koha. \v 9 Chapanga atuyekulile chile jhijhihitwe jhapalita kuitenda. Akahalalichwe na ajhakutuhenge lende kwa ndela jha Yecho Kilichitu. \v 10 Gheniya ghoha pukipala kuhika kipinde chapangite Chapanga, Kilichitu naleta ilebhe yoha ya kunane kwa Chapanga na ya pannema pamonga na ilongochwe na jwenio. \p \v 11 Chapanga akatei yoha ngita chapalita, Chapanga akatuhagwii twenga kwa kulombana na Kilichitu, tubhehe bhando bhake ngita chapalita, akahamwii naha kuhumii makacho. \v 12 Chapanga akatehi yenio, twenga bhitulongolile kunhobholela Kilichitu tuulumbulile ung'alicho gwa Chapanga! \p \v 13 Na mangota helahela punombikina na Kilichitu pala punyohina lilobhe lya chakaka ndi Lilobhe lya Mbone lilinetii ukomboche, mukanyeketii Kilichitu, na jwenio Chapanga kwa kulangii mangota ndi bhando bhake, amekite unepo kwa kumpelengana Uhuke gwa Chapanga jwatulaghii. \v 14 Uhuke gwenio gwa Chapanga ndi poni jha kupata ghala ghoha gha bhando bhake, kilebhe chenje ndi kitulangii kubhehe Chapanga nabhakombola bhando bhake bhoha. Tulumbilile ung'alicho gwake! \s Pauli innyopa Chapanga \p \v 15 Yene, kubhoke punyohina chimuhobholela Bhambo Yecho na chimwapala bhando bhoha bha Chapanga, \v 16 ngotwike jhe kunchenguu Chapanga kwa nhwalo gwino. Nanikombokangana mu kunnyopa kwango Chapanga, \v 17 nijhendele kunnyopa Tate jwa ung'alicho, Chapanga jwa Bhambo gwito Yecho Kilichitu, ampelengane Uhuke jwapala kuntenda mme na malango na kuyekulila mumanye Chapanga chamaha hake. \v 18 Ninyopa Chapanga haijhoghole miojho jhino mupokele lumule lwake, nhoto kulimanya lihobholelo lela lyankemile na ung'alicho nkolongwa gwa ghala lyabhabhekii bhando bhake, \v 19 na umanye likakala lyake chibhii likolongwa kwa twenga bhituhobholela. Likakala lyenio ndi lihenga lihengo nkate jhito lilandana na likakala lela likolongwa, \v 20 lyayokiche nako Kilichitu kuhumii kwa bhubhawile, ngamekita lubhoko lwalelo kwenio kunane kwa Chapanga. \v 21 Kwenio, Kilichitu ndi nkolongwa kuliku ilongoche yoha ya kunane kwa Chapanga na kila ukindendeke na kila likakala na akabhambo, na ilongocha ukindendeke ghoha gwa pannema ghongo na ghola ghupala kuhika. \v 22 Chapanga ampekii ukindendeke mu ilebhe yoha, ajhakumeka abhehe nkolongwa jwa makunde gha bhando bhibhanyeketii Kilichitu abhe nkolongwa kwa ilebhe yoha kwa nhwalo gwa bhando bhibhannyeketii Kilichitu. \v 23 Bhando bheniya ndi yegha jha Kilichitu, na bhando ndi ukamilicho gwa jwenie jwalenganikiya ilebhe yoha kila chehemo. \c 2 \s Kubhoka mukuwe nakujhingii mughome \p \v 1 Mangota mwe helahela makacho mukibha ngita nhwelingine nhwalo gwa malemo na uhakaho gwino. \v 2 Makacho ntamingina nkengima ndela mboho ya nnema ghongo, munyokaniya nkolo jwa michuka, gheniya makakala gha kunane kumahunde, michuka ndi jwalongocha bhando bhangannyokanikiya Chapanga. \v 3 Na twe twabhoha tukibha ngita bheniya, pututamita tukengima tama hito mboho ya yegha jhibhii nkate jhito, kuhenga ilebhe tela ipalita yegha jhito na malango ghito. Twenga helahela tukalandine ngita bheniya, tupalitwa kuhadabulwa na Chapanga ngita bhando bhange. \p \v 4 Nambo