\id 1TI 1T - Ndendeule Bible Version \ide UTF-8 \h 1 Timocheyo \toc1 Baluwa jhukutumbula jha Pauli kwa Timocheyo \toc2 1 Timocheyo \toc3 1 Tim \mt2 Baluwa jhukutumbula jha Pauli kwa \mt1 Timocheyo \imt Ulongolelo \ip Kitabo cha kutumbula cha Timocheyo ndi baluwa chikajhandikwe na Ntenga Pauli kujhenda kwa mmola gwake Timocheyo. Kitabo chenje kikajhandikwe muchaka cha makome chita na ubhele hade makome chita na ncheche pabhelwika njwe Yecho Kilichitu. Pange iwechekana kipinde chenie ndi ukibhe ubhandikila ujhomolelo gwa ughome gwa Pauli. Pauli akibha pahina na Timocheyo, pipipi ankemita mwana mundo, Filemone, mu chula jha 2:22, Timocheyo mu chula jha 1:2,18. \ip Baluwa jhenje ndi jhimo pakate jha baluwa ncheche ya Pauli yajhandikwe kwa bhando kajhika na chi kwa lilongo lya bhando lilinyeketii Kilichitu. Baluwa henge itato ndi baluwa jha ubhele kwa Timocheyo na kwa Titu na kwa Filemone. Kitabo cha kutumbula cha Timocheyo kilongelela mambu gha mahena hake ilongelela panane ya kunnyinamii Chapanga, muchula jha 2:1-15, chipwa chibhipala kubhe nako ilongoche ya bhubhajheketile muchula jha 3:1-13, na lupwato kwa bhabhola bhuwange muchula jha 1:3-11, 6:2-5. Jhenje ilangii Pauli pubhakibha imola Timocheyo kubhehe kilongoche jwa lilongo lya bhando bhibhannyeketii Kilichitu. Kitabo cha kutumbula cha Timocheyo kibhii na malaghilo ghamahele ghighahoto kwatangatila ilongoche ya bhando bhibhanyeketii Kilichitu mu machiko ghanga. \iot Ghughabhii mukitabo \io Pauli itumbu kwa kunnyambucha Timocheyo, mu chula jha 1:1-2. \io Pauli impwatalila Timocheyo akichunge na bhabhola bha uwange, mu chula jha 1:3-11. \io Pauli ajhendelela kuchenguu ngita hela chabhile kwa nhwalo gwa Yecho Kilichitu, muchula jha 1:12-19. \io Yene Pauli impe malaghilo Timocheyo nhwalo gwa kunnyinami Chapanga na ilongoche ya bhando bhibhannyeketii Kilichitu, mu chula jha 2-3. \io Pauli ijhomolee baluwa jhake kwa kumpe Timocheyo malaghilo gha kujhomolela, mu chula jha 4-6. \c 1 \p \v 1 Ne Pauli, natenga jwa Yecho Kilichitu kwa nhwilo gwa Chapanga ndi Nkomboche gwito na Yecho Kilichitu ndi lihobholelo lito. \p \v 2 Ninnyandikila Timocheyo mwanango jwa chakaka mu kihobholelo. \p Ninnyope umbone na kiya na uteeke kuhumii kwa Chapanga Tate gwito na Yecho Kilichitu Bhambo gwito. \s Lupwato panane jha mabholo ghuwange \p \v 3 Mbala ntame kwenio ku Epecho, ngita punipembelikiya punikibha nikajhenda ku Makedoniya. Bhabhii bhando bhange kwenio bhibhola mabholo ghuwange, makanakiye bhando bheniya. \v 4 Mwalobholela bhaleka kulingukiya kwamahele mu ibheluko pamonga na malobhe gha akahoko, gheniya ghileta kutaungana tu, ghichenga jhe lihengo lya Chapanga mu kihobholelo. \v 5 Kilebhe kikolongwa cha malaghalikilo ghango ndi upalo, ghuubhoka mumwojho gwambone, na kuhaghuu na kuhenga ghambone na kihobholelo cha uchakaka. \v 6 Bhando bhange bhahobhalile na kughalambukila mu malongocho gha kimbebhebhe. \v 7 Bhipala kubhehe bhabhola bha malaghalikilo gha Mucha, nambo bhimanya ndeka chibhalongela amu malobhe ghabhe bhene amu mambu ghibhajhoha. \p \v 8 Tumanya Malaghalikilo ndi ghambone, anda ghatumike chiipalwa. \v 9 Helahela tumanya kubhehe Lilaghalikilo liletitwe kwa nhwalo gwa bhando bhambone jhe, nambo kwa bhando bhangakamuu lilaghalikilo, bhangajhokanikiya, bhangannyopa Chapanga na akahako, bhando bhibhakengama gha nnema na bhangamanya ndela jha Chapanga, bhando bhibhakoma akatate bhabhe na akama jhe bhabhe, amu bhibhakoma bhando. \v 10 Lilaghalikilo liletitwe kunhwalo gwa bhibhahenga ngongola, bhibhagholoka na akanalome ajhabhe, bhibhakwatuu bhando, akawange na bhilapii kuwange amu bhihenga kilebhe chochoha chikibhii kuyeto na mabholo gha uchakaka. \v 11 Mabholo gheniya ghabhii mu Lilobhe lya Mbone lya Chapanga jhuna ung'alicho ndi lilobhe limbekiwe nenga natangachila bhando. \s Kiya jha Chapanga kwa Pauli \p \v 12 Ninchenguu Yecho Kilichitu Bhambo gwito jwambekii makakala kunhwalo amwene ne ndi nihobholeka, ngahagwila nintumikila, \v 13 pamonga na makacho ninighita na kwang'aha na kwatende chanake bhando bhinnyeketeketii Kilichitu. Nambo Chapanga ngamonila kiya, kwa nhwalo nakibha nalindindilima kabhele nanga kihobholelo. \v 14 Nambo Bhambo gwito ngandweleya twe umbone, ngambekiya kihobholelo na upalo mu kulombana na Kilichitu Yecho. \v 15 Lilobhe lende ndi lya chakaka, kabhele ipalwa kujheketelwa na kuhobholeka: Kilichitu Yecho pahikita pannema pano kwakombola bhando bhubhabhii na uhakaho. Na nenga nnemwite hake kupeta bhando bhoha, \v 16 nambo Chapanga ngamonila kiya ndi kupala Kilichitu Yecho alangiye luhimbililo lwoha kwa nenga mii nauhakaho kupeta bhoha, ngita nnandanikiho kwa bhala bhoha bhibhapala kunnyeketela na kupokela ughome gwa machiko ghoha ghangapeta. \v 17 Kwa Munahota Nkolongwa jwangawegha machiko ghoha ghangapeta, jwangahwe, jwanga bhonekana, ndi Chapanga kanjika ndo, kwa jwenio kubhii na ichima na ung'alicho gwa machiko ghoha ghangapeta! Amina. \p \v 18 Timocheyo ndi mwanango mu kihobholelo, ninkamuwa nhwilo ghongo, kwa malobhe gha ulondole ghighalongilwa panane jhino makacho mughakengame ndi uhoto kuikengelela ngondo jha Malobhe gha Mbone, \v 19 na mukikamulile kihobholelo chino na kupala mme na mwojho gwa kuhaghula ghakuhenga ghighabhii ghambone. Bhando bhange bhakanite gheniya, yenio bhakihangabhine kihobholelo chabhe. \v 20 Pakate jhabhe ndi Humeneyo na Alekichanda, bheniya ninkamwii Limbembela, abhabhole kupala bhakoto kunnigha Chapanga. \c 2 \s Malaghilo gha kunnyopa Chapanga \p \v 1 Kilebhe chukutumbula, nipala munnyope Chapanga ilebhe imupala, munnyinamila Chapanga, na mwajhopele bhando bhange na munnombe Chapanga kwa nhwalo gwa bhando bhoha. \v 2 Munnyope Chapanga kwa nhwalo gwa akanahota na bhando bhibhalongocha, ndi kupala ntame maha