Chapanga abhii na kiya hake. Akatupalite kwa upalo nkolongwa, \v 5 pamo ngita tukawile kwa nhwalo jha uhakaho, atutei kubhehe twaghome pamonga na Kilichitu. Kwa umbone gwa Chapanga mangota nghombokwilwe. \v 6 Mu kulombana na Yecho Kilichitu, Chapanga atuyokiche pamonga na jwenio, ngatutamita pamonga kunane kwa Chapanga. \v 7 Ateila naha kupala kuilangiya ipinde ya lichiko lilihika muumbone gwake nkolongwa gwatupekii kwa kulombana kwito na Kilichitu Yecho. \v 8 Nhwalo, kwa umbone gwa Chapanga mangota nkombwilwe kwa ndela jha kihobholelo. Kilebhe chenie chi nhwalo gwa kughagha kwinojhe, nambo ndi hupo jha Chapanga. \v 9 Ihumii muitendwa hinojhe, kwa gheniya mundo jhojhoha angalokejhe kilebhe. \v 10 Nhwalo twenga ndi ihumbe ya Chapanga na kwa kulombana na Kilichitu Yecho. Ndi Chapanga atupangine tutame kwa kuhenga ghaumbone, ghatulenganikiye tuhenge. \s Kubhe pamonga mu Kilichitu \p \v 11 Nkombokane pumukibha makacho mangota mabhando mangabhehe Akayahude kwa kubhelukwa, punkemitwa bhangajhingii jando, na Akayahude bhibhakikemita bhene bhajhingi jando, kwa nhwalo gwa chela chibhakitendii yegha kwa mabhoko ghabhe kwa kukilangiya ngita bhando bha Chapanga. \v 12 Helahela nkomboke machiko ghala mangota ntamingina changaumanya Kilichitu, mangota mukahaghulilwe na bhando bhu ku Ichilahele, peniya nnyakubhehe akaghene nhwalo mukibha panja jha lilaghano lyalongila Chapanga kwa nhwalo jha bhando bhake. Ntamita pannema ghongo kone nkwetejhe lihobholelo na ngita bhangaumanya Chapanga. \v 13 Nambo ngohe, mu kulombana na Yecho Kilichitu, mangota mukibha kutale makacho, mpelwikwe pahina na Chapanga kwa miyahe jha Kilichitu. \v 14 Nhwalo Kilichitu jwenio atuletii uteeke kwa kutenda Akayahude na bhando bha ilambo henge kubhehe kilebhe chimo. Kwa kupiya yegha jhake ngita litambiko, ngabhohita ulikoko ghulekanicha ngita lipamanda pakate jhabhe. \v 15 Ndi ngabhohita malaghalikilo gha Akayahude pamonga na mihilo jhake, kupala bhando bha ilambo henge na Akayahude bhabhehe kilebhe chimo mu kulombana na Kilichitu na kuhenga yenio aletite uteeke. \v 16 Mukuwe kwake, Kilichitu ngaukomilikiya ulikoko gwabhe, kwa nchalaba akatei bhando bheniya bhoha bhabhe ngita yegha jhimo kwajhelanicha na Chapanga. \v 17 Yene Kilichitu pahikita, ajhakuntangacha Lilobhe lya Mbone lya uteeke kwa mangota bhando mangabhehe Akayahude, bhumii kutale na Chapanga na Akayahude bhumii pahina na Chapanga. \v 18 Yene kwa chela chahengita Kilichitu, twenga twabhoha Akayahude na bhangabhehe Akayahude tuhoto kunyendele Tate kupete kwa jwenio Uhuke jwabhii jhumo. \p \v 19 Yene, mangota bhando bha ilambo henge makaghene jhe kabhele, hilu bhando mapeta ndela jhe. Nambo ngohe mangota ndi akolo kilambo pamonga na bhando bha Chapanga, na mangota ndi bhando bha nyumba jha Chapanga. \v 20 Nchengwitwe panane jha nchinge ghubhekwitwe na akatenga na akalondole bha Chapanga, kone Yecho Kilichitu jwenio ilandana na lighanga lilikamulii nyumba. \v 21 Jwenio ndi jwalombanicha nyumba jhoha na kuitenda itutumuke na kubhehe Nyumba jha Chapanga jha nyahinyahi kwa nhwalo jha Bhambo. \v 22 Mu kulombana