na kwa uteeke, kuhenga ghambone na kunnyinamii Chapanga. \v 3 Ilebhe henge yambone na inhalalicha Chapanga, jwabhii Nkomboche gwito, \v 4 jwenio ndi apala bhando bhoha bhaghombolelwe na bhaumanye uchakaka. \v 5 Nhwalo abhii Chapanga jhumo, na hele abhii jhumo jwajhelanicha bhando na Chapanga, mundo jwenio ndi Kilichitu Yecho, \v 6 jwenio ngangipihita ngita litambiko kwakombola bhando bhoha. Ughombokeko ghongo ubhoneka mu kipinde chake. \v 7 Kwa nhwalo gwa gheniya nenga ndumitwe ngita natenga nabhola bhando bhangaumanya Chapanga, ndangache lilobhe lya kihobholelo na lya uchakaka. Nenga nilonge jhe uwange, nilonge uchakaka! \p \v 8 Bhahe, popoha pala pimikongana kunnyopa Chapanga, nipala bhando bhibhabhii na mwojho gwamaha, bheniya bhahoto kutondobheya mabhoko ghabhe na kunnyopa Chapanga changabhehe na lilaka hilu mitaho. \v 9 Kabhele nipala akakeghe bhawale ngobho yambone na ya ichima, na chi kwa kukilemba kwa kutibha mangongo gha chaabo na lulo, andajhe kwa maghanga ghighachuluchwa kwa bei ngolongwa, \v 10 nambo bhabha na itendwa yambone ngita chiipalwa kwa akakeghe bhibhannyopa Chapanga. \v 11 Akakeghe bhipalwa kutama nuu na kubhehe na utembekelo pibhakibhola Lilobhe lya Chapanga. \v 12 Ne nipala jhe mwikeghe ammola amu kuntamila munalome, mwikeghe ipalwa atama nuu. \v 13 Nhwalo Adamo jwakalongolile kupanganwa, kubhoke peniya ngapanginwa Hawa. \v 14 Hilu Adamo jhe jwakakolwiwe, nambo mwikeghe ndi jwakakolwiwe, ngalemwiya Lilaghalikilo lya Chapanga. \v 15 Nambo mwikeghe nalondwa papapa yana, anda bhajhendelii mu kihobholelo na upalo na unyahinyahi na matyangilo ghamaha. \c 3 \s Ilongoche ya bhando bhibhannyeketii Kilichitu \p \v 1 Lilobhe lende ndi lya chakaka, mundo jwapala kubhehe kilongoche jwa bhando bhibhannyeketii Kilichitu, jwenio ighana lihengo lyambone. \v 2 Bhahe, kilongoche jwa bhando bhibhannyeketii Kilichitu ipalwa abhaha mundo jwantemulana ilebhe maha, abhaha na mwikeghe jhumo, abhaha jwahoto kukilongocha jwenio, jwajhokanikilwa na jwapokela akaghene na jwahoto kubhola bhando, \v 3 jwangalobhela amu mundo jwanga kijhonga, nambo abhaha jwanuu jwapala uteeke na angabhehe jhe jwakupala mbijha. \v 4 Ipalwa abhaha mundo jwahoto kwalongocha bhando bha pakajhake maha na aitenda yana yake bhannyokonikiye changa nkanila na ichima hake. \v 5 Anda mundo ahoto jhe kwalongocha maha bhando bha ukajhake, nahotolabho kulilongocha likunde lya bhando lilinnyeketii Chapanga? \v 6 Apalwa jhe kubhehe mundo jwannyeketii Kilichitu ngohengohe nhwalo ahoto kuloka na kuhadabulwa ngita chahadabwilwe Limbembela. \v 7 Ipalwa atopele na bhando bhangannyekete Kilichitu, kupala akoto kugwelele muhone na muntambo gwa Limbembela. \s Bhakujhangatii mu lilongo lya bhando bhibhannyeketii Kilichitu \p \v 8 Bhakujhangatii mu lilongo lya bhando lilinnyeketii Kilichitu bhipalwa bhabha na matyangilo ghamaha, bhina kuhobholeka na bhilonge chakaka chika bhangalobhela divaye na bhando bhakupala tama jha kupata mbijha kwa ndela mboho, \v 9 bhipalwa bhaikamula kwa mwojho gwambone uchakaka mu kihobholelo chikiyekulilwe na Chapanga. \v 10 Hote bhipalwa bhajhigwa, anda bhabhonikine bhakwetii jhe malemo, mwaleke bhabha akajhangatii mu lilongo lya bhando bhibhannyeketii Kilichitu. \v 11 Akahana bhabhe hele bhipalwa bhabha na matyangilo ghambone, bhangang'wenya bhando, bhitemulana ilebhe maha na bhihobholeka mu ilebhe yoha. \v 12 Jwantangatii lihengo pa bhando bhibhannyeketii Kilichitu ipalwa abhaha na mwikeghe jhumo tu, na jwahoto kulongocha maha yana mundo na nyumba jhake. \v 13 Nhwalo jwantangatii lihengo maha ahoto kujhema nganganga nu kulonge lilobhe lya kihobholelo chake mu kulombana na Kilichitu Yecho changajhoghopa. \s Lupwepo lukolongwa \p \v 14 Ninyandikii ghanga na kongo nihobholela kuhika kajhino machiko ghighabhandakii. \v 15 Nambo anda njeliwe, bhahe, ghanga ghininnyandikile itenda umanye chimitama munyumba jha Chapanga, ndi lilongo lya bhando lilinnyeketiii Kilichitu ndi Chapanga jwabhii ghome, jwenio ndi luheke na nchinge gwa uchakaka. \v 16 Ubhii jhe bwoghohe gwogwoha panane jha uyekulilo gwa lupwepo lwa kihobholelo chito chikibhii kikolongwa, \q Akabhonakine muyegha jha kimundo, \q jwakalangiwe na Uhuke gwa Chapanga kubhehe ndi jwambone, \q akabhonikine na ntumiche jwa kunane kwa Chapanga. \q Akatangichwe mu ilambo yoha, \q akahobholike munnema gwoha, \q akatolitwe kujhenda kunane kwa Chapanga mu ung'alicho. \c 4 \s Akabhola bhuuwange \p \v 1 Uhuke gwa Chapanga ulonge hotuhotu kubhehe machiko ghighahika bhando bhange nabhakikana kihobholelo, ndi nabhaijhokaniya ihuke yuuwange na kukengama mabholo gha michuka. \v 2 Mabholo ngita gheniya ghitangachwa na bhando bhuuwange na bhibhakitenda bhaumbone, bheniya miojho jhabhe jhukumanya lyambone amu lyanganandela ihwile ngita ijhochwite na choma cha mwotu. \v 3 Bhando bheniya ubhola kulemwa kutolela na kulyegha yakulya henge. Nambo Chapanga jwapangina yenie, kupala bhibhannyeketii bhalyeghe na bhaumanye uchakaka kwa kuchengula. \v 4 Kila kilebhe chapangine Chapanga ndi chambone, kibhii jhe chikipalwa kukanwa, nambo yoha ipokelelwa kukunchenguu Chapanga, \v 5 nhwalo lilobhe lya Chapanga na kunnyopa kukiteii kilebhe chenie kijheketelwe na Chapanga. \s Ntumiche jwambone jwa Kilichitu Yecho \p \v 6 Anda mapekii akalongo bhoha malaghilo ghanga, namma matumiche bhambone bha Kilichitu Yecho, anda ntei gheniya mabhene nanyendelela kukola mu uhuke kwa malobhe gha kihobholelo na mabholo ghamaha ghamikengama. \v 7 Nambo mwe ma Timacheyo mikane omo yangabhehe ya Chapanga na yanganandela. Mukibhole kutama kukunhalalicha Chapanga. \v 8 Kutenda machoechi gha yegha ndi kilebhe chamaha, nambo kutama kukuhalalicha Chapanga ndi kwambone hake mu kila kilebhe, nhwalo atulaghii ughome nhyono na