na Kilichitu, na mangota helahela nchengwitwe pamonga na bhange bhoha, mme nyumba jhatama Chapanga kupete Uhuke gwake. \c 3 \s Lihengo lya Pauli kwa bhando bha ilambo henge \p \v 1 Nhwalo gha gheniya, ne Pauli ndabhitwe nhwalo gwa kunhenge Kilichitu Yecho na kwa nhwalo gwino gwa kuntangachii mangota mabhando bha ilambo henge, ninnyope kwa Chapanga. \v 2 Chakaka nnyohingine kubhehe kwa umbone gwambekii Chapanga, ngangamwiya lihengo lyake leno nilihenge kwa nhwalo gwino. \v 3 Chapanga ayekulile niimanye chile jhenje jhijhihihitwe. Ngita chindumbwila kujhandika kandina kilebhe chenje. \v 4 Mangota anda nchomite maha ghala kunyandike, ndi naumbula chiniimanya chile jhene jha Kilichitu. \v 5 Makacho Chapanga akabhatei bhando bhakoto kuimanya chile jhene, nambo ngohe Chapanga abhayekulii akatenga bhake na milondole bhake bha nyahinyahi bhaimanye chile jhenje kwa ndela jha Uhuke gwake. \v 6 Chile jhene ndi jhenje: Kupete Lilobhe lya Mbone lya Yecho kwa bhando bha ilambo henge bhene nabhapokela mota ya Chapanga ngita ibhapala kupoke Akayahude, bhene hele ihungo ya yegha jhejhe, nabhapokela lilaghano lelela lela lyalitei Chapanga kupete kwa Kilichitu Yecho. \p \v 7 Nenga ndeilwe kubhehe natumiche jwa Lilobhe lya umbone, kwa umbone gwambekii Chapanga na likakala lyake likolongwa. \v 8 Nenga nachokombe ndo kuliku bhando bhoha bha Chapanga, nambo Chapanga ambii umbone gwake, kupala natangachila bhando bha ilambo henge ulohe gwa Yecho Kilichitu nkolo, \v 9 kabhele natende bhando bhoha bhalole mpangu gwa Chapanga ghukiihite chiuhenga lihengo. Chapanga ndi jwapangina ilebhe yoha ajhakuhiya chile jhake jhenje kuhumii makacho, \v 10 ibhehe ngohe, kupete likunde lya bhando bhibhanyeketii Kilichitu, ilongoche ya nnema na bhubhabhii na ukindendeke bhamanye malango gha Chapanga mu ilebhe yoha. \v 11 Chapanga itenda lijhambu lyenio kupete Yecho Kilichitu Bhambo gwito ngita chapalita jwenio machiko ghoha ghangapeta. \v 12 Kwa kulombana na Kilichitu na kunhobholela jwenio, tuhoto kunnyendele Chapanga changabhoghohe. \v 13 Ngohe chonde mwangahengeleka mwojho nhwalo gwa malola ghango ghuning'ahikila kwa nhwalo gwino, nhwalo ghanga ghoha ndi kwa nhwalo jha ung'alicho gwino. \s Upalo gwa Kilichitu \p \v 14 Kwa nhwalo gwenio, nitama makilikite ninnyopa palonge jha Tate, \v 15 jwabhii Tate jwa chakaka jwa kila nyumba yoha ya pannema na kunane kwa Chapanga. \v 16 Ninyopa Chapanga kwa ung'alicho gwake nkolongwa, kwa kupete Uhuke gwake ankangamaliche miojho jhino, \v 17 na jwenio Kilichitu atame kumiojho jhino ku kihobholelo. Ninnyope lyolyoha limuhenga lihume mu nchinge gwa lipalano, \v 18 kupala umanye pamo na bhando bhoha bha Chapanga upalano gwa Yecho Kilichitu chiubhii mpana na ntandamaho, na kimo na chiunyolike. \v 19 Mulimanye lipalano likolongwa lya Kilichitu chuupeta kumanya koha, na ntwelwele uchakaka ghoha kwa Chapanga. \p \v 20 Chapanga ihoto kuhenga mambu makolongwa kuliku chitujhopa ngita chighabhii makakala ghake chighahenga lihengo nkate jhito. \v 21 Jwenio abhii na ung'alicho kwa likunde lya bhando bhibhannyeketii Kilichitu na kwa nhwalo