ughome ghupakuhika. \v 9 Lilobhe lende ndi lya chakaka hake na lipalwa lijheketelwa. \v 10 Twenga tung'ahika nu kuhenga mahengo kwa kughagha hake, nhwalo hote tummekii lihobholelo lito Chapanga jwabhii ghome kabhele ndi Nkomboche jwa bhando bhoha, achwa bhala bhibhannyeketii Kilichitu. \p \v 11 Yene mapele malaghilo ghanga na mabhole ilebhe henge. \v 12 Mangajheketela mundo jhojhoha ampucha nhwalo mwe makangombo, nambo nkachane mme nnandanikiho kwa bhibhannyeketii Kilichitu, mu kulonge kwino na kutama kwino na mu kihobholelo chino na mupalo gwino na unyahinyahi gwino. \v 13 Machiko ghoha nnyendelela kwachome bhando pakongoloho Majhandiko gha Chapanga, kutangacha na kubhola ade pambakuhika. \v 14 Mangaleka jhe kutumii kitoi chimpokii kuhumii kwa Uhuke gwa Chapanga chikibhii nkate jhino, chimpatite kupete kwa malobhe gha akalondole bha Chapanga na kummeke mabhoko na kwajhopela bhando bhibhannyeketii Kilichitu. \v 15 Nhwachila hake gheniya ghoha na mughahengela lihengo na kila mundo alola chimujhendele kukola. \v 16 Mukilolekeya mwe mabhene na mabholo ghino. Nnyendelela kughakamuu gheniya, nhwalo anda ntei yenie, namikighombola mabhene na bhando bhibhannyokanikiya. \c 5 \s Chiipalwa kutama na jwanyeketii Kilichitu nnyino \p \v 1 Mangampwatalila jhe mundo munahota, nambo nnonge nako ngita tate gwino. Nnongele na achikangombo ngita akalongo bhino. \v 2 Nnonge nabho akakeghe imbujha ngita akamajhe bhino, na achikabhale nnonge nabho ngita akalombo bhino, kwa unyahinyahi gwoha. \p \v 3 Mwatendele ghambone akakeghe akanawela bhangabhehe na kilebhe chochoha. \v 4 Nambo nawela jwabhii na yana amu ichokolo, yenie ipalwa bhakibhole ghapala Chapanga, bhabhujhichila mabhoko akatate bhabhe na akahoko bhabhe, nhwalo ghihalalicha Chapanga. \v 5 Mwikeghe jwabhii nawela chakaka, jwanga mundo jwa kuntangatila, jwenio abhii na lihobholelo na ajhendelele kunnyopa Chapanga atangatila kilo na muhe. \v 6 Nambo nawela jwaitama kwa kukipala jwenio, jwenio abhii ngita awile, pamo nukubhehe ghome. \v 7 Malobholela bhando bhahenga ilebhe yenie, kupala angapitii jhe jwa kukokoleka. \v 8 Anda mundo abhahwachii jhe akalongo mundo, mundo jwenio akwete jhe kihobholelo, ndi jwanganandela kuliku jwanganyeketela Chapanga. \p \v 9 Manganyandika jhe mu kitabo cha akanawela mundo jwangahikicha yaka makome chita. Kabhele abha jwatolilwe mala jhimo, \v 10 na abhaha jwamanyikine kwa mahengo ghake ghambone, jwalelite yana yake maha na jwabhalendekeya akaghene kajhake na jwabhapoke bhando bha Chapanga na kwagholola magholo na kwatangatii bhando bhina malola, jwakitabhite kukamuu ghambone. \p \v 11 Nambo mangajhandika jhe akanawela ichikana, nhwalo tama yabhe yakupalwa kutolelwa nakanalome kabhele bhihoto kughalambuka na bhihoto kunneka Kilichitu. \v 12 Yene nabhabha na malemo gha kuleka lilaghano lyabhe lya makacho. \v 13 Akanawela ngita bheniya bhikibhola utotoho na kutumbuu kubheghe nyumba na nyumba, chi utotoho tu, nambo helahela kibhoho bhitumbukana kwang'enya ajhabhe na kujhingilii mu ilebhe ya bhando bhange na kone bhilonge malobhe ghangapalwa kulonge. \v 14 Kwa yenio, nipala akanawela ichikana bhatolelwe na akanalome, bhapapa yana na kuilejhemelela nyumba yabhe kupala likoko lino likoto kulonge lijhambu lyanganandela pakate jhino. \v 15 Nhwalo akanawela bhange bhahobhalile na kunkengama Limbembela. \v 16 Nambo anda majhe jwanyeketii Kilichitu akwete akanawela munyumba jhake, bheniya bhipalwa kujhemelelwa na chi kulileke nhwigho lilongo lya bhando lilinnyeketii Kilichitu. Kupala lilongo lilinnyeketii kilichitu lihoto kwajhemelela akanawela bhala bhangabhehe na kilebhe chochoha. \p \v 17 Ilongoche bhibhajhemele maha bhando bhibhannyeketii Kilichitu, ipalwa atopelwa hake, achwa jhola jwahenga lihengo lya kwatangachii bhando na kwabhola. \v 18 Nhwalo Majhandiko gha Chapanga ghilonge, “Nkotoka kuntabha nnomo ng'ombi piihuna,” na helahela, “Nhenga lihengo ipalwa alepwa malepo ghake.” \v 19 Mangapoke jhe litakalilo lya munahota lyangajheketelwa na lilongo lya bhando lilinnyeketii Kilichitu, bhando bhabhele amu bhatato. \v 20 Bhibhajhendelela kuhenga uhakaho makanikiya pa bhando twe, kupala bhando bhange bhajhoghope. \p \v 21 Ninaghalikiya palonge jha Chapanga na palonge jha Kilichitu Yecho na palonge jha akatumiche bha kunane kwa Chapanga, nkoto kuhadabuu kajhombe, mangahaghuu jhe mundo kwa kunnolekeya kumiho. \v 22 Mangajhomboteka kummeke mundo mabhoko. Nkoto kujhingii mu uhakaho gwa bhando bhange. Ntame kwa kunhalalicha Chapanga. \p \v 23 Manganywe mache tu, nambo unywa divaye kandina kunhwalo jha lutumbo lwino, nhwalo gwa ulwalo ghumilwalwa pipipi. \p \v 24 Uhakaho gwa bhando bhange ubhonekana hotuhotu, kabula jha kuhadabulwa, bhando bhange uhakaho gwabhe ubhonekana jhe ade pibhahadabulwa. \v 25 Helahela lihengo lyamaha libhonekana hotuhotu na ata yangabhonekana hotuhotu hele ihoto jhe kukihiya. \c 6 \p \v 1 Akabhanda bhoha bhipalwa bhanyenyekeya akanahota bhabhe kupala bhando bhakoto kuliligha liina lya Chapanga andajhe mabholo ghito. \v 2 Akabhanda bhubhabhii na akanahota bhabhe bhibhannyeketii Kilichitu bhangapucha jhe akanahota kwa bhikihwananicha ngita Akakilichitu ajhabhe. Nambo bhipalwa kwatumikila maha hake, nhwalo bheniya ndi bhibhajhambulila kuhumii mu mahengo ghabhe, bhibhahobholeka na bhibhapalwa. \s Mabholo ghu uwange na kichumo cha chakaka \p Yene ndi chimipalwa kubhola na kutangacha malobhe gheniya. \v 3 Mundo jhojhoha jwaibhola mabholo ghange ghangabhehe tela na ghanga, na jwangajheketela malobhe gha chakaka gha Bhambo gwito Kilichitu Yecho na kutama ngita chapala Chapanga, \v 4 jwenio atwelii kulokaloka na amanyite jhe kilebhe chochoha. Mundo jwatamii mitaho na bhulo na maligho na kuwachii bhange ghanganandela, \v 5 na mitaho