jha Yecho Kilichitu jwenio, ibheluko yoha ya machiko ghoha ghangapeta! Amina. \c 4 \s Kulombana muyegha jha Kilichitu \p \v 1 Ne hele nakibha napungwa kwa nhwalo jha kunhenge Bhambo, nimpembekeya ntame ngita chinkemitwe na Chapanga ntame. \v 2 Machiko ghoha mmangana mabhando bha unyenyekeho na utokomalo na luhimba, nhimbililane mabhene kwa mabhene kwa upalano. \v 3 Nghagha kujhendele kukamwu kulombana kwino kukuletwa na Uhuke gwa Chapanga kupete uteeke ghughumeka pamonga. \v 4 Ibhii yegha jhimo jha Kilichitu na Uhuke gwa nyahinyahi ghumo, ngita chilibhii lihobholelo limo lyankemii Chapanga chilibhii limo. \v 5 Abhii Bhambo jhumo na kihobholelo chimo na ubaticho ghumo. \v 6 Abhii Chapanga jhumo jwabhii Tate jwa bhoha, jwenio ndi Bhambo jwa bhoha na ihenga lihengo kupete bhoha na abhii mu ghoha. \p \v 7 Nambo kila mundo apokii hupo ngita Kilichitu champekii. \v 8 Ngita chighalonge Majhandiko gha Chapanga, \q “Pajhawila kunane kwa Chapanga kunane hake, \q ajhakwatola bhando bhabhakamwii, \q helahela ajhakwape bhando hupo.” \m \v 9 Bho, puilonge, “Ijhenda kunane kwa Chapanga,” mana jhake nike? Mana jhake hote akatumbwii kuhika pahe hake jha nnema. \v 10 Yene jhojho ndi jwahulwika pannema pano na jhojho ngajhawila kunane kwa Chapanga hake ahutweleye nnema ghoha. \v 11 Jwenio jwabhatehila bhando bhange bhabhe akatenga na bhange milondole bha Chapanga na bhange kubhehe akatangacha Malobhe gha Chapanga na bhange bhibhalongocha bhando bha Chapanga na bhange bhabhe akabhola. \v 12 Atehila naha kupala kulenganikii bhando bha Chapanga kwa lihengo lya kunhenge Kilichitu lya kuichenga yegha jhake. \v 13 Yene twe twabhoha tulombikane tubhehe kilebhe chimo mukihobholelo na kummanya Mwana gwa Chapanga, tubhehe bhando bhitukomile mukihobholelo nakuhikii ukangamalo ngita gwa Kilichitu jwenio. \v 14 Yene tubhejhe kabhele ngita yana ichokombe, bhibhahoto kukangwa kongo na kongo na kujhembeluwa na kila upepo gwa mabholo gha bhando bha uwange kupala kuhobhecha bhando. \v 15 Anda tulongii uchakaka kwa upalo, natukola ade kunhikii Kilichitu jwabhii muto. \v 16 Mulongoche gwake, ihungo yoha ya yegha ikamulana nde kwa ncheketa, na yegha jhoha ukamulichwa nde kwa kutangatilwa ihungo yake. Yene, kila kihungo anda kihenga lihengo lyake maha, yegha jhoha ukola na kukichenga mulipalano. \s Ughome nhyono kwa kulombana na Kilichitu \p \v 17 Ngohe kwa liina lya Bhambo, ninkelebhuwa mangajhendele kabhele ngita bhando bhangaumanya Chapanga, bhibhawacha ghachawana, \v 18 na malango ghabhe ghabhii mulubhendo tyoo. Bhabhii kutale na ughome gwa Chapanga nhwalo gwa undindilima ghubhii nkate jhabhe na mitaho jhabhe. \v 19 Bhando bheniya bhakwetejhe hone, na bhakijhingii mu ilebhe yanganandela na bhipala kuhenga ilebhe ya hone na kupala kubhehe na ilebhe mbwe hake. \p \v 20 Nambo mangota mwe mukamanyitejhe kwa namuna Kilichitu yenio. \v 21 Ndi mukaumanye uchakaka malobhe gha Yecho, mukibha bhabholwa bhake ndi ngamolitwa chakaka jhibhii nkate jhake. \v 22 Mmolitwe muuleke ghola ghanganandela ghuteila makacho, ngita mundo chaula ngobho yake, nhwalo itendwa hino ya makacho inongwicha mukomelekeho kwa tama hino ikopokiya. \v 23 Miojho jhino na malango ghino ghaghalambuke na ghabhehe mahyono. \v 24 Uhwale umundo nhyono ghupanginwe kwa kulandana na Chapanga, ntame mughome ghujheketelwa palonge jha Chapanga na unyahinyahi gwa chakaka. \p \v 25 Kwa gheniya, muleka uwange. Kila mundo ipalwa kunnobholela nnyake uchakaka, nhwalo twenga twabhoha ndi kihungo cha yegha jha Kilichitu. \v 26 Anda nchimwite, mangajheketela jhe lilaka lino linongoche kuhenga uhakaho, hilu nkoto kubhehe na lilaka ade lyobha litipike tipi, \v 27 kupala mangampe jhe Limbembela pwache. \v 28 Jwakibha ajhibhita, akoto kujhibha kabhele, nambo ahenge lihengo lyambone kwa mabhoko ghake, ankola na kilebhe cha kuntangatii mundo jwanga kilebhe. \v 29 Malobhe gha uwenje ghakoto kupita munnomo gwino, nambo nnongele malobhe ghambone ghatangatile kwachenga bhando bhibhannyokanikiya. \v 30 Nkoto kuneke uchongo Uhuke gwa Chapanga jwa nyahinyahi, nhwalo jwenio ndi unepo gwa Chapanga kwino kubhehe mangota ndi bhando bhake, nhwalo ilangii kubhehe lichiko lya kunkombola lihika kwino. \v 31 Ngohe nkoto kubhehe na uchongo amu nkoto kubhehe na lilaka na nkoto kuyoma na njobhelo na maligho. Muleke gwanganandela ghoghoha! \v 32 Nambo mme na mwojho gwambone na kukolelana kiya, kila mundo annekekeya malemo nnyake ngita Chapanga chanekekiye uhakaho mangota kwa ndela jha Kilichitu. \c 5 \s Kutama mulumule \p \v 1 Kuyene, munyighe Chapanga, nhwalo mangota ndi yana yake yaipala. \v 2 Ntame kwa kupalana ngita Kilichitu chatupahile na kupiya ughome gwake, ngita litambiko lilinungila petelele na litambiko lilinhalalicha Chapanga. \p \v 3 Nhwalo, mangota ndi yana ya Chapanga, ngongola na uhako ghoghoha ghola amu uloho ukotoka kujhokanikika pakate jhino ngita chiipalwa kwa bhando bha Chapanga. \v 4 Kabhele malobhe gha hone amu uwenje na malobhe ghanganandela, gheniya ghoha ghamaha jhe kwino kulonge. Ndi mbone nnongele malobhe gha kunchenguu Chapanga. \v 5 Umanyengane hotu ngongola jhojhoha amu jwahenga mambu gha hone anda jhe uloho ilenganile tela na kuijhinamila inyagho, amu mundo jhojhoha jwalandana na yenio najhingii ng'o munahota nkolongwa gwa Kilichitu na gwa Chapanga. \p \v 6 Mwangalogwa jhe kunnyeketela mundo jhojhoha kwa malobhe ghanganandela, kwa nhwalo gwa ilebhe ngita yenio lilaka lya Chapanga nalyahikila bhando bhangannyeketela. \v 7 Bhahe, nkotoka kubhehe maghumba nde na bheniya kwa kilebhe chochoha. \v 8 Makacho mangota mukibha mulubhendo tyoo, nambo ngoheno mangota mmii mulumule kwa kulombana na Bhambo. Ngohe ntamangane ngita yana ibhii mulumule, \v 9 nhwalo lumule luleta kuhenga ghaumbone na kujheketelwa na Chapanga na uchakaka. \v 10 Nghaghe kumanya ghala ghighanhalalicha Bhambo. \v 11 Mwangalombana mukuhenga ghanganandela ghighahuma mulubhendo nambo mughabheke pakongoloo. \v 12 Nhwalo ilebhe ibhahenga ajhito kwa chile hone kuichimulila. \v 13 Nambo ilebhe ihengeka mulumule, ubhonekana hotu, \v 14 nhwalo lumule lutenda kila kilebhe kibhonekane. Ndi nhwalo Majhandiko gha Chapanga ghilonge, \q “Nnyimuke mwenga bhingholwike, \q uyoke