jhangajhomoka kubhoka kwa bhando bheniya, malango ghabhe ghapoghanike kabhele nabhangabhehe na uchakaka. Bheniya bhihwacha kuntumikii Chapanga ndi ndela jha kichumo cha mbijha. \p \v 6 Chakaka kuntumikii Chapanga kummeka mundo abhaha na ulohe, anda ajheketela kubhehe atochike na ilebhe yakwete. \v 7 Nhwalo tuhikite jhe na kilebhe chochoha pannema pano, hilu natughegha jhe kilebhe chochoha pitujhenda kunane kwa Chapanga. \v 8 Yene, anda tukwete yakulyegha na ngobho, tupalwa tutocheka kubhehe na yenio. \v 9 Nambo bhala bhibhapala kubhehe na kichumo ugwegha mu majhighinikilo na mu ntambo gwa tama jha ghanganandela na undindilima ghighapeleka kuhobha na mukomelekelo. \v 10 Nhwalo kupala hake mbijha ndi kihokola cha mahakaho ghoha. Bhando bhange bhiloke hake kubhehe na mbijha ade kukileka kutale kihobholelo na kuijhocha miojho jhabhe kwa lipyanda kwa ghala ghibhahenga. \s Malaghilo kwa Timocheyo \p \v 11 Nambo mwe, mamundo bha Chapanga, muibhambale ilebhe yenio. Nnyendelela kubhehe mambone palonge jha Chapanga, mtembekeya Chapanga na mme na kihobholelo na mme na upalo na mma naluhimba na mma manuu. \v 12 Nkachane hake kukomana ngondo jha kihobholelo nkamule ughome gwa machiko ghoha ghangapeta, ughome Chapanga gwankemii pala pinnyeketila mabhene kihobholelo chino palonge jha bhando twe bhubhakibha peniya. \v 13 Ninaghila palonge jha Chapanga jwaipe ughome ilebhe yoha, na palonge jha Kilichitu Yecho jwalongela uchakaka palonge jha Pontiyo Pilatu, \v 14 nkamule malaghilo ghanga na kughajhokanikiya na ntende kwa kuhobholeka ade lichiko lela lyapala kubhujha Bhambo gwito Kilichitu Yecho. \v 15 Kubhujha kwakwe Yecho nakuhengeka machiko ghighabhekwitwe na Chapanga, jwenio jwabhii na ung'alicho, jwabhii Kilongoche kanjika ndo, jwenio jwabhii Bhambo jwa Mabhambo. \v 16 Jwenie kajhika ndo itama machiko ghoha ghangapeta mu lumule lwangahoto kuheghelelwa na mundo. Abhii jhe mundo jwahotwii kummona hilu jwahoto kummona. Ndi jhuna ichima na uhotolo gwa machiko ghoha ghangapeta! Amina. \p \v 17 Mwalaghalikiye bhando bhubhabhii na kichumo munnema ghongo gwa ngohe, bhangalokajhe, peniya bhaleke kuhobholela ulohe gwangahoto kuyobholeka nambo bhanhobholela Chapanga jwatupeke ghoha kwa umbone tuhangane. \v 18 Mwalaghalikiye bhahenga ghambone, bhabha na itendwa twe yambone na bhabha bhaumbone na bhajheketela kwabhaghulii bhange ilebhe yabhe. \v 19 Kwa kuhenga gheniya nakwatangatila kubhehe na kihukilo kibhehe nchinge nganganga na peniya nabhahotola kukipatii ughome gwa chakaka. \p \v 20 Mwe ma Timocheyo, mughalolekeye ghala ghoha ghinkamwiwe. Mmambale malobhe ghangabhehe gha Chapanga na ghanganandela na mataungano gha undindilima ndi bhando kwa uwange bhighakema, “Kumanya.” \v 21 Nhwalo bhando bhange bhakilokita kumanya kwenio kupeta undindilima, na kuhenga yenio bhahobhii kihobholelo. \p Umbone gwa Chapanga utama na mangota!