kuhumii kubhawile, \q na jwenio Kilichitu namulikila kupala umanye.” \p \v 15 Ngohe, mukilolekeye chimitama. Pimitama nkotoka kubhehe ngita mandindilima, nambo ntame ngita bhando bhina malango. \v 16 Nkachane kutumii mbone kila pwache jhiminajho, nhwalo machiko ghanga ghamboni jhe. \v 17 Kwa nhwalo gwenio nkotoka kubhehe malindilima, nambo mughamanye ghala ghapala Bhambo. \p \v 18 Nkotoka kulobhela ughembe, nhwalo kulobhela kunnongocha kuhenga ghanganandela, nambo ntwelehenganwe Uhuke gwa Chapanga. \v 19 Nnongela malobhe gha Zabule na mihambo jha kunomba Chapanga. Munnyembele Bhambo, munhanganile kumiojho jhino. \v 20 Munombe Chapanga Tate machiko ghoha ghangapeta kwa nhwalo gwa ilebhe yoha, kwa liina lya Bhambo gwito Yecho Kilichitu. \s Jwatolilwe na jwatolela \p \v 21 Kila mundo annyokanikiya nnyake kwa kuntembekeya Kilichitu. \p \v 22 Na mangota akakeghe majhokanikiya akangana bhino ngita chimunnnyekete Bhambo, \v 23 nhwalo akanalome ndi muto gwa nhwana mundo ngita Kilichitu chabhii muto gwa makunde gha bhando ghighanyeketii Kilichitu, na jwenio Kilichitu ndi nkomboche kwa bhando bhibhannyeketii yane yegha jhake. \v 24 Ngita makunde gha bhando ghighannyeketii Kilichitu chibhanyokanikiya Kilichitu, hele akakeghe bhajhokanikiya akangana bhabhe mughoha. \p \v 25 Na mangota akanalome, mapale akahana bhino ngita Kilichitu chalipala likunde lya bhando bhibhannyeketii jwenio, ade ngabhohita ughome gwake kwa nhwalo gwabhe. \v 26 Atehila yenio kulijhelebhula likunde lya bhando lilinyeketii Kilichitu palonge jha Chapanga, pajhomolila kwajhoha kwa lilobhe lyake ngita mundo jwaghololwa kwa mache. \v 27 Atehila naha akiletele jwenio likunde lya bhando lilinnyeketii jwenio lilibhii maha hake, lyangabhehe na mabaka amu ngenja amu ubhoho ghoghoha ghola, bhahe, nyahinyahi lyangabhehe na malemo. \v 28 Helahela kila munalome ampale nhwana mundo ngita chiipala yegha jhabhe bhene. Mundo jwampala nhwana mundo akipala jwenio. \v 29 Abhii jhe mundo jhojhoha jwaichimwa yegha jhake, nambo aupela chakulyegha na kukilonda. Ngita Kilichitu chalihengela likunde lya bhando lilinnyeketii Kilichitu jwenio, \v 30 nhwalo twenga ndi ihungo ya yegha yake. \v 31 Ngita hela Majhandiko gha Chapanga ghilonge, “Kwa nhwalo gwenio, munalome nabhaleka akanyongo mundo, na kulombana na nhwana mundo na bhabhele bheniya nabhabha yegha jhimo nde.” \v 32 Ubhii uchakaka ghuhiitwe kwa malobhe ghanga, nambo nenga nilonge malobhe ghanga kulangii malobhe gha Kilichitu na likunde lyake lilinnyeketile. \v 33 Nambo helahela kila munalome ipalwa ampale nhwana mundo ngita chakipala jwenio, na mwikeghe ipalwa hele annyokanikiya unganamundo. \c 6 \s Yana na akatate bhabhe \p \v 1 Na mangota akayana majhokanikiye akatate bhino, nhwalo munnyeketela Bhambo, chenie ndi kilebhe chamaha hake. \v 2 Ngita Majhandiko gha Chapanga chighalonge, “Munyokanikiye tate na majhe gwino.” Ghono ndi nhilo gwa kutumbula mu mihilo, nhilo gwene ulonge, \v 3 “Mme na ughome na ntame yaka twe pannema.” \p \v 4 Na mangota akatate mangabhehe na milomojhe kwa yana hino, nambo mwalele ngita chapala Bhambo, na kwa kwabhola mambu gheniya chibhipalwa kutama mbone. \s Akabhanda na akanahota bhabhe \p \v 5 Mangota akabhanda, majhokanikiye akanahota bhino bha pannema pano kwa mwojho ghoha na kujhoghopa, ntende gheniya kwa kuhangana mwojho ngita munhenge Kilichitu. \v 6 Pimuhenga yenio chi pibhanoleke tuu jhe kupala mmonekane bhamaha, nambo unhenga kwa mwojho gwino ngita chapala Chapanga nhwalo mangotamwe ndi makabhanda bha Kilichitu. \v 7 Pimuhenga mahengo, nhenge lihengo kwa kuhanganila ngita munhenge Bhambo na kwahenge bhando. \v 8 Nkomboka kubhehe Bhambo nampela ndweko mundo jhojhoha jwahenga ghambone, abhehe mmanda amu jwangabhehe mmanda. \p \v 9 Na akanahota mwahengela hele ngita akabhanda bhino, nkotoka kwatenda bhanyoghope. Nkomboka mangota hele ngita bhene, nkwete Bhambo jhojho kunane kwa Chapanga, na jwenio ihengajhe kwa kuhaghula. \s Ngondo ya uhuke \p \v 10 Bhahe, nimpalangana mme nganganga mu kulombana nde na Bhambo na kutangatilwa kwa makakala ghake makolongwa. \v 11 Uwalangane chilaha ya ngondo yampekengine Chapanga kupala ndi nhoto kujhema na kukenga makakala gha Limbembela. \v 12 Nhwalo kukomana kwito tukomana jhe na bhando, nambo tukomana na lilongo lya akakomana ngondo gwa michuka kunane ku mahunde bhina ulongoche na akanahota bhina ukindendeke bhibhalongocha nnema gwa lubhendo. \v 13 nhwalo gwenio, uhwale chilaha yampekiye Chapanga ndi muhimbilile ade puipala kujhomoka ngondo, pukujhomolela nahotola kujhema nganganga. \p \v 14 Bhahe, nnyeme nganganga, chakaka mme ngita luhunga mu kibhuno chino, na mu kuhenga ghapala Chapanga ngita kikopa chikihibhilikiya panganga jhino, \v 15 kilolo chu kutangacha Lilobhe lya Mbone lya uteeke libhehe ngita maghubache mu makongono ghino. \v 16 Panane jha gheniya, kihobholelo chino machiko ghoha kibhaha ngita ngao mu mabhoko ghino, jhihoto kuhibhilikiya mahonga ghina mwotu gha Limbembela. \v 17 Mupokele ughombokeko ngita kofiya jhino jha choma, lilobhe lya Chapanga ngita upanga ghumpatite na Uhuke gwa Chapanga. \v 18 Nhenge gheniya ghoha kwa kunnyopa Chapanga antangatile. Munyopengane Chapanga machiko ghoha ngita Uhuke gwa Chapanga chanongocha. Nkeluangana changatotokela mu kunnyopa Chapanga kwa bhando bha Chapanga bhoha. \v 19 Helahela unnyopela na nenga, hele punilonge na bhando, Chapanga ambela chukulonge, nhoto kwatangachila bhando chile jha Lilobhe lya Mbone lya Yecho Kilichitu changapwelela. \v 20 Nenga ndi majhumba kome jwa Lilobhe lya Mbone lyenio pamo na kubhehe mukipungo. Unyope ngotoka kubhehe na kiholo mu kutangacha ngita chiipalwa. \s Malobhe gha kujhomolela \p \v 21 Tikiko, nnongo gwito jhutumpahile na ntumiche jwahobholeka mukulombana na Bhambo, nannobholela mambu ghango ghoha kupala mmanyengane chinihenga. \v 22 Nintuma kwino nhwalo gwa lilobhe lende na anobholele malobhe ghito kupala ankangamalicha mwojho. \p \v 23 Ninyopelangana akalongo bhango uteeke na upalano na kihobholelo kubhoka kwa Chapanga Tate na kubhoka kwa Bhambo Yecho Kilichitu. \v 24 Ninyopelangana umbone gwa Chapanga ubhaha kwa bhando bhoha bhibhampala Bhambo gwito Yecho Kilichitu kwa upalo gwangapehekeya.